អន្តរជាតិ - La Reine Media

សម្លាប់ភរិយាព្រោះតែចង់បានប្រាក់ធានារ៉ាប់រងអាយុជីវិត

(សហរដ្ឋអាម៉េរិក)- Christopher Collins ត្រូវបានចោទប្រកាន់ថា បានសម្លាប់ភរិយា ពីរថ្ងៃបន្ទាប់ពីប្ដីប្រពន្ធនេះបានចុះហត្ថលេខាលើកិច្ចសន្យាធានារ៉ាប់រងអាយុជីវិតតម្លៃ ២៥០,០០០ ដុល្លារ។

ប៉ូលិសតំបន់ Harris នៃរដ្ឋ Texas កាលពីថ្ងៃទី 18 វិច្ឆិកា ទទួលបានការហៅទូរស័ព្ទពី Christopher Collins អាយុ ៤១ ឆ្នាំ ស្នើឱ្យសមត្ថកិច្ចមកកាន់ផ្ទះរបស់ខ្លួន ដើម្បីពិនិត្យស្ថានភាពរបស់ភរិយាឈ្មោះ Yuan Hua Liang អាយុ ៤៦ ឆ្នាំ។

«Collins និយាយថា គាត់បានបាត់ទំនាក់ទំនងជាមួយភរិយា បន្ទាប់ពីនាងបានផ្ញើសារប្រាប់ថា មានបុរសគួរឱ្យសង្ស័យម្នាក់ បង្ហាញខ្លួននៅក្បែរផ្ទះ។ នៅពេលបានចូលដល់ផ្ទះរបស់ពួកគេនៅក្បែរផ្លូវ Clayton Bluff ក្នុងទីក្រុង Cypress ក្រុមប៉ូលិសបានរកឃើញថា ស្ត្រីជាភរិយា បានស្លាប់ទៅហើយ» ប៉ូលិសក្នុងតំបន់ Harris ប្រាប់ដូច្នេះ។ Collins និយាយថា គាត់បានទៅហាត់ប្រាណ នៅពេលប្រពន្ធស្ថិតនៅក្នុងផ្ទះ។

សមត្ថកិច្ចបញ្ជាក់ថា ពុំមានសញ្ញាណាមួយបង្ហាញថា មានករណីចោរចូលផ្ទះ។ Collins បានប្រាប់ប៉ូលិសថា ប្ដីប្រពន្ធពួកគេ មិនបានទិញធានារ៉ាប់រងអាយុជីវិតទេ ប៉ុន្តែ នៅពេលឆែកឆេរក្នុងផ្ទះ ប៉ូលិសបានរកឃើញកិច្ចសន្យាធានារ៉ាប់រងអាយុជីវិតតម្លៃ ២៥០,០០០ ដុល្លារ ដែលត្រូវបានប្ដីប្រពន្ធនេះចុះហត្ថលេខាកាលពីថ្ងៃទី ១៦ វិច្ឆិកា។

សមត្ថកិច្ចស្រុក Harris ក្រោយមកក៏បានធ្វើកោសល្យវិច្ច័យលើសាកសព និងបានបញ្ជាក់ថា នាង Liang បានស្លាប់ដោយសារគ្រាប់កាំភ្លើង ហើយថា នេះគឺជាករណីមនុស្សឃាត។ ក្រុមមន្ត្រីសន្និដ្ឋានថា នាង Liang ត្រូវគ្រាប់កាំភ្លើងប្រភេទ ២២មម ឬ ២៥មម ហើយប្រអប់គ្រាប់កាំភ្លើង ២២មម ត្រូវបានរកឃើញនៅលើខ្លួន Collins។

https://www.youtube.com/watch?v=w6PMvFY79Z0&t=5s

មកដល់ថ្ងៃទី ២៤ វិច្ឆិកា Collins ត្រូវបានចោទប្រកាន់ពីបទមនុស្សឃាត ហើយត្រូវបានឃុំខ្លួនក្នុងពន្ធនាគារស្រុក Harris និងត្រូវបង់ប្រាក់ធានាចំនួន ១៥០,០០០ ដុល្លារ។ តាមគម្រោង ជនដៃដល់នេះនឹងត្រូវចូលសវនាការនៅថ្ងៃទី ២ ធ្នូខាងមុខ៕

November 29, 2021

កូវីដ-១៩ ប្រភេទ អូមីក្រុន(Omicron) ឆ្លងរាលដាលដល់ទ្វីប អាម៉េរិកខាងជើង

ក្រុមមន្ត្រីរបស់ប្រទេស កាណាដា បានប្រកាសថា វ៉ារ្យ៉ង់អូមីក្រុន (Omicron) បានឆ្លងរាលដាលដល់ អាម៉េរិកខាងជើង ដោយមានពីរករណីដំបូងត្រូវបានរកឃើញនៅខេត្ត អូនតារីយ៉ូ (Ontario)។

ក្រុមមន្ត្រីសុខាភិបាលជាន់ខ្ពស់នៅខេត្ត អូនតារីយ៉ូ គឺ Christine Elliott និង Kieran Moore បានឱ្យដឹងកាលពីថ្ងៃទី 28 វិច្ឆិកា ថា អ្នកជំងឺទាំងពីរនាក់ដែលបានឆ្លងវីរុស កូវីដ-១៩ ប្រភេទ អូមីក្រុន ថ្មីៗនេះបានត្រលប់មកពីប្រទេស នីហ្សេរីយ៉ា មុនពេលរកឃើញថា វិជ្ជមាននឹង កូវីដ-១។ សមត្ថកិច្ចកំពុងស្រាវជ្រាវអ្នកដែលបានប៉ះពាល់ផ្ទាល់ និងប្រយោលដើម្បីស្វែងរកអ្នកជំងឺដែលពាក់ព័ន្ធ។

នៅ សហរដ្ឋអាម៉េរិក វេជ្ជបណ្ឌិត Anthony Fauci ប្រធានវិទ្យាស្ថានជាតិគ្រប់គ្រងជំងឺឆ្លង កាលពីថ្ងៃទី 27 វិច្ឆិកា ឱ្យដឹងថា វ៉ារ្យ៉ង់ថ្មីប្រហែលជាបានឆ្លងទៅដល់ សហរដ្ឋអាម៉េរិក ហើយថា អូមីក្រុន មានសមត្ថភាពឆ្លងរាលដាលខ្ពស់ អាចគេចពីប្រព័ន្ធការពាររាងកាយ ក៏ដូចជាផ្នែកមួយនៃប្រព័ន្ធការពាររាងកាយដែលបង្កើតឡើងដោយវ៉ាក់សាំង។

អង្គការសុខភាពពិភពលោក (WHO) បានចាត់ អូមីក្រុន ដែលត្រូវបានរកឃើញដំបូងនៅទ្វីប អាហ្វ្រិកខាងត្បូង ចូលក្នុងក្រុម វ៉ារ្យ៉ង់ ដែលគួរឱ្យព្រួយបារម្ភ។ វ៉ារ្យ៉ង់ថ្មីនេះបានបង្ហាញខ្លួននៅក្នុងបណ្ដាប្រទេសក្នុងទ្វីប អឺរ៉ុប និងប្រទេសមួយចំនួនទៀតនៅក្នុងពិភពលោក៕

November 29, 2021

(វីដេអូ)-អ្នកវិទ្យាសាស្ត្រ រកឃើញភពក្រៅប្រព័ន្ធព្រះអាទិត្យ មានសម្បកស្រួយដូចសម្បកស៊ុត

ការគណនាតាមប្រព័ន្ធកុំព្យូទ័រ (Computer simulation) បានបង្ហាញថា បណ្ដាភពដែលនៅក្មេង ហើយផ្ទៃខាងលើមានសីតុណ្ហភាពខ្ពស់គឺ មានបណ្ឌលថ្ម (សម្បកខាងក្រៅ) យ៉ាងស្ដើង និងស្រួយ មិនអាចទ្រទ្រង់ជីវិត។

បណ្ដាភពក្រៅប្រព័ន្ធព្រះអាទិត្យពិតជាមានភាពខុសប្លែកខ្លាំងណាស់ ក្នុងនោះ មានមួយចំនួនក្ដៅខ្លាំង និងហួតហែង ខណៈមួយចំនួនទៀតមានភ្លៀងត្បូងពេជ្រពិតប្រាកដ។

ដោយការគណនានៅលើប្រព័ន្ធកុំព្យូទ័រ ក្រុមអ្នកវិទ្យាសាស្ត្រមកពីសាកលវិទ្យាល័យ ការ៉ូលីណាខាងជើង (North Carolina) និងសាកលវិទ្យាល័យវ៉ាស៊ីងតោន បានឱ្យដឹងថា ពួកគេបានរកឃើញប្រភេទនៃភពថ្មីមួយដែលមានផ្ទៃខាងលើស្រួយដូចសម្បកស៊ុត។

យោងតាមការស្រាវជ្រាវខាងលើ ប្រភេទភពនេះមានមណ្ឌលថ្ម (Lithosphere) យ៉ាងស្ដើង និងស្រួយ។ សណ្ដានដីរបស់ពួកវាក៏រាបស្មើដូចទៅនឹងតំបន់វាលរាបនៅលើភពសុក្រ។

ដូច្នេះតើកត្តាអ្វីខ្លះដែលបានបង្កើតពិភពមួយដែលមានផ្ទៃដូចសម្បកស៊ុត?

ក្រុមអ្នកវិទ្យាសាស្ត្រនិយាយថា សីតុណ្ហភាពនៅលើផ្ទៃភព និងអាយុកាលរបស់ភពគឺជាកត្តាចម្បងដែលនាំឱ្យមាន «ភពសម្បកស៊ុត»។

ភពដែលក្ដៅតែងតែមានសម្បកខាងក្រៅស្រួយ ហើយបើវាកាន់តែក្មេង នោះមណ្ឌលថ្មនឹងកាន់តែស្ដើង។ ភពដែលមានលក្ខណៈដូចសម្បកស៊ុត អាចមិនមានបាតុភូត ផ្លាកតិចតូនិច (plate tectonics) ដូចនៅលើផែនដី ព្រោះតែកម្រិតនៃភាពស្រួយរបស់វាមិនអនុញ្ញាតឱ្យមណ្ឌលថ្មប្រែទៅជាកោង ហើយជាងនេះទៀត វាមានមណ្ឌលថ្មតែមួយស្រទាប់ប៉ុណ្ណោះ។ ពុំមាន ផ្លាកទិចតូនិច គឺមានន័យថា ភពនោះពិបាកក្នុងការទ្រទ្រង់ជីវិត។

របកគំហើញនេះនឹងជួយឱ្យក្រុមអ្នកវិទ្យាសាស្ត្រ កាត់បន្ថយពេលវេលាបានច្រើននៅក្នុងបេសកកម្មរុករកពិភពថ្មីក្នុងអនាគត៕

November 27, 2021

ចូ បៃឌិន អំពាវនាវឱ្យបោះបង់ចោលកម្មសិទ្ធិបញ្ហាវ៉ាក់សាំង ដើម្បីទប់ទល់នឹងវីរុសបំប្លែងថ្មី Omicron

លោក បៃដិន ជំរុញឱ្យបណ្ដាប្រទេសបោះបង់ការការពារកម្មសិទ្ធិបញ្ញាចំពោះវ៉ាក់សាំង ដើម្បីបង្កើនល្បឿននៃការចាក់វ៉ាក់សាំងនៅទូទាំងសកលលោក ក្នុងបំណងទប់ស្កាត់ជំងឺកូវីដ-១៩ ដែលបង្កឡើងដោយវ៉ារ្យ៉ង់ Omicron។

កាលពីថ្ងៃទី 26 វិច្ឆិកា ប្រធានាធបិតីអាម៉េរិក លោក ចូ បៃដិន យល់ថា ព័ត៌មានស្ដីពីវីរុសបំប្លែងខ្លួនថ្មី Omicron ជាថ្មីម្ដងទៀត «បានបង្ហាញអំពីសារសំខាន់នៃការបោះបង់កម្មសិទ្ធិបញ្ហាវ៉ាក់សាំងដោយឆាប់រហ័ស» ដើម្បីអនុញ្ញាតឱ្យផលិតវ៉ាក់សាំងទូទាំងពិភពលោក។

លោក បៃដិន ក៏បានជំរុញឱ្យបណ្ដាប្រទេសអ្នកមាន បង្កើនជំនួយជាវ៉ាក់សាំងដល់បណ្ដាប្រទេសក្រីក្រ នៅក្នុងសង្គ្រាមប្រឆាំងជំងឺរាតត្បាត។ លោកបញ្ជាក់ថា «សហរដ្ឋអាម៉េរិក បានផ្ដល់ជំនួយជាវ៉ាក់សាំងច្រើនជាងប្រទេសនានាបូកចូលគ្នាទៅទៀត។ ហើយដល់ពេលដែលប្រទេសផ្សេងៗ ត្រូវតាមឱ្យទាន់ល្បឿន និងភាពជាប្រទេសចិត្តទូលាយដូច សហរដ្ឋអាម៉េរិក»។

ការអំពាវនាវរបស់ប្រធានាធិបតីអាម៉េរិក នេះ ត្រូវបានធ្វើឡើងបន្ទាប់ពីបានរឹតត្បិតការធ្វើដំណើរទៅមកជាមួយនឹងប្រទេសចំនួន ៨ នៅភាពខាងត្បូងនៃ ទ្វីបអាហ្វ្រិក ដើម្បីទប់ស្កាត់វ៉ារ្យ៉ង់ Omicron ដែលទើបត្រូវបានរកឃើញ និងទើបត្រូវបានអង្គការសុខភាពពិភពលោក (WHO) វាយតម្លៃថា មានសមត្ថភាពឆ្លងរាលដាលខ្លាំងជាង Delta។

ទិន្នន័យរបស់ក្រសួងការបរទេសអាម៉េរិក បង្ហាញថា ប្រទេសនេះបានសន្យាផ្ដល់ជំនួយជាវ៉ាក់សាំងបង្ការជំងឺកូវីដ-១៩ យ៉ាងតិច ១.១ ពាន់លានដូស ក្នុងនោះ ២៣៦.១ លានដូសត្រូវបានប្រគល់រួចរាល់ និង ២៧.៨ លានដូស កំពុងត្រូវបានដឹកជញ្ជូនទៅកាន់បណ្ដាប្រទេសជាគោលដៅ។ ៥០% នៃវ៉ាក់សាំងរបស់ សហរដ្ឋអាម៉េរិក ត្រូវបានផ្ដល់ជំនួយតាមរយៈយន្តការ Covax របស់ WHO ចំណែកក្រៅពីនេះត្រូវបានផ្ដល់ជំនួយលក្ខណៈទ្វេភាគី។

វ៉ារ្យ៉ង់ B.1.1.529 ត្រូវបានរកឃើញជាលើកដំបូងនៅប្រទេស Botswana កាលពីថ្ងៃទី 11 វិច្ឆិកា ហើយក្រោយមកត្រូវបានអង្គការសុខភាពពិភពលោក (WHO) ដាក់ឈ្មោះឱ្យថា Omicron និងត្រូវបានដាក់បញ្ចូលទៅក្នុងបញ្ជីនៃវីរុសដែលគួរឱ្យព្រួយបារម្ភ កម្រិតធ្ងន់ធ្ងរបំផុត៕

November 27, 2021

BioNTech ប្រកាសថា អាចកែតម្រូវវ៉ាក់សាំងប្រឆាំងកូវីដ-១៩ ក្នុងរយៈពេល ៦ សប្ដាហ៍ ក្នុងគ្រាដែលវ៉ារ្យ៉ង់ Omicron កំពុងបង្កការព្រួយបារម្ភ

ក្រុមហ៊ុន BioNTech ដែលជាដៃគូសហការអភិវឌ្ឍវ៉ាក់សាំងបង្ការជំងឺកូវីដ-១៩ ជាមួយនឹង Pfizer ឱ្យដឹងថា ពួកគេអាចធ្វើបច្ចុប្បន្នភាពវ៉ាក់សាំងដោយប្រើពេលតែ ៦ សប្ដាហ៍ បើសិនជាវីរុសបំប្លែងខ្លួនថ្មី Omicron អាចគេផុតពីអង្គបដិប្រាណ។

«Pfizer និង BioNTech បានធ្វើសកម្មភាពតាំងពីច្រើនខែមុនដើម្បីអាចកែសម្រួលវ៉ាក់សាំងប្រភេទ mRNA ក្នុងរយៈពេល ៦ ខែ និងដឹកជញ្ជូនឡូត៍ទំនិញដំបូងក្នុងរយៈពេល ១០០ ថ្ងៃ បើសិនមានវត្តមានវ៉ារ្យ៉ង់ដែលមានសមត្ថភាពគេចផុតពីប្រព័ន្ធការពាររាងកាយ» ក្រុមហ៊ុនរបស់ អាល្លឺម៉ង់ BioNTech បានប្រកាសដូច្នេះកាលពីថ្ងៃទី 26 វិច្ឆិកា។

BioNTech បន្ថែមថា ពួកគេកំពុងពិសោធមើលថា តើវ៉ាក់សាំងបង្ការកូវីដ-១៩ ដែលក្រុមហ៊ុននេះសហការអភិវឌ្ឍជាមួយក្រុមហ៊ុន អាម៉េរិក Pfizer មានប្រសិទ្ធភាពចំពោះវីរុសបំប្លែងថ្មីប្រភេទ Omicron ឬទេ។ លទ្ធផលចុងក្រោយនៃការស្រាវជ្រាវ តាមគម្រោងនឹងត្រូវបានប្រកាសឱ្យដឹងក្នុងរង្វង់ ២ សប្ដាហ៍ទៀត។

វ៉ារ្យ៉ង់ B.1.1.529 ត្រូវបានរកឃើញជាលើកដំបូងនៅប្រទេស Botswana កាលពីថ្ងៃទី 11 វិច្ឆិកា ហើយក្រោយមកត្រូវបានអង្គការសុខភាពពិភពលោក (WHO) ដាក់ឈ្មោះឱ្យថា Omicron និងត្រូវបានដាក់បញ្ចូលទៅក្នុងបញ្ជីនៃវីរុសដែលគួរឱ្យព្រួយបារម្ភ កម្រិតធ្ងន់ធ្ងរបំផុត។

ពលរដ្ឋនៅតំបន់ពាណិជ្ជកម្ម Johannesburg ក្នុងប្រទេសអាហ្វ្រិកខាងត្បូង កាលពីថ្ងៃទី 26 វិច្ចិកា

ក្រុមហ៊ុន Moderna របស់ អាម៉េរិក ក៏បានឱ្យដឹងថា ពួកគេកំពុងពិសោធបេក្ខភាពវ៉ាក់សាំងជំរុញចំនួន ៣ ក្នុងគោលដៅអភិវឌ្ឍវ៉ាក់សាំងទុកចាក់ដូសបន្ថែមសម្រាប់តែវ៉ារ្យ៉ង់ Omicron។

ចំណែកក្រុមហ៊ុនរបស់ អាម៉េរិក មួយទៀតគឺ Johnson & Johnson ក៏បានបញ្ជាក់ថា កំពុងពិសោធវ៉ាក់សាំងដែលមានប្រសិទ្ធភាពរបស់ពួកគេ ចំពោះវ៉ារ្យ៉ង់ថ្មី ដើម្បីវាយតម្លៃថា ត្រូវការធ្វើបច្ចុប្បន្នភាពវ៉ាក់សាំងដែរ ឬយ៉ាងណា។

AstraZeneca ដែលជាក្រុមហ៊ុនរបស់ អង់គ្លេស ឯណោះវិញ ក៏កំពុងធ្វើការស្រាវជ្រាវនៅ Botswana និង Eswatini ជាប្រទេសនៅតំបន់ភាគខាងត្បូងនៃ ទ្វីបអាហ្វ្រិក ដែលបានរកឃើញ Omicron ក្នុងបំណងប្រមូលទិន្នន័យជាក់ស្ដែងស្ដីពីប្រសិទ្ធភាពរបស់វ៉ាក់សាំង AstraZeneca ចំពោះវីរុសកូវីដ-១៩ ប្រភេទថ្មី៕

November 27, 2021

អង្គការសុខភាពពិភពលោក កោះប្រជុំបន្ទាន់ ដោយសារតែវ៉ារ្យ៉ង់ថ្មីនៃវីរុសកូវីដ-១៩

អង្គការសុខភាពពិភពលោក (WHO) លើកគម្រោងប្រជុំបន្ទាន់ និងតាមដានយ៉ាងយកចិត្តទុកដាក់លើវីរុសបំប្លែងខ្លួនថ្មី B.1.1.529 របស់ កូវីដ-១៩ បើទោះជាត្រូវបានរកឃើញតែប៉ុន្មានករណីនៅ ទ្វីបអាហ្វ្រិក។

«យើងមិនទាន់ដឹងច្រើនអំពីវ៉ារ្យ៉ង់នេះ។ អ្វីដែលយើងបានដឹង នោះគឺវាមានការប្រែប្រួលច្រើនទម្រង់។ ការព្រួយបារម្ភគឺថា នៅពេលមានការទម្រង់ច្រើន វាអាចមានឥទ្ធិពលដល់ដំណើរការរបស់វីរុស» វេជ្ជបណ្ឌិត Maria Van Kerkhove ប្រធានក្រុមបច្ចេកទេសប្រឆាំង កូវីដ-១៩ របស់ WHO ថ្លែងដូច្នេះកាលពីថ្ងៃទី 25 វិច្ឆិកា។

ស្ថាប័ននេះកំពុងតែតាមដានយ៉ាងម៉ត់ចត់ចំពោះវ៉ារ្យ៉ង់ B.1.1.529 ហើយក៏នឹងបើកកិច្ចប្រជុំបន្ទាន់ពិសេសនៅក្នុងថ្ងៃទី 26 វិច្ឆិកា នេះ ដើម្បីពិភាក្សាអំពីឥទ្ធិពលដែលបង្កប់ក្នុងវ៉ារ្យ៉ង់នេះ ដល់វ៉ាក់សាំង និងវិធីសាស្ត្រព្យាបាល។

វេជ្ជបណ្ឌិត Van Kerkhove បន្ថែមថា ក្រុមស្រាវជ្រាវនឹងពិនិត្យមើលលទ្ធភាពឱ្យដឹងថា តើ B.1.1.529 អាចក្លាយជាវ៉ារ្យ៉ង់ដែលគួរឱ្យព្រួយបារម្ភ ឬអត់ ហើយក្រោយមក WHO នឹងដាក់ឈ្មោះឱ្យវាទៅតាមអក្ខរក្រមរបស់ក្រិក។

វ៉ារ្យ៉ង់ B.1.1.529 មានការប្រែប្រួលចំនួន 50 ទម្រង់នៅក្នុងប្រូតេអ៊ីនបន្លា ជាផ្នែកដែលវ៉ាក់សាំងប្រើប្រាស់ដើម្បីបង្កើតអង្គបដិប្រាណសម្រាប់ប្រឆាំងវីរុសកូវីដ-១។ ចំនួនទម្រង់នៃការប្រែប្រួលក្នុងប្រូតេអ៊ីនបន្លា អាចប៉ះពាល់ដល់លទ្ធភាពនៃការឆ្លងរបស់វីរុស ក៏ដូចជាកោសិកាពិបាកក្នុងការវាយប្រហារមេរោគ។

ទ្វីបអាហ្វ្រិក ទើបតែបានរកឃើញវីរុសបំប្លែងថ្មី B.1.1.529 នេះ ប៉ុន្មានករណីប៉ុណ្ណោះ។ រដ្ឋាភិបាលអង់គ្លេស កាលពីថ្ងៃទី 25 វិច្ឆិកា និយាយថា វ៉ារ្យ៉ង់ថ្មីនេះគឺជា «វីរុសបំប្លែងខ្លួនថ្មីដែលអាក្រក់បំផុត» ព្រមទាំងបានដាក់ចេញនូវវិធានការទប់ស្កាត់ជាច្រើនដែលទាក់ទងនឹងការធ្វើដំណើរទៅមក រវាងប្រទេសនេះ ជាមួយបណ្ដាប្រទេសនៅ អាហ្វ្រិក៕

November 26, 2021

(វីដេអូ)-កប៉ាល់រាប់រយគ្រឿង កំពុងបូមខ្សាច់រកមាសនៅក្នុងទន្លេ អាម៉ាហ្សូន

(ប្រេស៊ីល)-កប៉ាល់បូមខ្សាច់រាប់រយគ្រឿងដែលតភ្ជាប់គ្នាជាជួរ ចតទទឹងផ្ទៃទន្លេ ម៉ាដេរ៉ា (Madeira) ដែលជាកំណត់សំខាន់នៃទន្លេ អាម៉ាហ្សូន ហើយបញ្ឆេះម៉ាស៊ីនជាបន្តបន្ទាប់ដើម្បីបូមខ្សាច់យកមាស។

កប៉ាល់តម្រៀបជាជួរទាំងនេះ ត្រូវបានគេដាក់ឱ្យដំណើរការពាសពេញផ្ទៃទន្លេ ម៉ាដេរ៉ា នៅតំបន់ អូតាហ្សេស ( Autazes) ក្នុងរដ្ឋ អាម៉ាហ្សូណាស (Amazonas) នៃ ប្រទេសប្រេស៊ីល។

«យើងរាប់បានប្រហែលមិនក្រោម 300 គ្រឿង។ ពួកគេបាននៅទីនោះយ៉ាងតិច 2 សប្ដាហ៍មកហើយ ប៉ុន្តែ រដ្ឋាភិបាលមិនបានធ្វើអ្វីទាំងអស់» សកម្មជនបរិស្ថាន ដាអេនីក្លេ អាគីយ៉ា (DAnicley Aguiar) នៃអង្គការសន្តិភាពបៃតងប្រេស៊ីល បានប្រាប់ដូច្នេះ។

ការបូមខ្សាច់រកមាសខាងលើនេះ បានកើតឡើងបន្ទាប់ពីមានព័ត៌មានចចាមអារ៉ាមថា មនុស្សមួយចំនួនបានរកឃើញមាសនៅក្នុងទន្លេ ម៉ាដេរ៉ា។ ទន្លេនេះមានបណ្ដោយប្រវែងប្រមាណ 3,300 គីឡូម៉ែត្រ រាប់ពី ប្រទេសបូលីវី ឆ្លងកាត់ព្រៃត្រូពិកប្រេស៊ីល ដល់ទន្លេ អាម៉ាហ្សូន។

អាជ្ញាធរប្រេស៊ីល បាននាំគ្នាគេចវេះពីការទទួលខុសត្រូវ ដោយអះអាងថា មិនមែនជាដែនសមត្ថកិច្ចរបស់ខ្លួន៕

November 26, 2021

52 នាក់បានបាត់បង់ជីវិតក្នុងហេតុការណ៍ផ្ទុះអណ្ដូងរ៉ែ នៅ រ៉ុស្ស៊ី

(រ៉ុស្ស៊ី)-មនុស្ស 52 នាក់ ក្នុងនោះមាន បុគ្គលិកសង្គ្រោះបន្ទាន់ 6 នាក់ បានស្លាប់នៅក្នុងហេតុការណ៍ផ្ទុះអណ្ដូងរ៉ែធ្យូងថ្មនៅតំបន់ ស៊ីបេរី (Siberia)។

ករណីផ្ទុះឧស្ម័នមេតាន នៅក្នុងអណ្ដូងរ៉េធ្យូងថ្ម Listvyazhnaya ក្នុងតំបន់ Kemerovo ភាគនិរតីនៃតំបន់ ស៊ីបេរី បានកើតឡើងកាលពីថ្ងៃទី 25 វិច្ឆិកា បណ្ដាលឱ្យផ្សែងរាលដាលគ្រប់កន្លែងនៅក្នុងផ្លូវរូងក្រោមដីនៃអណ្ដូងរ៉ែ។ សមត្ថកិច្ចឱ្យដឹងថា មនុស្ស 52 នាក់ បានបាត់បង់ជីវិត។

ប៉ុន្មានម៉ោងក្រោយការផ្ទុះ កងកម្លាំងសង្គ្រោះបន្ទាន់បានរកឃើញសាកសពចំនួន 14 នាក់ ប៉ុន្តែ ត្រូវផ្អាកសកម្មភាពស្វែងរក ដោយសារផ្សែងពុល។ ក្រុមសង្គ្រោះ បានជួយសង្គ្រោះជីវិតមនុស្ស 239 នាក់ ក្នុងនោះមាន 49 នាក់ រងរបួស។

សមត្ថកិច្ចទទួលស្គាល់ថា លែងមានឱកាសក្នុងការសង្គ្រោះមនុស្សនៅក្នុងហេតុការណ៍នេះហើយ។ មូលហេតុនៃការស្លាប់របស់មនុស្ស 52 នាក់ខាងលើ ត្រូវបានបញ្ជាក់ថា ដោយសារពុលឧស្ម័នកាបូនឌីអុកស៊ីត (CO2)។

សារព័ត៌មានរុស្ស៊ី បានអះអាងថា តំបន់អណ្ដូងរ៉ែនេះ បំពាក់អុកស៊ីសែនគ្រប់គ្រាន់ដល់បុគ្គលិកដើម្បីរក្សាជីវិតបាន 6 ម៉ោង ហើយបើសិនកែសម្រួលនឹងអាចអូសបន្លាយបានតែប៉ុន្មានម៉ោងបន្ថែមទៀតប៉ុណ្ណោះ។

នេះគឺជាករណីផ្ទុះក្នុងអណ្ដូងរ៉ែដែលបណ្ដាលឱ្យមានមនុស្សស្លាប់ និងរបួសច្រើនបំផុតនៅ រុស្ស៊ី ចាប់តាំងពីឆ្នាំ 2010 បន្ទាប់ពីហេតុការណ៍ផ្ទុះ និងករណីអគ្គិភ័យនៅឯអណ្ដូងរ៉ែ Raspadskaya ដែលបាននាំឱ្យមនុស្ស 91 នាក់ បាត់បង់ជីវិត។

អណ្ដូងរ៉ែធ្យូងថ្ម Listvyazhnaya ធ្លាប់កើតមានហេតុការណ៍ផ្ទុះឆេះកាលពីឆ្នាំ 2004 ម្ដងរួចមកហើយ ដែលទាក់ទិននឹងផ្សែងពុលនៃឧស្ម័នមេតាន និងបានបណ្ដាលឱ្យពលករ 13 នាក់ត្រូវស្លាប់។ ឆ្នាំ 2007 ករណីផ្ទុះមួយក៏បានកើតឡើងនៅឯអណ្ដូងរ៉ែ Ulyanovskaya ក្នុងតំបន់ Kemerovo ធ្វើឱ្យមានមនុស្សស្លាប់រហូតដល់ 110 នាក់៕

November 26, 2021

ក្រុមតំណាងរាស្ត្ររបស់ សហរដ្ឋអាម៉េរិក ធ្វើទស្សនកិច្ច កោះតៃវ៉ាន់ ទៀតហើយ

តំណាងរាស្ត្ររបស់ សហរដ្ឋអាម៉េរិក 5 រូប ដែលដឹកនាំដោយសមាជិកសភាជាន់ទាបមកពីបក្សប្រជាធិបតេយ្យ លោក ម៉ាក តាកាណូ (Mark Takano) បានធ្វើឱ្យមានការភ្ញាក់ផ្អើលខ្លាំងនៅពេលធ្វើទស្សនកិច្ច កោះតៃវ៉ាន់ បន្ទាប់ពីតំណាងរាស្ត្រ អាម៉េរិក មួយក្រុមផ្សេងទៀត បានមកកាន់កោះនេះកាលពីប៉ុន្មានសប្ដាហ៍មុន។

ក្រុមតំណាងរាស្ត្រខាងលើមានមនុស្សសរុប 17 នាក់ រួមមាន តំណាងរាស្ត្របក្សកាន់អំណាចនៃសភាជាន់ទាបចំនួន 4 រូប តំណាងរាស្ត្របក្សសាធារណរដ្ឋ 1 រូប រួមជាមួយនឹងជំនួយការរបស់ពួកគេ បានមកដល់ព្រលានយន្តហោះ សុងសាន (Songshan) នៅ ទីក្រុងតៃប៉ិ នៃ កោះតៃវ៉ាន់ តាមយន្តហោះ C40-C របស់កងទ័ព សហរដ្ឋអាម៉េរិក កាលពីយប់ថ្ងៃទី 25 វិច្ឆិកា។ តាមគម្រោង ក្រុមនេះនឹងជួបពិភាក្សាជាមួយមេដឹកនាំ កោះតៃវ៉ាន់ លោកស្រី ត្សៃ អីងវិន (Tsai Ing-wen) និងមន្ត្រីជាន់ខ្ពស់ដទៃទៀត ក្នុងនោះក៏មានរដ្ឋមន្ត្រីក្រសួងការពារជាតិ ឈីវ គួឆេង (Chiu Kuo-cheng) ផងដែរ។

វិទ្យាស្ថានអាម៉េរិក ប្រចាំ កោះតៃវ៉ាន់ (AIT) កាលពីយប់កន្លងទៅបានប្រកាសថា ក្រុមតំណាងរាស្ត្រខាងលើនឹងស្ថិតនៅ កោះតៃវ៉ាន់ រហូតដល់ដំណាច់ថ្ងៃទី 26 វិច្ឆិកា។

ចាង ហ្សឺវ៉ៃ (Chang Zewei) អ្នកនាំពាក្យរបស់លោកស្រី ត្សៃ អីងវីន បាននិយាយថា ការិយាល័យប្រធានាធិបតី កោះតៃវ៉ាន់ មានការត្រេកអរខ្លាំងចំពោះទស្សនកិច្ច ដែលត្រូវបានធ្វើឡើងក្រោយពីមានដំណើរទស្សនកិច្ចមួយរបស់ក្រុមតំណាងរាស្ត្របក្សសាធារណរដ្ឋ ដឹកនាំដោយលោក ចន ឃ័រនីន (John Cornyn) កាលពីថ្ងៃទី 9 វិច្ឆិកា។

អ្នកនាំពាក្យខាងលើបន្ថែមថា ទស្សនកិច្ចនេះអាចជួយឱ្យទំនាន់ទំនង និងការចែករំលែកព័ត៌មានរវាង សហរដ្ឋអាម៉េរិក និង កោះតៃវ៉ាន់ ទាក់ទិននឹងបញ្ហាសន្តិសុខតំបន់ និងបញ្ហាជាច្រើនផ្សេងទៀត កាន់តែស៊ីជម្រៅ។

មន្ត្រីចិនដីគោក មានការខឹងខ្លាំង និងបានហៅ ទស្សនកិច្ចនៃក្រុមរបស់លើក ចន ឃ័រនីន ថាជាសកម្មភាពបង្កហេតុ ហើយថានឹងបង្កើនការត្រៀមលក្ខណៈសម្រាប់សង្គ្រាមក្នុងតំបន់ ដើម្បីឆ្លើយតបនឹងទង្វើដែល ទីក្រុងប៉េកាំង ហៅថា «សម្ដី និងសកម្មភាពខុសឆ្គងធ្ងន់ធ្ងរ»។

កាលពីខែមិថុនា តំណាងរាស្ត្រ 3 រូបរបស់ អាម៉េរិក ក៏បានធ្វើទស្សនកិច្ច កោះតៃវ៉ាន់ រយៈពេល 3 ម៉ោង ធ្វើឱ្យចិនដីគោក ខឹងយ៉ាងខ្លាំង និងបានព្រមានដល់ កោះតៃវ៉ាន់ និង សហរដ្ឋអាម៉េរិក។ កាលពីខែមេសា អតីតតំណាងរាស្ត្រអាម៉េរិក 1 រូប រួមនឹងអតីតមន្ត្រីជាន់ខ្ពស់នៃក្រសួងការបរទេស 2 រូប ក៏បានមកកាន់ កោះតៃវ៉ាន់ ជួបពិភាក្សាជាមួយលោកស្រី ត្សៃ អីងវីន ផងដែរ៕

November 26, 2021

ចិនដីគោក ខឹងខ្លាំង ក្រោយ អាម៉េរិក អញ្ជើញ ចិនតៃវ៉ាន់ ចូលរួមកិច្ចប្រជុំកំពូល

បន្ទាប់ពីបានអញ្ជើញ កោះតៃវ៉ាន់ ឱ្យចូលរួមកិច្ចប្រជុំកំពូលស្ដីពីប្រជាធិបតេយ្យ សហរដ្ឋអាម៉េរិក បានធ្វើឱ្យ ចិនដីគោក ប្រតិកម្មខ្លាំងក្លា ហើយភាពតានតឹងនៃទំនាក់ទំនងរវាងប្រទេសទាំងបី ក៏កើនឡើងថែមមួយកម្រិតទៀត។

ក្រសួងការបរទេសអាម៉េរិក កាលពីថ្ងៃទី 23 វិច្ឆិកា បានប្រកាសថា តំណាងនៃប្រទេសជាង 100 ក្នុងនោះមាន កោះតៃវ៉ាន់ ផងដែរ ត្រូវបានអញ្ជើញឱ្យចូលរួមកិច្ចប្រជុំកំពូលស្ដីពីប្រជាធិបតេយ្យ ដែលនឹងត្រូវបានធ្វើឡើងតាមប្រព័ន្ធវីដេអូ នៅថ្ងៃទី 9 ធ្នូ និង 10 ធ្នូ ខាងមុខ។

ភាគី កោះតៃវ៉ាន់ ក្រោយមកក៏បានបញ្ជាក់ថា មេដឹកនាំនៃស្ថាប័នបច្ចេកវិទ្យាឌីជីថល និងតំណាងរបស់ កោះតៃវ៉ាន់ ប្រចាំ សហរដ្ឋអាម៉េរិក នឹងចូលរួមកិច្ចប្រជុំនេះ។

មេដឹកនាំរបស់ប្រទេស និងដែនដីទាំងបី (ចិន កោះតៃវ៉ាន់ និង អាម៉េរិក)

ទង្វើរបស់ អាម៉េរិក ធ្វើឱ្យ ចិនដីគោក ខ្លាំងយ៉ាងខ្លាំង។ អ្នកនាំពាក្យនៃការិយាល័យទទួលបន្ទុកកិច្ចការកោះតៃវ៉ាន់ បានហៅទង្វើរបស់ អាម៉េរិក ថា «ខុសឆ្គង» និងថា ចិនដីគោក «បដិសេធរាល់ទំនាក់ទំនងផ្លូវការរវាងទីក្រុងវ៉ាស៊ីងតោន នឹងតំបន់តៃវ៉ាន់ របស់ ចិន»។

អ្នកនាំពាក្យក្រសួងការបរទេសចិន Zhao Lijian ក៏បានស្នើឱ្យ អាម៉េរិក «បញ្ឈប់ទំនាក់ទំនងជាមួយនឹងក្រុមផ្ដាច់ខ្លួន» នៅ កោះតៃវ៉ាន់ និងបានព្រមានថា «ប្រលែងលេងនឹងភ្លើងគឺមានតែនាំឱ្យរលាកដៃប៉ុណ្ណោះ»៕

November 25, 2021

Category: អន្តរជាតិ