ប្រធានាធិបតីបេឡារូស បានឱ្យដឹងថា រុស្ស៊ី នឹងធ្វើការចរចា នៅពេលសំណើស្ដីពីសន្តិសុខរបស់ពួកគេត្រូវបានឆ្លើយតប។
យោងតាមសារព័ត៌មានបេឡារូស (Belta) កាលពីថ្ងៃទី ២៤ កុម្ភៈ ប្រធានាធិបតី Aleksandr Lukashenko របស់ បេឡារូស បានចង្អុលបង្ហាញនូវលក្ខខណ្ឌនានាដែលអាចចាប់ផ្ដើមការចរចា រវាង រុស្ស៊ី និង អ៊ុយក្រែន ក្នុងបំណងដោះស្រាយជម្លោះប្រដាប់អាវុធដែលកំពុងកើតឡើង។
នៅចំពោះមុខក្រុមមេដឹកនាំយោធារបស់ បេឡារូស លោក Lukashenko ថ្លែងថា៖ «ត្រូវការចាប់ផ្ដើមកិច្ចចរចាដើម្បីទប់ស្កាត់ការបង្ហូរឈាមនៅ អ៊ុយក្រែន ប៉ុន្តែ រុស្ស៊ី នឹងមិនចាប់ផ្ដើមចូលតុចរចានោះទេ បើសិនបញ្ហាដែលគ្រោងនឹងយកទៅជជែក មិនត្រូវបានយល់ស្របជាមុន។
រុស្ស៊ី បានផ្ញើសំណើប្រហែលពី ៥ ទៅ ៦ ប្រការ របស់ខ្លួនទៅកាន់ ណាតូ សហរដ្ឋអាម៉េរិក និង អ៊ុយក្រែន ក្នុងនោះមាន ២ ទៅ ៣ បញ្ហា ដែលទាក់ទិននឹង អ៊ុយក្រែន។ ទី ១ គឺ ភាពគ្មានយោធានៅ អ៊ុយក្រែន, ទី ២ គឺ ការទប់ស្កាត់ អ៊ុយក្រែន ចូលជាសមាជិករបស់ ណាតូ និង ទី ៣ គឺ ការបញ្ចប់សកម្មភាពជាអរិភាពនៅ Donetsk និង Luhansk។ បញ្ហាផ្សេងទៀត ក៏អាចនឹងត្រូវបានលើកឡើងបន្ថែម។
លោក Lukashenko ក៏បានស្នើឱ្យបើកកិច្ចចរចាទាក់ទងជាមួយនឹង រុស្ស៊ី និង អ៊ុយក្រែន នៅ Minsk ផងដែរ។ «ចូរអង្គុយចុះ និងសម្រេចវាសនារបស់យើងសម្រាប់អនាគត។ បើសិនខ្ញុំជា ប្រធានាធិបតីអ៊ុយក្រែន Zelensky ខ្ញុំនឹងចាប់យកឱកាសនេះ»។
