អន្តរជាតិ - La Reine Media

បារាំងមាននាយករដ្ឋមន្ត្រីជាស្ត្រីដំបូងគេក្នុងអំឡុងជាង ៣ ទសវត្សរ៍មកនេះ

ប្រធានាធិបតីបារាំង លោក ម៉ាក្រុង បានតែងតាំងរដ្ឋមន្ត្រីក្រសួងពលកម្ម Borne ជានាយករដ្ឋមន្ត្រីរបស់ បារាំង ដែលនេះគឺជាស្ត្រីដំបូងគេកាន់តំណែងនេះក្រោយរយៈពេលជាង ៣០ ឆ្នាំកន្លង។

វិមានអេលីសេ កាលពីថ្ងៃទី ១៦ ឧសភា បានប្រកាសថា លោកស្រី Elisabeth Borne ត្រូវបានតែងតាំងជានាយករដ្ឋមន្ត្រីបារាំង ជំនួសលោក Jean Castex ដែលបានដាក់ពាក្យសុំលាលែងពីតំណែងកាលពីពេលថ្មីៗនេះ។ លោកស្រី Borne បានទៅកាន់ភូមិគ្រឹះ Matignon របស់ នាយករដ្ឋមន្ត្រីបារាំង នៅ ប៉ារីស ដើម្បីទទួលភារកិច្ច។

ស្ត្រីជានាយករដ្ឋមន្ត្រីដំបូងគេរបស់ បារាំង គឺលោកស្រី Edith Cresson ដែលបានចូលកាន់តំណែងចាប់ពីខែឧសភា ឆ្នាំ ១៩៩១ ដល់ខែមេសា ឆ្នាំ ១៩៩២ ក្នុងសម័យលោកប្រធានាធិបតី Francois Mitterrand។

លោកស្រី Borne អាយុ ៦១ ឆ្នាំ ត្រូវបានវាយតម្លៃថាជាមនុស្សម្នាក់ដែលមានសក្ដានុពល និងអាចចរចាប្រកបដោយប្រសិទ្ធភាពជាមួយក្រុមសហជីពនៅក្នុងពេលប្រធានាធិបតី ម៉ាក្រុង ចាប់ផ្ដើមកែទម្រង់សង្គមថ្មី ក្នុងនោះមានទាំងការបង្កើនអាយុសម្រាប់ការចូលនិវត្តន៍ ដែលជាការសម្រេចចិត្តមួយប្រឈមនឹងហានិភ័យកើតមានបាតុកម្ម។

May 17, 2022

ធ្លាក់ឧទ្ធម្ភាគចក្រនៅ កូរ៉េខាងត្បូង បណ្ដាលឱ្យមនុស្ស ៣ នាក់ស្លាប់ និងរងរបួស

មនុស្សយ៉ាងហោចម្នាក់បានស្លាប់ និង ២ នាក់ទៀតរងរបួសធ្ងន់នៅក្នុងហេតុការណ៍ធ្លាក់ឧទ្ធម្ភាគនាថ្ងៃទី ១៦ ឧសភានេះ នៅទីក្រុង Geoje ភាគខាងត្បូងនៃ ប្រទេសកូរ៉េខាងត្បូង។

យោងតាមសារព័ត៌មាន Yonhap អង្គភាពជួយសង្គ្រោះបានឱ្យដឹងថា គ្រោះថ្នាក់នេះកើតឡើងនៅពេលឧទ្ធម្ភាគចក្រខាងលើកំពុងដឹកជញ្ជូនសម្ភារសំណង់បម្រើឱ្យគម្រោងស្ដារផ្លូវលំមួយខ្សែសម្រាប់ឡើងទៅកាន់កំពូលភ្នំ។ ឧទ្ធម្ភាគចក្រនេះបានធ្លាក់នៅក្បែរកំពូលភ្នំ Seonja នៃទីក្រុង Geoje។

ជនរងគ្រោះទាំង ៣ នាក់ខាងលើគឺជាសមាជិកនៃក្រុមហោះហើរ រួមមាន អ្នកបើកបរ ២ នាក់ដែលមានអាយុជាង ៦០ ឆ្នាំ និងជាងម៉ាស៊ីនម្នាក់អាយុប្រហែល ៣០ ឆ្នាំ។ អ្នកដែលបានស្លាប់នៅក្នុងហេតុការណ៍នេះគឺជាប្រធានក្រុមអ្នកបើកបរ។

ប្រភពព័ត៌មានបានឱ្យដឹងថា បច្ចុប្បន្ន សមត្ថកិច្ចកំពុងញាប់ដៃញាប់ជើងស៊ើបអង្កេតរកមូលហេតុនៃគ្រោះថ្នាក់នេះ។

May 16, 2022

(វីដេអូ)-ទិដ្ឋភាពក្នុងស្ថានីយអវកាស ISS ពេលកំពុងបង្កើនកម្ពស់នៅលើមេឃ

ទីភ្នាក់ងារអវកាសអឺរ៉ុប អ៊ីសា (ESA) បានបង្ហោះវីដេអូស្ដីពីសកម្មភាពនៅក្នុងស្ថានីយអវកាសអន្តរជាតិ (ISS) នៅពេលយានរបស់ រុស្ស៊ី បញ្ឆេះម៉ាស៊ីនដើម្បីរុញស្ថានីយនេះឡើងខ្ពស់ថែមមួយកម្រិតទៀតកាលពីខែមីនា ២០២។

ក្រុមហោះហើរនៅលើស្ថានីយអវកាស ISS កាលពីខែមីនា ដែលស្ថិតក្នុងស្ថានភាពអណ្ដែតថយក្រោយនៅពេលយានរបស់ រុស្ស៊ី បញ្ឆេះម៉ាស៊ីន ដើម្បីរុញស្ថានីយឡើងទៅលើ គឺក្រុមស្រាវជ្រាវ ៦។ សមាជិករបស់ក្រុមនេះរួមមាន ៦ នាក់ ក្នុងនោះមាន ៣ នាក់មកពី ណាសា (NASA), ម្នាក់មកពី អ៊ីសា និង ២ នាក់មកពី ទីភ្នាក់ងារអវកាសរុស្ស៊ី រ៉ូស្កូសមូស (Roscosmos)។

នៅពេលយើងមើលសកម្មភាពក្នុងវីដេអូនេះ គ្រប់គ្នាប្រាកដជាគិតថា ក្រុមអវកាសចរនេះកំពុងផ្លាស់ទីខាងក្នុង ISS ប៉ុន្តែ តាមពិតមិនដូច្នោះទេ ពោលគឺស្ថានីយអវកាសនេះកំពុងវិលជុំវិញពួកគេ។ ចំណែកសកម្មភាពពិតប្រាកដក៏យឺតជាងទិដ្ឋភាពក្នុងវីដេអូ ដោយសារតែវីដេអូនេះត្រូវបានបង្កើនល្បឿនលឿនជាង ៨ ដង ធៀបនឹងវីដេអូដើម។

អ៊ីសា មិនបានបង្ហើបឱ្យដឹងអំពីទិន្នន័យស្ដីពីកម្រិតនៃការបង្កើនល្បឿនលើកនេះ។ ក៏ប៉ុន្តែ ការបង្កើនល្បឿនកាលពីលើកមុននេះគឺ ប្រើពេល ១២ នាទី និង ១៧ វិនាទី និងមានល្បឿន ១.៣៤ ម៉ែត្រ ក្នុង ១ វិនាទី។

ក្នុងវីដេអូ ក្រុមអវកាសចរ កំពុងទទួលបទពិសោធន៍ដ៏អស្ចារ្យ។ វាប្រហាក់ប្រហែលទៅនឹងពេលរថយន្ត និងយន្តហោះបង្កើនល្បឿន។

ISS តែងតែគោចរពីលើផែនដីក្នុងរយៈកម្អស់ប្រហែល ៤០០ គីឡូម៉ែត្រ ប៉ុន្តែ ឥទ្ធិពលរបស់ទំនាញនៃបរិយាកាសអាចធ្វើឱ្យ ISS ធ្លាក់មកទាបប្រហែល ១០០ ម៉ែត្រ ជារៀងរាល់ថ្ងៃ ដូច្នេះហើយបានជាក្រុមអ្នកគ្រប់គ្រង ត្រូវលើកកម្ពស់នៃគន្លងគោចររបស់ស្ថានីយនេះ ប្រហែល ១ ដង នៅក្នុង ១ ខែ៕

May 16, 2022

កងទ័ពរុស្ស៊ី ប្រើប្រាស់គ្រាប់កាំភ្លើងត្បាល់នាំផ្លូវដោយឡាស៊ែរធំបំផុតក្នុងពិភពលោក នៅ អ៊ុយក្រែន

កងកម្លាំងរបស់ ប្រទេសរុស្ស៊ី ទំនងជាកំពុងតែប្រើប្រាស់កាំភ្លើងត្បាល់ ២S៤ Tyulpan បាញ់គ្រាប់កាំភ្លើងដែលមានប្រព័ន្ធនាំផ្លូវ Smelchak ដើម្បីវាយប្រហារលើរោងចក្រ Azovstal នៅទីក្រុងភាគត្បូង Mriupol របស់ អ៊ុយក្រែន។

គណនី 200_zoka នៅលើបណ្ដាញសង្គម Twitter ដែលមានជំនាញខាងបង្ហោះឯកសារស្ដីពីកងទ័ពរបស់ រុស្ស៊ី ដែលកំពុងចូលរួមធ្វើសង្គ្រាមនៅ អ៊ុយក្រែន កាលពីចុងសប្ដាហ៍កន្លង បានចែករំលែករូបភាពកាំភ្លើងត្បាល់ចល័ត ២S៤ Tyulpan កំពុងតែបាញ់ផ្លោងទៅលើគោលដៅរោងចក្រផលិតដែកថែប Azovstal នៅទីក្រុងភាគខាងត្បូង Mariupol។ ក៏ប៉ុន្តែ ពេលវេលានៃការបាញ់ផ្លោងនេះមិនត្រូវបានបង្ហើបឱ្យដឹងនោះទេ។

ក្នុងរូបថត គ្រាប់កាំភ្លើងត្បាល់ទើបតែចាកចេញពីកាណុង ២S៤ ដែលត្រូវបានដាក់ពង្រាយនៅលើទីវាលមួយកន្លែង។ ក្រុមអ្នកជំនាញយល់ថា គ្រាប់កាំភ្លើងក្នុងរូបភាពនេះគឺជា ១K១១៣ Smelchak ដែលត្រូវបាននាំផ្លូវដោយពន្លឺឡាស៊ែរ។

ក្រសួងការពារជាតិរុស្ស៊ី មិនទាន់បញ្ចេញប្រតិកម្មអ្វីនៅឡើយចំពោះការលើកឡើងខាងលើ។

២S៤ Tyulpan គឺជាប្រព័ន្ធកាំភ្លើងត្បាល់ចល័តធំបំផុតក្នុងពិភពលោក ដែលត្រូវបានគេឱ្យឈ្មោះថា «មហាទេពនៃសង្គ្រាម» មួយ របស់ សូវៀត ដែលត្រូវបានដាក់ឱ្យប្រើបប្រាស់ក្នុងជួរកងទ័ពក្នុងអំឡុងទសវត្សរ៍ ១៩៧០។

May 16, 2022

ណាតូ ថា អ៊ុយក្រែន អាចឈ្នះ រុស្ស៊ី

អគ្គលេខាធិការនៃអង្គការណាតូ និយាយថា យុទ្ធនាការយោធារបស់ រុស្ស៊ី នៅ អ៊ុយក្រែន កំពុងកើតឡើងមិនទៅតាមការគ្រោងទុក និងយល់ថា ទីក្រុងកៀវ នឹងមានប្រៀបជាង។

«យុទ្ធនាការយោធារបស់ រុស្ស៊ី នៅ អ៊ុយក្រែន កើតឡើងមិនដូចទៅនឹងផែនការរបស់ ទីក្រុងមូស្គូ។ ពួកគេមិនអាចគ្រប់គ្រងទីក្រុងកៀវ ពួកគេកំពុងដកថយចេញពី Kharkov ហើយការរុលចូលនៅ Donbass ត្រូវពន្យារពេល។ រុស្ស៊ី មិនអាចសម្រេចបានគោលដៅយុទ្ធសាស្ត្ររបស់ពួកគេ» អគ្គលេខាធិការនៃអង្គការណាតូ Jens Stoltenberg បានប្រាប់អ្នកយកព័ត៌មានបន្ទាប់ពីកិច្ចប្រជុំក្រៅផ្លូវការរបស់រដ្ឋមន្ត្រីនៃបណ្ដាប្រទេសក្នុងសម្ព័ន្ធយោធានេះ កាលពីថ្ងៃទី ១៥ ឧសភា។

យោងតាមលោក Stoltenberg ប្រធានបទសំខាន់នៃកិច្ចប្រជុំខាងលើគឺ «ការគាំទ្រយ៉ាងខ្លាំងក្លាចំពោះ អ៊ុយក្រែន» ការបង្កើនលទ្ធភាពនៃការកំញើញ និងការការពាររបស់ ណាតូ ក៏ដូចជាផលប៉ះពាល់យូរអង្វែរដែលកើតពីយុទ្ធនាការយោធារបស់ រុស្ស៊ី ក្នុងនោះក៏មានគោលជំហរនាពេលអនាគតរបស់សម្ព័ន្ធយោធាណាតូ ចំពោះ ប្រទេសរុស្ស៊ី ផងដែរ។

លោក Stoltenberg បន្តថា «អ៊ុយក្រែន អាចឈ្នះ។ ជនជាតិអ៊ុយក្រែន កំពុងមានភាពក្លាហានក្នុងការការពារស្រុកកំណើតរបស់ពួកគេ»។ លោកបន្ថែមថា ប្រភពផ្គត់ផ្គង់អាវុធ និងជំនួយពីបណ្ដាប្រទេស កំពុង «ធ្វើឱ្យមានភាពខុសគ្នានៅលើសមរភូមិ» ដូច្នេះសម្ព័ន្ធមិត្តគួរបន្តផ្ដល់ជំនួយដល់ អ៊ុយក្រែន។

ចំណែកភាគីខាង រុស្ស៊ី វិញ បានអះអាងថា កំពុងសម្រេចបានគ្រប់គោលដៅនៅ អ៊ុយក្រែន ហើយថា នឹងមិនប្ដូរផ្លាស់នូវដំណើរការដែលបានកំណត់។ នៅក្នុងកម្មវិធីទូរទស្សន៍ដែលចាក់ផ្សាយកាលពីថ្ងៃទី ១៤ ឧសភា ឯកអគ្គរដ្ឋទូតរុស្ស៊ី ប្រចាំ សហរដ្ឋអាម៉េរិក Anatoly Antonov សង្កត់ធ្ងន់ថា «យើងនឹងមិនចុះចាញ់ ឬដកថយជាដាច់ខាត»។

May 16, 2022

សេចក្ដីព្រាងច្បាប់ផ្ដល់ជំនួយ ៤០ ពាន់លានដុល្លារដល់ អ៊ុយក្រែន ជាប់គាំនៅ សភាជាន់ខ្ពស់អាម៉េរិក

តំណាងរាស្ត្រ Rand Paul បានរាំងខ្ទប់ការបោះឆ្នោតនៅ សភាជាន់ខ្ពស់អាម៉េរិក បណ្ដាលឱ្យស្ថាប័ននេះមិនទាន់អាចអនុម័តកញ្ចប់ថវិកាជំនួយសម្រាប់ អ៊ុយក្រែន។

មេដឹកនាំក្រុមសំឡេងភាគច្រើននៅ សភាជាន់ខ្ពស់អាម៉េរិក Chuck Schumer និងមេដឹកនាំក្រុមសំឡេងភាគតិច Mitch McConnell កាលពីម្សិលមិញ ដាក់សំណើ «ព្រមព្រៀងឯកភាព» មាត្រាដែលជួយជំរុញឱ្យធ្វើការអនុម័តឆាប់រហ័សលើសេចក្ដីព្រាងច្បាប់ដោយមិនចាំបាច់ពិភាក្សា ដើម្បីបង្កើនល្បឿនសម្រាប់ការអនុម័តច្បាប់ផ្ដល់ជំនួយ ៤០ ពាន់លានដុល្លារ ដល់ អ៊ុយក្រែន ដែលត្រូវបានសភាជាន់ទាបអាម៉េរិក អនុម័តរួចហើយកាលពីដើមសប្ដាហ៍។

ក៏ប៉ុន្តែ ឥរិយាបថខាងលើនេះ ត្រូវបានរាំងខ្ទប់ បន្ទាប់ពីតំណាងរាស្ត្រសភាជាន់ខ្ពស់ Rand Paul ប្រកាសថា នឹងយល់ស្របលុះណាតែបន្ថែមមាត្រាដែលទាក់ទងនឹងយន្តការត្រួតពិនិត្យពិសេសដើម្បីតាមដានដំណើរការនៃការបញ្ចេញកញ្ចប់ថវិកាជំនួយនេះ។ សំណើរបស់ Rand Paul ត្រូវបានបដិសេធដោយតំណាងរាស្ត្រសភាជាន់ខ្ពស់ Chuck Schumer។

ការស្នើរបស់លោក Paul បានធ្វើឱ្យដំណើរការបោះឆ្នោតអនុម័តសេចក្ដីព្រាងច្បាប់នេះត្រូវថយទៅសប្ដាហ៍ក្រោយ។ លោក Schumer ថ្លែងថា លោក Paul កំពុងរារាំងសេចក្ដីព្រាងច្បាប់នេះតែម្នាក់ឯង ខណៈដែលគ្រប់យ៉ាងបានត្រៀមរួចរាល់អស់ហើយ។

លោក Paul និយាយថា «នេះគឺជាសេចក្ដីព្រាងច្បាប់លើការចំណាយធំទីពីរសម្រាប់ អ៊ុយក្រែន នៅក្នុងរយៈពេល ២ ខែកន្លងមកនេះ។ វាធំជាង ៣ ដង ធៀបនឹងសេចក្ដីព្រាងច្បាប់ដំបូង។ សភាចេះតែចង់ចំណាយហើយ ចំណាយទៀតប៉ុណ្ណោះ»។

ការពន្យារពេលខាងលើនឹងបង្កការលំបាកដល់ការផ្ដល់ជំនួយដល់ អ៊ុយក្រែន របស់លោកខាងលិច។ រដ្ឋាភិបាលអាម៉េរិក ប្រកាសថា នឹងអស់ថវិកាសម្រាប់ការបញ្ជូនអាវុធបន្ទាន់ឱ្យ អ៊ុយក្រែន ដោយមិនបាច់មានការអនុញ្ញាតពីសភា ដែលអាចធ្វើឡើងនៅមុនថ្ងៃទី ១៩ ឧសភា។

លោក បៃដិន ដំបូងឡើយបានស្នើកញ្ចប់ថវិកា ៣៣ ពាន់លានដុល្លារដើម្បីជួយ អ៊ុយក្រែន ប៉ុន្តែ សភាក្រោយមកក៏បានបង្កើនកញ្ចប់នេះឡើងរហូតដល់ជិត ៤០ ពាន់លានដុល្លារ។ សកម្មភាពនេះគឺដើម្បីជួយឱ្យ អ៊ុយក្រែន អាចបណ្ដេញកងទ័ពរុស្ស៊ី ចេញពីទឹកដី បន្ទាប់ពី ទីក្រុងមូស្គូ បានបើកការឈ្លានពានលើ អ៊ុយក្រែន កាលពីខែកុម្ភៈ ២០២២។

អត្ថបទទាក់ទង៖ សភាជាន់ទាបអាម៉េរិក បានអនុម័តកញ្ចប់ថវិកាផ្ដល់ជំនួយចំនួន ៤០ ពាន់លានដុល្លារ ដល់ ប្រទេសអ៊ុយក្រែន

May 13, 2022

កូរ៉េខាងជើង មានអ្នកស្លាប់ដោយសារកូវីដ-១៩! «ករណីដំបូង»

កូរ៉េខាងជើង ឱ្យដឹងថា បានរកឃើញមនុស្សរាប់សែននាក់ដែលមានរោគសញ្ញាក្ដៅខ្លួន ក្នុងនោះមាន ៦ នាក់បានស្លាប់ ហើយក្នុងចំណោមនោះដែរ មាន ១ ករណី ស្លាប់ដោយសារឆ្លង អូមីក្រុង។

«ករណីក្ដៅខ្លួនខ្លាំងដោយមិនដឹងមូលហេតុ បានផ្ទុះឡើងនៅទូទាំងប្រទេស ចាប់ពីចុងខែមេសា។ ដោយឡែកក្នុងថ្ងៃទី ១២ ឧសភា មនុស្សប្រហែល ១៨,០០០ នាក់ មានអាការក្ដៅខ្លួនត្រូវបានរកឃើញនៅទូទាំងប្រទេស» ទីភ្នាក់ងារសារព័ត៌មានរដ្ឋកូរ៉េខាងជើង KCNA បានផ្សាយដូច្នេះ។

KCNA ក៏បានឱ្យដឹងថា មនុស្ស ៦ នាក់បានបាត់បង់ជីវិត ក្នុងនោះមានម្នាក់គឺជាករណីវិជ្ជមាននឹង កូវីដ-១៩ ប្រភេទអូមីក្រុង។

បច្ចុប្បន្ន មិនទាន់ដឹងច្បាស់ថា អ្នកដែលបានស្លាប់ផ្សេងទៀតគឺជាករណីឆ្លងជំងឺកូវីដ-១៩ ឬយ៉ាងណានៅឡើយ។

ព័ត៌មាននេះត្រូវបានចុះផ្សាយមួយថ្ងៃបន្ទាប់ពី កូរ៉េខាងជើង បញ្ជាក់ថា មានករណីឆ្លងកូវីដ-១៩ ដំបូង ហើយថា ប្រទេសនេះកំពុងអនុវត្តវិធានការទប់ស្កាត់យ៉ាងតឹងរ៉ឹងបំផុត។

May 13, 2022

សហរដ្ឋអាម៉េរិក សន្យាផ្ដល់ជំនួយជាងរយលានដុល្លារ ដល់ អាស៊ាន

សេតវិមាន បានសន្យាផ្ដល់ជំនួយដល់ក្រុមប្រទេសក្នុង សមាគមប្រជាជាតិអាស៊ីអាគ្នេយ៍ (ASEAN-អាស៊ាន) ជាទឹកប្រាក់ចំនួន ១៥០ លានដុល្លារ សម្រាប់គំនិតផ្ដួចផ្ដើមមួយចំនួន រួមមាន សន្តិសុខលើផ្ទៃសមុទ្រ និងថាមពលស្អាត នៅក្នុងថ្ងៃដំបូងនៃកិច្ចប្រជុំកំពូលពិសេស។

កិច្ចប្រជុំកំពូលពិសេស អាស៊ាន-អាម៉េរិក កាលពីថ្ងៃទី ១២ ឧសភា ចាប់ផ្ដើមដោយពិធីស្វាគមន៍ និងលៀងសាយភោជន៍របស់លោក បៃដិន ជូនដល់មេដឹកនាំបណ្ដាប្រទេសក្នុងសមាគមអាស៊ាន នៅឯ សេតវិមាន។

នេះគឺជាកិច្ចប្រជុំកំពូលដំបូងដែលមានក្រុមមេដឹកនាំអាស៊ាន ចូលរួមព្រឹត្តិការណ៍នៅ សេតវិមាន ហើយក៏ជាកិច្ចប្រជុំដំបូងរវាង អាម៉េរិក និង អាស៊ាន ដែលដឹកនាំដោយប្រធានាធិបតីអាម៉េរិក រាប់ចាប់ពីឆ្នាំ ២០១៦។

សេតវិមាន បានប្រកាសកញ្ចប់ជំនួយ ១៥០ លានដុល្លារ សម្រាប់គំនិតផ្ដួចផ្ដើមមួយចំនួន រួមមាន សន្តិសុខលើផ្ទៃសមុទ្រ និងថាមពលស្អាត នៅក្នុងតំបន់អាស៊ីអាគ្នេយ៍។

May 13, 2022

រុស្ស៊ី ព្រមានថា នឹងចាត់ទុក ហ្វាំងឡង់ និង ស៊ុយអែត ជាគោលដៅសម្រាប់ការវាយប្រហារ

ឯកអគ្គរដ្ឋទូតរង Polyanskiy រិះគន់ ណាតូ ថា មិនស្និទ្ធនឹង រុស្ស៊ី ហើយព្រមានថា ប្រទេសនេះនឹងចាត់ទុក ហ្វាំងឡង់ ស៊ុយអែត ជាគោលដៅ បើសិនពួកគេចូលជាសមាជិករបស់ ណាតូ (NATO)។

«ពួកគេដឹងថា នៅក្នុងពេលពួកគេក្លាយជាសមាជិករបស់ ណាតូ រុស្ស៊ី នឹងមានសកម្មភាពសមស្រប» ឯកអគ្គរដ្ឋទូតរងរុស្ស៊ី ប្រចាំអង្គការសហប្រជាជាតិ Dmitry Andreyevich Polyanski បានប្រាប់ទស្សនាវដ្ដីអង់គ្លេស UnHerd កាលពីថ្ងៃទី ១២ ឧសភា។ លោកថា «បើសិនអង្គភាពនានារបស់ ណាតូ ចូលទៅក្នុងដែនដីទាំងនោះ ពួកគេនឹងក្លាយជាគោលដៅ ឬគោលដៅដែលមានសក្តានុពលសម្រាប់ការវាយប្រហារ»។

«ណាតូ គឺជាក្រុមដែលមិនជិតស្និទ្ធនឹងយើង នោះគឺជាគូប្រជែង ហើយ ណាតូ ផ្ទាល់ក៏បានប្រកាសថា រុស្ស៊ី គឺជាគូបដិបក្ខ។ ប្រការនោះមានន័យថា បើសិន ហ្វាំងឡង់ និង ស៊ុយអែត ស្រាប់តែបានក្លាយជាផ្នែកមួយរបស់គូប្រជែង ច្បាស់ណាស់ពួកគេនឹងត្រូវទទួលរងហានិភ័យក្នុងវិស័យការពារជាតិ និងសេដ្ឋកិច្ច» លោក Polyanskiy និយាយដូច្នេះ។

លោក Polyanskiy បន្ថែមថា លោកមិនយល់ថា ការដែលប្រទេសទាំងពីរនេះក្លាយជាសមាជិករបស់ ណាតូ គឺជាការសំពងធ្ងន់ធ្ងរលើសន្តិសុខរបស់ រុស្ស៊ី ឡើយ។ បើពួកគេធ្វើដូច្នេះ នោះនឹងជាដំណោះស្រាយអាក្រក់បំផុតសម្រាប់ពួកគេ ចំណែក រុស្ស៊ី វិញ មិនដូច្នោះទេ។ សង្ឃឹមថា ពួកគេមិនធ្វើដូច្នេះ»។

ការអះអាងរបស់ លោក Polyanskiy ត្រូវបានធ្វើឡើងបន្ទាប់ពី ហ្វាំងឡង់ បានរៀបគម្រោងសុំចូលជាសមាជិករបស់ សម្ព័ន្ធយោធាណាតូ។ រីឯ ប្រទេសស៊ុយអែត វិញ ក៏កំពុងពិចារណាលើបញ្ហានេះ។

May 13, 2022

អ៊ុយក្រែន ខាតបង់ ១០០ ពាន់លានដុល្លារ បើគិតតែលើហេដ្ឋារចនាសម្ព័ន្ធ

ប្រធានធនាគារជាតិអ៊ុយក្រែន បានឱ្យដឹងថា យុទ្ធនាការយោធារបស់ រុស្ស៊ី បានបំផ្លាញហេដ្ឋារចនាសម្ព័ន្ធតម្លៃ ១០០ ពាន់លានដុល្លារអាម៉េរិក ស្មើនឹងពាក់កណ្ដាលនៃផលិតផលក្នុងស្រុកសរុប (GDP) របស់ប្រទេសនេះ។

«ការខូចខាតផ្នែកសេដ្ឋកិច្ចគឺធំធេងបំផុត» Kyrylo Shevchenko ប្រធានធនាគារជាតិអ៊ុយក្រែន (NBU) បានប្រាប់សារព័ត៌មានជប៉ុន នាថ្ងៃនេះដូច្នេះ។

យោងតាមប្រធានធនាគារខាងលើ រាប់ចាប់ពី រុស្ស៊ី បានបើកយុទ្ធនាការយោធាពិសេសលើ អ៊ុយក្រែន ស្ពាន ផ្លូវថ្នល់ ផ្ទះសំបែង ត្រូវរងការវាយប្រហារមិនឈប់ឈរពីគ្រាប់បែក និងរ៉ុក្កែត បង្កការខូចខាត់ហេដ្ឋារចនាសម្ព័ន្ធស្មើនឹងពាក់កណ្ដាល GDP របស់ អ៊ុយក្រែន។ ក្នុងឆ្នាំ ២០២១ GDP របស់ប្រទេសនេះ មានតម្លៃប្រមាណ ២០០ ពាន់លានដុល្លារអាម៉េរិក។

ប្រធានរបស់ NBU គណនាឃើញថា GDP របស់ អ៊ុយក្រែន «អាចថយចុះយ៉ាងតិច ១/៣ នៅក្នុងឆ្នាំ ២០២២» និងបញ្ជាក់ថា អ៊ុយក្រែន មិនអាចស្ដារប្រទេសឡើងវិញដោយពឹងទៅលើតែប្រភពទុនក្នុងស្រុក។

ចំណែករដ្ឋាភិបាលរបស់លោក ហ្សេឡែនស្គី វិញ បានឱ្យដឹងថា អ៊ុយក្រែន ខាតបង់ប្រហែល ៥ ពាន់លានដុល្លារ/ខែ នៅក្នុងរយៈពេលខ្លី។ ប្រធានាធិបតីអ៊ុយក្រែន កាលពីថ្ងៃទី ២៧ មេសា ថ្លែងថា ការខូចខាតសរុបរបស់ អ៊ុយក្រែន ចាប់តាំងពី រុស្ស៊ី បានចូលឈ្លានពាន គឺប្រហែល ៦០០ ពាន់លានដុល្លារអាម៉េរិក។

កាលពីថ្ងៃទី ១១ ឧសភា នាយករដ្ឋមន្ត្រីអាល្លឺម៉ង់ Olaf Scholz ក៏បានព្រមានថា អ៊ុយក្រែន អាចត្រូវរងផលវិបាកក្នុងរយៈពេល ១០០ ឆ្នាំ ដោយសារតែយុទ្ធនាការយោធារបស់ រុស្ស៊ី។

May 12, 2022

Category: អន្តរជាតិ