អាជ្ញាធររបស់ប្រធានាធិបតី បៃដិន គ្រោងនឹងលក់យន្តហោះគ្មានមនុស្សបើក (UAV) MQ-១C ចំនួន ៤ គ្រឿង ដែលអាចបំពាក់មីស៊ីល Hellfire ឱ្យ អ៊ុយក្រែន ប៉ុន្តែ កិច្ចព្រមព្រៀងនេះអាចនឹងត្រូវបានរារាំងដោយ សភាអាម៉េរិក។
រដ្ឋាភិបាលអាម៉េរិក គ្រោងនឹងប្រកាសប្រាប់ សភាអាម៉េរិក អំពីគម្រោងលក់យន្តហោះគ្មានមនុស្សបើកខ្នាតមធ្យម MQ-១C Gray Eagle ចំនួន ៤ គ្រឿង ឱ្យ អ៊ុយក្រែន ក្នុងប៉ុន្មានថ្ងៃខាងមុខ។ ក៏ប៉ុន្តែ ការជួញដូរអាវុធនេះទំនងជានឹងត្រូវបានរារាំងនៅសភា ក៏ដូចជាប្រឈមនឹងការលុបចោលព្រោះតែការផ្លាស់ប្ដូរគោលនយោបាយនៅនាទីចុងក្រោយ នេះបើតាមប្រភពព័ត៌មានអនាមិកដែលបានបង្ហើបឱ្យដឹងកាលពីថ្ងៃទី ០១ មិថុនា។
ថវិកាសម្រាប់ទិញយន្តហោះ និងការហ្វឹកហ្វឺនដល់ទាហានរបស់ អ៊ុយក្រែន នឹងត្រូវបានយកពីកញ្ចប់ជំនួយសន្តិសុខ ៤០ ពាន់លានដុល្លារដែល សភាអាម៉េរិក បានបែងចែកឱ្យ អ៊ុយក្រែន កាលពីខែកន្លង។ យន្តហោះ MQ-១C ១ គ្រឿងមានតម្លៃដើមប្រហែលជាង ២០ លានដុល្លារ ដោយមិនទាន់រាប់បញ្ចូលទាំងការចំណាយលើការអភិវឌ្ឍ និងបំពាក់អាវុធ។
អ្នកនាំពាក្យរបស់ សេតវិមាន បានបដិសេធការស្នើសុំការអធិប្បាយអំពីបញ្ហានេះ ខណៈដែលអ្នកនាំពាក្យរបស់ មន្ទីរបញ្ចោកោណ ឱ្យដឹងថា «មិនមានអ្វីដែលត្រូវប្រកាស»។
