អន្តរជាតិ - La Reine Media

ថ្ងៃនេះ ណាតូ ចាប់ផ្ដើមអនុម័តផ្លូវការលើសំណើសុំចូលជាសមាជិករបស់ ហ្វាំងឡង់ និង ស៊ុយអែត

ដំណើរការនៃការអនុម័តឱ្យ ហ្វាំងឡង់ និង ស៊ុយអែត ចូលជាសមាជិករបស់ សម្ព័ន្ធយោធាណាតូ នឹងអាស្រ័យលើប្រទេសនីមួយៗដែលជាសមាជិក ប៉ុន្តែ វាតែងស៊ីពេលពី ៨ ដល់ ១២ ខែ។

ប្រទេសចំនួន ៣០ ដែលជាសមាជិករបស់ណាតូ (អង្គការសន្ធឹសញ្ញាអាត្លង់ទិកខាងជើង-NATO) ថ្ងៃនេះ (៥ កក្កដា) នឹងចុះហត្ថលេខាលើពិធីសារស្ដីពីការបញ្ចូល ហ្វាំងឡង់ និង ស៊ុយអែត ទៅក្នុងសម្ព័ន្ធយោធាណាតូ ដើម្បីបើកផ្លូវឱ្យមានការចាប់ផ្ដើមដំណើរការអនុម័តលើពាក្យស្នើសុំចូលជាសមាជិករបស់ប្រទេសអឺរ៉ុបខាងជើងទាំងពីរនេះ។

ដើម្បីបានក្លាយជាសមាជិករបស់ ណូតូ ប្រទេសហ្វាំងឡង់ និង ស៊ុយអែត ត្រូវការការយល់ព្រមពីសភារបស់ប្រទេសទាំង ៣០ ដែលជាសមាជិកបច្ចុប្បន្នរបស់ ណាតូ។

ការដែល ហ្វាំងឡង់ និង ស៊ុយអែត ចូលជាសមាជិកណាតូ នឹងក្លាយជាព្រឹត្តិការណ៍សំខាន់ បង្កើតបានជាការផ្លាស់ប្ដូររចនាសម្ព័ន្ធសន្តិសុខធំបំផុតនៅ អឺរ៉ុប រាប់ចាប់តាំងពីសង្គ្រាមត្រជាក់បានបញ្ចប់ និងត្រូវបានចាត់ទុកថាជាលទ្ធផលដែលកើតឡើងដោយសារសង្គ្រាមរវាង រុស្ស៊ី និង អ៊ុយក្រែន។

ដំណើរការនៃការអនុម័តឱ្យ ហ្វាំងឡង់ និង ស៊ុយអែត ចូលជាសមាជិករបស់ សម្ព័ន្ធយោធាណាតូ នឹងអាស្រ័យលើប្រទេសនីមួយៗដែលជាសមាជិក ប៉ុន្តែ វាតែងស៊ីពេលពី ៨ ដល់ ១២ ខែ។ ទោះជាយ៉ាងណាក៏ដោយ នៅក្នុងសន្និបាតកំពូលកាលពីសប្ដាហ៍កន្លង សមាជិកទាំងអស់របស់ ណាតូ សុទ្ធតែបានសន្យាថា នឹងពន្លឿនដំណើរការនេះ។

July 5, 2022

រដ្ឋមន្ត្រីការបរទេសរបស់ ប្រទេសរុស្ស៊ី ធ្វើទស្សនកិច្ចនៅ វៀតណាម

រដ្ឋមន្ត្រីក្រសួងការបរទេសរុស្ស៊ី លោក Sergey Lavrov គ្រោងនឹងបំពេញទស្សនកិច្ចរយៈពេល ២ ថ្ងៃ នៅ ប្រទេសវៀតណាម តបតាមការអញ្ជើញរបស់ រដ្ឋមន្ត្រីការបរទេសវៀតណាម Bui Thanh Son។

លោក Sergey Lavrov នឹងធ្វើទស្សនកិច្ចនៅ វៀតណាម ចាប់ពីថ្ងៃទី ៥ ដល់ទី ៦ កក្កដា ក្នុងគ្រាដែល ប្រទេសរុស្ស៊ី និង វៀតណាម ឈានដល់របត់ ១០ ឆ្នាំនៃការបង្កើតទំនាក់ទំនងជាដៃគូយុទ្ធសាស្ត្រពេញលេញ។

រុស្ស៊ី និង វៀតណាម បានបង្កើតទំនាក់ទំនងការទូតកាលពីឆ្នាំ ១៩៥០ និងបានផ្ដើមកែលម្អទំនាក់ទំនងទ្វេភាគីចាប់ពីឆ្នាំ ២០០១។ ១១ ឆ្នាំក្រោយមក ប្រទេសទាំងពីរក៏បានក្លាយជាដៃគូសហការយុទ្ធសាស្ត្រគ្រប់ជ្រុងជ្រោយ។

ពាណិជ្ជកម្មទ្វេភាគីក្នុងឆ្នាំ ២០២០ រវាង រុស្ស៊ី និង វៀតណាម បានឡើងដល់ ៤.៨៥ ពាន់លានដុល្លារអាម៉េរិក កើន ៩% ធៀបនឹងឆ្នាំ ២០១៩។ ក្នុងឆ្នាំ ២០២១ ការដោះដូរទំនិញទៅមក បានឡើងដល់ ៧.១ ពាន់លានដុល្លារ កើនជាង ២៥% ធៀបនឹងឆ្នាំ ២០២០។ នៅក្នុង ទឹកដីវៀតណាម រុស្ស៊ី មានគម្រោងរកស៊ីចំនួន ១៥១ គម្រោង ដែលមានទុនវិនិយោគសរុបជាង ៩៥០ លានដុល្លារអាម៉េរិក។

July 5, 2022

ជនសង្ស័យក្នុងករណីបាញ់ប្រហារនៅពិធីបុណ្យឯករាជ្យអាម៉េរិក ត្រូវបានចាប់ខ្លួន!

សមត្ថកិច្ចនៅ Highland Park បានកំណត់អត្តសញ្ញាណ និងចាប់បានជនដែលគួរឱ្យសង្ស័យនៅក្នុងករណីបាញ់ប្រហារកាលពីថ្ងៃទី ៤ កក្កដា ដែលបានស្លាប់មនុស្សយ៉ាងតិច ៦ នាក់ នៅក្នុងពិធីដង្ហែក្បួនអបអរទិវាឯករាជ្យអាម៉េរិក។

Lou Jogmen ដែលជាស្នងការប៉ូលិសក្រុង Highland Park នៃរដ្ឋ Illinois សហរដ្ឋអាម៉េរិក កាលពីថ្ងៃទី ៤ កក្កដា បានឱ្យដឹងថា Robert E. Crimo III អាយុ ២២ ឆ្នាំ គឺជាជនសង្ស័យដែលទាក់ទិននឹងករណីបាញ់ប្រហារលើហ្វូងមនុស្សដែលកំពុងហែក្បួនអបអរទិវាបុណ្យឯករាជ្យ។ ក៏ប៉ុន្តែ មន្ត្រីប៉ូលិសរូបនេះនិយាយថា ជននេះមិនទាន់ត្រូវបានចាត់ទុកថាជាជនសង្ស័យពេញលេញនៅឡើយ។

ក្រុមមន្ត្រីមិនបានបង្ហើបឱ្យដឹងអំពីមូលហេតុដែល Crimo ត្រូវបានកំណត់ថាជាជនគួរឱ្យសង្ស័យនោះទេ។ អង្គភាពប៉ូលិសមួយនៅ Chicago ខាងជើង បានឃើញ Crimo និងបានដេញតាម និងចាប់ខ្លួនជននេះនាំទៅកាន់ការិយាល័យប៉ូលិស Highland Park។

អាជ្ញាធរក្នុងតំបន់បានរកឃើញកាំភ្លើងមួយដើមនៅលើដំបូលផ្ទះក្បែរកន្លែងកើតហេតុ និងបានបន្ថែមថា ករណីបាញ់ប្រហារនេះគឺ «មានចេតនា»។

ករណីបាញ់ប្រហារនេះកើតឡើងប្រហែល ១០ នាទី បន្ទាប់ពីក្បួនដង្ហែបានចាប់ផ្ដើមនៅលើដងផ្លូវក្នុងទីក្រុង Highland Park កាលពីព្រឹកថ្ងៃទី ៤ កក្កដា បណ្ដាលឱ្យមនុស្សរាប់រយនាក់ត្រូវរត់យករួចខ្លួន។ អាជ្ញាធរឱ្យដឹងថា យ៉ាងតិចណាស់មានមនុស្ស ៦ នាក់បានស្លាប់ និង ៣១ នាក់រងរបួសក្នុងហេតុការណ៍នេះ។

ហេតុការណ៍នៅ Highland Park នេះ កើតឡើងជាងមួយខែបន្ទាប់ពីករណីបាញ់ប្រហារនៅសាលាបឋមសិក្សាមួយនៅ Uvalde រដ្ឋ Texas សហរដ្ឋអាម៉េរិក ដែលបានសម្លាប់មនុស្ស ២១ នាក់ ក្នុងនោះមានកុមារចំនួន ១៩ នាក់ផងដែរ៕

July 5, 2022

ករណីបាញ់ប្រហារក្នុងពិធីបុណ្យឯករាជ្យអាម៉េរិក ៖ សាក្សីរៀបរាប់អំពីវិនាទីដ៏គួរឱ្យតក់ស្លុត

ឮសំឡេងស្រែករបស់ប្រពន្ធ Shawn Cotreau ក៏ងាកក្រោយ ហើយក៏បានឃើញបុរសម្នាក់ស្លៀកពាក់ឈុតទាហានកំពុងតែបាញ់រះសំដៅហ្វូងមនុស្សដែលកំពុងហែក្បួននៅ Highland Park។

Shawn Cotreau អាយុ ៤៧ ឆ្នាំ ដែលបានរួមដំណើរជាមួយភរិយា និងកូន ៣ នាក់ ទៅកាន់ទីក្រុង Highland Park ក្នុងរដ្ឋ Illinois របស់ សហរដ្ឋអាម៉េរិក ដើម្បីជួបគ្រួសារខាងភរិយា បានឱ្យដឹងថា មនុស្សម្នាគិតថា មានការបាញ់កាំជ្រួចអបអរនៅក្បែរតំបន់ប្រារព្ធពិធីហែក្បួននេះ។

«ភរិយារបស់ខ្ញុំមើលទៅលើ និងស្រែកខ្លាំងៗ «ក្រោកឡើង រត់ទៅ»។ ខ្ញុំងាកមើលក្រោយ ក៏ឃើញខ្មាន់កាំភ្លើងម្នាក់» Cotreau និយាយដូច្នេះ។ គ្រួសាររបស់លោកអង្គុយចម្ងាយប្រហែល ៦ ម៉ែត្រ ពីខ្មាន់កាំភ្លើង និងបានឃើញជននេះបាញ់ប្រហារពីលើដំបូលហាងលក់គ្រឿងសំអាងមួយកន្លែង។

អាជ្ញាធរ Highland Park ប្រកាសថា យ៉ាងហោចមានមនុស្ស ៦ នាក់ បានស្លាប់ និង ៣១ នាក់ រងរបួសនៅក្នុងករណីបាញ់ប្រហារសំដៅហ្វូងមនុស្សដែលកំពុងហែក្បួនអបអរទិវាបុណ្យឯករាជ្យកាលពីថ្ងៃទី ៤ កក្កដា។

Cotreau ប្រាប់ថា ជនដៃដល់ប្រដាប់ដោយកាំភ្លើងធុនធ្ងន់ ស្លៀកពាក់ឈុតទាហាន និងបិទមុខមាត់។ Cotreau បន្ថែមថា ករណីបាញ់ប្រហារនេះកើតឡើងនៅពេលក្បួរដង្ហែមិនទាន់ទៅដល់ទីលានប្រារព្ធកម្មវិធី ដូច្នេះជនដៃដល់ក៏បានបាញ់សំដៅលើហ្វូងមនុស្សដែលកំពុងអង្គុយរង់ចាំនៅចំណុចផ្លូវកែង។ Cotreau បីកូនអាយុ ២ ឆ្នាំ នាំគ្រួសាររត់គេចខ្លួន ចំណែកមនុស្សម្នាក៏រត់ប្រសាចតាមក្រោយ។

គ្រួសាររបស់ Cotreau បានរត់ទៅពួនក្បែរដើមឈើ «ពួកយើងនៅតែឮសំឡេងគ្រាប់កាំភ្លើងផ្ទុះ»។

Diego Rosas ធ្វើការនៅក្នុងហាងទំនិញមួយនៅក្បែរផ្លូវដែលក្បួនដង្ហែដើរឆ្លងកាត់ ក៏បានឮសំឡេងផ្ទុះរបស់កាំភ្លើងប្រហែល ៣០ គ្រាប់ ក្នុងគ្រាដែលហ្វូងមនុស្សរត់ចូលក្នុងហាង។

Lisa Schulkin ជាមួយមិត្តភក្ដិកំពុងស្ថិតនៅក្នុងកន្លែងចតរថយន្ត នៅពេលហេតុការណ៍កំពុងកើតឡើង។ «ផ្លូវដើរពេញដោយមនុស្ស ក្មេងៗស្រែកយំទ្រហឹង» Schulkin រៀបរាប់ដូច្នេះ ហើយថា នាងក៏ពួនក្បែររថយន្ត។

លោកតា Miles Zaremski អាយុ ៧៣ ឆ្នាំ ដែលនៅមិនឆ្ងាយប៉ុន្មានពីកន្លែងកើតហេតុ ក៏បានប្រាប់ថា ដំបូងគាត់ស្មានថាជាសំឡេងរបស់កាំជ្រួចដែលគេបាញ់អបអរ ៖ «ខ្ញុំឃើញស្ត្រីម្នាក់ប្រឡាក់ឈាមពេញខ្លួន។ មនុស្សជាច្រើនរងរបួស ឬក៏ស្លាប់»។

លោកតា Zaremski ដែលបានរស់នៅក្នុងតំបន់ Highland Park អស់ជាច្រើនទសវត្សរ៍មកហើយ ប៉ុន្តែមិនដែលបានឃើញហេតុការណ៍បែបនេះឡើយ។ លោកតានិយាយថា «គ្រប់កន្លែងនៅជាយក្រុងគួរតែមានការព្រមាន។ ហេតុការណ៍បែបនេះអាចកើតឡើងគ្រប់កន្លែង»៕

July 5, 2022

រថយន្តក្រុងធ្លាក់ចុះជ្រលងភ្នំជ្រៅនៅ ឥណ្ឌា បណ្ដាលឱ្យមនុស្សជាង ១០ នាក់ បាត់បង់ជីវិត

អាជ្ញាធរឥណ្ឌា នៅថ្ងៃទី ៤ ខែកក្កដា ២០២២ នេះ បានឱ្យដឹងថា មានហេតុការណ៍គ្រោះថ្នាក់ចរាចរណ៍ដ៏រន្ធត់មួយបានកើតឡើង បណ្ដាលឱ្យមនុស្ស ១២ នាក់ បាត់បង់ជីវិត និងមនុស្សជាច្រើននាក់ផ្សេងទៀតរងរបួស នៅពេលរថយន្តក្រុងមួយគ្រឿងបានធ្លាក់ចូលជ្រលងភ្នំជ្រៅនៅក្នុងរដ្ឋ Himachal Pradesh ប្រទេសឥណ្ឌា។

ប្រភពព័ត៌មានមួយចំនួនបានឱ្យដឹងថា មនុស្សប្រហែល ២០ នាក់ នៅលើរថយន្តក្រុងដែលបានជួបគ្រោះថ្នាក់នៅជ្រលងភ្នំ Sainj ក្នុងស្រុក Kullu រដ្ឋ Himachal Pradesh ភាគខាងជើងនៃ ប្រទេសឥណ្ឌា។ តួលេខអ្នកស្លាប់អាចកើនឡើងបន្ថែមទៀត ដោយសារតែនៅមានអ្នករងរបួសជាច្រើនស្ថិតក្នុងសភាពធ្ងន់ធ្ងរ។ បេសកកម្មជួយសង្គ្រោះកំពុងត្រូវបានធ្វើយ៉ាងយ៉ាងញាប់ដៃញាប់ជើង។

នៅលើទំព័រ Twitter ផ្ទាល់ខ្លួន នាយករដ្ឋមន្ត្រីឥណ្ឌា Narendra Modi យល់ថា នេះគឺជាករណីឧបទ្ទវហេតុដែលគួរឱ្យឈឺចាប់បំផុត និងបានសម្ដែងទុក្ខសោក និងការសោកស្ដាយចំពោះហេតុការណ៍នេះផងដែរ។

#WATCH | HP | Several teams continue rescue work in Jangla area of Sainj valley on Neoli-Shansher road of Kullu district where a private bus rolled off a cliff at around 8 am this morning. At least 10 dead, numbers expected to rise.
(Disclaimer: disturbing visuals) pic.twitter.com/KL4S8HfxZb
— ANI (@ANI) July 4, 2022

July 4, 2022

ល្ងាចនេះ (៤ កក្កដា ២០២២) ផែនដីស្ថិតនៅឆ្ងាយពីព្រះអាទិត្យបំផុត

ផែនដីគោចរទៅដល់ចំណុចឆ្ងាយបំផុតនៅលើគន្លងជុំវិញព្រះអាទិត្យនៅល្ងាចថ្ងៃទី ៤ កក្កដា ក្នុងគម្លាត ១៥២.១ លានគីឡូម៉ែត្រ។

ក្រុមអ្នកតារាសាស្ត្របានហៅព្រឹត្តិការណ៍នេះថាជា «Aphelion» (ចំណុចឆ្ងាយពីព្រះអាទិត្យបំផុត) ហើយវាកើតឡើងនៅវេលាម៉ោង ១៤ ល្ងាចថ្ងៃនេះ (ម៉ោងនៅ ភ្នំពេញ)។ ពេលនេះ ផែនដីនៅឆ្ងាយពីព្រះអាទិត្យ ១៥២.១ លានគីឡូម៉ែត្រ (ប្រហែលនឹង ១ ឯកតាតារាសាស្ត្រ (១ AU ស្មើនឹង ១៤៩.៦ លានគីឡូម៉ែត្រ) ឆ្ងាយជាង ១.៦៧% ធៀបនឹងចម្ងាយមធ្យមរវាងផែនដី និងព្រះអាទិត្យ។

មនុស្សជាច្រើនប្រហែលជាមិននឹកស្មានថា ផែនដីនៅឆ្ងាយពីព្រះអាទិត្យដូច្នេះសោះនៅក្នុងរដូវក្ដៅ។ Chris Vaughan ដែលជាអ្នកស្រាវជ្រាវមួយរូបរបស់ Space.com បានបកស្រាយថា ការប្រែប្រួលនៃសីតុណ្ហភាពទៅតាមរដូវគឺកើតឡើងដោយសារកម្រិតនៃភាពទ្រេតរបស់អ័ក្សផែនដី។

ផ្ទុយពីចំណុច Aphelion គឺចំណុច Perihelion ដែលផែនដីគោចរទៅដល់ចំណុចជិតព្រះអាទិត្យបំផុត ក្នុងថ្ងៃទី ៤ មករា (២០២៣) ដែលនៅពេលនោះ វានឹងមានចម្ងាយពីផ្កាយមេប្រហែល ១៤៧.១ លានគីឡូម៉ែត្រ។

July 4, 2022

បាតុកម្មកើតឡើងជាបន្តបន្ទាប់នៅ សហរដ្ឋអាម៉េរិក បន្ទាប់ពីករណីប៉ូលិសបាញ់សម្លាប់ជនជាតិស្បែកខ្មៅម្នាក់

មនុស្សរាប់រយនាក់បានបន្តចេញធ្វើបាតុកម្មក្នុងថ្ងៃទី ៣ កក្កដា នៅទីក្រុង Akron រដ្ឋ Ohio (សហរដ្ឋអាម៉េរិក) ក្រោយពីវីដេអូដែលថតបានសកម្មភាពប៉ូលិសបាញ់សម្លាប់បុរសស្បែកខ្មៅម្នាក់ ត្រូវបានគេផ្សព្វផ្សាយ។

បាតុកម្មត្រូវបានធ្វើឡើងជាបន្តបន្ទាប់ និងបានឈានចូលដល់ថ្ងៃទី ៤ ប៉ុន្តែប្រកបដោយសណ្ដាប់ធ្នាប់។ ក្រុមបាតុករនាំគ្នាកាន់បដាដែលខ្លះមានសរសេរថា «រកយុត្តិធម៌ជូន Jayland»។ Jayland Walker គឺជាបុរសវ័យ ២៥ ឆ្នាំដែលបានស្លាប់កាលពីថ្ងៃទី ២៧ មិថុនា ដោយសារតែត្រូវប៉ូលិសបាញ់នៅពេលសមត្ថកិច្ចព្យាយាមបញ្ឈប់រថយន្តរបស់បុរសនេះ ព្រោះតែបានបំពានច្បាប់ចរាចរណ៍។

បាតុកម្មបានអូសបន្លាយដល់យប់ និងមិនមានករណីប្រើអំពើហិង្សានោះទេ។ ប៉ុន្តែ ដើម្បីបង្ការបញ្ហាកើតឡើង សមត្ថកិច្ចបានដំឡើងរបងនៅក្បែរប៉ូស្ដិ៍ប៉ូលិស និងបានអំពាវនាវឱ្យប្រជាជនមានការអត់ធ្មត់។

មេប៉ូលិស Steve Mylett បានឱ្យដឹងថា នៅលើដងខ្លួនរបស់ Jayland មានស្នាមរបួសជាង ៦០ កន្លែង។ ចំណែកប៉ូលិសទាំង ៨ រូបដែលជាប់ពាក់ព័ន្ធនឹងការស្លាប់របស់ Jayland ក៏ត្រូវបានផ្អាកពីការងាររហូតដល់ការស៊ើបអង្កេតបានបញ្ចប់។

មុននោះ ក្នុងថ្ងៃដដែល អាជ្ញាធរក្រុង Akron បានបញ្ចេញវីដេអូចំនួន ២ បង្ហាញថា ប៉ូលិសព្យាយាមបញ្ឈប់រថយន្តរបស់ Jayland ប៉ុន្តែជននេះបានបើកឡានគេចខ្លួន។ ប៉ុលិសឱ្យដឹងថា ស្នូរកាំភ្លើងមួយគ្រាប់បានបាញ់ចេញពីរថយន្តរបស់ Jayland ហើយបុរសនេះក៏មានសកម្មភាពធ្វើឱ្យសមត្ថកិច្ចជឿថា ជាការគំរាមកំហែងដល់ជីវិតមនុស្ស។ ក្នុងវីដេអូ គេឃើញសមត្ថកិច្ចជាច្រើននាក់បានដេញតាម Jayland និងសុទ្ធតែបានផ្ទុះអាវុធ។

កាលពីឆ្នាំ ២០២០ សហរដ្ឋអាម៉េរិក កើតមានបាតុកម្មដែលអូសបន្លាយពេលអស់ជាច្រើនសប្ដាហ៍ និងមិនធ្លាប់មានពីមុនមក ដើម្បីប្រឆាំងនឹងការរើសអើងពូជសាសន៍ និងការប្រើប្រាស់អំពើហិង្សារបស់ប៉ុលិស ក្រោយពី George Floyd ដែលជាបុរសជនជាតិអាម៉េរិក ដើមកំណើតអាហ្វ្រិក ត្រូវប៉ូលិសនៅ Minneapolis រដ្ឋ Minnesota ក្រៀក និងសង្កត់ករហូតដល់ស្លាប់។ បាតុកម្មនេះ ក្រោយមកក៏បានរាលដាលដល់ប្រទេសមួយចំនួនផងដែរ៕

July 4, 2022

ក្រោយពី ប្រទេសថៃ «ធ្វើឱ្យកញ្ឆាស្របច្បាប់» ប្រទេសជាច្រើនក៏ធ្វើការព្រមានលើបញ្ហានេះ

ក្រោយពី អាជ្ញាធរថៃ សម្រេចចិត្តដកកញ្ឆា និងដើមកញ្ឆាចេញពីបញ្ជីគ្រឿងញៀនដែលត្រូវហាមឃាត់ ប្រទេសជាច្រើនក្នុងពិភពលោកក៏បានបញ្ចេញប្រតិកម្មនឹងបញ្ហានេះ។

យោងតាម Straits Times ប្រទេសជាច្រើនបានព្រមានដល់ទេសចរថា ការរក្សាទុក ឬការប្រើប្រាស់កញ្ឆា នៅតែជាអំពើខុសច្បាប់នៅក្នុងប្រទេសស្ទើរតែទាំងអស់ក្នុងពិភពលោក។

ស្ថានទូតថៃ ប្រចាំនៅ ប្រទេសឥណ្ឌូណេស៊ី, កូរ៉េខាងត្បូង និង ជប៉ុន បានណែនាំ ពលរដ្ឋថៃ កុំឱ្យនាំយកកញ្ឆា ឬផលិតផលដែលទាក់ទងនឹងកញ្ឆា ចូលទៅកាន់ប្រទេសទាំងនេះ។ បើសិនជាមានចេតនា ពួកគេនឹងអាចប្រឈមនឹងការកាត់ទោសឱ្យជាប់ពន្ធនាគារ ឬទោសប្រហារជីវិត នៅពេលត្រូវបានចាប់ខ្លួន។

ចំណែក សិង្ហបុរី និង ប្រទេសចិន ក៏បានក្រើនរំលឹកដល់ពលរដ្ឋរបស់ខ្លួននៅបរទេស កុំឱ្យប្រើប្រាស់កញ្ឆា ទោះជាក្រោមរូបភាពណាក៏ដោយ។ នៅ សិង្ហបុរី អ្នកដែលមានទោសពាក់ព័ន្ធនឹងការប្រើប្រាស់គ្រឿងញៀនអាចត្រូវជាប់ពន្ធនាគារ ១០ ឆ្នាំ និងពិន័យជាប្រាក់ឡើងដល់ ២០,០០០ ដុល្លារសិង្ហបុរី។

ឆ្លើយតបនឹង The Straits Times អំពីការដែល អាជ្ញាធរថៃ ធ្វើឱ្យកញ្ឆាក្លាយជាថ្នាំជក់ស្របច្បាប់ អាជ្ញាធរជាតិប្រឆាំងគ្រឿងញៀនសិង្ហបុរី (CNB) បានឱ្យដឹងថា បច្ចុប្បន្ន ប្រទេសមួយចំនួនបានកែប្រែច្បាប់ ធ្វើឱ្យគ្រឿងញៀន «មានសេរីភាពជាងមុន»។ ប៉ុន្តែ CNB ច្រានចោលការដែលយល់ឃើញថា កញ្ឆាគឺជា «ថ្នាំទន់» មានផលប្រយោជន៍ផ្នែកសុខាភិបាល និងមិនសូវធ្វើឱ្យញៀន ឬមិនសូវគ្រោះថ្នាក់ធៀបនឹង «ថ្នាំរឹង»។

CNB បានលើកឡើងនូវភ័ស្តុតាផ្នែកវិទ្យាសាស្ត្រ ក្នុងនោះមានទាំងរបាយការណ៍របស់ គណៈកម្មការគ្រប់គ្រងគ្រឿងញៀនអន្តរជាតិ បង្ហាញថា កញ្ឆាគឺជាគ្រឿងញៀន និងមានគ្រោះថ្នាក់។ បើសិនជាប្រើប្រាស់កញ្ឆាក្នុងរយៈពេលយូរ អ្នកប្រើប្រាស់នឹងមានហានិភ័យកើតមានរោគសញ្ញាផ្លូវចិត្ត និងជំងឺវិកលចរិត៕

July 4, 2022

នាយករដ្ឋមន្ត្រីអូស្ត្រាលី ធ្វើទស្សនកិច្ចនៅ អ៊ុយក្រែន! សន្យាថា នឹងបង្កើនជំនួយយោធា

នាយករដ្ឋមន្ត្រីអូស្ត្រាលី លោក អាល់បានីស ទើបតែបានធ្វើទស្សនកិច្ចភ្លាមៗទៅកាន់ ប្រទេសអ៊ុយក្រែន និងបានពិភាក្សាជាមួយ ប្រធានាធិបតី ហ្សេឡែនស្គី ក្នុងនោះ លោកបានសន្យាថា នឹងផ្ដល់ជំនួយបន្ថែមប្រមាណ ១០០ លានដុល្លារអូស្ត្រាលី (ប្រហែល ៦៨ លានដុល្លារអាម៉េរិក) ដល់ប្រទេសអឺរ៉ុបខាងកើតមួយនេះ ដោយរួមមានទាំងអាវុធផងដែរ។

កាលពីព្រលប់ថ្ងៃទី ៣ កក្កដា (ម៉ោងនៅ អូស្ត្រាលី) នាយករដ្ឋមន្ត្រី អាន់ថូនី អាល់បានីស (Anthony Albanese) បានបំពេញទស្សនកិច្ចភ្លាមៗទៅកាន់ អ៊ុយក្រែន និងមានជំនួបរយៈពេល ២ ម៉ោង ជាមួយ ប្រធានាធិបតី ហ្សេឡែនស្គី នៅ រដ្ឋធានីកៀវ។ លោកនាយករដ្ឋមន្ត្រីអូស្ត្រាលី ក៏បានធ្វើទស្សនកិច្ចទៅកាន់តំបន់ក្បែរខាងដែលបានរងការខូចខាតដោយសារសង្គ្រាម។

ក្នុងជំនួបជាមួយប្រធានាធិបតីអ៊ុយក្រែន លោក អាល់បានីស បានសន្យាថា អូស្ត្រាលី នឹងជួយដល់ការស្ដារប្រទេសអ៊ុយក្រែន ឡើងវិញ បន្ទាប់ពីសង្គ្រាមបានបញ្ចប់ ប៉ុន្តែ ដើម្បីទប់ទល់នឹងស្ថានការណ៍បច្ចុប្បន្ន អូស្ត្រាលី នឹងផ្ដល់ជំនួយយោធាតម្លៃជិត ១០០ លានដុល្លារអូស្ត្រាលី ដល់ប្រទេសនេះ។

ក្នុងសេចក្ដីប្រកាសមួយដែលត្រូវបានលើកឡើងនាព្រឹកនេះ នាយករដ្ឋមន្ត្រី អាល់បានីស បានអះអាងថា ដំណើរទស្សនកិច្ច ទៅកាន់រដ្ឋធានីកៀវ របស់លោក គឺដើម្បីបញ្ជាក់យ៉ាងច្បាស់ថា អូស្ត្រាលី នឹងប្រកៀកស្មាជាមួយ ប្រជាជនអ៊ុយក្រែន។

លោក អាល់បានីស ជឿជាក់ថា ផ្លូវដើរនៅខាងមុខនៅតែមានការលំបាកច្រើន ប៉ុន្តែ អ៊ុយក្រែន នឹងមានប្រៀបជាង រុស្ស៊ី។

កញ្ចប់ជំនួយថ្មីរបស់ អូស្ត្រាលី រួមមាន រថពាសដែក Bushmaster ចំនួន ២០ គ្រឿង, រថពាសដែកដឹកទាហាន M113 ចំនួន ១៤ គ្រឿង, ឧបករណ៍យោធាជាច្រើនទៀតដូចជា យន្តហោះគ្មានមនុស្សបើក រួមនឹងជំនួយតាមរយៈ NATO ជាដើម។

ជាងនេះ អូស្ត្រាលី ក៏បានសន្យាផ្ដល់ជំនួយជិត ៩ លានដុល្លារអូស្ត្រាលី ដើម្បីជួយបង្កើនសមត្ថភាពរបស់កងទ័ពការពារព្រំដែនរបស់ អ៊ុយក្រែន ព្រមទាំងមិនយកពន្ធចំពោះទំនិញដែលនាំចូលពីប្រទេសនេះផងដែរ។

កញ្ចប់ជំនួយថ្មីបំផុតនេះ បានរួមចំណែកធ្វើឱ្យខ្ទង់ជំនួយយោធារបស់ អូស្ត្រាលី សម្រាប់ អ៊ុយក្រែន ឡើងដល់ជិត ៣៩០ លានដុល្លារអូស្ត្រាលី (២៦៥,០០០,០០០ ដុល្លារអាម៉េរិក)។ ក្រៅពីនេះ អូស្ត្រាលី ក៏បានផ្ដល់ជំនួយមនុស្សធម៌ជាច្រើនដល់ អ៊ុយក្រែន ផងដែរ៕

July 4, 2022

ប្រធានាធិបតីអ៊ុយក្រែន ប្រកាសថា នឹងវាយដណ្ដើមយក Lysychansk មកវិញ

លោក ហ្សេឡែនស្គី ទទួលស្គាល់ថា កងទ័ពអ៊ុយក្រែន បានដកថយចេញពីទីក្រុង Lysychansk ប៉ុន្តែ ប្រកាសថា នឹងដណ្ដើមយកមកវិញដោយប្រើប្រាស់អាវុធរយៈចម្ងាយឆ្ងាយរបស់ បស្ចិមលោក។

«បើសិនជាមេបញ្ជាការកងទ័ពរបស់យើងដកទាហានចេញពីទីតាំងមួយចំនួននៅក្នុងសមរភូមិ ជាទីដែលកម្លាំងអាវុធធុនធ្ងន់របស់សត្រូវមានប្រៀបជាង ប្រការនេះគឺមានន័យតែម្យ៉ាងគត់ ហើយបញ្ហានេះក៏ត្រឹមត្រូវសម្រាប់ Lysychansk» ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី ឱ្យដឹងដូច្នេះកាលពីថ្ងៃទី ៣ កក្កដា។ «យើងនឹងត្រលប់មកវិញ ដោយប្រើប្រាស់យុទ្ធសាស្ត្ររបស់យើង និងគាំទ្រដោយការផ្គត់ផ្គង់អាវុធទំនើបដែលមានកាន់តែច្រើន»។

លោក ហ្សេឡែនស្គី បញ្ជាក់ថា រុស្ស៊ី កំពុងផ្ដោតអាវុធធុនធ្ងន់ទៅលើសមរភូមិ Donbass នៅភាគខាងកើតប្រទេស ប៉ុន្តែ អ៊ុយក្រែន នឹងឆ្លើយតបដោយអាវុធរយៈចម្ងាយឆ្ងាយ ដូចជាប្រព័ន្ធកាំជ្រួចហ្វូងប្រតិកម្មរហ័ស HIMARS ដែលផ្ដល់ជំនួយដោយ សហរដ្ឋអាម៉េរិក។

មុននោះមួយថ្ងៃ ក្រសួងការពារជាតិរុស្ស៊ី បានប្រកាសថា កងទ័ពប្រទេសនេះ និងក្រុមផ្ដាច់ខ្លួន «បានរំដោះសាធារណរដ្ឋប្រជាមានិត Lugansk (LPR)»។ យុទ្ធនាការយោធាប្រព្រឹត្តឡើងដោយជោគជ័យ កងកម្លាំងប្រដាប់អាវុធរបស់ សហព័ន្ធរុស្ស៊ី និងបណ្ដាអង្គភាពរបស់ LPR កំពុងគ្រប់គ្រងទីក្រុង Lysychansk និងបណ្ដាតំបន់ប្រជុំជននៅក្បែរនោះ» ប្រកាសរបស់ ក្រសួងការពារជាតិរុស្ស៊ី មានឃ្លាសរសេរដូច្នេះ។

អ្នកជំនាញផ្នែកយោធានៅ បស្ចិមលោក យល់ថា ការគ្រប់គ្រងបាន Lysychansk គឺជាជ័យជម្នះរបស់ រុស្ស៊ី។ ប្រការនេះមានន័យថា រុស្ស៊ី និងក្រុមផ្ដាច់ខ្លួន កំពុងគ្រប់គ្រងមួយភាគធំនៃតំបន់ Donbass ដែលមាន ២ ខេត្ត គឺ Lugansk និង Donetsk ជាតំបន់ដែលមានអណ្ដូងរ៉ែច្រើន និងវាលស្រែធំធេង។

July 4, 2022

Category: អន្តរជាតិ