មន្ទីរពេទ្យមួយនៅប្រទេស អ៊ីស្រាអែល ចាប់ផ្ដើមចាក់វ៉ាក់សាំងបង្ការជំងឺ កូវីដ-១៩ ដូសទី ៤ ដល់ក្រុមមនុស្សដែលត្រូវពិសោធន៍ រួមមាន បុគ្គលិកសុខាភិបាលជាដើម នៅក្នុងស្ថានភាពដែល អូមីក្រុង នៅតែបន្តរាតត្បាត។
មជ្ឈមណ្ឌលសុខាភិបាល Sheba នៅក្បែរទីក្រុង តែល អាវីវ របស់ប្រទេស អ៊ីស្រាអែល កាលពីម្សិលមិញ បានចាប់ផ្ដើមយុទ្ធនាការចាក់វ៉ាក់សាំងដូសទី ៤ សម្រាប់បុគ្គលិកសុខាភិបាល និងបានហៅយុទ្ធនាការនេះថាជាការស្រាវជ្រាវធំដំបូងស្ដីពីសមត្ថភាពទប់ទល់នឹង វ៉ារ្យ៉ង់ អូមីក្រុង នៅលើអ្នកដែលបានទទួលការចាក់វ៉ាក់សាំងដូសជំរុញទី ២ (ដូសទី ៤)។
«ការពិសោធនៅលើមនុស្សចំនួន ១៥០ នាក់ នឹងកំណត់បាននូវប្រសិទ្ធភាពក្នុងការបង្កើតអង្គបដិប្រាណរបស់ វ៉ាក់សាំង ក៏ដូចជាកម្រិតសុវត្ថិភាព ដើម្បីវាយតម្លៃឱ្យបានច្បាស់ថា ត្រូវការចាក់វ៉ាក់សាំងដូសទី ៤ ដែរ ឬអត់។ លទ្ធផលនៃការពិសោធនឹងត្រូវបានដាក់ជូនក្រសួងសុខាភិបាល នៅប្រមាណ ២ សប្ដាហ៍ខាងមុខ» អ្នកនាំពាក្យរបស់មជ្ឈមណ្ឌលសុខាភិបាល Sheba បានឱ្យដឹងដូច្នេះ។
ក្រុមមន្ត្រីរបស់ អ៊ីស្រាអែល ក៏បានប្រកាសកាត់បន្ថយពេលវេលាចន្លោះពីដូសទី ២ ទៅដូសជំរុញ ពី ៥ ខែ មកនៅត្រឹម ៣ ខែ ដើម្បីទប់ទល់នឹង អូមីក្រុង។
អ៊ីស្រាអែល គឺជាប្រទេសនាំមុខគេមួយ ក្នុងចំណោមប្រទេសដែលបានធ្វើយុទ្ធនាការចាក់វ៉ាក់សាំងមុនគេ។ ពលរដ្ឋ ៦៣% ក្នុងចំណោម ៩.៤ លាននាក់របស់ អ៊ីស្រាអែល បានទទួលការចាក់វ៉ាក់សាំង ២ ដូសរួចហើយ ខណៈដែលពលរដ្ឋជិត ៤៥% ត្រូវបានចាក់ដូសទី ។ ប្រទេសនេះ បានរកឃើញករណីឆ្លង ឬសង្ស័យថាឆ្លង អូមីក្រុង ជិត ២,០០០ នាក់ ក្នុងចំណោមករណីឆ្លងថ្មីសរុបដែលបានកើនឡើងក្នុងសប្ដាហ៍កន្លង៕
