Category: សុខភាព

វីវរហើយថៃ!! អ្នកទោសអង់គ្លេសដែលបញ្ជូនពីពន្ធនាគារប្រទេសថៃ ដួលសន្លប់ សង្ស័យឆ្លងវីរុសកូរ៉ូណា…
ពន្ធនាគារមួយនៅក្នុងប្រទេសអង់គ្លេសត្រូវបានបិទទាំងស្រុងកាលពីថ្ងៃអង្គារ ទី11 កុម្ភៈ(ម្សិលមិញ) បន្ទាប់ពីប្រទះឃើញអ្នកទោសម្នាក់ដួលសន្លប់នៅក្នុងបន្ទប់ឃុំឃាំង បន្ទាប់ពីអ្នកទោសម្នាក់នោះត្រូវបានបញ្ជូនទៅពីពន្ធនាគារនៅក្នុងប្រទេសថៃ។
សារព័ត៌មាន ឌឹ សាន់ និងដេលី មែល បានរាយការណ៍ថា អ្នកទោសម្នាក់នេះបានជាប់ឃុំឃាំងនៅក្នុងប្រទេសថៃ មុននឹងត្រូវបញ្ជូនត្រឡប់ទៅប្រទេសអង់គ្លេស និងត្រូវបានបន្តឃុំខ្លួននៅក្នុងពន្ធនាគារ ប៊ុលលីងដន ក្នុងទីក្រុង បៃឆេស្ទើរ មណ្ឌល អក់ស្វើត សៀរ។
ពន្ធនាគារទាំងមូលត្រូវបានបិទចោលទាំងស្រុង និងមកដល់ពេលនេះ មានអ្នកទោសយ៉ាងតិច 3នាក់ត្រូវបាននាំខ្លួនទៅពិនិត្យរកមេរោគវីរុសកូរ៉ូណាប្រភេទថ្មី ដែលនៅពេលនេះនៅក្នុងប្រទេសចិន ដែលជាដើមកំណើតនៃការឆ្លងរាលដាល បានរកឃើញអ្នកឆ្លងមេរោគរួចហើយ 45,88នាក់ ក្នុងនោះស្លាប់ 1,115នាក់ ចំណែកអ្នកដែលឆ្លងមេរោគនៅក្នុងប្រទេសផ្សេងៗ និងតាមតំបន់នានាក្រៅប្រទេសចិន មាន 319នាក់ ក្នុងនោះស្លាប់ 2នាក់។
ខណៈពេលជាមួយគ្នា ប្រភពព័ត៌មាននៅបានប្រាប់ឱ្យដឹងទៀតថា អ្នកទោសដែលមានជំងឺម្នាក់នោះត្រូវបានបញ្ជូនទៅព្យាបាលនៅឯមន្ទីរពេទ្យពិសេសមួយ នៅផ្នែកខាងក្រៅរបងពន្ធនាគារ។ “ប្រហែលជា គេទើបតែត្រូវបញ្ជូនមកពីពន្ធនាគារក្នុងប្រទេសថៃ មកដល់ប៊ុលលីងដននេះកាលពីពេលថ្មីៗនេះ ក្រោមគ្រោងការផ្លាស់ប្ដូរអ្នកទោសអន្តរជាតិ” ប្រភពព័ត៌មានបញ្ជាក់។
“ពេលនេះ គេកំពុងដេកព្យាបាលនៅឯមន្ទីរពេទ្យពិសេសក្រៅពន្ធនាគារ ចំណែក 2នាក់ទៀត មានអាការស្រដៀងអ្នកកើតជំងឺគ្រុនផ្ដាសាយ និងកំពុងព្យាបាលនៅឯមន្ទីរពេទ្យក្នុងពន្ធនាគារ” ប្រភពព័ត៌មានបានបញ្ជាក់បន្ថែម។
គេជឿថា អ្នកទោសទាំង 3នាក់ស្ថិតនៅក្នុងពន្ធនាគារតែមួយជាមួយគ្នា ដែលបណ្ដាលឱ្យគិលានុបដ្ឋាកម្នាក់ដែលធ្លាប់មើលថែអាការជំងឺឱ្យពួកគេ ត្រូវបានបង្ខាំងខ្លួនដើម្បីពិនិត្យរកមេរោគដែរ ដែលនេះជាផ្នែកមួយនៃវិធានការការពារទុកជាមុន។
កាលពីថ្ងៃអង្គារម្សិលមិញ គេបានមើលឃើញ ក្រុមមន្ត្រីសាធារណៈសុខាភិបាលអង់គ្លេស ចូលទៅក្នុងពន្ធនាគារ ដើម្បីផ្ដល់ការជួយសង្គ្រោះអ្នកទោស និងមន្ត្រីពន្ធនាគារចំនួន 1,114នាក់ ខណៈដែលគ្រូពេទ្យក្នុងសម្លៀកបំពាក់ឈុតការពារ បានចូលទៅត្រួតពិនិត្យខាងក្នុងអគារដែលជាកន្លែងបន្ទប់ឃុំឃាំងពួកអ្នកទោសដែលសង្ស័យថា បានឆ្លងមេរោគ។
រហូតមកដល់ល្ងាចថ្ងៃអង្គារម្សិលមិញ តាមរយៈព័ត៌មានរបស់ក្រសួងសាធារណៈសុខាភិបាលអង់គ្លេស បានរកឃើញថា មានប្រជាជនចំនួន 1,358នាក់ ត្រូវបាននាំខ្លួនទៅពិនិត្យរកមេរោគវីរុសកូរ៉ូណាប្រភេទថ្មី ដោយនៅក្នុងចំនួននោះ មាន 1,350នាក់មានលទ្ធផលអវិជ្ជមាន(គ្មានមេរោគ) តែមាន 8នាក់ដែលលទ្ធផលចេញមក វិជ្ជមាន(មានមេរោគ)៕
ប្រភព៖ សារព័ត៌មាន ឌឹ សាន់ និងដេលី មែល
February 12, 2020
ដំណឹងល្អពីអឺរ៉ូប! អង់គ្លេសពិសោធវ៉ាក់សាំងថ្មី ទប់ស្កាត់វីរុសកូរ៉ូណា “Corvid-19″
ការប្រកាសរបស់ក្រុមអ្នកវិទ្យាសាស្ត្រនៃមហាវិទ្យាល័យ Imperial College London ជួយឱ្យអង់គ្លេសក្លាយជាប្រទេសទី2 ដែលបានប្រកាសពិសោធវ៉ាក់សាំងទប់ស្កាត់មេរោគ Corvid-19 នៅលើសត្វ។
ក្រុមអ្នកវិទ្យាសាស្ត្រនៅមហាវិទ្យាល័យ Imperial College London (ICL) បានឱ្យដឹងថា៖ “យើងទើបបានពិសោធវ៉ាក់សាំងនៅលើសត្វកណ្ដុរ”។ លោក Paul McKay ធ្វើការនៅ ICL សង្ឃឹមថា “ក្នុងរយៈពេលប៉ុន្មានសប្ដាហ៍ខាងមុខ នឹងអាចដឹងអំពីប្រតិកម្មនៅលើសត្វកណ្ដុរ ជាវិធីដែលអង្គបដិប្រាណក្នុងឈាមរបស់ពួកវា ទប់ទល់នឹងវីរុសកូរ៉ូណា Corvid-19។
ICL ក៏សង្ឃឹមដែរថា ការសិក្សាស្រាវជ្រាវអំពីមេរោគកូរ៉ូណាដែលធ្លាប់បានបង្កជាអាសន្នរោគ SARS កើតឡើងកាលពី 2ទសវត្សរ៍មុន នឹងជួយកាត់បន្ថយពេលនៃការបង្កើតវ៉ាក់សាំង។ “ក្រោយពីបញ្ចប់ការពិសោធនៅតំណាក់កាលទី1 ដែលមានរយៈពេល 2-3ខែ យើងនឹងចាប់ផ្ដើមពិសោធនៅលើមនុស្សភ្លាម ដោយប្រើរយៈវេលាដូចគ្នា។ ដូច្នេះ អាចថានៅចុងឆ្នាំនេះ យើងនឹងមានវ៉ាក់សាំងសមស្របមួយប្រភេទ ដើម្បីប្រើប្រាស់សម្រាប់មនុស្ស”។ នេះបើតាមប្រសាសន៍របស់លោក Paul McKay។
សូមបញ្ជាក់ថា ប្រទេសអង់គ្លេសមានអ្នកឆ្លងវីរុសកូរ៉ូណា Corvid-19 ចំនួន 8នាក់ បង្ខំឱ្យសាខាចំនួន2នៃមជ្ឈមណ្ឌលសុខាភិបាលទីក្រុង Brighton ដែលមានបុគ្គលិកយ៉ាងតិច2នាក់បានឆ្លងមេរោគនេះ ត្រូវបិទទ្វារ។
ដំណើរការនៃការបង្កើតវ៉ាក់សាំងក្នុងបន្ទប់ពិសោធ ជាធម្មតា តែងត្រូវចំណាយពេលរាប់ឆ្នាំ ក្នុងនោះ គេត្រូវពិសោធនៅលើសត្វតូច រួចពិសោធលើសត្វធំ មុននឹងអាចពិសោធនៅលើមនុស្ស។ អ្នកវិទ្យាសាស្ត្រ ក៏ត្រូវពិនិត្យទៅលើប្រសិទ្ធភាព និងសុវត្ថិភាពរបស់វ៉ាក់សាំង មុនពេលផលិតជាផ្លូវការ និងផលិតក្នុងបរិមាណច្រើន។
ក្រុមអ្នកវិទ្យាសាស្ត្រនៅលើពិភពលោក កំពុងដុតដៃដុតជើង ដើម្បីស្វែងរកវិធានការទប់ស្កាត់វីរុសប្រភេទថ្មី ដែលចាប់កំណើតចេញពីទីក្រុង Wuhan ប្រទេសចិននេះ។ កាលពីថ្ងៃទី 9កុម្ភៈ អ្នកវិទ្យាសាស្ត្រមួយក្រុម មកពីសកលវិទ្យាល័យថុងជី (Tongji University) និងក្រុមហ៊ុនមួយនៅសៀងហៃ កំពុងធ្វើការពិសោធវ៉ាក់សាំងប្រភេទ m-RNA សម្រាប់ទប់ស្កាត់វីរុសកូរ៉ូណា Corvid-19 នៅលើសត្វកណ្ដុរតូចៗចំនួនជាង100ក្បាល។ ក្រុមអ្នកវិទ្យាសាស្ត្រនេះ អះអាងថា បើសិនជាការពិសោធនៅលើសត្វកណ្ដុរ ប្រព្រឹត្តទៅរលូន ពួកគេនឹងចាប់ផ្ដើមពិសោធស៊ីជម្រៅជាងនេះ នៅដើមខែមេសាខាងមុខ។
ការសិក្សាស្រាវជ្រាវនៅលើពិភពលោក ទាក់ទិននឹងមេរោគកូរ៉ូណាថ្មី ភាគច្រើន ទទួលបានជំនួយហិរញ្ញវត្ថុពីសម្ព័ន្ធដើម្បីការច្នៃប្រឌិតត្រៀមបង្ការការរីករាលដាលនៃជំងឺរាតត្បាត CEPI (Coalition for Epidemic Preparedness Innovations)។ អង្គការនេះ បានត្រូវបង្កើតឡើងកាលពីឆ្នាំ 2017 នៅឯវេទិកាសេដ្ឋកិច្ចពិភពលោក ក្នុងទីក្រុង Davos នៃប្រទេសស្វុីស ដើម្បីជួយដល់បណ្ដាក្រុមហ៊ុនផលិតឱសថ និងមហាវិទ្យាល័យនានា សហការគ្នា សំដៅទប់ស្កាត់ជំងឺឆ្លងទាំងឡាយដែលមានគ្រោះថ្នាក់ខ្លាំង។
អាសន្នរោគកូរ៉ូណា Covid-19 បានចាប់ផ្ដើមផ្ទុះឆ្លងរាលដាលចេញពីក្រុង Wuhan ខេត្ត Hubei ប្រទេសចិន កាលពីចុងឆ្នាំ 2019។ គិតមកដល់ថ្ងៃនេះ (12កុម្ភៈ) Covid-19 បានរាតត្បាតដល់ប្រទេស និងតំបន់ចំនួន 26 នៅទូទាំងពិភពលោក បណ្ដាលឱ្យមានមនុស្សស្លាប់ 1,018នាក់ និងអ្នកផ្ទុកមេរោគនេះ ឡើងដល់ជាង 45,183នាក់ ក្នុងនោះ 8,242នាក់ កំពុងប្រឈមនឹងការស្លាប់៕
ប្រភព៖ សារព័ត៌មានបរទេស
February 12, 2020
អង្គការសុខភាពពិភពលោក ប្រកាសប្រើឈ្មោះថ្មីនៃអាសន្នរោគកូរ៉ូណាជាផ្លូវការ
អង្គការសុខភាពពិភពលោក (WHO) បានប្រកាសឱ្យប្រើប្រាស់ឈ្មោះផ្លូវការនៃអាសន្នរោគកូរ៉ូណាប្រភទថ្មី ដែលបង្កឱ្យរលាកសួត នោះគឺឈ្មោះ “Corvid-19″។
“យើងបានដាក់ឈ្មោះឱ្យអាសន្នរោគនេះថា “Covid-19” នេះគឺជាប្រសាសន៍របស់លោក Tedros Adhanom Ghebreyesus ប្រធានអង្គការសុខភាពពិភពលោក ដែលបានថ្លែងនៅទីក្រុងហ្សឺណែវ ប្រទេសស្វុីសកាលពីម្សិលមិញ។ លោកបានបកស្រាយថា ពាក្យថា “co” គឺជាពាក្យកាត់របស់ corona។ ចំណែក “vi” គឺ virus និង “d” គឺ disease (រោគ/ជំងឺ)។
លោក Tedros ឱ្យដឹងថា ឈ្មោះ “Covid-19” ត្រូវបានគេជ្រើសរើសយកមកប្រើ ព្រោះតែវាមិនមានជាប់ទាក់ទិននឹងទីតាំង ប្រភេទសត្វ បុគ្គល ឬក្រុមមនុស្សណាមួយ ទន្ទឹមនឹងនេះ វាក៏ងាយឱ្យយើងបញ្ចេញសំឡេង ហើយវាក៏ពាក់ព័ន្ធជាមួយនឹងប្រភេទជំងឺ”។
លោក Tedros Adhanom Ghebreyesus ប្រធានអង្គការសុខភាពពិភពលោក (WHO)
សូមរំឭកថា មុននោះ WHO បានហៅឈ្មោះបណ្ដោះអាសន្ននៃអាសន្នរោគដែលបង្កឱ្យរលាកសួតនេះថា 2019-nCoV។ ចំណែកគណៈកម្មការសុខាភិបាលចិនវិញ ហៅអាសន្នរោគនេះថា អាសន្នរោគរលាកសួតកូរ៉ូណាថ្មី សរសេរកាត់ថា NCP។
Covid-19 បានចាប់ផ្ដើមផ្ទុះឆ្លងរាលដាលចេញពីក្រុង Wuhan ខេត្ត Hubei ប្រទេសចិន និងបានរាតត្បាតដល់ប្រទេស និងតំបន់ចំនួន 26 នៅទូទាំងពិភពលោក បណ្ដាលឱ្យមានមនុស្សស្លាប់ 1,018នាក់ និងអ្នកមានផ្ទុកមេរោគនេះ ឡើងដល់ជាង 45,182នាក់៕
ប្រភព៖ សារព័ត៌មានបរទេស
February 12, 2020
បទយកការណ៍រួម ស្ដីពីករណីវីរុស៖ មនុស្សសឹងតែទាំងអស់នៅក្នុងក្រុមរស់នៅជុំគ្នា ឬក្នុងក្រុមគ្រួសារ សុទ្ធតែត្រូវឆ្លងមេរោគ។ ចំនួនអ្នកស្លាប់ប្រចាំថ្ងៃ បំបែកឯកទគ្គកម្មលើស 100នាក់។ “ត្រាំ-ស៊ី” រំពឹងថា ខែមេសា វីរុសនឹងរលាយបាត់អស់…
ទីភ្នាក់ងារសារព័ត៌មាន សៅត៍ ឆាយណា ម៉នីង ផូស្ត បានរាយការណ៍ថា គណៈកម្មាធិការសុខាភិបាលចិន បានថ្លែងថា(ថ្ងៃទី11 កុម្ភៈ) ស្ថានការណ៍មេរោគវីរុសកូរ៉ូណាប្រភេទថ្មីដែលកំពុងរាតត្បាត បានធ្វើឱ្យចំនួនអ្នកស្លាប់ពីវីរុសកូរ៉ូណានៅថ្ងៃចន្ទ(ទី10 កុម្ភៈ)បំបែកឯកទគ្គកម្មប្រចាំថ្ងៃក្នុងចំនួន 108នាក់ ដែលអាចរាប់បានថា នេះជាលើកដំបូងហើយ ដែលចំនួនអ្នកស្លាប់ក្នុង 1ថ្ងៃបានកើនឡើងលើស 100នាក់ ធ្វើឱ្យចំនួនអ្នកស្លាប់ដោយសារមេរោគវីរុសប្រភេទថ្មីនៅក្នុងប្រទេសចិនរួមទាំងអស់ស្មើនឹង 1,018នាក់។
សម្រាប់ករណីឆ្លងមេរោគ ដែលបានទទួលការអះអាងថ្មី គឺស្មើនឹង 2,478នាក់ ធ្វើឱ្យចំនួនអ្នកឆ្លងមេរោគសរុបទាំងអស់មានចំនួន 42,638នាក់។ នេះជាព័ត៌មានដែលគិតមកដល់ត្រឹមថ្ងៃចន្ទ ទី10 កុម្ភៈ។
ក្នុងក្រុមអ្នកស្លាប់ដោយសារមេរោគវីរុសកូរ៉ូណា កាលពីថ្ងៃទី10 កុម្ភៈចំនួន 108នាក់នោះ មាន 103នាក់ស្ថិតនៅក្នុងមណ្ឌល ហ៊ូពេយ។
83% នៃការឆ្លង គឺឆ្លងនៅក្នុងក្រុមតែមួយ ឬជាការឆ្លងមេរោគក្នុងក្រុមគ្រួសារ
ក្នុងថ្ងៃទី11 កុម្ភៈ ម្សិលមិញ លោក អ៊ូ ជុន យ៉ូ ប្រធានក្រុមអ្នកវិទ្យាសាស្ត្រប្រចាំមជ្ឈមណ្ឌលគ្រប់គ្រង និងការពារមេរោគរាតត្បាតនៃប្រទេសចិន បានថ្លែងសរុបស្ថានការណ៍កន្លងមកថា អ្នកជំនាញការបានរកឃើញថា ការឆ្លងរាលដាលរវាងមនុស្សនៅក្នុងក្រុមតែមួយនៅក្នុងប្រទេសចិន ដែលមានចំនួនជិត 1,000ករណីនោះ មាន 83ភាគរយ ជាការឆ្លងមេរោគក្នុងក្រុមគ្រួសារ ក្រៅពីនោះ ជាការឆ្លងមេរោគនៅក្នុងមន្ទីរពេទ្យ សាលារៀន និងហាងផ្សារទំនើប(កន្លែងដែលមានមនុស្សច្រើន)។
ក្នុងករណីការឆ្លងមេរោគក្នុងក្រុមនេះ មាន 86ភាគរយ ជាការចម្លងមេរោគជំនាន់ទី1 ឬជំនាន់ទី2 ពោលគឺ អ្នកដែលស្នាក់នៅ ឬធ្វើដំណើរក្នុងមណ្ឌលហ៊ូពេយឆ្លងមេរោគវីរុសមក និងចម្លងមេរោគទៅអ្នកដែលនៅជិតស្និទ្ធជាមួយពួកគេ ដូចជា សមាជិកក្នុងគ្រួសារ ឬអ្នកចូលរួមញ៉ាំអាហារជាមួយពួកគេ។
សម្រាប់ការឆ្លងមេរោគជំនាន់ទី3 និងជំនាន់ទី4 គឺអ្នកដែលឆ្លងមេរោគដោយមិនបានបង្ហាញអាការច្បាស់លាស់ចេញមក តែជាជំងឺឆ្លង និងចម្លងមេរោគចេញទៅ។
ជនជាតិចិន 160លាននាក់កំពុងនាំគ្នាធ្វើដំណើរវិលត្រឡប់ទៅទីក្រុងដែលពួកគេធ្វើការក្នុងអំឡុងសប្ដាហ៍នេះ បន្ទាប់ពីបានឈប់សម្រាករយៈពេលយូរជាងឆ្នាំមុនៗ ដោយសារតែរដ្ឋាភិបាលបានពន្យារពេលថ្ងៃឈប់សម្រាកយូរជាងមុន ដើម្បីគ្រប់គ្រងមេរោគវីរុសកូរ៉ូណាឆ្លងរាលដាលរហូតទៅដល់ថ្ងៃទី18 កុម្ភៈ។ ក្នុងរូបភាព ជនជាតិចិនកំពុងឈររង់ចាំនៅក្នុងស្ថានីយរថភ្លើងក្រោមដីក្នុងទីក្រុងប៉េកាំង កាលពីថ្ងៃទី10 កុម្ភៈ(រូបភាពរ៉យទ័រ)។
ចិនអះអាងថា ការគ្រប់គ្រងជំងឺរាតត្បាត “ត្រូវតែមិនប៉ះពាល់ដល់ធុរកិច្ច”
ប្រជាជនចិន ចាប់ផ្ដើមត្រឡប់មកធ្វើការនៅថ្ងៃចន្ទ ក្រោយពីបានឈប់សម្រាកយូរថ្ងៃក្នុងពិធីបុណ្យចូលឆ្នាំចិន ដែលរដ្ឋាភិបាលបានពន្យារពេលថ្ងៃឈប់សម្រាក ដែលនេះជាការរំពឹងថា នឹងមានប្រជាជនដល់ទៅ 160លាននាក់នឹងនាំគ្នាធ្វើដំណើរវិលត្រឡប់មកទីក្រុងដែលពួកគេធ្វើការក្នុងអំឡុងសប្ដាហ៍នេះ។ នេះបើតាមការបង្ហើបឱ្យដឹងរបស់លោក ស៊ី យ៉ា វ៉ា រដ្ឋមន្ត្រីក្រសួងគមនាគមន៍ចិន។
ទាំងអស់នេះ មេរោគវីរុសកូរ៉ូណាបានឆ្លងរាលដាលក្នុងអំឡុងពិធីបុណ្យចូលឆ្នាំចិន ដែលជារដូវធ្វើដំណើរ ដែលមានជនជាតិចិនជាច្រើនលាននាក់ បានធ្វើដំណើរទៅប្រារព្ធពិធីបុណ្យចូលឆ្នាំថ្មីតាមប្រពៃណីជាមួយក្រុមគ្រួសារ។ រដ្ឋាភិបាលចិនបានពន្យារពេលថ្ងៃឈប់សម្រាកបុណ្យចូលឆ្នាំចិនរហូតដល់ថ្ងៃទី18 កុម្ភៈ ដើម្បីគ្រប់គ្រងការឆ្លងរាលដាលមេរោគ ខណៈដែលស្ថានីយដឹកជញ្ជូនអ្នកដំណើរជាច្រើនកន្លែងបានបិទដំណើរការ ធ្វើឱ្យការធ្វើដំណើរទៅមករបស់ប្រជាជនត្រូវបានកម្រិត។
រដ្ឋបាលក្នុងតំបន់មួយចំនួនបានកំណត់ឱ្យក្រុមហ៊ុនត្រូវមកចុះបញ្ជី និងសុំការអនុញ្ញាត មុននឹងចាប់ផ្ដើមបញ្ឆេះម៉ាស៊ីនដំណើរការផលិតកម្ម។ បើក្រុមហ៊ុនណាចាប់ផ្ដើមដំណើរការធ្វើការដោយមិនបានទទួលការអនុញ្ញាត ម្ចាស់ក្រុមហ៊ុននោះ នឹងត្រូវចាប់ខ្លួន…តែមេដឹកនាំក្នុងក្រុងប៉េកាំង បានថ្លែងប្រឆាំងនឹងការគ្រប់គ្រងដែលតឹងរ៉ឹងជ្រុលហួសហេតុពេកនេះ។
លោក អ៊ូ សៀវលី អគ្គនាយកនៃគណៈកម្មាធិការការផ្លាស់ប្ដូរ និងការអភិវឌ្ឍ ដែលជាអង្គភាពរៀបចំផែនការសេដ្ឋកិច្ចរបស់ប្រទេស បានថ្លែងនៅក្នុងទីប្រជុំព័ត៌មាននៅថ្ងៃទី11 កុម្ភៈ ម្សិលមិញថា នឹងមិនឱ្យមានការចេញច្បាប់ ឬវិធានការកម្រិតការវិលត្រឡប់មកធ្វើការវិញ ឬដំណើរការផលិតកម្មបែបភ័យភ្ញាក់ផ្អើលជ្រុលហួសហេតុនោះទេ។
“ត្រាំ” រំពឹងថា វីរុសកូរ៉ូណានឹងបាត់ទៅវិញក្នុងអំឡុងខែមេសា…
នៅថ្ងៃចន្ទ ទី10 កុម្ភៈ ប្រធានាធិបតី ដូណាល់ ត្រាំ នៃប្រទេសអាមេរិក បានថ្លែងពីការរំពឹងទុកថា មេរោគវីរុសកូរ៉ូណា នឹងឈប់រាតត្បាតនៅក្នុងខែមេសា ជាពេលដែលស្ថានភាពធាតុអាកាសកាន់តែក្ដៅឡើង។
“ជាធម្មតា វីរុសនឹងបាត់ទៅវិញនៅក្នុងអំឡុងខែមេសា” ត្រាំ ប្រាប់ទៅអ្នកសារព័ត៌មាននៅឯសេតវិមាន ក្នុងទីក្រុងវ៉ាស៊ីនតោន និងបាននិយាយថា “ខ្ញុំបាននិយាយជាមួយលោកប្រធានាធិបតី ស៊ី(ជីនភីង)រួចហើយកាលពីយប់ថ្ងៃម្សិលម្ង៉ៃ គាត់មានជំនឿទុកចិត្តខ្លាំងថា ក្នុងអំឡុងខែមេសា ធាតុអាកាសដែលចាប់ផ្ដើមកាន់តែក្ដៅឡើង នឹងជួយសម្លាប់វីរុស”
ប្រភព៖ សារព័ត៌មានបរទេស
February 12, 2020
គួរឱ្យខ្លាច!! ជនជាតិឥណ្ឌូនេស៊ី នៅតែនិយមហូបសាច់សត្វប្រចៀវ មិនខ្វល់ពីលទ្ធផលស្រាវជ្រាវដែលថា សត្វប្រចៀវជាដើមកំណើតនៃវីរុសកូរ៉ូណា…
សាច់សត្វប្រចៀវនៅតែទទួលបានការពេញនិយមនៅក្នុងតំបន់មួយចំនួននៃប្រទេសឥណ្ឌូនេស៊ី ទោះជាលទ្ធផលនៃការស្រាវជ្រាវបានបង្ហាញថា មេរោគវីរុសកូរ៉ូណាដែលកំពុងរាតត្បាតខ្លាំងនៅក្នុងប្រទេសចិន និងឆ្លងរាលដាលទៅប្រទេសជាច្រើននោះ អាចមានដើមកំណើតពីសត្វប្រចៀវ មុននឹងចម្លងមេរោគចូលមកមនុស្សក៏ដោយ។
តាំងពីដើមមក សាច់សត្វប្រចៀវត្រូវបានគេនិយមបរិភោគនៅក្នុងក្រុមជនកុលសម្ព័ន្ធ “មិណាហាសា” នៅ ស៊ុឡាវេស៊ីខាងជើងក្នុងរូបបែបជា សម្លខ្ទិះប្រចៀវ ដោយប្រើសត្វប្រចៀវទាំងមូលដាក់ចូលក្នុងសម្លខ្ទិះ ក្នុងនោះរួមទាំងក្បាល និងស្លាបរបស់វាផងដែរ។
“វា(មេរោគវីរុសកូរ៉ូណា)មិនប៉ះពាល់ដល់ការលក់ដូរទេ” ស្ទែនលី ធីមប៊ូលេង អ្នកលក់សាច់សត្វប្រចៀវបានផ្ដល់សម្ភាសនៅកន្លែងលក់សាច់សត្វប្រចៀវនៅក្នុងទីក្រុងតូម៉ូហន ក្នុងស៊ុឡាវេស៊ីខាងជើង “ការពិតគឺ វានៅតែលក់ដាច់ និងលក់អស់គ្មានសល់ដូចធម្មតា”។
ជាមធ្យមក្នុង 1ថ្ងៃ ធីមប៊ូលេង លក់សត្វប្រចៀវបានប្រមាណជា 50-60ក្បាល តែបើសិនជាក្នុងអំឡុងពិធីបុណ្យផ្សេងៗផងនោះ គាត់ធ្លាប់លក់បានច្រើនបំផុតដល់ទៅ 600ក្បាលឯណោះ។ “ប្រចៀវជាអាហារប្រពៃណីដែលទទួលបានការពេញនិយមខ្លាំង ជាពិសេសនៅស៊ុឡាវេស៊ីខាងជើង” វីលៀម វី.វ៉ង់សូ ប្រាប់ទៅអ្នកយកព័ត៌មានរ៉យទ័រ។ អ្នកជំនាញការខាងចំណីអាហារឥណ្ឌូនេស៊ីបានប្រាប់ថា “កន្លែងដែលខ្ញុំចូលចិត្តជាងគេ គឺស្លាបរបស់វា”។
ក្រពេញនៅត្រង់បរិវេណក្រោមក្លៀក នឹងត្រូវឆ្វៀលកាត់ចេញ ហើយនឹងមានការកាត់-ករបស់វាចោល ដើម្បីកម្ចាត់កិនសារបស់វា។
បន្ទាប់ពីនោះ ក៏យកខ្លួនរបស់វាទៅរោលភ្លើង ឬដុតដើម្បីយករោមចេញ មុននឹងហាន់ជាដុំៗ ហើយយកទៅធ្វើជាម្ហូបអាហាររួមជាមួយគ្រឿងទេស ម្ទេស និងខ្ទិះ រហូតបានជាមុខម្ហូបប្រពៃណី “សម្លខ្ទិះសាច់ប្រចៀវ” ឬដែលអ្នកស្រុកក្នុងតំបន់នាំគ្នាហៅថា Paniki។
គេនាំគ្នានិយាយថា មេរោគវីរុសកូរ៉ូណា មានដើមកំណើតចេញពីផ្សារលក់សាច់សត្វមួយកន្លែងនៅក្នុងទីក្រុងវូហាន ប្រទេសចិន ដែលលបលួចលក់សាច់សត្វព្រៃខុសច្បាប់ ដោយពួកអ្នកជំនាញការខាងផ្នែកសាធារណៈសុខាភិបាល ជឿថា វាមានប្រភពកំណើតពីសត្វប្រចៀវ បន្ទាប់ពីនោះក៏ចម្លងមេរោគចូលមកមនុស្ស និងអាចទៅរួចផងដែរ ដែលថា វាជាការចម្លងតាមរយៈសត្វផ្សេងៗទៀតផង។
អង្គការសុខភាពពិភពលោក បានបង្ហាញព័ត៌មានកាលពីថ្ងៃអង្គារ ទី11 កុម្ភៈថា រកឃើញអ្នកឆ្លងមេរោគវីរុសកូរ៉ូណាប្រភេទថ្មីនៅក្នុងប្រទេសចិន 42,708នាក់ ក្នុងនោះស្លាប់ 1,017នាក់ ចំណែកអ្នកឆ្លងមេរោគនៅក្នុងប្រទេសផ្សេងៗ និងតាមតំបន់នានាក្រៅពីចិន មានត្រឹមតែ 319នាក់ប៉ុណ្ណោះ ក្នុងនោះស្លាប់ 2នាក់ ម្នាក់ស្លាប់នៅហុងកុង និងម្នាក់ទៀតស្លាប់នៅប្រទេសហ្វីលីពីន។
ទោះជានៅមិនទាន់មានរបាយការណ៍អ្នកឆ្លងមេរោគនៅក្នុងប្រទេសឥណ្ឌូនេស៊ីមែន តែការឆ្លងរាលដាលដ៏គួរឱ្យភ័យខ្លាចនេះ បានជំរុញឱ្យហាងលក់ម្ហូបប្រពៃណី ឬភោជនីយដ្ឋាននៅក្នុងតំបន់ មិណាហាសា ក្នុងទីក្រុងចាការតា ត្រូវដកសត្វប្រចៀវចេញពីបញ្ជីមុខម្ហូបរបស់ពួកគេ តែយ៉ាងណាក៏ដោយ អ្នកស្រុកមិណាហាសា ក៏នៅតែនាំគ្នាដើរស្វែងរកទិញសត្វប្រចៀវមកទទួលទានតាមធម្មតាដដែល៕
ប្រភព សារព័ត៌មានរ៉យទ័រ
February 12, 2020
ប្រាប់តគ្នា !! ទទួលទានសាច់អាំងញឹកញយ កើតជំងឺមហារីក
ជារៀងរាល់ថ្ងៃ ប្រសិនបើអ្នកទទួលទានសាច់អាំងជាញឹកញាប់ពេក ឬនិយមទទួលទានសាច់អាំងរាល់ថ្ងៃ នោះមិនបានសេចក្ដីថា អ្នកកំពុងទទួលទានអាហារប៉ូវថាមពលឡើយ ផ្ទុយទៅវិញអ្នកកំពុងប្រឈមមុខជាមួយការកើតជំងឺមហារីកហើយ។ បើតាមអ្នកជំនាញបានឲ្យដឹងថា ដើម្បីទទួលទានអាហារប្រភេទសាច់អាំងទាំងឡាយ ដែលជៀសផុតពីជំងឺមហារីកបាន គួរតែទទួលទានតាមវិធីបែបនេះ៖
១.គួរអាំងបន្លែ ផ្សិត ផ្លែឈើ ជាជាងអាំងសាច់គ្រប់ប្រភេទ
២.ប្រសិនបើចង់អាំងសាច់គោ ឬត្រី គួរតែជ្រើសសាច់ណាដែលមិនមានជាប់ខ្លាញ់
៣.មិនត្រូវអាំងសាច់ដែលកក ដោយការក្លាសេ ត្រូវទុកឲ្យរលាយទឹកកកជាមុនសិន
៤.អាំងសាច់ក្នុងម៉ាស៊ីនកំដៅអាហារ microwave ២ ទៅ ៥ នាទីជាមុនសិន ដើម្បីសម្លាប់មេរោគមហារីកជាប់នឹងសាច់ ៩០ភាគរយ
៥.រុំ ឬចងអាហារឲ្យជិតមុនយកទៅអាំង រយៈពេល ១នាទីមុនអាំង ព្រោះវាជួយការពារមេរោគមិនឲ្យទុំជាប់អាហារ
៦.ហាមប្រើកំដៅភ្លើងក្ដៅខ្លាំង ក្នុងការអាំងសាច់ ព្រោះវាបណ្ដាល់ឲ្យខ្លោច ដែលជាសារធាតុបង្ករមេរោគមហារីក
៧.បើអាំងដោយចង្រ្កានហ្គាស់ ត្រូវបន្ថយសីតុណ្ហភាពឲ្យទាបបំផុត យកល្អគួរប្រើចង្រ្កានធ្យូង
៨.បើអាំងចង្រ្កានធ្យូង គួរប្រើចង្ក្រានឡួវ ជាជាងចង្ក្រានប្រើអុស
៩.ជៀសវាងអាំងសាច់កុំឲ្យខ្លោច
ជាចុងក្រោយ ប្រសិនបើអ្នកនិយមទទួលទានអាហារអាំង សូមជៀសវាងការអាំងរហូតដល់ខ្លោច ឬគ្រាមពេក ព្រោះអ្នកអាចនឹងប្រឈមមុខជាមួយជំងឺមហារីកបានគ្រប់ពេលវេលា ៕
February 12, 2020
អ្នកស្លាប់ដោយសារវីរុសកូរ៉ូណា (Covid-19) កើនដល់ 1,115នាក់ ក្នុងនោះ 8.242នាក់ កំពុងស្ថិតក្នុងស្ថានភាពធ្ងន់ធ្ងរ
អ្នកស្លាប់ថ្មីដោយសារមេរោគកូរ៉ូណា មានចំនួន 97នាក់ កើន 9,5% បើធៀបនឹងថ្ងៃម្សិលមិញ (11កុម្ភៈ) ធ្វើឱ្យចំនួនអ្នកស្លាប់សរុបឡើងដល់ 1.115នាក់ និងអ្នកបានឆ្លងមេរោគនេះ កើនដល់ 45.153នាក់។
គណៈកម្មការសុខាភិបាលខេត្ត Hubei នៃប្រទេសចិន ថ្ងៃនេះ បានប្រកាសថា អ្នកស្លាប់ថ្មីដោយសារមេរោគកូរ៉ូណា មានចំនួន 94នាក់ តិចជាង 9នាក់ បើធៀបនឹងម្សិលមិញ ធ្វើឱ្យចំនួនអ្នកស្លាប់នៅក្នុងខេត្ត Hubei ឡើងដល់ 1.068នាក់។
ខេត្ត Hubei ក៏បានរកឃើញអ្នកផ្ទុកមេរោគកូរ៉ូណាថ្មីបន្ថែម 1.638នាក់ ធ្វើឱ្យចំនួនអ្នកឆ្លងមេរោគនេះ សរុប កើនដល់ 33,366នាក់។
ចំនួនអ្នកស្លាប់ថ្មីនៅទូទាំងប្រទេសចិន (ដីគោក) គឺ 97នាក់។ អ្នកឆ្លងថ្មីមានចំនួន 1.998នាក់។ បច្ចុប្បន្ន ទូទាំងប្រទេសចិន មានអ្នកស្លាប់សរុបទាំងមុនទាំងក្រោយ គឺ 1.113នាក់ និងអ្នកឆ្លងមេរោគសរុប 44.636 នាក់។ ចំណែកអ្នកដែលបានជាសះស្បើយពីជំងឺនេះ មានចំនួន 4.633នាក់។
ដូច្នេះ គិតមកដល់ថ្ងៃនេះ នៅទូទាំងពិភពលោក មានអ្នកស្លាប់ដោយសារអាសន្នរោគកូរ់ូណា សរុប 1.115នាក់ ក្នុងនោះមាន2ករណីនៅខាងក្រៅប្រទេសចិន (ដីគោក) គឺមួយនៅហ្វីលីពីន និងមួយករណីទៀតនៅក្រុងហុងកុង។ រីឯអ្នកដែលមានផ្ទុកមេរោគនេះ មានចំនួន 45.153នាក់ ក្នុងនោះមាន 8.242នាក់ កំពុងស្ថិតក្នុងស្ថានភាពធ្ងន់ធ្ងរ។ អ្នកដែលបានព្យាបាលជាសះស្បើយនៅទូទាំងពិភពលោក មានចំនួន 4.687នាក់៕
ប្រភព៖ សារព័ត៌មានបរទេស
February 12, 2020
ក្រុមគិលានុបដ្ឋាកនៅវូហាន នាំគ្នាកោរសក់ តស៊ូមេរោគ និងមើលថែទាំអ្នកជំងឺវីរុសកូរ៉ូណា
ប្រព័ន្ធសារព័ត៌មាន ប៊ីស៊ីនីស អ៊ីនសៃឌើរ បានរាយការណ៍នៅថ្ងៃទី11 កុម្ភៈថា ក្រុមគិលានុបដ្ឋាកជនជាតិចិនដែលធ្វើដំណើរទៅប្រតិបត្តិតួនាទីនៅក្នុងទីក្រុងវូហាន បានរួមគ្នាកោរសក់ ដើម្បីងាយស្រួលក្នុងការប្រតិបត្តិភារកិច្ចតស៊ូប្រយុទ្ធប្រឆាំងនឹងការឆ្លងរាលដាលរបស់មេរោគវីរុសកូរ៉ូណាប្រភេទថ្មី។
របាយការណ៍បានឱ្យដឹងថា ការកោរសក់ក្បាលនេះ មានប្រយោជន៍ចំពោះការធ្វើការងារច្រើនប្រការ ទាំងការការពារការឆ្លងមេរោគដែលចម្លងតាមរយៈសរសៃសក់ដែលប៉ះពាល់គ្នា កាត់បន្ថយភាពប្រថុយប្រថានក្នុងការប្រឡាក់ប្រឡូសមេរោគ និងថែមទាំងជួយឱ្យការពាក់ និងដោះឧបករណ៍ការពារផ្សេងៗបានកាន់តែងាយស្រួលទៀតផង។
សម្ពាធរឿងពេលវេលាសម្រាប់បុគ្គលិកពេទ្យនៅក្នុងទីក្រុងវូហាន មានភាពខ្លាំងក្លា និងមានតម្លៃគ្រប់វិនាទី…
ការកោរសក់ដែលវែងរំសាយនៅលើក្បាលចេញ គឺជាគំរូដ៏អស្ចារ្យមួយនៃការលះបង់របស់បណ្ដាក្រុមបុគ្គលិកពេទ្យដែលកំពុងស្ថិតនៅក្នុងសមរភូមិមុខក្នុងការប្រយុទ្ធជាមួយការឆ្លងរាលដាលនៃមេរោគ។
ក្រៅពីការកាត់បន្ថយការឆ្លងរាលដាលរបស់មេរោគដែលអាចកើតឡើងហើយ ការគ្មានសក់ក្បាល នៅបានធ្វើឱ្យដំណាក់កាលនៃការពាក់ និងដោះឈុតការពារគ្រោះថ្នាក់ កាន់តែងាយស្រួលឡើងតាមឃ្លីបវីដេអូដែលបានផូស្តដោយទីភ្នាក់ងារសារព័ត៌មានស៊ីនហួរបស់ចិនទៀតផង។
សាន សៀ ដែលធ្វើការជាគិលានុបដ្ឋាកនៅក្នុងមន្ទីរពេទ្យ រឹន មីន នៃមហាវិទ្យាល័យវូហាន បានកោរសក់ទាំងអស់នៅក្បាលរបស់នាងចោលទាំងអស់កាលពីចុងខែមករានោះ បាននិយាយថា៖ “បុគ្គលិកនៅក្នុងមន្ទីរពេទ្យក្នុងទីក្រុងវូហាន នឹងត្រូវស្លៀកឈុតការពារពេញមួយថ្ងៃ និងដើម្បីសន្សំសំចៃពេលវេលាដ៏មានតម្លៃជាមួយការពាក់ និងដោះឈុតនេះពេលត្រូវចូលបន្ទប់ទឹក…ពួកយើងនឹងស្លៀកខោទឹកនោមសម្រាប់មនុស្សធំ ដើម្បីកុំឱ្យត្រូវដោះឈុតការពារនោះពេលចូលបន្ទប់ទឹក”។
អ្នកព្យាបាលដោយការធ្វើចលនាមកពីទីក្រុងប៉េកាំង លោក ឃែនដៃស៍ ឈិន បានរៀបរាប់កាសែត វ៉ាស៊ីនតោន ផូស្តថា “បុគ្គលិកពេទ្យ ក៏ជាមនុស្សដូចគ្នាដែរ ខ្ញុំគិតថា វាជាអំឡុងពេលនៃភាពលំបាកលំបិនទាំងខាងរាងកាយ និងផ្លូវចិត្ត សម្រាប់គ្រូពេទ្យ និងគិលានុបដ្ឋាក និងមន្ត្រីពេទ្យគ្រប់រូបនៅក្នុងទីក្រុងវូហាន”៕
ប្រភព៖ សារព័ត៌មានបរទេស
February 11, 2020
ម្ដាយរបស់សពលោកគ្រូ Li Wenliang ស្នើឱ្យក្រុមនគរបាលនៅ Wuhan ចេញមកបកស្រាយ ក្រោយការស្លាប់របស់កូនប្រុស
ម្ដាយរបស់សពវេជ្ជបណ្ឌិត Li Wenliang និយាយថាកូនប្រុសរបស់គាត់ត្រូវគេចាប់ទៅកាន់ការិយាល័យនគរ បាលទាំងកណ្ដាលយប់ និងត្រូវបង្ខំឱ្យស៊ីញេទទួលស្គាល់ថា បានបង្ហោះសារប្រឌិត ខណៈដែលគេមិនទាន់ដឹងច្បាស់អំពីបញ្ហានោះ។ អ្នកស្រីស្នើឱ្យនគរបាលក្រុង Wuhan ចេញមុខបកស្រាយអំពីរឿងនេះ។
សារព័ត៌មាន South China Morning Post កាលពីថ្ងៃទី 9កុម្ភៈ បានរាយការណ៍ថា ម្ដាយរបស់សពលោកវេជ្ជបណ្ឌិត Li Wenliang (ដែលបានបាត់បង់ជីវិតដោយសារមេរោគកូរ៉ូណា ក្រោយពីបានបញ្ចេញសារព្រមានអំពីអាសន្នរោគនេះ) ស្នើឱ្យនគរបាលបកស្រាយអំពីអ្វីដែលពួកគេបានធ្វើមកលើកូនរបស់គាត់។
ក្នុងឃ្លីបវីដេអូមួយដែលបានបង្ហោះនៅលើទំព័រ Pear Video ម្ដាយរបស់សពលោកគ្រូពេទ្យ Li Wenliang បាននិយាយថាកូនរបស់គាត់ត្រូវគេហៅទៅកាន់ការិយាល័យនគរបាលក្រុង Wuhan និងបានចាប់ឱ្យចុះហត្ថលេខាលើកំណត់ត្រាមួយដែលបង្ខំឱ្យទទួលស្គាល់ថា បានចែករំលែកព័ត៌មានមិនពិតអំពីអាសន្នរោគកូរ៉ូណា នៅពេលបញ្ហាមិនទាន់បានស៊ើបអង្កេតត្រឹមត្រូវ។
ម្ដាយរបស់សពលោកគ្រូ Li រៀបរាប់បណ្ដើរ យំបណ្ដើរ៖ “នៅពេលដែលការពិតមិនទាន់លាតត្រដាង កូនប្រុសរបស់ខ្ញុំត្រូវគេកោះហៅទៅកាន់ប៉ុស្តិ៍នគរបាលនៅ Wuhan ទាំងកណ្ដាលយប់។ បើសិនពួកគេមិនបកស្រាយឱ្យបានច្បាស់អំពីបញ្ហានេះ គឺមិនបាននោះទេ!”។
Li Wenliang ត្រូវបានគេចាត់ទុកថា ជាមនុស្សម្នាក់ក្នុងចំណោមមនុស្សដំបូងគេដែលបានចែករំលែកព័ត៌មាន និងព្រមានអំពីអាសន្នរោគរលាកសួតដែលបង្កឡើងដោយមេរោគកូរ៉ូណា (nCoV) នៅប្រទេសចិន។ ក្នុងថ្ងៃទី30 ខែធ្នូ ឆ្នាំ2019 Li Wenliang បានផ្ញើសារចូលក្នុងក្រុម WeChat របស់គាត់ដែលមានមិត្តភក្ដិរបស់គាត់ 150នាក់ ដែលជាមិត្តចាស់។ គាត់បានព្រមានអំពីអ្នកជំងឺ 7នាក់ដែលបានឆ្លងមេរោគមួយប្រភេទដែលគាត់យល់ថា ដូចទៅនឹងមេរោគផ្លូវដង្ហើម SARS (Severe Acute Respiratory Syndrome) ដែលធ្លាប់បានកើតឡើងនៅប្រទេសចិនកាលពីឆ្នាំ2002 និងបានសម្លាប់មនុស្សប្រមាណជា800នាក់ នៅទូទាំងពិភពលោក។
សាររបស់លោកគ្រូ Li បានទាក់ទាញចំណាប់អារម្មណ៍របស់ក្រុមមន្ត្រីអាជ្ញាធរក្រុង បន្ទាប់ពីមនុស្សម្នាក់ក្នុងក្រុមរបស់គាត់ បានបង្ហោះរូបភាពនៃការជជែករបស់ពួកគេនៅលើបណ្ដាញសង្គម។ ក្រោយមកទៀត គ្រូពេទ្យ7នាក់ដែលស្ថិតក្នុងក្រុមជជែករបស់លោកគ្រូ Li ក៏បានចែករំលែកព័ត៌មាននេះទៅកាន់ក្រុមជជែកចំនួន3ផ្សេងទៀត។
នៅក្នុងយប់ដដែលនោះ ក្រុមមន្ត្រីសុខាភិបាលនៃក្រុង Wuhan បានកោះហៅលោកគ្រូ Li ដោយស្នើឱ្យគាត់និយាយអំពីមូលហេតុដែលគាត់បានចែករំលែកព័ត៌៌មាននេះ។ ថ្ងៃទី3មករា ក្រុមនគរបាលបានហៅគាត់ទៅសួរនាំ ហើយបង្ខំឱ្យគាត់សន្យាថា “បានចែករំលែកព័ត៌មានមិនពិត ធ្វើឱ្យច្របូកច្របល់ក្នុងសង្គមជាតិ”។
ថ្ងៃទី8មករា លោកគ្រូ Li បានពិនិត្យសុខភាពអ្នកជំងឺកូរ៉ូណាម្នាក់។ ពីរថ្ងៃក្រោយមក លោកគ្រូ Li ចាប់ផ្ដើមមានអាការក្អក និងពិបាកដកដង្ហើម ប៉ុន្តែ ការពិនិត្យជាច្រើនលើកបង្ហាញថា គាត់មិនមានផ្ទុកមេរោគកូរ៉ូណា nCoV នោះទេ។
ថ្ងៃទី12មករា គ្រូពេទ្យ Li បានចូលសម្រាកព្យាបាលក្នុងមន្ទីរពេទ្យ ហើយថ្ងៃទី1កុម្ភៈ គាត់ត្រូវគេបញ្ជាក់ថា មានផ្ទុកមេរោគកូរ៉ូណា។
ម្ដាយរបស់សពលោកគ្រូ Li បន្តថា កូនប្រុសរបស់គាត់ជាកូនល្អ ហើយនៅកន្លែងធ្វើការវិញ គេក៏ជាអ្នករួមការងារដ៏ល្អម្នាក់ដែរ។ នៅក្នុងការរៀបចំកាលបរិច្ឆេទប្រចាំការ គ្រូពេទ្យម្នាក់នេះ តែងតែត្រៀមខ្លួនជានិច្ចដើម្បីមកប្រចាំការជំនួសមិត្តរួមការងារ ប្រសិនបើពួកគេត្រូវការ។
អ្នកស្រីនិយាយថា៖ “តាំងពីតូច វាតែងស្ដាប់បង្គាប់ឪពុកម្ដាយ ហើយពេលត្រូវរំពាត់ក៏មិនដែលនិយាយថាឈឺនោះដែរ។ អ្វីៗក៏វាចេះទ្រាំទាំងអស់។ ការងាររបស់វា រវល់ខ្លាំងណាស់ មានពេលខ្លះវាត្រូវយាម2យប់ក្នុង1សប្ដាហ៍ ស្របពេលដែលអ្នកខ្លះ យាមតែ1យប់/អាទិត្យ”។
សូមរំឭកថា ថ្មីៗនេះ តុលាការកំពូលរបស់ចិន ក៏ធ្លាប់បាននិយាយថា នគរបាលក្រុង Wuhan មិនគួរពិន័យទៅលើលោកវេជ្ជបណ្ឌិត Li រួមនឹងមនុស្ស 7នាក់ផ្សេងទៀត ដោយសារតែព័ត៌មានរបស់ពួកគេ មិនមែនប្រឌិត។
ចំណែកគណៈកម្មការត្រួតពិនិត្យជាតិនៃប្រទេសចិន ថ្មីៗនេះ ក៏បានបញ្ជូនក្រុមស៊ើបអង្កេតមួយក្រុមទៅកាន់ក្រុង Wuhan បន្ទាប់ពីការស្លាប់របស់វេជ្ជបណ្ឌិត Li Wenliang។ សកម្មភាពនេះ បានបង្ហាញថា ស្ថានភាពអាសន្នរោគកូរ៉ូណានៅទីនោះ ពិតជាមិនធម្មតានោះទេ។
កាលពីថ្ងៃទី 8កុម្ភៈ Fu Xuejie ដែលជាប្រពន្ធរបស់សពលោកគ្រូពេទ្យ Li ក៏បាននិយាយជាសាធារណៈដំបូងរបស់នាង ដោយក្នុងនោះ នាងបានអរគុណអ្នកទាំងអស់គ្នាដែលមានការអាណិតអាសូរចំពោះស្វាមីនាង។ នាងក៏ថែមទាំងបានបដិសេធអំពីព័ត៌មានដែលថា នាងបានអំពាវនាវសុំជំនួយពីសាធារណៈជន ទាក់ទិននឹងបញ្ហាហិរញ្ញវត្ថុ។
Fu Xuejie បានថ្លែងថា នាងនឹងទទួលយកតែសំណងជាផ្លូវការពីអាជ្ញាធរ កន្លែងធ្វើការរបស់ស្វាមីនាង និងប្រាក់សំណងទៅតាមគោលនយោបាយធានារ៉ាប់រង ឬប្រាក់រួមចំណែកពីក្រុមអង្គការមនុស្សធម៌ណាដែលទទួលស្គាល់ពីអាជ្ញាធរតែប៉ុណ្ណោះ។
គ្រួសារសពលោកគ្រូ Li ដែលជាគ្រូពេទ្យដំបូងម្នាក់ក្នុងចំណោមក្រុមគ្រូពេទ្យដំបូងគេដែលបានព្រមានអំពីអាសន្នរោគកូរ៉ូណា ប៉ុន្តែត្រូវអាជ្ញាធរចោទថា បាន “បញ្ចេញព័ត៌មានមិនពិត” ទទួលបានសំណងជាទឹកប្រាក់ 821,000យន់ (ប្រហែល 117,400 ដុល្លារអាមេរិក) បន្ទាប់ពីបានបាត់បង់ជីវិតដោយសារមេរោគកូរ៉ូណា។ National Interest បានរាយការណ៍ថា សំណងនេះរួមមាន សំណងមួយលើក 785,000យន់ ($112,100) និងប្រាក់ចំណាយលើពិធីបុណ្យសព 36,834យន់ ($5,260)៕
ប្រភព៖ សារព័ត៌មានបរទេស
February 11, 2020
“ប៉ាធីងហ្គា” ភយន្តរាយលំដាប់លេខ2 បន្ទាប់ពីវីរុសកូរ៉ូណា…
ខណៈដែលទូទាំងពិភពលោក កំពុងតស៊ូជាមួយការឆ្លងរាលដាលរបស់មេរោគវីរុសកូរ៉ូណាប្រភេទថ្មី2019 ដែលមានដើមកំណើតពីសត្វព្រៃនៅក្នុងទីក្រុងវូហាន មណ្ឌលហ៊ូពេយ ក្នុងប្រទេសចិននោះ នៅឯភូមិភាគសមុទ្រខ្សាច់ “តំបន់ចុងពយ អាហ្វ្រិក” ក្នុងតំបន់អាហ្វ្រិកខាងកើត ក៏កំពុងប្រឈមនឹងភយន្តរាយពីសត្វដូចគ្នាដែរ តែវាគឺ ហ្វូង“សត្វកណ្ដូបប៉ាធីងហ្គា” ដែលកំពុងរាតត្បាតរាលដាលយ៉ាងខ្លាំក្លាដូចភ្លើងឆេះព្រៃចំនួនរាប់ម៉ឺនលានក្បាល ខាំស៊ីកម្ទេចផលដំណាំ និងរុក្ខជាតិខូចខាតស្ទើរតែគ្មានសល់អ្វី។
ហ្វូងប៉ាធីងហ្គា ឬសត្វកណ្ដូបពុកមាត់ខ្លីនេះ ចាប់ផ្ដើមរាតត្បាតមកពីប្រទេស “យេមែន” ហោះហើរឆ្លងសមុទ្រក្រហមចូលមកក្នុងតំបន់អាហ្វ្រិកខាងកើតតាំងពីចុងឆ្នាំកន្លងទៅ(ដូចវីរុសកូរ៉ូណាដែរ)ក្រោយពីមានភ្លៀងធ្លាក់នៅក្នុងប្រទេសយេមែន ធ្វើឱ្យពួកវាអាចបន្តបង្កាត់ពូជបានយ៉ាងលឿនរហ័សជាពិសេស និងក្នុង 1ថ្ងៃៗ ពួកវាអាចហើរបានឆ្ងាយដល់ទៅ 150គីឡូម៉ែត្រ និងមួយក្បាលៗនៅអាចស៊ីចំណីបានស្មើនឹងទម្ងន់ខ្លួនរបស់វាទៀតផង។
អង្គការស្បៀងអាហារ និងកសិកម្ម(FAO)នៃអង្គការសហប្រជាជាតិ បានអំពាវនាវឱ្យគ្រប់ប្រទេសជួយគ្នាតស៊ូប្រយុទ្ធនឹងសត្វកណ្ដូបប៉ាធីងហ្គាតាំងពីពាក់កណ្ដាលខែមករា ឆ្នាំនេះមកម្ល៉េះ មុននឹងដល់រដូវប្រមូលផលក្នុងខែមេសា និងថែមទាំងបានព្រមានថា ប្រសិនបើ “ទប់ទល់មិនបាន” ក្នុងខែមិថុនា ពួកវានឹងកើនចំនួនទ្វេដងឡើងដល់ 500ដង!! និងអាចរាតត្បាតឆ្លងទៅដល់ឆ្នាំក្រោយ ឬឆ្នាំតៗទៅទៀតផង។
អង្គការសហប្រជាជាតិបានបញ្ជាក់ថា ការរាតត្បាតរបស់ហ្វូងសត្វកណ្ដូបប៉ាធីងហ្គាលើកនេះ ធ្ងន់ធ្ងរបំផុតក្នុងរយៈពេល 70ឆ្នាំកន្លងមកក្នុងប្រទេសកេនយ៉ា និងធ្ងន់ធ្ងរបំផុតក្នុងរយៈពេល 25ឆ្នាំក្នុងប្រទេសសូម៉ាលី និងអេត្យូពី រហូតដល់កាលពីដើមខែកុម្ភៈនេះ ប្រទេសសូម៉ាលី បានក្លាយជាប្រទេសដំបូងគេដែលបានប្រកាស”ស្ថានភាពអាសន្ន” ក្នុងប្រទេស ដើម្បីទប់ទល់នឹងគ្រោះភ័យដែលឈ្លានពានដោយសត្វកណ្ដូបប៉ាធីងហ្គា។
តែប្រទេសសូម៉ាលី មានបញ្ហាសន្តិសុខជាតិគ្មានស្ថិរភាព ទើបមិនអាចបញ្ជូនយន្តហោះឡើងទៅរោយថ្នាំសម្លាប់សត្វល្អិតដើម្បីកម្ចាត់ហ្វូងសត្វកណ្ដូបប៉ាធីងហ្គាបាននៅក្នុងតំបន់ជាច្រើន ធ្វើឱ្យការរាតត្បាតដ៏អាក្រក់នេះកាន់តែពង្រីកខ្លួនយ៉ាងធំទូលាយឡើង។ កសិករជាច្រើនខូចខាត និងបាត់បង់ទិន្នផលអស់យ៉ាងគ្មានសល់អ្វី ហុចផលប៉ះពាល់ដល់សន្តិសុខផ្នែកស្បៀងអាហារកាន់តែធ្ងន់ធ្ងរឡើង ខណៈដែលភូមិភាគនេះ មានមនុស្សអត់ឃ្លានយ៉ាងសែនលំបាកស្រាប់ទៅហើយចំនួនជាង 19លាននាក់។
ក្រៅពីសាងនូវភាពខូចខាតដល់ដំណាំកសិកម្មហួសនឹងបរិយាយហើយនោះ ហ្វូងសត្វកណ្ដូបប៉ាធីងហ្គា ថែមទាំងបង្កគ្រោះថ្នាក់ដល់ខ្សែផ្លូវហោះហើររបស់យន្តហោះទៀតផង ដូចជា កាលពីខែធ្នូ ឆ្នាំកន្លងទៅ ហ្វូងសត្វកណ្ដូបប៉ាធីងហ្គាបានហើរទៅចូលក្នុងប្រអប់គ្រឿងយន្ត បុកកញ្ចក់មុខ និងក្បាលយន្តហោះដឹកអ្នកដំណើររបស់ក្រុមហ៊ុនអាកាសចរណ៍ អេត្យូពី អ៊ែរឡាញ រហូតដល់ត្រូវប្ដូរផ្លូវហោះហើរត្រឡប់ទៅចុះចតបន្ទាន់នៅឯព្រលានយន្តហោះនៃទីក្រុង អ៊ែដឌិស អាបាបា វិញ។
គួររំឭកដែរថា កាលពីទសវត្សរ៍1990 “តំបន់ចុងពយ អាហ្វ្រិក” ធ្លាប់ប្រឈមនឹងការរាតត្បាតរបស់ហ្វូងសត្វកណ្ដូបប៉ាធីងហ្គាដល់ទៅ 6លើកធំៗ រួមទាំងក្នុងអំឡុងឆ្នាំ1987-1989 និងឆ្នាំ2003-2005 ផងដែរ។
តំបន់ចុងពយ អាហ្វ្រិក ជាតំបន់មួយនៅក្នុងភូមិភាគដែលក្រីក្រតោកយ៉ាក និងខ្វះការអភិវឌ្ឍខ្លាំងបំផុតក្នុងពិភពលោក ដូច្នេះហើយទើបភយន្តរាយពីកណ្ដូបប៉ាធីងហ្គាប្រៀបដូចជា “គ្រោះមហន្តរាយដ៏សែនអាក្រក់” ដែលយើងទាំងអស់គ្នាគួរតែបួងសួងភាវនា សូមកុំឱ្យ “វីរុសវូហាន” ឆ្លងរាលដាលទៅដល់ទីនោះអី ព្រោះគ្រាន់តែប៉ុណ្ណឹង តំបន់ចុងពយ អាហ្វ្រិក ហួសនឹងទប់ទល់បានទៅហើយ៕
ប្រភព៖ សារព័ត៌មានបរទេស
February 11, 2020