Category: សុខភាព

អ្នកនាំពាក្យក្រសួងសុខាភិបាល៖ ត្រូវមានការប្រុងប្រយ័ត្ន និងស្គាល់ពីវិធីបង្ការ ការឆ្លងមេរោគ
អ្នកនាំពាក្យក្រសួងសុខាភិបាលបានបង្ហាញពីរបៀបនៃការបង្ការការចម្លងមេរោគតាមរយៈខ្យល់ ដោយបានណែនាំដល់បងប្អូនប្រជាពលរដ្ឋ ត្រូវមានការប្រុងប្រយ័ត្នដើម្បីចៀសវាងការចម្លង ជំងឺពីមនុស្សម្នាក់ទៅមនុស្សម្នាក់ទៀត។ នេះបើតាមការធ្វើបាឋកថា ស្ដីពីចំណេះដឹង និងស្វែងយល់ពីសកម្មភាពឆ្លើយតប របស់ក្រសួងសុខាភិបាលចំពោះការវិវឌ្ឍរបស់មេរោគកូវីដ-19 កាលពីរសៀលថ្ងៃទី25 ខែកុម្ភៈ ម្សិលមិញ នៅទីស្ដីការក្រសួងសុខាភិបាល។
ឯកឧត្ដមវេជ្ជណ្ឌិត លី សូវ៉ាន់ អ្នកនាំពាក្យ និងជាប្រធាននាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល បានបញ្ជាក់ថា៖« ការឆ្លងមេរោគធំៗ គឺមាន2 ការឆ្លងតាមខ្យល់អាកាស និងឆ្លងតាមដំណក់លម្អងតូចៗ ដូចជាការកណ្តាស់ និងក្អកជាដើម។ ឯកឧត្ដមបានបន្ដថា ជំងឺដែលឆ្លងតាមខ្យល់មានមេរោគ ដូចជាមេរោគរបេង មេរោគស្អូច កញ្ជ្រឹល អុតស្វាយជាដើម»។
ឯកឧត្ដមមានប្រសាសន៍ថា៖« មេរោគឆ្លងតាមខ្យល់នេះ ទោះបីជាពាក់ម៉ាស់យ៉ាងណា ក៏មិនអាចការពារបានដែរ គឺវាអាចច្រោះចូលតាមប្រហោង តាមម៉ាស់ធំជាង ប៉ុន្តែអាចការពារបានទាល់តែពាក់ម៉ាស់របស់ពេទ្យ ទើបបានទប់ជាប់។ ចំពោះការឆ្លងតាមដំណក់លម្អងទឹកតូចៗវិញ មានន័យថា នៅពេលដំណក់ទឹកតូចៗ ចេញពីអ្នកជំងឺដល់កន្លែងណា មេរោគដល់ទីនោះ ជាក់ស្តែង រួមមានដូចជាជំងឺខាន់ស្លាក់ ជំងឺផ្តាសាយ និងវីរុសកូរ៉ូណា(COVID-19)នេះ ជាដើម»។ ឯកឧត្ដមបានឱ្យដឹងថា៖« ពេលដំណក់ទឹកតូចៗដល់ទីណា មេរោគទៅដល់ទីនោះ ដំណក់ទឹកហ្នឹង កើតមកពីការក្អក និងកណ្តាស់។ បើតាមការសិក្សា ចំពោះកណ្តាស់ និងក្អកនេះ អាចមានចម្ងាយជិត 1ម៉ែត្រ ហើយនៅពេលក្អកកន្លែងណា ទឹកនឹងនៅទីនោះ។ អ៊ីចឹងបានគេឱ្យពាក់ម៉ាស់ ដើម្បីចៀសវាងការឆ្លង ដែលអ្នកជំងឺគួរតែពាក់ម៉ាស់ ដើម្បីទប់ស្កាត់នៅពេលកណ្តាស់ ហើយ ឆ្លងទៅគេ»។
ឯកឧត្ដមបានបញ្ជាក់ថា៖« សម្រាប់អ្នកជាវិញ មិនចាំបាច់ពាក់ម៉ាស់ទេ ប៉ុន្តែត្រូវឧស្សាហ៍ លាងដៃនឹងសាប៊ូ ព្រោះថា អ្នកជា ឧស្សាហ៍ប៉ះពាល់នឹងទីកន្លែងផ្សេងៗ ដែលជាហេតុនាំឱ្យមេរោគឆាប់ឆ្លងនៅពេលយកដៃទៅញីច្រមុះ មាត់ ឬភ្នែក»។
ឯកឧត្ដមបានថ្លែងបញ្ជាក់ទៀតថា៖« អ្នកជា ឬមនុស្សទាំងឡាយ ដើម្បីទប់ស្កាត់ការឆ្លងជំងឺ ត្រូវកាត់បន្ថយការយកដៃទៅប៉ះពាល់ផ្ទៃមុខជាអតិបរមាកាន់តែល្អ ហើយយើងបង្ហាញថ្ងៃនេះមិនសម្រាប់តែមេរោគកូរ៉ូណាទេ មេរោគផ្សេងទៀតក៏ទប់ស្កាត់ការឆ្លងដែរ»។
ឯកឧត្ដមវេជ្ជបណ្ឌិត លី សូវ៉ាន់ បានលើកឡើងថា ដៃប្រៀបដូចជាវត្ថុមួយចំនួនដែលអាចចម្លងជំងឺ ឬអាចនិយាយថា ដៃបានប៉ះពាល់ទីកន្លែងជាច្រើន ដែលជាហេតុនាំឱ្យមេរោគឆាប់ឆ្លង។ ដៃយើងជាអ្នកចម្លង ហើយបណ្តាលឱ្យមានអាលាក់ហ្ស៊ី កើតលើផ្ទៃមុខ ព្រោះថា ដៃមានសារធាតុច្រើន ដូចជាមេរោគដែលអាចចម្លងបាន។
ឯកឧត្ដមបានលើកឡើងទៀតថា ក្រសួងសុខាភិបាលមិនបានបង្ខំឱ្យមានការពាក់ម៉ាស់នោះទេ ប៉ុន្តែការពាក់ម៉ាស់ គឺនៅពេលចាំបាច់ ដូចជានៅតំបន់មួយចំនួនដែលមានមនុស្សច្រើន ឬការទៅសួរសុខទុក្ខអ្នកជំងឺ នៅមន្ទីរពេទ្យជាដើម។
សូមបញ្ជាក់ថា ឯកឧត្តម លី សូវ៉ាន់ ប្រធាននាយកដ្ឋានប្រយុទ្ធជំងឺឆ្លង និងជាអ្នកនាំពាក្យក្រសួងសុខាភិបាលបានឱ្យដឹងថា(គិតម៉ោង 7យប់ ថ្ងៃទី24 ខែកុម្ភ: ឆ្នាំ2020) កម្ពុជាពុំទាន់រកឃើញ ករណីអ្នកឆ្លងមេរោគវីរុសកូរ៉ូណាប្រភេទថ្មី(Covid-19) បន្ថែមទៀតទេ តែលទ្ធភាពរកឃើញករណី អាចនឹងកើតមាន ពីព្រោះជំងឺនេះនៅតែបន្តរាតត្បាតនៅឡើយ នៅទីក្រុង Wuhan ប្រទេសចិន និងមានការឆ្លងជំងឺនេះទៅប្រទេសដទៃ។
បើទោះជាកម្ពុជា ពុំទាន់មានករណីថ្មីនៃវីរុសកូរ៉ូណាថ្មីនេះក្ដី ក៏ក្រុមឆ្លើយតបបន្ទាន់ ក៏ដូចជាក្រុមគ្រូពេទ្យតាមព្រំដែន (មន្រ្តីចត្តាឡីស័ក) បាននិងកំពុងឃ្លាំមើលអ្នកដំណើរចេញចូលគ្រប់ច្រកតាមព្រំដែនគោកទាំងអស់ ដូចជាប្រទេសថៃ ឡាវ វៀតណាម ផ្លូវសមុទ្រ និងអាកាសយានដ្ឋានអន្តរជាតិទាំង3 គឺភ្នំពេញ សៀមរាប ក្រុងព្រះសីហនុ តាមរយ:ម៉ាស៊ីនស្ទង់កម្ដៅ និងពិនិត្យសុខភាព។
ឯកឧត្តម បានបន្តថា «យើងមានមន្ទីរពិសោធន៍នៃវិទ្យាស្ថានប៉ាស្ទ័រកម្ពុជា ដែលដំណើរការទាំងថ្ងៃទាំងយប់ ធ្វើតេស្តវត្ថុវិភាគ ដែលបានផ្ញើមកពីទូទាំងប្រទេស និងយើងត្រៀមមន្ទីរពិសោធន៍ 2ទៀតក្នុងក្រសួងសុខាភិបាលដើម្បីជំនួយក្នុងការធ្វើតេស្តបន្ថែមទៀត។
គួររំឭកថា កន្លងមក កម្ពុជាមានករណីតែ 1គត់ពាក់ព័ន្ធនឹងវីរុសកូរ៉ូណា គឺបុរសជនជាតិចិនម្នាក់អាយុ 60ឆ្នាំ ដែលធ្វើដំណើរពីទីក្រុង Wuhan មកលេងខេត្តព្រះសីហនុ តែត្រូវបានព្យាបាលជាសះស្បើយ និងត្រឡប់ទៅស្រុកកំណើតវិញហើយ៕
February 26, 2020
ប្រទេសដែលមានអ្នកផ្ទុកវីរុសកូរ៉ូណា COVID-19 ចាប់ពី10នាក់ឡើងទៅ
អាសន្នរោគកូរ៉ូណា COVID-19 មកដល់ពេលនេះ បានឆ្លងរាលដាលទៅកាន់ប្រទេស និងដែនដីចំនួន41 នៅទូទាំងពិភពលោក ក្នុងនោះប្រទេសចិន(ចិនដីគោក) មានអ្នកផ្ទុកវីរុសកូរ៉ូណាឡើងដល់ជិត80,000នាក់ ខណៈដែលប្រទេសជាច្រើនមានអ្នកផ្ទុកមេរោគនេះច្រើនជាង10នាក់។
ខាងក្រោមនេះគឺជាតារាងនៃបណ្ដាប្រទេសដែលមានអ្នកផ្ទុកមេរោគកូរ៉ូណាច្រើនជាង10នាក់៖
ប្រភព៖ សារព័ត៌មានបរទេស
February 26, 2020
“រូបតុក្កតា” លើសម្លៀកបំពាក់ឈុតការពារវីរុសរបស់គ្រូពេទ្យចិន គឺភាពវាងវៃកាត់បន្ថយការភ័យខ្លាច និងភ្ជាប់សម្ព័ន្ធភាពអ្នកជំងឺក្មេងៗ
អាចរាប់បានថា ជារឿងរ៉ាវតូចមួយ តែអស្ចារ្យខ្លាំងណាស់ សាងភាពរំភើបចិត្តដល់អ្នកដែលបានឃើញ និងដឹងសម្រាប់ភាពវាងវៃ និងការយកចិត្តទុកដាក់របស់ក្រុមមន្ត្រីពេទ្យប្រចាំនៅមន្ទីរពេទ្យកុមារវូហាន មណ្ឌលហ៊ូពេយ ភាគកណ្ដាលប្រទេសចិន។
ការមើលថែទាំ និងព្យាបាលបណ្ដាក្មេងតូចៗដែលឆ្លងមេរោគវីរុសកូរ៉ូណាប្រភេទថ្មី(COVID-19)នៅក្នុងបន្ទប់ញែកដោយឡែកសម្រាប់តែអ្នកជំងឺក្មេងៗ មិនមែនជារឿងងាយស្រួលឡើយសម្រាប់ក្រុមគ្រូពេទ្យដែលស្លៀកឈុតការពារមេរោគដ៏សែនចម្លែកនេះ ដែលវានាំមកនូវភាពគួរឱ្យភ័យខ្លាចចំពោះក្មេងៗជាច្រើនដែលនៅមិនទាន់ដឹងក្ដី។
វ៉ាងចៀ គិលានុបដ្ឋាកអ្នកនិយមចូលចិត្តការគូររូបជាទម្លាប់ស្រាប់ហើយនោះ បាននឹកឃើញអៃឌៀគូររូបតុក្កតាល្បីៗ និងក្បាច់ក្បូរផ្សេងៗនៅលើសម្លៀកបំពាក់ឈុតការពារមេរោគ ព្រមទាំងបបួលអ្នកជំងឺក្មេងៗតូចៗទាំងឡាយឱ្យនាំគ្នាមកជួយផាត់ពណ៌ សាងភាពជិតដិតស្និទ្ធស្នាល រហូតដល់ក្មេងមានអារម្មណ៍ធូរស្រាល និងសប្បាយចិត្ត។
ការបង្កើតរូបតុក្កតានៅលើសម្លៀកបំពាក់ឈុតការពារ មុននឹងចេញទៅជួបអ្នកជំងឺក្មេងៗ បានក្លាយជាវិធីមួយដែលបណ្ដាមិត្តរួមការងាររបស់ វ៉ាងចៀ បានដឹងគ្រប់គ្នា និងនាំគ្នាធ្វើតាម ដែលវាបានបង្ហាញនូវលទ្ធផលវិជ្ជមាន ព្រោះក្មេងៗទាំងអស់បានរួមសហការក្នុងព្យាបាលកាន់តែងាយស្រួលឡើង៕
ប្រភព ៖ សារព័ត៌មានបរទេស
February 26, 2020
គ្រោះបោកកម្មបក់…ហ៊ូពេយ ត្រៀមប្រឈមនឹងអាកាសធាតុប្រែប្រួល ដែលនឹងមកដល់នៅដើមខែមីនា
សារព័ត៌មានស៊ីនហួ កាលពីថ្ងៃទី25កុម្ភៈម្សិលមិញ បានឱ្យដឹងថា អង្គភាពឧតុនិយម និងការព្យាករអាកាសធាតុរបស់មណ្ឌលហ៊ូពេយ ភាគកណ្ដាលរបស់ប្រទេសចិន បានព្យាករថា ក្នុងអំឡុងមិនប៉ុន្មានថ្ងៃខាងមុខនេះ ហ៊ូពេយនឹងត្រូវប្រឈមនឹងស្ថានភាពធាតុអាកាសយ៉ាប់យ៉ឺនខ្លាំង ដែលអាចនឹងមានផលប៉ះពាល់អវិជ្ជមានដល់ការតស៊ូប្រឆាំងនឹងមេរោគវីរុសកូរ៉ូណា COVID-19 ដែលកំពុងដំណើរការជាបន្តបន្ទាប់ក្នុងពេលនេះ។
គណៈកម្មការសម្រាលគ្រោះភ័យរបស់មណ្ឌលហ៊ូពេយ បានបញ្ជាក់ថា ចាប់តាំងពីថ្ងៃអង្គារ(ទី25កម្ភៈ)តទៅ ហ៊ូពេយដែលជាប្រភពកណ្ដាលនៃការឆ្លងរាលដាលមេរោគវីរុស នឹងមានសីតុណ្ហភាពធ្លាក់ចុះខ្លាំងបំផុតដល់ 12អង្សាC ហើយនឹងមានភ្លៀងធ្លាក់ញឹកញាប់ រួមទាំងផ្គររន្ទះដែលអាចបន្តរហូតដល់ដើមខែមីនា។
គណៈកម្មការនេះ បានប្រកាសព្រមានអាជ្ញាធរក្នុងតំបន់ និងប្រជាជនឱ្យប្រយ័ត្នរោគរាតត្បាតក្នុងរដូវស្លឹកឈើលាស់ ដែលនឹងហុចផលប៉ះពាល់ដល់ការងារកសិកម្ម និងបង្កឱ្យមានគ្រោះវិបត្តិផ្សេងទៀតកើតឡើង ដូចជាទឹកហូរខ្លាំង បាក់ដីនៅក្នុងតំបន់ភ្នំ រួមទាំងភ្លើងឆេះព្រៃដែលបណ្ដាលមកពីរន្ទះបាញ់ទៀតផង។
ទាំងអស់នេះ គណៈកម្មាធិការមណ្ឌលហ៊ូពេយ បានណែនាំអង្គភាពគមនាគមន៍ទូទាំងមណ្ឌលឱ្យដំណើរការវិធានការការពារទុកជាមុនឱ្យរួចជាស្រេចដើម្បីទប់ទល់នឹងហេតុការណ៍ភ្លៀង ព្យុះ និងខ្យល់បោកបក់ខ្លាំង ដើម្បីឱ្យការដឹកជញ្ជូនឧបករណ៍ការពារ និងការធ្វើដំណើររបស់ក្រុមមន្ត្រីប្រយុទ្ធប្រឆាំងការឆ្លងរាលដាលរបស់មេរោគវីរុសដំណើរការទៅដោយរលូនផង៕
ប្រភព ៖ សារព័ត៌មានបរទេស
February 26, 2020
អាមេកាំង៖ 57នាក់បានឆ្លងមេរោគ COVID-19 ខណៈ CDC ព្រមានថាអាចនឹងមានការឆ្លងរាលដាលទូទាំងប្រទេស
សហរដ្ឋអាមេរិក មានអ្នកផ្ទុកមេរោគកូរ៉ូណាសរុបចំនួន57នាក់ហើយ ខណៈដែលមជ្ឈមណ្ឌលទប់ស្កាត់ និងគ្រប់គ្រងអាសន្នរោគរបស់ប្រទេសនេះ បានព្រមានថា COVID-19 អាចឆ្លងរាលដាលខ្លាំងនៅទូទាំងប្រទេស។
យោងតាម CNN មន្ត្រីជាន់ខ្ពស់ម្នាក់មកពីមជ្ឈមណ្ឌលគ្រប់គ្រង និងទប់ស្កាត់អាសន្នរោគនៃសហរដ្ឋអាមេរិក(Centers for Disease Control and Prevention/CDC) កាលពីថ្ងៃទី25កុម្ភៈ បានព្រមានចំពោះពលរដ្ឋអាមេរិកាំងទាំងអស់ថា ក្រុមអ្នកជំនាញបានព្យាករថា វីរុសកូរ៉ូណានេះអាចឆ្លងរាលដាលខ្លាំងនៅទូទាំងសហរដ្ឋអាមេរិក។
ក្នុងថ្ងៃទី25កុម្ភៈដដែល CDC ក៏បានបញ្ជាក់ដែរថា អាមេរិកមានអ្នកផ្ទុកមេរោគកូរ៉ូណាចំនួន57ករណី បូករួមទាំង4ករណីថ្មី ដែលអ្នកជំងឺទាំងនោះគឺជាអ្នកទេសចររបស់នាវា Diamond Princess នៅជប៉ុន។ បច្ចុប្បន្ន សហអាមេរិកមានអ្នកជំងឺកូរ៉ូណាដែលមកពីនាវា Diamond Princess ចំនួន40នាក់។
លោកស្រី Nancy Messonnier ដែលជាប្រធានមជ្ឈមណ្ឌល CDC បានថ្លែងប្រាប់ក្រុមអ្នកយកព័ត៌មានថា៖ “យើងគិតថានឹងមានការឆ្លងរាលដាលនៅអាមេរិក។ សំណួរដែលត្រូវសួរនៅពេលនេះ មិនមែនថាតើការឆ្លងរាលដាលនឹងកើតឡើងដែរឬអត់នោះទេ ប៉ុន្តែគឺថា តើវាកើតឡើងនៅពេលណា និងមានមនុស្សប៉ុន្មាននាក់នៅប្រទេសនេះនឹងត្រូវឆ្លងវីរុស ហើយត្រូវធ្លាក់ខ្លួនឈឺធ្ងន់”។
នៅលើទំព័រ Twitter មជ្ឈមណ្ឌល CDC បានសរសេរថា ពលរដ្ឋអាមេរិកាំង គួរតែត្រៀមខ្លួនឱ្យបានរួចរាល់សម្រាប់សេនារីយ៉ូខាងលើ។ “ពេលនេះ គឺជាវេលាដែលបណ្ដាក្រុមហ៊ុន និងមន្ទីរពេទ្យនានា រួមនឹងពលរដ្ឋ ត្រូវតែត្រៀមសម្រាប់ស្ថានការណ៍ដែល COVID-19 នឹងកើតឡើង”។
លោកស្រី Messonnier បានឱ្យថា CDC ចង់ឱ្យពលរដ្ឋអាមេរិកាំងយល់ច្បាស់ជាមុនថា ជីវភាពរបស់គេអាចនឹងត្រូវបានរំខាន ប៉ុន្តែ លោកស្រីជំរុញឱ្យពួកគេសហការជាមួយ CDC ដើម្បីត្រៀមខ្លួនទុកជាមុន នៅពេលស្ថានការណ៍អាក្រក់កើតឡើង។
អាសន្នរោគ COVID-19 បានចាប់ផ្ដើមឆ្លងរាលដាលដំបូងនៅទីក្រុង Wuhan ខេត្ត Hubei ប្រទេសចិន កាលពីខែធ្នូ ឆ្នាំ2019។ មកដល់បច្ចុប្បន្ន អាសន្នរោគនេះបានសម្លាប់មនុស្សជាង2,760នាក់ និងបានឆ្លងទៅមនុស្សជិត90,000នាក់ នៅទូទាំងពិភពលោក៕
ប្រភព៖ សារព័ត៌មានបរទេស
February 26, 2020
អ្នកផ្ទុកមេរោគកូរ៉ូណានៅអ៊ីតាលីកើនដល់322នាក់ កូរ៉េខាងត្បូងកើនដល់1,146នាក់ ខណៈទូទាំងពិភពលោក មានអ្នកស្លាប់…
ប្រទេសអ៊ីតាលី បានឱ្យដឹងថា ចំនួនអ្នកផ្ទុកមេរោគកូរ៉ូណា COVID-19 ក្នុងប្រទេសនេះ បានឡើងដល់322នាក់ ហើយចំនួនអ្នកស្លាប់ក៏បានកើនឡើងដល់11ករណី ដែលភាគច្រើនគឺជាមនុស្សចាស់ និងអ្នកដែលមានជំងឺប្រចាំកាយពីមុនមក។
តំបន់ Tuscany នៅភាគកណ្ដាលប្រទេសអ៊ីតាលី បានរកឃើញអ្នកផ្តុកមេរោគកូរ៉ូណា COVID-19 2នាក់ដំបូង ក្នុងនោះក៏មានម្នាក់នៅឯទីក្រុងទេសចរណ៍ដ៏ល្បីឈ្មោះ Florence។ អាសន្នរោគកូរ៉ូណានេះក៏បានបង្ហាញខ្លួននៅក្នុងតំបន់ភាគខាងត្បូងប្រទេសនេះផងដែរ ដោយមានអ្នកជំងឺកូរ៉ូណា3នាក់នៅតំបន់ Sicily ក្នុងនោះមានស្វាមីភរិយាមួយគូ មកពីតំបន់ Lombardy ដែលជាតំបន់មានអ្នកផ្ទុកមេរោគកូរ៉ូណាដល់ទៅ240នាក់។
ចំណែកតំបន់ Liquria ក៏បានរកឃើញអ្នកផ្ទុកមេរោគកូរ៉ូណាករណីដំបូងមួយ ខណៈដែលអ្នកជំងឺទី11ដែលបានឆ្លងមេរោគកូរ៉ូណា បានបាត់បង់ជីវិតនៅអ៊ីតាលីនោះ គឺជាស្រ្តីវ័យ76ឆ្នាំម្នាក់ មកពីតំបន់ Veneto។ នេះបើតាមសេចក្ដីប្រកាសកាលពីម្សិលមិញរបស់អាជ្ញាធរ។
តំបន់ដែលទទួលរងផលប៉ះពាល់ខ្លាំងបំផុតពីអាសន្នរោគកូរ៉ូណា COVID-19 នៅអ៊ីតាលី គឺទីរួមស្រុក Codogno ដែលមានប្រជាជនប្រមាណជា15,000កំពុងរស់នៅ។ ទីរួមស្រុកមួយនេះ រួមនឹងទីរួមស្រុកមួយចំនួនទៀតក្នុងតំបន់ Lombardy ភាគខាងជើង ត្រូវបានដាក់បម្រាមគោចរចាប់ពីថ្ងៃទី23កុម្ភៈ ដើម្បីទប់ស្កាត់ការឆ្លងរាលដាលនៃមេរោគកូរ៉ូណា COVID-19 នេះ។
នៅឯប្រទេសកូរ៉េខាងត្បូងវិញ នៅថ្ងៃទី26 ខែកុម្ភៈនេះ បានរាយការណ៍ថា ប្រទេសនេះមានអ្នកឆ្លងមេរោគកូរ៉ូណាថ្មីបន្ថែមចំនួន169នាក់ ដែលធ្វើឱ្យចំនួនករណីឆ្លងសរុបនៅប្រទេសនេះឡើងដល់1,146នាក់។ រីឯចំនួនអ្នកស្លាប់វិញបានកើនដល់12នាក់។
គិតមកដល់ព្រឹកនេះ នៅទូទាំងពិភពលោក មានអ្នកស្លាប់ដោយសារអាសន្នរោគកូរ៉ូណា COVID-19 ចំនួន2,760នាក់ និងអ្នកផ្ទុកមេរោគ កើនដល់ជាង80,994នាក់៕
ប្រភព៖ សារព័ត៌មានបរទេស
February 26, 2020
ចិនបង្កើតវ៉ាក់សាំងប្រឆាំងវីរុសកូរ៉ូណាប្រភេទសម្រាប់លេប បានជោគជ័យមួយដំណាក់កាលហើយ
ប្រទេសចិន៖ មហាវិទ្យាល័យ Tianjin Medical University បានប្រកាសថា ពួកគេបង្កើតបានវ៉ាក់សាំងប្រភេទសម្រាប់លេបដើម្បីការពារមេរោគបង្កជំងឺរលាកសួតកូរ៉ូណា ដែលនេះនឹងឈានទៅរកការសាកល្បងនៅលើមនុស្សក្នុងពេលឆាប់ៗខាងមុខ។
សាស្ត្រាចារ្យ Huang Jinhai ដែលជាអ្នកនាំមុខក្នុងគម្រោងវ៉ាក់សាំងនេះ បានសាកល្បងលេបដោយខ្លួនឯងចំនួន4ដង ប៉ុន្តែមិនមានបញ្ហាអាក្រក់ណាមួយកើតឡើងឡើយ។ មហាវិទ្យាល័យនេះ កំពុងតែស្វែងរកដៃគូដែលមានសក្ដានុពលដើម្បីអនុវត្តជំហានបន្ទាប់ គឺពិសោធនៅលើមនុស្ស និងផលិតជាផ្លូវការ។
វ៉ាក់សាំងប្រភេទសម្រាប់លេបនេះ ប្រើប្រាស់ដំបែធម្មជាតិ saccharomyces cerevisiae សម្រាប់ធ្វើជា “ធាតុបញ្ជូន” និងសំដៅទៅលើប្រូតេអ៊ីនបន្លារបស់វីរុសកូរ៉ូណា ដើម្បីបង្កើតអង្គបដិប្រាណ(អង់ទីគ័រ)ប្រឆាំងមេរោគ COVID-19។
វ៉ាក់សាំងសម្រាប់លេបនេះ ត្រូវបានផលិតជាប្រភេទគ្រាប់រឹងសុទ្ធ គ្រាប់មានទឹកខាងក្នុង និងប្រភេទម្សៅ។ ក្រុមអ្នកវិទ្យាសាស្ត្រក៏បានអភិវឌ្ឍបច្ចេកវិទ្យាស្នូលក្នុងការបង្កើតកោសិកាដែលអាចប្រមូលផ្ដុំគ្នាឡើងវិញ។ល។ និងបង្កើតកម្លាំងជំរុញទៅលើដំបែ ដែលនេះសុទ្ធសឹងតែជាជំហានសំខាន់ក្នុងការអភិវឌ្ឍវ៉ាក់សាំងនេះ។
សាស្ត្រាចារ្យ Huang ឱ្យដឹងថា វ៉ាក់សាំងប្រភេទលេប មានសុវត្ថិភាពខ្ពស់ ងាយស្រួលប្រើ និងអាចផលិតក្នុងបរិមាណច្រើន និងប្រើពេលខ្លី។
ក្នុងដំណាក់កាលបន្ទាប់ ក្រុមអ្នកវិទ្យាសាស្ត្ររបស់លោកសាស្ត្រាចារ្យ Huang នឹងស្វែងរកក្រុមហ៊ុនដែលមានសក្តានុពលដើម្បីសហការគ្នា និងចាប់ផ្ដើមវាយតម្លៃ បង្កើនល្បឿននៃការពិសោធលើមនុស្ស និងផលិតជាផ្លូវការ។
ជាធម្មតា រយៈពេលនៃការបង្កើតវ៉ាក់សាំង ចាប់ពីដំណាក់កាលដំបូងរហូតដល់ដំណាក់កាលផលិតជាផ្លូវ គេត្រូវចំណាយពេលជាធម្យមពី2ដល់5ឆ្នាំឯណោះ។
កាលពីថ្ងៃទី21កុម្ភៈ Xu Nanping អនុរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យាចិន បានប្រកាសថា វ៉ាក់សាំងដំបូងនឹងត្រូវបានពិសោធនៅលើមនុស្សនៅចុងខែមេសាខាងមុខ៕
February 26, 2020
ទីក្រុង ជីណាន រស់ឡើងវិញ មានរថយន្តពេញផ្លូវថ្នល់ មនុស្សម្នាវិលមកធ្វើការវិញ
ស៊ីនហួ/ជីណាន – ទស្សនាទិដ្ឋភាពផ្លូវថ្នល់ក្នុងទីក្រុងជីណាន ទីក្រុងចម្បងរបស់មណ្ឌលសានតុង ភាគខាងកើតរបស់ប្រទេសចិន ដែលមានការធ្វើចរាចរណ៍ប្រញឹកឡើងវិញ នៅពេលដែលមុខជំនួញជាច្រើនបានវិលត្រឡប់មកដំណើរការជាថ្មីម្ដងទៀត។
ប្រភព៖ សារព័ត៌មានបរទេស
February 25, 2020
កូរ៉េខាងត្បូង បញ្ជាឱ្យពិនិត្យយ៉ាងល្អិតល្អន់លើសាវ័កលទ្ធិ “ស៊ីនឆន់ជី” ជាង200,000នាក់ ខណៈចំនួនអ្នកឆ្លងមេរោគ COVID-19 ទូទាំងប្រទេសកើនដល់ 977នាក់
អង្គភាពសាធារណៈសុខាភិបាលកូរ៉េខាងត្បូងបានត្រៀមធ្វើការពិនិត្យសុខភាពពលរដ្ឋជាង 200,000នាក់ ដែលជាសមាជិករបស់ព្រះវិហារសាសនាគ្រិស្ត ស៊ីនឆន់ជី(Shin cheon ji) ប្រភពចម្បងនៃការចម្លងមេរោគវីរុសកូរ៉ូណាប្រភេទថ្មី ឬ COVID-19 នៅក្នុងប្រទេសកូរ៉េ ខណៈដែលចំនួនអ្នកឆ្លងមេរោគនេះទូទាំងប្រទេសមកដល់ពេលនេះកើនឡើងដល់ 977នាក់ហើយ។ នេះបើតាមទីភ្នាក់ងារព័ត៌មានរ៉យទ័រនៅល្ងាចថ្ងៃទី25 កុម្ភៈ។
ចំនួនអ្នកឆ្លងមេរោគដែលកើនឡើងយ៉ាងឆាប់រហ័សក្នុងប្រទេសកូរ៉េខាងត្បូងនេះ បានធ្វើឱ្យស្ថាប័នជាច្រើនមានការព្រួយបារម្ភថា មេរោគដែលមានដើមកំណើតពីទីក្រុងវូហានប្រទេសចិននេះ អាចនឹងក្លាយជាជំងឺឆ្លងលំដាប់សកល(Global pandemic)។
អ្នកជំងឺប្រហែល 60% ក្នុងប្រទេសកូរ៉េខាងត្បូង ត្រូវបានរកឃើញថា មានការពាក់ព័ន្ធនឹងព្រះវិហារ ស៊ីនឆន់ជី ក្នុងទីក្រុង ឌែហ្គូ(Daegu) ដែលមានរបាយការណ៍ថា អ្នកឆ្លងមេរោគដំបូងគេ គឺជាស្ត្រីវ័យ 61ឆ្នាំ ប៉ុន្តែនៅមិនទាន់ប្រាកដច្បាស់ថា តើគាត់បានទទួលមេរោគមកពីទីណានៅឡើយ។
មជ្ឈមណ្ឌលគ្រប់គ្រង និងការពារជំងឺនៃប្រទេសកូរ៉េខាងត្បូង(KCDC) បានអះអាងពីចំនួនអ្នកជំងឺថ្មីរួម 84នាក់នៅថ្ងៃទី25កុម្ភៈ។
ខណៈពេលជាមួយគ្នា រដ្ឋបាលកូរ៉េខាងត្បូងបានអះអាងថា មានអ្នកជំងឺនៅក្នុងមន្ទីរពេទ្យក្នុងខេត្ត ក្យ៉ង់សាំងខាងជើង បានស្លាប់ជាចំនួនទី9 របស់ប្រទេស។
អ្នកដឹកនាំព្រះវិហារ ស៊ីនឆន់ជី បានប្រកាសថា ខ្លួននឹងយល់ព្រមប្រគល់បញ្ជីឈ្មោះសមាជិកទាំងអស់ប្រមាណជា 215,000នាក់ទូទាំងប្រទេសទៅឱ្យអាជ្ញាធរ ខណៈដែលទីស្ដីការនាយករដ្ឋមន្ត្រីកូរ៉េខាងត្បូងបានអះអាងថា រដ្ឋាភិបាលនឹងធ្វើការពិនិត្យសុខភាពសមាជិកនៃព្រះវិហារ ស៊ីនឆន់ជីគ្រប់គ្នា “យ៉ាងលឿនបំផុត តាមដែលអាចធ្វើបាន” បន្ទាប់ពីបានទទួលព័ត៌មាន។
ទីស្ដីការនាយករដ្ឋមន្ត្រីបានបញ្ជាក់៖ “យើងចាំបាច់ត្រូវតែពិនិត្យយ៉ាងល្អិតល្អន់ទៅលើសមាជិកនៃព្រះវិហារគ្រប់គ្នា ដើម្បីគ្រប់គ្រងការចម្លងសាយភាយនៃមេរោគវីរុស និងសម្រាលការភ្ញាក់ផ្អើល និងភ័យខ្លាចរបស់សាធារណជន”។
លោក គីម កាំងលីប រដ្ឋមន្ត្រីក្រសួងសាធារណៈសុខាភិបាលកូរ៉េខាងត្បូង បានចេញមកផ្ដល់ព័ត៌មានបន្ថែមថា អាជ្ញាធរនឹងពិនិត្យចម្រាញ់លើសមាជិកនៃព្រះវិហារ ស៊ីនឆន់ជី ក្នុងទីក្រុងឌែហ្គូដែលបង្ហាញអាការជំងឺចំនួន 1,300នាក់ ក្នុងចំណោមទាំងអស់ 9,200នាក់ មុនគេជាដំបូង ដែលប្រហែលជារួចស្រេចបាច់នៅថ្ងៃពុធ ទី26 កុម្ភៈ។
“យើងនឹងព្យាយាមយ៉ាងអស់ពីសមត្ថភាព ដើម្បីធ្វើឱ្យស្ថានការណ៍ក្នុងទីក្រុងឌែហ្គូត្រឡប់ទៅរកសភាវមានស្ថិរភាពវិញក្នុងរយៈពេល 4សប្ដាហ៍” លោក គីម បញ្ជាក់ ព្រមទាំងសង្កត់ធ្ងន់ថា រដ្ឋាភិបាលនឹងតាមដានប្រជាជនក្រុងឌែហ្គូគ្រប់គ្នាដែលបង្ហាញអាការជំងឺ ដើម្បីពិនិត្យរកមេរោគវីរុស និងធ្វើការបង្ខាំងការពារមេរោគ។
លោក លី ម៉ាន់ហ៊ី ស្ថាបនិកព្រះវិហារ ស៊ីន ឆន់ជី ដែលកំពុងត្រូវសង្គមរិះគន់យ៉ាងខ្លាំងអំពីមូលហេតុនៃការឆ្លងរាលដាលដ៏ធំរបស់មេរោគ COVID-19 នេះ បានអះអាងថា លោកនឹងផ្ដល់ការសហការគ្រប់យ៉ាងដើម្បីទប់ស្កាត់ការឆ្លងរាលដាល តែសូមឱ្យរដ្ឋាភិបាលកូរ៉េខាងត្បូងជួយបិទបាំងព័ត៌មានផ្ទាល់ខ្លួនរបស់សមាជិករបស់ខ្លួនផង។
ដោយឡែក នៅក្នុងខេត្ត ក្យ៉ង់សាំងខាងជើង មានអ្នកឆ្លងមេរោគវីរុសកើនឡើងជាបន្តបន្ទាប់ក្នុងអំឡុងពេលមិនប៉ុន្មានសប្ដាហ៍កន្លងមកនេះ ដោយភាគច្រើនកំពុងព្យាបាលខ្លួននៅក្នុងមន្ទីរពេទ្យក្នុងតំបន់ ឆង់ដូ(Cheongdo) ដែលរដ្ឋាភិបាលកូរ៉េខាងត្បូងបានប្រកាសជា “តំបន់គ្រប់គ្រងមេរោគ” ដូចគ្នានឹងទីក្រុងឌែហ្គូដែរ។
អាជ្ញាធរបានរកឃើញថា មានអ្នកជំងឺ 21នាក់ក្នុងចំណោមទាំងអស់ 22នាក់នៅក្នុងខេត្តនេះ បានឆ្លងមេរោគមកពីមណ្ឌលជួយសង្គ្រោះជនពិការក្នុងមណ្ឌល ឈីលហ្កក់(Chilgok) ដែលស្ថិតនៅមិនឆ្ងាយប៉ុន្មានពីទីក្រុងឌែហ្គូ ដោយមានប្រភពមកពីបុគ្គលិកម្នាក់ ដែលមានម្ដាយជាសមាជិកនៃព្រះវិហារ ស៊ីនឆន់ជី៕
ប្រភព៖ សារព័ត៌មានបរទេស
February 25, 2020
អនុរដ្ឋមន្ត្រីក្រសួងសុខាភិបាលអ៊ីរ៉ង់ មានផ្ទុកមេរោគកូរ៉ូណា បន្ទាប់ពីធ្វើតេស្ត
អនុរដ្ឋមន្ត្រីក្រសួងសុខាភិបាលអ៊ីរ៉ង់ លោក Iraj Harirchi ត្រូវបានគេរកឃើញថា មានផ្ទុកមេរោគកូរ៉ូណា COVID-19 ក្រោយការធ្វើតេស្ត នេះបើតាមការចេញផ្សាយរបស់សារព័ត៌មានរដ្ឋអ៊ីរ៉ង់។
Iraj Harirchi គឺជាអ្នកនាំមុខគេក្នុងការប្រយុទ្ធប្រឆាំងនឹងការឆ្លងរាលដាលនៃអាសន្នរោគនៃប្រទេសនេះ។ អ្នកនាំពាក្យរបស់ក្រសួងសុខាភិបាលអ៊ីរ៉ង់បានបញ្ជាក់នៅក្នុងកិច្ចសម្ភាសមួយដែលបានចាក់ផ្សាយនៅលើទូរទស្សន៍នៅក្នុងថ្ងៃនេះថា លោក Iraj Harirchi បានឆ្លងមេរោគ និងកំពុងទទួលការព្យាបាល។
សារព័ត៌មានអ៊ីរ៉ង់ ILNA ដកស្រង់សម្ដីរបស់ក្រុមមន្ត្រីពីទីក្រុង Qom បានឱ្យដឹងកាលពីថ្ងៃចន្ទថា មានអ្នកស្លាប់ដោយសារមេរោគកូរ៉ូណាចំនួន50នាក់ហើយនៅតំបន់នោះ។
ក៏ប៉ុន្តែ លោកអនុរដ្ឋមន្ត្រី Harirchi បានច្រានចោលព័ត៌មានចចាមអារ៉ាមខាងលើ។ លោកថា លោកនឹងលាលែងពីតំណែងបើសិនជាមានអ្នកស្លាប់ចំនួនត្រឹមពាក់កណ្ដាលនៃចំនួនដែលគេបានចុះផ្សាយ។
ក្រសួងសុខាភិបាលអ៊ីរ៉ង់ក្នុងថ្ងៃទី25កុម្ភៈនេះ បានឱ្យដឹងថា ចំនួនអ្នកស្លាប់ដោយសារមេរោគកូរ៉ូណាក្នុងប្រទេសនេះ បានឡើងដល់16នាក់ហើយ។ អ្នកនាំពាក្យក្រសួងសុខាភិបាលអ៊ីរ៉ង់ Kianoush Jahanpour ក៏បានបញ្ជាក់ដែរថា មកដល់ថ្ងៃនេះ អ៊ីរ៉ង់មានអ្នកផ្ទុកមេរោគកូរ៉ូណា COVID-19 សរុបចំនួន95នាក់។
ទីក្រុង Tehran បច្ចុប្បន្ន មិនទាន់បញ្ជាក់ថា មានអ្នកជំងឺកូរ៉ូណាចំនួនប៉ុន្មាននាក់កំពុងត្រូវដាក់ឱ្យនៅដាច់ដោយឡែកដើម្បីទប់ស្កាត់ការឆ្លងរាលដាលនោះទេ ប៉ុន្តែសារព័ត៌មាន MEHR បានចុះផ្សាយថា មានអ្នកជំងឺ320នាក់កំពុងត្រូវបានព្យាបាលក្នុងមន្ទីរពេទ្យ៕
ប្រភព៖ សារព័ត៌មានបរទេស
February 25, 2020