សង្គម និងសេដ្ឋកិច្ច - La Reine Media

ក្រុមបាល់ទាត់បុរសទីពីរដែលបានមកដល់កម្ពុជា ដើម្បីត្រៀមខ្លួនសម្រាប់ស៊ីហ្គេមលើកទី 32

ល្ងាចថ្ងៃទី 25 មេសានេះ ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសឥណ្ឌូណេស៊ី បានមកដល់អាកាសយានដ្ឋានអន្តរជាតិភ្នំពេញ ដើម្បីត្រៀមខ្លួនសម្រាប់ការប្រកួតនៅស៊ីហ្គេមលើកនេះ។

U-22 ឥណ្ឌូណេស៊ី គឺជាក្រុមបាល់ទាត់ជម្រើសជាតិទីពីរដែលបានមកដល់ទឹកដីកម្ពុជា ដើម្បីត្រៀមខ្លួនសម្រាប់ចូលរួមព្រឹត្តិការណ៍ប្រកួតកីឡាអាស៊ីអាគ្នេយ៍។ ក្រុមបាល់ទាត់បុរសដែលបានមកដល់កម្ពុជាមុនគេគឺ U-22 ហ្វ៊ីលីពីន។

U-22 ឥណ្ឌូណេស៊ី ក៏ជាក្រុមដំបូងគេដែលបានបំពេញបញ្ជីឈ្មោះកីឡាករដែលត្រូវចូលរួមប្រកួតនៅស៊ីហ្គេមលើកនេះ។ U-22 ឥណ្ឌូណេស៊ី មានឈ្មោះកីឡាករជាច្រើនដែលធ្លាប់បានចូលរួមប្រកួតនៅស៊ីហ្គេមលើកទី 31 ក្រោមការដឹកនាំរបស់គ្រូបង្វឹក Shin Tae-yong មានដូចជា អ្នកចាំទី Ernando Ari, ខ្សែការពារកណ្ដាល Rizky Ridho, ខ្សែការពារស្លាបទាំងពីរគឺ Pratama Arhan និង Alfeandra Dewangga, ខ្សែបម្រើ Marselino Ferdinan, Witan Sulaeman។ល។ ទន្ទឹមនឹងនេះ គ្រូបង្វឹក Indra Sjafri ក៏បន្ថែមកីឡាករថ្មីជាច្រើននាក់ដែលមានអាយុពី 19 ដល់ 21 ឆ្នាំ។

ចំណែកកីឡាករដែលអវត្តមានដ៏គួរឱ្យចាប់អារម្មណ៍បំផុតរបស់ U-22 ឥណ្ឌូណេស៊ី ប្រហែលជា Ronaldo Kwateh ដែលជាតារាបាល់ទាត់មួយរូបរបស់ប្រទេសនេះ។ អវត្តមានរបស់ Ronaldo Kwateh ទំនងបណ្ដាលមកពីការរងរបួសពេលប្រកួត។ ក៏ប៉ុន្តែ ប្រធានក្រុមគ្រូបង្វឹករបស់ឥណ្ឌូណេស៊ី បានអះអាងថា «ខ្ញុំមិនបារម្ភអ្វីឡើយនៅពេលអវត្តមាន Ronaldo»។

នៅស៊ីហ្គេមលើកនេះ U-22 ឥណ្ឌូណេស៊ីស្ថិតក្នុងពូល A ជាមួយនឹងកម្ពុជា ហ្វ៊ីលីពីន មីយ៉ាន់ម៉ា និងទីម័រខាងកើត។ U-22 ឥណ្ឌូណេស៊ី នឹងត្រូវប្រកួតជាមួយ U-22 ហ្វ៊ីលីពីន វេលាម៉ោង 16 គត់ ថ្ងៃទី 29 មេសា។ ក្នុងថ្ងៃនោះដែរក៏នឹងមានការប្រកួតរវាងក្រុមម្ចាស់ផ្ទះកម្ពុជា ជាមួយនឹងទីម័រខាងកើត នៅវេលាម៉ោង 19 គត់៕

April 25, 2023

កម្ពុជាផ្ដល់សញ្ជាតិដល់អត្តពលិកយូដូអ៊ុយក្រែនច្រើននាក់សម្រាប់ការប្រកួតនៅស៊ីហ្គេម

ក្រុមអត្តពលិកយូដូកម្ពុជាគ្រោងនឹងផ្ដល់សញ្ជាតិដល់អត្តពលិកអ៊ុយក្រែនចំនួនបីនាក់ ក្នុងនោះមានយ៉ាងតិចពីរនាក់នឹងត្រូវបានអនុញ្ញាតឱ្យចូលប្រកួតនៅព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32។

«កម្ពុជាផ្ដល់សញ្ជាតិដល់អត្តពលិកដូចទៅនឹងបណ្ដាប្រទេសជាច្រើនផ្សេងទៀតដើម្បីលើកកម្ពស់សមិទ្ធផលនៃការប្រកួតអន្តរជាតិ» ប្រធានផ្នែកកីឡានៃសហព័ន្ធកីឡាយូដូហ្វ៊ីលីពីន (PJF) Emir Reyes បានប្រាប់សារព័ត៌មាន Malaya ដូច្នេះ។

Emir Reyes បន្ថែមថា «ពួកគេកំពុងផ្ដល់សញ្ជាតិដល់អត្តពលិកយូដូអ៊ុយក្រែនបីរូប ហើយយ៉ាងតិចពីររូបក្នុងចំណោមនោះនឹងចូលរួមប្រកួតនៅស៊ីហ្គេមលើកទី 32»។

យោងតាមសារព័ត៌មានខាងលើ Reyes បានដឹងអំពីរឿងនេះពេលកំពុងធ្វើការជាមួយអគ្គលេខាធិការនៃ PJF លោក Dave Carter (អ្នកទទួលបន្ទុកវិញ្ញាសាយូដូស៊ីហ្គេមលើកទី 32) ក្នុងការបណ្ដុះបណ្ដាលក្រុមអាជ្ញាកណ្ដាល និងមន្ត្រីបច្ចេកទេសរបស់វិញ្ញាសានេះនៅរាជធានីភ្នំពេញ។

Emir Reyes ឱ្យដឹងថា ម្នាក់នឹងប្រកួតនឹងប្រកួតក្នុងប្រភេទទម្ងន់ 66 គីឡូក្រាម ជាមួយនឹង Shugen Nakano របស់ហ្វ៊ីលីពីន។ PJF កំពុងស្វែងរកព័ត៌មានលម្អិតអំពីអត្តពលិកពីររូបខាងលើដើម្បីឱ្យដឹង ពួកគេបំពានច្បាប់យូដូអន្តរជាតិ ឬអត់។

ភាគីខាងកម្ពុជា មកដល់ពេលនេះហាក់មិនទាន់មានប្រតិកម្មអ្វីនៅឡើយ ទាក់ទងនឹងព័ត៌មានខាងលើ។

អ៊ុយក្រែនត្រូវបានគេចាត់ទុកថាជាប្រទេសខ្លាំងក្នុងវិញ្ញាសាក្បាច់គុនយូដូ ឬចំបាប់។ យូដូអ៊ុយក្រែនធ្លាប់ដណ្ដើមបានមេដាយប្រាក់ចំនួនមួយគ្រឿង មេដាយសំរឹទ្ធបីគ្រឿងក្នុងប្រវត្តិសាស្ត្រអូឡាំពិក។ ចំណែកកម្ពុជាវិញ នៅស៊ីហ្គេមលើកទី 31 ក្រុមយូដូកម្ពុជាដណ្ដើមបានមេដាយសំរឹទ្ធចំនួនមួយគ្រឿងក្នុងប្រភេទទម្ងន់ 62 គីឡូក្រាមផ្នែកនារី។

វិញ្ញាសាយូដូនៅស៊ីហ្គេមលើកនេះនឹងប្រកួតចាប់ពីថ្ងៃទី 13 ឧសភា នៅមជ្ឈមណ្ឌលសន្និបាត និងពិព័រណ៍អន្តរជាតិ ជ្រោយចង្វារ រាជធានីភ្នំពេញ។

April 25, 2023

ក្រុមហ៊ុនផលិតម៉ូតូអគ្គិសនីនៅប្រទេសក្បែរខាងកម្ពុជា ប្រមូលទុនបានបីលានដុល្លារដើម្បីបង្កើនការផលិត

Selex Motors ដែលជាក្រុមហ៊ុនផលិតម៉ូតូអគ្គិសនី និងថ្មផ្ទុកថាមពលសម្រាប់ម៉ូតូអគ្គិសនី កំពុងប្រមូលទុនតម្លៃបីលានដុល្លារអាម៉េរិក ក្នុងនោះក៏មានការចូលរួមវិនិយោគពី ADB Ventures, Schneider Electric Energy Access Asia, Touchstone Partners និង Sopoong Ventures ផងដែរ។

ខ្ទង់វិនិយោគថ្មីខាងលើនេះនឹងត្រូវបានប្រើប្រាស់ដើម្បីពង្រីកទំហំនៃខ្សែច្រវាក់ផលិតកម្ម និងគាំទ្រដល់ការលក់ម៉ូតូអគ្គិសនី និងបង្កើតប្រព័ន្ធប្ដូរថ្មផ្ទុកថាមពលនៅតាមបណ្ដាទីក្រុងធំៗនៅប្រទេសវៀតណាម ក៏ដូចជាការពង្រីកតំបន់ពាណិជ្ជកម្មរបស់ Selex ។ នេះបើតាម CEO របស់ក្រុមហ៊ុន Selex Motors ។

ម៉ូតូអគ្គិសនីរបស់ក្រុមហ៊ុន Selex Motors ត្រូវបានរចនាឡើងសម្រាប់គោលដៅប្រើប្រាស់ក្នុងកម្រិតខ្ពស់ដូចជាការប្រគល់ទំនិញជាដើម។ ម៉ូតូរបស់ក្រុមហ៊ុនវៀតណាមមួយនេះផ្ដល់ការគាំទ្រដល់ដំណោះស្រាយនៅក្នុងការប្ដូរថ្មផ្ទុកថាមពលដែលអាចធ្វើដំណើរបានរហូតដល់ 150 គីឡូម៉ែត្រ ដោយប្រើពេលដក និងដាក់ថ្មមិនដល់ពីរនាទី។

ខ្ទង់ប្រាក់វិនិយោគខាងលើនេះត្រូវបានប្រមូលនៅពេលវិស័យយានយន្តអគ្គិសនីទទួលបានចំណាប់អារម្មណ៍ខ្លាំងនៅអាស៊ីប៉ាស៊ីហ្វ៊ិក ដោយទីផ្សារនៅតំបន់នេះត្រូវបានគណនាឃើញថានឹងមានតម្លៃឡើងដល់ជាង 777 ពាន់លានដុល្លារអាម៉េរិកនៅត្រឹមឆ្នាំ 2027។

ក្រុមហ៊ុន Selex Motors ត្រូវបានបង្កើតឡើងកាលពីឆ្នាំ 2018 នៅប្រទេសវៀតណាម ដោយជនជាតិវៀតណាមបីរូបគឺ បណ្ឌិត ង្វៀន ហឺវហ្វឿកង្វៀន, បណ្ឌិត ង្វៀន ត្រុងហៃ និងអ្នកជំនាញផ្នែក IoT ង្វៀន ឌិញក្វាង។

April 25, 2023

ក្រុមហ៊ុនពីរនៅកម្ពុជា គ្រោងនឹងបង្កើតរោងចក្រកាត់ដេរ និងផលិតសម្ភារៈវេចខ្ចប់តម្លៃជាងដប់លានដុល្លារ

ក្រុមហ៊ុន FITLY APPAREL និងក្រុមហ៊ុន WH PACKAGING ទទួលបានការយល់ព្រមពីគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា ដើម្បីវិនិយោគទៅលើគម្រោងចំនួនពីរដែលមានទុនសរុបចំនួនជាងដប់លានដុល្លារអាម៉េរិក។ នេះបើតាមទំព័របណ្ដាញសង្គមផ្លូវការរបស់ក្រុមប្រឹក្សាអភិវឌ្ឍន៍កម្ពុជា ចុះផ្សាយកាលពីថ្ងៃទី 24 មេសា។

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុនដូចខាងក្រោម៖

ទីមួយ៖ ក្រុមហ៊ុន FITLY APPAREL CO., LTD មានគម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិអង្គកែវ សង្កាត់ចោមចៅទីបី ខណ្ឌពោធិ៍សែនជ័យ រាជធានីភ្នំពេញ ក្នុងទុនវិនិយោគប្រមាណ 5.3 លានដុល្លារអាម៉េរិក និងអាចបង្កើតការងារបានចំនួន 1,891 កន្លែង។

ទីពីរ៖ ក្រុមហ៊ុន WH PACKAGING មានគម្រោងបង្កើតរោងចក្រផលិតសម្ភារៈវេចខ្ចប់ ដែលមានទីតាំងវិនិយោគស្ថិតនៅផ្លូវជាតិលេខ 6 ភូមិជ្រោយមេត្រីក្រោម ឃុំឫស្សីជ្រោយ ស្រុកមុខកំពូល ខេត្តកណ្តាល ក្នុងទុនវិនិយោគប្រមាណ 5.1 លានដុល្លារអាម៉េរិក និងអាចបង្កើតការងារបានចំនួន 1,076 កន្លែង។

ជាសរុប ក្រុមហ៊ុនទាំងពីរខាងលើមានទុនសរុបចំនួន 10.4 លានដុល្លារអាម៉េរិក និងបង្កើតការងារបានជិតពីរពាន់កន្លែង៕

April 25, 2023

កីឡាការិនីនៃក្រុមបាល់ទាត់ជម្រើសជាតិហ្វ៊ីលីពីនប្ដេជ្ញាដណ្ដើមមេដាយមាសនៅស៊ីហ្គេមកម្ពុជា

ខ្សែការពារ Hali Long បានអះអាងថា ក្រុមបាល់ទាត់នារីហ្វ៊ីលីពីននឹងប្រឹងប្រែងឡើងឱ្យដល់វគ្គផ្ដាច់ព្រ័ត្រនៅស៊ីហ្គេមលើកទី 32 ដើម្បីនាំយកមេដាយមាសជូនប្រទេសជាតិ។

យោងតាមទំព័រ One Sports របស់ហ្វ៊ីលីពីន កីឡាការិនីខ្សែការពាររបស់ក្រុមបាល់ទាត់នារីជម្រើសជាតិរបស់ប្រទេសនេះ ថ្មីៗនេះបានចែករំលែកព័ត៌មានដ៏គួរឱ្យចាប់អារម្មណ៍ស្ដីពីគោលដៅរបស់ Filipinas (រហ័សនាមរបស់ក្រុមបាល់ទាត់នារីជម្រើសជាតិហ្វ៊ីលីពីន) នៅស៊ីហ្គេមលើកទី 32 នៅក្នុងកម្មវិធីកីឡា «The Game»។

Hali Long ឱ្យដឹងថា បន្ទាប់ពីមេដាយសំរឹទ្ធនៅស៊ីហ្គេមលើកទី 31 ក្រុមបាល់ទាត់នារីជម្រើសជាតិហ្វ៊ីលីពីន កំពុងឆ្ពោះទៅរកមេដាយដទៃទៀតនៅឯព្រឹត្តិការណ៍ប្រកួតកីឡាអាស៊ីអាគ្នេយ៍ឆ្នាំ 2023 ដែលនឹងធ្វើឡើងនៅកម្ពុជានាប៉ុន្មានថ្ងៃខាងមុខ។

«សម្រាប់ខ្ញុំ គោលដៅរបស់ក្រុមនារីជម្រើសជាតិហ្វ៊ីលីពីនត្រូវតែជាមេដាយមាស ឬសំរឹទ្ធ។ យើងមិនចង់ឡើងដល់វគ្គផ្ដាច់ព្រ័ត្រហើយក្រោយមកត្រូវបរាជ័យ។ ក្រុមនារីជម្រើសជាតិហ្វ៊ីលីពីនចង់មានវត្តមាននៅក្នុងការប្រកួតចុងក្រោយ និងដណ្ដើមបានជ័យជម្នះ» Hali Long ឱ្យដឹងដូច្នេះ។

ក្នុងរយៈពេលពីរឆ្នាំមកនេះ ក្រុមបាល់ទាត់នារីហ្វ៊ីលីពីនបានរីកចម្រើនគួរឱ្យកត់សម្គាល់។ Hali Long រួមនឹងមិត្តរួមក្រុមដណ្ដើមបានសំបុត្រទៅចូលរួមប្រកួតនៅ World Cup 2023 ។ ទន្ទឹមនឹងនេះ Filipinas ក៏បានយកឈ្នះលើក្រុមវៀតណាម និងថៃ ក្លាយជាជើងឯកនៅ AFF Cup 2022 ។

ជាងនេះ ក្រុមបាល់ទាត់នារីហ្វ៊ីលីពីនក៏បានបង្ហាញកម្លាំងដ៏ល្អរបស់ខ្លួននៅវគ្គជម្រុះទីមួយនៅ Olympic Paris 2024 ដោយបានផ្ដួលប៉ាគីស្ថាន (4-0), តាហ្ស៊ីគីស្ថាន (8-0) និងហុងកុង (4-0) ហើយក៏បានឡើងដល់វគ្គជម្រុះទីពីរ។

ទោះជាយ៉ាងណាក៏ដោយ Hali Long នៅតែប្ដេជ្ញាផ្ដោតការយកចិត្តទុកដាក់ខ្ពស់សម្រាប់គោលដៅនៅស៊ីហ្គេមកម្ពុជា។ នាងយល់ថា ក្រុមនារីហ្វ៊ីលីពីននឹងមិន «ដេកលក់» នៅលើជោគជ័យដែលដណ្ដើមបាននាពេលកន្លងនោះឡើយ។

កីឡាការិនីនៃក្រុមបាល់ទាត់ជម្រើសជាតិហ្វ៊ីលីពីន

នៅស៊ីហ្គេមលើកទី 32 ក្រុមបាល់ទាត់នារីជម្រើសជាតិហ្វ៊ីលីពីនស្ថិតក្នុងពូល A ដែលមានក្រុមវៀតណាម ម៉ាឡេស៊ី និងមីយ៉ាន់ម៉ា។ ដោយមានសមិទ្ធផល និងកម្លាំងខ្លាំងក្លានាពេលកន្លង ក៏ដូចជាបច្ចុប្បន្ន Hali Long និងក្រុមជម្រើសជាតិហ្វ៊ីលីពីនត្រូវបានវាយតម្លៃថាជាបេក្ខភាពដ៏លេចធ្លោសម្រាប់មេដាយមាសនៅស៊ីហ្គេមលើកនេះ៕

April 25, 2023

យន្តហោះកូនកាត់បាឡុងហោះទំនើប និងធំជាងគេបង្អស់លើពិភពលោក

(អង់គ្លេស) – យន្តហោះ Airlander 10 ឬ HAV 304 របស់ក្រុមហ៊ុន Hybrid Air Vehicles មានបណ្ដោយ 92 ម៉ែត្រ អាចហោះឡើងដល់កម្ពស់ 5,000 ម៉ែត្រ និងល្បឿន 145 គីឡូម៉ែត្រ/ម៉ោង។

George Land ដែលជាប្រធានផ្នែកអភិវឌ្ឍពាណិជ្ជកម្មរបស់ក្រុមហ៊ុន Hybrid Air Vehicles បានឱ្យដឹងថា បណ្ដាក្រុមហ៊ុនអភិវឌ្ឍយន្តហោះកូនកាត់នឹងកំណត់ឡើងវិញនូវវិធីដែលពិភពលោកស្រមៃអំពីអាកាសចរណ៍។ «យើងនឹងពិនិត្យមើលមធ្យោបាយហោះហើរកូនកាត់ខ្នាតយក្សប្ដូរផ្លាស់ការយល់ឃើញអំពីសកម្មភាពហោះហើរ» នេះបើតាម George Land។

ម៉ូដែលយន្តហោះកូនកាត់បាឡុងរបស់ក្រុមហ៊ុន Hybrid Air Vehicles (HAV) នៅប្រទេសអង់គ្លេស ដែលមានឈ្មោះថា Airlander 10 ឬ HAV 304 ហោះហើរជាលើកដំបូងកាលពីឆ្នាំ 2012។ យន្តហោះនេះរួមមាន បាឡុងអេល្យូម ដែលមានស្លាប និងកន្ទុយ រួមនឹងម៉ាស៊ីនម៉ាស៊ូតចំនួនបួនគ្រឿង។

យន្តហោះកូនកាត់ដូច Airlander នេះ ប្រើប្រាស់ទាំងកម្លាំងលើករបស់ឧស្ម័ន បច្ចេកទេស និងបច្ចេកវិទ្យាទំនើប ធ្វើឱ្យវាស្រាលជាងបរិយាកាសជាងមុន។ ប្រការនេះជួយកាត់បន្ថយការលំបាកនៅក្នុងការដឹកជញ្ជូនដែលតែងកើតមាននៅលើបាឡុងហោះបែបប្រពៃណីបច្ចុប្បន្ន។

ដងខ្លួនរបស់ Airlander ធ្វើពីក្រណាត់ច្រើនស្រទាប់ដែលភ្ជាប់ជាមួយគ្នាដើម្បីបង្កើនភាពធន់ និងរក្សាឧស្ម័នអេល្យូមបានល្អ។ ដោយមានបំពាក់មុខងារប្ដូរផ្លាស់ទំហំនៃកាប៊ីនផ្ទុកឧស្ម័នអេល្យូម ពីឡុតអាចបើកបរយន្តហោះកូនកាត់នេះបានយ៉ាងស្រួល។

ក្នុងករណីខួច Airlander អាចហោះទៅដល់កន្លែងជួសជុល និងបំពេញអេល្យូមតាមរយៈប្រព័ន្ធគ្រប់គ្រងសម្ពាធស្វ័យប្រវត្ត។ ឧស្ម័នអេល្យូមដែលលេចចេញតាមរន្ធនៅលើស្រទាប់ក្រណាត់ កើតឡើងយ៉ាងយឺត ដោយសារភាពខុសគ្នារវាងសម្ពាធមានកម្រិតទាប។

ចំណុចពិសេសរបស់យន្តហោះកូនកាត់ Airlander 10 ដែលអាចដឹកអ្នកដំណើរបាន 100 នាក់ ឬទំនិញដប់តោននេះ គឺមិនសូវបំពុលបរិស្ថាន អាចប្រើបានយូរ ពហុមុខងារ មានភាពបត់បែនខ្ពស់ និងសន្សំសំច័យ។ល។

យន្តហោះ Airlander 10 ឬ HAV 304 របស់ក្រុមហ៊ុន Hybrid Air Vehicles

ម៉ាស៊ីនម៉ាស៊ូត V8 កម្លាំង 325 សេះ (242 kW) ចំនួនបួនគ្រឿងរបស់ Thielert Centurion ផ្ដល់ថាមពលដល់កង្ហារបួនគូនៅលើយន្តហោះកូនកាត់នេះ៕

April 25, 2023

ក្រោយពីបានបង្ហាញថ្វីជើងនៅអឺរ៉ុប តារាបាល់ទាត់ថៃមានទំនុកចិត្តខ្ពស់នៅមុនស៊ីហ្គេមកម្ពុជាមកដល់

ក្នុងថ្ងៃដំបូងនៃការជួបជុំរបស់ខ្លួននៅក្នុងក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសថៃ ដែលត្រៀមខ្លួនសម្រាប់ចូលរួមព្រឹត្តិការណ៍ប្រកួតកីឡាអាស៊ីអាគ្នេយ៍នៅកម្ពុជា ខ្សែប្រយុទ្ធ Achitpol Keereerom បាននិយាយដោយភាពជឿជាក់។

កាលពីល្ងាចថ្ងៃទី 24 មេសា U-22 ថៃ បានឈានចូលដល់ថ្ងៃហ្វឹកហាត់ទីបួនដើម្បីត្រៀមខ្លួនសម្រាប់ស៊ីហ្គេមលើកទី 32។ ក្នុងថ្ងៃហ្វឹកហាត់នៅតំបន់ទេសចរណ៍កីឡា Phatthana ខេត្ត Chonburi គ្រូបង្វឹក Issara Sritaro បន្តទទួលស្វាគមន៍វត្តមានរបស់កីឡាករមួយចំនួន ក្នុងនោះក៏មាន Achitpol Keereerom ដែលជាតារាបាល់ទាត់មួយរូបកំពុងប្រកួតឱ្យក្លឹបនៅអឺរ៉ុប។

Achitpol Keereerom បច្ចុប្បន្នស្ថិតក្នុងចំណោមកីឡាករវ័យក្មេងរបស់ក្លឹប Augsburg ដែលប្រកួតនៅឯពានរង្វាន់លំដាប់ទីបួនរបស់ប្រទេសអាល្លឺម៉ង់។ នៅមុនថ្ងៃត្រលប់មកជួបជុំក្រុម U-22 ថៃ ខ្សែប្រយុទ្ធកើតឆ្នាំ 2001 រូបនេះ បានបង្ហាញថ្វីជើងដ៏ល្អរបស់ខ្លួន ដោយការស៊ុតបញ្ចូលទីជួយឱ្យ Augsburg ឈ្នះ Hankofen-Hailing 2-1 នៅក្នុងវគ្គទី 33 នៃការប្រកួតដណ្ដើមពានរង្វាន់លំដាប់ទីបួននៅអាល្លឺម៉ង់។

នៅក្នុងការហ្វឹកហាត់ថ្ងៃដំបូងរបស់ខ្លួន បន្ទាប់ពីជួបជុំក្រុម U-22 ថៃ ខ្សែប្រយុទ្ធ Achitpon Keereerom បានថ្លែងដោយក្ដីរីករាយថា «ការទាត់បញ្ចូលទីឱ្យ Augsburg នៅមុនស៊ីហ្គេមមកដល់ គឺពិតជាបាននាំមកថាមពល និងភាពជឿជាក់ដល់ខ្ញុំយ៉ាងច្រើន។ ខ្ញុំចង់បន្តរក្សាកម្លាំងនេះនៅក្នុងពានរង្វាន់នាពេលខាងមុខ»។

«ខ្ញុំមិនមានការបារម្ភទាល់តែសោះនៅមុនស៊ីហ្គេមលើកទី 32។ ពួកយើងមកទីនេះក្នុងបំណងដណ្ដើមជ័យជម្នះ។ U-22 ថៃ ជឿជាក់លើសមត្ថភាពរបស់ខ្លួន ហើយនឹងប្រឹងប្រែងឱ្យអស់ពីលទ្ធភាព…។

ក្នុងបញ្ជីឈ្មោះនៃក្រុម U-22 ថៃ ដែលត្រៀមសម្រាប់ស៊ីហ្គេមនៅកម្ពុជា Achitpol Keereerom គឺជាម្នាក់ក្នុងចំណោមកីឡាករថៃពីររូប (ក្នុងនោះមាន Chayapipat Suphanphat ទាត់ឱ្យក្លឹប Estoril របស់ព័រទុយហ្កាល់) ដែលកំពុងប្រកួតនៅអឺរ៉ុប។ Achitpol Keereerom កំពុងលេចធ្លោនៅពានរង្វាន់លំដាប់ទីបួននៃប្រទេសអាល្លឺម៉ង់ នៅពេលបានរួមចំណែករកបានពីរគ្រាប់ និងបង្កឱកាសបានមួយគ្រាប់ឱ្យ Augsburg ក្រោយការប្រកួត 566 នាទីនៅក្នុង 16 ប្រកួតនាពេលកន្លង៕

April 25, 2023

ក្រុមគុនល្បុក្កតោជម្រើសជាតិវៀតណាម នឹងទទួលបានរង្វាន់បន្ថែម ពេលដណ្ដើមបានមេដាយ

ដំណឹងល្អបានលេចឡើងសម្រាប់កីឡាករនៃក្រុមគុនល្បុក្កតោជម្រើសជាតិវៀតណាម គ្រាដែលនៅសល់មិនដល់ពីរសប្ដាហ៍ទៀតប៉ុណ្ណោះ ស៊ីហ្គេមលើកទី 32 នឹងត្រូវបានសម្ពោធបើកការប្រកួតនៅកម្ពុជា។

ដំណឹងល្អខាងលើ នោះគឺអត្តពលិកដែលដណ្ដើមបានមេដាយមាសក្នុងវិញ្ញាសាប្រកួតក្បាច់គុនល្បុក្កតោនៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍នៅកម្ពុជា នឹងទទួលបានប្រាក់រង្វាន់ 20 លានដុង ពីសហព័ន្ធកីឡាគុនបុរាណវៀតណាម។

លោក ង្វៀន ង៉ុកអាញ់ ប្រធានសហព័ន្ធកីឡាគុនបុរាណវៀតណាម បានឱ្យដឹងថា «ដើម្បីគាំទ្រ និងលើកទឹកចិត្តដល់អត្តពលិកនៃក្រុមកីឡាគុនល្បុក្កតោជម្រើសជាតិវៀតណាម សហព័ន្ធក្បាច់គុនបុរាណវៀតណាម នឹងផ្ដល់ប្រាក់រង្វាន់ 20 លានដុង (ជាង 850 ដុល្លារអាម៉េរិក) ដល់អត្តពលិកម្នាក់ៗដែលដណ្ដើមបានមេដាយមាសក្នុងវិញ្ញាសាប្រកួតក្បាច់គុនល្បុក្កតោនៅស៊ីហ្គេមលើកទី 32»។

យោងតាមសារព័ត៌មានវៀតណាម ការលើកទឹកចិត្ត ក៏ដូចជាការប្រកាសផ្ដល់រង្វាន់ទាន់ពេលនេះនឹងក្លាយជាការជំរុញដ៏សំខាន់ដើម្បីឱ្យកូនសិស្ស និងគ្រូបង្វឹករបស់ក្រុមគុនល្បុក្កតោជម្រើសជាតិវៀតណាម ឆ្ពោះទៅរកលទ្ធផលល្អក្នុងការប្រកួតស៊ីហ្គេមនៅកម្ពុជា។

អត្តពលិកដែលដណ្ដើមបានមេដាយមាសក្នុងវិញ្ញាសាប្រកួតក្បាច់គុនល្បុក្កតោនៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍នៅកម្ពុជា នឹងទទួលបានប្រាក់រង្វាន់ 20 លានដុង

លោក ឡេ កុងប៊ុត ប្រធានក្រុមគ្រូបង្វឹករបស់ក្រុមគុនល្បុក្កតោវៀតណាម បាននិយាយថា «តាមការកំណត់ អត្តពលិកម្នាក់ៗដែលចូលរួមប្រកួតនៅស៊ីហ្គេម នឹងទទួលបានប្រាក់រង្វាន់ 45 លានដុងសម្រាប់មេដាយមាស, 25 លានដុងសម្រាប់មេដាយប្រាក់ និង 20 លានដុងសម្រាប់មេដាយសំរឹទ្ធ»។

វិញ្ញាសាគុនល្បុក្កតោរបស់កម្ពុជា ថ្វីបើទើបតែមានវត្តមានជាលើកដំបូងក្នុងព្រឹត្តិការណ៍ស៊ីហ្គេម ប៉ុន្តែតាមគម្រោង នឹងមានប្រាំក្រុមចូលរួមប្រកួតដណ្ដើមមេដាយចំនួន 19 គ្រឿង។

យោងតាមកាលវិភាគនៃការប្រកួតនៅស៊ីហ្គេមលើកទី 32 វិញ្ញាសាគុនល្បុក្កតោនឹងសម្ពោធបើកការប្រកួតនៅថ្ងៃទី 05 ឧសភា ហើយចាប់ផ្ដើមការប្រកួតពីថ្ងៃទី 06 ដល់ 14 ឧសភា 2023៕

April 24, 2023

រថយន្តអគ្គិសនីអាចជួយឱ្យអ្នកសន្សំសំច័យប្រាក់បានចាប់ពី 6,000 ដុល្លារអាម៉េរិក

យោងតាមការស្រាជ្រាវមួយតាំងពីឆ្នាំ 2020 របស់ Consumer Reports ម្ចាស់រថយន្តអគ្គិសនីអាចសន្សំសំច័យប្រាក់បានចាប់ពី 6,000 ដល់ 10,000 ដុល្លារអាម៉េរិក នៅក្នុងមួយអាយុកាលរបស់វា បើធៀបនឹងរថយន្តដែលប្រើតែម៉ាស៊ីនចំហេះក្នុង។

Chris Harto អ្នកវិភាគគោលនយោបាយថាមពល និងគមនាគមន៍ជាន់ខ្ពស់របស់ Consumer Reports បានឱ្យដឹងថា ចាប់តាំងពីការស្រាវជ្រាវនោះត្រូវបានប្រកាស រថយន្តអគ្គិសនីជាច្រើនបានថោកជាងមុន ហើយរថយន្តម៉ាស៊ីនសាំងប្រែជាថ្លៃជាងមុន។

នៅសហរដ្ឋអាម៉េរិក ច្បាប់កាត់បន្ថយអតិផរណាដែលលោក ចូ បៃដិន បានចុះហត្ថលេខាកាលពីឆ្នាំ 2022 បានពន្យារពេលឥណទានពន្ធសម្រាប់រថយន្តអគ្គិសនីថ្មីរហូតដល់ឆ្នាំ 2032។ ការផ្ដល់ជូនដែលមានតម្លៃឡើងដល់ 7,500 ដុល្លារនេះ រួមនឹងការកំណត់ស្ដីពីស្ដង់ដាមួយចំនួនទៀត បាន និងកំពុងរួមចំណែកធ្វើឱ្យតម្លៃរថយន្តអគ្គិសនីកាន់តែធូរថ្លៃ។

នៅពេលប្រៀបធៀបអំពីការចំណាយសរុបក្នុងពេលប្រើប្រាស់ គេឃើញថា «ជាមធ្យម រថយន្តអគ្គិសនីតែងតែល្អជាងបើធៀបនឹងរថយន្តម៉ាស៊ីនចំហេះក្នុង» នេះបើតាម Debapriya Chakraborty សេដ្ឋវិទូ និងជាជំនួយការផ្នែកស្រាវជ្រាវនៅមជ្ឈមណ្ឌលស្រាវជ្រាវលើរថយន្តអគ្គិសនីរបស់សាកលវិទ្យាល័យ Chicago និង The Associated Press បានឱ្យដឹងដូច្នេះ។

ក៏ប៉ុន្តែ នៅមានកត្តាមួយចំនួនដែលអាចធ្វើឱ្យលទ្ធផលខាងលើមានការប្រែប្រួលសម្រាប់មនុស្សម្នាក់ៗ ក្នុងនោះមានដូចជាកត្តាតម្លៃអគ្គិសនី និងសាំងក្នុងតំបន់, ប្រសិទ្ធភាពរបស់ឆ្នាំងសាកថ្មតាមផ្ទះធៀបនឹងស្ថានីយសាធារណៈ, ម៉ូដែលរថយន្ត និងរយៈចម្ងាយនៃការបើកបរ។ល។

ទោះជាយ៉ាងណាក៏ដោយ បើយោងតាមលទ្ធផលនៃការសិក្សាស្រាវជ្រាវមួយរបស់សាកលវិទ្យាល័យ Michigan ដែលបានប្រកាសកាលពីខែមករាកន្លងទៅ ការប្ដូរមកប្រើប្រាស់រថយន្តអគ្គិសនីនឹងជួយសន្សំសំច័យឥន្ធនៈជាមធ្យមបាន 55% សម្រាប់អតិថិជននៅទូទាំងសហរដ្ឋអាម៉េរិក។ ការស្រាវជ្រាវនេះក៏បានបង្ហាញថា 90% នៃគ្រួសារនៅសហរដ្ឋអាម៉េរិក នឹងកាត់បន្ថយឧស្ម័នផ្ទះកញ្ចប់ដែលពួកគេបំភាយផងដែរ៕

April 24, 2023

ទ្វីបអឺរ៉ុបសាងសង់ប្រព័ន្ធម៉ាស៊ីនបង្កើននៃភាគល្អិតមានថាមពល «ខ្លាំងស្មើនឹងរន្ទះបាញ់ដប់លានគ្រាប់»

អង្គការស្រាវជ្រាវនុយក្លេអែរអឺរ៉ុប កំពុងអនុវត្តជំហានដំបូងៗដើម្បីសាងសង់ម៉ាស៊ីនបង្កើនល្បឿនភាគល្អិតមានថាមពល (energy particle collider) ខ្នាតយក្សថ្មី ក្នុងគោលដៅស្រាវជ្រាវផ្នែកវេជ្ជសាស្ត្រ និងព្យាបាលជម្ងឺមហារីក។

Future Circular Collider (FCC) នឹងមានបរិមាត្រវែងជាងបីដងធៀបនឹង LHC ដែលជាម៉ាស៊ីនបង្កើនល្បឿនភាគល្អិតមានថាមពល ដែលធំ និងខ្លាំងបំផុតលើពិភពលោកនាបច្ចុប្បន្ន ត្រូវបានសាងសង់ឡើងដើម្បីស្វែងយល់អំពីអាថ៌កំបាំងស្ដីពីយន្តការចក្រវាល។ ម៉ាស៊ីនបង្កើនល្បឿនភាគល្អិតមានថាមពល FCC នឹងស្ថិតក្នុងផ្លូវរូងក្រោមដីនៃប្រទេសបារាំង និងស្វ៊ីស ហើយមានប្រវែង 91 គីឡូម៉ែត្រ និងទំហំមុខកាត់ប្រហែលប្រាំម៉ែត្រ។ នេះបើតាម Phys.org ចុះផ្សាយកាលពីថ្ងៃទី 22 មេសា។

យោងតាមអង្គការស្រាវជ្រាវនុយក្លេអែរអឺរ៉ុប (CERN) គោលបំណងរបស់ FCC គឺការជំរុញថាមពល និងកម្លាំងរបស់ម៉ាស៊ីនបង្កើនល្បឿនភាគល្អិតមានថាមពល ឱ្យសម្រេចបានថាមពលនៃការប៉ះគ្នាឱ្យឡើងដល់ 100 teraelectronvolt ដែលស្មើនឹងរន្ទះបាញ់ដប់លានគ្រាប់។ ផ្លូវរូងនេះស្ថិតនៅក្នុងទីក្រុងហ្សឺណែវ ប្រទេសស្វ៊ីស និងក្បែរតំបន់ Annecy របស់ប្រទេសបារាំង។ មូលដ្ឋានវិទ្យាសាស្ត្រ និងបច្ចេកទេសចំនួន 8 នឹងត្រូវបានសាងសង់នៅលើដី ក្នុងនោះមាន 7 នៅក្នុងប្រទេសបារាំង និងមួយនៅក្នុងប្រទេសស្វ៊ីស។ ក្រោយពីការសិក្សាលំអិត ប្រទេសចំនួន 22 ដែលជាសមាជិករបស់ CERN នឹងធ្វើការសម្រេចចិត្តថា តើអាចសាងសង់ FCC ក្នុងរយៈពេលពី 5 ទៅ 6 ឆ្នាំទៀត ឬអត់។

FCC នឹងបង្កើនល្បឿនរបស់អេឡិចត្រុង និងប៉ូស៊ីត្រុង (electron and positron) រហូតដល់ឆ្នាំ 2060 ហើយក្រោយមកនឹងបង្កើនល្បឿនរបស់ហាដរ៉ុន (hadron) រហូតដល់ឆ្នាំ 2090។ ប្រព័ន្ធម៉ាស៊ីននេះនឹងស្វែងរកចម្លើយដើម្បីតបទៅនឹងសំណួរជាច្រើនដែលមិនទាន់មានចម្លើយនៅក្នុងវិស័យរូបវិទ្យាមូលដ្ឋាន។ បច្ចុប្បន្ន ម៉ាស និងថាមពលប្រមាណ 95% របស់ចក្រវាល មិនទាន់ត្រូវបានគេស្គាល់នៅឡើយ។

អំពីអង្គការស្រាវជ្រាវនុយក្លេអែរអឺរ៉ុប (CERN)

ម៉ាស៊ីនបង្កើននៃភាគល្អិតមានថាមពល LHC របស់ CERN មានបរិមាត្រប្រវែង 27 គីឡូម៉ែត្រ និងជម្រៅប្រហែល 100 ម៉ែត្រក្រោមដី ធ្លាប់ត្រូវបានប្រើប្រាស់ដើម្បីបញ្ជាក់អំពីវត្តមានរបស់ភាគល្អិត Higgs Boson ឬហៅថា ភាគល្អិតរបស់ព្រះ (God Particle) ពង្រីកការយល់ដឹងអំពីរបៀបដែលភាគល្អិតប្រមូលបានម៉ាស ដែលនេះបានជួយឱ្យអ្នកវិទ្យាសាស្ត្រពីររូបទទួលបានពានរង្វាន់ណូបែលរូបវិទ្យាកាលពីឆ្នាំ 2013។

Malika Meddahi អនុប្រធានផ្នែកប្រព័ន្ធម៉ាស៊ីនបង្កើនល្បឿនភាគល្អិត និងបច្ចេកវិទ្យារបស់ CERN បានសង្កត់ធ្ងន់ថា ផលប្រយោជន៍នៃការស្រាវជ្រាវនេះពិតជាមានសារសំខាន់ខ្លាំងណាស់ ក្នុងនោះក៏មានទាំងការថតរូបក្នុងវិស័យវេជ្ជសាស្ត្រ និងការព្យាបាលជម្ងឺមហារីកជាដើមផងដែរ៕

April 24, 2023

Category: សង្គម និងសេដ្ឋកិច្ច