សង្គម និងសេដ្ឋកិច្ច - La Reine Media

ទួរប៊ីនខ្យល់លើសមុទ្រធំបំផុតលើពិភពលោកបង្កើតកំណត់ត្រាថ្មីក្នុងការផលិតអគ្គិសនី

ប្រព័ន្ធកង្ហារផលិតអគ្គិសនីពីកម្លាំងខ្យល់លើសមុទ្រដែលមានថាមពល 16 MW និងជាផលិតផលក្នុងស្រុករបស់ប្រទេសចិន ដំណើរការនៅលើសមុទ្រខេត្ត Fujian បង្កើតបានកំណត់ត្រាថ្មីស្ដីពីការផលិតអគ្គិសនីក្នុងមួយថ្ងៃ កាលពីថ្ងៃទី 01 កញ្ញា 2023។

យោងតាមក្រុមហ៊ុនចិន CTGC ដែលគ្រប់គ្រងទួរប៊ីនខាងលើ ប្រព័ន្ធកង្ហារលើសមុទ្រនេះដំណើរការ 24 ម៉ោងក្នុងមួយថ្ងៃ និងផលិតអគ្គិសនីក្នុងមួយថ្ងៃបានរហូតដល់ 384,000 គីឡូវ៉ាតម៉ោង ស្មើនឹងបរិមាណអគ្គិសនីដែលប្រើប្រាស់ក្នុងមួយថ្ងៃរបស់មនុស្សជិត 170,000 នាក់។

សូមបញ្ជាក់ថា បន្ទាប់ពីត្រូវបានដំឡើងកាលពីចុងខែមិថុនា 2023 ទួរប៊ីនខ្យល់ខាងលើត្រូវបានតភ្ជាប់ជាមួយនឹងបណ្ដាញអគ្គិសនី និងចាប់ផ្ដើមផលិតអគ្គិសនីពីថ្ងៃទី 19 កក្កដា។

តាមផែនការ ទួរប៊ីនខ្យល់នេះនឹងផលិតអគ្គិសនីបានជាង 66 លានគីឡូវ៉ាត់ម៉ោងក្នុងមួយឆ្នាំ ដែលនេះគឺគ្រប់គ្រាន់សម្រាប់ផ្គត់ផ្គង់ដល់តម្រូវការរបស់មនុស្សនៅក្នុង 36,000 គ្រួសារដែលក្នុងមួយគ្រួសារមានសមាជិកបីនាក់។ ប្រព័ន្ធកង្ហារផលិតអគ្គិសនីនេះមានស្លាបចក្រដែលវិលក្នុងផ្ទៃក្រឡាប្រហែល 50,000 ម៉ែត្រការ៉េ ស្មើនឹងទីលានបាល់ទាត់ស្ដង់ដាចំនួន 7 បូកចូលគ្នា។

September 5, 2023

BYD បង្ហាញរថយន្តអគ្គិសនីថ្មីតម្លៃជាងបីម៉ឺនដុល្លារអាម៉េរិក/គ្រឿង

ក្រុមហ៊ុនចិន BYD បានបង្ហាញរថយន្តអគ្គិសនីម៉ូដែលថ្មី 2023 ដែលមានឈ្មោះថា Tang តម្លៃជាង 34,000 ដុល្លារអាម៉េរិក។

កាលពីថ្ងៃទី 31 សីហាកន្លងទៅ BYD បានបង្ហាញកំណែថ្មីឆ្នាំ 2023 នៃរថយន្តអគ្គិសនី Tang នៅទីផ្សារចិន។ កំណែថ្មីរបស់ BYD Tang មានម៉ូដែលដែលមានមុខងារ និងតម្លៃផ្សេងៗគ្នាសម្រាប់ជ្រើសរើស។ កំណែដែលអាចធ្វើដំណើរបាន 600 គីឡូម៉ែត្រ មានតម្លៃ 34,300 ដុល្លារ ខណៈដែលកំណែ 730 គីឡូម៉ែត្រ មានតម្លៃ 37,700 ដុល្លារ និងកំណែ 635 គីឡូម៉ែត្រ មានតម្លៃ 41,100 ដុល្លារអាម៉េរិក។

មួយក្នុងចំណោមចំណុចលេចធ្លោរបស់ BYD Tang 2023 គឺតម្លៃថយចុះរហូតដល់ 13.7% បើធៀបនឹងស៊េរីឆ្នាំ 2022 ធ្វើឱ្យរថយន្តទាំងនេះកាន់តែមានភាពទាក់ទាញ។

ក្រៅពីនេះ គ្រប់ម៉ូដែល BYD Tang 2023 សុទ្ធតែបំពាក់ឧបករណ៍បច្ចេកវិទ្យាដែលគាំទ្រដល់ការបញ្ចូលថាមពលរហ័ស អនុញ្ញាតឱ្យថ្មដែលសល់ 30% លោតឡើងដល់ 80% ដោយចំណាយពេលតែ 30 នាទី។ ម៉ូដែលថ្មីនេះមានកៅអី 6 និង 7។

កំណែ 635 គីឡូម៉ែត្រ មានសមត្ថភាពបង្កើនល្បឿនពី 0 ដល់ 100 គីឡូម៉ែត្រ/ម៉ោង ដោយចំណាយពេលត្រឹមតែ 4.4 វិនាទី៕

September 4, 2023

ក្រុមហ៊ុនទាំងដប់ដែលជួយឱ្យលោក Elon Musk ក្លាយជាមហាសេដ្ឋីពិភពលោក

លោក Elon Musk បានចូលរួមបង្កើត ឬគ្រប់គ្រងក្រុមហ៊ុនសរុបចំនួនដប់ ដែលភាគច្រើនស្ថិតក្នុងវិស័យបច្ចេកវិទ្យា និងមានភាពច្នៃប្រឌិតខ្ពស់។

យោងតាម Forbes គិតចាប់តាំងពីលោកចាប់ផ្ដើមចេញរកស៊ីកាលពីអាយុ 24 ឆ្នាំរហូតដល់បច្ចុប្បន្ន មហាសេដ្ឋីវ័យ 51 ឆ្នាំរូបនេះមានទ្រព្យសរុបប្រហែល 243 ពាន់លានដុល្លារអាម៉េរិក និងជាអ្នកមានទ្រព្យច្រើនជាងគេលំដាប់ទីមួយក្នុងពិភពលោក។

ក្រុមហ៊ុន Zip2

ឆ្នាំ 1995 បន្ទាប់ពីខ្ចីបានប្រាក់ 28,000 ដុល្លារពីឪពុក លោក Elon Musk និងប្អូនបង្កើត Kimbal បើកក្រុមហ៊ុន Zip2 ដែលជាគម្រោងផ្ដល់សេវាកម្មផែនទី និងសៀវភៅលេខទូរស័ព្ទដល់គេហទំព័រព័ត៌មាននានា។ បួនឆ្នាំក្រោយមក ពួកគេក៏លក់ Zip2 ទៅឱ្យក្រុមហ៊ុន Compaq ក្នុងតម្លៃ 307 លានដុល្លារ។ លោក Elon Musk ទទួលបាន 22 លានដុល្លារ និងបន្តការវិនិយោគលើគម្រោងដទៃ។

ក្រុមហ៊ុន PayPal

ឆ្នាំ 1999 បន្ទាប់ពីបានលក់ Zip2 លោក Elon Musk ក៏បានចំណាយ 12 លានដុល្លារដើម្បីបង្កើតក្រុមហ៊ុនផ្ដល់សេវាកម្មហិរញ្ញវត្ថុតាមអនឡាញ X.com។ ឆ្នាំ 2000 លោកក៏យល់ព្រមច្របាច់បញ្ចូលគ្នារវាង X.com និងគូប្រជែង Confinity ហើយប្ដូរឈ្មោះទៅជា PayPal។ ប៉ុន្តែ ក្រោយមក លោកក៏ត្រូវបង្ខំឱ្យចាកចេញពីកៅអីប្រធាន។

PayPal ត្រូវបាន eBay ទិញក្នុងតម្លៃ 1.5 ពាន់លានដុល្លារកាលពិឆ្នាំ 2002។ លោក Elon Musk គឺជាភាគហ៊ុនិកធំជាងគេ និងទទួលបានពី 160 ទៅ 180 លានដុល្លារ។ លោកក៏ប្រើប្រាស់ប្រាក់នេះវិនិយោគទៅលើ SpaceX និង Tesla ដែលក្រុមហ៊ុននាំឱ្យលោកក្លាយជាមហាសេដ្ឋី។

SpaceX

SpaceX គឺជាក្រុមហ៊ុនអវកាសដែលលោក Musk និង Tom Mueller បង្កើតឡើងកាលពីឆ្នាំ 2002។ គោលដៅរបស់ពួកគេគឺការកាត់បន្ថយការចំណាយក្នុងការដឹកជញ្ជូនមនុស្ស និងទំនិញឡើងទៅកាន់ទីអវកាស។ បច្ចុប្បន្ន SpaceX ត្រូវបានកំណត់តម្លៃឡើងដល់ប្រហែល 150 ពាន់លានដុល្លារ។

ក្រុមហ៊ុន Tesla

Tesla ត្រូវបានបង្កើតឡើងកាលពីឆ្នាំ 2003។ បច្ចុប្បន្ន Tesla គឺជាក្រុមហ៊ុនផលិតរថយន្តអគ្គិសនីធំជាងគេលើពិភពលោក។

SolarCity

ឆ្នាំ 2006 ដោយយោងទៅតាមគំនិតរបស់លោក Musk បងប្អូនជីដូនមួយរបស់លោក គឺ Peter និង Lyndon Rive បានបង្កើត SolarCity ដែលផលិតផ្ទាំងសូឡា។ ក្រោយមក លោក Musk ក៏ធ្វើជាប្រធាន និងជាភាគហ៊ុនិកធំជាងគេក្នុងក្រុមហ៊ុននេះ។

ឆ្នាំ 2016 Tesla ទិញយក SolarCity ក្នុងតម្លៃ 2.6 ពាន់លានដុល្លារដើម្បីជួយដល់សកម្មភាពរបស់ Tesla Energy ក្នុងវិស័យរក្សាថាមពលព្រះអាទិត្យសម្រាប់ផ្គត់ផ្គង់ដល់ស្ថានីយបញ្ចូលអគ្គិសនីដោយមិនគិតថ្លៃសម្រាប់រថយន្តអគ្គិសនី។

OpenAI

ឆ្នាំ 2015 លោក Musk ចូលរួមបង្កើតក្រុមហ៊ុនមិនស្វែងរកប្រាក់កម្រៃ OpenAI ដែលសិក្សាស្រាវជ្រាវអំពីបញ្ញាសិប្បនិម្មិត។ ប៉ុន្តែ លោក Musk បានចាកចេញពីក្រុមហ៊ុននេះកាលពីឆ្នាំ 2018។

ឆ្នាំ 2019 OpenAI ទទួលបានប្រាក់វិនិយោគមួយពាន់លានដុល្លារពី Microsoft។ បច្ចុប្បន្ន OpenAI បានងាកទៅស្វែងរកប្រាក់កម្រៃដោយមានផលិតផលសំខាន់គឺ ChatGPT។

Neuralink

នេះគឺជាក្រុមហ៊ុនបច្ចេកវិទ្យាទាក់ទងនឹងប្រព័ន្ធប្រសាទដែលលោក Musk បង្កើតឡើងកាលពីឆ្នាំ 2016។ គោលដៅរបស់ក្រុមហ៊ុននេះគឺការអភិវឌ្ឍវិធីសាស្ត្រព្យាបាលជំងឺដែលទាក់ទងនឹងខួរក្បាល និងតភ្ជាប់ខួរក្បាលមនុស្សជាមួយនឹងកុំព្យូទ័រតាមរយៈឧបករណ៍តូចដែលភ្ជាប់ក្នុងក្បាលមនុស្ស។

The Boring Company

ឆ្នាំ 2017 លោក Musk បង្កើតក្រុមហ៊ុននេះដើម្បីជួយផ្លាស់ប្ដូរបណ្ដាញគមនាគមន៍នៅសហរដ្ឋអាម៉េរិក។ ក្រុមហ៊ុននេះមានគម្រោងសាងសង់ផ្លូវរូងក្រោមដីសម្រាប់រថយន្តល្បឿនលឿនបើកបរដោយស្វ័យប្រវត្ត។

ក្រុមហ៊ុន X

X ដើមឡើយគឺជាបណ្ដាញសង្គម Twitter ប៉ុន្តែត្រូវលោក Musk ទិញកាលពីខែតុលា 2022 ក្នុងតម្លៃ 44 ពាន់លានដុល្លារ។ ខែកក្កដា 2023 លោកក៏បានប្ដូរឈ្មោះ និងឡូហ្គោ Twitter ទៅជា X។

ក្រុមហ៊ុន xAI

ខែកក្កដា 2023 xAI ត្រូវបានលោក Musk បង្កើតឡើងដើម្បីស្វែងយល់អំពីចក្រវាល និងអភិវឌ្ឍដំណោះស្រាយដើម្បីជំនួស ChatGPT៕

September 2, 2023

រថយន្តដឹកទំនិញពាសផ្ទាំងសូឡាធ្វើដំណើរបន្ថែមបានប្រាំពាន់គីឡូម៉ែត្រ

(ស៊ុយអែត) – រថយន្តដឹកទំនិញដែលសាកល្បងដំណើរការក្នុងគម្រោងពិសោធន៍ថ្មី ពាសផ្ទាំងសូឡាដែលមានផ្ទៃក្រឡារហូតដល់ 100 ម៉ែត្រការ៉េ ជួយឱ្យរថយន្តធ្វើដំណើរបន្ថែមបាន 5,000 គីឡូម៉ែត្រ ដោយមិនបាច់ឈប់ចាក់សាំង។

សាកលវិទ្យាល័យ Uppsala សហការជាមួយបណ្ដាក្រុមហ៊ុន Eksjo Maskin & Truck, Midsummer, Ernsts Express, Dalakraft និង Scania អនុវត្តគម្រោងស្រាវជ្រាវថ្មីមួយដើម្បីអភិវឌ្ឍរថយន្តដឹកទំនិញដំណើរការដោយថាមពលព្រះអាទិត្យ។ គម្រោងនេះឧបត្ថម្ភដោយស្ថាប័នច្នៃប្រឌិត Vinnova របស់ស៊ុយអែត។

យោងតាមទំព័រ New Atlas ក្រុមអ្នកជំនាញអភិវឌ្ឍផ្ទាំងសូឡាស្រាលសម្រាប់ភ្ជាប់លើរថយន្ត ដើម្បីទាញយកថាមពលពីកម្ដៅព្រះអាទិត្យ ជួយកាត់បន្ថយការចំណាយ និងការបំភាយឧស្ម័ន។ល។

រថយន្តដឹកទំនិញខាងលើប្រើប្រាស់ម៉ាស៊ីនកម្លាំង 560 សេះ និងមានដងខ្លួនប្រវែង 18 ម៉ែត្រ ក្នុងនោះផ្ទៃក្រឡាខាងក្រៅទំហំ 100 ម៉ែត្រការ៉េត្រូវបានគ្របដោយផ្ទាំងសូឡាកម្លាំង 13.2 គីឡូវ៉ាត់ ដែលអាចបង្កើតអគ្គិសនីបានប្រហែល 8,000 គីឡូវ៉ាត់ម៉ោង/ឆ្នាំ ពេលប្រើប្រាស់នៅក្នុងប្រទេសស៊ុយអែត។ ថ្មផ្ទុកអគ្គិសនីរបស់រថយន្តនេះមានកម្លាំង 300 គីឡូវ៉ាត់ម៉ោង ក្នុងនោះ 100 គីឡូវ៉ាត់ម៉ោងសម្រាប់ក្បាលរថយន្ត និង 200 គីឡូវ៉ាត់ម៉ោងសម្រាប់ទូសណ្ដោង។

បើទោះនៅស៊ុយអែតខ្វះថាមពលព្រះអាទិត្យព្រោះតែអាកាសធាតុ ប៉ុន្តែផ្ទាំងសូឡាដែលភ្ជាប់លើរថយន្តដឹកទំនិញខាងលើនៅតែអាចទាញយកថាមពលបានច្រើន ជួយឱ្យរថយន្តធ្វើដំណើរបន្ថែមបានរហូតដល់ 5,000 គីឡូម៉ែត្ររៀងរាល់ឆ្នាំ ដែលជួយឱ្យរថយន្តមិនបាច់ឈប់ដើម្បីចាក់សាំង។ ក្រុមស្រាវជ្រាវសង្ឃឹមថា ថាមពលព្រះអាទិត្យដែលប្រមូលបាននៅក្នុងបណ្ដាប្រទេសក្បែរតំបន់អេក្វាទ័រនឹងខ្ពស់ជាងនេះទ្វេដង៕

September 2, 2023

យន្តហោះល្បឿនមហាលឿនរបស់ Boom ហោះហើរសាកល្បងឆាប់ៗនេះ

(សហរដ្ឋអាម៉េរិក) – ក្រុមហ៊ុន Boom Supersonic ប្រកាសថា យន្តហោះល្បឿនលឿនជាងសំឡេងគំរូដើមរបស់ពួកគេបានឆ្លងផុតការសាកល្បងនៅលើដី និងទទួលបានការអនុញ្ញាតពី FAA ក្នុងការហោះហើរសាកល្បងនាពេលខាងមុខ។

យន្តហោះ XB-1 ដែលមានទំហំស្មើនឹង 1/3 នៃទំហំផ្លូវការក្នុងគម្រោងអភិវឌ្ឍយន្តហោះដឹកអ្នកដំណើរល្បឿនលឿនជាងសំឡេង Overture ត្រូវបានក្រុមហ៊ុន Boom ធ្វើតេស្តលើដីនៅឯអវកាសយានដ្ឋាន Mojave ក្នុងរដ្ឋ California មុននឹងដំណើរហោះហើរសាកល្បងដំបូង។ នេះបើតាម New Atlas ចុះផ្សាយកាលពីថ្ងៃទី 29 សីហា 2023។

រដ្ឋបាលអាកាសចរណ៍សហរដ្ឋអាម៉េរិក (FAA) បានអនុញ្ញាតឱ្យ XB-1 ធ្វើការហោះហើរដំបូងដោយមានពីឡុត។ XB-1 មានបណ្ដោយ 21 ម៉ែត្រ, ស្លាបប្រវែង 5.2 ម៉ែត្រ, កម្ពស់ 5.2 ម៉ែត្រ និងទម្ងន់អតិបរមាពេលហោះហើរគឺ 6,123 គីឡូក្រាម។

យន្តហោះនេះបំពាក់ម៉ាស៊ីន General Electric J85-15 ដែលប្រើប្រាស់ឥន្ធនៈអាកាសចរណ៍ប្រកបដោយស្ថិរភាព (SAF) ចំនួនបីគ្រឿង ផ្ដល់កម្លាំងរុញច្រានសរុប 5,579 គីឡូក្រាម និងល្បឿន 2,100 គីឡូម៉ែត្រ/ម៉ោង។

August 31, 2023

រថយន្តកាត់ឧទ្ធម្ភាគចក្រ ល្បឿន 240 គីឡូម៉ែត្រ/ម៉ោង

(សហរដ្ឋអាម៉េរិក) – ក្រុមហ៊ុនបច្ចេកវិទ្យា Aska នៅកាលីហ្វរញ៉ាខាងជើង អភិវឌ្ឍរថយន្តកាត់ឧទ្ធម្ភាគចក្រអាចរត់លើផ្លូវគោក ហើយបន្ទាប់មកហោះឡើងដោយគ្រាន់តែចុចគន្លឹះ។

Aska A5 គឺជារថយន្តកាត់ឧទ្ធម្ភាគចក្រគំរូដែលអាចធ្វើឱ្យក្ដីស្រមៃអំពីឡានហោះក្លាយជាការពិត។ ក្រុមហ៊ុន Aska បានចាប់ផ្ដើមអភិវឌ្ឍឡានហោះនេះតាំងពីឆ្នាំ 2018។ ថ្មីៗនេះ ពួកគេសម្រេចបានគំរូដំបូង និងបានសាកល្បងដំណើរការរយៈពេល 10 នាទី។ នេះបើតាម Business Insider ចុះផ្សាយកាលពីថ្ងៃទី 28 សីហា។

Aska A5 ទទួលបានលិខិតអនុញ្ញាតសម្រាប់ការហោះហើរសាកល្បងពីស្ថាប័នគ្រប់គ្រងអាកាសចរណ៍អាម៉េរិក (FAA)។ Aska គឺជាក្រុមហ៊ុនអភិវឌ្ឍឡានហោះទីពីរដែលត្រូវបាន FAA ផ្ដល់លិខិតអនុញ្ញាតក្នុងឆ្នាំនេះ បន្ទាប់ពីក្រុមហ៊ុន Alef Aeronautics។

សម្រាប់ A5 ក្រុមហ៊ុន Aska ចង់ធ្វើបដិវត្តលើវិស័យគមនាគមន៍ និងជួយឱ្យអ្នកដំណើរដែលរស់នៅឆ្ងាយពីការិយាល័យ ទទួលបានភាពងាយស្រួលក្នុងការធ្វើដំណើរ។ ឡានហោះនេះអាចហោះក្នុងល្បឿន 240 គីឡូម៉ែត្រក្នុងមួយម៉ោង និងផ្លាស់ទីបាន 400 គីឡូម៉ែត្រ។ Aska A5 ដំណើរការដោយម៉ូទ័រអគ្គិសនី រួមនឹងម៉ាស៊ីនឧស្ម័ន។

A5 អាចហោះឡើង និងចុះចតត្រង់ដូចទៅនឹងដ្រូន ឬឧទ្ធម្ភាគចក្រ។ ក្រុមហ៊ុនដទៃអភិវឌ្ឍមធ្យោបាយហោះឡើង និងចុះចតត្រង់ ដំណើរការដោយអគ្គិសនី (eVTOL) ប៉ុន្តែ ពួកវាសុទ្ធតែមិនអាចរត់លើផ្លូវគោក។ ចំណែក A5 អាចបត់ស្លាបរបស់វា បង្កើតបានជារាងរថយន្ត អាចធ្វើដំណើរលើផ្លូវគោក។

ក្រុមហ៊ុន Aska កំពុងបន្តការអភិវឌ្ឍឡានហោះនេះ។ គំរូចុងក្រោយនឹងល្អជាងបច្ចុប្បន្ន ហើយអាចដឹកមនុស្សបាន 6 នាក់។ Aska គ្រោងនឹងប្រគល់ A5 ដល់ដៃអតិថិជនចាប់ពីឆ្នាំ 2026។ ពួកគេក៏មានគម្រោងផ្ដល់សេវាដឹកជញ្ជូនដែលមានតម្លៃសមស្របផងដែរ៕

August 29, 2023

យន្តហោះបុគ្គលមានរាងដូចស៊ុត អាចហោះក្នុងល្បឿនមួយរយគីឡូម៉ែត្រ/ម៉ោង

Airscooter ដែលត្រូវបានរចនាឡើងដើម្បីជំនួសកូនរថយន្ត អាចហោះហើរក្នុងល្បឿន 100 គីឡូម៉ែត្រក្នុងមួយម៉ោង ដោយហោះឡើង និងចុះចតត្រង់ដូចឧទ្ធម្ភាគចក្រ។

អ្នកស្រាវជ្រាវជនជាតិបារាំង Franky Zapata បានបង្ហាញយន្តហោះលក្ខណៈបុគ្គលថ្មីមួយប្រភេទ មានកាប៊ីនសម្រាប់អ្នកបើកបរដែលមានរូបរាងដូចស៊ុត និងអាចហោះក្នុងកម្ពស់ 2,900 ម៉ែត្រ។ យោងតាម Mail ដែលបានចុះផ្សាយកាលពីថ្ងៃទី 21 សីហា 2023 យន្តហោះ Airscooter អាចជួយឱ្យការធ្វើដំណើរប្រហែលពីរម៉ោងតាមរថយន្តនៅក្នុងពេលចរាចរណ៍ចង្អៀត ចុះមកនៅត្រឹម 10 នាទី។

ក្រុមហ៊ុន Zapata ឱ្យដឹងថា យានជំនិះថ្មីនេះកំពុងស្ថិតក្នុងដំណាក់កាលអភិវឌ្ឍ។ Airscooter គឺជាយន្តជំនិះដែលហោះឡើង និងចុះចត់ត្រង់ដូចឧទ្ធម្ភាគចក្រ (VTOL)។ នេះគឺជាយន្តហោះកូនកាត់ (ហាយព្រីដ) ប្រើប្រាស់អគ្គិសនី និងប្រេងឥន្ធនៈ ដើម្បីផ្ដល់ថាមពលដល់រ៉ូទ័រ 6 គ្រឿងដែលបំពាក់ពីខាងលើកាប៊ីន។ Airscooter អាចហោះហើររយៈពេលពីរម៉ោងបន្តបន្តបន្ទាប់ យូរជាងយាន VTOL ដទៃ។

Airscooter មានទម្ងន់ 115 គីឡូក្រាម។ គ្រប់គ្នាអាចបើកបរយន្តហោះនេះបាន បន្ទាប់ពីឆ្លងកាត់ការហ្វឹកហាត់រយៈពេលខ្លី។ បើទោះជាផលិតឡើងក្នុងបំណងជំនួសកូនរថយន្ត ប៉ុន្តែ Airscooter នឹងមិនត្រូវបានដាក់លក់ក្នុងទីផ្សារនោះទេ។ ជំនួសមកវិញ អ្នកប្រើប្រាស់នឹងត្រូវបង់ប្រាក់មួយចំនួនសម្រាប់ការបើកបរ 40 នាទីដោយផ្ទាល់ដៃ និងគយគន់ទេសភាពតាមបង្អួច។

ចាប់ពីដើមឆ្នាំក្រោយ Zapata នឹងបើកមជ្ឈមណ្ឌលហោះហើរនៅសហរដ្ឋអាម៉េរិក ដើម្បីផ្ដល់សេវាកម្មហោះហើរកម្សាន្តដល់អតិថិជន។ មជ្ឈមណ្ឌលដំបូងនឹងមាននៅក្នុងទីក្រុង Lake Havasu រដ្ឋ Arizona៕

August 23, 2023

ក្រុមបាល់ទាត់ U23 កម្ពុជា អាចផ្ដួលក្រុមថៃនៅព្រលប់នេះ ឬអត់?

បើសិនផ្ដួល U23 របស់ថៃ បានសម្រេច ក្រុមបាល់ទាត់បុរសជម្រើសជាតិវ័យក្រោម 23 ឆ្នាំ (U23) របស់កម្ពុជា នឹងបានឡើងទៅកាន់វគ្គពាក់កណ្ដាលផ្ដាច់ព្រ័ត្រនៃពានរង្វាន់បាល់ទាត់ U23 អាស៊ីអាគ្នយ៍ឆ្នាំ 2023។

ការប្រកួតរវាង U23 កម្ពុជា និង U23 ថៃ នៅជើងទីបីនៃវគ្គសន្សំពិន្ទុរបស់ពានរង្វាន់បាល់ទាត់ U23 អាស៊ីអាគ្នយ៍ឆ្នាំ 2023 (2023 AFF U-23 Championship) នឹងត្រូវបានធ្វើឡើងនៅម៉ោង 20 ថ្ងៃទី 21 សីហានេះ នៅឯកីឡដ្ឋាន Rayong ប្រទេសថៃ។

កន្លងមក អ្នកគាំទ្រជាច្រើន មានការបារម្ភជំនួស U23 ថៃ និងត្រេកអរចំពោះ U23 កម្ពុជា នៅពេលក្រុមម្ចាស់ផ្ទះបញ្ចប់ការប្រកួតដំបូងរបស់ខ្លួននៅពូល A ត្រឹមចំណាត់ថ្នាក់លេខពីរប្រចាំពូល។ U23 ថៃបានឈ្នះ មីយ៉ាន់ម៉ា 3-0 គ្រាដែលកម្ពុជាឈ្នះព្រុយណេ 5-0។ ក៏ប៉ុន្តែ ចូលដល់ជើងទីពីរ ថៃបានលោតឡើងកំពូលតារាង ដោយបានឈ្នះព្រុយណេ 3-0 ហើយមាន 6 ពិន្ទុក្នុងដៃ។ U23 ថៃ ត្រូវការតែលទ្ធផលស្មើប៉ុណ្ណោះក្នុងការប្រកួតជាមួយកម្ពុជា ក៏អាចបានឡើងដល់វគ្គពាក់កណ្ដាលផ្ដាច់ព្រ័ត្រ។

ចំណែកកម្ពុជាវិញ ថ្វីបើបានធ្វើឱ្យ U23 ថៃព្រួយបារម្ភ បន្ទាប់ពីបានផ្ដួលព្រុយណេដោយលទ្ធផល 5-0 ប៉ុន្តែក៏បានធ្វើឱ្យខកចិត្តនៅពេលបណ្ដោយឱ្យមីយ៉ាន់ម៉ាយកស្មើក្នុងការប្រកួតជើងទីពីរ។ ពេលនេះ កម្ពុជាត្រូវតែឈ្នះថៃ ដើម្បីបានបន្តទៅវគ្គបន្ទាប់។ បើគ្រាន់តែស្មើ និងឈរលំដាប់ទីពីរក្នុងពូល U23 កម្ពុជាប្រាកដជានឹងមិនអាចយកឈ្នះឥណ្ឌូណេស៊ី ដើម្បីក្លាយជាក្រុមលំដាប់ទីពីរដែលត្រូវឡើងទៅវគ្គពាក់កណ្ដាលផ្ដាច់ព្រ័ត្រ។

ពាន់រង្វាន់ជើងឯកបាល់ទាត់បុរសអាយុក្រោម 23 ឆ្នាំ (U23) អាស៊ីអាគ្នេយ៍ ធ្វើឡើងនៅប្រទេសថៃចាប់ពីថ្ងៃទី 17 ដល់ 26 សីហា 2023។ ក្នុងលើកទីបួន ពានរង្វាន់នេះមានក្រុមបាល់ទាត់ចូលរួមប្រកួតសរុបចំនួន 10 ក្រុម និងត្រូវបានចែកជា 3 ពូល។ ពូល A រួមមាន កម្ពុជា ថៃ មីយ៉ាន់ម៉ា និងព្រុយណេ។ ពូល B រួមមាន ទីម័រខាងកើត ម៉ាឡេស៊ី និងឥណ្ឌូណេស៊ី ខណៈពូល C មាន វៀតណាម ហ្វ៊ីលីពីន និងឡាវ។

កាលពីឆ្នាំកន្លង ពានរង្វាន់បាល់ទាត់នេះត្រូវបានធ្វើឡើងនៅកម្ពុជា ក្នុងនោះ ថៃ និងវៀតណាមបានជួបគ្នានៅវគ្គផ្ដាច់ព្រ័ត្រ ហើយវៀតណាមបានក្លាយជាជើងឯក ដោយបានយកឈ្នះលើថៃ 1-0៕

August 21, 2023

បច្ចេកវិទ្យារបស់ណាសា អាចធ្វើឱ្យឡានហោះក្លាយជាការពិត

(សហរដ្ឋអាម៉េរិក) – ការបំពាក់ស្លាបកង្ហារនៅសងខាង និងខាងក្រោយ ជួយឱ្យយានជំនិះនេះអាចហោះឡើងត្រង់ទៅលើ និងឆ្ពោះទៅមុខដោយកម្លាំងរុញច្រាន។

ក្រុមហ៊ុន Applied eVTOL Concepts បង្ហាញគម្រោងអភិវឌ្ឍយានជំនិះមួយប្រភេទដែលហោះឡើង និងចុះចតដោយត្រង់ (eVTOL) ដែលមានឈ្មោះថា Epiphany Transporter។ យានជំនិះនេះអាចហោះក្នុងល្បៀន 258 គីឡូម៉ែត្រ/ម៉ោង ប៉ុន្តែមានសំឡេងរំខានមិនដល់កម្រិត 55 decibel (dB) នៅលើកម្ពស់ 15 ម៉ែត្រ។ សំឡេងរំខាននេះស្ថិតក្នុងចន្លោះសំឡេងទឹកភ្លៀងធ្លាក់ស្មើ (50 dB) និងសំឡេងមនុស្សនិយាយគ្នាធម្មតា (60 dB)។ នេះបើតាម Space ចុះផ្សាយកាលពីថ្ងៃទី 18 សីហា។

គន្លឹះសំខាន់គឺស្ថិតនៅលើស្លាបកង្ហាររុញច្រានដែលបំពាក់នៅសងខាង និងផ្នែកខាងក្រោយរបស់ Epiphany Transporter។ នេះគឺជារចនាដែលដូចទៅនឹងរូបរាងរបស់យានជំនិះមួយប្រភេទដែលត្រូវបានណាសាអភិវឌ្ឍកាលពីឆ្នាំ 2002 ប៉ុន្តែបានឆ្លងកាត់ការអភិវឌ្ឍជាបន្តបន្ទាប់ក្នុងរយៈពេលប្រហែលពីរទសវត្សរ៍កន្លង។

Epiphany Transporter ត្រូវបានរចនាឡើងដើម្បីអាចដឹកអ្នកដំណើរបានពីរនាក់ រួមនឹងអីវ៉ាន់។ ក្រុមហ៊ុនខាងលើឱ្យដឹងថា យានជំនិះនេះមានទំហំប្រហាក់ប្រហែលនឹងរថយន្ត Tesla Model S និងអាចចតក្នុងចំណតធម្មតាបាន៕

August 19, 2023

តារាងចំណាត់ថ្នាក់ក្រុមបាល់ទាត់ U23 អាស៊ីអាគ្នេយ៍ 2023 សម្រាប់ថ្ងៃទី 18 សីហា

ពាន់រង្វាន់ជើងឯកបាល់ទាត់បុរសអាយុក្រោម 23 ឆ្នាំ (U23) អាស៊ីអាគ្នេយ៍ ធ្វើឡើងនៅប្រទេសថៃចាប់ពីថ្ងៃទី 17 ដល់ 26 សីហា 2023។ ក្នុងលើកទីបួន ពានរង្វាន់នេះមានក្រុមបាល់ទាត់ចូលរួមប្រកួតសរុបចំនួន 10 ក្រុម និងត្រូវបានចែកជា 3 ពូល។ ពូល A រួមមាន កម្ពុជា ថៃ មីយ៉ាន់ម៉ា និងព្រុយណេ។

ចំណែកពូល B វិញ រួមមាន ទីម័រខាងកើត ម៉ាឡេស៊ី និងឥណ្ឌូណេស៊ី ខណៈពូល C មាន វៀតណាម ហ្វ៊ីលីពីន និងឡាវ។

កាលពីឆ្នាំកន្លង ពានរង្វាន់បាល់ទាត់នេះត្រូវបានធ្វើឡើងនៅកម្ពុជា ក្នុងនោះ ថៃ និងវៀតណាមបានជួបគ្នានៅវគ្គផ្ដាច់ព្រ័ត្រ ហើយវៀតណាមបានក្លាយជាជើងឯកដោយបានយកឈ្នះលើថៃ 1-0។

នៅក្នុងការប្រកួតបើកឆាករបស់ពាន់រង្វាន់ជើងឯកបាល់ទាត់អាស៊ីអាគ្នេយ៍ U23 ឆ្នាំ 2023 ក្រុមបាល់ទាត់បុរសអាយុក្រោម 23 ឆ្នាំរបស់កម្ពុជា ដែលស្ថិតក្នុងពូល A បានយកឈ្នះ U23 របស់ព្រុយណេ 5-0 កាលពីម្សិលមិញ៕

ពូល A

លរ	ក្រុម	ចំនួនប្រកួត	ឈ្នះ	ស្មើ	ចាញ់	គ្រាប់បាល់ចំណេញ	ពិន្ទុ
1	U23 កម្ពុជា	1	1	0	0	5	3
2	U23 ថៃ	1	1	0	0	3	3
3	U23 មីយ៉ាន់ម៉ា	1	0	0	1	-3	0
4	U23 ព្រុយណេ	1	0	0	1	-5	0

ពូល B

លរ	ក្រុម	ចំនួនប្រកួត	ឈ្នះ	ស្មើ	ចាញ់	គ្រាប់បាល់ចំណេញ	ពិន្ទុ
1	U23 ទីម័រខាងកើត	0	0	0	0	0	0
2	U23 ម៉ាឡេស៊ី	0	0	0	0	0	0
3	U23 ឥណ្ឌូណេស៊ី	0	0	0	0	0	0

ពូល C

លរ	ក្រុម	ចំនួនប្រកួត	ឈ្នះ	ស្មើ	ចាញ់	គ្រាប់បាល់ចំណេញ	ពិន្ទុ
1	U23 វៀតណាម	0	0	0	0	0	0
2	U23 ហ្វ៊ីលីពីន	0	0	0	0	0	0
3	U23 ឡាវ	0	0	0	0	0	0

August 18, 2023

Category: សង្គម និងសេដ្ឋកិច្ច