សង្គម និងសេដ្ឋកិច្ច - La Reine Media

កូនក្រមុំពាក់មាសទម្ងន់រហូតដល់ 10 គីឡូក្រាម ចំណែកគ្រែវិញ ត្រូវក្រាលពេញដោយបាច់ប្រាក់

(ប្រទេសចិន)-កូនក្រមុំម្នាក់នៅខេត្ត Fujian ទទួលបានចំណងដៃជាសាច់ប្រាក់សុទ្ធចំនួន 880,000 យុន (ជិត 138,000 ដុល្លារអាម៉រិក) រួមនឹងមាសទម្ងន់ 10 គីឡូក្រាម នៅក្នុងថ្ងៃរៀបមង្គលការ។

គណនី Weibo ឈ្មោះ Zhang Xiaolei កាលពីសប្ដាហ៍មុន បានបង្ហោះអត្ថបទមួយស្ដីពីរឿងរ៉ាវនៃពិធីរៀបអាពាហ៍ពិពាហ៍ដ៏ប្រណិតមួយដែលមានចំណងដៃជាមាស និងប្រាក់យ៉ាងច្រើនសន្ធឹក របស់កូនក្រមុំមួយរូបដែលមានវ័យខ្ទង់ជាង 20 នៅទីក្រុង Putian នៃខេត្ត Fujian ធ្វើឱ្យអ្នកលេងបណ្ដាញសង្គមនៅប្រទេសចិន មានការភ្ញាក់ផ្អើល។

យោងតាមការចែករំលែករបស់ Zhang កូនក្រមុំកើតក្នុងត្រកូលអ្នកមាន ដែលឪពុកម្ដាយមានទ្រព្យសម្បត្តិមហាសាលដោយសារជំនួញ។ នាងត្រូវបានឪពុកម្ដាយចាត់ទុកដូចជាត្បូងពេជ្រដ៏កម្រ មិនអាចកាត់ថ្លៃបាន និងរស់នៅក្នុងភាពសម្បូរសប្បាយតាំងពីតូច។ ប៉ុន្តែ ព័ត៌មានស្ដីពីកូនកំលោះ មិនត្រូវបានបង្ហើបឱ្យដឹងឡើយ។

ក្នុងថ្ងៃរៀបការ សាច់ប្រាក់សុទ្ធជាចំណងដៃពីឪទុកម្ដាយរបស់ មានចំនួន 8880,000 យុន (ជិត 138,000 ដុល្លារ) ត្រូវបានចងជាបាច់ ក្រាលពេញលើគ្រែ ខណៈមាសជាគ្រឿងអលង្ការ រួមមាន ខ្សែក កងដៃ និងចិញ្ចៀនជាដើម មានទម្ងន់សរុប 10 គីឡូក្រាម ក៏ត្រូវបានបំពាក់ពេញលើរាងកាយកូនក្រមុំ។

អ្នកលេងបណ្ដាញសង្គមនៅ ប្រទេសចិន បានសម្ដែងការភ្ញាក់ផ្អើលនឹងភាពមានបានរបស់គ្រួសារកូនក្រមុំ ក្នុងនោះមានអ្នកខ្លះស្ងើចសរសើរ តែក៏មានអ្នកខ្លះបញ្ចេញមតិថា៖ «សុភមង្គលមិនអាចវាស់បានដោយប្រាក់កាស» ហើយអ្នកខ្លះក៏ថា៖ «ដូចជាសម្ញែងទ្រព្យសម្បត្តិពេកហើយ»។ល។

November 24, 2021

ឥណ្ឌា មានបំណងដាក់បម្រាម និងការកំណត់លើរូបិយវត្ថុឌីជីថល របស់ឯកជន ដើម្បីទុកលទ្ធភាពឱ្យរដ្ឋ

រដ្ឋាភិបាលឥណ្ឌា ជិតដាក់សេចក្ដីព្រាងច្បាប់ថ្មី ឡើងទៅសភា ក្នុងបំណងទប់ស្កាត់រូបិយវត្ថុឌីជីថលឯកជនស្ទើរតែទាំងអស់ មុនពេលធនាគារជាតិបញ្ចេញប្រាក់ឌីជីថលផ្ទាល់ខ្លួន។

រដ្ឋាភិបាលឥណ្ឌា កាលពីថ្ងៃទី 23 វិច្ឆិកា បានឱ្យដឹងថា សេចក្ដីព្រាងច្បាប់ «ប្រាក់ឌីជីថល និងការកំណត់អំពីសេចក្ដីព្រាងច្បាប់ស្ដីពីប្រាក់ឌីជីថល» នឹងអនុញ្ញាតឱ្យប្រើប្រាស់ប្រាក់ឌីជីថល តែមួយចំនួនតូចប៉ុណ្ណោះ។ សេចក្ដីព្រាងច្បាប់នេះនឹងត្រូវបានដាក់ឡើងទៅកាន់សភាជាតិដើម្បីពិនិត្យ អនុម័ត នៅក្នុងកិច្ចប្រជុំនារដូវត្រជាក់ ដែលចាប់ផ្ដើមពីចុងខែវិច្ឆិកា 2021។

តាមរយៈសេចក្ដីព្រាងច្បាប់នេះ ឥណ្ឌា ក៏កំពុងតែមានគម្រោងដាក់ឱ្យប្រើប្រាស់រូបិយវត្ថុឌីជីថល ដែលបោះផ្សាយដោយធនាគារជាតិ (RBI) ផងដែរ។ កន្លងមក RBI បានសម្ដែងការព្រួយបារម្ភខ្លាំងអំពីប្រាក់ឌីជីថលឯកជន ហើយគ្រោងនឹងបញ្ចេញរូបិយវត្ថុឌីជីថលដោយឡែករបស់ខ្លួននៅធ្នូ 2021។

Bitcoin ជារូបិយវត្ថុឌីជីថល មានតម្លៃខ្ពស់ជាងគេក្នុងពិភពលោក កំពុងត្រូវបានជួញដូរក្នុងរង្វង់ 60,000 ដុល្លារ/Bitcoin។ ប្រាក់ឌីជីថលឯកជននេះ បានឡើងថ្លៃទ្វេដង រាប់ចាប់ពីដើមឆ្នាំ 2021 និងកំពុងទាក់ទាញអ្នកវិនិយោគយ៉ាងខ្លាំងក្លា។

ប្រទេសឥណ្ឌា បច្ចុប្បន្នមានអ្នកវិនិយោគលើប្រាក់ឌីជីថល ប្រមាណពី 15 ទៅ 20 លាននាក់ ជាមួយនឹងខ្ទង់ប្រាក់សរុបប្រហែល 400 ពាន់លានរូពី (5.39 ពាន់លានដុល្លារអាម៉េរិក)។

ថ្មីៗនេះ នាយករដ្ឋមន្ត្រី Narendra Modi បានបើកកិច្ចប្រជុំមួយដែលពិភាក្សាអំពីអនាគតរបស់ប្រាក់ឌីជីថល ក្នុងគ្រាដែលមានការព្រួយបារម្ភថា ទីផ្សារហិរញ្ញវត្ថុឌីជីថលដែលមិនត្រូវបានគ្រប់គ្រង អាចបង្កលក្ខណៈងាយស្រួលដល់សកម្មភាពលាងលុយ និងការគាំទ្រអំពើភេរវកម្ម៕

November 24, 2021

IMF ថា ប្រទេសអែលសាល់វ៉ាឌ័រ មិនគួរប្រើប្រាស់ Bitcoin ជារូបិយវត្ថុគោលរបស់ខ្លួន

មូលនិធិរូបិយវត្ថុអន្តរជាតិ (IMF) កាលពីថ្ងៃទី 22 វិច្ឆិកា បានព្រមានដល់ ប្រទេសអែលសាល់វ៉ាឌ័រ ថា មិនគួរប្រើប្រាស់ Bitcoin ធ្វើជារូបិយវត្ថុផ្លូវការរបស់រដ្ឋទេ ដោយសារតែប្រាក់ឌីជីថលនេះមានផ្ទុកហានិភ័យច្រើន។

ក្នុងប្រកាសមួយដែលបានផ្ញើទៅកាន់ ប្រទេសអែលសាល់វ៉ាឌ័រ មូលនិធិរូបិយវត្ថុអន្តរជាតិ បានសង្កត់ធ្ងន់ថា ដោយសារតែតម្លៃរបស់ Bitcoin មានការប្រែប្រួលខ្លាំង ការប្រើប្រាស់ Bitcoin ជារូបិយវត្ថុស្របច្បាប់ នឹងនាំឱ្យមានហានិភ័យខ្ពស់ក្នុងបញ្ហាការពារអតិថិជន តម្លាភាព និងស្ថិរភាពផ្នែកហិរញ្ញវត្ថុ។ យោងតាម IMF ការប្រើប្រាស់ Bitcoin ក៏មានហានិភ័យបង្កជាខ្ទង់បំណុលហិរញ្ញវត្ថុភ្លាមៗផងដែរ ដូច្នេះ Bitcoin មិនគួរត្រូវបានប្រើប្រាស់ជាប្រាក់ស្របច្បាប់។

IMF ក៏បានផ្ដល់អនុសាសន៍ដល់ អែលសាល់វ៉ាឌ័រ ថា គួរបង្រួមវិសាលភាពរបស់ច្បាប់របស់ប្រទេសនេះ ដែលបានអនុញ្ញាតឱ្យ Bitcoin ក្លាយជារូបិយវត្ថុស្របច្បាប់។ ទន្ទឹមនឹងនេះ IMF ក៏បានជំរុញឱ្យ អែលសាល់វ៉ាឌ័រ រឹតបន្តឹងលើការកំណត់ និងគ្រប់គ្រងប្រព័ន្ធទូទាត់ថ្មី ទាក់ទងនឹង Bitcoin។

សូមរំលឹកថា មុននេះមួយថ្ងៃ អែលសាល់វ៉ាឌ័រ បានប្រកាសអំពីគម្រោងសាងសង់ «ទីក្រុង Bitcoin» ដំបូងគេក្នុងពិភពលោក ដោយប្រើប្រាស់ទុនវិនិយោគដំបូងដែលប្រមូលបានពីមូលបត្របំណុលរបស់ Bitcoin។

អែលសាល់វ៉ាឌ័រ បានប្រើប្រាស់ប្រាក់ដុល្លារអាម៉េរិក អស់រយៈពេល 2 ទសវត្សរ៍មកហើយ។ កាលពីខែកញ្ញា 2021 អែលសាល់វ៉ាឌ័រ បានក្លាយជាប្រទេសដំបូងគេក្នុងលោកដែលបានទទួលស្គាល់ប្រាក់ឌីជីថល Bitcoin នៅក្នុងការទូទាត់ ក្រោយពីការអនុម័តពីសភាជាតិ៕

November 24, 2021

(វីដេអូ)-ទិដ្ឋភាពពន្លារបស់ កម្ពុជា ក្នុងព្រឹត្តិការណ៍ពិព័រណ៍ពិភពលោក នៅ សហភាពអារ៉ាប់រួម

ក្រុមការងាររបស់ កម្ពុជា កំពុងរៀបចំតាំងបង្ហាញក្នុងព្រឹត្តិការណ៍ពិព័រណ៍ពិភពលោក រយៈពេល 6 ខែ នៅក្នុងទីក្រុងឌូបៃ របស់ សហភាពអារ៉ាប់រួម។

ការចូលរួមរបស់ កម្ពុជា ក្នុងព្រឹត្តិការណ៍ពិព័រណ៍ពិភពលោក នៅ សហភាពអារ៉ាប់រួម លើកនេះ មានសារៈប្រយោជន៍ខ្លាំងណាស់ ទន្ទឹមនឹងការបង្កើតទំនាក់ទំនងល្អជាមួយភាគីម្ចាស់ផ្ទះ។ ក្នុងនោះ កម្ពុជា មានឱកាសផ្សព្វផ្សាយអំពីតំបន់ទេសចរណ៍ វប្បធម៌ ផលិតផលសក្តានុពល និងសមិទ្ធផលធំៗជាច្រើនរបស់ កម្ពុជា ឱ្យពិភពលោកបានស្គាល់។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានដឹកនាំគណៈប្រតិភូកម្ពុជា ទៅចូលរួមគាំទ្រ និងទស្សនាពន្លាជាតិកម្ពុជា ដែលកំពុងរៀបចំតាំងបង្ហាញក្នុងព្រឹត្តិការណ៍ពិព័រណ៍ពិភពលោកនេះផងដែរ នៅក្នុងឱកាសដែលប្រតិភូ អញ្ជើញទៅចូលរួមកិច្ចប្រជុំលើកទី 40 របស់ក្រុមប្រឹក្សាអូឡាំពិកអាស៊ី នាព្រឹកថ្ងៃទី 22 ខែវិច្ឆិកា។

គណៈប្រតិភូកម្ពុជា ទៅចូលរួមគាំទ្រ និងទស្សនាពន្លាជាតិកម្ពុជា ដែលកំពុងរៀបចំតាំងបង្ហាញក្នុងព្រឹត្តិការណ៍ពិព័រណ៍ពិភពលោក នៅ សហភាពអារ៉ាប់រួម

ក្នុងដំណើរទស្សនកិច្ចនេះ ក៏មានវត្តមានរបស់ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ ឯកឧត្តម វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មការជាតិអូឡាំពិកកម្ពុជា រួមនឹងមន្ត្រីជាន់ខ្ពស់មួយចំនួនទៀត នៃក្រសួងទេសចរណ៍ និងគណៈអភិបាលរាជធានីភ្នំពេញ។

November 23, 2021

កម្ពុជា ខាតបង់ថវិកាប្រមាណ 2.3 ពាន់លានដុល្លារអាម៉េរិក ដោយសារតែជំងឺរាតត្បាត COVID-19

កម្ពុជា បានខាតបង់ថវិកាស្មើនឹងការសាងសង់ស្ពានចំនួន 20 ខ្សែ ព្រោះតែជំងឺ COVID-19 ដោយថវិកាជាតិប្រមាណ 2.3 ពាន់លានដុល្លារអាម៉េរិក ត្រូវបានចំណាយក្នុងការដោះស្រាយបញ្ហាវិបត្តិសុខភាពក្នុងសម័យ COVID-19។ នេះបើតាមប្រសាសន៍របស់ប្រមុខរដ្ឋាភិបាលកម្ពុជា។

«ខ្ញុំសោកស្ដាយណាស់នៅត្រង់ថា អា COVID-19 នេះ វាបានស៊ីស្ពានរបស់ខ្ញុំប្រហែលជា 20 ស្ពាន អាហ្នឹងគិតតម្លៃខ្ពស់ផង…។ អីចឹងធ្វើឱ្យយើងត្រូវបន្តស្នើសុំមិត្ត ចិន ជួយបន្តទៀត ហើយមិត្ត ចិន នឹងបន្តជួយទៅតាមគម្រោងដែលយើងបានដាក់» សម្ដេចអគ្គមហាសេនាបតីតេជោ ហ៊ុន សែន មានប្រសាសន៍ដូច្នេះ កាលពីព្រឹកថ្ងៃទី 23 ខែវិច្ឆិកា ក្នុងឱកាសអញ្ជើញជាអធិបតីភាព ជាមួយឯកឧត្ដម Wang Wentian ឯកអគ្គរដ្ឋទូតចិន ប្រចាំនៅ កម្ពុជា ក្នុងពិធីសម្ពោធដាក់ឱ្យប្រើប្រាស់ជាផ្លូវការ ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ និងបើកការដ្ឋានគម្រោងសាងសង់ផ្លូវលេខ 71C ក្រោមហិរញ្ញប្បទានសម្បទានពី ប្រទេសចិន។

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ

សម្ដេច ហ៊ុន សែន បានបញ្ជាក់ថា នៅមុនផ្ទុះការឆ្លងរីករាលដាលនៃជំងឺ COVID-19 រាជរដ្ឋាភិបាលកម្ពុជា មានគម្រោងសាងសង់ស្ពានជាច្រើនកន្លែង ឆ្លងកាត់ទន្លេ និងស្ទឹងនានានៅទូទាំងប្រទេស បន្ទាប់ពី កម្ពុជា ទទួលបានប្រាក់សន្សំច្រើន៕

November 23, 2021

កំលោះជានិស្សិតខ្សត់ប្រាក់ ដឹកនាំក្រុមការងារដែលខ្វះលុយ រហូតក្លាយជា CEO របស់ក្រុមហ៊ុនធុរកិច្ចថ្មី តម្លៃ 6.3 ពាន់លានដុល្លារ៖ ពេលខ្លះនៅក្នុងគណនីធនាគាររបស់ក្រុមហ៊ុន នៅសល់តែជាង 200 ដុល្លារគត់!

សហស្ថាបនិករបស់ក្រុមហ៊ុនបច្ចេកវិទ្យា Personio និយាយថា៖ គាត់នៅរក្សារូបដែលបានថតពីអេក្រង់ ទាក់ទងនឹងគណនីធនាគារដែលនៅសល់តែជាង 200 ដុល្លារប៉ុណ្ណោះ ដែលនោះគឺជាអនុស្សាវរីយ៍មិនអាចភ្លេចបាន។

គ្រាន់តែរយៈពេល 6 ឆ្នាំសោះ Personio បានក្លាយជា startup មួយក្នុងចំណោមក្រុមហ៊ុនធុរកិច្ចថ្មីដែលមានតម្លៃជាងគេនៅ ទ្វីបអឺរ៉ុប ដោយត្រូវបានកំណត់តម្លៃឡើងដល់ 6.3 ពាន់លានដុល្លារអាម៉េរិក។ ប៉ុន្តែ មុនពេលរកឃើញជោគជ័យនោះ CEO Hanno Renner បានឆ្លងកាត់ដំណាក់កាលលំបាកៗជាច្រើនទាក់ទងនឹងបញ្ហាប្រាក់កាស។

Renner បានប្រាប់ CNBC ថា៖ «មានពេលមួយនោះ យើងនៅសល់តែ 226 ដុល្លារគត់ ក្នុងគណនីធនាគារ មុនពេលបានទទួលប្រាក់វិនិយោគដំបូង»។

លោក Renner រួមនឹង Roman Schumacher, Arsenity Vershinin និង Ignaz Forstmeier បានបង្កើតក្រុមហ៊ុន Personio នៅក្នុងទីក្រុង Munich (ប្រទេសអាល្លឺម៉ង់) កាលពីឆ្នាំ 2015។ ពួកគេបានជួបគ្នានៅពេលកំពុងសិក្សាផ្នែកបច្ចេកវិទ្យា នៅឯសាកលវិទ្យាល័យមួយនៅ Munich។

Personio ត្រូវបានបង្កើតឡើង បន្ទាប់ពីម្នាក់ក្នុងចំណោមពួកគេនិយាយអំពីឧបសគ្គក្នុងការគ្រប់គ្រងធនធានមនុស្សនៅក្នុងក្រុមហ៊ុន ព្រោះតែមិនមានកម្មវិធីផ្នែកទន់ (software) ដែលជួយដល់កិច្ចការនោះ។

ដោយសារតែនៅជានិស្សិត និងពុំទាន់មានលទ្ធភាពជួលការិយាល័យសម្រាប់ធ្វើការនឹងគេ ដូច្នេះ ពួកគេត្រូវធ្វើការនៅកន្លែងណាក៏បាន ឱ្យតែអាចបង្កើតបានផលិតផលដំបូង។ ពួកគេត្រូវប្រើប្រាស់ប្រាក់សន្សំផ្ទាល់ខ្លួនដើម្បីផ្គត់ផ្គង់ការចំណាយ។

ក្រោយពីទទួលបានប្រាក់ពីអតិថិជន ពួកគេក៏យកប្រាក់ចំណូលនោះទៅចុះឈ្មោះស្នើសុំប័ណ្ណប៉ាតង់ ជួលបន្ទប់ការិយាល័យតូចមួយ និងជ្រើសរើសបុគ្គលិកមួយចំនួន។ ឆ្នាំ 2016 Personio ប្រមូលទុនបាន 2.1 លានដុល្លារ ពី Global Founders Capital ជាក្រុមហ៊ុនដែលបានវិនិយោគទៅលើ LinkedIn និង Facebook។

មុនពេលអ្វីៗដំណើរការដោយរលូន សហស្ថាបនិករបស់ Personio ត្រូវដោះស្រាយបញ្ហាជាច្រើន ក្នុងនោះមានបញ្ហាហិរញ្ញវត្ថុគឺជារឿងធំ។

«ខ្ញុំនៅរក្សារូបដែលថតបានពីអេក្រង់ស្ដីពីគណនីធនាគារដែលនៅសល់តែជាង 200 ដុល្លារប៉ុណ្ណោះ។ នោះគឺជាអនុស្សាវរីយ៍ដែលមិនអាចភ្លេចបាន» Renner និយាយដូច្នេះ។

ស្ថានភាពហិរញ្ញវត្ថុរបស់ Personio បានប្រែប្រួលខ្លាំងបន្ទាប់ពីទទួលបានខ្ទង់វិនិយោគ 2.1 លានដុល្លារ។ ក្នុងការប្រមូលទុនថ្មីបំផុតនៃស៊េរី E កាលពីខែមុន ក្រុមហ៊ុន Personio រកបានទុនវិនិយោគ 270 លានដុល្លារ និងត្រូវបានកំណត់តម្លៃឡើងដល់ 6.3 ពាន់លានដុល្លារ។ នេះគឺជាជំហានដ៏វែងសម្រាប់ Personio ព្រោះថា កាលពីដើមឆ្នាំនេះ ក្រុមហ៊ុនត្រូវបានកំណត់តម្លៃត្រឹមតែ 1.7 ពាន់លានដុល្លារប៉ុណ្ណោះ។

គិតមកដល់បច្ចុប្បន្ន ក្រុមហ៊ុនបច្ចេកវិទ្យា Personio ប្រមូលទុនបានសរុបចំនួនជាង 500 លានដុល្លារអាម៉េរិក ពីក្រុមអ្នកវិនិយោគ។

ខ្ទង់ប្រាក់វិនិយោគថ្មីបំផុតដែលប្រមូលបាន កំពុងត្រូវបានប្រើប្រាស់ដើម្បីអភិវឌ្ឍប្រភេទកម្មវិធីថ្មីដែលមានឈ្មោះថា People Workflow Automation។ កម្មវិធីនេះនឹងជួយលុបបំបាត់រនាំងរវាងផ្នែកគ្រប់គ្រងធនធានមនុស្ស និងផ្នែកផ្សេងៗរបស់ក្រុមហ៊ុន។

Renner បានបញ្ជាក់ថា៖ «ចំពោះខ្ញុំ ការបង្កើតក្រុមហ៊ុនមួយឡើង មិនមែនដើម្បីក្លាយជាថៅកែរបស់គ្រប់គ្នានោះទេ។ ខ្ញុំតែងតែមានបំណងធានាឱ្យប្រាកដថា បុគ្គលិកទាំងអស់របស់ក្រុមហ៊ុន ទទួលបានសិទ្ធិក្នុងការសម្រេចចិត្តត្រឹមត្រូវ ក៏ដូចជាធ្វើសកម្មភាពដូចទៅនឹងម្ចាស់អាជីវកម្មមួយរូបពិតប្រាកដ»៕

November 23, 2021

ByteDance បញ្ចេញ App ផ្សារអនឡាញ ជួយដល់អ្នកលក់រាយលើបណ្ដាញសង្គម TikTok

ByteDance បានចេញកម្មវិធីសម្រាប់អ្នកលក់ទំនិញនៅលើ TikTok ដើម្បីជួយសម្រួលដល់ការគ្រប់គ្រងហាងឌីជីថលរបស់ពួកគេ ដែលនេះត្រូវបានគេមើលឃើញថា ជាការចាប់យកឱកាស និងទីផ្សារដ៏ធំសម្បើមដែលខ្លួនកំពុងមានប្រៀបជាងគូប្រជែង។

សារព័ត៌មាន SCMP បានឱ្យដឹងថា កម្មវិធី (App) ដែលត្រូវបានក្រុម TikTok នៅ សិង្ហបុរី អភិវឌ្ឍ បានបង្ហាញខ្លួនកាលពីសប្ដាហ៍មុន ក្នុងគ្រាដែលស្ថាបនិករបស់ ByteDance លោក Zhang Yiming បានទៅកាន់ទីនោះ។

ByteDance ថ្មីៗនេះ បានពង្រីកក្រុមការងាររបស់ខ្លួននៅ សិង្ហបុរី ដើម្បីជួយដល់ការពង្រីកខ្លួនជាសកលរបស់ក្រុមហ៊ុននេះ។

កាលពីខែកុម្ភៈ ពួកគេបានឧទ្ទេសនាម Seller University ដែលជាមជ្ឈមណ្ឌលបណ្ដុះបណ្ដាលមួយ ជួយដល់អ្នកជំនួញ លក់ទំនិញនៅលើ TikTok។ កាលពីរដូវក្ដៅ ក្រុមហ៊ុននេះក៏បានដំណើរការសាកល្បងមុខងារ TikTok Shopping នៅ សហរដ្ឋអាម៉េរិក អង់គ្លេស និង កាណាដា ដែលបានសហការជាមួយ Shopify។

យោងតាមសារព័ត៌មានចិន បច្ចុប្បន្ន កម្មវិធី TikTok Seller កំពុងត្រូវបានប្រើប្រាស់ភាគច្រើនដោយអ្នកជំនួញនៅក្នុងតំបន់អាស៊ីអាគ្នេយ៍។ ក្រៅពីប្រទេសចិន បច្ចុប្បន្ន TikTok បានចាប់ផ្ដើមសាកល្បងដំណើរការមុខងារលក់រាយអនឡាញនៅ ឥណ្ឌូនេស៊ី និង អង់គ្លេស កាលពីដើមឆ្នាំ។

តាមការព្យាករឆ្នាំ 2021 របស់ Adobe Digital Economy Index វិស័យពាណិជ្ជកម្មទូទាំងពិភពលោក មានតម្លៃ 4.2 ពាន់លានដុល្លារ៕

November 23, 2021

សូមអញ្ជើញចូលរួមបើកបរសាកល្បងរថយន្ត Ford Territory ស៊េរីថ្មី ដោយសេរី និងឥតគិតថ្លៃ នៅទីលានបើកបរយានយន្ត យ៉ាម៉ាម៉ូតូ ថ្ងៃទី 27 ខែវិចិ្ឆកា ឆ្នាំ2021 នៅតំបន់អភិវឌ្ឍន៍កសិទេសចរណ៍ ម៉ុង ឬទ្ធី សែនជ័យ ខេត្តកំពង់ស្ពឺ

សូមអញ្ជើញចូលរួមបើកបរសាកល្បងរថយន្ត Ford Territory ស៊េរីថ្មី ដោយសេរី និងឥតគិតថ្លៃ នៅទីលានបើកបរយានយន្ត យ៉ាម៉ាម៉ូតូ ថ្ងៃទី 27 ខែវិចិ្ឆកា ឆ្នាំ2021 នៅតំបន់អភិវឌ្ឍន៍កសិទេសចរណ៍ ម៉ុង ឬទ្ធី សែនជ័យ ខេត្តកំពង់ស្ពឺ។ រាល់ការចូលរួមកម្មវិធីនេះ លោកអ្នកនឹងទទួលបានអត្ថប្រយោជន៍ជាច្រើនដូចជា៖

ចូលរួមបើកបរសាកល្បងរថយន្ត Ford Territory ស៊េរីថ្មីដោយឥតគិតថ្លៃ
ទទួលបានបទពិសោធន៍នៃការបើកបរ និងការបណ្តុះបណ្តាលផ្ទាល់ជាមួយអ្នកជំនាញ ឯកទេសរបស់ក្រុមហ៊ុន Ford
យល់ដឹងអំពីប្រព័ន្ធសុវត្ថិភាព និងបច្ចេកទេសនៃការបើកបររថយន្ត
យល់ដឹងអំពីបច្ចេកទេសនៃការថែទាំយានយន្ត
យល់ដឹងអំពីបច្ចេកវិទ្យា និងអត្ថប្រយោជន៍នៃរថយន្ត Ford Territory ស៊េរីថ្មី
ទទួលបានការញុំាអាហារថ្ងៃត្រង់ដោយឥតគិតថ្លៃ
ទំនាក់ទំនងចុះឈ្មោះចូលរួម: 092 888 496 | 087 333 139
សម្រាប់ទីតាំងសូមចុចលើ តំណរភ្ជាប់ មួយនេះ https://bit.ly/3lV0C9a

***បញ្ជាក់: អាហារថ្ងៃត្រង់ធ្វើការផ្តល់ជូនសម្រាប់តែអ្នកដែលបានចុះឈ្មោះទុកជាមុនតែប៉ុណ្ណោះ។

November 23, 2021

តម្លៃមាសពិភពលោក ដាំក្បាលចុះ ក្រោយមានដំណឹងថា ប្រធាន Fed នឹងកាន់តំណែងនេះក្នុងអាណត្តិបន្ទាប់

មាសក្នុងមួយ អោន (1 ounce = 8.29426 ជី) ធ្លាក់ថ្លៃជាង 40 ដុល្លារអាម៉េរិក កាលពីយប់ម្សិលមិញ ដោយមានតម្លៃក្បែរ 1,800 ដុល្លារ ក្រោយពីមានព័ត៌មានថា ប្រធានរបស់ Fed ត្រូវបានជ្រើសតាំងសម្រាប់អាណត្តិទីពីរ។

ការជួញដូរចុងក្រោយនៃថ្ងៃទី 22 វិច្ឆិកា តម្លៃមាសពិភពលោកប្រគល់ភ្លាម បានធ្លាក់មកនៅត្រឹម 1,804 ដុល្លារ ទាបបំផុតរាប់ចាប់ពីថ្ងៃទី 5 វិច្ឆិកា។ បប្ចុប្បន្ន មាសក្នុងមួយ អោន ត្រូវបានជួញដូរក្នុងរង្វង់ 1,809 ដុល្លារ។

មូលហេតុដែលនាំឱ្យតម្លៃមាសធ្លាក់ចុះជាង 2% កាលពីយប់ម្សិលមិញគឺដោយសារប្រាក់ដុល្លារអាម៉េរិក ឡើងថ្លៃ បន្ទាប់ពីប្រធាន Fed លោក Jerome Powell ត្រូវបានជ្រើសតាំងសម្រាប់អាណត្តិទីពីរ។ ប្រការនេះធ្វើឱ្យមានការរំពឹងថា ធនាគារកណ្ដាលរបស់ អាម៉េរិក អាចនឹងបន្តដកខ្ទង់ថវិកាជំរុញកំណើនសេដ្ឋកិច្ច។

ប្រាក់ដុល្លារឡើងថ្លៃ ធ្វើឱ្យមាសឡើងថ្លៃសម្រាប់អ្នកទិញជាជនបរទេស។ អត្រាការប្រាក់កើនឡើងក៏នាំឱ្យការចំណាយលើឱកាសនៃការក្ដោបក្ដាប់ទ្រព្យមិនបង់ការប្រាក់ដូចជាមាស ត្រូវកើនឡើងផងដែរ។

ក្រុមមន្ត្រីរបស់ Fed (Federal Reserve System/ធនាគារកណ្ដាលរបស់ សហរដ្ឋអាម៉េរិក) នឹងលើកយកបញ្ហានៃការដកខ្ទង់ថវិកាជំរុញកំណើនសេដ្ឋកិច្ច ដើម្បីទប់ទល់នឹងអតិផរណា នៅក្នុងខែធ្នូខាងមុខ។

មាសត្រូវបានព្យាករថា នឹងមានតម្លៃចន្លោះពី 1,800 ទៅ 1,850 ដុល្លារ/អោន រហូតដល់ពាក់កណ្ដាលខែធ្នូ ឆ្នាំ 2021៕

November 23, 2021

វៀតណាម ជិតសម្ពោធដាក់ឱ្យប្រើប្រាស់ «ស្ពានគោកលើពពក» ខ្ពស់ជាងគេបង្អស់នៅប្រទេសនេះ

ស្ពាន ម៉ុងសេន (Cau Mong Sen) ដែលស្ថិតនៅក្នុងខេត្តឡាវកាយ (Lao Cai) ភាគខាងជើងប្រទេសវៀតណាម កំពុងត្រូវបានសាងសង់ដំណាក់កាលចុងក្រោយដើម្បីអាចសម្រេចជាស្ថាពរនៅចុងខែធ្នូ 2021។

តាមគម្រោង ស្ពាននេះនឹងត្រូវបានសាងសង់រួចរាល់នៅថ្ងៃទី 31 ធ្នូ 2021។ បច្ចុប្បន្ន ក្រុមអ្នកវិនិយោគកំពុងញាប់ដៃញាប់ជើងដើម្បីបង្ហើយការងារចុងក្រោយ ឱ្យត្រូវតាមពេលវេលា។

ក្រោយការសាងសង់រយៈពេល 2 ឆ្នាំ គម្រោងស្ពាន ម៉ុងសេន ដែលប្រើប្រាស់ទុនវិនិយោគជាង 450 ពាន់លានដុង (ជាង 19 លានដុល្លារអាម៉េរិក) សាងសង់សម្រេចបាន 90% រួចហើយ ធៀបនឹងការគ្រោងទុក។

ស្ពាន ម៉ុងសេន គឺជាស្ពានឆ្លងកាត់តំបន់គោកដែលមានបង្គោលខ្ពស់ជាងគេបង្អស់នៅ ប្រទេសវៀតណាម។

ស្ពានដែលមានគន្លងសម្រាប់រថយន្តចំនួន 4 នេះ មានប្រវែងជាង 600 ម៉ែត្រ ទទឹង 14.5 ម៉ែត្រ និងមានបង្គោលទ្រចំនួន 5។ ស្ពាននេះត្រូវបានសម្ពោធការដ្ឋានសាងសង់កាលពីដើមខែកុម្ភៈ 2020៕

November 22, 2021

Category: សង្គម និងសេដ្ឋកិច្ច