អ្នកមានជាងគេនៅអង់គ្លេស Sir Jim Ratcliffe បានចូលរួមការប្រជែងទិញក្រុមបីសាចក្រហម Manchester United នេះបើតាមសារព័ត៌មាន The Sun។
ក្លឹបម្ចាស់ទីលាន Old Trafford ត្រូវបានប្រធាន Glazer ដាក់លក់កាលពីខែវិច្ឆិកា 2022 ហើយថ្មីៗនេះ Ratcliffe បានបញ្ជាក់ថា លោកកំពុងចូលរួមប្រជែងដើម្បីក្លាយជាម្ចាស់ក្លឹបនេះ។
ទោះជាយ៉ាងណាក៏ដោយ ការទិញដូរអាចទៅរួចលុះណាតែ Ratcliffe ហ៊ានចំណាយប្រាក់មិនក្រោម 5 ពាន់លានផោន ដែលប្រហែលនឹង 6 ពាន់លានដុល្លារអាម៉េរិក ទៅឱ្យគ្រួសារ Glazer។
នាថ្ងៃទី 18 មករា 2023 នេះ រដ្ឋលេខាធិការដ្ឋានអាកាសចរណ៍ស៊ីវិល និងក្រុមហ៊ុន រ៉ូយ៉ាល់ គ្រុប កោះរ៉ុង ឌីវេឡូបមេន បានរៀបចំពិធីចុះហត្ថលេខាលើអនុស្សារណៈនៃការយោគយល់ និងទទួលស្គាល់ផែនការមេ លើគម្រោងសាងសង់អាកាសយានដ្ឋានអន្តរជាតិអេកូទេសចរណ៍កោះរ៉ុង នៅតំបន់អភិវឌ្ឍន៍កោះរ៉ុង ខេត្តព្រះសីហនុ។
ពិធីចុះហត្ថលេខានេះត្រូវបានធ្វើឡើងនៅសណ្ឋាគារ Cambodiana ក្នុងរាជធានីភ្នំពេញ ក្រោមអធិបតីភាព ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល។
យោងតាមកិច្ចព្រមព្រៀង គម្រោងសាងសង់ព្រលានយន្តហោះអន្តរជាតិកោះរ៉ុង (លំដាប់ 4 C) នឹងចំណាយថវិកាប្រមាណ 300 លានដុល្លារ និងសាងសង់ក្នុងរយៈពេល 5 ឆ្នាំ។
(សហរដ្ឋអាម៉េរិក) – ណាសា (NASA) កំពុងពិចារណាលើការប្រើប្រាស់បណ្ដាញបំពង់បង្ហូរអុកស៊ីសែនដើម្បីនាំអុកស៊ីសែនទៅកាន់ទីតាំងផ្សេងៗគ្នានៅជុំវិញតំបន់ប៉ូលខាងត្បូងរបស់ព្រះចន្ទ នៅក្នុងបេសកកម្ម Artemis បន្ទាប់។
Peter Curreri ប្រធានផ្នែកវិទ្យាសាស្ត្ររបស់ក្រុមហ៊ុន Lunar Resources Inc, បានអធិប្បាយលំអិតអំពីបញ្ហាចំពោះគម្រោងដឹកអុកស៊ីសែនដោយរ៉ូបូតស្វ័យប្រវត្តបច្ចុប្បន្នរបស់ណាសា។ Curreri បញ្ជូនសំណើរបស់ខ្លួនទៅកាន់ណាសា សម្រាប់កម្មវិធី Innovative Advanced Concepts (NIAC) ដែលអនុវត្តដោយទីភ្នាក់ងារអវកាសអាម៉េរិកនេះ។ ក្រុមរបស់លោក Curreri ស្ថិតក្នុងចំណោម 14 ក្រុមដែលទទួលបានថវិកា 175,000 ដុល្លារ ដើម្បីអភិវឌ្ឍគំនិតរបស់ពួកគេ នេះបើតាម Interesting Engineering ចុះផ្សាយកាលពីថ្ងៃទី 17 មករា។
បណ្ដាញបំពង់បង្ហូរអុកស៊ីសែនលើផ្ទៃព្រះចន្ទនៅក្នុងសំណើដែលមានឈ្មោះថា Lunar South Pole Oxygen Pipeline (LSPOP) តភ្ជាប់ជាមួយនឹងមជ្ឈមណ្ឌលរុករកទឹកកករបស់ណាសានៅប៉ូលខាងត្បូងរបស់ព្រះចន្ទ។ ទាំងសហរដ្ឋអាម៉េរិក ចិន និងរុស្ស៊ី សុទ្ធតែផ្ដោតលើតំបន់នេះ ដោយសារតែមានផ្ទុកទឹកកកជាច្រើន រួមនឹងធនធានដទៃទៀតនៅខាងក្រោមស្រទាបលើរបស់ព្រះចន្ទ។ ទឹកកកនោះនឹងជាផ្នែកសំខាន់មួយក្នុងគម្រោងនាំមនុស្សឡើងទៅកាន់ឋានព្រះចន្ទ ព្រោះអាចចម្រាញ់ជាទឹកផឹកបាន និងអុកស៊ីសែនដើម្បីដកដង្ហើម ក៏ដូចជាការធ្វើជាឥន្ធនៈសម្រាប់រ៉ុក្កែត។
យោងតាម Curreri គម្រោងដំបូងរបស់ពួកគេគឺការស្ថាបនាបណ្ដាញបំពង់បង្ហូរមួយប្រវែង 5 គីឡូម៉ែត្រដើម្បីនាំអុកស៊ីសែនពីកន្លែងផលិត ទៅកាន់រោងចក្ររក្សាអុកស៊ីសែនដែលនៅក្បែរមូលដ្ឋានហោះហើរលើព្រះចន្ទ។ បើសិនជាត្រូវបានណាសាយល់ព្រមប្រើប្រាស់គម្រោង LSPOP សម្រាប់បេសកកម្ម Artemis បំពង់បង្ហូរនេះនឹងត្រូវបានផលិតទៅតាមដំណាក់កាលនៅលើផ្ទៃព្រះចន្ទ មុនពេលដំឡើងជាបណ្ដាញពេញលេញ។ បំពង់ទាំងនេះអាចត្រូវបានផលិតពីអាលុយមីញូម ដែលជាវត្ថុធាតុមានច្រើននៅប៉ូលខាងត្បូងរបស់ព្រះចន្ទ៕
(អារ៉ាប៊ីសាអូឌីត) – អ្នកជំនួញ Mushraf Al Ghamdi បានឈ្នះក្នុងការដេញថ្លៃសំបុត្រពិសេសចូលទស្សនាការប្រកួតរវាង PSG និង Saudi All-Star ដែលមានការចូលរួមរបស់កំពូលតារាបាល់ទាត់ Messi និង Ronaldo។
«សូមអបអរសាទរ។ សំបុត្រមនុស្សធម៌ «Above Imagination» លក់ដេញថ្លៃបានខ្ពស់បំផុតគឺ 10 លានរីយ៉ាល (ប្រហែលនឹង 2.7 លានដុល្លារអាម៉េរិក) ហើយត្រូវបានទិញដោយអ្នកជំនួញផ្នែកអចលនទ្រព្យ Mushraf Al Ghamdi» មេដឹកនាំក្នុងវិស័យកំសាន្តរបស់អារ៉ាប៊ីសាអូឌីត Turki Al Sheikh ប្រកាសនៅលើ Twitter កាលពីថ្ងៃទី 17 មករា។
Mushraf Al Ghamdi ដែលជាអ្នកជំនួញផ្នែកអចលនទ្រព្យនៅ អារ៉ាប៊ីសាអូឌីត បាននាំមុខគេក្នុងការដេញថ្លៃដែលបានចាប់ផ្ដើមតាំងពីមួយសប្ដាហ៍មុន។ ទឹកប្រាក់ដែលបានពីការលក់សំបុត្រពិសេសនេះនឹងត្រូវបានផ្ទេរទៅឱ្យអង្គការមនុស្សធម៌ Ehsan របស់រដ្ឋាភិបាលប្រទេសនេះ។
ទន្ទឹមនឹងការចូលរួមចំណែកក្នុងកិច្ចការមនុស្សធម៌ សំបុត្រពិសេសនេះក៏នឹងអនុញ្ញាតឱ្យម្ចាស់កម្មសិទ្ធិចូលទស្សនាការប្រកួតពីជ្រុងមួយយ៉ាងពិសេស។ ក្រោយពីការប្រកួតបានបញ្ចប់ ម្ចាស់សំបុត្រថែមទាំងមានសិទ្ធិចូលទៅកាន់បន្ទប់ផ្លាស់សម្លៀកបំពាក់ជួប Messi និង Ronaldo ទៀតផង។
ការប្រកួតមិត្តភាពរវាង PSG និង Saudi All-Star នឹងធ្វើឡើងនៅថ្ងៃទី 19 មករា ក្នុងកីឡដ្ឋាន King Fahd នៅរាជធានីរីយ៉ាដ ប្រទេសអារ៉ាប៊ីសាអូឌីត។ នេះគឺជាការប៉ះគ្នាដំបូងរបស់ Messi ដែលជាកំពូលកីឡាកររបស់ក្លឹប PSG និង Ronaldo កំពូលកីឡាកររបស់ Saudi All-Star រាប់ចាប់ពីឆ្នាំ 2020។ PSG នឹងទទួលបាន 10 លានដុល្លារអាម៉េរិក ពីការប្រកួតមិត្តភាពនេះ។
Saudi All-Star គឺជាក្រុមបាល់ទាត់ចម្រុះរវាងក្លឹបធំជាងគេពីររបស់អារ៉ាប៊ីសាអូឌីត គឺ Al Nassr និង Al Hilal។ Ronaldo នឹងធ្វើជាប្រធានក្រុមកីឡាកររបស់ក្រុមចម្រុះនេះ៕
មន្ត្រីឥណ្ឌូណេស៊ី បានបង្ហើបឱ្យដឹងថា ប្រទេសនេះកំពុងបង្ហើយកិច្ចការសម្រាប់កិច្ចព្រមព្រៀងជាមួយ BYD (ចិន) និង Tesla (អាម៉េរិក) ក្នុងការវិនិយោគលើការបង្កើតរោងចក្រផលិតរថយន្តអគ្គិសនីនៅទីនេះ។
លោក Luhut Pandjaitan រដ្ឋមន្ត្រីក្រសួងកិច្ចការសមុទ្រ និងវិនិយោគរបស់ឥណ្ឌូណេស៊ី បានថ្លែងកាលពីម្សិលមិញថា «បណ្ដាក្រុមហ៊ុនផលិតរថយន្តអគ្គិសនីធំៗរបស់ពិភពលោកនឹងមកបណ្ដាក់ទុននៅទីនេះ។ ក្រុមហ៊ុន BYD លេខមួយលើពិភពលោក Tesla លេខពីរ រួមនឹង Hyundai ជាដើម សុទ្ធតែកំពុងបង្ហើយកិច្ចការសម្រាប់កិច្ចព្រមព្រៀងជាមួយឥណ្ឌូណេស៊ី»។ BYD កាលពីឆ្នាំកន្លង បានយកឈ្នះលើ Tesla ហើយក្លាយជាក្រុមហ៊ុនផលិតរថយន្តអគ្គិសនីធំជាងគេលើពិភពលោកស្ដីពីបរិមាណរថយន្តដែលបានលក់ចេញ។
កាលពីសប្ដាហ៍កន្លង ប្រភពព័ត៌មានរបស់ Bloomberg បានឱ្យដឹងថា Tesla និងឥណ្ឌូណេស៊ី កំពុងចរចាគ្នាអំពីការសាងសង់រោងចក្រផលិតរថយន្តអគ្គិសនីឱ្យបាន 1 លានគ្រឿងជារៀងរាល់ឆ្នាំ។ បើសិនជាកិច្ចព្រមព្រៀងខាងលើត្រូវបានចុះហត្ថលេខា នោះនឹងជារោងចក្រទីបីរបស់ Tesla ដែលស្ថិតនៅខាងក្រៅសហរដ្ឋអាម៉េរិក បន្ទាប់ពីរោងចក្រនៅប្រទេសចិន និងអាល្លឺម៉ង់។
ឥណ្ឌូណេស៊ី តាំងពីយូរមកហើយ បានអញ្ជើញ Tesla មកបណ្ដាក់ទុន។ ប្រធានាធិបតី Joko Widodo បានទៅជួប CEO របស់ Tesla លោក Elon Musk កាលពីខែឧសភា 2022 និងសម្រេចបានកិច្ចព្រមព្រៀងផ្គត់ផ្គង់នីកែលតម្លៃ 5 ពាន់លានដុល្លារអាម៉េរិកកាលពីខែសីហាឆ្នាំកន្លង។ កាលណោះ លោក Widodo ក៏ឱ្យដឹងថា ចង់ឱ្យ Tesla មកផលិតរថយន្តអគ្គិសនីនៅប្រទេសនេះ។
ឥណ្ឌូណេស៊ី កំពុងជំរុញការវិនិយោគទៅលើការផលិតថ្មផ្ទុកអគ្គិសនី និងរថយន្តអគ្គិសនីក្នុងប្រទេសដើម្បីប្រើប្រាស់ប្រភពធនធាននីកែលដ៏សម្បូរបែបឱ្យកាន់តែមានប្រសិទ្ធភាព។
ក្រុមហ៊ុនកូរ៉េខាងត្បូង Hyundai បានសម្ពោធរោងចក្រនៅឥណ្ឌូណេស៊ី កាលពីខែឧសភាឆ្នាំកន្លង ដើម្បីផលិតរថយន្តអគ្គិសនី។ ចំណែក SGMW Motor Indonesia ដែលជាក្រុមហ៊ុនបណ្ដាក់ទុនរួមរវាង SAIC Motor, General Motors និង Wuling Motor Holdings ក៏បានសាងសង់បណ្ដារោងចក្រដំឡើងរថយន្តអគ្គិសនីនៅឥណ្ឌូណេស៊ីផងដែរ។
ឥណ្ឌូណេស៊ីគឺជាច្រកចេញដើម្បីឱ្យបណ្ដាក្រុមហ៊ុនផលិតរថយន្ត អាចចូលទៅកាន់ទីផ្សារអាស៊ីអាគ្នេយ៍ដែលមានប្រជាជនជាង 675 លាននាក់។ ក៏ប៉ុន្តែ ទីនេះគឺជាទីផ្សារដែលលំបាកសម្រាប់អ្នកផលិតរថយន្តប្រណិតៗ ដោយសារថា រថយន្តដែលមានតម្លៃក្រោម 20,000 ដុល្លារអាម៉េរិក មានចំណែកធំជាងគេនៅក្នុងបរិមាណរថយន្តដែលបានលក់ចេញ៕
ដោយសារតែបរាជ័យក្នុងការទិញកីឡដ្ឋាន Le Parc des Princes ក្លឹប PSG បច្ចុប្បន្នកំពុងព្យាយាមក្នុងការកែប្រែកីឡដ្ឋានជាតិបារាំង Stade de France ឱ្យទៅជាទីលានផ្ទាល់ខ្លួនរបស់ពួកគេ។
ចាប់តាំងពីបានបង្កើតឡើងកាលពីឆ្នាំ 1970 ក្លឹប PSG តែងតែផ្សារភ្ជាប់ជាមួយនឹងកីឡដ្ឋាន Le Parc des Princes ហើយនៅទីនេះមានអនុស្សាវរីយ៍ជាច្រើនរបស់ក្លឹបបាល់ទាត់រដ្ឋធានីបារីស។
កាលពីឆ្នាំ 2011 ប្រធាន Nasser Al Khelaifi រួមនឹងមូលនិធិជាតិកាតា Qatar Investment Authority បានទទួលជោគជ័យក្នុងការក្ដោបក្ដាប់ក្លឹប PSG។ ប្រវត្តិរបស់ក្រុមបាល់ទាត់នេះបានឈានចូលដល់ទំព័រថ្មី ដោយក្លាយជាក្លឹបដ៏ខ្លាំងក្លាលំដាប់កំពូលនៅប្រទេសបារាំង និងអឺរ៉ុប។
ក្លឹប PSG បានចំណាយប្រាក់ 85 លានអឺរ៉ូក្នុងការលើកកម្ពស់គុណភាពរបស់កីឡដ្ឋាន Le Parc des Princes ក្នុងរយៈពេលច្រើនឆ្នាំកន្លង។ ហើយក្នុងពេលខាងមុខ PSG គ្រោងនឹងចំណាយ 500 លានអឺរ៉ូដើម្បីស្ដារគុណភាព និងពង្រីកកីឡដ្ឋាននេះ។
ក៏ប៉ុន្តែ ការសម្រេចចិត្តដកខ្លួនពីការសន្យាលក់ Le Parc des Princes ឱ្យ PSG ដ៏គួរឱ្យភ្ញាក់ផ្អើលរបស់អភិបាលក្រុងបារីស លោកស្រី Anne Hidalgo បាននាំឱ្យ PSG ប្រឈមនឹងហានិភ័យមិនមានកីឡដ្ឋានផ្ទាល់ខ្លួននាពេលខាងមុខ។ តាមពិត Le Parc des Princes មិនមែនជាកម្មសិទ្ធិរបស់ PSG ឡើយ ប៉ុន្តែគឺជាកម្មសិទ្ធិរបស់អាជ្ញាធររដ្ឋធានីបារីស។
បើទោះជា PSG ព្យាយាមចរចាជាមួយលោកស្រី Anne Hidalgo ប៉ុន្តែគ្រប់យ៉ាងបានបរាជ័យ។ ពេលនេះ ថ្នាក់ដឹកនាំរបស់ PSG ត្រូវបង្ខំចិត្តដាក់ផែនការរកកីឡដ្ឋានមួយផ្សេងទៀតដើម្បីជំនួស Le Parc des Princes។
កីឡដ្ឋានបាល់ទាត់ដែលត្រូវបានប្រធាន Nasser Al Khelaifi ចាប់អារម្មណ៍ខ្លាំងគឺ Stade de France ដែលជាពហុកីឡដ្ឋានជាតិបារាំង។ កីឡដ្ឋាននេះអាចដាក់មនុស្សបាន 81,000 នាក់ (ឈរលេខមួយនៅបារាំងស្ដីពីកម្លាំងផ្ទុក)។ Stade de France គឺជាកម្មសិទ្ធិរបស់រដ្ឋាភិបាលបារាំង ហើយបច្ចុប្បន្នកំពុងត្រូវបានពពាយនាយលក់។
ក្នុងករណីមិនអាចទិញបាន Stade de France ក្លឹប PSG នឹងត្រូវចាកចេញពីរដ្ឋធានីបារីស និងស្វែងរកកីឡដ្ឋានផ្សេងទៀតដែលសមស្រប៕
ក្រុមហ៊ុនចិន អភិវឌ្ឍទួរប៊ីនខ្យល់ដែលមានស្លាបកង្ហារវិលក្នុងផ្ទៃក្រឡាឡើងដល់ជាង 66,000 ម៉ែត្រក្រឡា និងអាចផលិតអគ្គិសនីបាន 80 GWh ជារៀងរាល់ឆ្នាំ។
កាលពីថ្ងៃទី 06 មករា ក្រុមហ៊ុនសាងសង់កប៉ាល់ចិន (CSSC) បានប្រកាសបង្ហាញទួរប៊ីនខ្យល់ (Wind turbine) H260 18MW យកឈ្នះលើ MySE 16.0-242 របស់ក្រុមហ៊ុន MingYang និងក្លាយជាទួរប៊ីនខ្យល់ធំជាងគេបង្អស់នៅលើពិភពលោក។ ក៏ប៉ុន្តែ ពេលនេះ MingYang បានវិលមករកការប្រកួត ដោយបង្ហើបឱ្យដឹងពីកំណែទួរប៊ីនខ្យល់ថ្មីដែលធំជាងឆ្ងាយ និងមានឈ្មោះថា MySE 18.X-28X ដោយមានកម្ពស់ប្រហាក់ប្រហែលនឹងអគារ 70 ជាន់ នេះបើតាម New Atlas ចុះផ្សាយកាលពីថ្ងៃទី 15 មករា 2023។
ក្នុងគ្រាដែល H260 18MW របស់ CSSC មានស្លាបកង្ហារប្រវែង 128 ម៉ែត្រ ទួរប៊ីនខ្យល់ MySE 18.X-28X របស់ MingYang នឹងមានកម្លាំងលើសពី 18 MW ដោយមានស្លាបកង្ហារប្រវែង 140 ម៉ែត្រ និងវិលក្នុងផ្ទៃក្រឡាឡើងដល់ 66,052 ម៉ែត្រការ៉េ។
ក្រុមហ៊ុន MinhYang ឱ្យដឹងថា ទួរប៊ីនខ្យល់ថ្មីនេះអាចទប់ទល់រាល់ស្ថានភាពអាកាសធាតុនៅលើសមុទ្រ រួមទាំងព្យុះធំដែលមានកម្លាំងខ្យល់លើសពី 202 គីឡូម៉ែត្រ/ម៉ោង។ ដោយមានខ្យល់លើសមុទ្រជាមធ្យម 30.6 គីឡូម៉ែត្រ/ម៉ោង ក្រុមហ៊ុននេះព្យាករថា ទួរប៊ីននេះនឹងផលិតអគ្គិសនីបាន 80 GWh ក្នុងមួយឆ្នាំៗ ដែលគ្រប់គ្រាន់សម្រាប់ផ្គត់ផ្គង់តាមតម្រូវការរបស់ប្រជាជន 96,000 នាក់។
មូលហេតុដែលនាំឱ្យបណ្ដាក្រុមហ៊ុននេះគ្នាផលិតទួរប៊ីនខ្យល់ធំៗ គឺដោយសារចង់កាត់បន្ថយការចំណាយក្នុងការសាងសង់។ MingYang ឱ្យដឹងថា «ធៀបនឹងការដំឡើងបណ្ដាទួរប៊ីនខ្យល់ 13 MW កម្លាំងរបស់ MySE18.X-28X នឹងជួយកាត់បន្ថយឧបករណ៍បាន 18 គ្រឿងនៅពេលសាងសង់ស្ថានីយផលិតអគ្គិសនីដើរដោយកម្លាំងខ្យល់ 1 GW។ នេះមានន័យថា កាត់បន្ថយការចំណាយក្នុងការសាងសង់បានប្រហែលពី 120,000 ទៅ 150,000 ដុល្លារ/MW»។ ដូច្នេះ គម្រោងមួយដែលផលិតអគ្គិសនីបាន 1 GW នឹងសំច័យប្រាក់បានពី 120 លានទៅ 150 លានដុល្លារអាម៉េរិក៕
ក្រុមជម្រើសជាតិថៃ បានទទួលប្រាក់រង្វាន់យ៉ាងច្រើន គឺឡើងដល់ជាង 35 លានបាត ប្រហែលនឹង 4,353,000,000 រៀល បន្ទាប់ពីដណ្ដើមបានតំណែងជើងឯកនៅ AFF Cup 2022។
ការប្រកួតជើងទីពីរនៃវគ្គផ្ដាច់ព្រ័ត្រកាលពីព្រលប់ថ្ងៃទី 16 មករា នៅកីឡដ្ឋាន Thammasat ថៃបានផ្ដួលវៀតណាមដោយលទ្ធផល 1-0។ លទ្ធផលដែលនាំឱ្យថៃឈ្នះសរុប 3-2 ក្នុងវគ្គចុងក្រោយបានជួយឱ្យថៃក្លាយជាជើងឯកលើកលើកទី 7 នៅ AFF Cup បន្ទាប់ពីឆ្នាំ 1996, 2000, 2002, 2014, 2016 និង 2021។
ក្រោយពីការការពារជើងឯក AFF Cup បានជោគជ័យ ក្រុមកីឡាករបាល់ទាត់ជម្រើសជាតិថៃ បានទទួលប្រាក់រង្វាន់ធំ។ ក្រៅពី 10 លានបាត (302,000 ដុល្លារ) ពីសហព័ន្ធបាល់ទាត់អាស៊ីអាគ្នេយ៍ (AFF) ក្រុមថៃក៏ទទួលបានប្រាក់បន្ថែម 20 លានបាត (605,000 ដុល្លារ) ពីប្រធានប្រតិភូក្រុមថៃ លោកស្រី Nualphan Lamsam និង 5 លានបាត (151,000 ដុល្លារ) ពីប្រធានសហព័ន្ធបាល់ទាត់ថៃ លោក Somyot Boompanmuang ផងដែរ។
ជាសរុប Teerasil Dangda និងក្រុមកីឡាករថៃ បានទទួល 35 លានបាត (1,059,000 ដុល្លារអាម៉េរិក) សម្រាប់តំណែងជើងឯក AFF Cup 2022។ ខ្ទង់ប្រាក់នេះអាចនឹងកើនឡើងបន្ថែមទៀត បើសិនមានម្ចាស់ឧបត្ថម្ភដែលចង់លើកតម្កើងក្រុមជម្រើសជាតិ។
ក្រៅពីតំណែង និងកិត្តិនាមរួម ខ្សែប្រយុទ្ធថៃ Teerasil Dangda ក៏ទទួលបានតំណែង «ស្ដេចកម្ទេចសំណាញ់ទី» ដូចទៅនឹង Nguyen Tien Linh របស់វៀតណាម ដោយរកបាន 6 គ្រាប់ដូចគ្នា។ ចំណែកខ្សែបម្រើរបស់ថៃ Theerathon Bunmathan ក៏ទទួលបានតំណែង «កីឡាករឆ្នើមបំផុតនៅ AFF Cup 2022»៕
(ប្រទេសថៃ) – ប្រធានក្រុមកីឡាករវៀតណាម Do Hung Dung ទទួលស្គាល់ថា ក្រុមជម្រើសជាតិថៃលេងបានល្អជាងនៅវគ្គផ្ដាច់ព្រ័ត្រជើងទីពីរ និងស័ក្ដិសមជាជើងឯក AFF Cup 2022។
ការប្រកួតនៅកីឡដ្ឋាន Thammasat កាលពីព្រលប់ថ្ងៃទី 16 មករា បានបញ្ចប់ដោយថៃឈ្នះវៀតណាម 1-0 នៅនាទីទី 24 នាំឱ្យវៀតណាមចាញ់សរុប 2-3 ក្នុងវគ្គផ្ដាច់ព្រ័ត្រ និងជួយឱ្យថៃក្លាយជាជើងឯក AFF Cup លើកទី 7។
ប្រធានក្រុមកីឡាករវៀតណាម Do Hung Dung និយាយថា «យើងចាញ់ ប៉ុន្តែត្រូវតែទទួលស្គាល់ថា ថៃគឺជាក្រុមខ្លាំង។ ពួកគេឈ្នះ និងដណ្ដើមបានពានរង្វាន់ជើងឯកគឺស័ក្ដិសម។ យើងបានលេងមួយប្រកួតដោយការខំប្រឹង និងមិនមានអ្វីត្រូវស្ដាយក្រោយឡើយនៅថ្ងៃនេះ»។
ប្រធានក្រុមកីឡាករវៀតណាម Do Hung Dung (លេខ 8)
ខុសពីការប្រកួតជើងទីមួយ នៅជើងទីពីរនេះ វៀតណាមមិនអាចបង្កឱកាសច្បាស់ៗណាមួយឡើង។ ចំណែកខាងថៃវិញ ក្រុមកីឡាករសហការគ្នាបានល្អនៅខ្សែកណ្ដាល។ នេះគឺជាបរាជ័យទីពីររបស់វៀតណាម ក្រោមសម័យគ្រូបង្វឹក Park Hang-seo នៅចំពោះមុខក្រុមជម្រើសជាតិថៃនៅ AFF Cup។ មុននោះ វៀតណាមបានចាញ់ 0-2 ក្នុងវគ្គពាក់កណ្ដាលផ្ដាច់ព្រ័ត្រជើងទីមួយកាលពីឆ្នាំ 2021។
ការប្រកួតវគ្គផ្ដច់ព្រ័ត្រជើងទីមួយរវាងថៃ និងវៀតណាម នៅ AFF Cup 2022
ការប្រកួតវគ្គផ្ដច់ព្រ័ត្រជើងទីពីររវាងថៃ និងវៀតណាម នៅ AFF Cup 2022
ជើងចុងក្រោយនៃវគ្គផ្ដាច់ព្រ័ត្រកាលពីម្សិលមិញក៏ជាការប្រកួតបិទបញ្ចប់វត្តមាន 5 ឆ្នាំរបស់គ្រូបង្វឹកជនជាតិកូរ៉េខាងត្បូង លោក Park Hang-seo នៅក្នុងក្រុមជម្រើសជាតិវៀតណាម។ កិច្ចសន្យារវាងលោក Park និងក្រុមវៀតណាម នឹងត្រូវអស់សុពលភាពចាប់ពីថ្ងៃទី 31 មករា 2023៕
(ប្រទេសថៃ) – គ្រូបង្វឹក Mono Polking អះអាងថា ថៃបានបញ្ជាក់អំពីឋានៈលេខមួយនៅអាស៊ីអាគ្នេយ៍ បន្ទាប់ពីបានផ្ដួលវៀតណាម និងក្លាយជាជើងឯក AFF Cup 2022។
«…យើងតែងតែលេខមួយ និងតែងតែឈានផុតពីអាស៊ីអាគ្នេយ៍។ ថៃត្រូវការបញ្ជាក់នៅក្នុងបណ្ដាពានធំជាងនេះ មានដូចជា Asian Cup ជាដើម ដែលមានគូប្រជែងខ្លាំងៗ មានជាអាទិ៍ ជប៉ុន កូរ៉េខាងត្បូង ឬ UAE» គ្រូបង្វឹកជនជាតិប្រេស៊ីលរបស់ក្រុមជម្រើសជាតិថៃ លោក Polking ថ្លែងដូច្នេះបន្ទាប់ពីបានយកឈ្នះវៀតណាម 1-0 ក្នុងការប្រកួតជើងចុងក្រោយនៃវគ្គផ្ដាច់ព្រ័ត្រ និងឈ្នះសរុប 3-2 នៅវគ្គផ្ដាច់ព្រ័ត្រនៅ AFF Cup 2022 កាលពីព្រលប់ម្សិលមិញ។
គ្រូបង្វឹករបស់ថៃនិយាយថា លោកមានកីឡាករឆ្នើមៗ និងលើកសរសើរចំពោះស្មារតីរបស់ក្រុមទាំងមូល។ ក្នុងការប្រកួតជើងចុងក្រោយនៃវគ្គផ្ដាច់ព្រ័ត្រ គ្រូបង្វឹក Polking រក្សាវត្តមានកីឡាករជម្រើសដំបូងទាំង 11 នាក់។ ថៃរកបាន 1 គ្រាប់ដំបូងក្នុងនាទីទី 24 ពេល Adisak Kraisorn បញ្ជូនបាល់ឱ្យ Theerathon Bunmathan ស៊ុតពីចម្ងាយ ផ្ដួលអ្នកចាំទីវៀតណាម Dang Van Lam នាំឱ្យពួកគេឈ្នះវៀតណាម 3-2 នៅវគ្គផ្ដាច់ព្រ័ត្រ។
ថៃឈ្នះវៀតណាម 3-2 នៅវគ្គផ្ដាច់ព្រ័ត្ររបស់ AFF Cup 2022
ជ័យជម្នះខាងលើ បានជួយឱ្យថៃក្លាយជាម្ចាស់ជើងឯក AFF Cup លើកទី 7 ក្រោយពីឆ្នាំ 1996, 2000, 2002, 2014, 2016 និង 2020។ នេះក៏ជាជើងឯកអាស៊ីអាគ្នេយ៍លើកទីពីររបស់គ្រូបង្វឹក Polking ផងដែរ។ គ្រូបង្វឹករូបនេះបានចូលដឹកនាំក្រុមជម្រើសជាតិថៃមុន AFF Cup 2020 មកដល់ និងបានជួយឱ្យថៃដណ្ដើមបានជើងឯក ក្រោយពីផ្ដួលវៀតណាមនៅវគ្គពាក់កណ្ដាលផ្ដាច់ព្រ័ត្រ និងឈ្នះឥណ្ឌូណេស៊ីនៅវគ្គផ្ដាច់ព្រ័ត្រ៕