សង្គម និងសេដ្ឋកិច្ច - La Reine Media

កីឡាករបារាំង Benzema បង្អួតសមិទ្ធផលក្នុងឆ្នាំ 2022 ក្រោយ FIFA The Best បានបញ្ចប់

ខ្សែប្រយុទ្ធ Karim Benzema បង្ហោះលើបណ្ដាញសង្គម Instagram នូវសមិទ្ធផលផ្ទាល់ខ្លួន និងបណ្ដាពានរង្វាន់រួមដែលបានទទួលក្នុងឆ្នាំ 2022 បន្ទាប់ពីជាប់ចំណាត់ថ្នាក់ក្រោម Lionel Messi នៅពានរង្វាន់ FIFA The Best។

កាលពីថ្ងៃទី 28 កុម្ភៈ គណនី Instagram @prime.benzi បានបង្ហោះអត្ថបទមួយដែលលើកឡើងអំពីសមិទ្ធផលរបស់ Benzema រាប់ចាប់ពីខែសីហា 2021 រហូតដល់បញ្ចប់ដំណាក់កាលបោះឆ្នោតជ្រើសរើសបេក្ខភាពសម្រាប់ពានរង្វាន់ FIFA The Best 2022។

ខ្សែប្រយុទ្ធវ័យ 35 ឆ្នាំ Benzema បានថតអេក្រង់ស្ដីពីអត្ថបទខាងលើ និងបង្ហោះលើ Instagram Story របស់ខ្លួន។

អត្ថបទនេះលើកឡើងថា Benzema ស៊ុតបញ្ចូលទីបាន 63 គ្រាប់ និងបង្កឱកាសស៊ុតបញ្ចូលទីបាន 21 គ្រាប់, ជាជើងឯក Champions League (អឺរ៉ុប), La Liga (អេស្ប៉ាញ), Spanish Super Cup (អេស្ប៉ាញ), UEFA Super Cup (អឺរ៉ុប), FIFA Club World Cup និង UEFA Nations League (បារាំង)។ គាត់គឺជាកីឡាករដែលរកគ្រាប់បាល់បានច្រើនជាងគេនៅ La Liga, Champions League, Spanish Super Cup និងបង្កឱកាសស៊ុតបញ្ចូលទីបានច្រើនជាងគេនៅ La Liga, Champions League។

សមិទ្ធិផលក្នុងឆ្នាំ 2022 របស់ Karim Benzema

អំពីពានរង្វាន់ផ្ទាល់ខ្លួន Benzema ដណ្ដើមបានពានរង្វាន់គ្រាប់បាល់មាសឆ្នាំ 2022, កីឡាករឆ្នើមបំផុតនៅ UEFA 2021-2022, កីឡាករឆ្នើមបំផុតនៅ La Liga, ខ្សែប្រយុទ្ធឆ្នើមបំផុតនៅ La Liga និងកីឡាករឆ្នើមបំផុតនៅ La Liga ដែលជ្រើសរើសដោយអ្នកគាំទ្រ។ល។

ក៏ប៉ុន្តែ កីឡាករបារាំង Benzema ទទួលបានតែ 34 ពិន្ទុ ឈរពីក្រោយ Kylian Mbappe (44 ពិន្ទុ), និង Lionel Messi (52 ពិន្ទុ) នៅក្នុងការបោះឆ្នោតជ្រើសរើសកីឡាករបាល់ទាត់ផ្នែកបុរសឆ្នើមបំផុតរបស់ FIFA សម្រាប់ឆ្នាំ 2022៕

March 1, 2023

តម្លៃលក់រាយរបស់ប្រេងសាំង និងម៉ាស៊ូត សម្រាប់ពីថ្ងៃទី 01 ដល់ 10 មីនា ឆ្នាំ 2023

យោងតាមក្រសួងពាណិជ្ជកម្ម សម្រាប់អំឡុងពេលពីថ្ងៃទី 01 ដល់ 10 មីនា ឆ្នាំ 2023 តម្លៃលក់រាយរបស់ប្រេងសាំង និងប្រេងម៉ាស៊ូតត្រូវថយចុះ 100 រៀល/លីត្រ។

ក្នុងអំឡុងពេលខាងលើ សាំងធម្មតានឹងតម្រូវឱ្យលក់ក្នុងតម្លៃ 4,250 រៀល/លីត ថយចុះ 100 រៀល/លីត្រ ធៀបនឹងរយៈពេលកន្លង។ ចំណែកប្រេងម៉ាស៊ូតវិញ ត្រូវលក់ក្នុងតម្លៃ 4,200 រៀល/លីត្រ ថយចុះ 100 រៀល/លីត្រ។

March 1, 2023

«ឪពុកបង្កើត» ពិតប្រាកដរបស់ «ទូរស័ព្ទដំបូងគេបង្អស់» គឺជាអ្នកណា?

ទូរស័ព្ទពិតជារបកគំហើញដ៏អស្ចារ្យរបស់មនុស្សជាតិ ដោយសារតែវាបានជួយឱ្យមនុស្សអាចទាក់ទងគ្នាបានដោយមិនបាច់ទៅជួបគ្នា ឬផ្ញើសំបុត្រដូចកាលពីសម័យមុន។ ក៏ប៉ុន្តែ អ្នកបង្កើតទូរស័ព្ទពិតប្រាកដវិញ ទំនងជាមិនទាន់ត្រូវបានគេស្គាល់ច្បាស់នៅឡើយ។

អ្នកបង្កើតទូរស័ព្ទដំបូងគេបង្អស់លើពិភពលោក គឺលោក Antonio Meucci ជនជាតិអាម៉េរិកដើមកំណើតអ៊ីតាលី។ លោកបានបង្កើតទូរស័ព្ទដំបូងគេកាលពីឆ្នាំ 1860។

ព័ត៌មានស្ដីពីអ្នកបង្កើតទូរស័ព្ទដំបូងគេមានភាពចម្រូងចម្រាសច្រើន ព្រោះថា ក្នុងអំឡុងទសវត្សរ៍ឆ្នាំ 1860 Antonio Meucci គឺជាអ្នកពិភាក្សាអំពីទូរស័ព្ទជាមួយនឹង Alexander Graham Bell និងបានហៅទូរស័ព្ទជាលើកដំបូងទៅឱ្យភរិយារបស់ខ្លួន ហើយបានហៅឧបករណ៍នេះថា «ទូរស័ព្ទ»។

ក៏ប៉ុន្តែ ក្នុងពេលនោះ លោក Meucci មិនមានប្រាក់គ្រប់ 250 ដុល្លារអាម៉េរិកដើម្បីចុះឈ្មោះកម្មសិទ្ធិបញ្ញាសម្រាប់ទូរស័ព្ទ។ ដូច្នេះ Alexander Graham Bell ក៏បានក្លាយជាម្ចាស់ទូរស័ព្ទ ព្រោះលោកបានចុះឈ្មោះកម្មសិទ្ធិបញ្ញា។ នេះគឺជារឿងគួរឱ្យសង្ស័យធំមួយស្ដីពីរបកគំហើញត្រូវបានគេបន្លំ។ មនុស្សជាច្រើនបានដឹងថា

Bell គឺជាអ្នកបង្កើតទូរស័ព្ទដំបូងគេ ប៉ុន្តែក៏មានមនុស្សជាច្រើនបានបញ្ជាក់ថា Bell បានបន្លំរបកគំហើញទូរស័ព្ទរបស់ Meucci ហើយយកវាធ្វើជារបស់ខ្លួន។

ក៏ប៉ុន្តែ មកដល់ថ្ងៃទី 11 មិថុនា 2002 សភាជាន់ទាបអាម៉េរិកបានប្រកាសជាផ្លូវការថា Antonio Meucci ទើបជា «ឪពុកបង្កើត» របស់ទូរស័ព្ទ មិនមែន Alexander Graham Bell នោះទេ។

Antonio Meucci និង Alexander Graham Bell

ទោះជាយ៉ាងណាក៏ដោយ ការពិតស្ដីពី «ឪពុកបង្កើត» របស់ទូរស័ព្ទនៅតែជារឿងប្រទាញប្រទង់គ្នាដដែល ដោយអ្នកខ្លះគាំទ្រ Alexander Graham Bell និងអ្នកខ្លះគាំទ្រ Antonio Meucci។ ទំព័រ Imagining the Internet របស់សាកលវិទ្យាល័យ Elon បានចុះផ្សាយថា Antonio Meucci ជាអ្នករកឃើញវិធីបង្កើតទូរស័ព្ទដំបូងគេនៅឆ្នាំ 1849, ជនជាតិបារាំង Charles Bourseul រកឃើញកាលពីឆ្នាំ 1854 ខណៈ Alexander Graham Bell ទទួលបានបណ្ណកម្មសិទ្ធិបញ្ញាដំបូងពីសហរដ្ឋអាម៉េរិកនៅឆ្នាំ 1876៕

March 1, 2023

Kylian Mbappe បង្ហើបពីក្លឹបអនាគតក្នុងក្ដីស្រមៃ ក្រោយចាកចេញពី PSG

នៅក្នុងថ្ងៃប្រគល់ពានរង្វាន់ The Best FIFA Football Awards 2022 កាលពីម្សិលមិញ កំពូលតារាបាល់ទាត់ Kylian Mbappe របស់ក្លឹប PSG បានបង្ហើបឱ្យដឹងនូវក្រុមបាល់ទាត់ដែលគាត់មានបំណងចូលរួមក្នុងពេលអនាគត។

កាលពីរដូវក្ដៅកន្លង Mbappe បានចុះកិច្ចព្រមព្រៀងជាមួយ PSG បើទោះជាមានការទាក់ទាញពី Real Madrid មុននោះ។ ក៏ប៉ុន្តែ នៅក្នុងពិធីប្រគល់ពានរង្វាន់ The Best FIFA Football Awards 2022 ដែលត្រូវបានធ្វើឡើងកាលពីថ្ងៃទី 28 កុម្ភៈ 2023 (ពេលវេលានៅកម្ពុជា) កំពូលតារាបាល់ទាត់បារាំងរូបនេះបានចែករំលែករឿងដ៏គួរឱ្យភ្ញាក់ផ្អើល។

ជាក់ស្ដែង នៅពេលរម្លឹកដល់រឿងដែលថាអាចចាកចេញពី PSG ក្នុងពេលអនាគត ខ្សែប្រយុទ្ធវ័យ 24 ឆ្នាំ Mbappe មិនមានការរារែកក្នុងការនិយាយដល់ករណីទៅចូលរួមទាត់នៅពានរង្វាន់ Serie A។

Messi និង Mbappe ទទួលពានរង្វាន់ The Best FIFA Football Awards 2022

ក្នុងកិច្ចសម្ភាសមួយជាមួយនឹង Gazzetta dello Sport កាលពីអតីតកាល Kylian Mbappe ក៏បានចែករំលែកមូលហេតុដែលនាំឱ្យគាត់គាំទ្រខ្លាំងចំពោះ Rossoneri (AC Milan) ដោយនិយាយថា ៖

«ទំនាក់ទំនងរបស់ខ្ញុំជាមួយនឹង Milan គឺពិតជាធំធេង។ កាលពីនៅក្មេង ខ្ញុំមានមេដោះជនជាតិអ៊ីតាលីម្នាក់ រួមនឹងគ្រួសាររបស់គាត់ យើងបានចំណាយពេលយ៉ាងច្រើននៅក្បែរគ្នា។ ពិតជាអស្ចារ្យខ្លាំងណាស់នៅពេលគ្រប់គ្នាសុទ្ធតែស្រលាញ់ AC Milan។ ដូច្នេះហើយបានជាខ្ញុំទទួលមរតកជាស្មារតីនោះ និងបានមើលការប្រកួតជាច្រើនរបស់ក្រុមបាល់ទាត់នេះ»។

បច្ចុប្បន្ន Mbappe នៅមានកិច្ចសន្យាជាមួយ PSG ដែលមានសុពលភាពរហូតដល់រដូវក្ដៅ 2024 អមនឹងលក្ខខណ្ឌជួយឱ្យកីឡាកររូបនេះអាចពន្យារកិច្ចសន្យាបន្ថែមមួយឆ្នាំ (2025) ទៀត។ ក៏ប៉ុន្តែ ក្នុងករណីគាត់មិនចង់ គាត់នឹងចាកចេញពីប៉ារីសទៅតាមទម្រង់ទិញដូរដោយសេរី បន្ទាប់ពីរដូវកាល 2023/2024 បានបញ្ចប់។

Mbappe គឺជាអ្នកគាំទ្ររបស់ AC Milan តាំងពីតូច

ដូច្នេះហើយបានជា PSG ក៏ប្រឹងប្រែងរក្សាកំពូលថ្វីជើងរបស់ខ្លួន។ ក៏ប៉ុន្តែបើតាមប្រភពព័ត៌មានពីបារាំង ក្នុងករណីមិនអាចចងជើងបាន ក្លឹប PSG នឹងយល់ព្រមលក់ Mbappe នៅក្នុងរដូវក្ដៅឆ្នាំនេះ។

ព័ត៌មាននេះអាចនឹងធ្វើឱ្យទីផ្សារទិញដូរកីឡាករឡើងកម្ដៅខ្លាំងក្នុងរដូវកាល 2023/2024។ ព្រោះថា មិនត្រឹមតែ Real Madrid នោះទេ ប៉ុន្តែនៅមានក្លឹបធំៗជាច្រើនទៀតនៅអឺរ៉ុប កំពុងត្រៀមប្រាក់ដើម្បីដណ្ដើមយកកំពូលថ្វីជើងដែលត្រូវបានគេចាត់ទុកថាជាអនាគតរបស់ពិភពបាល់ទាត់អន្តរជាតិរូបនេះ៕

March 1, 2023

កីឡាករខ្សែការពាររបស់ PSG ត្រូវរងការចោទថា «វាយប្រហារផ្លូវភេទ»

(បារាំង) – តារាបាល់ទាត់របស់ក្លឹប PSG និងក្រុមជម្រើសជាតិម៉ារ៉ុក Achraf Hakimi ត្រូវបានស៊ើបអង្កេតពីបទរំលោភបំពានផ្លូវភេទ បន្ទាប់ពីបានអញ្ជើញស្ត្រីម្នាក់មកលេងផ្ទះក្នុងពេលភរិយាទៅទេសចរណ៍។

យោងតាមទំព័រ Le Parisien (បារាំង) ស្ត្រីវ័យ 23 ឆ្នាំម្នាក់បានរាយការណ៍ប្រាប់ប៉ូលិសកាលពីចុងសប្ដាហ៍កន្លងថា នាងត្រូវបានកីឡាករមួយរូបរបស់ក្លឹប PSG ចាប់រំលោភ ប៉ុន្តែមិនចង់ដាក់ពាក្យប្ដឹង។ ស្ត្រីរូបនេះនិយាយប្រាប់ប៉ូលិសថា ខ្លួនគ្រាន់តែចង់ «រាយការណ៍ពីករណីចាប់រំលោភ»។ ក៏ប៉ុន្តែ ដោយសារតែភាពធ្ងន់ធ្ងរនៃហេតុការណ៍ រដ្ឋអាជ្ញាមួយក្រុមក៏ចាប់ផ្ដើមធ្វើការស៊ើបអង្កេតលើជនសង្ស័យ។

Le Parisien ឱ្យដឹងថា Hakimi ចាប់ផ្ដើមនិយាយគ្នាជាមួយស្ត្រីខាងលើនៅលើ Instagram កាលពីថ្ងៃទី 16 មករា។ ក្រោយមក កីឡាករខ្សែការពារវ័យ 24 ឆ្នាំរូបនេះ ក៏បានកក់សេវាកម្ម Uber និងអញ្ជើញនាងមកកាន់ផ្ទះផ្ទាល់ខ្លួននៅ Boulogne-Billancourt ក្នុងទីក្រុងបារីសកាលពីថ្ងៃទី 25 មករា។ នៅទីនេះ កីឡាកររបស់ក្លឹប PSG បានរួមភេទជាមួយស្ត្រីខាងលើ បើទោះនាងមិនយល់ព្រម។ នាងបានទាត់ទៅលើ Hakimi មុនពេលផ្ញើសារឱ្យមិត្តម្នាក់មកទទួល និងរាយការណ៍ប្រាប់ប៉ូលិសនៅថ្ងៃបន្ទាប់។

ទំព័រ AP បានផ្សាយថា ការិយាល័យរដ្ឋអាជ្ញាទទួលបន្ទុករឿងក្ដីនេះត្អូញត្អែរថា «ព័ត៌មានត្រូវបានបែកធ្លាយជាសាធារណៈ ធ្វើឱ្យដំណើរការស៊ើបអង្កេតរកការពិតជួបការលំបាក»។

ក្នុងអំឡុងពេលកើតហេតុ ភរិយារបស់ Hakimi ដែលជាតារាភាពយន្តជនជាតិអេស្ប៉ាញ ឈ្មោះ Hiba Abouk កំពុងតែទៅទេសចរណ៍ជាមួយកូនប្រុស 2 នាក់នៅឌូបៃ។

ដោយឡែក Dani Alves ដែលជាកីឡាករខ្សែការពារមួយរូបផ្សេងទៀតដែលធ្លាប់ទាត់ឱ្យ PSG ក៏កំពុងជាប់បណ្ដឹងនៅតុលាការ ទាក់ទងនឹងរឿងបំពានផ្លូវភេទ។ Dani ត្រូវតុលាការបដិសេធសំណើសុំនៅក្រៅឃុំ និងត្រូវជាប់ឃុំរហូតដល់សវនាការត្រូវបានធ្វើឡើង។ ប៉ុន្តែ កាលបរិច្ឆេទនៃការបើកសវនាការនេះមិនទាន់ត្រូវបានកំណត់នៅឡើយ៕

February 28, 2023

Elon Musk ដណ្ដើមបានមកវិញតំណែងអ្នកមានជាងគេលើពិភពលោក

ភាគហ៊ុន Tesla ឡើងថ្លៃ ជួយឱ្យទ្រព្យរបស់លោក Elon Musk កាលពីម្សិលមិញកើនដល់ 187.1 ពាន់លានដុល្លារអាម៉េរិក ច្រើនជាងទ្រព្យរបស់មហាសេដ្ឋីបារាំង Bernard Arnault។

យោងតាមតារាងចំណាត់ថ្នាក់មហាសេដ្ឋីពិភពលោក Bloomberg Billionaires Index បច្ចុប្បន្ន អគ្គនាយកប្រតិបត្តិរបស់ Tesla លោក Elon Musk មានទ្រព្យ 187.1 ពាន់លានដុល្លារអាម៉េរិក។ តួលេខនេះច្រើនជាង 2 ពាន់លានដុល្លារធៀបនឹងទ្រព្យរបស់ម្ចាស់ LVMH លោក Bernard Arnault។ ដូច្នេះ លោក Musk ក៏ដណ្ដើមបានមកវិញតំណែងអ្នកមានជាងគេលើពិភពលោក បន្ទាប់ពីបាត់បង់អស់រយៈពេលជាង 2 ខែ។

ទ្រព្យរបស់លោក Musk កើនជិត 7 ពាន់លានដុល្លារកាលពីថ្ងៃទី 27 កុម្ភៈ ដោយសារតែភាគហ៊ុន Tesla ឡើងថ្លៃជាង 5% ក្នុងការជួញដូរកាលពីម្សិលមិញ។ ជាសរុប រាប់ចាប់ពីដើមឆ្នាំមកនេះ លោក Musk រកបានប្រាក់ 50 ពាន់លានដុល្លារ ខណៈដែលទ្រព្យរបស់លោក Bernard កើនតែ 23 ពាន់លានប៉ុណ្ណោះ៕

February 28, 2023

Tom Cruise នៅតែចង់ថតឈុតផ្សងគ្រោះថ្នាក់ដល់អាយុ 100 ឆ្នាំ

កំពូលតារាសម្ដែង Tom Cruise និយាយថា នៅតែចង់សម្ដែងក្នុងឈុតឆាកផ្សងគ្រោះថ្នាក់ មានដូចជាការលោតចុះពីភ្នំជាដើម បើទោះមានអាយុ 80 ឬ 100 ឆ្នាំក៏ដោយ។

ក្នុងកម្មវិធី Jimmy Kimmel Live កាលពីថ្ងៃទី 26 កុម្ភៈ Tom Cruise ត្រូវបានគេសួរថា «តើនឹងបន្តសម្ដែងក្នុងឈុតផ្សងគ្រោះថ្នាក់ លោតពីភ្នំទៀតទេ នៅពេលមានអាយុ 80 ឬ 100 ឆ្នាំ?»។

លោក Tom Cruise ថ្លែងថា «នោះគឺជាអ្វីដែលខ្ញុំប៉ង។ ខ្ញុំបានធ្វើកិច្ចការនេះពេញមួយជីវិតហើយ… ខ្ញុំជាក្មេងដែលឡើងលើដំបូលផ្ទះពេលមានអាយុ 4 ឆ្នាំ ព្រោះតែចូលចិត្តមើលមេឃ ពពក និងដួងតារា»។

ក្នុងពេលថតរឿង Mission: Impossible 7 លោក Tom Cruise និយាយថា គាត់នៅតែសម្ដែងដោយផ្ទាល់ខ្លួននូវទិដ្ឋភាពផ្សងគ្រោះថ្នាក់ ដូចជាបើកម៉ូតូហោះធ្លាក់ទៅលើជ្រោះជ្រៅជាដើម។ គាត់ត្រូវសម្ដែងសកម្មភាពនេះរហូតដល់ 8 លើក។ «ខ្ញុំមានពេលតែ 6 វិនាទីប៉ុណ្ណោះដើម្បីបើកឆត្រ មុនពេលធ្លាក់ដល់ដី» Tom Cruise និយាយដូច្នេះ។ ដើម្បីធ្វើបានដូច្នេះ គាត់ត្រូវហាត់សមយ៉ាងលំបាក ក្នុងនោះគាត់បានលោកឆត្រយោង 13,000 លើក និងរៀនប្រណាំងម៉ូតូ។ល។

ឈុតឆាកផ្សងគ្រោះថ្នាក់ធំបំផុតរបស់ Tom Cruise ក្នុងពេលថតរឿង Mission: Impossible – Dead Reckoning Part One

ក្រុមអ្នកផលិតភាពយន្តក៏ត្រូវធ្វើកិច្ចការជាច្រើនដើម្បីធានាថា កំពូលតារាសម្ដែងរូបនេះមិនជួបគ្រោះថ្នាក់ក្នុងពេលថតរឿង។

ក្នុងអាជីព Tom Cruise តែងសម្ដែងក្នុងឈុតផ្សងគ្រោះថ្នាក់ដោយខ្លួនឯង មិនចាំបាច់មានអ្នកសម្ដែងជំនួស។ គាត់ធ្លាប់លោតពីយន្តហោះដែលមានកម្ពស់ 7,620 ម៉ែត្រ តោងឡើងកង្កេះភ្នំកម្ពស់ប្រហែល 610 ម៉ែត្រ និងឡើងអគារ Burj Khalifa កម្ពស់ជាង 518 ម៉ែត្រ។ កាលពីឆ្នាំ 2018 ពេលថតរឿង Mission Impossible – Fallout គាត់ត្រូវរងរបួសពេលលោតពីអគារមួយទៅអគារមួយ។

ក្នុងវ័យ 60 ឆ្នាំ Tom Cruise នៅតែហាត់ប្រាណ លើកដុំដែក និងធ្វើការហាត់ខ្លាំង។ បច្ចុប្បន្ន គាត់កំពុងថតរឿង Mission: Impossible 8។ Tom Cruise ក៏មានគម្រោងថតភាពយន្តដែលមានទិដ្ឋភាពអវកាសផងដែរ ដោយគាត់នឹងដើរក្នុងអវកាសដូចទៅនឹងអវកាសចរចេញជួសជុលស្ថានីយអវកាសអន្តរជាតិ។ នេះបើតាម Cinemablend៕

February 28, 2023

កប៉ាល់បើកបរស្វ័យប្រវត្តដំណើរការដោយអ៊ីដ្រូសែនរាវដំបូងគេលើពិភពលោក

ក្រុមហ៊ុន HI-FIVED របស់អង់គ្លេស ទើបតែទទួលបានថវិកាឧបត្ថម្ភ 6.46 លានដុល្លារអាម៉េរិកពីរាជរដ្ឋាភិបាលដើម្បីអភិវឌ្ឍកប៉ាល់អ៊ីដ្រូសែន ក្នុងបំណងបន្សាបកាបូននៅក្នុងវិស័យដឹកជញ្ជូនតាមផ្លូវទឹក។

យោងតាមការពិពណ៌នានៅលើគេហទំព័ររបស់ HI-FIVED កប៉ាល់ដែលមានឈ្មោះថា H-USV នឹងអាចផ្ទុកទំនិញបាន 4.5 តោន ផ្លាស់ទីក្នុងល្បឿន 7.4 គីឡូម៉ែត្រ/ម៉ោង ហើយអាចធ្វើដំណើរជាបន្តបន្ទាប់ពី 40 ទៅ 60 ថ្ងៃ។ នេះគឺជាកប៉ាល់បើកបរស្វ័យប្រវត្តដំណើរការដោយអ៊ីដ្រូសែនរាវដំបូងគេលើពិភពលោក។ ការប្រើប្រាស់អ៊ីដ្រូសែនធ្វើជាឥន្ធនៈនឹងជួយកាត់បន្ថយបរិមាណឧស្ម័យកាបូនបានរហូតដល់ 99.1% នៅក្នុងវិស័យដឹកជញ្ជូន។ នេះបើតាម Interesting Engineering ចុះផ្សាយកាលពីថ្ងៃទី 27 កុម្ភៈ 2023។

H-USV ប្រើប្រាស់សេនសឺរបរិស្ថាន និងបញ្ញាសិប្បនិម្មិតដើម្បីវិភាគទិន្នន័យ ស្វែងរកការគំរាមកំហែង ឬឧបសគ្គ និងសម្រេចចិត្តក្នុងពេលវេលាជាក់ស្ដែង។

ក្រុមហ៊ុន Unitrove មានទីស្នាក់ការកណ្ដាលនៅ Leceister ដែលជាសមាជិកមួយរបស់ HI-FIVED នឹងផ្គត់ផ្គង់ហេដ្ឋារចនាសម្ព័ន្ធចាំបាច់សម្រាប់កប៉ាល់ H-USV ដើម្បីអភិវឌ្ឍផ្លូវគមនាគមន៍បៃតងរវាងទីក្រុង Aberdeen នៅស្កុតឡែន និងប្រជុំកោះ Orkney និង Shetland ដែលមានចម្ងាយពីដីគោករបស់ស្កុតឡែនប្រហែល 9.6 គីឡូម៉ែត្រ។

កប៉ាល់ H-USV ដំបូងៗត្រូវបានគេគ្រោងនឹងប្រគល់ឱ្យដៃគូសហការចាប់ពីឆ្នាំ 2024។ រាជរដ្ឋាភិបាលអង់គ្លេសកំពុងរកវិធីដើម្បីផលិតអ៊ីដ្រូសែនស្អាតជាងបច្ចុប្បន្ន តាមរយៈការស្រូបទាញយកកាបូនដែលបំភាយចេញពីការផលិតអ៊ីដ្រូសែន ឬប្រើប្រាស់ទឹកជាប្រភពសម្រាប់ចម្រាញ់ ជំនួសឱ្យឧស្ម័នធម្មជាតិ៕

February 28, 2023

Cristiano Ronaldo មិនបោះឆ្នោតជ្រើសរើសបេក្ខភាព The Best FIFA 2022

Ronaldo គឺជាប្រធានក្រុមកីឡាករជម្រើសជាតិព័រទុយហ្កាល់ ប៉ុន្តែមិនបានបោះឆ្នោតជ្រើសរើសបេក្ខភាពសម្រាប់ The Best FIFA 2022 ដោយទុកតួនាទីនេះឱ្យអនុប្រធានក្រុម Pepe ទៅវិញ។

យោងតាមលទ្ធផលនៃការបោះឆ្នោតជ្រើសរើសដែលត្រូវបាន FIFA ប្រកាសកាលពីព្រលប់ថ្ងៃទី 27 កុម្ភៈ 2023 Ronaldo ជាលើកដំបូងដែលមិនចូលរួមបោះឆ្នោតជ្រើសរើស The Best។ តាមច្បាប់ ក្រុមបាល់ទាត់ជម្រើសជាតិនៃប្រទេសនីមួយៗត្រូវមានគ្រូបង្វឹក ប្រធានក្រុម និងអ្នកយកព័ត៌មាន បោះឆ្នោតជ្រើសរើស The Best។ Ronaldo គឺជាប្រធានក្រុមជម្រើសជាតិព័រទុយហ្កាល់ដែលចូលរួមប្រកួតនៅ World Cup 2022 ប៉ុន្តែអ្នកដែលទទួលបានសិទ្ធិបោះឆ្នោតគឺ Pepe (Kepler Laveran de Lima Ferreira ComM) ដែលជាអនុប្រធាន។

មេប្រយោគម្នាក់ៗត្រូវតែជ្រើសរើសកីឡាករ 3 រូបពីតារាងបេក្ខភាព 14 រូបដែលត្រូវបានប្រកាសមុននោះ ដោយតម្រូវឱ្យដាក់ពិន្ទុ 5, 3 និង 1 ពិន្ទុ។ Ronaldo ក៏មិនមានឈ្មោះនៅក្នុងក្រុមបេក្ខភាពនេះដែរ។

កីឡាករដែល Pepe ជ្រើសរើសគឺ Kylain Mbappe, Luka Modric និង Karim Benzema។ ប្រធានគ្រូបង្វឹកថ្មីរបស់ព័រទុយហ្កាល់ Roberto Martinez បានជ្រើសរើស Lionel Messi, Kevin de Bruyne និង Mbappe។

Messi ជាលើកទីពីរដែលដណ្ដើមបានពាន់រង្វាន់កីឡាករឆ្នើមបំផុត The Best របស់ FIFA ដោយទទួលបានពិន្ទុច្រើនលើសលុបជាងគេ។ ចំណែក Mbappe ឈរលំដាប់លេខ 2 និង Benzema ឈរលំដាប់លេខ 3។

ពានរង្វាន់ The Best ត្រូវបានប្រគល់ចាប់ពីឆ្នាំ 2016 ក្នុងនោះ Ronaldo ដណ្ដើមបាន 2 លើកដំបូងគេ។ រីឯកីឡាករ 2 រូបទៀតដែលទទួលបាន The Best ចំនួន 2 លើកដូចគ្នា គឺ Lewandowsky និង Messi៕

February 28, 2023

Lionel Messi ទទួលបានពានរង្វាន់ The Best FIFA 2022

(បារាំង) – យកឈ្នះលើ Kylian Mbappe និង Karim Benzema កំពូលតារាបាល់ទាត់វ័យ 36 ឆ្នាំ Lionel Messi ដណ្ដើមបានពានរង្វាន់ The Best របស់ FIFA ជាលើកទីពីរកាលពីព្រលប់ថ្ងៃទី 27 កុម្ភៈ 2023។

«ពាន់រង្វាន់នេះ ខ្ញុំទុកសម្រាប់មិត្តរួមក្រុម ជំនួសឱ្យពាក្យអរគុណចំពោះអ្វីដែលពួកគេធ្វើបាន» Messi ថ្លែងដូច្នេះបន្ទាប់ពីបានទទួលពានរង្វាន់ពីប្រធាន FIFA លោក Gianni Infantino។ «តំណែងជើងឯក World Cup គឺជាប្រកាសអស្ចារ្យបំផុតចំពោះខ្ញុំនៅក្នុងអាជីពជាកីឡាករបាល់ទាត់»។

ចុងបញ្ចប់នៃការថ្លែងការណ៍កាលពីវេលាម៉ោងជាង 22 (ម៉ោងនៅបារីស) Messi ថែមទាំងនិយាយប្រាប់កូនប្រុសទាំង 3 ដែលអង្គុយលើកៅអីសម្រាប់ភ្ញៀវនៅខាងមុខថា «Thiago, Mateo, Ciro ដល់ពេលទៅគេងហើយ»។

ពានរង្វាន់ថ្មីនេះបានជួយឱ្យ Messi មានពាន The Best ចំនួន 2 ដែលស្មើនឹង Cristiano Rolando និង Robert Lewandowski។ បើគិតទាំងពានរង្វាន់នានាដែលផ្ដល់ដោយ FIFA ចាប់ពីឆ្នាំ 1991 កំពូលកីឡាករអាហ្សង់ទីនរូបនេះមានពានសរុបឡើងដល់ 7 ក្នុងគ្រាដែល Ronaldo ទទួលបានតែ 5 ប៉ុណ្ណោះ។

FIFA ជ្រើសរើសបេក្ខភាព The Best 2022 ដោយយោងទៅលើសមិទ្ធផលចាប់ពីថ្ងៃទី 08 សីហា 2021 ដល់ 18 ធ្នូ 2022។ ក្នុងអំឡុងពេលនោះ Messi ស៊ុតបញ្ចូលទីបាន 45 គ្រាប់ និងបង្កឱកាសរកបានគ្រាប់បាល់ចំនួន 34 លើក នៅក្នុង 74 ប្រកួត រួមនឹងការដណ្ដើមបានជើងឯក World Cup 2022, ពានរង្វាន់បាល់ទាត់អន្តរទ្វីប (CONMEBOL–UEFA Cup of Champions) ដែលអាហ្សង់ទីនដណ្ដើមបាន, Ligue 1 និងពានរង្វាន់បាល់ទាត់បារាំង (Trophée des Champions) ដែល PSG ដណ្ដើមបាន ក៏ដូចជាពានរង្វាន់បាល់មាស World Cup 2022៕

February 28, 2023

Category: សង្គម និងសេដ្ឋកិច្ច