Category: សង្គម និងសេដ្ឋកិច្ច

ស្របពេលដែល​រឿង “វិលចរិត” នឹងដាក់បញ្ចាំងជាថ្មីក្នុង3ប្រទេស​ដំណាលគ្នា​មាន កម្ពុជា  ថៃ  និងឡាវនោះ លោក ហ៊ុយ យ៉ាឡេង បានដឹកនាំតួសំខាន់ៗពីរដួងផ្សេងទៀតគឺ កញ្ញា ឆុំ វត្តី និងលោក វណ្ណី ពិសិដ្ឋ និងបានផ្តល់បទសម្ភាសផ្តាច់មុខ​ជាមួយគេហទំព័រ ឡារ៉ែន កាលពីល្ងាចថ្ងៃទី​19 ខែកក្កដា ឆ្នាំ​2017 នៅផ្សារទំនើបអ៊ីអនម៉ល។​

ផលិតករ ហ៊ុយ យ៉ាឡេង បានប្រាប់ថា សម្រាប់រឿង «វិកលចរិត» ដែលនឹងដាក់បញ្ចាំងក្នុង3ប្រទេសដំណាលគ្នានោះនឹងធ្វើឡើងនៅថ្ងៃទី​3 ខែសីហា ឆ្នាំ​2017 ខាងមុខនេះ។​ លោកថា ការយករឿងទៅដាក់បញ្ចាំងនៅក្រៅប្រទេស ជាពិសេសប្រទេសថៃ តែម្តង ពិតជាមានផលលំបាកខ្លាំងណាស់ ដោយត្រូវទៅរក​អ្នកបកប្រែភាសាថៃធ្វើការទំនាក់ទំនង​សព្វបែបយ៉ាង ដូចជាបញ្ចូលសំឡេងជាភាសាថៃ ដោយប្រើប្រាស់ពេលវេលាដល់ទៅ៤ខែឯណោះ។​

តួសុភាព(ហ៊ុយ យ៉ាឡេង) ក្នុងរឿងវិកលចរិកខាងលើ បានបន្តថា ផលលំបាកធំបំផុត គឺការឆ្លងរឿងទៅកាន់ប្រទេសគេ ត្រូវប្រើប្រាស់ រយៈពេល ១ខែ ទើបអាច​ដាក់បញ្ចាំង ក្នុងរោងកុនបាន។ លោកថា ការឆ្លងពិបាក ដោយសារតែ​រឿងគេ មានរាប់រយរឿង ហើយរឿងយើងទៅក្រោយគេ នៅក្រោមគេ ទម្រាំដល់យើង ត្រូវប្រើប្រាស់ពេលយូរ ។​

បើទោះបីជាប្រើប្រាស់ពេលយូរយ៉ាងនេះក្តី លោកបំណងចង់បង្ហាញស្នាដៃនៃខ្សែភាពយន្តខ្មែរ ទៅកាន់ប្រទេសគេ យើងត្រូវ​អត់ធ្មត់ ក៏ព្រោះតែចង់ឲ្យថៃ​ទទួលស្គាល់ស្នាដៃខ្មែរ ដូច​ជំនាន់មុន​ ខណៈរឿងខ្មែរខ្ពស់ជាងគេ តែពេលនេះគេខ្ពស់ជាងយើង​។​

លោកថា ការចង់បង្ហាញរឿង វិកលចរិក ទៅកាន់ថៃ និង ឡាវ​ ព្រោះតែចង់ឲ្យប្រទេសគេ គិតថា កុនខ្មែរមិនអន់នោះទេ ផលិតឡើង មានគុណភាព និងកំពុងងើបឡើងវិញហើយ ។​

ដោយឡែកលោក វណ្ណី ពិសិដ្ឋ និង កញ្ញា ឆុំ វត្តី ក៏បានប្រាប់ថា ដល់ពេលឃើញរឿង«វិកលចរិក» ដែលខ្លួនសម្តែង ចេញបង្ហាញ ខ្លួនលើឆាកអន្តរជាតិ ជាពិសេស​ដាក់បញ្ចាំងនៅ ថៃ និងឡាវ អ៊ីចឹង ពួកយើងពិតជាសប្បាយចិត្ត រកអ្វីថ្លែងមិនត្រូវនោះទេ ។ ពួកយើង គិតថាវា​ជាមោទនភាពមួយ សម្រាប់ខ្លួនឯង និងសង្គមជាតិទាំងមូល ដែលរឿងខ្មែរ អាចដាក់បញ្ចាំង បាននៅក្រៅប្រទេស យ៉ាងដូច្នោះ ។ ម្យ៉ាងវិញពួកយើងគិតថា វាជាចំណែកមួយ ដែលជួយឲ្យ ភាពយន្តខ្មែរ ងើបឡើងវិញ ដើម្បីប្រកួតប្រជែង លើទីផ្សារ អន្តរជាតិ ។

ដើម្បីឱ្យកាន់តែជាក់ច្បាស់សូមទស្សនា វីដេអូសម្ភាស ហ៊ុយ យ៉ាឡេង ដឹកនាំតួ​ពីរដួងក្នុងរឿង«វិកលចរិក» ចូលឆាកអន្ដរជាតិផ្តល់សម្ភាសន៍ផ្តាច់មុខអោយឡារ៉ែន ខាងក្រោមនេះ៖​

លោក វណ្ណី ពិសិដ្ឋ តួអង្គសំខាន់នៅក្នុងរឿង “វិកលចរិត” បច្ចុប្បន្ននេះកំពុងមមាញឹកយ៉ាងខ្លាំងនៅក្នុងអាជីពសម្តែង និងការងារសិល្បៈផ្សេងៗទៀត មិនថាការងារជាពិធីករ ឬដឹកនាំកម្មវិធីផ្សេងៗនោះទេ។ ទន្ទឹមនឹងនេះរឿង “វិកលចរិត” ក៏កំពុងទទួលបានការចាប់អារម្មណ៍យ៉ាងខ្លាំងក្លាពីសំណាក់ប្រិយមិត្តតាមបណ្តាញសង្គមនានា ដោយសារតែនេះជាខ្សែភាពយន្តភ័យរន្ធត់ដំបូងគេរបស់ខ្មែរដែលមានលក្ខណៈខុសប្លែកពីខ្សែភាពយន្តនានាកន្លងមកទាំងបច្ចេកទេស និងគុណភាព។

តារាសម្បុរខ្មៅស្រអែមរូបនេះមានសមត្ថភាព និងទេពកោសល្យសម្តែងខ្ពស់ ទើបលោកតែងតែមានឱកាសទទួលបានការអញ្ជើញឲ្យដើរលើកម្រាលព្រំក្រហមក្នុងមហោស្រពភាពយន្តអន្តរជាតិនៅតាមបណ្តាប្រទេសផ្សេងៗ ដូចជា ប្រទេសចិន កូរ៉េ ជប៉ុន និងស្វ៊ីស ជាដើម។ ក្នុងនេះរឿងដែលលោកបានចូលរួមសម្ដែង និងបានឆ្លងទៅបញ្ចាំងនៅលើឆាកអន្ដរជាតិមានដូចជារឿង “គ្រាប់ពេជ្រចុងក្រោយ” រួមទាំងរឿង “វិកលចរិត” នេះផងដែរ។

យ៉ាងណាមិញ វណ្ណី ពិសិដ្ឋ បានប្រាប់អ្នកយកព័ត៌មានគេហទំព័រ ឡារ៉ែន ថា នៅថ្ងៃទី3 ខែសីហា ឆ្នាំ2017​ នេះនឹងមានការចាក់បញ្ចាំងរឿង “វិកលចរិត” នៅក្នុងប្រទេសកម្ពុជាដំណាលគ្នាជាមួយប្រទេសថៃ និងឡាវផងដែរ លោកថា “សម្រាប់ខ្ញុំ ការចូលរួមគាំទ្រទាំងអស់គ្នាពីសំណាក់ទស្សនិកជន ចំពោះសិល្បករ សិល្បការិនី ក៏ដូចជាផលិតករ គឺជាការលើកទឹកចិត្តដើម្បីផលិតរឿងឱ្យកាន់តែល្អឡើងថែមទៀតនៅថ្ងៃខាងមុខ”។

គួររំឭកផងដែរថា អ្វីដែលកាន់តែពិសេសជាងនេះទៅទៀតនោះគឺ រឿងនេះធ្លាប់ត្រូវបានគណៈកម្មការវាយតម្លៃភាពយន្តអន្តរជាតិចេញលិខិតទទួលស្គាល់គុណភាពចំពោះខ្សែភាពយន្តមួយនេះ ហើយក៏ត្រូវបាននាយកដ្ឋានសិល្បភាពយន្ត និងផ្សព្វផ្សាយវប្បធម៌នៃក្រសួងវប្បធម៌ និងវិចិត្រសិល្បៈជ្រើសរើសធ្វើជាតំណាងភាពយន្តកម្ពុជាយកទៅចាក់បញ្ចាំងនៅមហោស្រពភាពយន្តអន្តរជាតិនៅប្រទេសចិននាពេលកន្លងមកដែរ៕

ភ្នំពេញ៖ ក្នុងជំនួបពិភាក្សាការងារជំនួញជាមួយឯកឧត្តម វេង សាខុន រដ្ឋមន្រ្តីក្រសួងកសិកម្មកម្ពុជាកាលពីថ្ងៃទី18 ខែកក្កដានេះ ឯកឧត្តម Beketzhan Zhumakhanov ឯកអគ្គរដ្ឋទូតនៃសាធារណរដ្ឋកាហ្សាក់ស្ថានប្រចាំនៅកម្ពុជា ឡាវ និងវៀតណាមបានបញ្ជាក់ថា ប្រទេសកាហ្សាក់ស្ថានមានបំណងទិញផ្លែស្វាយ និងដំណាំកសិកម្មដទៃមួយចំនួនទៀតដើម្បីយកទៅលក់បន្តនៅទីផ្សារសហគមន៍អឺរ៉ុប។

ឯកឧត្តមឯកអគ្គរដ្ឋទូតមានប្រសាសន៍ថា គោលបំណងនៃជំនួបរបស់លោក និងគណប្រតិភូនាពេលនេះ គឺដើម្បីពិភាក្សាលើការផ្លាស់ប្តូរជំនួញរវាងប្រទេសទាំងពីរលើវិស័យកសិកម្ម ព្រមទាំងស្នើសុំការណែនាំពីបែបបទ និងនីតិវិធីក្នុងការនាំចូល និងនាំចេញទំនិញរវាងប្រទេសទាំងពីរ។ ក្រៅពីនេះឯកឧត្តមឯកអគ្គរដ្ឋទូតក៏ចង់ស្វែងយល់ពីការស្នើសុំវិញ្ញាបនបត្រក្នុងការនាំចូលសាច់សត្វ និងមានបំណងនាំចេញផ្លែស្វាយ និងដំណាំផ្សេងទៀតពីកម្ពុជា ហើយទស្សនកិច្ចលើកនេះ លោកក៏មានបំណងពិនិត្យមើលនូវលទ្ធភាពនៃការសហការដៃគូជាមួយសហគ្រិនមួយចំនួនផងដែរ។

ឆ្លៀតក្នុងឱកាសនេះ ឯកឧត្តមឯកអគ្គរដ្ឋទូតក៏បានបង្ហាញពីមធ្យោបាយក្នុងការដឹកជញ្ជូនទំនិញរវាងប្រទេសទាំងពីរ ដោយប្រើប្រាស់រយៈពេលត្រឹមតែ14ថ្ងៃប៉ុណ្ណោះ ដោយត្រូវឆ្លងកាត់កំពង់ផែប្រទេសចិន ហើយក៏អាចប្រើប្រាស់កំពង់ផែនោះធ្វើការនាំផលិតផលនានាចេញទៅកាន់ទីផ្សារប្រទេសអឺរ៉ុបផងដែរ។

ជាការឆ្លើយតបឯកឧត្តមរដ្ឋមន្រ្តី វេង សាខុន បានថ្លែងស្វាគមន៏ចំពោះការចាប់ដៃគូសហការ និងផ្លាស់ប្តូរពាណិជ្ជកម្មរវាងប្រទេសទាំងពីរ។ ឯកឧត្តមរដ្ឋមន្រ្តីក៏បានបញ្ជាក់អំពីកសិផលដែលមានសក្តានុពលនាំចេញដែលរួមមានដូចជា ផ្លែស្វាយ និងម្រេច ដែលបច្ចុប្បន្នកំពុងប្រកាសរកទីផ្សារនាំចេញ។ ចំពោះបែបបទក្នុងការនាំចេញ-ចូល ឯកឧត្តមរដ្ឋមន្រ្តីបានស្នើឱ្យភាគីកាហ្សាក់ស្ថានបញ្ជូនមន្រ្តីជំនាញមកពិភាក្សាលម្អិតជាមួយមន្រ្តីជំនាញក្រសួងកសិកម្ម រុក្ខាប្រមាញ់ និងនេសាទអំពីបែបបទ និងនីតិវិធីក្នុងការនាំចេញ-ចូល និងពិនិត្យមើលនូវលក្ខខណ្ឌអនាម័យ និងភូតគាមអនាម័យ។

ជាមួយគ្នានេះដែរឯកឧត្តមរដ្ឋមន្រ្តីបានស្នើឱ្យឯកឧត្តមឯកអគ្គរដ្ឋទូតពិចារណាក្នុងការគាំទ្រដល់ការពង្រីកកំពង់ផែសមុទ្រ និងទឹកសាបនៅកម្ពុជាដើម្បីឈានទៅប្រកួតប្រជែងតម្លៃនៃការនាំចេញ និងបង្កើនល្បឿនទំហំពាណិជ្ជកម្មរវាងប្រទេសទាំងពីរ៕

ភ្នំពេញ៖ ទោះបីសេដ្ឋកិច្ចពិភពលោកកំពុងស្ថិតក្នុងភាពមិនប្រាកដប្រជាជាច្រើន ដែលរួមមានទាំងហានិភ័យ និងបញ្ហាប្រឈមទាំងក្នុងប្រទេសអភិវឌ្ឍន៍ និងប្រទេសកំពុងអភិវឌ្ឍន៍ ក៏សេដ្ឋកិច្ចកម្ពុជានៅតែអាចបន្តកំណើនខ្ពស់ និងរឹងមាំក្នុងរយៈពេលខ្លី និងមធ្យមនាពេលខាងមុខនេះដែរ។

ជាមួយនឹងសមិទ្ធផលនេះ ធនាគារអភិវឌ្ឍន៍អាស៊ីបានចាត់ទុកប្រទេសកម្ពុជា ជាប្រទេសមួយក្នុងចំណោមប្រទេសដែលមានកំណើនសេដ្ឋកិច្ចលឿនបំផុតនៅតំបន់អាស៊ី ហើយបានប្រសិទ្ធនាមប្រទេសកម្ពុជាថាជា “ខ្លាសេដ្ឋកិច្ចថ្មីនៅអាស៊ី” ទៀតផង។ ដោយក្នុងឆ្នាំ 2016 កន្លងទៅ កម្ពុជារក្សាបាននូវកំណើនសេដ្ឋកិច្ចក្នុងអត្រា 7.0% ដោយសារការងើបឡើងវិញនៃកំណើនក្នុងវិស័យកសិកម្ម បន្ទាប់ពីស្ទើរតែគ្មានកំណើនសោះក្នុងរយៈពេលបីឆ្នាំចុងក្រោយនេះ ខណៈដែលកំណើនវិស័យឧស្សាហកម្ម និងសេវាកម្មមានភាពថមថយបន្តិច។ ការថមថយនៃកំណើនក្នុងវិស័យឧស្សាហកម្ម និងសេវាកម្មនេះ បានបង្ហាញពីភាពចាំបាច់ និងបន្ទាន់នៃការអនុវត្តវិធានការគោលនយោបាយកែទម្រង់រចនាសម្ព័ន្ធសេដ្ឋកិច្ច និងការធ្វើពិពិធកម្មក្នុងគោលដៅស្វែងរកចន្ទល់ថ្មីៗដែលមានតម្លៃបន្ថែមខ្ពស់ដល់សេដ្ឋកិច្ច ដើម្បីបន្តធានាចីរភាពនៃកំណើនក្នុងរយៈពេលមធ្យម និងវែង។

យោងតាមទិន្នន័យស្ថិតិផ្លូវការដើមឆ្នាំ 2017 របស់ក្រសួង-ស្ថាប័នពាក់ព័ន្ធ សេដ្ឋកិច្ចកម្ពុជាក្នុងឆ្នាំ2017 ត្រូវបានប៉ាន់ប្រមាណថា នឹងរក្សាបានកំណើនក្នុងរង្វង់ 7,0%។ ក្នុងនោះវិស័យឧស្សាហកម្មនឹងនៅតែមានកំណើនរឹងមាំក្នុងអត្រាពីរខ្ទង់ដដែល ពោលគឺប្រមាណ 10,7% ដែលនឹងបន្តដើរតួនាទីជាក្បាលម៉ាស៊ីនជំរុញកំណើនសេដ្ឋកិច្ចទីមួយដឹកមុខដោយវិស័យកាត់ដេរ និងការរីកធំធាត់នៃវិស័យមិនមែនកាត់ដេរ បើទោះបីជាវិស័យសំណង់មានការថមថយបន្តិចក្តី។ វិស័យកសិកម្មអាចនឹងមានកំណើនល្អ ពោលគឺក្នុងអត្រា 2,0% បើប្រៀបធៀបនឹងឆ្នាំ 2016 ក្នុងអត្រា 1,8% ដោយសារកត្តាអាកាសធាតុដែលមានស្ថានភាពល្អប្រសើរជាងឆ្នាំមុន និងការងើបឡើងវិញនៃតម្លៃទំនិញ ខណៈដែលវិស័យសេវាកម្មអាចនឹងមានកំណើនយឺតជាងឆ្នាំមុនជាមួយនឹងអត្រាកំណើន 6,5% ដោយសារការបន្តថមថយនៃវិស័យទេសចរណ៍ និងអចលនទ្រព្យ។

ជាមួយនឹងកំណើនរឹងមាំក្នុងឆ្នាំ 2017 នេះ ផ.ស.ស ថ្លៃបច្ចុប្បន្នត្រូវបានប៉ាន់ប្រមាណថា នឹងកើនឡើងដល់ 22. 2 ប៊ីលានដុល្លារអាមេរិក ដែលធ្វើឱ្យ ផ.ស.ស សម្រាប់មនុស្សម្នាក់អាចនឹងកើនឡើងដល់ 1,434 ដុល្លារអាមេរិក។ លើសពីនេះ កម្ពុជាអាចរក្សាបាននូវអតិផរណា ដែលស្ថិតក្នុងកម្រិតទាប និងអាចគ្រប់គ្រងបាន ដោយអតិផរណាជាមធ្យមប្រចាំឆ្នាំត្រូវបានប៉ាន់ស្មានថា នឹងមានអត្រា 3,8% ក្នុងឆ្នាំ 2017 កើនពី 3,0% ក្នុងឆ្នាំ 2016 ដោយសារនិន្នាការកើនឡើងនៃតម្លៃប្រេងក្នុងទីផ្សារអន្តរជាតិ និងតម្លៃម្ហូបអាហារក្នុងស្រុក។ ជាមួយគ្នានេះដែរ អត្រាប្តូរប្រាក់នៅបន្តមានស្ថិរភាពជាមួយនឹងការរំពឹងទុកថា ប្រាក់រៀលនឹងនៅបន្តរក្សាបាននូវតម្លៃប្រមាណ 4,037 រៀលក្នុង 1ដុល្លារអាមេរិកនៅក្នុងឆ្នាំ 2017 នេះ៕

ភ្នំពេញ៖ ក្រសួងពាណិជ្ជកម្មកាលពីម្សិលមិញបានចេញគោលការណ៍ថ្មីមួយដោយហាមមន្រ្តីកាំក្រុងត្រូល និងមន្រ្តីគយនៅតាមច្រកព្រំដែនយកកម្រៃសេវាពីការនាំចេញកសិផលពោត ដើម្បីជាការសម្រួលកុំឱ្យតម្លៃពោតធ្លាក់ចុះ។

ការដាក់ចេញគោលការណ៏ថ្មីនេះ គឺជាការឆ្លើយតបនឹងការតវ៉ារបស់ប្រជាពលរដ្ឋជុំវិញការធ្លាក់ចុះតម្លៃពោតក្រហមពី 440រៀលមកត្រឹម 360រៀលក្នុងឆ្នាំ2017 នៅក្នុងស្រុកកំរៀង និងស្រុកភ្នំព្រឹក នៃខេត្តបាត់ដំបងកាលពីពេលថ្មីៗនេះ។

ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មបានមានប្រសាសន៍ក្នុងកិច្ចប្រជុំកាលពីរសៀលម្សិលមិញនេះ ដោយបានដាក់ចេញនូវគោលការណ៍មួយចំនួនគឺ៖
1. ភ្នាក់ងារគយនិងកាំកុងត្រូលត្រូវបញ្ឈប់ការយកកម្រៃលើការនាំចេញកសិផលពោតចាប់ពីថ្ងៃនេះតទៅ។ 2.ក្រសួងពាណិជ្ជកម្មនឹងចងក្រងរបាយការណ៍ដើម្បីស្នើសុំទៅប្រមុខរាជរដ្ឋាភិបាលនិងស្ថាប័នពាក់ព័ន្ធ ធ្វើការកាត់បន្ថយការបង់ប្រាក់ចំណាយក្រៅផ្លូវការឱ្យបាន100%។
3.ធនាគារអភិវឌ្ឍន៍ជនបទនឹងបើកចំហ និងត្រៀមខ្លួនដើម្បីធ្វើការជាមួយម្ចាស់សៃឡូដែលត្រូវការខ្ចីប្រាក់ដើម្បីទិញកសិផលពោត ឬធ្វើឡសម្ងួត និងពង្រីកឃ្លាំងស្តុកកសិផលជាដើម។ បច្ចុប្បន្នធនាគារពិភពលោកមានគោលការណ៍ប្រើប្រាស់ឥណទានរបស់ខ្លួនដែលមានទឹកប្រាក់សរុប27លានដុល្លារអាមេរិកជាមួយអត្រាការប្រាក់ពីចន្លោះ5% ទៅ7%ក្នុងមួយឆ្នាំ សម្រាប់វិស័យឯកជនជាមួយលក្ខណ្ឌការងារ។
4. ក្រុមហ៊ុនផលិតចំណីសត្វ CP នឹងប្រមូលទិញកសិផលពោតទៅតាមស្តង់ដារឱ្យបានល្អប្រសើរជាងមុន។
5.ក្រសួងសេដ្ឋកិច្ច និងហិរញ្ញវត្ថុនឹងសិក្សាបន្ថែមលើលទ្ធភាពបន្ធូរបន្ថយពន្ធលើប្រាក់ចំណេញសម្រាប់ទំនិញប្រភេទកសិផល។
6. អគ្គនាយកពាណិជ្ជកម្មក្រៅប្រទេស វិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ នាយកដ្ឋានអភិវឌ្ឍន៍ជនបទនៃក្រសួងពាណិជ្ជកម្មនឹងធ្វើការសិក្សាបន្ថែមលើការអនុវត្តយន្តការកិច្ចសន្យាកសិកម្ម (Contract Farming) រវាងក្រុមហ៊ុនផលិតចំណីសត្វ និងកសិករដាំពោត ដើម្បីធានាបានស្ថេរភាពតម្លៃទីផ្សារក្នុងស្រុក និងការផ្គត់ផ្គង់។

ក្នុងឱកាសនោះដែរ ឯកឧត្តម កៅ ថាច អគ្គនាយកធនាគារអភិវឌ្ឍន៍ជនបទ មានប្រសាសន៍ថា បច្ចុប្បន្នយើងមានថវិកាបម្រុងក្នុងដៃប្រមាណជា 27លានដុល្លារអាមេរិកដែលអាចប្រើប្រាស់បានលើការផ្តល់កម្ចីសម្រាប់កសិផលពោតជាបណ្តោះអាសន្នសិន ហើយនឹងមានបន្ថែមទៀតដែលអាចកើនដល់ប្រមាណជា 50លានដុល្លារ។

សូមបញ្ជាក់ថា តាមរបាយការណ៍ក្រសួងពាណិជ្ជកម្មបានឱ្យដឹងថា កាលពីឆ្នាំ2016កន្លងទៅ តម្រូវការនាំចេញពោតពីប្រទេសកម្ពុជាទៅកាន់ទីផ្សារពិភពលោកមានប្រមាណ10ម៉ឺនតោន ដែលមានតម្លៃស្មើនឹង 14លានដុល្លារអាមេរិក៕

សញ្ញា​នៃ​ការតាំង​គភ៌​មិន​មែនមាន​ត្រឹមតែ​ការ​ក្អួតចង្អោរ​ប៉ុណ្ណោះ​ទេ ព្រោះ​អាការ​របស់​អ្នកមាន​ផ្ទៃពោះ​ក្នុង​រយៈ​ដំបូង​អាច​មិន​ដូចគ្នា​ទាំងអស់​នោះទេ អ្នកខ្លះ​ចាញ់​ខ្លាំង ឬ​អ្នកខ្លះ​សឹងតែ​គ្មាន​អាការ​ចាញ់កូន​សោះ​ក៏មាន ឯ​អ្នក​ខ្លះទៀត​កើត​អាការប្លែកៗដែល​ធ្វើឱ្យ​យល់ច្រឡំ​ថា ជា​អាការ​ជំងឺ​អ្វីមួយ​ទៅវិញ ដូច្នេះ​នៅពេលនេះ ឡា​រ៉ែ​ន សូម​រួបរួម​អាការ​របស់​អ្នកមាន​ផ្ទៃពោះ​ក្នុងលក្ខណៈផ្សេងៗមក​ជម្រាប​ជូនជ្រាប ជាពិសេស​សម្រាប់នារីៗដែល​មិនទាន់មាន​បទពិសោធ​ក្នុងការ​តាំង​គភ៌​ដូចតទៅ។

1. បាត់​វដ្ត​រដូវ
បើ​វដ្ត​រដូវ​ប្រចាំខែ​ដែល​ធ្លាប់តែ​មកជា​ប្រក្រតី​មិនដែល​បាត់ តែ​ដល់​ពេលវេលា​ហើយ​នៅតែ​មិនឃើញ​មកទៀត​នោះ បញ្ជាក់ថា អ្នក​អាច​កំពុង​តាំង​គភ៌​ហើយ ព្រោះ​ក្រោយពី​ការចាប់បដិសន្ធិ វដ្ត​រដូវ​នឹង​បាត់​លែង​មក ដូច្នេះ ឡា​រ៉ែ​ន សូម​ណែនាំ​ឱ្យទៅ​ទិញ​ប្រដាប់​ពិនិត្យ​ការតាំង​គភ៌​មក​ធ្វើការ​ពិនិត្យមើល​ទើប​ប្រាកដ។

2. ក្អួតចង្អោរ
ជា​អា​ការដែល​ជួប​ញឹកញាប់​រហូត​ក្លាយជា​និមិត្តសញ្ញា​របស់​ការតាំង​គ​ភ៌​ក៏​អាច​ថា​បានដែរ។ អាការ​ក្អួតចង្អោរ​ច្រើនតែ​កើតឡើង​ក្រោយពី​តួ​កំណើត​ចាប់បដិសន្ធិ​បាន1ខែ តែ​អាការ​នេះ​នឹង​ថមថយ​ទៅវិញ​ពេល​ចូលដល់​ត្រីមាស​ទី2។

3. ធុំក្លិន​នេះ ធុំក្លិន​នោះ
អាការ​នេះ​បណ្តាលមកពី​អ័រម៉ូន អេស​ត្រូ​ជេន​កើនឡើង នារីៗដែល​កំពុង​តាំង​គភ៌​អាច​ក្លាយជា​មនុស្ស​ពូកែ​ច្រមុះ ធុំក្លិន​អ្វី​ក៏​ស្អុយ​រហូតដល់​ចង់តែ​ក្អួត​ទាំងអស់។ ពេល​ហ្នឹងហើយ​ដែល​ត​ឱ្យ​សាច់គោ​ឆា​ខាត់ណា​ដែលជា​អាហារ​សំណព្វចិត្ត​ក៏​លែង​ចង់​ដែរ។

4. ដើមទ្រូង​ហើម និង​ឈឺ
ដើមទ្រូង​របស់​អនាគត​អ្នក​ម្តាយ​ត្រីមាស​ដំបូង​អាច​នឹង​ហើម ព្រោះ​មាន​ឈាម​រត់​ចូលទៅ​ចិញ្ចឹម​នៅ​បរិវេណ​នោះ​ច្រើន​រហូត​មាន​អារម្មណ៍​
ថា ឈឺ​អួល រួមទាំង​មាន​អារម្មណ៍​ថា​ឆាប់​ដឹង​នៅពេល​ប៉ះ​នឹង​អ្វីមួយ​ស្រដៀង​នឹង​អាការ​មុន​មាន​វដ្ត​រដូវ​ដែរ។

5. ឆាប់​នឿយហត់
មាន​អារម្មណ៍​ថា នឿយ​ល្វើយ​ខ្លាំងណាស់ ទាំង​មិនបាន​ធ្វើ​អ្វី​សោះ​មែន​ទេ? មាន​អារម្មណ៍​ងងុយ​ងោក​ស្ងាប​ចង់​គេង​ពេញ​មួយថ្ងៃ​មែន​ទេ? នេះ​អាចជា​លទ្ធផល​បណ្តា​លពី​កម្រិត​អ័រម៉ូន​ប្រូ​ជេ​ស្ទើ​រ៉ូ​ន​ដែល​កើនឡើង​យ៉ាង​ឆាប់រហ័ស តែ​មិនចាំបាច់​កង្វល់​ទេ ព្រោះ​ចូលដល់​ត្រីមាស2 កម្លាំង​ថាមពល​របស់​អ្នកនឹង​ត្រឡប់មកវិញ​មិន​ខាន។

6. មាន​ឈាម​ចេញមក​តាម​រន្ធ​ស្បូន
អំឡុង​ពេលដែល​តួ​កំណើត​ទម្លាក់ខ្លួន​ចូលទៅក្នុង​ស្បូន អនាគត​អ្នក​ម្តាយ​មួយចំនួន​អាច​នឹងមាន​ឈាម​ហូរ​ចេញមក​តាម​រន្ធ​ស្បូន។ អាការ​នេះ​ច្រើន​កើតឡើង​ក្រោយពី​តួ​កំណើត​ចាប់បដិសន្ធិ​បាន11-12ថ្ងៃ (ពេល​ជាមួយគ្នា​នឹង​ពេលដែល​អ្នក​ចាប់ផ្តើម​សង្កេត​ដឹងថា​បាត់​វដ្ត​រដូវ)។ ឈាម​ដែល​ហូរ​ចេញមក​ច្រើន​មាន​ពណ៌ស្លេកៗឬ​ពណ៌​ផ្កាឈូក ហើយនឹង​ឈប់​ហូរ​ចេញមក​ក្នុង​រយៈពេល1-2ថ្ងៃ។ យ៉ាងណាក៏ដោយ បើ​អ្នក​ដឹងខ្លួន​ថា​តាំង​គភ៌​ហើយ និង​ឃើញថា​មាន​ឈាម​ហូរ​ចេញមក​តាម​រន្ធ​ស្បូន រួមជាមួយ​អាការ​ឈឺពោះផង​នោះ គួរ​ប្រញាប់​ទៅ​ជួប​គ្រូពេទ្យ​ជាបន្ទាន់ព្រោះ​អាចជា​សញ្ញា​នៃ​សភាវ​កូនក្រៅស្បូន​ក៏​អាច​ថា​បានដែរ។

7. ពោះ​ឡើង​ប៉ោង
ឈប់! កុំអាល​ភ្ញាក់ផ្អើល​អី អ្នក​នៅ​មិនទាន់​ក្លាយជា​ស្ត្រី​តាំង​គភ៌​ពោះ​ប៉ោង​មូល​តាំងពី​ត្រីមាស​ដំបូង​នោះទេ ក្បាលពោះ​ដែល​រាបស្មើ​របស់​អ្នកគ្រាន់តែ​រាង​ធំ​ចេញមក​បន្តិច និង​មាន​អារម្មណ៍​ថា ចង្កេះ​ខោ​រាង​ណែន​ជាង​មុន​បន្តិច​ប៉ុណ្ណោះ។

8. បត់ជើងតូច​ញឹកញាប់
អា​ការឈឺ​បត់ជើងតូច​ញឹកញាប់ ជា​រឿង​ប្រក្រតី​របស់​ស្ត្រី​ដែល​ចាប់ផ្តើម​មានគភ៌ ព្រោះ​រាងកាយ​នឹង​ផលិត​ឈាម​ទៅ​ចិញ្ចឹម​ផ្នែកផ្សេងៗកាន់តែ​ច្រើនឡើង ធ្វើឱ្យ​ក្រលៀន​បញ្ចេញ​កាកសំណល់​ក្នុង​រូប​ភាពជា​វត្ថុ​រាវ​ច្រើនឡើង​តាម​នោះដែរ។

9. មាន​អាការ​ទល់លាមក
មូលហេតុ​ដែលបណ្តាលមកពី​ការប្រែប្រួល​របស់​រាងកាយ​នៅពេល​មានការ​តាំង​គភ៌ ធ្វើឱ្យ​ការ​ច្របាច់​ខ្លួន​របស់​ពោះវៀន​ថយចុះ ស្បូន​អាច​នឹង​ទៅ​សង្កត់​លើ​ពោះវៀនធំ។ ការកែ​បញ្ហា​រឿង​ទល់លាមក​នៅពេល​តាំង​គភ៌​នេះ​គឺ ព្យាយាម​ទទួលទាន​អាហារ​ដែលមាន​ជាតិ​កាក​សរសៃ​ច្រើន(បន្លែ​ផ្លែឈើ) ទទួលទាន​ទឹកច្រើនៗ និង​ហាត់ប្រាណបន្តិចៗល្មម​សមរម្យ នឹង​ជួយ​កែ​បញ្ហា​រឿង​ទល់លាមក​នេះ​បាន។

បើ​វដ្ត​រដូវ​របស់​អ្នក​មក​មិន​ប្រក្រតី​ស្រាប់​ហើយ ឬ​មិន​ចាំ​ថា មាន​វដ្ត​រដូវ​លើកចុងក្រោយ​នៅពេលណា​នោះ អាការ​ទាំងអស់​ខាងលើ​គឺជា​កត្តា​ជួយ​បញ្ជាក់​ប្រាប់ថា អ្នក​អាច​កំពុង​តាំង​គភ៌​ហើយ ចូរ​សាកល្បង​ទៅ​ទិញ​ប្រដាប់​ពិនិត្យ​គភ៌​មក​ពិនិត្យមើល បើ​លទ្ធផល​ចេញមក​វិជ្ជមាន សូម​កុំអាល​ស្រែក​ប្រកាសប្រាប់​នរណា តែ​ចូរ​ទូរស័ព្ទ​ទៅ​ណាត់​គ្រូពេទ្យ ដើម្បី​ពិនិត្យ​ឱ្យ​ប្រាកដ​ម្តងទៀត​ទើប​ជាការ​ល្អ​បំផុត៕