ទិញ-លក់

ភ្នំពេញៈ មន្ត្រីជាន់ខ្ពស់​នៃ​ក្រសួង​សាធារណការ និង​ដឹកជញ្ជូន​បាន​លើកឡើងថា គម្រោង​សាងសង់​ស្ពាន​របស់​រដ្ឋា​ភិ​បាល​ទៅកាន់​តំបន់​អរិយ​ក្សត្រ និង​តំបន់​ស្វាយជ្រុំ​អាចមាន​ការប្រែប្រួល។ លោក វ៉ា ស៊ីម​សូរិយា អ្នកនាំពាក្យ​ក្រសួង​សាធារណការ និង​ដឹកជញ្ជូន​បាន​ថ្លែង​ឲ្យ​ដឹង​តាម​ទូរស័ព្ទ​កាលពី​ព្រឹក​ថ្ងៃទី11 ខែសីហា​ម្សិលមិញ​នេះ​ថា ការសាងសង់​ស្ពាន​ភ្ជាប់​រវាងផ្លូវ​ជាតិ​លេខ1ពី​តំបន់​ក្តី​តា​កុយ​ទៅកាន់​តំបន់​អរិយ​ក្សត្រ និង​ពី​តំបន់​ជ្រោយចង្វារ​ទៅ​តំបន់​ស្វាយជ្រុំ​នឹងមាន​ការប្រែប្រួល ប៉ុន្តែ​លោក​មិនបាន​បញ្ជាក់​ពី​ព័ត៌មាន​លម្អិត​នោះទេ។ លោក​បន្តថា “ខ្ញុំ​មិនទាន់​បានទទួល​ព័ត៌មាន​លម្អិត​ទាក់ទង​នឹង​គម្រោង​នេះ​ទេ ព្រោះ​រហូតមកទល់​ពេលនេះ​មិនទាន់មាន​ព័ត៌មាន​វិវឌ្ឍន៍​ថ្មី​នៅឡើយ។ លោក នូ វឌ្ឍនៈ អគ្គនាយក​បច្ចេកទេស​នៃ​ក្រសួង​សាធារណការ និង​ដឹកជញ្ជូន​បាន​ថ្លែងថា ក្រុមហ៊ុន​ចិន​កំពុង​សិក្សា​ពី​ទីតាំង​សម្រាប់​សាងសង់​ស្ពាន​នេះ ប៉ុន្តែ​ការកំណត់​សាងសង់​ជា​ផ្លូវការ​នៅពេលណា​នោះ​នៅ​មិនទាន់​កំណត់​ជាក់លាក់​នៅឡើយ​ទេ ប៉ុន្តែ​វា​ជា​គម្រោង​នាពេល​អនាគត ដែល​ត្រូវតែ​សាងសង់។ លោក​បន្តថា គម្រោង​នេះ​មិនទាន់​ស្ថិតនៅក្នុង​ផែនការ​ជាក់លាក់ ឬ​ដាក់ចូល​ផែនការមេ​របស់​ក្រសួង​ថា នឹង​សាងសង់​នៅពេលណា​នោះទេ ព្រោះ​យើង​រង់ចាំ​ជំនួយ​របស់​ប្រទេស​ចិន។ ក្នុងឱកាស​អញ្ជើញ​សម្ពោធ​បើក​ឲ្យ​ប្រើប្រាស់​មហាវិថី​សម្តេច​តេ​ជោ​ហ៊ុន សែន ដែល​គេ​ហៅ​រត់មាត់​ថា ផ្លូវ60ម៉ែត្រ​នោះ សម្តេច​តេ​ជោ​ហ៊ុន សែន​បាន​ថ្លែងថា ដើម្បី​ឲ្យ​ការសាងសង់​នឹង​ភ្ជាប់​ផ្លូវ​ខ្សែក្រវាត់​ក្រុង​ពេញលេញ កម្ពុជា​ចាំបាច់​ត្រូវ​សាងសង់​ស្ពាន​ភ្ជាប់​រវាង​តំបន់​ក្តី​តា​កុយ​ទៅកាន់​តំបន់​អរិយ​ក្សត្រ និង​ពី​ផ្លូវ​កែវ ចិន្តា នា​តំបន់​ជ្រោយចង្វារ ភ្ជាប់​ទៅកាន់​តំបន់​ស្វាយជ្រុំ ស្ថិតក្នុង​ឃុំ​ស្វាយជ្រុំ ស្រុក​ល្វាឯម ខេត្តកណ្តាល។ ការប្រកាស​ពី​ការសាងសង់​ស្ពាន​នេះ​បានធ្វើ​ឲ្យ​តម្លៃ​ដី​នៅ​តំបន់​ទាំងនោះ​កញ្ជ្រោល​ឡើង​យ៉ាងខ្លាំង ហើយ​ក៏មាន​អ្នកវិនិយោគ​ក្នុងស្រុក​មួយចំនួន​បាន​សាងសង់​បុរីខ្លះៗរួចហើយ​ដែរ​នៅ​តំបន់​នោះ៕

ភ្នំពេញៈ ការសិក្សាស្រាវជ្រាវថ្មីមួយបានរកឃើញថាខណ្ឌចំនួន9​ក្នុងចំណោមខណ្ឌទាំង12នៅរាជធានីភ្នំពេញ មានអាផាតមិនចំនួន​7,020យូនីត​បាន និងកំពុងដាក់ដំណើរការនៅក្នុងទីផ្សារ។ តាមរយៈការសិក្សារបស់ក្រុមហ៊ុនប៊ុណ្ណារៀលធីគ្រុបដែលបានបញ្ចប់​របាយការណ៍​បឋមកាលពីពេលថ្មីៗនេះបានឲ្យដឹងថាគិតត្រឹម​ដំណាច់ឆមាស​ទី1ឆ្នាំនេះមានអាផាតមិនចំនួន7,020យូនីតកំពុងដំណើរការ និងអាផាតមិន​មួយចំនួនទៀតបាន និងកំពុងសាងសង់។ ខណ្ឌដែលមានអាផាតមិន​ច្រើន​ជាង​គេមានដូចជាខណ្ឌចំការមនមានអាផាតមិនសរុបចំនួន3,800យូនីត ដូនពេញ​ចំនួន880យូនីតទួលគោកចំនួន870យូនីត 7មករាចំនួន620យូនីត និងខណ្ឌសែនសុខមានចំនួន230យូនីតជាដើម។ ការសិក្សាដដែលបានរកឃើញថា តម្លៃជួលអាផាតមិនមិនបានថយ​ចុះ​នោះ​ទេទោះជាមានការផ្គត់ផ្គង់កើនឡើងក្តី ព្រោះតម្រូវការពីអ្នក​ប្រើប្រាស់​នៅ​បន្ត​កើនឡើងដែលធ្វើឲ្យបន្ទប់​ជួលនៅតាមអាផាតមិនមានតម្លៃ​នៅតែខ្ពស់​ដូចជា​​អាផាតមិន​កម្រិតAមួយបន្ទប់គេងមានតម្លៃ​ចន្លោះ​ពី800​ទៅ2,000ដុល្លារ និងអាផាតមិនបែបស្ទូឌីយោមានតម្លៃចន្លោះ៦៥០ ទៅ១៨០០ដុល្លារអាមេរិកក្នុង​មួយខែ។ លោកឧកញ៉ា នួន រិទ្ធី អគ្គនាយកក្រុមហ៊ុនKFAដែលបានវិនិយោគ​អាផាតមិនចំនួនមួយអគារនៅតំបន់បឹងត្របែកបានថ្លែងថាទីផ្សារអាផាតមិន​នៅតែមានភាពល្អប្រសើរនៅឡើយ ទោះបីជាការប្រកួតប្រជែងកើនឡើងក្តីប៉ុន្តែតម្រូវការ​អាផាតមិននៅតែមានកម្រិតខ្ពស់ ទោះជាការផ្គត់ផ្គង់កំពុង​បន្តកើន​ឡើងក៏ដោយ៕

ភ្នំពេញៈ ការប្រកួតប្រជែងក្នុងបរិបទទីផ្សារសេរី និងចរន្តនៃការមកដល់នូវផ្សារទំនើបធំៗកាន់តែច្រើនបានធ្វើឲ្យផ្សារបែបប្រពៃណី និងផ្សារចាស់ៗក្នុងស្រុកកាន់តែស្ងប់ស្ងាត់។ តាមរយៈការសិក្សារបស់ក្រុមហ៊ុនប៊ុណ្ណារៀលធីគ្រុបដែលបានបញ្ចប់កាលពីពេលថ្មី​ៗនេះបានរកឃើញថា ផ្សារបែបប្រពៃណីលក់រាយ ដូចជាផ្សារអូឡាំពិក ផ្សារអូរឫស្សី ផ្សារទួលទំពូង​ និងផ្សារធំថ្មីជាដើមបាន និងកំពុងប្រឈមនឹងការប្រកួតប្រជែងកាន់តែខ្លាំង និងធ្វើឲ្យផ្សារទាំងនោះកាន់តែស្ងប់ស្ងាត់ទៅៗ។ ការសិក្សាដដែលបានរកឃើញថាការថយចុះនូវចំនួនភ្ញៀវ គឺមួយផ្នែកដោយសារបញ្ហាហេដ្ឋារចនាសម្ព័ន្ធ ចំណតយានយន្ត​ និងការរចនាម៉ូដរបស់ផ្សារមិនមានភាពទាក់ទាញ និងមួយផ្នែកទៀតដោយ​​សារការកើនឡើងនូវវត្តមានផ្សារទំនើបនានាកាន់តែច្រើន។ ការសិក្សាដដែលបានរកឃើញទៀតថា ការថមថយនូវការលក់នេះមួយផ្នែកក៏ដោយសារតែក្រុមហ៊ុនរបស់ថៃធំៗ និងក្រុមហ៊ុនដទៃទៀតបានពង្រីកការលក់ផលិត​ផលរបស់ពួកគេទៅដល់តាមបណ្តាស្រុកនៅតាមខេត្តនានាដែលធ្វើឲ្យចំនួនអ្នក​មកទិញទំនិញនៅក្រុងភ្នំពេញធ្លាក់ចុះផងដែរ។ លោក ប៉ែន សុខគា ប្រធានផ្នែកវាយតម្លៃនៃក្រុមហ៊ុនប៊ុណ្ណារៀលធីគ្រុបបានថ្លែងឲ្យដឹងថាមិនត្រឹមតែផ្សារបែបប្រពៃណីទេ សូម្បីតែផ្សារទំនើបតូចៗដូចជា City Mall, Sovanna Mall, Sorya shopping Mall និងផ្សារទំនើបដទៃទៀតក៏មាន​សភាពស្ងប់ស្ងាត់ផងដែរ។ លោកបន្តថាការផ្គត់ផ្គង់ផ្សារលំដាប់អន្តរជាតិធំៗនៅឆ្នាំ2018ខាងមុខក៏នឹងក្លាយជាផ្នែកមួយដែលធ្វើឲ្យមានការព្រួយបារម្ភផងដែរ ដោយសារកម្លាំងនៃការទិញមិនសូវមានការប្រែប្រួលជាដុំកំភួនប៉ុន្មាននោះទេ៕

ភ្នំពេញៈ ទំហំអគារការិយាល័យ និងតម្រូវការប្រើប្រាស់អគារការិ​យាល័យបាន និងកំពុងកើនឡើងព្រមគ្នាស្របពេលការផ្គត់ផ្គង់អគារការិ​យាល័យបានកើនឡើងរហូតដល់ជិត1លានម៉ែត្រការ៉េនៅក្នុងរាជធានីភ្នំពេញ។ យោងតាមការសិក្សារបស់ក្រុមហ៊ុនប៊ុណ្ណារៀលធីគ្រុបដែលបានបញ្ចប់កាលពីពេលថ្មីៗនេះបានឲ្យដឹងថា គិតរហូតមកដល់ដំណាច់ឆមាសទី1ឆ្នាំនេះ ទំហំអគារការិយាល័យកម្រិតAកើនឡើងជាង34ម៉ឺនម៉ែត្រការ៉េ ការិយាល័យប្រភេទBកើនឡើងជាង30ម៉ឺនម៉ែត្រការ៉េ និងទំហំការិ​យាល័យកម្រិតC មានទំហំកើនឡើងដល់ជាង20ម៉ឺនម៉ែត្រការ៉េ។ តម្លៃ​ការិយាល័យកម្រិតA មានតម្លៃចន្លោះពី30ទៅ40ដុល្លារការិយា​ល័យកម្រិតBមានតម្លៃចាប់ពី12ទៅ30ដុល្លារ និងការិយាល័​យកម្រិតCមានតម្លៃចាប់ពី8ទៅ12ដុល្លារក្នុងមួយម៉ែត្រការ៉េ។ ការសិក្សាដដែលបានរកឃើញថា តម្រូវការការិយាល័យធ្វើការបន្តកើនឡើងដោយសារការមកដល់នូវក្រុមហ៊ុនថ្មីៗកាន់តែច្រើន ដែលបានធ្វើឲ្យតម្លៃជួលមានកំណើនចន្លោះពី5ទៅ10ភាគរយផងដែរ។ លោក ប៉ែន សុខគានាយកផ្នែកវាយតម្លៃនៃក្រុមហ៊ុនប៊ុណ្ណារៀលធីគ្រុបបានថ្លែងឲ្យដឹងតាមទូរស័ព្ទនាព្រឹកថ្ងៃទី8 សីហានេះថា ទីផ្សារការិយាល័យនៅតែមានភាពល្អប្រសើរដោយសារការផ្គត់ផ្គង់មិនទាន់​លើសតម្រូវការនោះទេហើយការចូលមកដល់នៃក្រុមហ៊ុនថ្មីៗបានធ្វើឲ្យតម្រូវការជួលការិយាល័យមានការកើនឡើង។ លោកបន្តថាវិស័យនេះ​នៅតែបង្ហាញសញ្ញារឹងមាំ និងជាពេលវេលាល្អសម្រាប់ការវិនិយោគ។ ការវិនិយោគអគារការិយាល័យជាការវិនិយោគល្អមួយព្រោះអគារការិយាល័យមានតម្រូវការច្រើន ហើយការវិនិយោគលើអគារបែបនេះមិនសូវចំណាយប្រាក់ច្រើនលើការរចនាផ្នែកខាងក្នុងអគារនោះទេ៕

ភ្នំពេញៈ ខុនដូតម្លៃទាបមួយដែលគ្រោងវិនិយោគទឹកប្រាក់ជាង 10លានដុល្លារអាមេរិកគ្រោងនឹងចាប់ផ្តើមសាងសង់នៅចុងសប្តាហ៍នេះហើយ។ លោក ទុយ ប៊ុន ភាគហ៊ុនិកក្រុមហ៊ុនលំនៅដ្ឋាន L កម្ពុជាភ្នំពេញ បានថ្លែងឲ្យដឹងតាមទូរស័ព្ទនារសៀលថ្ងៃទី7 ខែសីហានេះថា ការសាងសង់គ្រឹះរបស់ខុនដូកម្ពស់ 24ជាន់នេះនឹងចាប់ផ្តើមនៅថ្ងៃទី13 ខែសីហាខាងមុខនេះ និងគ្រោងបញ្ចប់ការសាងសង់ក្នុងរយៈពេល 3ឆ្នាំ។ ខុនដូនេះមានទីតាំងនៅតាមបណ្តោយផ្លូវចូលវត្តដំបូកខ្ពស់ ក្នុងសង្កាត់បឹងទំពុន រាជធានីភ្នំពេញ។ លោកបន្តថា ខុនដូនេះជាប្រភេទខុនដូមានតម្លៃទាបដែលមានមួយបន្ទប់គេង និងពីរបន្ទប់គេង និងលក់ក្នុងតម្លៃ800ដុល្លារក្នុងមួយម៉ែត្រការ៉េ។ លោកបន្តថា “ខ្ញុំមិនព្រួយបារម្ភពីការលក់ទេ ព្រោះយើងមានអតិថិជនក្នុងដៃស្រាប់ ហើយបើលក់មិនដាច់ក៏ក្រុមហ៊ុនអាចប្រើប្រាស់ជាអគារសម្រាប់ជួលផងដែរ”។ ខុនដូនេះមានចំណតយានយន្តចំនួន6ជាន់ និងមានក្លឹបហាត់ប្រាណ Sky Bar ភោជនីយដ្ឋាន និងក្លិបហាត់ប្រាណនៅជាន់ទី24។ នេះជាគម្រោងទី6របស់ក្រុមហ៊ុនលំនៅដ្ឋានអឹល កម្ពុជាភ្នំពេញ។ ការទិញលក់ខុនដូនៅកម្ពុជាកំពុងចាប់ផ្តើមមានការកើនឡើង ពិសេសខុនដូសម្រាប់ប្រជាជនមានជីវភាពមធ្យម។ តាមការសិក្សារបស់ក្រុមហ៊ុនប៊ុណ្ណារៀលធីគ្រុប ដែលទើបបញ្ចប់កាលពីពេលថ្មីៗនេះបានរកឃើញថា ការលក់ខុនដូបានកើនពី60ភាគរយកាលពីឆ្នាំមុន ដល់61ភាគរយនៅក្នុងឆមាសទី1ឆ្នាំនេះ ធៀបរយៈពេលដូចគ្នាកាលពីឆ្នាំមុន ខណៈចំនួនខុនដូផ្គត់ផ្គង់ចូលទីផ្សារបានកើនឡើងជាង477,000យូនីត៕

ភ្នំពេញ៖ វឌ្ឍនភាពនៃវិស័យសំណង់បានបន្តកើនឡើងខ្លាំងនៅឆមាសទី1​ ឆ្នាំ2017នេះ ដោយសារកត្តាសេ្ថរភាពនយោបាយ​ ស្ថេរភាពនៃម៉ាក្រូសេដ្ឋកិច្ច កំណើនតម្រូវការលំនៅដ្ឋានរបស់ប្រជាពលរដ្ឋ និងកំណើននៃលំហូរចូលវិនិយោគបរទេសនៅក្នុងវិស័យសំណង់។ របាយការណ៍វឌ្ឍនភាពវិស័យសំណង់ត្រូវបានឆ្លុះបញ្ចាំងតាមរយៈការនាំចូលសម្ភារសំណង់និងគម្រោងវិនិយោគសំណង់នានាដែលនៅក្នុងឆមាសទី1 ឆ្នាំ2017នេះ។ ការនាំចូលសម្ភារសំណង់បានកើនឡើងវិញប្រមាណ34% ខ្ពស់ជាងកំណើន22% ហើយការនាំចូលស៊ីម៉ងត៍មានកំណើន 10%វិញ បន្ទាប់ពីបានធ្លាក់ចុះ40% កាលពីរយៈពេលដូចគ្នានៅឆ្នាំ2016។ ម្យ៉ាងទៀតគម្រោងវិនិយោគក្នុងវិស័យ​សំណង់បន្តមានសេ្ថរភាពល្អប្រសើរ ដោយគម្រោងដែលមានការអនុញ្ញាតកើនឡើង 28.7% ដល់ចំនួន 1,523 គម្រោង ស្របពេលតម្លៃវិនិយោគដែលបានអនុម័តបានកើនឡើង 27% ដល់ជិត 5ប៊ីលានដុល្លារអាមេរិក។ ចាប់ពីឆ្នាំ2016មក សមាមាត្រនៃគម្រោងសំណង់លំនៅដ្ឋានធៀបនឹងគម្រោងអនុម័តសរុប មាននិន្នាការថយចុះ ខណៈដែលសមាមាត្រគម្រោងលំនៅដ្ឋានពាណិជ្ជកម្ម និងទេសចរណ៍ មាននិន្នាការកើនឡើងជាបន្តបន្ទាប់ ដោយវិនិយោគិនបានបង្វែរមកពីការវិនិយោគអគារការិយា ល័យ ផ្សារទំនើប មជ្ឈមណ្ឌលពាណិជ្ជកម្ម និងសណ្ឋាគារជាដើមវិញ។ កំណើននៃសំណង់លំនៅដ្ឋាន និងទេសចរណ៍នេះបានរួមចំណែក និងគាំទ្រដោយគម្រោងសង់ថ្មីៗ ដូចជាសណ្ឋាគារ ខុនដូ ដែលកំពុងតែផុលផុសនៅខេត្តព្រះសីហនុដើម្បីបំពេញតាមតម្រូវការ នៃកំណើនភ្ញៀវទេសចរទៅកាន់តំបន់នោះ ដែលជាមធ្យមកើនឡើងប្រមាណជា 10% ក្នុងឆមាសទី1 ឆ្នាំ2017។ ជាក់ស្តែងខុនដូខ្ពស់ជាងគេ (The Seagate Suit) ដែលមានតម្លៃ 200លានដុល្លារអាមេរិក វិនិយោគរួមគ្នារវាងក្រុមហ៊ុនក្នុងស្រុក និងហុងកុង … Read more

បន្ទាប់ពីលើកពេលជួសជុលម្តងជាពីរដងរួចមកនោះ ក្រសួងសាធារណការ និងដឹកជញ្ជូន បានប្រកាសសាជាថ្មីថា ស្ពានជ្រោយចង្វាចាស់នេះនឹងត្រូវជួសជុលឡើងវិញនៅពាក់កណ្តាលខែកញ្ញា ឆ្នាំ2017នេះក្រោមជំនួយឥតសំណងរបស់រដ្ឋាភិបាលជប៉ុន។ ការប្រកាសនេះធ្វើឡើងក្នុងជំនួបរវាងឯកឧត្ដម តូច ចានកុសល រដ្ឋលេខាធិការក្រសួងសាធារណការ និងដឹកជញ្ជូនដែលបានដឹកនាំគណៈប្រតិភូក្រសួងទៅចុះហត្ថលេខាលើកិច្ចព្រមព្រៀងមួយស្ដីពីគម្រោងស្ដារស្ពានជ្រោយចង្វាឡើងវិញរវាងក្រសួងសាធារណការ និងដឹកជញ្ជូនកម្ពុជា និងក្រុមហ៊ុនសាជីវកម្ម អូបាយ៉ាស៊ិ ជប៉ុន (Obayashi Corporation of Japan) កាលពីថ្ងៃទី25 ខែកក្កដា ឆ្នាំ2017 នៅទីក្រុងតូក្យួ។ យ៉ាងណាគេនៅមិនទាន់ដឹងច្បាស់នៅឡើយទេថា គម្រោងស្តារជួសជុលស្ពានជ្រោយចង្វាឡើងវិញនេះនឹងត្រូវចំណាយថវិកា និងប្រើពេលវេលាយូរប៉ុនណានោះទេ ប៉ុន្តែបើតាមប្រសាសន៍របស់ឯកឧត្តម វ៉ា ស៊ឹមសូរិយា អ្នកនាំពាក្យក្រសួងសាធារណការ និងដឹកជញ្ជូនឱ្យដឹងថា គម្រោងជួសជុលស្ពានជ្រោយចង្វាចាស់នេះនឹងត្រូវចំណាយថវិកាប្រហែលជា 20លានដុល្លារអាមេរិក និងត្រូវចំណាយពេលប្រហែលជា 2 ឆ្នាំ។ គួរបញ្ជាក់ថា នៅក្នុងអំឡុងពេលជួសជុលខាងមុខ ស្ពានជ្រោយចង្វាចាស់នឹងត្រូវបិទផ្អាកការធ្វើដំណើរជាបណ្តោះអាសន្ន និងដាក់ឱ្យដំណើរការស្ពានថ្មីតែមួយប៉ុណ្ណោះ។ ប៉ុន្តែយ៉ាងណានោះតាមគម្រោងសាលារាជធានីភ្នំពេញនឹងសាងសង់ស្ពានបាឡេថ្មីមួយនៅចំណុចក្បែឃ្លាំងសាំងសូគីមិច ក្នុងខណ្ឌឬស្សីកែវឆ្ពោះទៅត្រើយខាងកើតដើម្បីដាក់ឱ្យធ្វើដំណើរចៀសវាងការកកស្ទះនៅពេលជួសជុលស្ពានជ្រោយចង្វាចាស់នេះ៕

ភ្នំពេញ – រហូតមកដល់ពេលនេះគេសង្កេតឃើញថា គ្រឿងចក្រកំពុងតែបន្ដការគាស់កាយ វាយរំលំអគារប៊ុលឌិងសស្ថិតនៅក្នុងសង្កាត់ទន្លេបាសាក់ និងក៏មានអ្នកអភិវឌ្ឍន៍ជាច្រើនកំពុងតែចាប់អារម្មណ៍ទៅលើតំបន់នេះខ្លាំងដែរ។ តើក្រោយពីមានការអភិវឌ្ឍនៅប្លុកប៊ុលឌិងនេះហើយ តើស្ថានភាពអចលនទ្រព្យនឹងវិវឌ្ឍទៅជាយ៉ាងណា?។ លោក វ៉ន ចាន់ថន នាយកប្រតិបត្ដិនៃក្រុមហ៊ុនថោនស៊ីធី រៀលអ៊ីស្ទេត ខូអិលធីឌីបានលើកឡើងថា នៅក្នុងតំបន់ទន្លេបាសាក់គឺជាទីតាំងមួយមានការរីកចម្រើនលើវិស័យអចលនទ្រព្យជាយូរមកហើយ។ បើទោះជាសព្វថ្ងៃនេះនៅក្នុងសង្កាត់ទន្លេបាសាក់មានគម្រោងលំនៅឋានច្រើនហើយក៏ដោយ ក៏ទៅអនាគតអ្នកអភិវឌ្ឍន៍នឹងងាកទៅរកគម្រោងខុនដូវិញជាមិនខាន ដោយសារគម្រោងលំនៅឋាននៅកណ្ដាលក្រុងអាចនឹងមានការកំណត់ ព្រោះបើយើងសិក្សាទៅលើតម្លៃដីនៅក្នុងតំបន់នេះ គឺវាមានតម្លៃថ្លៃ។ ការរស់នៅក្នុងគម្រោងខុនដូ វាបង្ហាញឱ្យឃើញពីការរស់នៅបែបទំនើប ស៊ីវិល័យ និងមានផាសុកភាព ម្យ៉ាងទីតាំងនេះវាស្ថិតនៅចំកណ្ដាលក្រុងនៅជិតសាលារៀនអន្ដរជាតិ មន្ទីរពេទ្យ ផ្សារទំនើបជាដើម ងាយស្រួលដល់អ្នករស់នៅទីនោះក្នុងការស្វែងរកសេវាកម្មនានាដែលនៅជិតខ្លួន។ អគ្គនាយកនៃនាយកប្រតិបត្ដិក្រុមហ៊ុនថោនស៊ីធី រៀលអ៊ីស្ទេត ខូអិលធីឌីបន្ដថា ក្រោយពីអគារប៊ុលឌិងស វាយរំលំ និងអភិវឌ្ឍទៅជាអគារមួយថ្មី យើងជឿថានឹងធ្វើឱ្យសង្កាត់ទន្លេបាសាក់កាន់តែរីកមុខរីកមាត់ខ្លាំងបន្ថែមទៀតតាមរយៈការបង្ហាញឱ្យឃើញនូវសោភ័ណភាពថ្មី និងការរីកចម្រើនលើវិស័យអចលនទ្រព្យ។ លោកបញ្ជាក់ថា៖«កន្លងមកយើងមើលឃើញថា នៅក្នុងប្លុកប៊ុលឌិងសហាក់បង្ហាញពីរូបភាពមិនសូវល្អចេញទៅខាងក្រៅតាមរយៈការរស់នៅគ្មានផាសុកភាព និងបរិស្ថានមិនល្អ ។ ប្រសិនបើវាយអគារចាស់ចោលសង់អគារថ្មី វារឹតតែធ្វើឱ្យមានទិដ្ឋភាពស្រស់ស្អាតទាក់ទាញបន្ថែមទៀត»។ ពាក់ព័ន្ធនឹងស្ថានភាពនៃតម្លៃដី ត្រូវបានលោក វ៉ន ចាន់ថន ប្រាប់ថា បច្ចុប្បន្នដីមានតម្លៃថ្លៃស្រាប់ទៅហើយ ដូច្នេះនៅពេលមានការអភិវឌ្ឍបន្ថែមទៀតវានឹងបន្ដឡើងទៅទៀត ព្រោះតំបន់នេះទាក់ទាញចំណាប់អារម្មណ៍ខ្លាំងក្នុងការវិនិយោគ ពិសេសដីនៅទីនោះកាន់តែចង្អៀតសម្រាប់អ្នកអភិវឌ្ឍន៍ តែលោកជឿថា តម្លៃដីវានឹងមិនឡើងថ្លៃគំហុកទេ វាអាចឡើងទៅតាមក្រាហ្វិក។ ដោយឡែកលោក … Read more

ភ្នំពេញ – ដើម្បីរៀបចំឱ្យមានដំណើរការនៃការគ្រប់គ្រងល្អទៅលើសកម្មភាពការងារលើវិស័យស្ថាបត្យកម្ម គ្រាដែលមានស្ថាបត្យករបរទេសកំពុងតែមកបម្រើការងារនៅកម្ពុជាដែរនោះ បច្ចុប្បន្នក្រសួងរៀបចំដែនដី នគរូបនីយកម្ម និងសំណង់បាននិងកំពុងតែត្រៀមរៀបចំឱ្យមានការចុះបញ្ជីជាលក្ខណៈផ្លូវច្បាប់សម្រាប់ស្ថាបត្យករដែលជាជនបរទេស។ ឯកឧត្ដម ភឿង សោភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានលើកឡើងថា ដោយសារតែមានភាពរីកចម្រើនលើវិស័យស្ថាបត្យកម្ម ទើបបច្ចុប្បន្នកម្ពុជាក៏មានស្ថាបត្យករបរទេសមករកស៊ីធ្វើការងារនៅទីនេះដែរ និងដើម្បីរៀបចំឱ្យមានការគ្រប់គ្រងល្អទៅលើប្រព័ន្ធការងាររបស់ស្ថាបត្យករទាំងនោះ គណៈស្ថាបត្យករកម្ពុជាកំពុងតែត្រៀមរៀបចំឱ្យស្ថាបត្យករបរទេសដែលមកប្រកបការងារនៅក្នុងប្រទេសកម្ពុជាត្រូវបានចុះបញ្ជីជាលក្ខណៈផ្លូវច្បាប់នៅក្នុងគណៈស្ថាបត្យករកម្ពុជាដែលវាស្របទៅនឹងទិសដៅដែលអាស៊ានចង់បាន។ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានបន្ដថា៖ «អ្វីដែលអាស៊ានចង់បាន គឺចង់ឱ្យមានការគ្រប់គ្រង និងចរាចរណ៍ស្ថាបត្យករទាំងអស់នៅក្នុងប្រទេសទាំង10 អាស៊ានដែលមានប្រទេសកម្ពុជាយើងមួយដែរ ព្រោះនៅពេលគណៈស្ថាបត្យកររបស់ប្រទេសយើងបានធ្វើសមាហរណកម្មជាមួយគ្នានឹងអាស៊ានរួចហើយយើងក៏អាចទៅធ្វើការងារនៅប្រទេសទាំង10 នោះបានដែរ»។ ទោះយ៉ាងណាឯកឧត្ដមបញ្ជាក់ថា កុំឱ្យស្ថាបត្យករក្នុងស្រុកមានការបារម្ភ គេអាចគ្រប់គ្រងយើងបាន យើងក៏មានសិទ្ធិគ្រប់គ្រងគេបានដែរ ព្រោះការងារទាំងនេះវាអាស្រ័យទៅលើសមត្ថភាពតែប៉ុណ្ណោះ។ ឯកឧត្ដមបញ្ជាក់ថា៖ «សមត្ថភាពស្ថាបត្យករជារឿងចាំបាច់ណាស់ ព្រោះការងាររបស់ស្ថាបត្យករខុសពីការងារវិស្វករ។ វិស្វករជាអ្នកជំនាញគណនាដង្គុំគ្រឿងសំណង់ជាដើម ប៉ុន្ដែការងារស្ថាបត្យករត្រូវការគំនិត និងទស្សនៈ ជារឿងសំខាន់នៅពេលបង្កើតអ្វីមួយ»៕

ភ្នំពេញ – ទោះបីជាស្ថានភាពជាក់ស្ដែងនៃសកម្មភាពទិញ-លក់ក្នុងវិស័យអចលនទ្រព្យនៅដើមឆ្នាំ2017 នេះត្រូវបានសាធារណជនមើលឃើញថា ហាក់មានភាពយឺតយ៉ាវក៏ដោយ ក៏ម្ចាស់គម្រោងជាច្រើននៅតែបន្ដការអភិវឌ្ឍគម្រោងរបស់ខ្លួនទៅតាមផែនការដដែល។ យោងតាមរបាយការណ៍ការបូកសរុបទិន្នន័យរបស់ក្រសួងរៀបចំដែនដីនគរូបនីយកម្ម និងសំណង់បានបង្ហាញឱ្យឃើញថា ទិន្នន័យសំណង់ទូទាំងប្រទេសនៅ 6 ខែដើមឆ្នាំ2017 នេះ ទាំងសមត្ថកិច្ចថ្នាក់ក្រោមជាតិ និងថ្នាក់រាជធានី ខេត្តបានផ្ដល់លិខិតអនុញ្ញាតសាងសង់ចំនួន1,523 គម្រោងមានផ្ទៃក្រឡាសំណង់សរុប 7,284,675 ម៉ែត្រការ៉េ ដែលមានទឹកប្រាក់ប៉ាន់ស្មានក្នុងរង្វង់ 4,943,523,517 ដុល្លារសហរដ្ឋអាមេរិក ធៀបក្នុងរយៈពេលដូចគ្នាទៅនឹងឆ្នាំ2016 ចំនួន 1,183 គម្រោង មានផ្ទៃក្រឡាសំណង់សរុប ចំនួនតែ 10,512,261ម៉ែត្រការ៉េ មានតម្លៃប៉ាន់ស្មានប្រមាណជា 3.879.058.482 ដុល្លារសហរដ្ឋអាមេរិក មានការកើនឡើងទុនវិនិយោគប្រមាណ 27,44%។ ជាមួយគ្នានេះដែរក្នុងរយៈពេល 6ខែ ឆ្នាំ2017 មានទីក្រុងរណប បុរីលំនៅឋានមានលក្ខណៈជាបុរីសរុបចំនួន 14ទីតាំងត្រូវបានអភិវឌ្ឍបន្ថែម មានអគារខ្ពស់ចាប់ពី5ជាន់ឡើងទៅមានចំនួនសរុប43អគារ។ គិតពីឆ្នាំ 2000 ដល់ 6ខែដើមឆ្នាំ2017 ការបោះទុនវិនិយោគមកពីបរទេសមានចំនួន18ប្រទេស ដែលមានចំនួន 309គម្រោង ។ ដោយឡែកក្រសួងក៏បានធ្វើការចុះបញ្ជីឱ្យក្រុមហ៊ុនប្រកបអាជីវកម្មសិក្សាគម្រោងប្លង់ និងសាងសង់ក្នុងរយៈពេល 6ខែ ដើមឆ្នាំ2017នេះ ក្រសួងបានចុះបញ្ជីក្រុមហ៊ុនសិក្សាគម្រោងប្លង់ និងសាងសង់ នៅមានសុពលភាពចំនួន1,006ក្រុមហ៊ុន … Read more