វល័ក្ខ - La Reine Media

ក្លិប Pahang អនុញ្ញាតឱ្យចាន់ វឌ្ឍនាកា ចាកចេញ និងយក Nakajima ជំនួសវិញ

ខ្សែប្រយុទ្ធអន្តរជាតិកម្ពុជា ចាន់ វឌ្ឍនាកា ត្រូវបានអនុញ្ញាតឱ្យចាកចេញកាលពីថ្ងៃអង្គារ ដោយក្លិប Pahang FA ក្រោយពីការបង្ហាញទម្រង់លេងមិនបានល្អក្នុងរយៈពេលដ៏ខ្លីរបស់គេជាមួយនឹងក្លិបរបស់ក្របខ័ណ្ឌម៉ាឡេស៊ី Super League មួយនេះ ក្រោយពីបានចូលក្នុងនាមជាកីឡាករខ្ចីជើង កាលពីដើមឆ្នាំនេះ។

ក្លិប Pahang FAបាននាំយកខ្សែប្រយុទ្ធកាណាដា Issey Nakajima-Farran មកជំនួសវិញភ្លាមៗ ដើម្បីពង្រឹងក្រុមនេះ និងដើម្បីប្រជែងយកពានក្របខ័ណ្ឌម៉ាឡេស៊ី Super League។ ជាមួយគ្នានេះ ពួកគេក៏បាននាំយកខ្សែប្រយុទ្ធ Austin Amutu ដើម្បីជំនួសកន្លែងរបស់ Francis Forkey Doe ដែលមានបញ្ហារបួសជង្គង់រយៈពេលវែងផងដែរ កាលពីខែមីនា។ លោក DollahSalleh គ្រូបង្វឹករបស់ក្រុម Pahang បានឱ្យដឹងថា៖ «យើងសង្ឃឹមថា វត្តមានកីឡាករទាំង 2នេះ នឹងបង្កើនគុណភាពក្នុងក្រុមរបស់យើង។

Amutu អាចនឹងមានបញ្ហាមួយចំនួនក្នុងការសម្របខ្លួនក្នុងក្រុមនេះ ប៉ុន្តែខ្ញុំប្រាកដក្នុងចិត្តថា បទពិសោធរបស់ពួកគេនឹងជួយដល់យើង»។ ការចាកចេញរបស់វឌ្ឍនាកា ត្រូវបានរំពឹងទុកជាមុនទៅហើយ ក្រោយពីខ្សែបម្រើស្លាបរូបនេះបានបង្ហាញពីទម្រង់លេងដ៏គួរឱ្យទាក់ទាញតិចតួចបំផុតក្នុងការចំណាយពេលដ៏ខ្លីរបស់គេជាមួយនឹង Pahang។ លោក Dollah បានប្រាប់បណ្តាញសារព័ត៌មាន FOX Sports Asia ថា លោកចង់ឱ្យមានការបង្ហាញពីទម្រង់លេងកាន់តែល្អប្រសើរជាងមុនពី វឌ្ឍនាកា ក្រោយពីការបញ្ចប់ក្នុងលទ្ធផលស្មើ 2-2 ជាមួយនឹងក្រុម Kuala Lumpur FAកាលពីថ្ងៃទី15 ខែមេសា៕

ប្រភពពី៖ FOX Sports Asia

May 9, 2018

PSG ផ្តួលក្រុម Les Herbiers ដើម្បីលើកពាន French Cup

ក្រុមជើងខ្លាំង Paris Saint-Germain ត្រូវតែជម្នះទៅលើការបង្ហាញពីទម្រង់លេងដ៏រឹងមាំពីសំណាក់ក្រុមលំដាប់ទាប Les Herbiers ដើម្បីកត់ត្រាជ័យជម្នះក្នុងលទ្ធផល 2-០ ក្នុងការប្រកួតពាន French Cup កាលពីថ្ងៃអង្គារ។

កីឡាករ Giovani Lo Celso និង EdinsonCavani សុទ្ធសឹងរកគ្រាប់បាល់បានដូចគ្នាសម្រាប់ក្រុម PSG ដោយគ្រាប់បាល់ទី2 គឺជាគ្រាប់បាល់ប៉េណាល់ទី ដើម្បីផ្តួលក្រុមស្ថិតក្នុងក្របខ័ណ្ឌលំដាប់ទី៣ Les Herbiers និងដើម្បីបំពេញការឈ្នះពានក្នុងស្រុកទាំង៣សម្រាប់ក្រុម PSG។ Les Herbiers ត្រូវបានសង្គ្រោះ 3លើកដោយរបាទី ក្នុងការប្រកួតដើមតង់ទី1 ហើយបន្ទាប់មក Les Herbiers បានបាត់បង់គ្រាប់បាល់ទី2 របស់ខ្លួន ដោយសារតែប្រព័ន្ធវីដេអូជំនួយការអាជ្ញាកណ្តាល។

ប៉ុន្តែ ទោះបីជាយ៉ាងណា Les Herbiers នៅតែមិនអាចរារាំងក្រុម PSG មិនឱ្យឈ្នះពាន French Cup សម្រាប់រយៈពេល 4ឆ្នាំជាប់ៗគ្នាបានដដែល។ ក្រុម PSG បានឈានទៅកាន់ការប្រកួតនេះ ក្រោយពីបានឈ្នះពាន League Cup និងពានក្របខ័ណ្ឌ Ligue 1 រួចជាស្រេច។ បច្ចុប្បន្ន ពួកគេបានឈ្នះពាន French Cup និង League Cup សម្រាប់រយៈពេល 4ឆ្នាំជាប់ៗគ្នា ក្នុងនោះពួកគេបានឈ្នះពាន3 ក្នុងរដូវកាលតែ1។ បច្ចុប្បន្នក្រុម PSG មិនស្គាល់ចាញ់សោះពីការប្រកួតពានក្នុងស្រុកចំនួន 42ប្រកួត បើគិតចាប់តាំងពីថ្ងៃទី22 ខែមករា ឆ្នាំ2014 មក៕

ប្រភពពី៖ Channel News Asia

May 9, 2018

កម្មវិធី ABC Exceptional Night ជាមួយក្រុមតូច (SWSB)

ភ្នំពេញ៖ កាលពីថ្ងៃសុក្រ ទី 04 ខែឧសភា ឆ្នាំ2018 ស្រាបៀរ ABC អិចស្ត្រាស្តោត បានបន្តរៀបចំកម្មវិធី ABC EXCEPTIONAL NIGHT នៅ Motor Café Pub ដោយមានការអញ្ជើញចូលរួមពីសំណាក់ក្រុមតារាចម្រៀងវ័យក្មេងដែលមានទេពកោសល្យ ហើយតែងតែបង្កើតនូវអ្វីដែលថ្មី ដើម្បីជាអត្តសញ្ញាណរបស់ពួកគេ ពួកគេជាសិល្បករ សិល្បការនីនៃក្រុមតូច – Small World Small Band (True Blue Exceptional) ។

កម្មវិធីរាត្រីដ៏ល្អឯក (ABC Exceptional Night) មិនត្រឹមតែមានការសម្តែងដ៏អស្ចារ្យរបស់ក្រុមតូច និងក្រុមតារាបង្ហាញម៉ូត ព្រមទាំងសកម្មភាពកម្សាន្តផ្សេងទៀត។ លើសពីនេះ អតិថិជនរបស់ស្រាបៀរ ABC អិចស្ត្រាស្តោត ក៏បានភ្លក់នូវរសជាតិដ៏ល្អឯកពីការលាយបញ្ជូលគ្នាជាស្រាក្រឡុក ABC អិចស្ត្រាស្តោត ពីសំណាក់អ្នកក្រឡុកស្រាដ៏ជំនាញ ។

កម្មវិធី ABC EXCEPTIONAL NIGHT គឺជាផ្នែកមួយនៃយុទ្ធនាការ “ជាឧត្តមភាពដ៏ល្អឯក” របស់ ស្រាបៀរ ABC អិចស្ត្រាស្តោត ដែលផ្តល់នូវអំណរសារទរដល់ប្រជាពលរដ្ឋកម្ពុជា ដែលទទួលបានជោគជ័យដោយបានបង្ហាញពីចំណុចខ្លាំង ចំណេះដឹង និងសមិទ្ធផលរបស់ខ្លួននៅក្នុងវិស័យសិល្បៈ ពាណិជ្ជកម្ម និងការកសាងសហគមន៍។

ABC អិចស្ត្រាស្តោត នៅតែជាម៉ាកសញ្ញាស្រាបៀរទឹកខ្មៅលំដាប់ថ្នាក់អន្តរជាតិដែលឈានមុខគេគ្មានគូរបៀបនៅលើទីផ្សារ ស្រាបៀរទឹកខ្មៅគុណភាពខ្ពស់បំផុតនៅក្នុងប្រទេសកម្ពុជា ដែលអតិថិជនជ្រើសរើសយកមកទទួលទាន ”ក្រេបរសជាតិដ៏ល្អឯក” នៃស្រាបៀរទឹកខ្មៅ ដែលផលិតពីគ្រឿងផ្សំមានគុណភាពខ្ពស់បំផុត និងបានឈ្នះពានរង្វាន់ជាច្រើន ជាពិសេសកំពុងទទួលបានការគាំទ្រកាន់តែខ្លាំងឡើងពីស្រទាប់យុវវ័យ មជ្ឈដ្ឋានសិល្បករ និងពាណិជ្ជករលំដាប់ថ្នាក់ខ្ពស់។

កម្មវិធី ABC EXCEPTIONAL NIGHT នឹងបន្តប្រារព្ធធ្វើឡើងនៅទីតាំងកិ្លប 2ND Night នៅថ្ងៃពុធ ទី 09 ខែឧសភាខាងមុខនេះ ដោយមានការអញ្ជើញចូលរួមពីកំពូលតារាចម្រៀងដ៏ល្បីប្រចាំព្រះរាជាណាចក្រកម្ពុជា កញ្ញា មាស សុខសោភា។

សូមចូលរួមឲ្យបានច្រើនកុះករដើម្បីទទួលបានបទពិសោធន៍ដ៏ល្អឯកពី ABC អិចស្ត្រាស្តោត!

ចំពោះព័ត៌មានបន្ថែមអំពីកម្មវិធីពិសេសនេះ ចូលទៅកាន់គេហទំព័រផ្លូវការ៖ https://www.facebook.com/ABC.ExtraStoutCambodia/

សូមរីករាយទទួលទាន ABC អិចស្ត្រាស្តោត ដោយការទទួលខុសត្រូវ

May 9, 2018

កំពូលចុងភៅមកពីបារាំង នឹងបង្ហាញស្មាដៃចម្អិនម្អូបដ៏អស្ចារ្យសម្រាប់អាហារពេលល្ងាចនៅសណ្ឋាគារសូហ្វិតែលភ្នំពេញ

ភ្នំពេញ៖ កំពូលចុងភៅមកពីប្រទេសបារាំង លោក Jean-Yves Guého និងជាម្ចាស់ជ័យលាភីចុងភៅ Michelin នឹងបង្ហាញស្មាដៃ ក៏ដូចជាទាក់ទាញចំណាប់អារម្មណ៍ភ្ញៀវកត្តិយសដែលចូលចិត្តមុខម្ហូបឈ្ងុញឆ្ងាញ់ នៅសណ្ឋាគារសូហ្វិតែលភ្នំពេញ ភូគីត្រា និងសណ្ឋាគារសូហ្វីតែល អង្គរ ភូគីត្រា ហ្គូហ្វ & ស្ដា នាថ្ងៃទី09 ខែឧសភា ឆ្នាំ 2018។

អស់លោកដែលធ្លាប់ស្គាល់មុខម្ហូបឈ្ងុញឆ្ងាញ់នៅក្នុងប្រទេសកម្ពុជានឹងមានឱកាសទទួលទានអាហារនាពេលល្ងាចរបស់ចុងភៅ Michelin គឺលោក Jean-Yves Guého ដែលជាម្ចាស់ជ័យលាភីពានរង្វាន់ L’Atlantide នៅទីក្រុង Nates ប្រទេសបារាំង។ អាហារពេលល្ងាចដ៏ពិសេសនេះ នឹងផ្សំឡើងពីគ្រឿងទេស និងម្រេចមកពី ឡាផ្លេនថេសិន (La Plantation ខេត្តកំពត។ មុខម្អូបរួមមានបង្កងកាណាដា និងឆៃថាវជូអែមផ្សំរសជាតិជាមួយនឹងអំបិលខេត្តកែប និងម្រេចក្រហមកំពត ព្រមទាំងសាច់គោហ្វីឡេ ថ្លើមទាចម្អិនស្រស់ទឹក និងអន្ទង់ឆ្អើរផ្សំរស់ជាតិជាមួយម្រេចខ្មៅកំពត។

ឱកាសទទួលទានអាហារពេលល្ងាចរបស់ចុងភៅ Michelin គឺលោក Jean-Yves Guého ដែលជាម្ចាស់ជ័យលាភីពានរង្វាន់ L’Atlantide នេះ អាចប្រព្រឹត្តទៅបានក្រោមការចូលរួមសហការជាមួយក្រុមហ៊ុន Thai Airways, AusKhmer និង La Plantation៕

May 8, 2018

សារៈសំខាន់របស់លេខបារកូដដែលអាជីវករក្នុងស្រុកគួរយល់ដឹង

ជាទូទៅគ្រប់ផលិតផលដែលដាក់លក់នៅក្នុងទីផ្សារតែងតែមានលេខបារកូដដែលធ្វើឱ្យអតិថិជនអាចដឹងបានថា ផលិតផលនោះផលិតចេញពីប្រទេសណា។ ជាក់ស្តែងផលិតផលដែលផលិតនៅកម្ពុជា យើងមានលេខបារកូដសម្រាប់សម្គាល់នៅខាងមុខ 3ខ្ទង់គឺ 884។

លោក ឡូញ គឹមអៀន នាយកប្រតិបត្តិស្ថាប័នបារកូដកម្ពុជា

បច្ចុប្បន្នស្ថាប័នតែមួយគត់ដែលមានសិទ្ធិក្នុងការគ្រប់គ្រង បែងចែកលេខបារកូដនៅព្រះរាជាណាចក្រកម្ពុជា គឺស្ថាប័នបារកូដកម្ពុជា ឬហៅកាត់ថា ជីអេស1កម្ពុជា (GS1cambodia) ស្ថាប័ននេះត្រូវបានតែងតាំងឡើងដោយ ជីអេស1អន្តរជាតិ (GS1Internaational)គឺជាស្ថាប័នមិនស្វែងរកប្រាក់ចំណេញ និងជាស្ថាប័នដែលសាមញ្ញ និងច្បាស់លាស់ពីច្បាប់គ្រប់គ្រង កំណត់មូលដ្ឋានគ្រឹះសម្រាប់ការធ្វើពាណិជ្ជកម្ម។

ដូច្នេះអាជីវករក្នុងស្រុកដែលជាម្ចាស់ក្រុមហ៊ុន ឬសហគ្រាសឯកជនត្រូវតែស្វែងយល់ពីអត្ថប្រយោជន៏ និងសារៈសំខាន់នៃការប្រើប្រាស់បារកូដកម្ពុជាដើម្បីពង្រឹងគុណភាពផលិតផលរបស់ខ្លួនឱ្យឈានទៅរកភាពល្អប្រសើរឡើងក្នុងទីផ្សារស្របទៅតាមការជំរុញរបស់រដ្ឋាភិបាល និងសហគមន៍ប្រជាជាតិអាស៊ីអាគ្នេយ៍។

អគ្គនាយកសភាពាណិជ្ជកម្ម លោក ងួន ម៉េងតិច បានមានប្រសាសន៍ថា ចំពោះបារកូដកម្ពុជា កន្លងមកយើងធ្លាប់បានជូនព័ត៌មានទៅដល់បងប្អូនអ្នករកស៊ីច្រើនហើយ តែពូកគាត់នៅមិនទាន់យល់ ដូច្នេះទើបការចុះឈ្មោះផលិតផលក្នុងបញ្ជីបារកូដនេះនៅមានចំនួនតិចនៅឡើយ។ លោកបានបន្តថា៖ “លោកមានបំណងចង់ឱ្យពាណិជ្ជករយើងទាំងអស់មានការយល់់ដឹងពីលេខបារកូដនេះឱ្យកាន់តែច្បាស់ឡើង ពីព្រោះបារកូដនេះជាតួលេខមួយដែលអាចដឹងបានថាផលិតផលចេញមកពីប្រទេសណាមួយ ព្រោះក្នុងប្រទេសមួយគេផ្តល់តួលេខបារកូដឱ្យតែមួយទេជាតំណាងរបស់ជាតិ។ ពិភពលោកគេប្រើប្រាស់ បារកូដនេះជាចាំបាច់ដើម្បីគ្រប់គ្រងផលិតផល និងគ្រប់គ្រងតម្លៃនៅលើទីផ្សារ។

លោកស្រីឧកញ៉ា កែវ មុំ នាយិកាក្រុមហ៊ុនលីលីផលិតនំស្រួយបានមានប្រសាសន៍អំពីបារកូដសម្រាប់ផលិតផលជាទូទៅនេះថា៖ “សម្រាប់ក្រុមហ៊ុនរបស់ខ្ញុំ ខ្ញុំបានចុះបញ្ជីបារកូដនេះតាំងពីជាង 10ឆ្នាំមុនមកម្ល៉េះ នេះក៏ដោយសារខ្ញុំបានយល់ពីអត្ថប្រយោជន៍នៃការចុះបញ្ជីបារកូដសម្រាប់ផលិតផលរបស់យើង។

លោកស្រីនាយិកាក៏បានឱ្យដឹងផងដែរពីអត្ថប្រយោជន៍នៃការចុះលេខបារកូដទៅលើផលិតផលដោយបានបញ្ជាក់ថា៖“ចំពោះអត្ថប្រយោជន៍នៃលេខបារកូដនេះគឺវាផ្តល់ឱ្យយើងច្រើនណាស់ ពីព្រោះការចុះបារកូដទៅលើផលិតផល គឺពេលណាផលិតផលដែលយើងផលិតបាន យើងចង់យកទៅលក់នៅលើទីផ្សារ ដូចជានៅក្នុងផ្សារទំនើប (Super Market) ឬក្នុងម៉ាត (Mart)គេត្រូវការស្គែនបារកូដនេះដើម្បីគ្រប់គ្រងការលក់ និងតម្លៃផ្សេងៗបានដោយស្រួល ហើយវាក៏ជាអត្តសញ្ញាណមួយបញ្ជាក់ថាផលិតផលរបស់យើង គឺយើងមានការចុះបញ្ជីត្រឹមត្រូវ។

នៅពេលដែលយើងចុះបញ្ជីបារកូដហ្នឹងពេលយើងស្គែនទៅ យើងនឹងឃើញឈ្មោះក្រុមហ៊ុន អាសយដ្ឋាន លេខទូរស័ព្ទ និងព័ត៌មានផ្សេងៗសម្រាប់ទំនាក់ទំនងនៅក្នុងបារកូដនោះ។ ចង់បញ្ជាក់ថា ក្រុមហ៊ុនយើងជាក្រុមហ៊ុនពិតប្រាកដច្បាស់លាស់មានការចុះបញ្ជីត្រឹមត្រូវ។

លោកស្រីបន្តថា៖ នៅពេលយើងចុះបញ្ជីបារកូដហ្នឹងត្រឹមត្រូវ គឺយើងអាចនាំយកផលិតផលរបស់យើងទៅលក់នៅក្រៅប្រទេសបាន ពីព្រោះស្រុកក្រៅ គឺគេត្រូវការបារកូដ រាល់ផលិតផលទាំងអស់គឺត្រូវតែមានលេខបារកូដសម្គាល់ ហើយបារកូដនេះមិនមែនចេះតែចុះផ្តេសផ្តាសបានទេ ពីព្រោះនៅពេលដែលគេស្គែនទៅ គេនឹងឃើញលេខបារកូដប្រទេសដែលជាទិន្នន័យអត្តសញ្ញាណសម្រាប់សម្គាល់ តែបើក្លែងក្លាយនឹងពុំឃើញមានទិន្នន័យទាំងអស់។

លោក ឡូញ គឹមអៀន នាយកប្រតិបត្តិស្ថាប័នបារកូដកម្ពុជាបានមានប្រសាសន៍ថា តាំងពីស្ថាប័នបារកូដកម្ពុជាបង្កើតឡើងរហូតមកទល់ពេលបច្ចុប្បន្ន យើងមានសមាជិកកើនឡើងជារៀងរាល់ឆ្នាំព្រោះមានការយល់ដឹងពីអត្ថប្រយោជន៍នៃបារ-កូដនេះកាន់តែច្រើនឡើងហើយ។ ម្យ៉ាងវិញទៀតផលិតផលមួយចំនួនប្រសិនបើមិនមានលេខបារកូដទេ គេនឹងមិនទទួលទិញទេនៅតាមម៉ាត ឬនៅតាមផ្សារទំនើបមួយចំនួននោះទេ។

បច្ចុប្បន្នគេលែងប្រើការបិទតម្លៃនៅលើផលិតផលទៀតហើយ គឺគេប្រើការស្គែនតម្លៃតាមរយៈបារកូដនេះឯង ហើយក៏ដោយសារគេងាយគ្រប់គ្រងទិន្នន័យស្តុកទំនិញ និងចំនួននៃការលក់ចេញជាដើមផងដែរ។ គ្រប់ក្រុមហ៊ុន សហគ្រាស និងសិប្បកម្មតូចតាចក៏អាចចុះលេខបារកូដបានដែរឱ្យតែមានផលិតផលរបស់ខ្លួន។

លោកបានឱ្យដឹងថា ការចុះលេខបារកូដនេះមិនមែនជាការធ្វើឡើងដោយនឹកសង្ឃឹមថាទទួលបានជោគជ័យទេ តែវាគឺជោគជ័យតែម្តង ដោយសារនៅលើជាង 100ប្រទេសគេប្រើប្រព័ន្ធតែមួយ ហើយការចុះលេខបារកូដនេះ ក្រុមហ៊ុន សហគ្រាសគាត់អាចយកទៅលក់នៅប្រទេសណាក៏បានដែរគឺគេទទួលស្គាល់ផលិតផលដែលបានចុះលេខបារកូដនេះដោយស្ថាប័នបារកូដឬ GS1(Global System1)មានន័យថា “ប្រព័ន្ធតែមួយ ដំណោះស្រាយតែមួយ និងស្តង់ដារតែមួយ។

យោងតាមបទបង្ហាញរបស់ស្ថាប័នបារកូដកម្ពុជាស្តីពីសកម្មភាពការងារស្នូលរបស់ខ្លួន ស្ថាប័ននេះបាននិងកំពុងសហប្រតិបត្តិការជាមួយក្រសួងកសិកម្មក្នុងការជំរុញ និងពង្រឹងសុវត្ថិភាពចំណីអាហារក្នុងវិស័យកសិកម្ម។ ទន្ទឹមនឹងនេះក៏បានបង្កើតគម្រោងកម្មវិធីទូរទស្សន៍ និងវីដេអូឯកសារស្តីពីការប្រើប្រាស់លេខបារកូដ និងការបង្កើតគំរូបារកូដសម្រាប់ប្រើប្រាស់លើផលិតផលផងដែរ ដោយរួមទាំងកិច្ចប្រជុំទាំងក្នុង និងក្រៅប្រទេសសំដៅអភិវឌ្ឍជីអេស1កម្ពុជាក្នុងការជំរុញបង្កើនទីផ្សារឱ្យកាន់តែទូលំទូលាយ៕

May 8, 2018

តើនាពេលអនាគត ទីក្រុងរបស់យើងនឹងក្លាយជាបែបណា?

ក្រោយពីកិច្ចប្រជុំកំពូលអាស៊ានលើកទី32 នៅប្រទេសសិង្ហបុរី ប្រមុខដឹកនាំរដ្ឋាភិបាលទាំងអស់នៅក្នុងតំបន់អាស៊ានបានសម្រេចកិច្ចព្រមព្រៀងរួមគ្នាជាច្រើនដែលអាចជួយជំរុញឱ្យមានការអភិវឌ្ឍកាន់តែខ្លាំង ដោយក្នុងនោះមានចំណុចសំខាន់មួយ គឺការបង្កើតឱ្យទីក្រុងនានានៅក្នុងតំបន់ក្លាយជាទីក្រុងឆ្លាតវៃ (Smart City)។

សម្រាប់ប្រទេសកម្ពុជា ប្រមុខរាជរដ្ឋាភិបាលបានលើកឡើងថា ប្រទេសកម្ពុជាជឿជាក់ថា តាមរយៈគំនិតផ្តួចផ្តើមក្នុងការបង្កើតបណ្តាញទីក្រុងឆ្លាតវៃអាស៊ាននេះនឹងអាចស្វែងរកវិធីសាស្ត្រថ្មីៗដើម្បីទាក់ទាញអត្ថប្រយោជន៍នៃបច្ចេកវិទ្យា ដើម្បីជំរុញកំណើនសេដ្ឋកិច្ច និងលើកកម្ពស់ការរស់នៅរបស់ប្រជាជន។ ហេតុនេះក្នុងការរៀបចំការអនុវត្តជាក់ស្តែង ទីក្រុងឆ្លាតវៃអាស៊ានក៏ត្រូវយកចិត្តទុកដាក់ផងដែរលើចំណុចមួយចំនួនចជាការបង្កើតយន្តការគ្រប់គ្រងប្រតិបត្តិការដោយខ្លួនឯង បង្កើតយន្តការហិរញ្ញវត្ថុដែលអនុគ្រោះ ហើយអាចអនុវត្តជាក់ស្តែងដើម្បីជួយអភិវឌ្ឍទីក្រុងឆ្លាតវៃសម្រាប់ប្រទេសសមាជិកអាស៊ាននីមួយៗ និងបង្កើតស្តង់ដាររួម និងយន្តការដើម្បីទ្រទ្រង់ការអភិវឌ្ឍទីក្រុងអាស៊ានទាំងមូល។

ស្របនឹងបញ្ហានេះកម្ពុជាក៏ដូចជាប្រទេសនីមួយៗបានព្យាយាមគ្រប់លទ្ធភាពដើម្បីបង្កើនភាពទំនើបក្នុងការរស់នៅរបស់ប្រជាជន ដោយចាប់ផ្តើមពីការអភិវឌ្ឍផ្នែកបច្ចេកវិទ្យា បណ្តាញតភ្ជាប់ទំនាក់ទំនង និងប្រព័ន្ធថ្មីៗជាច្រើនផ្សេងទៀត។ ជាបន្តបន្ទាប់ ទីក្រុងទាំងអស់នឹងវិវឌ្ឍទៅរករបត់មួយដែលស្រដៀងគ្នាទៅនឹងទីក្រុងសំខាន់ៗនាពេលបច្ចុប្បន្ន ដូចជាទីក្រុងតូក្យូ ទីក្រុងសិង្ហបុរី ទីក្រុងសិនជិន និងទីក្រុងឌូបៃជាដើម។

ទីក្រុងឆ្លាតវៃ ឬ Smart City ត្រូវបានអ្នកជំនាញបញ្ជាក់ថា ជាទីក្រុងដែលមានប្រើប្រាស់ដោយម៉ាស៊ីនស្វ័យប្រវត្តិនៅក្នុងប្រតិបត្តិការទីក្រុងជាច្រើន ដោយរួមទាំងវិស័យសាធារណៈមួយចំនួន ការសម្រួលចរាចរណ៍ និងវិស័យដឹកជញ្ជូន ប្រកបដោយភាពរលូន។ ចំណែកឯការគ្រប់គ្រងលើអភិបាលកិច្ចទីក្រុងវិញនឹងចាប់ផ្តើមធ្វើដោយប្រព័ន្ធបច្ចេកវិទ្យាដែលមានប្រសិទ្ធភាពខ្ពស់ និងឆាបរហ័ស។

ចំពោះលក្ខខណ្ឌចរាចរណ៍វិញអាចនឹងមានលក្ខខណ្ឌល្អប្រសើរ ព្រោះមនុស្សនឹងចាប់ផ្តើមប្រើប្រាស់បណ្តាញអនឡាញដើម្បីបញ្ជាទិញរបស់របរប្រើប្រាស់នានា ឬទិញទំនិញសំខាន់ៗនៅក្នុងផ្ទះ (house shopping) ដែលវាអាចកាត់បន្ថយការកកស្ទះចរាចរណ៍ ប្រសិនបើបណ្តាញអុីនធើណិតត្រូវបានគេរៀបចំឱ្យមានល្បឿនលឿន និងមានគុណភាពខ្ពស់។

ទីក្រុងដែលមានប្រព័ន្ធហេដ្ឋារចនាសម័ន្ធផ្លូវថ្នល់ដ៏ទំនើប

ងាកមកវិស័យដឹកជញ្ជូនអ្នកដំណើរសាធារណៈវិញ គឺមិនខុសពីទីក្រុងធំៗប៉ុន្មាននោះទេ បណ្តាញដឹកជញ្ជូនអ្នកដំណើរស្វ័យប្រវត្តិដោយគ្មានមនុស្សបើកនឹងចាប់ផ្តើមប្រកួតប្រជែង ហើយក្លាយជាវិធីសាស្ត្រសំខាន់សម្រាប់ការរស់នៅរបស់ប្រជាជននៅក្នុងក្រុងដែលអភិវឌ្ឍខ្លួនឱ្យក្លាយជាទីក្រុងឆ្លាតវៃ។ ចំពោះប្រព័ន្ធផ្ទុកទំនិញ ឬឃ្លាំងវិញក៏នឹងចាប់ផ្តើមផ្លាស់ប្ដូរ ដោយជំនួសមកវិញនូវចំនួនគ្រឿងម៉ាស៊ីនស្វ័យប្រវត្តិហើយកាត់បន្ថយចំនួនមនុស្ស បន្ទាប់មកទៀតការធ្វើការងារដោយការចាប់ផ្តើមប្រើប្រាស់ដ្រូនក្នុងវិស័យដឹកជញ្ជូនទំនិញឯកជនក៏នឹងចាប់ផ្តើមរីកដុះដាលឡើង ដែលអាចធ្វើឱ្យការចែកចាយទំនិញពីក្នុងឃ្លាំងទៅកាន់អតិថិជនបានកាន់តែលឿនឡើង។

ចំពោះវិស័យសុខាភិបាលវិញ យើងនឹងឃើញថា នឹងមានការចាប់ផ្តើមប្រើប្រាស់បណ្តាញបច្ចេកវិទ្យាទំនើបព្រោះការភ្ជាប់ទំនាក់ទំនងជាមួយនឹងស្ថាប័នសុខាភិបាលអាចប្រើប្រាស់តាមបណ្តាញបច្ចេកវិទ្យាដែលមាននៅក្នុងទូរស័ព្ទដៃរបស់មនុស្សម្នាក់ៗបាន ហើយផ្នែកកសិកម្មនៅតំបន់ជាយក្រុងក៏នឹងប្រែក្លាយពីការប្រើប្រាស់មនុស្ស និងគ្រឿងចក្រពាក់កណ្តាលស្វ័យប្រវត្តិទៅជាប្រព័ន្ធស្វ័យប្រវត្តិទាំងស្រុង។

បច្ចេកវិទ្យាទាំងអស់នេះត្រូវបានគេមើលឃើញថា អាចនឹងធ្វើឱ្យមនុស្សដែលរស់នៅក្នុងទីក្រុងឆ្លាតវៃ (smart city) អាចនឹងមានភាពងាយស្រួលច្រើន ហើយថែមទាំងអាចកាត់បន្ថយការបំពុលបរិស្ថានបានច្រើនផងដែរ។ លើសពីនេះទៅទៀត ការរកស៊ី និងការភ្ជាប់ទំនាក់ទំនងរវាងប្រជាជននៃប្រទេសនីមួយៗនឹងចាប់ផ្តើមកាន់តែមានភាពងាយស្រួលឡើង ដែលអាចធ្វើឱ្យកើតមានអាជីវកម្មពហុជាតិសាសន៍ រួមទាំងនវានុវត្តន៍ថ្មីៗជាច្រើនផ្សេងទៀតដែលឆ្លើយតបទៅនឹងរបត់ថ្មីនៃការរស់នៅរបស់មនុស្សក្នុងពិភពលោក៕

May 8, 2018

ឱកាសសម្រេចក្តីស្រមៃទៅសិក្សានៅប្រទេសសិង្ហបុរីបានមកដល់ហើយ!

ការបានទៅសិក្សានៅឯប្រទេសអភិវឌ្ឍន៍ ឬប្រទេសដែលមានភាពល្បីល្បាញផ្នែកអប់រំ គឺជាក្តីស្រមៃយ៉ាងធំមួយរបស់សិស្ស ហើយវាក៏ជាមោទនភាពមួយផងដែរសម្រាប់ក្រុមគ្រួសារ និងជីវិតខ្លួនឯងផ្ទាល់ដែរ។

សិង្ហបុរី ដែលជាប្រទេសមួយមានភាពល្បីល្បាញផ្នែកអប់រំនៅលើពិភពលោក ថ្មីៗនេះបានប្រកាសផ្តល់អាហារូបករណ៍សម្រាប់សិស្សកម្រិតមធ្យមនៅក្នុងបណ្ដាប្រទេសក្នុងអាស៊ានដែលក្នុងនោះ សិស្សពីកម្ពុជាក៏អាចមានសិទ្ធិក្នុងការសម្រេចក្តីស្រមៃរបស់ខ្លួនដើម្បីបន្តការសិក្សាដោយឥតបង់ប្រាក់នៅសិង្ហបុរីបានដែរ។

អាហារូបករណ៍ដែលផ្តល់ជូននេះជាអាហារូបករណ៍របស់ក្រសួងអប់រំ នៃប្រទេសសិង្ហបុរី ដែលក្នុងនោះគឺមានការផ្គត់ផ្គង់ដល់អ្នកប្រឡងជាប់ទាំងអស់នូវប្រាក់សម្រាប់ការហូបចុក រ៉ាប់រងលើថ្លៃសិក្សា ការស្នាក់នៅ និងសំបុត្រយន្តហោះ ទៅ-មកកម្ពុជា-សិង្ហបុរីទៀតផង។

ចំពោះលក្ខខណ្ឌនៃការជ្រើសរើសគឺបេក្ខជនទាំងអស់ត្រូវតែជាសមាជិក ឬប្រជាជនដែលស្ថិតនៅតំបន់អាស៊ាន (ASEAN) ដែលកើតនៅចន្លោះឆ្នាំ2002 ដល់ឆ្នាំ2004 ដែលជាសិស្សពូកែ និងជាសិស្សដែលកំពុងសិក្សានៅថ្នាក់ទី10 ឬទី11 នៅសាលាមធ្យមសិក្សាចំណេះទូទៅ។ បេក្ខជនត្រូវតែជាអ្នកដែលមានចំណេះដឹងជ្រៅជ្រះលើភាសាអង់គ្លេសដែលអាចប្រើប្រាស់បានទាំងការទំនាក់ទំនង និងការសិក្សាជាផ្លូវការនៅប្រទេសសិង្ហបុរី។

ចំណែកឯដំណាក់កាលនៃការជ្រើសរើសគឺ ក្រោយពីបេក្ខជនជាប់ដំណាក់កាលទី1 ឬត្រូវបានជាប់ជាជម្រើសសម្រាប់ការប្រឡងហើយ បេក្ខជនត្រូវចូលរួមប្រឡងប្រជែងសមត្ថភាពទូទៅដូចជាភាសាអង់គ្លេស និងគណិតវិទ្យា ហើយត្រូវចូលរួមសម្ភាសជាបន្តបន្ទាប់។ ការប្រឡង និងការសម្ភាសនឹងប្រព្រឹត្តទៅនៅភ្នំពេញ ហើយចំពោះបេក្ខជនដែលទទួលបានជោគជ័យជាស្ថាពរនឹងត្រូវប្រកាសលទ្ធផលនៅចុងខែកញ្ញា ឆ្នាំ2018នេះ។

សម្រាប់លក្ខខណ្ឌក្នុងការដាក់ពាក្យសម្រាប់សិស្សកម្ពុជា គឺត្រូវដាក់ពាក្យនៅការិយាល័យអាហារូបករណ៍ និងកម្មសិក្សានៃនាយកដ្ឋានទំនាក់ទំនងវប្បធម៌ និងអាហារូបករណ៍នៃក្រសួងអប់រំ យុវជន និងកីឡា ដោយបេក្ខជនតម្រូវឱ្យដាក់ពាក្យជា Hard Copy។ ប្រសិនបើបេក្ខជនចង់ដាក់ពាក្យតាមបណ្តាញអនឡាញ ក៏អាចដាក់ពាក្យបានតាមគេហទំព័ររបស់ក្រសួងអប់រំ យុវជន និងកីឡា ដែលចាប់ផ្តើមបើកពីថ្ងៃទី2 ខែឧសភា ឆ្នាំ2018 នេះតទៅ៕

May 8, 2018

កាន់តែអស្ចារ្យ ព្រឹត្តិការណ៍ប្រកួតកីឡាបាល់ទះឆ្នេរខ្សាច់អន្តរជាតិរបស់ស្រាបៀរអាន់ឆ័រ

បន្ទាប់ពីបានបើកឆាកនៃការប្រកួតលើកដំបូងកាលព្រឹកថ្ងៃទី04 ខែមេសា កន្លងទៅក្រោមវត្តមានរបស់ក្រុមកីឡាជាប់ជម្រើសវិលជុំដែលមកពីបណ្តាប្រទេសផ្សេងៗសរុបចំនួន17ប្រទេសនោះរួចមក សម្រាប់ថ្ងៃទី2 នៃការប្រកួតលើទីលានឆ្នេរខ្សាច់អន្តរជាតិសិប្បនិម្មិត នៅកោះពេជ្រ កាន់តែមានភាពទាក់ទាញ និងអស្ចារ្យជាទីបំផុត ដោយក្រុមកីឡាការិនីទាំងអស់បានបញ្ចេញនូវសមត្ថភាពរបស់ខ្លួន ដើម្បីប្រកួតដណ្ដើមយកជ័យលាភីយ៉ាងស្វិតស្វាញ។

នៅក្នុងព្រឹត្តិការណ៍ដ៏អស្ចារ្យក្រោមការផ្តល់ពិន្ទុ និងកាត់សេចក្ដីយ៉ាងសុក្រិតពីសំណាក់អ្នកជំនាញផ្នែកកីឡាបាល់ទះអន្តរជាតិ នៅក្រោមក្រសែភ្នែកមហាជន ដែលចូលរួមទស្សនាដោយផ្ទាល់យ៉ាងច្រើនកុះករនាពេលនោះ គេសង្កេតឃើញថា គ្រប់ក្រុមកីឡាករិនី ដែលជាសមាសភាពស្ថិតនៅលើទីលានឆ្នេរខ្សាច់បានបង្ហាញពីសកម្មភាពយ៉ាងស្វាហាប់ក្នុងការទប់ទល់ទៅនឹងការវាយសម្រុករបស់ដៃគូប្រកួតប្រជែងជាខ្លាំង ។ យ៉ាងណាក៏ដោយ ចំពោះការប្រកួតរហូតដល់វេលាបញ្ចប់នាថ្ងៃទី2 ជាលទ្ធផល គណៈកម្មការផ្តល់ពិន្ទុនៅមិនទាន់អាចរកឃើញក្រុមដែលអាចមានលទ្ធភាពលើកពាននៅឡើយ ខណៈដែលការប្រកួតកំពុងស្ថិតនៅក្នុងវគ្គសន្សំពិន្ទុនៅឡើយ ។

គួរបញ្ជាក់ផងដែរថា កម្មវិធី International Beach Volleyball 2-Star FIVB World Tour គឺជាផ្នែកមួយនៃកម្មវិធី Anchor International Beach Volleyball Carnival 2018 របស់ស្រាបៀរអាន់ឆ័រ ដែលបានរៀបចំសន្និសីទកាសែតប្រកាសបើកជាផ្លូវការកាលពីថ្ងៃទី 27ខែកុម្ភៈ ឆ្នាំ 2018 នៅសណ្ឋាគារ កាំបូឌីយ៉ាណា។ កម្មវិធីនេះបានចាប់ផ្តើមពីថ្ងៃទី 24 ខែមីនា រហូតដល់ថ្ងៃទី 27 ខែឧសភា ឆ្នាំ 2018 នៅខេត្តក្រុងធំចំនួន 8 រួមមាន ខេត្តកំពង់ស្ពឺ ព្រះសីហនុ បន្ទាយមានជ័យ បាត់ដំបង កំពង់ចាម រាជធានីភ្នំពេញ រតនគិរី និងសៀមរាប។

ចំពោះម៉ោងប្រកួតកម្មវិធី International Beach Volleyball 2-Star FIVB World Tour ចាប់ផ្តើមពីម៉ោង 9 ព្រឹកដល់ 5ល្ងាចចាប់ពីថ្ងៃទី 4 ដល់ថ្ងៃទី 6 ខែឧសភា នៅបរិវេណកោះពេជ្រ រាជធានីភ្នំពេញ។ បន្ទាប់ពីកម្មវិធីប្រកួតនេះ ក៏មានការប្រគុំតន្ត្រីរបស់ស្រាបៀរអាន់ឆ័រក្រោមការអញ្ជើញចូលរួមពីសំណាក់តារាល្បីជាច្រើន ដូចជា កញ្ញា ភាមា (Pia Mia) ដែលជាកំពូលតារាចម្រៀងស្រីដ៏ល្បីប្រចាំសហរដ្ឋអាមេរិក ព្រមទាំងតារាប្រុស-ស្រី ល្បីឈ្មោះប្រចាំព្រះរាជាណាចកម្ពុជាជាច្រើនរូបផងដែរ ដូចជា កញ្ញា ឱក សុគន្ធកញ្ញា, លោក ខេមរៈ សេរីមន្ត ,លោក នីកូ ,លោក ឆន សុវណ្ណរាជ ,អ្នកនាង សុគន្ធ នីសា , អ្នកនាង សុខ ស្រីនាង , កញ្ញា ទេព បូព្រឹក្ស , កញ្ញា សួស វីហ្សា , អ្នកនាង ពេជ្រ សោភា , កញ្ញា វី ឌីណែត , លោក ស្តិប (Step) និងលោក ជី ដេវីត ៕

May 7, 2018

វិនិយោគិនជប៉ុនត្រៀមផ្តល់កម្ចីការប្រាក់ទាបជូនកសិករខ្មែរសម្រាប់វិស័យកសិកម្ម

ក្នុងគោលបំណងលើកកម្ពស់កម្រិតជីវភាពកសិករ និងលើកស្ទួយវិស័យកសិកម្មនៅកម្ពុជាឱ្យកាន់តែប្រសើរឡើង ក្រុមអ្នកវិនិយោគជប៉ុនគ្រោងនឹងបោះទុនវិនិយោគលើវិស័យហិរញ្ញវត្ថុ សម្រាប់ផ្តល់ជាកម្ចីក្នុងអត្រាការប្រាក់ទាបជូនដល់កសិករកម្ពុជា។

គម្រោងវិនិយោគលើវិស័យមីក្រូហិរញ្ញវត្ថុនេះត្រូវបានបង្ហើបឱ្យដឹងនៅក្នុងជំនួបរវាងថ្នាក់ដឹកនាំក្រសួងពាណិជ្ជកម្មកាលពីចុងសប្តាហ៍មុនជាមួយក្រុមអ្នកវិនិយោគក្រុមហ៊ុន Idemitsu Saison Microfinance ។

នៅក្នុងជំនួបនោះលោក Koichi Watanabe តំណាងរបស់ក្រុមហ៊ុន Idemitsu Saison Microfinance បានលើកឡើងអំពីប្រវត្តិ និងចក្ខុវិស័យរបស់ក្រុមហ៊ុនដែលផ្តោតសំខាន់លើការចូលរួមពង្រីកឥណទានសម្រាប់វិស័យកសិកម្មតាមរយៈសេវាកម្មផ្ដល់ប្រាក់កម្ចីរយៈពេលវែង និងការប្រាក់ទាបដល់កសិករផ្ទាល់ ឬដល់សហគមន៍ណាមួយក្រោមរូបភាពដាក់ទ្រព្យបញ្ចាំនិងមិនមានទ្រព្យបញ្ចាំ។

ជាកិច្ចឆ្លើយតបឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានថ្លែងស្វាគមន៍ចំពោះវត្តមានក្រុមហ៊ុនខាងលើដែលបានរួមចំណែកជួយដល់វិស័យកសិកម្ម និងកសិករកម្ពុជា។ ឯកឧត្តមរដ្ឋមន្ត្រីបានគូសបញ្ជាក់ថា ការពង្រីកឥណទានក្នុងវិស័យកសិកម្ម គឺជាកិច្ចការអាទិភាពមួយរបស់រាជរដ្ឋាភិបាល ហើយការវិនិយោគរបស់ក្រុមហ៊ុន Idemitsu Saison នឹងរួមចំណែកដោះស្រាយបញ្ហាដែលកសិករ និងម្ចាស់អាជីវកម្មខ្នាតតូចភាគច្រើនបានជួបប្រទះដោយសារតែឥណទានកសិកម្មមានសារៈសំខាន់ដល់ការពង្រីកមុខរបរ ក៏ដូចជាបង្កើនផលិតកម្មឱ្យស្របទៅនឹងតម្រូវការនៃទីផ្សារ។

ឯកឧត្តមរដ្ឋមន្ត្រី ក៏បានស្នើសុំឱ្យក្រុមហ៊ុន បន្តសហការឱ្យបានស្អិតល្មួតជាមួយប្រជាកសិករ សហគ្រាសធុនតូច និងមធ្យម និងសមាគមកសិកម្មមួយចំនួនថែមទៀតដូចជា ស្រូវ-អង្ករ ដំឡូងមី ម្រេច ពោត កៅស៊ូ ស្វាយ និងស្វាយចន្ទី-ល- ដោយសារតែផលិតផលទាំងអស់នោះ មានសក្ដានុពលខ្ពស់សម្រាប់អភិវឌ្ឍខ្សែចង្វាក់តម្លៃ ដើម្បីធ្វើពិពិធកម្មការនាំចេញទៅកាន់ទីផ្សារអន្តរជាតិ៕

May 7, 2018

ប្រមើលមើលសេដ្ឋកិច្ចកម្ពុជាឆ្នាំ2018 និង2019 ទៅជាយ៉ាងណា?

ស្ថានភាពម៉ាក្រូសេដ្ឋកិច្ចកម្ពុជានៅក្នុងឆ្នាំ2017 មានភាពល្អប្រសើរ ដោយអាចសម្រេចបានកំណើនក្នុងរង្វង់ 7.0% ដែលគាំទ្រដោយវិស័យសំណង់ វិស័យកាត់ដេរ ទេសចរណ៍ និងកសិកម្ម។ ចុះចំណែកឆ្នាំ2018 ដែលជាឆ្នាំបោះឆ្នោត និងឆ្នាំ2019 ខាងមុខបន្ទាប់ទៀត តើសេដ្ឋកិច្ចប្រទេសកម្ពុជានឹងទៅជាយ៉ាងណា?។

លោកបណ្ឌិត ចាប សុថារិទ្ធ សេដ្ឋវិទូនៃវិទ្យាស្ថានខ្មែរសម្រាប់សហប្រតិបត្តិការ និងសន្តិភាព (CICP) ដែលបានបញ្ចប់ថ្នាក់បណ្ឌិតមកពីសាកលវិទ្យាល័យ (Sydney)ប្រទេសអូស្ត្រាលីបានមានប្រសាសន៍ថា យោងតាមការស្រាវជ្រាវកន្លងមក សេដ្ឋកិច្ចកម្ពុជាឆ្នាំ2018 និង2019នឹងរក្សាកំណើនថេរក្នុងរង្វង់ 6.9% ឬ7.1%ប្រហាក់ប្រហែលនឹងឆ្នាំ2017កន្លងទៅដែរ។

លោកបណ្ឌិតបញ្ជាក់បន្ថែមថា ទោះ2018 ជាឆ្នាំបោះឆ្នោតសកលក៏ដោយ ប៉ុន្តែតាមការសិក្សាស្រាវជ្រាវបានបង្ហាញថា កម្ពុជានៅតែមានស្ថិរភាពនយោបាយល្អប្រសើរ ធ្វើឱ្យវិស័យសំខាន់ៗដែលទ្រទ្រង់សេដ្ឋកិច្ចនៅតែបន្តបោះជំហានទៅមុខជាលំដាប់ ពិសេសវិស័យឧស្សាហកម្មកាត់ដេរដែលថ្មីៗនេះសហរដ្ឋអាមេរិកទើបតែបន្តការអនុគ្រោះពន្ធនាំចេញរយៈពេល 2ឆ្នាំបន្ថែមទៀត។

ចំណែកវិស័យសំណង់ និងដីធ្លីអាចនៅទ្រឹងបន្តិចនៅពេលបោះឆ្នោត ប៉ុន្តែមិនមានភាពអសកម្ម ឬថយចុះនោះទេពោលគឺសំណង់បុរីមួយចំនួននៅតែបន្តការសាងសង់ ចំណែកអតិថិជនក៏បានត្រៀមថវិកាគ្រប់គ្រាន់សម្រាប់ទិញសំណង់បុរីលំនៅឋានទាំងនោះដែរ ដោយមិនពឹងផ្អែកទៅលើកម្ចីធនាគារទាំងស្រុងនោះឡើយ ហើយវិស័យនេះអាចមានសម្ទុះល្អឡើងវិញនៅក្រោយពេលបោះឆ្នោតរួច។

ចំណែកវិស័យកសិកម្មទោះបីជាមានកំណើនយឺតក៏ដោយ ប៉ុន្តែនៅតែបន្តភាពប្រសើរឡើងបន្តិចម្តងៗជារៀងរាល់ឆ្នាំ ពិសេសប្រជាជនកម្ពុជាបានធ្វើការផ្លាស់ប្តូរពីកសិកម្មខ្នាតតូចមកជាកសិកម្មខ្នាតធំតាមរយៈការប្រើគ្រឿងយន្តជំនួសឱ្យការប្រើសត្វគោក្របីដូចមុនទៀត។ ប៉ុន្តែយ៉ាងណាក៏ដោយ លោកបណ្ឌិត សុថារិទ្ធ បានអះអាងថា ប្រជាជនខ្មែរនៅខ្វះបច្ចេកទេសរក្សាគុណភាព និងសោភ័ណភាពសម្បកវេចខ្ចប់ផលិតផលដើម្បីដណ្តើមយកទីផ្សារជាមួយប្រទេសជិតខាង ដែលករណីនេះលោកបានជំរុញឱ្យប្រជាពលរដ្ឋគួរតែផ្លាស់ប្តូរទម្លាប់ចាស់ពីការលក់ស្រូវទៅឱ្យឈ្មួញ មកជាការវិនិយោគលក្ខណៈគ្រួសារកិន និងលក់ជាអង្ករវេចខ្ចប់ឱ្យបានល្អ និងប្រកបដោយសោភ័ណភាព និងគុណភាពដើម្បីទទួលបានប្រាក់ចំណេញកាន់តែច្រើន។

យោងតាមឯកសារក្របខ័ណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈសម្រាប់ការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ2019 របស់ក្រសួងសេដ្ឋកិច្ច និងហិរញ្ញវត្ថុបានបង្ហាញថា ក្នុងឆ្នាំ2018 និងឆ្នាំ2019 សេដ្ឋកិច្ចកម្ពុជាត្រូវបានរំពឹងថានឹងនៅបន្តកំណើនក្នុងរង្វង់ប្រមាណ 7.0% ដែលទ្រទ្រង់ដោយមូលដ្ឋានកំណើនស្រដៀងគ្នានឹងឆ្នាំ2017។

ផ្អែកលើនិន្នាការខាងលើ សេដ្ឋកិច្ចកម្ពុជាឆ្នាំ 2018 និង2019 ត្រូវបានព្យាករតាមវិស័យសំខាន់4 រួមមាន 1.វិស័យកសិកម្មនឹងបន្តសម្រេចបានកំណើនយឺតក្នុងរង្វង់1.8%ក្នុងឆ្នាំ2018 និងឆ្នាំ2019។ អនុវិស័យដំណាំត្រូវបានរំពឹងថានឹងមានកំណើន 2.2%ក្នុងឆ្នាំទាំងពីរ ដោយកត្តាអាកាសធាតុអំណោយផល ភាពប្រសើរឡើងនៃប្រព័ន្ធធារាសាស្ត្រ ព្រមទាំងការកើនឡើងនៃថ្លៃអង្ករនៅលើទីផ្សារអន្តរជាតិ។

ម្យ៉ាងទៀតកម្រិតខ្ពស់នៃតម្លៃកៅស៊ូលើទីផ្សារអន្តរជាតិ គួបផ្សំនឹងកំណើនខ្ពស់នៃផ្ទៃដីចៀរជ័រកៅស៊ូនឹងលើកទឹកចិត្តឱ្យកសិករខ្នាតតូច និងក្រុមហ៊ុនឯកជនបង្កើនផលិតកម្មកៅស៊ូសម្រាប់ការនាំចេញ។ អនុវិស័យកសិកម្មត្រូវបានគេរំពឹងថានឹងមានកំណើនល្អប្រសើរផងដែរ ដែលត្រូវជំរុញដោយការបន្តកំណើនខ្ពស់នៃវារីវប្បកម្មនៅពេលដែលមាននិន្នាការកើនឡើងនៃការវិនិយោគពីសំណាក់វិស័យឯកជន និងដៃគូអភិវឌ្ឍន៍។

ការចិញ្ចឹមសត្វក៏ត្រូវបានព្យាករដែរថានឹងមានកំណើនល្អដោយសារការបន្តកំណើននៃការចិញ្ចឹមគោ និងមាន់ និងកំណើនផលិតកម្មជ្រូក ដោយសារតែការងើបឡើងវិញនៃតម្លៃជ្រូករស់។ ទោះជាដូច្នេះក្តី វិស័យកសិកម្មនៅតែបន្តជួយបញ្ហាប្រឈមច្រើន ដូចជាកំណើនផលិតភាពទាប កង្វះការវិនិយោគលើការកែច្នៃផលិតពាណិជ្ជនីយកម្មកសិកម្ម និងបញ្ហាហេដ្ឋារចនាសម្ព័ន្ធផ្សេងៗទៀត។

2.ចំណែកវិស័យឧស្សាហកម្មនឹងបន្តរក្សាកំណើនរឹងមាំក្នុងអត្រាប្រចាំឆ្នាំក្នុងរង្វង់10% និងឆ្នាំ 2018 និងឆ្នាំ2019 ដែលគាំទ្រដោយភាពរឹងមាំនៃវិស័យសំណង់ និងការបន្តកំណើននៃវិស័យកាត់ដេរស្របនឹងសម្ទុះកំណើនខ្ពស់នៃវិស័យកម្មន្តសាលមិនមែនកាត់ដេរ ទាំងសម្រាប់នាំចេញ និងបម្រើទីផ្សារក្នុងស្រុក។

ក្នុងនោះការរីកចម្រើនវិស័យសំណង់ ជាមួយនឹងអត្រាកំណើនប្រមាណជា16.7%ក្នុងឆ្នាំ2018 និងឆ្នាំ16.9%ក្នុងឆ្នាំ2019 ត្រូវបានឆ្លុះបញ្ចាំងតាមរយៈការបន្តការងាកទៅរកប្រភេទគម្រោងសំណង់តម្លៃទាប និងមធ្យមដែលជួយប៉ះប៉ូវដល់កំណើនយឺតនៃប្រភេទថ្លៃខ្ពស់។ ភាពរឹងមាំនៃវិស័យនេះត្រូវបានបន្តគាំទ្រដោយការអនុវត្តគម្រោងអភិវឌ្ឍន៍លំនៅឋានតម្លៃសមរម្យ ការប្តេជ្ញាចិត្តរបស់រាជរដ្ឋាភិបាលក្នុងការអភិវឌ្ឍ ហេដ្ឋារចនាសម្ព័ន្ធរូបវន្ត និងភាពជឿជាក់ចំពោះការវិនិយោគមួយចំនួនក្នុងឆ្នាំ2018 ដែលជាឆ្នាំត្រូវបោះឆ្នោតក៏ដោយ។

វិស័យកាត់ដេរនៅរក្សាកំណើនក្នុងរង្វង់ 5.0%ក្នុងឆ្នាំ2018 និង2019 ដោយសារសេដ្ឋកិច្ចពិភពលោក ជាពិសេសសេដ្ឋកិច្ចនៃបណ្តាប្រទេសដៃគូពាណិជ្ជកម្មរបស់កម្ពុជាមានភាពប្រសើរជាងការរំពឹងទុក។ ទោះបីជាយ៉ាងនេះក្ដី ក៏វិស័យនេះអាចបន្តប្រឈមនឹងសម្ពាធថ្លៃដើមផលិតកម្ម ដែលប៉ះពាល់ដល់ការប្រកួតប្រជែង កំណើនបៀវត្សរ៍ដែលលឿនជាងផលិតភាព ភាពមិនច្បាស់លាស់នៃការបញ្ជាទិញ និងការប្រកួតប្រជែងកាន់តែខ្លាំងជាងមុនពីបណ្តាប្រទេសផ្សេងទៀតដែលនាំចេញផលិតផលកាត់ដេរដូចកម្ពុជាដែរ។

វិស័យឧស្សាហកម្មផ្សេងទៀតត្រូវបានរំពឹងថា នៅរក្សាបានកំណើនល្អដដែលក្នុងរង្វង់11.9% ក្នុងឆ្នាំ2018 និង12.2%ក្នុងឆ្នាំ2019 ដោយសារការពង្រីកការវិនិយោគដែលមានស្រាប់ និងការវិនិយោគថ្មីក្នុងអនុវិស័យកម្មន្តសាលមិនមែនកាត់ដេរដែលជាជន្ទល់កំណើនមួយដ៏រឹងមាំរួមមានការផលិតម្ហូបអាហារ និងភេសជ្ជៈ គ្រឿងផ្គុំអេឡិចត្រូនិក គ្រឿងបន្លាស់ គ្រឿងសង្ហារិម កង់ និងស៊ីម៉ង់ត៍ជាដើម។

3.វិស័យសេវាកម្មត្រូវបានព្យាករថា នឹងមានកំ-ណើនខ្ពស់ក្នុងរង្វង់ប្រមាណ 7%ក្នុងឆ្នាំ2018 និង2019 ដោយសារការរំពឹងទុកនៃកំណើនល្អប្រសើរនៃវិស័យទេសចរណ៍ លក់ដុំ លក់រាយ អចលនទ្រព្យ និងវិស័យដឹកជញ្ជូន និងទូរគមនាគមន៍។ ក្នុងនោះវិស័យទេសចរណ៍ត្រូវបានរំពឹងថា នឹងបន្តងើបឡើងក្នុងអត្រាកំណើន 4.5%ក្នុងឆ្នាំ2018 និង4.70%ក្នុងឆ្នាំ2019 ដោយសារកំណើនខ្ពស់នៃចំនួនភ្ញៀវទេសចរអន្តរជាតិ ជាពិសេសពីតំបន់អាស៊ី ការខិតខំប្រឹងប្រែងរបស់រាជរដ្ឋាភិបាលក្នុងការផ្សព្វផ្សាយ ការលើកទឹកចិត្តឱ្យមានការបើកជើងហោះហើរត្រង់និងការដាក់ចេញនូវគោលនយោបាយនានាក្នុងគោលបំណងទាក់ទាញទេសចរបន្ថែម។

ទោះយ៉ាងនេះក្តីការធ្វើពិពិធកម្មផលិតផល និងគោលដៅទេសចរណ៍ ព្រមទាំងការទាក់ទាញភ្ញៀវចំណាយខ្ពស់នៅតែជាប្រការចាំបាច់ និងបន្ទាន់សំដៅធានាចីរភាពកំណើនវិស័យនេះ ដើម្បីបន្តតួនាទីជាជន្ទល់សំខាន់មួយសម្រាប់ទ្រទ្រង់សេដ្ឋកិច្ចជាតិ។

វិស័យលក់ដុំ និងរាយត្រូវបានព្យាករថា នឹងមានកំណើនរឹងមាំក្នុងអត្រា 7.2%ក្នុងឆ្នាំ2018 និង7.3ក្នុងឆ្នាំ2019 ដោយសារការរំពឹងទុកនៃការបន្តការកើនឡើងនៃការប្រើប្រាស់ក្នុងស្រុក។ ជាក់ស្តែងក្នុងរយៈពេលប៉ុន្មានឆ្នាំចុងក្រោយនេះ កាប្រើប្រាស់ក្នុងស្រុកត្រូវបានវាយតម្លៃថាមានសម្ទុះខ្លាំង ហើយនិន្នាការនេះនឹងនៅតែបន្តដោយសារកំណើនប្រជាជនដែលមានចំណូលមធ្យម និងការផ្លាស់ប្តូរឥរិយាបថនៃការចាយវាយដែលឆ្លុះបញ្ចាំងតាមរយៈកំណើនហាងលក់ដុំ និងរាយ និងបណ្តាភោជនីយដ្ឋានក្នុងស្រុក និងភោជនីយដ្ឋាន និងភេសជ្ជៈអន្តរជាតិជាច្រើន។

លើសពីនេះ ការបង្កើនចំណាយរបស់រាជរដ្ឋាភិបាលលើបៀវត្សរ៍ជូនមន្ត្រីរាជការស៊ីវិល និងកងកម្លាំងប្រដាប់អាវុធ ព្រមទាំងការបង្កើនការវិនិយោគលើហេដ្ឋារចនាសម្ព័ន្ធផ្សេងៗក៏នឹងរួមចំណែកយ៉ាងសំខាន់ក្នុងការជំរុញ និងបង្កើនសមត្ថភាពចំណាយក្នុងស្រុកផងដែរ។

វិស័យអចលនទ្រព្យត្រូវបានរំពឹងថា នឹងនៅតែមានកំណើនរឹងមាំក្នុងរង្វង់8.5% ក្នុងឆ្នាំ2018 និងឆ្នាំ2019 ដែលមាននិន្នាការស្របគ្នាទៅនឹងវិស័យសំណង់។ កំណើននេះនឹងត្រូវទ្រទ្រង់ដោយការកើនឡើងនៃសកម្មភាពទិញ-លក់ សំណង់អគារពាណិជ្ជកម្ម និងលំនៅស្ថានដែលមានតម្លៃទាប និងមធ្យម ដែលប៉ះប៉ូវដល់ការថមថយនៃប្រតិបត្តិការទិញ-លក់ និងជួលលំនៅឋានថ្លៃខ្ពស់ ដោយសារកំណើនខ្លាំងនៃការផ្គត់ផ្គង់ធៀបនឹងតម្រូវការ។

វិស័យដឹកជញ្ជូន និងទូរគមនាគមន៍ ត្រូវបានឮរំពឹងថានឹងបន្តកំណើនក្នុងអត្រា 7.3% ក្នុងឆ្នាំ2018 និង7.5% ក្នុងឆ្នាំ2019។កំណើនវិស័យនេះត្រូវបានជំរុញដោយគម្រោងអភិវឌ្ឍន៍ហេដ្ឋារចនាសម្ព័ន្ធថ្មីៗដូចជា ការបើកផ្លូវរថភ្លើងថ្មី ការពង្រីកព្រលានយន្តហោះ និងកំពង់ផែនានា និងការធ្វើឱ្យកាន់តែប្រសើរឡើងនៃប្រព័ន្ធឡូជីស្ទីក ដែលនឹងជួយប៉ះប៉ូវដល់កំណើនយឺត នៃការនាំចេញផលិតផលកាត់ដេរ។

សម្រាប់ផ្នែកទូរគមនាគមន៍ ផែនការវិនិយោគថ្មីលើបច្ចេកវិទ្យា 5G និងការពង្រីកវិសាលភាពគ្របដណ្តប់តំបន់ដាច់ស្រយាល នឹងជួយជំរុញទីផ្សារអ៊ីនធើណិតឱ្យមានសម្ទុះខ្លាំងក្នុងរយៈពេលខ្លី និងមធ្យមខាងមុខ។ ទោះយ៉ាងណាវិស័យនេះ ក៏ជួបប្រទះបញ្ហាប្រឈមទៅនឹងកង្វះខាតប្រព័ន្ធដឹកជញ្ជូន ពហុមធ្យោបាយ ព្រមទាំងភាពមានកម្រិតនៃជំនាញនិងវិជ្ជាជីវៈក្នុងវិស័យឡូជីស្ទីក៕

May 7, 2018

Author: វល័ក្ខ