ភ្នំពេញ៖ ដូចការគ្រោងទុកក្រសួងប្រៃសនីយ៍កម្ពុជា និងក្រុមហ៊ុនខេធីកូរ៉េ កាលពីថ្ងៃទី ២៩ ខែមិថុនា ឆ្នាំ ២០១៨ នេះ បានរួមគ្នាចុះបើកសម្ពោធសម្ធិផលអគារវិទ្យាល័យហ៊ុនសែនទួលខ្ពស់ ដែលស្ថិតនៅភូមិរកាទង ឃុំទួលខ្ពស់ ស្រុកទឹកផុស ខេត្តកំពង់ឆ្នាំង និងដាក់ឲ្យដំណើរការប្រព័ន្ធ Digital Connectivity for School ដែលជាកិច្ចសហប្រតិបត្តិការរវាងក្រសួង ប.ទ.ជាមួយសាជីវកម្មទូរគមនាគមន៍កូរ៉េ (KT) ដែលអាចប្រយោជន៍សម្រាប់ការសិក្សាពីចម្ងាយ និងឧបករណ៍អេឡិកត្រូនិកទំនើបៗនៅតាមវិទ្យាល័យ។
ឯកឧត្ដមរដ្ឋមន្ត្រី ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ឲ្យដឹងថា៖ ការតភ្ជាប់សាលារៀនឌីជីថលកម្ពុជាត្រូវបានអភិវឌ្ឍក្នុងរយៈពេលជាង ២០ ឆ្នាំមកហើយ ជាមួយនឹងកំណើនផលទុនជាតិសរុបនៅប្រទេសកម្ពុជា (GDP) សរុបជាមធ្យមប្រហែល៧% ក្នុងមួយឆ្នាំ ហើយត្រូវបានគេព្យាករណ៍ថានឹងបន្តកំណើនរបស់ខ្លួននាពេលអនាគត។ ការរួមចំណែកសំខាន់ចំពោះកំណើនរហូតមកដល់ពេលនេះ គឺដោយសារមានសុខសន្តិភាព និងស្ថេរភាពនៅក្នុងប្រទេស ជាមួយនឹងការបើកទូលាយនៅក្នុងគោលនយោបាយចំពោះការវិនិយោគពីបរទេស។
ក្នុងជំហានបន្ទាប់នៃការអភិវឌ្ឍប្រទេសកម្ពុជា គឺការផ្តោតទៅលើគុណភាពនៃកំណើន។ ដែលមានន័យថាប្រទេសកម្ពុជាត្រូវមានយុទ្ធសាស្ត្របន្ថែមទៀតទៅលើផែនការអភិវឌ្ឍន៍របស់ខ្លួន ក៏ដូចជាទាក់ទាញការវិនិយោគដែលមានគុណភាពបន្ថែមទៀតទៅលើវិស័យយុទ្ធសាស្ត្រសំខាន់ៗរបស់ខ្លួន។ ការអភិវឌ្ឍនាពេលអនាគតនឹងត្រូវពឹងផ្អែកយ៉ាងខ្លាំងលើបច្ចេកវិទ្យានិងការរួមបញ្ចូលគ្នានៃវិស័យបច្ចេកវិទ្យា ដើម្បីជួយកែលម្អការសម្រេចចិត្ត ការរៀបចំផែនការ ការប្រកួតប្រជែង និងគុណភាពដ៏ល្អនៃជីវិតសម្រាប់មនុស្សគ្រប់គ្នា។ វាច្បាស់ណាស់ថាបច្ចេកវិទ្យាគឺជាអ្នកកំណត់និន្នាការនានានៅទូទាំងពិភពលោក។ សំខាន់ជាងនេះទៀតបណ្ដារអង្គការអន្តរជាតិដូចជា អង្គការសហប្រជាជាតិ សហភាពអឺរ៉ុប សមាគមអាស៊ាន ITU និង WEF ជាដើម កំពុងលើកទឹកចិត្តដល់ប្រទេសទាំងអស់ឲ្យទទួលយកនូវបច្ចេកវិទ្យាដែលនឹងជះឥទ្ធិពលដល់ការអភិវឌ្ឍន៍របស់ប្រទេស ក៏ដូចជាដើម្បីចូលរួមបដិវត្តន៍ឧស្សាហកម្មលើកទី។
ឯកឧត្ដមបន្តថា ក្រសួងប្រៃសណីយ៍ និងទូរគមនាគមន៍កំពុងជួយគាំទ្រដល់ការអភិវឌ្ឍប្រទេសដោយផ្តោតលើគម្រោង និងកម្មវិធីដែលកំពុងជួយកម្ពុជាក្នុងការធ្វើទំនើបកម្ម និងរៀបចំសម្រាប់វិស័យសេដ្ឋកិច្ចឌីជីថលនិងបដិវត្តន៍ឧស្សាហកម្មលើកទី ៤ ។ ផ្អែកលើយុទ្ធសាស្ត្រ និងគោលនយោបាយចតុកោណរបស់រដ្ឋាភិបាលការអភិវឌ្ឍវិស័យទូរគមនាគមន៍នឹងក្លាយជាកត្តាគន្លឹះក្នុងការគាំទ្រដល់រដ្ឋាភិបាល វិស័យឯកជន សង្គមនិងវប្បធម៌ តាមរយៈការធ្វើឲ្យប្រសើរឡើងនូវការអភិវឌ្ឍន៍ និងគុណភាពនៃការអភិវឌ្ឍន៍សម្រាប់វិស័យទាំងអស់នោះ។
នេះគឺជាសូចនាករដ៏រឹងមាំមួយសម្រាប់ក្រសួងប្រៃសនីយ៍ និងទូរគមនាគមន៍ ដើម្បីជំរុញឲ្យមានគម្រោងតភ្ជាប់បន្ថែមដូចជា គម្រោង Wi-Fi សាធារណៈ និងការតភ្ជាប់ឌីជីថលទៅកាន់សាលារៀនជាគម្រោងមួយដែល ក្រសួងប្រៃសនីយ៍ និងទូរគមនាគមន៍ បានផ្តួចផ្តើមឡើងហើយនឹងបន្តគាំទ្រយ៉ាងពេញទំហឹងលើគម្រោងនេះនៅទូទាំងប្រទេស។
នៅថ្ងៃទី ៩ ខែឧសភា ឆ្នាំ ២០១៨ ក្រសួងប្រៃសនីយ៍ និងទូរគមនាគមន៍ បានផ្តល់ការគាំទ្រដល់ក្រុមហ៊ុនទូរគមនាគមន៍កម្ពុជា (TC) ដើម្បីដាក់ឲ្យដំណើរការគម្រោង Wi-Fi សាធារណៈនៅក្នុងរាជធានីភ្នំពេញដោយមានការសហការពីក្រុមហ៊ុន Korea Telecom (ខេធី) ។ ក្រុមហ៊ុនខេធីគឺជាក្រុមហ៊ុនទូរគមនាគមន៍ឈានមុខគេមួយរបស់ពិភពលោកដែលបានជួយប្រទេសកូរ៉េខាងត្បូងឲ្យអភិវឌ្ឍខ្លួនក្លាយជាប្រទេសឈានមុខគេនៅក្នុងការអភិវឌ្ឍបច្ចេកវិទ្យាគមនាគមន៍ និងព័ត៌មានវិទ្យា។ យោងតាមចំណាត់ថ្នាក់ពិភពលោកសម្រាប់សន្ទស្សន៍អភិវឌ្ឍន៍ ICT ដោយសហភាពទូរគមនាគមន៍អន្តរជាតិ (ITU) បានឲ្យដឹងថាប្រទេសកូរ៉េជាប់ចំណាត់ថ្នាក់លេខ ១ ឬទី ២ នៅលើពិភពលោកក្នុងរយៈ ៨ ឆ្នាំចុងក្រោយនេះ។
យើងមានសេចក្តីសោមនស្សរីករាយដែលមាន KT ធ្វើជាដៃគូដើម្បីជួយគាំទ្រដល់ការអភិវឌ្ឍវិស័យឧស្សាហកម្មបច្ចេកវិទ្យាគមនាគមន៍ព័ត៌មានវិទ្យាកម្ពុជា។ គម្រោង Wi-Fi សាធារណៈកំពុងប្រើបច្ចេកវិទ្យា Wi-Fi ចុងក្រោយបំផុតពីខេធី។
គម្រោងទាំងនេះនឹងអនុញ្ញាតឲ្យប្រជាជនកម្ពុជា និងភ្ញៀវទេសចរកាន់តែច្រើនដែលជាសសរស្តម្ភសេដ្ឋកិច្ចរបស់ប្រទេសកម្ពុជាអាចភ្ជាប់អ៊ិនធឺណិតដោយល្បឿនលឿនបំផុតរហូតដល់ ១ ជីហ្គាបៃក្នុងមួយវិនាទីនៅក្នុងតំបន់សាធារណៈធំ ៗ ដូចជាសួនច្បារសម្តេចហ៊ុនសែន, សួនច្បារមុខព្រះបរមរាជវាំង និងកន្លែងជាច្រើនទៀតដែលបានតភ្ជាប់ទាំងនៅរាជធានីភ្នំពេញនិងបណ្តាខេត្ត។
សព្វថ្ងៃនេះក្រសួងប្រៃសណីយ៍ និងទូរគមនាគមន៍មានក្តីសោមនស្សរីករាយយ៉ាងខ្លាំងក្នុងការគាំទ្រដល់ការបើកដំណើរការកម្មវិធីឌីជីថលសម្រាប់សាលារៀននៅវិទ្យាល័យហ៊ុនសែនទួលខ្ពស់ដោយមានការគាំទ្រពី TC និង KT ។ គោលបំណងនៃគម្រោងនេះគឺដើម្បីនាំមកនូវការតភ្ជាប់ទៅសាលារៀននៅទូទាំងប្រទេសតាមរយៈការបង្កើនការតភ្ជាប់អ៊ីនធឺណិតដែលនឹងអនុញ្ញាតឲ្យសាលារៀនភ្ជាប់ទៅការអប់រំឌីជីថលបន្ថែមទៀតដើម្បីសម្រាប់សាលាទាំងមូល។ យើងសង្ឃឹមថានឹងទទួលការគាំទ្រនិងសហការបន្ថែមទៀតជាមួយអ្នកពាក់ព័ន្ធសំខាន់ៗដូចជា ក្រសួងអប់រំ យុវជន និងកីឡា សហភាពសហព័ន្ធយុវជនកម្ពុជានិងអង្គការអប់រំអន្តរជាតិ។
លើសពីនេះទៀតយើងសង្ឃឹមថានឹងបង្កើតកម្មវិធីអប់រំសាធារណៈបន្ថែមទៀតដើម្បីជួយលើកកម្ពស់ទីក្រុងស្អាត គ្មានគ្រឿងញៀន និងកម្មវិធីអប់រំស្ទែម (STEM) ។ យើងសង្ឃឹមថាកម្មវិធីសាធារណៈទាំងនេះនឹងជួយកែលម្អអាកប្បកិរិយា និងការយល់ដឹងរបស់សាធារណៈជនដើម្បីជួយលើកកម្ពស់សកម្មភាពរួមគ្នានិងផលប្រយោជន៍របស់យើងទាំងអស់គ្នា។ យើងមានគម្រោងគាំទ្រកម្មវិធីទាំងនេះតាមរយៈការប្រើមូលនិធិសកល និងមូលនិធិ R&D Fund ដែលត្រូវបានគាំទ្រដោយក្រុមហ៊ុនទូរគមនាគមន៍ និងក្រុមហ៊ុនផ្តល់សេវាអ៊ិនធឺណេតទាំងអស់។ យើងខ្ញក៏សង្ឃឹមផងដែរដើម្បីលើកកម្ពស់គំនិតបន្ថែមទៀតដែលនឹងជួយផ្តល់ឲ្យប្រជាជនកម្ពុជានូវចក្ខុវិស័យច្បាស់លាស់អំពីការអភិវឌ្ឍន៍របស់ប្រទេសកម្ពុជានិងត្រៀមខ្លួនចូលរួមក្នុងវិស័យសេដ្ឋកិច្ចឌីជីថលយ៉ាងឆាប់រហ័ស និងបដិវត្តន៍ឧស្សាហកម្មលើកទី៤ ដែលនឹងផ្តោតលើបញ្ញាសិប្បនិម្មិត អ៊ីនធឺណិតនៅក្នុងការរស់នៅប្រចាំថ្ងៃ និង ការទាញយកទិន្នន័យធំ។
នៅពេលអនាគតយើងក៏សង្ឃឹមផងដែរក្នុងការសហការជាមួយកម្មវិធីអន្តរជាតិជាច្រើនទៀតដូចជា កម្មវិធីទប់ស្កាត់ជំងឺឆ្លងទូទាំងពិភពលោកដែលនឹងសហការជាមួយប្រទេសជាច្រើនក្នុងការជួយប្រយុទ្ធប្រឆាំងនឹងគ្រោះថ្នាក់នៃជំងឺឆ្លងទូទាំងពិភពលោកដូចជា H1N1, Zika, Ebola … ដែលមានផលប៉ះពាល់ដល់សេដ្ឋកិច្ចនិងការអភិវឌ្ឍសង្គម។ ក្រសួងប្រៃសនីយ៍ និងទូរគមនាគមន៍ប្តេជ្ញាធ្វើការជាមួយអ្នកពាក់ព័ន្ធសំខាន់ៗ ទាំងអស់ក្នុងតំបន់ និងអន្តរជាតិដើម្បីធានាថារដ្ឋាភិបាលកម្ពុជានឹងធ្វើឲ្យកម្មវិធីទាំងនេះជាអាទិភាពក្នុងការជួយធ្វើទំនើបកម្មប្រទេសនៅក្នុងគ្រប់វិស័យទាំងអស់ និងដើម្បីអភិវឌ្ឍប្រកបដោយចីរភាពជាមួយនឹងការប្តេជ្ញាចិត្តចំពោះប្រកបដោយគុណភាព។ អ្វីដែលសំខាន់បំផុតនោះគឺកម្ពុជាក្លាយទៅជាប្រទេសដ៏ល្អ និងលើកកម្ពស់គុណភាពជីវិតសម្រាប់ប្រជាជនកម្ពុជាគ្រប់ៗជំនាន់៕
