វល័ក្ខ - La Reine Media

ការចាប់អារម្មណ៍នឹងធ្លាក់លើ Hazard ពេលបែលហ្ស៊ិក ជួប បារាំង ថ្ងៃនេះ

ខ្សែបម្រើដ៏មានឥទ្ធិពល Eden Hazard នឹងក្លាយជាកីឡាករដ៏គួរឱ្យចាប់អារម្មណ៍បំផុត នៅពេលដែលក្រុមជម្រើសជាតិបែលហ្ស៊ិក ទៅជួបក្រុមប្រទេសជិតខាងរបស់ខ្លួន ក្នុងការប្រកួត World Cup វគ្គពាក់កណ្តាលផ្តាច់ព្រ័ត្រ នៅរាត្រីនេះ។

Hazard គឺជាកីឡាករក្រៅស្រុកដ៏មានទេពកោសល្យបំផុតក្នុងប្រវត្តិយុវជនរបស់បារាំង ក្នុងរយៈពេល 1ទសវត្សរ៍កន្លងមកនេះ ប៉ុន្តែរូបគេអាចនឹងក្លាយជាកីឡាករក្នុងការបញ្ចប់ការប្រជែងរបស់លោក Didier Deschamps សម្រាប់ការឈ្នះពាន World Cup។

ជាមួយនឹងការមានឈាមជ័រពីឪពុកម្តាយដែលជាកីឡាករបាល់ទាត់ ក្នុងទីក្រុង Braine-le-Comte របស់បែលហ្ស៊ិកកេរិ៍្តឈ្មោះរបស់ Hazard បានសាយភាយជុំវិញព្រំដែន ហើយការល្បីល្បាញនោះនាំឱ្យរូបគេបានផ្ទេរទៅកាន់ក្លិប Lille ក្នុងវ័យត្រឹមតែ14ឆ្នាំប៉ុណ្ណោះ។ ប៉ុន្តែភាពស្រពេចស្រពិលផ្សេងៗកំពុងតែកើតនិងចោទសួរថា តើរូបគេមានបំណងក្នុងការបង្កើតទេពកោសល្យរបស់ខ្លួន និងធ្វើការប្រជែងជាមួយនឹងCristiano Ronaldo និង Lionel Messi ក្នុងនាមជាកីឡាករដ៏ឆ្នើមបំផុតរបស់ពិភពលោក ឬយ៉ាងណា?។

នៅមុនពេលយុទ្ធនាការនេះលោក Roberto Martinez គ្រូបង្វឹកនៃក្រុមបែលហ្ស៊ិកបានឱ្យដឹងថា៖ «ខ្ញុំគិតថាEden កំពុងតែស្ថិតក្នុងពេលវេលាដ៏អស្ចារ្យបំផុតនៃអាជីពរបស់គេ។ បើនិយាយពីអាយុរបស់គេវិញ គេគឺជាប្រធានក្រុមហើយបើនិយាយពីភាពជាអ្នកដឹកនាំ រូបគេមិនដែលបង្ហាញពីការលំបាកសម្រាប់បាល់ទាត់ឡើយ»។

សុច្ឆន្ទៈ និងសមត្ថភាពរបស់ Hazard ក្នុងការគ្រប់គ្រងបាល់នៅពេលស្ថិតក្រោមសម្ពាធ និងការបញ្ជូនបាល់ផុតជើងខ្សែការពារបានបង្ហាញឱ្យឃើញរួចស្រេចទៅហើយ ខណៈដែលបែលហ្ស៊ិកបានកត់ត្រាជ័យជម្នះដ៏ធំបំផុតរបស់ពួកគេក្នុង World Cup តាមរយៈការផ្តួលក្រុមប្រេស៊ីល ក្នុងវគ្គ 8ក្រុមចុងក្រោយ។ ការប្រកួតនេះនឹងចាប់ផ្តើមនៅម៉ោង1 រំលងអធ្រាត្រ៕

ប្រភពពី៖ Channel News Asia

July 10, 2018

ចំណុចសំខាន់ក្នុងការប្រឡងបាក់ឌុបមួយចំនួនដែលបេក្ខជនចាំបាច់ត្រូវដឹង

នៅឆ្នាំនេះ ការរៀបចំប្រឡងមធ្យមសិក្សាទុតិយភូមិនៅតែមានលក្ខណៈហ្មត់ចត់ ហើយច្បាស់លាស់មិនខុសពីរាល់ឆ្នាំនេះទេ ហេតុនេះបេក្ខជនចាំបាច់ត្រូវយកចិត្តទុកដាក់លើគ្រប់ចំណុចទាំងអស់ ដើម្បីធានាថាពួកគេអាចចូលរួមប្រឡងដោយគ្មានការព្រួយបារម្ភ។

ចំពោះបញ្ហាវិន័យ និងគោលការណ៍ប្រឡង សិស្សចាំបាច់ត្រូវតែដឹង ព្រោះថា ប្រសិនបើពួកគេធ្វើខុសនឹងគោលការណ៍មួយចំនួនពួកគេអាចនឹងប្រឈមមុខជាមួយនឹងបញ្ហានានាដែលអាចឈានរហូតដល់ធ្លាក់ថែមទៀតផង។ ខាងក្រោមនេះជាគោលការណ៍មួយចំនួនដែលបេក្ខជនត្រូវដឹង៖

1- ត្រូវមកដល់មណ្ឌលប្រឡងឱ្យបានមុនដំណើរការនៃការប្រឡង
2- ត្រូវស្លៀកពាក់ឯកសណ្ឋានសិស្ស ដោយប្រើអាវពណ៌ស និងខោ ឬសំពត់ពណ៌ខៀវ ដាក់ក្នុងខោ ឬសំពត់ឱ្យបានត្រឹមត្រូវ
3- ត្រូវយកមកនូវអត្តសញ្ញាណប័ណ្ណ ឬលិខិតសម្គាល់ខ្លួនមានបិទរូបថតថ្មី និងមានចុះហត្ថលេខានាយកសាលាត្រឹមត្រូវច្បាស់លាស់។ ចំពោះបេក្ខជនស្វៃរិន ត្រូវយកមកនូវសលាកបត្រឯកត្តជន ដែលមានហត្ថលេខារបស់មន្ទីរអប់រំ យុវជន និងកីឡា រាជធានី-ខេត្ត
4- ត្រូវយកចូលក្នុងបន្ទប់ប្រឡងនូវសម្ភារប្រើប្រាស់ ដែលក្រសួងអប់រំ យុវជន និងកីឡាអនុញ្ញាតឱ្យប្រើ ៖ ប៊ិចពណ៌ខៀវ ខ្មៅដៃ បន្ទាត់ ដែកឈាន រ៉ាបព័រទ័រ។
5- ត្រូវអនុវត្តតាមការណែនាំរបស់គណៈមេប្រយោគ និងអ្នកមានសមត្ថកិច្ចថែរក្សាសណ្ដាប់ធ្នាប់ ក្នុងការដកហូតសំណៅឯកសារ សម្ភារផ្សេងៗ ដែលក្រសួងមិនអនុញ្ញាតឱ្យយកចូលក្នុងមណ្ឌលប្រឡង ឬបន្ទប់ប្រឡង
6- ត្រូវគោរពតាមការណែនាំរបស់អនុរក្ស ដូចជាអង្គុយចំតាមលេខតុ ដែលអនុរក្សបានបង្ហាញ បំពេញលើក្បាលសន្លឹកកិច្ចការ ដែលអនុរក្សបានចែកឱ្យ ប្រគល់សន្លឹកកិច្ចការជូនអនុរក្សវិញ នៅពេលដល់ម៉ោង ទោះបីកិច្ចការនោះបានធ្វើ ឬពុំបានធ្វើក៏ដោយ
7- ត្រូវរក្សាសណ្ដាប់ធ្នាប់ របៀបរៀបរយនៃការប្រឡង និងត្រូវគោរពឱ្យបានត្រឹមត្រូវនូវបទប្បញ្ញត្តិនៃការប្រឡង៕

July 10, 2018

បារាំង ថា Thierry Henry ស្ថិតក្នុងជំរំខុស សម្រាប់វគ្គ1/2ផ្តាច់ព្រ័ត្រ

នៅពេលដែលក្រុមបាល់ទាត់ជម្រើសជាតិ ត្រៀមសម្រាប់ការប្រកួត World Cup វគ្គពាក់កណ្តាលផ្តាច់ព្រ័ត្រ អតីតកីឡាករឆ្នើមរបស់បារាំង Thierry Henry នឹងសម្លឹងមើលពួកគេពីក្រោយខ្នង ពីលើកៅអីរបស់ក្រុមជម្រើសជាតិបែលហ្ស៊ិក ហើយក្រុមមានរហស្សនាមថា Les Bleus មិនអាចបញ្ឈប់ការនិយាយពីបញ្ហានេះបានឡើយ។

លោក Henry ដែលជាសមាជិករបស់ក្រុមបារាំងដែលបានឈ្នះពាន World Cup ឆ្នាំ1998 លើទឹកដីខ្លួនឯងនោះ ឥឡូវបានក្លាយជាជំនួយការគ្រូបង្វឹករបស់ក្រុមជម្រើសជាតិបែលហ្ស៊ិក គឺលោក Roberto Martinez ចាប់តាំងពីឆ្នាំ2016 មកម្ល៉េះ និងបានជួយឱ្យក្រុមដែលមានរហស្សនាមថា បិសាចក្រហមមួយនេះ ឈានទៅដល់វគ្គ 4ក្រុមចុងក្រោយនៃ World Cup ជាលើកទី2 ក្នុងប្រវត្តិសាស្ត្ររបស់ខ្លួន។

អតីតតារាឆ្នើមរូបនេះ ដែលបានស៊ុតបាល់បញ្ចូលទី 51គ្រាប់ក្នុងការបង្ហាញខ្លួនជាអន្តរជាតិ 123លើក និងបានជួយឱ្យក្រុមជម្រើសជាតិបារាំង ក្លាយជាម្ចាស់ជើងឯកពិភពលោក និង Euro នោះ បច្ចុប្បន្នកំពុងតែរៀបចំផែនការផ្សេងៗក្នុងការរារាំងមិនឱ្យឈានដល់ទៅវគ្គផ្តាច់ព្រ័ត្រក្នុងប្រទេសរុស្ស៊ី។ ខ្សែប្រយុទ្ធអន្តរជាតិបារាំង Olivier Giroud បានឱ្យដឹងថា៖ «វានឹងក្លាយជារឿងដ៏ចម្លែកមួយក្នុងការមានរូបគាត់តតាំងនឹងយើង។ គាត់កំពុងតែស្ថិតជាវីរបុរសរបស់កីឡាបាល់ទាត់បារាំង។ គាត់បានជួយដល់ក្រុមជម្រើសជាតិបារាំងជាច្រើន ហើយយើងមានការគោរពដ៏ច្រើនសម្រាប់អ្វីដែលគាត់បានធ្វើ»។

Giroud ដែលបាននិយាយដោយប្រើប្រាស់ឈ្មោះក្រៅរបស់ Henry នោះ បានបន្ថែមទៀតថា៖ «ប៉ុន្តែ ពិតណាស់ ខ្ញុំនឹងមានមោទនភាពក្នុងការបង្ហាញឱ្យលោក Titi ឃើញថាគាត់បានជ្រើសរើសជំរំខុសហើយ»។ ការប្រកួតនេះនឹងចាប់ផ្តើមនៅម៉ោង 1រំលងអធ្រាត្រ៕

ប្រភពពី៖ Channel News Asia

July 10, 2018

ស្អាតបែបតារាជាមួយ Samsung Galaxy A8 Star

ថ្មីៗនេះ ក្រុមហ៊ុនសាមសុងបានធ្វើការសម្ពោធទូរស័ព្ទ Samsung Galaxy A8 Star ដែលជាទូរស័ព្ទម៉ូដែលថ្មីក្នុងគ្រួសារត្រកូលស៊េរី A ដែល មានរូបរាងស្អាត, ទាន់សម័យនិង បង្ហាញពីភាពស៊ីវិល័យដ៏ល្អឥតខ្ចោះ ជាមួយលក្ខណៈពិសេសដ៏សម្បូរបែបជាច្រើន ដែលបំពេញទៅតាមតម្រូវការរបស់អ្នកប្រើប្រាស់បច្ចុប្បន្ន។

ចំពោះលក្ខណៈលេចធ្លោដែលគ្រាន់តែឃើញភ្លាមចាប់អារម្មណ៏បំផុត នោះ គឺអេក្រង់ FHD Super AMOLED (1280 X 2220) ទំហំ 6.3 អ៊ីញ ដែលបង្ហាញរូបភាពច្បាប់ ធំទូលាយ និងសាកសមបំផុតសម្រាប់អ្នកដែលចូលចិត្តលេងហ្គេម ទស្សនាវីដេអូ ព្រោះអេក្រង់នេះមានមុខងារផ្តល់ពណ៌ និងរូបភាពច្បាស់កម្រិតខ្ពស់បានយ៉ាងល្អ។

ក្រៅពីអេក្រង់ដ៏ធំនិងកម្រិតភាពច្បាស់ដ៏លេចធ្លោ ចំណុចដ៏ទាក់ទាញមួយទៀតរបស់ Samsung Galaxy A8 star គឺបំពាក់នូវកាមេរ៉ាភ្លោះខាងក្រោយទំហំ 16 មេហ្គាភិចសែល(F1.7) និងកាមេរ៉ាខាងមុខទំហំ 24 មេហ្គាភិចសែល ជាមួយនឹងការរចនាបែបថ្មីដែលមានរាងបញ្ឈរនៅគៀនខាងឆ្វេងនិង LED Flash នៅពីខាងក្រោម។

ម្យ៉ាងវិញទៀត Samsung Galaxy A8 star ក៏ភ្ជាប់ជាមួយមុខងា Live Focus ដែលអាចចាប់យករូបភាពខាងមុខច្បាស់នឹងធ្វើឲ្យផ្ទៃខាងក្រោយព្រាលព្រមទាំងមុខងារ Selfie Focus ដែលត្រូវបានរចនាឡើងជាពិសេសសម្រាប់ការថតសែលហ្វីដោយផ្តោតលើរូបអ្នកនិងមិត្តភក្តិរបស់អ្នកបានយ៉ាងច្បាស់ស្រស់ស្អាតនិងលេចធ្លោទៅតាមភាពទាន់សម័យនៃបច្ចេកវិទ្យាកាមេរ៉ានាពេលបច្ចុប្បន្ន។

ក្រៅពីអេក្រង់ និងកាមេរ៉ា ចំណុចខាងក្រោមនេះជាលក្ខណៈសម្បត្តិ ដែលយើងគួរយល់ដឹងអំពីទូរស័ព្ទដៃមួយនេះ៖

– បំពាក់នូវRAMទំហំ 4GB មេម៉ូរីទំហំ 64GB និងអាចបន្ថែមម៉េម៉ូរីកាត micro SD រហូតដល់ 400GB
– ទូរស័ព្ទដៃ ស៊ីម2
– អាចប្រើប្រាស់ គណនីបាន 2 (Dual Accounts) លើកម្មវិធី Facebook, Line, Viber, Telegram WeChat និង WhatsApp ជាដើម។
– ល្បឿនដំណើរការដោយ Octa- Core 2.2 GHz + 1.8 GHz ដែលធ្វើឲ្យទូរស័ព្ទដំណើរការបានលឿន ទោះបើកកម្មវិធីច្រើនក៏ដោយ។
– កម្លាំងថ្ម 3,700mAh
– ស្កេនផ្ទៃមុខ (Face Recognition) និងស្កេនក្រយ៉ៅម្រាមដៃ (Fingerprint)

ឥឡូវនេះ Samsung Galaxy A8 star បានដាក់លក់ជាផ្លូវការនៅតាមបណ្តាហាងទំនើបសាមសុងនិងដេប៉ូចែកចាយទូរស័ព្ទសាមសុងទូទាំងប្រទេសកម្ពុជាជាមួយនឹង តម្លៃ $525 ដែលភ្ជាប់ជាមួយជម្រើស2ពណ៌រួមមាន៖ពណ៌ខ្មៅ និងពណ៌ស៕

July 9, 2018

កាសែតឡារ៉ែន ពាណិជ្ជ លេខ 133

[easy_media_download url=”https://www.lareine.com.kh/wp-content/uploads/2018/07/LRPN_133-Final-For-Web.pdf” force_dl=”1″]

July 7, 2018

លោក Southgate៖ អង់គ្លេស ត្រូវតែបង្ហាញពីភាពខ្លាំងពេលប៉ះ ស៊ុយអែត

លោក Gareth Southgate ដែលជាអ្នកចាត់ការទូទៅ បានបញ្ជាក់ថា ក្រុមបាល់ទាត់ជម្រើសជាតិអង់គ្លេស «ប្រហែលជាមិនមានឱកាសបែបនេះម្តងទៀតឡើយ» ខណៈដែលលោកកំពុងតែរៀបចំផែនការផ្សេងៗក្នុងការយកឈ្នះលើក្រុមជម្រើសជាតិស៊ុយអែត ក្នុងការប្រកួតវគ្គ៨ក្រុមចុងក្រោយ ដើម្បីឈានទៅប្រកួតក្នុងព្រឹត្តិការណ៍ World Cup វគ្គពាក់កណ្តាលផ្តាច់ព្រ័ត្រ ជាលើកទី1ក្នុងរយៈពេល៣ទសវត្សរ៍។

លោក Southgate បានប្រាប់បណ្តាញសារព័ត៌មាន BBC កាលពីថ្ងៃព្រហស្បតិ៍ថា ក្រុមប្រជុំដោយកីឡាការវ័យក្មេងរបស់លោក ដែលត្រូវបានដឹកនាំដោយខ្សែបយុទ្ធ Harry Kane «ត្រូវតែប្រឹងឲ្យអស់ពីសមត្ថភាព» ក្នុងយុទ្ធនាការនៅប្រទេសរុស្ស៊ី។ លោក Southgate បានឲ្យដឹងថា៖ «វាជាឱកាសដ៏អស្ចារ្យមួយ ហើយបើទោះបីក្រុមរបស់យើងនឹងមានទេពកោសល្យល្អប្រសើរជាង2ឆ្នាំមុនក៏ដោយ ប៉ុន្តែ យើងប្រហែលជាមិនមានឱកាសបែបនេះម្តងទៀតឡើយ»។

ការដណ្តើមបានជ័យជម្នះដោយការស៊ុតបាល់ប៉េណាល់ទីរបស់អង់គ្លេស លើក្រុមជម្រើសជាតិកូឡុំប៊ី ក្នុងវគ្គ16ក្រុមចុងក្រោយមានន័យថា មានតែក្រុមស៊ុយអែតប៉ុណ្ណោះ ជាឧបស័គ្គរបស់ពួកគេក្នុងការឈានទៅវគ្គពាក់កណ្តាលផ្តាច់ព្រ័ត្រ ជាលើកទី1 បើគិតចាប់តាំងពីឆ្នាំ1990។

លោក Southgate បានបញ្ជាក់ថា លោកកំពុងតែសម្លឹងឆ្ពោះទៅកាន់ការប្រកួតវគ្គ៨ក្រុមចុងក្រោយជាមួយនឹងក្រុមស៊ុយអែត នៅថ្ងៃសៅរ៍នេះ រួចជាស្រេច ក្នុងទីក្រុង Samara ដើម្បីប្រជែងយកកៅអីទៅជួបក្រុមក្រូអាស៊ី ឬរុស្ស៊ី ក្នុងវគ្គ៤ក្រុមចុងក្រោយ។

លោក Southgate ដែលការស៊ុតបាល់ប៉េណាល់មិនចូលទីរបស់លោកបានធ្វើឲ្យក្រុមអង់គ្លេស ចាញ់អាល្លឺម៉ង់ ក្នុងវគ្គ1/2ផ្តាច់ព្រ័ត្រនៃព្រឹត្តិការណ៍ Euro ឆ្នាំ1996 នាកីឡដ្ឋាន Wembley នោះ បានឲ្យដឹងថា៖ នេះគឺជាលទ្ធផលដ៏ពិសេស ប៉ុន្តែ ខ្ញុំចង់ឲ្យយើងបន្តដំណើរទៅមុខ។

គ្រូបង្វឹករូបនេះបានបន្ថែមទៀតថា៖ ស៊ុយអែត គឺជាក្រុមមួយទៀតដែលយើងមានកំណត់ត្រាដ៏អន់ពេលជួបគ្នា។ យើងបានមើលស្រាលពួកគេអស់រយៈពេលជាច្រើនឆ្នាំមកហើយ។ ពួកគេបានបង្កើតរឿងផ្ទាល់របស់ពួកគេ និងបានបង្កើតប្រវត្តិសាស្ត្រ។ ខ្ញុំមិនទាន់ចង់ទៅផ្ទះនៅឡើយទេ។ ការប្រកួតនៅថ្ងៃសៅរ៍នេះ នឹងចាប់ផ្តើមនៅម៉ោង៩យប់៕

ប្រភពពី៖ Channel News Asia

July 6, 2018

អ្នកក្លែងបន្លំ និងអ្នកចែករំលែកព័ត៌មានមិនពិតតាមប្រព័ន្ធអនឡាញ ត្រូវមានទោសចាប់ពីពេលនេះតទៅ

ភ្នំពេញ៖ ក្រោយពីសង្កេតឃើញថា មានប្រជាពលរដ្ឋខ្មែរភាគច្រើន ដែលកំពុងប្រើប្រាស់បណ្ដាញសង្គម និងចែករំលែកព័ត៌មានមិនពិត ដែលជាហេតុនាំឱ្យមានការយល់ច្រឡំពីស្ថានភាពសង្គមជាក់ស្ដែងនោះ ក្រសួងមហាផ្ទៃ ក្រសួងប្រៃសនីយ៍ និងទូរគមនាគមន៍ និងក្រសួងព័ត៌មាន បានចេញសេចក្តីប្រកាសព័ត៌មានរួមគ្នាមួយ ដែលមាន 10មាត្រា ដោយជូនដំណឹងដល់អ្នកប្រើប្រាស់ទាំងនោះ ឱ្យមានការប្រុងប្រយ័ត្នមុននឹងផ្សព្វផ្សាយ។

សេចក្ដីប្រកាសនេះ មានគោលដៅប្រឆាំង ទប់ស្កាត់ រាល់ការផ្សព្វផ្សាយ ឬចែករំលែកខ្លឹមសារព័ត៌មាន ឬសារជាអក្សរ សំឡេង រូបភាព វីដេអូ ឬក្នុងទម្រង់ផ្សេងៗ ដែលមានចេតនាបង្កជាចលាចលបណ្ដាលឱ្យអន្តរាយដល់វិស័យការពារជាតិ សន្តិសុខជាតិ ទំនាក់ទំនងជាមួយប្រទេសដទៃ សេដ្ឋកិច្ចជាតិ សណ្ដាប់ធ្នាប់សាធារណៈ ការរើសអើង និងវប្បធម៌ ប្រពៃណីជាតិ។

សេចក្ដីប្រកាសខាងលើនេះមានខ្លឹមសារដូចតទៅ៖

July 6, 2018

Cavani អាចនឹងអវត្តមាន ពេលអ៊ុយរូហ្គាយ ប៉ះ បារាំង នៅរាត្រីនេះ

ខ្សែប្រយុទ្ធអន្តរជាតិអ៊ុយរូហ្គាយ Edinson Cavani អាចនឹងត្រូវអវត្តមានក្នុងការប្រកួតព្រឹត្តិការណ៍ World Cup វគ្គ8ក្រុមចុងក្រោយរបស់ក្រុមរបស់គេ ក្នុងពេលប៉ះជាមួយនឹងក្រុមជម្រើសជាតិបារាំង នៅរាត្រីថ្ងៃសុក្រនេះ ក្រោយពីបានរងរបួសកំភួនជើង ក្នុងពេលក្រុមខ្លួនទទួលជ័យជម្នះក្នុងវគ្គ 16ក្រុមចុងក្រោយ លើក្រុមជម្រើសជាតិព័រទុយហ្គាល់។

សហព័ន្ធកីឡាបាល់ទាត់អ៊ុយរូហ្គាយហៅកាត់ថា UFA បានបង្ហោះរូបថតជាច្រើនទាក់ទងនឹងការហ្វឹកហាត់កាលពីថ្ងៃពុធ នៅលើបណ្តាញសង្គម ខណៈដែល Cavani បានអវត្តមាន។ ក្រោយពីការត្រួតពិនិត្យកាលពីថ្ងៃចន្ទ ក្រុមវេជ្ជបណ្ឌិតបានប្រកាសថា តារាឆ្នើមរបស់ក្លិប Paris Saint-Germain រូបនេះ បានរងរបួសត្រងកំភួនជើងឆ្វេងរបស់គេ បើទោះបីវាមិនរហែកសាច់ដុំដោយ។

ស្របពេលដែល Cavani វ័យ31ឆ្នាំ នឹងត្រូវអវត្តមាន លោក Oscar Tabarez គ្រូបង្វឹកនៃក្រុមជម្រើសជាតិអ៊ុយរូហ្គាយ អាចនឹងប្រើប្រាស់ Cristhian Stuani នៅតំបន់ប្រយុទ្ធរួមជាមួយនឹងខ្សែប្រយុទ្ធ Luis Suarez។ ជាមួយគ្នានេះ តំបន់ការពារដ៏រឹងមាំរបស់ក្រុមជម្រើសជាតិអ៊ុយរូហ្គាយ អាចនឹងក្លាយជាចំណុចកាត់សេចក្តីក្នុងពេលប្រកួតជាមួយនឹងបារាំង ខណៈដែលពួកគេបានរបូតគ្រាប់បាល់ត្រឹមតែ១គ្រាប់គត់ក្នុងយុទ្ធនាការ World Cup មកទល់ពេលនេះ។

បើទោះបី ក្រុមជម្រើសជាតិបារាំង ដាក់ក្តីសង្ឃឹមទៅលើខ្សែប្រយុទ្ធវ័យក្មេង Kylian Mbappe ក៏ដោយ ប៉ុន្តែ វាហាក់ដូចជាមិនអាចទៅរួចឡើយដែលតារាឆ្នើមរូបនេះ អាចទម្លុះតំបន់ការពារដ៏រឹងមាំមួយដូចជាក្រុមអ៊ុយរូហ្គាយ ដោយងាយស្រួលនោះ។ ការប្រកួតក្នុងវគ្គ8ក្រុមចុងក្រោយ ដ៏រំភើបមួយនេះ ក្នុងទីក្រុង Nizhny Novgorod អាចនឹងត្រូវកាត់សេចក្តីដោយការប្រជែងគ្នាមួយរវាងតំបន់ការពាររបស់អ៊ុយរូហ្គាយ និងខ្សែប្រយុទ្ធល្បឿនលឿន Mbappe វ័យ19ឆ្នាំ។

ខណៈដែលត្រូវបានដឹកនាំដោយប្រធានក្រុម Diego Godin ដែលចាប់ដៃគូជាមួយនឹងកីឡាករ Jose Gimenez, Martin Caceres និង Diego Laxalt រួមជាមួយនឹងអ្នកចាំទីដៃស្អិត Fernando Muslera តំបន់ការពាររបស់អ៊ុយរូហ្គាយ មានកំណត់ត្រាដ៏ល្អបំផុតក្នុងយុទ្ធនាការ World Cup។ ការប្រកួតនេះនឹងចាប់ផ្តើមនៅម៉ោង9យប់៕

ប្រភពពី៖ Channel News Asia

July 6, 2018

ក្លិបកម្សាន្ត Epic 2 នឹងបើកដំណើរការជាផ្លូវការនៅថ្ងៃស្អែកនេះ ជាមួយការបញ្ចុះតម្លៃ 30%

ភ្នំពេញ៖ បន្ទាប់ពីទទួលបានការគាំទ្រ ក៏ដូចជាដើម្បីពង្រីកវិសាលភាពឱ្យកាន់តែប្រសើរជាងមុននោះ ក្លិបកម្សាន្ត Epic នឹងចាប់ផ្ដើមបើកដំណើរការសាខាទី2 (Epic 2) របស់ខ្លួននៅថ្ងៃសៅរ៍ ទី07 ខែកក្កដា ស្អែកនេះ ដែលមានទីតាំងនៅស្ថិតនៅមជ្ឈមណ្ឌលពាណិជ្ជកម្ម Eden Garden ពោលគឺកណ្ដាលរាជធានីភ្នំពេញ ដោយមានការបញ្ចុះតម្លៃរហូត 30ភាគរយគ្រប់ភ្ញៀវទាំងអស់។

លោក Faz Ghotbi នាយកគ្រប់គ្រងក្រុមហ៊ុន Epic Group បានបញ្ជាក់ឱ្យដឹងថា មូលហេតុសំខាន់ដែល Epic Group ជ្រើសរើសទីតាំងខាងលើដោយសារតែវាជាទីតំបន់អភិវឌ្ឍន៍ថ្មី និងសម្បូរទៅដោយភោជនីយដ្ឋាន និងអគារពាណិជ្ជកម្មជាច្រើន ហើយវាក៏ជាទីតាំងមួយដ៏ល្អសម្រាប់អតិថិជនរបស់ Epic ជាពិសេសគឺវាស្ថិតនៅចំកណ្ដាលទីក្រុងតែម្ដង។

មួយវិញទៀត ពាក់ព័ន្ធនឹងថវិកាដែលត្រូវចំណាយលើកាវិនិយោគទុនដើម្បីបង្កើតក្លិប Epic 2 នេះឡើងមិនត្រូវបានលោក Faz បញ្ជាក់ពីតួលេខពិតឡើយ ដោយគ្រាន់តែបង្ហើបឱ្យដឹងថា ថវិកាដែលត្រូវចំណាយគឺលើសពីគម្រោងដែលបានគ្រោងទុក ប៉ុន្តែលោកសប្បាយរីករាយ ព្រោះក្រុមការងាររបស់ Epic បានធ្វើវាឡើងយ៉ាងល្អប្រសើរ។

លោក Mort Chanraksmey នាយកគ្រប់គ្រងទូទៅបានបញ្ជាក់ឱ្យដឹងថា ក្លិបកម្សាន្ត Epic 2 មានលក្ខណៈពិសេសច្រើនដោយបានបង្កើត និងរៀបចំនូវប្រព័ន្ធសំឡេងដែលល្អឥតខ្ចោះ និងប្រព័ន្ធភ្លើងដែលមានភាពស្រស់ស្អាត ជាពិសេសគឺការផ្ដល់សេវាកម្មពីសំណាក់បុគ្គលិក ដោយពួកគាត់ទទួលបានការបង្ហាត់បង្រៀនយ៉ាងល្អគ្រប់ផ្នែក ទាំងការទទួលភ្ញៀវ បម្រើភ្ញៀវ។

លោក Chanraksmey បានឱ្យដឹងទៀតថា Epic មិនត្រឹមតែផ្ដល់សេវាកម្មលើផ្នែកកម្សាន្ត និងទាក់ទាញភ្ញៀវទេសចរណ៍បរទេសនោះទេ Epic ក៏បានចូលរួមនៅក្នុងវិស័យមនុស្សធម៌ និងបានជួយសង្គមជាច្រើនផងដែរ ដូចជាបង្កើតព្រឹត្តិការណ៍ដើរសំអាតទីក្រុង ជាពិសេសគឺបានឧបត្ថម្ភដល់មន្ទីរពេទ្យគន្ធបុប្ភាជាប្រចាំខែ ក៏ដូចជាមជ្ឈមណ្ឌលកុមាកំព្រា ហើយអ្វីដែលពិសេសជាងនេះទៅទៀតនោះគឺ Epic តែងតែជួយដល់បុគ្គលិកនៅក្នុងក្រុមហ៊ុនផ្ទាល់នៅពេលដែលពួកគាត់មានទុក្ខលំបាក។

លោក Faz Ghotbi បានរំលេចបន្ថែមទៀតថា ក្លិបកម្សាន្ត Epic មិនត្រឹមតែទាក់ទាញភ្ញៀវទេសចរណ៍ក្នុងស្រុកប៉ុណ្ណោះទេ ថែមទាំងទាក់ទាញភ្ញៀវទេសចរណ៍អន្តរជាតិផងដែរ ដែលកន្លងមកក្រុមការងារ Epic ក៏ធ្លាប់បានធ្វើការងារជាមួយនឹងក្រសួងទេសចរណ៍ និងទទួលបានការកោតសរសើរផងដែរ។ ចំណែកពាក់ព័ន្ធនឹងសំណួរដែលសួរថា តើ Epic មានគម្រោងបើកសាខាទី3 ដែរ ឬទេ? លោក Faz បានឆ្លើយថា Yes! វានឹងកើតឡើងនៅក្នុងឱកាសដ៏សមស្រពណាមួយ ហើយ Epic Group មិនត្រឹមតែចង់ពង្រីកវិសាលភាពនៅតែក្នុងប្រទេសកម្ពុជានោះទេ គឺមានគម្រោងពង្រីកឈ្មោះ Epic ទៅតាមបណ្ដាប្រទេសផ្សេងៗនៅជិតខាង ដូចជាថៃ និងមីយ៉ាន់ម៉ាជាដើម៕

July 6, 2018

ក្រុមហ៊ុន Samsung បានបរិច្ចាកថវិកាចំនួន 5,100,000រៀលពីកម្មវិធី “Slow-mo Challenge’’ របស់ Samsung Galaxy S9/S9+ ជូនទៅមន្ទីពេទ្យគន្ធបុប្ផា

នៅថ្ងៃទី05 ខែកក្កដា ឆ្នាំ2018 ក្រុមហ៊ុនសាមសុង បានធ្វើការប្រគល់ថវិកាជូនដល់មន្ទីពេទ្យគន្ធបុប្ផា ពីកម្មវិធី “Slow-mo Challenge’’ របស់ Galaxy S9/S9+ ដើម្បីចូលរួចចំណែកជួយដល់កុមារកម្ពុជាដែលទទួលការព្យាបាលពីមន្ទីពេទ្យនេះ។

ការបង្កើតកម្មវិធីនេះឡើងគឺដើម្បីផ្តល់ឱកាសដល់អតិថិជនសាមសុងទាំងអស់ក្នុងការចូលរួចចំណែកផ្តល់វិភាគទានជូនដល់សង្គមនិងបង្ហាញពីសម្ថតភាពដ៏អស្ចារ្យរបស់កំពូលទូរស័ព្ទស្មាតហ្វូនគឺ Samsung Galaxy S9/S9+ ។

លើសពីនេះទៅទៀតអតិថិជនដែលស្រឡាញ់ពេញចិត្តនឹងផលិតផលសាមសុង មិនត្រឹមតែបានរីករាយជាមួយនឹងមុខងាររបស់ទូរស័ព្ទប៉ុណ្ណោះទេ ប៉ុន្តែពួកគាត់ក៏បង្កើតបាននូវអនុស្សាវរីយ៍ល្អៗជាមួយមិត្តភក្តិ ហើយជាមួយគ្នានោះដែរ ពួកគាត់ក៏បានចូលរួមជួយដល់កុមារៗនៅមន្ទីរពេទ្យគន្ធបុប្ផាផងដែរ។

កម្មវិធីនេះត្រូវបានប្រកាសឲ្យចាប់ផ្ដើមកាលពីថ្ងៃទី15 ខែឧសភា ដល់ថ្ងៃទី5 ខែកក្កដា ឆ្នាំ2018កន្លងទៅនេះហើយទទូលបានការចូលរួមចំនួន 110 វីដេអូ ហើយវីដេអូនីមួយៗក្រុមហ៊ុនបរិច្ចាកទឹកប្រាក់ចំនួន១០,០០០រៀលទៅមន្ទីរពេទ្យគន្ធបុប្ផា។

មិនត្រឹមតែប៉ុណ្ណោះ ក្រុមហ៊ុនក៏បានបរិច្ចាក ទឹកប្រាក់ចំនួន 4,000,000រៀលបន្ថែមទៀតពីលើការបង្កើតវីដេអូនេះផងដែរ។នេះបើតាមប្រសាសន៏របស់លោក Seungho Choi អគ្គនាយកសាខាក្រុមហ៊ុនថៃសាមសុងអេឡិចត្រូនិកប្រចាំប្រទេសកម្ពុជា។

ដោយឡែកអ្នកដែលបានចូលរួមក្នុងការបង្កើតវីដេអូនេះក៏មានឱកាសឈ្នះរង្វាន់ Samsung Galaxy S9+ ( 256GB) 1គ្រឿងផងដែរ។

លោក មាស កក្កដា ដែលជាអ្នកឈ្នះរង្វាន់ Samsung Galaxy S9+ ( 256GB) 1គ្រឿង ពីការបង្តើតវីដេអូSlow-moបាននិយាយថា៖«នេះគឺជាលើកទីមួយហើយដែលខ្ងុំបានចូលរួមក្នុងការបង្កើតវីដេអូក្នុងកម្មវិធី “Slow-mo Challenge’’ របស់ក្រុមហ៊ុនសាមសុងដើម្បីចូលរួមជួយដល់កុមារកម្ពុជាក៏ដូចជារួមចំណែកជួយដល់សង្គមជាតិផងដែរហើយខ្ងុំជឿជាក់ថាក្រុមហ៊ុនសាមសុងនឹងមានកម្មវិធីល្អៗជាច្រើនទៀតដើម្បីបើកឱកាសឲ្យកាន់តែទូលំទូលាយក៏ដូចជាការបំផុសទឹកចិត្តស្រលាញ់និងចូលរួមចំណែកជួលដល់សង្គមជាតិហើយក៏សូមជូនពរក្រុមហ៊ុនសាមសុងទទួលបានភាពជោគជ័យ និងបន្តបង្កើតបច្ចេកវិទ្យាដ៏ទំនើបៗបន្តទៀតដើម្បីបំពេញតម្រូវការសព្វថ្ងៃរបស់អតិថិជន»៕

July 6, 2018

Author: វល័ក្ខ