វល័ក្ខ - La Reine Media

Cam-Paint ជប់លៀងបុគ្គលិកក្នុងឱកាសបុណ្យចូលឆ្នាំថ្មី

មុនឱកាសពិធីបុណ្យចូលឆ្នាំថ្មីចូលមកដល់ ក្រុមហ៊ុន Cam-Paint ថ្នាំពណ៌ជាតិបានរៀបចំពិធីជប់លៀងជូនបុគ្គលិករបស់ខ្លួន ដោយមានតុបតែងរោងពិធីតាមរបៀបប្រពៃណីខ្មែរបុរាណពិតៗ ដើម្បីជាការថ្លែងអំណរគុណដល់ពួកគេដែលបានខិតខំបំពេញការងារជូនក្រុមហ៊ុនកន្លងមក។

លោក សោម សម្បត្តិ នាយកប្រតិបត្តិក្រុមហ៊ុន Cam-Paint ថ្នាំពណ៌ជាតិ មានប្រសាសន៍ថា នេះជាលើកទី13 ហើយដែលក្រុមហ៊ុនបានប្រារព្ធពិធីជប់លៀងជូនបុគ្គលិក ដើម្បីឱ្យពួកគាត់បានទទួលទានអាហារសាមគ្គី សប្បាយរីករាយជាមួយគ្នាក្នុងឱកាសចូលឆ្នាំថ្មីចូលមកដល់។

លោកប្រាប់ថា នេះមិនមែនជាការលើកទឹកចិត្តបុគ្គលិកនោះទេ ដោយក្រុមហ៊ុនបានផ្តល់ប្រាក់លើកទឹកចិត្ត និងផ្តល់រង្វាន់ការងារទៅតាមផ្នែកនីមួយៗរួចហើយ ការរៀបចំពិធីជប់លៀងនេះគឺគ្រាន់តែឱ្យពួកគេបានជួបជុំគ្នា ទទួលទានអាហារសាមគ្គីជាមួយគ្នា រាំច្រៀងលេងសប្បាយជាមួយគ្នា និងចាប់រង្វាន់យកកាដូរអនុស្សាវរីយជាមួយគ្នាប៉ុណ្ណោះ។

គួរបញ្ជាក់ថាក្នុងចំណោមបុគ្គលិកចំនួន180នាក់ ក្រុមហ៊ុនបានផ្តល់រង្វាន់គ្រប់ៗគ្នាមិនខ្វះម្នាក់នោះឡើយ គ្រាន់តែរង្វាន់តិច ឬច្រើនប៉ុណ្ណោះ៕

April 21, 2017

ឆ្នាំ 2017 នេះ ប្រាក់ឈ្នួលកម្មករកាត់ដេរ និងស្បែកជើង ទទួលបានចាប់ពី 170ដល់ 181 ដុល្លារ

រដ្ឋមន្ត្រីលើកឡើងថា សម្រាប់ឆ្នាំ 2017នេះ ប្រាក់ឈ្នួលកម្មករនិយោជិតម្នាក់ៗទទួលបានប្រាក់ឈ្នួលចាប់ពី 170ដុល្លារអាមេរិក ទៅ 181 ដុល្លារអាមេរិក ក្នុងមួយខែ ដោយបូករួមទាំងប្រាក់អត្ថប្រយោជន៍ផ្សេងៗ និងប្រាក់អតីតភាពផងដែរ។

ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួការងារ និងបណ្តុះបណ្តាលវិជ្ជាជីវៈ មានប្រសាសន៍ថា ប្រាក់ឈ្នួលអប្បបរមា គិតចាប់ពីឆ្នាំ 1997 ដល់ឆ្នាំ 2017 រាជរដ្ឋាភិបាលបានដំឡើងប្រាក់ឈ្នួលអប្បបរមា និងអត្ថប្រយោជន៍ផ្សេងៗជូនកម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើង បានចំនួន 13លើក ដោយកើនដល់ 30ដុល្លារអាមេរិក។

ក្នុងន័យនេះ ឯកឧត្តមថា សម្រាប់ឆ្នាំ 2017 ដោយបូករួមទាំងប្រាក់អត្ថប្រយោជន៍ផ្សេងៗ និងប្រាក់អតីតភាពកម្មករនិយោជិតម្នាក់ៗទទួលបានប្រាក់ឈ្នួលចាប់ពី 170ដុល្លារអាមេរិក ទៅ 181 ដុល្លារអាមេរិកក្នុងមួយខែផងដែរ។

បរិបទមួយដែលប្រទេសក្នុងតំបន់កំពុងមានការប្រកួតប្រជែង ក្នុងវិស័យពាណិជ្ជកម្មអន្តរជាតិ ជាពិសេសផ្នែកវាយនភណ្ឌកាត់ដេរ និងផលិតស្បែកជើង ការគ្រប់គ្រងលើតម្លៃពលកម្មដ៏សមស្របមួយគឺជាចំណុច អាទិភាពមួយដែលប្រទេសកម្ពុជាត្រូវគិតគូរជាចាំបាច់។ ដូច្នេះ ការពង្រឹងយន្តការកំណត់ប្រាក់ឈ្នួលអប្បបរមា គឺពិតជាមានសារៈសំខាន់ក្នុងការឆ្លើយតបទៅនឹងស្ថានភាពសេដ្ឋកិច្ច និងសង្គម។

ឯកឧត្តមរដ្ឋមន្ត្រីថា ដើម្បីធានានូវយន្តការកំណត់ប្រាក់ឈ្នួលអប្បបរមា មានប្រយោជន៍យ៉ាងខ្លាំង ក្នុងការធានាសុខដុមរមនានៃទំនាក់ទំនងវិជ្ជាជីវៈ ក៏ដូចជាការលើកកម្ពស់កម្រិតជីវភាពកម្មករនិយោជិត ព្រមទាំងធានាស្ថិរភាព និរន្តរភាព នៃវិស័យពាណិជ្ជកម្ម និងការទាក់ទាញការវិនិយោគនៅប្រទេសកម្ពុជា ក្រសួងបានរៀបចំសេចក្ដីព្រាងច្បាប់ស្ដីពីប្រាក់ឈ្នួលអប្បបរមា អនុលោមតាមរដ្ឋធម្មនុញ្ញនៃព្រះរាជាណាចក្រកម្ពុជា មាត្រា 36 វាក្យខណ្ឌទី 2បញ្ញត្តថា ប្រជាពលរដ្ឋខ្មែរទាំងពីរភេទ មានសិទ្ធិទទួលប្រាក់បំណាច់ស្មើៗគ្នា ចំពោះការងារដូចគ្នា៕

April 21, 2017

CBS ចាប់ដៃគូជាមួយ Legend Tiger លើការផលិតស្ប៉តពាណិជ្ជកម្ម

សក្តានុពលទីផ្សារដែលមានទំហំកាន់តែធំបានជំរុញឱ្យក្រុមហ៊ុនដែលមានជំនាញផ្នែកផលិតស្ប៉តពាណិជ្ជកម្មធំ និងល្អជាងគេចំនួន2 នៅកម្ពុជាសម្រេចចាប់ដៃគូគ្នាដើម្បីបង្កើនសមត្ថភាពរបស់ខ្លួនឱ្យបានកាន់តែខ្លាំងឡើងបន្ថែមទៀត។

លោក Bernard Anthony អគ្គនាយកនៃក្រុមហ៊ុនខេមបូឌា ប្រូឃែសស្ទីង សឺវីស (CBS)ដែលកំពុងប្រតិបត្តិការគ្រប់គ្រងលើទូរទស្សន៍ CTN, MyTv និង CNC បាននិយាយថា កំណើនសេដ្ឋកិច្ចដែលមានភាពរឹងមាំនារយៈពេលប៉ុន្មានឆ្នាំចុងក្រោយនេះ បានជំរុញឱ្យក្រុមហ៊ុនធំៗលំដាប់អន្តរជាតិជាច្រើនចូលមកវិនិយោគ និងបើកសាខានៅកម្ពុជា ហើយស្របពេលនេះគេក៏ឃើញមានក្រុមហ៊ុនក្នុងស្រុកលេចរូបរាងឡើងច្រើនផងដែរ។

លោកបានបន្តថា ក្រុមហ៊ុនទាំងនោះសុទ្ធតែត្រូវការផលិតស្ប៉តពាណិជ្ជកម្មដើម្បីផ្សព្វផ្សាយផលិតផល និងសេវាកម្មរបស់ខ្លួន។

លោកបានអះអាងថា៖“ដោយមើលឃើញពីចន្លោះប្រហោងនៃតម្រូវការ និងការផ្គត់ផ្គង់នេះ ទើបក្រុមហ៊ុន CBS សម្រេចចាប់ដៃគូជាមួយក្រុមហ៊ុន Legend Tiger Investment Co., Ltd ដើម្បីរួមគ្នាបង្កើតក្រុមហ៊ុនផលិតស្ប៉តពាណិជ្ជកម្មទូរទស្សន៍ (TV Ad) ដ៏ធំមួយដែលបំពាក់នូវឧបករណ៍មានបទដ្ឋានកម្រិតខ្ពស់សម្រាប់ផលិតស្ប៉តពាណិជ្ជកម្មដែលមានគុណភាពកម្រិតស្តង់ដារអន្តរជាតិ។

ការរួមបញ្ចូលគ្នារវាងក្រុមហ៊ុនដែលមានជំនាញទាំង2 នឹងធ្វើឱ្យអតិថិជនទទួលបានអត្ថប្រយោជន៍ជាច្រើនទាំងផ្នែកតម្លៃ គុណភាព និងការផ្សព្វផ្សាយ។

ស្ថាបនិកក្រុមហ៊ុន CBS អ្នកឧកញ៉ា គិត ម៉េង មានប្រសាសន៍ថា ជាមួយនឹងធនធានមនុស្សប្រកបដោយទេពកោសល្យ និងគំនិតច្នៃប្រឌិតរបស់ CBS TVC Production និង Legend Tiger ការវិនិយោគរួមគ្នានេះនឹងជួយឱ្យកម្ពុជាអាចប្រកួតប្រជែងជាមួយនឹងបណ្ដាក្រុមហ៊ុនផលិតស្ប៉តពាណិជ្ជកម្មក្នុងប្រទេសជិតខាងដូចជា ថៃ និងវៀតណម បាន។

អ្នកឧកញ៉ាបានថា៖“យើងនឹងធ្វើការអភិវឌ្ឍក្រុមហ៊ុនថ្មីនេះបន្ថែមទៀត ដើម្បីបង្កើតបានទាំងគុណភាពផលិតកម្ម និងសេវាកម្មជូនអតិថិជន។

បើតាមកិច្ចព្រមព្រៀងនោះ ក្រុមហ៊ុន Legend Tiger នឹងក្លាយជាក្រុមហ៊ុនបុត្រសម្ព័ន្ធមួយរបស់ក្រុមហ៊ុន CBS។

លោក ប៊ូ បញ្ញា នាយកប្រតិបត្តិក្រុមហ៊ុន Legend Tiger Investment Co., Ltd បានប្រាប់ថា ការរួមសហការគ្នារវាងក្រុមហ៊ុនផលិតស្ប៉តពាណិជ្ជកម្ម CBS និងក្រុមហ៊ុន Legend Tiger Investment Co., Ltd គឺជារឿងមួយដែលល្អបំផុត ព្រោះការសហការនេះនឹងផ្ដល់នូវភាពងាយស្រួលទាំងគុណភាពផ្សព្វផ្សាយព័ត៌មាន និងគុណភាពផលិតស្ប៉តដែលប្រកបដោយភាពជឿជាក់ជូនដល់អតិថិជន។ លោកប្រាប់ទៀតថា នាពេលកន្លងមកមានប្រាក់ដ៏ច្រើនត្រូវបានហូរចេញពីកម្ពុជា តាមរយៈការទៅរកក្រុមហ៊ុននៅបរទេសឱ្យជួយផលិតស្ប៉តណិជ្ជកម្មសម្រាប់យកមកចាក់ផ្សាយនៅកម្ពុជា។ ដូច្នេះបន្ទាប់ពីក្រុមហ៊ុនទាំង2 សហការគ្នា លោកសង្ឃឹមថានឹងអាចទាក់ទាញឱ្យក្រុមហ៊ុនដែលធ្លាប់ទៅផលិតស្ប៉តពាណិជ្ជកម្មនៅក្រៅប្រទេសឱ្យងាយមកជ្រើសរើសយកក្រុមហ៊ុនក្នុងស្រុកវិញ។

បើតាមលោក បញ្ញា ការមកដល់របស់ CBS នឹងផ្តល់ឱ្យអតិថិជនរបស់ Legend Tiger ទទួលបាននូវកញ្ចប់ល្អជាច្រើនទាំងការបម្រើសេវាកម្ម និងការផ្សព្វផ្សាយស្ប៉តពាណិជ្ជកម្ម។

Legend Tiger Investment Co., Ltd ត្រូវបានគេដឹងថាជាក្រុមហ៊ុនផលិតស្ប៉តពាណិជ្ជកម្មមួយដ៏ល្បីនៅកម្ពុជា ដែលត្រូវបានបង្កើតឡើងក្នុងឆ្នាំ2010។ ក្នុងរយៈពេល7ឆ្នាំកន្លងមកនេះក្រុមហ៊ុនបានទទួលផលិតស្ប៉តពាណិជ្ជកម្មឱ្យក្រុមហ៊ុនជាច្រើនដូចជា Cellcard, Wing, Ganzberg beer និង Cambodia Beer ជាដើម៕

April 21, 2017

5ហេតុផល ហេតុអ្វីបានជាឪពុកម្តាយមួយចំនួនមិនទាន់ចង់ដឹងភេទរបស់កូនភ្លាមៗ

ធ្លាប់នឹកឆ្ងល់ដែរឬទេថា តើហេតុអីបានជាឪ-ពុកម្តាយខ្លះមិនចង់ដឹងភេទកូនរហូតទាល់តែដល់ថ្ងៃប្រសូត?ជាប្រក្រតី ឪពុកម្តាយភាគច្រើនណាស់ ឬស្ទើរតែទាំងអស់តែម្តងដែលចង់ដឹងភេទរបស់កូនជាមុន ព្រោះនឹងបានរៀបចំត្រៀមរបស់របរសម្រាប់កូនបានត្រឹមត្រូវ។ ស្ទើរតែគ្រប់គូស្វាមីភរិយាសុទ្ធតែនាំគ្នាទន្ទឹងទាំងអន្ទះសាជាមួយការពិនិត្យគភ៌ និងចាំតែសួរគ្រូពេទ្យថា កូនប្រុស ឬកូនស្រី? តែក៏មានក្រុមគ្រួសារខ្លះដែរ ដែលគេមិនចង់ដឹងពីភេទរបស់កូនដែលនៅក្នុងគភ៌ រហូតទាល់តែដល់ថ្ងៃដែលនឹងបានជួបមុខគ្នា ហើយខាងក្រោមនេះគឺ មូលហេតុចម្បងៗដែលថា ហេតុអីបានជាពួកគេមិនចង់ដឹងចម្លើយនោះ?

1 ចង់ឱ្យមានការភ្ញាក់ផ្អើល ៈ ព្រោះព័ត៌មានសម័យនេះ មហាសែនលឿន និងមើលទៅហាក់ដូចជាសឹងតែគ្មានអ្វីសោះឡើយដែលជាការសម្ងាត់ ភេទរបស់កូនក៏ដូចគ្នាដែរ ទើបធ្វើឱ្យរឿងនេះក្លាយជាហេតុផលចម្បងមួយរបស់ឪពុកម្តាយមួយចំនួនដែលចង់លាក់ទុករឿងនេះជាការសម្ងាត់ ដើម្បីសាងភាពរំភើបញាប់ញ័រដល់ខ្លួនឯង និងមនុស្សជុំវិញខ្លួន។

2 ចៃដន្យដឹងដោយឯកឯង ៈ ក្នុងការធ្វើអ៊ុល-ត្រាសោនដ៍(មើលអេកូ) គោលបំណងចម្បង មិនមែនដើម្បីមើលថា តើកូនភេទអីនោះទេ តែដើម្បីចង់ដឹងពីវិវឌ្ឍនាការរបស់ទារកច្រើនជាងថា តើមានវិវឌ្ឍនាការដែលល្អ ឬមានអ្វីដែលខុសប្រក្រតីដែរឬទេ?

ទើបធ្វើឱ្យការដឹងពីភេទរបស់កូនក្លាយជាលទ្ធផលដែលបានមកដោយក្តីចៃដន្យ តែក៏មិនមែនថា កូននឹងព្រមឱ្យមើលដោយងាយៗនោះដែរព្រោះជួនកាលយើងគិតថាជាកូនស្រី តែទីបំផុតបែរជាបានកូនប្រុសទៅវិញក៏មានច្រើនដែរ។

3 ជាកម្លាំងជំរុញចិត្តក្នុងការប្រសូត ៈ ត្រឹមត្រូវហើយចា៎ស មានអ្នកម្តាយមួយចំនួន មិនចង់ដឹងពីភេទកូនទេ ព្រោះត្រូវការប្រើរឿងនេះធ្វើជាកម្លាំងជំរុញចិត្តក្នុងការប្រសូតថា បើចង់ដឹងថា កូនស្រី ឬប្រុសឆាប់ៗ ក៏ត្រូវតែតាំងចិត្តក្នុងការប្រឹងប្រសូត និងអត់ធន់ឱ្យបានល្អហ្នឹងឯង។

4 មិនចង់ឱ្យស្រពិចស្រពឹល ៈ ដូចដែលបានប្រាប់ហើយថា ការមើលភេទកូននៅក្នុងគភ៌មិនមែនជារឿងងាយទេ ជាញឹកញាប់ណាស់ដែលយើងច្រើនតែជួបប្រទះថា ការដឹងពីភេទកូនជាមុននោះ ធ្វើឱ្យកើតមានការខុសប្លែកបានជានិច្ច ដូចដែលបានលើកជាឧទាហរណ៍ក្នុងចំណុចទី2 រួចមកហើយ។

5 កាត់បន្ថយសម្ពាធ ៈ ជាការពិតហើយដែលឪពុកម្តាយខ្លះអាចនឹងតាំងសេចក្តីសង្ឃឹមជាមួយភេទរបស់កូននៅក្នុងគភ៌ខ្លាំងហួសហេតុពេក គូខ្លះអាចនឹងចង់បានកូនស្រី ឬគូខ្លះទៀតមានកូនស្រីហើយ ក៏ចង់បានកូនប្រុសម្តង តែពេលបានដឹងលទ្ធផលមុនហើយ ក៏ធ្វើឱ្យនាំគ្នាអស់សង្ឃឹមក៏មានដែរ ដូច្នេះទើបមិនមែនជារឿងប្លែកឡើយដែលឪពុកម្តាយខ្លះមិនចង់ក្នុងការដាក់សម្ពាធឱ្យខ្លួនឯង ទើបរង់ចាំទៅអ៊ុតមើលនៅពេលប្រសូតតែម្តងប្រសើរជាងហ្នឹងឯង។

ចុះមិត្តអ្នកអានវិញ ចង់ដឹងភេទកូនជាមុន ឬក៏ចង់រក្សាទុកចាំទៅអ៊ុតនៅពេលប្រសូតទាំងអស់គ្នា?

April 12, 2017

សាលាបង្រៀនអាយ៉ៃមិនយកលុយរបស់លោក ព្រហ្ម ម៉ាញ នឹងបើកនៅក្រោយបុណ្យចូលឆ្នាំខ្មែរ

ជាមួយនឹងគម្រោងនៃការបង្កើតសាលាបង្រៀនអាយ៉ៃ និងសិល្បៈបុរាណដល់អ្នកជំនាន់ក្រោយ ដើម្បីបន្តវេណ និងលើកស្ទួយវិស័យសិល្បៈដ៏កម្រមួយនេះ លោក ព្រហ្ម ម៉ាញ ជាសម្បត្តិមនុស្សរស់របស់ជាតិខ្មែរ បានបញ្ជាក់ថា ការដំណើរការសាលាបង្រៀនជំនាញខាងលើអាចនឹងចាប់ផ្តើមនៅក្រោយថ្ងៃបុណ្យចូលឆ្នាំថ្មីប្រពៃណីជាតិខ្មែរឆាប់ៗខាងមុខ។ កំពូលអ្នកចម្រៀងអាយ៉ៃប្រចាំប្រទេសរូបនេះបានលើកឡើងទៀតថា ចំពោះសាលាបង្រៀនជំនាញសិល្បៈខ្មែរបុរាណ ដែលមានរូបលោកផ្ទាល់ជាអ្នកបង្រៀន និងបង្វឹកបង្ហាត់បង្ហាញផងនោះ គឺអាចដំណើរការទៅបានអាស្រ័យដោយមានការជួយជ្រោមជ្រែងទាំងស្រុងពីសំណាក់ « សមាគម សិល្បៈស្ម័គ្រចិត្តជួយសង្គម » របស់អ្នកនាង ចន ច័ន្ទលក្ខិណា ដែលនឹងត្រូវចំណាយថវិកាទៅលើការជួលទីតាំង ថ្លៃឧបករណ៍ហាត់រៀន ថ្លៃម្ហូបអាហារចំនួន3ពេល ជាពិសេស គឺការចំណាយទៅលើកន្លែងស្នាក់នៅរបស់សិស្សដែលមកសិក្សាជំនាញទាំងនេះនៅក្រុងភ្នំពេញផ្ទាល់តែម្ដង ។

ជាមួយគ្នានេះ លោក ព្រហ្ម ម៉ាញ ក៏បានបញ្ជាក់សារជាថ្មីថា « សម្រាប់ការសិក្សាគឺមិនតម្រូវឱ្យបង់ថ្លៃនោះទេ ដែលសូម្បីតែការហូបចុក និងស្នាក់នៅក៏ជាបន្ទុករបស់សាលាជួយសម្រួលទាំងអស់ ។ ម្យ៉ាងវិញទៀត សម្រាប់អ្នកដែលមាននិស្ស័យពីធម្មជាតិជាមួយសិល្បៈបុរាណខ្មែរ ជាពិសេស ផ្នែកអាយ៉ៃតែម្ដង គឺអាចមកដាក់ពាក្យនៅ « សមាគមសិល្បៈស្ម័គ្រចិត្តជួយសង្គម» ក៏បាន ឬអាចទំនាក់ទំនងមកកាន់ Facebook ផ្ទាល់ខ្លួនរបស់ខ្ញុំក៏បាន » ។

គួរកត់សម្គាល់ផងដែរថា នៅត្រឹមមួយរយៈចុងក្រោយនេះ វិស័យសិល្បៈបុរាណខ្មែរ ជាពិសេស ផ្នែកអាយ៉ៃ ឆ្លើយឆ្លង ហាក់ត្រូវបានបណ្តាយុវជនមួយចំនួនធំបំភ្លេចចោលស្ទើរទាំងស្រុង ខណៈដែលអ្នកទាំងនោះបានងាកទៅចាប់អារម្មណ៍យ៉ាងខ្លាំងទៅលើវិស័យសិល្បៈបែបទាន់សម័យ ស្របពេលដែលលំហូរនៃសិល្បៈរបស់បរទេសកើតមានយ៉ាងគំហុកមកកាន់ប្រទេសដែលធ្លាប់តែប្រកាន់ខ្ជាប់នូវសិល្បៈ និងវប្បធម៌ដ៏ល្អផូរផង់មួយនេះ។ ដោយឡែកងាកទៅកាន់បណ្តាក្រុមហ៊ុន ក៏ដូចជាបណ្តាផលិតកម្មក្នុងស្រុកវិញ ក៏ត្រូវបានគេកត់សម្គាល់ឃើញថា ជាដើមចមចូលរួមចំណែកក្នុងការរំលត់សិល្បៈបុរាណខ្មែរមួយផងដែរ ខណៈដែលភាគច្រើនសុទ្ធតែបានផ្តោតការផលិតរបស់ខ្លួនទៅតាមបែបរទេសនិយមនោះ ។

បើស្រឡាញ់សង្គមជាតិខ្មែរ ស្រឡាញ់វប្បធម៌ខ្មែរ សូមចូលរួមគាំទ្រវិស័យសិល្បៈបុរាណខ្មែរទាំងអស់គ្នា ….

April 12, 2017

នាយ គ្រឿន ធ្វើឱ្យកក្រើកខ្សែភាពយន្តខ្នាតធំរឿង «ជួបស៊យ»

នេះគឺជាលើកដំបូងហើយ ដែលកំពូលតារាកំប្លែងមានប្រជាប្រិយភាពខ្ពស់នាពេលបច្ចុប្បន្ននេះបានបញ្ចេញស្នាដៃក្នុងការតែងនិពន្ធសាច់រឿង និងចូលរួមដឹកនាំការសម្ដែងខ្សែភាពយន្តខ្នាតធំ រឿង «ជួបស៊យ» ក្រោមការផ្តល់សិទ្ធិ និងជួយជ្រោមជ្រែងពីសំណាក់លោក លៀក លីដា ចាងហ្វាងផលិតកម្ម LD Picture ខណៈដែលតារាកំប្លែងរូបនេះក៏ជាតួអង្គសំខាន់ម្នាក់សម្ដែងនៅក្នុងរឿងមួយនេះផងដែរ ។

ជាមួយនឹងខ្សែភាពយន្តខ្នាតធំដែលពោរពេញទៅដោយឈុតឆាកកំប្លុកកំប្លែង ដែលចំណាយលើការផលិតរហូតដល់ជិត 5 ម៉ឺនដុល្លារ មួយនេះ នាយគ្រឿង បានអះអាងថា ខ្សែភាពយន្តដែលស្នាដៃលើកដំបូងរបស់លោកមួយនេះគឺពិតជាមានភាពទាក់ទាញខ្លាំង ខណៈដែលផ្ទៃសាច់រឿងទាំងមូលសុទ្ធតែអាចធ្វើឱ្យអ្នកទស្សនាផ្ទុះសំណើច សើចស្ទើរចុកពោះតាំងពីដើមរហូតដល់ចប់ ហើយក៏មានបញ្ចូលឈុតបែបកម្សត់ផងដែរ ។

ថ្លែងប្រាប់អ្នកសារព័ត៌មាននាថ្ងៃសម្ពោធចាក់បញ្ចាំងនៅរោងកុន LEGEN ផ្សារស្ទឹងមានជ័យថ្មីកាលពីល្ងាចថ្ងៃទី10 ខែមេសា ម្សិលមិញនេះ នាយគ្រឿនបានបញ្ជាក់ថា ៖ «តាមការពិតទៅវាក៏ជាការងារលំបាកសម្រាប់ខ្ញុំដែរ ព្រោះទី1វាជាស្នាដៃលើកដំបូងរបស់ខ្ញុំ ហើយទី2 ពិបាកក្នុងការប្រាប់តួសម្ដែង ប៉ុន្តែក៏បានការជួយណែនាំពីបងចាងហ្វាង លីដា ច្រើន ។ ខ្ញុំមិនអាចនិយាយបានថា ស្នាដៃរបស់ខ្ញុំមួយនេះវាល្អឥតខ្ចោះនោះទេ ប៉ុន្តែគ្រាន់តែបញ្ជាក់ថា ខ្ញុំបានប្រឹងប្រែង និងព្យាយាមអស់លទ្ធភាពរបស់ខ្ញុំហើយ ហើយក៏គិតខ្លួនឯងថា វានឹងល្អប្រសើរបានច្រើនជាង » ។

ជាមួយនឹងការបញ្ជាក់ពីភាពលំបាកក្នុងការសរសេរសាច់រឿង និងដឹកនាំសម្ដែង ខណៈដែលខ្លួនឯងផ្ទាល់ក៏ជាតួអង្គសំខាន់ ដែលមានឈ្មោះថា នាយ ស៊យ នោះ នាយ គ្រឿន ក៏បានបង្ហើបប្រាប់ពីសាច់រឿងត្រួសៗផងដែរថា ចំពោះខ្សែភាពយន្តខ្នាតធំ បែបកំប្លែង និងកម្សត់មួយនេះ គឺគ្រប់មនុស្សទាំងអស់ ដែលបានជួបជាមួយនាយ ស៊យ ដែលសម្ដែងដោយរូបខ្ញុំនេះ គឺត្រូវតែស៊យជួបរឿងមិនល្អ ឬមានគ្រោះថ្នាក់ជាដើម ដែលភាពចង្រៃ ភាពស៊យនេះមានតាំងពីជំនាន់ឪពុករហូតបន្តដល់កូនជំនាន់ក្រោយ ។ ដោយឡែកមានតួអង្គម្នាក់ទៀត គឺឈ្មោះ នាយ ហេង ខណៈដែលគ្រប់មនុស្សទាំងអស់ដែលបានជួបជាមួយនាយ ហេង គឺមានសំណាងតែម្ដង ។ ក៏ប៉ុន្តែ បើទោះជាសាច់រឿងនេះភាគច្រើនមានឈុតឆាកកំប្លុកកំប្លែង ផ្ទុះសំណើចក៏ដោយ តែនៅចុងបញ្ចប់នៃសាច់រឿង គឺមានឈុតបែបកម្សត់ខណៈដែលតួឯកត្រូវបានស្លាប់ដោយជំងឺមហារីកខួរក្បាល ដែលសម្ដែងដោយ លោក ជា សុវណ្ណនរាហ៍ ។

សូមបញ្ជាក់ផងដែរថា ជាមួយផ្ទាំងទស្សនីយភាពដ៏កក្រើក ដែលដាក់បញ្ចាំងជាផ្លូវការចាប់ពីថ្ងៃទី13 ខែមេសា ខាងមុខនេះ មានវត្តមានរបស់តារាសម្ដែង និងតារាកំប្លែងល្បីៗជាច្រើន ដូចជា លោក ទេព រិន្ទដារ៉ូ, អ្នកស្រី ប៉ែន សុផាន់នី , នាយ គ្រឿន , នាយ ពាក់មី , អ្នកនាង ខ្ញុង , លោក ជាសុវណ្ណនរាហ៍ , លោក ងួន សុបិន , កញ្ញា គៀត សុវណ្ណាឡាង , កញ្ញា សាឡាត ស្រីនាង , នាយ ក្រឹប , ឌីជេ BIG , ឌីជេ KAKA រួមនឹងតារាកិត្តិយសជាច្រើននាក់ទៀត៕

April 12, 2017

អ៊ិន ចាន់រតនា កំពុងសម្លឹងមើលផលិតកម្មថ្មីបង្កើនប្រជាប្រិយភាព

មានឈ្មោះថាជាតារាចម្រៀង និងធ្លាប់បានចរាចរណ៍បទចម្រៀងជាច្រើនបទនៅលើទីផ្សារយ៉ាងណាក៏ដោយ ក៏ប្រជាប្រិយភាពរបស់លោក អ៊ិន ចាន់រតនា ត្រូវបានគេសង្កេតឃើញថា ហាក់នៅមានកម្រិតនៅឡើយ ហើយក៏កម្របានចេញមុខជាសាធារណៈដូចតារាដទៃទៀតនោះដែរ បើទោះបីជានៅពេលបច្ចុប្បន្ននេះ មានកម្មវិធីប្រគំតន្ត្រីបង្ហាញពីផលិតផលនានាជាច្រើនកំពុងតែសម្រុកបង្កើតព្រឹត្តិការណ៍យ៉ាងគគ្រឹកគគ្រេង ។

អស់រយៈពេលប្រមាណជា3ឆ្នាំកន្លងមកហើយ ដែលលោក អ៊ិន ចាន់រតនា បានសម្រេចចិត្តឈោងចាប់អាជីពជាតារាចម្រៀងតាមរយៈការចូលរួមប្រឡងនៅក្នុងកម្មវិធី «ផ្កាយរះក្នុងសួន» ដែលរៀបចំឡើងដោយស្ថានីយទូរទស្សន៍អប្សរា ប៉ុស្តិ៍លេខ11 ជាមួយនឹងលទ្ធផលជាប់ជម្រុះនៅក្នុងវគ្គចុងក្រោយនៃបេក្ខជនសំឡេងពិរោះរណ្តំ។ បន្ទាប់ពីនោះ លោក ចាន់រតនា ក៏បានចូលបង្ហាញខ្លួននៅក្នុងផលិតកម្មក្នុងស្រុកមួយ រួមជានឹងការផលិតបទចម្រៀងចេញលក់នៅលើទីផ្សារជាបន្តបន្ទាប់ ដែលក្នុងនៅក្នុងបទចម្រៀងដែលទទួលបានប្រជាប្រិយភាពគួរសមពីសំណាក់អ្នកស្តាប់ រួមមានបទ «ហេតុតែស្រឡាញ់» និងបទ «ចង់បែក កុំឆ្លើយអត់អារម្មណ៍» ខណៈដែលបទទាំង2នេះហើយ ដែលជួយជម្រុញកេរ្តិ៍របស់លោកឱ្យគេស្គាល់ជាសាធារណៈ។

ជាថ្មីម្ដងទៀត កាលពីពេលកន្លងទៅថ្មីៗនេះតារាចម្រៀងដែលទើបតែចុះឈ្មោះជាសមាជិកគ្រួសារតារាកម្ពុជា លោក អ៊ិន ចាន់រតនា បានពង្រីកវិសាលភាពនៃកេរ្តិ៍ឈ្មោះរបស់ខ្លួនគួរជាទីមោទន ជាមួយនឹងការផលិតបទចម្រៀងតបទៅតាមសំណូមពររបស់ពលរករខ្មែរ នៅប្រទេសកូរ៉េ ដើម្បីចែករំលែកនៅលើបណ្តាញគេហទំព័រ Youtube រួមមានបទ «សង្សារទៅកូរ៉េចោល» និងបទ «ព្រះគុណម៉ែ» ក្រោមការទទួលបានចំនួន like ជាច្រើនពាន់នាក់ ។ លោក អ៊ិន ចាន់រតនា បានបង្ហើបប្រាប់យ៉ាងដូច្នេះថា ៖ «សម្រាប់បទចម្រៀងទាំង 2 ខាងលើនេះ ពិតជាទទួលបានការគាំទ្រច្រើនមែន ប៉ុន្តែមិនបានថតជា MV នោះឡើយ ព្រោះគ្រាន់តែថតជាបទចម្រៀង ហើយបង្ហោះនៅលើ Youtube តែប៉ុណ្ណោះ ។ ប៉ុន្តែដោយសារតែបទទាំង2នេះ វាមានអត្ថន័យជ្រាលជ្រៅ និងបង្កប់ទៅដោយមនោសញ្ចេតនាផងនោះ ទោះជាមិនមានរូបភាពកាយវិកា ក៏អាចទាក់ទាញចំនួន like បានដែរ » ។

ភ្ជាប់ជាមួយនឹងការបង្ហាញពីមោទនភាពដែលទទួលបានការគាំទ្រទៅលើបទចម្រៀងដែលបានបង្ហោះនៅលើបណ្តាញ Youtube ខាងលើនេះ មានសំណួរមួយចោទសួរថា បើបទចម្រៀងរបស់លោកទទួលបានការគាំទ្រពីសំណាក់អ្នកស្តាប់ ចុះហេតុអ្វីបានជាវត្តមានរបស់លោកហាក់ត្រូវបានស្ងប់ស្ងាត់ពីវិស័យមួយនេះ ? ជាការឆ្លើយតបទៅនឹងសំណួរ លោក អ៊ិន ចាន់រតនា បាននិយាយថា ដោយសារតែលោកបានចាកចេញពីផលិតកម្មចាស់ ដ្បិតការជ្រកកោនមួយរយៈកន្លងទៅនេះហាក់មិនមានលទ្ធផលល្អដូចការរំពឹងទុក ។ លោកបញ្ជាក់ថា « ពេលនេះខ្ញុំបានចាកចេញពីកម្លែងចាសហើយ ហើយក៏កំពុងសម្លឹងមើលផលិតកម្មថ្មីណាមួយដែលអាចបន្តក្ដីសង្ឃឹមរបស់ខ្ញុំបាន។ ពេលនេះខ្ញុំមានបទចម្រៀង Original Song ដែលនិពន្ធឡើងដោយខ្លួនឯង ហើយក៏មានអត្ថន័យល្អគួរសម ។ ខ្ញុំនឹងបង្ហាញស្នាដៃថ្មីនេះនៅក្នុងផលិតកម្មថ្មីណាមួយដែលខ្ញុំអាចសហការបានក្នុងពេលដ៏ខ្លីខាងមុខឆាប់ៗនេះ »៕

April 12, 2017

នារីៗ ត្រូវប្រុងប្រយ័ត្នមុនពេលឆ្លុះកញ្ចក់ក្នុងបន្ទប់ទឹក

ប្រកាសអាសន្នសម្រាប់នារី…ពេលឆ្លុះកញ្ចក់ក្នុងបន្ទប់សណ្ឋាគារ ក្នុងបន្ទប់ទឹក ឬក្នុងបន្ទប់តែងខ្លួន អាចមានមនុស្សកំពុងមើលអ្នក!

ការពារខ្លួនឯងជាមុន មុននឹងដោះសម្លៀកបំពាក់នៅក្នុងបន្ទប់សាធារណៈ…តើអ្នកធ្លាប់គិតទេថា កញ្ចក់នៅតាមទីកន្លែងផ្សេងៗ ដូចជា កញ្ចក់ក្នុងបន្ទប់លខោអាវ កញ្ចក់ក្នុងបន្ទប់សណ្ឋាគារ កញ្ចក់ក្នុងបន្ទប់ទឹកសាធារណៈ អ្វីៗទាំងអស់នេះ តើវាជាកញ្ចក់ធម្មតា ឬក៏ជាកញ្ចក់មើលឃើញពីរខាងដែលមានមនុស្សកំពុងមើលឃើញរូបអ្នកពីខាងក្រោយផ្ទាំងកញ្ចក់នោះ តែអ្នកមើលគេមើនឃើញ?

វិធីពិសោធន៍ងាយៗដើម្បីឱ្យដឹងថា កញ្ចក់ដែលអ្នកកំពុងឆ្លុះនោះជាកញ្ចក់មើលឃើញទាំងសងខាង (គេមើលឃើញយើង តែយើងមើលឃើញតែរូបខ្លួនឯង ឧទាហរណ៍ដូចកញ្ចក់នៅក្នុងបន្ទប់សួរចម្លើយរបស់ប៉ូលិសជាដើម) ឬជាកញ្ចក់ដែលមើលឃើញតែ

ម្ខាងនោះគឺ ចូរយកម្រាមដៃទៅចង្អុលលើកញ្ចក់ បើចុងម្រាមដៃរបស់អ្នកប៉ះគ្នានឹងរូបម្រាមដៃនៅក្នុងកញ្ចក់ (រូបភាពខាងឆ្វេង) នោះគឺជា កញ្ចក់មើលឃើញពីរខាងហើយ បញ្ជាក់ថា មានមនុស្សកំពុងមើលឃើញរូបអ្នកហើយ តែបើជាកញ្ចក់ឆ្លុះធម្មតាវិញ នឹងមានប្រឡោះកណ្តាលរវាងចុងម្រាមរបស់អ្នក និងរូបម្រាមដៃនៅក្នុងកញ្ចក់ (រូបភាពខាងស្តាំ)។

ចាំទុកថា បើគ្មានប្រឡោះរវាងម្រាមដៃរបស់អ្នក និងរូបម្រាមដៃនៅក្នុងកញ្ចក់ទេនោះ ចូរប្រញាប់ចាកចេញពីទីនោះភ្លាម ព្រោះវាជាកញ្ចក់ពីរខាង ដែលអាចមើលឃើញរូបអ្នកពីម្ខាងទៀតហើយ ដូច្នេះគួរពិនិត្យសាកល្បងគ្រប់ពេលដែលចូលក្នុងបន្ទប់លខោអាវ បន្ទប់ទឹកសាធារណៈ ក្នុងបន្ទប់សណ្ឋាគារ ជាដើម។ វាមិនខាតបង់អ្វីទេ ព្រោះវាជាការការពារខ្លួនយើងពីជនខូចខិលមួយចំនួនប៉ុណ្ណោះ៕

April 12, 2017

គ្រួសារតារាកម្ពុជា ធ្វើឱ្យកក្រើកក្រុងតាខ្មៅកាលពីល្ងាចម្សិលមិញ

បន្ទាប់ពីបានបង្កើតព្រឹត្តិការណ៍ដ៏កក្រើក និងជោគជ័យ នៃកម្មវិធី « រាំ-ច្រៀង និងដើរលើកម្រាលព្រំ» នៅសាកលវិទ្យា ន័រតុន កាលពីឆ្នាំមុន ដើម្បីស្វែងរកមូលនីធីមនុស្សធម៌ជួយទ្រទ្រង់មន្ទីរពេទ្យគន្ធបុប្ផា និងឧបត្ថម្ភកុមារកំព្រា រួមជាមួយនឹងជនចាស់ជរាគ្មានទីពឹងផងដែរនោះ នៅល្ងាចថ្ងៃទី09 ខែមេសា ឆ្នាំ2017 ម្សិលមិញនេះ គ្រួសារតារាកម្ពុជា បានរៀបចំមហាព្រឹត្តិការណ៍លើកទី 2 របស់ខ្លួន នៅក្នុងបរិវេណវិទ្យាល័យ ហ៊ុនសែន សេរីភាព ក្រុងតាខ្មៅ ក្រោមការចូលរួមពីសំណាក់តារាដែលជាសមាជិកគ្រួសារតារាកម្ពុជាប្រមាណជាង40នាក់ ព្រមទាំងសិស្ស -និស្សិត យ៉ាងច្រើនណែនណាន់តាន់តាប់ សរុបរហូតប្រមាណជាង1000នាក់ ។

ស្ថាបនិកគ្រួសារតារាកម្ពុជា លោក ផាត់ តារារដ្ឋ បានឱ្យថា ចំពោះកម្មវិធីមួយនេះ ត្រូវបានបង្កើតឡើងក្នុងគោលបំណងចម្បងបំផុតគឺអាចស្វែងរកថវិកាដើម្បីជួយឧបត្ថម្ភ និងចូលរួមទ្រទ្រង់ដល់មន្ទីរពេទ្យគន្ធបុប្ផា ក៏ដូចជាជួយដល់សកម្មភាពសង្គម និងមនុស្សធម៌ផងដែរ ។ លោកថា ចំពោះថវិកាដែលចំណាយទៅលើការរ៉ាប់រងចំពោះអ្នកសិល្បៈ ក៏ដូចជាថ្លៃធ្វើដំណើរ ថ្លៃឆាកប្រគំតន្ត្រីជាដើម គឺជាការចំណាយផ្ទាល់របស់សមាជិកគ្រួសារតារាកម្ពុជា រួមជាមួយនឹងក្រុមដំបូលតែមួយជាអ្នកឧបត្ថម្ភ ដោយឡែកចំពោះប្រាក់ចំណូលដែលទទួលបានពីការលក់ភេសជ្ជៈ នំចំណី ក៏ដូចជាចំណូលពីការផ្ញើយានយន្តនានា ត្រូវបានរៀបចំទុកសម្រាប់មូលនីធិនៃមន្ទីរពេទ្យគន្ធបុប្ផា។ លោកបញ្ជាក់ថា ជាមួយនឹងសកម្មភាពមនុស្សធម៌ខាងលើនេះ គ្រួសារតារាកម្ពុជា នឹងមានគម្រោងរៀបចំជារៀងរាល់ឆ្នាំ ដើម្បីលើកស្ទួយវិស័យសិល្បៈផង ក៏ដូចជាចូលរួមជួយសម្រាលបន្ទុកសង្គមជាតិផងដែរ ។

ថ្លែងនៅក្នុងឱកាសដ៏សែនរីករាយនាល្ងាចថ្ងៃម្សិលមិញនេះ កញ្ញា ទេព្យ បូព្រឹក្ស កំពូលតារាចម្រៀងដ៏ល្បីឈ្មោះប្រចាំនៅក្នុងផលិតកម្ម ហង្សមាស ដែលស្ថិតនៅក្នុងមហាព្រឹត្តិការណ៍មួយនេះ បានបង្ហាញពីអារម្មណ៍ផ្ទាល់ខ្លួនយ៉ាងដូច្នេះថា ៖ « ខ្ញុំពិតជារំភើបមែនទែន នៅពេលដែលបានចូលរួមនៅក្នុងព្រឹត្តិការណ៍ដ៏អស្ចារ្យមួយនេះ ជាពិសេសនៅពេលដែលបានឃើញបងប្អូនមកគាំទ្រយ៉ាងច្រើនបែបនេះ ។ ទោះជាខ្ញុំមិនបានទទួលកម្រៃ ក៏រីករាយ និងសប្បាយជាមួយបងប្អូន ហើយបើមានកម្មវិធី ឬព្រឹត្តិការណ៍ដូចនេះនៅពេលក្រោយៗទៀត ខ្ញុំនឹងព្យាយាមចូលរួមជាបន្ត » ។

ស្រដៀងគ្នាទៅនឹងកំពូលតារាចម្រៀងស្រីខាងលើនេះ ពិធីករវ័យក្មេង ដែលមានប្រជាប្រិយភាពគួរសម នាយ ព្រែក ក៏បានបង្ហាញពីទស្សនៈផងដែរថា ៖ «ពិតជាមិនធម្មតាមែន នេះសម្រាប់ថ្ងៃនេះ គឺជាលើកទី2របស់ខ្ញុំដែលបានចូលរួមនៅក្នុងព្រឹត្តិការណ៍របស់គ្រួសារតារាកម្ពុជា ខណៈដែលការចូលរួមលើកទី1 គឺនៅក្នុងព្រឹត្តិការណ៍ វិហារសួគ៌សង្ក្រាន ដែលធ្វើឡើងកាលពីថ្ងៃទី08 ខែមេសា ឆ្នាំ2017 ។ វាពិតជាអស្ចារ្យបំផុត នៅពេលដែលបងប្អូន ជាពិសេស សិស្ស- និស្សិត ភាគច្រើនសុទ្ធតែបានបង្ហាញពីភាពរីករាយ សប្បាយ ជាមួយនឹងកម្មវិធី រាំ – ច្រៀង ដើម្បីស្វែងរកមូលនីធីសប្បុរសធម៌នាពេលនេះ ហើយបើសិនជាអាច ខ្ញុំចង់ឃើញព្រឹត្តិការបែបនេះទៀត ដើម្បីខ្ញុំបានចូលរួមចំណែកផង» ៕

April 12, 2017

លោក ឡេង ណាវ៉ាត់ត្រា យកប្រាក់ចំណេញពីការបញ្ចាំងរឿងបរិច្ចាគជួយជនក្រីក្រ

ស្ទើរតែមិនគួរឱ្យជឿទាល់តែសោះ ខណៈដែលលោក ឡេង ណាវ៉ាត់ត្រា ដែលជាផលិតករ និងជាអ្នកធ្វើជំនួញជាមួយវិស័យភាពយន្ត យកថវិកាយ៉ាងសន្ធឹកសន្ធាប់ដែលចំណេញបានពីការផលិត និងចាក់បញ្ចាំងខ្សែភាពយន្ត ទៅបរិច្ចាគជូនដល់ប្រជាពលរដ្ឋមានជីវភាពក្រីក្រជាង100គ្រួសារ ស្ថិតនៅក្នុងភូមិត្រពាំងស្នា ឃុំព្រះនិព្វាន ស្រុកគង់ពិសី ខេត្តកំពង់ស្ពឺ ។ យ៉ាងណាក៏ដោយ ជាមួយនឹងទឹកចិត្តសប្បុរសចូលរួមចែករំលែកនូវធនធានផ្ទាល់ខ្លួនខាងលើនេះ លោក ឡេង ណាវ៉ាត់ត្រា ក៏បានសង្កត់ធ្ងន់ផងដែរថា ការជួយឧបត្ថម្ភនេះមិនមែនជាការសម្ដែងដើម្បីទទួលបានប្រជាប្រិយភាពនោះទេ ប៉ុន្តែវាជាទង្វើដែលផុសចេញពីបេះដូងពិតៗ ខណៈដែលលោកក៏ធ្លាប់ឆ្លងកាត់ជីវភាពខ្សត់ខ្សោយផងដែរនោះ ។

ថ្លែងនៅក្នុងឱកាសនៃការផ្តល់អំណោយទៅដល់ប្រជាពលរដ្ឋក្រីក្រសរុបចំនួន101គ្រួសារខាងលើ ដែលរួមមាន អង្ករ ទឹកស៊ីអ៊ីវ ប្រេងឆា ប៊ីចេង និងថវិកាមួយចំនួនផងដែរនោះ ចាងហ្វាងផលិតកម្ម Galaxy លោក ឡេង ណាវ៉ាត់ត្រា បានលើកឡើងថា ថវិកាដែលលោកនាំយកមកជូនដល់ប្រជាពលរដ្ឋខាងលើនេះមានចំនួនប្រមាណជា 20លានរៀល ដែលបានមកពីការចំណេញពីការផលិត និងចាក់បញ្ចាំងរឿងដំបូងរបស់លោកដែលមានចំណងជើងថា «កំពូលល្ងង់នៅអាស៊ី» ។ លោកបានសង្កត់ធ្ងន់ថា ថ្វីត្បិតតែថវិកា ក៏ដូចជាគ្រឿងឧបភោគ បរិភោគទាំងនេះមានចំនួនតិចតួចក៏ពិតមែន ប៉ុន្តែវាអាចជួយដោះស្រាយទុក្ខលំបាកបានមួយគ្រា ហើយលោកក៏នៅតែបន្តស្វែងរកជំនួយផ្សេងៗទៀតដើម្បីជួយដល់ពលរដ្ឋក្រីក្រទៅតាមលទ្ធភាពដែលអាចធ្វើទៅបាន ។

អតីតពលករបម្រើការងារនៅប្រទេសកូរ៉េ រូបនេះបានបញ្ជាក់ថា ៖ «ខ្ញុំយល់ពីភាពលំបាក និងស្គាល់ពីរសជាតិក្រីក្រយ៉ាងច្បាស់ ព្រោះមុននឹងមានទ្រព្យធនដូចពេលបច្ចុប្បន្ននេះ ខ្ញុំក៏ធ្លាប់ក្រ បានព្រឹកខ្វះល្ងាច បានល្ងាចខ្វះព្រឹក ដូចជាបងប្អូនដែលជាប្រជាពលរដ្ឋទាំង101គ្រួសារនេះដែរ ប៉ុន្តែក្រោមការព្យាយាមជំនះភាពលំបាកទាំងឡាយ ទើបខ្ញុំអាចគេចចេញផុតពីជីវភាពខ្សត់ខ្សោយទាំងនោះ » ។ លោកបានបន្តថា ៖ «សម្រាប់ការជួយឧបត្ថម្ភក្នុងនាមជាសប្បុរសជនទាំងនេះនៅតែបន្ត ជាពិសេស បន្ទាប់ពីការចាក់បញ្ចាំងុរឿង «កំពូលល្ងង់នៅអាស៊ី» របស់ខ្ញុំត្រូវបានបញ្ចប់ នោះប្រាក់ដែលចំណេញបានទាំងប៉ុន្មាន ខ្ញុំនឹងយកមកប្រើជាមូលនីធីសប្បុរស សម្រាប់ចែកជូនបងប្អូនក្រីក្រដែលស្ថិតនៅតំបន់ផ្សេងៗទៀត » ៕

April 10, 2017

Author: វល័ក្ខ