Author: វល័ក្ខ

អ្នកម្តាយមានគភ៌ចាប់ពី 20សប្តាហ៍ឡើងទៅ មិនគួរដើរ ឬឈរយូរៗឡើយ ព្រោះអាចហុចផលប៉ះពាល់ធ្វើឱ្យជើងហើមខ្លាំងឡើងបាន។ ថ្ងៃនេះ ឡារ៉ែន មានគន្លឹះល្អៗមកណែនាំអ្នកម្តាយមានគភ៌ បើកើតមានអាការចុករួយបាតជើងពេលអាយុគភ៌កាន់តែច្រើនឡើង និងឥរិយាបទហាត់ប្រាណ ការពារជង្គង់ចុះខ្សោយចំពោះអ្នកម្តាយមានគភ៌ មកជម្រាបជូន។

ពេលមានគភ៌ ទាំងសេរីរាង្គ និងអ័រម៉ូនរបស់អ្នកម្តាយមានការប្រែប្រួល ការឈរ ឬដើរយូរៗលើស 30នាទី អាចនឹងហុចផលអាក្រក់ដល់សុខភាពអ្នកម្តាយបាន។

បញ្ហា 4 យ៉ាង បើឈរ ឬ ដើរយូរ
សន្លាក់ជង្គង់ចុះខ្សោយ៖ ជាមធ្យម ទម្ងន់ខ្លួនអ្នកម្តាយនឹងកើនឡើងក្នុងអំឡុងពេលតាំងគភ៌យ៉ាងតិច 11 – 15 គីឡូក្រាម ធ្វើឱ្យជង្គង់ត្រូវទទួលទ្រទម្ងន់ដែលចេះតែកើនឡើងរហូត 9 – 10 ខែនោះ និងថែមទាំងមានកិច្ចការងារត្រូវធ្វើទៀតផង។ រឹតតែអ្នកម្តាយដើរច្រើន ក៏នឹងរឹតតែធ្វើឱ្យទម្ងន់សង្កត់ចុះទៅលើជង្គង់ខ្លាំងឡើង ទើបអ្នកម្តាយច្រើនតែមានអាការឈឺសន្លាក់ជង្គង់ ស្រដៀងជង្គង់ចុះខ្សោយ ឬអាចនឹងកើតការចុះខ្សោយរបស់ជង្គង់មែនក៏អាចថាបានដែរ។

វិធីកែខៃ
– មិនគួរដើរច្រើន ឬ ដើរឡើងចុះជណ្តើរញឹកញាប់ទេ។
– មិនគួរលើករបស់ធ្ងន់ៗ ឬ អង្គុយចោងហោងឡើយ។
– គួរគ្រប់គ្រងទម្ងន់ឱ្យឡើងតាមដំណាក់កាលខណៈតាំងគភ៌ (មួយសប្តាហ៍ប្រមាណជា 0,5 គីឡូក្រាម) ព្រោះអាការឈឺនឹងខ្លាំងឡើងបើទម្ងន់ខ្លួនកើនឡើងខ្លាំងពេក។
– ហាត់ប្រាណធ្វើឱ្យសាច់ដុំភ្លៅរឹងមាំដើម្បីទទួលទ្រទម្ងន់ខ្លួនជំនួសឆ្អឹងសន្លាក់ជង្គង់ដែលជាការការពារការកើតឆ្អឹងសន្លាក់ជង្គង់ចុះខ្សោយ ឬក្នុងករណីដែលកើតឡើងរួចហើយ ក៏នឹងជួយមិនឱ្យយ៉ាប់យ៉ឺនខ្លាំងជាងហ្នឹងទៀត និងបន្ថយអាការឈឺចាប់បាន។

ឈាមស្ទះ ហើមជើង៖ អាយុគភ៌ 20 សប្តាហ៍ឡើងទៅ ស្បូននឹងតោងផ្អៀងទៅខាងស្តាំ ធ្វើឱ្យទៅសង្កត់លើសរសៃឈាមខ្មៅធំនៅក្នុងប្រឡោះត្រគាកដែលហូរនាំឈាមត្រឡប់ទៅបេះដូងវិញ និងចែកចាយឈាមល្អដើម្បីចិញ្ចឹមរាងកាយជាបន្ត នៅពេលត្រូវសង្កត់ជាប់ ការហូរវឹលរបស់ឈាមពីជើងផ្នែកខាងក្រោមត្រឡប់ទៅបេះដូងវិញធ្វើបានតិច ទើបធ្វើឱ្យឈាមស្ទះនៅនឹងជើង និងបាតជើង ធ្វើឱ្យកើតបញ្ហាជើង ឬបាតជើងហើមបានយ៉ាងងាយ ហើយបើអ្នកម្តាយរឹតតែឈរយូរៗ ឬដើរជាប់រហូតរយៈពេលយូរផងនោះ នឹងរឹតតែធ្វើឱ្យជើងហើមកាន់ខ្លាំងឡើង។

វិធីកែបញ្ហា
– ចៀសវាងការឈរយូរៗ ឬដើរជាប់រហូតរយៈពេលយូរ។
– ចៀសវាងការអង្គុយសំយ៉ុងជើងយូរៗ គួរអង្គុយដាក់ជើងឱ្យខ្ពស់ ដូចជា ដាក់ជើងសណ្តូកលើកៅអី ជាដើម។
– ខណៈពេលគេងលក់ គួរយកខ្នើយ ឬភួយមកដាក់ទ្រជើងឱ្យខ្ពស់ នឹងជួយឱ្យឈាមហូរវឹលបានល្អឡើង។
– បើសិនមានអាការហើមជើង ហើយឈឺ ចូរត្រាំជើងក្នុងទឹកក្តៅឧណ្ហៗមុនពេលចូលគេង នឹងជួយកាត់បន្ថយអាការឈឺឱ្យ
ថយចុះបាន។

ឥរិយាបថហាត់ប្រាណ ការពារជង្គង់ចុះខ្សោយ
1/ ឈរត្រង់ ដៃចាប់បង្អែកកៅអី ទម្លាក់ខ្លួនចុះឱ្យជង្គង់បញ្ជុចចុះបន្តិច ស្ថិតក្នុងឥរិយាបថបែបនោះដោយរាប់ 3 – 6 ហើយឈរត្រង់ឡើងវីញ រួចធ្វើដដែលៗ 3 – 6 ដង។
2/ អង្គុយលើកៅអី សណ្តូកជើងម្ខាង និងប្រឹងប្រមាណ 10 វិនាទី ហើយបញ្ជុចជង្គង់ចុះ ហើយប្តូរទៅធ្វើជើងម្ខាងទៀត ធ្វើដដែលៗឱ្យបានច្រើនដង។

សរសៃឈាមខ្វេរនៅនឹងជើង៖ គឺមានឈាមស្ទះនៅនឹងសរសៃឈាមខ្មៅ ធ្វើឱ្យសរសៃឈាមហើមប៉ោង អ្នកម្តាយអាចមានអាការរមាស់ ឬមានអារម្មណ៍ថារាងធ្ងន់ៗនៅនឹងជើង ដែលបណ្តាលមកពីស្បូនទៅសង្កត់ពីលើសរសៃឈាមខ្មៅធំក្នុងប្រឡោះឆ្អឹងត្រគាក និងបណ្តាលមកពីការប្រែប្រួលរបស់អ័រម៉ូនខណៈតាំងគភ៌ ធ្វើឱ្យពេលឈរ ឬអង្គុយសំយ៉ុងជើងយូរៗនឹងរឹតតែមានអាការនោះខ្លាំងឡើង។

ក្រៅពីទម្ងន់ខ្លួនដែលកាន់តែកើនឡើងច្រើនហើយនោះ នៅលើអ្នកម្តាយដែលដើរច្រើន នឹងហុចផលឱ្យកជើង និងបាតជើងទ្រទម្ងន់ខ្លាំងឡើងដែរ ធ្វើឱ្យសរសៃប្រសាទត្រូវបានសង្កត់លើនៅម្តុំកជើង ទើបកើតអាការសរសៃបាតជើងរលាក ឈឺបាតជើងនៅពេលដើរ។

វិធីកែបញ្ហា
ចៀសវាងការឈរ ឬអង្គុយសំយ៉ុងជើងយូរៗ គួរក្រោកផ្លាស់ប្តូរឥរិយាបថរៀងរាល់ 30 នាទី ដាក់ក្រណាត់រឹត ( Support )នៅលើជើង កន្លែងដែលសរសៃឈាមខ្វេនោះ និងអ្វីដែលសំខាន់គឺ ចៀសវាងការពាក់ស្បែកជើងកែងចោត គួរពាក់ស្បែកជើងណាដែលពាក់ទៅស្រួល បាតរាប ក្រាស់ទន់ ការពាររអឹល និងទប់ទល់នឹងការពង្រីកខ្លួនរបស់ជើងបានល្អ។

មិនមែនជារឿងពិបាកក្នុងការកាត់បន្ថយអាការឈឺចាប់ ឬការរលាកដែលកើតចេញពីការដើរក្នុងអំឡុងពេលតាំងគភ៌នោះឡើយ បើប្រតិបត្តិតាមវិធីខាងលើរហូតដល់ពេលក្រោយប្រសូត 3 ខែ នឹងជួយឱ្យរាងកាយឆាប់រឹងប៉ឹងឡើងវិញមិនខាន៕

ខ្សែភាពយន្តខ្នាតខ្លីស្តីពីការតស៊ូរបស់យុវនារីម្នាក់ ដែលជាស្ថាបត្យករវ័យក្មេងបានក្លាយជារឿងមួយ ដែលទទួលបានចំណាប់អារម្មណ៍ខ្លាំងពីយុវវ័យសម័យបច្ចុប្បន្ន ហើយវាក៏ជារឿងមួយដែលជំរុញទឹកចិត្តឱ្យអ្នកដែលបានទស្សនាឲ្យមានកម្លាំងចិត្តក្នុងការខិតខំប្រឹងប្រែងធ្វើការងារដែលខ្លួនស្រឡាញ់យ៉ាងពិតប្រាកដ។

រឿងដែលបង្កើតឱ្យមានភាពភ្ញាក់ផ្អើលនេះ គឺរឿង «យុវជនសម័យឥឡូវ» ដែលផលិតឡើងដោយអង្គការទស្សនពិភពលោកប្រចាំនៅកម្ពុជា។

បើយោងតាមការបង្ហាញរបស់អង្គការទស្សនពិភពលោកបានឱ្យដឹងថា រឿង “យុវជនសម័យឥឡូវ” ជារឿងដែលបង្កប់ដោយអត្ថន័យតស៊ូយ៉ាងជ្រាលជ្រៅ ហើយវាក៏ជារឿងមួយដែលជួយឱ្យយុវជន និងយុវនារីបានដឹងពីវិធីដើម្បីយកឈ្នះការបរាជ័យ និងការខកចិត្ត ជាមួយនឹងកម្លាំងចិត្តយ៉ាងមុតមាំឆ្ពោះទៅរកគោលដៅរបស់ខ្លួន។

នៅក្នុងសាច់រឿងនេះក៏បានបង្ហាញផងដែរអំពីការយល់ឃើញរបស់មនុស្សចាស់ពីរប្រភេទផ្សេងគ្នា គឺរវាងម្តាយរបស់តួអង្គស្រី និងអ្នកជិតខាងម្នាក់ដែលជាអ្នកបម្រើការងារនៅក្នុងក្រុមហ៊ុនឯកជនមួយ។ ចំពោះម្តាយរបស់យុវតីដែលជាស្ថាបត្យករនោះ គឺគាត់គាំទ្រ និងផ្តល់តម្លៃពេញទំហឹងសម្រាប់កូនស្រីក្នុងការធ្វើការរចនាប្លង់ ទោះបីជាកិច្ចការខ្លះត្រូវធ្វើនៅពេលយប់ ហើយតម្រូវឱ្យកូនរបស់គាត់ចេញទៅខាងក្រៅដើម្បីប្រជុំជាមួយមិត្តភ័ក្តិក៏ដោយ។

ផ្ទុយទៅវិញ ការយល់ឃើញរបស់បុរសចំណាស់ម្នាក់ដែលជាអ្នកជិតខាងនោះវិញ គាត់បានវាយតម្លៃបែបផ្សេងដោយគ្រាន់តែឃើញរូបភាពខាងក្រៅប៉ុណ្ណោះ ដូចជាការរិះគន់តួអង្គស្រីដែលងើបយឺតនៅពេលព្រឹក ខណៈដែលគាត់មិនបានដឹងពីការពិតថា ពេលនោះគឺស្ថាបត្យករវ័យក្មេងរូបនេះមិនទាន់បានសម្រាកពីការគូរប្លង់របស់គាត់ពេញមួយយប់នៅឡើយ និងការរិះគន់ផ្សេងៗទៀតនៅពេលដែលឃើញក្មេងស្រីម្នាក់នោះចេញទៅក្រៅនៅពេលយប់ ដែលធ្វើឱ្យគាត់ភ្ញាក់ផ្អើលនៅពេលដែលដឹងពីស្ថានភាពពិត គឺនាងបានទៅចូលរួមកម្មវីធីសម្ពោធប្លង់រចនារបស់ក្រុមហ៊ុនដែលគាត់កំពុងធ្វើការហ្នឹងឯង។
តែទោះជាយ៉ាងណាក៏ដោយ ក៏ថាមពលនៃការខិតខំប្រឹងប្រែង គឺពិតជាធ្វើឱ្យស្ថាបត្យករដ៏ក្មេងខ្ចីម្នាក់នោះទទួលបានជោគជ័យនៅទីបំផុត៕

ភ្នំពេញ៖ សាលារាជធានីភ្នំពេញ នឹងដាក់បន្ថែមរថយន្តក្រុងសាធារណៈចំនួន 100គ្រឿងទៀត ហើយនឹងបន្ថែមខ្សែផ្លូវរត់ចំនួន 5ខ្សែទៀត នៅពាក់កណ្តាលខែកក្កដា ឆ្នាំ2017នេះ ដែលរថយន្តទាំង 100គ្រឿងនេះ ជាជំនួយរបស់រដ្ឋាភិបាលចិន។

លោក ម៉េត មាសភក្តី អ្នកនាំពាក្យរដ្ឋបាលនៃសាលារាជធានីភ្នំពេញបានឲ្យដឹងថា សាលាក្រុងកំពុងគ្រោងពង្រីកខ្សែផ្លូវរត់របស់រថយន្តក្រុងក្នុងរាជធានីភ្នំពេញឱ្យបាន10ខ្សែបន្ថែមទៀតនៅចុងឆ្នាំ2017នេះ ខណៈដែលពេលបច្ចុប្បន្នមានរថយន្តក្រុងចំនួនតែ 57គ្រឿងកំពុងដំណើរការនៅលើផ្លូវរត់ចំនួនតែ 3ខ្សែប៉ុណ្ណោះ ប៉ុន្តែលោកនៅមិនទាន់បានបញ្ជាក់អំពីខ្សែផ្លូវរត់ថ្មីទាំង10នោះនៅឡើយ។

គួរបញ្ជាក់ថា បច្ចុប្បន្នសាលារាជធានីភ្នំពេញបានលក់សំបុត្ររថយន្តក្រុងបានប្រមាណជា 6ពាន់ ទៅ7ពាន់សន្លឹកប៉ុណ្ណោះដល់អ្នកធ្វើដំណើរប្រចាំថ្ងៃ ដែលនេះជាមូលហេតុមួយធ្វើឱ្យរដ្ឋបាលក្រុងភ្នំពេញខំប្រឹងពង្រីកបន្ថែមទៀតនូវខ្សែផ្លូវរត់ថ្មី និងដាក់រថយន្តក្រុងសាធារណៈបន្ថែមទៀត៕

ភ្នំពេញ៖ ដើម្បីផ្តល់ភាពងាយស្រួលក្នុងការទាក់ទាញអ្នកវិនិយោគ ចូលមកបណ្តាក់ទុន បង្កើតរោងចក្រកាន់តែច្រើននៅក្នុងប្រទេសកម្ពុជា ក្រុមហ៊ុនជប៉ុន មានគម្រោងវិនិយោគលើវិស័យថាមពល បន្ថែមទៀតនៅកម្ពុជា។

លោកសាស្ត្រាចារ្យ ហ្វូមីអូ ហូឈិ (Fumio Hoshi) ទីប្រឹក្សាជាន់ខ្ពស់នៃក្រុមហ៊ុន Sumitomo Mitsui Banking Corporation បានមានប្រសាសន៍នៅក្នុងជំនួបជាមួយរដ្ឋមន្រ្តីក្រសួងពាណិជ្ជកម្មថា ថាមពលជាគន្លឹះមួយក្នុងការទាក់ទាញអ្នកវិនិយោគមកកាន់ប្រទេសកម្ពុជាកាន់តែច្រើនឡើង ហើយមុននឹងធ្វើដំណើរទស្សនកិច្ចមកកម្ពុជា លោកបានជួបជាមួយក្រុមហ៊ុនមួយចំនួននៅជប៉ុនដែលបានសម្តែងចំណាប់អារម្មណ៍ក្នុងការធ្វើវិនិយោគនៅកម្ពុជាក្នុងវិស័យនេះ។

ជាមួយនឹងការវិនិយោគនេះដែរ លោកសាស្ត្រាចារ្យបានឲ្យដឹងថា ក្រុមហ៊ុនជប៉ុនកំពុងតែប្រឹក្សាលើយុទ្ធសាស្ត្រវិនិយោគមួយចំនួន ដូចជាការវិនិយោគលើរោងចក្រដែលប្រើប្រេងឥន្ធនៈជំនួសឲ្យការដុតធ្យូងថ្ម ការប្រើថាមពលព្រះអាទិត្យ (Solar) និងការកសាងស្ថានីយតភ្ជាប់ការទិញថាមពលពីប្រទេសឡាវ ជាដើម។ល។

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានគាំទ្រទាំងស្រុងលើគំនិតផ្ដួចផ្ដើមរបស់លោកសាស្ត្រាចារ្យ Fumio Hoshi តែសូមឱ្យភាគីជប៉ុនបន្តជំរុញ និងលើកកម្ពស់លើកាលានុវត្តន៍ភាពវិនិយោគរបស់កម្ពុជាបន្ថែមទៀតក្នុងនាមលោកសាស្ត្រាចារ្យជាបុគ្គលម្នាក់ដែលមានការគោរពក្នុងចំណោមធុរជនជប៉ុនដូចគ្នា។

ឯកឧត្តមបានជម្រាបជូនបន្ថែមទៀតថា ក្រុមហ៊ុនជប៉ុនមួយចំនួនបាន និងកំពុងវិនិយោគក្នុងប្រទេសកម្ពុជាប្រកបដោយជោគជ័យ និងគួបផ្សំជាមួយនឹងការលើកទឹកចិត្តពិសេសលើការវិនិយោគក្នុងតំបន់សេដ្ឋកិច្ចពិសេស ឯកឧត្តមមានសុទិដ្ឋិនិយមខ្ពស់ថា ក្រុមហ៊ុនជប៉ុននឹងមកវិនិយោគបន្ថែមទៀតនៅកម្ពុជា៕

បន្ទាប់ពីទទួលបានប្រជាប្រិយភាពនៅក្នុងរឿង «ក្រមុំបាយឆា» មក គេសង្កេតឃើញថា កញ្ញា ឈិន សៀវម៉ី កំពុងតែខំប្រឹងប្រែងទាញយកប្រជាប្រិយភាពបន្ថែមទៀតពីមហាជនតាមរយៈការតុបតែងខ្លួន។

កន្លងមកកញ្ញា ឈិន សៀវម៉ី ត្រូវបានគេដឹងថា ជាតារាសម្ដែងម្នាក់និយមការស្លៀកពាក់រម្យទម ប៉ុន្ដែមួយរយៈចុងក្រោយនេះនាងបានធ្វើឱ្យអ្នកគាំទ្រ និងប្រុសៗមួយចំនួនហាក់ស្លុងអារម្មណ៍ជាខ្លាំងជាមួយការតុបតែងខ្លួនបែបសិចស៊ីរបស់នាង ពិសេសនៅពេលនាង Live ផ្ទាល់តាមរយៈបណ្ដាញសង្គម ដោយមានការតុបតែងខ្លួនបែបសិចស៊ី Cute Cute …។

កញ្ញា ឈិន សៀវម៉ី ទទួលស្គាល់ថា មួយរយៈចុងក្រោយនេះនាងពិតជានិយមតុបតែងខ្លួនបែបសិចស៊ី Cute Cute មែន ជាពិសេសគឺនៅពេលចូលរួមក្នុងកម្មវិធីមង្គលការ ឬជប់លៀងអ្នកសិល្បៈដូចគ្នា។ នាងបន្ដថា នាងចង់ធ្វើការកែប្រែខ្លួនឯងខ្លះ ព្រោះនាងជាអ្នកសិល្បៈមិនចង់ធ្វើអ្វីដដែលៗឡើយ គ្រាន់តែទង្វើរបស់នាងមិនធ្វើឱ្យជ្រុលហួសហេតុ ឬរងការរិះគន់ពីមហាជនឡើយ។

នាងបន្ដថា៖ «កន្លងមកខ្ញុំមិនដែលហ៊ានស្លៀកពាក់សិចស៊ីទេ តែដោយយល់ថា ខ្លួនជាអ្នកសិល្បៈគួរតែមានការផ្លាស់ប្ដូររបៀបតុបតែងខ្លួន ឱ្យមើលទៅប្លែកភ្នែកខ្លះ អ៊ីចឹងហើយទើបខ្ញុំចាប់ផ្ដើមស្លៀកពាក់សិចស៊ីខ្លះៗទៅ»។

គេសង្កេតឃើញថា នៅពេលដែលកញ្ញា ឈិន សៀវម៉ី តុបតែងខ្លួនបែបសិចស៊ីលាយឡំ និងពាក្យសំដីផ្អែមស្រទន់និយាយតាមការ Live ផ្ទាល់ បានធ្វើឱ្យអ្នកគាំទ្ររបស់នាង ជក់ចិត្ដដិតអារម្មណ៍ជាមួយនឹងកាយវិការរបស់នាងជាខ្លាំង ដែលគេជឿថា នាងកំពុងតែប្រើភាពសិចស៊ីនេះមកទាក់ទាញចិត្តមហាជន និងអ្នកគាំទ្ររបស់ខ្លួនហើយ។

តារាសម្ដែងកំពុងតែឡើងកូដម្នាក់នេះ បញ្ជាក់ថា ការស្លៀកពាក់ប្រចាំថ្ងៃរបស់នាង គឺធ្វើឡើងដើម្បីតែភាពស្រស់ស្អាតប៉ុណ្ណោះ។ កន្លងមកនាងក៏ធ្លាប់បានដឹងព័ត៌មានអំពីការដាក់ពិន័យរបស់ក្រសួងទៅលើតារាសិល្បៈដែរ នៅពេលដែលពួកគេស្លៀកពាក់សិចស៊ី ដូច្នេះហើយទើបនាងមានការប្រុងប្រយ័ត្នណាស់ មុនពេលស្លៀកពាក់ចេញទៅក្រៅម្ដងៗ។

សៀវម៉ី បញ្ជាក់ថា ៖ «មុនពេលចេញទៅណាម្ដងៗ ខ្ញុំពិនិត្យមើលខ្លួនឯងច្រើនលើក ច្រើនសាណាស់ទើបសម្រេចចិត្ដចេញទៅ ប្រសិនបើពុំដូច្នោះទេ អាចនឹងមានបញ្ហា ឬទទួលរងនូវការរិះគន់ខ្លាំង។ ផ្ទុយទៅវិញការតុបតែងខ្លួនរបស់ខ្ញុំតែងទទួលបានការសរសើរពីអ្នកគាំទ្រច្រើន ទើបខ្ញុំរក្សាការស្លៀកពាក់បែបនេះ»៕

ភ្នំពេញៈ មន្រ្តីជាន់ខ្ពស់រាជរដ្ឋាភិបាលកម្ពុជា បានពិភាក្សាលើសេចក្តីព្រាងគោលនយោបាយជាតិស្តីពីការលើកទឹកចិត្ត និងការបង្កើតកម្មវិធីសម្រាប់អភិវឌ្ឍលំនៅឋានតម្លៃសមរម្យ។

រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានថ្លែងបន្ទាប់ពីបើកកិច្ចប្រជុំនៅឧត្តមក្រុមប្រឹក្សាសេដ្ឋកិច្ចជាតិនាព្រឹកថ្ងៃទី22 ខែមិថុនានេះថា ទស្សនវិស័យរបស់រាជរដ្ឋាភិបាលកម្ពុជាគឺ លើកទឹកចិត្ត និងបង្កើតកម្មវិធីគោលនយោបាយជាតិសម្រាប់ការអភិវឌ្ឍលំនៅឋានដែលមានតម្លៃសមរម្យ សំដៅធ្វើឲ្យប្រជាជនទូទាំងប្រទេសមានលំនៅឋានសមរម្យអាចរស់នៅបានប្រកបដោយសុខុមាលភាព សុវត្ថិភាព និងសេចក្តីថ្លៃថ្នូរ។

លោកបន្តទៀតថា គោលបំណង និងគោលដៅធំរបស់រាជរដ្ឋាភិបាលកម្ពុជា គឺចូលរួមចំណែកដល់ការទទួលបានលំនៅឋានសមរម្យសម្រាប់ក្រុមគ្រួសារដែលមានចំណូលទាប និងមធ្យម ហើយជាការលើកកម្ពស់សុខសុវត្ថិភាពនៃការកាន់កាប់លំនៅឋាន ការពង្រឹងគុណភាព និងបង្កើនការទទួលបានសេវាទឹក និងភ្លើងអគ្គិសនីជាដើម។

មន្រ្តីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានបញ្ជាក់ទៀតថា គោលដៅនៃការសង់លំនៅឋានតម្លៃសមរម្យ គឺប្រើប្រាស់យន្តការភាពជាដៃគូរដ្ឋ និងឯកជន ហើយបង្កើតឲ្យមានការកម្ចីអនុគ្រោះសម្រាប់ទិញ និងជួសជុលលំនៅឋានដោយការផ្តល់កម្ចីរយៈពេលវែង និងមានការប្រាក់សមរម្យសម្រាប់ប្រជាពលរដ្ឋមានចំណូលទាប និងមធ្យម។ គម្រោងលំនៅឋានសាធារណៈមានតម្លៃសមរម្យសម្រាប់មហាជនរួមទាំងមន្ត្រីរាជការ និងប្រជាពលរដ្ឋដែលមានប្រាក់ចំណូលទាប និងមធ្យមនៅក្នុងប្រទេសកម្ពុជាបានលេចចេញជារូបរាងហើយនៅឆ្នាំ2017នេះ។

លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានថ្លែងថា ជាមួយនឹងកំណើនសេដ្ឋកិច្ច នគរូបនីយកម្មក៏បានកើនឡើងយ៉ាងឆាប់រហ័សដែរ ព្រោះតាមរយៈការសិក្សារបស់ក្រសួងអំពីក្របខ័ណ្ឌយុទ្ឋសាស្រ្តអភិវឌ្ឍន៍ទីក្រុងនៅកម្ពុជាបានរកឃើញថា ចំនួនប្រជាជនរស់នៅរាជធានី ក្រុង និងទីប្រជុំជននៅឆ្នាំ2014 មានចំនួន 4.5លាននាក់ ស្មើនឹង 27.1ភាគរយ និងបន្តកើនឡើងដល់ 7.92លាននាក់នៅឆ្នាំ2030 ស្មើនឹង 44ភាគរយនៃចំនួនប្រជាជនកម្ពុជាសរុប។

តាមទិន្នន័យនេះបានបង្ហាញឲ្យឃើញថា សម្រាប់រយៈពេល 15ឆ្នាំ គិតចាប់ពីឆ្នាំ2015 ដល់ 2030 តម្រូវការលំនៅដ្ឋានសម្រាប់រាជធានី ក្រុង និងទីប្រជុំជននឹងមានប្រមាណជា80ម៉ឺនលំនៅដ្ឋានដែលគិតជាមធ្យម គឺមានតម្រូវការប្រមាណ5ម៉ឺនលំនៅដ្ឋានក្នុងមួយឆ្នាំ៕

អ្នកចូលចិត្ដបទ «ភ្នំពេញនឹកកំពង់ចាម» ដែលច្រៀងដោយលោក ប៊ុន ស័ក្តិ ប្រាកដជានៅចាំកញ្ញា កែវ ស្រីនិច ជាតារាសម្ដែងនៅក្នុងបទចម្រៀងនោះមិនខាន។ ថ្មីៗនេះនាងបានសម្ដែងនូវក្ដីសង្ឈឹមយ៉ាងខ្លាំងចំពោះអាជីពសិល្បៈបន្ទាប់ពីបានដកខ្លួនចេញមួយរយៈធំចេញពីវិថីនេះ។

កញ្ញា កែវ ស្រីនិច បានបញ្ជាក់ថា បន្ទាប់ពីឈប់សម្រាកអស់រយៈពេលជាច្រើនឆ្នាំ ធ្វើឱ្យនាងស្ទើរតែពុំហ៊ានត្រឡប់មកចាប់អាជីពសិល្បៈនេះវិញ ព្រោះនាងយល់ថា ខ្លួនមានអាយុច្រើន ម្យ៉ាងមានអ្នកសិល្បៈស្រករក្រោយជាច្រើនមានសមត្ថភាពចូលប្រឡូកក្នុងវិស័យនេះហើយផង។ នាងបន្ដថា៖ «ខ្ញុំមិននឹកស្មានថា មានយីអ៊ុនឡើងវិញសោះ ព្រោះក្រោយពីប្រឡូកបានជិតមួយឆ្នាំមក ក៏ត្រូវបានអ្នកគ្រប់គ្រងផលិតកម្មសាន់ដេ ហៅឱ្យមកជួយការងារនៅទីនេះដែលមានទាំងការថតខារ៉ាអូខេ និងគ្រប់គ្រងតារាម៉ូដែលជាដើម»។

តារាសម្ដែងរូបនេះបញ្ជាក់ថា ដោយសារតែនាងធ្លាប់មានអនុស្សាវរីយ៍ជាមួយផលិតកម្មសាន់ដេច្រើន ទើបបច្ចុប្បន្នអ្នកគ្រប់គ្រងនៅផលិតកម្មសាន់ដេ គាត់នឹកឃើញព្រមទាំងបានជួយឱ្យរូបនាងធ្វើជាអ្នកគ្រប់គ្រងលើតារាម៉ូដែល នៅពេលផលិតកម្មរៀបចំការប្រគំតន្រ្ដីនៅតាមបណ្ដាខេត្ដនានាម្តងៗ។ កែវ ស្រីនិច បន្ដថា បើទោះជាការវិវឌ្ឍនៃការងារពីតារាសម្ដែងមកជាអ្នករៀបចំតារាម៉ូដែល ហាក់ដូចជាលឿនសម្រាប់នាងក៏ដោយ ក៏នាងពុំជួបការលំបាកអ្វីដែរ ព្រោះនាងជាអ្នកសិល្បៈស្រាប់ ដូច្នេះនាងងាយយល់ពីអារម្មណ៍អ្នកសិល្បៈដូចគ្នាច្បាស់ណាស់។

តារាសម្ដែងរូបនេះបានសម្ដែងនូវអារម្មណ៍រីករាយទោះជាការងារនេះពុំមានកុងត្រាជាមួយគ្នាក៏ដោយ ដោយនាងបានបញ្ជាក់ថា៖ «ខ្ញុំត្រូវតែខំប្រឹងប្រែងចាប់យកការងារទាំងនេះ និងធ្វើវាឱ្យបានល្អ ព្រោះរូបសម្រស់យើងមិននៅស្ថិតស្ថេររហូតទេ ប្រសិនបើថ្ងៃណាមួយយើងសម្ដែងលែងបាន យើងក៏នៅមានការងារទាំងនេះជួយបង្កើនប្រាក់ចំណូលដែរ ដូច្នេះហើយទើបខ្ញុំកំពុងតែមានគម្រោងបើកហាងបាយមួយទៀតដើម្បីរកប្រាក់ចំណូលបន្ថែមក្រៅពីការងារសិល្បៈ»។ ជាមួយគ្នានេះដែរ ស្រីនិច ប្រាប់ថា ទោះជានាងចាប់យកការងារទាំងនោះក៏ពិតមែន ប៉ុន្ដែនាងក៏នៅតែទទួលយកការងារសម្ដែងដូចមុនដដែល ពោលការងារអ្វីក៏នាងធ្វើដែរឱ្យតែទាក់ទងនិងសិល្បៈ។

គួបញ្ជាក់ថា កញ្ញាកែវ ស្រីនិច ជាអតីតកញ្ញាឯកប្រ៊ីដស្ដុនដែលទទួលជយលាភីកាលឆ្នាំ 2009។ បន្ទាប់ពីនាងបានជាប់ចំណាត់ថ្នាក់លេខ1ហើយនោះ នាងបានចូលរួមសម្ដែងក្នុងខ្សែភាពយន្ដដែលចាក់បញ្ចាំងតាមស្ថានីយទូរទស្សន៍ជាច្រើន ដូចជារឿង «រលកក្រោមខ្សាច់»ជាដើម។ ក្រោយមកនាងបានធ្វើឱ្យមហាជនស្គាល់នាងកាន់តែច្បាស់ឡើង ខណៈនាងសម្ដែងនៅក្នុងបទចម្រៀងមួយបទមានចំណងជើងថា «ភ្នំពេញនឹកកំពង់ចាម»៕

https://www.youtube.com/watch?v=OLJeYN7vHW8