វល័ក្ខ - La Reine Media

ល្បឿនលឿនជាងមុនរហូត 8ដង ប៉ុន្តែប្រើបានតែជាមួយស្មាតហ្វូន 3ម៉ូដែលប៉ុណ្ណោះ

កាលពីដើមសប្ដាហ៍នេះក្រុមហ៊ុនបណ្ដាញទូរស័ព្ទ Smart បានធ្វើការបើកឱ្យដំណើរប្រព័ន្ធបច្ចេកវិទ្យា 4.5G ជាមួយនឹងទំហំទឹកប្រាក់វិនិយោគរហូតដល់ទៅ 80 លានដុល្លារ ដែលក្រុមហ៊ុនអះអាងថា ធ្វើឱ្យល្បឿនអ៊ីនធើណិតរបស់ខ្លួនមានល្បឿនលឿនជាងមុនរហូតដល់ទៅ 8 ដង ដែលវារឿងមួយគួរឱ្យរីករាយណាស់សម្រាប់ការប្រើប្រាស់ ប៉ុន្តែអ្វីដែលគួរឱ្យសោកស្ដាយនោះ គឺប្រព័ន្ធថ្មីនេះអាចប្រើបានតែលើស្មាតហ្វូនចំនួន 3 ម៉ូដែលប៉ុណ្ណោះនាពេលបច្ចុប្បន្ន។

តាមការបញ្ជាក់ពីនាយកប្រតិបត្តិក្រុមហ៊ុន Smart លោក ថូម៉ាស ហ៊ុន បានឱ្យដឹងថា បច្ចុប្បន្នប្រព័ន្ធបច្ចេកវិទ្យា 4.5G នេះមានល្បឿនអតិបរមា 1Gbps ដោយអាចប្រើបានលើទូរស័ព្ទម៉ូដែលចុងក្រោយបំផុតរបស់ក្រុមហ៊ុន Samsung ក្រុមហ៊ុន Sony និងក្រុមហ៊ុន Huawei។

លោកបញ្ជាក់ថា៖«អ្វីដែលយើងច្បាស់ការណ៍នៅពេលនេះ គឺមានតែ 3 ម៉ូដែលប៉ុណ្ណោះ ដែលអាចដំណើរការបច្ចេកវិទ្យា 4.5G នេះបាន ដូចជាទូរស័ព្ទ Samsung Galaxy S8 / S8 Plus, Huawei P10 / P10 Plus និងទូរស័ព្ទ Sony Xperia XZ Premium»។

យើងរំពឹងថា ក្រុមហ៊ុនផលិតស្មាតហ្វូនកាន់តែច្រើននឹងបញ្ចូលមុខងារគាំទ្របច្ចេកវិទ្យានេះតាមរយៈការ Upgrade Software នៅក្នុងរយៈពេលប៉ុន្មានខែខាងមុខនេះ។ ការប្រើប្រាស់បច្ចេកវិទ្យា 256QAM 4×4 MIMO និងពហុបណ្តាញរួមគ្នា (Multi Carrier Aggregation) បណ្តាញសេវារបស់ Smart អាចសម្រេចបានរហូតដល់ 600 Mbps នៅក្នុងតំបន់មួយចំនួន គិតមកដល់បច្ចុប្បន្ន។

ទាំងអស់នេះមានន័យថា ក្រៅពីទូរស័ព្ទស្មាតហ្វូនដែលបានរៀបរាប់ខាងលើ គឺនៅមិនទាន់អាចទទួលបានបទពិសោធថ្មីនៃបច្ចេកវិទ្យា 4.5G នេះនៅឡើយទេ។ ទោះជាយ៉ាងណា Smart មិនបានបញ្ជាក់ពីរបៀបមើលដើម្បីដឹងថា តើត្រូវមើល ឬពិនិត្យលើលក្ខណសម្បត្តិស្មាតហ្វូនយ៉ាងណាទើបដឹងថាអាចប្រើបាន ឬមិនបាននោះទេ ប៉ុន្តែតាមការសន្និដ្ឋាន រាល់ស្មាតហ្វូនដែលបំពាក់នូវបន្ទះឈីប Qualcomm Snapdragon 835 ប្រហែលជាប្រើបានទាំងអស់ ខណៈស្មាតហ្វូនទាំង 3 ម៉ូដែលខាងលើនោះ សុទ្ធតែបំពាក់ដោយបន្ទះឈីបស៊េរីនេះទាំងអស់៕

August 23, 2017

Microsoft ចុះបណ្តុះបណ្តាលជំនាញកុំព្យូទ័រដល់ក្មេងៗនៅកន្លែងចាក់សំរាមស្ទឹងមានជ័យ

ក្មេងៗនៅអតីតកន្លែងចាក់សំរាមស្ទឹងមានជ័យ នៃមូលនិធិកុមារកម្ពុជា CCF ប្រមាណជាង 300 នាក់ បានទទួលការបណ្តុះបណ្តាលថ្មីលើជំនាញប្រើប្រាស់កុំព្យូទ័រលក្ខណៈមូលដ្ឋានគ្រឹះ ការប្រើប្រាស់បច្ចេកវិជ្ជាក្នុងជីវភាពប្រចាំថ្ងៃ និងវគ្គខ្លី Hour of Code ពីក្រុមហ៊ុន Microsoft។

លោកស្រី Marija Ralic ប្រធានគ្រប់គ្រងក្រុមមនុស្សធម៌របស់ក្រុមហ៊ុន Microsoft បានឱ្យដឹងថា Microsoft មានបេសកកម្មផ្តល់សិទ្ធិអំណាចដល់មនុស្សគ្រប់រូប និងគ្រប់អង្គការទាំងអស់នៅលើភពផែនដី ដើម្បីសម្រេចសមិទ្ធផលឱ្យបានកាន់តែច្រើនបន្ថែមទៀត។ បច្ចុប្បន្ននេះក្រុមហ៊ុនបានធ្វើការជាមួយអង្គការដៃគូមិនរកប្រាក់ចំណេញ ដូចអង្គការ CCF ដើម្បីធ្វើឱ្យយុវជនគ្រប់រូបនៅទូទាំងពិភពលោកអាចមានលទ្ធភាពប្រើប្រាស់ជំនាញឌីជីថល។

លោកស្រីបន្តថា សិស្សដែលបញ្ចប់កម្មវិធីសិក្សានេះនឹងទទួលបានការយល់ដឹងអំពីគោលគំនិត និងជំនាញកុំព្យូទ័រជាមូលដ្ឋាន។ ក្នុងនោះបុគ្គលិករបស់ Microsoft នឹងធ្វើការស្ម័គ្រចិត្តនៅក្នុងប្រទេសកម្ពុជាដើម្បីសម្របសម្រួល និងរៀបចំវគ្គបណ្ដុះបណ្ដាលសមត្ថភាពសម្រាប់បុគ្គលិក និងសិស្សានុសិស្សអង្គការមូលនិធិកម្ពុជា។ ចំពោះយុទ្ធនាការ Hour of Code គឺជាវគ្គបណ្តុះបណ្តាលរយៈពេល 60 នាទីបង្ហាត់បង្រៀនអំពីវិទ្យាសាស្ត្រកុំព្យូទ័រ និងរៀបចំឡើងដើម្បីស្វែងយល់អំពី “ការសរសេរកូដកុំព្យូទ័រ” និងដើម្បីបង្ហាញថា អ្នកណាក៏អាចរៀនមូលដ្ឋានគ្រឹះ និងពង្រីកការចូលរួមក្នុងការអភិវឌ្ឍឯកសារបង្រៀននៃកម្មវិធីហ្គេម Minecraft របស់ Microsoft និងអង្គការ Code.org បានដែរ។

លោកស្រី Marija Ralic ថ្លែងថា៖«ឱ្យតែនិយាយរឿងការសរសេរកូដ អ្នកសិក្សាភាគច្រើនតែងគិតថា វាលំបាក និងស្មុគស្មាញ ប៉ុន្តែថ្ងៃនេះយើងចង់បង្ហាញពួកគាត់ថា វាមិនមែនដូច្នោះទេ»។

កម្មវិធីសិក្សាផ្នែកចំណេះដឹងឌីជីថលរបស់ Microsoft មានចំនួន 5 កម្មវិធី រួមមានមូលដ្ឋានគ្រឹះកុំព្យូទ័រដោយប្រើប្រាស់កម្មវិធីអ៊ីនធើណេត និងផលិតភាពសុវត្ថិភាព ឯកជនភាព និងការប្រើប្រាស់បច្ចេកវិទ្យាក្នុងជីវភាពប្រចាំថ្ងៃ ដែលសិស្សនឹងទទួលបានការយល់ដឹងអំពីគោលគំនិត និងជំនាញកុំព្យូទ័រជាមូលដ្ឋាន។

លោក Scott Neeson ស្ថាបនិក និងជានាយកប្រតិបត្តិនៃមូលនិធិកុមារកម្ពុជាបានឱ្យដឹងថា តាមរយៈជំនួយឥតសំណងពី Microsoft កម្មវិធីសិក្សានេះកំពុងត្រូវបានបកប្រែជាភាសាខ្មែរដើម្បីចែកចាយដល់សាលារៀន និងអង្គការផ្សេងទៀតប្រើប្រាស់ ជាពិសេសកម្មវិធីសិក្សានេះមានតម្រូវការជាចាំបាច់នៅតាមបណ្តាខេត្តនានាដែលមានអ្នកចេះភាសាអង់គ្លេសមានកម្រិតទាបជាងរាជធានីភ្នំពេញ។ សាលាបឋមសិក្សា នីសិគ្រីប បានផ្តល់ឱកាសអប់រំប្រកបដោយស្តង់ដារខ្ពស់បំផុត ដល់កុមារក្រីក្របំផុតមួយចំនួនក្នុងចំណោមកុមារក្រីក្របំផុតទាំងឡាយនៅកម្ពុជា។

សមិទ្ធផលនេះសម្រេចបានតាមរយៈការកែលម្អទីតាំងសិក្សាឱ្យមានភាពប្រសើរឡើង និងការប្រើប្រាស់បច្ចេកវិទ្យាឌីជីថល ចុងក្រោយបំផុតដែលផ្តោតជាសំខាន់លើការអប់រំ STEM និងនៅក្នុងបរិយាកាសដែលអំណោយផលដល់ការយកចិត្តទុកដាក់រៀនសូត្រ និងការយល់ដឹងអំពីពិភពលោក។ សាលាបឋមសិក្សា នីសិគ្រីប និងសាលារៀននៅសហគមន៍ចំនួន 5 កន្លែងរបស់អង្គការ CCF បច្ចុប្បន្ននេះផ្តល់ការអប់រំកុំព្យូទ័រ ដល់សិស្សចំនួន 1,550 នាក់ តាមរយៈជំនួយឥតសំណងនៃគម្រោង YouthSpark ហើយពេលនេះអង្គការក៏បានចុះកិច្ចសហការជាមួយក្រុមហ៊ុន Microsoft មួយទៀតដើម្បីផ្ដល់នូវកម្មវិធីសិក្សា និងវគ្គជំនាញខ្លី៕

August 23, 2017

កម្ពុជានឹងក្លាយជាប្រទេសផលិតប្រេងដ៏ធំមួយក្នុងពេលអនាគត

ភ្នំពេញៈ មន្ត្រីជាន់ខ្ពស់រដ្ឋាភិបាលកម្ពុជាបានលើកឡើងថា កម្ពុជានឹងក្លាយជាប្រទេសផលិតប្រេងដ៏ធំមួយនាពេលអនាគត និងរំពឹងទុកថា សម្រាប់ដំណាក់កាលទាញយកប្រេងដំបូងនៅតំបន់1A និង1Bត្រូវបានប៉ាន់ស្មានថា អាចនឹងលើសពី30លានបារ៉ែលដែលអាចផ្តល់លទ្ធភាពពាណិជ្ជកម្មគ្រប់គ្រាន់ក្នុងការជំរុញឲ្យប្រទេសកម្ពុជាផលិតប្រេងឆៅប្រកបដោយសក្តានុពល។

ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពលបានថ្លែងលើកឡើងនៅក្នុងពិធីចុះហត្ថលេខាលើកិច្ចព្រមព្រៀងសម្រាប់ការអភិវឌ្ឍប្រេងកាតប្លុកA រវាងរាជរដ្ឋាភិបាល និងក្រុមហ៊ុនគ្រីសអេនើជី ( Kris Energy) នៅព្រឹកថ្ងៃទី23 ខែសីហា ឆ្នាំ2017នេះថា ការចុះហត្ថលេខាលើកិច្ចព្រមព្រៀង អភិវឌ្ឍន៍អណ្តូងប្រេងកាតប្លុកAនាពេលនេះគឺជាសក្ខីភាពឆ្លុះបញ្ចាំងនូវសមិទ្ធផលដ៏អស្ចារ្យរបស់រាជរដ្ឋាភិបាលកម្ពុជា និងជាការចាប់ផ្តើមថ្មីមួយយ៉ាងសំខាន់ក្នុងដំណើរការឆ្ពោះទៅផលិតប្រេងឆៅលើកទី1 ចេញពីដែនសមុទ្ររបស់កម្ពុជា។

ឯកឧត្តមបន្តថា បរិមាណសក្តានុពលប្រេងកាតដែលបានសិក្សាឃើញ និងរំពឹងទុកសម្រាប់ដំណាក់កាលដំបូង 1A និង 1B ត្រូវបានប៉ាន់ប្រមាណថា អាចនឹងលើសពី30លានបារ៉ែលដែលអាចផ្តល់លទ្ធភាពពាណិជ្ជកម្មគ្រប់គ្រាន់ក្នុងការជំរុញឲ្យកម្ពុជាក្លាយជាប្រទេសផលិតប្រេងឆៅប្រកបដោយសក្តានុពល។ ក្នុងនោះការចាប់ផ្តើមអភិវឌ្ឍអណ្តូងប្រេងកាតប្លុកAនេះគឺបានជំរុញឲ្យមានការសិក្សាស្វែងរកដ៏ខ្លាំងក្លាថែមទៀតលើប្លុកប្រេងកាតដែលនៅទំនេរចំនួន5នៅដែនសមុទ្រ និង18ប្លុកផ្សេងទៀតនៅដែនគោកផងដែរ។

ឯកឧត្តមអូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានលើកឡើងថា កម្ពុជាមានទិសដៅច្បាស់លាស់ គឺមិនបណ្តោយខ្លួនឲ្យក្លាយជាប្រទេសដែលពឹងផ្អែកលើចំណូលប្រេងកាត និងឧស្ម័នជាចរន្តដង្ហើមស្លាប់រស់នៃសេដ្ឋកិច្ចទេ ប៉ុន្តែនឹងប្រើប្រាស់ចំណូលនេះរួមចំណែកក្នុងការកែទម្រង់រចនាសម្ព័ន្ធសេដ្ឋកិច្ច ដើម្បីធានាចីរភាពកំណើនក្នុងរយៈពេលមធ្យម និងវែងផងដែរ។

ឯកឧត្តមបានលើកឡើងទៀតថា កម្ពុជាត្រៀមខ្លួនរួចរាល់ទាំងក្នុងក្របខ័ណ្ឌធនធានមនុស្ស ស្ថាប័ន និងគោលនយោបាយដើម្បីបញ្ចៀសនូវបណ្តាសារធនធាន និងជំងឺហូឡង់ (Dutch disease) ដោយបានសិក្សាពីបទពិសោធដ៏ជូរចត់កន្លងមករបស់ប្រទេសផលិតប្រេងមួយចំនួន និងបានគិតគូររួចជាស្រេចដើម្បីប្រែក្លាយចំណូលប្រេងកាតទៅជាកាតលីករពិតប្រាកដមួយក្នុងការអភិវឌ្ឍពិពិធកម្ម និងទំនើបកម្មសេដ្ឋកិច្ចដែលមានវិស័យឧស្សាហកម្មដើរតួកាន់តែសំខាន់ឡើងដើម្បីក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ2030 និងជាប្រទេសមានចំណូលខ្ពស់នៅឆ្នាំ2050 ។

ពាក់ព័ន្ធនឹងការអភិវឌ្ឍប្រេងកាតនេះ លោក ខេលវិន តាំង (Kelvin Tang) នាយកប្រតិបត្តិក្រុមហ៊ុន Kris Energy Ltd,បានថ្លែងនូវការប្តេជ្ញាចិត្តថា បន្ទាប់ពីការចុះហត្ថលេខាក្នុងពេលឆាប់ៗបន្ទាប់នេះ ក្រុមហ៊ុននឹងប្រកាសសេចក្តីសម្រេចចុងក្រោយលើការវិនិយោគ និងបន្តសម្រេចឲ្យបានដំណក់ប្រេងដំបូងក្នុងរយៈពេល24ខែ ក្នុងឆ្នាំ2019ខាងមុខនេះ៕

August 23, 2017

ព្រាប សុវត្ថិ រិះគន់ហេដ្ឋារចនាសម្ព័ន្ធតាមតំបន់ទេសចរណ៍មួយចំនួន

ក្នុងវេទិកាស្ដីពីបរិស្ថានកាលពីម្សិលមិញគេសង្កេតឃើញតារាចម្រៀងស្រី មាស សុខសោភា លើកឡើងនូវសំណូមពរ 3ចំណុច ដល់រាជរដ្ឋាភិបាល ដោយឡែកលោក ព្រាប សុវត្ថិ ហាក់ពុំបានបញ្ចេញមតិអ្វីសោះ គ្រាដែលគេមើលឃើញថា លោកដូចជាមានអារម្មណ៍ភិតភ័យ។

បើទោះជាលោក ព្រាប សុវត្ថិ មិនបានបញ្ចេញមតិអ្វីជាដុំកំភួនក្នុងវេទិកាសាធារណៈនោះក៏ដោយ ប៉ុន្ដែក្នុងការផ្ដល់បទសម្ភាសជាមួយអ្នកសារព័ត៌មានវិញ លោកបានលើកឡើងនូវសំណូមពរមួយចំនួនជុំវិញការអភិវឌ្ឍតំបន់ទេសចរណ៍ ពិសេសតំបន់កម្សាន្ដស្ថិតនៅក្នុងខេត្ដរតនគិរី។ លោក ព្រាប សុវត្ថិ បញ្ជាក់ប្រាប់ថា ប្រទេសកម្ពុជា ជាប្រទេសសម្បូរទៅដោយធនធានធម្មជាតិ ពិសេសតំបន់ទេសចរណ៍ ដូច្នេះយើងគួរតែចូលរួមថែរក្សាវាឱ្យបានល្អក្នុងចំណែកនៃការអភិរក្ស និងអភិវឌ្ឍន៍យើងគួរតែមានហេដ្ឋារចនាសម្ព័ន្ធល្អដើម្បីជួយសម្រួលដល់ភ្ញៀវទេសចរ ដូចជានៅខេត្ដរតនគិរី ជាដើម។

លោកបានលើកឧទាហរណ៍ថា៖ «តំបន់បឹងយក្សឡោម…ពិភពលោកគេស្គាល់បឹងយក្សឡោម ប៉ុន្ដែបើយើងមើលពីផ្លូវចូលទៅតំបន់នោះវិញ ហាក់មិនទាន់ល្អសម្រាប់ការទាក់ទាញនៅឡើយទេ ប្រសិនបើយើងធ្វើការកែលម្អផ្លូវ និងរៀបចំបរិស្ថានឱ្យបានកាន់តែល្អថែមទៀតសម្រាប់ភ្ញៀវទេសចរ ក៏វាកាន់តែល្អសម្រាប់មុខមាត់ខេត្ដនេះផងដែរ»។ លោកបន្ដថា មានខេត្ដខ្លះពុំមានអ្វីជាភាពទាក់ទាញដល់ភ្ញៀវទេសចរ ឬក៏អាចយកទៅបង្អួតដល់ពិភពលោកផង ដូច្នេះវាជាភ័ព្វសំណាងសម្រាប់ខេត្ដខ្លះដែលមានតំបន់កម្សាន្ដសម្រាប់បង្អួតដល់គេនោះហើយ។

តារាចម្រៀងលំដាប់កំពូលរូបនេះបានលើកឡើងទៀតថា ជាក់ស្ដែងដូចជាបទលោកតា ស៊ិន ស៊ីសាមុត ឬបទរបស់លោកជាដើម បានចូលរួមច្រៀងលើកពីតំបន់ទេសចរណ៍មួយចំនួនស្ដាប់ទៅពីរោះរហូតមានអ្នកខ្លះមានក្ដីស្រមៃថាចង់ទៅស្គាល់ ព្រោះមិនដឹងថា តំបន់នោះល្អប៉ុនណាទេ? ប៉ុន្ដែទិដ្ឋភាពជាក់ស្ដែង មិនមែនដូចក្នុងចម្រៀងទេ ពោលគឺកន្លែងនោះសម្បូរទៅដោយសំរាម។ លោកបញ្ជាក់ថា តំបន់បឹងកន្សែង គឺយើងមានបទ «អកបឹងកន្សែង» ស្ដាប់ទៅពិរោះរណ្ដំ តែភាពជាក់ស្ដែងអ្វីដែលលោកក៏ដូចជាមហាជនទូទៅអាចមើលឃើញនៅបឹងកន្សែងនោះ គឺមានសំរាមច្រើន ដូច្នេះគួរតែជួយគ្នាថែរក្សាបរិស្ថានឱ្យបានល្អដើម្បីសោភ័ណភាព និងសុខមាលភាពភ្ញៀវទេសចរ និងប្រជាជនដែលរស់នៅជុំវិញទីនោះ។

ពាក់ព័ន្ធនឹងកម្រងទេសភាពនៅខេត្ដរតនគិរី កន្លងមកគេមើលឃើញថា លោក ព្រាប សុវត្ថិ បានបង្ហើរសំនៀងជាច្រើនបទដែលបង្ហាញពីភាពស្រស់ស្អាត និងតំបន់ទេសចរណ៍ជាច្រើននៅក្នុងខេត្ដនេះដូចជាបទ «សាងស្នេហ៍នៅបឹងយក្សឡាម» ជាដើម៕

https://www.youtube.com/watch?v=30zyd70h3JQ

August 23, 2017

អ័រគីដេវីឡា ចូលរួមសកម្មភាពមនុស្សធម៌កសាងផ្លូវ និងចែកសម្ភារសិក្សាដល់សិស្សជាង 500នាក់

ជាការចូលរួមចំណែកក្នុងការលើកកម្ពស់វិស័យអប់រំ ក៏ដូចជាការបង្ហាញពីឆន្ទៈក្នុងការថែរក្សាធនធានធម្មជាតិនៅកម្ពុជាផងដែរនោះ នៅព្រឹកថ្ងៃទី23 ខែសីហា ឆ្នាំ 2017 ព្រឹកមិញនេះ ក្រុមហ៊ុន អ័រគីដេ វីឡា បានចំណាយថវិកាស្ថាបនាផ្លូវបេតុងមួយខ្សែដែលមានទទឹង 4 ម៉ែត្រ និងប្រវែង 70 ម៉ែត្រ និងចែកសម្ភារសិក្សាដូចជាប៊ិច សៀវភៅ កាបូបស្ពាយ ដល់សិស្សានុសិស្សចំនួនជាង 500 នាក់ ដែលសិស្សានៅក្នុងសាលារៀន និងអនុវិទ្យាល័យ សម្ដេច អគ្គមហាសេនា បតីតេជោ ហ៊ុន សែន ស្ថិតនៅភូមិ ចំបក់មាស សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ។ បន្ថែមពីនេះ នៅក្នុងឱកាសសម្ពោធផ្លូវបេតុងនេះ ក្រុមការងាររបស់ក្រុមហ៊ុន អ័រគីដេវីឡា ក៏បានចូលរួមបំផុសចលនា ថែរក្សាបរិស្ថាន និងធនធានធម្មជាតិ ដោយការដាំកូនឈើ រួមជាមួយនឹងការដាំកូនផ្កា ដើម្បីជាការលម្អរនៅក្នុងបរិវេណសាលារៀន និងអនុវិទ្យាល័យផងដែរ ។

ជាការផ្ដាំផ្ញើ អ្នកតំណាងក្រុមហ៊ុន អ័រគីដេវីឡា ដែលនាំយកអំណោយទៅចែកដល់សិស្សានុសិស្សក៏បានបញ្ជាក់ឱ្យដឹងផងដែរ សម្រាប់អំណោយ ដែលរួមមានសម្ភារសិក្សា សម្ភារលេងកីឡា រួមជាមួយនឹងផ្លូវបេតុងមួយខ្សែនេះ ថ្វីត្បិតមានចំនួនតិច ប៉ុន្តែវាជាសកម្មភាពមួយដែលបង្ហាញពីឆន្ទៈនៃការចូលរួមចំណែកនៅក្នុងសង្គម លើកម្ពស់វិស័យអប់រំ ក៏ដូចជាជួយសម្រួលដល់សិស្សានុសិស្ស និងលោកគ្រូអ្នកគ្រូនៅក្នុងរដូវភ្លៀងធ្លាក់នេះឱ្យមានភាពងាយស្រួល។

គួររំលឹកផងដែរថា ជានិច្ចកាល ក្រុមហ៊ុន អ័រគីដេវីឡា តែងបានចូលរួមចំណែកក្នុងការអភិវឌ្ឍន៍សង្គមជាតិ និងការងារមនុស្សធម៌ជាហូរ ដូចជា ការផ្តល់ឈាម ការបរិច្ចាកថវិកាជួយគាំទ្រដល់មន្ទីរពេទ្យគន្ធបុប្ផា ការកសាងផ្លូវ ក៏ដូចជាចូលរួមកសាងសាលារៀនជាដើម ៕

August 23, 2017

ប្រឡងបាក់ឌុបឆ្នាំនេះ មានអ្នកអវត្តមានជាង1ពាន់នាក់ និងភាពមិនប្រក្រតីមួយចំនួន

ក្រសួងអប់រំ យុវជន និងកីឡា បានចេញសេចក្តីប្រកាសព័ត៌មានស្តីពីដំណើរការសំណេរ នៃការប្រឡងមធ្យមសិក្សាទុតិយភូមិចំណេះទូទៅ និងបំពេញវិជ្ជាក្នុងសម័យប្រឡងថ្ងៃទី 21 ខែសីហា ឆ្នាំ2017 ដើម្បីបង្ហាញពីស្ថានភាពទូទៅ និងសរុបស្ថានភាពទូទៅនៃការប្រឡងមធ្យមសិក្សាទុតិយភូមិ។

ជាស្ថានភាពដែលបង្ហាញដោយក្រសួងអប់រំ យុវជន និងកីឡា បានបង្ហាញថា នៅឆ្នាំ 2017 នេះ ការប្រឡងមានស្ថានភាពស្ងប់ស្ងាត់ល្អ និងប្រព្រឹត្តទៅដោយរលូន ដោយមានបេក្ខជនប្រឡងសរុបចំនួន 101,410នាក់ និងមានមណ្ឌលប្រឡងចំនួន 178មណ្ឌល ក្នុងនោះមានថ្នាក់វិទ្យាសាស្ត្រពិតចំនួន 108មណ្ឌល និងថ្នាក់វិទ្យាសាស្ត្រសង្គមចំនួន 70មណ្ឌល។ ការប្រឡងនេះក៏មានការចូលរួមពីអ្នកសង្កេតការណ៍ចំនួន 4,678នាក់។

ក្នុងដំណើរការប្រឡងនេះមានបេក្ខជនអវត្តមានចំនួន 1,647នាក់ ក្នុងនោះមានសិស្សស្រីចំនួន 584នាក់ គិតជាភាគរយគឺប្រមាណជា 1,62ភាគរយនៃបេក្ខជនសរុប។ ចំពោះដំណើរការសំណេរនៅឆ្នាំនេះថ្វីត្បិតតែមានលក្ខណៈល្អប្រសើរជាងឆ្នាំមុនៗក៏ដោយ តែក៏មានចំណុចខ្លះដែលគួរឱ្យកត់សម្គាល់ផងដែរដូចជាមានភ្លៀងធ្លាក់នៅតាមបណ្តាខេត្តខ្លះ រួមទាំងមានបេក្ខជនមួយចំនួនមានបញ្ហាសុខភាពដែលជាឧបសគ្គបន្តិចបន្តួចសម្រាប់ដំណើរការប្រឡង។

យោងតាមឯកសាររបស់ក្រសួងអប់រំ យុវជន និងកីឡា បានបង្ហាញថា បេក្ខជនប្រឡងដែលមានកំហុសឆ្គងត្រូវបានរៀបចំកំណត់ហេតុពិសេសមានចំនួន 13ករណី ក្នុងនោះករណីដកហូតទូរស័ព្ទដៃ6ករណី ប្តូរលេខតុអង្គុយមាន1ករណី លួចចម្លងសំណៅឯកសារ 1ករណី លួចប្រើម៉ាស៊ីនគិតលេខ 1ករណី ប្រឡងជំនួស 1ករណី លួចប្តូរលេខតុ1ករណី និងបុគ្គលិកអប់រំមានកំហុសឆ្គង5ករណី (ប្រើប្រាស់ទូរស័ព្ទ ឱ្យគេមកជំនួស ខ្ជីខ្ជាក្នុងការបំពេញភារកិច្ច)។

ចំពោះបញ្ហាសុខភាពវិញ ជារួមឃើញថាកើតឡើងចំនួន70ករណី ប៉ុន្តែអាចដំណើរការប្រឡងបន្តទៀតបានបន្ទាប់ពីទទួលការសង្គ្រោះបឋមចំនួន 31ករណី និង9ករណីផ្សេងទៀតមិនអាចបន្តប្រឡងបាន។ ចំពោះបុគ្គលិកអប់រំវិញ មានបញ្ហាសុខភាពចំនួន2ករណី៕

August 23, 2017

Barca ប្តឹង Neymar ទារសំណង10លានដុល្លារជុំវិញការរំលោភកិច្ចសន្យា

ក្លិបយក្ស Barcelona កំពុងតែព្យាយាមទាមទារសំណងក្នុងទឹកប្រាក់8.5លានអឺរ៉ូ (ស្មើនឹង10លានដុល្លារអាមេរិក) ពីខ្សែប្រយុទ្ធ Neymar ពីបទរំលោភកិច្ចសន្យា។ នេះបើយោងទៅតាមការប្រកាសរបស់ក្លិបនេះកាលពីថ្ងៃអង្គារ ខណៈដែលការប្តឹងតវ៉ានេះបានកើតឡើងក្រោយពីការផ្ទេរក្នុងតម្លៃខ្លួនជាកំណត់ត្រាពិភពលោកចំនួន222លានអឺរ៉ូរបស់ Neymar ទៅកាន់ក្លិប Paris Saint-Germain។

Barcelona ទាមទារប្រាក់សំណងនេះពី Neymar វិញ ដោយបានចោទប្រកាន់តារាឆ្នើមអន្តរជាតិប្រេស៊ីលរូបនេះថា មិនបានគោរពទៅតាមកិច្ចសន្យារបស់ខ្លួនដែលរូបគេទើបតែបានចុះហត្ថលេខាលើកុងត្រាថ្មីរយៈពេល5ឆ្នាំកាលពីរយៈពេល9ខែមុន។

Barcelona បានឲ្យដឹងក្នុងសេចក្តីថ្លែងការណ៍មួយថា៖ «ក្នុងពាក្យបណ្តឹងនេះ ក្លិបទាមទារឲ្យកីឡាកររូបនេះបង្វិលសងប្រាក់ដែលត្រូវបានផ្តល់ឲ្យរួចជាស្រេចសម្រាប់ការបន្តកុងត្រាថ្មីរបស់ពួកគេ ខណៈដែលរូបគេមិនបានបំពេញកិច្ចសន្យារបស់គេឡើយ ពោលគឺទឹកប្រាក់ 8.5លានអឺរ៉ូ និងប្រាក់សំណង10ភាគផ្សេងទៀតនៃទឹកប្រាក់សរុបនេះទៀតសម្រាប់ការពន្យារពេលនៃការបង់សង»។

ដោយឡែកភាគីខាង Neymar បានធ្វើការឆ្លើយតបវិញកាលពីថ្ងៃអង្គារនៅក្នុងសេចក្តីប្រកាសព័ត៌មានមួយតាមរយៈការបញ្ជាក់ថា ខ្លួនបានគោរពតាមសុពលភាពនៃកិច្ចសន្យាទាំងស្រុង។ ក្លិប Barcelona បានបញ្ជាក់ក្នុងសេចក្តីថ្លែងការណ៍ដដែលថា៖ «ក្លិបក៏ស្នើឲ្យ Paris St-Germain ទទួលខុសត្រូវសម្រាប់ការបង់សងចំពោះទឹកប្រាក់នោះផងដែរ ប្រសិនបើកីឡាកររូបនេះមិនអាចធ្វើបានដោយខ្លួនគេផ្ទាល់»។ ក្រោយមក ក្លិប Paris St-Germain បានឆ្លើយតបវិញថា ពួកគេពិតជាមានការភ្ញាក់ផ្អើលចំពោះសេចក្តីប្រកាសរបស់ Barcelona និងបានបន្ថែមថា៖ «ក្លិបសូមធ្វើការបញ្ជាក់ម្តងទៀតរួមជាមួយនឹង Neymar Jr ថា យើងពិតជាគោរពតាមច្បាប់ និងលក្ខខណ្ឌផ្សេងៗទាំងអស់ ប៉ុន្តែពិតជាសោកស្តាយណាស់ ចំពោះឥរិយាបថរបស់ក្លិប FC Barcelona»៕

ប្រភពពី៖ Sport24

August 23, 2017

រដ្ឋមន្ត្រីទេសចរណ៍ព្រួយបារម្ភពីបញ្ហាកាកសំណល់ និងសំរាម

ភ្នំពេញៈ រដ្ឋមន្ត្រីក្រសួងទេសចរណ៍លោក ថោង ខុន បានសម្តែងនូវការព្រួយបារម្ភជាខ្លាំងអំពីបញ្ហាបរិស្ថាន ការគ្រប់គ្រងសំរាម និងសណ្តាប់ធ្នាប់នៅក្នុងប្រទេសកម្ពុជា បើទោះណាជាមានមជ្ឈដ្ឋានអន្តរជាតិមួយចំនួនបាននិងកំពុងសរសើរកម្ពុជាថា មានបរិស្ថានល្អស្អាតយ៉ាងណាក៏ដោយ។

រដ្ឋមន្ត្រីរូបនេះបានលើកឡើងនៅថ្ងៃម្សិលមិញនេះ បន្ទាប់ពីកម្ពុជាបានសម្រេចយកទីក្រុងស្អាតរបស់កម្ពុជាចំនួន7 ដែលរួមមានរាជធានីភ្នំពេញ ខេត្តបាត់ដំបង សៀមរាប ក្រុងព្រះសីហនុ កំពត កែប និងខេត្តកំពង់ចាម ទៅចូលរួមប្រកួតប្រជែងដណ្តើមយកជយលាភីឯកទីក្រុងស្អាតអាស៊ានលើកទី1 ដែលនឹងប្រកាសលទ្ធផលនៅខែមករាឆ្នាំ2018 ខាងមុខនេះ។

លោកបញ្ជាក់ថា អ្វីដែលក្រសួងទេសចរណ៍សំណូមពរ និងសុំឱ្យប្រជាពលរដ្ឋ និងអាជ្ញាធរមូលដ្ឋានសហការធ្វើឱ្យបាននោះ គឺការខិតខំគ្រប់គ្រងសំរាម ប្រមូលសំរាមឱ្យបានស្អាតនៅក្នុងមូលដ្ឋាន និងជុំវិញកន្លែងដែលយើងកំពុងរស់នៅ ការរៀបចំធ្វើឱ្យមានសណ្តាប់ធ្នាប់ល្អ និងខិតខំរៀបចំបង្គន់សាធារណៈជាដើម។ ព្រោះថាសំរាមជាប្រភពនៃមេរោគ និងធ្វើឱ្យបាត់បង់ភ្ញៀវទេសចរផងដែរ។ ដូច្នេះ យើងត្រូវតែចូលរួមសម្អាតទាំងអស់គ្នា ទើបមានបរិស្ថានស្អាតអាចទាក់ទាញភ្ញៀវទេសចរបាន។

ក្រុមអ្នកជំនាញទេសចរណ៍នានាសុទ្ធតែបានសម្តែងនូវការព្រួយបារម្ភពីបញ្ហានេះ ដោយសារកម្រិតនៃការយល់ដឹងរបស់ប្រជាពលរដ្ឋនៅមានកម្រិត និងមិនមានការផ្លាស់ប្តូរឥរិយាបទលើបញ្ហានេះ។

លោក លូ ម៉េង សហប្រធានក្រុមការងារឯកជនផ្នែកវិស័យទេសចរណ៍បានថ្លែងថា បញ្ហាសំរាមជាបញ្ហារបស់យើងទាំងអស់គ្នា និងទាមទារឲ្យមានការចូលរូមពីប្រជាពលរដ្ឋរបស់យើងទាំងអស់គ្នា ទើបប្រទេសយើងស្អាត និងទាក់ទាញបាននូវភ្ញៀវទេសចរកាន់តែច្រើន។ លោកបន្តថា ភ្ញៀវទេសចរអន្តរជាតិជាច្រើនពួកគេមានការខ្លាចរអា ខ្ពើមរអើម ពេលឃើញសំរាមចោលពាសវាលពាសកាលនៅតាមដងផ្លូវនានាកន្លងមក។

លោកបន្តថា “សូមប្រជាពលរដ្ឋយកចិត្តទុកដាក់ចំពោះបញ្ហានេះ ហើយចាប់ផ្តើមផ្លាស់ប្តូរឥរិយាបទរបស់ខ្លួនដើម្បីលើកកម្ពស់សោភ័ណភាពប្រទេសរបស់យើង”៕

August 23, 2017

ការរិះគន់ផ្សេងៗបានផ្ទុះឡើង ខណៈទីម័រខាងកើតបន្ថែមភាពអាម៉ាសដល់កម្ពុជា

ក្រុមបាល់ទាត់ជម្រើសជាតិកម្ពុជាអាយុក្រោម22ឆ្នាំ កំពុងតែប្រឈមមុខនឹងការធ្លាក់ចេញពីពូល B នៃព្រឹត្តិការណ៍ស៊ីហ្គេម លើកទី29 ដោយគ្មានសូម្បីតែមួយពិន្ទុ ក្រោយពីពួកគេបានរងបរាជ័យក្នុងលទ្ធផល 1-០ ពេលប្រកួតជាមួយនឹងក្រុមរបស់ប្រទេសដ៏តូចមួយគឺទីម័រខាងកើត ក្នុងទីក្រុងគូឡាឡាំពួ ប្រទេសម៉ាឡេស៊ី កាលពីថ្ងៃម្សិលមិញ ខណៈដែលមានការផ្ទុះនូវការរិះគន់ជាច្រើនបន្ទាប់ពីការប្រកួតនេះ។

ក្រុមយុវជនកម្ពុជាបានឈានទៅកាន់ការប្រកួតកាលពីល្ងាចថ្ងៃអង្គារ ដោយសម្លឹងរកលទ្ធផលជាវិជ្ជមានមួយ ក្រោយពីបានធ្លាក់ចេញពីយុទ្ធនាការស៊ីហ្គេម ត្រឹមវគ្គចែកពូលរួចជាស្រេច បន្ទាប់ពីចាញ់ក្រុមជម្រើសជាតិហ្វីលីពីន 2-០ កាលពីថ្ងៃបើកឆាក មុននឹងចាញ់ក្រុមវៀតណាម 4-1 និង 3-០ ក្រោមស្នាដៃក្រុមម្ចាស់ជើងឯកថៃ។ លទ្ធផលកាលពីថ្ងៃអង្គារ មានន័យថា បច្ចុប្បន្នក្រុមកម្ពុជា U22 ក្រោមការដឹកនាំរបស់លោក Leonardo Vitorino កំពុងតែឈរនៅបាតនៃពូល ដោយមិនមានសូម្បីតែមួយពិន្ទុ។

ក្រុមជម្រើសជាតិ U22កម្ពុជា នឹងត្រូវធ្វើការប្រកួតចុងក្រោយរបស់ពួកគេនៅថ្ងៃព្រហស្បតិ៍ ស្អែកនេះ ដោយត្រូវប៉ះជាមួយនឹងក្រុមជម្រើសជាតិ U22ឥណ្ឌូនេស៊ី។ ហេតុនេះ មានន័យថា ក្រុមយុវជនកម្ពុជា នឹងប្រឈមមុខនឹងការមិនទទួលបានពិន្ទុសោះពីយុទ្ធនាការស៊ីហ្គេមនៅឆ្នាំនេះ ស្របពេលដែលក្តីសង្ឃឹមនៃការទទួលបានពិន្ទុក្នុងពេលប្រកួតជាមួយនឹងក្រុមខ្លាំងឥណ្ឌូនេស៊ី ដែលបច្ចុប្បន្នកំពុងតែមាន8ពិន្ទុពីការប្រកួត4លើកស្ថិតក្នុងកម្រិតយ៉ាងស្តួចស្តើងបំផុត។

ប៉ុន្តែ បើទោះបីក្រុមជម្រើសជាតិកម្ពុជា មិនទទួលបានលទ្ធផលប្រកបដោយផ្លែផ្កាក្តី តែបើគិតចាប់តាំងពីលោក Vitorino ត្រូវបានតែងតាំងជាគ្រូបង្វឹកកាលពីដើមឆ្នាំនេះមក បុរសសញ្ជាតិប្រេស៊ីលរូបនេះ មិនដែលទទួលស្គាល់ពីកម្រិតបច្ចេកទេសរបស់ខ្លួនឡើយ ប៉ុន្តែបែរជានៅតែកោតសរសើលើសមត្ថភាពរបស់ខ្លួនទៅវិញ។ លោក Vitorino បាននិយាយបន្ទាប់ពីការប្រកួតមិត្តភាពមួយមុនយុទ្ធនាការស៊ីហ្គេមថា៖ «ខ្ញុំមិនមែនមកទីនេះដើម្បីរាប់លទ្ធផលឈ្នះប៉ុន្មាន និងចាញ់ប៉ុន្មានឡើយ ប៉ុន្តែ ខ្ញុំមកទីនេះដើម្បីអភិវឌ្ឍ និងធ្វើឲ្យកម្រិតលេងរបស់កម្ពុជាល្អប្រសើរឡើង»។ ជាមួយគ្នានេះ ក៏មានការរិះគន់នៅលើបណ្តាញសង្គម Facebook ផងដែរ បន្ទាប់ពីកម្ពុជាចាញ់ក្រុមជម្រើសជាតិទីម័រខាងកើត។ គណនីឈ្មោះ Sopheak Hiek បានសរសេរបែបចំអកថា៖ «អរគុណសម្រាប់ការខំប្រឹង អ៊ុយ22 តែបើឲ្យអ៊ុយ90លេងវិញ ប្រហែលជាល្អជាងនេះ»។ ដោយឡែក គណនី Chean Chanra បានសរសេរថា៖ «ខ្ញុំមើលបាល់ទាត់កម្ពុជានៅស៊ីហ្គេមឆ្នាំនេះ ឈឺចាប់ណាស់»៕

August 23, 2017

ម៉ារ៉ា បូណ្ណា ចេញមុខបកស្រាយការពារកិត្ដិយស សាធ រស្មី

ក្រោយពីអ្នកនាង សាធ រស្មី ប្រកាសថា នាងមិនមានពាក់ព័ន្ធនឹងអតីតស្វាមីរបស់ខ្លួនគឺលោក ជៀស ស្រួច ទេនោះ ស្រាប់តែថ្មីៗនេះលេចចេញនូវព័ត៌មានថ្មីមួយទៀតថា នាងបានសាងស្នេហ៍ជាមួយនឹងលោកម៉ារ៉ា បូណា្ណ។

ពាក់ព័ន្ធចំណងស្នេហ៍រវាងអ្នកនាង សាធ រស្មី និងលោក ម៉ារ៉ា បូណ្ណា ជាតារាចម្រៀង និងតារាសម្ដែងត្រូវបានគេមើលឃើញថា ទើបតែផ្ទុះរឿងឡើងរយៈពេលប៉ុន្មានថ្ងៃនេះប៉ុណ្ណោះ ពោលក្រោយពីនាងចាប់ផ្ដើមទទួលយកការសម្ដែងជាញឹកញាប់ជាមួយលោក ម៉ារ៉ា បូណ្ណា។ ក្រោយពីផ្ទុះរឿងនេះឡើងភ្លាម គេពុំបានឃើញភាគីខាងស្រីចេញមុខមកបកស្រាយនោះទេ ផ្ទុយទៅវិញបែរជាលោក ម៉ារ៉ា បូណ្ណា ជាអ្នកចេញមកបកស្រាយពាក់ព័ន្ធនឹងរឿងនេះទៅវិញ។

លោក ម៉ារ៉ា បូណ្ណា បានសំណូមពរកុំឱ្យមហាជនមានការយល់ច្រឡំមកលើរូបលោក និងអ្នកនាង សាធ រស្មី ថាមានទំនាក់ទំនងស៊ីជម្រៅគ្នានោះ គឺគ្មានទេ ពោលគឺគ្មានទេ ហើយលោកក៏មិនចង់ល្បីឈ្មោះដោយសាររឿងនេះដែរ។ លោកបន្ដថា៖«ខ្ញុំអត់មានស្នេហាស៊ីជម្រៅអីជាមួយ សាធ រស្មី នោះទេ យើងគ្រាន់តែជាអ្នកសិល្បៈសម្ដែងជុំគ្នាប៉ុណ្ណោះ មូលហេតុខ្ញុំចេញមកបកស្រាយ ព្រោះបងប្អូនចង់ដឹងពីរឿងនេះ។ សម្រាប់ខ្ញុំបើបងប្អូនមិត្ដភ័ក្ដិប្រហែលជាសម្បូរច្រើន ប៉ុន្ដែស្នេហាដូចជាអត់សូវមានទេ ដូច្នេះសូមឈប់យល់ច្រឡំទៅ»។

តារាចម្រៀងរូបនេះបន្ដថា រវាងលោក និងអ្នកនាង សាធ រស្មី មិនអាចយកទៅប្រៀបធៀបគ្នាបានទេ ព្រោះនាងមានរូបសម្រស់ស្អាតខ្លាំងដូចទេពអប្សរ បែរមកមើលរូបរាង និងសម្បុរស្បែករបស់លោកវិញ បើឈរជិតអ្នកនាង សាធ រស្មី ដូចក្អែកពាំពងមាន់អ៊ីចឹង ដូច្នេះរវាងលោក និងនាងគ្រាន់តែជាមិត្ដភ័ក្ដិតែប៉ុណ្ណោះ៕

https://www.youtube.com/watch?v=9_z5HMounDQ

August 23, 2017

Author: វល័ក្ខ