វល័ក្ខ - La Reine Media

A M K ផ្តល់កម្ចីទិញម៉ូតូដោយលក្ខខណ្ឌងាយៗ

ភ្នំពេញ – ក្រោយពីដំណើរការឥណទានកម្ចីទិញម៉ូតួរយៈពេលជិត2ឆ្នាំ និងទទួលបានការគាំទ្រនិងមានកំណើនអតិជនកើនឡើងជាបន្ដបន្ទាប់រួចមក គ្រឹះស្ថានមីក្រូហិរញ្ញវត្ថុអេ អឹម ខេ បានបើកយុទ្ធនាការជាលក្ខណៈទ្រង់ទ្រាយធំដើម្បីផ្ដល់អត្ថប្រយោជន៍ទ្វេដងទៅលើកម្ចីទិញម៉ូតូជូនអតិថិជន។

លោកសួន ពិសី ប្រធាននាយកប្រតិបត្ដិអាជីវកម្មឥណទាន និងធានារ៉ាប់រងខ្នាតតូច នៃគ្រឹះស្ថានមីក្រូហិរញ្ញវត្ថុ អេ អឹម ខេ បានលើកឡើងថា ឥណទាននេះបានដាក់ឱ្យដំណើរការតាំងពីចុងឆ្នាំ2015មកម្ល៉េះ ដោយចាប់ផ្ដើមនៅតាមបណ្ដាខេត្ដចំនួន8។ ដោយមើលឃើញពីសក្ដានុពល ភាពរីកចម្រើន និងកំណើនអតិថិជនដែលប្រើប្រាស់កម្ចីនេះកាន់តែមានការកើនឡើងយើងក៏បង្កើតឥណទានក្នុងទ្រង់ទ្រាយធំ គឺផ្ដល់កម្ចីទិញម៉ូតូទូទាំងប្រទេសតែម្ដង។ ជាមួយគ្នានេះយើងក៏មានយុទ្ធនាការផ្ដល់អត្ថប្រយោជន៍ទ្វេដងពីកម្ចីទិញម៉ូតូដោយចាប់ផ្ដើមពីថ្ងៃទី1 ខែកញ្ញា ដល់30 ខែវិច្ឆិកា ឆ្នាំ2017។

កម្ចីទិញម៉ូតូ អេ អឹម ខេ នឹងផ្ដល់ជូនអតិថិជនអាចឱ្យខ្ចីបាន100%នៃតម្លៃម៉ូតូ ដោយផ្ដល់ជូនមួកសុវត្ថិភាពមួយដោយឥតគិតថ្លៃក្នុងអំឡុងពេលយុទ្ធនាការរយៈពេល3ខែនេះ។ ក្រៅពីនេះអតិថិជនអាចទទួលបានអត្រាការប្រាក់ទាប និងនឹងលុបចោលបំណុលនៅពេលម្ចាស់បំណុលមានគ្រោះថ្នាក់ជាយថាហេតុរហូតបាត់បង់ជីវិត។

លក្ខខណ្ឌងាយៗដើម្បីទទួលបានឥណទានកម្ចីទិញម៉ូតូនេះ គឺគ្រាន់តែអតិថិជនបញ្ជាក់ពីលំនៅដ្ឋានអចិន្ដ្រៃយ៍ និងប្រាក់ចំណូលប្រចាំខែ និងមានអចលនទ្រព្យបញ្ចាំអតិថិជនអាចទទួលបានកម្ចី100% ដោយអតិថិជនត្រូវសងរំលស់ទៅវិញរយៈពេល36ខែ។ ក្នុងករណីអតិថិជនពុំមានអចលនទ្រព្យដាក់បញ្ចាំទេនោះ ពួកគាត់អាចដាក់ម៉ូតូដែលបានមកពីកម្ចីទិញនោះយកមកធ្វើជាទ្រព្យបញ្ចាំ ដោយគ្រឹះស្ថានមីក្រូហិរញ្ញវត្ថុតម្រូវឱ្យអតិថិជនត្រូវទិញធានារ៉ាប់រងលើការថែរក្សាម៉ូតូ ។

ប្រធាននាយកប្រតិបត្ដិអាជីវកម្ម ឥណទាន និងធានារ៉ាប់រងខ្នាតតូចនៃគ្រឹះស្ថានមីក្រូហិរញ្ញវត្ថុ អេ អឹម ខេ បញ្ជាក់ថា តាមរយៈឥណទាននេះយើងសង្ឃឹមថា ប្រជាជនដែលមានតម្រូវការម៉ូតូដើម្បីបម្រើដល់ជីវភាពប្រចាំថ្ងៃនឹងពេញចិត្ដនូវកម្ចីទិញម៉ូតូនេះ ព្រោះឥណទាននេះនឹងបើកទូលាយដល់អតិថិជនអាចមានជម្រើសយកការទិញម៉ូតូបាននៅគ្រប់ទីកន្លែង។ អាចទិញបានជាមួយក្រុមហ៊ុនជាដៃគូសហការរបស់ អេ អឹម ខេ ឬកន្លែងលក់ម៉ូតូនានាទៅតាមចំណូលចិត្ដរបស់អតិថិជន ដូច្នេះអេ អឹម ខេ ជាជម្រើសល្អបំផុតសម្រាប់អតិថិជនក្នុងការទទួលបានកម្ចីទិញម៉ូតូ៕

September 2, 2017

អាល្លឺម៉ង់ ខិតកាន់តែកៀកទៅ World Cup ខណៈអង់គ្លេសឈ្នះម៉ាល់ត៍

ខ្សែការពារ Mats Hummels បានជួយឲ្យក្រុមបាល់ទាត់ជម្រើសជាតិអាល្លឺម៉ង់ ស្ថិតយ៉ាងប្រកៀកក្នុងការឈ្នះកៅអីទៅលេងក្នុងព្រឹត្តិការណ៍ World Cup ឆ្នាំ2018 កាលពីថ្ងៃសុក្រ តាមរយៈការរកគ្រាប់បាល់ឈ្នះនៅពេលចុងម៉ោងក្នុងការប្រកួតជាមួយនឹងក្រុមបាល់ទាត់ជម្រើសជាតិសាធារណរដ្ឋឆែក ស្របពេលដែលខ្សែប្រយុទ្ធ Harry Kane បានស៊ុតបាល់បញ្ចូលទី2គ្រាប់ដើម្បីជួយឲ្យក្រុមជម្រើសជាតិអង់គ្លេស យកឈ្នះលើក្រុមម៉ាល់ត៍ ក្នុងលទ្ធផល 4-។

ខ្សែប្រយុទ្ធ Timo Werner របស់ក្លិប RB Leipzig បានរកគ្រាប់បាល់បំប៉ោងសំណាញ់ទី ក្រោយពីលេងបានត្រឹមតែរយៈពេល4នាទីសម្រាប់ក្រុមម្ចាស់ជើងឯកពិភពលោក អាល្លឺម៉ង់ ក្នុងទីក្រុង Prague ប៉ុន្តែ គ្រាប់បាល់តាមស្មើរបស់កីឡាករ Vladimir Darida បានផ្តល់ការជឿជាក់ឡើងវិញសម្រាប់ក្រុមម្ចាស់ផ្ទះ។ ក្រុមរបស់លោក Joachim Loew បានកត់ត្រាជ័យជម្នះជាលើកទី7ពីការប្រកួតទាំង7លើកក្នុងពូល C ខណៈដែល Hummels បានតែតបាល់បញ្ចូលទីយ៉ាងល្អ ក្រោយពីការទាត់បាល់ឆ្លងពីសំណាក់ Toni Kroos នៅនាទីទី88 ដើម្បីជួយឲ្យក្រុមខ្លួនទទួលជ័យជម្នះ 2-1 និងធ្វើឲ្យក្រុមអាល្លឺម៉ង់ត្រូវការត្រឹមតែ4ពិន្ទុប៉ុណ្ណោះពីការប្រកួត3លើកចុងក្រោយរបស់ពួកគេ។

លោក Loew បានឲ្យដឹងថា៖ «យើងមិនអាចរីករាយជាមួយនឹងកម្រិតដែលយើងបានលេងនេះឡើយ។ យើងត្រូវការសំណាងជាច្រើននៅថ្ងៃនេះ ហើយប្រសិនបើ Mat មិនបានគ្រាប់បាល់បញ្ចូលទីតាមរយៈការតែតបាល់ដ៏អស្ចារ្យទេនោះ យើងច្បាស់ជាទទួលបានលទ្ធផលស្មើមិនខាន»។ ក្រុមជម្រើសជាតិអាល្លឺម៉ង់ នឹងឈ្នះកៅអីទៅកាន់ប្រទេសរុស្ស៊ីនៅថ្ងៃន្ទខាងមុខនេះ ប្រសិនបើពួកគេផ្តួលក្រុមជម្រើសជាតិន័រវែស ក្នុងផ្ទះខ្លួនឯង និងក្រុមជម្រើសជាតិអៀរឡង់ខាងជើង មិនអាចយកឈ្នះពេលជួបក្រុមជម្រើសជាតិឆែក នៅទីក្រុង Belfast៕

ប្រភពពី៖ Sport24

September 2, 2017

មណ្ឌលទេសចរណ៍ទឹកចម្រុះពណ៌ 5កន្លែង ដែលស្អាតបំផុតលើពិភពលោក

អាចរាប់បានថា ជាមណ្ឌលទេសចរណ៍ទឹកដ៏អស្ចារ្យបំផុត ដែលកំពុងរង់ចាំឱ្យអ្នកទេសចរទូទាំងពិភពលោកបានទៅទស្សនា និងនែបនិត្យជាមួយនឹងបរិយាកាសធម្មជាតិដ៏ស្អាតអស្ចារ្យដែលបានឃើញហើយនឹងធ្វើឱ្យជញ្ជក់មាត់គ្រប់ៗគ្នាមិនខាន។

1/ Plitvice Lake ប្រទេសក្រូអាត

ជាមណ្ឌលទេសចរណ៍ដ៏ល្បីល្បាញបំផុតរបស់ប្រទេស ក្រូអាត ដែលឧត្តមសម្បូរទៅដោយភាពស្រស់ស្អាតរបស់ធម្មជាតិ ភាពស្រស់ថ្លាខៀវខ្ចីរបស់ធម្មជាតិ ភាពត្រជាក់ស្រស់បស់របស់ព្រៃព្រឹក្សា និងភាពត្រជាក់ស្រើបនៃទឹកបឹងទន្លេសាប Plitvice Lake។ គឺជាបឹងមួយក្នុងចំណោមបឹងទន្លេសាបទាំង16ដែលត្រូវបានតភ្ជាប់គ្នាដោយទឹកជ្រោះធ្លាក់ដ៏ស្រស់ស្អាតជាច្រើនរហូតកើតចេញជាបឹងទន្លេសាបដែលឧត្តមសម្បូរទៅដោយធម្មជាតិដែលទាមទារឱ្យអ្នកទេសចរទៅនែបនិត្យផ្តិតយករូបភាពដ៏ស្រស់ស្អាតទាំងនេះ។

2/ Halong Bay or Bay of Descending Dragons ប្រទេសវៀតណាម

ប្រហែលជាមិនចាំបាច់អធិប្បាយអ្វីច្រើនទេសម្រាប់ ហាឡុង បេយ៍ ប្រទេសវៀតណាមនេះ ព្រោះអាចរាប់បានថា ជាមណ្ឌលទេសចរណ៍ខាងទឹកបែបធម្មជាតិមួយទៀតដ៏ស្រស់ស្អាតបំផុត ដែលធ្លាប់ទទួលអ្នកទេសចរអស់ជាច្រើនលាននាក់មកហើយ។ ជាមួយនឹងដំណើរទេសចរណ៍បែបអនុរក្សធម្មជាតិ និងនែបនិត្យជាមួយនឹងភាពស្រស់ស្អាតរបស់បណ្តាកោះតូចធំជាង1,600កោះដែលពោរពេញទៅដោយដើមឈើ និងព្រៃស្រោង ព្រមទាំងបានរៀនយល់ដឹងពីវិថីជីវិតរបស់អ្នករស់នៅទីនោះយ៉ាងស្ងប់សុខ និងងាយស្រួលផងដែរ។

3/ Wuhua Hai, Five-Flower Lake ប្រទេសចិន

ទន្លេសាប វូហួ ហៃ ឬទន្លេសាបនៃបុប្ផាទាំងប្រាំ គឺជាទន្លេសាបមួយក្នុងចំណោមទន្លេសាបដែលស្រស់ស្អាតលំដាប់ជួរមុខគេរបស់ឧទ្យាន ជីវ ចូ កូវ៍ ដោយសារតែមានទឹកដែលថ្លាហួសវិស័យរហូតដល់អាចមើលឃើញបាតបឹងបាន និងពណ៌របស់ទឹកថែមទាំងស្រស់ស្អាតរហូតក្លាយជាទីពេញនិយមសម្រាប់ប្រជាជនចិននាំគ្នាចូលមកថតរូបមុនរៀបការទុកជាអានុស្សាវរីយ៍ទៀតផង។ បឹងទន្លេសាបមួយនេះមានជម្រៅដល់ទៅ5ម៉ែត្រ នឹងមានផ្ទៃក្រឡាដល់ទៅ9ម៉ឺនម៉ែត្រការ៉េ។ ចំណែកឯប្រភពរបស់ឈ្មោះដែលគេនាំគ្នាហៅថា បុប្ផាទាំងប្រាំនោះគឺ ព្រោះតែដុំកករ រុក្ខជាតិ និងថ្មកំបោរដែលស្ថិតនៅក្រោមទឹកនោះមានពណ៌ចម្រុះហ្នឹងឯង។

4/ Cano Cristales, River of Five Colors ប្រទេសកូឡុំប៊ី

បើបានទៅលេងកម្សាន្តនៅទីនោះក្នុងអំឡុងពេលដែលមានទឹកច្រើន ភ្ញៀវទេសចរច្បាស់ជាត្រូវនឹកចម្លែកចិត្តមិនខានថា តើហេតុអីបានទីនេះមានឈ្មោះថា ទន្លេ 5ពណ៌ ទាំងដែលវាមានតែពណ៌បៃតងចាស់មួយដូចទន្លេទូទៅដែរនោះ តែឈប់សិន… បើសិនលោកអ្នកបានទៅលេងក្នុងអំឡុងខែកញ្ញា និងខែវិច្ឆិកាដែលមានទឹកតិច ឬរដូវប្រាំងវិញនោះ ក៏នឹងបានដឹងថា ហេតុអីបានមានដល់ទៅ 5ពណ៌? ព្រោះថា ពណ៌ទាំងអស់នោះ គឺរុក្ខជាតិដែលដុះនៅក្រោមទឹកដែលមានឈ្មោះថា Macarenia clavigera ដែលនឹងប្តូរទៅជាពណ៌ក្រហម និងពណ៌ផ្កាឈូក ចៃដន្យជួបនឹងពណ៌ដ៏ស្រស់ស្អាតរបស់ដីខ្សាច់ដែលមានពណ៌លឿង និងពណ៌បៃតង ហើយផ្ទៃទឹកក្នុងទន្លេក៏មានពណ៌ផ្ទៃមេឃដ៏ស្អាតផងនោះ ទើបមានឈ្មោះថាជា ទន្លេ 5ពណ៌បែបនេះ។

5/ Abraham Lake in Alberta ប្រទេសកាណាដា

ភាពស្រស់ស្អាតដ៏គួរឱ្យនឹកចម្លែកចិត្តដែលដូចជាត្រូវបានសាងឡើងដោយកុំព្យូទ័រក្រាហ្វិកខ្លាំងជាងជាស្នាដៃរបស់ធម្មជាតិ តែមិនមែនទេ… នេះគឺជាទន្លេ អាប្រាហាំ នៃប្រទេសកាណាដា នារដូវរងា។ គឺជាបាតុភូតធម្មជាតិដ៏គួរឱ្យនឹកស្ងើច នៅពេលដែលពពុះខ្យល់រាប់លានដុំដែលនៅឯបាតទន្លេអណ្តែតឡើងមកនៅពេលធាតុអាកាសរងាខ្លាំង។ ពពុះខ្យល់ទាំងអស់នេះ ជាហ្កាសដែលកើតឡើងពីបាក់តេរីដែលរលាយពីកម្ទេចរុក្ខជាតិនៅឯបាតទន្លេហ្នឹងឯង៕

September 2, 2017

ការទទួលខោអាវរោងចក្រមកកាត់ព្រុយក៏អាចរកចំណូលចិញ្ចឹមគ្រួសារបានដែរ

ភ្នំពេញ៖ រោងចក្រសហគ្រាសនៅតាមមូលដ្ឋានមិនត្រឹមតែជួយបង្កើនការងារ និងប្រាក់ចំណូលដល់កម្មករនោះទេ ប៉ុន្តែថែមទាំងជួយកាត់បន្ថយនូវការធ្វើចំណាកស្រុក និងផ្តល់ការងារដល់ស្ត្រីមេផ្ទះ និងមនុស្សចាស់មួយចំនួនឱ្យអាចរកចំណូលបានគួរសមទៀតផង។

ក្រៅអំពីការងារដាំស្លមើលថែកូនចៅនៅផ្ទះហើយនោះ ស្ត្រីមេផ្ទះ និងចាស់ៗនៅក្នុងភូមិព្រែកសំរោង ភូមិព្រែកខ្សេវ ភូមិព្រែកឡុង និងភូមិព្រែកថីក្នុងឃុំរកាខ្ពស់ ស្រុកស្អាង ខេត្តកណ្តាលនៅមានរបរបន្ទាប់បន្សំមួយទៀត គឺស៊ីឈ្នួលកាត់ព្រុយខោអាវថ្មីៗពីរោងចក្រដែលក្នុងមួយខែអាចទទួលបានកម្រៃបន្ថែមប្រមាណ100 ទៅ150ដុល្លារផងដែរក្នុងមួយខែ។

អ្នកស្រី នួន សុខនាង នៅភូមិព្រែកខ្សេវបានប្រាប់ឱ្យដឹងថា អ្នកស្រីមានរបរលក់នំគ្រក់ ហើយក្រៅពីការងារលក់ដូរ និងដាំស្លរហើយ អ្នកស្រីនៅមានរបរមួយផ្សេងទៀត គឺទទួលខោអាវទើបដេរហើយថ្មីៗពីរោងចក្រយកមកកាត់ព្រុយនៅឯផ្ទះ ដែលមួយខែៗអាចរកចំណូលបន្ថែមបានប្រមាណជាង100ដុល្លារ ហើយខាងរោងចក្រគេដឹកយកមកឱ្យដល់ផ្ទះទៀតផង។ លុះធ្វើរួចរាល់ហើយ គ្រាន់តែទូរស័ព្ទប្រាប់គេ ខាងរោងចក្រនឹងមកដឹកយកទៅវិញ និងយកថ្មីទៀតមកឱ្យធ្វើបន្ត។ ការងារនេះមិនលំបាកណាស់ណាទេ និងថែមទាំងអាចជួយបន្ថែមចំណូលឱ្យមានជីវភាពកាន់តែប្រសើរឡើងទៀតផង។

ចំណែកលោកយាយ មុំ សុខ អាយុ75ឆ្នាំ រស់នៅភូមិព្រែកឡុង ក៏បានមានប្រសាសន៍ដែរថា សព្វថ្ងៃបានការងារកាត់ព្រុយខោអាវរោងចក្រនេះហើយដែលជួយឱ្យគាត់រកកម្រៃបានសម្រាប់ធ្វើបុណ្យដាក់ទានទៅវត្តវ៉ា ហើយក៏មិនហត់នឿយដែរ ព្រោះចាំតែអង្គុយកាត់នៅផ្ទះប៉ុណ្ណោះ។ គេដឹកយកមកឱ្យដល់កន្លែង ហើយដល់ខែគេយកលុយមកទូទាត់ឱ្យដល់ផ្ទះទៀតដែលធ្វើឱ្យគាត់អាចជួយមើលថែទាំចៅ និងចាំផ្ទះបានទៀតផង សរុបទៅគឺបានរបរនេះហើយដែលផ្តល់នូវចំណូលប្រចាំខែមិនចាំបាច់សុំ ឬចាំកូនឱ្យប្រាក់ចាយនោះ។

មេការម្នាក់នៅរោងចក្រយ៉ុងវ៉ា នៅក្នុងឃុំរកាខ្ពស់ក្នុងចំណោមរោងចក្រចំនួនទាំង10 អ្នកនាង ម៉ែន ស្រីទូច ក៏បានប្រាប់ឱ្យដឹងដែរថា ដោយសារនៅក្នុងរោងចក្រមានការខ្វះខាតកម្មករ ទើបយើងបានដឹកសម្លៀកបំពាក់ដេររួចយកទៅឱ្យបងប្អូនជួយកាត់ព្រុយនៅតាមផ្ទះ ដើម្បីជួយបង្កើនចង្វាក់ការងារក្នុងរោងចក្រឱ្យបានទាន់ពេលវេលា។

លោក សុខ ប៊ុនថន ជំទប់ទី1ឃុំរកាខ្ពស់បានមានប្រសាសន៍ថា នៅទូទាំងឃុំមានភូមិចំនួន7 មានប្រជាពលរដ្ឋចំនួន 2,895គ្រួសារ និងមានចំនួនមនុស្សសរុប13,149 នាក់ ហើយមានរោងចក្រកាត់ដេរចំនួន10 មានកម្មករកម្មការិនីចំនួន2,410នាក់ ហើយភូមិដែលប្រជាពលរដ្ឋទទួលយកសម្លៀកបំពាក់ពីរោងចក្រទៅកាត់ព្រុយនោះមានចំនួន4ភូមិ រួមមានភូមិ ព្រែកឡុង ភូមិព្រែកសំរោង ភូមិព្រែកខ្សេវ និងភូមិព្រែកថី។ ការងារនេះវាមិនត្រឹមតែផ្តល់នូ វចំណូលដល់បងប្អូនដែលជាស្ត្រីមេផ្ទះនោះទេ វាថែមទាំងជួយកាត់បន្ថយល្បែងស៊ីសងនៅក្នុងមូលដ្ឋានទៀតផង ព្រោះពួកគាត់មានការងារធ្វើ ដូច្នេះគ្មានពេលទំនេរទៅលេងល្បែងស៊ីសងនោះឡើយ។ ចុងក្រោយលោកក៏សូមអំពាវនាវទៅដល់បងប្អូនដែលកំពុងធ្វើចំណាកស្រុកទាំងប្រថុយប្រថាននោះ គួរតែគិតគូរឡើងវិញ ព្រោះក្នុងភូមិឃុំរបស់យើងក៏អាចរកប្រាក់ចំណូលបានដែរ និងដែលសំខាន់គឺកំពុងខ្វះខាតកម្លាំងពលកម្ម៕

September 1, 2017

ស្ថាបត្យករ និងនិស្សិតដែលសិក្សាលើជំនាញនេះមិនគួរមើលរំលង «វេទិកាស្ថាបត្យកម្ម» ឡើយ

ភ្នំពេញ – ទោះជាបច្ចុប្បន្នវិស័យសំណង់នៅកម្ពុជាកំពុងតែរីកចម្រើន និងបោះជំហានទៅមុខយ៉ាងលឿនក៏ដោយ ក៏នៅមានអ្នកជំនាញមួយចំនួនលើកឡើងដែរថា វិស័យមួយនេះនៅមានចំណុចខ្វះខាតខ្លះ និងទាមទារឱ្យមានការសិក្សាស្វែងយល់ដើម្បីបង្កើនពុទ្ធិ និងពង្រឹងសមត្ថភាពបន្ថែមទៀត។

ថ្លែងនៅក្នុងកម្មវិធីសន្និសីទស្ដីពីការតាំងពិព័រណ៍វិស័យសំណង់ Cambuild2017 ឯកឧត្ដមភឿង សោភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានលើកឡើងថា បច្ចុប្បន្នវិស័យសំណង់មានការរីកដុះដាលគ្រប់កន្លែងដែលនាំមកនូវការងារសម្រាប់ប្រជាជនកម្ពុជា និងចូលរួមកាត់បន្ថយភាពក្រីក្រ។ ឯកឧត្ដមបញ្ជាក់ថា៖«ដូច្នេះយើងចង់ពង្រឹងសមត្ថភាពទៅដល់ស្ថាបត្យករ វិស្វករដែលធ្វើការបម្រើខាងវិស័យនេះឱ្យយល់ដឹងអំពីវឌ្ឍនភាពខាងវិស័យនេះ។ ក្នុងន័យនេះមិនមែនមានន័យថា កម្ពុជាដើរមិនទាន់ប្រទេសគេនោះទេ យើងដើរទាន់គេដែរ ប៉ុន្ដែយើងចង់រក្សាឱ្យបាននូវការអភិរក្ស និងអភិវឌ្ឍន៍តម្លៃស្ថាបត្យកម្មខ្មែរ និងរក្សាឱ្យបានផលប្រយោជន៍គ្រប់ជ្រុងជ្រោយដើម្បីឱ្យយើងអភិវឌ្ឍទៅឆ្ពោះទៅរកការរីកចម្រើន»។

គួរបញ្ជាក់ថា សំណង់ជាវិស័យអាទិភាពទី3ក្នុងការជំរុញសេដ្ឋកិច្ចជាតិឱ្យរក្សាកំណើនបាន7%និងតាមរយៈវិស័យមួយនេះយើងអាចផ្ដល់ការងារដល់ប្រជាជនទូទាំងប្រទេសក្នុងរង្វង់20ម៉ឺននាក់។

ឯកឧត្ដមភឿង សោភ័ណ្ឌ បន្ដថា មូលហេតុនេះហើយដែលនាំឱ្យយើងត្រូវតែបង្កើត «វេទិកាស្ថាបត្យកម្ម» នេះឡើងដើម្បីពង្រឹងសមត្ថភាពស្ថាបត្យករ វិស្វករ និងអ្នករកស៊ីក្នុងវិស័យសំណង់ អចនទ្រព្យ លំនៅឋាន ឱ្យរក្សាបាននូវអ្វីដែលជាអត្ដសញ្ញាណជាតិផង ទំនើបកម្មផងដើម្បីធ្វើយ៉ាងណាឱ្យកាន់តែមានភាពរីកចម្រើនបន្ថែមទៀត។ ឯកឧត្ដមបន្ដថា ប្រសិនបើប្រទេសកម្ពុជាអាចរក្សាបានស្ថាបត្យកម្មខ្មែរបែបទំនើប ប្រទេសកម្ពុជានឹងទទួលបានលំហូរភ្ញៀវទេសចរកាន់តែច្រើនដែរ ព្រោះយើងអាចដឹងបានតាមរយៈចំណង់ចំណូលចិត្ដរបស់ភ្ញៀវទេសចរដែលមកទស្សនានៅកម្ពុជា គឺចង់ឃើញប្រាសាទបុរាណដែលជាស្នាដៃស្ថាបត្យករខ្មែរពីបុរាណហ្នឹងឯង។

«វេទិកាស្ថាបត្យកម្ម»នឹងត្រូវធ្វើឡើងនៅថ្ងៃដំបូងនៃកម្មវិធីពិព័រណ៍វិស័យសំណង់Cambuild2017 ដែលនឹងប្រព្រឹត្ដទៅនៅថ្ងៃទី7-9 ខែកញ្ញា ឆ្នាំ2017នៅសាលកោះពេជ្រ។ ក្នុងនោះក៏មានក្រុមហ៊ុនជាង300ក្រុមហ៊ុនចូលរួមដោយនាំមកនូវផលិតផលដែលជាបច្ចេកវិទ្យាថ្មីៗចុងក្រោយបង្អស់មកតាំងបង្ហាញដោយផលិតផលទាំងនោះមានមកពីប្រទេសចិន ចិនតៃវ៉ាន់ សិង្ហបុរី ម៉ាឡេស៊ី វៀតណាម អ៊ីតាលី ជាដើម។

រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ប្រាប់ទៀតថា នៅក្នុងវេទិកាស្ថាបត្យកម្មនេះនឹងមានស្ថាបត្យករកំពូលៗមកពីប្រទេសសិង្ហបុរី ថៃ ភូមា ឡាវ និងកម្ពុជា មកចូលរួមបង្ហាញនូវបទពិសោធល្អៗរបស់ពួកគាត់មកចែកជូនដល់ស្ថាបត្យករកម្ពុជា ក៏ដូចជានិស្សិតដែលសិក្សាលើជំនាញនេះឱ្យយល់កាន់តែច្បាស់ពីការអភិវឌ្ឍ និងគំនិតច្នៃប្រឌិតនានា។

ជាមួយគ្នានេះឯកឧត្ដមភឿង សោភ័ណ្ឌ ក៏បានក្រើនរំឭកដល់សិស្សនិស្សិតទាំងអស់គួរតែមកចូលរួមក្នុងវេទិកាសាធារណៈមួយនេះដោយពុំត្រូវមើលរំលងឡើយ ព្រោះវេទិកានេះនឹងផ្ដល់ពុទ្ធិ និងបទសោធថ្មីៗជាច្រើន។ ម្យ៉ាងវេទិកាស្ថាបត្យកម្មនេះជាកម្មវិធីដែលបានរៀបចំជាលើកដំបូងទៀតផង៕

September 1, 2017

សេដ្ឋវិទូសាទរការសម្រេចរបស់សម្តេចតេជោ លើការអនុគ្រោះពន្ធវិស័យកាត់ដេរ

ភ្នំពេញៈ ក្រុមសេដ្ឋវិទូនានាបានសម្តែងការសាទរចំពោះការសម្រេចចិត្តរបស់សម្តេចតេជោហ៊ុន សែនដែលបានប្រកាសផ្តល់ការអនុគ្រោះពន្ធដល់អ្នកវិនិយោគក្នុងវិស័យកាត់ដេររយៈពេល9ឆ្នាំ។

ប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting លោក ង៉ែត ជូ បានថ្លែងឲ្យដឹងតាមទូរស័ព្ទនៅព្រឹកថ្ងៃទី១ កញ្ញានេះថា ការសម្រេចចិត្តរបស់ប្រមុខរដ្ឋាភិបាលដែលលើកលែងពន្ធក្នុងវិស័យនេះគឺជាសញ្ញាល្អមួយដែលជាការលើកទឹកចិត្តដល់អ្នកវិនិយោគ ព្រោះកម្ពុជាបានយកពន្ធលើប្រាក់ចំណេញ20ភាគរយ គឺជាចំនួនមួយច្រើន ហេតុនេះប្រសិនជារដ្ឋាភិបាលសម្រេចចិត្តមិនយកពន្ធលើប្រាក់ចំណេញនេះ វាជាការជួយរួមចំណែកច្រើនក្នុងការទាក់ទាញអ្នកវិនិយោគ។

លោក ង៉ែត ជូ បានបន្តថា លោកពិតជាមានការអបអរសាទរចំពោះការសម្រេចចិត្តនេះ ប៉ុន្តែអ្វីដែលសំខាន់ក្នុងវិស័យនេះ គឺទាមទារការវិនិយោគលើកម្លាំងពលកម្មដែលមានជំនាញដើម្បីបង្កើនផលិតភាព និងការផ្គត់ផ្គង់វត្ថុធាតុដើម គឺកម្ពុជាបាននាំចូលវត្ថុធាតុដើមពីប្រទេសចិនភាគច្រើន ដូច្នេះប្រសិនជារោងចក្រទាំងនោះវិនិយោគផលិតវត្ថុធាតុដើមនៅកម្ពុជា រដ្ឋាភិបាលគួរលើកលែងពន្ធទាំងអស់រយៈពេល5ឆ្នាំ ព្រោះការយកវត្ថុធាតុដើមពីគេ ធ្វើឲ្យអ្វីយើងទទួលបានតម្លៃបន្ថែមពីវិស័យនេះមានកម្រិត និងធ្វើឲ្យឧស្សាហកម្មនេះងាយចាប់ផ្តើម និងងាយបិទទ្វារ។

ក្នុងជំនួបជាមួយកម្មករ កម្មការិនីនៅសួនឧស្សាហកម្មវឌ្ឍនៈទី2 កាលពីថ្ងៃទី30 ខែសីហាកន្លងមកនេះសម្តេចតេជោហ៊ុន សែននាយករដ្ឋមន្ត្រីកម្ពុជាបានប្រកាសជាសាធារណៈថា នឹងផ្តល់ការអនុគ្រោះពន្ធ9ឆ្នាំចំពោះការវិនិយោគទុនលើវិស័យកាត់ដេរនៅកម្ពុជាដើម្បីដោះដូរទៅនឹងការផ្តល់អត្ថប្រយោជន៍ដល់កម្មករនិយោជិតក្នុងវិស័យមួយនេះ។

សម្តេចតេជោហ៊ុន សែនថ្លែងបន្តថា តាមសំណើរបស់លោករដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានស្នើថា នឹងមានការអនុគ្រោះមិនយកពន្ធរយៈពេល9ឆ្នាំដល់អ្នកវិនិយោគកាលពីមុន គឺយើងមានការលើកលែងពន្ធដល់ម្ចាស់រោងចក្រសហគ្រាសរយៈពេល5ឆ្នាំ។ ការដែលយើងផ្តល់នូវការលើកលែងពន្ធរយៈពេល9ឆ្នាំចំពោះអ្នកវិនិយោគថ្មីគឺជាថ្នូរទៅនឹងការដំឡើងប្រាក់ឈ្នួលដល់កម្មករនិយោជិត និងអត្ថប្រយោជន៍ផ្សេងៗទៀតផងដែរព្រមទាំងភាពរឹងដៃជើងនៃសេដ្ឋកិច្ចផង។

អគ្គលេខាធិការរងសមាគមរោងចក្រកាត់ដេរកម្ពុជាលោកបណ្ឌិត កាំង ម៉ូនីកា បានថ្លែងថា ការអនុគ្រោះពន្ធរយៈពេល9ឆ្នាំ ផ្តោតលើគម្រោងវិនិយោគដែលមានលក្ខណៈសម្បត្តិគ្រប់គ្រាន់ វាជាការទាក់ទាញការវិនិយោគថ្មីៗ តែមិនជួយឧស្សាហកម្មដែលមានស្រាប់នោះទេ ប៉ុន្តែរដ្ឋាភិបាលអាចនឹងពន្យារពេលបង់ពន្ធលើប្រាក់ចំណេញពីប្រចាំខែ មកប្រចាំឆ្នាំវិញក៏ជាការល្អដែរ ព្រោះការពន្យារពេលបង់ពន្ធលើប្រាក់ចំណេញនេះនឹងបញ្ចប់នៅចុងឆ្នាំនេះ។

លោកបន្តថា“ការសម្រេចចិត្តរបស់ប្រមុខរដ្ឋាភិបាល ជាការជួយសម្រួលមួយដល់វិស័យនេះ ប៉ុន្តែរដ្ឋាភិបាលគួរជួយសម្រួលបន្ថែមទៀតលើការកាត់បន្ថយការចំណាយលើកម្រៃឯកសារនានា និងផ្នែកដឹកជញ្ជូន”៕

September 1, 2017

រដ្ឋាករទឹកក្រុងភ្នំពេញ គ្រោងចាយលុយ 500លានដុល្លារដើម្បីពង្រីកបណ្តាញ

ភ្នំពេញៈ រដ្ឋាករទឹកស្វយ័តក្រុងភ្នំពេញ បានបង្ហាញផែនការរយៈពេលវែងរបស់ខ្លួនសម្រាប់ឆ្នាំ2017 ដល់ឆ្នាំ 2030 ដោយស្ថាប័នស្វយ័តនេះ គ្រោងបោះទុនវិនិយោគរហូតដល់ 500លានដុល្លារអាមេរិក។

លោក ស៊ឹម ស៊ីថា អគ្គនាយករដ្ឋាករទឹកស្វយ័តក្រុងភ្នំពេញនៃក្រសួងឧស្សាហកម្ម និងសិប្បកម្មបានថ្លែងឲ្យដឹងតាមទូរស័ព្ទនាព្រឹកថ្ងៃទី1 កញ្ញានេះថា រដ្ឋាករទឹកស្វយ័តក្រុងភ្នំពេញបានរៀបចំផែនការយូរអង្វែងដែលជាផែនការមេដ៏ធំមួយចាប់ពីឆ្នាំនេះរហូតដល់ឆ្នាំ2030សម្រាប់ជំហានធំៗក្នុងការវិនិយោគលើវិស័យទឹកស្អាតនៅក្នុងផែនការគិតជាទឹកប្រាក់គ្រោងចំណាយអស់ប្រមាណជាង500លានដុល្លាអាមេរិកដើម្បីជំរុញការផ្គត់ផ្គង់ទឹកស្អាតនៅរាជធានីភ្នំពេញឲ្យបាន100ភាគរយ។

លោកបន្តថា នៅក្នុងគម្រោងផែនការអភិវឌ្ឍទឹកស្អាតរបស់រដ្ឋាករទឹកស្វយ័តក្រុងភ្នំពេញចាប់ពីឆ្នាំ2018ខាងមុខនេះ រដ្ឋាករទឹកស្វយ័តក្រុងភ្នំពេញគ្រោងពង្រីកបណ្តាញចែកចាយទឹកស្អាតឲ្យបានចំនួនជាង2ម៉ឺនកុងទ័រគឺស្មើជាង2ម៉ឺនគ្រួសារនៅតំបន់ជាយក្រុងចំពោះប្រជាពលរដ្ឋដែលពុំទាន់ទទួលបានសេវាប្រើប្រាស់ទឹកស្អាត។

លោក ស៊ឹម ស៊ីថា បានបន្តទទួលស្គាល់ថា លទ្ធភាពនៃការចែកចាយបណ្តាញទឹកស្អាតនៅក្រុងភ្នំពេញគឺពុំទាន់ឆ្លើយតបបានទៅតាមសេចក្តីត្រូវការនៅឡើយទេ ប៉ុន្តែសម្រាប់ការអនុវត្តគោលការណ៍ទឹកស្អាតសម្រាប់ទាំងអស់គ្នារដ្ឋាករទឹកស្វយ័តក្រុងភ្នំពេញបានពង្រីកបណ្តាញទៅកាន់ជាយក្រុងកាន់តែច្រើន បើធៀបនឹងតំបន់នៅក្នុងទីក្រុងក្នុងគោលដៅជំរុញឲ្យប្រជាពលរដ្ឋទទួលបានការប្រើប្រាស់ទឹកស្អាតក្នុងតម្លៃសមរម្យមួយ និងទទួលបានទឹកស្អាតប្រើប្រាស់ប្រកបដោយគុណភាព៕

September 1, 2017

អនុគណៈកម្មការទាំងអស់ត្រូវដកហូតទូរស័ព្ទទុក ពេលបូកពិន្ទុបាក់ឌុប

បន្ទាប់ពីបានបូកសរុបលទ្ធផលការងារកែវិញ្ញាសាប្រឡងមធ្យមសិក្សាទុតិយភូមិ ដំណើរការនៃការបូកសរុបលទ្ធផលក៏ត្រូវបានចាប់ផ្តើមនៅព្រឹកថ្ងៃទី01 ខែតុលា ឆ្នាំ2017 នេះ។

ដើម្បីធានាថាកិច្ចការស្រង់ពិន្ទុនេះធ្វើទៅដោយរលូន ក្រសួងអប់រំ យុវជន និងកីឡា បានបើកកិច្ចប្រជុំបច្ចេកទេសបង្ហាញពីដំណើរការស្រង់បូកពិន្ទុដោយកុំព្យូទ័រ និងផ្ទៀងផ្ទាត់លទ្ធផល នៅវិទ្យាស្ថានជាតិអប់រំ។ កិច្ចប្រជុំនេះក៏ធ្វើឡើងដើម្បីណែនាំមន្ត្រីជំនាញទាំងអស់ឱ្យយល់ច្បាស់ពីបច្ចេកទេសនៃដំណើរការស្រង់ពិន្ទុឱ្យបានត្រឹមត្រូវតាមបច្ចេកទេសស្របតាមគោលកាណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។

ការបូកសរុបពិន្ទុនៅព្រឹកនេះ គឺធ្វើឡើងដោយភាពស្ងប់ស្ងាត់ និងទុកចិត្តបានព្រោះមន្ត្រីទាំងអស់បានធ្វើការដោយយកចិត្តទុកដាក់ និងគោរពតាមគោលការណ៍របស់ក្រសួង ដែលសូម្បីតែទូរស័ព្ទរបស់អនុគណៈកម្មការក៏ត្រូវបានដកហូតទុកនៅក្រៅមណ្ឌលដែរ៕

September 1, 2017

កូនស្រី អេ ភូថង ត្រៀមបង្ហាញសមត្ថភាពនៅស៊ាងហៃ ថ្ងៃសៅរ៍នេះ

កីឡាការិនី អេ យ៉ានុត ដែលជាកូនស្រីច្បងរបស់អតីតកីឡាប្រដាល់ដ៏ឆ្នើមរបស់កម្ពុជា អេ ភូថង កំពុងតែសម្លឹងរកការធ្វើឲ្យបានល្អ និងដណ្តើមឲ្យបានជ័យជម្នះក្នុងពេលប្រកួតយុទ្ធគុនចម្រុះ (MMA) ជាមួយនឹងកីឡាការិនីចិន Xu Chun Yan ក្នុងទម្ងន់52.2គីឡូក្រាម ក្នុងព្រឹត្តិការណ៍ ONE Championship: Shanghai នៅសង្វៀន Shanghai Oriental Sports Center នៅថ្ងៃសៅរ៍ ស្អែកនេះ។

កីឡាការិនីវ័យ19ឆ្នាំរូបនេះនឹងធ្វើការបង្ហាញខ្លួនក្នុងការប្រកួត MMA អាជីពដែលត្រូវបានរៀបចំឡើងដោយស្ថាប័ន ONE Championship ជាលើកទី2 របស់នាង ក្រោយពីបានចូលប្រកួតលើកទី1កាលពីឆ្នាំ2015។ ក្នុងការប្រកួតនោះ អេ យ៉ានុត បានរងបរាជ័យដោយពិន្ទុមិនឯកច្ឆន្ទនៅពេលជួបជាមួយនឹងកីឡាការិនី វី ស្រីខួច នាព្រឹត្តិការណ៍ ONE: Kingdom of Khmer ដែលត្រូវបានរៀបចំឡើងនៅរោងមហោស្រពកោះពេជ្រ រាជធានីភ្នំពេញ។ ប៉ុន្តែ បច្ចុប្បន្ន កីឡាការិនីវ័យក្មេងរូបនេះ កំពុងតែប្រឈមមុខនឹងការប្រកួតដ៏ធំមួយជាមួយនឹងកីឡាការិនីចិន Chun Yan វ័យ27ឆ្នាំ ដែលក៏ជាជើងថ្មីក្នុង MMA ម្នាក់ដែរ ប៉ុន្តែជាជើងខ្លាំងក្នុងការប្រកួតប្រដាល់សកលអាជីព និងជាអតីតម្ចាស់ខ្សែក្រវាត់ WBCទៀតផង។ មុននឹងចេញដំណើរទៅប្រកួតកាលពីថ្ងៃពុធ អេ យ៉ានុត បានប្រាប់ថា៖ «ខ្ញុំពិតជារំភើបណាស់ដែលបានចូលរួមក្នុងព្រឹត្តិការណ៍ដ៏ធំបែបនេះ ហើយខ្ញុំនឹងប្រឹងឲ្យអស់ពីសមត្ថភាពរបស់ខ្ញុំដើម្បីធ្វើឲ្យបានល្អ។ ខ្ញុំត្រៀមលក្ខណៈរួចរាល់ហើយ»។ អេ យ៉ានុត បានត្រៀមសម្រាប់ការប្រកួតនេះ តាមរយៈការហ្វឹកហាត់នៅឯក្លិប Cambodia Top Team ក្រោមការបង្វឹកពីលោកហ៊ុន ចាន់រាជ។

ក្នុងការប្រកួតដែលមានរហូតដល់ទៅ១០គូនេះ ក៏មានជើងខ្លាំងផ្នែកចំបាប់ Ben Askren នឹងត្រូវការពារខ្សែក្រវាត់ពិភពលោកក្នុងទម្ងន់77.1គីឡូក្រាមរបស់គេជាមួយនឹងកីឡាករ Zebaztian Kadestam របស់ស៊ុយអែត ក្នុងការប្រកួតកម្រិតគូឯកផងដែរ៕

September 1, 2017

PGS បំពេញការផ្ទេរ Mbappe ក្នុងលក្ខខណ្ឌខ្ចីជើង មុននឹងទិញដាច់នៅរដូវកាលក្រោយ

ក្លិបយក្សរបស់បារាំង Paris St-Germain បានបំពេញការចុះហត្ថលេខាជាមួយនឹងខ្សែប្រយុទ្ធ Kylian Mbappe ក្នុងលក្ខខណ្ឌខ្ចីជើងពេញមួយរដូវកាលពីក្លិប Monaco ជាមួយនឹងជម្រើសក្នុងការទិញយកដាច់ក្នុងតម្លៃខ្លួន165.7លានផោន (ស្មើនឹង214.5លានដុល្លារអាមេរិក)។

ប្រសិនបើ PSG បំពេញការចុះហត្ថលេខាជាមួយនឹងខ្សែប្រយុទ្ធអន្តរជាតិបារាំងរូបនេះជាអចិន្ត្រៃយ៍នោះ កិច្ចសន្យារបស់គេនឹងផុតកំណត់រហូតដល់ខែមិថុនា ឆ្នាំ2022។ ការផ្ទេររបស់ Mbappe វ័យ18ឆ្នាំ បានកើតឡើងក្រោយពីក្លិប PSG បានចំណាយប្រាក់ចំនួន222លានអឺរ៉ូ (ស្មើនឹង261លានដុល្លារអាមេរិក) រួចជាស្រេចក្នុងការទិញចូលខ្សែប្រយុទ្ធ Neymar ពីក្លិប Barcelona។

Mbappe បានឲ្យដឹងថា៖ «ខ្ញុំពិតជាចង់ក្លាយជាសមាជិកម្នាក់ក្នុងគម្រោងរបស់ក្លិបនេះ ដែលជាក្លិបមួយក្នុងចំណោមក្លិបមានមហិច្ឆតាដ៏ធំបំផុតនៅអឺរ៉ុប»។ ការពន្យារពេលក្នុងការចុះហត្ថលេខាជាមួយនឹង Mbappe ក្នុងកិច្ចសន្យាជាអចិន្ត្រៃយ៍នេះ ត្រូវបានចាត់ទុកថា គឺជាការសម្រេចចិត្តរបស់ PSG ពីព្រោះពួកគេមិនចង់ប្រព្រឹត្តល្មើសទៅនឹងច្បាប់ប្រកួតប្រជែងផ្នែកហិរញ្ញវត្ថុដោយយុត្តិធម៌របស់ UEFA។

ខ្សែប្រយុទ្ធវ័យក្មេងរូបនេះ បានរកគ្រាប់បាល់បញ្ចូលទីជាលើកទី1របស់គេសម្រាប់ក្រុមជម្រើសជាតិបារាំង ក្នុងពេលពួកគេដណ្តើមបានជ័យជម្នះ 4-០ លើក្រុមជម្រើសជាតិហូឡង់ ក្នុងការប្រកួតជម្រុះ World Cup កាលពីថ្ងៃព្រហស្បតិ៍ ដើម្បីក្លាយជាកីឡាករវ័យក្មេងបំផុតក្នុងការរកគ្រាប់បាល់បញ្ចូលទីរបស់ប្រទេសនេះ បើគិតចាប់តាំងពីឆ្នាំ1963។

លោក Nasser Al-Khelaifi ដែលជាប្រធានក្លិបរបស់ PSG បានឲ្យដឹងថា៖ «វាពិតជាសំខាន់ណាស់សម្រាប់កីឡាបាល់ទាត់បារាំង ដែលយើងត្រូវតែរក្សា និងជួយអភិវឌ្ឍកីឡាករដ៏មានទេពកោសល្យម្នាក់នេះក្នុងក្រុមជើងឯករបស់យើង។ ពិតណាស់ ក្នុងចំណោមកីឡាករអាយុប្រហាក់ប្រហែលនឹងរូបគេ គេជាកីឡាករឆ្នើមបំផុតក្នុងពិភពលោក ទាំងភាពរឹងមាំ បច្ចេកទេស និងស្មារតីប្រយុទ្ធ»៕

ប្រភពព័ត៌មាន៖ BBC

September 1, 2017

Author: វល័ក្ខ