កន្លងមកប្រជាកសិករក្នុងខេត្ដកំពតជាច្រើន មានក្ដីបារម្ភជាខ្លាំងចំពោះទីផ្សារផ្លែស្វាយក្រោយពីប្រមូលផលរួច ខ្លាចមានការកកស្ទះក្នុងការលក់ចេញ ប៉ុន្ដែថ្មីៗនេះ ប្រធានសភាពាណិជ្ជកម្មខេត្ដកំពតបានបង្ហាញពីសញ្ញាណវិជ្ជមានមួយដែលបញ្ជាក់ថា ប្រជាកសិករដែលនិយមដាំដុះដំណាំស្វាយក្នុងខេត្ដកំពត និងទូទាំងប្រទេសនឹងលែងជួបបញ្ហារឿងទីផ្សារទៀតហើយ។
លោកឧកញ៉ា ហាក់ សុវណ្ណា ប្រធានសភាពាណិជ្ជកម្មខេត្ដកំពត កែប និងតាកែវ បានលើកឡើងដោយទទួលស្គាល់ថា កន្លងមកផ្លែស្វាយរបស់ប្រជាកសិករនៅខេត្ដកំពតពិតធ្លាប់ជួបបញ្ហាទីផ្សារមែន ពិសេសនៅពេលនាំចេញទៅកាន់ប្រទេសវៀតណាម។ ដូច្នេះហើយទើបសភាពាណិជ្ជកម្មបានគិតគូរយ៉ាងហ្មត់ចត់ចំពោះបញ្ហានេះដោយបានរិះរកដំណោះស្រាយជូនប្រជាពលរដ្ឋ ព្រោះទីផ្សារជារឿងសំខាន់បំផុតសម្រាប់ប្រជាកសិករក្រោយពេលប្រមូលផល។ អ្វីដែលបង្កជាភាពរាំងស្ទះ គឺដោយសារតែភាគីវៀតណាមសំអាងលើរបាំងបច្ចេកទេសនៃការដាំដុះ ដូចជាការត្រួតពិនិត្យលើអនាម័យជាដើម។
ប្រធានសភាពាណិជ្ជកម្មខេត្ដកំពត កែប និងតាកែវ បានសង្កត់ធ្ងន់ថា៖« ដូច្នេះហើយទើបយើងសហការជាមួយមន្ទីរកសិកម្ម រៀបចំឱ្យមានការអប់រំដល់ប្រជាកសិករឱ្យងាកមកដាំដុះកសិផល ពិសេសដំណាំស្វាយដោយប្រើជីសរីរាង្គវិញ ព្រោះសភាពាណិជ្ជកម្មជាអ្នកទទួលខុសត្រូវលើទីផ្សារ ប្រសិនបើយើងមិនចែករំលែកចំណេះដឹងនេះដល់ប្រជាកសិករទេ គាត់នឹងនៅតែបន្ដប្រើជីគីមី វានឹងធ្វើឱ្យខូចទីផ្សារផ្លែស្វាយរបស់យើង ព្រោះផ្លែស្វាយរបស់យើងមានភាពល្បីល្បាញណាស់នៅប្រទេសចិន ព្រោះប្រជាជនចិនមានការពេញនិយមក្នុងការទទួលទានច្រើន»។
ប្រធានសភាពាណិជ្ជកម្មខេត្ដកំពត កែប និងតាកែវ បានបន្ដទៀតថា ផ្លែស្វាយកន្លងមកត្រូវនាំចេញតាមច្រករបៀង ប៉ុន្ដែយើងបានជជែកជាមួយភាគីវៀតណាមរួចរាល់ហើយ ដើម្បីនាំចេញផ្លែស្វាយទៅកាន់ប្រទេសវៀតណាមតាមច្រកអន្ដរជាតិ។ ជាងនេះទៅទៀត យើងក៏កំពុងតែរិះរកមធ្យោបាយធ្វើយ៉ាងណាដើម្បីនាំចេញផ្លែស្វាយទៅកាន់ប្រទេសចិនផ្ទាល់ទៀតផង ប្រសិនបើផែនការនេះធ្វើទៅបានជោគជ័យ យើងជឿថាផ្លែស្វាយនៅក្នុងប្រទេសកម្ពុជាយើងនឹងផ្គត់ផ្គត់ទៅប្រទេសចិនមិនគ្រប់គ្រាន់ទេ ដូច្នេះត្រូវបន្តបន្ថែមការដាំដុះឡើងទៀត។
បច្ចុប្បន្ននៅក្នុងក្របខ័ណ្ឌខេត្ដទាំងមូលមានប្រជាកសិករដាំដុះដំណាំស្វាយលើផ្ទៃដីក្នុងរង្វង់6ពាន់ហិកតា បច្ចុប្បន្នផ្លែស្វាយកំពុងតែក្លាយជាផ្លែឈើពេញនិយមសម្រាប់ឈ្មួញវៀតណាមចុះមកប្រមូលទិញតាមចម្ការដើម្បីនាំចេញទៅប្រទេសវៀតណាម។ ប្រភេទស្វាយដែលពេញនិយមជាងគេ គឺស្វាយកែវរមៀត ដោយក្នុងនោះវៀតណាមជាអ្នកទទួលបន្ទុកលើបច្ចេកទេសក្នុងការបេះ វេចខ្ចប់ និងដឹកជញ្ជូនដោយខ្លួនឯងដោយផ្ដល់តម្លៃឱ្យ កសិករកម្ពុជាក្នុង1គីឡូមានតម្លៃ1800រៀល។
ទោះជាយ៉ាងណាលោកឧកញ៉ា ហាក់ សុវណ្ណា បានបញ្ជាក់ថា នៅពេលខាងមុខឆាប់ៗនេះ កសិករដែលនិយមដាំដំណាំស្វាយទូទាំងប្រទេសនឹងលែងមានការព្រួយបារម្ភលើបញ្ហាទីផ្សារទៀតហើយក្រោយពីកសិករអនុវត្ដតាមបទដ្ឋានរបស់មន្ទីរកសិកម្មណែនាំក្នុងការពង្រឹងបច្ចេកទេសដាំដុះ ព្រោះវានឹងកាន់តែបើកទូលាយទីផ្សារនៅក្រៅប្រទេសបន្ថែមទៀត។
លោកឧកញ៉ាបញ្ជាក់បន្ថែមថា៖«បច្ចុប្បន្នក្រុមហ៊ុនក្នុងស្រុកបានសម្រេចសាងសង់ឃ្លាំងត្រជាក់ និងឃ្លាំងសម្រាប់កែច្នៃផ្លែស្វាយ ក្នុងករណីដែលផ្លែស្វាយមិនជាប់ចំណាត់ថ្នាក់ក្នុងការនាំចេញ យើងនឹងយកមកកែច្នៃធ្វើជាដំណាប់ស្វាយសម្រាប់ផ្គត់ផ្គង់ក្នុងស្រុក និងនាំចេញទៅបរទេស ឃ្លាំងនេះមានទីតាំងនៅខេត្ដកំពង់ស្ពឺ។ នៅឆ្នាំ2018 នឹងមានក្រុមហ៊ុនក្នុងស្រុកផ្សេងទៀតបង្កើតឃ្លាំងប្រភេទនេះបន្ថែមទៀត។ នៅពេលយើងមានឃ្លាំងទាំងនោះហើយ វានឹងក្លាយជាក្ដីសង្ឃឹមរបស់កសិករយើង ព្រោះបើសរុបផ្ទៃដីនៃការដាំដុះស្វាយទូទាំងប្រទេសរបស់កសិករយើងមានក្នុងរង្វង់ជិត1លានហិកតាឯណោះ ដូច្នេះយើងត្រូវតែយកចិត្ដទុកលើបញ្ហានេះឱ្យបានហ្មត់ចត់»៕
