អ្នកណាខ្លះនឹងទៅឆ្លងឆ្នាំនៅរៀមរាប? កុំភ្លេចណា ទៅលេងបុណ្យភូមិនៅឯភូមិជ្រាវ ក្នុងទីរួមខេត្ត សៀមរាបទាំងអស់គ្នា ពីព្រោះក្រុមសមាជិករបស់ Jaya Catering & Events បានសហការគ្នារៀបចំកម្មវិធី «បុណ្យដារលាន ឬបុណ្យភូមិ» ហើយនឹងកម្មវិធីឆ្លងឆ្នាំសកលនៅថ្ងៃទី 31 ខែធ្នូតែម្តង។
លោក ច្រឹក គីមផូ ជាអគ្គនាយក ក្រុមហ៊ុន Jaya Catering & Events បានលើកឡើងថា៖ នេះជាលើកទី12 ហើយដែល លោកក៏ដូចជាក្រុមសមាជិកបានរៀបចំពិធីបុណ្យ ដារលាន ឬបុណ្យភូមិនេះឡើង ដែលលើកមុនៗ គឺរៀបចំសម្រាប់តែទទួលស្វាគមតែភ្ញៀវបរទេសប៉ុនណ្ណោះ តែលើកនេះគឺរៀបចំជាលក្ខណៈពិសេសដែលនឹងទទួលស្វាគមភ្ញៀវជាតិ និងអន្តរជាតិ។ គោលបំណងសំខាន់ដែលរៀបចំកម្មវិធី «បុណ្យដារលាន ឬបុណ្យភូមិ» គឺរំលឹកសារឡើងវិញពីវប្បធម៌របស់ខ្មែរយើងដែលមានតាំងពីយូរលុងណាស់មកហើយ ជាពិសេសគឺការផ្សព្វផ្សាយឱ្យក្មេងៗ ជំនាន់ក្រោយយល់ដឹងកាន់តែច្បាស់ពីពិធីបុណ្យរបស់ខ្មែរតែម្តង។
លោកបានលើកឡើងទៀតថា៖ ជាធម្មតាជារៀងរាល់ឆ្នាំ មានភ្ញៀវជាតិ និង អន្តរជាតិជាច្រើនបានធ្វើដំណើរកម្សាន្តមកកាន់ទីក្រុងសៀមរាបនៅក្នុងថ្ងៃឆ្លងឆ្នាំ ក៏ប៉ុន្តែជាបទពិសោធន៍កន្លងមក ភ្ញៀវគ្រាន់តែចំណាយពេលក្នុងការស្នាក់នៅសណ្ឋាគារ និង ដើរលេងតាមប្រសាទ និង រមណីយដ្ឋានមួយចំនួននៅពេលថ្ងៃ ហើយនាពេលរាត្រីគឺពួកគាត់ក្រាន់តែចំណាយពេលនៅក្នុងតំបន់ Pub Street ដើម្បីរង់ចាំឆ្លងឆ្នាំដោយការមើលកាំជ្រួញ និង រាំលេងតាមក្លិប។ តែឆ្នាំនេះភ្ញៀវក៏អាចអញ្ជើញមកចូលរួមកម្មវិធីបុណ្យ ដារលាន ឬបុណ្យភូមិ នៅភូមិជ្រាវ ក្នុងទីរួមខេត្ត សៀមរាប ដោយមានការរៀបចំជាប្រពៃណីខ្មែរ មានរាំលេងកម្សាន្ត និង អាហារប្រភេទ BBQ ប៊ូហ្វេ ស្រាក្រឡុក ស្រាក្រហម ស្រា Sparkling និង រង់ចាំឆ្លងឆ្នាំ ជាមួយនឹងការបាញ់កាំជ្រួញដ៏អស្ចារ្យ។
ភ្ញៀវដែលមានចំណាប់អារម្មណ៍ចូលរួមកម្មវិធីបុណ្យ«បុណ្យដារលាន ឬបុណ្យភូមិ» អាចឆែករកពត៌មានបន្ថែមតាមរយៈហ្វេកបុក Jaya Catering & Events Management រឺក៏ទំនាក់ទំនងតាមលេខទូស័ព្ទ 089 998 338 និង 069 888 034 អ៊ីម៉ែល [email protected]។
លោកបានប្រាប់ឱ្យដឹងពីប្រវត្តិ «បុណ្យដារលាន ឬបុណ្យភូមិ» គឺជាប្រពៃណីមួយដែលត្រូវបានបណ្ដាជនអ្នកស្រុកស្រែចម្ការ តែងតែរៀបចំធ្វើជារៀងរាល់ឆ្នាំចន្លោះពីខែមករា ដល់ ខែមេសា ជារៀងរាល់ឆ្នាំទៅតាមភូមិនីមួយៗដើម្បីរំឭកគុណដល់ទឹក ដី និងអាកាសធាតុ សម្រាប់ការបង្កបង្កើនស្រូវនោះគឺ «បុណ្យដារលាន ឬបុណ្យភូមិ» ។
ប្រជាពលរដ្ឋខ្មែរតែងតែប្រារពពិធី «បុណ្យដារលាន» ជារៀងរាល់ឆ្នាំមិនដែលអាក់ខានឡើយ ក្រោយពីបានប្រមូលផលស្រូវរួចរាល់។ ប្រជាពលរដ្ឋក្នុងភូមិទាំងអស់បានស្រុះស្រួលគ្នា រៀបចំពិធី «បុណ្យដារលាន ឬបុណ្យភូមិ» ដើម្បីបង្កើតនូវភាពសប្បាយរីករាយ ការជួបជុំ ជាពិសេស ការបង្ហាញនូវផលស្រូវ ដែលពួកគាត់ទទួលបានក្នុងឆ្នាំនេះ។ ពិធីបុណ្យនេះធ្វើឡើងតាមប្រពៃណីខ្មែរជារៀងរាល់ឆ្នាំ ក្នុងអំឡុងខែមករា ដល់ខែមេសា ទៅតាមភូមិនីមួយៗ ដើម្បីរំឭកគុណដល់ ទឹក ដី និងអាកាសធាតុ ដែលជាកត្តាសំខាន់ក្នុងការបង្កបង្កើនស្រូវ។ ពីធីបុណ្យមាននិមន្តព្រះសង្ឃសូត្រមន្តដើម្បី សូមសិរីសួស្ដីជូនដល់ពលរដ្ឋ ក៏ដូចជាសូមការបង្កបង្កើនស្រូវឱ្យបានផលច្រើនរាល់ឆ្នាំ និងក៏មានរាប់បាត្រឆ្លងដែរ។
ដំណើររឿងនៃពិធីបុណ្យ «ដារលាន ឬបុណ្យភូមិ» តាមប្រជុំរឿងព្រេងជាតកថា កាលពីព្រេងនាយមានបងប្អូនពីរនាក់ជាកសិករ បងឈ្មោះមហាកាឡ និងប្អូនឈ្មោះ ចុល្លកាឡ។ ថ្ងៃមួយប្អូនបានបេះស្រូវសាលីកំពុងតែចេញផ្លែមកទំពារហើយមានរសជាតិឆ្ងាញ់ក៏កើតមានសទ្ធាក្នុងព្រះពុទ្ធសាសនាបានបបួលបងធ្វើទានចំពោះព្រះសង្ឃដែលមានព្រះពុទ្ធជាប្រធាន។
ទោះបីជាមានការអង្វរករពីប្អូនយ៉ាងណាក៏ដោយ បងនៅតែមិនព្រមព្រោះស្រូវ «ជិតចេញផ្លែ» ទៅហើយ។ ចុងក្រោយបងក៏បង្ខំចិត្តចែកស្រែនោះជាពីចំណែក ឯចំណែកប្អូនយកទៅធ្វើអីក៏ធ្វើទៅ។ ប្អូនសប្បាយចិត្តណាស់ដោយនិយាយថា ស្រួលហើយខ្ញុំនឹងបានធ្វើទានកុំឱ្យ «ស្រូវចេញផ្លែទាន់»។
ប្អូនបានបបួលមិត្តភក្ដិជាច្រើនទៅ «ហែកបង្ហើបស្រូវ» យកមកកិនចម្អិនលាយទឹកដោះគោស្រស់ ផ្សំជាមួយទឹកឃ្មុំ ស្ករក្រាម យកទៅថ្វាយភិក្ខុសង្ឃដែលមានព្រះពុទ្ធជាប្រធាន ហើយប្រាថ្នាថា «ខ្ញុំសូមឱ្យបានត្រាស់ដឹង នូវធម៌ប្រសើរមុនគេ ក្នុងអនាគតកុំខាន» ព្រោះជាទានប្រសើរ ដែលកើតពីស្រូវដំបូងបំផុត។ ក្រោយពីក្រាបបង្គំលាព្រះពុទ្ធអង្គ ប្អូនបានត្រឡប់ទៅមើលស្រូវវិញ ក៏ឃើញចេញផ្លែដូចគេចងកណ្តឹង ហើយបានសម្រេចចិត្តធ្វើទានក្នុងរដូវធ្វើស្រែឱ្យបានប្រាំបួនដងក្នុងមួយរដូវ។
ដល់ពេលស្រូវល្មមធ្វើអំបុក ប្អូនធ្វើទានជាលើកទីពីរ ពេលច្រូតធ្វើទានជាលើកទីបី ពេលហាលដៃធ្វើទានជាលើកទីបួន ពេលចងកណ្តាប់ធ្វើទានជាលើកទីប្រាំ ជញ្ជូនកណ្តាប់ដល់លាន ធ្វើទានជាលើកទីប្រាំមួយ ពេលបោកបែន ធ្វើទានជាលើកទីប្រាំពីរ រោយស្រូវចាក់ធាធ្វើទានជាលើកទីប្រាំបី និងដឹកស្រូវចាក់ជង្រុកធ្វើទានជាលើកទីប្រាំបួន។ ចុល្លកាឡ បានធ្វើភត្តទានប្រាំបួនដង ហើយស្រូវឥតមានខូចឡើយ។ ចំណេរកាលក្រោយមកដល់បច្ចុប្បន្ននេះ នៅសល់តែពីរទេដែលគេតែងតែប្រារព្ធមួយពិធី «បុណ្យអកអំបុក» ជាពិធីទីពីរ និងពីធី «បុណ្យដារលាន» ជាពីធីទីប្រាំបួននេះឯងរបស់ ចុល្លកាឡ ក្នុងចំណោមប្រាំបួនពិធី។
គួរបញ្ជាក់ផងដែរថា បច្ចុប្បន្នប្រជាពលរដ្ឋខ្មែរយើងធ្វើពិធីបុណ្យនេះចាប់តាំងពីរដូវច្រូតកាត់ហើយ រហូតដល់ថ្ងៃបុណ្យចូលឆ្នាំខ្មែរ ហើយហៅបុណ្យដាលាននេះថា «បុណ្យដារលាន ឬបុណ្យភូមិ»៕
