វល័ក្ខ - La Reine Media

លោកជំទាវ តាំង ហ្គិចលៀង៖ អ្នកដឹកនាំពូកែ គឺគេយកបេះដូងទៅដឹកនាំ…

ការគ្រប់គ្រង និងដឹកនាំមនុស្សជារឿងសំខាន់បំផុតសម្រាប់ម្ចាស់ស្ថាប័នមួយ ឬបុគ្គលដែលចង់ក្លាយជាអ្នកដឹកនាំនៅថ្ងៃអនាគតត្រូវតែចេះ និងមានវិធីសាស្ត្រគ្រប់គ្រង ឬមានភាពជាអ្នកដឹកនាំផ្សេងៗគ្នាទៅតាមភាពវៃឆ្លាត ក៏ដូចជាបទពិសោធរៀងៗខ្លួន។

បង្ហាញពីភាពជាអ្នកដឹកនាំ នៅក្នុងវេទិកាភាពជាអ្នកដឹកនាំឆ្នាំ 2017 លោកជំទាវ តាំង ហ្គិចលៀង អគ្គនាយិកានៃក្រុមហ៊ុនឌីហ្វើនីឈ័រ បានលើកឡើងថា អ្នកដឹកនាំដែលល្អ គឺជាអ្នកដឹកនាំដែលយកបេះដូងទៅដឹកនាំ មានភាពជាគំរូល្អ មានការជំរុញទឹកចិត្តខ្លាំង និងមានការទទួលខុសត្រូវខ្ពស់។

លោកជំទាវ តាំង ហ្គិចលៀង បាននិយាយថា៖ «អ្នកដឹកនាំដែលល្អគឺជាអ្នកដឹកនាំដែលយកបេះដូងទៅដឹកនាំ ហើយវិធីសាស្ត្រដែលអាចដឹកនាំដោយរបៀបនេះបាន លុះត្រាតែយើងអាចយកចិត្តគេ មកដាក់ក្នុងចិត្តយើងឱ្យបាន»។

សហគ្រិនល្បីឈ្មោះខាងលើបានបន្ថែមទៀតថា ការដែលយកចិត្តរបស់អ្នកដទៃ មកដាក់ក្នុងចិត្តយើង គឺធ្វើឱ្យយើងក្លាយជាអ្នកដឹកនាំដែលមានការគិតល្អិតល្អន់ និងមានចិត្តទូលាយបំផុត។ លោកជំទាវបានពន្យល់លម្អិតលើចំណុចនេះដោយលើកជាឧទាហរណ៍ថា ប្រសិនបើបុគ្គលិកធ្វើខុស យើងអាចមានរឿង 5 ចង់ស្តីឱ្យ ប្រសិនបើយើងមិនបានយកចិត្តបុគ្គលិកនោះមកដាក់ក្នុងចិត្តយើងទេនោះ តែនៅពេលដែលយើងសាកគិតម្តងទៀត ពេលខ្លះក្នុងការសម្រេចចិត្តស្តីបន្ទោស 5 រឿងនោះ យើងអាចខុស 3 រឿងរួចបាត់ទៅហើយ ហេតុនេះ ក្នុងនាមយើងជាអ្នកដឹកនាំ គួរតែគិតទៅវិញថា ប្រសិនបើយើងទទួលរងនូវការស្តីបន្ទោស ឬទទួលរងនូវស្ថានភាពដែលយើងបានធ្វើដាក់គាត់វិញ តើគាត់នឹងមានអារម្មណ៍បែបណា ហើយវាចំណេញអ្វីខ្លះដល់ស្ថាប័ន និងអ្នកទាំងអស់គ្នា។

បញ្ជាក់លើចំណុចភាពជាអ្នកដឹកនាំនេះដែរ លោកជំទាវ តាំង ហ្គិចលៀង បានថ្លែងផងដែរថា អ្នកដឹកនាំដែលប្រើបេះដូងទៅដឹកនាំក៏ជាមនុស្សដែលមានភាពទទួលខុសត្រូវខ្ពស់ផងដែរ ដោយយើងគួរគិតថាវាសនារបស់អ្នកដទៃគឺស្ថិតក្នុងដៃរបស់យើង។ នៅពេលដែលយើងគិតថា វាសនាអ្នកដទៃ ជាពិសេសបុគ្គលិកដែលមានវ័យជាង 20ឆ្នាំ កំពុងរីកលូតលាស់ជាមួយយើង ហើយគាត់នឹងមានអនាគតបន្តទៀតជាមួយនឹងការដឹកនាំរបស់យើង យើងនឹងកាន់តែមានអារម្មណ៍ថា ត្រូវតែមានភាពជាអ្នកដឹកនាំឱ្យខ្លាំងជាងមុន ដើម្បីធ្វើការអភិវឌ្ឍ និងដឹកនាំឆ្ពោះទៅរកចំណុចដែលកាន់តែវិជ្ជមានឡើង៕

October 10, 2017

ទុនវិនិយោគលើវិស័យសំណង់នៅត្រីមាសទី1ធ្លាក់ចុះជាង20%

ភ្នំពេញ៖ នៅក្នុងត្រីមាសទី1 ឆ្នាំ2017នេះ ទុនវិនិយោគនៃវិស័យសំណង់នៅក្នុងប្រទេសកម្ពុជា សរុបមានចំនួន1,200លានដុល្លារ ពោលគឺបានធ្លាក់ចុះប្រមាណជា 22% បើធៀបនឹងរយៈពេលដូចគ្នាក្នុងឆ្នាំ2016។

លោកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា បានថ្លែងក្នុងសិក្ខាសាលាស្តីពីទិដ្ឋភាពច្បាប់ បទដ្ឋានគតិយុត្តលើការវិនិយោគវិស័យសំណង់នៅកម្ពុជាថា ទោះជាទុនវិនិយោគលើវិស័យសំណង់មានការធ្លាក់ចុះដូច្នេះមែន ប៉ុន្តែបើយើងក្រឡេកមើលគម្រោងសំណង់លំនៅឋាន និងបុរី គិតត្រឹមខែមិនា ឆ្នាំ2017 ការវិនិយោគមាន 670គម្រោង ដែលមានទុនសរុប 939លានដុល្លា មានការកើនឡើង 33.18% បើធៀបនឹងរយៈពេលដូចគ្នាកាលពីឆ្នាំមុន។ លោកឧកញ៉ា បញ្ជាក់ថា វិស័យសំណង់ បច្ចុប្បន្នអគារចាប់ពី5ជាន់ឡើងមានចំនួនជាង600អគារ និងបុរីជាង110ទីតាំង។

ចំណែកលោកជំទាវ ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានថ្លែងថា ចាប់ពីឆ្នាំ 2010 រហូតដល់ខែកញ្ញា ឆ្នាំ2017 ក្រសួងសេដ្ឋកិច្ច និងហិរញ្ញវត្ថុ បានផ្តល់អាជ្ញាប័ណ្ណជូនក្រុមហ៊ុនអភិវឌ្ឍន៍លំនៅឋានសរុបបានចំនួន 213គម្រោង ដែលមានទុនវិនិយោគសរុបប្រមាណជា 3,375លានដុល្លារអាមេរិក។

លោកជំទាវមានប្រសាសន៍ថា វិស័យសំណង់នៅកម្ពុជាគឺមានការរីកចម្រើនខ្លាំង តែចំនួនក្រុមហ៊ុនដែលក្រសួងផ្តល់អាជ្ញាប័ណ្ណឱ្យបាន213គម្រោងដែលមានទុនវិនិយោគសរុបប្រមាណ 3,375លានដុល្លារអាមេរិក។ ក្នុងចំណោមគម្រោងដែលទទួលបានអាជ្ញាប័ណ្ណ ក្នុងនោះគម្រោងបុរីមានចំនួន 132 គម្រោង ស្មើនឹង 31,997ផ្ទះ និងអគារសហកម្មសិទ្ធិ មានចំនួន 81 គម្រោង ស្មើនឹង 29,612បន្ទប់។

លោកជំទាវបានរំឭកថា ឧស្សាហកម្មសំណង់នៅប្រទេសកម្ពុជាបានបង្កើតរហូតដល់ប្រមាណ1/10(មួយភាគដប់)នៃផលិតផលក្នុងស្រុកសរុប(ផសស)នៅក្នុងប្រទេសកម្ពុជា និងបានបង្កើតការងារដោយផ្ទាល់ និងមិនផ្ទាល់សម្រាប់ប្រជាពលរដ្ឋជាច្រើន។ លើសពីនេះដោយសារវិស័យសំណង់មានការចូលរួមជាច្រើនពីសំណាក់សហគ្រាសធុនតូច និងមធ្យម ដូច្នេះវិស័យនេះបានបង្កើតប្រាក់ចំណូលដែលត្រូវបានបែងចែកទូលំទូលាយ ធ្វើឱ្យកំណើនសេដ្ឋកិច្ចកម្ពុជាកាន់តែប្រសើរឡើង។

របាយការណ៍ក្រសួងសេដ្ឋកិច្ច និងហិរញ្ញវត្ថុឱ្យដឹងថា វិស័យសំណង់នៅតែបន្តកំណើនរឹងមាំ និងស្ថិតក្នុងគន្លងដែលមាននិរន្តរភាពជាងមុន ទោះជាមានការថយចុះមកនៅត្រឹម 14.4% ក៍ដោយ។ នៅត្រីមាសទី1 ឆ្នាំ2017នេះ សកម្មភាពសាងសង់នៅតែបន្តកំណើនខ្ពស់ ទោះបីមានការថយចុះនៃគម្រោងសំណង់លំនៅឋាន ដែលមានតម្លៃខ្ពស់ ប៉ុន្តែត្រូវបានជំនួសវិញដោយសំណង់លំនៅឋានដែលមានតម្លៃសមរម្យ និងសំណង់ផ្សារទំនើប ព្រមជាមួយនឹងកំណើនវិនិយោគសាធារណៈ លើហេដ្ឋារចនាសម្ព័ន្ឋរូបវន្ត៕

October 10, 2017

ឆ្នាំ2017 ប្រជាជនកម្ពុជា មានចំណូលក្រោម 120ដុល្លារក្នុងមួយខែ

ភ្នំពេញ៖ របាយការណ៍ថ្មីមួយបានរកឃើញថា ទោះជាកំណើនសេដ្ឋកិច្ចឆ្នាំ 2017 នឹងនៅតែបន្តកើនក្នុងរង្វង់7.0%ក៏ដោយ ក៏ប៉ុន្តែផលិតផលក្នុងស្រុកសរុប(ផសស) ឬហៅថាចំណូលដុលប្រចាំឆ្នាំរបស់ប្រជាជនខ្មែរម្នាក់មានចំនួនត្រឹមតែ 1,422ដុល្លារអាមេរិក ប្រហែល118ដុល្លារក្នុងមួយខែតែប៉ុណ្ណោះ។

យោងតាមរបាយការណ៏លទ្ធផលនៃការអនុវត្តថវិកាឆមាសទី1 និងលទ្ធផលប៉ាន់ស្មាននៃការអនុវត្តថវិកាឆ្នាំ2017របស់ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា កំណើនសេដ្ឋកិច្ចឆ្នាំ2017 នៅតែបន្តរឹងមាំក្នុងរង្វង់7.0% ដែលធ្វើឱ្យផលិតផលក្នុងស្រុកសរុប(ផសស) គិតជាទឹកប្រាក់តាមថ្លៃបច្ចុប្បន្នមានចំនួន 89,032,586លានរៀល ស្មើនឹង 21,983 លានដុល្លារអាមេរិក ហើយផលិតផលសរុបសម្រាប់មនុស្សម្នាក់រំពឹងថា នឹងឡើងដល់1,422ដុល្លារក្នុងមួយឆ្នាំនេះ។

កាលពីឆ្នាំ2016កន្លងទៅ សេដ្ឋកិច្ចកម្ពុជានៅរក្សាបានកំណើនក្នុងរង្វង់7.0% ដែលគាំទ្រដោយការងើបឡើងវិញនៃវិស័យកសិកម្ម កំណើនរឹងមាំនៃវិស័យសំណង់ ទោះជាមានកំណើនថយចុះបន្តិច និងកំណើនគួរឱ្យកត់សម្គាល់នៃវិស័យមិនមែនកាត់ដេរក្ដី។ ប្រការនេះធ្វើឱ្យផលិតផលក្នុងស្រុកសរុប(ផសស) សម្រាប់មនុស្សម្នាក់កើនពី1,216ដុល្លារនៅឆ្នាំ2015 ដល់1,302 ដុល្លារនៅឆ្នាំ2016 បើគិតសរុបសម្រាប់មនុស្សម្នាក់ទទួលបានប្រហែល108ដុល្លារក្នុងមួយខែ។

យោងតាមការប៉ាន់ស្មាន ដោយផ្អែកតាមទិន្នន័យស្ថិតិជាក់ស្តែងរបស់ស្ថាប័នពាក់ព័ន្ធក្នុងរយៈពេលប៉ុន្មានខែដើមឆ្នាំ2017នេះ សេដ្ឋកិច្ចកម្ពុជាអាចនឹងនៅតែបន្តកំណើនក្នុងរង្វង់ 6.9% ក្នុងឆ្នាំ2017 ដែលទាបជាងការប៉ាន់ស្មានកាលពីដើមឆ្នាំ ដែលកំណើននេះត្រូវបានគាំទ្រដោយវិស័យសំណង់ និងវិស័យកសិកម្ម និងកំណើនខ្ពស់លើសពីការរំពឹងទុកនៃវិស័យទេសចរណ៍។

វិស័យកសិកម្មត្រូវបានព្យាករថា នឹងបន្តកំណើនរឹងមាំក្នុងរង្វង់ 2.0% នៅឆ្នាំ2017 ចំណែកវិស័យឧស្សាហកម្មត្រូវបានព្យាករដែរថា នឹងមានកំណើនថយចុះបន្តិចក្នុងអត្រា 9.2% នៅឆ្នាំ2017 ដោយសារការថយចុះនៃកំណើនក្នុងវិស័យកាត់ដេរ។ វិស័យកាត់ដេររំពឹងថា មានកំណើនថយចុះមកនៅត្រឹម 5.8% ចំណែកវិស័យសំណង់ត្រូវបានព្យាករថា នៅបន្តរឹងមាំ និងស្ថិតនៅក្នុងគន្លងមួយដែលមាននិរន្តរភាពជាងមុន ទោះបីមានការថយចុះបន្តិចមកនៅត្រឹម14.4% ដោយសារការរង់ចាំមើលរបស់វិនិយោគិន ចំពោះព្រឹត្តិការណ៍បោះឆ្នោត ដែលខិតជិតមកដល់ និងវិធានការរឹតត្បិតរបស់ធនាគារជាតិនៃកម្ពុជា ក្នុងការផ្តល់ឥណទានក្នុងវិស័យនេះ។

យោងតាមតួលេខនៃអង្គការរូបិយវត្ថុអន្តរជាតិ (IMF)បានបង្ហាញថា កម្ពុជាជាប្រទេសមួយដែលប្រជាជនមានចំណូលទាបជាងប្រទេសជិតខាងនៅក្នុងតំបន់អាស៊ី។ របាយការណ៍ចេញផ្សាយកាលពីខែមេសា ឆ្នាំ2017 បង្ហាញថា ប្រជាជនកម្ពុជាមានចំណូលត្រឹមតែ1,308ក្នុងមួយឆ្នាំ ខណៈដែលឥណ្ឌូនេស៊ីមានចំណូល 3,895 ដុល្លារក្នុងមួយឆ្នាំ ថៃ 6,265ដុល្លារ/ឆ្នាំ ហ្វីលីពីន3,102ដុល្លារ/ឆ្នាំ ម៉ាឡេស៊ី 9,623ដុល្លារ/ឆ្នាំ សិង្ហបូរី 51,431ដុល្លារ/ឆ្នាំ វៀតណាម 2,305ដុល្លារ/ឆ្នាំ មីយ៉ាន់ម៉ា 1,374ដុល្លារ/ឆ្នាំ ឡាវ 2,051ដុល្លារ/ឆ្នាំ និងប្រ៊ុយណេ 28,740ដុល្លារ/ឆ្នាំ៕

October 10, 2017

វិទ្យាស្ថានសិក្សាដើម្បីជោគជ័យ បើកបវេសនកាលថ្មី ឆ្នាំ 2017 – 2018

ក្រោយពីបញ្ចប់ការប្រឡងមធ្យមសិក្សាទុតិយភូមិ (បាក់ឌុប) 2017 កាលពីពេលកន្លងទៅនោះ គេសង្កេតឃើញថា សិស្សានុសិស្សជាច្រើននាក់បានទៅចុះឈ្មោះសិក្សាយ៉ាងច្រើនកុះករនៅវិទ្យាស្ថានសិក្សាដើម្បីជោគជ័យ ដែលជាគ្រឹះស្ថានអប់រំសិក្សា ដែលពូកគេជឿជាក់ថាអាចផ្តល់អនាគតដ៏ភ្លឺស្វាងទាំងការសិក្សា និងការងារសម្រាប់ពួកគេ។ អាស្រ័យហេតុនេះ ដោយមើលឃើញពីចំនួននៃការចុះឈ្មោះមានការកើនឡើងនោះ វិទ្យាស្ថានបានរៀបចំកម្មវិធីបើកបវេសនកាលឆ្នាំសិក្សា 2017-2018 សម្រាប់ជាការជូនដំណឹងដល់សិស្សានុសិស្សដែលបានចុះឈ្មោះសិក្សាមុននឹងពួកគេចាប់កម្មវិធីបង្វឹករយៈពេល3ខែមុនចូលបម្រើការងារ និងកម្មវិធីសិក្សាថ្នាក់មហាវិទ្យាល័យ។

ថ្លែងនៅក្នុងកម្មវិធីបើកបវេសនកាលកាលពីព្រឹកថ្ងៃទី09 ខែតុលា ឆ្នាំ2017 ម្សិលមិញនេះ លោក កឹម អឿន នាយកប្រតិបត្តិ វិទ្យាស្ថានសិក្សាដើម្បីជោគជ័យ បានមានប្រសាសន៍ថា ៖ កាលរៀបចំពិធីបវេសនកាលនេះ គឺធ្វើឡើងក្នុងគោលបំណងជាការប្រកាសជាសាធារណៈជូនប្អូនៗសិស្សានុសិស្ស ដែលបានមកចុះឈ្មោះសិក្សានៅវិទ្យាស្ថាន និងដើម្បីឱ្យពួកគេបានត្រៀមខ្លួនចូលរួមកម្មវិធីបណ្តុះបណ្តាលរយៈពេល3ខែ ត្រៀមសម្រាប់ធ្វើការងារ និងការត្រៀមខ្លួនចូលសិក្សាថ្នាក់មហាវិទ្យាល័យសម្រាប់ឆ្នាំសិក្សា 2017-2018 នេះផងដែរ ។ បន្ថែមពីនេះ ការបើកបវេសនកាលថ្មីនាពេលនេះ ក៏ជាឱកាសមួយដែលប្អូនៗសិស្សានុសិស្សបានស្វែងយល់កាន់តែច្បាស់ពីទស្សនវិស័យរបស់វិទ្យាស្ថានសិក្សាដើម្បីជោគជ័យ ក៏ដូចជាទស្សនវិស័យរបស់ក្រុមប្រឹក្សាភិបាលរបស់វិទ្យាស្ថានក្នុងការជួយសិស្ស-និស្សិតឱ្យមានការងារធ្វើបើទោះបីជាពួកគេប្រឡងមធ្យមសិក្សាទុតិយភូមិជាប់ក្ដី ឬមិនជាប់ក្ដី »។

នៅក្នុងឱកាសជាមួយគ្នានេះ លោក ស៊ីវ ស្រេង នាយករងទទួលបន្ទុកការិយាល័យសិក្សានិស្សិត ក៏បានបញ្ជាក់ផងដែរថា ៖ «ការបើកបវេសនកាលថ្មី វាគឺជាកម្មវិធីមួយដ៏សំខាន់សម្រាប់ប្អូនៗដែលបានចុះឈ្មោះសិក្សានៅវិទ្យាស្ថាន ដើម្បីបង្ហាញពីការចាប់ផ្តើមនូវកម្មវិធីសិក្សា ត្រៀមដើម្បីទទួលបានការងារ និងការចាប់ផ្តើមថ្នាក់មហាវិទ្យាល័យរបស់ពួកគេ ប៉ុន្តែសម្រាប់ប្អូនៗដែលចង់ចុះឈ្មោះសិក្សានៅវិទ្យាស្ថាន យើងនៅតែមន្តទទួលចុះឈ្មោះរៀនជារៀងរាល់ថ្ងៃ ព្រោះការបើកបវេសនកាលថ្មីនេះ គឺសម្រាប់ប្អូនៗជំហ៊ានទី1 តែប៉ុណ្ណោះ » ។

អ្វីដែលជាការគួរឱ្យកត់សម្គាល់នោះ លោក ឃីម សុខហេង ស្ថាបនិកនៃវិទ្យាស្ថានសិក្សាដើម្បីជោគជ័យ បានសង្កត់ធ្ងន់ថា ៖ ការជួយឱ្យសិស្ស-និស្សិតបានបន្តការសិក្សាថ្នាក់មហាវិទ្យាល័យ ហើយមានការងារធ្វើក្នុងពេលតែមួយ គឺជាបេសកកម្មដ៏ធំមួយរបស់វិទ្យាស្ថានសិក្សាដើម្បីជោគជ័យ ដើម្បីជួយដល់ប្អូនៗដែលជាសិស្សានុសិស្ស ដែលខ្វះលទ្ធភាព តែចង់បន្តការសិក្សារបស់ខ្លួន។ នៅក្នុងឱកាសនេះ ខ្ញុំក៏ចង់បញ្ជាក់ផងដែរថា សម្រាប់ប្អូនៗដែលចង់សិក្សានៅវិទ្យាស្ថានសិក្សាដើម្បីជោគជ័យ ការចុះឈ្មោះជាជំហ៊ានទី2 គឺនៅតែទទួលចុះឈ្មោះជារៀងរាល់ថ្ងៃ ហើយបើទោះជាប្រឡងបាក់ឌុបជាប់ក្ដី ឬមិនជាប់ក្ដី មានក្តី ក្រក្ដី សូមកុំបោះបង់ការសិក្សាចោល បើខ្វះលទ្ធភាពបន្តការសិក្សា យើងអាចធ្វើការបណ្ដើរ សិក្សាបន្តបណ្ដើរ កុំអស់សង្ឃឹមឱ្យសោះ ។

សូមបញ្ជាក់ផងដែរថា ក្នុងឱកាសនោះដែរ ក៏មានការចុះអនុស្សារណៈយោគយល់ទទួលយកនិស្សិត របស់វិទ្យាស្ថានឱ្យចូលបម្រើការងារពីក្រុមហ៊ុនជាដៃគូជាង10 ក្នុងឆ្នាំសិក្សាថ្មីនេះផងដែរ។ ប្រធានក្រុមហ៊ុន Bamboo PLC និង ក្រុមហ៊ុន Laksmi Preme Investment និងជាអ្នកដំណាងក្រុមហ៊ុន10ផ្សេងទៀតគឺ លោក លឹម សុជាតិ បានមានប្រសាសន៍ឱ្យដឹងផងដែរថា « ការដែលខ្ញុំទទួលយកនិស្សិតពីវិទ្យាស្ថាន សិក្សាដើម្បីជោគជ័យ ឱ្យចូលរួមបម្រើការងារក្នុងក្រុមហ៊ុនរបស់ខ្ញុំ បើទោះបីពួកគេទើបតែចប់បាក់ឌុប ធ្លាក់ក៏ដោយ ជាប់ក៏ដោយ ឬជានិស្សិតទើបចូលរៀនឆ្នាំទី1ក្ដី នោះក៏ព្រោះតែខ្ញុំបានយល់ឃើញថា ពួកគេម្នាក់ៗ មានជំនាញ AML Soft Skill រួចជាស្រេច ដែលវាជាដើមទុនដ៏ធំមួយ ងាយក្នុងការបណ្ដុះបណ្ដាល និងហាត់ពត់ពួកគេឱ្យក្លាយទៅជាបុគ្គលិកដ៏ល្អរបស់ក្រុមហ៊ុន »៕

October 10, 2017

តើនរណានៅពីក្រោយនៃពាន រង្វាន់ ICT AWARDS ឆ្នាំ2017?

កាលពីពេលថ្មីៗនេះកម្ពុជាបានរៀបចំការប្រកួតប្រជែងពានរង្វាន់ ICT Awards 2017 ដែលមានស្ថាប័នឯកជន និងស្ថាប័នរដ្ឋជាច្រើនចូលរួមប្រកួតដណ្តើមពានរង្វាន់យ៉ាងសស្រោកសស្រាំ។

បន្ទាប់ពីការប្រកួតគណៈកម្មការរៀបចំបានរកឃើញម្ចាស់ជ័យលាភី ICT Awards 2017 គឺក្រសួងសាធារណការ និងដឹកជញ្ជូន ខណៈក្រសួងបានធ្វើកំណែទម្រង់លើការគ្រប់គ្រងយានយន្តដោយប្រើបច្ចេកវិទ្យាថ្មីចុងក្រោយបំផុត ដែលផ្តល់សេវាចុះបញ្ជីយានយន្តក្នុងរយៈពេលត្រឹមតែប្រមាណ2ថ្ងៃប៉ុណ្ណោះ ជំនួសឱ្យការប្រើប្រាស់នីតិវិធីស្មុគស្មាញចាស់ ដែលប្រើប្រាស់ពេលវេលារាប់ខែ។

ជាមួយគ្នានេះក្រសួងក៏បានដាក់ឱ្យប្រើប្រាស់នូវ QR Code លើស្លាកលេខម៉ូតូ រថយន្ត ជាលើកដំបូងក្នុងប្រវត្តិសាស្ត្រប្រទេសកម្ពុជា និងដំបូងគេនៅអាស៊ីផងដែរ។ ក្រោយពេលទទួលជ័យលាភីក្នុងការប្រកួតរួចមក ម្ចាស់ជ័យលាភីនៃពានរង្វាន់ខាងលើក៏កំពុងត្រៀមខ្លួនដើម្បីចូលរួមប្រកួតប្រជែងថា្នក់តំបន់មួយទៀត គឺ ASEAN ICT Awards 2017 ដែលបានចាប់ផ្តើមដំណើរការដាក់ពាក្យប្រឡងកាលពីខែមេសា ឆ្នាំ2017 ហើយត្រូវប្រកួតយកជ័យលាភីផ្តាច់ព្រ័ត្រនៅថ្ងៃទី30 ខែវិច្ឆិកា ឆ្នាំ2017 ខាងមុខ។ តើតំណាងពីកម្ពុជាអាចនឹងទទួលបានជ័យជម្នះនៅលើឆាកអន្តរជាតិដែរ ឬទេ?

តើ ICT Awards 2017 នេះបានផ្តល់ប្រយោជន៍ដូចម្តេចខ្លះដល់កម្ពុជា?

លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូន ដែលនឹងចូលរួមប្រកួតប្រជែង ASEAN ICT Awards 2017 ដោយផ្ទាល់ បាននិយាយថា ការចូលរួមប្រកួតយើងសម្រេចបានជោគជ័យគួរជាទីមោទនៈ។ កម្មវិធីនេះសម្រេចទៅបានក្រោមគំនិតផ្តួចផ្តើមដឹកនាំធ្វើកំណែទម្រង់ និងការផ្តល់ឱកាសដល់យុវជនជំនាន់ក្រោយពីសំណាក់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

កិច្ចខិតខំប្រឹងប្រែងនេះកំពុងជួយសម្រួលផ្តល់សេវាជូនប្រជាពលរដ្ឋឱ្យពួកគាត់មានភាពងាយស្រួលក្នុងការចុះបញ្ជីធ្វើស្លាកលេខរថយន្តតាមអនឡាញក៏បាន តាមហាងទិញរថយន្តក៏បាន និងតាមរយៈមន្ត្រីនៅកន្លែងធ្វើការផ្ទាល់ក៏បាន ដែលអាចចំណេញទាំងពេលវេលា និងថវិកា មានន័យថា ប្រជាពលរដ្ឋលែងចំណាយសេវាក្រៅផ្លូវការដូចមុនទៀតហើយ។ អ្វីដែលពិសេសជាងនេះទៀតនោះគឺប្រព័ន្ធចុះបញ្ជីស្វ័យប្រវត្តិកម្មថ្មីមានដាក់ QR Code នៅលើស្លាកលេខរថយន្ត និងទោចក្រយានយន្ត ឬម៉ូតូ តែម្តងដោយវានឹងផ្តល់នូវភាពងាយស្រួលក្នុងការត្រួតពិនិត្យព័ត៌មានពាក់ព័ន្ធទៅនឹងទោចក្រយានយន្ត ម៉ូតូ ឬរថយន្ត គឺមិនចាំបាច់ចំណាយពេលទៅឆែកគល់បញ្ជីដើម្បីផ្ទៀងផ្ទាត់ព័ត៌មាន ចៀសវាងការក្លែងបន្លំណាមួយក្នុងការប្រើប្រាស់ស្លាកលេខក្លែងបន្លំនោះ។

លោកបានបន្តថា នីតិវិធីងាយៗក្នុងការចុះបញ្ជី គឺប្រជាពលរដ្ឋមានជម្រើស3សម្រាប់ចុះបញ្ជីធ្វើស្លាកលេខ ទី1. អាចចុះបញ្ជីធ្វើស្លាកលេខដោយផ្ទាល់ជាមួយមន្ត្រីនៅការិយាល័យផ្តល់សេវារបស់ក្រសួង ទី2. អាចធ្វើតាមរយៈហាងដែលបានទិញរថយន្ត ឬទោចក្រយានយន្តនៅនឹងកន្លែង និងទី3. អាចចុះបញ្ជីតាមប្រព័ន្ធអនឡាញ។ វិធីសាស្ត្រដែលងាយស្រួលជាងគេ គឺចុះបញ្ជីតាមប្រព័ន្ធអនឡាញ ដោយគ្រាន់តែចូលទៅកាន់គេហទំព័ររបស់ក្រសួង តាមរយៈអាសយដ្ឋាន https://vehicle.mpwt.gov.kh ដែលបានផ្តល់លទ្ធភាពឱ្យម្ចាស់រថយន្តជ្រើសរើសលេខរថយន្ត និងប្រភេទស្លាកខ្នាតធំ ឬវែងដែលខ្លួនពេញចិត្ត ហើយបង់កម្រៃសេវា Online ឬទៅកាន់បញ្ជរ Wing, LyHour ឬ SmartLuy ជាការស្រេច។ ក្រោយពីបង់ប្រាក់រួចរាល់អតិថិជនអាចជិះរថយន្តទៅកឹបស្លាកលេខ នៅទីតាំងធ្វើស្លាកលេខរថយន្តរាជធានី-ខេត្ត ដោយគ្រាន់តែធ្វើដំណើរទៅដល់ទីតាំងនោះគេនឹងផ្ទៀងផ្ទាត់ព័ត៌មាន ក៏ដូចជាទិន្នន័យដែលបានចុះបញ្ជីតាមអនឡាញដើម្បីកឹបស្លាកលេខ ហើយផ្តល់កាតគ្រីជូនភ្លាមៗតែម្តង មិនបាច់ចំណាយក្រៅផ្លូវការ និងមិនបាច់រង់ចាំយូរដូចពេលមុនទៀតទេ។

ប្រព័ន្ធស្វ័យប្រវត្តិកម្មនេះ នឹងត្រូវដាក់ចូលប្រកួតប្រជែងក្នុងកម្មវិធី ASEAN ICT Awards 2017 ដែលនឹងត្រូវប្រកាសជ័យលាភីនៅចុងខែវិច្ឆិកា ខាងមុខនេះ ហើយគេរំពឹងថាកម្ពុជានឹងអាចដណ្តើមបានជ័យលាភីនេះ ដោយសារប្រព័ន្ធចុះបញ្ជីយានយន្តបែបថ្មីនេះ ត្រូវបានរៀបចំឡើងប្រកបដោយតម្លាភាព សុវត្ថិភាព និងទើបត្រូវបានដាក់ឱ្យប្រើប្រាស់នៅកម្ពុជាដំបូងបំផុត ក្នុងចំណោមប្រទេសនានាក្នុងតំបន់អាស៊ាន។

គួររំលឹកថា ក្រោយពេលបញ្ចប់ថ្នាក់បរិញ្ញាបត្រផ្នែកវិស្វករព័ត៌មានវិទ្យានៅសាកលវិទ្យាល័យភូមិន្ទភ្នំពេញ លោក ហ៊ាង សុទ្ធាយុត្តិ បានចូលបម្រើការងារក្នុងក្រុមហ៊ុនអភិវឌ្ឍកម្មវិធីព័ត៌មានវិទ្យាជាច្រើនដូចជា ក្រុមហ៊ុន I-ways ក្នុងតួនាទីជាអ្នកគ្រប់គ្រង បន្ទាប់មកលោកក៏ចូលបម្រើការងារនៅក្រុមហ៊ុន Khmer Dev Company ក្រុមហ៊ុន Angkor One LLC និងជាទីប្រឹក្សាបច្ចេកវិទ្យាព័ត៌មានថ្នាក់តំបន់របស់អង្គការសហប្រជាជាតិស្ថិតិ (UNSD) ហើយក៏ជាទីប្រឹក្សាបច្ចេកវិទ្យាព័ត៌មានរបស់ក្រសួងអប់រំយុវជន និងកីឡា រៀបចំកម្មវិធីគ្រប់គ្រងការប្រឡងបាក់ឌុបដែលកំពុងប្រើប្រាស់សព្វថ្ងៃផងដែរ។ ក្រោយមកលោកក៏ចូលបម្រើការងារនៅក្រសួងពាណិជ្ជកម្ម ក្នុងតួនាទីជាអនុប្រធាននាយកដ្ឋានអឺរ៉ុប មជ្ឈិមបូព៌ា និងអាហ្វ្រិក។ ការងារបច្ចុប្បន្នរបស់លោកគឺជាប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈនៃក្រសួងសាធារណការ និងដឹកជញ្ជូន៕

October 10, 2017

ការមើលថែទាំកូនតូចក្រោយចាក់វ៉ាក់សាំងយ៉ាងត្រឹមត្រូវ

អ្នកម្តាយអាចសង្កេតឃើញអាការផ្សេងៗរបស់កូនតូចក្រោយពីបានទទួលការចាក់វ៉ាក់សាំងការពារហើយដែរឬទេថា អាការដែលបង្ហាញចេញមកនោះមានគ្រោះថ្នាក់ធ្ងន់ធ្ងរចំពោះកូនតូចឬយ៉ាងណា?ហើយតើកូនតូចត្រូវបានទទួលការមើលថែទាំដែលស័ក្តិសម និងត្រឹមត្រូវតាមវិធីណាខ្លះ? លោកឪពុកអ្នកម្តាយនឹងមានវិធីការទប់ទល់យ៉ាងណានោះ យើងនាំគ្នាមកចម្លើយទាំងអស់គ្នា។

ឈឺ ហើម ឡើងក្រហមកន្លែងដែលចាក់ថ្នាំ

បើកូនមានអាការហើម ឬបង្ហាញអាការឈឺចាប់ (យំរករឿង) អ្នកម្តាយចូរស្អំដោយទឹកកកដើម្បីសម្រាលអាការឈឺចាប់។ ទាំងអស់នេះ អាការទាំងនោះអាចបាត់ទៅវិញក្នុងរយៈពេល1-3ថ្ងៃ តែបើសិនឡើងហើមក្រហមជាស្នាមរបួស សូមអ្នកម្តាយសាកល្បងសង្កេតមើលថាតើកូនកម្រើកដៃខាងដែលចាក់វ៉ាក់សាំងនោះបានតិចតួច ឬមិនកម្រើកសោះ អាការបែបនេះអាចកើតការឆ្លងមេរោគរហូតក្លាយពងខ្ទុះបាន ត្រូវប្រញាប់នាំកូនតូចទៅជួបលោកគ្រូពេទ្យជាបន្ទាន់។

មានគ្រុនក្តៅខ្លួន

យកក្រណាត់ស្អាតជ្រលក់ទឹកស្អាតសើមៗ ជូតបញ្ចុះកម្តៅ បរិវេណក កញ្ចឹងក តាមសន្លាក់ដៃជើងផ្សេងៗ ដើម្បីបញ្ចុះសីតុណ្ហភាពក្នុងរាង-កាយ។ អាការគ្រុនក្តៅនឹងធូរស្រាលឡើង និងបាត់ក្នុងអំឡុង2-3ថ្ងៃ តែបើកម្តៅខ្លួននៅតែខ្ពស់ មិនព្រមថយចុះ អាចឱ្យកូនតូចញ៉ាំថ្នាំបញ្ចុះកម្តៅតាមដែលគ្រូពេទ្យណែនាំបាន។

យំ ងង៉ក់ រករឿង

ពេលដែលកូនតូចយំ ងង៉ក់ កុំអាលជ្រួលច្រាលអី អ្នកម្តាយត្រូវធ្វើចិត្តឱ្យត្រជាក់ ប្រើវិធីលួងលោមកូន ដូចជា បង្វែរចំណាប់អារម្មណ៍ដោយការនាំទៅដើរលេង ច្រៀង ឬចាក់បទភ្លេងឱ្យកូនស្តាប់ ដើម្បីសាងបរិយាកាសដែលល្អ ការបី ព ឱបកូនយោលខ្លួនទៅមកតិចៗ ដើម្បីជួយសាងភាពកក់ក្តៅ សប្បាយចិត្តដល់កូនតូចឱ្យឈប់យំងង៉ក់។

មានពងទុលឡើងនៅកន្លែងដែលចាក់ថ្នាំ

មានលក្ខណៈបែបឡើងពង រួចបាត់ទៅវិញ ឡើងពង រួចបាត់ទៅវិញ ប្រមាណជា3-4សប្តាហ៍ ក៏នឹងជាបាត់ទៅវិញ មិនចាំបាច់ត្រូវដាក់ថ្នាំ ឬលាបថ្នាំបិទស្លាកស្នាមទេ។ បើមានពងទុលឡើង គួរប្រយ័ត្នកុំច្របាច់ កុំសង្កត់ ឬធ្វើអ្វីជាមួយពងនោះឱ្យសោះ ព្រោះអាចកើតការឆ្លងមេរោគ តែបើមានឆ្លងមេរោគចូល ក្លាយជាដំបៅ ចូរប្រញាប់នាំកូនតូចទៅជួបលោកគ្រូពេទ្យភ្លាម៕

October 10, 2017

វិធីធម្មតាៗ តែមានប្រសិទ្ធិភាពកម្ចាត់ក្លិនក្លៀកពូកែបំផុត

ក្លិនក្លៀកបណ្តោលមកពីក្រពេញញើសនៅក្រោមក្លៀក និងបាក់តេរីមានការកើនឡើង។ នេះជាជំងឺទូទៅមួយមិនមានផលប៉ះពាល់ដល់សុខភាពឡើយ ប៉ុន្តែវាបានរំខានដល់ជីវិតរបស់នៅប្រចាំថ្ងៃ និងទំនាក់ទំនងរបស់អ្នក។ ប្រសិនបើអ្នកខ្មាស់អៀនមិនហ៊ានជួបជាមួយនឹងគ្រូពេទ្យ ដើម្បីធ្វើការព្យាបាលនោះទេ អ្នកអាចអនុវត្តតាមវិធីធម្មជាតិវិញក៏មានប្រសិទ្ធភាពដែរ។

១. ក្រូចឆ្មាស្រស់

ក្រូឆ្មាមានរសជាតិជូរ, ត្រជាក់, មានប្រសិទ្ធភាពកាត់បន្ថយកម្ដៅ, ជាថ្នាំសម្លាប់មេរោគ, ប្រឆាំងនឹងការរលាក។ ប្រភពធម្មជាតិនៃទឹកអាស៊ីតនៅក្នុងក្រូចឆ្មា អាចជួយសម្លាប់បាក់តេរីនៅលើស្បែកក្លៀក ហើយអាស៊ីតខ្លាញ់អាចជួយលុបបំបាត់ញើស និងក្លិនក្លៀក។

វិធីសាមញ្ញបំផុត៖ បន្ទាប់ពីងូតទឹក យកក្រូចឆ្មាស្រស់មួយចំណិត ត្រដុសត្រង់ក្លៀកប្រហែលជា ១០នាទី។ បន្ទាប់មកប្រើកូនកន្សែងជ្រក់ទឹកក្តៅឧណ្ឌៗមកជូតសម្អាត។ អនុវត្តជារៀងរាល់ថ្ងៃ អ្នកនឹងឆាប់ឃើញលទ្ធផល។

ដើម្បីបង្កើនប្រសិទ្ធភាពនៃការព្យាបាលក្លិនក្លៀក គួរតែលាយទឹកក្រូចឆ្មាមួយលីត្រសម្រាប់បរិភោគក្នុងមួយថ្ងៃ។ ធ្វើបែបនេះអាចកាត់បន្ថយកម្ដៅ, បន្សាបជាតិពុលនៅក្នុងរាងកាយ, ជួយកាត់បន្ថយក្លិនខ្លួនដែលបង្កឡើងដោយសារតែក្រពេញញើស។

២. ស៊ុតស្ងោរ

បើយោងតាមឱសថបុរាណស៊ុតស្ងោរមានប្រសិទ្ធភាពក្នុងការព្យាបាលក្លិនក្លៀកខ្លាំងណាស់។ ប្រសិនបើបានអនុវត្តម្តងហើយ ម្តងទៀតអ្នកនឹងមានអារម្មណ៍ថា ក្លិនក្លៀនត្រូវបានបាត់បង់យ៉ាងលឿន។

យកស៊ុតពីគ្រាប់មកស្ងោរឲ្យឆ្អិន រួចបកសំបកចេញទាន់នៅក្តៅៗ ហើយខ្ចប់នឹងកូនកន្សែងមួយដើម្បីលុញនៅក្រោមក្លៀកទាល់តែស៊ុតត្រជាក់ទើបឈប់។ អនុវត្តបែបនេះឱ្យបានទៀងទាត់អ្នកនឹងទទួលបានផល។

៣. ខ្ញីស្រស់

ខ្ញីស្រស់អាចជួយការពារការបែបញើសក្លៀក និងជួយឲ្យក្លៀកស្ងួតបានយូរ។ តើគួរតែប្រើយ៉ាងម៉េច? អ្នកគ្រាន់តែប្រើទឹកខ្ញីស្រស់យកទៅជូតសម្អាតក្លៀកឱ្យបានរៀងរាល់ថ្ងៃ ដើម្បីជួយឱ្យស្បែកក្រោមក្លៀកស្ងួត និងមានក្លិនល្អឡើងវិញ៕

October 10, 2017

ដើម្បីក្តីសង្ឃឹម World Cup…អាហ្សង់ទីន ត្រូវតែឈ្នះជាដាច់ខាតពេលប៉ះ អេក្វាទ័រ

ក្រុមបាល់ទាត់ជម្រើសជាតិអាហ្សង់ទីន ត្រូវតែដណ្តើមជ័យជម្នះឲ្យបានជាដាច់ខាត នៅពេលដែលធ្វើដំណើរទៅជួបក្រុមបាល់ទាត់ជម្រើសជាតិអេក្វាទ័រ ក្នុងការប្រកួតជម្រុះជុំចុងក្រោយនៃតំបន់អាមេរិកខាងត្បូងរបស់ពួកគេនៅរាត្រីថ្ងៃអង្គារនេះ (ត្រូវនឹងព្រឹកថ្ងៃពុធ នៅកម្ពុជា) ខណៈដែលយុទ្ធនាការ World Cup ឆ្នាំ2018ខាងមុខនេះ កំពុងតែប្រឈមមុខនឹងការអវត្តមានតារាឆ្នើមបំផុតរបស់ពិភពលោកគឺ Lionel Messi។

ក្រុមជម្រើសជាតិអាហ្សង់ទីន ទទួលបានត្រឹមលទ្ធផលស្មើ ០-០ នៅពេលប្រកួតជាមួយនឹងក្រុមជម្រើសជាតិប៉េរូ កាលពីថ្ងៃព្រហស្បតិ៍ ដែលមិនត្រឹមតែធ្វើឱ្យធ្លាក់ចេញពីចំណាត់ថ្នាក់កំពូលទាំង4ដែលត្រូវឈ្នះសិទ្ធិជាស្វ័យប្រវត្តិនៅកាន់ប្រទេសរុស្ស៊ី នៅឆ្នាំក្រោយប៉ុណ្ណោះទេ ប៉ុន្តែក៏បានធ្លាក់ចេញពីចំណាត់ថ្នាក់លេខ5 ដែលជាកៅអីសម្រាប់លេងវគ្គ Playoff ជាមួយនឹងក្រុមជម្រើសជាតិនូវែសេឡង់ ទៀតផង។ ជាមួយនឹងការស្ថិតក្នុងចំណាត់ថ្នាក់លេខ6 បច្ចុប្បន្នក្រុមជម្រើសជាតិអាហ្សង់ទីន ត្រូវតែឈ្នះជាដាច់ខាតក្នុងការប្រកួតចុងក្រោយរបស់ពួកគេលើទឹកដីក្រុមជម្រើសជាតិអេក្វាទ័រ នៅថ្ងៃអង្គារនេះ។

រយៈពេល 2ឆ្នាំមុន ក្រោយពីក្រុមជម្រើសជាតិអាហ្សង់ទីន បានចាប់ផ្តើមយុទ្ធនាការជម្រុះរបស់ពួកគេជាមួយនឹងការបរាជ័យ 2-០ លើទឹកដីខ្លួនឯង ក្រោមស្នាដៃក្រុមជម្រើសជាតិអេក្វាទ័រ ក្រុមរបស់លោក Jorge Sampaoli នឹងត្រូវធ្វើដំណើរទៅកាន់ទីក្រុង Quito ដើម្បីជួបជាមួយនឹងអេក្វាទ័រនេះម្តងទៀតជាមួយនឹងក្តីសង្ឃឹមដ៏ទាបបំផុត។ ប៉ុន្តែ ស្របពេលដែលក្រុមឈរលេខ3 ស៊ីលី (26ពិន្ទុ) និងក្រុមឈរលេខ7 ប៉ារ៉ាហ្គាយ (24ពិន្ទុ) កំពុងតែដេញតាមពីក្រោយគ្នាត្រឹមតែ2ពិន្ទុនោះ ការប្រែប្រួលផ្សេងៗអាចនឹងត្រូវកើតឡើង។

ទោះបីជាយ៉ាងណា ក្រុមជម្រើសជាតិអាហ្សង់ទីន អាចនឹងលួងចិត្តអ្នកគាំទ្ររបស់ខ្លួនបាន ប្រសិនបើពួកគេដណ្តើមបាន3ពិន្ទុដ៏សំខាន់នេះ។ ប៉ុន្តែ ការដណ្តើមជ័យជម្នះនៅលើទឹកដីដែលមានសម្ពាធខ្យល់ទាបនៃទីក្រុង Quito និងដែលមានកម្ពស់ខ្ពស់ជាងកម្រិតទឹកសមុទ្រចំនួន2,850ម៉ែត្រនេះ ប្រហែលមិនមែនជារឿងងាយស្រួលឡើយ។ ការប្រកួតនេះនឹងចាប់ផ្តើមនៅម៉ោង6:3០ព្រឹកថ្ងៃពុធ៕

ប្រភពពី៖ Sport24

October 10, 2017

អ៊ីស្លង់ ក្លាយជាប្រទេសតូចជាងគេបំផុតក្នុងការឈ្នះកៅអីទៅ World Cup

ក្រុមបាល់ទាត់ជម្រើសជាតិអ៊ីស្លង់ បានឈ្នះកៅអីមួយទៅកាន់ប្រទេសរុស្ស៊ី ក្រោយពីបានកត់ត្រាជ័យជម្នះក្នុងលទ្ធផល 2-០ លើក្រុមជម្រើសជាតិកូសូវ៉ូ ក្នុងទីក្រុង Reykjavik កាលពីថ្ងៃចន្ទ និងបានក្លាយជាប្រទេសតូចជាងគេបំផុតមិនធ្លាប់មានពីមុនមកក្នុងការឈ្នះសិទ្ធិទៅ World Cup។

ក្រុមរបស់លោក Heimir Hallgrimsson បានដឹងថា ការដណ្តើមបានជ័យជម្នះនៅពេលប្រកួតជាមួយនឹងក្រុមបាតតារាងនៃពូល I នេះ នឹងធ្វើឲ្យពួកគេបញ្ចប់ដោយបានឈរលើលេខ1ក្នុងពូល និងឈ្នះកៅអីជាស្វ័យប្រវត្តិទៅជុំផ្តាច់ព្រ័ត្រ ហើយខ្សែបម្រើ Gylfi Sigurdsson របស់ក្រុម Everton បានកាត់បន្ថយការភិតភ័យរបស់ពួកគេតាមរយៈការរកបានគ្រាប់បាល់ដ៏ល្អមួយគ្រាប់មុនពេលបញ្ចប់តង់ទី1។

Sigurdsson ក៏បានជួយឲ្យកីឡាករ Johann Berg Gudmundsson រកគ្រាប់បាល់ទី2ផងដែរ នៅពាក់កណ្តាលតង់ទី2 ខណៈដែលក្រុមជម្រើសជាតិអ៊ីស្លង់ បានបំពេញយុទ្ធនាការជម្រុះរបស់ពួកគេ តាមរយៈការឈ្នះការប្រកួត3លើកចុងក្រោយរបស់ពួកគេ ដើម្បីបង្ហាញថា ការឈានទៅប្រកួតវគ្គ8ក្រុមចុងក្រោយនៃព្រឹត្តិការណ៍ Euro ឆ្នាំ2016 របស់ពួកគេកន្លងមកនោះ មិនមែនជារឿងចៃដន្យឡើយ។

លោក Hallgrimsson គ្រូបង្វឹករបស់ក្រុមជម្រើសជាតិអ៊ីស្លង់ បានឲ្យដឹងថា៖ «ខ្ញុំបានគិត បន្ទាប់ពីការប្រកួត Euro ឆ្នាំ2016 ហើយថា រឿងដែលលំបាកបំផុតគឺការលើកទឹកចិត្តខ្លួនឯងម្តងទៀត។ រឿងដ៏ល្អបំផុតគឺការបន្តធ្វើឲ្យបានល្អម្តងទៀត ក្រោយពីការជួបភាពជោគជ័យដ៏ធំនៅប្រទេសបារាំង»។ ស្របពេលជាមួយគ្នានេះ ក្រុមជម្រើសជាតិស៊ែប៊ី ក៏បានឈ្នះកៅអីរបស់ពួកគេទៅកាន់ព្រឹត្តិការណ៍ World Cup ឆ្នាំ2018 ផងដែរ ក្រោយពីបានយកឈ្នះលើក្រុមជម្រើសជាតិហ្ស៊កហ្ស៊ី ដើម្បីបញ្ចប់ដោយឈរលើលេខ1ក្នុងពូលរបស់ពួកគេ។

ក្រុមជម្រើសជាតិអ៊ីស្លង់ ត្រូវការ3ពិន្ទុជាដាច់ខាតដើម្បីបញ្ចប់ដោយការឈរលើលេខ1ក្នុងពូល ក្នុងការប្រកួតជម្រុះប្រចាំតំបន់អឺរ៉ុប ក្នុងពូល I ខណៈដែលក្រុមបាល់ទាត់ជម្រើសជាតិក្រូអាស៊ី ដែលបានបណ្តេញលោក Ante Cacic ចេញពីតំណែងកាលពីសប្តាហ៍មុននោះ បានកត់ត្រាជ័យជម្នះ 2-០ លើក្រុមជម្រើសជាតិអ៊ុយក្រែន ក្នុងទីក្រុងគៀវ ដើម្បីដណ្តើមយកចំណាត់ថ្នាក់លេខ2៕

លទ្ធផលពីការប្រកួតផ្សេងទៀត

Albania 0-1 Italy
Finland 2-2 Turkey
FYR Macedonia 4-0 Liechtenstein
Israel 0-1 Spain
Moldova 0-1 Austria
Wales 0-1 Ireland
ប្រភពពី៖ The Guardian

October 10, 2017

ចូលទស្សនារមណីដ្ឋានឋានសួគ៌បូកគោ មិនត្រូវបង់ប្រាក់ជារៀងរហូត ចាប់ពីថ្ងៃទី 15 ខែនេះ

ចាប់ពីម៉ោង00 នាទីថ្ងៃទី15ខែតុលា ឆ្នាំ2017ខាងមុខនេះ ប្រជាជនខ្មែរទាំងអស់នឹងបានទទួលកាដូចំនួនពីរព្រមគ្នាគឺការធ្វើដំណើរឆ្លងកាត់ស្ពានលីយុងផាត់ដោយលែងបង់ប្រាក់ និងការធ្វើដំណើរឡើងកម្សាន្តនៅរមណីយដ្ឋានឋានសួគ៌ភ្នំបូកគោ «ឧទ្យានជាតិព្រះមុនីវង្ស» ដោយពុំចាំបាច់ទិញសំបុត្រចូលឡើយ។

រយៈពេលកន្លងមកប្រមុខរាជរដ្ឋាភិបាលកម្ពុជា បានប្រកាសស្ដីពីការទិញស្ពានលី យុងផាត់ ដើម្បីជួយសម្រួលដល់ការធ្វើដំណើរដល់ប្រជាជនកម្ពុជាឆ្លងកាត់ដោយពុំចាំបាច់បង់ប្រាក់បន្ដទៀត។ ដំណឹងល្អនេះ មិនទាន់បានរំលងផុតពីសេចក្ដីរីករាយរបស់ប្រជាជនកម្ពុជាផង ថ្មីៗនេះនៅក្នុង Page ផ្លូវការរបស់សម្ដេច ហ៊ុន សែន ប្រមុខរាជរដ្ឋាភិបាល បានសរសេរដោយបង្ហាញពីដំណឹងល្អមួយទៀតដល់ប្រជាជនកម្ពុជាដែលមានបំណងចង់ទៅកម្សាន្តនៅ រមណីយដ្ឋានឋានសួគ៌ភ្នំបូកគោ «ឧទ្យានជាតិព្រះមុនីវង្ស» ពុំចាំបាច់ចំណាយប្រាក់ទិញសំបុត្រចូលទស្សនាទៀតឡើយ។

ខ្លឹមសារទាំងស្រុងនៃសំណេរនេះបញ្ជាក់ថា៖ «ទូលព្រះបង្គំ ខ្ញុំព្រះករុណាខ្ញុំ ក្នុងនាមរាជរដ្ឋាភិបាល មានសេចក្តីរីករាយ សូមជម្រាបជូនដល់សាធារណជនឱ្យបានជ្រាបថា ក្រុមហ៊ុន សុខា អូតែល បានស្ម័គ្រចិត្តឈប់លក់សំបុត្រយកថ្លៃចូលឧទ្យានជាតិព្រះមុនីវង្ស «បូកគោ» និងរមនីយដ្ឋានបូកគោ ដែលនឹងចូលជាធរមាន ចាប់ពីវេលាម៉ោង 00:00 នាទី ថ្ងៃទី15ខែតុលា ឆ្នាំ2017 តទៅ។ ទូលព្រះបង្គំ ខ្ញុំព្រះករុណាខ្ញុំ យល់ថា ការឈប់លក់សំបុត្រយកថ្លៃចូលឧទ្យានជាតិនេះ នឹងជួយសម្រួលដល់បងប្អូនជនរួមជាតិ ក៏ដូចជាភ្ញៀវទេសចរណ៍ទាំងអស់បានឡើងទៅទស្សនាកម្សាន្ដនៅលើតំបន់រមណីយដ្ឋានប្រវត្តិសាស្ដ្រ ជាពិសេសបានទស្សនាទេសភាពដ៏ស្រស់ត្រកាលនិងសែនមនោរម្យ និងស្វែងយល់អំពីប្រភេទសត្វ និងរុក្ខជាតិដ៏មានតម្លៃ ដែលមាននៅក្នុងតំបន់ឧទ្យានជាតិ។ បងប្អូនជនរួមជាតិ នឹងមានភាពងាយស្រួលក្នុងការធ្វើដំណើរឡើងទៅកាន់តំបន់រមណីយដ្ឋានបូគោ ដើម្បីស្វែងយល់ពីហេដ្ឋារចនាសម្ព័ន្ធវប្បធម៌ និងសាសនា ក៏ដូចជាការគោរពប្រតិបត្តិពិធីប្រពៃណីសាសនានៅលើតំបន់ប្រវត្តិសាស្ដ្រនេះ។ លើសពីនេះទៅទៀត ទូលព្រះបង្គំ ខ្ញុំព្រះករុណាខ្ញុំសង្ឃឹមថា ដំណោះស្រាយនេះ ក៏នឹងជួយជំរុញឱ្យសកម្មភាពទេសចរណ៍នៅតំបន់ឧទ្យានជាតិព្រះមុនីវង្ស «បូគោ» ក៏ដូចជានៅរបៀងទេសចរណ៍ភាគខាងត្បូង ជាពិសេសតំបន់ឆ្នេរ មានការកើនឡើងបន្ថែមទៀត សំដៅរួមចំណែកដល់សេដ្ឋកិច្ចសង្គម និងជីវភាពរស់នៅរបស់ប្រជាសហគមន៍ក្នុងមូលដ្ឋាន»៕

October 9, 2017

Author: វល័ក្ខ