វល័ក្ខ - La Reine Media

វីតាមីន10មុខសម្រាប់ស្ត្រីគ្រប់រូប

អាហារហូបចុកប្រចាំថ្ងៃវាពិតជាសំខាន់ណាស់សម្រាប់ស្ត្រីយើង ដូច្នេះក្នុងនាមជាអ្នកចាត់ចែកចំណីអាហារក្នុងគ្រួសារអ្នកគួរតែជ្រើសរើសអាហារណាដែលល្អសម្រាប់អ្នក និងសមាជិកគ្រប់គ្នា ទាំងចំពោះសុខភាព និងសម្រស់។ វីតាមីនសំខាន់ណាស់សម្រាប់អ្នក ហើយវីតាមីនទាំង10ខាងក្រោមនេះរឹតតែសំខាន់ទៅទៀត ព្រោះវាគឺជាវីតាមីនដែលស្ត្រីគ្រប់រូបគួរតែផ្គត់ផ្គង់ទៅឱ្យរាងកាយឱ្យបានគ្រប់គ្រាន់ ដើម្បីឱ្យក្លាយជាស្ត្រីម្នាក់ដែលប្រកបដោយសុខភាពល្អប្រពៃ និងមានសម្រស់ដ៏ផូរផង់ជាទីទាក់ទាញចិត្ត។

1-វីតាមីន A ៈ ផ្ទុក Antioxidant ដែលស្ត្រីគ្រប់វ័យត្រូវការចាំបាច់ដើម្បីជួយសាងសង់ និងទ្រទ្រង់ឆ្អឹង ធ្មេញ ស្បែកនិងភ្នាសរំអិលជាដើម។ វីតាមីន A ក៏ជួយកាត់បន្ថយឱកាសនៃការកើតជំងឺរលាកសន្លាក់រាំរ៉ៃជំនួយភ្នែក និងជួយការពារប្រព័ន្ធភាពស៊ាំផងដែរ។ អាហារដែលសម្បូរវីតាមីន A មានដូចជា ការ៉ុត ល្ពៅ ត្រសក់ Cantaloupe ប៉េងប៉ោះ ត្របែក ឪឡឹក ខាត់ណាខៀវ ល្ហុង ស្ពៃ ស៊ុត ថ្លើម ទឹកដោះគោ និងធញ្ញជាតិជាដើម។

2-វីតាមីន B2 ៈ ជាវីតាមីនដែលអាចជួយឱ្យរាងកាយលូតលាស់បានល្អ មានសុខភាពល្អ និងផ្តល់ថាមពលដល់រាងកាយ។ ជួយពង្រឹកប្រព័ន្ធភាពស៊ាំ បន្ថយភាពហត់នឿយ ធុញថប់ និងស្ពឹកស្រពន់ជាដើម។វត្តមានរបស់វីតាមីន B2 ជួយការពារមិនឱ្យកើតមានបញ្ហាប្រេះបែកបបូរមាត់ សក់ស្ងួត ស្បែកជ្រួញ និងរមាស់ស្បែកជាដើម។ ប្រភេទអាហារដែលសម្បូរវីតាមីនប្រភេទនេះមានដូចជា Cheeseទឹកដោះគោ បន្លែបៃតង ស៊ុត ធញ្ញជាតិ សណ្តែកបាយ អាល់ម៉ុន និងផ្សិតជាដើម។

3-វីតាមីន B6 ៈ បន្ថែមការចងចាំ កាត់បន្ថយជំងឺបេះដូង អស់កម្លាំង ជំនួយខួរក្បាល សម្រួលដល់កម្រិតជាតិស្ករក្នុងឈាម បន្ថយអាការចាញ់កូន និងការពារជំងឺខ្វះឈាម។ចេក សាច់ ផ្លែប៊័រ សណ្តែក ត្រី គ្រាប់ធញ្ញជាតិ គឺជាអាហារដែលមានផ្ទុកវីតាមីនប្រភេទនេះច្រើនជាងគេ។

4-វីតាមីន B7 ៈ វីតាមីនប្រភេទនេះត្រូវការ ដើម្បីភាពរីកលូតលាស់នៃកោសិកាស្បែក និងការសំយោគរបស់អាស៊ីតខ្លាញ់។ វាជួយរក្សាសំណើមឱ្យសក់ និងស្បែក ជួយជុំរុញការលូតលាស់នៃសក់ ព្យាបាលបញ្ហាក្រចកឆាប់បាក់។ វីតាមីនB7 ក៏ជាតម្រូវការសម្រាប់ការលូតលាស់នៃឆ្អឹង និងជួយគ្រប់គ្រងកម្រិតកូឡេស្តេរ៉ូលផងដែរ។ អាហារមួយចំនួនដែលសម្បូរវីតាមីនប្រភេទនេះមានដូចជា ត្រី ដំឡូងជ្វា អាល់ម៉ុន ការ៉ុត ចេក ផ្លែឈើពណ៌លឿង បន្លែបៃតង សណ្តែក ទឹកដោះគោ យ៉ា-អួរ និងម្ទេស…។

5-វីតាមីន B9 ៈ សំខាន់ណាស់សម្រាប់ស្ត្រីយើង ព្រោះវាជួយការពារជំងឺបេះដូង សំពោធឈាមឡើងខ្ពស់ Alzheimer អស់កម្លាំង មហារីក និងការចងចាំថយចុះជាដើម។ក្រៅពីនោះវាជួយដល់សុខភាពខួរក្បាល ព្រមទាំងជួយដល់ការលូតលាស់របស់ទារកក្នុងផ្ទៃ
ផងដែរ។ B9 មាននៅក្នុងអាហារមួយចំនួនដូចជា បន្លែបៃតង ទឹកក្រូច ត្រសក់ស្រូវ ស្ត្រូប៊ឺរី ស៊ុត និងសណ្តែក…។

6-វីតាមីន B12 ៈ វីតាមីនផ្សេងទៀតដែលស្ត្រីគួរទទួលទានគឺ B12 ដែលមានសារសំខាន់ក្នុងការជួយបំលែងអាហារសំយោគប្រូតេអីុន។ វីតាមីននេះជួយដល់បេះដូងនិងខួរក្បាលមិនឱ្យកើតមានបញ្ហាខ្វះឈាម។ អាចរកបាននៅក្នុងត្រី សាច់ ទឹកដោះគោ ស៊ុត និងយ៉ាអួជាដើម។

7-វីតាមីន E ៈ សំខាន់សម្រាប់ស្បែក សក់ និងគុណប្រយោជន៍ជាច្រើនទៀត។ វាមាននៅក្នុងស្ពៃ ប្រេងពោត ប្រេងអូលីវ គ្រាប់ផ្កាឈូករ័ត្ន ស៊ុត និងត្រសក់…។

8-វីតាមីន C ៈ ជួយបន្ថយឱកាសនៃការកើតជំងឺមហារីក ជួយបង្កើតកោសិកាឈាមក្រហម ពង្រឹកប្រព័ន្ធការពារ បង្កើតសមត្ថភាពក្នុងការព្យាបាលរាងកាយ។ ខាត់ណាខៀវ ក្រូចថ្លុង គីវី ក្រូច ត្របែក ដំឡូងបារាំង ប៉េងប៉ោះ និងស្ត្រូប៊ឺរី … សុទ្ធតែជាអាហារដែលសម្បូរទៅដោយវីតាមីន C។

9-វីតាមីន D ៈ គឺជាភ្នាក់ងារបឺតស្រូបកាល់ស្យូម ដែលដើរតួយ៉ាងសំខាន់ក្នុងការជួយពង្រឹងឆ្អឹងឱ្យរឹងមាំ និងគុណប្រយោជន៍ជាច្រើនទៀត។ ខ្លាញ់ត្រី ទឹកដោះគោ ថ្លើម និងស៊ុត… ជាអាហារដែលមានវីតាមីនប្រភេទនេះខ្ពស់ជាងគេ។

10-វីតាមីន K ៈ ដើរតួយ៉ាងសំខាន់ក្នុងការពង្រឹងឆ្អឹង សម្រួលឈាម បន្ថយឱកាសកើតជំងឺបេះដូង និងជួយដល់ប្រព័ន្ធការពាររាងកាយផងដែរ។ សម្បូរនៅក្នុង ស្ពៃក្តោប ត្រសក់ ម្ទេសចេក ប៉េងប៉ោះ ប្រេងសណ្តែក និងខ្លាញ់ត្រី….។

នៅពេលដែលរាងកាយរបស់អ្នកមានវីតាមីនទាំង10ប្រភេទនេះគ្រប់គ្រាន់ហើយនោះ ធានាថារាងកាយរបស់អ្នកពិតជាប្រកបដោយសុខភាពល្អ និងមានសម្រស់ស្រស់ស្អាតជាមិនខាន៕

November 7, 2017

ទម្លាប់ 3 យ៉ាងនៃភាពជោគជ័យ ដែលពួកអ្នកមាននាំគ្នាធ្វើជាប្រចាំ

តើធ្លាប់នឹកឆ្ងល់ដែរឬទេថា…មនុស្សដែលជួបនឹងភាពជោគជ័យយ៉ាងច្រើននាបច្ចុប្បន្ននេះ តើពួកគេមានផ្នត់គំនិត និងទស្សនៈជីវិតយ៉ាងណាខ្លះ ទើបធ្វើឱ្យអាចធ្វើដំណើរទៅដល់ចំណុចជោគជ័យនោះបានដូចបំណងបែបនេះ?។ តាមរយៈការដែលយើងបានរៀនយល់ដឹងពីបណ្ដាអ្នកមាន និងមានកេរ្តិ៍ឈ្មោះល្បីៗជាច្រើន ដែលធ្លាប់ឆ្លងកាត់ជីវិត និងឧបសគ្គដ៏ច្រើនទម្រាំនឹងអាចងើបត្រដែតឡើងក្លាយជាមនុស្សដែលទទួលបានជោគជ័យទាំងនោះរួចមក ធ្វើឱ្យយើងបានដឹងថា ពួកគេមានទម្លាប់មួយចំនួនដែលមិនសូវជាខុសប្លែកពីគ្នាប៉ុន្មានឡើយ។

នោះគឺ កិច្ចការងារប្រចាំថ្ងៃដែលយើងអាចប្រទះឃើញជាញឹកញាប់ គឺការគ្រប់គ្រងចាត់ចែងពេលវេលាក្នុងតម្លៃថោកឱ្យទទួលបានប្រយោជន៍យ៉ាងច្រើន និងដែលសំខាន់គឺ មិនចាំបាច់យកលុយទៅទិញមកទៀតផង។ បើអ្នកណាចង់សាកល្បងធ្វើជាមនុស្សម្នាក់ក្នុងចំណោមពួកអ្នកទទួលបានជោគជ័យទាំងនោះឱ្យបានម្ដងនោះ សាកល្បងនាំយកគន្លឹះសំខាន់ 3 យ៉ាងខាងក្រោមនេះទៅសាកល្បងកែច្នៃប្រើជាមួយជីវិតប្រចាំថ្ងៃលមើលក៏បាន…។

1 . ការហ្វឹកសមាធិ

ជារឿងដ៏គួរឱ្យចាប់អារម្មណ៍មួយក្នុងក្រុមមនុស្សដែលជោគជ័យយ៉ាងមហាសាលទាំងនោះ។ ការដាក់ចិត្តឱ្យស្ងប់នឹង និងអាចប្រឈមជាមួយគ្រប់ស្ថានការណ៍បានគឺជាការសាងថាមពលផ្លូវចិត្តឱ្យខ្លួនឯងក្លាយជាមនុស្សដែលមានភាពក្លាហាន និងមានសតិបញ្ញាស្មារតីច្រើនគ្រប់គ្រាន់ក្នុងការសម្រេចចិត្តជាមួយការងារធំៗនៅចំពោះមុខឱ្យត្រង់ចំៗគោលដៅខ្លាំងបំផុត ដូច្នេះហើយទើបការហ្វឹកសមាធិបានក្លាយជាអ្នកជួយលើកកម្ពស់ថាមពលខួរក្បាល និងភាពស្ងប់ខាងផ្លូវចិត្ត មិនថាប្រឈមជាមួយបញ្ហាបែបណាក៏ដោយ។ បើសិនសាកល្បងហ្វឹកហាត់អង្គុយតាំងសមាធិជាប្រចាំ យើងនឹងអាចមានឱកាសឈានទៅមុខក្នុងតួនាទីមុខតំណែងការងារ និងទទួលបានជោគជ័យកាន់តែងាយស្រួលឡើង។

2 . ការភ្ញាក់ពីព្រឹកព្រលឹម

ភ្ញាក់មុន បានលុយមុន មានមុន…ពាក្យនេះច្រើនតែត្រូវបាននិយាយនៅក្នុងក្រុមអ្នកមាន ឬក្រុមអ្នកជោគជ័យ។ អ្នកដែលភ្ញាក់ឡើងមកធ្វើការតាំងពីព្រឹកព្រលឹម ច្បាស់ជាមានពេលវេលាច្រើនក្នុងការធ្វើការងារ តាំងពីការរៀបចំផែនការយ៉ាងសន្សឹមៗយ៉ាងហ្មត់ចត់ មានពេលវេលាច្រើនគ្រប់គ្រាន់ក្នុងការធ្វើអ្វីផ្សេងៗឱ្យសម្រេចទៅបានច្រើនជាងអ្នកដែលគេងដល់ថ្ងៃបានភ្ញាក់។ ការភ្ញាក់ឡើងនៅពេលព្រឹកថែមទាំងជួយឱ្យពួកគេបានជួបជាមួយនឹងអំឡុងពេលដ៏សែនវិសេស រីកស្រស់ស្រាយដោយធាតុអាកាសដ៏សែនបរិសុទ្ធ ជួយឱ្យខួរក្បាលត្រូវបានជំរុញ និងធ្វើការបានយ៉ាងមានប្រសិទ្ធភាព។ សាកល្បងនាំគ្នាសង្កេតមើលងាយៗថា អ្នកដែលគេងដល់ថ្ងៃទើបភ្ញាក់ និងមិនចង់ងើបចេញពីគ្រែនោះ ដល់ពេលវេលាធ្វើការ ពួកគេច្រើនតែច្របូកច្របល់ជ្រួលច្រាល និងចាប់ផ្ដើមចាប់ការងារដែលត្រូវធ្វើមិនសូវជាត្រូវប៉ុន្មានឡើយ ព្រោះរវល់តែបារម្ភថា ពេលវេលាធ្វើការក្នុងមួយថ្ងៃនោះនឹងត្រូវប្រើប្រាស់អស់ជាមុន។

3 . ចេះនិយាយបដិសេធដោយពាក្យថា “ទេ” យ៉ាងសមរម្យ

ការនិយាយបដិសេធដោយពាក្យមួយម៉ាត់នេះសម្រាប់រឿងខ្លះដែលមិនមានតម្លៃគ្រប់គ្រាន់ជាមួយការរស់នៅ គ្រប់យ៉ាងអាចនឹងមាន 2 ជម្រើសឱ្យយើងជ្រើសរើស។ នៅពេលបានអ្វីមួយមក អ្វីមួយទៀតក៏នឹងបាត់បង់ទៅ ដូច្នេះការបដិសេធយ៉ាងឆ្លាតវៃគឺជាការនៅតែគ្រប់គ្រងត្រឹមតែរឿងណាមួយដែលមានតម្លៃ។ សម្លឹងមើលឱ្យធ្លុះថា តើរឿងណាដែលគួររក្សាទុក និងរឿងណាដែលគួរតែលែងចោល ទោះជាវានៅមានប្រយោជន៍ខ្លះក៏ដោយ តែនៅពេលប្រៀបធៀបជាមួយអនាគតហើយនោះ យើងអាចនឹងត្រូវជ្រើសរើសត្រឹមតែរឿងមួយដែលល្អបំផុតតែមួយគត់ប៉ុណ្ណោះ ទោះជានៅស្ដាយរឿងមួយទៀតនោះក៏ដោយ។

ឱកាស និងភាពសំណាងល្អមិនដែលបានមកដោយសារជោគវាសនា ឬព្រហ្មលិខិតនោះទេ ទោះជាយើងដើរចេញមកពីផ្លូវនៃជីវិតផ្សេងគ្នាក៏ដោយ តែការឈានឆ្ពោះទៅរកភាពជោគជ័យអាចកើតឡើងបានតាមរយៈការព្យាយាម មិនមែនដោយការគូសដំណើរផ្លូវឱ្យរបស់ព្រះជាម្ចាស់ ឬពីអ្វីម្យ៉ាងដែលមើលមិនឃើញនោះទេ ដូច្នេះចូរក្រោកឡើងមកផ្លាស់ប្ដូរខ្លួនឯង សាងថាមពលវិជ្ជមាន និងធ្វើអ្វីដែលល្អបំផុតក្នុងរៀងរាល់ថ្ងៃដើម្បីគោលដៅរបស់ខ្លួនឯង…៕

រៀបរៀងដោយ តាវ៉ែនតា

November 7, 2017

សុខភាពកុមារជារឿងសំខាន់សម្រាប់អនាគតសង្គម

សុខភាព និងការរីកលូតលាស់របស់កុមារតូចៗជាផ្នែកមួយដ៏សំខាន់សម្រាប់អនាគតរបស់សង្គម និងប្រទេសជាតិ ព្រោះកុមារជាអ្នកបន្តវេននៅក្នុងសង្គមនាថ្ងៃអនាគត ហើយធនធានមនុស្សនៅថ្ងៃខាងមុខគឺត្រូវជំនួសដោយកុមារៗក្នុងពេលបច្ចុប្បន្ននេះទាំងស្រុង។

ប្រធានអង្គការកម្មវិធីអភិវឌ្ឍន៍ធនធានយុវជនកម្ពុជា លោក ជាង សុខា បានលើកឡើងថា កុមារជាផ្នែកដ៏សំខាន់សម្រាប់ប្រទេសកម្ពុជា ព្រោះពួកគេនឹងក្លាយជាយុវជននាថ្ងៃខាងមុខ។ អ្វីដែលជាបញ្ហាប្រឈមរបស់កុមារបច្ចុប្បន្ន គឺបញ្ហាសុខភាព ព្រោះនាពេលបច្ចុប្បន្ននេះស្ត្រីដែលជាមាតាជាច្រើនបាន និងកំពុងធ្វើការងារនៅតាមរោងចក្រសហគ្រាស និងកន្លែងជាច្រើនទៀតដែលពេលខ្លះសុខភាពរបស់គាត់មានលក្ខណៈទន់ខ្សោយ ដែលជាហេតុធ្វើឱ្យកូនតូចៗដែលកើតមកអាចមានលក្ខណៈទន់ខ្សោយតាមដែរ។

លោក ជាង សុខា បាននិយាយថា៖ «យើងគ្រប់គ្នាតែងតែពឹងពាក់លើកុមារជំនាន់ក្រោយថា អាចនឹងមានលក្ខណៈរឹងមាំ តែពេលខ្លះយើងមើលឃើញថា ពួកគេអាចនឹងមានកត្តាប្រឈមមួយចំនួនដែលត្រូវយកចិត្តទុកដាក់»។

Cambodian school children head back their home after morning school time at Tnoat Kpoh village in the outskirt of Phnom Penh, Cambodia, Monday, March 18, 2013. (AP Photo/Heng Sinith)

ស្របជាមួយគ្នានេះដែរ អង្គការ Unicef ប្រចាំនៅកម្ពុជាបានរាយការណ៍ថា កង្វះអាហារូបត្ថម្ភជាបញ្ហាមួយដែលធ្វើឱ្យការលូតលាស់របស់រាងកាយ និងបញ្ញាស្មារតីរបស់កុមារមានការអន់ថយ។ ការធានាថាស្ត្រីមានផ្ទៃពោះ និងកុមារទទួលបានអាហារដែលមានជីវជាតិ និងការថែទាំសុខភាពដែលមានគុណភាព អាចផ្តល់ផលវិជ្ជមានដល់ការលូតលាស់របស់កុមារដែលឈានទៅកាន់ជីវិតដែលមានសុខភាពល្អ និងសុភមង្គល។

អង្គការដដែលនេះបានបញ្ចាក់ផងដែរថា ចាប់ពីឆ្នាំ 2000 ដល់ឆ្នាំ 2014 ភាគរយនៃកុមារមិនគ្រប់ទម្ងន់ខ្លួនបានថយចុះពី 39% មក 24% ហើយកុមារដែលមានជំងឺក្រិសក្រិនបានថយចុះពី 50% មក 32% ប៉ុន្តែការថយចុះនេះក៏មានន័យដែរថា មានកុមារម្នាក់ក្នុងចំណោមបួននាក់នៅតែមិនគ្រប់ទម្ងន់ខ្លួននៅកម្ពុជា។ ហើយកុមារម្នាក់ក្នុងចំណោមបីនាក់មានកម្ពស់ទាបជាងអាយុ ដែលនេះជាសញ្ញាបញ្ជាក់អំពីកង្វះអាហារូបត្ថម្ភ៕

November 7, 2017

ជម្រើសថ្មី! ក្រសួងត្រៀមរៀបចំដឹកអ្នកដំណើរតាមផ្លូវទឹកបន្ថែមពីលើឡានក្រុង

ភ្នំពេញ៖ ដើម្បីផ្តល់ភាពងាយស្រួល និងកាត់បន្ថយការកកស្ទះចរាចរណ៍ក្នុងការធ្វើដំណើរ ក្រសួងសាធារណការ និងដឹកជញ្ជូនបាននិងកំពុងសាងសង់កំពង់ផែនៅតាមចំណុចរថយន្តក្រុងនានាដែលនៅជាប់មាត់ទន្លេដើម្បីឱ្យប្រជាពលរដ្ឋអាចធ្វើដំណើរតាមផ្លូវទឹកជំនួសផ្លូវគោកបាន។

ថ្លែងទៅកាន់អង្គប្រជុំប្រចាំសប្តាហ៍ជាមួយមន្ត្រីជាន់ខ្ពស់ និងមន្ត្រីជំនាញជាច្រើនរូប ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានលើកឡើងពីសក្ដានុពលនៃការអភិវឌ្ឍវិស័យដឹកជញ្ជូនអ្នកដឹកដំណើរតាមផ្លូវទឹក ពិសេសតាមបណ្តាញដៃទន្លេដែលហូរកាត់ក្នុងភូមិសាស្ត្ររាជធានីភ្នំពេញ និងការពង្រីកវិស័យនេះឱ្យបានទូលំទូលាយ បញ្ចៀសការកកស្ទះចរាចរណ៍ ក៏ដូចជាកាត់បន្ថយគ្រោះថ្នាក់ចរាចរណ៍ និងឱ្យប្រកបដោយចីរភាពផងដែរ។

ដើម្បីឱ្យគម្រោងនេះដំណើរការទៅបានឆាប់រហ័ស ឯកឧត្ដមទេសរដ្ឋមន្ត្រី ក៏បានជំរុញឱ្យអគ្គនាយកដ្ឋានដឹកជញ្ជូនផ្លូវទឹកពន្លឿនគម្រោងដឹកជញ្ជូនអ្នកដំណើរតាមផ្លូវទឹកពីរាជធានីភ្នំពេញទៅខេត្តកណ្ដាលឱ្យបានមុនពិធីបុណ្យចូលឆ្នាំថ្មីប្រពៃណីខែ្មរខាងមុខ ដោយចំណតកំពង់ផែនីមួយៗត្រូវមានការតភ្ជាប់ជាមួយនឹងចំណតរថយន្តក្រុង ដើម្បីបង្កភាពងាយស្រួលដល់អ្នកធ្វើដំណើរឡើងចុះបន្ត។

គួរបញ្ជាក់ផងដែរថា ដោយសារការកកស្ទះផ្លូវកើតមានជាអន្លើៗ ជារៀងរាល់ថ្ងៃក្នុងភូមិសាស្ត្ររាជធានីភ្នំពេញ ប្រជាពលរដ្ឋរស់នៅក្នុងទីក្រុងហាក់មិនសូវមានការគាំទ្រក្នុងការធ្វើដំណើរតាមរថយន្តក្រុងនោះឡើយ ដោយហេតុផលតែម្យ៉ាងគត់ គឺខ្លាចទៅធ្វើការមិនទាន់ម៉ោង។ ដូច្នេះគេរំពឹងថា បើសិនជាគម្រោងដឹកជញ្ជូនតាមផ្លូវទឹកនេះដាក់ឱ្យដំណើរការបាននៅមុនពេលចូលឆ្នាំថ្មីខាងមុខនោះ ប្រាកដជានឹងមានអ្នកដំណើរចាប់អារម្មណ៍ច្រើន ដោយសារការធ្វើដំណើរតាមផ្លូវទឹកមិនមានការកកស្ទះដូចធ្វើដំណើរតាមផ្លូវគោកហ្នឹងឯង៕

November 7, 2017

ក្រសួងពាណិជ្ជកម្មជំរុញឱ្យវិនិយោគិនបង្កើនការទិញដំឡូងមីឱ្យកាន់តែច្រើន

ភ្នំពេញ៖ ថ្លែងនៅក្នុងពិធីសម្ពោធជាផ្លូវការនៃ “វេទិកាធុរកិច្ច និងវិនិយោគដំឡូងមី” ដែលរៀបចំឡើងកាលពីព្រឹកថ្ងៃទី6 ខែវិច្ឆិកា ឆ្នាំ2017 នៅឯមជ្ឈមណ្ឌលសន្និសីទសុខាអង្គរ ខេត្តសៀមរាប ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានអំពាវនាវដល់វិស័យឯកជន និងស្ថាប័នពាក់ព័ន្ធឱ្យបង្កើនការវិនិយោគលើការអភិវឌ្ឍចង្វាក់តម្លៃដំឡូងមី ដើម្បីធានានិរន្តរភាពពាណិជ្ជកម្មដំឡូងមីនៅកម្ពុជា។

ឯកឧត្តមរដ្ឋមន្ត្រីបានមានប្រសាសន៍ថា ដំឡូងមី គឺជាពាណិជ្ជកម្មដ៏សំខាន់ និងមានសក្តានុពលបំផុតដែលអាចបង្កើតការងារពហុវិស័យជូនប្រជាជន និងនាំមកនូវប្រាក់ចំណូលយ៉ាងច្រើនសម្រាប់សេដ្ឋកិច្ចជាតិ “វាតម្រូវឱ្យមានការវិនិយោគកាន់តែច្រើនពីវិស័យឯកជន និងភាគីពាក់ព័ន្ធលើខ្សែចង្វាក់តម្លៃរាប់តាំងពីវិទ្យាស្ថានស្រាវជ្រាវ និងអភិវឌ្ឍន៍កសិកម្ម ក្រុមហ៊ុនផលិតជី និងគ្រាប់ពូជ អ្នកផលិត និងកែច្នៃម្ហូបអាហារ ភ្នាក់ងារផ្សព្វផ្សាយទីផ្សារ និងជំរុញការនាំចេញ ព្រមទាំងក្រុមហ៊ុនភ័ស្តុភារ និងដឹកជញ្ជូន។

បន្ថែមលើសនេះ ឯកឧត្តម ប៉ាន សូរស័ក្តិ បានគូសបញ្ជាក់អំពីទំនាក់ទំនងរវាងពាណិជ្ជកម្ម និងការវិនិយោគ និងបានបង្ហាញអំពីដំណោះស្រាយសមស្របចំពោះការផ្លាស់ប្តូរចំនួន3 ដែលកម្ពុជាកំពុងប្រឈមសព្វថ្ងៃនៅក្នុងវិស័យដំឡូងមី រួមមាន៖

1.ការកើនឡើងយ៉ាងឆាប់រហ័សរបស់ប្រទេសកម្ពុជា និងរបៀបដែលកម្ពុជាអាចទាញយកផលប្រយោជន៍ពាណិជ្ជកម្ម និងលំហូរវិនិយោគ ដើម្បីពន្លឿនកំណើនលូតលាស់ និងការអភិវឌ្ឍនៅក្នុងសេដ្ឋកិច្ចពិភពលោក។

2.របៀបដែលពាណិជ្ជកម្ម និងការវិនិយោគត្រូវបានផ្សារភ្ជាប់គ្នាកាន់តែខ្លាំងឡើងនៅក្នុងសេដ្ឋកិច្ចដំឡូងមី។

និង 3.របៀបដោះស្រាយបញ្ហាប្រឈម ចេញពីទស្សនវិស័យគោលនយោបាយ។

ជាមួយគ្នានេះដែរឯកឧត្តម នីក ប៊ឺរេសហ្វ៉ត (Nick Beresford) នាយកកម្មវិធីអភិវឌ្ឍន៍សហប្រជាជាតិ (UNDP) បានមានប្រសាសន៍ថា ផលិតកម្មដំឡូងមីបានកើនឡើងយ៉ាងឆាប់រហ័ស ដោយសារតែមានតម្រូវការខ្ពស់ពីទីផ្សារសកលដើម្បីកែច្នៃជាផលិតផលសម្រេចផ្សេង។ កត្តានេះ បានផ្តល់នូវប្រភពកំណើនថ្មីសម្រាប់កម្ពុជាឱកាសសម្រាប់អភិវឌ្ឍតំបន់ជនបទ និងការបង្កើនប្រាក់ចំណូលប្រជាជនដែលមិនត្រឹមតែសម្រាប់ឧស្សាហកម្មនោះទេ ប៉ុន្តែក៏សម្រាប់គ្រួសារកសិករដែលមានប្រាក់ចំណូលទាបផងដែរ “យើងមើលឃើញករណីអាជីវកម្មច្បាស់លាស់មួយ សម្រាប់ការវិនិយោគវិស័យឯកជនលើវិស័យដំឡូងមីនៅក្នុងប្រទេសកម្ពុជាដែលផ្តល់តម្លៃប្រកួតប្រជែងខ្ពស់សម្រាប់ដំឡូងមីឆៅ និងកែច្នៃ។ ប្រទេសនេះសម្បូរដីមានជីជាតិ អាចផលិតបានដំឡូងមី 20 តោនក្នុងមួយហិកតា ខ្ពស់ជាងឧស្សាហកម្មស្តង់ដារទាំង12ផ្សេងទៀត” ។

ឯកឧត្តមនាយកអង្គការ UNDP ក៏បានសង្កត់ធ្ងន់ពីតួនាទីសំខាន់របស់រាជរដ្ឋាភិបាលកម្ពុជា ជាពិសេសក្រសួងពាណិជ្ជកម្មក្នុងការផ្តល់នូវបរិយាកាសចាំបាច់សម្រាប់កាត់បន្ថយហានិភ័យ និងស្រូបទាញការវិនិយោគឯកជនកម្រិតខ្ពស់ដូចជា៖ ការបង្កើតគោលនយោបាយច្បាស់លាល់ និងការវិនិយោគសាធារណៈនៅក្នុងវិស័យសំខាន់ៗដើម្បីតភ្ជាប់កសិករ និងក្រុមហ៊ុនឯកជនជាមួយកាលានុវត្តភាពសេដ្ឋកិច្ច។

សូមបញ្ជាក់ថា ក្រោមការសហការ និងគាំទ្រពីកម្មវិធី UNDP “វេទិកាធុរកិច្ច និងវិនិយោគដំឡូងមី” ដែលបានរៀបចំឡើងរយៈពេល2ថ្ងៃនេះបានទាក់ទាញការចូលរួមយ៉ាងច្រើនពីមន្ត្រីរាជរដ្ឋាភិបាល សេដ្ឋវិទូ អ្នកជំនាញកសិកម្ម តំណាងដៃគូអភិវឌ្ឍន៍ និងវិស័យឯកជនប្រមាណ 200នាក់ក្នុងគោលបំណងសំខាន់គឺដើម្បីពិភាក្សា និងស្វែងរកធាតុចូល ដើម្បីរៀបចំគោលនយោបាយ និងយុទ្ធសាស្ត្រសំដៅអភិវឌ្ឍវិស័យដំឡូងមីកម្ពុជា ដែលជាដំណាំមានសក្តានុពលពាណិជ្ជកម្មខ្ពស់បន្ទាប់ពីវិស័យស្រូវ-អង្ករ៕

November 7, 2017

ក្លិបញញួរធំ West Ham United តែងតាំងគ្រូបង្វឹកថ្មីក្នុងកិច្ចសន្យាសាកល្បង

ក្លិបញញួរធំ West Ham United នឹងត្រូវតែងតាំងលោក David Moyes ក្នុងកិច្ចសន្យាសាកល្បងរយៈពេល6ខែ ដោយផ្តល់តួនាទីឲ្យលោកទទួលខុសត្រូវក្នុងការស្រោចស្រង់ឲ្យពួកគេគេចឲ្យផុតពីគ្រោះថ្នាក់នៃការធ្លាក់ចូលក្នុងតំបន់កាត់ចោល ក្រោយពីអស់ការជឿជាក់ទៅលើសមត្ថភាពរបស់លោក Slaven Bilic ក្នុងការសង្គ្រោះពួកគេ។

ក្លិបនេះសង្ឃឹមថា លោក Moyes អតីតគ្រូបង្វឹករបស់ក្លិប Sunderland អាចដឹកនាំការហ្វឹកហាត់នៅព្រឹកថ្ងៃអង្គារនេះ ខណៈដែលលោក Alan Irvine, Chris Woods និងលោក Stuart Pearce អាចនឹងចូលរួមធ្វើការជាមួយនឹងលោក Moyes ក្នុងនាមជាជំនួយការគ្រូបង្វឹក។ លោក Moyes នឹងទទួលបានការបន្តកុងត្រាថ្មីរយៈពេល2ឆ្នាំ ប្រសិនបើគាត់អាចជួយឲ្យក្លិប West Ham រក្សាវត្តមានក្នុងក្របខ័ណ្ឌ Premier League បាន។ លោក Bilic ដែលកិច្ចសន្យារបស់លោកនឹងត្រូវផុតកំណត់នៅរដូវក្តៅក្រោយនោះ ត្រូវបានបណ្តេញចេញកាលពីព្រឹកថ្ងៃចន្ទ ក្រោយពីជួបលទ្ធផលដ៏សែនខកចិត្តជាបន្តបន្ទាប់នៅរដូវកាលនេះ ដែលបានធ្វើឲ្យក្លិប West Ham ស្ថិតក្នុងចំណាត់ថ្នាក់លេខ18 ហើយពួកគេដណ្តើមបានជ័យជម្នះត្រឹមតែ2លើកគត់ ពីការប្រកួតក្របខ័ណ្ឌ Premier League 11លើកចុងក្រោយរបស់ពួកគេ។ បើទោះបីលោក David Gold និងលោក David Sullivan ដែលជាម្ចាស់ក្លិបរបស់ West Ham ធ្លាប់បានសង្ឃឹមថា ការផ្តល់ពេលវេលាឲ្យអ្នកចាត់ការទូទៅរូបនេះ នឹងទទួលបានលទ្ធផលល្អ ក៏ដោយ ប៉ុន្តែ ការរងបរាជ័យយ៉ាងចាស់ដៃក្នុងលទ្ធផល 4-1 ក្រោមស្នាដៃក្រុម Liverpool នៅកីឡដ្ឋាន London បានក្លាយជាចំណុចកាត់សេចក្តីរបស់ម្ចាស់ក្លិបនេះតែម្តង។ លោក Nikola Jurcevic, Edin Terzic, Julian Dicks និងលោក Miljenko Rak ដែលជាគ្រូបង្វឹកជំនួយរបស់អ្នកចាត់ការទូទៅសញ្ជាតិក្រូអាស៊ីរូបនេះ ក៏ត្រូវចាកចេញផងដែរ៕

ប្រភពី៖ The Guardian

November 7, 2017

ស្វែងយល់ពីលំហាត់ប្រាណបែបយូហ្គា ឬយោគៈ

យូហ្គា ឬយោគៈ ត្រូវបានគេស្គាល់ថា ជាការធ្វើលំហាត់ប្រាណដ៏មានប្រយោជន៍យ៉ាងលើសលប់ចំពោះសុខភាពរាងកាយ ផ្លូវចិត្ត ស្មារតី ជាពិសេសអាចមានប្រសិទ្ធភាពក្នុងការចូលរួមព្យាយាមជំងឺផ្លូវចិត្តបានយ៉ាងប្រសើរ ហើយក៏កំពុងមានប្រជាប្រិយភាពនាពេលបច្ចុប្បន្ននេះផងដែរ ដែលសូម្បីតែក្រសួងទេសចរណ៍ ក៏មានបំណងបង្កើតទីតាំងសម្រាប់ហាត់ប្រាណបែបយូហ្គានេះនៅតាមបណ្តាតំបន់ទេសចរណ៍នានាថែមទៀតផង។ តើប្រិយមិត្តអ្នកអានធ្លាប់បានជ្រាបទេថា យូហ្គា ឬយោគៈ នេះមានប្រភពមកណា អ្នកណាជាអ្នករកឃើញ និងបង្កើតឡើង ហើយគួរហាត់បែបណា នៅកន្លែងណា ទើបមានអត្ថប្រយោជន៍ចំពោះសុខភាព? សូមតាមដានលម្អិតជាមួយអត្ថបទនៅខាងក្រោមនេះ ក្រោមការបកស្រាយបញ្ជាក់ពីសំណាក់អ្នកជំនាញ ដែលជាគ្រូបង្ហាត់នៅ អាសាហា ហ្វោនដេសិន (Azahar Foundation-Phnom Penh) ដែលមានទីតាំងស្ថិតនៅផ្ទះលេខ 39 ផ្លូវ 21 សង្កាត់ទន្លេបាសាក់ ខណ្ឌចំការមន រាធានីភ្នំពេញ។

1 និយមន័យ យោគៈ
បើយោងតាមការសិក្សាស្រាវជ្រាវមួយបានអោយដឹងថា យោគៈ គឺជាសាលាមួយដែលគេសិក្សាពីទស្សនៈរបស់ឥណ្ឌា ចាប់តាំងពីសហវត្សទី3មុន គ.ស។ ចំណែកពាក្យថា “យូហ្គា” មកពីភាសាសំស្ក្រឹតបុរាណមួយដែលមានន័យថា ការផ្សារភ្ជាប់គ្នារវាងបេះដូង ចិត្ត
និងវិញ្ញាណ។ សម្រាប់ការហាត់ប្រាណតាមបែបយោគៈ គឺជាការបង្កើតទំនាក់ទំនងរវាងផ្នែករាងកាយទៅនឹងផ្នែកខាងក្នុងរបស់យើង។ ក្នុងន័យមួយទៀតបានលើកឡើងថា យោគៈ គឺជាការបង្កើតឱ្យមានទំនាក់ទំនងរវាងខ្លួនយើងទៅនឹងធម្មជាតិ ឫមជ្ឈដ្ឋានដែលនៅជុំវិញខ្លួនរបស់យើង។ការអនុវត្តលំហាត់ប្រាណ យោគៈ ប្រៀបបានទៅនឹងការដាក់វិន័យសម្រាប់រាងកាយរបស់យើងតាមវិធីសាស្ត្រ និងបច្ចេកទេសផ្សេងៗគ្នា។ ដោយឡែកសម្រាប់បច្ចេកទេសទាំងនោះ រួមមានការប្រើឥរិយាបថនៃរាងកាយ ដែលត្រូវបានគេហៅឈ្មោះថា អាសាណា (ASANAS) និងការប្រើប្រាស់ចលនាដង្ហើម ការធ្វើសមាធិ ការសម្រាករាងកាយ ចិត្ត ត្រូវបានគេប្រើជាមួយក្បាច់ ប្រាណាយាម៉ា (Pranayama)។ ក្នុងន័យម្យ៉ាងទៀតការធ្វើលំហាត់ប្រាណ យោគៈ គឺជាវិធីសាស្ត្រមួយដែលប្រាប់ឱ្យយើងបានស្គាល់ច្បាស់ពីខ្លួនឯង ដោយឆ្លើយតបទៅនឹងសំណួរមួយចំនួនដូចជា តើខ្ញុំជានរណា? ខ្ញុំមកពីណា? តើខ្ញុំនឹងទៅទីណា? តើខ្ញុំគួរធ្វើអ្វី? ក្នុងន័យនេះយើងអាចយល់បានថា ការអនុវត្តយោគៈ គឺជាការឱ្យយើងបានចងចាំពីខ្លួនយើងឡើងវិញ។

2 ផលប្រយោជន៍ខាងរាងកាយ និងសីលធម៌
ពិតណាស់ការធ្វើលំហាត់ប្រាណតាមបែបយោគៈ វាជាដំណោះស្រាយល្អសម្រាប់បន្ធូរបន្ថយភាពតានតឹង និងបង្កើតទំនាក់ទំនងជាមួយអ្នកដទៃ។ យោគៈ គឺជាវ៉ិចទ័រដ៏ល្អនៃការតាមដានលើសុខុមាលភាព។ ការអនុវត្តរបស់វាមានប្រសិទ្ធភាពយ៉ាងល្អទាំងផ្នែករាងកាយ និងបញ្ញាស្មារតី វាអាចជួយសម្រួលដល់ប្រភេទផ្សេងៗនៃជំងឺដូចជា ជំងឺលើសឈាម បញ្ហាផ្លូវដង្ហើម ជំងឺផ្លូវដង្ហើម ឈឺក្បាលប្រកាំង ឈឺខ្នង ធ្លាក់ទឹកចិត្ត និងថប់បារម្ភជាដើម។ នៅពេលដែលយើងអនុវត្តយោគៈ វាមានន័យថា យើងបង្កើតឱ្យមានគំនិតប្រាជ្ញាល្អ ភាពរីករាយ និងមេត្តាធម៌ពិតប្រាកដ។

3 អំពី អាសាហា ហ្វោនដេសិន
អាសាហា ហ្វោនដេសិន បានចាប់ផ្តើមការងាររបស់ខ្លួននៅក្នុងប្រទេសកម្ពុជាចាប់តាំងពីឆ្នាំ2008 ដែលមានលោកស្រី យូហ្គេសស្វារី (Yogeswari) ជាស្ថាបនិក។ សកម្មភាពរបស់ អាសាហា ហ្វោនដេសិន ដំបូង គឺបានធ្វើការបង្ហាត់យោគៈដល់ក្មេងនៅមណ្ឌលកុមារកំព្រា។ ក្រោយមកដោយសង្កេតឃើញថា ក្មេងៗនៅទីនោះមានចំណាប់អារម្មណ៍ខ្លាំងចំពោះការហាត់យោគៈនេះ ដូច្នេះលោកស្រី យូហ្គេសស្វារី (Yogeswari) ក៏បានសម្រេចចិត្តបង្កើតអង្គការនេះឡើង ដើម្បីបង្កើតឱ្យមានកន្លែងសម្រាប់ហាត់យោគៈ និងសមាធិ។ បច្ចុប្បន្ននេះអាសាហា ហ្វោនដេសិន បានផ្តោតលើការរួមចំណែកក្នុងការកសាងសន្តិភាពតាមរយៈយោគៈរួមមានកម្មវិធីមួយចំនួនដូចជា ថ្នាក់យោគៈ ថ្នាក់សិក្សាសន្តិភាពរយៈពេល8ខែ និងការចុះកម្មសិក្សា កម្មវិធីបោះជំរុំសន្តិភាពដែលមានគ្រូយោគៈ
ជាជនជាតិខ្មែរ មានវិញ្ញាបនបត្រ ជំនាញផ្នែកយោគៈយ៉ាងត្រឹមត្រូវ។

4 ថ្នាក់យោគៈជាមួយ អាសាហា ហ្វោនដេសិន
គ្រូបង្រៀនយោគៈរបស់ អាសាហា ហ្វោនដេសិន ផ្តល់នូវថ្នាក់យោគៈ ដោយអមជាមួយតន្ត្រីស្មូត និងជួយដល់សិស្ស។ ជារៀងរាល់ថ្ងៃការអនុវត្តមានលក្ខណៈខុសៗគ្នា និងប្រកបដោយការច្នៃប្រឌិត ដូច្នេះវាបានធ្វើឱ្យអ្នកហាត់មិនធុញទ្រាន់ ហើយមានភាពរីករាយពីមួយពេលទៅមួយពេលថែមទៀតផង។ នៅពេលចាប់ផ្តើមថ្នាក់នីមួយៗ គ្រូបង្រៀននឹងសួរសិស្សប្រាប់ឱ្យបិទភ្នែកដើម្បីធ្វើឱ្យចិត្តស្ងប់។ បន្ទាប់មកគ្រូបង្រៀននឹងចាប់ផ្តើមយឺតៗ ដើម្បីឱ្យបានកម្ដៅខ្លួនប្រាណតាមរយៈអាស៊ីតដែលបញ្ចេញមកនៅពេលដែលយើងធ្វើចលនាដង្ហើម។ មួយថ្នាក់មានរយៈពេល1ម៉ោង ឬ1ម៉ោង 15នាទី ដែលអាស្រ័យលើថ្នាក់ និងបែបបទនៃលំហាត់ប្រាណ។តាមរយៈការធ្វើចលនារាងកាយ វាបានជួយឱ្យសាច់ដុំ និងបញ្ញាស្មារតីដំណើរការល្អប្រសើរជាងមុន។

យោគៈ អាចហាត់បានគ្រប់ៗគ្នា ទាំងក្មេងចាស់ ប្រុស ស្រី ដោយមិនប្រកាន់នៃភាពរស់រវើករបស់រាងកាយឡើយ។ នៅស្ទីឌីយោយោគៈរបស់ អាសាហា ហ្វោនដេសិន មានផ្តល់នូវឧបករណ៍ជំនួយក្នុងពេលហាត់ ដើម្បីធានានូវគុណភាពលំហាត់ប្រាណដល់អ្នកហាត់។ អាសាហា ហ្វោនដេសិន មានការបង្ហាត់យោគៈ សម្រាប់គ្រប់កម្រិត ទាំងអ្នកមិនធ្លាប់បានអនុវត្ត អ្នកធ្លាប់ហាត់បានខ្លះៗ និងអ្នកដែលមានកំរិតខ្ពស់។

សូមបញ្ជាក់ផងដែរថា បច្ចុប្បន្ន អាសាហា ហ្វោនដេសិន មានសាខាចំនួន2 ដោយសាខាទី1ស្ថិតផ្ទះលេខ 39 ផ្លូវ 21 សង្កាត់ទន្លេបាសាក់ ខណ្ឌចំការមន ភ្នំពេញ។ សាខាទី2 ស្ថិតនៅផ្ទះលេខ 628 ផ្លូវហាប់ហ្គន់ ភូមិកណ្តាល ក្រុងសៀមរាប ឬអាចទាក់ទងតាមរយៈ E-mail: [email protected] ឬ face-book: Azahar Foundation-Phnom Penh៕

November 7, 2017

Kane និង Winks នឹងអវត្តមាននៅពេលអង់គ្លេស ជួបអាល្លឺម៉ង់ និងប្រេស៊ីល

ខ្សែប្រយុទ្ធឆ្នើម Harry Kane ត្រូវបានលុបឈ្មោះចេញពីការប្រកួតមិត្តភាពអន្តរជាតិរបស់ក្រុមជម្រើសជាតិអង់គ្លេស ជាមួយនឹងក្រុមជម្រើសជាតិអាល្លឺម៉ង់ និងប្រេស៊ីល ក្រោយពីការត្រួតពិនិត្យដោយម៉ាស៊ីនស្គែនទៅលើបញ្ហារបួសរបស់គេរួចមក ធ្វើឲ្យលោក Gareth Southgate សម្រេចចិត្តឲ្យរូបគេសម្រាកតែម្តង។

Kane បានជួបបញ្ហារបួសក្នុងពេលក្រុម Tottenham Hotspur ដណ្តើមបានជ័យជម្នះ 1-០ លើក្រុម Crystal Palace កាលពីថ្ងៃសៅរ៍ និងបានស្នាក់នៅក្នុងទីក្រុងឡុងដ៍ ដើម្បីទទួលបានការព្យាបាល ខណៈដែលកីឡាកររបស់ក្រុមអង់គ្លេសជាច្រើននាក់ផ្សេងទៀត ត្រូវបានបញ្ចូលឈ្មោះសម្រាប់ការប្រកួតនៅកីឡដ្ឋាន St George’s Park។ ក្រុមជម្រើសជាតិអង់គ្លេស នឹងត្រូវធ្វើការប្រកួតជាមួយនឹងក្រុមជម្រើសជាតិអាល្លឺម៉ង់ នៅថ្ងៃសុក្រនេះ នៅមុនពេលធ្វើជាម្ចាស់ផ្ទះទទួលក្រុមជម្រើសជាតិប្រេស៊ីល នៅថ្ងៃអង្គារ សប្តាហ៍ក្រោយ។ ខ្សែបម្រើ Harry Winks ដែលជាមិត្តរួមក្រុម Spurs របស់ Kane ក៏នឹងត្រូវអវត្តមានផងដែរ ក្រោយពីបានជួបបញ្ហារបួសកជើង អំឡុងពេលប្រកួតជាមួយនឹងក្រុម Crystal Palace ដូចគ្នា ដែលធ្វើឲ្យលោក Southgate កាន់តែខកចិត្តចំពោះការបំពេញក្រុមរបស់លោកជាមួយនឹងកីឡាករឆ្នើមៗរបស់ Spurs។ លោក Southgate បានអវត្តមានខ្សែបម្រើឆ្នើម Dele Alli ម្នាក់រួចទៅហើយ ដោយសារតែបញ្ហារបួស។

ក្រោយពីការដកខ្លួនរបស់ Kane និង Winks ខ្សែបម្រើ Jake Livermore របស់ក្លិប West Bromwich Albion ត្រូវបានកោះហៅកាលពីថ្ងៃចន្ទ៕

ប្រភពពី៖ The Guardian

November 7, 2017

រថយន្ត ហាវថាយ (HAWTAI A25) ឧបត្ថម្ភ កម្មវិធី តម្រង់ទិស និងការចែករំលែកបទពិសោធន៍ រៀបចំឡើងនៅសាកលវិទ្យាល័យធំៗក្នុងរាជធានីភ្នំពេញ

ភ្នំពេញ៖ ក្រុមហ៊ុន Worldwide Motor Company Ltd (WMC) ដែលជាក្រុមហ៊ុនដ៏ធំមួយ បានទទួលសិទ្ធិផ្តាច់មុខ ក្នុងការនាំចូល និងចែកចាយរថយន្តថ្មីទំនើប HAWTAI A25 នៅក្នុងប្រទេសកម្ពុជា បានឧបត្ថម្ភដ៏ធំក្នុងការរៀបចំកម្មវិធី “ ការតម្រង់ទិស និងការចែករំលែកបទពិសោធន៍” ដែលជាកម្មវិធីមួយបណ្តុះបណ្តាលអប់រំមួយដ៏ធំ ដល់និស្សិតទាំងឡាយដែលរៀបចំឡើងដោយក្រុមហ៊ុន AGB និងមានការចូលរួមពីសាកលវិទ្យាល័យធំៗចំនួន10 ក្នុងរាជធានីភ្នំពេញ ហើយការបណ្តុះបណ្តាលនេះចាប់ផ្តើមពីចុងខែតុលា និងបញ្ចប់ទៅវិញនៅចុងខែធ្នូ ឆ្នាំ 2017 ហើយការរៀបចំលើកដំបូងនេះ គឺនៅសាកលវិទ្យាល័យពុទ្ធិសាស្ត្រ នាថ្ងៃទី 27 ខែតុលា ឆ្នាំ 2017។

លោក ពាង ម៉ាន់ អគ្គនាយក្រុមហ៊ុន WMC បានមានប្រសាសន៍ឲ្យដឹងថា “រថយន្តហាវថាយ (HAWTAI A25) ដែលជាប្រភេទរថយន្ត SUV ដ៏ថ្មីសន្លាង បំពាក់ដោយបច្ចេកវិទ្យាទំនើបបំផុតនេះ ជានិច្ចកាល តែងតែចូលរួមឧបត្ថម្ភ និងលើកស្ទួយកម្មវិធីជាច្រើន ទាំងកម្មវិធីអប់រំ និង ការងារសង្គម។ ជាក់ស្តែង ដូចជាកម្មវិធី ការតម្រង់ទិស ឆ្ពោះទៅរកភាពជោគជ័យនេះ ជាដើម គឺជាកម្មវិធីអប់រំមួយដ៏ល្អ ដែលប្អូនៗនិស្សិត អាចនឹងទទួលបាននូវចំណេះដឹង និងបទពិសោធន៍ល្អៗពីវាគ្មិនចំណានៗ និងល្បី ដែលពួកគាត់គឺជាបុគ្គលជោគជ័យក្នុងអាជីពការងារ ហើយគាត់មកចូលរួមជាវាគ្មិនក្នុងកម្មវិធីនេះ គឺក្នុងគោលបំណងដើម្បីផ្តល់នូវគន្លឹះនៃភាពជោគជ័យដល់និស្សិតទាំងអស់ ថានៅពេលបញ្ចប់ការសិក្សា តើខ្លួនត្រូវធ្វើយ៉ាងណា ដើម្បីយកចំណេះដឹង ដែលខ្លួនបានសិក្សានៅមហាវិទ្យាល័យនានានេះ មកបំពេញការងារឲ្យមានប្រសិទ្ធិភាព ទទួលបានភាពជាបុគ្គលិកឆ្នើម ដែលបណ្តាក្រុមហ៊ុនឯកជន ព្រមទាំងស្ថាប័នរដ្ឋ ដែលគេត្រូវការ។

លោកអគ្គនាយកបានបន្តទៀតថា ក្រុមហ៊ុនណាក៏ដូចជាក្រុមហ៊ុនណាដែរ តែងតែចង់បានបុគ្គលិកល្អ មានចំណេះដឹងជ្រៅជ្រះ បទពិសោធន៍ល្អៗ ស្មោះត្រង់ អំណត់ក្នុងការងារ និងដោះស្រាយបញ្ហាដោយភាពឆ្លាតវៃ ដោយគេមិនខ្លាចក្នុងការផ្តល់ប្រាក់ខែខ្ពស់ទៅឲ្យបុគ្គលិកទាំងនោះទេ ។ យ៉ាងណាមិញ ក្រុមហ៊ុន WMC ដែលជាក្រុមហ៊ុនដ៏ធំ នាំចូលរថយន្ត HAWTAI A25 នេះ ក៏ត្រូវការបុគ្គលិកឆ្នើមៗល្អ មកបំពេញការងារដើម្បភាពជោគជ័យទាំងអស់គ្នាផងដែរ។ ដោយហេតុនេះហើយ ទើបរាល់កម្មវិធី ទាក់ទងនឹងការបណ្តុះធនធានមនុស្ស HAWTAI A25 តែងតែជួយឧបត្ថម្ភគាំទ្រជានិច្ច។

កម្មវិធីនេះ ដែលរៀបចំនៅតាមបណ្តាសាកលវិទ្យាល័យទាំងដប់នៅរាជធានីភ្នំពេញនេះ ក៏មានការដាក់តាំងបង្ហាញនូវរថយន្ត HAWTAI A25 SUV នេះ ក្នុងទីធ្លាសាកលវិទ្យល័យផងដែរ ដើម្បីឲ្យនិស្សិត សាស្ត្រាចារ្យ និងមហាជនទាំងឡាយ បានឃើញនូវរូបរាងដ៏ល្អប្រណិតរបស់រថយន្តនេះទាំងរូបរាងខាងក្រៅ និងការរចនាផ្នែកខាងក្នុងរថយន្ត ដែលបំពាក់ដោយប្រព័ន្ធបច្ចេកវិទ្យាទំនើបល្អឥតខ្ចោះ ទាំងអស់ រួមទាំងម៉ាស៊ីនគុណភាពលំដាប់ស្តង់ដារអន្តរជាតិ ប្រព័ន្ធការពារសុវត្ថិភាពខ្ពស់ មានការធានាច្បាស់លាស់ពីក្រុមហ៊ុនរយៈលើគុណភាព និងគ្រឿងបន្លាស់។

យ៉ាងណាមិញ ការរៀបចំកម្មវិធីនេះ គឺចំពេល ដែលក្រុមហ៊ុន WMC មានកម្មវិធីពិសេស គឺមានទឹកប្រាក់បង់ដំបូងតែ 3000ដុល្លារ ( បីពាន់ដុល្លារ) ប៉ុណ្ណោះ អតិថិជនទាំងអស់នឹងទទួលបានរថយន្ត HAWTAI A25 ដ៏ថ្មីសន្លាងនេះភ្លាមជាមួយនឹងការផ្តល់ជូនពិសេសដូចជា សេវាធានារ៉ាប់រងអាយុជីវិត មានតម្លៃ 10000ដុល្លារ ការធានាលើគុណភាពម៉ាស៊ីន និងគ្រឿងបន្លាស់រថយន្តរយៈពេល 5ឆ្នាំស្មើនឹង 100,000គីឡូម៉ែត ហើយលើសពីនេះទៀត អតិថិជនម្នាក់អាចកម្ម៉ង់ទិញបាន 3 គ្រឿង ជាមួយប្រាក់កម្ចីរហូតដល់ 100,000$ និង 2,000,000 $ សម្រាប់អតិថិជនជាលក្ខណៈក្រុមហ៊ុនពីដៃគូមីក្រូហិរញ្ញវត្ថុរបស់ HAWTAI A25។ កម្មវិធីពិសេសនេះ គឺផ្តល់ឱកាសដល់សិស្ស និស្សិត សាស្ត្រាចារ្យ បុគ្គលិកនានា ដែលមានបំណងទិញរថយន្តថ្មី ដើម្បីជីវិតដ៏ទាន់សម័យរបស់ខ្លួន។

សម្រាប់ព័ត៌មានបន្ថែម អតិថិជនក៏អាចអញ្ជើញមកកាន់ Showroom HAWTAI A25 ដែលនៅជាប់របងវត្តទឹកថ្លាឬទំនាក់ទំនងតាមទូរស័ព្ទលេខ 078 999 006 ឬចូលទៅកាន់ www.facebook.com/wmchawtai

November 7, 2017

បុរសៗដឹងឬទេគ្រាន់តែដកដង្ហើមក៏ជួយឱ្យមានសាច់ដុំពោះ6កង់បានដែរ?

វិធីងាយៗ ដែលធ្វើឱ្យបុរសយើងមានស្បែកពោះស្អាត មានសាច់ដុំពោះ6កង់ដោយវិធីងាយៗបំផុត ព្រោះទស្សនាវដ្តី ឡារ៉ែន បានដឹងថា បុរសមួយចំនួនធ្វើការងារនឿយហត់ មិនសូវបានយកចិត្តទុកដាក់ចំពោះការហាត់ប្រាណប៉ន្មានទេ។ ដូច្នេះគ្រាន់តែដកដង្ហើមក៏អ្នកអាចមានសាច់ដុំពោះ6កង់បានដែរ គ្រាន់តែធ្វើតាមវិធីខាងក្រោមនេះតែប៉ុណ្ណោះ។

ពិតប្រាកដណាស់ បច្ចុប្បន្ននេះគឺមានភាពសំខាន់ខ្លាំងដែលបុរសៗគួរយកចិត្តទុកដាក់ទាក់ទងនឹងសុខភាពរាងកាយរបស់ខ្លួន ព្រោះក្រៅពីបានទទួលនូវសុខភាពរាងកាយរឹងមាំហើយ ភាពមានទំនុកចិត្តក៏មកតាមជាមួយផងដែរ។ ប្រសិនបើរាងកាយស្រស់សង្ហា ការហុចផលតបមកវិញនោះគឺ មន្តស្នេហ៍ដែលទាក់ទាញចំពោះនារីៗនៅជុំវិញខ្លួន ដូច្នេះការហាត់ប្រាណខ្ជាប់ខ្ជួន និងការទទួលទានអាហារដ៏ត្រឹមត្រូវ គឺជារឿងសំខាន់ ក៏ប៉ុន្ដែគន្លឹះមួយទៀតដែលអ្នកត្រូវដឹងនោះគឺ ការធ្វើលំហាត់ដង្ហើម។

ដកដង្ហើមក៏ជួយឱ្យមានសាច់ដុំពោះ6កង់បានដែរ! បុរសជាច្រើនប្រហែលជាឆ្ងល់ហើយថា វាពិតជាអាចជួយបានមែនឬទេ? គ្រាន់តែដកដង្ហើមនេះ នឹងជួយឱ្យមានសាច់ដុំពោះបាន?ដូច្នេះយើងសូមជម្រាបតែម្ដងថា វាពិតជាបានផលពិតមែន ព្រោះការដកដង្ហើមឱ្យជ្រៅៗ និងវែងៗវាជួយឱ្យរាងកាយនាំយកនូវអុកស៊ីហ៊ែ្សនចូលទៅក្នុងរាងកាយបានគ្រប់គ្រាន់ ព្រមទាំងជួយកម្ចាត់កាបូនឌីអុកស៊ីតបានយ៉ាងប្រសើរ ហើយវាបានរំញោចដល់ប្រព័ន្ធរំលាយអាហារ ដែលជួយរំញោចបញ្ជេញនូវកាកសំណល់ និងភាពតានតឹង អារម្មណ៍ធុញថប់ ដែលជាការហុចផលល្អដល់ការសម្មាធិរបស់អ្នក។

ខាងក្រោមនេះជាការអនុវត្តការដង្ហើម ដើម្បីទទួលបានសាច់ដុំពោះ6កង់

1-ដកដង្ហើមបែប Concentric និង Eccentric
អ្នកអាចកាន់កូនដុំដែកនៅក្នុងដៃទាំងពីរសងខាង រួមធ្វើលំហាត់ដង្ហើម ដោយ Concentric គឺជាការលើកដុំដែកឡើង ហើយដកដង្ហើមចេញ។ រីឯលំហាត់ប្រាណ Eccentric គឺជាការទម្លាក់ដុំដែកចុះ រួចដកដង្ហើមចូល
មកក្នុងរាងកាយវិញ ការធ្វើលំហាត់ដង្ហើមបែបនេះ គឺជាការស្រូបយកអុកស៊ីហ្សែ៊នដែលត្រឹមត្រូវ។ អ្នកអាចធ្វើលំហាត់ដង្ហើមបែបនេះក្នុងរយៈពេល30វិនាទីម្ដង ឱ្យបានគ្រប់ចំនួន200ដងឡើងទៅ។

2-Valsava Maneuver
នៅក្នុងពោះរបស់អ្នកអាចនឹងមានខ្យល់ស្រាប់ហើយ ដូច្នេះការធ្វើលំហាត់ប្រាណវិធីនេះ គឺការរក្សាលំនឹងខ្យល់នៅក្នុងពោះ ដែលមាន3ដំណាក់កាលគឺ Intra (ផ្នែកខាងក្នុង) Abdominal (បរិវេណពោះ) និង Pressure (ផ្នែកខាងក្រោម)។ ការអនុវត្តគឺ អ្នកត្រូវដកដង្ហើមចូលក្នុងខ្លួនសិន រួចបោះដៃទាំងសងខាងតម្រង់ទៅខាងមុខ បន្ទាប់មកបន្ទន់ជង្គង់អង្គុយចុះ។ បន្ទាប់មកទៀតត្រូវក្រោកឡើងត្រឹមពាក់កណ្ដាលខ្លួន ហើយបញ្ចេញដង្ហើមបន្តិចសិន រួចខណៈដែលអ្នកក្រោកឈរពេញទំហឹង ទើបត្រូវបញ្ចេញខ្យល់ដង្ហើមមកក្រៅទាំងអស់តែម្ដង។

3-Push-up
តាមរយៈភាសារអង់គ្លេសត្រូវបានគេហៅថា Push-up ឬខ្មែរយើងនិយមហៅថា ពុយអាវ៉ង់ ការធ្វើលំហាត់ដង្ហើម បែបនេះគីជាការប្រឹងសាច់ដុំពោះដូចគ្នាផងដែរ៕

November 7, 2017

Author: វល័ក្ខ