វល័ក្ខ - La Reine Media

FA ចោទប្រកាន់លោក Emery ក្រោយទាត់ដបទឹកសុទ្ធពេលប្រកួតជាមួយ Brighton

លោក Unai Emery អ្នកចាត់ការទូទៅរបស់ក្រុម Arsenal ត្រូវបានចោទប្រកាន់ពីបទប្រព្រឹត្តមិនសមរម្យដោយសហព័ន្ធកីឡាបាល់ទាត់អង់គ្លេស (FA) ក្រោយពីបានទាត់ដបទឹកបរិសុទ្ធទៅកាន់អ្នកគាំទ្រ អំឡុងពេលក្រុមខ្លួនបានបញ្ចប់ក្នុងលទ្ធផលស្មើ ១-១ ជាមួយនឹងក្រុម Brighton ក្នុងការប្រកួតក្របខ័ណ្ឌ Premier League កាលពីថ្ងៃ Boxing Day។

អ្នកនាំពាក្យម្នាក់របស់សហព័ន្ធកីឡាបាល់ទាត់អង់គ្លេស បានបញ្ជាក់កាលពីថ្ងៃព្រហស្បតិ៍ថា៖ «លោក Unai Emery អ្នកចាត់ការទូទៅរបស់ក្រុម Arsenal ត្រូវបានចោទប្រកាន់ ក្រោយពីការប្រកួតជាមួយនឹងក្រុម Brighton កាលពីថ្ងៃទី២៦ ខែធ្នូ ឆ្នាំ២០១៨»។

អ្នកនាំពាក្យរបស់ FA ដដែលបានបន្ថែមទៀតថា៖ «វាត្រូវបានគេចោទប្រកាន់ថា សកម្មភាពទាត់ដបទឹកបរិសុទ្ធរបស់លោក អំឡុងពេលនៃការប្រកួតនោះ គឺជាការប្រព្រឹត្តមិនសមម្យ។ លោកមានពេលវេលារហូតដល់ម៉ោង៦ល្ងាច ថ្ងៃទី២ ខែមករា ដើម្បីឆ្លើយតបទៅនឹងការចោទប្រកាន់នេះ»។ លោក Emery សញ្ជាតិអេស្ប៉ាញ បានដើរទៅនិយាយទៅកាន់អ្នកគាំទ្រម្ចាស់ផ្ទះដែលនៅក្បែរដបទឹកដែលបានធ្លាក់ភ្លាមៗ ក្រោយពីហេតុការណ៍នេះ និងបានដើរទៅនិយាយម្តងទៀតក្នុងពេលបញ្ចប់ការប្រកួតនាកីឡដ្ឋាន Amex។

លោក Emery ដែលបាននិយាយកាលពីថ្ងៃព្រហស្បតិ៍ នៅមុនពេលការប្រកាសរបស់ FA និងមុនពេលក្រុម Arsenal ធ្វើដំណើរទៅជួបក្រុម Liverpool នៅចុងសប្តាហ៍នេះ បានបញ្ជាក់ថា លោកបានសង្ឃឹមថា ការសុំការអភ័យទោសរបស់លោក នឹងគូសខ្សែបន្ទាត់មួយពីក្រោមហេតុការណ៍នេះ។ គ្រូបង្វឹករូបនេះបាននិយាយថា៖ «ខ្ញុំបាននិយាយកាលពីថ្ងៃម្សិលមិញពីការសុំអភ័យទោសរបស់ខ្ញុំ។

ខ្ញុំបានទាត់ដបទឹកដោយការអស់សង្ឃឹម ប៉ុន្តែ មិនមែនសំដៅទៅលើអ្នកគាំទ្រឡើយ។ ខ្ញុំបានទាត់សម្រាប់តែខ្ញុំ ហើយវាបានធ្លាក់ក្បែរអ្នកគាំទ្រ ហើយខ្ញុំបានសុំអភ័យទោសរបស់ខ្ញុំទៅកាន់ពួកគេ។ វាគ្មានការសន្ទនាណាផ្សេងឡើយ»៕

ប្រភពពី៖ Channel News Asia

December 28, 2018

វិទ្យាស្ថាន ពាណិជ្ជសាស្ត្រ អេស៊ីលីដា សម្ពោធអគារស្តង់ដារអន្តរជាតិថ្មីសម្រាប់និស្សិតកម្ពុជា និងបរទេស

ការអប់រំផ្នែកពាណិជ្ជសាស្ត្រ និងហិរញ្ញវត្ថុ ជាផ្នែកដ៏សំខាន់មួយដែលកម្ពុជាកំពុងត្រូវការស្របពេលដែលវិស័យធនាគារ-ហិរញ្ញវត្ថុ និងពាណិជ្ជកម្មកំពុងមានការរីកចម្រើនយ៉ាងខ្លាំង។ ដោយមើលឃើញពីសារៈសំខាន់នៃការបណ្តុះបណ្តាលធនធានមនុស្សលើវិស័យទាំងអស់នេះ វិទ្យាស្ថាន ពាណិជ្ជសាស្ត្រ អេស៊ីលីដា ដែលជាក្រុមហ៊ុនបុត្រសម្ព័ន្ធមួយរបស់ធនាគារ អេស៊ីលីដា ភីអិលស៊ី បានធ្វើការសម្ពោធជាផ្លូវការនូវអគារថ្មីស្របតាមស្តង់ដារអន្តរជាតិរបស់ខ្លួនដើម្បីផ្តល់ឱកាសឱ្យសិស្ស-និស្សិតនៅកម្ពុជា និងប្រទេសមានឱកាសសិក្សាប្រកបដោយគុណភាពខ្ពស់។

អគារសិក្សាដ៏ទំនើប និងធំទូលាយនេះមានទីតាំងស្ថិតនៅអគារលេខ1397 មហាវិថីមិត្តភាព ភ្នំពេញ-ហាណូយ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ។ ពិធីសម្ពោធដាក់ឱ្យប្រើប្រាស់ជាផ្លូវការនេះប្រព្រឹត្តឡើងក្រោមអធិបតីភាពដ៏ខ្ពង់ខ្ពស់របស់ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាតំណាងដ៏ខ្ពស់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងអញ្ជើញចូលរួមជាភ្ញៀវកិត្តិយសដោយលោកជំទាវ អ៊ុក ម៉ាលី ទេសាភិបាលរងធនាគារជាតិនៃកម្ពុជា ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា និងភ្ញៀវកិត្តិយសសំខាន់ៗជាច្រើនផ្សេងទៀត។

បណ្ឌិត ផុន ណារិន នាយកវិទ្យាស្ថាន ពាណិជ្ជសាស្ត្រ អេស៊ីលីដា បានលើកឡើងថា វិទ្យាស្ថានពាណិជ្ជសាស្ត្រ អេស៊ីលីដា មានការរីកចម្រើនកើនឡើងជាលំដាប់ ដែលមិនអាចកាត់ផ្តាច់បានពីការលូតលាស់នៃកំណើនសេដ្ឋកិច្ចកម្ពុជាប្រកបដោយចីរភាព។ ទន្ទឹមនឹងនេះ ក្នុងរយៈពេល 2ទសវត្សរ៍ចុងក្រោយនេះ ទីផ្សារការងារកម្ពុជា និងសកលបានត្រូវការជាចាំបាច់នូវធនធានមនុស្សប្រកបដោយសមត្ថភាពខ្ពស់។ ជាឱកាសដ៏វិសេសវិសាលនេះ ធនាគារអេស៊ីលីដា ភីអិលស៊ី បានបោះទុនវិនិយោគលើវិស័យអប់រំ ដោយបានសាងសង់អគារវិទ្យាស្ថាន ពាណិជ្ជសាស្ត្រ អេស៊ីលីដា ដែលជាក្រុមហ៊ុនបុត្រសម្ព័ន្ធ ក្នុងគោលបំណងបំពេញតម្រូវការចាំបាច់នៃកំណើនសិស្ស-និស្សិត និងសិក្ខាកាម ជាការរួមចំណែកនៅក្នុងវិស័យអប់រំ ចែករំលែកនូវបទពិសោធជោគជ័យ ចំណេះជំនាញសីលធម៌ និងពង្រឹងគុណភាពអប់រំស្របតាមគោលនយោបាយរបស់រាជរដ្ឋាភិបាល និងក្រសួងអប់រំយុវជន និងកីឡា នៃព្រះរាជាណាចក្រកម្ពុជា។

វិទ្យាស្ថាន ពាណិជ្ជសាស្ត្រ អេស៊ីលីដា ត្រូវបានសាងសង់ឡើងស្របតាមស្តង់ដាអន្តរជាតិ មានលក្ខណៈទំនើប ស្រស់ស្អាត និងត្រូវបានគូសប្លង់ដោយក្រុមហ៊ុន HSNK របស់ប្រទេសកូរ៉េខាងត្បូង ដែលជាស្ថាបត្យករល្បីល្បាញលំដាប់ថ្នាក់អន្តរជាតិ។ វិទ្យាស្ថាន ពាណិជ្ជសាស្ត្រ អេស៊ីលីដាសាងសង់ដោយក្រុមហ៊ុន(Main Contractor) PISNOKA ដែលជាក្រុមហ៊ុនក្នុងស្រុកដោយសហការជាមួយក្រុមហ៊ុនសាងសង់ចំនួន4 និងក្រុមហ៊ុនផ្គត់ផ្គង់គ្រឿងសង្ហារិម និងសម្ភារការិយាល័យ និងអគ្គិសនីចំនួន17 ទៀត។ សរុបរួមមាន 22ក្រុមហ៊ុន ទាំងក្នុងស្រុក និងបរទេស ដោយប្រើប្រាស់រយៈពេលសាងសង់ 600ថ្ងៃ និងថវិកាចំនួន 36,726,888ដុល្លារអាមេរិក (រួមទាំងតម្លៃដី)។ វិទ្យាស្ថាន ពាណិជ្ជសាស្ត្រ អេស៊ីលីដា មានបំពាក់ទៅដោយឧបករណ៍សម្ភារការិយាល័យ លិក្ខូបករណ៍តាមបន្ទប់រៀនទំនើប និងទាន់សម័យ ព្រមទាំងមានប្រព័ន្ធការពារសន្តិសុខ ការសន្សំសំចៃថាមពលប្រើប្រាស់ ការបង្ការអគ្គិភ័យ បណ្តាញត្រួតពិនិត្យ និងប្រព័ន្ធទូរគមនាគមន៍ ហើយនិងប្រព័ន្ធគាំទ្របច្ចេកវិទ្យាព័ត៌មានគ្រប់អគារទាំងអស់។ អគារទាំងនេះសាងសង់លើផ្ទៃដីទំហំ 75,750ម៉ែត្រការ៉េ ដែលរួមមានអគារសិក្សា2 កម្ពស់ 5ជាន់ មានបន្ទប់រៀនចំនួន 8បន្ទប់ ដែលអាចទទួលនិស្សិតបានពី 6,000 ទៅ 7,000នាក់ (សរុប 3វេនសិក្សា) អគាររដ្ឋបាល1 កម្ពស់ 3ជាន់ ដែលនៅក្នុងអគារនោះមានអាហារដ្ឋាន 1កន្លែង បណ្ណាល័យ1 កម្ពស់ 3ជាន់ អន្តេវាសិកដ្ឋាន1 កម្ពស់ 4ជាន់ មាន 47បន្ទប់ ដែលអាចទទួលនិស្សិតស្នាក់នៅសរុបចំនួន 137នាក់ ទីធ្លាសម្រាប់ចតយានយន្តធំទូលាយ ទីលានបាល់ទាត់ទំហំ 8,088ម៉ែត្រការ៉េ បាល់បោះ និងបាល់ទះទំហំ 1,438ម៉ែត្រការ៉េ។

ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានវាយតម្លៃខ្ពស់ចំពោះការកសាងវិទ្យាស្ថានពាណិជ្ជសាស្ត្រអេស៊ីលីដាស្របតាមបទដ្ឋានអន្តរជាតិ ដូចសាកលវិទ្យាល័យនានានៅតាមបណ្តាប្រទេស ក្នុងតំបន់មួយចំនួនដោយមានជាអគារសិក្សាទំនើប និងប្រណីត បន្ទប់សិក្សាបំពាក់ដោយឧបករណ៍គ្រប់គ្រាន់ មានបណ្ណាល័យធំទូលាយ និងទំនើបទាន់សម័យ ទីធ្លាវិទ្យាស្ថានមានលក្ខណៈធំទូលាយ មានសួនច្បារ ទីលានបាល់ទាត់ បាល់បោះ និងបាល់ទះ។ វិទ្យាស្ថាន ពាណិជ្ជសាស្ត្រ អេស៊ីលីដា អាចត្រូវបានចាត់ទុកថាជាមជ្ឈមណ្ឌលសម្រាប់អភិវឌ្ឍន៍ធនធានមនុស្សប្រកបដោយគុណភាពខ្ពស់ និងស្របតាមគោលនយោបាយរបស់រាជរដ្ឋាភិបាល និងក្រសួងអប់រំ យុវជន និងកីឡា និងជាជម្រើសដ៏ល្អមួយសម្រាប់សិស្ស-និស្សិត និងសិក្ខាកាមទាំងក្នុង និងក្រៅប្រទេសសម្រាប់បន្តការសិក្សាដើម្បីទទួលបានចំណេះជំនាញ និងបទពិសោធការងារច្បាស់លាស់៕

December 28, 2018

ស្រាបៀរថៃហ្គ័រនឹងរៀបចំកម្មវិធីអបអរឆ្លងឆ្នាំថ្មី 2019 នៅ Pub Street និង Le Moon

រាជធានីភ្នំពេញ៖ នៅយប់ថ្ងៃទី 31 ខែធ្នូ ឆ្នាំ 2018 ខាងមុខនេះ ស្រាបៀរថៃហ្គ័រនឹងរៀបចំកម្មវិធីអបអរឆ្លងឆ្នាំថ្មី 2019 នៅ Pub Street ក្រុងសៀមរាប និង Le Moon Terrace Bar នៅរាជធានីភ្នំពេញដើម្បីផ្តល់ជូននូវបទពិសោធន៍ឆ្លងឆ្នាំថ្មីដ៏វិសេសវិសាលអស្ចារ្យ ដែលញ៉ាំងឲ្យអ្នកចូលរួមកម្មវិធីសប្បាយអឹកធឹក និងទទួលអំណរឆ្នាំថ្មីពីស្រាបៀរថៃហ្គ័រ។

កម្មវិធីពិសេសនេះនឹងចាប់ផ្តើមពីម៉ោង 6ល្ងាច រហូតដល់យប់ជ្រៅ និងប្រព្រឹត្តធ្វើឡើងទៅស្របពេលជាមួយគ្នានៅតាមទីតាំងនីមួយៗខាងលើ ដែលមានការចូលរួមសម្តែងពីសំណាក់ឌីជេ និងតារាល្បីៗជាតិ និងអន្តរជាតិដូចជាឌីជេល្បីប្រចាំប្រទេសថៃកញ្ញា Riviere ឌីជេល្បីប្រចាំប្រទេសថៃកញ្ញា Cathrin ឌីជេវ័យក្មេងស្រស់សោភាកញ្ញា Rose Candy ឌីជេល្បីប្រចាំព្រះរាជាណាចក្រកម្ពុជាលោក Nick និងពិធីកររូបរាងស្រស់សង្ហាលោក Yaro។

សូមចូលរួមអបអរឆ្នាំថ្មីជាមួយស្រាបៀរថៃហ្គ័រឲ្យបានច្រើនកុះករ និងរាំរែកកម្សាន្តសប្បាយនៅក្នុងកម្មវិធីរាត្រីដ៏អស្ចារ្យទាំងនេះជាមួយកម្មវិធីប្រូម៉ូសិនពិសេស និងកម្មវិធីចាប់រង្វាន់ផ្សងសំណាងឈ្នះរង្វាន់ឆ្នាំថ្មីពីស្រាបៀរថៃហ្គ័រ។

តោះយើងត្រៀមខ្លួនរាប់ថយក្រោយសម្រាប់ឆ្លងឆ្នាំថ្មី 2019 ជាមួយស្រាបៀរថៃហ្គ័រ!!!

ចំពោះព័ត៌មានលម្អិតអំពីព្រឹត្តិការណ៍ឆ្លងឆ្នាំ 2019 របស់ស្រាបៀរថៃហ្គ័រ សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ : www.facebook.com/TigerBeerKH ។

សូមពិសាស្រាបៀរថៃហ្គ័រដោយការទទួលខុសត្រូវ

December 28, 2018

Serena សម្លឹងរកការស្តារមុខមាត់ ក្រោយពីភាពចម្រូងចម្រាស់ក្នុង US Open

កីឡាការិនីវាយកូនបាល់ Serena Williams នឹងមិនធ្វើការពិភាក្សាទៅលើហេតុការណ៍ដែលបានផ្ទុះឡើង អំឡុងពេលនៃការប្រកួតព្រឹត្តិការណ៍ US Open វគ្គផ្តាច់ព្រ័ត្រ ដែលនាងបានរងបរាជ័យក្រោមស្នាដៃរបស់កីឡាការិនី Naomi Osaka នៅខែកញ្ញា និងកំពុងតែជ្រើសរើសយក «ការធ្វើរឿងកាន់តែធំ និងកាន់តែល្អប្រសើរ»។ នេះបើយោងទៅតាមការបញ្ជាក់របស់កីឡាការិនីអាមេរិករូបនេះទៅកាន់អ្នកយកព័ត៌មាន ក្នុងទីក្រុងអាប៊ូដាប៊ី កាលពីថ្ងៃព្រហស្បតិ៍។

ក្នុងការបង្ហាញខ្លួននៅលើទីលានជាលើកទី1របស់នាង ចាប់តាំងពីការប្រកួតវគ្គផ្តាច់ព្រ័ត្រដ៏ចម្រូងចម្រាស់ក្នុងទីក្រុងញូវយ៉ក Williams បានចាញ់ក្នុងការប្រកួតបែបកម្សាន្តរបស់នាង ក្រោមស្នាដៃបងស្រីរបស់ខ្លួនគឺ Venus ក្នុងលទ្ធផល 4-6 6-3 និង10-8 ក្នុងរាជធានីអ៊េមីរ៉ាតអារ៉ាប់រួម ហើយបច្ចុប្បន្ននាងនឹងត្រូវធ្វើដំណើរទៅកាន់ទីក្រុង Perth ដើម្បីប្រកួតក្នុងព្រឹត្តិការណ៍ Hopman Cup រួមជាមួយនឹងមិត្តរួមជាតិរបស់នាងគឺ Frances Tiafoe។

នៅពេលដែលត្រូវបានចោទសួរថា ការប្រកួត US Open វគ្គផ្តាច់ព្រ័ត្រ គឺជាប្រធានបទមួយដែលនឹងចង់គេចផុត ក្នុងពេលរដូវកាលថ្មីនេះចាប់ផ្តើម ឬយ៉ាងថា Serena បានឆ្លើយថា៖ «ខ្ញុំមិនចង់គេចផុតពីអ្វីឡើយ។ ខ្ញុំគ្រាន់តែមិនមានពេលក្នុងការនិយាយពីបញ្ហានោះ។ ខ្ញុំបាននិយាយពីវា គ្រប់គ្រាន់បាននិយាយពីបញ្ហានោះអស់រយៈពេលជាច្រើនខែមកហើយ ហើយវាជារឿងដ៏ល្អបំផុតក្នុងការធ្វើដំណើរទៅកាន់រឿងកាន់តែធំ និងកាន់តែល្អប្រសើរ»។

សមិទ្ធផលកាន់តែធំ និងកាន់តែល្អប្រសើរ ពិតជាស្ថិតក្នុងចិត្តរបស់ Serena ខណៈដែលនាងបានទទួលស្គាល់ថា ការប្រជែងឲ្យតាមស្មើកំណត់ត្រារបស់នាង Margaret Court នៃការឈ្នះពាន Grand Slam 24លើក គឺជាគោលដៅរបស់នាងក្នុងឆ្នាំ2019៕

ប្រភពពី៖ Channel News Asia

December 28, 2018

អ្នកវិនិយោគចិន បោះទុនសាងសង «ទីក្រុងរំដួល» បែបសួនឧទ្យានបៃតង ក្នុងខណ្ឌសែនសុខ

ក្រុមហ៊ុន SRE Group ដែលជាក្រុមហ៊ុនអភិវឌ្ឍអចលនទ្រព្យដ៏ធំរបស់ចិនបានប្រារព្ធពិធីបើកការដ្ឋាន និងពិធីសម្ភោធមជ្ឈមណ្ឌលលក់គម្រោងទីក្រុងរំដួល (ROMDUOL CITY) នៅថ្ងៃទី២៦ ខែធ្នូ ឆ្នាំ២០១៨ ដែលជាគម្រោងអគារពាណិជ្ជកម្ម និងលំនៅឋានលំដាប់ខ្ពស់ដំបូងគេបំផុត បែបសួនឧទ្យានបៃតង នៅក្នុងខណ្ឌសែនសុខ។

នៅក្នុងពីធីបើកការដ្ឋាននេះដែរ លោក ឃួង ស្រេង អភិបាលនៃគណៈអភិបាលរាជធានីភ្នំពេញបានមានប្រសាសន៍ថា ៖ រាជធានីភ្នំពេញកំពុងស្ថិតនៅក្នុងដំណាក់កាលអភិវឌ្ឍយ៉ាងឆាប់រហ័សថ្មីមួយ ហើយខណ្ឌសែនសុខ ដែលមានគម្រោងទីក្រុងរំដួលស្ថិតនៅនេះទៀតសោត គឺជាមជ្ឈមណ្ឌលវិទ្យាសាស្ត្រ ការអប់រំ វប្បធម៌ និងសុខាភិបាលនៃរាជធានីភ្នំពេញ ហើយក៏ជាតំបន់អភិវឌ្ឍស្នូលសម្រាប់ទីក្រុងភ្នំពេញនាពេលអនាគតផងដែរ។

លោក រំពឹងទុកថា គម្រោងទីក្រុងរំដួលដែលក្រុមហ៊ុន SRE Group ខិតខំរៀបចំផែនការ និងកសាងដោយយកចិត្តទុកដាក់បំផុតនេះ អាចលើកកម្ពស់ដល់កម្រិតស្ថាបត្យកម្មទីក្រុង និងមុខមាត់របស់រាជធានីភ្នំពេញ និងនាំមូលនូវថាមពលថ្មីៗបន្ថែម ដល់ការអភិវឌ្ឍន៍ទីក្រុង និងក្លាយទៅជានាមប័ណ្ណថ្មីមួយ ដែលស្តែងឱ្យឃើញពីភាពបើកចំហ ថាមពល និងភាពជាទីក្រុងអន្តរជាតិរបស់ទីក្រុងភ្នំពេញ។ ជាមួយគ្នានេះ លោកក៏បានលើកឡើងផងដែរថា ទំនាក់ទំនងមិត្តភាពកម្ពុជា-ចិន មានប្រវត្តិតាំងពីយូរលង់ណាស់មកហើយ ហើយនៅក្នុងឱកាស«ខួបអនុស្សាវរីយ៍លើកទី ៦០ នៃការបង្កើតទំនាក់ទំនងការទូត រវាងកម្ពុជា-ចិន» ដ៏មានអត្ថន័យយ៉ាងជ្រាលជ្រៅនេះ គម្រោងទីក្រុងរំដួលដែលក្រុមហ៊ុន SRE Group បាននិងកំពុងអភិវឌ្ឍជាលើកដំបូងនៅក្នុងរាជធានីភ្នំពេញ នឹងក្លាយទៅជាគម្រោងមួយ ដែលជួយរឹតបន្តឹងទំនាក់ទំនងសេដ្ឋកិច្ច និងពាណិជ្ជកម្មឈ្នះៗរបស់ភាគីទាំងពីរឱ្យកាន់តែរឹងមាំថែមទៀត។

អគ្គនាយកក្រុមហ៊ុន SRE Group លោក LIU FENG បានមានប្រសាសន៍ថា ៖ ការចូលមកវិនិយោគក្នុងប្រទេសកម្ពុជាលើកនេះ ក៏ជាការឆ្លើយតបយ៉ាងសកម្មចំពោះគោលនយោបាយជាយុទ្ធសាស្ត្រ «ខ្សែក្រវ៉ាត់មួយ វិថីមួយ»របស់រដ្ឋាភិបាលចិនផងដែរ។ សក្តានុពលភាពអភិវឌ្ឍន៍នៃទីផ្សារអចលនទ្រព្យ នៅក្នុងរាជធានីភ្នំពេញ និងអនាគតអភិវឌ្ឍន៍របស់ប្រទេសកម្ពុជា ដែលជាប្រទេសសេដ្ឋកិច្ចថ្មី នៅតំបន់អាស៊ីអាគ្នេយ៍ ក៏ជាមូលហេតុដែលទាក់ទាញក្រុមហ៊ុន SRE Group មកធ្វើការវិនិយោគនៅទីនេះដែរ។ លោកបានបញ្ជាក់ថា គម្រោងទីក្រុងរំដួលនេះ មានទីតាំងនៅចន្លោះចំណុចកណ្តាលក្រុងភ្នំពេញ និងអាកាសយានដ្ឋានអន្តរជាតិភ្នំពេញ ដែលជាតំបន់សេដ្ឋកិច្ចពិសេស និងសួនឧស្សាហកម្មធំជាងគេ នៅក្នុងប្រទេសកម្ពុជា ហេតុនេះវាស្ថិតនៅចំទីតាំងអភិវឌ្ឍបំផុតក្នុងទីក្រុង ដោយមិនត្រឹមតែប្រមូលផ្តុំនូវធនធានអប់រំ សុខាភិបាល ពាណិជ្ជកម្ម និងចរាចរណ៍ល្អបំផុតប៉ុណ្ណោះទេ វាថែមទាំងបំពេញនូវតម្រូវការ លើកកម្ពស់កម្រិតលំនៅឋាន កាន់តែងាយស្រួលជាទីបំផុត។

គម្រោងទីក្រុងរំដួលត្រូវបានកំណត់ជា «សហគមន៍រស់នៅបែបអេកូឡូស៊ីអន្តរជាតិមួយ» ហើយគម្រោងនេះ នឹងត្រូវសាងសង់លើផ្ទៃដី១៦៣២៧ម៉ែត្រការ៉េ ដោយសាងសង់លំនៅឋាន លំដាប់ខ្ពស់ចំនួន៤អគារ ផ្សារទំនើប និងចំណតរថយន្តចំនួន២ជាន់នៅខាងក្រោម។

លោក Matthew Hon អ្នកគ្រប់គ្រងគម្រោង «ទីក្រុងរំដួល» បានឱ្យដឹងថា គម្រោងទីក្រុងរំដួលនេះបង្កប់នូវទ្រឹស្តីសហគមន៍រស់នៅបែបសួនឧទ្យានបៃតង ដ៏ធំនិងកម្រមួយនៅក្នុងទីក្រុងភ្នំពេញ ដោយវាត្រូវបានរចនាឱ្យមានសួនអេកូឡូស៊ីបែបអាស៊ីបូព៌ា ច្របាច់បញ្ចូលគ្នាយ៉ាងល្អ នូវទេសភាពដើមត្នោតនិងទឹកថ្លាឆ្វេង បង្កើតបានជាសួនឧទ្យាន អេកូឡូស៊ីដ៏ស្រស់សោភា។ នៅក្នុងសួនឧទ្យាននេះ មានកសាងននូវកុមារដ្ឋាន តំបន់លេងទឹកសម្រាប់កុមារ អាងហែលទឹកខាងក្រៅ មជ្ឈមណ្ឌលស្ប៉ា សួនហាត់ប្រាណ តំបន់លំហែរកាយកម្សាន្តខាងក្រៅ ស្ថានីយ៍ពហុបំណង មជ្ឈមណ្ឌលអាហារ និងហេដ្ឋារចនាសម្ព័ន្ធទ្រទ្រង់ផ្សេងៗទៀត ដើម្បីបំពេញតម្រូវការរស់នៅរបស់មនុស្សគ្រប់វ័យ បង្កើតជាបែបផែននៃការរស់នៅបែបទាន់សម័យនៅក្នុងបរិយាកាសធម្មជាតិអេកូឡូស៊ី ៕

December 27, 2018

ព្រឹកមិញនៅមុខហាង Adidas ម៉េចក៏មានមនុស្សកុះករម្ល៉េះ

ភ្នំពេញ៖ ព្រឹកថ្ងៃទី27 ខែធ្នូ ឆ្នាំ 2018 នៅព្រឹកព្រលឹមព្រះអាទិត្យរះមិនទាន់ច្បាស់នៅឡើយ គេសង្គេតឃើញនៅមុខហាង Adidas នៅលើបណ្តោយផ្លូវព្រះសីហនុ មានភ្ញៀវជាច្រើនបានឈរជុំគ្នាហាក់បីដូចជាកំពុងរងចាំអ្វីមួយដែលនឹងលេចខ្លួនឡើង។

តាមការឱ្យដឹងពីថ្នាក់ដឹកនាំម៉ាក Adidas ប្រចាំប្រទេសកម្ពុជា បានឱ្យដឹងថា ការដែលមានមនុស្សជាច្រើនមកឈរតម្រង់ជួរនៅទីនោះ គឺដោយសារតែពួកគាត់រងចាំជាវស្បែកជើង Yeezy Boost 350 V2 Static ដែលជាស្បែកជើងម៉ូតថ្មីក្នុងត្រកូលរបស់ម៉ាក Adidas ហើយជាពិសេសគឺស្បែកជើងនេះគឺរចនាដោយ Kanye West ជាអ្នកឌីស្សាញ និង ជាតារារ៉េបដ៏ល្បីរបស់អាមេរិច។

Yeezy Boost 350 V2 Static ត្រូវបានប្រកាសលក់ជាផ្លូវការលើកដំបូងបង្អស់នៅលើកទីផ្សារប្រទេសកម្ពុជាព្រឹកនេះចាប់ផ្តើមពីម៉ោង 8ព្រឹក នៅហាង Adidas សាខាផ្លូវព្រះសីហនុ។ គូរបញ្ជាក់ថាគឺមានភ្ញៀវជាច្រើនបានធ្វើការរង់ចាំ និង តម្រង់ជាជួរចាប់តាំងពីម៉ោង 11យប់ នាថ្ងៃទី26 ខែធ្នូ ឆ្នាំ2018 ដើម្បីជាវស្បែកជើងម៉ាក Yeezy Boost 350 V2 Static នេះ។ អ្វីដែលអស្ចារ្យជាងនេះទៀតគឺស្បែកជើងម៉ាក Yeezy Boost 350 V2 Static ត្រូវបានលក់អស់ពីហាងក្នុងរយៈពេលតែ 2ម៉ោងប៉ុណ្ណោះ។

ចំណុចពិសេសរបស់ Yeezy Boost 350 V2 Static គឺផ្នែកខាងលើនៃស្បែកជើងជាប្រភេទសាច់ក្រណាត់ចាក់ (Primeknit) ដែលមានពណ៌ស លាយពណ៌ប្រផេះ ជាពិសសេគឺឆ្នូតនៅចំហៀងត្រូវបានត្បាញជាប់ទៅនឹងផ្នែកខាងលើ និងរួមចូលគ្នាតែមួយ (Monofilament) ចំណែកឯផ្នែកកែងនៃស្បែកជើង (Midsole) ត្រូវបានជ្រើសរើសបច្ចេកវិទ្យាចុងក្រោយរបស់ Adidas គឺបច្ចេកវិទ្យា Innovative Boot ™ Technology៕

December 27, 2018

រដ្ឋាភិបាលកូរ៉េផ្តល់កម្ចីជាង 60លានដុល្លារ សម្រាប់គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់

រដ្ឋាភិបាលកូរ៉េខាងត្បូងបានផ្តល់ឥណទានជិត 64លានដុល្លារអាមេរិកសម្រាប់សាងសង់ស្ថានីយប្រព្រឹត្ដកម្មទឹកកខ្វក់នៅក្នុងក្រុងតាខ្មៅ ខេត្តកណ្តាល។ ពិធីចុះហត្ថលេខាទទួល និងផ្តល់ឥណទាននេះបានធ្វើឡើងនៅព្រឹកថ្ងៃទី26 ខែធ្នូ ឆ្នាំ2018 ម្សិលមិញ រវាងលោកទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ជាមួយតំណាងក្រុមហ៊ុនទីប្រឹក្សាបច្ចេកទេស Dohwa Engineering Co.,Ltd។

ឯកឧត្តម ស៊ុន ចាន់ថុលទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានគូសបញ្ជាក់ថា ការចុះអនុស្សរណៈនៃការយោគយល់នេះធ្វើឡើងក្នុងគោលបំណងធ្វើឱ្យប្រសើរឡើងនូវស្ថានភាពសុខុមាលភាព និងអនាម័យប្រជាពលរដ្ឋ តាមរយៈការសាងសង់ស្ថានីយដែលមានសមត្ថភាពគ្រប់គ្រាន់ក្នុងការច្រោះសម្អាតទឹកកខ្វក់។

ពិសេសទៅទៀតនោះ គឺការលើកកម្ពស់បរិស្ថានដោយការសាងសង់ និងបង្កើននូវប្រព័ន្ធបណ្ដាញលូ និងការតភ្ជាប់បណ្ដាញលូពីផ្ទះប្រជាពលរដ្ឋមកកាន់ស្ថានីយប្រព្រឹត្ដកម្មទឹកកខ្វក់ និងការពារទឹកជំនន់ផងដែរ។ គម្រោងនេះប្រើរយៈពេលប្រមាណ 48ខែ។

លោកទេសរដ្ឋមន្ត្រីបានថ្លែងបញ្ជាក់ថា ស្ថានីយប្រព្រឹត្ដកម្មទឹកកខ្វក់នេះមានសមត្ថភាពចម្រោះ ទឹកបាន 7,600ម៉ែត្រគូបក្នុង 1ថ្ងៃ។

នៅក្នុងគម្រាងនេះ ស្ថានីយបូមទឹកនឹងសាងសង់ចំនួន 10ទីតាំងដែលមានសមត្ថភាពបូមសរុបចំនួន 29,952ម៉ែត្រគូបក្នុងមួយថ្ងៃ។

គម្រោងថវិកានេះក៏នឹងសាងសង់បណ្ដាញលូមុខកាត់ពី 0.3 ទៅ1.2ម៉ែត្រ ប្រវែង 43.33គីឡូម៉ែត្រ និងលូមុខកាត់ពី 0.1 ទៅ0.4ម៉ែត្រ ប្រវែង 6គីឡូម៉ែត្រ។

ជាមួយគ្នានេះផងដែរ គម្រោងនឹងជួញការងារស្ដារស្ទឹងប្រវែង 16.3គីឡូម៉ែត្រ រួមទាំងការស្ដារស្ថានីយបូមដែលមានស្រាប់នៅក្នុងក្រុងតាខ្មៅផងដែរ៕

December 27, 2018

ការនាំចេញជ័រកៅស៊ូកម្ពុជា មានការកើនឡើងក្នុងរយៈពេល 11ខែ ឆ្នាំ2018 ខណៈតម្លៃធ្លាក់ចុះ

ក្នុងរយៈពេល 11ខែនៃឆ្នាំ2018នេះ កម្ពុជាបាននាំចេញជ័រកៅស៊ូសរុបចំនួនជាង 18ម៉ឺនតោន ដោយទទួលបានចំណូលជាង 250លានដុល្លារអាមេរិក។ នេះបើតាមរបាយការណ៍របស់អគ្គនាយកដ្ឋានកៅស៊ូ។

របាយការណ៍បញ្ជាក់ថា ចាប់ពីខែមករា ដល់វិច្ឆិកា ឆ្នាំ2018កម្ពុជា បាននាំចេញជ័រកៅស៊ូចំនួន187,703តោន កើនឡើង23% បើធៀបនឹងរយៈពេលដូចគ្នានៅឆ្នាំ2017។ តម្លៃកៅស៊ូបានធ្លាក់ចុះផងដែរ ដោយតម្លៃជាមធ្យមក្នុងរយៈពេល 11ខែកន្លងមកនេះក្នុងកម្រិត 1,336ដុល្លារអាមេរិកក្នុង1តោនធ្លាក់ចុះ17%។

កាលពីរយៈពេល 10ខែនៃឆ្នាំ2018នេះ កម្ពុជាបាននាំចេញជ័រកៅស៊ូជាង 16ម៉ឺនតោន ទទួលបានចំណូល 218លានដុល្លារ។ របាយការណ៍ក៏បានបញ្ជាក់ផងដែរថា ក្នុងរយៈពេល 10ខែកន្លងមកនេះ តម្លៃកៅស៊ូបានធ្លាក់ចុះក្នុងកម្រិត 1,355ដុល្លារក្នុង1តោន។

យោងតាមក្រសួងកសិកម្ម រុក្ខា ប្រមាញ់ និងនេសាទបានឱ្យដឹងថា បច្ចុប្បន្នកម្ពុជាមានរោងចក្រសិប្បកម្មកែច្នៃកៅស៊ូចំនួន 139កន្លែងដោយអាចផលិតកៅស៊ូស្ងួតបានជាង 19ម៉ឺនតោនក្នុងមួយឆ្នាំ។ក្រុមហ៊ុនដែលកំពុងរកស៊ី និងដាំដុះកៅស៊ូនៅកម្ពុជាមានចំនួន 129ក្រុមហ៊ុន ក្នុងនោះមាន 30ក្រុមហ៊ុនហើយដែលប្រមូលផល និងធ្វើការនាំចេញ។

ក្នុងឆ្នាំ2017 ប្រាក់ចំណូលបានពីការលក់ជ័រកៅស៊ូមានរហូតដល់ជិត 300លានដុល្លារអាមេរិកដែលចំណូលនេះបានរួមចំណែកយ៉ាងធំធេងក្នុងការទ្រទ្រង់កំណើនសេដ្ឋកិច្ច។ គិតក្នុងរយៈពេល 11ខែ ឆ្នាំ2018នេះ ជ័រកៅស៊ូនាំចេញសរុបចំនួនជាង 18ម៉ឺនតោន ប្រមូលបានចំណូលជាង 250លានដុល្លារអាមេរិក។

បច្ចុប្បន្នកម្ពុជាមានផ្ទៃដីដាំដុះកៅស៊ូចំនួនជិត 43ម៉ឺនហិកតា ក្នុងផ្ទៃដីដែលចៀរជ័របានមាន 20ម៉ឺនហិកតា ស្មើនឹង47% និងផ្ទៃដីថែទាំជាង 22ម៉ឺនហិកតា ស្មើនឹង53%។ ប្រទេសវៀតណាមនៅតែជាទីផ្សារសំខាន់សម្រាប់កៅស៊ូរបស់កម្ពុជាហើយរដ្ឋាភិបាលកំពុងចរចាជាមួយប្រទេសចិនដែលជាអ្នកនាំចូលកៅស៊ូធំបំផុតក្នុងពិភពលោកដើម្បីចាប់ផ្ដើមនាំចេញដោយផ្ទាល់។ កៅស៊ូរបស់កម្ពុជានាំចេញទាំងស្រុងទៅកាន់ប្រទេសវៀតណាម ម៉ាឡេស៊ី សិង្ហបុរី ចិន និងកូរ៉េខាងត្បូង៕

December 27, 2018

EU នឹងផ្តល់ឱ្យកម្ពុជានូវជំនួយហិរញ្ញប្បទានឥតសំណងសរុបចំនួន 115លានអឺរ៉ូ សម្រាប់កម្មវិធីចំនួន 3

ទឹកប្រាក់សរុបចំនួន 115លានអឺរ៉ូ (ជាង130លានដុល្លារ)ត្រូវបានសហភាពអឺរ៉ុបកំពុងរៀបចំផ្តល់ហិរញ្ញប្បទានឥតសំណងឱ្យកម្ពុជាសម្រាប់កម្មវិធីចំនួន3។ នេះបើតាមសេចក្តីប្រកាសព័ត៌មានស្តីពីជំនួបរវាងលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាមួយនឹងលោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា ដែលជំនួបនេះ ធ្វើឡើងកាលពីពាក់កណ្ដាលខែធ្នូ ឆ្នាំ2018នៅទីស្តីការក្រសួងសេដ្ឋកិច្ច និងហិរញ្ញវត្ថុ។

លោក ចច អេដហ្គា (George Edgar) ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានថ្លែងអះអាងក្នុងឱកាសដែលលោកបានចូលជួបពិភាក្សាអំពីកម្មវិធីកិច្ចសហប្រតិបត្តិការកម្ពុជា-សហភាពអឺរ៉ុបជាមួយ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុថា នៅពេលនេះសហភាពអឺរ៉ុបកំពុងរៀបចំផ្តល់ជំនួយជាថវិកាចំនួន 115លានអឺរូដល់កម្ពុជា ដើម្បីអនុវត្តនូវកម្មវិធីចំនួន3។

ក្នុងស្មារតីបន្តជំរុញ និងពង្រឹងកិច្ចសហប្រតិបត្តិការ សម្រាប់កម្មវិធីចំនួន3 រួមមាន៖ 1- កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈចំនួន 22លានអឺរ៉ូ (ជិត 30លានដុល្លារ)បន្ថែម។ 2- កម្មវិធីជំរុញកំណើនវិស័យជលផលប្រកបដោយចីរភាព និងបរិយាប័ន្ន (ផ្នែកនេសាទ)ចំនួន 87លានអឺរ៉ូ (ជាង98លានដុល្លារ)និង3- កម្មវិធីសម្ព័ន្ធភាពប្រែប្រួលអាកាសធាតុកម្ពុជា ដំណាក់កាលទី3ចំនួន6លានអឺរ៉ូ (ជាង6,8លានដុល្លារ) ទៀត។

ក្នុងជំនួបដ៏មានតម្លៃនេះ ក្នុងនាមរាជរដ្ឋាភិបាលកម្ពុជា អគ្គបណ្ឌិតសភាចារ្យ ឧបនាយករដ្ឋមន្ត្រី បានស្វាគមន៍យ៉ាងកក់ក្តៅចំពោះលោក ចច អេដហ្គា និងសហការី និងបានវាយតម្លៃខ្ពស់ចំពោះការគាំទ្រផែ្នកហិរញ្ញវត្ថុ និងកិច្ចសហប្រតិបត្តិការដ៏ល្អប្រសើររវាងសហភាពអឺរ៉ុប និងរាជរដ្ឋាភិបាលកម្ពុជា ដែលបានបង្ហាញការគាំទ្រជាគោលការណ៍ចំពោះសំណើកម្មវិធីទាំង3ខាងលើនេះ ព្រមទាំងបានសន្យាជួយសម្របសម្រួល និងសហការរៀបចំជាមួយក្រសួងជំនាញពាក់ព័ន្ធដើម្បីឈានទៅចុះហត្ថលេខាកិច្ចព្រមព្រៀងឱ្យទាន់ដើមឆ្នាំ2019 ខាងមុខនេះ។

អគ្គបណ្ឌិតសភាចារ្យឧបនាយករដ្ឋមន្ត្រី ក៏បានថ្លែងអំណរគុណសហភាពអឺរ៉ុប ចំពោះជំហរបន្តគាំទ្រ និងពង្រឹងកិច្ចសហប្រតិបត្តិការជាមួយរាជរដ្ឋាភិបាលបន្ថែមទៀត ដែលឆ្លុះបញ្ចាំងអំពីសុភវិនិច្ឆ័យចំពោះសមិទ្ធផល ដែលរាជរដ្ឋាភិបាលខិតខំសម្រេចបាន៕

December 27, 2018

លោក Klopp រំភើប ក្រោយ Liverpool បន្តភាពខ្លាំង ខណៈ Man City ចាញ់ម្តងទៀត

លោក Jurgen Kloppបានអំពាវនាវឱ្យមានការស្ងប់អារម្មណ៍ ក្រោយពីដណ្តើមបានជ័យជម្នះក្នុងលទ្ធផល 4-០ របស់ Liverpool លើក្រុម Newcastle ដែលបានជួយបន្ថែមពិន្ទុនាំមុខរបស់ក្លិបនេះនៅលើកំពូលតារាងក្របខ័ណ្ឌ Premier League រហូតដល់ 6ពិន្ទុ។

ក្រុម Liverpool កំពុងតែស្ថិតក្នុងការរង់ចាំ ចាប់តាំងពីឆ្នាំ1990 ដើម្បីឈ្នះពានក្របខ័ណ្ឌកំពូលរបស់អង់គ្លេស ហើយនៅរដូវកាលនេះ វាហាក់បង្ហាញថានឹងក្លាយជាឱកាសមួយក្នុងចំណោមឱកាសដ៏ល្អបំផុតរបស់ពួកគេ ដើម្បីបញ្ចប់ការមិនឈ្នះពានសោះនោះ។

ការដណ្តើមបានជ័យជម្នះលើក្រុម Newcastle នាកីឡដ្ឋាន Anfield កាលពីថ្ងៃពុធ បានកើតឡើងតាមរយៈគ្រាប់បាល់ស៊ុតបញ្ចូលទីពីកីឡាករ 4នាក់រួមមាន DejanLovren, Mohamed Salah, XherdanShaqiriនិង Fabinho ដែលជួយឱ្យមើលឃើញពីភាពខ្លាំងក្នុងតំបន់ប្រយុទ្ធរបស់ក្រុម Liverpool។

ស្របពេលជាមួយគ្នានេះ ក្រុម Manchester City បានរងបរាជ័យជាលើកទី2 ក្នុងរយៈពេល 5ថ្ងៃ ដោយចាញ់នៅលើទឹកដីក្រុម Leicester 2-1។

ក្រុម Tottenham បានឡើងឈរពីលើក្រុម Man City ក្នុងចំណាត់ថ្នាក់លេខ2 ក្រោយពីបានលត់ក្រុម Bournemouth យ៉ាងចាស់ដៃក្នុងលទ្ធផល 5-០ ស្របពេលក្រុម Eden Hazard បានស៊ុតបាល់បញ្ចូលទី2គ្រាប់ ក្នុងពេលក្រុម Chelsea បានយកឈ្នះ 2-1 លើទឹកដីក្រុម Watford ប៉ុន្តែ ក្រុមឈរលេខ4 Arsenal ត្រឹមតែអាចបញ្ចប់ក្នុងលទ្ធផលស្មើ 1-1 នៅលើទឹកដីក្រុម Brighton។

លោក Klopp បានបញ្ជាក់ថា៖ «ការនាំមុខ 6ពិន្ទុដាច់មិនមានន័យអ្វីឡើយ។ យើងនឹងត្រូវលេងជាមួយនឹងក្រុម Arsenal និង Man City។ វាជារឿងល្អដែលយើងមាន 6ពិន្ទុបន្ថែមទៀតច្រើនជាងក្រុមផ្សេង ឬ7ពិន្ទុនោះ»៕

December 27, 2018

Author: វល័ក្ខ