វល័ក្ខ - La Reine Media

Barca ទៅជួប Juventus ខណៈ Chelsea សម្លឹងកៅអីវគ្គ 16ក្រុម រាត្រីនេះ

ក្រុមយក្សអេស្ប៉ាញ Barcelona នឹងធ្វើដំណើរទៅជួបក្រុមធ្លាក់ទម្រង់លេង Juventus ក្នុងការប្រកួតវគ្គចែកពូលនេះក្របខ័ណ្ឌ Champions League នៅរាត្រីនេះ ស្របពេលដែលក្រុមម្ចាស់ជើងឯកអង់គ្លេស Chelsea សម្លឹងរកកៅអីវគ្គ16ក្រុមចុងក្រោយ នៅពេលដែលពួកគេនឹងធ្វើដំណើរទៅកាន់ទីក្រុងអាស៊ែបៃហ្សង់ ដើម្បីប៉ះជាមួយនឹងក្រុម Qarabag។

ស្របពេលជាមួយគ្នានេះ Roma អាចឈ្នះកៅអីរបស់ពួកគេទៅវគ្គបន្ទាប់ តាមរយៈការដណ្តើមបាន1ពិន្ទុលើទឹកដីក្រុម Atletico Madrid ស្របពេល Chelsea នឹងឈានទៅវគ្គ16ក្រុម ដោយការយកឈ្នះលើក្រុម Qarabag ឬប្រសិនបើ Atletico មិនអាចដណ្តើមបានជ័យជម្នះក្នុងប្រទេសអេស្ប៉ាញ។ Roma បានកម្តៅសាច់ដុំសម្រាប់ការប្រកួតនេះ តាមរយៈការយកឈ្នះ Lazio 2-1 ក្នុងការប្រកួតលីករបស់ពួកគេ។ ក្នុងពូល C ដូចគ្នានេះ Chelsea នឹងឈានទៅកាន់ការប្រកួតនេះ ទាំងការជឿជាក់ ក្រោយពីបានលត់ក្រុម Qarabag យ៉ាងចាស់ដៃក្នុងលទ្ធផល 6-០ ក្នុងពេលក្រុមទាំងបានជួបគ្នាកាលពីថ្ងៃបើកឆាក។ មិនត្រឹមតែប៉ុណ្ណោះ ក្រុមតោខៀវមួយនេះ បានកម្តៅសាច់ដុំសម្រាប់ការប្រកួតនេះ តាមរយៈការផ្តួលក្រុម West Brom ក្នុងលទ្ធផល 4-០ ក្នុងការប្រកួតក្របខ័ណ្ឌ Premier League កាលពីចុងសប្តាហ៍មុននេះ។ ស្របពេលជាមួយគ្នានេះ ក្រុម Barcelona នឹងបញ្ចប់ដោយឈរលើលេខ1ក្នុងពូល តាមរយៈការដណ្តើមបានលទ្ធផលស្មើជាមួយនឹងក្រុមម្ចាស់ជើងឯករង Juventus កាលពីឆ្នាំមុន ។ ក្រុម Juventus បានរងបរាជ័យដ៏កម្រកាលពីថ្ងៃអាទិត្យ ក្រោយពីចាញ់ក្រុម Sampdoria 3-2 ក្នុងពេលអ្នកចាំទី Gianluigi Buffon និងខ្សែការពារ Andrea Barzagli មិនត្រូវបានដាក់ឲ្យចូលលេង។ ប៉ុន្តែ លោក Ernesto Valverde គ្រូបង្វឹករបស់ក្រុម Barcelona បានសារភាពកាលពីថ្ងៃអង្គារថា លោកបានទស្សនាការរងបរាជ័យក្នុងលទ្ធផល 3-០ ក្រោមស្នាដៃក្រុម Juventus កាលពីរដូវកាលមុន ម្តងហើយម្តងទៀត ដើម្បីត្រៀមសម្រាប់ការប្រកួតរបស់ពួកគេក្នុងក្របខ័ណ្ឌ Champions League ក្នុងទីក្រុង Turin នៅរាត្រីនេះ។

លោក Valverde ដែលបានចូលជំនួសកន្លែងរបស់លោក Luis Enrique កាលពីខែឧសភា កន្លងទៅ បានឲ្យដឹងថា៖ «ខ្ញុំបានទស្សនាការប្រកួតជើងទី1ម្តងហើយម្តងទៀត ដើម្បីត្រៀមលក្ខណៈ។ នេះគឺជាវគ្គចាញ់ធ្លាក់ ហើយស្ថានភាពក៏ខុសគ្នាដែរនៅពេលនេះ ប៉ុន្តែ យើងពិតជាដឹងថា Juventus នឹងចាប់ផ្តើមយ៉ាងរឹងមាំ ហើយយើងត្រូវតែត្រៀមលក្ខណៈឲ្យរួចរាល់សម្រាប់ការវាយបក»។ Chelsea នឹងចាប់ផ្តើមប្រកួតនៅម៉ោង12 អធ្រាត្រ ខណៈ Barca និង Juventus ចាប់ផ្តើមនៅម៉ោង2:45ទៀបភ្លឺ៕

ប្រភពពី៖ sports.yahoo.com

November 22, 2017

អង្គការស៊ីប៉ា នឹងរៀបចំពិធីលៀងសាយភោជនសមោសរ (Gala Dinner) អបអរសាទរខួបទី 35ឆ្នាំ

អង្គការស៊ីប៉ា គឺជាអង្គការក្រៅរដ្ឋាភិបាលមួយរបស់ប្រទេសបារាំង ដែលបង្កើតឡើងនៅឆ្នាំ1982 ហើយអនុវត្តការងារដោយបុគ្គលិកខ្មែរប្រកបដោយវិជ្ជាជីវៈចំនួន 45នាក់។ ជាដៃគូយ៉ាងជិតស្និទ្ឋមួយរបស់ក្រសួងអប់រំ យុវជន និងកីឡា អង្គការស៊ីប៉ាបានធ្វើការងារយ៉ាងសកម្មជាមួយប្រជាជន ក្រីក្រដើម្បីអភិវឌ្ឍការអាន និងប្រយុទ្ឋប្រឆាំងនឹងអនក្ខរកម្មនៅកម្ពុជា។ ដោយគោរពតាមបេសកម្ម «អាន និងរៀន គឺដើម្បីកសាងអនាគត» អង្គការស៊ីប៉ាបានជំរុញឱ្យមានលទ្ឋភាពក្នុងការទទួលបានការអប់រំប្រកបដោយគុណភាពមួយតាមរយៈការបង្កើនការអាន និងការបោះពុម្ពសៀវភៅជាភាសាខ្មែរហើយចែកចាយទូទាំងខេត្តក្រុងក្នុងប្រទេសកម្ពុជា។ សព្វថ្ងៃនេះ បណ្ណាល័យជាង 340 ត្រូវបានដាក់ឱ្យដំណើរការនៅតាមសាលារៀន មន្ទីរពេទ្យ សហគមន៏ក្រីក្រ រោងចក្រ និងពន្ធនាគារសម្រាប់អ្នកអាន និងអ្នករៀនសរុបជាង 600,000នាក់។ អង្គការស៊ីប៉ាក៏បានបោះពុម្ពសៀវភៅជាភាសាខ្មែរជាង 1,8លានក្បាលផងដែរ។

ដើម្បីបង្កើន «ការអាន និងរៀន គឺដើម្បីកសាងបរិស្ថានល្អមួយ» អង្គការស៊ីប៉ានឹងរៀបចំពិធីលៀងសាយភោជនសមោសរ (Gala Dinner) នៅថ្ងៃទី5 ខែធ្នូ ឆ្នាំ2017 នៅសណ្ឋាគារសូហ្វីតែលភ្នំពេញភូគីត្រា ក្រោមអធិបតីភាព ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា និង លោកជំទាវ Eva Nguyen Binh ឯកអគ្គរដ្ឋទូតនៃសាធារណរដ្ឋបារាំងប្រចាំនៅប្រទេសកម្ពុជា។

គោលបំណងនៃកម្មវិធីនេះ គឺស្វែងរកមូលនិធិដើម្បីទ្រទ្រង់បណ្ណាល័យចល័តមួយសម្រាប់បង្កើនការអាន និងពង្រីកការអប់រំដែលទាក់ទងនឹងបរិស្ថានទៅដល់កុមារជាង 2,000 នាក់ក្នុងមួយឆ្នាំ។ សកម្មភាពកម្សាន្តដ៏ អស្ចារ្យជាច្រើននឹងត្រូវរៀបចំឡើងក្នុងកម្មវិធីនេះ រួមជាមួយការបង្ហាញសិល្បៈគំនូរបន្តផ្ទាល់ពីវិចិត្រករខ្មែរដ៏ ល្បីល្បាញម្នាក់គឺ កញ្ញា លីសា ម៉ម (Lisa Mam) ការបង្ហាញម៉ូតដោយប្រើប្រាស់សម្លៀកបំពាក់កែច្នៃ និងការដាក់ដេញថ្លៃផងដែរ។

រាត្រីដ៏មានអត្ថន័យនេះ នឹងមិនអាចកើតឡើងបានឡើយប្រសិនបើគ្មានការគាំទ្រអំពី សណ្ឋាគារសូហ្វីតែលភ្នំពេញភូគីត្រា ក្រុមហ៊ុន Smart Axiata ក្រុមហ៊ុន Total ធនាគារកាណាឌីយ៉ា ធនាគារអេស៊ីលីដា ក្រុមហ៊ុន Vinissimo និងសភាពាណិជ្ជកម្មបារាំងខ្មែរ (CCIFC)។

ជាចុងបញ្ចប់ នៅក្នុងរាត្រីដែលមិនអាចបំភ្លេចបាននេះ ភ្ញៀវកិត្តិយស និងអ្នកចូលរួមទាំងឡាយនឹងអញ្ជើញ ទទួលទានម្លូបអាហារដ៏ឈ្ងុយឆ្ងាញ់ ជាមួយនឹងស្រាក្រហមដ៏មានឱជារស ការសម្តែងដ៏អស្ចារ្យ និងបង្កើនទំនាក់ទំនងយ៉ាងជោគជ័យ។ នេះក៏ជាឱកាសពិសេសមួយដើម្បីសិក្សាស្វែងយល់អំពីភាពជោគជ័យរបស់ អង្គការស៊ីប៉ារយៈពេល 35ឆ្នាំកន្លងមកនេះ ក្នុងការលើកកម្ពស់ការអាននៅក្នុងប្រទេសកម្ពុជា ព្រមជាមួយនឹងការអបអរសាទរដំណាច់ឆ្នាំសកលផងដែរ។

សំបុត្រអាចរកទិញបានតាមរយៈ https://www.last2ticket.com/en/events/535/

សម្រាប់ព័ត៌មានបន្ថែមសូមទាក់ទងមក

អង្គការស៊ីប៉ា

លោក លឹម ម៉េងហួរ ជំនួយការទំនាក់ទំនង
ទូរស័ព្ទ: 015 757680; Email: [email protected]
Website: https://www.sipar.org/en
Facebook: https://www.facebook.com/siparcambodia/

November 22, 2017

ល្បីថា iPad Pro ស៊េរី 2018 នឹងមាន TrueDepth និង Face ID ដែរ

Ming-Chi Kuo អ្នកវិភាគល្បីឈ្មោះមកពី KGI Securities បានបង្ហើបឱ្យដឹងថា Apple នឹងបង្ហាញ iPad Pro ស៊េរីថ្មីក្នុងឆ្នាំ 2018 ដែលនឹងចេញមកព្រមជាមួយ Feature ល្អៗលេចធ្លោដូចគ្នានឹង iPhone X ដែរ។

អាចនឹងមានឈ្មោះថា iPad Pro X។ បន្ទាប់ពី Apple បង្ហាញខ្លួន iPhone X ស្មាតហ្វូនស៊េរីខួបកំណើត10ឆ្នាំ ជា iPhone ដែលចេញមកព្រមជាមួយកាមេរ៉ាអច្ឆរិយៈ (TrueDepth) ប្រព័ន្ធបញ្ជាក់ខ្លួនម្ចាស់តាមរយៈផ្ទៃមុខដ៏ទំនើបបំផុត (Face ID) និងអេក្រង់គ្មានគែម កម្រិតភាពច្បាស់ខ្ពស់រួចមក ក៏ធ្វើឱ្យមានពាក្យចចាមអារ៉ាមជាច្រើន រហូតដល់មានអ្នកវិភាគខ្លះជឿថា Apple អាចនឹងនាំយក Featuer ទាំងនេះទៅដាក់ក្នុង iPad Pro ស៊េរីថ្មីដែលនឹងចេញក្នុងឆ្នាំ2018 ខាងមុខនេះទៀតផង។

iPad Pro ក៏ជាឧបករណ៍លើកកេរ្តិ៍ឈ្មោះមួយរបស់ Apple ដែរ ព្រោះអាចរាប់បានថាជាធេប្លេតស៊េរីកំពូលរបស់ក្រុមហ៊ុនផងដែរ ទើបមិនមែនជារឿងប្លែកឡើយបើសិនជា Apple ចង់យក Featuer ក្នុង iPhone X មកដាក់ក្នុងiPad Pro ស៊េរីបន្ទាប់ទៀត ហើយថែមជាការជួយបង្កើនភាពល្បីល្បាញរបស់ Featuer ស្គែនផ្ទៃមុខនេះទៀតផង ធ្វើឱ្យអ្នកអភិវឌ្ឍទាំងឡាយងាកមកចាប់អារម្មណ៍តិចណូឡូជីនេះកាន់តែច្រើនឡើង៕

November 22, 2017

Chocolate Hillsបណ្ដុំកូនភ្នំចម្លែកនៃកោះ បូហល ហ្វ៊ីលីពីន

ប្រទេសជិតខាងក្នុងតំបន់អាស៊ានរបស់យើងមួយទៀតដែលមានតំបន់ស្អាតៗគួរឱ្យចង់ទៅកម្សាន្តជាច្រើនកន្លែង មិនថាតែឆ្នេរ បូរ៉ាហ្គាយ ដ៏ស្រស់ស្អាត និងល្បីល្បាញនោះទេ តែក៏នៅមានទីកន្លែងដែលចម្លែកភ្នែកមួយទៀតដែលកើតឡើងពីការបង្កើតរបស់ធម្មជាតិ ថែមទាំងមានឈ្មោះដូចគ្នានឹងស្ករគ្រាប់ទៀតផង គឺ សូកូឡា ហៀល។ តើទីនោះមានអ្វីខ្លះទៅ ទំព័រទេសចរណ៍ឡារ៉ែន នឹងនាំមិត្តអ្នកអានទៅទស្សនាទាំងអស់គ្នា…។សូកូឡា ហៀល (Chocolate Hills) ស្ថិតនៅលើកោះ បូហល ប៉ែកខាងកើតទីក្រុងម៉ានីល ប្រទេសហ្វ៊ីលីពីន។ កោះនេះមានឈ្មោះថាជាកោះដែលធំជាងគេបំផុតរបស់ហ្វ៊ីលីពីន មានភាពស្រស់ស្អាតតាមធម្មជាតិដែលល្អឥតខ្ចោះ។ ឆ្នេរសមុទ្រត្រូវបានក្រាលដោយខ្សាច់ពណ៌សក្បុស មានសម្បត្តិធម្មជាតិក្រោមសមុទ្រដ៏សែនស្រស់ស្អាត ដែលអ្នកមុជទឹកទាំងឡាយតែងនឹកស្រមៃចង់ទស្សនា តែទីកន្លែងដែលធ្វើឱ្យ បូហលមានលក្ខណៈឯក លេចធ្លោខុសពីទីកន្លែងផ្សេងទៀតនោះគឺ ដែនដីមួយនេះឯង។

ទ្រង់ទ្រាយរបស់ សូកូឡា ហៀល គឺជាកូនភ្នំតូចៗ ជារាងសាជីផ្កាប់ ដែលមានលក្ខណៈហាក់ដូចជាប៉ុនៗគ្នា រៀងគ្នាជាជួរក្នុងបរិវេណដ៏ធំទូលាយ គ្របដណ្ដប់លើផ្ទៃដីជាង50គីឡូម៉ែត្រការ៉េ ដែលគេប៉ាន់ស្មានថា មានចំនួនប្រមាណជា1,260 ទៅ 1,776កូនភ្នំ។ កម្ពស់ជាមធ្យមគឺប្រមាណជា30-50ម៉ែត្រ ចំណែកកូនភ្នំដែលធំជាងគេបំផុតមានកម្ពស់120ម៉ែត្រ។ គ្រោងសាងកូនភ្នំទាំងនេះគឺជាថ្មកំបោរ ដែលគ្របដណ្ដប់ដោយដើមស្មៅ ដោយកូនភ្នំទាំងនេះកើតពីស្នាដៃរបស់ធម្មជាតិដ៏អស្ចារ្យពន់ពេក។ ចំណែកប្រភពនៃឈ្មោះដែលហៅថា ភ្នំស្ករសូកូឡានេះ គឺមកពីវាមានរូបរាងលក្ខណៈស្រដៀងនឹងគ្រាប់ស្ករសូកូឡាមូលតូចៗជាច្រើនដុំដែលមករួមគ្នានៅក្នុងកន្លែងតែមួយហ្នឹងឯង។

ចំណែកប្រវត្តិដែលធ្វើឱ្យកើតជាកូនភ្នំតូចធំឡើងចំនួនច្រើនបែបនេះ គេនាំគ្នានិយាយថា កាលពីយូរលង់ច្រើនលានឆ្នាំមុន នៅបរិវេណនោះគឺជាផ្ទៃមហាសមុទ្រ ហើយនេះគឺជួរផ្កាថ្មដ៏សែនសម្បូរបែប ក្រោយមកទឹកសមុទ្របានកើតការរីងស្ងួតហួតហែងអស់ បន្ទាប់ពីនោះមកក៏កើតមានការកកើតការពូនគររបស់ថ្មកំបោរឡើងរហូតក្លាយជាកូនភ្នំទាំងនោះ។

តែបើតាមរឿងរ៉ាវនិទានរបស់អ្នកស្រុកភូមិក្បែរៗនោះវិញ គេនាំគ្នាតំណាលថា កាលពីច្រើនលានឆ្នាំមុន មានយក្ស2ក្បាល តែងតែឈ្លោះគ្នាជាប្រចាំ ពេលខឹងសម្បា ក្រេវក្រោធម្ដងៗ តែងតែលើកដុំថ្មធំៗគប់ដាក់គ្នា។ ឈ្លោះគ្នាគ្មាន
លស់ថ្ងៃរហូតដល់ធុញទ្រាន់ ក៏បែរមកចរចាត្រូវរ៉ូវគ្នា និងបានក្លាយមិត្តសម្លាញ់នឹងគ្នាវិញនៅទីបំផុត។ បន្ទាប់ពីនោះមកមហាយក្សទាំង2 មិនព្រមបោសសម្អាតទីកន្លែងដែលខ្លួនធ្លាប់លើកដុំថ្មគប់ដាក់គ្នានោះឡើយ ទើបវាក្លាយជាគំនរថ្ម និងដីដែលមានចំនួនដ៏ច្រើនមហាសាលឱ្យយើងបានទស្សនានៅថ្ងៃនេះ។ឯរឿងមួយទៀតបានតំណាលថា គឺជាសោកនាដកម្មរ៉ូមែនស៍ ដែលបង្កឡើងដោយមហាយក្សមួយក្បាលដែលលង់ស្នេហ៍នឹងនារីម្នាក់ តែក្រោយមកនារីម្នាក់នោះបានស្លាប់ចោល ធ្វើឱ្យមហាយក្សខូចចិត្តសោកស្ដាយ ក៏ស្រែកទួញសោកទ្រហោយំ រហូតទឹកភ្នែកក្លាយជាកូនភ្នំទាំងនោះរហូតមកដល់សព្វថ្ងៃនេះ។

ទោះជាមានរឿងតំណាលពីប្រវត្តិដែលពាក់ព័ន្ធនឹងបណ្ដុំភ្នំ សូកូឡា ហៀល នេះជាច្រើនរឿងក៏ដោយ តែទីបំផុតទៅ ទ្រឹស្ដីខាងធរណីវិទ្យា មើលទៅហាក់ដូចជាមានភាពពិតត្រឹមត្រូវជាមួយនឹងចម្លើយខ្លាំងបំផុត តែក៏នៅតែមានចំណុចសង្ស័យដដែលថា តើវាគរពីលើគ្នាយ៉ាងណា បានក្លាយជារូបសាជីផ្កាប់ដែលមានទំហំសឹងតែប៉ុនៗគ្នាដល់ថ្នាក់នេះ? ដែលសូម្បីតែអ្នកជំនាញការក៏មិនទាន់រកចម្លើយច្បាស់លាស់ឃើញនៅឡើយដែរ…៕

November 22, 2017

ក្រុមហ៊ុនថៃជំនាញរៀបចំព្រឹត្ដិការណ៍ស្ដង់ដារអន្ដរជាតិ កំពុងស្វែងរកដៃគូសហការនៅកម្ពុជា

ក្រុមហ៊ុនទាំង 12មកពីប្រទេសថៃ ដែលមានជំនាញរៀបចំកម្មវិធី និងព្រឹត្ដិការណ៍ធំៗស្ដង់ដារជាតិ និងអន្ដរជាតិ បានរៀបចំកម្មវិធី «ការចាប់ដៃគូពាណិជ្ជកម្មផ្នែករៀបចំព្រឹត្ដិការណ៍រវាងពាណិជ្ជករកម្ពុជា និងថៃ» នៅថ្ងៃម្សិលមិញនេះ ដើម្បីពិភាក្សាស្វែងរកដៃគូនៅកម្ពុជា ក៏ដូចជាអតិថិជនផងដែរ។

លោក ជីរ៉ាវុឍ សុវណ្ណាអាត អគ្គទីប្រឹក្សាពាណិជ្ជកម្មនៃស្ថានតំណាងពាណិជ្ជកម្មប្រចាំស្ថានឯកអគ្គរាជទូតថៃ បានលើកឡើងថា អគ្គនាយកដ្ឋានជំរុញពាណិជ្ជកម្មអន្ដរជាតិនៃក្រសួងពាណិជ្ជកម្មថៃបានដឹកនាំគណៈប្រតិភូចំនួន12ក្រុមហ៊ុនដែលមានអាជីវកម្មរៀបចំព្រឹត្ដិការណ៍ (Event) ដើម្បីចូលរួមក្នុងការមកចាប់ដៃគូពាណិជ្ជកម្មជាមួយក្រុមហ៊ុននៅក្នុងប្រទេសកម្ពុជា។

ក្រុមហ៊ុនដែលមានជំនាញរៀបចំព្រឹត្ដិការណ៍ធំៗមកពីប្រទេសថៃទាំង12 ធ្លាប់មានបទពិសោធក្នុងការងារជំនាញនេះអស់រយៈពេលជិត50ឆ្នាំមកហើយ ដោយក្រុមហ៊ុនទាំងនេះធ្លាប់មានកេរ្កិ៍ឈ្មោះ និងទទួលបានការកោតសរសើរពីសំណាក់អតិថិជនដែលជាម្ចាស់ក្រុមហ៊ុនជាតិ និងអន្ដរជាតិចំពោះជំនាញ និងទេពកោសល្យដ៏ល្អរបស់ពួកគេ។

លោកបន្ដថា បច្ចុប្បន្នអ្នករៀបចំព្រឹត្ដិការណ៍របស់ប្រទេសថៃទាំងនេះបានត្រៀមខ្លួនរួចជាស្រេចក្នុងការបង្ហាញនូវសក្ដានុពលដ៏ខ្លាំងក្លារបស់ខ្លួនឱ្យបានឃើញយ៉ាងច្បាស់នៅមុខក្រសែភ្នែកប្រជាជនទូទាំងពិភពលោក។ ពួកគេជឿជាក់ ហើយសម្លឹងឃើញទិសដៅដូចគ្នា និងឈានទៅមុខជាមួយអតិថិជន។ ជាងនេះទៅទៀត ពួកគេមានក្រុមការងារដែលមានជំនាញគ្រប់ផ្នែកដើម្បីឆ្លើយតបការរៀបចំកម្មវិធីព្រឹត្ដិការណ៍ផ្សេងៗនៅគ្រប់ទីកន្លែងនៅក្នុងប្រទេសកម្ពុជា និងទូទាំងពិភពលោក។

នៅទីបញ្ចប់ លោកជីរ៉ាវុឍ សុវណ្ណាអាត បានថ្លែងថា ដូច្នេះយើងសង្ឃឹមថា វត្ដមានរបស់ក្រុមហ៊ុនទាំង12ដែលមានជំនាញរៀបចំព្រឹត្ដិការណ៍ ក៏ដូចជាម៉ៅការរៀបចំព្រឹត្ដិការណ៍ នឹងកាន់តែពង្រឹងទំនាក់ទំនងពាណិជ្ជកម្មលើវិស័យឯកជននៃប្រទេសទាំងពីរឱ្យកាន់តែរឹងមាំបន្ថែមទៀត៕

November 22, 2017

Kane សាទរជ័យជម្នះរបស់ Spurs ខណៈ Real លត់ APOEL ចាស់ដៃ

ខ្សែប្រយុទ្ធ Harry Kane របស់ក្រុម Tottenham Hotspur បានសាទរចំពោះការសម្រេចបាននូវសមិទ្ធផលដ៏ធំមួយនៃក្រុមរបស់គេ តាមរយៈការបញ្ចប់ដោយការឈរលេខ១លើពូល H ក្នុងក្របខ័ណ្ឌ Champions League ក្រោយពីបានវាយបកដើម្បីផ្តួលក្រុម Borussia Dortmund 2-1។

Spurs មានសុវត្ថិភាពក្នុងការឈរលេខ1ក្នុងពូល H ក្រោយពីគ្រាប់បាល់ស៊ុតបញ្ចូលទីពីសំណាក់ Kane និង Son Heung-min បានបំពេញជ័យជម្នះរបស់ពួកគេ ក្រោយពីខ្សែប្រយុទ្ធ Pierre-Emerick Aubameyang របស់ក្រុម Dortmund បានជួយឲ្យក្រុមម្ចាស់ផ្ទះមានគ្រាប់បាល់នាំមុខមុន។ លទ្ធផលនេះ បានធ្វើឲ្យក្រុម Tottenham ដែលបានឈ្នះកៅអីទៅវគ្គបន្តរួចជាស្រេចនោះ មាន13ពិន្ទុ និងបានធ្វើឲ្យក្រុម Real Madrid ត្រូវមានវាសនាបញ្ចប់ក្នុងចំណាត់ថ្នាក់លេខ2 ខណៈដែលនៅសល់1ប្រកួតទៀត។ Kane បានប្រាប់ទូរទស្សន៍ BT Sport ថា៖ «វាជារាត្រីដ៏ធំ និងអស្ចារ្យមួយសម្រាប់យើង សម្រាប់អ្នកគាំទ្រ សម្រាប់ក្លិប ក្នុងការបញ្ចប់ដោយឈរលើកំពូលនៃតារាងពូល ខណៈដែលនៅសល់1ប្រកួតទៀត។ គ្រប់គ្នាបានដាក់ក្តីសង្ឃឹមមកលើយើង នៅមុនពេលប្រកួត។ វាជាកន្លែងដ៏លំបាកក្នុងការទៅដល់ និងឈ្នះ។ ពិតជារាត្រីដ៏អស្ចារ្យមែន»។

ខ្សែប្រយុទ្ធ Cristiano Ronaldo បានស៊ុតបាល់បញ្ចូលទី2គ្រាប់ ខណៈដែលក្រុមម្ចាស់ការពារតំណែងជើងឯក Real Madrid បានលត់ក្រុម APOEL យ៉ាងចាស់ដៃក្នុងលទ្ធផល 6-០ ក្នុងទីក្រុងស៊ីប ដើម្បីឈានទៅវគ្គ16ក្រុមចុងក្រោយនៃក្របខ័ណ្ឌ Champions League កាលពីថ្ងៃអង្គារ ស្របពេលដែលក្រុម Liverpool បានខ្ជះខ្ជាយគ្រាប់បាល់នាំមុខ3គ្រាប់ក្នុងការប្រកួតដ៏រំភើបនៅលើទឹកដីក្រុម Sevilla។

ក្រុម Real របស់លោក Zinedine Zidane បានធ្វើការស្តារមុខមាត់ពីការរងបរាជ័យរបស់ពួកគេក្នុងលទ្ធផល 3-1 នៅលើទឹកដីក្រុម Tottenham Hotspur កាលពីជុំមុន តាមរយៈការលត់ក្រុម APOEL យ៉ាងចាស់ដៃ ខណៈដែលពួកគេបានរកបាន4គ្រាប់នៅត្រឹមតង់ទី1៕

ប្រភពពី៖ Daily Stars

November 22, 2017

កម្ពុជា និងមីយ៉ាន់ម៉ា ភ្ជាប់ជើងហោះហើរត្រង់ទៅមកដើម្បីទាក់ទាញទេសចរ

ភ្នំពេញ៖ ក្នុងគោលដៅទាក់ទាញទេសចរនៃប្រទេសទាំងពីរឱ្យមានចំនួនកាន់តែច្រើន រដ្ឋមន្ត្រីក្រសួងសណ្ឋាគារ និងទេសចរណ៍មីយ៉ាន់ម៉ា ឯកឧត្តម U Onh Maung បានបន្តជួបពិភាក្សាការងារជាមួយ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ដើម្បីជំរុញស្មារតីនៃអនុស្សរណៈយោគយល់គ្នាស្ដីពីកិច្ចសហប្រតិបត្តិការទេសចរណ៍ឆ្នាំ 2017-2020 ដោយផ្តោតលើការពិភាក្សាស៊ីជម្រៅលើចំណុចសំខាន់ៗ 4 រួមមាន៖ ការជំរុញការតភ្ជាប់ការហោះហើរត្រង់រវាងខេត្តសៀមរាប និងបាហ្កាន ការផ្សព្វផ្សាយរួមគ្នា ការសម្រួលការធ្វើដំណើរ និងការបណ្តុះបណ្តាលធនធានមនុស្ស។

ក្រោយកិច្ចពិភាក្សា ភាគីកម្ពុជា និងមីយ៉ាន់ម៉ាបានឯកភាពគ្នាដូចតទៅ៖

1 – ជំរុញការបង្កើនជើងហោះហើរពីទីក្រុងឌូបៃនៃសហភាពអ៉ារ៉ាប់អេម៊ីរ៉ាត-យ៉ាំងហ្គោន- ភ្នំពេញ តាមរយៈក្រុមហ៊ុនអាកាសចរណ៍ Fly Emirates និងការជំរុញការតភ្ជាប់ជើងហោះហើរ ពីទីក្រុងយ៉ាំងហ្គោន-សៀមរាបអង្គរ រវាងក្រុមហ៊ុនអាកាសចរណ៍មីយ៉ាន់ម៉ា និងអាកាសចរណ៍កម្ពុជា Cambodia Angkor Air ដែលក្រុមហ៊ុនទាំងពីរនឹងបន្តពិភាក្សាការងារបច្ចេកទេសដើម្បីជំរុញការហោះហើរត្រង់ឱ្យបានឆាប់។

2 – ជំរុញការផ្សព្វផ្សាយរួមគ្នាដើម្បីបន្តរក្សាសមិទ្ធផលដែលភាគីទាំងពីរបានធ្វើរួមគ្នា ដូចជាការបោះពុម្ភប័ណ្ណផ្សព្វផ្សាយគោលដៅទេសចរណ៍សៀមរាបអង្គរ និងបាហ្គាន (ប្រទេសពីរ គោលដៅតែមួយ) ការផ្លាស់ប្តូរទស្សនកិច្ច Farm Trip សម្រាប់ប្រព័ន្ធផ្សព្វផ្សាយ និងការសម្តែងវប្បធម៌រួមគ្នា។

3 – ខណៈពេលដែលប្រទេសទាំងពីរមានការលើកលែងទិដ្ឋាការរួចហើយ សម្រាប់ប្រជាជននៃប្រទេសទាំងពីរក្នុងក្របខ័ណ្ឌអាស៊ាន ភាគីទាំងពីរនឹងបន្តខិតខំសម្រួលការផ្តល់ទិដ្ឋាការសម្រាប់ទេសចរមកពីប្រទេសទី3ទៀត ដោយផ្តល់ទិដ្ឋាការពេលមកដល់ (Visa-on-arrival និងE-visa)ដើម្បីចូលមកកាន់ប្រទេសទាំងពីរ។

4 – ការជំរុញការផ្លាស់ប្តូរទស្សនកិច្ចសិក្សាដកស្រង់បទពិសោធរវាងមន្ត្រីជំនាញរបស់ក្រសួងទេសចរណ៍នៃប្រទេសទាំងពីរ ក៏ដូចជាបុគ្គលិកជំនាញមកពីវិស័យឯកជនដើម្បីចែករំលែកបទពិសោធអនុវត្តល្អៗ សំដៅកសាងសមត្ថភាពធនធានមនុស្សក្នុងវិស័យទេសចរណ៍។

សូមកត់សម្គាល់ថា ភាគីទាំងពីរក៏បានស្នើឱ្យមានជំនួបពិភាក្សាការងារថ្នាក់រដ្ឋមន្ត្រីទេសចរណ៍នៃប្រទេសទាំងពីរឱ្យបានយ៉ាងតិចមួយដងក្នុងមួយឆ្នាំ និងបង្កើតជំនួបពិភាក្សារវាងក្រុមការងារជំនាញ និងផ្នែកឯកជនឱ្យបានច្រើនដងជារៀងរាល់ឆ្នាំ៕

November 22, 2017

Huawei ផ្ដល់អណ្តូងទឹកស្អាត 50 ដល់ពលរដ្ឋខេត្តចំនួន 5

ថ្មីៗនេះ Huawei ដែលជាក្រុមហ៊ុនឈានមុនផ្នែកបច្ចេកវិទ្យា ទូរគមនាគមន៍ ព័ត៌មានវិទ្យាលើពិភពលោក រៀបចំពិធីសម្ភោធដាឲ្យប្រើប្រាស់ “អណ្តូងទឹកសម្តេចតេជោ” ចំនួន 50 អណ្តូងប្រគល់ជូនពលរដ្ឋរស់នៅខេត្តចំនួន 5 បានប្រើប្រាស់។

ក្រោមអធិបតីភាព ឯកឧត្តមបណ្ឌិត អ៊ុក រ៉ាប៊ុន រដ្ឋមន្ត្រីក្រសួអភិវឌ្ឍន៍ជនបទ ឯកឧត្តម លី អាន អគ្គកុងសុលផ្នែកសេដ្ឌកិច្ច និងពាណិជ្ជកម្មនៃស្ថានទូតសាធារណរដ្ធប្រជាមានិតចិន ឯកឧត្តមអភិបាលខេត្តកំពង់ឆ្នាំង រួមទាំង ភ្ញៀវ កិត្តិយស លោក លោកស្រី អ្នកសារព័ត៌មាន និងប្រជាជនកម្ពុជាប្រមាណ 300នាក់ ។

អណ្តូងសរុបចំនួន 50 ត្រូវបានបែងចែកដល់ 5 ខេត្តដែលខ្សត់ប្រភពទឹក ឆ្ងាយៗ បានសាងសង់នៅក្នុងខេត្តចំនួនប្រាំ មាន ខេត្តកំពង់ឆ្នាំង ខេត្តកំពង់ស្ពឺ ខេត្តស្វាយរៀង ខេត្តព្រៃវែង និងខេត្តបន្ទាយមានជ័យ ក្នុងមួយខេត្តទទួលបាន 10 អណ្តូង ដោយប្រសិទ្ធិនាម អណ្តូងទឹកសម្តេចតេជោរ ។

លោក ដាវិត លី (David Lixiongwei) អគ្គនាយកប្រតិបត្តិជាន់ខ្ពស់ក្រុមហ៊ុន Huawei តិចណូឡូជី ប្រចាំនៅកម្ពុជា បានមានប្រសាសន៍ “កាលពីខែកញ្ញ ឆ្នាំ 2016 កន្លងទៅនេះ សម្តេចអគ្គមហាសេនាធិបតីតេជោរ ហ៊ុន សែន នាយករដ្ផមន្ត្រីនៃ ព្រះរាជាណាចក្រកម្ពុជា បានជួបសន្ទនាជាផ្លវូការជាមួយ នាយកប្រតិបត្តិជាន់ខ្ពស់ក្រុមហ៊ុន Huawei ប្រចាំពិភពលោកទាំងមូល លោក លី ជីញជី (Li Jinge) ក្នុងជំនូបទ្វេរភាគីនិងផ្លូវការ ក្នុងឱកាសពិព័រណ៌ដ៍ធំប្រចាំឆ្នាំ រវាង ចិន និងអាស៊ាន នាទីក្រុងណាន់ណីង ក្រុមហ៊ុន Huawei ក្នុងនាមក្រុមហ៊ុនដែលមានទំនួលខុសត្រូវនៅកម្ពុជា បានបញ្ចក់និងបង្ហាញជំហរគាំទ្រនិងផ្តល់អំណោយ អណ្តូងទឹកចំនួន 50 អណ្តូង ដើម្បលើកកំពស់សុភាព អនាម័យ ទឹកស្អាត រស់នៅស្អាត ដល់ប្រជាជន នៅទីជនបទជូនដល់សម្តេច ក៍ដូចជារាជរដ្នាភិបាលកម្ពុជា ។ ថ្ងៃនេះ គឺជាថ្ងៃដ៍ឧឡារឹក ដែលយើងបានជួបជុំគ្នា នៅទីនេះ ប្រកបដោយមោទនភាពដើម្បីបំពេញនូវ ការតាំងចិត្តការសន្យា និងមានក្តីរីករាយដែលបានឃើញលទ្ធផលជាផ្លែផ្ការគឺអណ្តូងទឹកដែលផ្តល់ 50 អណ្តូង ដើម្ប លើក កំពស់សុខភាព អនាម័យ ទឹកស្អាត រស់នៅស្អាត ដល់ប្រជាជននៅតាម ទីជនបទដាច់ស្រយ៉ាល។

ឯកឧត្តមបណ្ឌិត អ៊ុក រ៉ាប៊ុន រដ្ឋមន្ត្រីក្រសួអភិវឌ្ឍន៍ជនបទ មានប្រសាសន៍ថា “ក្នុងនាមសម្តេចអគ្គមហាសេនាធិបតីតេជោ ហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជា ខ្ញុំសូមសម្តែងនូវអំណរគុណយ៉ាងជ្រាលជ្រៅ និង សូមវាយតម្លៃខ្ពស់ចំពោះកាយវិការដ៏សប្បុរស និងថ្លៃថ្លារបស់ក្រុមហ៊ុន Huawei ដែលបានឧបត្ថម្ភថវិកាដ៏ច្រើនសន្ធឹកសន្ធាប់សម្រាប់រួមចំណែកក្នុងការស្តារ និងអភិវឌ្ឍន៍ហេដ្ឋារចនាសម្ព័ន្ធរូបវ័ន្ត ពិសេស គឺការសាងសង់ “អណ្តូងទឹកសម្តេចតេជោ។ ជាការពិត ក្រុមហ៊ុន Huawei បានផ្តល់នូវហិរញ្ញប្បទានសម្បទានដ៏ច្រើនទាន់ពេលវេលា នៃតម្រូវការជាក់ស្តែង ក្នុងន័យរួមចំណែកក្នុងការស្តារ និង អភិវឌ្ឍន៍ប្រទេសកម្ពុជា ជាពិសេសលើ វិស័យហេដ្ឋាចរនាសម្ព័ន្ធជនបទនៅពេលនេះ។ ការជួយឧបត្ថម្ភគាំទ្រនេះ គឺជាការរួមចំណែកដ៏សំខាន់ជាមួយរាជរដ្ឋាភិបាលកម្ពុជា ក្នុងការជំរុញកំណើនសេដ្ឋកិច្ច និងការអភិវឌ្ឍសង្គម ក្នុងខណៈ កំពុងមានតម្រូវការចាំបាច់ក្នុងការស្តារនិងអភិវឌ្ឍន៍ប្រទេសជាតិរបស់ខ្លួននោះ។ ជាការពិតការកសាងហេដ្ឋារចនាសម្ព័ន្ធ ជាកិច្ចការចាំបាច់ របស់រាជរដ្ឋាភិបាលកម្ពុជា ក្នុងគោលដៅបង្កើនសមត្ថភាពសហគមន៍សម្រាប់សកម្មភាព នៃសុខភាព សាធារណៈ ដើម្បីបម្រើឲ្យបានជាអតិបរមាដល់ប្រយោជន៍របស់សង្គម។

Huawei គឺក្រុមហ៊ុនដែលមានទំនួលខុសត្រូវនៅកម្ពុជាបានចូលរួមនិងផ្តល់ជាអំណោយដល់រដ្ធាភិបាល ក៍ដូចជាប្រជាជនកម្ពុជាជារៀងរាល់ឆ្នាំ តួរយ៉ាងដូចជាការប្រគល់អំណោយដល់កាកបាទក្រហម ការបង្កើតកម្មវិធី បណ្តុះគ្រាប់ពូជ កម្មវិធីទស្សនៈវិស័យនៃកម្ពុជា ។ Huawei បានចាប់ផ្តើមប្រតិបត្តិការនៅកម្ពុជាតាំងពីឆ្នាំ 1999 បានសហការណ៍ ជាមួយក្រុមហ៊ុន ទូរគមនាគមន៍ ទូរសព្ទ័ បច្ចេកវិទ្យាព័ត៌មានទូរគមនាគមន៍ ក្រសួងមន្ទីរ ក៍ដូចជាតាមបណ្តារក្រុមហ៊ុន សហគ្រាសធំៗ ថ្មីៗនេះសោតក៍លេចធ្លោរខ្លាំង ផ្នែកទូរសព្ទ័ស្មាតហ្វូន ទទួលបានការពេញនិយមនៅកម្ពុជា នៅទូទាំង 25 ខេត្តក្រុង ផងដែរ ។ ក្រុមហ៊ុនបានផ្គត់ផ្គង់សំភារៈបច្ចេកវិទ្យា បណ្តាញបច្ចេកវិទ្យា សេវាកម្ម ប្រមាណ 70% ដល់ប្រជាជនកម្ពុជាទាំងអស់ ក្រុមហ៊ុនក៍បានបណ្តុះបណ្តាល ហ្វឹកហ្វើន ដល់វិស្វករ អ្នកជំនាញផ្នែក បច្ចេកវិទ្យា ព័ត៌មានវិទ្យាប្រមាណ 1,000 នាក់ ដោយផ្ទាល់ និងដោយប្រយោលនៅ កម្ពុជា ហើយភាគច្រើន នៃបុគ្គលិកគឺជាជនជាតិខ្មែរ ពោលគឺប្រមាណ 80%៕

November 22, 2017

សាច់មាន់ហ្វីឡេ ឆាម្ទេសក្រៀមរសជាតិប្លែក

ភាគច្រើន សាច់ភ្លៅមាន់ គឺជាប្រភេទសាច់ដែលមានការពេញនិយមពីសំណាក់អ្នកទទួលទាន ក៏ដូចជាការពេញនិយមពីសំណាក់អ្នកជំនាញផ្នែកដាំស្លយកទៅច្នៃធ្វើជាម្ហូបអាហារជាច្រើនមុខ ដែលក្នុងនោះរួមមានដូចជា អាំងស្ងោរ ចៀន ឆា រំលីង បំពង និងអប់គ្រឿងជាដើម។ ដោយឡែកពេលនេះ ក្រោមការជ្រើសរើសយ៉ាងពិសេសពីសំណាក់មេចុងភៅប្រចាំភោជនីយដ្ឋាន Cowboy ដែលស្ថិតនៅតាមផ្លូវប៉ាស្ទ័រ រាជធានីភ្នំពេញ ប្រភេទសាច់មាន់ហ្វីឡេ បានលេចចេញជាមុខម្ហូបដ៏ឈ្ងុយឆ្ងាញ់គួរជាទីទាក់ទាញមួយមុខទៀត ក្រោមការរួមផ្សំពីគ្រឿងផ្សំសំខាន់ៗមួយចំនួន ជាពិសេស ម្ទេសក្រៀមក្លិនក្រអូបតែម្ដង។

គ្រឿងផ្សំ
• សាច់ភ្លៅមាន់ហ្វីឡេ
• ម្ទេសដៃនាងក្រៀម
• ខ្ទឹមស ចិញ្ច្រាំ
• ប្រេងខ្យង
• ស្ករស
• អំបិល
• ម្សៅស៊ុបខ្នរ
• ប្រេងម្ទេស
• ប្រេងឆា

វិធីចម្អិន
ត្រូវដាក់ប្រេងឆាកម្ដៅឱ្យក្ដៅល្អ។ រួចយកភ្លៅមាន់ហ្វីឡេកាប់ជាដុំតូចល្មម ហើយច្របល់ជាមួយគ្រឿងផ្សំមួយចំនួនដូចជា ស្ករស ប្រេងខ្យង អំបិល និងម្សៅស៊ុបខ្នរ រួចយកទៅបំពងរួមគ្នាជាមួយម្ទេសក្រៀមឱ្យឆ្អិនល្មមហើយស្រង់ចេញទុកមួយអន្លើ។ ដាក់កម្ដៅឆ្នាំងខ្ទះឱ្យក្ដៅចាក់ប្រេងម្ទេសចូលលាយជាមួយខ្ទឹមស ហើយយកសាច់មាន់ហ្វីឡេដែលបានបំពងនោះ ឆាជាថ្មីម្ដងទៀត ដោយរោយស្ករសបន្ថែមពីលើបន្តិចៗ (រសជាតិផ្អែម ឬប្រៃអា-ស្រ័យតាមចំណូលចិត្ត) ហើយចាក់ប្រេងខ្យងចូលបន្ដិចកូរឱ្យសព្វរហូតឃើញថា ស្ងួតល្មម និងឡើងពណ៌ក្រហមល្អគួរឱ្យចង់ទទួលទានហើយ សឹមលើកចេញពីចង្ក្រាន រួចដួសដាក់ចានជាការស្រេច៕

November 21, 2017

កាសែតឡារ៉ែន ពាណិជ្ជ លេខ 102

[easy_media_download url=”https://www.lareine.com.kh/wp-content/uploads/2017/11/LRPN_102-for-web.pdf” force_dl=”1″]

November 21, 2017

Author: វល័ក្ខ