វល័ក្ខ - La Reine Media

តើអ្នកត្រៀមខ្លួនរួចស្រេចប៉ុនណាហើយ ក្នុងការធ្វើជាម្ចាស់មុខជំនួញ?

សំណួរដំបូងគេដែលអ្នកត្រូវឆ្លើយតបខ្លួនឯងនៅពេលនឹកស្រមៃចង់ចាប់ផ្ដើមធ្វើជំនួញនោះគឺ “តើអ្នកបានត្រៀមខ្លួនរួចជាស្រេចហើយឬ?” ព្រោះអ្វី…ព្រោះអ្នកនឹងក្លាយជាបុគ្គលិកដែលសំខាន់បំផុតនៅក្នុងក្រុមហ៊ុនរបស់ខ្លួនឯង។

ការវាយតម្លៃខ្លួនឯងសំខាន់ខ្លាំងជាងការវាយតម្លៃអនាគតនិយោជិត(កូនឈ្នួល)របស់អ្នកទៅទៀត។ អ្នកគួរតែអាចវិភាគពីចំណុចលេចធ្លោ និងចំណុចខ្សោយរបស់ខ្លួនឯងបាន ព្រោះការគ្រប់គ្រងចាត់ចែងការងារជំនួញរបស់ខ្លួនឯងនេះ ម្ចាស់មុខជំនួញត្រូវតែមានគុណសម្បត្តិច្រើនៗយ៉ាងរួមបញ្ចូលគ្នា។

ក្នុងការដឹកនាំឆ្ពោះទៅរកភាពជោគជ័យរបស់ការគ្រប់គ្រងមុខជំនួញ គំរូសំណួរ-ចម្លើយខាងក្រោមនេះនឹងជួយឱ្យអ្នកបានដឹងថា តើអ្នកមានភាពត្រៀមខ្លួនរួចជាស្រេចហើយឬនៅ ក្នុងការធ្វើជំនួញរបស់ខ្លួនឯង។ អ្នកអាចនាំគំរូសំណួរ-ចម្លើយនេះទៅប្រើសម្រាប់វិភាគលើមនុស្សដែលនឹងក្លាយមកជាភាគហ៊ុនិកក្នុងការគ្រប់គ្រងការងាររបស់អ្នកបានផងដែរ។

សូមកុំភ្លេចថា ចូរជ្រើសរើសយកចម្លើយក្នុងលក្ខណៈជាខ្លួនអ្នកពិតៗ មិនមែនគ្រាន់តែអារម្មណ៍ដែលគិតថាគួរតែធ្វើអ៊ីចឹងនោះទេ។ ត្រូវស្មោះត្រង់ចំពោះខ្លួនឯង ដើម្បីឱ្យទទួលបានពិន្ទុដែលត្រូវនឹងការពិតខ្លាំងបំផុត។

1 . តើអ្នកមានភាពឧស្សាហ៍ព្យាយាមប៉ុនណា?

ចម្លើយ

ក . បើមានអ្នកបង្ខំឱ្យចាប់ផ្ដើមធ្វើការ ទើបអ្នកចាប់ផ្ដើម និងធ្វើការតទៅទៀតបានល្អ

ខ . អ្នកដឹងពីតួនាទីការធ្វើការងាររបស់អ្នកខ្លួនឯង មិនចាំបាច់ឱ្យនរណាមកបញ្ជាឱ្យចាប់ផ្ដើមនោទេ

ឃ . មានដែរភាពឧស្សាហ៍ព្យយាមនោះ…គ្រាន់តែមិនទាន់ចាប់ផ្ដើមធ្វើការ ចាំរហូតទាល់តែដល់ពេលវេលាត្រូវចាប់ផ្ដើម

2 . តើអ្នកមានអារម្មណ៍ជាមួយអ្នកដទៃជុំវិញខ្លួនអ្នកយ៉ាងណាដែរ?

ចម្លើយ

ក . អ្នកមានអារម្មណ៍ថា មនុស្សច្រើនៗគួរឱ្យរំខានណាស់ មនុស្សច្រើន រឿងក៏ច្រើនដែរ

ខ . អ្នកចូលចិត្តមនុស្សច្រើនៗ ហើយអ្នកខ្លួនឯងក៏អាចចូលចុះជាមួយអ្នកដទៃបានល្អដែរ

ឃ . ខ្លួនអ្នកមានមិត្តភ័ក្តិច្រើនគ្រប់គ្រាន់ស្រាប់ហើយ មិនត្រូវការស្គាល់អ្នកដទៃថែមទៀតទេ

3 . តើអ្នកមានភាពជាអ្នកដឹកនាំដែរឬទេ?

ចម្លើយ

ក . អ្នកអាចធ្វើឱ្យអ្នកឯទៀតធ្វើការតាមដែលអ្នកត្រូវការបាន តែត្រូវបង្ខំពួកគេបន្តិច

ខ . អ្នកអាចធ្វើឱ្យមនុស្សភាគច្រើនធ្វើការបាន តាមដែលត្រូវការដោយមិនចាំបាច់បញ្ចេញកម្លាំងប៉ុន្មានឡើយ

គ . ជាប្រក្រតី អ្នកច្រើនតែធ្វើតាមអ្នកដទៃបញ្ជាច្រើនជាង

4 . តើអ្នកមានភាពទទួលខុសត្រូវប៉ុនណា?

ចម្លើយ

ក . អ្នកនឹងបង្ហាញភាពទទួលខុសត្រូវនៅពេលណាដែលចាំបាច់ប៉ុណ្ណោះ ពេលនេះឱ្យអ្នកដទៃទទួល

ខុសត្រូវការងារសិនចុះ

ខ . អ្នកមិនចូលចិត្តដឹកនាំអ្នកដទៃ ឬបង្ហាញភាពទទួលខុសត្រូវលើការងារណាទាំងអស់ ព្រោះគិតថាមានអ្នកឯទៀតនៅចាំចេញមុខចេញមាត់ច្រើនណាស់ ដូច្នេះទុកឱ្យពួកនោះសម្ដែងតែម្ដងទៅល្អជាង

គ . អ្នកចូលចិត្តធ្វើជាអ្នកដឹកនាំ និងបង្ហាញពីភាពទទួលខុសត្រូវលើការងារផ្សេង។ ចូលចិត្តក្នុងការសម្រេចចិត្តលើបញ្ហាដើម្បីឱ្យការងារដំណើរការទៅមុខទៀតយ៉ាងរលូន

5 . តើជំនាញផ្នែកការចាត់ការរបស់អ្នកយ៉ាងណាដែរ?

ចម្លើយ

ក . អ្នកចូលចិត្តរៀបផែនការមុននឹងចាប់ផ្ដើមការងារ ដោយជាប្រក្រតីទៅ អ្នកច្រើនតែជាអ្នកកំណត់ដំណាក់កាលក្នុងការធ្វើការងារ

ខ . អ្នកធ្វើការងារបានល្អ តែបើការងារនោះមិនដំណើរការទៅដូចការចង់បាននោះ ទើបអ្នកត្រឡប់មក គិតគូររៀបចំផែនការ

គ . មានការងារអ្វីចូលមកក៏ធ្វើជាបណ្ដើរៗទៅ មិនបានត្រូវការរៀបផែនការជារឿងជារ៉ាវអ្វីប៉ុន្មានទេ

6 . តើអ្នកជាមនុស្សទទួលធ្វើការងារបានច្រើនប៉ុនណា?

ចម្លើយ

ក . មិនចូលចិត្តធ្វើការច្រើន ព្រោះមើលមិនឃើញថា ការងារច្រើននឹងជួយឱ្យជីវិតល្អឡើងសោះ

ខ . ធ្វើការច្រើនជាប់រហូត តែបើធ្វើលែងរួចហើយនោះ ឈប់ក៏គឺឈប់

គ . ធ្វើការច្រើនបានជារឿយៗ មិនខ្វល់ពីរឿងការងារច្រើនស្រាប់ទៅហើយ

7 . តើអ្នកសម្រេចចិត្តបានល្អប៉ុនណាដែរ?

ចម្លើយ

ក . បានល្អ បើសិនមានពេលវេលាគ្រប់គ្រាន់ តែបើមានពេលវេលាតិច ច្រើនតែមិនសូវល្អ

ខ . ច្រើនតែសម្រេចចិត្តបានល្អ ទោះជាមានពេលគិតមិនសូវច្រើនក៏ដោយ

គ . មិនចូលចិត្តការសម្រេចចិត្តសោះតែម្ដង ព្រោះលទ្ធផលនៃការសម្រេចចិត្តមិនសូវល្អសោះ

8 . តើអ្នកដទៃគេជឿសំដីរបស់អ្នកបានប៉ុនណាដែរ?

ចម្លើយ

ក . ព្យាយាមរក្សាពាក្យសំដីដែរ តែពេលខ្លះក៏ជ្រើសរើសនិយាយតែរឿងងាយៗ និងគេចពីរឿងណដែលអាចត្រូវឆ្លើយសំណួរ

ខ . បាន ប្រាកដណាស់! ព្រោះបើមិនមែនជាសំដីដែលចេញមកពីចិត្ត អ្នកនឹងមិននិយាយវាចេញមកទេ

គ . ដូចជាមិនឃើញត្រូវទៅយកចិត្តទុកដាក់អីនឹងអ្នកដទៃសោះ បើនិយាយទៅហើយធ្វើមិនបាន ក៏គឺធ្វើមិនបានហ្នឹងហើយ

9 . អ្នកជាមនុស្សរក្សាពាក្យសន្យាបានប៉ុនណាដែរ?

ចម្លើយ

ក . “និយាយហើយត្រូវតែធ្វើ” បើអ្នកសម្រេចចិត្តហើយថា នឹងធ្វើអ្វីមួយ អ្នកនឹងមិនព្រមឱ្យអ្វីមួយមកបញ្ឈប់អ្នកបានទេ

ខ . “និយាយហើយមិនបាច់ធ្វើក៏បានដែរ” បើការងារកំពុងធ្វើ វាមិនទៅតាមអ្វីដូចដែលចង់បាន ទៅខំប្រឹងធ្វើនាំតែខាតខួរក្បាលធ្វើអី?!

គ . “និយាយហើយគួរតែធ្វើ” ទោះជាការងារហ្នឹងមិនបានដូចចិត្តក៏ដោយ ក៏អ្នកនឹងព្យាយាមធ្វើឱ្យរួចស្រេចដូចដែលបានចាប់ផ្ដើមដែរ។

10 . តើអ្នករក្សាទុកព័ត៌មានរបស់ការងារដែលធ្វើហើយយ៉ាងណាដែរ?

ចម្លើយ

ក . ព័ត៌មាន មិនឃើញចាំបាច់ ឬសំខាន់អ្វីសោះ ព្រោះអ្នកដឹងថា ត្រូវធ្វើយ៉ាងណាដោយមិនចាំបាច់ត្រូវពឹងព័ត៌មានចាស់ឡើយ

ខ . រក្សាទុកខ្លះដែរ តែធ្វើការឱ្យបានតាមសាច់ការ វាសំខាន់ជាងមកអង្គុយមើលតួលេខ

គ . អ្នករក្សាទុកព័ត៌មានជាប់រហូត ដើម្បីក្រែងលោត្រូវប្រើការ ទោះជាអ្នកខ្ជិលរក្សាទុកក៏ដោយ

ពិន្ទុ

ចម្លើយ ក ខ គ

6 10 0
0 10 6
6 10 0
6 0 10
10 6 0
0 6 10
6 10 0
6 10 0
10 0 6
0 6 10

វិភាគពិន្ទុ ៖

ពិន្ទុ 100 ៖ កម្រិតភាពត្រៀមខ្លួនរួចជាស្រេច ល្អកំពូល។ មានន័យថា អ្នកកើតមកដើម្បីធ្វើជាចៅហ្វាយលើខ្លួនឯងយ៉ាងពិតប្រាកដ។ បើអ្នកនៅមិនទាន់បានចាប់ផ្ដើមបើកមុខជំនួញជារបស់ខ្លួនឯងនោះ អ្នកគួរតែបើកបានហើយ រឹតតែឆាប់ រឹតតែល្អ ព្រោះអ្នកកំពុងមានកម្ដៅ គ្រប់គ្រាន់សម្រាប់បោះជំហានទៅមុខបានយ៉ាងល្អ។

ពិន្ទុ 91 – 99 ៖ កម្រិតភាពត្រៀមខ្លួនរួចជាស្រេច ល្អណាស់។ មានន័យថា អ្នកមានភាពត្រៀមរួចជាស្រេចលើគ្រប់ផ្នែកសម្រាប់ការចាប់ផ្ដើមមុខជំនួញរបស់ខ្លួនឯង។ កុំបង្អង់យូរ ដំណើរផ្លូវនៃភាពជោគជ័យនៅខាងមុខកំពុងតែបើកចំហ និងរង់ចាំអ្នកហើយ។

ពិន្ទុ 72 – 90 ៖ កម្រិតភាពត្រៀមខ្លួនរួចជាស្រេច ល្អ។ មានន័យថា អ្នកមានគុណសម្បត្កិ និងភាពត្រៀមជាស្រេចក្នុងការធ្វើជាសហគ្រិនដែលនឹងទទួលជោគជ័យ តែក៏នៅមានចំណុចខ្សោយជាច្រើនចំណុចទៀតដែរ។ ជំនាញលើចំណុចដែលអ្នកខ្វះ អ្នកអាចសិក្សារកចំណេះដឹងបន្ថែមបាន ឬមិនទេអាចជួលមនុស្សពីក្រៅឱ្យចូលមកជួយបាន។

ពិន្ទុ 40 – 71 ៖ កម្រិតភាពត្រៀមខ្លួនរួចជាស្រេច កណ្ដាល ឬមធ្យម។ មានន័យថា នៅមិនទាន់ប្រាកដច្បាស់ថា តើអ្នកត្រៀមរួចស្រេចក្នុងការធ្វើជាចៅហ្វាយលើខ្លួនឯង និងអ្នកដទៃហើយឬនៅទេ។ អ្នកនៅខ្វះគុណសម្បត្តិច្រើនប្រការដែលអនាគតសហគ្រិនជោគជ័យមិនគួរមើលរំលង តែបើអ្នកនៅតែមានតម្រូវការចង់បើកមុខជំនួញរបស់ខ្លួនឯងឱ្យបានវិញនោះ អ្នកនឹងជួបឧបសគ្គដ៏ច្រើននាពេលអនាគតដែលអាចនឹងធ្វើឱ្យអ្នកបរាជ័យយ៉ាងអស់ក្បាច់មិនខាន។

ពិន្ទុ ទាបជាង 40 ៖ កម្រិតភាពត្រៀមខ្លួនរួចជាស្រេច មិនសូវល្អ។ មានន័យថា មិនចង់ប្រាប់ឡើយថា ចូរបំភ្លេចក្តីសុបិនដែលចង់ក្លាយជាចៅហ្វាយលើខ្លួនឯងនោះចោលទៅ។ ការធ្វើជំនួញមិនមែនជាដំណើរផ្លូវរបស់អ្នកទេ អ្នកប្រហែលជាស័ក្តិសមនឹងការងារដែលអ្នកកំពុងធ្វើហ្នឹងច្រើនជាង។ ដូច្នេះចូរកុំមកខាតពេលមកអង្គុយនឹកស្រមៃទៅដល់អ្វីដែលមិនអាចក្លាយជាការពិតបានធ្វើអី៕ រៀបរៀងដោយ តាវ៉ែនតា

November 25, 2017

CWEA រៀបចំទិវាសហគ្រិនស្ដ្រី ឆ្នាំ2017 លើកទី4 ក្រោមប្រធានបទ «ហេតុអ្វីត្រូវវិនិយោគជាមួយស្ដ្រី?»

ក្រោមការខិតខំបង្ហាញ និងលើកកម្ពស់តម្លៃស្ត្រីទូទៅនៅទូទាំងពិភពលោក នៅរសៀលថ្ងៃទី20 ខែវិច្ឆិកា ឆ្នាំ2017 កន្លងទៅ សមាគមសហគ្រិនស្ដ្រីកម្ពុជា បានរៀបចំកម្មវិធី អបអរសាទរ ទិវាសហគ្រិនស្ដ្រីឆ្នាំ2017 នៅសណ្ឋាគារ Raffles Hotel Le Royal ក្រោមប្រធានបទ «ហេតុអ្វីត្រូវវិនិយោគជាមួយស្ដ្រី?» ព្រោះការវិនិយោគជាមួយស្ត្រី គឺជាគន្លឹះឆ្លាតវៃឈាន ទៅជំរុញកំណើនសេដ្ឋកិច្ចជាតិ។

ទិវាសហគ្រិនស្ដ្រី ឆ្នាំ2017 លើកទី4ខាងលើនេះ បានរៀបចំធ្វើឡើងក្រោមអធិបតីភាព លោកស្រី ចាន់ សូរីយ៍ រដ្ឋលេខាធិការ ទទួលបន្ទុកការអភិវឌ្ឍសេដ្ឋកិច្ចរបស់ស្ដ្រី តំណាងលោកស្រី អ៊ឹង ភន្ថាផាវី រដ្ឋមន្ដ្រីក្រសួងកិច្ចការនារី, និងឧកញ៉ា កែវ មុំ ប្រធានសមាគមសហគ្រិនស្ដ្រីកម្ពុជា (CWEA)។ ទិវានេះមានការចូលរួមពីលោកជំទាវ តឹករ៉េត កំរង រដ្ឋលេខាធិការនៃក្រសួងពាណិជ្ជកម្ម, លោកស្រី ឌិត នីតា នាយកប្រតិបត្តិរបស់ក្រុមហ៊ុន Camma Microfinance, លោកឧកញ៉ា សុខ ពិសិដ្ឋ នាយកប្រតិបត្តិ និងជាស្ថាបនិកក្រុមហ៊ុន GGear, លោកស្រី ជា សុផល្លា អគ្គនាយករង ក្រុមហ៊ុន Emerald Plus, លោកស្រី ពាន់ ភួងបុប្ផា ចាងហ្វាងផលិតកម្មផ្កាប្រាំ និងមានអ្នកចូលរួមពីស្ថាប័ន ពាក់ព័ន្ធនានាជាច្រើនរូបទៀត។

ឯកអគ្គរាជទូតទិវាសហគ្រិនស្ត្រី អ្នកនាង ជា សុខលាង បានសម្តែងនូវគារវកិច្ចដ៏ខ្ពង់ខ្ពស់ជូនចំពោះ ឧកញ៉ា បណ្ឌិត លោក លោកស្រី អ្នកនាង កញ្ញា ដែលជាវាគ្មិនកិត្ដិយស ភ្ញៀវជាតិ និងអន្ដរជាតិ ដែលមានវត្ដមាននៅទីនេះ ជាទីគោរពរាប់អាន។ អ្នកនាង បានថ្លែងថា «តាំងនាមខ្ញុំផ្ទាល់ជាគណកម្មាធិការៀបចំកម្មវិធីលើប្រធានបទ «ការវិនិយោគលើស្ដ្រីគឺ ជាភាពវៃឆ្លាត» នាងខ្ញុំដែលជាស្ដ្រីមួយរូប ពិតជាមានមោទនភាពចំពោះភាព ជាស្ដ្រីដែលបានខិតខំតស៊ូ ព្យាយាម ជំនះនូវរាល់ឧបសគ្គជីវិត និងសង្គមគ្រប់បែបយ៉ាងដើម្បីទទួលបាននូវគុណវឌ្ឍជីវិតប្រកបដោយតម្លាភាព និងតុល្យភាពរវាងបុរស និងស្ដ្រីនៅក្នុង សង្គមកម្ពុជាបច្ចុប្បន្ន»។ អ្នកនាងបន្ដទៀតថា «នាងខ្ញុំសូមរំលឹក និងកោតសរសើរយ៉ាងអនេក ជូនចំពោះស្ថាបនិកនៃទិវាសហគ្រិនស្ដ្រីនេះ ជាលើកតំបូងបំផុតគឺលោកស្រី Wendy Diamond ដែលលោកស្រីមានទស្សនវិស័យក្នុងការផ្លាស់ប្ដូរនូវផ្នត់គំនិតជនអគតិមួយចំនួនដែលពុំផ្ដល់តម្លៃ និងសន្ដិភាពផ្លូវចិត្តមកកាន់ស្រី្ដ»។ អ្នកនាង ជា សុខលាង បន្ដថា ស្ដ្រីបានចូលរួមយ៉ាងផុសផលលើគ្រប់វិស័យនៅក្នុងប្រទេសកម្ពុជា។ យោងតាមទិន្នន័យនៃការស្រាវជ្រាវគិតចាប់ពីឆ្នាំ2012 មកដល់បច្ចុប្បន្ន សហគ្រិន នៅប្រទេសកម្ពុជាមានរហូតដល់ជាង50ម៉ឺននាក់ ដែលក្នុងនោះស្ដ្រីដែលជាម្ចាស់របស់សហគ្រាសមានរហូតដល់ជាង30ម៉ឺន សហគ្រិន ឫស្មើនឹង60ភាគរយ នៃចំនួនសហគ្រិនសរុប។

ឧកញ៉ា កែវ មុំ បានឲ្យដឹងថា «ស្ដ្រីគឺអាចមានសមត្ថភាព ក្នុងការចូលរួមអភិវឌ្ឍប្រទេសជាតិបានច្រើន កិច្ចការងាររបស់ស្ដ្រី ដែលយើងធ្វើមានការច្បាសលាស់ តស៊ូ អត់ធ្មន់ ព្យាយាមគ្រប់ បែបយ៉ាង និងទន់ភ្លន់…មកពីមុនយើងមិនមានឱកាស ចូលរួមអភិវឌ្ឍប្រទេសជាតិបានច្រើន ប៉ុន្ដែក្នុងបច្ចុប្បន្នមិនមែន មានត្រឹមតែប្រទេសកម្ពុជានោះទេ គឺទូទាំងពិភពលោក ផ្ដោតទៅលើភាពស្នើគ្នា ដើម្បីផ្ដល់ឱកាសដល់ស្ដ្រីចូលរួម ក្នុងការអភិវឌ្ឍប្រទេសជាតិផងដែរ»។ ឧកញ៉ា កែវ មុំ បានបញ្ជាក់ថា «នៅក្នុងថ្ងៃនេះ សមាគមស្ដ្រីកម្ពុជា គឺយើងបានរៀបចំជាឆ្នាំទី៤ហើយ ដែលវេទិកាស្ដ្រីពិភពលោក នៅក្នុងថ្ងៃនេះ»។ ឧកញ៉ាបន្ដថា សមាគមស្ដ្រីកម្ពុជា តែងតែខិតខំប្រឹងប្រែងស្វែងរកដៃគូសហការជាច្រើន មកជួយដល់សមាគមឲ្យសមាគមមានលទ្ធភាព ក្នុងការបើកវគ្គបណ្ដុះបណ្ដាល និងផ្ដល់ឱកាសដល់ស្ដ្រី ក្នុងការទំនាក់ទំនងគ្នា ទៅវិញទៅមក ចែករំលែកបទពិសោធន៍គ្នា និងជួយក្នុងការផ្លាស់ប្ដូរអាជីវកម្មគ្នាទៅវិញទៅមក។

សូមជម្រាបថា ទិវាសហគ្រិនស្ដ្រី WED បានប្រាព្ធនៅទូទាំងពិភពលោក នៅថ្ងៃទី20 ខែវិច្ឆិកានេះ ក្នុងប្រទេសកម្ពុជា ខណៈដែលប្រទេសដទៃទៀត នឹងប្រាព្ធពិធីមួយថ្ងៃមុន ហើយគឺជាចលនា និងបេសកកម្មដ៏ធំបំផុតរបស់ពិភពលោក ដែលបានឧទ្ទិសដល់ការគាំទ្រការផ្ដល់សិទ្ធិអំណាចដល់ស្ដ្រីទូទាំងពិភពលោក៕

November 24, 2017

អ្នកជំនាញបង្ហាញពីហេតុផលដែលក្រសួងចាត់វិធានការលើក្រុមហ៊ុនពាក់ព័ន្ធនឹងសិទ្ធិការងារ

ការគាំពារបុគ្គលិក និងការជំរុញឱ្យមានការគោរពសិទ្ធិការងារឱ្យកាន់តែទូលំទូលាយ ជារឿងសំខាន់មួយដែលកម្ពុជាកំពុងយកចិត្តទុកដាក់។

វិធានការមួយចំនួនដែលរដ្ឋាភិបាល ដែលមានក្រសួងការងារ និងបណ្តុះបណ្តាលវិជ្ជាជីវៈ ជាសេនាធិការ បានចាប់ផ្តើមធ្វើចំពោះក្រុមហ៊ុនឯកជននាពេលបច្ចុប្បន្ននេះ គឺការដាក់ពិន័យទៅលើក្រុមហ៊ុនទាំងឡាយណាដែលមិនគោរពតាមច្បាប់ការងារ ជាពិសេសលើលក្ខខណ្ឌមួយចំនួនស្តីពីសិទ្ធិការងារ។

ពាក់ព័ន្ធនឹងបញ្ហានេះ លោកមេធាវី សោម ចំណាន ដែលជាអ្នកជំនាញផ្នែកច្បាប់ការងារបានលើកឡើងថា នេះជាពេលវេលាដ៏សំខាន់ដែលក្រសួងចាប់ផ្តើមចាត់វិធានការលើក្រុមហ៊ុនទាំងឡាយណាដែលមិនគោរពសិទ្ធិការងារ។ ដើម្បីធានាដល់ការគ្រប់គ្រងយន្តការនេះ ក្រសួងបានបង្កើតឱ្យមានក្រុមអធិការកិច្ចដែលក្នុងនោះ តួនាទីរបស់ពួកគាត់គឺធ្វើការត្រួតពិនិត្យ និងផាកពិន័យចំពោះក្រុមហ៊ុន ឬសហគ្រាសទាំងឡាយណាដែលមិនគោរពសិទ្ធិបុគ្គលិក។

លោកមេធាវី សោម ចំណាន បាននិយាយថា៖ «នៅឆ្នាំ 2015 ដល់ឆ្នាំ 2016 មានការផាកពិន័យកើនឡើងដល់ទៅ 100%។ វាជាពេលដែលត្រូវផាកពិន័យហើយ ព្រោះច្បាប់ការងារបានធ្វើប្រមាណជាង 30ឆ្នាំ មកហើយ ហេតុនេះល្មមដល់ពេលដែលក្រុមហ៊ុននានាយល់ច្បាស់ និងចូលរួមអនុវត្តហើយ»។

ក្រៅពីនេះ ហេតុផលដែលជំរុញឱ្យមានការផាកពិន័យកាន់តែច្រើននេះ ព្រោះក្រសួងមានយន្តការលើកទឹកចិត្តដល់ក្រុមអធិការកិច្ច ដោយក្រសួងបានផ្តល់ថវិកាប្រមាណ 70% នៃចំនួនទឹកប្រាក់ដែលបានមកពីការផាកពិន័យឱ្យទៅក្រុមអធិការកិច្ចដែលបានចាត់វិធានការលើក្រុមហ៊ុនឯកជន។ ក្រៅពីនេះ សហជីពអន្តរជាតិក៏តែងតែធ្វើការស្នើសុំ (Complain) និងជំរុញដើម្បីឱ្យក្រសួងចាត់វិធានការឱ្យបានដិតដល់ជុំវិញបញ្ហានេះផងដែរ៕

November 24, 2017

ធនាគារ CIMB សហការជាមួយក្រុមហ៊ុនមូលបត្រ ផ្តល់រង្វាន់ដល់និស្សិតជាប់ជយលាភី

ភ្នំពេញ៖ ដើម្បីលើកចិត្តដល់និស្សិតដែលខិតខំប្រឹងប្រែងរៀនសូត្រ ធនាគារ CIMB បានសហការជាមូយក្រុមហ៊ុនផ្សារមូលបត្រកម្ពុជា (CSX) ប្រគល់រង្វាន់ជយលាភីថ្នាក់ជាតិដល់ក្រុមជយលាភីកំពូល3ក្រុមក្នុងកម្មវិធីប្រកួតជួញដូរភាគហ៊ុនស៊ីអាយអិមប៊ីប្រចាំតំបន់អាស៊ានឆ្នាំ2017 នៅប្រទេសកម្ពុជា។

ក្រុមជយលាភីថ្នាក់ជាតិដែលតំណាងឱ្យប្រទេសកម្ពុជាសម្រាប់ការប្រកួតថ្នាក់តំបន់ គឺក្រុម The Brilliant។ ជាមួយគ្នានេះក្រុមជយលាភីលេខ1គឺក្រុម Team Potatoes មកពីសាកលវិទ្យាល័យហ្សាម៉ាន ទទួលបានប្រាក់រង្វាន់800ដុល្លារពីធនាគារ CIMB និង 500ដុល្លារពី CSX រីឯក្រុមជយលាភីលេខ2 គឺក្រុមThe Brilliant មកពីសាកលវិទ្យាល័យកម្ពុជា ទទួលបានប្រាក់រង្វាន់ 500ដុល្លារពីធនាគារ CIMB និង 350ដុល្លារពី CSX ខណៈដែលក្រុមជយលាភីលេខ3 គឺក្រុម The Gravity មកពីសាកលវិទ្យាល័យហ្សាម៉ាន ទទួលបានប្រាក់រង្វាន់ 400ដុល្លារពីធនាគារ CIMB និង 250ដុល្លារពីCSX។ ស្របតាមការប្តេជ្ញាចិត្តរបស់ស៊ីអាយអិមប៊ីក្នុងការអភិវឌ្ឍទេពកោសល្យយុវជនជំនាន់ក្រោយ ក្រុមកំពូលទាំង3 ក៏នឹងទទួលបានឱកាសក្លាយជាបុគ្គលិកហាត់ការ នៅក្នុងធនាគារ ស៊ីអាយអិមប៊ី ផងដែរ។

លោក ប៊ុន យីន ប្រធាននាយកប្រតិបត្តិនៃធនាគារ CIMB បានបង្ហាញចំណាប់អារម្មណ៍ដោយបានសម្តែងនូវការកោតសរសើរដល់ក្រុមបេក្ខជនដែលទទួលបានជយលាភីទាំងអស់ ជាពិសេសគឺក្រុមជើងឯកថ្នាក់ជាតិដែលត្រូវបានជ្រើសរើសជាក្រុមជយលាភីតំណាងកម្ពុជាទៅចូលរួមក្នុងវគ្គផ្តាច់ព្រ័ត្រនៃកម្មវិធីប្រកួតជួញដូរភាគហ៊ុនស៊ីអាយអិមប៊ីប្រចាំតំបន់អាស៊ានឆ្នាំ2017 នៅប្រទេសឥណ្ឌូនេស៊ី នាពេលខាងមុខនេះ។

លោកបន្ថែមថា ការចូលរួមកម្មវិធីប្រកួតជួញដូរភាគហ៊ុនស៊ីអាយអិមប៊ីប្រចាំតំបន់អាស៊ាន គឺមិនត្រឹមតែបង្កើនចំណេះដឹង និងជំនាញវិនិយោគ Platform ប៉ុណ្ណោះទេ តែថែមទាំងបានលើកកម្ពស់ការទទួលស្គាល់លើសមត្ថភាពរបស់និស្សិតកម្ពុជាពីតំបន់អាស៊ានដ៏ទូលំទូលាយទៀតផង។

ជាមួយគ្នានេះ ឯកឧត្តម ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជាបានមានប្រសាសន៍ថា កន្លងមកដើម្បីគាំទ្រកម្មវិធីប្រកួតប្រជែងនេះឱ្យទទួលបានភាពជោគជ័យ ក្រុមហ៊ុនផ្សារមួលបត្រកម្ពុជាបានរៀបចំវគ្គបណ្តុះបណ្តាលក៏ដូចជាសិក្ខាសាលាមួយចំនួនដែរដោយសហការជាមួយធនាគារស៊ីអាយអិមប៊ី ដើម្បីពន្យល់ពីរបៀបដាក់ការបញ្ជាជួញដូរ និងការវិភាគផ្សេងៗដែលជាទុនសម្រាប់ប្អូនៗនិស្សិតក្នុងការប្រកួត។ ជាការពិត ការចូលរួមនៅក្នុងកម្មវិធីប្រកួតប្រជែងបែបនេះនឹងញ៉ាំងឱ្យប្អូនៗនិស្សិតកាន់តែមានទំនុកចិត្តមួយកម្រិតថែមទៀតក្នុងការចូលរួមក្នុងវិស័យមូលបត្រនាពេលអនាគតក្នុងនាមជាវិនិយោគិន ឬជាមន្ត្រីបុគ្គលិក ដែលទទួលបន្ទុកការងារពាក់ព័ន្ធ និងដំណើរការទីផ្សារមូលបត្រផ្ទាល់តែម្តង។

មកដល់ពេលនេះ កម្មវិធីប្រកួតជួញដូរភាគហ៊ុនស៊ីអាយអិមប៊ីប្រចាំតំបន់អាស៊ានបានឈានមកដល់ឆ្នាំទី8ហើយ ហើយប្រទេសកម្ពុជាទើបតែបានចូលរួមកម្មវិធីប្រកួតថ្នាក់តំបន់នេះ ចំនួន 3ឆ្នាំប៉ុណ្ណោះ ប៉ុន្តែអ្វីដែលគួរឱ្យកត់សម្គាល់នោះ គឺក្រុមជើងឯកតំណាងកម្ពុជាតែងតែបង្ហាញនូវភាពលេចធ្លោរបស់ខ្លួន ដោយដណ្តើមបានតំណែងរងជើងឯកថ្នាក់តំបន់ 2ឆ្នាំជាប់គ្នា និងជយលាភីលេខ4កាលពីឆ្នាំមុនទៀតផង។ កម្មវិធីនេះមានការគាំទ្រយ៉ាងផុលផុសពីបណ្តាសាកលវិទ្យាល័យនានា និងមានការចូលរួមប្រកួតពីសំណាក់និស្សិតដែលកាន់តែកើនច្រើនឡើងពីមួយឆ្នាំទៅមួយឆ្នាំ។ ក្នុងឆ្នាំនេះមានក្រុមចូលរួមប្រកួតប្រជែងកើនឡើងរហូតដល់124ក្រុមមកពីសាកលវិទ្យាល័យចំនួន23 នៅក្នុងរាជធានីភ្នំពេញ៕

November 24, 2017

គន្លឹះជោគជ័យក្នុងការធ្វើអាជីវកម្មផ្នែកសេវាកម្ម

គន្លឹះសំខាន់ដែលលោកអ្នកគួរយល់ដឹង៖

1. តើអ្វីជាអាជីវកម្មប្រភេទសេវាកម្ម (Service Industry)?
2. តើគួររៀបចំការវិនិយោគបែបណាលើផ្នែកនេះ? ហើយអ្វីជាបញ្ហាប្រឈម?
3. តើអាជីវកម្មបែបនេះមានការរីកចម្រើនបែបណាក្នុងទីផ្សារកម្ពុជា?
4. ស្វែងយល់យុទ្ធសាស្ត្រ និងតិកនិកក្នុងដំណើរការអាជីវកម្ម
5. ស្រាយចំងល់ផ្លូវច្បាប់នានាទាក់ទងនឹងទំរង់អាជីវកម្មប្រភេទនេះ
6. តើយុទ្ធសាស្រ្តអ្វីដែរអនុញ្ញាតឲ្យក្រុមហ៊ុនមួយរីកចម្រើនខ្លាំងបាន?
7. ស្រាយចម្ងល់ផ្សេងៗតាមរយៈការជជែកវែកញែកបន្ថែមជាមួយវាគ្មិន និងអ្នកចូលរួមជាច្រើនទៀត។

November 24, 2017

ការប្រកួតប្រដាល់ក្បាច់គុន “THAI FIGHT 2017” វគ្គជម្រុះជុំទី1 នឹងធ្វើឡើងនៅថ្ងៃទី25 វិច្ឆិកា

ដើម្បីបង្កើនទំនាក់ទំនងឲ្យកាន់តែជិតស្និតរវាងប្រទេសថៃ និងកម្ពុជា ក្រុមហ៊ុន ISUZU បានចូលរួមរៀបចំការប្រកួតប្រដាល់ក្បាច់គុនថៃលំដាប់ពិភពលោក “THAI FIGHT 2017” ក្នុងវគ្គជម្រុះជុំទី1 ក្នុងការប្រគួត “KHMER – THAI FIGHT” ដោយនាំយកកីឡាករ “សេនសាថាន ភី.ខេ សេនឆៃ មួយថៃយីម” ( Saensatharn PK Saenchaimuaythaigym) ម្ចាស់ជើងឯក ISUZU CUP SUPER FIGHT 2017 ជួបជាមួយនឹង “កីឡាករ ទីអាកូ កួឡាតេ” (Thiago Goulate) មកពីប្រេស៊ីល ព្រមជាមួយវត្តមានកីឡាករប្រដាល់ដ៏ល្បីល្បាញ៤រូបទៀតមកពីប្រទេសកម្ពុជា រួមមាន ពេជ្រ ម្ទេសខ្មាំង, ឃឹម ឌីម៉ា, មឿន សុភា និង ឡៅ ចិត្រា។

ព្រឹត្តិការណ៍ដ៏អស្ចារ្យនេះ នឹងរៀបចំឡើងនៅពហុកីឡាដ្ឋានជាតិអូឡាំពិក ទីក្រុងភ្នំពេញ ព្រះរាជាណាចក្រកម្ពុជា នៅថ្ងៃ សៅរ៍ ទី25 ខែ វិច្ឆិកា ពីម៉ោង 6:20 នាទីល្ងាច ដល់ម៉ោង 10:00នាទីយប់ ឬលោកអ្នកអាចទស្សនាតាមរយៈការផ្សាយបន្តផ្ទាល់នៅលើកញ្ចក់ទូរទស្សន៍ PNN ចាប់ពីម៉ោង 18:20 នាទី ដល់ម៉ោង 21:45នាទីយប់តទៅ។ ក្នុងឱកាសនេះផងដែរ ក្រុមហ៊ុន Tri Petch Isuzu Sales Cambodia Co., Ltd. និង ក្រុមហ៊ុន K (CAMBODIA) Co., Ltd. ក៏នឹងមានការតាំងបង្ហាញរថយន្ដម៉ូឌែលចុងក្រោយបំផុតដែលជារថយន្ដពហុមុខងារ គឺ រថយន្ដ Isuzu MU-X និង Isuzu D-Max V-Cross 4×4 នៅបញ្ជារតាំងបង្ហាញ Isuzu នៅក្នុងព្រឹត្តិការណ៍នេះផងដែរ៕

November 24, 2017

ទួលគោក ត្រូវបានអ្នកវិនិយោគសម្លឹងឃើញបន្ទាប់ពីតំបន់បឹងកេងកង

ភ្នំពេញ – បច្ចុប្បន្នក្រៅពីបឹងកេងកង1 – 2 និង3 ទួលគោកត្រូវបានគេចាត់ទុកជាតំបន់សក្ដានុពលទីពីរដែលអ្នកវិនិយោគផ្នែកអចលនវត្ថុនានាមិនអាចមើលរំលងបានក្នុងការអភិវឌ្ឍ ខណៈដែលគម្រោងធំៗ ផ្សារទំនើប និងហេដ្ឋារចនាសម្ព័ន្ធជាច្រើនកំពុងតែមានការអភិវឌ្ឍយ៉ាងខ្លាំង ពិសេសម្ចាស់គម្រោងអភិវឌ្ឍន៍ដែលកំពុងតែធ្វើការងារសាងសង់អគាររបស់ខ្លួនបានបង្កើនសកម្មភាពដើម្បីឱ្យបញ្ចប់តាមការសន្យាជាមួយអតិថិជនផងដែរ។

លោក សន សៀប អគ្គនាយកក្រុមហ៊ុន Key Realestate បានថ្លែងថា ទួលគោកត្រូវបានគេចាត់ទុកថា ជាតំបន់មានសក្ដានុពលទីពីរ បន្ទាប់ពីតំបន់បឹងកេងកង១ ដោយសារតែតំបន់នេះមានផ្ទះធំៗ ដីទំនេរធំៗ និងមានហេដ្ឋារចនាសម្ព័ន្ធល្អ។ ពិសេសបច្ចុប្បន្ន តំបន់នេះត្រូវបានអភិវឌ្ឍឡើងដោយអគារខ្ពស់ៗជាច្រើន ដែលធ្វើឱ្យតំបន់ទួលគោកផ្លាស់ប្តូរមុខមាត់ ជាក់ស្ដែងដូចជានៅតំបន់បឹងកក់ ជាដើម។ លើសពីនេះទៅទៀតនឹងមានផ្លូវ30ម៉ែត្រថ្មីមួយខ្សែដែលសព្វថ្ងៃកំពុងសាងសង់នៅលើផ្លូវរថភ្លើងចាស់ដែលស្ថិតនៅចន្លោះទួលគោក និងបឹងកក់ដែលតភ្ជាប់ពីមហាវិថីសហព័ន្ធរុស្សីទៅកាន់សង្កាត់ឬស្សីកែវទៀតផង។

បច្ចុប្បន្នគេសង្កេតឃើញថា តម្លៃដីនៅតំបន់ទួលគោកស្ថិតក្នុងសភាពថេរនៅពេលបច្ចុប្បន្ន បើប្រៀបធៀបទៅនឹងតំបន់អភិវឌ្ឍន៍ជាស្រេចផ្សេងទៀតនៅក្នុងទីក្រុង។ តម្លៃដីនៅតំបន់ទួលគោកមិនមានការកើនឡើង ឬថយចុះនោះទេនៅក្នុងរយៈពេល 2ឆ្នាំចុងក្រោយនេះ។

លោក សន សៀប បន្ដថា លោកទទួលស្គាល់ថា តំបន់ទួលគោកជាតំបន់ដែលមានសក្ដានុពលខ្លាំង ព្រោះវាហ៊ុមព័ទ្ធទៅដោយគម្រោងធំៗជាច្រើនដែលអាចទាក់ទាញចំណាប់អារម្មណ៍នៃការរស់នៅពីប្រជាជនដោយសារតែពួកគេងាយស្រួលរកសេវាកម្មនានាដែលមាននៅជិតខ្លួនដូចជា សាលារៀន មន្ទីរពេទ្យ ផ្សារទំនើប និងភោជនីយដ្ឋានល្បីៗជាដើម ។

អគ្គនាយកក្រុមហ៊ុន Key Realestate បន្ថែមទៀតថា ទួលគោកជាតំបន់ដែលតភ្ជាប់ទៅតំបន់នានាជាច្រើនពិសេសភ្នំពេញថ្មីដែលសម្បូរទៅដោយគម្រោងនានា និងមានប្រជាជនរស់នៅច្រើន និងកំពុងតែមានការអភិវឌ្ឍយ៉ាងខ្លាំងទៀតផង។ ជាងនេះទួលគោកត្រូវបានគេចាត់ទុកថា ជាខណ្ឌនៅកណ្ដាលទីក្រុងក្នុងចំណោមខណ្ឌទាំង 4ដែលមានការអភិវឌ្ឍខ្លាំងជាងគេដែលមានហេដ្ឋារចនាសម្ព័ន្ធផ្លូវធំៗ ដូច្នេះវានឹងធ្វើឱ្យតម្លៃអចលនទ្រព្យកើនឡើងខ្លាំងៗនាពេលខាងមុខដ៏ខ្លី៕

November 24, 2017

ក្រុមឡើងទម្រង់លេង Valencia ត្រៀមប៉ះជើងខ្លាំង Barca ថ្ងៃអាទិត្យនេះ

ក្នុងនាមជាក្រុមមិនស្គាល់ចាញ់ដូចគ្នាក្នុងក្របខ័ណ្ឌ La Liga នារដូវកាលនេះ ក្រុម Valencia នឹងធ្វើជាម្ចាស់ផ្ទះទទួលក្រុម Barcelona ក្នុងការប្រកួតនៅថ្ងៃអាទិត្យនេះ ដោយមានបំណងបង្ហាញថា ភាពខ្លាំងក្នុងនាមជាក្រុមប្រជែងពានរបស់ពួកគេ គឺជាការពិត។

ក្រោយពីជួបភាពត្រដាបត្រដួសអស់រយៈពេល2រដូវកាល និងបានផ្លាស់ប្តូរគ្រូបង្វឹកអស់ជាច្រើននាក់ រួមទាំងការចោទសួរផ្សេងៗទៅលើការគ្រប់គ្រងក្លិបនេះពីមហាសេដ្ឋីសញ្ជាតិសិង្ហបុរីលោក Peter Lim រួចមក ទីបំផុត Valencia ត្រូវបានធ្វើឲ្យមានភាពខ្លាំងឡើងវិញក្រោមការដឹកនាំរបស់គ្រូបង្វឹក Marcelino Garcia Toral និងប្រធានផ្នែកកីឡាលោក Mateu Alemany ដើម្បីជួយឲ្យពួកគេកត់ត្រាជ័យជម្នះក្នុងក្របខ័ណ្ឌចំនួន8លើកជាប់ៗគ្នា។ ទោះបីជាយ៉ាងណា ពួកគេនៅតែដេញតាមពីក្រោយក្រុម Barca ចំនួន4ពិន្ទុនៅលើកំពូលតារាង ខណៈដែលក្រុមមានមូលដ្ឋាននៅ Catalonia មួយនេះ រកបានដល់ទៅ34ពិន្ទុពីការប្រកួតដែលផ្តល់ពិន្ទុសរុបចំនួន36ពិន្ទុ។ ខ្សែប្រយុទ្ធ Simone Zaza របស់ Valencia ដែលបានវិលមករកទម្រង់លេងដ៏ល្អរបស់ខ្លួនវិញ ក្រោយពីជួបពេលវេលាខ្ចីជើងដ៏សែនខកចិត្តនៅឯក្លិប West Ham United កាលពីរដូវកាលមុននោះបានឲ្យដឹងថា៖ «រឿងដែលពិតប្រាកដនោះគឺថា ក្រុមនេះបានផ្លាស់ប្តូរទាំងស្រុង។ មិនត្រឹមតែអាចលេងក្នុងកម្រិតល្អមួយឡើយ ប៉ុន្តែថែមទាំងមានស្មារតីប្រយុទ្ធផងដែរ។ នេះគឺជាអ្វីដែលគ្រូបង្វឹកបានជួយដល់យើងជាច្រើន»។

លោក Marcelino នឹងត្រូវអង្គុយមើលពីកៅអីទស្សនិកជននៅថ្ងៃអាទិត្យនេះ ដោយសារតែបានរងពិន័យកាតក្រហមបណ្តេញចេញក្នុងពេលដែលក្រុមរបស់លោកទទួលជ័យជម្នះ 2-០ នៅលើទឹកដីក្រុម Espanyol កាលពីចុងសប្តាហ៍នេះ។ បច្ចុប្បន្នលោកកំពុងព្យាយាមផ្តួលក្រុម Barcelona ជាលើកទីដំបូងក្នុងនាមជាគ្រូបង្វឹកនៅពេលជួបគ្នាជាលើកទី15 នេះ។ ការប្រកួតនៅថ្ងៃអាទិត្យនេះនឹងចាប់ផ្តើមនៅម៉ោង2:45ទៀបភ្លឺ៕

ប្រភពពី៖ Daily Stars

November 24, 2017

Robinho ត្រូវបានកាត់ទោសឲ្យជាប់គុក 9ឆ្នាំ

Robinho ត្រូវបានកាត់ទោសឲ្យជាប់គុករយៈពេល9ឆ្នាំ ក្រោយពីតុលាការអ៊ីតាលីរកឃើញថា មានកំហុសទៅលើការរំលោភផ្លូវភេទ។ អតីតតារាឆ្នើមរបស់ក្លិប Manchester City រូបនេះ គឺជាជនជាប់ចោទម្នាក់ក្នុងចំណោមជនជាប់ចោទ5នាក់ទៀតដែលត្រូវបានផ្តន្ទាទោសពីបទរំលោភទៅលើនារីវ័យក្មេងសញ្ជាតិអាល់បានីម្នាក់ ក្នុងក្លិបរាត្រីមួយនៅទីក្រុង Milan កាលពីថ្ងៃទី22 ខែមករា ឆ្នាំ2013។

នៅពេលនោះ Robinho កំពុងតែលេងឲ្យក្លិប AC Milan ក្នុងក្របខ័ណ្ឌ Serie A របស់អ៊ីតាលី។ ខ្សែប្រយុទ្ធអន្តរជាតិប្រេស៊ីលវ័យ33ឆ្នាំរូបនេះ ដែលបច្ចុប្បន្នកំពុងតែលេងឲ្យក្លិប Atletico Mineiro នោះ បានសន្យាថា នឹងធ្វើការតវ៉ាចំពោះសេចក្តីសម្រេចនេះ។ ក្រោមច្បាប់របស់អ៊ីតាលី រូបគេនឹងមិនត្រូវបានឲ្យចូលគុកភ្លាមៗឡើយ រហូតទាល់តែដំណើរការនៃការប្តឹងឧទ្ធរណ៍ ត្រូវបានបំពេញជាផ្លូវការ ដែលអាចនឹងចំណាយពេលជាច្រើនឆ្នាំទៀត។ សេចក្តីប្រកាសមួយដែលត្រូវបានបង្ហោះនៅលើបណ្តាញសង្គម Instagram របស់គេពីសំណាក់ក្រុមការងារផ្នែកច្បាប់របស់ពួកគេបានឲ្យដឹងថា៖ «ទាក់ទងនឹងព័ត៌មានស្តីពីខ្សែប្រយុទ្ធ Robinho ក្នុងហេតុការណ៍មួយដែលបានកើតឡើងក្នុងរយៈពេលជាច្រើនឆ្នាំមុន យើងសូមធ្វើការបញ្ជាក់ថា រូបគេបានប្រកាសរួចជាស្រេចថា គេមិនបានដឹងអ្វីឡើយ និងនៅតែរក្សាជំហរថា រូបគេមិនបានទាក់ទិននឹងករណីនេះឡើយ»។

ប្រសិនបើរូបគេចាញ់ក្ដីក្នុងបណ្តឹងឧទ្ធរណ៍នោះ Robinho នឹងត្រូវគេធ្វើបត្យាប័នដើម្បីទៅទទួលទោសក្នុងប្រទេសអ៊ីតាលី។ រូបគេបានបំបែកកំណត់ត្រានៃការផ្ទេររបស់ចក្រភពអង់គ្លេសកាលពីឆ្នាំ2008 នៅពេលដែលក្លិប Man City បានលួងលោមរូបគេឲ្យចាកចេញពីក្លិប Real Madrid ក្នុងតម្លៃខ្លួន32លានផោន៕

ប្រភពពី៖ The Sun

November 24, 2017

ABC អិចស្ត្រាស្តោត ចាប់រង្វាន់ធំឈ្នះដំណើរកម្សាន្តក្រេបទឹកឃ្មុំនៅទីក្រុងមីឡាន ប្រទេសអ៊ីតាលីចុងសប្តាហ៍នេះ

ភ្នំពេញ៖ នៅថ្ងៃទី 26 ខែវិច្ឆិកា ឆ្នាំ2017 ខាងមុខនេះ ABC អិចស្ត្រា ស្តោត នឹងរៀបចំកម្មវិធីចាប់ឆ្នោតជ័យមង្គលនៅស្ថានីយទូរទស្សន៍ PNN ដែលផ្សាយផ្ទាល់នៅវេលាម៉ោង 8:០០-10:០០ យប់ដើម្បីផ្តល់រង្វាន់ជ័យមង្គលជូនដល់គូស្វាមីភរិយាទាំងអស់ដែលបានជាវ ABC អិចស្ត្រាស្តោត ក្នុងកម្មពិធីអាពាហ៍ពិពាហ៍របស់ ABC អិចស្ត្រាស្តោត ឆ្នាំ2016-2017។

កម្មវិធីអាពាហ៍ពិពាហ៍របស់ ABC អិចស្ត្រាស្តោត ឆ្នាំ 2016-2017 ដែលរៀបចំចាប់ឆ្នោតជ័យមង្គលនេះមានការចូលរួមសម្តែងកម្សាន្ត សប្បាយរីករាយ ពីតារាចម្រៀងល្បីឈ្មោះប្រចាំព្រះរាជាណាចក្រកម្ពុជាជាច្រើនរូបដូចជា៖ លោក ឈឹម សក្កដា លោក ឆាយ វីរៈយុទ្ធ លោក នី រតនា និងកញ្ញា សួសវីសា។

កម្មវិធីនេះធ្វើឡើងសម្រាប់តែអតិថិជនដែលបានជាវ ABC អិចស្ត្រាស្តោត សម្រាប់កម្មវិធីអាពាហ៍ពិពាហ៍របស់ខ្លួន។ សម្រាប់ការចាប់ឆ្នោតនេះ ABC អិចស្ត្រាស្តោត នឹងចាប់រង្វាន់សម្រាប់គូស្វាមីភរិយាថ្មីចំនួន 5គូ រង្វាន់ដំណើរកម្សាន្តក្រេបទឹកឃ្មុំដ៏ឧត្តុង្គឧត្តមនៅទីក្រុងមីឡាន អ៊ីតាលី រួមជាមួយបទពិសោធន៍ដ៏ល្អផ្តាច់ក្នុងការស្នាក់នៅសណ្ឋាគារទំនើបលំដាប់ផ្កាយ7។

ឆ្ពោះទៅរកឧត្តមភាពនៃអាពាហ៍ពិពាហ៍ដ៏ល្អឯក ជាមួយស្រាបៀរ ABC អិចស្ត្រាស្តោត !

សម្រាប់ព័ត៌មានបន្ថែម សូមធ្វើការទំនាក់ទំនងឥឡូវនេះទៅកាន់ប្រព័ន្ធ Hotline# 011 222 400 / 011 333 500 ។

សូមរីករាយទទួលទាន ABC អិចស្ត្រាស្តោត ដោយការទទួលខុសត្រូវ!!!

November 24, 2017

Author: វល័ក្ខ