វល័ក្ខ - La Reine Media

អាជីវកម្មតាមអនឡាញរីកសាយ ប៉ុន្តែមិនទាន់មានរបៀប និងគ្មាននិរន្តរភាព

អាជីវកម្មតាមប្រព័ន្ធអនឡាញនៅកម្ពុជាបានរីកសាយភាយគួរឱ្យកត់សម្គាល់ ថ្វីបើហាក់នៅមានភាពយឺតយ៉ាវបន្តិចបើធៀបនឹងដំណើរការអាជីវកម្មតាមអនឡាញនៃបណ្តាប្រទេសមួយចំនួនក្នុងតំបន់ក៏ដោយ។ នេះបើតាមថ្នាក់ដឹកនាំនៃក្រសួងឧស្សាហកម្ម និងសិប្បកម្ម។ឯកឧត្តម ភោគ សុវណ្ណរិទ្ធិ រដ្ឋលេខាធិការក្រសួងឧស្សាហកម្ម និងសិប្បកម្ម បាននិយាយថា តាមការសង្កេត ការប្រកបអាជីវកម្មតាមប្រព័ន្ធអនឡាញនៅកម្ពុជាកំពុងមានទំនោរកើនឡើងច្រើន ពិសេសក្នុងចំណោមក្រុមយុវវ័យ។ អាជីវកម្មលក់រាយតាមអនឡាញមានភាគច្រើនជាការលក់សម្ភារ និងស្បែកជើង ខណៈផលិតផលផ្សេងទៀតមិនទាន់មានច្រើននោះទេ។ឯកឧត្តមរដ្ឋលេខាធិការ បានមានប្រសាសន៍ថា៖“ប្រទេសកម្ពុជាមានការលក់រាយតាមអនឡាញច្រើន។ យើងសង្កេតឃើញមានការលក់សម្លៀកបំពាក់ និងលក់ស្បែកជើងតាមអនឡាញ ហើយក៏មានក្រុមយុវជនក្មេងៗកុម្ម៉ង់ទិញសម្ភារតាមអនឡាញពីក្រៅប្រទេសផងដែរ។ ដូចនេះការរីកចម្រើននៃបច្ចេកវិទ្យា គឺគេអាចមើលឃើញតាមរយៈអាជីវកម្មនេះ”។

ទោះជាយ៉ាងណា ឯកឧត្តម ភោគ សុវណ្ណរិទ្ធិ អះអាងថា កម្ពុជានៅដើរយឺតជាងបណ្តាប្រទេសនានាក្នុងតំបន់លើការលក់រាយដោយប្រើប្រាស់បច្ចេកវិទ្យា ព្រោះសហគ្រិនខ្មែរនៅមានការយល់ដឹងតិចតួច ចំណែកអ្នកខ្លះទៀតមិនបានយកចិត្តទុកដាក់សម្រាប់ការផ្សារភ្ជាប់អាជីវកម្មរបស់ខ្លួនជាមួយបច្ចេកវិទ្យាទាន់សម័យនោះទេ។ឯកឧត្តមបានបញ្ជាក់ថា៖“យើងដឹងហើយថា ប្រទេសកម្ពុជាត្រូវការជាចាំបាច់នូវការបណ្តុះបណ្តាលធនធានមនុស្សច្រើនឆ្នាំតទៅមុខទៀត។ ក្រៅពីការបណ្តុះបណ្តាធនធានមនុស្សក្នុងវិស័យសាធារណៈរបស់រដ្ឋ យើងក៏បានព្យាយាមជួយដល់វិស័យឯកជន ដើម្បីឱ្យពួកគាត់មានជំនាញក្នុងការផលិតផលិតផលរបស់ខ្លួនឱ្យមានគុណភាព ដើម្បីប្រកួតជាមួយទីផ្សារអន្តរជាតិ”។ ឯកឧត្តមបន្ថែមថា៖“គេអាចលក់សម្ភារពីប្រទេសមួយឆ្លងទៅកាន់ប្រទេសមួយទៀតបានដោយងាយ ដោយប្រើប្រព័ន្ធអនឡាញ”។

លោក Jun Ho-Kim មន្ត្រីកម្មវិធីនៃនាយកដ្ឋានឧស្សាហកម្មនៃអង្គការផលិតភាពអាស៊ី (APO) ដែលជាដៃគូដ៏សំខាន់ក្នុងការបណ្តុះបណ្តាលសហគ្រិន និងការកសាងសមត្ថភាពរបស់មន្ត្រីក្នុងស្ថាប័នសាធារណៈ បានប្រាប់ថា ថ្វីត្បិតអាជីវកម្មតាមប្រព័ន្ធអនឡាញកើតឡើងច្រើន ប៉ុន្តែគេមិនច្បាស់ថាតើអាជីវកម្មនោះមាននិរន្តរភាពយ៉ាងដូចម្តេចនោះទេ។ លោក Jun Ho-Kim បានបញ្ជាក់ថា៖“យើងមិនដឹងដំណើរការទៅមុខស្ថានភាពបច្ចេកវិទ្យានឹងវិវត្តន៍ទៅរកអ្វីនោះទេ ប៉ុន្តែតាមប្រទេសខ្លះយើងដឹងហើយថាវាស្ថិតនៅដំណាក់កាលនៃការអភិវឌ្ឍខុសៗគ្នា ដោយប្រទេសខ្លះស្ថិតនៅក្នុងដំណាក់កាល2.0 ប្រទេសខ្លះស្ថិតនៅដំណាក់កាល3.0 ហើយប្រទេសខ្លះមានការអភិវឌ្ឍដល់ដំណាក់កាល4.0។ នៅក្នុងដំណាក់កាល4.0 មានទម្រង់អាជីវកម្មច្រើនប្រភេទផ្សេងៗគ្នាជាច្រើន”។
លោកបន្ថែមថា៖“ពេលនេះ APO សហការជាមួយមជ្ឈមណ្ឌលផលិតភាពជាតិកម្ពុជា ដោយយើងអភិវឌ្ឍន៍កម្មវិធីសិក្សានេះរួមគ្នា ដើម្បីគាំទ្រដល់ប្រទេសជាសមាជិករបស់អង្គការផលិតភាពអាស៊ី ដើម្បីឱ្យគេដឹងពីរបៀបរៀបចំយុទ្ធសាស្ត្រក្នុងការចូលទៅកាន់ទីផ្សារពិភពលោកក្នុងសម័យកាលឧស្សាហកម្ម4.0។ យើងនឹងបង្ហាញពួកគេថាតើធ្វើដូចម្តេចដើម្បីធានានិរន្តរភាពបាន”៕

November 27, 2017

ចិន នឹងដាក់ឲ្យប្រើបច្ចេកវិទ្យា 5G នៅពាក់កណ្ដាលឆ្នាំ 2018

យោងតាមការចេញផ្សាយរបស់សារព័ត៌មាន China Daily បានឲ្យដឹងថា នៅពេលនេះ រដ្ឋភិបាល និងក្រុមហ៊ុនបច្ចេកវិទ្យាចិន បានធ្វើការសាកល្បងបច្ចេកវិទ្យា 5G ដំណាក់កាលទី3 ដែលការសាកល្បងនេះ ត្រូវបានគេមើលឃើញថា ចិនហាក់ដូចជាចង់បញ្ចប់ការសាកល្បងនេះ មុនពេលកំណត់។

កាលពីថ្ងៃសុក្រកន្លងទៅនេះ ក្រុមហ៊ុន China Mobile Communications Corp និង Huawei Technologies Co Ltd បានធ្វើការសាកល្បងបច្ចេកវិទ្យា 5G ប៉ុន្តែក្រោមការឃ្លាំមើលពីរដ្ឋាភិបាលនៃប្រទេសចិន។ មន្ត្រីតំណាងក្រសួងឧស្សាហកម្ម និងព័ត៌មានវិទ្យាចិន បានបញ្ជាក់ថា នេះជាការសាកល្បងលើកទី3 ហើយ 5G ជំនាន់ទី1 អាចនឹងត្រូវដាក់ឲ្យប្រើនៅខែមិថុនា ឆ្នាំ 2018 ហើយវានឹងប្រើប្រាស់ទូលំទូលាយនៅឆ្នាំ 2020៕

November 27, 2017

វេទិកា «យុវជនអ៊ីស្លាមកម្ពុជា»

ភ្នំពេញ៖ នៅថ្ងៃអាទិត្យ ទី10 ខែធ្នូ ឆ្នាំ 2017 ខាងមុននេះ បណ្ដាញយុវជន ដើម្បីអភិវឌ្ឍន៍សមាគមន៍ខ្មែរ-អ៊ីស្លាមកម្ពុជា នឹងរៀបចំវេទិកា «យុវជនអ៊ីស្លាមកម្ពុជា» ដែលវេទិកានេះគឺចង់បង្ហាញឲ្យមនុស្សគ្រប់គ្នា ជាពិសេសគឺយុវជនថា តួនាទីរបស់យុវជនគឺត្រូវស្វែងរកសន្ដិភាពដល់ពិភពលោក។

វេទិកានេះផងដែរថា នឹងត្រូវធ្វើឡើងចាប់ពីម៉ោង 7:30នាទីព្រឹក ដល់ម៉ោង 12ថ្ងៃត្រង់ នៅសាលសន្និសិទនៃសាលារៀនអន្តរទ្វីបអាមេរិកកាំង អគារលេខ 26 ផ្លូវ 279 បឹងកក់1 ទួលគោក។

– ចុះឈ្មោះតាមអនឡាញ បន្ទាប់មកក្រុមការងារផ្នែកចុះឈ្មោះនឹងទាក់ទងទៅអ្នក

https://goo.gl/vMLuPk

– ទំនាក់ទំនងផ្ទាល់:
១ កញ្ញា ម៉ាត់ សាំមៀត ០៨១ ២៦ ៧៩ ២១
២ កញ្ញា គីភ្លី នូរីហ្សាន ០៩៣ ៧០ ៨០ ១៨
៣ លោក យ៉ា រ៉ានី ០៩៦ ២០ ១២ ០៩៨

November 27, 2017

«បច្ចុប្បន្នភាពប្រចាំឆ្នាំ 2017» ជាសិក្ខាសាលាដែលផ្ដល់នូវចំណេះដឹងលើជំនាញធំៗ 4

ក្រុមហ៊ុន APLUS CONSULTING (អេផ្លើស ខនសាលធីង) ដែលជាក្រុមហ៊ុនឈានមុខមួយខាងផែ្នកផ្គត់ផ្គង់ធនធានមនុស្សនៅកម្ពុជា បានសហការរួមគ្នាជាមួយនឹង ACCA Cambodia (អេ សី សី អេ ខេមបូឌែ ) ក្នុងការរៀបចំសិក្ខាសាលាស្តីពី “បច្ចុប្បន្នភាពប្រចាំឆ្នាំ 2017 ” ដោយមានការចូលរូមពីសំណាក់ ម្ចាស់សហគ្រាស ថ្នាក់ដឹងនាំនាំក្រុមហ៊ុន អ្នកជំនាញផែ្នកពន្ធ គណនេយ្យនិង ច្បាប់ការងារពីស្ថាប័នឯកជននានាប្រមាណ 200នាក់។ សិក្ខាសាលានេះត្រូវបានធ្វើឡើងនៅ សណ្ឋាគារ ដឺរ៉ាហ្វល លើរូយ៉ាល់ នាព្រឹកថ្ងែសុក្រ ទី24 ខែវិច្ឆិកា ឆ្នាំ2017 ចាប់ពីម៉ោង 8ពេលព្រឹក រហូតដល់ម៉ោង 12នាទីថ្ងៃត្រង់ ដែលមានវាគ្មិនចូលរួមចំនួន 03 រូបគឺ ៖

1. លោកស្រី ឈីវ គីមស្រូយ នាយិកាផ្នែកសេវាកម្មពន្ធដារ និងប្រឹក្សាយោបល់ នៃក្រុមហ៊ុនដឺឡយ, Director, Tax & Advisory Service at Deloitte

2. លោក សោម ចំណាន មេធាវី នៃក្រុមហ៊ុនច្បាប់ អិលអេសភី , Attorney-at-Law, LSP Law Firm

3. លោក សឹម ចាន់គិរីរត្ន នាយកក្រុមហ៊ុន រិច អែន ផាត់ណឺ, Partner, REACHs & Partners Co., Ltd

លោក នូវ រតនា នាយក ACCA Cambodia ប្រចាំប្រទេសកម្ពុជា បានមានប្រសាសន៏លើកឡើងថា ទាំងស្ថាប័នរដ្ឋ និងឯកជន ទាំងជាតិនិងអន្តរជាតិបាននិងកំពុងផ្តោតការយកចិត្តទុកដាក់យ៉ាងខ្លាំង លើផែ្នកពន្ធ គណនេយ្យ និងច្បាប់ការងារ ដែលផ្នែកទាំងបីនេះគឺមានលក្ខណៈសំខាន់ដោយឡែកពីគ្នាពោលគឺ គណនេយ្យបានប្រៀបបាននឹងវិជ្ជបណ្ឌិតដែលអាចប្រាប់ពីស្ថានភាពសុខភាពរបស់ក្រុមហ៊ុន និងរក្សាបាននិរន្តក្រុមហ៊ុន ច្បាប់ការងារគឺជួយដល់ភាពសុខដុមរមនារវាងនិយោជក និងនិយោជិក ពោលគឺភាពរីកចម្រើនក្រុមហ៊ុន និងពន្ធដារ គឺជូយដល់ការពង្រីកទីផ្សារ ការបង្កបរិយាកាសអំណោយផល និងភាពប្រសើរឡើងនៃសេវាសាធារណៈដែលជាចលករជំរុញឲ្យមានដំណើរការរីកចំរើនកាន់តែខ្លាំងឡើងនៃដំណើរការអាជីវកម្មនិងពាណិជ្ជកម្មនានាផងដែរ ។

លោក ស គីណាល់ អគ្គនាយកក្រុមហ៊ុន APLUS CONSULTING បានលើកឡើងបន្ថែមថា ដើម្បីរួមចំណែកក្នុងការផ្តល់ជាព័ត៌មាន និងបង្កើនការយល់ដឹងពីដំណើរវិវឌ្ឍន៍នានាពាក់ព័ន្ធនឹងអាជីវកម្ម ដល់ម្ចាស់សហគ្រាស់ និងសាធារណៈជន ACCA Cambodia និងក្រុមហ៊ុន Aplus Consulting Co., Ltd តែងតែបានរួមសហការគ្នារៀបចំសិក្ខាសាលានេះនានា តួយ៉ាងដូចជាសិក្ខាសាលាលើកនេះជាដើម គឺបានរៀបចំឡើងក្នុងគោលបំណងសំខាន់ៗរួមមាន៖

1. ការផ្តល់ព័ត៌មានទូទៅពាក់ព័ន្ធនឹងការកែប្រែ និងការវិឌ្ឍន៍នៃច្បាប់ពន្ធដារ គណនេយ្យ និងច្បាប់ការងារនៃព្រះរាជាណាចក្រកម្ពុជា ជូនដល់ម្ចាស់សហគ្រាស់ ថ្នាក់ដឹងនាំរបស់សហគ្រាសនានា និងនិងសាធារណៈជនទូទៅ
2. ការជួយពង្រឹងសមត្ថភាព និងចំណេះដឹង ដល់អ្នកចូលរួម ពោលគឺការផ្តល់ធាតុចូលនានាដែលអាចជាជំនួយដល់ការគិត ការវិភាគ និងសម្រចចិត្តនានាក្នុងការគ្រប់គ្រង់អាជីវកម្ម និងការងាររបស់ខ្លួន
3. ការចូលរួមជាមួយរាជរដ្ឋាភិបាលក្នុងការផ្សព្វផ្សាយ និងពង្រឹងការអនុវត្តច្បាប់អាជីវកម្មនានា ជាដើម

ចំណែកឯលោកស្រី ឈីវ គីមស្រូយ និង លោក សឹម ចាន់គិរីរត្ន បានសង្កត់ធ្ងន់ថា អ្នកជំនាញផ្នែកនីមួយៗរបស់ស្ថាប័នននានា មិនត្រឹមតែត្រូវមានសញ្ញាបត្រ ឬចំណេះដឹង ជំនាញជាក់លាក់ ប៉ុណ្ណោះទេ តែត្រូវព្យាយាម ធ្វើយ៉ាងឲ្យខ្លួនទទួលបាននូវព័ត៌មាន និងចំណេះដឹងថ្មីបំផុតបន្ថែមទៀតដើម្បីជួយធានាឲ្យស្ថាប័ន ឬក្រុមហ៊ុនរបស់ខ្លួនមានការរីកចម្រើនជានិរន្ត ។ វាគ្មិនទាំងពីរបានបន្ថែមទៀតថា រដ្ឋាភិបាលបានកំពុងនឹងព្យាយាមកែសម្រួល និងដាក់ចេញនូវគោលនយោបាយ និងច្បាប់ថ្មីៗទាក់ទងនឹងពន្ធដារ និងគណនេយ្យ ដើម្បីលើកទឹកចិត្តម្ចាស់អាជីវកម្មក្នុងស្រុក និងទាក់ទាញវិនិយោគិនក្រៅស្រុកផងដែរ យ៉ាងណាក៏ដោយរដ្ឋាភិបាលក៏បាននិងកំពុងពង្រឹងការអនុវត្តច្បាប់អាជីវកម្មនានា ហើយការខកខានមិនបានអនុលោមតាមច្បាប់ និងបទបញ្ញាត្តិនានាអាចនឹងបង្កឲ្យជួបការដាក់ទោសទណ្ឌ និងហានិភ័យផ្សេងៗ ។ បន្ថែមលើការលើកឡើងរបស់វាគ្មិនខាងលើ លោក សោម ចំណាន បានផ្តល់នូវព័ត៌មានស្តីពីការកែប្រែចុងក្រោយដែលទាក់ទងទៅនឹងច្បាប់ការងារ រួមមានដូចជា សេចក្តីព្រាងច្បាប់ប្រាក់ខែគោលអប្បរមា មូលនិធីសោធននិវត្តន៍ ធានារ៉ាប់រងសុខភាពសារណៈ ជាដើម ។ លោកបានរំលឹកដែរថា ការយល់ដឹងពីបច្ចុប្បន្នភាពការងារ ទិន្នន័យ គោលការណ៍ច្បាប់ និងការអនុលោមប្រកបដោយការទទួលខុសត្រូវខ្ពស់ និងក្រមសីលធម៌វិជ្ជាជីវៈ គឺជាមូលដ្ឋានគ្រឹះនិងចាំបាច់ ក្នុងការកាត់បន្ថយនូវហានិភ័យទាំងឡាយ ហើយផ្ទុយទៅវិញវាបានជួយមានការរីកចម្រើនទាំងស្ថាប័នផង បុគ្គលិកផង និងសង្គមជាតិទាំងមូលផងដែរ ។

ឆ្លងតាមការពន្យល់បង្ហាញនិងការចោទឆ្លើយរវាងអ្នកចូលរួមនិងវាគ្មិន សិក្ខាសាលានេះពិតជាបានរួមចំណែកមួយដ៏សំខាន់ក្នុងការចូលរួមផ្តល់នូវព័ត៌មាន ចំណេះដឹង និងអាចជួយឲ្យសិក្ខាកាមមើលឃើញច្បាស់ ពីគុណតម្លៃ និងសារៈសំខាន់វិស័យគណនេយ្យ ពន្ធដារ ទីផ្សារនិងច្បាប់ការងារ ក្នុងការជួយឲ្យស្ថាប័ន និងសង្គមជាតិរីកចំរើនជានិច្ចនិរន្តដ៏ពិតប្រាកដ៕

November 27, 2017

ស្ថាបនិក Amazon លោក Jeff Bezos ក្លាយជាកំពូលមហាសេដ្ឋីមានលុយច្រើនជាងគេបំផុត នៅថ្ងៃនេះ

អាមេរិក៖ កំពូលមហាសេដ្ឋី Microsoft លោក Bill Gate នៅថ្ងៃនេះ ត្រូវបានទស្សនាវដ្ដីដ៏ល្បីរបស់អាមេរិក Forbes ចុះផ្សាយថា លោកបានធ្លាក់តំណែងកំពូលមហាសេដ្ឋីលំដាប់ទី1 មកនៅលេខរៀងទី2 វិញ បន្ទាប់ពីលោក Jeff Bezos ស្ថាបនិកក្រុមហ៊ុនលក់ទំនិញអនឡាញ Amazon.com កើនទ្រព្យច្រើនជាង។

គិតត្រឹមថ្ងៃទី27 វិច្ឆិកានេះ លោក Bill Gates មានលុយត្រឹមតែ 89.4ពាន់លានដុល្លារអាមេរិកប៉ុណ្ណោះ ខណៈដែលលោក Jeff Bezos មានលុយរហូតដល់ 99.6ពាន់លានដុល្លារអាមេរិក។ នេះមិនមែនជារៀងទី1 នោះទេសម្រាប់លោក Jeff Bezos ដែលក្លាយជាកំពូលមហាសេដ្ឋីលំដាប់ទី1។

តាមការបញ្ជាក់របស់ Forbes បានឲ្យដឹងថា ចំនួនលុយរបស់ Jeff Bezos កើនឡើងច្រើន រហូតដល់យកឈ្នះលោក Bill Gates បានគឺដោយសារតែព្រឹត្តិការណ៍ Black Friday ព្រោះនៅថ្ងៃនោះ គឺប្រជាជនអាមេរិកនាំគ្នាសម្រុកទិញទំនិញសម្រាប់ឱកាសចុងឆ្នាំ ហើយវាក៏ជាថ្ងៃមួយដែលទំនិញភាគច្រើនត្រូវបានលក់បញ្ចុះតម្លៃ។

ជាមួយគ្នានោះផងដែរ មហាសេដ្ឋីវ័យក្មេង Mark Zuckerberg ស្ថាបនិក និងជានាយកប្រតិបត្តិ Facebook គឺនៅរក្សាតំណែងរបស់ខ្លួនបាន នៅលេខរៀងទី5 ជាមួយនឹងលុយ 73.7ពាន់លានដុល្លារ៕

November 27, 2017

អ្នកប្រើទិនានុលេខន៍ជាប់ជាប្រចាំ ភាគច្រើនជាមនុស្សគ្រប់គ្រងខ្លួនឯងបានល្អ

ទិនានុលេខន៍ (diary) ភាគច្រើនគ្រប់គ្នាស្គាល់ថា ជាសៀវភៅកត់ត្រាពីសកម្មភាពប្រចាំថ្ងៃលើគ្រប់ផ្នែកនៃការរស់នៅ ទាំងពីជីវិតការងារ ការសិក្សា ទំនាក់ទំនង និងគម្រោងជាច្រើនទៀត។ នៅរដូវកាលចុងឆ្នាំនេះ មនុស្សជាច្រើនចាប់ផ្តើមស្វែងរកទិញទិនានុលេខន៍នៅតាមបណ្ណាគារ និងកន្លែងផ្សេងៗទៀតដើម្បីត្រៀមសម្រាប់ប្រើប្រាស់នៅឆ្នាំក្រោយដែលនឹងចូលមកដល់ក្នុងពេលត្រឹមតែជាងមួយខែទៀតប៉ុណ្ណោះ។

តាមរយៈការបង្ហាញរបស់ស្ថាប័នស្រាវជ្រាវចិត្តសាស្ត្រ Psychology today បានលើកឡើងថា អ្នកដែលប្រើទិនានុលេខន៍ជាប្រចាំ ជាមនុស្សដែលមានការគ្រប់គ្រងខ្លួនឯងល្អ ហើយការងារគ្រប់យ៉ាងរបស់គាត់គឺតែងតែអាចអភិវឌ្ឍបានលឿនជាងមនុស្សទូទៅដែលមិនកត់ត្រាពីកំណត់ត្រាផ្ទាល់ខ្លួនប្រចាំថ្ងៃ។ ខាងក្រោមនេះជាចំណុចមួយចំនួនដែលបង្ហាញថា អ្នកដែលប្រើទិនានុលេខន៍ជាមនុស្សដែលគ្រប់គ្រងខ្លួនឯងបានល្អ។

អ្នកប្រើទិនានុលេខន៍បង្ហាញពីភាពជាអ្នកមានគោលដៅច្បាស់លាស់

ជារៀងរាល់ថ្ងៃ មនុស្សដែលមានគោលដៅ និងមនុស្សដែលគ្មានគោលដៅ ពួកគេធ្វើការងារដូចគ្នា តែលទ្ធផលនៃការងារខុសគ្នាដាច់ស្រឡះ ព្រោះថា អ្នកដែលគ្មានគោលដៅតែងតែត្រូវចំណាយពេលវេលាដើម្បីស្វែងរកចំណុចដែលត្រូវធ្វើជាមុនសិនទើបចាប់ផ្តើមធ្វើ ហើយរស់នៅមួយថ្ងៃ ដើម្បីតែមួយថ្ងៃប៉ុណ្ណោះ តែសម្រាប់អ្នកមានគោលដៅវិញ គឺគេដឹងរូចជាស្រេចនៅរៀងរាល់ព្រឹកថា ថ្ងៃនេះគេនឹងត្រូវសម្រេចអ្វីខ្លះ ហើយនឹងទទួលបានអ្វីខ្លះ។

អ្នកដែលប្រើទិនានុលេខន៍ ជាអ្នកដែលបានកត់ត្រារួចជាស្រេចពីអ្វីដែលខ្លួនត្រូវធ្វើ ហេតុនេះគេមិនចាំបាច់ចំណាយពេលច្រើនដើម្បីគិតថា គេត្រូវធ្វើអ្វីនៅពេលទៅដល់ការិយាល័យនោះទេ។ គេចំណាយពេលច្រើនបំផុតនៅកន្លែងការងារដើម្បីធ្វើនូវអ្វីដែលគេបានគ្រោងទុកជាមុន ដែលអាចធ្វើឱ្យពួកគេធ្វើការងារបានលឿន ហើយថែមទាំងសល់ពេលដើម្បីស្វែងរកចំណុចអភិវឌ្ឍន៍ខ្លួនឯងបានថែមទៀតផង។

អ្នកប្រើទិនានុលេខន៍មិនសូវកុហកខ្លួនឯងទេ

កំណត់ត្រាប្រចាំថ្ងៃ គឺជាភ័ស្តុតាងដែលបញ្ជាក់ពីការងារដែលត្រូវធ្វើជាប្រចាំ។ ចំណុចនេះគឺអាចជួយមនុស្សរួចផុតពីវិបត្តិកុហកខ្លួនឯងបានច្រើនបំផុត ព្រោះថា ពួកគេគង់តែត្រូវយកការងារដែលនៅសល់ពីថ្ងៃនេះទៅធ្វើនៅថ្ងៃស្អែកមិនខាន។ ការសរសេរទុកនូវចំណុចដែលត្រូវធ្វើ និងមិនត្រូវធ្វើ ជារឿងសំខាន់ណាស់ ព្រោះថា មនុស្សដែលមិនសរសេរទុកតែងតែភ្លេចបាត់ ឬកុហកថា ភ្លេចរឿងណាមួយដែលខ្លួនមិនបានធ្វើ ដើម្បីគេចវេះពីការទទួលខុសត្រូវដែលធ្វើឱ្យប្រសិទ្ធភាពការងារធ្លាក់ចុះ។

សម្រាប់អ្នកដែលបានតាមដាន និងសរសេរទុកនូវការងាររបស់ខ្លួននៅក្នុងសៀវភៅទិនានុលេខន៍ គេដឹងយ៉ាងច្បាស់ចំពោះការងារដែលមិនទាន់ធ្វើ ហើយជាកាតព្វកិច្ច គឺត្រូវតែដាក់ចំណុចអវត្តមាននៅថ្ងៃនេះ ជាចំណុចដែលត្រូវធ្វើសងនៅថ្ងៃស្អែក៕

November 27, 2017

លោក Pardew កំពុងពិភាក្សាជុំវិញការក្លាយជាគ្រូបង្វឹករបស់ West Brom

លោក Alan Pardew បានរៀបចំការពិភាក្សាផ្សេងៗជុំវិញការទទួលតំណែងជាអ្នកចាត់ការទូទៅរបស់ក្លិប West Bromwich Albion ក្រោយពីក្លិបរបស់ក្របខ័ណ្ឌ Premier League មួយនេះបានបណ្តេញលោក Tony Pulis ចេញកាលពីដើមសប្តាហ៍មុន។ នេះបើយោងតាមការប្រកាសរបស់អតីតគ្រូបង្វឹករបស់ក្លិប Crystal Palace កាលពីថ្ងៃអាទិត្យ។

លោក Pulis បានចែកផ្លូវជាមួយនឹងក្លិប West Brom កាលពីថ្ងៃចន្ទ ក្រោយពីកាន់តំណែងបានជិត3ឆ្នាំ ខណៈដែលក្លិបស្ថិតក្នុងចំណាត់ថ្នាក់លេខ17នៅលើតារាងមួយនេះ បានធ្លាក់ទៅក្បែរតំបន់កាត់ចោល ក្រោយពីបានរងបរាជ័យ4លើកជាប់ៗគ្នា។ លោក Gary Megson ដែលជាអ្នកចាត់ការទូទៅបណ្តោះអាសន្ន បានជួយឲ្យក្រុមនេះដណ្តើមបានលទ្ធផលស្មើ 1-1 ជាមួយនឹងក្រុម Tottenham Hotspur កាលពីថ្ងៃសៅរ៍ ប៉ុន្តែលោក Pardew បានក្លាយជាបេក្ខភាពឈានមុខគេ ក្រោយពីលោក Megson បានបញ្ជាក់ថា លោកមានការស្ទាក់ស្ទើរក្នុងការកាន់តំណែងដែលលោកបានចាកចេញកាលពីឆ្នាំ 2004នេះ។

លោក Pardew បានប្រាប់ទូរទស្សន៍ Sky Sports ថា៖ «ខ្ញុំមានការពិភាក្សាផ្សេងៗជាមួយនឹងពួកគេ។ ត្រូវហើយ! វាពិតជាការងារដ៏គួរឲ្យទាក់ទាញណាស់ ហេតុនេះ យើងនឹងរង់ចាំមើលថា តើវានឹងមានដំណើរការទៅបែបណា»។ គ្រូបង្វឹកវ័យ56ឆ្នាំរូបនេះបានបន្ថែមទៀតថា៖ «វាជាក្លិបមួយដែលមានកីឡាករឆ្នើមៗជាច្រើន ហើយខ្ញុំគិតថា វាជាឱកាសដ៏ល្អមួយសម្រាប់អ្នកចាត់ការទូទៅម្នាក់ ហើយប្រសិនបើជាខ្ញុំ នោះវានឹងប្រាកដជាខ្ញុំហើយ។ ពួកគេមានកម្រិតលេងល្អ ហើយពួកគេប្រហែលជាកំពុងតែធ្វើបានល្អប្រសើរជាងមុន ហេតុនេះជាការរំពឹងទុក គឺជាអ្វីដែលពួកគេនឹងធ្វើបាន»៕

ប្រភពពី៖ The Guardian

November 27, 2017

Messi បន្តកុងត្រាថ្មីជាមួយ Barcelona រហូតដល់ឆ្នាំ 2021

ខ្សែប្រយុទ្ធ Lionel Messi បានចុះហត្ថលេខាលើកុងត្រាថ្មីមួយជាមួយនឹងក្លិប Barcelona ដើម្បីបន្តលេងឲ្យក្លិបយក្សរបស់អេស្ប៉ាញមួយនេះរហូតដល់ឆ្នាំ2021។ កុងត្រាថ្មីមួយ ត្រូវបានធ្វើឡើងរវាងកីឡាករ និងក្លិបមួយនេះ តាំងពីខែមិថុនាមកម្ល៉េះ ប៉ុន្តែ Messi ទើបតែយល់ព្រមចុះហត្ថលេខាជាផ្លូវការលើកិច្ចសន្យារបស់ខ្លួនកាលពីថ្ងៃសៅរ៍កន្លងមកប៉ុណ្ណោះ។

បើយោងតាមកិច្ចសន្យានេះ ក្លិប Barcelona បានបញ្ជាក់ថា ខ្សែប្រយុទ្ធអន្តរជាតិអាហ្សង់ទីនរូបនេះ មានលក្ខខណ្ឌទិញរំលាយកិច្ចសន្យាក្នុងទឹកប្រាក់835លានដុល្លារអាមេរិក។ នោះមានន័យថា តារាឆ្នើមវ័យ30ឆ្នាំរូបនេះនឹងត្រូវបន្តលេងរហូតដល់បញ្ចប់អាជីពរបស់ខ្លួននៅឯកីឡដ្ឋាន Camp Nou ហើយបើនៅតែបន្តលេងទៀតបន្ទាប់ពីកិច្ចសន្យានោះ រូបគេអាចនឹងផ្ទេរទៅកាន់ក្លិប Manchester City។ Messi ដែលបានធ្វើការបង្ហាញខ្លួនក្នុងក្រុមធំជាលើកដំបូងរបស់គេក្នុងវ័យ16ឆ្នាំក្នុងការប្រកួតមិត្តភាពមួយជាមួយនឹងក្រុម Porto នោះ ធ្លាប់បានឈ្នះពានក្របខ័ណ្ឌ La Liga 8លើក ពានក្របខ័ណ្ឌ Champions League 4លើក និងពាន Copa del Rey ចំនួន5លើក ស្របពេលដែលរូបគេក៏បានឈ្នះពានកិត្តិយសជាច្រើនទៀតផងដែរជាមួយនឹងក្រុម Barcelona។ Messi បានចូលរួមជាមួយនឹងក្លិប Barcelona ក្រោយពីផ្ទេរមកពីក្លិប Newell’s Old Boys ក្នុងនាមជាយុវជនម្នាក់កាលពីឆ្នាំ2000 និងបានធ្វើការបង្ហាញខ្លួនក្នុងការប្រកួតជាផ្លូវការរបស់គេក្នុងពេលប្រកួតជាមួយនឹងក្រុម Espanyol ពេលមានវ័យត្រឹមតែ 17ឆ្នាំ។

រូបគេបានរកគ្រាប់បាល់បញ្ចូលទីជាលើកទី1ក្នុងចំណោមគ្រាប់បាល់សរុបចំនួន523គ្រាប់របស់គេ ក្នុងពេលប្រកួតជាមួយនឹងក្រុម Albacete កាលពីខែឧសភា ឆ្នាំ2005 ហើយចាប់តាំងពីពេលនោះមក រូបគេបានឈ្នះពាន Ballon d’Or ចំនួន5លើក ពោលគឺច្រើនជាងកីឡាកររូបណាទាំងអស់៕

ប្រភពពី៖ The Guardian

November 27, 2017

ធ្លាយព័ត៌មាន Apple កំពុងសំងំផលិត iPhone SE ជំនាន់ថ្មី

សារព័ត៌មានចិន Economic Daily News បានចេញផ្សាយថា ក្រុមហ៊ុន Apple គ្រោងនឹងបង្ហាញ iPhone ម៉ូដែលតូច ឬអាចនិយាយបានថា iPhone SE ម៉ូដែលថ្មី នៅត្រីមាសដើមឆ្នាំ 2018 ដែលព័ត៌មាននេះគឺជាដំបូងថ្មីបំផុតសម្រាប់អ្នកគាំទ្រ iPhone។ ប្រភពដដែលបានបន្តទៀតថា iPhone តូចថ្មី អាចនឹងមានឈ្មោះ iPhone SE 2 ហើយផលិតនៅរោងចក្រមួយក្នុងប្រទេសឥណ្ឌា ប៉ុន្តែសមត្ថភាពរបស់ iPhone ថ្មីនេះ អាចនឹងអស្ចារ្យជាង iPhone SE កាលពីឆ្នាំ 2016 ពោលគឺតូចតែទំហំប៉ុណ្ណោះ។

ជាមួយគ្នានោះផងដែរថា សារព័ត៌មានឥណ្ឌា Tekz24 បានចេញផ្សាយថា iPhone SE 2 មានលក្ខណពិសេសចំនួន ដូចជា មាន RAM ទំហំ 2GB, មានម៉ូដែល 32GB និង 128GB ចំណែកកាមេរ៉ាវិញគឺខាងមុខ 5មេហ្គាភិចសែល និងខាងក្រោយ 12មេហ្គាភិចសែល៕

November 25, 2017

សមាជិកអង្គការពាណិជ្ជកម្មពិភពលោកសរសើរកម្ពុជាអំពីការអភិវឌ្ឍឧស្សាហកម្ម

ភ្នំពេញ៖ ឯកឧត្តម Juan Carlos Gonzalez អគ្គរដ្ឋទូតប្រទេសកូឡុំប៊ី បានថ្លែងថា សមាជិកអង្គការពាណិជ្ជកម្មពិភពលោក បានសម្ដែងការសាទរចំពោះសមិទ្ធផលរបស់កម្ពុជាក្នុងផែនការយុទ្ធសាស្ត្រនានារួមមានគោលនយោបាយអភិវឌ្ឍន៍ឧស្សាហកម្ម ឆ្នាំ2015-2025 និងផែនការយុទ្ធសាស្ត្រអភិវឌ្ឍន៍វិស័យទេសចរណ៍ ឆ្នាំ2012-2020 ជាដើម។

ការលើកសរសើរអំពីផែនការអភិវឌ្ឍន៍គោលនយោបាយឧស្សាហកម្ម និងពាណិជ្ជកម្មរបស់ប្រទេសកម្ពុជាធ្វើឡើងក្នុងកិច្ចប្រជុំត្រួតពិនិត្យទ្បើងវិញនូវគោលនយោបាយពាណិជ្ជកម្មលើកទី2របស់កម្ពុជានៅអង្គការពាណិជ្ជកម្មពិភពលោក។ យ៉ាងនេះក្តីឯកឧត្តម Juan Carlos Gonzalez ប្រធានអង្គប្រជុំក៏ជំរុញឱ្យកម្ពុជាបន្តកិច្ចការដែលកំពុងធ្វើ និងបំពេញកាតព្វកិច្ចរបស់ខ្លួនបន្ថែមទៀត ពិសេសតាមការស្នើសុំរបស់សមាជិកអង្គការពាណិជ្ជកម្មពិភពលោក ដើម្បីលើកកម្ពស់តម្លាភាពក្នុងរបបពាណិជ្ជកម្ម និងអនុលោមភាពស្របតាមគោលការណ៍ ដែលមានចែងក្នុងបទដ្ឋានអន្តរជាតិ ដែលកម្ពុជាបានចូលជាភាគីហត្ថលេខី។

ឆ្លើយតបនូវការលើកឡើងនេះ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានថ្លែងក្នុងកិច្ចប្រជុំខាងលើនេះថា គំនិតផ្តួចផ្តើមនៃការបង្កើតស្ថានបេសកកម្មអចិន្ត្រៃយ៍កម្ពុជាប្រចាំនៅអង្គការពាណិជ្ជកម្មពិភពលោកជាសក្ខីភាពបង្ហាញអំពីការប្តេជ្ញាចិត្តរបស់កម្ពុជាក្នុងក្របខ័ណ្ឌអង្គការពាណិជ្ជកម្មពិភពលោកដែលនឹងជួយជ្រោមជ្រែងបន្ថែមដល់ការចូលរួមរបស់កម្ពុជាក្នុងកិច្ចការអន្តរជាតិ ពាក់ព័ន្ធនឹងវិស័យពាណិជ្ជកម្ម ពិសេសការបំពេញតួនាទីរបស់កម្ពុជាជាប្រធានសម្របសម្រួលប្រទេសអភិវឌ្ឍន៍តិចតួច។

គួរបញ្ជាក់ថា បច្ចុប្បន្នប្រទេសអភិវឌ្ឍន៍តិចតួចភាគច្រើនចំណូលជាមធ្យមរបស់ប្រជាជនគឺ 1.25 ដុល្លារអាមេរិក និងបានរួមចំណែក 0.9% នៃ ផ.ស.ស (GDP) របស់ពិភពលោក។ លទ្ធផលនៃសេដ្ឋកិច្ចទន់ខ្សោយរបស់ប្រទេសអភិវឌ្ឍន៍តិចតួចជាច្រើន បានធ្វើឱ្យមានការថមថយនៃកំណើន ផ.ស.ស (GDP) ជាមធ្យមសម្រាប់មនុស្សម្នាក់ក្នុងមួយឆ្នាំដល់ 1.5% នៅឆ្នាំ 2015 ដែលក្នុងឆ្នាំ2014មាន 3.3%។ ការធ្លាក់ចុះបែបនេះហើយដែលជាកត្តារារាំងដល់ការកាត់បន្ថយភាពក្រីក្រ និងអូសបន្លាយពេលក្នុងការសម្រេចបាននូវទិសដៅការអភិវឌ្ឍប្រកបដោយចីរភាព។

គណៈកម្មាធិការស្តីពីពាណិជ្ជកម្ម និងការអភិវឌ្ឍរបស់អង្គការពាណិជ្ជកម្មពិភពលោកបានគូសបញ្ជាក់ច្បាស់អំពីការបើកច្រកទីផ្សាររបស់ប្រទេសអភិវឌ្ឍន៍តិចតួចពីឆ្នាំ2005 ដល់ 2016 ដែលការនាំចេញទំនិញ និងសេវាកម្មរបស់ប្រទេសអភិវឌ្ឍន៍តិចតួចបានកើនឡើងតិចតួចជាមធ្យម 6.4%៕

November 25, 2017

Author: វល័ក្ខ