បន្ទាប់ពីរៀបអាពាហ៍ពិពាហ៍រួច ការធ្វើដំណើរកម្សាន្តសម្រាប់រាត្រីទឹកឃ្មុំបានក្លាយជាទម្លាប់មួយសម្រាប់គូរស្វាមីភរិយាសម័យថ្មី។ ការធ្វើដំណើរបន្ទាប់ពីការរៀបការរួចនេះមិនត្រឹមតែជួយបង្កើនភាពរីករាយ បន្ថយភាពហត់នឿយបន្ទាប់ពីមមាញឹកអស់រយៈពេលយ៉ាងយូរនាមុនពេលរៀបការតែប៉ុណ្ណោះទេ ប៉ុន្តែវាជាការជួយបង្កើនអនុស្សាវរីយ៍ រឹតបន្តឹងចំណងស្នេហាមនុស្សពីរនាក់ឱ្យកាន់តែតឹងណែន ស្រឡាញ់គ្នាកាន់តែខ្លាំងឡើងផងដែរ។
មនុស្សជាច្រើនបាននិយាយថា ស្នេហាពិតប្រាកដគឺមិនស្ថិតនៅលើរូបសម្រស់នោះទេ ប៉ុន្តែវាស្ថិតនៅលើចិត្ត។ មែនហើយវាពិតជាត្រឹមត្រូវណាស់ ប៉ុន្តែសូមកុំភ្លេចថា ភាពទាក់ទាញពីខាងក្រៅដែលអ្នកមានក៏នៅតែមានចំណែកចូលរួមក្នុងការធ្វើឱ្យស្នេហារបស់អ្នកកាន់តែកើនឡើងដែរ។ បបូរមាត់ដ៏ទាក់ទាញគួរឱ្យចង់ថើបជាផ្នែកមួយនៃស្នេហារវាងមនុស្សពីរនាក់ ដូច្នេះអ្នកគួរតែចេះយកវាមកធ្វើជាប្រយោជន៍ ដើម្បីបង្កើននូវចំណងស្នេហ៍នារាត្រីទឹកឃ្មុំរបស់អ្នកឱ្យកាន់តែមានអត្ថន័យឡើងថែមមួយកម្រិតទៀត។ អូខេ! មកមើលបន្តិចទៅមើល៍ថា តើដើម្បីឱ្យបបូរមាត់របស់អ្នកក្លាយជាបបូរមាត់ដែលគួរឱ្យស្រឡាញ់នោះ ត្រូវធ្វើដូចម្តេចខ្លះ?
1/ ការពារគឺជាកូនសោ៖ បបូរមាត់របស់អ្នកមានស្រទាប់ស្បែកខាងលើស្តើងខ្លាំងណាស់ ដូច្នេះវាជារឿងសំខាន់ណាស់ដែលអ្នកត្រូវការពារវាឱ្យបានល្អពីកម្តៅថ្ងៃ។ ចូរប្រើផលិតផលលាបលើបបូរមាត់ណាដែលមានជាតិ SPF, UVA, UVB ជាប្រចាំ។ ទុកដាក់វានៅក្បែរដៃចៀសវាងការភ្លេចហើយបើអ្នកត្រូវធ្វើដំណើរកម្សាន្តទៀតនោះ គួរតែដាក់វាក្នុងកាបូបស្ពាយជាប់ខ្លួនរបស់អ្នក។
2/ រក្សាសំណើម៖ បបូរមាត់នឹងឡើងស្ងួតប្រេះបែក ប្រសិនបើអ្នកមិនបានបំពេញជាតិទឹកឱ្យបានគ្រប់គ្រាន់ ដូច្នេះមិនថាអ្នកទៅដល់ទីណានោះទេ ទឹកត្រូវតែនៅជាមួយអ្នកជានិច្ច ហើយអ្នកត្រូវទទួលទានទឹកឱ្យបានច្រើនបំផុតតាមដែលអាចធ្វើទៅបាន ដើម្បីផ្តល់នូវជាតិសំណើមដល់រាងកាយរបស់អ្នក ក៏ដូចជាបបូរមាត់របស់អ្នកផងដែរ។
3/ កុំលិទ្ធបបូរមាត់៖ ការលិទ្ធបបូរមាត់មិនមែនជាវិធីផ្តល់សំណើមនោះទេ តែវានឹងកាន់តែធ្វើឱ្យបបូរមាត់របស់អ្នកស្ងួតទៅៗម្តងបន្តិច។ ជំនួសដោយការប្រើអណ្តាតលិទ្ធបបូរមាត់ អ្នកគួរតែព្យាយាមលាបផលិតផលដូចដែលបានជម្រាបជូនខាងលើឱ្យបានញឹកញាប់វិញប្រសើរជាង។
4/ វីតាមីន៖ ជឿឬទេដែលថាកង្វះវីតាមីនធ្វើឱ្យប៉ះពាល់ដល់រាងកាយ ទាំងផ្នែកខាងក្នុង និងផ្នែកខាងក្រៅ? ហើយវាក៏នាំឱ្យបបូរមាត់ប្រេះបែកផងដែរ។ ត្រូវប្រាកដក្នុងចិត្តថា អាហារដែលអ្នកទទួលទានជាអាហារដែលមានប្រយោជន៍ចំពោះសុខភាព ហើយក៏កុំភ្លេចដាក់បញ្ចូលវីតាមីនចម្រុះដូចជា វីតាមីន B, C, E… ផងដែរ។
5/ អាហារល្អ៖ ពេលធ្វើដំណើរកម្សាន្តអ្នកពិតជាមានជម្រើសច្រើនណាស់ក្នុងការភ្លក្សអាហារផ្សេងៗតាមតំបន់ ប៉ុន្តសូមកុំភ្លេចថា អាហារមួយចំនួនដែលមានផ្ទុកអាស៊ីតខ្លាញ់ និងអាហារមួយចំនួនទៀតដូចជា ផ្លែឈើ បន្លែ ត្រី ធញ្ញជាតិ និងប្រេងអូលីវជាដើម គឺជាអាហារដ៏សំខាន់សម្រាប់អ្នកដែលមានបបូរមាត់ស្ងួតប្រេះបែកដូចជារូបអ្នក ដើម្បីជួយឱ្យសុខភាពស្បែកត្រង់បបូរមាត់របស់អ្នកប្រែមកជាមានសភាពស្រស់ថ្លា និងមានសំណើមគួរជាទីពេញចិត្តវិញ។
អនុវត្តតាមវិធីងាយៗខាងលើ នោះអ្នកនឹងទទួលបាននូវបបូរមាត់ដែលទន់រលោង មានសុខភាពល្អគួរឱ្យចង់ថើប និងគួរឱ្យទាក់ទាញដូចបំណងជាមិនខាន៕
