វល័ក្ខ - La Reine Media

វិធីថែទាំស្បែកមុខសម្រាប់ស្ត្រីវ័យអស់រដូវ

ស្ត្រីទាំងអស់នៅពេលឈានចូលដល់វ័យអស់រដូវហើយនោះ ភាពប្រែប្រួលដែលកើតឡើងយ៉ាងច្បាស់នោះគឺ បញ្ហាស្បែកដែលរុះរោយស្រពោនស្រអាប់ មើលទៅលែងស្រស់ស្អាតភ្លឺថ្លាដូចពេលមុនទៀតហើយ រហូតធ្វើឱ្យស្ត្រីជាច្រើននាក់ត្រូវប្រញាប់ស្វះស្វែងរិះរកវិធីជាច្រើនមកមើលថែបំប៉នស្បែកយ៉ាងប្រញាប់។ ថ្ងៃនេះ ឡារ៉ែន សូមនាំយកគន្លឹះល្អៗដែលជួយបំប៉ន និងថែទាំស្បែកមុខឱ្យស្អាតម៉ដ្ឋថ្លាមកជម្រាបជូនដូចខាងក្រោមនេះ៖

1/ ថែបំប៉នស្បែកមុខដោយគ្រីម

មើលថែទាំ និងបំប៉នស្បែកឱ្យស័ក្តិសមល្មម ដោយការលាបគ្រីមបំប៉នដែលមានគុណសម្បត្តិជួយពន្យារភាពចុះទ្រុឌទ្រោមរបស់កោសិកាស្បែក និងស្តារសភាពស្បែកដែលជ្រីវយារឱ្យតឹងស្មើឡើងវិញ ដែលមានវីតាមីន A វីតាមីន C វីតាមីន E និងខូឡាជេន។ ក្រៅពីនេះ អ្នកគួរលាបគ្រីមការពារកម្តៅថ្ងៃដែល មានចំណែកផ្សំរបស់ម៉ូជីរ៉ាយស័រ និងសារធាតុពន្យារការកើតស្លាកស្នាម ដើម្បីជួយការពារការឡើងស្រអាប់ខ្មៅ និងការពារមិនឱ្យកើតស្នាមជ្រួញយារនៅលើស្បែក ដោយសារត្រូវកម្តៅថ្ងៃទៀតផង។

2/ ប្រើគ្រឿងសម្អាងជាជំនួយ

សម្អាតស្បែកមុខឱ្យស្អាតស្រស់ថ្លាជាប់ជានិច្ច ដោយសារតែស្ត្រីស្ថិតក្នុងវ័យ40ឆ្នាំជាង ភាគច្រើនតែងតែប្រើគ្រឿងសម្អាង ដើម្បីបិទបាំងស្លាកស្នាមជាប្រចាំរៀងរាល់ថ្ងៃ ទើបជាហេតុធ្វើឱ្យស្បែកមុខមើលទៅចុះខ្សោយ និងងាយកើតមានស្នាមជ្រីវជ្រួញ។ ដូច្នេះដើម្បីកុំឱ្យស្បែកមុខកាន់តែមានបញ្ហាខ្លាំងជាងមុននោះអ្នកគួរប្រើម្សៅផាត់មុខដូចជា ម្សៅទ្រនាប់ ឬប៊ីប៊ីគ្រីមសាច់ស្តើងៗ បន្ទាប់ពីនោះ ពេលត្រឡប់មកដល់ផ្ទះវិញ អ្នកគួរជូតសម្អាតស្បែកមុខរបស់អ្នកចេញ ដោយការយកសំឡីជ្រលក់ទឹកសម្រាប់សម្អាតផ្ទៃមុខលាងសម្អាតគ្រឿងសម្អាងហើយសឹមជូតចេញយ៉ាងថ្នមដៃ។

3/ សម្រាកឱ្យគ្រប់គ្រាន់

គេងសម្រាកឱ្យបានគ្រប់គ្រាន់ ក្នុងខណៈពេលដែលអ្នកកំពុងគេងលក់ រាងកាយនឹងបញ្ចេញសារធាតុ មេឡាថូនីន និងសារធាតុ អេនដូហ្វ៊ីន ដែលមានចំណែកជួយធ្វើឱ្យផ្ទៃមុខឡើងស្រស់ថ្លាភ្លឺរលោង និងមើលទៅក្មេងជាងវ័យ។

4/ អាហារបំប៉នស្បែក

ទទួលទានអាហារបំប៉នស្បែក ដែលមានដូចជា អាហារពពួកបន្លែ និងផ្លែឈើស្រស់ពណ៌បៃតង ពណ៌លឿង និងពណ៌ក្រហម ដោយសារតែបន្លែផ្លែឈើទាំងអស់នោះសម្បូរទៅដោយវីតាមីន សារធាតុរ៉ែ រួមទាំងសារធាតុប្រឆាំងនឹងអនុមូលឥស្សរ: ដែលធ្វើឱ្យស្បែកស្អាតស្រស់ថ្លា និងមានភាពយឺតតឹង។

5/ ទទួលទានទឹកជំនួយដល់ស្បែក

ទទួលទានទឹកឱ្យបានច្រើន ពីព្រោះការទទួលទានទឹកមិនត្រឹមតែជួយចិញ្ចឹមប្រព័ន្ធ ធ្វើការងាររបស់រាងកាយឱ្យដំណើរការប្រក្រតីនោះទេ នៅហុចផលល្អដល់ស្បែករបស់អ្នកបានទៀតផង ជួយពន្យឺតភាពជ្រួញយាររបស់ស្បែក ថែមទាំងផ្លាស់ប្តូរស្បែកដើមដែលធ្លាប់តែក្រៀមស្វិតឱ្យមើលទៅស្រស់ស្អាត តឹងណែន មានសុខភាពល្អមិនចាញ់គ្រីមបំប៉នស្បែកតម្លៃថ្លៃៗនោះឡើយ។

6/ ចៀសវាងសកម្មភាពមិនល្អមួយចំនួន

ចំពោះសុខភាពស្បែកចៀសវាងពីអ្វីដែលធ្វើឱ្យស្បែកក្រៀមជ្រួញមិនស្រស់ថ្លា ដូចជា ការដុសសម្អាតមុខខ្លាំងៗ ការធុញថប់មួម៉ៅ ការទទួលទានភេសជ្ជៈដែលមានជាតិអាល់កុល និងកាហ្វេអុីន ដែលជាកត្តាបំផ្លាញភាពស្រស់ថ្លារបស់ស្បែកឱ្យឆាប់រុះរោយ និងមើលទៅចាស់ជាងវ័យ។

កុំរវល់តែឆ្លុះកញ្ចក់ ហើយអង្គុយពិបាកចិត្តនឹងបញ្ហាស្បែកមុខរបស់អ្នកតទៅទៀតអី ចូរនាំគ្នាចាប់ផ្តើមមើលថែបំប៉នស្បែកឱ្យស្រស់ស្អាតចាប់ពីថ្ងៃនេះតទៅវិញប្រសើរជាង ជាមួយនឹងវិធីបែបងាយៗទាំង6ចំណុចដូចខាងលើនេះ៕

January 17, 2018

ក្រុមជើងឯកកម្ពុជា The Brilliant ទទួលបានចំណាត់ថ្នាក់លេខ 3 ក្នុងកម្មវិធីប្រកួតជួញដូរភាគហ៊ុន ស៊ីអាយអិមប៊ី ប្រចាំតំបន់អាស៊ាន

ភ្នំពេញ៖ ក្រុមជើងឯកតំណាងកម្ពុជា The Brilliant មកពីសាកលវិទ្យាល័យកម្ពុជា បាននាំកិត្តិយសជូនជាតិ ដោយទទួលបានជ័យលាភីចំណាត់ថ្នាក់លេខ3 រួមទាំងទទួលបានប្រាក់រង្វាន់ចំនួន 5,000 ដុល្លារអាមេរិក នៅក្នុងព្រឹត្តិការណ៍ប្រឡងប្រជែងដ៏លេចធ្លោមួយថ្នាក់តំបន់ សម្រាប់និស្សិតសាកលវិទ្យាល័យ គឺកម្មវិធីប្រកួតជួញដូរភាគហ៊ុន ស៊ីអាយអិមប៊ី ប្រចាំតំបន់អាស៊ាន។ ជាមួយគ្នានេះ ក្រុមជើងថ្នាក់ថ្នាក់តំបន់ សម្រាប់ឆ្នាំនេះ បានទៅលើក្រុម The Management មកពីសាកលវិទ្យាល័យ Gadjah Mada University ប្រទេសឥណ្ឌូនេស៊ី ដែលទទួលបានប្រាក់រង្វាន់ 12,000ដុល្លារអាមេរិក និងដំណើរទស្សនកិច្ចសិក្សា ទៅកាន់ក្រុមហ៊ុនផ្សារមូលបត្រតូក្យូ ប្រទេសជប៉ុនទៀតផង។

វគ្គផ្តាច់ព្រ័ត្រ នៃកម្មវិធីប្រកួតជួញដូរភាគហ៊ុន ស៊ីអាយអិមប៊ី ប្រចាំតំបន់អាស៊ាន ដែលប្រព្រឹត្តទៅនៅប្រទេសឥណ្ឌូនេស៊ីនេះ មានក្រុមជើងឯកថ្នាក់ជាតិ មកពី ៦ប្រទេស ក្នុងតំបន់អាស៊ាន រួមមានប្រទេសកម្ពុជា ម៉ាឡេស៊ី សិង្ហបុរី ឥណ្ឌូនេស៊ី ថៃ និងប្រ៊ុយណេ សម្រាប់ការប្រកួតប្រជែងដ៏ស្វិតស្វាញ។ ក្នុងនោះ ក្រុម Team Litquidity Capital មកពីសាកលវិទ្យាល័យជាតិសិង្ហបុរី ទទួលបានចំណាត់លេខ2 ជាមួយនឹងប្រាក់រង្វាន់ 8,00០ដុល្លារអាមេរិក។ ហើយក្រុម TA មកពីសាកលវិទ្យាល័យគ្រប់គ្រង និងវិទ្យាសាស្ត្រ ប្រទេសម៉ាឡេស៊ី ទទួលបានចំណាត់ថ្នាក់លេខ4 ជាមួយនឹងប្រាក់រង្វាន់ 2,500ដុល្លារអាមេរិក ខណៈដែលក្រុម Ray Kim មកពីសាកលវិទ្យាល័យឈៀងម៉ៃ ទទួលបានចំណាត់ថ្នាក់លេខ5 ជាមួយនឹងប្រាក់រង្វាន់ 1,500ដុល្លារអាមេរិក ហើយក្រុម HIO មកពី Politeknik ប្រទេសប្រ៊ុយណេ ទទួលបានចំណាត់ថ្នាក់លេខ6 ជាមួយនឹងប្រាក់រង្វាន់ 800ដុល្លារអាមេរិក។

លោកស្រី អ៊ុំ ចិន្តាភក្តី អគ្គនាយិកាធនធានក្រុមហ៊ុន របស់ធនាគារ CIMB បានឲ្យដឹងថា៖ «ស្របតាមចក្ខុវិស័យរបស់ស៊ីអាយអិមប៊ី គ្រុប ដែលជាធនាគារសកលឈានមុខគេមួយ ក្នុងតំបន់អាស៊ាន ក្នុងការលើកកម្ពស់ភាពរីកចម្រើនក្នុងតំបន់ នៃការអភិវឌ្ឍន៍សមត្ថភាពយុវជន យើងបានចូលរួមយ៉ាងសកម្មក្នុងការនាំយក និងរៀបចំកម្មវិធីប្រកួតជួញដូរភាគហ៊ុនថ្នាក់តំបន់នេះ មកកាន់និស្សិតខ្មែរយើង ដើម្បីលើកតម្កើងជំនាញ និងចំណេះដឹងវិនិយោគ ក៏ដូចជាការទទួលស្គាល់សក្តានុពល របស់និស្សិតក្នុងស្រុក ទៅកាន់ថ្នាក់តំបន់ និងលើឆាកអន្តរជាតិ។ ហើយយើងពិតជាមានមោទនភាពចំពោះក្រុមជើងឯកថ្នាក់ជាតិរបស់យើង ដែលតែងតែត្រឡប់មកវិញ ជាមួយនឹងជ័យលាភីគាប់ប្រសើរ ដល់សង្គមជាតិវិញ នាឆ្នាំកន្លងមក។ ជាក់ស្តែងឆ្នាំនេះ ក្រុមជើងឯកថ្នាក់ជាតិ The Brilliant ទទួលបានចំណាត់លេខ 3 ជាមួយនឹងប្រាក់រង្វាន់ 5,000 ដុល្លារអាមេរិក»។

កម្មវិធីប្រកួតជួញដូរភាគហ៊ុន ស៊ីអាយអិមប៊ី ប្រចាំតំបន់អាស៊ាន ត្រូវបានបង្កើតឡើងតាំងពីឆ្នាំ2010មកម្ល៉េះ។ ហើយក្នុងឆ្នាំទី8នេះ កម្មវិធីប្រឡងប្រជែងនេះមានការចូលរួមពីប្រទេសប្រ៊ុយណេ ជាលើកដំបូង និងបានដាក់បញ្ចូលមុខងារពិសេស គឺកម្មវិធីជួញដូរភាគហ៊ុន តាម Mobile App និងកម្មវិធីវិភាគទស្សទាយទិន្នន័យទៀតផង។ ជាលទ្ធផល មានក្រុមចូលរួមប្រឡងប្រជែងសរុប រហូតដល់ 3,727ក្រុម មកពី 200សាកលវិទ្យាល័យ នៃប្រទេសទាំង6 ក្នុងតំបន់អាស៊ាន ដែលកើនឡើងប្រមាណ 7% លើសពីឆ្នាំមុន។ សម្រាប់ប្រទេសកម្ពុជា យើងបានចូលរួមប្រកួតប្រជែង ក្នុងរយៈពេល៤ឆ្នាំចុងក្រោយផងដែរ។ គួរឲ្យកត់សម្គាល់ ក្រុមជើងឯកថ្នាក់ជាតិតំណាងកម្ពុជា ដណ្តើមបានជ័យលាភីជើងឯករង2ឆ្នាំដំបូងជាប់គ្នា ចំណាត់ថ្នាក់លេខ4ម្តង និងចំណាត់ថ្នាក់លេខ3 ក្នុងឆ្នាំនេះផងដែរ។

កាលពីខែវិច្ឆិកា ឆ្នាំ2017កន្លងទៅនេះ កម្មវិធីប្រកួតជួញដូរភាគហ៊ុនស៊ីអាយអិមប៊ី ប្រចាំតំបន់អាស៊ាន បានប្រកាសក្រុមជើងឯកថ្នាក់ជាតិ នៅតាមប្រទេសទាំង6 ដែលបានចូលរួមប្រឡងជែង។ ក្រុមកំពូលនេះ ត្រូវបានជ្រើសរើស ក្រោយពីប្រកួតប្រជែងគ្នា អស់រយៈពេល 3សប្តាហ៍ នៅតាមប្រទេសនីមួយៗ ដោយផ្អែកលើផលចំណេញជាភាគរយខ្ពស់បំផុត។ ហើយក្រុមកំពូល3នេះ ត្រូវដាក់បង្ហាញគម្រោងយុទ្ធសាស្ត្ររបស់ខ្លួន ហើយក្រុមដែលមានយុទ្ធសាស្ត្រល្អបំផុត គឺត្រូវបានជ្រើសរើសជា ក្រុមជើងឯកថ្នាក់ជាតិ។ យុទ្ធសាស្ត្រវិនិច្ឆ័យនេះ ផ្តោតសំខាន់លើការចាប់យកភាគហ៊ុន សម្រាប់ការចំណេញរយៈពេលវែង ព្រមទាំងមូលធនធៀបនឹងផលចំណេញរយៈពេលខ្លី។

សម្រាប់វគ្គផ្តាច់ព្រ័ត្រ ក្រុមជើងឯកថ្នាក់ជាតិ នៃប្រទេសទាំង៦ នឹងត្រូវធ្វើបទបង្ហាញអំពីយុទ្ធសាស្ត្រជួញដូររបស់ខ្លួន ដែលបានយកមកប្រើប្រាស់ នៅក្នុងការប្រកួតប្រជែង ទៅដល់ចៅក្រមវិនិច្ឆ័យ រួមមានសមាសភាពមកពីគណៈគ្រប់គ្រងរបស់ CIMB នៃប្រទេសម៉ាឡេស៊ី សិង្ហបុរី ថៃ និងឥណ្ឌូនេស៊ី ព្រមទាំងច្រៅក្រមកិត្តិយស ពីផ្សារភាគហ៊ុនឥណ្ឌូនេស៊ីផងដែរ។ ក្រុមប្រកួតត្រូវបានវាយតម្លៃ ដោយផ្អែកលើយុទ្ធសាស្ត្រវិនិយោគរយៈពេលខ្លី និងវែង ការចាប់យកភាគហ៊ុន និងសមត្ថភាពសម្រេចចិត្តវិនិយោគ ក៏ដូចជាជំនាញ ក្នុងការប្រើប្រាស់កម្មវិធីវិភាគទស្សទាយទិន្នន័យផងដែរ។

ដៃគូសហការនៃកម្មវិធីប្រកួតជួញដូរភាគហ៊ុនស៊ីអាយអិមប៊ី ប្រចាំតំបន់អាស៊ាន រួមមានក្រុមហ៊ុនអាកាសចរណ៍ម៉ាឡេស៊ី ក្រសួងអប់រំឧត្តមសិក្សានៃប្រទេសម៉ាឡេស៊ី ក្រុមហ៊ុនទូរគមនាគមន៍ Progresif Cellular ព្រមទាំងផ្សារភាគហ៊ុនប៊ូរសាម៉ាឡេស៊ី (Bursa Malaysia) ផ្សារភាគហ៊ុនឥណ្ឌូណេស៊ី (IDX) ផ្សារភាគហ៊ុនសិង្ហបុរី (SGX) ផ្សារភាគហ៊ុនថៃ (SET) ផ្សារភាគហ៊ុនកម្ពុជា (CSX) និងផ្សារភាគហ៊ុនហុងកុង (HKEx)។

សម្រាប់ព័ត៌មានលម្អិត អំពីកម្មវិធីប្រកួតជួញដូរភាគហ៊ុនស៊ីអាយអិមប៊ី ប្រចាំតំបន់អាស៊ាន សូមចូលទៅកាន់គេហទំព័រ https://stockchallenge.itradecimb.com/

January 16, 2018

មូលហេតុដែលបណ្ដាលឱ្យសក់ស្កូវមុនអាយុ

កាលណានិយាយពីសក់ គឺអ្នកនឹងនឹកឃើញទៅដល់ស្បែកភ្លាម ដែលពណ៌សម្បុរស្បែកអាស្រ័យទៅលើកោសិកាស្បែកម្យ៉ាងឈ្មោះថា មេឡាណូសាយ។ មានន័យថា កោសិកាស្បែកមេឡាណូសាយនេះឱ្យពណ៌ទាំងស្បែក ទាំងសក់ដូចគ្នា។ ម្យ៉ាងទៀតលោកអ្នកដែលមានសក់ពណ៌ខ្មៅ ឬសក់ពណ៌ផ្សេងទៀតដូចជា ពណ៌ក្រហមស្លេកមានតាំងពីកំណើតមក គឺអាស្រ័យទៅតាមហ្សែនដែលមាននៅក្នុងខ្លួនរបស់បុគ្គលម្នាក់។

ដូចនេះគេអាចកំណត់ពីមូលហេតុសក់ស្កូវមុនអាយុបានតាមរយៈចំណុចមួយចំនួនដូចជា ៖

មេតាប៉ូលីស៖ ការប្រែប្រួលរបស់មេតាប៉ូសលីស ដែលបំប្លែងសារធាតុប្រូតេអីុន ជាតិស្ករ ជាតិខ្លាញ់ និងបំប្លែងសារធាតុផ្សេងៗទៀតនៅក្នុងខ្លួន បណ្ដាលឱ្យពណ៌សក់មានការប្រែប្រួលខុសពីពណ៌សក់ធម្មជាតិ។
ការប្រើប្រាស់ឱសថ៖ ការទទួលទានឱសថមួយចំនួនដូចជា ឱសថព្យាបាលជំងឺមហារីក ជំងឺគ្រុនចាញ់ ឬប្រើប្រាស់ឱសថ ដើម្បីបន្ថយសម្ពាធឈាមក៏ជាកត្ដាធ្វើឱ្យសក់មានការស្លក់ពណ៌បន្ដិចម្ដងៗរហូតសក់ប្រែពណ៌ទៅជាស្កូវ។
ការកង្វះវីតាមីន៖ ភាពកង្វះវីតាមីនមួយចំនួនដូចជា កង្វះវីតាមីន B12 និងកង្វះជាតិដែកជាដើមក៏ជាមូលហេតុធ្វើឱ្យសក់ស្លក់ពណ៌ដែរ។
បញ្ហាលើស្បែក៖ ស្បែកមានជំងឺដូចជា កើតឃ្លង់ល្ពៅនៅលើស្បែកនៅត្រង់កន្លែងណាធ្វើឱ្យស្បែកកន្លែងនោះប្រែពណ៌ទៅជាសស្លែតដោយសារកោសិកាស្បែក មេឡាណូសាយ មកពាក់ព័ន្ធ ហើយបណ្ដាលឱ្យស្បែក និងសក់ប្រែពណ៌ខុសពីធម្មជាតិ។

វិធីបង្ការសក់ស្កូវមុនអាយុ

ដោយសារអ្នកបានដឹងពីមូលហេតុមួយចំនួននៃសក់ស្កូវមុនអាយុ អ្នកក៏អាចទប់ស្កាត់កុំឱ្យកើតឡើងបានដែរ។ លោកអ្នកមិនត្រូវបណ្ដាលឱ្យមានកង្វះជាតិដែក និងជាតិស្ករនៅក្នុងខ្លួននោះទេ។ មិនត្រូវទទួលទានឱសថណាដែលប៉ះពាល់ដល់សរសៃសក់ធ្វើឱ្យមានការប្រែប្រួលពណ៌សក់ឡើយ ហើយត្រូវទទួលទានអាហារដែលមានវីតាមីន និងប្រូតេអីុនឱ្យបានគ្រប់គ្រាន់។

ត្រូវការពារស្បែកកុំឱ្យមានបញ្ហាដូចជា កើតឃ្លង់ល្ពៅ កើតជំងឺ ឬរោគសើស្បែកផ្សេងៗ ព្រោះវាអាចធ្វើឱ្យកោសិកាស្បែក មេឡាណូសាយ មានពាក់ព័ន្ធ បណ្ដាលឱ្យស្បែកស្លក់ពណ៌ ក៏ដូចជាធ្វើឱ្យសក់មានការប្រែប្រួលពណ៌ផងដែរ៕

January 16, 2018

ថន លក្ខិណា សប្បាយកើបលុយពេករហូតជំងឺធ្វើទុក្ខ

ចាប់តាំងពីដើមឆ្នាំ2017រហូតមក ពិធីការិនីនិងជាតារាសម្ដែងម្ដងម្កាល កញ្ញា ថន លក្ខិណាត្រូវបានគេសម្លឹងឃើញថា បានបង្កើនប្រជាប្រិយភាពរបស់ខ្លួនខ្លាំងទ្វេដង រួមជាមួយនឹងការទទួលបានការងារជាច្រើនកាន់កាប់ក្នុងដៃ ជាពិសេស បន្ទាប់ពីជាប់ឈ្មោះជាតារាតំណាងឱ្យផលិតផលតែបៃតងអីុឈីតាន់ ក៏ដូចជាពិធីការិនីនៅស្ថានីយទូរទស្សន៍ហង្សមាស។ ជាមួយនឹងការបង្កើនភាពល្បីល្បាញ និងមានការងារមមាញឹកខាងលើនេះ ពិធីការិនីដែលមានស្រុកកំណើតនៅឯខេត្តកោះកុងម្នាក់នេះមានឱកាសកើបលុយបានយ៉ាងសន្ធឹកសន្ធាប់ រហូតភ្លេចខ្លួនមានជំងឺដោយបញ្ហាឈឺក្រពះដែលតម្រូវឱ្យមានការពិនិត្យ និងព្យាបាលយ៉ាងយកចិត្តទុកដាក់បំផុត។

ក្រោយពីបានក្លាយខ្លួនជាតារាតំណាងផលិតផលតែបៃតងអីុឈីតាន់ភ្លាម ថន លក្ខិណា បានក្លាយទៅជាពិធីការិនីលំដាប់កំពូលមួយរូបដែលមានកម្មវិធីកាន់កាប់ក្នុងដៃយ៉ាងច្រើន រួមជាមួយនឹងការទទួលបានប្រាក់ចំណូលកប់ក្តោងរាប់ម៉ឺនដុល្លារក្នុងមួយខែៗរហូតភ្លេចគិតពីសុខភាព បណ្ដែតបណ្តោយឱ្យកើតមានជំងឺដោយបញ្ហាក្រពះ។

ដោយមិនមានការលាក់បាំង ថន លក្ខិណា បានប្រាប់ឱ្យដឹងថា “ជំងឺក្រពះនេះបានកើតមានជាយូរណាស់មកហើយ គ្រាន់តែកាលពីមុនវាមិនសូវធ្វើទុក្ខខ្លាំង។ គ្រូពេទ្យប្រាប់ថា វាបណ្តាលមកពីការទទួលទានមិនទៀងទាត់។ មែនបង…ភាគតិចណាស់ដែលបានញាំុបាយទាន់ពេល ជូនកាលបាយថ្ងៃត្រង់របស់ខ្ញុំ គឺម៉ោង3 ឬម៉ោង4ល្ងាច ក៏មានដែរ ឬពេលខ្លះញាំុបាយល្ងាចជំនួសបាយថ្ងៃត្រង់ក៏មានដែរ។ កញ្ញា បានបន្តទៀតថា “ពេលវាធ្វើទុក្ខម្ដងៗពិបាកទ្រាំណាស់ ហើយពេលនេះគ្រូពេទ្យឱ្យញាំុថ្នាំជាប់ជាប្រចាំ ហើយកំណត់ឱ្យមានពេលសម្រាកគ្រប់គ្រាន់ និងត្រឹមត្រូវ ជាពិសេស ត្រូវយកចិត្តទុកដាក់ញាំុបាយឱ្យទៀងពេលវិញ។ យ៉ាងណាក៏ដោយ លក្ខិណា ក៏បានបញ្ជាក់ផងដែរថា សម្រាប់ជំងឺក្រពះដែលតែងធ្វើទុក្ខជាញឹកញាប់នេះ នាងមិនបានប្រាប់ឱ្យអ្នកម្ដាយជាទីស្រឡាញ់របស់នាងបានដឹងនោះឡើយ ខណៈដែលអ្នកម្តាយរូបនេះក៏មានបញ្ហាសុខភាពមិនសូវរឹងមាំផងដែរនោះ។

គួរកត់សម្គាល់ផងដែរថា កញ្ញា ថន លក្ខិណា នាពេលបច្ចុប្បន្ននេះបានក្លាយទៅជាពិធីការិនីឈានមុខ ដែលស្ថិតនៅលំដាប់កំពូល និងមានកម្មវិធីជាច្រើនកាន់នៅក្នុងដៃ រាប់ទាំងការងារជាពិធីការិនីប្រចាំនៅស្ថានីយទូរទស្សន៍ CTN ក៏ដូចជាស្ថានីយទូរទស្សន៍ហង្សមាស ដែលមានកម្មវិធីតន្ត្រីកម្សាន្ត អីុឈីតាន់ និងតន្ត្រីខារ៉ាបាវប្រចាំសប្ដាហ៍ រួមជាមួយនឹងការប្រគំតន្ត្រីទេសចរណ៍តាមបណ្តាខេត្តក្រុងរៀងរាល់សប្ដាហ៍ផងដែរ។ បន្ថែមពីនេះនៅមានកម្មវិធីជាលក្ខណៈឯកជនផ្សេងៗជាច្រើនទៀត ដូចជា ការសម្ពោធក្រុមហ៊ុន និងការបង្ហាញផលិតផលថ្មីជាដើម៕

January 16, 2018

កសិករដាំមៀននៅប៉ៃលិនមានសង្ឃឹម ខណៈរដ្ឋាភិបាលស្នើចិនឱ្យរកទីផ្សារ

ប៉ៃលិនគឺជាខេត្តមួយដែលមានសក្តានុពលខ្លាំងក្នុងការដាំដុះដើមឈើហូបផ្លែ ជាពិសេសដំណាំមៀនដែលកំពុងចែកចាយយ៉ាងផុលផុសនៅលើទីផ្សារក្នុងស្រុក។ ដើម្បីលើកកម្ពស់កសិផលក្នុងស្រុក រដ្ឋាភិបាលកម្ពុជាតាមរយៈក្រសួងពាណិជ្ជកម្មបានស្នើសុំឱ្យប្រទេសចិនទទួលយកផ្លែមៀនពីកម្ពុជាទៅបំពេញទីផ្សារបស់ខ្លួនបន្ថែមទៀត បន្ទាប់ទីផ្សារអង្ករ។

ក្នុងជំនួបជាមួយប្រតិភូកសិកម្មចិនដែលដឹកនាំដោយលោក ហ៊ី ជៀនយ៉ាង (He Jianxiang) អគ្គនាយករងទទួលបន្ទុកការិយាល័យកែច្នៃផលិតផលកសិកម្មនៃក្រសួងកសិកម្មប្រទេសចិន ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជាបានស្នើភាគីចិនឱ្យធ្វើការអភិវឌ្ឍចង្វាក់តម្លៃបន្ថែមសម្រាប់ដំណាំដំឡូងមី និងផ្លែមៀនប៉ៃលិនដើម្បីពង្រីកការនាំចេញផលិតផលទាំងពីរនេះឱ្យបានអតិបរមា។

ឯកឧត្តមរដ្ឋមន្ត្រីមានប្រសាសន៍បន្ថែមអំពីអត្ថប្រយោជន៍នៃដំឡូងមីដែលជាដំណាំអាទិភាពទី2 និងមានសក្តានុពលនាំចេញខ្ពស់របស់កម្ពុជាបន្ទាប់ពីដំណាំស្រូវ ព្រមទាំងផ្លែមៀនប៉ៃលិន ដែលជាដំណាំឈើហូបផ្លែមានតម្រូវការខ្ពស់នៅលើទីផ្សារ។

ឯកឧត្តមបានគូសបញ្ជាក់ថា កម្ពុជាកំពុងចងក្រងគោលនយោបាយដំឡូងមី និងដំណាំផ្សេងៗរួមទាំងមៀនប៉ៃលិនដើម្បីជំរុញការអភិវឌ្ឍចង្វាក់តម្លៃ និងការនាំចេញសំដៅធ្វើពិពិធកម្មវិស័យការងារជូនប្រជាជន និងកាត់បន្ថយភាពក្រីក្រ។ ឯកឧត្ដមមានប្រសាសន៍ថា “កម្ពុជាមានដីអំណោយផលសម្រាប់វិស័យកសិកម្ម ជាពិសេសដំឡូងមី និងដំណាំមៀននៅខេត្តប៉ៃលិន ហើយយើងចង់សហការជាមួយវិនិយោគិនចិនដើម្បីកែច្នៃផលិតផលទាំងពីរនេះសំដៅនាំចេញទៅកាន់ប្រទេសចិនដោយផ្ទាល់ ដោយពុំចាំបាច់ឆ្លងកាត់ប្រទេសទីបីដូចពេលបច្ចុប្បន្ន។

ជាការឆ្លើយតប លោក ហ៊ី ជៀនយ៉ាង បានសន្យានឹងយកសំណើនេះទៅពិភាក្សាឱ្យបានស៊ីជម្រៅ និងសិក្សាបន្ថែមអំពីលទ្ធភាពសហការវិនិយោគលើការអភិវឌ្ឍចង្វាក់តម្លៃនៃផលិតផលទាំងពីរ គឺដំឡូងមី និងផ្លែមៀនប៉ៃលិន និងដំណាំសក្តានុពលផ្សេងៗទៀតរបស់កម្ពុជា ដូចជា ពោត ស្រូវ និងស្វាយជាដើម។

ទន្ទឹមគ្នានេះដែរ លោក ហ៊ឺ ជៀនយ៉ាង ក៏បានជម្រាបទៅឯកឧត្តមរដ្ឋមន្ត្រីពាណិជ្ជកម្មកម្ពុជាដែរថា លោកនឹងលើកយកសំណើនេះទៅពិភាក្សាជាមួយរដ្ឋមន្ត្រីកសិកម្មចិនដែលនឹងអញ្ជើញអមដំណើរឯកឧត្តម លី កឺឈាំង (Li Keqiang) នាយករដ្ឋមន្ត្រីនៃសាធារណរដ្ឋប្រជាមានិតចិនដែលនឹងអញ្ជើញមកបំពេញទស្សនកិច្ចផ្លូវការនៅកម្ពុជានៅដើមសប្តាហ៍ក្រោយនេះ។

ទាក់ទងនឹងព័ត៌មាននេះលោកប៊ុន ថេង កសិករដាំមៀននៅខេត្តប៉ៃលិនមានប្រសាសន៍ថា លោករីករាយណាស់ដែលរដ្ឋាភិបាលកំពុងស្វែងរកទីផ្សារជូនកសិករដាំមៀនដូច្នេះ។ លោកបន្តថា ដោយសារទីផ្សារមៀនក្នុងស្រុកមានតម្រូវការខ្ពស់ លោកបានដាំសាកល្បងនៅលើផ្ទៃដីទំហំត្រឹម1ហិកតាប៉ុណ្ណោះហើយនៅពេលទទួលបានផល ផ្លែមៀនរបស់លោកមិនខ្វះទីផ្សារនោះទេ គឺមានម៉ូយមកទទួលទិញដល់ទីកន្លែងតែម្តង ហើយលោកថា បើសិនផ្លែមៀនប៉ៃលិនត្រូវបានរដ្ឋាភិបាលចិននាំចូលទៅទីផ្សាររបស់ខ្លួនទៀតផងនោះ លោកនឹងពង្រីកចម្ការមៀនឱ្យកាន់តែធំជាងនេះថែមទៀត។

សូមបញ្ជាក់ថា ទំហំពាណិជ្ជកម្មទ្វេភាគីសរុបរវាងចិន និងកម្ពុជាបានកើនឡើងយ៉ាងឆាប់រហ័សជាមធ្យម26%ក្នុងរយៈពេល10ឆ្នាំចុងក្រោយ។ កាលពីឆ្នាំ2016 ប្រទេសទាំងពីរសម្រេចបានទំហំពាណិជ្ជកម្មដល់ទៅ4,800លានដុល្លារអាមេរិក ក្នុងនោះការនាំចេញរបស់កម្ពុជាមានទឹកប្រាក់ 830លានដុល្លារ និងនាំចូល 3,900លានដុល្លារ។ ចិនគឺជាប្រទេសវិនិយោគធំជាងគេនៅកម្ពុជាដែលគិតត្រឹមឆ្នាំ2017 វិនិយោគរបស់ចិនមានចំនួន 5,000,100លានដុល្លារ លើវិស័យមួយចំនួន ដូចជាកម្មន្តសាល សំណង់ វាយនភណ្ឌ និងអគ្គិសនី។ ដោយឡែកភ្ញៀវទេសចរចិនដែលមកកម្ពុជាបានកើនដល់83ម៉ឺននាក់នៅក្នុងឆ្នាំ 2017 គឺបានកើនឡើង 20% បើធៀបនឹងឆ្នាំ2016។ នៅក្នុងឆ្នាំ2018នេះ ចិនក៏បានយល់ព្រមឱ្យកម្ពុជានាំចូលអង្ករ 30ម៉ឺនតោនផងដែរ៕

January 16, 2018

Microsoft បង្ហាញ NoteBook ឈុតថ្មីប្រើ ARM ចំណុចខ្លាំងលើថ្មប្រើបានពេញមួយថ្ងៃ

កាលពីពេលមុននេះមានបែកធ្លាយព័ត៌មានរឿងឧបករណ៍ដែលប្រើ ARM ពី ASUS ដែលបំពាក់ Windows 10 ស៊េរីធម្មតាអាចប្រើការប្រូក្រាមដែលដំណើរការលើ x86 របស់ Intel, AMD ភាគច្រើនបាននោះ ឥឡូវនេះ រឿងនេះបានក្លាយជាការពិតហើយ។

Microsoft និង Qualcomm បានប្រកាសបង្ហាញជាផ្លូវការហើយនូវ Notebook ដែលប្រើ CPU ARM ពី Qualcomm ដែលប្រើ Windows 10 ស៊េរីធម្មតា (ដូចកុំព្យូទ័រទូទៅ) ដែលប្រើឈិប Qualcomm Snapdragon 835 ដែល HP និង ASUS កំពុងតែបើកបង្ហាញឧបករណ៍ទាំងនេះក្នុងថ្ងៃនេះ ហើយគេរំពឹងថា Lenovo ក៏នឹងចាប់ផ្ដើមដំណើរការក្នុងមិនប៉ុន្មានសប្ដាហ៍ខាងមុខនេះដែរ។

កាលពីពេលមុននេះ Microsoft ធ្លាប់បានបង្ហាញឱ្យឃើញថា Windows 10 អាចប្រើការនៅលើ ARM បាន និងលេងហ្គេម ឬលេងកម្មវិធីទូទៅបានដូចជាAdobe Photoshop សម្រាប់ Windows ធម្មតាបានភ្លាមៗកាលពីខែធ្នូ ឆ្នាំ2016 កន្លងមក។

ទាំងអស់នេះឧបករណ៍របស់ HP និង Asus នឹងប្រកបដោយ Windows 10S ដែលរចនាម៉ូដចេញមកដើម្បីប្រើការ Application តាមរយៈ Windows Store តែប៉ុណ្ណោះ តែអ្នកប្រើប្រាស់នឹងអាច Upgrade ទៅជា Windows 10 Pro បានដោយមិនអស់ថ្លៃចំណាយអ្វីទាំងអស់។

Microsoft បានបង្ហាញចំណុចលេចធ្លោថា ការប្រើ ARM ធ្វើឱ្យថ្មបាត់តេរីអាចនៅបានពេញមួយថ្ងៃប្រើការបានប្រមាណជា 20-22ម៉ោង ហើយបានរៀនយល់ដឹងពីចំណុចខុសឆ្គងពីការធ្វើ Windows RT កាលពីអតីតកាលមកកែសម្រួលទៀតផង។

សម្រាប់ព័ត៌មានរបស់លក្ខណៈសម្បត្តិដែលចេញមក មាន Asus NovaGo 2-in-1ប្រកបដោយអេក្រង់ HD ទំហំ 13.3អីុញ RAM ខ្ពស់បំផុត 8GB និងកន្លែងផ្ទុកឯកសារបាន 256GB ថែមទាំងអាចប្រើប៊ិចស្តៃឡាស់ និងមានផត USB 3.1 ផត HDMI ព្រមទាំង microSD ទៀតផង។

ចំណែក HP Envy X2 វិញចេញមកព្រមជាមួយអេក្រង់បង្ហាញទិន្នន័យទំហំ 12.3អីុញ RAM 8GB និងផ្ទៃផ្ទុកឯកសារ 256GB និង HP នៅអាចប្រើការជាមួយប៊ិចស្តៃឡាស់បាន ហើយទាំងពីរស៊េរីនេះ នឹងចេញមកព្រមជាមួយការតភ្ជាប់ LTE ទៀតផង៕

January 16, 2018

Man Utd ទុករឿង Sanchez មួយឡែក ដើម្បីផ្តួល Stoke

ក្រុម Manchester United បានទុករឿងការប្រជែងទិញខ្សែប្រយុទ្ធ Alexis Sanchez របស់ក្លិប Arsenal មួយឡែកសិន ដើម្បីកត់ត្រាជ័យជម្នះយ៉ាងកក់ក្តៅក្នុងលទ្ធផល 3-០ លើក្រុម Stoke នាកីឡដ្ឋាន Old Trafford កាលពីថ្ងៃចន្ទ។

ខ្សែបម្រើ Antonio Valencia និងខ្សែប្រយុទ្ធ Anthony Martial សុទ្ធសឹងបានរកគ្រាប់បាល់បញ្ចូលទីដូចគ្នានៅតង់ទី1 ហើយ Romelu Lukaku បានបន្ថែម 1គ្រាប់ទៀតនៅតង់ទី2 ខណៈដែលលោក Jose Mourinho បានផ្តួលក្រុម Stoke ជាលើកទី1 ក្នុងនាមជាអ្នកចាត់ការទូទៅរបស់ក្រុម Man United ក្នុងចំណោមការជួបគ្នា 4លើក។

ប៉ុន្តែ ការបង្ហាញពីទម្រង់លេងរបស់ Man United ពីការប្រកួតនេះមានការខ្ជះខ្ជាយឱកាសជាច្រើន និងនៅតែបង្ហាញឲ្យឃើញថា លោក Mourinho ត្រូវតែបន្ថែមតារាឆ្នើម Sanchez របស់ក្លិប Arsenal ចូលក្នុងក្រុមរបស់លោក អំឡុងពេលនៃការដោះដូរកីឡាករនៅខែមករានេះ បើទោះបីជាបានកាត់បន្ថយពិន្ទុនាំមុខរបស់ក្រុម Manchester City នៅលើកំពូលតារាងនៃក្របខ័ណ្ឌ Premier League មកនៅត្រឹម 12ពិន្ទុក៏ដោយ។

ខ្សែបម្រើដ៏មានឥទ្ធិពល Paul Pogba របស់ Man United បានប្រាប់ទូរទស្សន៍ Sky Sports ថា៖ «ពិតណាស់ យើងឃើញ Manchester City កំពុងតែនាំមុខយើង ហើយពួកគេបានរងបរាជ័យ។ ពួកគេកំពុងតែនាំមុខ ហេតុនេះ យើងតែងតែចង់តាមពួកគេឲ្យទាន់ ហេតុនេះ វាជារឿងល្អដែរដែលពួកគេបានរងបរាជ័យ ហេតុនេះ សម្រាប់យើង យើងត្រូវតែគិតអំពីខ្លួនយើង»៕

ប្រភពពី៖ Channel News Asia

January 16, 2018

គម្រោងចំនួន 3 ទៀតទទួលបានការគាំទ្រផ្នែកហិរញ្ញវត្ថុពី ADB

ធនាគារអភិវឌ្ឍន៍អាស៊ី (ADB) ដែលជាដៃគូអភិវឌ្ឍន៍ហិរញ្ញវត្ថុធំមួយរបស់កម្ពុជាបានសម្រេចផ្តល់ហិរញ្ញប្បទានចំនួន180 លានដុល្លារក្នុងឆ្នាំ2018 ដល់កម្ពុជាសម្រាប់អនុវត្តនូវគម្រោងចំនួន 3ដើម្បីអភិវឌ្ឍវិស័យគមនាគមន៍ដឹកជញ្ជូន ការកាត់បន្ថយភាពក្រីក្រ និងបណ្តាញទឹកស្អាតតាមបណ្តាខេត្តនានា។

ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក Samiuela T. Tukuafu នាយកស្ថានតំណាងធនាគារអភិវឌ្ឍន៍អាស៊ីប្រចាំកម្ពុជា បានចុះហត្ថលេខាលើអនុស្សរណយោគយល់គ្នាលើគម្រោងដែលបានឯកភាពគ្នា កាលពីថ្ងៃទី9 ខែមករា ឆ្នាំ2018។

ក្នុងពិធីចុះហត្ថលេខានៅឯទីស្តីការក្រសួងសេដ្ឋកិច្ច និងហិរញ្ញវត្ថុ ឯកឧត្តមទេសរដ្ឋមន្ត្រី អូន ព័ន្ធមុនីរ័ត្ន បានចាត់ទុកកម្ចីហិរញ្ញប្បទាននោះថានឹងដើរតួនាទីដ៏សំខាន់ក្នុងការរួមចំណែកអភិវឌ្ឍកម្ពុជា សំដៅកាត់បន្ថយភាពក្រីក្ររបស់ប្រជាជន និងបែងចែកផ្លែផ្កានៃកំណើន ប្រកបដោយសមធម៌ដល់ប្រជាជនកម្ពុជា តាមរយៈការបន្តធានាសម្រេចឱ្យបាននូវចីរភាពនៃកំណើនសេដ្ឋកិច្ចក្នុងរយៈពេលវែង។

គម្រោងទាំង 3 ដែលមានទឹកប្រាក់សរុប 180លានដុល្លារអាមេរិកនោះ រួមមានៈ1- គម្រោងកែលម្អបណ្តាញផ្លូវជាតិមួយចំនួនដែលគ្រោងចំណាយថវិកាសរុបចំនួនប្រមាណ 76,94 លានដុល្លារអាមេរិកដោយ ADB នឹងផ្តល់ហិរញ្ញប្បទានប្រមាណ 70 លានដុល្លារ សម្រាប់កែលម្អកំណាត់ផ្លូវជាតិលេខ1 និងលេខ6 ប្រវែងប្រមាណ 147 គ.ម។ ទី2- គឺគម្រោងផ្គត់ផ្គង់ទឹកស្អាត និងអនាម័យតាមខេត្តមួយចំនួន ដែលគ្រោងចំណាយថវិកាសរុបប្រមាណ 119 លានដុល្លារអាមេរិក ដោយ ADB នឹងផ្តល់ហិរញ្ញប្បទានប្រមាណ 50 លានដុល្លារអាមេរិក

ក្រៅពីនោះជាហិរញ្ញប្បទានឥតសំណងរបស់រដ្ឋាភិបាលជប៉ុនចំនួន 10លានដុល្លារអាមេរិក ព្រមទាំងថវិកានៅសល់ជាហិរញ្ញប្បទានពីរដ្ឋាភិបាល និងថវិកាបដិភាគរបស់រាជរដ្ឋាភិបាលកម្ពុជា។

ទី3- គឺគម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចនៅតំបន់ទន្លេសាប ដោយធនាគារអភិវឌ្ឍន៍អាស៊ីនឹងផ្តល់ទឹកប្រាក់ 50លានដុល្លារសម្រាប់គម្រោងនេះ រួមនឹងឥណទានសម្បទាន 10 លានដុល្លារពីមូលនិធិអន្តរជាតិសម្រាប់អភិវឌ្ឍកសិកម្ម (IFAD) និងការចូលរួមបដិភាគប្រមាណ 6លានដុល្លារពីរដ្ឋាភិបាល។

គិតមកទល់នឹងពេលនេះ ADB បានផ្តល់ហិរញ្ញប្បទានសហប្រតិបត្តិការសរុបប្រមាណ 2.750លានដុល្លារអាមេរិក ដោយគិតបញ្ចូលទាំងគម្រោង 3 នេះផងដែរ។ យោងតាមព្រឹត្តិបត្ររបស់ធនាគារអភិវឌ្ឍន៍អាស៊ីបានឱ្យដឹងថា វិស័យសំខាន់ចំនួន 10 ដែលគ្របដណ្តប់លើគម្រោងចំនួន 359 របស់កម្ពុជាធ្លាប់ប្រើប្រាស់ធនធានហិរញ្ញវត្ថុពីធនាគារអភិវឌ្ឍន៍អាស៊ី រួមមាន ៖ វិស័យកសិកម្ម ធនធានធម្មជាតិ និងអភិវឌ្ឍន៍ជនបទ វិស័យអប់រំ វិស័យថាមពល វិស័យហិរញ្ញវត្ថុ វិស័យសុខាភិបាល វិស័យឧស្សាហកម្ម និងពាណិជ្ជកម្ម ការគ្រប់គ្រងវិស័យសាធារណៈ វិស័យដឹកជញ្ជូន ទឹក និងហេដ្ឋារចនាសម្ព័ន្ធ ព្រមទាំងសេវាដទៃទៀតនៅតំបន់ទីក្រុង និងពហុវិស័យផ្សេងៗទៀត។

ធនាគារអភិវឌ្ឍន៍អាស៊ី បានហៅប្រទេសកម្ពុជាថាជាប្រទេសមួយក្នុងចំណោមប្រទេសដែលមានសេដ្ឋកិច្ចរីកចម្រើនលឿនជាងគេនៅអាស៊ីអាគ្នេយ៍ក្នុងរយៈពេល 5 ឆ្នាំចុងក្រោយនេះ។ កំណើនសេដ្ឋកិច្ចបានជួយកាត់បន្ថយភាពក្រីក្ររបស់ប្រទេសកម្ពុជាពី47.8% ក្នុងឆ្នាំ2007 មកនៅ 13.5% ក្នុងឆ្នាំ2014។ ទោះបីជាបែបនេះក្តី ក៏ប្រជាជនកម្ពុជារហូតដល់ទៅ 70% នៅបន្តរស់នៅជាមួយនឹងចំណូលក្រោម 3 ដុល្លារក្នុងមួយថ្ងៃដដែល។

យោងតាមព្រឹត្តិបត្រសមាជិករបស់ធនាគារអភិវឌ្ឍន៍អាស៊ីដែលមានមូលដ្ឋាននៅទីក្រុងម៉ានីលប្រទេសហ្វីលីពីនបានចេញផ្សាយថា កម្ពុជាបានប្រើប្រាស់ទឹកប្រាក់ដែលទទួលបានពីធនាគារអភិវឌ្ឍន៍អាស៊ី សម្រាប់គម្រោងសរុបចំនួន 359ដោយមិនបួកបញ្ជូលគម្រោង 3 ថ្មីនេះទេ ចាប់តាំងពីឆ្នាំនៃការភ្ជាប់ទំនាក់ទំនងនឹងគ្នាឡើងវិញ រហូតដល់ឆ្នាំ2016៕

January 16, 2018

Chelsea ប្រជែង Man Utd ទិញ Sanchez ខណៈ Man City បោះបង់

ក្លិបបិសាចក្រហម Manchester United ហាក់កំពុងតែស្ថិតយ៉ាងប្រកៀកក្នុងការចុះហត្ថលេខាជាមួយនឹង Alexis Sanchez របស់ក្លិប Arsenal កាលពីថ្ងៃចន្ទ ខណៈដែលក្លិបជាគូប្រជែងក្នុងតំបន់តែមួយរបស់ពួកគេ Manchester City បានបញ្ចប់ការចាប់អារម្មណ៍របស់ពួកគេក្នុងការទិញតារាឆ្នើមអន្តរជាតិស៊ីលីរូបនេះហើយ។

Sanchez វ័យ 29ឆ្នាំ ហាក់ដូចជាបានលេងការប្រកួតជាលើកចុងក្រោយរបស់គេរួចហើយសម្រាប់ក្រុម Arsenal ខណៈដែលលោក Arsene Wenger ដែលជាអ្នកចាត់ការទូទៅ បានបញ្ជាក់កាលពីថ្ងៃអាទិត្យថា ការផ្ទេររបស់គេអាចនឹងត្រូវប្រកាសក្នុងរយៈពេល 48ម៉ោងទៀត។

ស្របពេលជាមួយគ្នានេះ មានព័ត៌មានថ្មីមួយចេញផ្សាយថា ក្លិប Chelsea ក៏បានបោះជំហានដើម្បីប្រជែងការចុះហត្ថលេខាជាមួយនឹង Sanchez ពីក្លិប Arsenal ផងដែរ ក្រោយពីបានរៀបចំការពិភាក្សាផ្សេងៗរួចមក។ ក្លិប Manchester United ដែលបានបញ្ជាក់យ៉ាងច្បាស់រួចជាស្រេចថា ពួកគេត្រៀមផ្តល់តម្លៃខ្លួន 35លានផោន (ស្មើនឹង 48លានដុល្លារអាមេរិក) តាមការស្នើសុំរបស់ក្លិប Arsenal ខណៈដែលក្លិប Man City ហាក់មានការស្ទាក់ស្ទើរក្នុងការចំណាយប្រាក់លើតម្លៃខ្លួននេះ។

Sanchez អាចនឹងចង់បន្តនៅក្នុងទីក្រុងឡុងដ៍ច្រើនជាង ក្រោយពីរូបគេបានច្រានចោលការផ្ទេរទៅកាន់ក្លិប Liverpool កាលពីឆ្នាំ 2014 ដោយសារតែហេតុផលរឿងទីតាំងភូមិសាស្ត្រ។ ប៉ុន្តែក្រុមរបស់លោក Jurgen Klopp មួយនេះ ក៏ទាក់ទងជាមួយនឹងខ្សែប្រយុទ្ធ Sanchez វ័យ 28ឆ្នាំនៅពេលនោះផងដែរ៕

ប្រភពពី៖ Worldsoccertalk

January 16, 2018

តើអ្នកដឹងទេថា ពេលណាដែលមិនគួរហាត់ប្រាណ?

ការហាត់ប្រាណនឹងធ្វើឱ្យសុខភាពរឹងមាំឡើងទាំងរាងកាយ ទាំងផ្លូវចិត្ត។ អ្នកដែលហាត់ប្រាណជាប់ជាប្រចាំនឹងយល់ច្បាស់នូវការពិតក្នុងចំណុចនេះយ៉ាងច្បាស់លាស់។ អ្នកខ្លះប្រាប់ថា ការហាត់ប្រាណប្រៀបដូចជាគ្រឿងញៀនម្យ៉ាងអុីចឹង ព្រោះបើបានប្រព្រឹត្តប្រតិបត្តិរហូតក្លាយជាទម្លាប់ប្រចាំហើយនោះ បើមិនបានហាត់ប្រាណមួយថ្ងៃ នឹងមានអារម្មណ៍ថា ដូចជាមិនសូវស្រស់ស្រាយប៉ុន្មានសោះ នេះជាការពិត (ព្រោះរាងកាយមិនបានបញ្ចេញសារថាតុនៃសេចក្តីសុខ «អេនដូហ្វ៊ីន» ចេញមក)។

តែយ៉ាងណាក៏ដោយ ទោះជាការហាត់ប្រាណធ្វើឱ្យមានផលល្អដល់សុខភាពរាងកាយយ៉ាងច្រើនមែន តែក៏មានករណីជាច្រើនដែលយើងគួរតែប្រយ័ត្ន ឬគួរតមការធ្វើលំហាត់ប្រាណជាបណ្តោះអាសន្នដែរ ជាពិសេសក្នុងសភាវណាមួយដូចខាងក្រោមនេះ។

1 . ឈឺថ្កាត់ មិនស្រួលខ្លួន ជាពិសេសបំផុតបើមានគ្រុនក្តៅខ្លួន ឬមានអាការរលាកក្លាយនៅលើផ្នែកណាមួយរបស់រាងកាយ

2 . ក្រោយជាសះស្បើយពីជំងឺថ្មីៗ ដែលរាងកាយនៅទន់ខ្សោយ បើសិនហាត់ប្រាណក្នុងអំឡុងពេលនេះ នឹងធ្វើឱ្យរាងកាយរឹតតែទន់ខ្សោយទៅទៀត។

3 . បន្ទាប់ពីញ៉ាំអាហារហើយភ្លាមៗ ព្រោះនឹងធ្វើឱ្យឈាមនៅក្នុងប្រព័ន្ធឈាមរត់ត្រូវបែងចែកទៅប្រើប្រាស់ក្នុងការរំលាយអាហារ ដូច្នេះឈាមដែលនឹងហូរទៅចិញ្ចឹមសាច់ដុំផ្នែកដែលហាត់ប្រាណនឹងថយចុះ ធ្វើឱ្យសាច់ដុំចុះខ្សោយសមត្ថភាព និងងាយកើតប្រគ្រីវកាច់។

4 . ក្នុងពេលដែលធាតុអាកាសក្តៅ និងហប់ខ្លាំង ព្រោះរាងកាយនឹងបាត់បង់ញើស និងទឹកច្រើនជាងប្រក្រតី ធ្វើឱ្យរាងកាយទន់ខ្សោយ ឆាប់ហត់ ឬអាចខ្យល់គបាត់ស្មារតីក៏មាន (សម្រាប់អ្នកដែលរាងកាយមិនរឹងមាំដូចអ្នកកីឡា)។

អាការដែលបង្ហាញថា គួរបញ្ឈប់ការហាត់ប្រាណ

ក្នុងករណីខ្លះដែលរាងកាយអាចចុះទន់ខ្សោយមួយខណៈពេល ដូចជា ក្រោយពេលកើតអាការរាករូស អត់ងងុយ ការហាត់ប្រាណដែលធ្លាប់តែធ្វើតាមធម្មតានោះ អាចក្លាយទៅជាធ្ងន់ធ្ងរបាន ដូច្នេះបើសិនជាមានអាការដូចខាងក្រោមនេះ ទោះជាតែមួយករណី ឬច្រើនយ៉ាងក៏ដោយ គួរតែឈប់ធ្វើការហាត់ប្រាណភ្លាម ដូចជា ៖

1 . មានអារម្មណ៍ថាហត់ខុសប្រក្រតី

2 . មានអាការញ័របេះដូងខុសប្រក្រតី

3 . មានអាការដកដង្ហើមមិនស្រួល ឬដកដង្ហើមមិនបានពេញលេញ

4 . មានអាករវឹលមុខ

5 . មានអាការក្អួតចង្អោ

6 . មានអាការងងឹតមុខ

7 . ជីពចរលោតញាប់ច្រើនជាង 140 ដងក្នុង 1នាទី (សម្រាប់មនុស្សចាស់) ឬ 160ដងក្នុង 1នាទី(សម្រាប់កម្លោះក្រមុំ)

សូមចាំទុកថា បើមានអាការណាមួយកើតឡើង ត្រូវឈប់ហាត់ប្រាណភ្លាម រួចហើយអង្គុយសម្រាក ឬគេងសម្រាករហូតទាល់តែបាត់ហត់ មិនគួរហាត់ប្រាណបន្តទៀតឡើយ និងត្រូវទៅប្រឹក្សាជាមួយគ្រូពេទ្យ ឬសម្រាកឈប់ហាត់ប្រាណរហូតទាល់តែសភាពរាងកាយរឹងប៉ឹងដូចប្រក្រតីឡើងវិញ៕

January 16, 2018

Author: វល័ក្ខ