វល័ក្ខ - La Reine Media

EZECOM សម្ពោធភាពជាដៃគូជាមួយក្រុមហ៊ុន MICROSOFT និងទទួលសិទ្ធិចែកចាយ OFFICE 365 នៅកម្ពុជា

ភ្នំពេញ៖ នៅព្រឹកថ្ងៃសុក្រ ទី19 ខែមករា នេះ ក្រុមហ៊ុន EZECOM ដែលជាក្រុមហ៊ុនអ៊ីនធឺណិតឈានមុខគេនៅកម្ពុជា បានប្រកាសការចាប់ដៃគូសហការជាមួយក្រុមហ៊ុនបច្ចេកវិទ្យាយក្សលំដាប់ពិភពលោក គឺក្រុមហ៊ុន Microsoft ក្នុងការចែកចាយកម្មវិធី OFFICE 365 នៅកម្ពុជា។ ក្នុងនាមជា Microsoft CSP Partner ដំបូងគេនៅកម្ពុជា ក្រុមហ៊ុន EZECOM មានសិទ្ធិចែកចាយដោយស្របច្បាប់នូវកម្មវិធី OFFICE 365 ដែលជាបណ្តុំកម្មវិធីកុំព្យូទ័រចុងក្រោយបំផុត ដែលប្រមូលផ្តុំនូវមុខងារពិសេសៗជាច្រើន និងអនុញ្ញាតឱ្យអ្នកប្រើប្រាស់មានផលិតភាពការងារគ្រប់ពេលវេលា និងគ្រប់ទីកន្លែង។

ការដែលក្រុមហ៊ុន Microsoft ដែលជាក្រុមហ៊ុនដ៏ធំមានមូលដ្ឋាននៅសហរដ្ឋអាមេរិក សម្រេចចិត្តជ្រើសរើស EZECOM ជា Cloud Service Provider (CSP) ដំបូងគេនៅកម្ពុជាយ៉ាងដូច្នេះ គឺជាការបង្ហាញយ៉ាងច្បាស់ថា ក្រុមហ៊ុន Microsoft មានទំនុកចិត្តចំពោះគុណភាពរបស់ក្រុមហ៊ុនអ៊ីនធឺណិតលំដាប់ខ្ពស់ EZECOM ក្នុងការចែកចាយបន្តនូវផលិតផលរបស់ខ្លួនទៅដល់អតិថិជននានា។

ផលិតផលសំខាន់បំផុតមួយសម្រាប់អតិថិជនគឺ Office 365 ដែលជាបណ្តុំកម្មវិធីការិយាល័យសម្បូរបែប រួមមាន Word, Excel និង PowerPoint ជាដើម ប៉ុន្តែមានភាពបត់បែន និងចល័តភាពខ្ពស់ ដោយអាចប្រើប្រាស់យ៉ាងងាយស្រួលតាមទូរស័ព្ទស្មាតហ្វូន អាចចែករំលែក និងរក្សាទុកឯកសារយ៉ាងងាយស្រួល ថែមទាំងមានសុវត្ថិភាពលើបណ្តាញ Cloud មានប្រព័ន្ធអ៊ីមែលថ្មី មុខងារផ្ញើសារ និងអាចឆ្លងឆ្លើយតាមវីដេអូខលក្នុងកម្រិត HD ជាមួយក្រុមការងារនិងអតិថិជនទៀតផង។ បណ្តុំកម្មវិធីទាំងមូលមានមូលដ្ឋានលើបណ្តាញ Cloud ដែលអនុញ្ញាតឱ្យអ្នកប្រើប្រាស់ភ្ជាប់ទំនាក់ទំនងគ្រប់ពេលវេលា គ្រប់ទីកន្លែងដែលមានសេវាអ៊ីនធឺណិត តាមរយៈកម្មវិធីផ្សេងៗ ដូចជា Skype for Business និង Microsoft Teams ជាដើម។ សម្រាប់រាល់អ្នកប្រើប្រាស់ម្នាក់ៗ គាត់នឹងទទួលបានទំហំធំរហូតដល់ ១ តេរ៉ាបៃត៍ (TB) សម្រាប់រក្សាទុក និងចែករំលែកឯកសារនៅលើអ៊ីនធឺណិត ហើយរាល់ឯកសារទាំងអស់នឹងត្រូវបានការពារយ៉ាងមានសុវត្ថិភាពដោយបច្ចេកវិទ្យាចុងក្រោយពីក្រុមហ៊ុន Microsoft និងអាចស្ដារមកវិញបានងាយស្រួល។

លោក Paul Blanche-Horgan អគ្គនាយកក្រុមហ៊ុន EZECOM បានមានប្រសាសន៍ថា “ក្រុមហ៊ុន EZECOM ពិតជាមានក្តីសោមនស្សរីករាយណាស់ ដែលត្រូវបានក្រុមហ៊ុន Microsoft ជ្រើសរើសជាដៃគូយុទ្ធសាស្ត្រដ៏សំខាន់ក្នុងការចែកចាយផលិតផល និងសេវាដ៏ពិសេសនេះនៅកម្ពុជា ហើយអ្វីដែលកាន់តែគួរឱ្យមានមោទនភាពនោះ គឺយើងបានក្លាយជាដៃគូផ្លូវការដំបូងគេនៅកម្ពុជាទៀតផង” លោកបានបន្ថែមទៀតថា “តាមរយៈការផ្តល់ជូននូវផលិតផលនិងសេវាកម្មថ្មីៗទាំងនេះ ក្រុមហ៊ុន Microsoft និងក្រុមហ៊ុន EZECOM កំពុងរួមគ្នាលើកកម្ពស់ប្រសិទ្ធភាពប្រតិបត្តិការសហគ្រាសទាំងតូច និងធំនៅកម្ពុជា។

ក្រុមហ៊ុន EZECOM ក៏បានបញ្ជាក់ផងដែរថា ខ្លួនបាន និងកំពុងត្រៀមខ្លួនយ៉ាងស្វិតស្វាញ ដើម្បីធានាថាគ្រប់យ៉ាងមានភាពរលូនល្អក្នុងការផ្តល់ជូនសេវាថ្មីនេះដល់អតិថិជនទាំងអស់ ក៏ដូចជាធានាថាអតិថិជនទទួលបានព័ត៌មានគ្រប់គ្រាន់ក្នុងការទាញយកអត្ថប្រយោជន៍ពេញលេញបំផុតពីសេវាកម្មនេះ។

លោកស្រី Rena Chai អគ្គនាយកផ្នែកទីផ្សារ និងប្រតិបត្តិការនៃក្រុមហ៊ុន Microsoft បានមានប្រសាសន៍ថា “ការជ្រើសរសើក្រុមហ៊ុន EZECOM ជាដៃគូ Cloud Solutions Partner ដំបូងគេនៅក្នុងប្រទេសកម្ពុជា គឺជាការសម្រេចគោលដៅដ៏សំខាន់មួយទៀត នៅក្នុងកិច្ចខិតខំប្រឹងប្រែងរបស់ក្រុមហ៊ុន Microsoft ក្នុងទីផ្សារមួយនេះ។ ដើម្បីសម្រេចបាននូវចក្ខុវិស័យរបស់យើង ក្នុងការលើកកម្ពស់សមត្ថភាពមនុស្ស និងស្ថាប័នទាំងអស់នៅលើពិភពលោក យើងចាំបាច់ត្រូវការដៃគូល្អៗដែលដើរតួនាទីសំខាន់ក្នុងការផ្សព្វផ្សាយទៅដល់អតិថិជន។ ជាមួយនឹងជំនាញយូរឆ្នាំ និងវត្តមានរឹងមាំនៅក្នុងប្រទេសកម្ពុជា យើងជឿជាក់ថាក្រុមហ៊ុន EZECOM នឹងអាចជួយអតិថិជនអោយទទួលអត្ថប្រយោជន៍ច្រើនបំផុតពីការប្រើប្រាស់កម្មវិធី Office 365 នៅក្នុងប្រទេសកម្ពុជា” ៕

January 19, 2018

តើការរស់នៅក្នុងបុរី និងការរស់នៅជាលក្ខណៈឯកជនមួយណាប្រសើរជាង?

បច្ចុប្បន្នពលរដ្ឋកម្ពុជាជាច្រើនពិសេសយុវជនដែលទើបរៀបការហើយថ្មីថ្មោងហាក់មានការចាប់អារម្មណ៍យ៉ាងខ្លាំងទៅលើការស្វែងរកលំនៅឋានផ្ទាល់ខ្លួន ដើម្បីរស់នៅសាងសុភមង្គលគ្រួសារ និងមានជីវិតដែលឯករាជ្យ។ ក្នុងនោះគេមើលឃើញថា មានអ្នកខ្លះមានចំណាប់អារម្មណ៍ទៅលើការទិញផ្ទះនៅក្នុងគម្រោងបុរី រីឯអ្នកខ្លះទៀតបានសម្លឹងទៅលើការរស់នៅក្នុងលំនៅឋានខាងក្រៅដោយឡែកជាលក្ខណៈឯកជនជាជាងទិញផ្ទះក្នុងបុរី។

ដូច្នេះមានសំណួរមួយសួរថា តើការទិញផ្ទះនៅក្នុងបុរី និងទិញផ្ទះនៅខាងក្រៅខុសគ្នាបែបណា?

ឧកញ៉ា នួន រិទ្ធី អគ្គនាយកក្រុមហ៊ុន KFA បានលើកឡើងថា រវាងការរស់នៅក្នុងបុរី និងការរស់នៅជាលក្ខណៈឯកជនក្រៅបុរី គឺមានគុណសម្បត្ដិ និងគុណវិបត្ដិដូចគ្នា។ គុណសម្បត្ដិនៃការរស់នៅក្នុងបុរី គឺអ្នករស់នៅក្នុងបុរីអាចទទួលបានសេវាកម្មច្រើន មានហេដ្ឋារចនាសម្ព័ន្ធល្អ រស់នៅមានផាសុកភាពតាមរយៈការបង្កើតតំបន់បៃតង ផ្ទះមានការរចនាម៉ូដស្រស់ស្អាតទាន់សម័យ ពិសេសមានប្រព័ន្ធសុវត្ថិភាពខ្ពស់ ទោះជាការរស់នៅក្នុងបុរី ម្ចាស់ផ្ទះត្រូវមានភារកិច្ចបង់ប្រាក់លើសេវាច្រើនក្ដី។ លោកឧកញ៉ាបញ្ជាក់ថា៖“តែ ការរស់នៅក្នុងបុរីយើងមិនអាចធ្វើអ្វីទៅតាមចិត្ដបានទេ ឧទាហរណ៍ ដូចជារាល់ការជួសជុល ឬសាងសង់បន្ថែមមិនអាចធ្វើបានទេ។ បើប្លង់គោលរបស់គេមានពីរជាន់យើងអាចធ្វើបានតែពីរជាន់ប៉ុណ្ណោះ មិនអាចធ្វើបន្ថែមឡើងរហូតដល់បី ឬបួនជាន់ដូចយើងរស់នៅឯកជនដោយឡែកនោះទេ ព្រោះការរស់នៅក្នុងបុរី ជាការរស់នៅក្នុងលក្ខខណ្ឌមួយដែលត្រូវបានគ្រប់គ្រងដោយបុរី ទាំងសន្ដិសុខ សុវត្ថិភាព និងសោភ័ណភាពដូច្នេះយើងមិនអាចធ្វើអ្វីខុសពីកិច្ចសន្យាបានទេ។

អគ្គនាយកក្រុមហ៊ុន KFA បន្ថែមថា ការរស់នៅខាងក្រៅបុរី ឬលក្ខណៈឯកជនដោយឡែក គឺយើងរស់នៅដោយមានសេរីភាពយើងអាចធ្វើអ្វីៗបានច្រើន ដូចជាការសាងសង់បន្ថែមបាន ឱ្យតែច្បាប់រដ្ឋបាលអនុញ្ញាត តែការរស់នៅឯកជនដោយឡែកមានបញ្ហាចោទទៅលើរឿងសន្ដិសុខ ព្រោះការរស់នៅឯកជនដោយឡែកត្រូវពឹងផ្អែកតែលើសន្ដិសុខរដ្ឋបាលតែប៉ុណ្ណោះ រីឯការរស់នៅក្នុងបុរីគឺមានសន្ដិសុខក្នុងបុរីការពារមួយជាន់ហើយ និងមានសន្ដិសុខរដ្ឋបាលភូមិ-ឃុំបន្ថែមមួយជាន់ទៀត។

ដូច្នេះអ្នករស់នៅឯកជនដោយឡែកទាមទារឱ្យមានការប្រុងប្រយ័ត្នខ្ពស់ជាងការរស់នៅក្នុងបុរី ផ្ទុយទៅវិញអ្នករស់នៅក្នុងបុរីចង់ដើរហើរទៅណាមកណាក៏ពុំសូវជាមានការបារម្ភខ្លាំងដែរ។

ជាមួយគ្នានេះដែរលោកឧកញ៉ា នួន រិទ្ធី បានបង្ហើបថា សូមកុំឱ្យមហាជនមានការយល់ច្រឡំថា ការរស់នៅក្នុងបុរី ឬលក្ខណៈឯកជនដោយឡែក វានឹងផ្ដល់ប្រយោជន៍ខុសគ្នានៅពេលចង់លក់អចលនទ្រព្យនោះឱ្យសោះ ព្រោះការទិញ-លក់ដូរអចលនទ្រព្យ ដើម្បីទទួលបានផលចំណេញ វាមិនអាស្រ័យលើអចលនទ្រព្យនោះស្ថិតនៅក្នុងបុរី ឬក្រៅបុរីនោះទេ វាអាស្រ័យលើលំនៅឋាននោះស្ថិតក្នុងតំបន់ណា និងពេលវេលានៃការលក់។ លោកឧកញ៉ាបានប្រាប់ទៀតថា បច្ចុប្បន្នប្រជាពលរដ្ឋកម្ពុជា គឺនៅតែមានការពេញនិយមរស់នៅជាលក្ខណៈឯកជនដោយឡែកជាងការរស់នៅក្នុងបុរីនៅឡើយ។

បុរីជាទីប្រជុំជនបែបថ្មីដែលមានការប្រមូលផ្ដុំការរស់នៅរបស់មនុស្សដែលសំដៅទៅលើបណ្ដុំផ្ទះល្វែង ឬវីឡា ដែលមានផ្សារដើម្បីបំពេញនូវតម្រូវការនៃការធ្វើពាណិជ្ជកម្មរបស់អ្នករស់នៅក្នុងតំបន់នោះអាចប្រើប្រាស់ និងអាស្រ័យផលបាន បច្ចុប្បន្នអ្នកអភិវឌ្ឍន៍ជាច្រើនបានគិតគូរពីតំបន់បៃតងដើម្បីផ្ដល់នូវការរស់នៅបែបសុខដុមរមនាដល់អតិថិជន។

លោក ច្រឹក សុខនីម អគ្គនាយកក្រុមហ៊ុន មេគង្គ Century 21 បានលើកឡើងថា តាមការសិក្សា មូលហេតុដែលធ្វើឱ្យអតិថិជន ឬពលរដ្ឋកម្ពុជាមានទំនោរចង់ទៅរស់នៅក្នុងបុរី ដោយសារផ្ទះនៅក្នុងបុរីមានចំណុចវិជ្ជមានច្រើនសម្រាប់ជាបច្ច័យដល់អ្នកប្រើប្រាស់ពិចារណាថា គួរទិញ ឬមិនគួរទិញ។ លោកបញ្ជាក់ទៀតថា៖ “អ្នកនិយមទិញផ្ទះក្នុងបុរី ពួកគាត់គិតថា ការប្រើប្រាស់បុរីមានលក្ខណៈល្អ ងាយស្រួល និងមានសុវត្ថិភាពខ្ពស់។ ម្យ៉ាងវិញទៀត បណ្ដុំនៃអ្នកទិញអចលនទ្រព្យនៅក្នុងបុរីមានជីវភាពប្រហាក់ប្រហែលគ្នាដែលបង្កភាពងាយស្រួលក្នុងការរស់នៅ។ ពិសេសបុរីត្រូវបានវិនិយោគជារួមទៅលើ ហេដ្ឋារចនាសម្ព័ន្ធ មានសួនច្បារសាធារណៈ សួនលម្ហែកាយ និងមានផ្លូវដើរសម្រាប់ធ្វើការហាត់ប្រាណសម្រាប់អ្នករស់នៅទីនោះទៀតផង។ គុណតម្លៃទាំងនេះ អាចទាញយកចំណាប់អារម្មណ៍របស់អតិថិជនបានខ្លាំង ពិសេសដោយសារតែវាមានតម្លៃសមល្មមដែលពួកគាត់គិតថា អាចមានសមត្ថភាពទិញ ឬបង់រំលស់បាន។

លោករ័ត្ន វាសនា បុគ្គលិកក្រុមហ៊ុនម្នាក់ដែលកំពុងតែរស់នៅក្នុងបុរីមួយកន្លែងនៅម្ដុំចំការដូងបានលើកឡើងថា បើទោះជាការរស់នៅក្នុងបុរីមានគុណសម្បត្ដិ និងគុណវិបត្ដិដូចគ្នាក៏ដោយ តែយ៉ាងណាការរស់នៅក្នុងបុរីមានគុណសម្បត្ដិច្រើនជាង។ លោកបានបន្ដថា សម្រាប់អ្នកធ្វើការងារ ឬបុគ្គលិកការងាររដ្ឋដែលធ្វើការងារ ច្រើនចូលចិត្ដរស់នៅកន្លែងដែលមានភាពស្ងប់ស្ងាត់ និងការរស់នៅប្រកបដោយភាពសុខដុមរមនា ការរស់នៅក្នុងបុរីជាជម្រើសល្អបំផុតសម្រាប់ពួកគាត់។ បុគ្គលិកក្រុមហ៊ុនរូបនេះបញ្ជាក់ថា៖ “ទោះបីជាការរស់នៅក្នុងបុរីតម្រូវឱ្យមានការបង់សេវាច្រើន ឬពេលធ្វើកម្មវិធីនៅផ្ទះម្ដងៗតម្រូវឱ្យមានការអនុញ្ញាតពីការិយាល័យគ្រប់គ្រងបុរី និងអាជ្ញាធរ ដែលបង្កលក្ខណៈសាំញ៉ាំជាងការរស់នៅជាលក្ខណៈឯកជនដោយឡែកក៏ដោយ ក៏ប៉ុន្ដែការរស់នៅក្នុងបុរីមានលក្ខណៈល្អ ត្រង់នៅទីនោះមានហេដ្ឋារចនាសម្ព័ន្ធល្អ មានកន្លែងលម្ហែសម្រាប់ហាត់ប្រាណ មានសុវត្ថិភាពល្អ ពិសេសអ្នករស់នៅជិតខាងមានការយល់ដឹង និងមិនសូវមានភាពរញ៉េរញ៉ៃ ខ្ញុំរស់នៅទីនោះរយៈពេលពីរឆ្នាំមកហើយ ខ្ញុំមានអារម្មណ៍ថា វាមានភាពងាយស្រួលជាងការរស់នៅជាលក្ខណៈឯកជនដោយឡែកឆ្ងាយណាស់ ឧទាហរណ៍ដូចជានៅពេលយើងចង់ដើរកម្សាន្ដទៅឆ្ងាយៗ គឺយើងពុំចាំបាច់បារម្ភពីផ្ទះយើងឡើយ។

លោក រ័ត្ន វាសនា បន្ថែមថា កន្លងមកមានមនុស្សជាច្រើនបានលើកឡើងថា ការរស់នៅក្នុងបុរីពិបាកបង្កើតអាជីវកម្ម ប៉ុន្ដែសម្រាប់លោកគិតថា សម្រាប់អ្នកចង់រកស៊ីនៅតែអាចបង្កើតអាជីវកម្មបាន គ្រាន់តែអ្នករស់នៅក្នុងបុរីត្រូវចេះរៀបចំឱ្យមានសណ្ដាប់ធ្នាប់ ឬក៏អាចបង្កើតអាជីវកម្មនៃការលក់សេវាកម្មក៏បាន ហើយអាចលក់សម្រាប់អ្នកនៅក្នុងបុរី ឬអ្នកមកពីខាងក្រៅក៏បានដូចគ្នា។

ដោយឡែកលោក រ៉េត សារុន ដែលមានលំនៅឋាននៅជិតផ្សារទួលសង្កែ បានលើកឡើងថា លោកយល់ថា ការរស់នៅក្នុងបុរីពិតជាមានភាពស្ងប់ស្ងាត់ល្អមែន ប៉ុន្ដែសម្រាប់អាជីវករលក់ដូរដូចរូបលោកដែលទទួលបានកម្រៃជាប្រចាំ ពិតជាគិតថា ការរស់នៅក្នុងទីប្រជុំជនខាងក្រៅ ពិសេសតំបន់ផ្សារមានសារៈសំខាន់ក្នុងជីវិតរបស់គាត់ ព្រោះសេដ្ឋកិច្ចគ្រួសារទាំងមូលរបស់លោកត្រូវពឹងផ្អែកលើប្រាក់ចំណូលដែលបានមកពីការលក់ដូរនេះ។

លោកបញ្ជាក់ថា៖“ខ្ញុំរស់នៅក្នុងជីវភាពអ៊ូអរយូរមកហើយ តាំងពីក្មេងរហូតមានកូនចៅធំៗអស់ហើយ អាចនិយាយបានថា ជាទម្លាប់ក្នុងជីវិតទៅហើយ។ ដូច្នេះទោះបីជាខ្ញុំមានលុយច្រើនអាចទិញផ្ទះក្នុងបុរីបាន ក៏ខ្ញុំអត់ទិញដែរ ព្រោះខ្ញុំអត់ចេះរស់នៅក្នុងភាពស្ងប់សា្ងត់ទេ”៕

January 19, 2018

សិស្សថ្នាក់ទី12ចាប់ផ្តើមមានឱកាសសិក្សាផ្នែកអក្ខរកម្មមេឌៀ និងព័ត៌មាន

មុខវិជ្ជាអក្ខរកម្មមេឌៀ និងព័ត៌មាន (MIL) ត្រូវបានក្រសួងអប់រំ យុវជន និងកីឡាសហការជាមួយនឹងអង្គការ DW Akademie សហការគ្នាដាក់បញ្ចូលទៅក្នុងកម្មវិធីសិក្សាសម្រាប់សិស្សថ្នាក់ទី12 ដើម្បីផ្តល់ជាបំណិនជីវិតដល់ពួកគេឱ្យបានយល់ដឹងអំពីប្រព័ន្ធទំនាក់ទំនងសង្គម។ មុខវិជ្ជាដ៏មានសារៈសំខាន់នេះ ត្រូវបានគេដាក់បញ្ចូលទៅក្នុងម៉ោងសិក្សាបច្ចេកវិទ្យាព័ត៌មានវិទ្យា និងសារទូរគមនាគមន៍ (ICT) ដែលក្រសួងបានដាក់ចេញរួចមកហើយ។

យោងតាមការបង្ហាញនៅលើគេហទំព័ររបស់ក្រសួងអប់រំ យុវជន និងកីឡា បានឱ្យឃើញថា ប្រទេសកម្ពុជាជាប្រទេសដែលមានប្រជាជនវ័យក្មេងច្រើនជាងគេក្នុងតំបន់អាស៊ីអាគ្នេយ៍ ហើយភាគច្រើននៃប្រជាជនវ័យក្មេងទាំងនេះមានការប្រើប្រាស់ប្រព័ន្ធអីុនធើណិត។ ការទំនាក់ទំនង គ្នាតាមរយៈទូរស័ព្ទស្មាតហ្វូនកំពុងមានការពេញនិយម ខណៈប្រព័ន្ធទំនាក់ទំនងសង្គម Facebook បានក្លាយជាជម្រើសយ៉ាងសំខាន់សម្រាប់ពួកគេ។ ស្របតាមការអភិវឌ្ឍយ៉ាងឆាប់រហ័ស នៃប្រព័ន្ធបច្ចេកវិទ្យាក្នុងការទំនាក់ទំនងនៅកម្ពុជាយើងឃើញថា មាន

បញ្ហាជាច្រើនដែលត្រូវការស្វែងយល់អំពីភាពស្មុគស្មាញ និងផលប៉ះពាល់របស់វាមកលើយុវជនកម្ពុជា។ កម្មវិធីអក្ខរកម្មមេឌៀ និងព័ត៌មាន (MIL) ផ្តល់ឱកាសឱ្យសិស្សានុសិស្សកម្ពុជាអាចសិក្សាពីរបៀបប្រើប្រាស់មេឌៀគ្រប់ទម្រង់ដូចជា វិទ្យុ ទូរទស្សន៍ ឯកសារបោះពុម្ព ប្រព័ន្ធអីុនធើណិត និងបច្ចេកវិទ្យាឌីជីថលថ្មីៗជាច្រើនទៀត។

យោងតាមឯកសារនៅក្នុងគេហទំព័រផ្លូវការរបស់អង្គការ DW Akedemie បានឱ្យដឹងថា តាមរយៈការសហការជាមួយនឹងក្រសួងអប់រំ យុវជន និងកីឡា អង្គការ DW Akedemie បានបង្កើត និងអភិវឌ្ឍសៀវភៅពុម្ពសម្រាប់វិស័យបច្ចេកវិទ្យា និងទំនាក់ទំនងព័ត៌មាន (ICT) សម្រាប់សិស្សថ្នាក់ទី12 ដែលក្នុងនោះមានសិស្សដែលកំពុងសិក្សាផ្នែកនេះចំនួន 94,500នាក់នៅកម្ពុជា។

ប្រធាននាយកដ្ឋានព័ត៌មាន និងបច្ចេកវិទ្យាព័ត៌មានវិទ្យានៃក្រសួងអប់រំ យុវជន និងកីឡា លោកសុខ ថា បានលើកឡើងថា “ចាប់តាំងពីសារនៃមេឌៀ និងបច្ចេកវិទ្យាថ្មីនៃការទំនាក់ទំនងបានក្លាយជាផ្នែកមួយនៃការរស់នៅរបស់យុវជនកម្ពុជា វាបានដើរតួនាទីយ៉ាងសំខាន់សម្រាប់ពួកគេក្នុងការជម្នះនូវឧបសគ្គ និងចាប់យកឱកាសមានប្រយោជន៍ជាច្រើនសម្រាប់ពួកគេ។

លោក សុខ ថា បានលើកឡើងផងដែរថា សិស្សត្រូវការការយល់ដឹងពីផលប៉ះពាល់នៃអីុនធើណិតនិងវិធីសាស្ត្រដើម្បីការពារខ្លួនចេញពីឧក្រិដ្ឋកម្មអនឡាញ។ លោកទទួលស្គាល់ផងដែរថា សារៈសំខាន់នៃបច្ចេកវិទ្យាអីុនធើណិត និងគេហទំព័រដែលផ្តល់ការអប់រំសម្រាប់សិក្សាបានកើនឡើងយ៉ាងឆាប់រហ័ស ដែលកត្តាទាំងអស់នេះនឹងក្លាយជាចំណុចខ្លាំងរបស់សង្គមខណៈសិស្សអាចអភិវឌ្ឍសមត្ថភាពផ្នែកបច្ចេកវិទ្យាព័ត៌មាន (ICT) និងមេឌៀ (MIL) ដើម្បីប្រើវាក្នុងការចូលរួមចំណែកអភិវឌ្ឍសង្គម។

យោងតាមទិន្នន័យចុងក្រោយបំផុតរបស់ស្ថាប័នទូរគមនាគមន៍របស់រដ្ឋបានបង្ហាញឱ្យឃើញថា ជិតពាក់កណ្តាលនៃប្រជាជនកម្ពុជាប្រមាណ 15.9លាននាក់ទទួលបានសេវាអីុនធើណិតប្រើប្រាស់ ខណៈពេលដែលអ្នកប្រើប្រាស់ Facebook មានចំនួនប្រមាណ 3.4លាននាក់ (កើនឡើង 1.1លាននាក់កាលពី2ឆ្នាំមុន)។

លោកស្រី Ute Schaeffer ប្រធានផ្នែកអភិវឌ្ឍន៍មេឌៀនៃអង្គការ DW Akademie បានលើកឡើងថា ដើម្បីដឹងពីប្រភពព័ត៌មានយ៉ាងសម្បូរបែបនៅលើពិភពលោក ប្រជាជនទាំងអស់ចាំបាច់ត្រូវតែមានជំនាញក្នុងការប្រើប្រាស់បណ្តាញបច្ចេកវិទ្យា។ ម្យ៉ាងវិញទៀត ប្រជាជនក៏ត្រូវតែដឹងពីវិធីនិងកន្លែងដែលអាចស្វែងរកប្រភពព័ត៌មានដែលច្បាស់ការ និងវិធីសាស្ត្រក្នុងការទំនាក់ទំនងដោយសុវត្ថិភាព និងដោយសេរីផងដែរ។ លោកស្រី Ute Shaeffer បាននិយាយថា៖ “ពួកគេត្រូវតែជាអក្ខរជនផ្នែកមេឌៀ”៕

January 19, 2018

គន្លឹះទាំង5 ដើម្បីរក្សាសុខភាពនៅក្នុងរដូវរងា

រដូវរងា គឺជាអំឡុងពេលវេលាដែលយើងត្រូវមើលថែយកចិត្តទុកដាក់បំផុត ជាពិសេសចំពោះសុខភាពតែម្តង សូមកុំបណ្ដោយឱ្យពេលវេលានៅក្នុងរយៈពេលនេះ រំលងទៅពីមួយថ្ងៃទៅមួយថ្ងៃ។ អាកាសធាតុផ្លាស់ប្តូរពីក្ដៅមកត្រជាក់ ហើយ ធ្លាក់ខ្យល់ខ្លាំង សម្រាប់អ្នកដែលចាញ់រងា គឺពិតជាងាយនឹងឈឺញឹកញាប់។ ដូច្នេះហើយត្រូវងាកមកត្រៀមខ្លួនមើលថែខ្លួនឯងឱ្យមានសុខភាពល្អវិញ។ ថ្ងៃនេះទស្សនាវដ្តី ឡារ៉ែន សូមពាំនាំនូវគន្លឹះថែទាំសុខភាពនៅក្នុងរដូវរងាទាំង5ចំណុចដូចខាងក្រោមនេះ។

1/ ស្លៀកពាក់ខោអាវជុំជិត និងអាវរងា

ចៀសវាងការស្លៀកពាក់ខោអាវស្ដើង ខោចខ្លីៗ ដែលធ្លាប់តែបញ្ចេញស្ទាយល៍នៅរដូវក្ដៅត្រូវទុកមួយអន្លើសិន។ នៅរដូវរងានេះត្រូវឱ្យស្លៀកពាក់បែបរុំជិតៗ អាវធំ ដៃវែងៗ និងខោជើងវែង ហើយមានសាច់ក្រណាត់ក្រាស់ៗ នោះទើបជាការប្រសើរ។ ចំពោះដៃអាចនឹងងាយត្រជាក់រងាគ្រប់ពេលវេលា ដូច្នេះអ្នកគួរតែប្រើប្រាស់ស្រោមដៃ និងស្រោមជើងដូចគ្នា។ ករណីដែលរងាខ្លាំងពេកអ្នកអាចពាក់មួករងាឱ្យជិតត្រចៀក ឬយកក្រណាត់ កន្សែងបង់ក មករុំបរិវេណក្បាលក៏បានដែរ។ ការថែរក្សាសុខភាពបែបងាយៗនៅក្នុងអំឡុងពេលរដូវរងា លោកអ្នកមិនត្រូវមើលរំលងឡើយ។

2/ ទទួលទានអាហារដែលមានគុណប្រយោជន៍

វិធីសាស្ត្រការពារមិនឱ្យផ្ដាសាយដែលអ្នកមិនគួរមើលរំលងនោះគឺការបន្ថែមថាមពលដល់ប្រព័ន្ធភាពស៊ាំនៃរាងកាយ ដោយការទទួលទានអាហារដែលមានសារធាតុចិញ្ចឹម និងវីតាមីន ដែលអាចជួយជំរុញប្រព័ន្ធភាពស៊ាំឱ្យប្រយុទ្ធប្រឆាំងជាមួយមេរោគនៅក្នុងរដូវរងា។ ចំពោះអាហារដែរគួរតែទទួលទានឱ្យបានច្រើនបំផុតនោះគឺ បន្លែ ផ្លែឈើគ្រប់មុខជាជាងសាច់ក្រហម ព្រោះបន្លែផ្លែឈើសម្បូរទៅដោយសារធាតុវីតាមីនជាច្រើនប្រភេទ ថែមទាំងមានសារធាតុអង់ទីអុកស៊ីដង់ ដែលជួយការពាររាងកាយមិនឱ្យឆ្លងមេរោគ និងងាយឈឺថ្កាត់។

3/ ពិសាទឹកក្ដៅ ឬភេសជ្ជៈក្ដៅៗ

ដើម្បីការពារសុខភាពរាងកាយរបស់អ្នកជាប្រចាំថ្ងៃ នៅក្នុងរដូវរងាអ្នកត្រូវទទួលទានទឹកឱ្យបានច្រើន ជាពិសេសគឺទឹកក្ដៅ ឬភេសជ្ជៈក្ដៅឧណ្ហៗ ក្នុងការបន្ថែមកម្ដៅដល់រាងកាយ និងស្បែករបស់អ្នក ព្រោះថា នៅក្នុងរដូវរងាស្បែករបស់អ្នកងាយនឹងស្ងួត ក្រៀមក្រោះដោយសារខ្យល់ ដូច្នេះហើយអ្នកត្រូវបន្ថែមជាតិទឹកឱ្យរាងកាយ ដើម្បីឱ្យមានសំណើមឡើងវិញ។ ម្យ៉ាងទៀត ប្រសិនបើអ្នកទទួលទានទឹកត្រជាក់ច្រើននៅក្នុងអំឡុងអាកាសធាតុត្រជាក់បែបនេះ ក៏មិនសូវហុចផលល្អចំពោះសុខភាពមាត់ធ្មេញប៉ុន្មានដែរ វាធ្វើឱ្យអ្នកងាយឈឺបំពុងក រលាកបំពង់ក ហើយនឹងងាយផ្ដាសាយផងដែរ។

4/ ហាត់ប្រាណជាប្រចាំ

អ្នកអាចក្រោកមកហាត់ប្រាណដោយការរត់ ឬដើរដើម្បីទទួលពន្លឺរស្មីនៃកម្ដៅព្រះអាទិត្យ ដើម្បីជំរុញរាងកាយឱ្យសាងភាពកក់ក្ដៅនៅខាងក្នុង។ ប្រសិនជាមិនមានពេលវេលានាពេលព្រឹកទេនោះ អ្នកអាចកម្ដៅសាច់ដុំនៅពេលល្ងាច ដើម្បីបញ្ចេញញើស និងជាតិពុលចេញក៏បាន ព្រោះក្រៅពីរាងកាយបានកក់ក្ដៅហើយនោះ វាក៏អាចបន្ថយភាពរងាចេញពីរាងកាយអ្នកបានផងដែរ ព្រមទាំងមានសុខភាពល្អថែមទៀតផង។

5/ ងូតទឹកក្ដៅ

ដោយសារតែអាកាសធាតុត្រជាក់ទើបរាងកាយរបស់អ្នកត្រូវមានភាពកក់ក្តៅគ្រប់ពេល និងចៀសឆ្ងាយពីជំងឺផ្សេងៗ ដូច្នេះ អ្នកគួរតែងូតទឹកក្តៅជាជាងទឹកត្រជាក់ ដើម្បីជួយរក្សាលំនឹងសីតុណ្ហភាពរាងកាយឱ្យនៅសភាពដើម និងជួយកាត់បន្ថយជំងឺផ្តាសាយផងដែរ៕

January 19, 2018

Man Utd នឹងធ្វើឱ្យ Sanchez ក្លាយជាកីឡាករមានចំណូលខ្ពស់បំផុតក្នុង Premier League

ក្លិបបិសាចក្រហម Manchester United នឹងនាំយកតារាឆ្នើម Alexis Sanchez ពីក្លិប Arsenal តាមរយៈការធ្វើឲ្យរូបគេក្លាយជាកីឡាកររកបានចំណូលខ្ពស់ជាងគេបំផុតរបស់ក្របខ័ណ្ឌ Premier League។ នេះបើយោងទៅតាមបណ្តាញសារព័ត៌មានជាច្រើនកាលពីថ្ងៃព្រហស្បតិ៍។

ខ្សែប្រយុទ្ធអន្តរជាតិស៊ីលីរូបនេះ នឹងទទួលបានចំណូលក្នុងចន្លោះពី 40ម៉ឺន ទៅ 50ម៉ឺនផោន (ស្មើនឹង 55.5ម៉ឺនដុល្លារ និង 69ម៉ឺនដុល្លារ) ក្នុងមួយសប្តាហ៍មុនពេលកាត់ពន្ធតាមរយៈការផ្ទេរទៅកាន់កីឡដ្ឋាន Old Trafford។ នេះបើយោងទៅតាមការចេញផ្សាយរបស់កាសែត The Sun, Daily Telegraph និងកាសែតជាច្រើនផ្សេងទៀត។

ការទាមទារប្រាក់បៀវត្សរ៍ដ៏ច្រើនសន្ធឹកសន្ធាប់នេះ បានធ្វើឲ្យក្លិប Manchester City និង Chelsea បោះបង់ការប្រជែងទិញ ដែលនាំឲ្យក្លិប Man Utd ក្លាយជាបេក្ខភាពតែម្នាក់ឯង។ កាសែត Daily Telegraph បានចេញផ្សាយថា Man United បានផ្តល់កុងត្រារយៈពេល4ឆ្នាំកន្លះ ហើយរូបគេនឹងផ្ទេរក្នុងតម្លៃខ្លួន30លានផោន (ស្មើនឹង41.6លានដុល្លារអាមេរិក) ដែលជាតម្លៃខ្លួនទាបមួយ ដោយសារតែរូបគេនឹងត្រូវចាកចេញពី Arsenal ដោយគ្មានតម្លៃខ្លួននៅចុងរដូវកាលនេះ។

ការផ្ទេររបស់អតីតកីឡាកររបស់ក្លិប Barcelona រូបនេះក៏ទាក់ទិននឹងទឹកប្រាក់សម្រាប់ការចុះកុងត្រាចំនួន 20លានផោន និងសេវាភ្នាក់ងារចំនួន 10លានផោនផងដែរ។ ជាមួយគ្នានេះ លោក Arsene Wenger គ្រូបង្វឹករបស់ Arsenal បានបញ្ជាក់ថា Sanchez នឹងត្រូវចូលរួមជាមួយMan United ក្នុងរយៈពេល 24ម៉ោង ឬ 48ម៉ោងខាងមុខទៀត៕

ប្រភពពី៖ The Guardian

January 19, 2018

ប្រភពព័ត៌មាន៖ Barcelona ចំណាយប្រាក់ច្រើនជាង 200លានអឺរ៉ូ ដើម្បីទិញ Neymar

ក្លិប FC Barcelona បានជះទឹកប្រាក់ច្រើនជាង 200លានអឺរ៉ូ (ស្មើនឹង245លានដុល្លារអាមេរិក) សម្រាប់ Neymar ក្នុងនោះរាប់បញ្ចូលទាំងប្រាក់ខែរបស់គេ និងលក្ខខណ្ឌលាក់បាំងតម្លៃខ្លួននៃការផ្ទេរមួយនេះផងដែរ។ នេះបើយោងទៅតាមការចេញផ្សាយរបស់កាសែត El Mundo របស់អេស្ប៉ាញ កាលពីថ្ងៃព្រហស្បតិ៍។

ប្រសិនបើពិតដូចការលើកឡើងខាងលើមែននោះ វានឹងមានចំនួនច្រើនជាងទឹកប្រាក់57.1លានអឺរ៉ូ ដែលក្លិប Barcelona បានអះអាងថា ខ្លួនបានចំណាយសម្រាប់ការផ្ទេររបស់ Neymar កាលពីឆ្នាំ2013 និងច្រើនជាង83.3លានអឺរ៉ូ ដែលត្រូវបានព្យាករដោយអាជ្ញាធរអេស្ប៉ាញ ដែលនឹងស៊ើបអង្កេតលើភាពមិនប្រក្រតីទៅលើការផ្ទេរនេះ។

ខ្សែប្រយុទ្ធវ័យ25ឆ្នាំរូបនេះ និងឪពុកម្តាយរបស់គេ ត្រូវបានបញ្ជាឲ្យរក្សាការសម្ងាត់ចំពោះការផ្ទេរនេះ ក៏ដូចជាលោក Josep Maria Bartomeu ប្រធានក្លិប Barcelona និងលោក Sandro Rosell អតីតប្រធានក្លិប ផងដែរ។

កាសែត El Mundo បានផ្អែកលើព័ត៌មានរបស់ខ្លួន និងឯកសារផ្សេងៗដែលត្រូវបានប្រគល់ទៅឱ្យរដ្ឋអាជ្ញាអេស្ប៉ាញ ដោយក្រុមអាជ្ញាធរប្រេស៊ីល ដែលក៏កំពុងតែស៊ើបអង្កេតលើតារាបាល់ទាត់រូបនេះផងដែរចំពោះការរំលោភការបង់ពន្ធ។ ប្រភពមួយនៅឯតុលាការ ដែលបានបដិសេធក្នុងការបញ្ចេញឈ្មោះ បានអះអាងថា រដ្ឋអាជ្ញាអេស្ប៉ាញ ពិតជាបានទទួលឯកសារទាំងនោះប្រាកដមែន ប៉ុន្តែ មិនបានបញ្ជាក់ពីតួលេខនៃតម្លៃខ្លួនឡើយ៕

ប្រភពពី៖ AFP

January 19, 2018

អ៊ីស៊ូហ្ស៊ុ ខេមបូឌា ដាក់បង្ហាញជាផ្លូវការនូវរថយន្ដថ្មីម៉ូដែល “ភីកអាប់ Isuzu D-Max V-Cross 4×4 Limited Edition!

ក្រុមហ៊ុន ទ្រី ផេដ អ៊ីស៊ូហ្ស៊ុ សេល ខេមបូឌា ឯ.ក ដាក់បង្ហាញជាផ្លូវការនូវរថយន្ដថ្មីម៉ូដែល “ភីកអាប់ Isuzu D-Max V-Cross 4×4 Limited Edition!” នេះគឺជារថយន្តប្រណាំងដែលមានល្បឿនលឿនបំផុតដែលបញ្ជាក់បន្ថែមពីអត្ថន័យនៃការផ្សងព្រេង និងនៅលើផ្លូវលំបាកៗគ្រប់ទីកន្លែង។ រថយន្ដនេះមានរូបរាងស្អាតជាងមុន និង ធន់ រឹងមាំ ជាងមុន ដើម្បីឆ្លើយតបទៅនឹងស្ថានភាពផ្លូវលំបាកៗ នៅគ្រប់កាលៈទេសៈទាំងអស់។ វាក៏មានភ្ជាប់មកជាមួយនូវការរចនាប្លែកអស្ចារ្យថ្មីសម្រាប់អ្នកបើកបរកម្ពុជាដែលពិតជាកម្ររកបាន។

លោក Hisao Ito ប្រធានក្រុមហ៊ុន ទ្រី ផេដ អ៊ីស៊ូហ្ស៊ុ សេល ខេមបូឌា ឯ.ក ជាអ្នកតំណាងចែកចាយរថយន្ត អ៊ីស៊ូហ្ស៊ុ នៅក្នុងប្រទេសកម្ពុជាបានបញ្ជាក់ថា “ ជាមួយនឹងការបន្តសកម្មភាពរបស់ ទ្រី ផេដ គ្រុប នេះបានធ្វើ
ឲ្យមានការទទួលស្គាល់យ៉ាងទូលំទូលាយនូវរថយន្ដ “អ៊ីស៊ូហ្ស៊ុ D-Max” និង “អ៊ីស៊ូហ្ស៊ុ MU-X”។ អ្នកប្រើប្រាស់រថយន្តនៅកម្ពុជាមានទំនុកចិត្តខ្ពស់ ចំពោះភាពរឹងមាំនៃផលិតផល និងភាពធន់ នៃម៉ាស៊ីន អ៊ីស៊ូហ្ស៊ុ ប្ល៊ូផៅវើ ដែលមានលក្ខណៈសន្សំសំចៃ រឹងមាំ និងការផ្តល់ជូននូវសេវាកម្មល្អតាមស្តង់ដា អ៊ីស៊ូហ្ស៊ុ ពី មជ្ឈមណ្ឌលសេវាកម្ម អ៊ីស៊ូហ្ស៊ុ។ ដើម្បីបង្កើនជម្រើសសម្រាប់ទីផ្សាររថយន្តកម្ពុជា អ៊ីស៊ូហ្ស៊ុបានណែនាំនូវរថយន្តស៊េរថ្មី “អ៊ីស៊ូហ្ស៊ុ D-Max V-Cross 4×4 Limited Edition! ជម្រើសក្នុងបរិមាណកំណត់!” ។ តម្លៃលក់ចាប់ពី 48,900 ដុល្លារសហរដ្ឋអាមេរិក ដែលមានភ្ជាប់មកជាមួយការរចនារូបរាងថ្មីពិសេស រូបរាងជាប្រភេទឡានប្រណាំង និងមើលទៅគួរឱ្យទាក់ទាញនៅគ្រប់វិមាត្រ។ ការរចនាផ្ទៃខាងក្នុងរបស់រថយន្ដមានលក្ខណៈប្លែកដែលផ្តល់នូវអារម្មណ៍ស្រស់ស្រាយប្រកបដោយប្រណិតភាព ជាមួយនឹងកៅអីជួរខាងក្រោយសម្រាប់អ្នកដំណើរដែលរួមបញ្ចូលគ្នានូវកម្លាំងរបស់រថយន្ត ដែលត្រៀមរួចជាស្រេចដើម្បីឆ្លើយតបទៅនិងតម្រូវការរបស់អតិថិជនថ្មីក្នុងការស្វែងរកសេរីភាពនៃជម្រើសដែលគ្មានដែនកំណត់។ សូមរីករាយជាមួយនឹងដំណើរផ្សងព្រេងដ៏រំភើបអស្ចារ្យនៅគ្រប់ស្ថានភាពផ្លូវ ដើម្បីឆ្លើយតបទៅនឹងតម្រូវការប្រើប្រាស់របស់អ្នក។ ភាពទាក់ទាញ និងការបត់បែនយ៉ាងល្អឥតខ្ចោះ ក្រុមហ៊ុនយើងខ្ញុំបានត្រៀមខ្លួនជាស្រេចដើម្បីស្វាគមន៍អ្នកនៅអគារតាំងបង្ហាញ ខេ (ខេមបូឌា)ខូ អិល ធី ឌី ចាប់ពីថ្ងៃទី 20 ខែមករា ឆ្នាំ 2018 តទៅ។ ”

“អ៊ីស៊ូហ្ស៊ុ D-Max V-Cross 4×4 Limited Edition!” រថយន្តប្រណាំងប្រភេទ ភីកអាប់ ដែលមានល្បឿនលឿនពិតប្រាកដនៅលើគ្រប់ស្ថានភាពផ្លូវជាមួយនឹង

ម៉ាស៊ីនអ៊ីស៊ូហ្ស៊ុ 0 Ddi ប្ល៊ូផៅវើ 3,000 cc កម្លាំងសេះ 163 ដែលផ្តល់នូវកម្លាំងសេះខ្លាំង និងកម្លាំងបង្វិលជុំ សន្សំសំចៃខ្ពស់។
ផ្នែកខាងក្រៅភ្លឺរលោងដែលបាននាំមកដោយគ្រឿងបន្លាស់ដែលមាន
លក្ខណៈថ្មីនៅក្នុងការរចនាកាន់តែប្រសើរឡើង កាន់តែខ្លាំងក្លា និងស្ទុះគ្រប់ផ្នែកទាំងអស់
ថ្មី! ឡានប្រណាំងដែលខ្លាំង រឹងមាំ ល្អប្រណិត
ថ្មី! ជញ្ជាំងអង្កត់ផ្ចិតដែលមានភាពប្រណិត និងទាន់សម័យ
ថ្មី! ផ្នែកខាងមុខរបស់រថយន្តការពារដោយរបាំងមុខពណ៌ប្រផេះចាស់ផ្នែកខាងមុខដែលមានលក្ខណៈពីរគឺ ទាំង
‘ត្រជាក់ និងមានតែមួយ’
ថ្មី! ចានចង្កៀងរ៉ុកកែតភ្លឺ (ស្លាកសញ្ញាពណ៌ក្រហម) បង្កើនអារម្មណ៍ កីឡាភាព ក្នុងការប្រកួតប្រជែង និងប្រណិតភាព
មានល្បឿន Rev Tronic ដោយស្វ័យប្រវត្តិដែលមានហ្គៀរ 5 មានអនុភាព និងឆ្លើយតបទៅនឹងតម្រូវការបេះដូងរបស់អ្នក ព្រមទាំងអាចនាំ អ្នកឆ្លងកាត់ផ្លូវឧបសគ្គទាំងឡាយផងដែរ។
ប្រព័ន្ធផ្លាស់ប្តូរបញ្ជាដី ផ្លាស់ប្ដូរពីកង់អេឡិចត្រូនិក 2 ទៅកង់ 4 ជាមួយនឹងម៉ូទ័រមួយដែលមានការធានារ៉ាប់រងខ្លាំង ងាយស្រួលប្រើប្រាស់ និងអាចផ្លាស់ប្តូររបៀបបើកបរពីកង់ 4 ទៅរបៀបកង់ 2 ផងដែរ។ ជ្រើសរើសជម្រើសរបស់អ្នកក្នុងទម្រង់បីគឺ 2H 4H និង 4L សម្រាប់គ្រប់ស្ថានភាពផ្លូវ
ទាំងអស់។
I-GRIP PLATFOAM (អ៊ីស៊ូហ្ស៊ុ ជំនាញឆ្លើយតបលើឆាកដ៏ឆ្លាតវៃ) លំដាប់ថ្នាក់ពិភពលោកក្រោមតួដែលកំណត់ពាក្យថា “ ធន់បានយូរ” ។ វាមានកិត្យានុភាពដែលល្បីល្បាញទូទាំងពិភពលោក សូម្បីតែនៅតាមផ្លូវធម្មតា ឬផ្លូវលំបាកក៏ដោយ ដែលបង្ហាញពីចរាចរណ៍ និងស្ថេរភាពផ្លូវល្អឥតខ្ចោះដែលផ្តល់ឱ្យអ្នក។ ភាពទន់ភ្លន់មួយមានអារម្មណ៍មិនដូចទៅនឹងអ្វីដែលអ្នកធ្លាប់ទទួលបាន ក្នុងល្បឿនលឿន ឬធម្មតា ក្នុងផ្លូវធម្មតា និងផ្លូវលំបាកខ្លាំង។
ប្រព័ន្ធគ្រប់គ្រងសុវត្ថិភាពធ្វើដំណើររបស់អ្នកបើកបរដែលហៅថា HDC (Hill Descent Control) ដែលផ្តល់ឱ្យអ្នកនូវការគ្រប់គ្រងបានល្អប្រសើរក្នុងអំឡុងពេលចុះចំណោត ក៏ដូចជា HSA (Hill Start Assist) ប្រព័ន្ធស្ថេរភាពដែលគេហៅថា ESC (Electronic Stability Control) និង TCS (Traction Control System) ដែលផ្ដល់នូវសុវត្ថិភាពកាន់តែប្រសើរនៅក្នុងស្ថានភាពផ្លូវរអិល។

ផ្ទៃខាងក្នុងរថយន្តបំពាក់បានយ៉ាងល្អគ្រប់ទិដ្ឋភាព និងវិមាត្រទាំងអស់ មានក្រណាត់ស្បែកស្រោបដែលមានមុខងារពីរ ពណ៌ និងសម្លេង ដែលមានភ្ជាប់មកជាមួយពហុមុខងារ នាំមកនូវការកម្សាន្ត នៅក្នុងសម្លេងជុំវិញ និងបច្ចេកវិទ្យា “ Isuzu Connect world “ ដែលអាចភ្ជាប់ទៅនឹងការកម្សាន្តសម្បាយៗជាមួយពិភពលោកដែលងាយស្រួលភ្ជាប់ទៅនឹងស្មាតហ្វូនទាំងប្រព័ន្ធ iOS និង Android ។

ហេតុដូច្នេះហើយ យើងសូមអញ្ជើញអ្នកទាំងអស់គ្នាចូលរួម បើកបរសាកល្បងជាមួយនឹងថាមពលរបស់ “Isuzu D-Max V-Cross 4×4 Limited Edition!” តាមរយៈគេហទំព័ររបស់យើង៖ www.isuzucambodia-tis.com រឺហ្វេសប៊ុកផេក៖ Isuzu Cambodia ក្នុងគោលបំណងដើម្បីទទួលបានព័ត៌មានថ្មីៗ ក៏ដូចជាចូលរួមក្នុងសកម្មភាពយុទ្ធសាស្ត្រទីផ្សាររបស់យើង ជាមួយរង្វាន់ជាច្រើន ឬទំនាក់ទំនងមកការិយាល័យតាំងបង្ហាញរបស់យើង នៅក្រុមហ៊ុន ខេ (ខេមបូឌា) ខូអិលធីឌី ភូមិក្បាលដំរី មហាវិថីសហព័ន្ធរុស្សី សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។ លេខទូរស័ព្ទ 023 950 084 ចាប់ពីថ្ងៃទី 20 ខែមករា ឆ្នាំ2018 តទៅ ។

កាន់តែពិសេស!! លោកអ្នកអាចអញ្ជើញចូលរួមនិងទទួលយកបទពិសោធន៍ថ្មីជាមួយរថយន្ដ Isuzu D-Max V-Cross Limited Edition នៅផ្សារទំនើប AEON Mall នាថ្ងៃទី 20 ដល់ថ្ងៃទី 21 ខែមករាឆ្នាំ 2018 ចាប់ពីម៉ោង ៩ព្រឹកដល់ម៉ោង ១0យប់. ការផ្ដល់ជូនយ៉ាងពិសេសនិងសកម្មភាពផ្សេងៗទៀតគឺសម្រាប់តែអ្នក៕

January 18, 2018

វ៉ាន់ នីឡា ចេញមុខពន្លះសារព័ត៌មានទាំងអស់ ក្រោយធ្លាយវីដេអូនែបនិត្យជាមួយគូស្នេហ៍

តាមរយៈបណ្ដាញសង្គមហ្វេសប៊ុកនៅថ្ងៃទី18 ខែមករា ឆ្នាំ2018 បានឱ្យដឹងថា បន្ទាប់ពីសារព័ត៌មានក្នុងស្រុកបានចេញផ្សាយនូវឃ្លិបវីដេអូនែបនិត្យកៀកកើយគ្នាយ៉ាងផ្អែមល្ហែមនៅក្នុងរថយន្ដ រវាងតារាកំប្លែងស្រីវ័យក្មេង វ៉ាន់ នីឡា ជាមួយនឹងគូស្នេហ៍មិនបានប៉ុន្មាននាទីផង តារាស្រីរូបនេះបានពន្លះអ្នកសារព័ត៌មាននៅលើបណ្ដាញសង្គមហ្វេសប៊ុកយ៉ាងក្ដៅស្លឹកត្រចៀក។

នាង វ៉ាន់ នីឡា បានរៀបរាប់ថា «ទង្វើល្អៗរបស់ខ្ញុំ ពួកបងៗមានមើលឃើញខ្លះទេ? ខ្ញុំដើរទាំងថ្ងៃក្ដៅដើម្បីរកថវិកាជួយដល់កុមារកំព្រា ខ្ញុំជួយមនុស្សចាស់ជរាដែលខ្វះខាត តើពួកបងមានបើកភ្នែកមើលដែរទេ?! ខ្ញុំធ្វើល្អ10 ខុសតែ1សោះពួកបងចាប់ហែកខ្ញុំតែម្ដង។ ពេលខ្ញុំធ្វើល្អ ពួកបងឃើញហើយ តែបងធ្វើមិនឃើញ មិនដឹង មិនឮ តែបើធ្វើខុសអីមួយ បងដឹង និងឮច្បាស់ហ្ម៉ង។ ខ្ញុំថតរូបស្និទ្ធស្នាលជាមួយពួកម៉ាកបន្តិចបន្តួច បងថាខ្ញុំជាគូស្នហ៍នឹងគ្នា»។

តារាស្រីវ័យក្មេងដែលទើបតែលែងលះស្វាមីរូបនេះបានបន្ដថា «ខ្ញុំសុំសួរតិច! ខាងគ្រួសារបង ឬក៏ខាងបងប្អូនបងហ្នឹង ឲ្យតែថតស្និទ្ធតិច ដឹងតែជាសង្សារហ្ម៉ងហ្អេ៎ពួកបង?? តែបើខាងបងប្អូនក្រុមគ្រួសារខ្ញុំវិញ គេមិនដែលប្រកាន់រឿងអត់ប្រយោជន៍អ៊ីចឹងទេបង…!!!។ ខ្ញុំយល់ថា បងនិយាយអាក្រក់ពីខ្ញុំ ដើម្បីមុខរបររបស់បង ខ្ញុំយល់! ក៏ប៉ុន្តែមុខរបររបស់បងវាបំផ្លាញកិត្តិយសរបស់គេច្រើនណាស់»។

ជាចុងក្រោយនាងបានបញ្ជាក់ផងដែរថា «ខ្ញុំខំសាងកេរ្តិ៍ឈ្មោះកិត្តិយសតាំងពីតូចមកដល់ពេលនេះ…គឺលំបាកណាស់ ហេតុអីបងបំផ្លាញវាចេញពីខ្ញុំ?! បំផ្លាញកិត្តិយសគេដើម្បីមុខរបររបស់ខ្លួន!!។ សារទាំងអស់នេះផ្ញើជូនបងៗអ្នកសារព័ត៌មានទាំងអស់ ឈប់ទៅបង not good…»៕

January 18, 2018

សាច់គោអាំងស្លឹកជីភ្លូជាមួយជ្រក់ឆៃថាវ

គ្រឿងផ្សំ

សាច់គោ 500ក្រាម (កិនឱ្យម៉ដ្ឋ)
ស្ករស 2ស្លាបព្រាកាហ្វេ
ទឹកសីុអីុវ 2ស្លាបព្រាកាហ្វេ
ម្សៅស៊ុប 3/4ស្លាបព្រាកាហ្វេ
ខ្លឹមស 100ក្រាម
ម្ទេស តាមចំណូលចិត្ត
រំដេង 100ក្រាម
ស្លឹកជីភ្លូ

របៀបធ្វើ

ដំបូងត្រូវបុកខ្ទឹមស រំដេង និងម្ទេសឱ្យម៉ដ្ឋ រួចដាក់ម្សៅស៊ុប និងស្ករសចូល បុកចូលគ្នាឱ្យសព្វល្អ បន្ទាប់មកចាក់ទឹកសីុអីុវចូល និងជាចុងក្រោយចាក់សាច់គោ ដែលកិនម៉ដ្ឋនោះចូល រួចបុកចូលគ្នាឱ្យចូលជាតិល្អ។ បន្ទាប់មកទៀត ចូរយកស្លឹកជីភ្លូមកខ្ចប់សាច់គោ ដែលលាយគ្រឿង និងរសជាតិហើយនោះជារៀងមូលទ្រវែងទំហំប៉ុនមេដៃ រួចយកមកដោតចង្កាក់ (មួយចង្កាក់ដោត4-5) ហើយយកទៅអាំងភ្លើងឱ្យឆ្អិន ដោយដាក់ភ្លើងតិចៗល្មមជាការស្រេច។ ម្ហូបមួយមុខនេះត្រូវទទួលទានជាមួយនឹងជ្រក់ឆៃថាវ ទើបឆ្ងាញ់ពិសា និងប្លែកមាត់៕

January 18, 2018

គុណតម្លៃនៃភាពស្រស់ស្អាតដ៏ពិតប្រាកដ

គុណតម្លៃនៃភាពស្រស់ស្អាត និងការចម្រើនធំធាត់របស់ជីវិតគឺជាការដែលយើងបានធ្វើនូវរឿង ដែលយើងមានតាំងពីដើមឱ្យវាអភិវឌ្ឍឡើង ព្រមទាំងមានសេចក្ដីសុខជាមួយនឹងរឿងនោះតាមរឿងរ៉ាវរបស់វា និងមិនតាមរឿងរ៉ាវរបស់វា មានន័យថា ព្រមទទួលស្គាល់នូវអ្វីដែលមាននាពេលបច្ចុប្បន្ន។ រៀនយល់ដឹងពីអតីតកាលដែលកើតឡើងដោយភាពជាកណ្ដាល ជំហរជាដើមហេតុ និងអភិវឌ្ឍពីអ្វីដែលកំពុងមាននាពេលបច្ចុប្បន្នឱ្យល្អបំផុតយ៉ាងអស់ពីសមត្ថភាព។

ពាក្យថា អស់ពីសមត្ថភាព គឺ “បើយើងនឹងស្លាប់ក្នុងវិនាទីនេះ ក៏យើងមិនសោកស្ដាយ ឬស្លាប់បិទភ្នែកមិនជិតចំពោះអ្វីដែលយើងកំពុងធ្វើដែរ។ យើងគ្រាន់តែដកដង្ហើមចុងក្រោយ និងបិទភ្នែកចុះហើយគិតថា ដល់ពេលវេលាបរាជ័យដ៏អស្ចារ្យរបស់យើងហើយតែប៉ុណ្ណោះ។ យើងមិនមានឱកាសកែកុន ឬអភិវឌ្ឍតទៅទៀតឡើយ…។

បើយើងនៅតែវិលវល់ជាមួយនឹងរឿងដដែលៗ ស្ពឹកស្រពន់ ដូចជាខកចិត្តម្ដងហើយម្ដងទៀត មិនជួបមនុស្សដែលពិតប្រាកដម្ដងណាសោះ ជួបតែមនុស្សដែលបោកប្រាស់យើងរហូតម្ដងហើយម្ដងទៀតការផ្លាស់ប្ដូរការងារម្ដងហើយម្ដងទៀត ការវិលទៅរកសភាវចាស់ៗពីមុនទាំងដែលយើងបានផ្លាស់ប្ដូរមនុស្សដែលយើងជួប ផ្លាស់ប្ដូរទីកន្លែង ផ្លាស់ប្ដូរគូស្នេហ៍ ផ្លាស់ប្ដូរអ្នករួមហ៊ុនហើយក៏ដោយ… តែស្ថានការណ៍ ក៏នៅតែត្រឡប់ទៅដូចដើមវិញដដែលនោះបញ្ជាក់ថាយើងនៅមិនទាន់បានកែសម្រួល ឬផ្លាស់ប្ដូរទង្វើមួយចំនួន ដើម្បីឱ្យខ្លួនយើងអភិវឌ្ឍល្អឡើង និងឆ្លងកាត់ស្ថានការណ៍នោះទៅបាននៅឡើយ។ បើយើងនៅតែមានរូបគោរព ឬអាចហៅម្យ៉ាងទៀតថាការមើលមកល្អស្អាត ឬមិនព្រមទទួលស្គាល់ខ្លួនឯង យើងក៏នឹងនៅតែរកមិនឃើញរឿងពិតនៃមូលហេតុរបស់ក្ដីបរាជ័យដដែល…។

ចក្រវាល ឬពិភពលោកមួយនេះ ឬហៅតាមគោលសាសនាគឺ ព្រះជាម្ចាស់ពិតជាល្អខ្លាំងណាស់ចំពោះមនុស្ស ទ្រង់បញ្ជូនស្ថានការណ៍ដដែលៗ ដែលកើតឡើងម្ដងហើយម្ដងទៀតនោះមកឱ្យយើង បើយើងនៅមិនទាន់ឆ្លងផុតស្ថានការណ៍ទាំងនោះទៅបាន… គឺដើម្បីឱ្យយើងរៀនស្គាល់ពីខ្លួនឯងអភិវឌ្ឍខ្លួនឯង… ដើម្បីការចម្រើនធំធាត់ របស់យើង… ដើម្បីឱ្យយើងមានសេចក្ដីសុខដែលស្ថិតស្ថេរក្នុងជីវិត…។

“ថ្ងៃនេះសាកល្បងសួរខ្លួនអ្នកទៅមើលថា រឿងអ្វីដែលធ្វើឱ្យ អ្នកនៅតែវិលវល់ជាមួយរឿងចាស់ដដែល… រឿងអ្វីដែលអ្នក នៅតែថ្ងួចថ្ងូរ… រឿងដែលអ្នកនៅតែគ្មានសន្តិសុខនៅក្នុងចិត្ត… រឿងហ្នឹងឯងដែលអ្នកត្រូវតែឈានកន្លងវាឱ្យផុតទៅឱ្យបាន និងត្រូវសាងគោលដៅដើម្បីខ្លួនឯង…”៕

January 18, 2018

Author: វល័ក្ខ