វល័ក្ខ - La Reine Media

ស៊ីភ្លើងកាន់តែតិច ត្រជាក់កាន់តែលឿនដោយសារបច្ចេកវិទ្យាដ៏ឆ្លាតវៃ របស់ម៉ាស៊ីនត្រជាក់ LG Dual Cool Smart inverter

សីតុណ្ហភាពក្តៅបំផុតប្រចាំឆ្នាំខិតជិតមកដល់ហើយ ខណៈពេលដែលបចេ្ចកវិទ្យាថ្មីរបស់ LGបានមកដល់ដើម្បីត្រៀមខ្លួនដោះស្រាយបញ្ហាអាកាសធាតុក្តៅជូនលោកអ្នកជាមួយនឹងម៉ាស៊ីនត្រជាក់ LG Dual Cool smart inverter ដែលមានលក្ខណះពិសេសជាច្រើន ជួយអោយអ្នកប្រើប្រាស់ទាំងអស់សន្សំសំចៃភ្លើង ត្រជាក់កាន់តែលឿន ងាយស្រួលប្រើ និងផ្តល់នូវផាសុភាពជូនលោកអ្នក។

ថាមពលដ៏មានប្រសិទ្ធិភាព រួមជាមួយនិងអនុភាពដ៏ត្រជាក់

ម៉ាសុីនត្រជាក់ Dual Cool បានភ្ជាប់មកជាមួយនៅបច្ចេកវិទ្យា Smart inverter Compressor និងDual inverter Compressor ដែលកាត់បន្ថយនូវការប្រើប្រាស់ថាមពលអគ្គីសនីរហូតដល់ 70%។ ម៉ាសុីនត្រជាក់ Dual Inverter Compressor មានប្រេកង់បង្វិលខ្ពស់ និងលឿនជាងម៉ាសុីនត្រជាក់ធម្មតា ដែលធ្វើអោយត្រជាក់លឿន ត្រជាក់បានយូរ ដំណើរការបានស្ងាត់ល្អ មិនថាស្ថិតក្នុងសីតុណ្ហភាពក្តៅប៉ុណ្ណាក៏ដោយ និងម៉ាសុីនត្រជាក់ភាយខ្យល់ត្រជាក់ភ្លាមៗទៅដល់គ្រប់កន្លែងទាំងអស់នៅក្នុងបន្ទប់។ វាមានកង្ហារធំជាងមុន25%ដែលអាចបញ្ចេញខ្យល់យ៉ាងខ្លាំងតាមបំពង់ខ្យល់ ដែលបានរចនាឡើងដ៏ល្អឥតខ្ចោះដើម្បីអោយត្រជាក់សព្វពេញបន្ទប់ ។

ផាសុខភាព និងរក្សាសុខភាពដ៏ប្រសើរ

ភាពត្រជាក់ដ៏ខ្លាំងក្លាមិនធ្វើអោយអ្នកប្រើប្រាស់ទាស់ចិត្តទេដោយគ្រាន់តែចុចបញ្ជាលើប៊ូតុង “Comfort Air” ម៉ាសុីនត្រជាក់ Dual Cool បានកែតម្រូវមុំរបស់កង្ហារខ្យល់ ដើម្បីអោយប្រាកដថាខ្យល់បញ្ចេញមិនបានបក់ទៅប៉ះអ្នកប្រើប្រាស់ដោយផ្ទាល់បណ្តាលអោយសីតុណ្ហភាពក្នុងខ្លួនធ្លាក់ចុះនោះទេ។ ម៉ាស៊ីនត្រជាក់នេះដំណើរការក្នុងកំរិតសំលេងស្ងាត់ជាងគេលំដាប់ពិភពលោក ដោយសារតែបច្ចេកវិទ្យាថ្មី LG’s Unique BLCD motor, Skew Fan Technology និងលក្ខណះពិសេសរបស់ Active low vibration ( ALV)។ ហើយវាក៏មានសមត្ថភាពក្នុងការរក្សាសំណើមដ៏មិនគួរអោយជឿដើម្បីផ្តល់នូវបរិយាកាសដ៏មានផាសុខភាពផងដែរ។

សុខភាព គឺជាចំណុចសំខាន់បំផុតដែលក្រុមហ៊ុនLGគិតគូរ នៅពេលដែលបង្កើតផលិតផលថ្មី។ ម៉ាស៊ីនត្រជាក់LG Dual Coolផ្តល់ជូននូវគុណប្រយោជន៍ដល់សុខភាព និងផាសុកភាពដល់អ្នកប្រើប្រាស់:

Plasmaster lonizer plus ដែលសាបព្រួសអ៊ីយ៉ុងជាងបីលាន ដើម្បីកំចាត់មេរោគអាក្រក់ មិនមែនតែខ្យល់ដែលចូលទៅក្នុងម៉ាសុីនត្រជាក់តែប៉ណ្ណោះទេ ប៉ុន្តែសារធាតុទាំងអស់ដែលនៅជុំវិញបន្ទប់អ្នក។
ចម្រោះធូលីបានល្អ លំហូរខ្យល់ សំលេងរំខានតិច និងតស្រទាប់ដ៏រឹងមាំនៅលើផ្ទៃរបស់ខ្លួន ដែលស្រួបយក លុបបំបាត់មេរោគដែលបង្កគ្រោះថ្នាក់ និងផ្តល់មកវិញនូវខ្យល់ស្រស់ស្អាត។
ការសំអាតដោយស្វ័យប្រវត្តិ៖ មុខងារសំអាតដ៏ល្អ ដែលការពារការកើតឡើងនៃបាក់តេរីនៅលើឧបករណ៍កំដៅ។ ដោយបំបាត់សំណើមនិងមេរោគចេញពីក្នុងម៉ាសុីនត្រជាក់មុខងារសំអាតស្វ័យប្រវត្តិកំចាត់សារធាតុទាំងឡាយណាដែលធ្វើអោយប៉ះពាល់ដល់រាងកាយ រក្សារបរិយាកាសក្នុងផ្ទះ និងរក្សាភាពត្រជាក់បានយូរ ទោះបីម៉ាស៊ីនត្រជាក់ប្រើអស់រយៈពេល១០ឆ្នាំហើយក៏ដោយ។

កាន់តែងាយស្រួលមួយកំរិតទៀត

ការតម្លើងមិនមែនជាការងាយស្រួលឡើយជាមួយនិងការរចនាដ៏ប្រណិត។ ការតម្លើងម៉ាសុីនត្រជាក់ LG Dual cool និងការវេចខ្ចប់ដ៏សាមញ្ញធ្វើអោយការតំឡើងមានការប្រសើរ ទំហំបំពង់ធំជាងគម្របបាត និងប៊ូតុងរហ័សសម្រាប់ការធ្វើតេស្តសាកល្បង។

ព័ត៌មានបន្ថែម https://ggear.com.kh/air-conditioners/home-air-cond/inverter-air-conditioners/

February 1, 2018

ចិនគ្រោងសាងសង់មន្ទីរពេទ្យខ្នាតអន្តរជាតិនៅកម្ពុជា

ដើម្បីចូលរួមលើកកម្ពស់វិស័យសុខាភិបាលនៅក្នុងប្រទេសកម្ពុជាឱ្យមានការរីកចម្រើនដូចបណ្តាប្រទេសនៅក្នុងតំបន់ និងក៏ដូចជានៅលើឆាកអន្តរជាតិដែរនោះ ក្រុមវេជ្ជបណ្ឌិតល្បីៗរបស់ចិនគ្រោងនឹងសាងសង់មន្ទីរពេទ្យលំដាប់អន្តរជាតិនៅកម្ពុជានាពេលខាងមុខ។

គម្រោងសាងសង់នេះត្រូវបានបង្ហាញតាមរយៈឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មដែលបានដឹកនាំប្រតិភូទៅទស្សនកិច្ចមន្ទីរពេទ្យ Yi Zhou Proton Therapy Center នៅទីក្រុង Zhuozhou នៃខេត្តហឺប៉ី ប្រទេសចិន ដែលជាមន្ទីរពេទ្យឯកទេសព្យាបាលជំងឺមហារីកដ៏ធំ និងទំនើបបំផុតនៅក្នុងប្រទេសចិន។

ឯកឧត្តមរដ្ឋមន្ត្រីបានមានប្រសាសន៍ថា មន្ទីរពេទ្យនេះត្រូវបានវិនិយោគលើផ្ទៃដីប្រមាណ90 ហិកតា ចំណាយអស់ទុនសាងសង់ចំនួន 6.2 ប៊ីលានយន់ (ប្រមាណ 1ប៊ីលានដុល្លារអាមេរិក) និងមានបុគ្គលិក គ្រូពេទ្យ និងវេជ្ជបណ្ឌិតជំនាញប្រមាណ 3,000 នាក់កំពុងបំពេញការងារ ដោយមានបំពាក់ឧបករណ៍ និងគ្រឿងបរិក្ខារទំនើបបំផុត។ ក្នុងបរិវេណមន្ទីរពេទ្យនេះមានអគារព្យាបាលជំងឺទូទៅ ជំងឺមហារីកព្យាបាលតាមបែបគីមី តាមបែបកោសិកា តាមបែបវិទ្យាសាស្ត្រចិន និងតាមបែបបស្ចិមប្រទេស ព្រមទាំងមានអគារស្នាក់នៅសម្រាប់បុគ្គលិក-គ្រូពេទ្យ មន្ទីរពិសោធ សាលប្រជុំ ភោជនីយដ្ឋាន និងកន្លែងហាត់កីឡាទៀតផង។

ក្នុងជំនួបនេះលោក Han Ge ដែលជាអ្នកវិនិយោគមន្ទីរពេទ្យនេះបានមានប្រសាសន៍ថា តាមរយៈមន្ទីរពេទ្យនេះ លោកមានបំណង និងកំពុងសិក្សាលើគម្រោងសាងសង់មន្ទីរពេទ្យដែលមានស្តង់ដារដូចគ្នានេះនៅក្នុងប្រទេសកម្ពុជា និងបង្កើតវិទ្យាស្ថានវេជ្ជសាស្ត្រមួយទៀតផង។

ជាមួយគ្នានេះ ឯកឧត្ដមរដ្ឋមន្ត្រី បានសម្ដែងនូវការស្វាគមន៍ចំពោះគម្រោងវិនិយោគនេះ ព្រោះការបង្កើតបាននូវមន្ទីរពេទ្យលំដាប់ស្តង់ដារខ្ពស់នឹងជួយផ្ដល់ឱកាសការងារក្នុងស្រុក និងជាមូលដ្ឋានដ៏សំខាន់ក្នុងការថែរក្សាសុខភាពប្រជាជន។ បើគម្រោងសាងសង់មន្ទីរពេទ្យនេះសម្រេចបានជោគជ័យ វានឹងក្លាយជាមន្ទីរពេទ្យដែលបម្រើសេវាព្យាបាល មិនត្រឹមតែសម្រាប់ប្រជាជនកម្ពុជាប៉ុណ្ណោះទេ តែសម្រាប់ប្រជាជនទូទាំងតំបន់ផងដែរ៕

February 1, 2018

Aubameyang បំពេញការផ្ទេរទៅ Arsenal ខណៈ Giroud ទៅ Chelsea

ខ្សែប្រយុទ្ធអន្តរជាតិបារាំង Olivier Giroud បានបំពេញការផ្ទេរក្នុងតម្លៃខ្លួន 18លានផោន (ស្មើនឹង 25.56លានដុល្លារអាមេរិក) របស់គេទៅកាន់ក្លិប Chelsea និងបានចុះហត្ថលេខាលើកុងត្រារយៈពេល 18ខែ នៅឯកីឡដ្ឋាន Stamford Bridge។

នៅមុននេះបន្តិច កាលពីថ្ងៃពុធ ក្លិប Arsenal បានបំបែកកំណត់ត្រាផ្ទេររបស់ពួកគេ សម្រាប់ការបើកទីផ្សារដោះដូរកីឡាករជាលើកទី 2នៅរដូវកាលនេះ តាមរយៈការបំពេញការផ្ទេរខ្សែប្រយុទ្ធ Pierre-Emerick Aubameyang ពីក្លិប Borussia Dortmund ក្នុងតម្លៃខ្លួន 56លានផោន (ស្មើនឹង 74លានដុល្លារអាមេរិក)។ ដោយឡែក ក្លិបយក្សរបស់អាល្លឺម៉ង់មួយនេះ បានចុះហត្ថលេខាជាមួយនឹងខ្សែប្រយុទ្ធ Michy Batshuayi ពីក្លិប Chelsea ជំនួសវិញក្នុងលក្ខខណ្ឌខ្ចីជើងរហូតដល់បញ្ចប់រដូវកាលនេះ។

Giroud នឹងពាក់អាវលេខ 18ក្នុងក្លិបថ្មីរបស់គេ ក្រោយពីការចូលរួមរបស់គេបានកើតឡើង មុនពេលក្លិប Dortmund បានប្រកាសពីការខ្ចីជើង Batshuayi។ Aubameyang វ័យ 28ឆ្នាំ ដែលបានចុះហត្ថលេខាលើកុងត្រាមួយជាមួយនឹងក្លិប Arsenal រហូតដល់ឆ្នាំ2021នោះ នឹងក្លាយជាកីឡាករចំណូលថ្មីមានឈ្មោះល្បីទី 2របស់ Arsenal នៅខែមករានេះ ក្រោយពី Henrikh Mkhitaryan បានចូលរួមដោយមកពីក្លិប Manchester United។

ការផ្ទេរមួយនេះ នឹងបង្កើនជម្រើសក្នុងតំបន់ប្រយុទ្ធរបស់ Arsenal ក្រោយពីការចាកចេញរបស់ Alexis Sanchez ទៅកាន់ Man United ក្នុងការផ្ទេរមួយដែលមានការដោះដូរជាមួយនឹង Mkhitaryan ប៉ុន្តែ វាបានបង្កើតឲ្យមានសំណួរជាច្រើនជុំវិញអនាគតរបស់ Alexandre Lacazette ក្នុងជម្រើសទាំង 11នាក់ដំបូង៕

ប្រភពពី៖ The Guardian

February 1, 2018

Moura បំពេញការផ្ទេរពី PSG ទៅ Spurs ក្នុងតម្លៃខ្លួន 25លានផោន

ក្លិបមាន់ខ្នាយមាស Tottenham បានបំពេញការចុះហត្ថលេខាជាមួយនឹងខ្សែបម្រើស្លាបអន្តរជាតិប្រេស៊ីល Lucas Moura ពីក្លិប Paris Saint-Germain ក្នុងតម្លៃខ្លួន 25លានផោន (ស្មើនឹង 35.4លានដុល្លារអាមេរិក) ក្នុងរយៈពេល 5ឆ្នាំកន្លះ។

Moura គឺជាកីឡាករចំណូលថ្មីដំបូងគេរបស់ Spurs នៅរដូវរងានេះ បើគិតចាប់តាំងពីឆ្នាំ2015 ដែលនៅពេលនោះពួកគេបានទិញខ្សែបម្រើ Dele Alli ពីក្លិប MK Dons ហើយខ្សែបម្រើរូបនោះក៏បានក្លាយជាកីឡាករទី2របស់ PSG ក្នុងការចាកចេញពីក្លិបនេះនៅរដូវកាលនេះផងដែរ បន្ទាប់ពីការចាកចេញរបស់ Serge Aurier កាលពីរដូវក្តៅ។ Moura បានធ្វើដំណើរទៅដល់ទីក្រុងឡុងដ៍ហើយកាលពីរាត្រីថ្ងៃចន្ទ ហើយនិងត្រូវបាននាំទៅកាន់ទីលានហ្វឹកហាត់របស់ក្លិប Spurs កាលពីថ្ងៃអង្គារ ដើម្បីពិនិត្យសុខភាព។

Lucas ដែលសង្ឃឹមថានឹងបានចូលលេងក្នុងជម្រើសទាំង 11នាក់ដំបូងនោះ បាននិយាយនៅលើបណ្តាញសង្គម Twitter របស់ Tottenham ថា៖ «វាជាទំព័រថ្មីមួយក្នុងជីវិតរបស់ខ្ញុំ ជាការប្រជែងថ្មីមួយសម្រាប់ខ្ញុំ។ ខ្ញុំពិតជារីករាយណាស់»។ ខ្សែបម្រើស្លាបវ័យ 25ឆ្នាំដែលបានបង្ហាញខ្លួនជាអន្តរជាតិចំនួន 34លើករូបនេះ បានសម្តែងពីការខកចិត្តរបស់គេទៅកាន់កាសែតកីឡាប្រចាំថ្ងៃរបស់បារាំង L’Equipe កាលពីដើមសប្តាហ៍នេះ សម្រាប់ការដែលត្រូវបានបង្កកដោយក្លិប PSG ខណៈដែលការទៅដល់របស់មិត្តរួមជាតិរបស់គេ Neymar ពីក្លិប Barcelona បានធ្វើឲ្យគេកាន់តែបាត់បង់ឱកាសក្នុងការចូលលេងក្នុងជម្រើសដំបូងទៅទៀត៕

ប្រភពពី៖ Sky Sports

February 1, 2018

Vivo បង្ហាញ X20 Plus UD ស្មាតហ្វូនបង្កប់ស្គែនខ្ចៅដៃក្រោមអេក្រង់មុនគេលើពិភពលោក

នៅទីបំផុតក៏ដល់ពេលបង្ហាញខ្លួនជាផ្លូវការហើយសម្រាប់ Vivo X20 Plus UD ស្មាតហ្វូនដែលខាង Vivo ចាត់ភាពទំនើបមកព្រមជាមួយនឹងសេនស៊ើរស្គែនស្នាមខ្ចៅម្រាមដៃក្រោមអេក្រង់ដំបូងគេបំផុតក្នុងពិភពលោក។

សេនស៊ើរស្គែនស្នាមខ្ចៅម្រាមដៃក្រោមអេក្រង់របស់ Vivo ដែលបានធ្វើឡើងរួមគ្នាជាមួយ Synaptics នោះមានឈ្មោះហៅថា Clear ID FS9500 ស្គែនស្នាមខ្ចៅម្រាមដៃដោយប្រព័ន្ធ Optical ដោយប្រើសេនស៊ើរទទួលរូបភាព CMOS ដែលមានកម្រាស់ស្ដើងបំផុតត្រឹមតែ 0.7 មីល្លីម៉ែត្រ បំពាក់នៅស្រទាប់ក្រោមអេក្រង់ OLED ដែលនឹងមានតួនាទីបញ្ចាំងពន្លឺទៅរកស្នាមខ្ចៅម្រាមដៃដើម្បីឱ្យសេនស៊ើរស្គែន និងបញ្ជូនព័ត៌មានទៅឈិពរក្សាទិន្នន័យ ដើម្បីពិនិត្យស្នាមខ្ចៅម្រាមដៃថា តើត្រឹមត្រូវឬទេ?។ ក្រៅពីនេះ សេនស៊ើរស្គែនស្នាមខ្ចៅម្រាមដៃបែបក្នុងអេក្រង់

របស់ Synaptics នេះថែមទាំងធន់នឹងការឆ្កូតឬស្នាមផ្សេងៗ និងអាចការពារការជ្រាបទឹកបានទៀតផង ព្រោះបំពាក់នៅក្រោមកញ្ចក់។

Synaptics នៅបានប្រាប់ទៀតថា Clear ID FS9500 នេះធ្វើការបានលឿនជាង Face ID ដល់ទៅ 2ដង និងធ្វើការបានល្អទោះជានៅក្នុងកន្លែងដែលមានពន្លឺថ្ងៃចាំងខ្លាំងក៏ដោយ។

Vivo X20 Plus UD នឹងចេញមកព្រមជាមួយអេក្រង់ AMOLED ទំហំ 6.43អីុញ អត្រាចំណែក 18:9 ភាពលម្អិតច្បាស់ Full HD គូគ្នាជាមួយ RAM 4GB ផ្ទុកបាន 128GB ប្រើឈិពសិត Snapdragon 660 Support និងការប្រើស៊ីម 2 បែប HighBrid។ ចំណែកឯផ្នែកកាមេរ៉ាវិញ កាមេរ៉ាខាងមុខនឹងចេញមកព្រមជាមួយភាពលម្អិតច្បាស់ 12 Mega Pixel។ កាមេរ៉ាក្រោយ 1គូ មានភាពលម្អិតច្បាស់ 12+5 Mega Pixel និងថែមទាំងប្រើថ្មបាត់តេរីទំហំ 3,950mAh ទៀតផង៕

February 1, 2018

ឯកឧត្តម វេង សាខុន ជំរុញការដាំដុះឫស្សីតាមសហគមន៍ព្រៃឈើ ដើម្បីបង្កើនប្រាក់ចំណូល

រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទបានអះអាងពីគោលបំណងបង្កើនប្រាក់ចំណូលដល់ប្រជាពលរដ្ឋក្នុងសហគមន៍ការពារព្រៃឈើ តាមរយៈការបង្កើនការដាំដើមឈើដែលមានប្រយោជន៍ ការផលិតបន្លែ និងការចិញ្ចឹមសត្វ ស្របពេលដែលតម្រូវការនៅក្នុងប្រទេសកាន់តែកើនឡើង។

ការប្រកាសរបស់ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ បានធ្វើឡើងនៅក្នុងវេទិកាកសិកម្មក្នុងខែមករានេះ។ ការប្រកាសនេះត្រូវបានគេមើលឃើញថា ស្របពេលដែលផលិតកម្មកសិកម្មរបស់ប្រទេសកម្ពុជាកំពុងធ្លាក់ចុះជាបន្តបន្ទាប់ ដោយលើកលែងតែការផលិតស្រូវ ខណៈដែលកម្ពុជាមានតម្រូវការខ្ពស់ផ្នែកបន្លែ និងត្រីសាច់ ដើម្បីបំពេញតម្រូវការទីផ្សារក្នុងស្រុកដែលកំពុងមានកំណើនខ្ពស់ និងកើនឡើងតាមរយៈកំណើនទេសចរ និងកំណើនសេដ្ឋកិច្ច។

ឯកឧត្តម វេង សាខុន មានប្រសាសន៍ថា ៖ “ទិសដៅរបស់ខ្ញុំ គឺយើងមិនអាចទៅចៀរជ័រទឹក ហើយយកទៅលក់ដើម្បីរស់បានទៀតនោះទេ ព្រោះសេដ្ឋកិច្ចរបស់យើងកើនឡើងហើយ និងកើនឡើងរហូត។ ខ្ញុំឱ្យប្រមូលធនធានដើម្បីជួយដល់សហគមន៍ព្រៃឈើដែលបានបង្កើតហើយនោះ ដែលមិនត្រឹមតែការពារព្រៃឈើប៉ុណ្ណោះទេ ប៉ុន្តែយើងត្រូវធ្វើការដាំដុះបន្ថែមទៀត ទាំងអគ្គនាយកដ្ឋានកសិកម្ម និងរដ្ឋបាលជលផលត្រូវសហការគ្នា គឺកន្លែងណាដែលអាចជួយគាត់បាន។

តាមអ្វីដែលរដ្ឋមន្ត្រីក្រសួងកសិកម្ម រុក្ខា ប្រមាញ់និងនេសាទបានមានប្រសាសន៍នោះគឺ សហគមន៍ព្រៃឈើនៅកម្ពុជាមានសក្តានុពលច្រើនក្នុងការអភិវឌ្ឍការថែរក្សាព្រៃឈើរបស់ខ្លួន និងបង្កើនប្រាក់ចំណូលបន្ថែមតាមរយៈការដាំដុះប្រភេទរុក្ខជាតិដែលមានប្រយោជន៍ដល់សេដ្ឋកិច្ចតាមរយៈការប្រើប្រាស់ប្រចាំថ្ងៃ។

ប្រភេទរុក្ខជាតិដែលមានប្រយោជន៍ដល់សេដ្ឋកិច្ចគ្រួសារ និងសហគមន៍ព្រៃឈើនោះគឺការដាំដុះដើមឫស្សី ព្រោះដើមឫស្សីត្រូវបានគេប្រើប្រាស់ ចាប់តាំងពីទំពាំងរហូតដល់ដើមរបស់វា ដែលជាហេតុផលមួយរួមចំណែកដល់ការកាត់បន្ថយការពឹងផ្អែកលើការនាំចូលប្រភេទបន្លែទំពាំងពីប្រទេសជិតខាង។

ឯកឧត្តម វេង សាខុន បានបញ្ជាក់ថា ៖ “ខ្ញុំមើលនៅក្នុងកាសែត ខ្ញុំឃើញថាមានចំណូលច្រើនពីដំណាំឫស្សី អ៊ីចឹងនៅក្នុងព្រៃនោះ ម៉េចមិនព្រមដាំឫស្សី? ព្រោះបានផលច្រើន ប្រមូលផលពីដើមឫស្សីផង និងទំពាំងផង។ ខ្ញុំឃើញក្នុងពិធីការនីមួយៗ ទំពាំងត្រូវគេយកទៅឆាធ្វើម្ហូប មិនតិចនោះទេ ហើយយើងមិនព្រមគិតគូរដាំ បែជាទៅនាំទំពាំងពីគេមកវិញ។

តាមរយៈគំនិតផ្តួចផ្តើមនេះ ប្រជាជនដែលរស់នៅតាមតំបន់ដែលមានសហគមន៍ព្រៃឈើ មិនត្រឹមតែមានឱកាសថែរក្សាព្រៃឈើដែលមានប្រយោជន៍យូរអង្វែងដល់អនាគតក្រុមគ្រួសាររបស់គាត់ប៉ុណ្ណោះទេ ប៉ុន្តែថែមទាំងទទួលបានមុខរបរ និងប្រាក់ចំណូលដើម្បីបង្កើនជីវភាពគ្រួសារឱ្យបានល្អប្រសើរជាងមុនផងដែរ។ ឯកឧត្តម វេង សាខុន បានបញ្ជាក់ថែមទៀតថា៖“យើងអាចកែច្នៃបាន អ្វីដែលមិនប៉ះពាល់ដល់ព្រៃឈើ ហើយទទួលបានចំណូលផង។ សេដ្ឋកិច្ចចេះតែកើនឡើង មានសេចក្តីត្រូវការច្រើនណាស់ យើងត្រូវបង្កើនមុខរបរថ្មីៗបន្ថែមទៀត ខាងអគ្គនាយកដ្ឋានផលិតកម្មសត្វ និងសុខភាពសត្វត្រូវតែគិតគូរថា តើយើងអាចលែងគោ លែងក្របីក្នុងព្រៃឈើនោះបានឬទេ?។

ឯកឧត្តម វេង សាខុន បន្ថែមទៀតថា៖ “ខ្ញុំកំពុងបុករុកជាមួយក្រសួងសេដ្ឋកិច្ច និងហិរញ្ញវត្ថុ ដើម្បីឱ្យផ្តល់ទុនវិនិយោគលើបញ្ហានេះ ដើម្បីបន្ថែមទុនទៅដល់អគ្គនាយកដ្ឋានផលិតកម្មសត្វ និងសុខភាពសត្វដើម្បីជំរុញកិច្ចការនេះ យើងមិនធ្វើឱ្យប៉ះពាល់ព្រៃឈើទេ ប៉ុន្តែយើងត្រូវចិញ្ចឹមជាមួយគ្នាតែម្តង ដូចជាដាំដើមឫស្សី ចិញ្ចឹមសត្វ គឺយើងអាចធ្វើទៅរួច ដើម្បីបន្ថយសម្ពាធ។

យោងតាមទិន្នន័យដែលបានសិក្សានាពេលកន្លងមក កម្ពុជាបាននាំចូលបន្លែជាច្រើនប្រភេទពីប្រទេសជិតខាងដែលមានបរិមាណប្រមាណជា 400តោនក្នុងមួយថ្ងៃ ចន្លោះពីខែមីនារហូតដល់ខែវិច្ឆិកា ហើយកម្ពុជាត្រូវចំណាយទឹកប្រាក់ប្រមាណ 200លានដុល្លារសម្រាប់ការនាំចូលបន្លែទាំងនោះ។

បច្ចុប្បន្ននេះ ផ្ទៃដីដាំដុះបន្លែនៅកម្ពុជាបានថយចុះជាបន្តបន្ទាប់យ៉ាងគួរឱ្យព្រួយបារម្ភចំពោះការផលិតស្បៀងនៅក្នុងស្រុក។ ក្នុងឆ្នាំ2016 ផ្ទៃដីដាំដុះបន្លែនៅសល់តែជាង 12,000 ដោយថយចុះអស់ជាង 3,000ហិកតា ពីជាង 15,000ហិកតាក្នុងឆ្នាំ2015 ហើយនៅឆ្នាំ2017 ផ្ទៃដីដាំដុះបន្លែគ្រប់ប្រភេទនៅសល់តែជាង 9,000ហិកតាប៉ុណ្ណោះ៕

February 1, 2018

ការប្រគំតន្រី្ត Tiger Street Football Festival 2018 ជាបទពិសោធន៍ថ្មីសម្រាប់អ្នកកំពង់ស្ពឺ

បន្ទាប់ពីទស្សនាការប្រកួតបាលទាត់ដ៏ស្វិតស្វាញ និងជក់ចិត្ត នៃពានរង្វាន់ Tiger Street Football Festival 2018 បងប្អូនដែលរស់នៅក្នុងខេត្តកំពង់ស្ពឺ ទទួលបាននូវភាពរីរាយ ហ្គេមកម្សាន្តប្លែកៗដ៏ទាក់ទាញជាច្រើន ហើយនេះជាលើកដំបូងដែលក្រុមការនៃក្រុមហ៊ុនស្រាបៀរថៃហ្គ័របាននាំយកបទពិសោធន៍ដ៏អស្ចារ្យ មកចែកជូនបងប្អូនដែលរស់នៅលើទឹកដីសម្បូរទៅដោយដើមត្នោតមួយនេះ។

លើសពីនេះទៅទៀតគឺ ការប្រគំតន្ត្រីដោយមានការចូលរួមពីសំណាក់កំពូលតារាចម្រៀងល្បីៗជាច្រើនរូបក្នុងប្រទេសកម្ពុជារួមមាន កញ្ញា ឪប សុគន្ធកញ្ញា លោក ខេមរៈ សេរីមន្ត លោក នី រតនា កញ្ញា វី ឌីណែត និង លោក Step។ ហើយតារាចំរៀងទាំងអស់បានលើកយកសុទ្ធសឹងជាបទញ៉ាក់កន្ត្រាក់អារម្មណ៍ ជាហេតុធ្វើឲ្យ អ្នកគាំទ្រនៅព្រះសីហនុសប្បាយរីករាយ និងរាំកម្សាន្តទៅតាមចង្វាក់ភ្លេងយ៉ាងសប្បាយរីករាយ គ្រប់គ្នាពេញខាងមុខឆាកតន្រ្តី។

សូមបញ្ជាក់ថា ក្រោយចប់ការប្រកួតបាល់ទាត់ Tiger Street Football Festival 2018 នៅមណ្ឌលកំពង់ស្ពឺនេះ ក្រុមការងានឹងបន្តដំណើរទៅខេត្តបាត់ដំបងនៅសប្តាហ៍ក្រោយ ថ្ងៃទៅ ៣ និងទី៤ ខែកុម្ភៈ ឆ្នាំ២០១៨ ខាងមុខ៕

February 1, 2018

សេវាកម្មប្រឹក្សាយោបល់ធុរកិច្ចអន្តរជាតិកំពុងមានសក្តានុពលលើទីផ្សារកម្ពុជា

ស្របពេលដែលសេដ្ឋកិច្ចកម្ពុជាកំពុងមានការរីកចម្រើន គេសម្លឹងឃើញថា ក្រុមហ៊ុនបរទេស ផ្តល់សេវាកម្មច្រើនប្រភេទបានឈានជើងចូលមកក្នុងទីផ្សារកម្ពុជាកាន់តែច្រើនឡើងៗ ឧទាហរណ៍ដូចជាក្រុមហ៊ុន NAKI GROUP បានសហការជាមួយក្រុមហ៊ុន AIMS Immigration Specialist Cambodia Co.,Ltd នាំយកអ្នកជំនាញខាងផ្តល់ប្រឹក្សាសេវាកម្មខាងលើមកកម្ពុជាជាផ្លូវការហើយ។

លោក Pearce Cheng នាយកប្រតិបត្តិក្រុមហ៊ុន AIMS Immigration Specialist Cambodia Co, Ltd មានប្រសាសន៍ថា ក្រុមហ៊ុនរបស់លោកបាននាំអ្នកជំនាញមកផ្តល់សេវាកម្មទាក់ទងនឹងការធ្វើជំនួញ និងការវិនិយោគនៅបរទេស និងអ្នកមានជំនាញដែលអាចទៅធ្វើការនៅក្រៅប្រទេស រួមទាំងការទៅបន្តការសិក្សានៅបរទេសរបស់សិស្ស-និស្សិតនិងការរៀបចំការរើទីតាំងជំនួញទៅបរទេស បានឈានជើងចូលទីផ្សារកម្ពុជាហើយ។ លោកថា AIMS (អេ អាយ អឹម អេស)ត្រូវបានបង្កើតឡើងដំបូងបង្អស់នៅខែវិច្ឆិកា ឆ្នាំ2006 នៅក្នុងប្រទេសសិង្ហបុរី ជាមួយនឹងភាពជោគជ័យលើការផ្តល់សេវាកម្មដល់អតិថិជនរបស់ខ្លួន ឥឡូវ AIMS (អេ អាយ អឹម អេស) មានមោទនភាពក្នុងការផ្តល់សេវាកម្មនេះនៅកម្ពុជាបន្ថែមទៀត។

តំណាងរបស់ក្រុមហ៊ុន AIMS (អេ អាយ អឹម អេស) បានមានប្រសាសន៍បន្ថែមថា ក្រុមហ៊ុន AIMS Immigration Specialist Cambodia Co.,Ltd ផ្តោតលើសេវាកម្មសំខាន់ៗចំនួន 4 គឺ ទី1. ការសុំទិដ្ឋាការទៅសិក្សានៅបរទេស (Student visa)គឺការរៀបចំវីសាសម្រាប់សិស្ស-និស្សិតដែលមានបំណងទៅសិក្សានៅតាមបណ្តាប្រទេសនានាជុំវិញពិភពលោក។ ទី2.ការសុំទិដ្ឋាការទៅរស់នៅបរទេសតាមរយៈភាពជំនាញ (Skilled Migration) ជាការរៀបចំផ្តល់សេវាកម្មសុំវីសាជូនគ្រួសារ និងអ្នកនៅលីវដែលមានបំណងចង់ទៅរស់នៅបរទេសតាមរយៈជំនាញ ឬលក្ខណៈសម្បត្តិការងារ និងបទពិសោធការងាររបស់ខ្លួន។ ទី3.ការសុំទិដ្ឋាការទៅរស់នៅបរទេសតាមរយៈការធ្វើជំនួញ និងការវិនិយោគនៅបរទេស(Business and Investor Migration) គឺការផ្តល់សេវាកម្មសុំវីសា និងសុំសញ្ជាតិដល់ម្ចាស់អាជីវកម្ម សហគ្រិន និងវិនិយោគិន តាមរយៈការធ្វើអាជីវកម្ម ការវិនិយោគលើអចលនទ្រព្យ និងការវិនិយោគលើមូលបត្ររបស់រដ្ឋាភិបាលរបស់ប្រទេសដែលគាត់ចង់ទៅរស់នៅ និងចង់ទទួលបានសញ្ជាតិ និងទី4.ការសុំទិដ្ឋាការ និងរៀបចំការរើទីតាំងជំនួញទៅបរទេស គឺការផ្តល់សេវាលើការរៀបចំរើទីតាំងជំនួញទៅក្រៅប្រទេស ព្រមជាមួយការផ្តល់ប្រឹក្សាយោបល់គ្រប់ជំហាន រួមមានការសហប្រតិបត្តិការនៃអាជីវកម្ម ការស្វែងរកបុគ្គលិកនៅប្រទេសជាម្ចាស់ផ្ទះ ការស្វែងរកទីតាំងអាជីវកម្ម ឬការិយាល័យដែលល្អ និងសេវាជាច្រើនទៀត ដែលអាចធានាបាននូវភាពងាយស្រួលក្នុងការពង្រីកអាជីវកម្មរបស់លោកអ្នកនៅក្រៅប្រទេស។

ក្រុមហ៊ុន AIMS Immigration Specialist Cambodia Co.,Ltd នៅកម្ពុជាជាអ្នកដើរតួនាទីផ្តល់សេវាប្រឹក្សាយោបល់ និងផ្តល់សេវាកម្មសម្របសម្រួលប្រកបដោយភាពងាយស្រួល និងចំណេញពេលវេលាដល់អតិថិជន ដើម្បីបញ្ជូនឯកសារពាក់ព័ន្ធទៅការិយាល័យកណ្តាលរបស់ក្រុមហ៊ុននេះដែលមានទីស្នាក់ការធំនៅប្រទេសសិង្ហបុរី ជាកន្លែងដែលមានអ្នកជំនាញអន្តរជាតិមានបទពិសោធខ្ពស់ និងធ្វើការប្រកបដោយប្រសិទ្ធភាពខ្ពស់ សម្រាប់រៀបចំបែបបទស្នើសុំនានា។

ជាមួយនឹងការធ្វើការងារប្រកបដោយជំនាញជាក់លាក់ និងច្បាស់លាស់ ក្រុមហ៊ុនលំដាប់ពិភពលោកនេះតែងតែបានបញ្ជួនគ្រួសារចំនួន 500គ្រួសារជារៀងរាល់ខែ ចេញទៅរៀនសូត្រ ធ្វើការងារធ្វើជំនួញ និងរស់នៅក្រៅប្រទេសបានដោយស្របច្បាប់ជាមួយនឹងទំនុកចិត្ត និងភាពជឿជាក់មកលើ AIMS “យើងជឿជាក់ថា សេវាកម្មនេះនឹងទទួលបានជោគជ័យនៅកម្ពុជា ដោយសារតែបច្ចុប្បន្ននៅកម្ពុជាមិនទាន់មានក្រុមហ៊ុនជំនាញផ្តល់សេវាកម្មបែបនេះច្បាស់លាស់នៅឡើយ។

លោក Pearce Cheng បញ្ជាក់ថា ប្រទេសកម្ពុជាបាននិងកំពុងមានការរីកចម្រើនសេដ្ឋកិច្ច និងមានប្រាក់ចំណូលកើនឡើងដែលធ្វើឱ្យគ្រួសារកម្ពុជាកាន់តែច្រើនចង់បញ្ជូនកូនទៅសិក្សាក៏ដូចជាការធ្វើជំនួញនៅក្រៅប្រទេស ដែលជាកត្តាធ្វើឱ្យក្រុមហ៊ុនមួយនេះ សម្រេចឈានជើងចូលមកទីផ្សារក្នុងប្រទេសកម្ពុជាបន្ថែមទៀត៕

February 1, 2018

អេ អឹម ខេ ជាជម្រើសអាជីពការងារសម្រាប់អ្នក

ភ្នំពេញ៖ បុគ្គលិក អេ អឹម ខេ មានការកើនឡើងជាលំដាប់ពីមួយឆ្នាំទៅមួយឆ្នាំ។ អត្រាកើនឡើងនៃចំនួនបុគ្គលិក នេះហើយ ដែលសរបញ្ជាក់ឲ្យឃើញថា អេ អឹម ខេ គឺជាគ្រឹះស្ថានដែលបានយកចិត្តទុកដាក់ខ្ពស់ចំពោះបុគ្គលិកទាំងអស់។ គ្រប់បុគ្គលិក អេ អឹម ខេ ពិតជារីករាយជាមួយការងាររបស់គាត់ ព្រោះគាត់ពេញចិត្តនឹងបរិយាកាសការងារល្អ ការសហការក្រុម ការយកចិត្តទុកដាក់ពីថ្នាក់ដឹកនាំរបស់គាត់ ព្រមទាំងអាចទទួួលបាននូវអត្ថប្រយោជន៍ច្រើន និងឱកាសអភិវឌ្ឍខ្លួនផងដែរ។

លោកស្រី ពាំង ពិសាខ នាយិការប្រតិបត្តិធនធានមនុស្សបានមានប្រសាសន៍ថា “អេ អឹម ខេ បាន និងកំពុងខិតខំប្រឹងប្រែងដើម្បីក្លាយជាជម្រើសសម្រាប់និយោជិត ព្រោះ អេ អឹម ខេ បានផ្តល់ជូននូវលក្ខណៈពិសេស៣យ៉ាងគឺ៖ កន្លែងដែលផ្តល់ជូននូវអត្ថប្រយោជន៍ជាច្រើន ផ្តល់នូវឱកាសក្នុងការអភិវឌ្ឍខ្លួន និងជាពិសេសជាគ្រឹះស្ថានដែលមានបរិយាកាសការងារល្អ” លោកស្រីបានលើកឡើងថា អត្ថប្រយោជន៍សំខាន់ៗមួយចំនួនដែល អេ អឹម ខេ ផ្តល់ជូនបុគ្គលិកមានដូចជា ការធានារ៉ាប់រងសុខភាពសម្រាប់បុគ្គលិក ព្រមទាំងក្រុមគ្រួសារ (ប្តីឬប្រពន្ធ និង កូន) ១០០% ដោយមិនកំណត់ ការធានារ៉ាប់រង ២៤ ម៉ោងទៅលើគ្រោះថ្នាក់ដល់បុគ្គលិក ប្រាក់ឧបត្ថម្ភសម្រាប់បុណ្យចូលឆ្នាំខ្មែរ និងបុណ្យភ្ជុំបិណ្ឌ ប្រាក់សោធន ប្រាក់ឧបត្ថម្ភសម្រាប់បុគ្គលិកចូលនិវត្តន៍ ប្រាក់រង្វាន់លើកទឹកចិត្ត ប្រាក់កម្ចីសម្រាប់បុគ្គលិកក្នុងអត្រាការប្រាក់ត្រឹមតែ ២% ក្នុងមួយឆ្នាំ ប្រាក់មាតុភាពរហូតដល់ ១៧០% និងការឈប់សម្រាកព្យាបាលជំងឺដោយមានប្រាក់ឈ្នួលរហូតដល់ ៦ខែ ការឈប់សម្រាកពិសេស និងអត្ថប្រយោជន៍ជាច្រើនទៀត។

ចំពោះឱកាសអភិវឌ្ឍខ្លួន អ្នកស្រីបានឲ្យដឹងដែរថា ជារៀងរាល់ឆ្នាំ អេ អឹម ខេ បានរៀបចំកម្មវិធីសម្រាប់អភិវឌ្ឍបុគ្គលិករបស់ខ្លួនជាច្រើនមានដូចជា កម្មវិធីការបណ្តុះបណ្តាល និងការហ្វឹកហ្វឺន កម្មវិធីអ្នកស្នង កម្មវិធីទំនាក់ទំនងបុគ្គលិក កម្មវិធីអភិវឌ្ឍសមត្ថភាពស្នូល កម្មវិធីរៀនសូត្របន្ថែម កម្មវិធីអ្នកគ្រប់គ្រងហាត់ការ និងកម្មវិធីបណ្តុះបណ្តាលផ្សេងៗទៀត។ អ្នកស្រីពិសាខ ក៏បានសង្កត់ធ្ងន់ផងដែរអំពីបរិយាកាសការងារ ព្រោះវាជាកត្តាសំខាន់សម្រាប់បុគ្គលិក ព្រោះនៅពេលដែលស្ថាប័នមួយមានបរិយាកាសការងារល្អ បុគ្គលិកមានភាពរីករាយ សហការល្អក្នុងការបំពេញកាតព្វកិច្ច ដែលជាលទ្ធផលធ្វើឲ្យការងាររបស់គាត់មានប្រសិទ្ធភាពខ្ពស់។ ចំពោះ អេ អឹម ខេ ត្រូវបានចាត់ទុកថា ជាកន្លែងដែលមានបរិយាកាសការងារល្អ ព្រោះ អេ អឹម ខេ មានចំណុចពិសេសរបស់ខ្លួនដូចជា មានវប្បធម៌ការងារល្អ មានគុណតម្លៃរួមដែលជំរុញឲ្យមានបរិយាកាសស្និទ្ធស្នាលប្រកបដោយការទទួលខុសត្រូវ ផ្តល់ភាពកក់ក្តៅ និងមានការយកចិត្តទុកដាក់ខ្ពស់ចំពោះគ្រប់បុគ្គលិក មានការសហការណ៍ល្អ និងមានទំនាក់ទំនងល្អរវាងបុគ្គលិកគ្រប់ជាន់ថ្នាក់។

បុគ្គលិក អេ អឹម ខេ ម្នាក់ លោក សាង មក្ករី មន្ត្រីឥណទានឯកទេស បានចាប់ផ្តើមអាជីពការងារជាមួយ អេ អឹម ខេ ក្នុងឆ្នាំ ២០១៥ ជាមន្ត្រីឥណទានរៀនសូត្រ ដោយសារកិច្ចខិតខំប្រឹងប្រែងក្នុងការបំពេញការងារ លោកត្រូវបានតំឡើងតំណែងជា មន្ត្រីឥណទានពេញសិទ្ធក្នុងរយៈពេល២ខែ មកដល់ពាក់កណ្តាលឆ្នាំ២០១៧ លោកត្រូវបានតែងតាំងក្នុងមុខតំណែងថ្មីមួយទៀតគឺ មន្ត្រីឥណទានឯកទេស។ “អស់រយៈពេលជិត២ឆ្នាំហើយដែលខ្ញុំបម្រើការងារជាមួយ អេ អឹម ខេ ខ្ញុំមានអារម្មណ៍ថា អេ អឹម ខេ ដូចជាផ្ទះទី២ដែរ ដោយបុគ្គលិកទាំងអស់រួសរាយរាក់ទាក់ហាក់បីដូជាក្រុមគ្រួសារខ្ញុំដែរ។ លោក មក្ករី បានបន្ថែមទៀតថា “អ្វីដែលសំខាន់នោះ គឺខ្ញុំទទួលបានការលើកទឹកចិត្តពីប្រធានផ្ទាល់ ក៏ដូចជាមិត្តភក្តិរួមក្រុមក្នុងការបំពេញការងារប្រចាំថ្ងៃរបស់ខ្ញុំផងដែរ។

អេ អឹម ខេ គឺជាគ្រឹះស្ថានមីក្រូហិរញ្ញវត្ថុ ដែលឈានមុខគេលើវិសាលភាពប្រតិបត្តិការ និងចំនួនអតិថិជនប្រាក់កម្ចី។ គិតត្រឹម ខែធ្នូ ឆ្នាំ២០១៧ នេះ អេ អឹម ខេ មានបុគ្គលិកសរុបចំនួនជិត ២៥០០នាក់ អតិថិជនចំនួនជិត ៦៨ ម៉ឺននាក់ ជាមួយនឹងផលប័ត្រប្រាក់កម្ចីជាង ២០៧ លានដុល្លារអាមេរិក មានការិយាល័យប្រតិបត្តិការចំនួន ១៥០ កន្លែង និងមានភ្នាក់ងារជាង៣.០០០កន្លែងនៅទូទាំងប្រទេស។ អេ អឹម ខេ មានផលិតផល និង សេវាកម្មជាច្រើន កំពុងផ្តល់ជូនអតិថិជនដូចជា សេវាប្រាក់កម្ចី ប្រាក់សន្សំ ផ្ទេរប្រាក់ សេវាទូទាត់វិក្កយបត្រ ធានារ៉ាប់រងខ្នាតតូច ធនាគារចល័ត សេវាបើកប្រាក់បៀវត្សរ៍ ម៉ាស៊ីនដក និងដាក់ប្រាក់ដោយស្វ័យប្រវត្តិ (ATMs/CDMs)៕

February 1, 2018

តម្លៃដីនៅតាមបណ្តោយផ្លូវជាតិលេខ3 កំពុងមានសក្តានុពល

ស្របពេលដែលរដ្ឋាភិបាលប្រកាសគម្រោងជួសជុល និងពង្រីកឡើងវិញនូវជាតិលេខ3 ចាប់ពីចំណុចរង្វង់មូលចោមចៅក្រុងភ្នំពេញឆ្ពោះទៅទីរួមខេត្តកំពត បានធ្វើឱ្យដីនៅតាមបណ្តោយផ្លូវជាតិលេខ3 ចាប់ផ្ដើមមានសក្តានុពលខ្លាំងក្នុងការពុះជាឡូត៍ៗ និងសង់អគារផ្ទះល្វែងសម្រាប់លក់។

លោក តាំង សេងប៉ អគ្គនាយកបុរីហ្គ្រែនផាកដែលមានទីតាំងប្រមាណជា 3គីឡូម៉ែត្រពីរង្វង់មូលចោមចៅបានមានប្រសាសន៍ថា ដោយមើលឃើញសក្តានុពលដីនៅតាមបណ្តោយផ្លូវជាតិលេខ3កំពុងមានតម្លៃកើនឡើងចាប់តាំងពីរដ្ឋាភិបាលប្រកាសជួសជុល និងពង្រីកផ្លូវឡើងវិញមកនោះក្រុមហ៊ុនរបស់លោកក៏ចាប់ផ្តើមគម្រោងសាងសង់នេះឡើងដែរកាលពីអំឡុងជាងមួយខែមុន ដោយក្រោយពីការប្រកាសលក់មកក៏មានអតិថិនចូលមកទំនាក់ទំនងទិញបានប្រមាណជាង30%ហើយ គឺលើសពីការរំពឹងទុក។

លោកថា “បើយើងធ្វើដំណើរពីចោមចៅទៅតែ 5នាទីប៉ុណ្ណោះនឹងទៅដល់ហើយ ពេលទៅដល់គឺមានរោងចក្រនៅជុំវិញតំបន់នោះជាច្រើន ពេលម៉ោងចេញ និងចូលធ្វើការ មានមនុស្សច្រើនអ៊ូអរ ដែលជាសក្តានុពលក្នុងការប្រកបរបររកស៊ីផ្សេង។ បច្ចុប្បន្នដីនៅតាមបណ្តោយផ្លូវជាតិលេខ3 មានការរីកលូតលាស់ខ្លាំង ជាពិសេសការពុះដីជាឡូត៍និងសង់ផ្ទះល្វែងសម្រាប់លក់ ប៉ុន្តែក៏ហាក់មានភាពអសកម្មខ្លះដែរ ដោយសារអ្នកធ្វើដំណើរតែងជួបការកកស្ទះនៅម្ដុំរង្វង់មូលចោមចៅស្ទើររាល់ថ្ងៃ។

ករណីនេះលោក តាំង សេងប៉ និយាយថា វានឹងប្រសើរឡើងវិញក្រោយពីសាលារាជធានីសាងសង់ស្ពានអាកាសនៅត្រង់រង្វង់មូលចោមចៅរួចរាល់។ ជាមួយគ្នានេះដែរ លោក អ៊ុន និមល ម្ចាស់គម្រោងពុះដីឡូត៍លក់នៅជិតផ្សារព្រៃទទឹង ស្ថិតនៅតាមបណ្តោយផ្លូវជាតិលេខ3 ដែលមានចម្ងាយប្រមាណជាជាង10គីឡូម៉ែត្រពីរង្វង់មូលចោមចៅមានប្រសាសន៍ទទួលស្គាល់ថា បច្ចុប្បន្នដីនៅតាមបណ្តោយផ្លូវជាតិលេខ3 ពិតជាមានសម្ទុះឡើងថ្លៃពិតប្រាកដមែន ពោលគឺមានឈ្មួញចុះទិញដីសង់ផ្ទះល្វែង និងពុះឡូត៍លក់ មានឈ្មួញកណ្តាលចុះទិញទុកលក់យកចំណេញបន្ត និងពលរដ្ឋទិញសម្រាប់សង់ផ្ទះរស់នៅផ្ទាល់ខ្លួន ឬសង់បន្ទប់ជួលកាន់តែច្រើនឡើងៗគួរឱ្យកត់សម្គាល់។ កន្លងមកដីនៅតំបន់នោះមានតម្លៃតែ 4 ឬ5ដុល្លារប៉ុណ្ណោះក្នុងមួយម៉ែត្រការ៉េ ប៉ុន្តែបច្ចុប្បន្នឡើងថ្លៃដល់ទៅ40-50$ ឯណោះក្នុងមួយម៉ែត្រការ៉េ។

លោកបានបញ្ជាក់ដូច្នេះថា “សម្រាប់ដីឡូត៍របស់ខ្ញុំ ទើបតែចាក់ដីពុះលក់បានត្រឹមតែ1ថ្ងៃប៉ុណ្ណោះ មិនទាន់បានដាក់ផ្លាកលក់ផង គ្រាន់តែដឹងតៗគ្នាពីមាត់មួយទៅមាត់មួយ ស្រាប់តែមានអតិថិជនមកកក់ទិញអស់9ឡូត៍ភ្លាមៗបាត់ទៅហើយ មិនគួរឱ្យជឿសោះ។ អ្វីដែលធ្វើឱ្យដីនៅតំបន់នោះមានការរីកលូតលាស់ខ្លាំង គឺដោយសារតែស្ថិតនៅក្នុងទីតាំងកំពុងអភិវឌ្ឍន៍រោងចក្រ និងផែស្ងួត និងគម្រោងតំបន់សេដ្ឋកិច្ចពិសេសចំនួនពីរទៀតកំពុងសាងសង់ ចំណែកផែស្ងួតមួយកន្លែងកំពុងចាក់ដីសាងសង់ផងដែរ ពិសេសសម្បូររោងចក្រច្រើនអាចប្រកបរបរលក់ដូរបាន។

លោក ហ៊ឹម សីហា នាយកផ្នែកស្រាវជ្រាវក្រុមហ៊ុនអចលនទ្រព្យ Vtrust Appraisal មានប្រសាសន៍ថា ជារឿងធម្មតាទេ ទីណាមានការអភិវឌ្ឍ ទីនោះមានប្រជាពលរដ្ឋទៅរស់នៅច្រើនហើយ ដោយសារតែជាទីតាំងដែលមានចរន្តសេដ្ឋកិច្ចល្អ ប៉ុន្តែយ៉ាងណានោះ លោកអះអាងថា ដីនៅម្តុំផ្លូវជាតិលេខ3 គឺមានសក្តានុពលប្រហាក់ប្រហែលនឹងដីនៅផ្លូវជាតិផ្សេងៗដែរ គឺមិនមែននៅផ្លូវណាល្អជាងផ្លូវណានោះទេ។

បើគេក្រឡេកមើលទៅផ្លូវជាតិលេខ4វិញ គឺមានភាពប្រសើរជាង ដោយសារផ្លូវនោះពេលគេធ្វើដំណើរចេញពីទីក្រុងទៅ គឺមានកូនទីក្រុងតូចៗជាបន្តបន្ទាប់ដែលមានចរន្តសេដ្ឋកិច្ចល្អ ប្រជាពលរដ្ឋអាចប្រកបរបរលក់ដូរ រកចំណូលសម្រាប់ក្រុមគ្រួសារបាន។

លោកបានមានប្រសាសន៍ បន្ថែមទៀតថា មិនថាតែផ្លូវជាតិលេខ3នោះទេ ទោះជាផ្លូវជាតិណាក៏ដោយ បច្ចុប្បន្នកំពុងមានសក្តានុពលពុះដីឡូត៍លក់ និងសង់សំណង់ផ្ទះល្វែងលក់ច្រើនដូចៗគ្នាទាំងអស់សំខាន់ឱ្យតែជាទីតាំងដែលមានសក្តានុពលសេដ្ឋកិច្ចដូចជាមានរោងចក្រឧស្សាហកម្ម មានផ្សារ សាលារៀន និងមន្ទីរពេទ្យ ទីនោះតែងមានប្រជាពលរដ្ឋចូលទៅរស់នៅច្រើនហើយ៕

February 1, 2018

Author: វល័ក្ខ