វល័ក្ខ - La Reine Media

“ចែករំលែកភាពរំភើបរីករាយ ចែករំលែកពានរង្វាន់” ជាមួយ HEINEKEN

ភ្នំពេញ៖ នៅថ្ងៃទី 9 ខែមីនា យុទ្ធនាការទូទាំងប្រទេសមួយបានចាប់ផ្តើមបន្ទាប់ពីការប្រកាសថាកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ដែលនាំជូនដោយស្រាបៀរ Heineken® នឹងធ្វើដំណើរមកកាន់ព្រះរាជាណាចក្រកម្ពុជាជាមួយនឹងវីរបុរសបាល់ទាត់ Ruud van Nistelrooy ចាប់ពីថ្ងៃទី 2 ដល់ថ្ងៃទី 4 ខែមេសា ឆ្នាំ 2018 ខាងមុខនេះ។

យុទ្ធនាការ UEFA Champions League ឆ្នាំ 2018 របស់ស្រាបៀរ Heineken® ដែលមានឈ្មោះថា “ចែករំលែកភាពរំភើបរីករាយ ចែករំលែកពានរង្វាន់” មានគោលបំណងចែករំលែកភាពរំភើប និងភាពសប្បាយរីករាយនៃការប្រកួតនេះជាមួយនឹងអ្នកគាំទ្រទូទាំងពិភពលោក។ កម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ដែលនាំជូនដោយស្រាបៀរ Heineken® នឹងជួយអ្នកគាំទ្របានឃើញផ្ទាល់នូវពានរង្វាន់ដ៏ល្បីល្បាញនេះ និងមានឱកាសជួបផ្ទាល់ជាមួយវីរបុរសបាល់ទាត់ UEFA Champions League ។

ស៊េរីនៃស្ពតផ្សាយពាណិជ្ជកម្មតាមទូរទស្សន៍កំពុងបានចាក់ផ្សាយអមជាមួយយុទ្ធនាការការទាក់ទងតាមឌីជីថលដែលមានឈ្មោះពិសេសថា #ShareTheTrophy ដែលអ្នកគាំទ្រស្រាបៀរ Heineken® និងអ្នកគាំទ្រ UEFA Champions League អាចចែករំលែកតាមអនឡាញដើម្បីបង្ហាញពីការគាំទ្ររបស់ពួកគេ។

កម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ដែលនាំជូនដោយស្រាបៀរ Heineken® ផ្តល់ឲ្យអ្នកគាំទ្រកីឡាបាល់ទាត់នៅជុំវិញពិភពលោកមានឱកាសកាន់តែស្និទ្ធស្នាលជាមួយវីរបុរសជើងឯកបាល់ទាត់ និងពានរង្វាន់ UEFA Champions League ដ៏ល្បីល្បាញ។ ក្នុងប្រវត្តិសាស្ត្រដប់មួយឆ្នាំនៃកម្មវិធីដំណើរទេសចរណ៍នេះបានទៅដល់ 26 ប្រទេសនៅទូទាំងទ្វីបអាហ្វ្រិក អាស៊ី និងអាមេរិកខាងត្បូង និងអាមេរិកខាងជើង។

កម្មវិធីដំណើរទេសចរណ៍នេះនឹងមកដល់ប្រទេសកម្ពុជាជាលើកទីមួយចាប់ពីថ្ងៃទី 2 ដល់ថ្ងៃទី 4 ខែមេសា ឆ្នាំ 2018 ខាងមុខនេះ ដែលក្រុមអ្នកគាំទ្រមានឱកាសដ៏កម្រក្នុងការថតរូបជាមួយនឹងពានរង្វាន់ដ៏ល្បីល្បាញនេះ ជួបផ្ទាល់ជាមួយ Ruud van Nistelrooy និងទទួលបទពិសោធន៍ដ៏រំភើបជាមួយនឹងសកម្មភាពដែលគាំទ្រដល់កម្មវិធីដំណើរទេសចរណ៍នេះ។

ព័ត៌មានបន្ថែមអំពីកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ដែលនាំជូនដោយស្រាបៀរ Heineken® នៅក្នុងប្រទេសកម្ពុជា និងឱកាសសម្រាប់អ្នកគាំទ្រចូលរួមក្នុងសកម្មភាពផ្សេងៗនឹងធ្វើការចេញផ្សាយក្នុងពេលឆាប់ៗនេះ។

ចំពោះព័ត៌មានលម្អិត សូមចូលមើលគេហទំព័រ www.facebook.com/Heineken

សូមរីករាយទទួលទានស្រាបៀរ Heineken ដោយទទួលខុសត្រូវ

March 19, 2018

វីដេអូអប់រំខ្លី ភាគទី៣ ‌«បទពិសោធន៍ការខ្ចីលុយពីអ្នកចងការ និងគ្រឹះស្ថានមីក្រូហិរញ្ញវត្ថុ»

បទពិសោធន៍ខ្ចីប្រាក់ពីអ្នកចងការលុយក្រៅប្រព័ន្ធដែលមានការប្រាក់ខ្ពស់ និងខ្ចីប្រាក់ពីគ្រឹះស្ថានមីក្រូហិរញ្ញវត្ថុដែលទទួលបានអាជ្ញាប័ណ្ណពីធនាគារជាតិនៃកម្ពុជា និងគោរពតាមគោលការណ៍ការពារអតិថិជន ដែលមានការប្រាក់សមរម្យ ជាមួយនឹងការប្រឹក្សាយោបល់ច្បាស់លាស់មុននឹងផ្តល់ប្រាក់កម្ចី។

March 19, 2018

ចង់ក្លាយខ្លួនជាមនុស្សខ្លាំង ធ្វើការមានប្រសិទ្ធភាពខ្ពស់ ត្រូវមានចំណុចអ្វីខ្លះ?

នៅក្នុងជីវិតការរស់នៅប្រចាំថ្ងៃ និងជីវិតការងារមនុស្សម្នាក់ៗ មិនមែនទទួលបានលទ្ធផលដូចៗគ្នានោះទេ បើទោះបីជាពួកគេស្ថិតនៅក្នុងគ្រួសារជាមួយគ្នា ឬក្នុងស្ថាប័នតែមួយក៏ដោយ ព្រោះមនុស្សខ្លះមានប្រសិទ្ធភាពការងារខ្ពស់ ខណៈមនុស្សផ្សេងទៀតមានប្រសិទ្ធភាពការងារធម្មតា។ ជាទូទៅ មនុស្សដែលមានប្រសិទ្ធភាពការងារខ្ពស់តែងតែជាអ្នកដែលមានភាពលេចធ្លោ និងជោគ-ជ័យខ្លាំងជាងអ្នកដែលបណ្តែតបណ្តោយឱ្យជីវិតការងារប្រែប្រួលទៅតាមស្ថានការណ៍ជាក់ស្តែង។

ពាក់ព័ន្ធទៅនឹងបញ្ហានេះ លោក Christopher Lee ស្ថាបនិកនៃអង្គការ HEDC អន្តរជាតិ និងជាអ្នកជំនាញផ្នែកអភិវឌ្ឍន៍មនុស្ស បានលើកឡើងថាការជំរុញទឹកចិត្តគឺជារឿងសំខាន់មួយដែលធ្វើឱ្យពួកគេក្លាយជាអ្នកដែលមានប្រសិទ្ធភាពការងារខ្ពស់។ លោកបញ្ជាក់ថា រឿងល្អគ្រប់យ៉ាងកើតឡើងពីក្តីស្រឡាញ់ ហើយរឿងមិនល្អគ្រប់យ៉ាងគឺកើតចេញពីកង្វះក្តីស្រឡាញ់ ហេតុនេះការដែលមនុស្សណាម្នាក់មានក្តីស្រឡាញ់ចំពោះការងាររបស់ខ្លួន និងមានការជំរុញទឹកចិត្តបានត្រឹមត្រូវនោះរូបគេអាចនឹងក្លាយជាមនុស្សដែលមានប្រសិទ្ធភាពការងារខ្ពស់។

លោក Christopher Lee បានមានប្រសាសន៍ថា ៖ “មនុស្សដែលមានកត្តាជំរុញខ្លាំង គឺមនុស្សដែលមានគោលដៅច្បាស់លាស់ មានការតស៊ូព្យាយាម និងមានចំណង់ដ៏លើសលប់។

អ្នកជំនាញអភិវឌ្ឍន៍មនុស្សខាងលើបានលើកឡើងផងដែរថា មនុស្សដែលគ្មានគោលដៅគាត់អាចធ្វើការងាររាល់ថ្ងៃដើម្បីតែប្រាក់ខែរបស់គាត់នៅចុងខែ ឬព្រោះតែការងារនោះជាអ្វីដែលមេរបស់គាត់ដាក់ឱ្យតែប៉ុណ្ណោះ តែគាត់មិនបានដឹងពីគោលបំណងពិតប្រាកដ និងសារៈសំខាន់នៃការងាររបស់គាត់នោះទេ។

មនុស្សដែលមានគោលដៅច្បាស់លាស់ គាត់ដឹងយ៉ាងច្បាស់ពីកន្លែងដែលគាត់ត្រូវទៅ និងគុណតម្លៃនៃការងាររបស់គាត់ចំពោះសង្គមឬចំពោះមនុស្សជំនាន់ក្រោយ ដែលធ្វើឱ្យពួកគាត់បើកចិត្តបានទូលាយក្នុងការជំរុញខ្លួនឯងឱ្យធ្វើការងារជាច្រើនដោយតម្លៃខ្ពស់។ ក្រៅពីនេះ ការតស៊ូព្យាយាមក៏ជាចំណុចមិនអាចខ្វះបានផងដែរសម្រាប់មនុស្ស ព្រោះថាមនុស្សដែលមិនពូកែក៏ដោយ ឱ្យតែមានសេចក្តីតស៊ូព្យាយាមខ្ពស់ គាត់នឹងអាចទទួលបានជោគជ័យ ដូចគ្នា ឱ្យតែការតស៊ូនោះត្រូវបានធ្វើឡើងជាប់រហូតដោយមិនបោះបង់។

លោក Christopher Lee បានថ្លែងផងដែរថា សិស្សមួយចំនួនដែលពូកែមិនប្រាកដថាជោគជ័យនោះទេ វាអាស្រ័យលើការព្យាយាមខ្លាំងកម្រិតណាព្រោះថាមនុស្សដែលមានការតាំងចិត្ត និងតស៊ូព្យាយាមខ្ពស់ជាមនុស្សដែលមិនងាយបោះបង់នោះទេ ហើយជាទូទៅមនុស្សដែលមិនបោះបង់ និងមិនព្រមចុះចាញ់ការបរាជ័យ និងបន្តអភិវឌ្ឍជានិច្ចនោះ ភាគច្រើនជាមនុស្សដែលមានប្រសិទ្ធភាពការងារខ្ពស់។ គេនៅតែខំម្តងហើយម្តងទៀត និងអាចតស៊ូជាមួយស្ថានភាពលំបាកដែលអាចជំរុញឱ្យពួកគេរកឃើញនូវវិធីសាស្ត្រល្អបំផុតដើម្បីសម្រេចជោគជ័យលើការងាររបស់ពួកគេ។ ម្យ៉ាងវិញទៀត ការមានចំណង់ដ៏លើសលប់ក៏ជាមូលហេតុសំខាន់មួយផងដែរ ក្នុងការជំរុញមនុស្សឱ្យទទួលបានជោគជ័យក្នុងភារកិច្ចការងាររបស់ខ្លួន។

នៅពេលដែលមនុស្សណាម្នាក់បានដឹងច្បាស់ពីសារៈសំខាន់នៃការងាររបស់ខ្លួន ហើយមានបំណងច្បាស់លាស់ក្នុងការធ្វើការងារ គេបានស្រមៃយ៉ាងច្បាស់ពីភាពជោគជ័យដែលគេចង់ឃើញ ដែលរូបភាពទាំងអស់នេះនឹងរុញច្រានពួកគេឱ្យក្លាយជាមនុស្សដែលមានថាមពលខ្លាំងក្នុងការអនុវត្តការងារលំបាកៗបានយ៉ាងល្អ។

លោក គង់ វិចិត្រា ស្ថាបនិកស្ថាប័នបណ្តុះបណ្តាលភាពជាអ្នកដឹកនាំ Asia Leading Academy បានលើកឡើងថា ដើម្បីពង្រឹងប្រសិទ្ធភាពការងារ បុគ្គលិកម្នាក់ៗត្រូវចេះគោរពអ្នកដទៃ ក្នុងការធ្វើការងារជាក្រុម ហើយព្យាយាមគ្រប់លទ្ធភាពដើម្បីទទួលយកគំនិតអ្នកដទៃឱ្យបានច្រើនប្រសិនបើគំនិតនោះនាំឆ្ពោះទៅរកភាពរីកចម្រើន។ ម្យ៉ាងវិញទៀត ការសម្របសម្រួលបានល្អក្នុងការធ្វើការងារជាក្រុមក៏ជាកត្តាជំរុញមួយដែលធ្វើឱ្យយើងធ្វើការងារបានល្អ និងមានប្រសិទ្ធភាពខ្ពស់ដែរ ព្រោះការធ្វើការងារជាក្រុមអាចធ្វើឱ្យយើងជម្នះឧបសគ្គបានល្អជាងការដែលយើងធ្វើការងារម្នាក់ឯង។

នៅពេលដែលអ្នកណាម្នាក់មានទំនាក់ទំនងល្អ និងមានចិត្តទូលាយក្នុងការជួយការងារជាក្រុមគាត់ក៏នឹងទទួលបានការយកចិត្តទុកដាក់ខ្ពស់ផងដែរ នៅពេលដែលគាត់ជួបបញ្ហាប្រឈមដែលលំបាកដោះស្រាយ។

លោក គង់ វិចិត្រា បាននិយាយថា ៖ “រាល់ការធ្វើការងារអ្វីក៏ដោយ សូមគិតថា យើងធ្វើការងារដើម្បីខ្លួនឯង មិនមែនធ្វើឱ្យតែរួចពីដៃនោះទេ ហើយធ្វើឱ្យបានល្អឥតខ្ចោះដើម្បីឱ្យទទួលបានលទ្ធផលល្អបំផុត ព្រោះការងារល្អ និងមិនល្អ វាអាចជះឥទ្ធិពលមកលើស្ថាប័នរបស់យើង និងមកលើខ្លួនយើងផ្ទាល់ផងដែរ។

លោក គង់ វិចិត្រា បានលើកឡើងផងដែរថា បុគ្គលដែលមានគំនិតវែងឆ្ងាយ និងធ្វើការងារដើម្បីគោលដៅរួមដោយបើកចិត្តទូលាយ សម្រាប់ធ្វើការងារជាមួយមនុស្សគ្រប់គ្នា និងចេះសម្របខ្លួនជាមួយស្ថានភាពជាក់ស្តែងនៃស្ថាប័នគឺជាបុគ្គលម្នាក់ដែលតែងតែទទួលបានការចាប់អារម្មណ៍ និងការលើកទឹកចិត្ត។ កត្តាទាំងអស់នេះហើយ ដែលធ្វើឱ្យពួកគេមានទឹកចិត្តខ្លាំងក្នុងការជំរុញលើកទឹកចិត្តខ្លួនឯងឱ្យក្លាយជាមនុស្សដែលមានថាមពលខ្លាំងក្នុងការធ្វើការងារប្រកបដោយប្រសិទ្ធភាពខ្ពស់៕

March 19, 2018

ជួបជាមួយកំពូលតារាចម្រៀងល្បីៗក្នុងកម្មវិធី «សង្គ្រាន្ត ភីភីអេសអ៊ីហ្សិត IDOL 2018»

ការប្រគំសិល្បៈ និងតន្ត្រីដើម្បីប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរ ដោយមានកម្មវិធីការប្រកួតប្រជែងសម្រស់និងទេពកោសល្យ និងការសំដែងសិល្បៈ រួមជា មួយតារាចម្រៀងល្បីៗប្រចាំព្រះរាជាណាចក្រកម្ពុជា នៅក្នុងតំបន់សេដ្ឋកិច្ចពិសេសភ្នំពេញដ៍ធំបំផុត សម្រាប់ទស្សនិកជន២៧០០០នាក់។

ព្រឹត្តិការណ៍សិល្បៈ និងការប្រគំតន្ត្រីប្រចាំឆ្នាំលើទីធ្លាដ៏ធំទូលាយ ប្រារព្ធឡើងសម្រាប់អបអរការរីកចម្រើន និងភាពជោគជ័យក្នុងឆ្នាំថ្មី នៅតំបន់សេដ្ឋកិច្ចពិសេសលំដាប់អន្តរជាតិឈានមុខគេនៅកម្ពុជា។

រាជធានីភ្នំពេញ ថ្ងៃទី១៩ ខែមីនា ឆ្នាំ២០១៨៖ តំបន់សេដ្ឋកិច្ចពិសេសភ្នំពេញ ដែលជាតំបន់សេដ្ឋកិច្ចពិសេសឈានមុខគេនៅកម្ពុជា នឹងមានការរៀបចំព្រឹត្តិការណ៍ប្រចាំឆ្នាំដ៏ធំមួយដើម្បីអបអរសាទរពិធីបុណ្យចូលឆ្នាំខ្មែរ នៅថ្ងៃទី៣១ ខែមីនា ឆ្នាំ២០១៨ នាពេលខាងមុខនេះ ដែលមានឈ្មោះថា “សង្គ្រាន្ត ភីភីអេសអ៊ីហ្សិត IDOL 2018” ។ ព្រឹត្តិការណ៏នេះ នឹងមានកម្មវិធីពិសេសៗដូចជា ការប្រកួតប្រជែងសម្រស់និងទេព្យកោសល្យពិសេស របស់កម្មករកម្មការិនី ដែលកំពុងបម្រើការងារនៅក្នុងក្រុមហ៊ុននានា ក្នុងតំបន់សេដ្ឋកិច្ចពិសេសភ្នំពេញ នឹងសម្តែងសមត្ថភាពនិងទេពកោសល្យ នៅចំពោះមុខ មហាជន និងមានការដាក់ពិន្ទុកាត់សេចក្ដីដោយគណៈកម្មការសម្រាប់ជ្រើសរើសជ័យលាភី។ អី្វដែល គួរឱ្យចាប់អារម្មណ៍ និងធ្វើអោយព្រឹត្តការណ៍នេះកាន់តែសប្បាយ និងវិសេសវិសាលថែមទៀតនោះ គឺ មានការសំដែងសិល្បៈរបាំបូរាណ របាំសហសម័យ របស់ក្រុមសិល្បៈអាជីពកម្រិតខ្ពស់នៃព្រះរាជាណាចក្រកម្ពុជា ព្រមទាំងមានវត្ដមានចូលរួមពីតារាល្បីៗប្រចាំប្រទេសកម្ពុជាដូចជា លោក ព្រាប សុវត្ថិ អ្នកនាង ខាត់ សុឃីម និងក្រុមកំប្លែងនាយពែកមីទៀតផង ។ ទស្សនិកជនដែលរំពឹងទុកចូលរួមនៅក្នុងព្រឹត្តិការណ៍នេះ នឹងមានប្រមាណ ២៧០០០នាក់។

លោកស្រី ហ៊ុន ចាន់ប៉ី អ្នកគ្រប់គ្រងជាន់ខ្ពស់របស់ក្រុមហ៊ុន ភ្នំពេញ អេសអ៊ីហ្សិត ភិអិលស៊ី និងជាអ្នករៀបចំកម្មវិធីឆ្នាំនេះមានប្រសាសន៍ថា “ យើងមានសេចក្តីគោរព និងអោយតម្លៃទៅដល់កម្មករ និងកម្មការិនី។ ជាការពិតនិង មានសារសំខាន់ខ្លាំងណាស់សម្រាប់យើង ក្នុងការធ្វើការងារជាក្រុម និងយល់អំពីសេចក្តីត្រូវការរបស់ពួកគាត់ និង មានការសហការល្អរវាងគ្នាទៅវិញទៅមក ដើម្បីឱ្យការងារមានភាពរីកចម្រើន និងភាពលូតលាស់។ ហេតុដូច្នេះហើយ នៅក្នុងឱកាសប្រារព្ធពិធីបុណ្យចូលឆ្នាំខ្មែរ អមជាមួយនឹង កម្មវិធីសង្ក្រាន្ត ភីភីអេសអ៊ីហ្សិត IDOL 2018 នាពេលខាងមុខនេះ គឺជាការបង្ហាញនូវការអោយតម្លៃ ការលើកទឹកចិត្ត និងពង្រឹងចំណងមិត្តភាពឱ្យកាន់តែរឹងមាំបន្ថែមទៀត រវាងក្រុមការងាររបស់តំបន់សេដ្ឋកិច្ចពិសសភ្នំពេញ កម្មករកម្មការិនី អ្នកដឹកនាំ អ្នកវិនិយោគ និងសហគមន៍ដែលនៅជុំវិញតំបន់សេដ្ឋកិច្ចពិសេសរបស់យើង ដើម្បីការសហការងារល្អនាពេលអនាគតបន្តទៅទៀត។ យើងខ្ញុំរង់ចាំទទួល និងស្វាគមន៍អ្នកទាំងអស់គ្នាមកកាន់កម្មវិធី និងចូលរួមសប្បាយរីករាយទាំងអស់គ្នាក្រោយពីបានបំពេញការងារយ៉ាងសកម្មសម្រាប់ឆ្នាំកន្លងមក” ។

លោកជំទាវឧកញ៉ា លីម ឈីវហូរ អគ្គនាយិកាក្រុមហ៊ុន ភ្នំពេញ អេសអ៊ីហ្សិត ភីអិលស៊ី ដែលជាអ្នកផ្តួចផ្តើមគំនិតបង្កើតព្រឹត្តិការណ៍នេះឡើង មានប្រសាសន៍ថា “ខ្ញុំមានសេចក្ដីសោមនស្សរីករាយជាខ្លាំង ក្នុងការរៀបចំព្រឹត្តិការណ៍ជាលើកទី៥សម្រាប់ឆ្នាំនេះ និងសូមឆ្លៀតយកឱកាសនេះថ្លែងអំណរគុណចំពោះអ្នកឧបត្ថម្ភ និងដៃគូសហការរបស់យើង ហើយនេះគឺជាការឆ្លើយតបដល់កម្មករកម្មការិនីរបស់យើង ដែលបានខិតខំប្រឹងប្រែងបំពេញការងារក្នុងឆ្នាំកន្លងទៅ។ យើងមានកិត្តិយសដ៏ខ្ពង់ខ្ពស់ ដែលបានអញ្ជើញភ្ញៀវសំខាន់ៗជាច្រើនដូចជា ឯកឧត្តម អ៊ិត សំហេង រដ្ឋមន្ត្រី ក្រសួងការងារ និងបណ្តុះបណ្តាលវិជ្ជាជីវៈ លោកជំទាវ វេជ្ជ. អ៊ឹង កន្ថាផាវី រដ្ឋមន្ត្រីក្រសួងកិច្ចការនារី ឯកឧត្តម សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា ឯកអគ្គរាជទូត/ឯកអគ្គរដ្ឋទូតនៃស្ថានទូតជាច្រើនក្នុងប្រទេសកម្ពុជា ព្រមទាំងសមាជិកនៃសមាគមសហគ្រិនស្ត្រីកម្ពុជា” ។

“យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះអ្នកឧបត្ថម្ភកម្មវីធី និងដៃគូសហការទាំងអស់ សម្រាប់ការគាំទ្រដោយសប្បុរស ដើម្បីញ៉ាំងឱ្យកម្មវិធីនេះប្រព្រឹត្តទៅបាន និងសម្រាប់ការបំពេញការងារយ៉ាងសស្រាក់សស្រាំរបស់ក្រុមការងារតំបន់សេដ្ឋកិច្ចពិសេសភ្នំពេញ ដែលបានរៀបចំកម្មវិធីនេះរយៈពេលពីរបីខែដោយគ្មាននឿយហត់” ប្រសាសន៍លោក Hiroshi Uematsu នាយកប្រតិបត្តិនៃក្រុមហ៊ុន ភ្នំពេញ អេសអ៊ីហ្សិត ភីអិលស៊ី។ “នៅពេលចាប់ផ្តើមកម្មវិធីនេះពីរបីឆ្នាំដំបូង យើងមានទស្សនិកជនចូលរួមប្រមាណជា១ម៉ឺននាក់ប៉ុណ្ណោះ។ លើកនេះ យើងសង្ឃឹមថា ចំនួនទស្សនិកជនចូលរួមនឹងកើនឡើង៣ដង ហើយខ្ញុំគិតថា វាជាកម្មវិធីប្រគុំតន្ត្រីសម្រាប់សហគមន៍ធំជាងគេ ដែលមានតែមួយគត់នៅកម្ពុជា។ យើងពិតជាអរគុណសម្រាប់អ្នកទាំងអស់គ្នា ដែលបានធ្វើឱ្យកម្មវីធីដ៏គួរឱ្យសប្បាយរីករាយមួយនេះ ដំណើរការទៅបាន និងទន្ទឹងរង់ចាំរាត្រីដ៏អស្ចារ្យនេះ” ។

ការប្រកួតប្រជែងឆ្នាំនេះ មានកម្មករកម្មការិនីចូលរួមដាក់ពាក្យប្រមាណជា៨០នាក់ ហើយការជម្រុះលើកទី១ បានធ្វើឡើងនៅថ្ងៃទី១១ ខែមីនា ឆ្នាំ២០១៨ ដោយជ្រើសរើសបានបេក្ខជនដែលត្រូវបន្តទៅកាន់វគ្គបន្ទាប់ចំនួន៤០នាក់ ប្រុស២០នាក់ ស្រី២០នាក់។ ការជម្រុះលើកទី២ បានធ្វើឡើងនៅថ្ងៃទី១៨ ខែមីនា ដើម្បីសម្រាំងយកបេក្ខជនចំនួន១០នាក់ សម្រាប់ការប្រកួតវគ្គផ្តាច់ព្រ័តនៅលើឆាកនាថ្ងៃទី៣១ ខែមីនា៕

March 19, 2018

ទិន្នផលស្រូវមានកំណើនជាង2% នៅដើមឆ្នាំ2018

ក្រោមគោលនយោបាយជំរុញផលិតកម្មស្បៀងដែលគាំទ្រថវិកាពីរាជរដ្ឋាភិបាលបានធ្វើឱ្យទិន្នផលស្រូវនៅកម្ពុជានាចុងឆ្នាំ2017 និងដើមឆ្នាំ2018នេះ កើនឡើងប្រមាណជាង2% ធៀបនឹងឆ្នាំចាស់កន្លងផុតទៅ។

ឯកឧត្តមហ៊ាន វណ្ណហន ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានកសិកម្មបានឱ្យដឹងថា កាលពីឆ្នាំ2016កន្លងទៅ កំណើនវិស័យកសិកម្មទាំងមូលមានប្រមាណជិត 3% ហើយការរួមចំណែករបស់វិស័យកសិកម្មក្នុងសេដ្ឋកិច្ចជាតិមានចំនួន 26.30% ដែលក្នុងនោះអនុវិស័យដំណាំមានចំនួន14.60% នៃផលិតផលក្នុងស្រុកសរុប ឬស្មើនឹង62.39%នៃចំណែកវិស័យកសិកម្មទាំងមូលក្នុងសេដ្ឋកិច្ចជាតិ។

ឯកឧត្តមបន្តថា តាមការប៉ាន់ស្មានផលិតកម្មដំណាំកសិកម្មក្នុងឆ្នាំ2017 និងដើមឆ្នាំ2018 កន្លងទៅនេះឃើញថា ផ្ទៃដីដាំដុះស្រូវអាចសម្រេចបានចំនួនជាង3.18លានហិកតា មានកំណើន1.9% ទិន្នផលស្រូវអាចទទួលបាន 3.287តោន/ហិកតា មានកំណើន2.36% បរិមាណផលស្រូវទទួលបានជិត10.5លានតោន មានកំណើន4.52% និងអតិរេកស្បៀងគិតជាអង្ករមានចំនួន3.5លានតោន មានកំណើន 7% ធៀបឆ្នាំ2016 និង2017។

ក្រៅពីដំណាំស្រូវ កម្ពុជាមានផលិតកម្មដំណាំរួមផ្សំដែលមានសក្តានុពលផ្សេងៗទៀតដូចជាពោត ដំឡូងមី ដំឡូងជ្វា បន្លែ និងសណ្តែកបាយ កើនឡើងប្រមាណជា19.84%។ រីឯការនាំចេញផលិតផលកសិកម្មមាននិន្នាការកើនឡើងជាលំដាប់ ហើយមានសម្ទុះខ្លាំងក្នុងរយៈពេល4ឆ្នាំចុងក្រោយនេះ។ ជាក់ស្តែងការនាំចេញអង្ករជាផ្លូវការបានកើនឡើងពី205,717តោន នៅឆ្នាំ2012 ដល់635,679តោន នៅឆ្នាំ2017 គឺកើនឡើង17.25% ធៀបនឹងឆ្នាំ2016 ដែលមានចំនួន542,144តោន។ កំណើននៃការនាំចេញផលិតផលកសិកម្ម តាមរយៈការចេញវិញ្ញាបនបត្រភូតគាមអនាម័យបានកើនឡើងប្រមាណជា 9% ធៀបនឹងឆ្នាំ2016៕

March 19, 2018

Chelsea ទម្លាក់ Leicester ដើម្បីទៅជួប Southampton ក្នុងវគ្គ1/2នៃ FA Cup

ក្រុម Manchester United ត្រូវបានចាប់ឆ្នោតឱ្យជួបជាមួយនឹងក្រុម Tottenham Hotspurs ក្នុងការប្រកួតវគ្គពាក់កណ្តាលផ្តាច់ព្រ័ត្រនៃពាន FA Cup នៅរដូវកាលនេះ។ ក្នុងការប្រកួតមួយគូផ្សេងទៀតដែលនឹងត្រូវរៀបចំឡើងនៅចុងសប្តាហ៍នាថ្ងៃទី21 និងទី22 ខែមេសា ក្រុម Chelsea ដែលជាម្ចាស់ជើងឯករងកាលពីឆ្នាំមុន នឹងត្រូវជួបជាមួយនឹងក្រុម Southampton។

ក្រោយពីដណ្តើមបានជ័យជម្នះលើក្រុម Brighton ក្នុងការប្រកួតវគ្គ 8ក្រុមចុងក្រោយកាលពីថ្ងៃសៅរ៍ ក្រុមរបស់លោក Jose Mourinho នឹងត្រូវប៉ះជាមួយនឹងក្រុមរបស់លោក Mauricio Pochettino នាកីឡដ្ឋានបណ្តោះអាសន្នរបស់ក្រុម Spurs គឺWembley។

ក្រុម Spurs បានយកឈ្នះលើក្រុម Swansea ក្នុងលទ្ធផល 3-០ នៅថ្ងៃដដែលនោះ។ ការជួបគ្នារវាងក្រុមទាំង2កាលពីលើកមុន បានកើតឡើងកាលពីថ្ងៃទី31 ខែមករា នាកីឡដ្ឋាន Wembley ដែលនៅពេលនោះក្រុម Tottenham បានយកឈ្នះក្នុងលទ្ធផល 2-។

ស្របពេលជាមួយគ្នានេះ ក្រុម Southampton របស់លោក Mark Hughes បានផ្តួលក្រុម Wiganក្នុងលទ្ធផល 2-០ កាលពីថ្ងៃអាទិត្យ ក្រោយពីគ្រាប់បាល់បញ្ចូលទីពីសំណាក់កីឡាករ Cedric Soares និង Pierre-Emile Hojbjerg ដើម្បីឈានទៅប្រកួតនៅកីឡដ្ឋាន Wembley ក្នុងការប្រកួតជាលើកទី1 របស់គ្រូបង្វឹកវែលស៍រូបនេះ ក្នុងនាមជាគ្រូបង្វឹកចាប់តាំងពីចូលកាន់តំណែង បន្ទាប់ពីលោក Mauricio Pellegrino ត្រូវបានបណ្តេញចេញ។

ក្រុម Chelsea ដណ្តើមបានជ័យជម្នះក្នុងការប្រកួតវគ្គ 8ក្រុមចុងក្រោយរបស់ពួកគេ ក្នុងលទ្ធផល 2-1 នៅលើទឹកដីក្រុម Leicester កាលពីថ្ងៃអាទិត្យ ក្រោយពីនាទីបន្ថែម 15នាទី 2ដង ដោយ Pedro រកបានគ្រាប់បាល់ឈ្នះនៅនាទីទី105 បន្ទាប់ពីខ្សែប្រយុទ្ធ Jamie Vardy បានរកគ្រាប់បាល់តាមស្មើគ្រាប់បាល់បើកឆាករបស់ Alvaro Morata៕

ប្រភពពី៖ The Guardian

March 19, 2018

Messi បង្ហាញថ្វីជើងម្តងទៀត ខណៈ Ronaldo រកបាន 4គ្រាប់សម្រាប់ Real

ការបង្ហាញពីទម្រង់លេងយ៉ាងល្អឥតខ្ចោះក្នុងតង់ទី1 បានផ្តល់ការខកចិត្តដល់ក្រុម Athletic Bilbao ខណៈដែលការមិនស្គាល់ចាញ់របស់ក្រុម Barcelona ក្នុងយុទ្ធនាការ La Ligaនៅរដូវកាលនេះ បានឈានដល់ 29ប្រកួត នៅមុនពេលឈប់សម្រាកសម្រាប់ការប្រកួតអន្តរជាតិ។

គ្រាប់បាល់ស៊ុតបញ្ចូលទីពីសំណាក់កីឡាករ PacoAlcacer និង Lionel Messi ក្នុងរយៈពេល 45នាទីដំបូង បានជួយឱ្យក្រុម Barcaដណ្តើមបានជ័យជម្នះក្នុងលទ្ធផល 2-០ នៅពេលប្រកួតជាមួយនឹងអតីតក្រុមរបស់លោក Ernesto Valverde។ ស្របពេលដែល Luis Suarez suspended និង Sergio Busquets មានបញ្ហារបួស កីឡាករ Alcacer បានចូលលេងនៅនាទីទី8 ហើយ Messi បានបំពេញជ័យជម្នះរបស់ក្រុមនៅនាទីទី30 ក្នុងតង់ទី1។

ទាក់ទងនឹង Messi ដែលជាអ្នករកគ្រាប់បាល់បានច្រើនជាងគេក្នុងក្របខ័ណ្ឌអេស្ប៉ាញ La Liga នៅរដូវកាលនេះតាមរយៈការរកបាន 25គ្រាប់នោះ លោក Valverde គ្រូបង្វឹករបស់ Barcelona បានឱ្យដឹងថា៖ «រាល់ថ្ងៃ រូបគេបានរកឃើញអ្វីថ្មីៗ និងអ្វីៗដែលលំបាកជានិច្ច ហើយរូបគេដឹងយ៉ាងច្បាស់ពីអ្វីដែលរូបគេត្រូវធ្វើ និងអ្វីដែលក្រុមត្រូវការពីរូបគេ»។គ្រូបង្វឹករូបនេះបានបន្ថែមទៀតថា៖ «ភាគច្រើន វាហាក់បង្ហាញថា គ្រូបង្វឹកត្រូវតែពន្យល់ដល់កីឡាករ ប៉ុន្តែអ្វីដែលគ្រូបង្វឹកបានធ្វើនោះគឺការរៀនរួមជាមួយនឹងក្រុម។ យើងសង្ឃឹមថា យើងអាចរក្សាការរៀនសូត្រជាមួយគ្នាបាន»។

ស្របពេលជាមួយគ្នានេះ ខ្សែប្រយុទ្ធ Cristiano Ronaldo បានស៊ុតបាល់បញ្ចូលទី 4គ្រាប់ ខណៈដែលក្រុម Real Madrid បានផ្តួលក្រុម Girona ក្នុងលទ្ធផល 6-3 ដើម្បីឡើងទៅឈរលេខ3 បើទោះបីនៅតែដេញតាមពីក្រោយ Barcelona 15ពិន្ទុក៏ដោយ៕

ប្រភពពី៖ Sky Sports

March 19, 2018

6 ចំណុចនៃគុណប្រយោន៍ទឹកកក ក្នុងការរក្សាសម្រស់

អ្នកប្រហែលជាធ្លាប់ដឹងហើយថា ទឹកកក មានគុណប្រយោជន៍ជាច្រើនរួមមានដូចជា ក្លាសេបន្លែ សាច់ និងគ្រឿងទេស ជួយបង្កើតរសជាតិរបស់ភេសជ្ជៈជាដើម។ អ្នកខ្លះទៀតបានយកទឹកកកទៅស្អំពោះ ស្អំដៃជើង ដើម្បីជួយរំលាយគ្រាប់ឈាមកកបានផងដែរ។

ក្រៅពីនេះតើអ្នកមានធ្លាប់ប្រើដុំទឹកកកដាក់នៅលើផ្ទៃមុខរបស់អ្នកដែរឬទេ? ប្រសិនបើអ្នកឆ្ងល់ថា ហេតុអី្វចាំបាច់ធ្វើដូចនេះនោះ អ្នកត្រូវតែធ្វើការស្វែងយល់នូវអត្ថប្រយោជន៍របស់ដុំទឹកកកចំពោះសម្រស់ហើយ ព្រោះដុំទឹកកកអាចប្រើសម្រាប់ជួយដល់ការលើកសម្រស់បានជាច្រើនយ៉ាង។ ពេលនេះ ទស្សនាវដ្តី ឡារ៉ែន សូមជម្រាបជូនពីការថែរក្សាសម្រស់ដោយប្រើដុំ ទឹកកកដូចខាងក្រោមនេះ។

1/ សម្រួលលំហូវិលនៃចរន្ដឈាមរត់

ប្រសិនបើអ្នកយកដុំទឹកកកមកត្រដុសនៅលើផ្ទៃមុខ នោះវានឹងអាចបង្កើនដល់ចរន្តឈាមរត់របស់អ្នកឱ្យដំណើរការល្អ។ ជាលទ្ធផលនោះ គឺវាមានប្រសិទ្ធភាពក្នុងការបង្ការដល់សញ្ញានៃភាពចាស់មុនវ័យ។ អ្នកអាចយកដុំទឹកកកមកជូត និងត្រដុសថ្នមៗនៅលើផ្ទៃមុខរបស់អ្នកក្នុងយៈពេល1នាទី នោះវានឹងធ្វើឱ្យផ្ទៃ មុខរបស់អ្នកភ្លឺថ្លាតាមបែបធម្មជាតិជាមិនខានឡើយ។ អ្នកអាចធ្វើដូចនេះឱ្យបាន2ដងក្នុងមួយសប្តាហ៍។

2/ បំបាត់មុននៅលើផ្ទៃមុខ

ការយកដុំទឹកកកមកត្រដុសជូតថ្នមៗនៅលើផ្ទៃមុខនៃតំបន់ដែលត្រូវបានរងគ្រោះដោយសារការកើតមុន គឺវាអាចជួយកាត់បន្ថយបាននូវស្ថានភាពអាក្រក់របស់មុន។ អ្នកគួរអនុវត្តតាមវិធីនេះឱ្យបានជាបន្តបន្ទាប់ទើបអាចផ្តល់នូវផលិតផលដ៏ល្អដល់ផ្ទៃមុខរបស់អ្នក។ ចូរយកដុំទឹកកកមកត្រដុសនៅលើផ្ទៃមុខរបស់អ្នកឱ្យបាន1 ឬ2នាទី។ ប្រសិនបើនៅលើផ្ទៃមុខរបស់អ្នកត្រង់កន្លែងណាដែលហាក់មានសភាពស្ពឹក នោះអ្នកត្រូវសម្រាក1នាទីសិន រួចសឹមចាប់ផ្តើមធ្វើវាម្តងទៀត។

ការធ្វើបែបនេះ គឺអាចជួយកម្ចាត់មុនក្នុងកម្រិតស្រាលបាន ដោយប្រើពេលត្រឹមតែរយៈពេល2ថ្ងៃប៉ុណ្ណោះ ប៉ុន្តែអ្នកត្រូវប្រាកដចិត្តថា ស្បែករបស់អ្នក គឺអាចទទួលយកនូវភាពត្រជាក់បែបនេះបាន មុនពេលដែលអ្នកសម្រេចជ្រើសរើសអនុវត្តតាមវិធីនេះ ចៀសវាងមានបញ្ហាចំពោះស្បែកមុខរបស់អ្នក។

3/ ព្យាបាលការរលាកដោយសារកម្ដៅថ្ងៃ

ដុំទឹកកកអាចជួយសម្រាលដល់ស្ថានភាពនៃការរលាកនឹងកម្ដៅថ្ងៃ។ ដាក់ដុំទឹកកក2 ឬ3ដុំនៅក្នុងក្រណាត់ និងយកវាមកជូតនៅតំបន់ដែលកំពុងមានបញ្ហា ហើយសូមធ្វើបែបនេះឱ្យបាន 2ទៅ 3ដង។ វាអាចជួយសម្រាលដល់ការរមាស់ដែលបណ្តាលមកពីស្ថានភាពរលាកដោយកម្តៅថ្ងៃ។

4/ លុបលាងជាតិកង្វក់នៅលើស្បែកមុខ

អ្នកមិនចាំបាច់មានការភ្ញាក់ផ្អើលនោះទេ នៅពេលអ្នកបានឮដូចនេះ។ ដុំទឹកកក ប្រសិនបើត្រូវបានគេប្រើ វាមកត្រដុសនៅលើផ្ទៃមុខ មុនពេលអ្នកចាប់ផ្តើមលាបគ្រឿងសម្អាង គឺអាចជួយឱ្យគ្រឿងសម្អាងជាប់បានយូរ។

5/ ព្យាបាលការរលាក និងហើមភ្នែក

តើអ្នកធ្លាប់រងគ្រោះពីស្ថានភាពនៃអាការហើមប៉ោងនៅលើត្របកភ្នែក ឬរលាក និងមានសរសៃក្រហមនៅក្នុងភ្នែកដែរឬទេ? ដាក់ដុំទឹកកកមួយចំនួននៅក្នុងក្រណាត់ទន់មួយ រួចដាក់វានៅក្រោមភ្នែករបស់អ្នក។ វិធីនេះគឺអាចជួយសម្រាលនូវភាពហើមប៉ោងបាន។ ដុំទឹកកក ក៏អាចជួយសម្រាលដល់ភាពនឿយហត់របស់គ្រាប់ភ្នែក ហើយវាក៏ត្រូវបានគេប្រើសម្រាប់បញ្ហារោគសញ្ញានៃការស្ងួតគ្រាប់ភ្នែកបានផងដែរ។

6/ ធ្វើម៉ាសបិទមុខ

តើអ្នកមានធ្លាប់ប្រើម៉ាសកកត្រជាក់បិតមុខដែរឬទេ? ចូរលាយទឹកត្រសក់ និងទឹកផ្កាកូលាប។ បន្ទាប់មកដាក់វាក្លាសេឱ្យកក រួចយកវាចេញមកក្រៅ និងដាក់វាស្អំនៅលើផ្ទៃមុខរបស់អ្នក។ ម៉ាសកកត្រជាក់នេះ អាចជួយកាត់បន្ថយនូវស្នាមជាំ និងស្នាមជ្រាវ-ជ្រួញនៅលើស្បែកមុខរបស់អ្នកបាន។ ហើយវាក៏អាចជួយធ្វើឱ្យស្បែកមុខរបស់អ្នកស្រស់ថ្លាជាងមុនតាមបែបធម្មជាតិដែរ៕

March 19, 2018

ចង់បានស្បែកស តឹងណែនល្អត្រូវចំណាយពេលបន្តិច!

នាសម័យបច្ចុប្បន្ន ចង់ឱ្យស្បែកសស្អាតតឹងណែនមិនពិបាកនោះទេ ព្រោះថាមានផលិតផលថែរក្សាសម្រស់ដែលមានគុណភាពល្អច្រើនណាស់ ដែលតម្រៀបគ្នាចាំឱ្យអ្នកប្រើប្រាស់ជ្រើសរើសទៅតាមប្រភេទស្បែករបស់ខ្លួន។ ដោយសារតែចំណូលចិត្តរបស់មនុស្សយើងមិនដូចគ្នា ហេតុនេះហើយបានជាវិធីនៃការថែរក្សា និងផ្តល់នូវភាពស្រស់ស្អាតឱ្យខ្លួនឯងមានភាពខុសប្លែកពីគ្នា។

សម្រាប់អ្នកដែលមិនចង់ចំណាយប្រាក់ច្រើនទៅលើការទិញផលិតផល ឬបារម្ភខ្លាចថា ផលិតផលដែលអ្នកប្រើអាចមិនត្រូវជាមួយប្រភេទស្បែករបស់ខ្លួននោះ ទើបធ្វើឱ្យពួកគេសុខចិត្តងាកមកថែរក្សាសម្រស់របស់ពួកគេតាមបែបសាមញ្ញវិញ បើទោះជាពួកគេបានដឹងយ៉ាងច្បាស់ហើយថា ការថែរក្សាស្បែកដោយវិធីនេះ គឺត្រូវចំណាយពេលយូរជាងការប្រើផលិតផលក៏ដោយ។ ចំពោះអ្នកដែលចាប់អារម្មណ៍ជាមួយនឹងវិធីថែរក្សាសម្រស់តាមបែបធម្មជាតិនោះ សូមតាមដានជាមួយនឹងគន្លឹះសំខាន់ៗដូចខាងក្រោម។

ស្បែកតឹងណែន

សម្រាប់អ្នកដែលនិយមចង់រក្សាស្បែកឱ្យមានភាពតឹងណែនតាមបែបធម្មជាតិ គេនិយមប្រើសារធាតុផ្សំពីធម្មជាតិមួយចំនួនដូចជា ផ្នែកពណ៌សនៃស៊ុត លាយជាមួយនឹងទឹកក្រូចឆ្មាររួចលាបនៅលើផ្ទៃមុខ លុះដល់ពេលស្ងួត គេប្រើទឹកក្តៅតិចៗលាងសម្អាតល្បាយនោះចេញរួចសម្អាតម្តងទៀតជាមួយទឹកត្រជាក់។ វិធីមួយទៀតដែលអាចជួយឱ្យស្បែកតឹងណែនល្អនោះគឺ ម៉ាសត្រសក់ និងផ្លែប៊័រ។ សារធាតុផ្សំដែលគេយកមកប្រើមានដូចជា ស៊ុតស ម្សៅទឹកដោះគោ ផ្លែប៊័រ និងផ្លែត្រសក់។

យកគ្រឿងផ្សំទាំងអស់ដាក់ចូលគ្នាកិនឱ្យម៉ដ្ឋរួចយកទៅទុកក្នុងទូទឹកកកឱ្យត្រជាក់រយៈពេលប្រមាណជា1ម៉ោង បន្ទាប់មកសឹមលាបល្បាយនោះនៅលើផ្ទៃមុខ និងក។ រួចទុកចោល30នាទី ហើយសឹមលាងវាចេញដោយទឹកក្តៅឧណ្ហៗ បន្ទាប់មកសម្អាតវាឱ្យស្អាតម្តងទៀតជាមួយទឹកត្រជាក់។

ស្បែកសស្អាត

ដោយសារតែក្រូចឆ្មារត្រូវបានប្រើប្រាស់ជាច្រើនឆ្នាំមកហើយក្នុងការជួយឱ្យស្បែក-សភ្លឺថ្លា ព្រោះវាមានជាតិអាស៊ីតដែលអាចជួយប្រែពណ៌ស្បែកពីខ្មៅមកជាសបាន។ ប៉ុន្តែដោយសារថាក្រូចឆ្មារតែម្យ៉ាងអាចបណ្តាលឱ្យស្បែករមាស់ ហេតុនេះហើយបានជាគេត្រូវការជំនួយពីទឹក ដើម្បីកាត់បន្ថយភាពកាត់របស់វា។ ទឹក និងទឹកក្រូចឆ្មារត្រូវប្រើក្នុងល្បាយស្មើគ្នា រួចយកអេប៉ុងទន់ៗមកជ្រលក់ក្នុងទឹកល្បាយនោះ ហើយលាបនៅលើស្បែករបស់អ្នក។

ទុកចោល15នាទី រួចសឹមលាងសម្អាតចេញដោយទឹកក្តៅឧណ្ហ។ ចំណែកអ្នកខ្លះ បានជ្រើសរើសម៉ាសប៉េងប៉ោះ ព្រោះគេជឿថាវាមានប្រសិទ្ធភាពក្នុងការបន្ថែមភាពសស្អាតដល់ស្បែក និងជួយការពារស្បែកពីកាំរស្មីព្រះអាទិត្យផងដែរ។ មិនមានអ្វីច្រើននោះទេ គេគ្រាន់តែយកប៉េងប៉ោះទុំកិនលាយជាមួយម្សៅ Baking Soda ទឹកឃ្មុំ រួចលាប និងត្រដុសវាថ្នមៗនៅលើផ្ទៃមុខ និងនៅបរិវេណករបស់អ្នកប្រហែល5នាទី រួចលាងសម្អាតចេញជាការស្រេច។

បើទោះជាមនុស្សមួយភាគនិយមថែរក្សាស្បែកតាមបែបធម្មជាតិក៏ដោយ ប៉ុន្តែពួកគេក៏មិនដែលបោះបង់ចោលផលិតផលថែរក្សាស្បែកទាំងស្រុងនោះដែរ។ ឡេការពារស្បែកពីកម្តៅថ្ងៃ និងក្រែមបន្ថែមសំណើមជាដើម នៅតែដើរតួនាទីយ៉ាងសំខាន់ក្នុងការថែរក្សាសម្រស់ស្បែករបស់ពួកគេ។ ក្រៅពីនេះពួកគេក៏នៅតែរក្សាទម្លាប់ល្អៗមួយចំនួនឱ្យបានយ៉ាងខ្ជាប់ខ្ជួនដូចជា ទទួលទានទឹក បន្លែឆៅ ផ្លែឈើស្រស់ហាត់ប្រាណ ហាត់យ៉ូហ្គា រក្សាទម្ងន់ ម៉ាស្សា ចំហុយស្បែក ការពារស្បែកពីការបំផ្លាញផ្សេងៗជាប់ជានិច្ច ដើម្បីឱ្យស្បែកនៅតែមានសភាពសស្អាតរលោងភ្លឺថ្លា៕

March 19, 2018

ឈ្នះរង្វាន់ធំ ឡេបថប់ Huawei Matebook X តម្លៃ 1568USD ដោយគ្រាន់តែជាវ ស្មាតហ្វូន Huawei Nova 2i តម្លៃ 329USD

ភ្នំពេញ៖ ក្រុមហ៊ុន ស្មាតហ្វូន ឈានមុខ លំដាប់ពិភពលោក Huawei ប្រចាំកម្ពុជា ប្រកាសផ្តល់រង្វាន់ធំ “ឡេបថប់ Huawei MatebookX សរុប 4 គ្រឿង និងនាឡិការ Huawei Band 0 សរុប 240 គ្រឿ ដែលមួយសប្តាហ៍ៗ អតិថិជន នឹងអាចឈ្នះឡេបថប់ Huawei Matebook X ចំនួន 1 គ្រឿង តម្លៃ 1568USD និងនាឡិការ Huawei Band 0 ចំនួន 60 គ្រឿង” រាល់ការជាវស្មាតហ្វូនស៊េរីថ្មី Huawei nova 2i ចាប់ពីពេលនេះតទៅ។

លោក អែម យុទ្ធូ ប្រធានផ្នែកទីផ្សារជាន់ខ្ពស់ Huawei ប្រចាំកម្ពុជាបានឲ្យដឹងថា អតិថិជន មានឱកាស ឈ្នះមហារង្វាន់ជាទីគាប់ចិត្ត ដោយគ្រាន់តែអតិថិជនទិញស្មាតហ្វូន Huawei Nova2i ចាប់ពីថ្ងៃប្រកាសប្រ៉ូម៉ូសិននេះតែប៉ុណ្ណោះ លោក អែម យុទ្ធូ បន្ថែមថា “ការចាប់ឆ្នោតលើកទី 1 នៅថ្ងៃ 27 មីនា 2018 វេលាចន្លោះពីម៉ោង 4:30 ដល់ 5:30 ល្ងាច ដោយផ្សាយផ្ទាល់តាមផេកផ្លូវការ Huawei Mobile (KH)”

អតិថិជនដែលបានជាវស្មាតហ្វូន Huawei Nova 2i ចាប់ពីថ្ងៃផ្សាយដំណឹងតាម ផេកផ្លូវការ Huawei Mobile (KH) អាចចូលរួមផ្សងសំណាង កម្មវិធីចាប់ឆ្នោតរបស់ក្រុមហ៊ុន Huawei

“WOW WOW! Buy & Win ឈ្នះអស់ស្ទះ WOW WOW! ទិញ ឈ្នះ” បានដោយគ្រាន់តែអនុវត្តន៏តាម លក្ខខណ្ឌ និងការណែនាំខាងដូចខាងក្រោមនេះ៖

លក្ខខណ្ខ

1- Screen Shot IMEI រឺថតរូប Warranty Card ដែលមានបិត IMEI នៃទូរស័ព្ទ Huawei Nova2i របស់លោកអ្នកដែលទើបបានទិញ ហើយធ្វើការ Comment ជារូបភាពខាងក្រោមនេះ រឺ ផ្ញើសារជារូបភាព តាម Inbox របស់ Huawei Mobile (KH)

2- ការចាប់រង្វាន់នេះ ដោយផ្សាយផ្ទាល់(Live) តាម Huawei Mobile (KH) ធ្វើឡើងរៀងរាល់ 1 សប្តាហ៍ម្តង វេលាចន្លោះម៉ោង 4:30 ទៅ 5:30 ល្ងាច!

3- ការចូលរួមផ្សងសំណាងឈ្នះរង្វាន់នេះ បានតែអតិថិជនដែលបានទិញស្មាតហ្វូន Huawei Nova 2i ចាប់ពីថ្ងៃប្រកាសនេះតែប៉ុណ្ណោះ

4- ក្រុមហ៊ុនរក្សាសិទ្ធិក្នុងការពិនិត្យលេខ IMEIs ថាជាផលិតផលផ្លូវការ រឺមិនផ្លូវការ រឺអនុវត្តសមស្របតាម រឺមិនស្របតាមលក្ខខណ្ឌ !!

5- កម្មវិធីនេះ ចាប់ផ្តើមពីថ្ងៃនេះ ដោយចាប់ឆ្នោត 4 ដង ក្នុង 1 សប្តាហ៍ម្តង រហូតដល់ចុងខែមេសា ! ប្រញ៉ាប់ឡើងរង្វាន់មានកំណត់ !!

កាលវិភាគការចាប់ឆ្នោតផ្សងសំណាង ដែលផ្សាយផ្ទាល់ Live តាម Huawei Mobile (KH) មានដូចខាងក្រោម:

(1) ការចាប់រង្វាន់ លើកទី 1 ថ្ងៃ 27 មីនា 2018 នៅក្រុមហ៊ុន Huawei ដោយផ្ទាល់

(2) ការចាប់រង្វាន់ លើកទី 2 ថ្ងៃ 03 មេសា 2018 នៅ Huawei Showroom ផ្សារទំនើបសូរិយាជាន់ទី 3

(3) ការចាប់រង្វាន់លើកទី 3 ថ្ងៃ 10 មេសា 2018 នៅ Huawei Showroom ផ្សារទំនើបសុវណ្ណាជាន់ទី 4

(4) ការចាប់ឆ្នោត លើកទី 4 ថ្ងៃ 24 មេសា 2018 នៅ ក្រុមហ៊ុន Huawei ដោយផ្ទាល់

** IMEI ដែលមានសិទ្ធិចូលរួមក្នុងការចាប់ឆ្នោតផ្សងសំណាង គឺបានតែ IMEI ពីផលិតផលនាំចលូផ្លូវការដែលមានត្រាក្រុមហ៊ុនលើប្រអប់ និងមានបណ្ណ័ធានាត្រឹមត្រូវ ប៉ុណ្ណោះ

** រយៈពេលផុតកំណត់ទទួល IMEIs គឺ 1 ថ្ងៃ មុនថ្ងៃចាប់ឆ្នោត នៃសប្តាហ៍នីមួយៗ

** អតិថិជនមានសិទ្ធិឈ្នះរង្វាន់ច្រើនដង ផ្ញើ IMEI កាន់តែច្រើន មានឱកាសឈ្នះរង្វាន់កាន់តែច្រើន

** IMEI ដែលផ្ញើមកហើយមិនទាន់ឈ្នះរង្វាន់ក្នុងការចាប់ឆ្នោតលើកទី 1 ក៍មានឱកាសឈ្នះរង្វាន់ក្នុងការចាប់ឆ្នោតផ្សងសំណាងសប្តាហ៍ក្រោយៗទៀត។

ព័ត៌មានអំពី Huawei ទទួលបាន ចំណាត់ថ្នាក់លេខរៀងទី២៥ ជាម៉ាកមានតម្លៃបំផុតលំដាប់ពិភពប្រចាំឆ្នាំ ២០១៨ (Most Valuable Global Brands 2018)

សម្រាប់ព័ត៌មានបន្ថែម សូមចូលទៅកាន់៖ https://consumer.huawei.com
សម្រាប់ព័ត៌មានថ្មីៗពី Huawei នៅកម្ពុជាសូមតាមដានជាមួយពួកយើងតាមរយៈ៖
Youtube link: www.youtube.com/c/HuaweiMobileKH អ្នកតំណាង៖ ង៉ោ ម៉េងហ៊ួង
Instagram link: www.instagram.com/huaweimobilekh លេខទូរស័ព្ទ៖ 010 44 99 06 / 092 47 69 75 Facebook: www.facebook.com/huaweimobilekh អ៊ីមែល៖ [email protected]

March 19, 2018

Author: វល័ក្ខ