វល័ក្ខ - La Reine Media

ដល់ក ស្មាតហ្វូនស៊េរីថ្មី Huawei nova 3e (P20 lite) តម្លៃ $329 Huawei Y9 តម្លៃ $249 និង Huawei Y7 Pro 2018 តម្លៃ $189

ភ្នំពេញ៖ ថ្ងៃទី ២៧ មិនា ២០១៨ ក្នុងព្រឹត្តិការណ៏ទស្សនា ការផ្សាយផ្ទាល់ពីទីក្រុងបារីស “សម្ភោធ និង ដាក់ឲ្យតេស្តដំបូងគេនូវ ស្មាតហ្វូនស៊េរីថ្មី Huawei P20, P20 Pro និង Nova 3e (P20 lite)” នៅមជ្ឈមណ្ឌលពិព័រណ៌អន្តរជាតិ CSIC (Customer Solution Innovation & Integration Experience Center) អគារ Exchange Square ថ្នាក់ដឹកនាំក្រុមហ៊ុន Huawei ប្រចាំកម្ពុជា បើកកម្ម៉ង់ទុកមុនស្មាតហ្វូនស៊េរីថ្មី ៣ម៉ូដែលព្រមគ្នា។

“អតិថិជន ដែលកក់ទុកមុនភ្លាម Huawei nova 3e (P20 lite) តម្លៃ $329 ថែមកាសធំ ក្រវិលទម្រទូរសព្ទ័ ដង Selfie Stick ស៊ីមស្មាត និងកញ្ចប់ធំម្ម៉ង 12 សប្តាហ៍, Huawei Y9 2018 តម្លៃ $249 ថែមកាសធំ ក្រវិលទម្រទូរសព្ទ័, ដបទឹក ស៊ីមស្មាត និងកញ្ចប់ធំហ្មង 12 សប្តាហ៍ និង Huawei Y7 Pro តម្លៃ $189 ថែម Bluetooth Speaker ស៊ីមស្មាត និងកញ្ចប់ធំហ្មង 8 សប្តាហ៍” លោក Jeff Yang នាយកចែកចាយស្មាតហ្វូនប្រចាំប្រទេសកម្ពុជា ថ្លែងក្នុងព្រឹត្តិការណ៏ ទស្សនាការផ្សាយផ្ទាល់ពីទីក្រុងបារីស “សម្ភោធ និង ដាក់ឲ្យតេស្តដំបូងគេនូវ ស្មាតហ្វូនស៊េរីថ្មី Huawei P20, P20 Pro និង Nova 3e (P20 lite)”។

អតិថិជន អាចកម្ម៉ង់ទុកមុន Huawei nova 3e (P20 lite) ($329), Huawei Y9 2018 ($ 249)

និង Huawei Y7 Pro 2018 ($189) ដោយគ្រាន់តែ អញ្ជើញទៅកាន់ហាងលក់ទូរសព្ទនានាជាពិសេសហាងដែលមានបុគ្គលិកលក់រឺ ស្លាកយីហោ Huawei ទូទាំងប្រទេស ដែលនៅជិតលោកអ្នកជាងគេ។

Huawei nova 3e រឺ P20 lite ជាកំពូលស្មាតហ្វូនស៊េរីថ្មីឆ្នាំ ២០១៨ មានរូបរាងស្រស់ស្អាត ទាន់សម័យ ខ្យូតកប់ មានវិមាត្រ 148.6 x 71.2 x 7.4mm និងទម្ងន់ 145 ក្រាម ផ្នែកខាងក្រោយ ប្រើកញ្ចក់ 2.5D ជាមួយនឹងបន្ទះឈីប Kirin 659 ប្រើប្រព័ន្ធប្រតិបត្តិការ Android 8 ជាមួយនឹង EMUI 8 មានរ៉េមទំហំ 4GB និងម៉េមូរីក្នុងម៉ាស៊ីនទំហំ 64GB។ នៅផ្នែកខាងមុខរបស់ស្មាតហ្វូននេះ គឺប្រើប្រាស់អេក្រង់ទំហំ 5.84 អ៊ីង កម្រិតភាពច្បាស់ 2280×1080 ភិចសែល FHD+។ Huawei nova 3e បំពាក់ កាមេរ៉ាភ្លោះក្រោយ ទំហំ 16MP+2MP ទ្រទ្រង់នូវមុខងារ Bokeh (ព្រាលផ្ទៃខាងក្រោយ) និង កាមេរ៉ាមុខទំហំ 16 MP និង Aperture F2.0 មានមុខងារ Face Unlock, Game Mode, Voice Assistant ប្រើប្រាស់ថាមពលថ្មទំហំ 3000mAh ភ្ជាប់ជាមួយនឹងបច្ចេកវិទ្យា fast charging។

ស្មាតហ្វូន Huawei Y9 2018 គឺជាកំពូលស្មាតហ្វូនដែលផលិតតាមស្ដង់ដា និងស្របតាមតម្រូវការអ្នកប្រើប្រាស់ ជាពិសេសគុណភាពនៃការផលិត តួរខ្លួនស្រោបដោយលោហៈ អេក្រង់លាតដែលមានទំហំ 5.93” កម្រិត Aspect Ratio 18:9 និងកម្រិតបង្ហាញ Full HD+ FullView Display បំពាក់កាមេរ៉ាភ្លោះ ខាងមុខទំហំ 16MP+2MP និងខាងក្រោយទំហំ 13MP+2MP មានកម្លាំងថ្មធំ 4000mAh ប្រើបន្ទះឈីប Kirin 659 ប្រព័ន្ធAndroid 8.0 (Oreo)ចេញពីប្រអប់ស្រាប់ ជាមួយនឹង RAM 3GB និង ROM 32GB និងបន្ថែមមកនូវសេនស័រ ស្កេនម្រាមដៃលឿន ព្រមទាំងមុខងារដោះសោរ ដោយប្រើទម្រង់មុខផងដែរ។ កាន់តែអែម Huawei Y9 2018 មានជើងទម្ររដាក់ស៊ីមបានពីរ និង Micro SD card ១ (256G) និង ច្ចេកវិទ្យា Screenshot ដោយប្រើម្រាមដៃបីអូសចុះក្រោម (Three Finger Screen Shoot) ថែមទៀតផង។

ចំណែកឯ Y7 Pro 2018 ក៏ឡូយដែរ វាមានរូបរាងស្រស់ស្អា បំពាក់អេក្រង់លាតទំហំ 5.99”ដែលមានកម្រិតបង្ហាញ HD+ FullView Display ប្រើន្ទះឈីប Snapdragon 450 មាន RAM 3GB និង ROM 32GB ថ្មទំហំ 3,000mAh ដំណើរការដោយ Android Oreo។ ម្យ៉ាងវិញទៀត ក៏មានកាមេរ៉ាភ្លោះ នៅខាងក្រោយផងដែរ មានទំហំ 13MP+2MP រីឯកាមេរ៉ាមុខទំហំ 8MP ជាមួយនឹង Selfie Tonning Flash, AR lens រួមទាំងកម្មវិធី Multiple Photo Taking Mode។ ក្រៅពីនេះ Y7 Pro 2018 បំពាក់មុខងារដោះសោរ ដោយប្រើទម្រង់មុខ រហ័សទាន់ចិត្ត។

កាន់តែអែម Huawei Y9 2018 មានជើងទម្ររដាក់ស៊ីមបានពីរ និង Micro SD card ១ (256G) និង ច្ចេកវិទ្យា Screenshot ដោយប្រើម្រាមដៃបីអូសចុះក្រោម (Three Finger Screen Shoot) ថែមទៀតផង។

ប្រញាប់រួសរាន់ឡើង កក់ទុកមុន ស្មាតហ្វូន Huawei nova 3e ($329), Huawei Y9 2018 ($249), Huawei Y7 Pro 2018 ($189) ទាន់មានតម្លៃពិសេស និងកាដូថែមសន្ធឹកសន្ធាប់!

ព័ត៌មានថ្មីអំពី Huawei P20

P20 បំពាក់នូវកាមេរ៉ា Selfie ទំហំធំបំផុតពុំធ្លាប់មាន គឺ 24 MP ជាមួយនឹង 3D Portrait Lighting Effect P20 មានអេក្រង់ 5.8 អ៊ីញកម្រិត 2240 X 1080 ភីកសែល ដោយប្រើឈីប Kirin 970 រត់នៅល្បឿន 2,36GHz ដោយប្រើឈីប Kirin 970 រត់នៅល្បឿន 2,36GHz ដោយមាន RAM 4GB និង ROM 128GB ប៉ុន្តែគ្មានរន្ធបន្ថែម microSD។ ថាមពលថ្ម 3400mAh គាំទ្របច្ចេកវិទ្យាសាកថ្មរហ័ស SuperCharge ដំណើរការលើ Android 8។

March 29, 2018

កញ្ញា យុន លីនដា ចែករំលែកគន្លឹះដើម្បីជាប់អាហារូបករណ៍ទៅសិក្សានៅប្រទេសជប៉ុន

ទទួលបានអាហារូបករណ៍ទៅសិក្សានៅក្រៅប្រទេស គឺជាក្តីស្រមៃមួយរបស់យុវជនខ្មែរជាច្រើនដែលចង់បន្តការសិក្សានៅក្នុងប្រទេសអភិវឌ្ឍន៍នានាដើម្បីទទួលយកចំណេះដឹងប្លែកៗ មកសង្គមកម្ពុជា។ នៅក្នុងដំណើរឆ្ពោះទៅរកការសម្រេចក្តីស្រមៃនោះ មានបុគ្គលខ្លះត្រូវចំណាយពេលវេលាច្រើនឆ្នាំ ខណៈបុគ្គលមួយចំនួនទៀតចំណាយពេលត្រឹមតែមួយឆ្នាំ ឬតិចជាងនេះដើម្បីសម្រេចក្តីស្រមៃទៅសិក្សានៅបរទេស។

ដោយមើលឃើញពីបញ្ហាទាំងអស់នេះអ្នកយកព័ត៌មានផ្នែកអប់រំនៃកាសែត ឡារ៉ែន ពាណិជ្ជ បានជួបសម្ភាសដោយផ្ទាល់ជាមួយនឹងកញ្ញា យុន លីនដាជានិស្សិតថ្នាក់អនុបណ្ឌិតដែលសិក្សាជំនាញវិទ្យាសាស្ត្រអប់រំនៃសាកលវិទ្យាល័យ Tsukuba នៅប្រទេសជប៉ុន ដើម្បីចែករំលែកបទពិសោធជោគជ័យក្នុងការដាក់ពាក្យទៅសិក្សានៅប្រទេសជប៉ុន។

តើហេតុអ្វីបានជាកញ្ញាលីនដា សម្រេចចិត្តទៅសិក្សានៅប្រទេសជប៉ុន?

បើនិយាយពីគោលដៅទៅសិក្សានៅប្រទេសជប៉ុន ដំបូងឡើយខ្ញុំសូមបង្ហាញបន្តិចពីមូលហេតុដែលខ្ញុំចាប់ផ្តើមចូលចិត្តប្រទេសជប៉ុនជាមុនសិន។

កាលពីនាងខ្ញុំនៅក្មេង មានថ្ងៃមួយខ្ញុំបានមើលទូរទស្សន៍ហើយឃើញពីការពិសោធនៅសាលារបស់ជប៉ុន ពេលនោះខ្ញុំចាប់អារម្មណ៍ខ្លាំង និងគិតថាប្រសិនបើបានរៀនក្នុងបរិយាកាសបែបនោះ ប្រាកដជាអាចធ្វើឱ្យខ្ញុំសប្បាយចិត្ត។ បន្ទាប់មក ខ្ញុំក៏ចាប់ផ្តើមចិញ្ចឹមចិត្តថានឹងទៅប្រទេសជប៉ុនឱ្យបាន។ បន្ទាប់មកទៀត ក៏ចាប់ផ្តើមព្យាយាមស្វែងយល់ពីប្រទេសជប៉ុន និងព្យាយាមចូលរួមកម្មវិធីជាច្រើនដែលពាក់ព័ន្ធនឹងប្រទេសជប៉ុន។

តើកញ្ញាបានត្រៀមខ្លួនអ្វីខ្លះដើម្បីសម្រេចក្តីស្រមៃទៅសិក្សានៅប្រទេសជប៉ុន?

ដូចបានជម្រាបខាងលើហើយថា ដោយសារតែខ្ញុំចង់ទៅប្រទេសជប៉ុន ខ្ញុំក៏ចាប់ផ្តើមស្វែងយល់ពីប្រទេសនេះឱ្យកាន់តែច្រើន បន្ទាប់មកខ្ញុំក៏ចាប់ផ្តើមដាក់ពាក្យប្រឡងអាហារូបករណ៍នៅវិទ្យាស្ថានភាសាបរទេស (IFL) នៅដេប៉ាតឺម៉ង់ភាសាជប៉ុនក្រោយពេលដែលខ្ញុំបានបញ្ចប់ការសិក្សានៅវិទ្យាល័យ។ នៅពេលនោះខ្ញុំត្រូវសិក្សា2មហាវិទ្យាល័យ គឺទី1 សិក្សាផ្នែកគណនេយ្យ តាមអ្វីដែលគ្រួសារចង់ឱ្យរៀន និងទី2 សិក្សាផ្នែកភាសាជប៉ុន ដែលជាក្តីស្រមៃ និងជំនាញដែលខ្ញុំស្រឡាញ់ពិតប្រាកដ។

ក្រោយមកទៀត ដោយសារតែនិស្ស័យ ឬចិត្តស្រឡាញ់ភាសាជប៉ុន ខ្ញុំអាចទទួលបានលទ្ធផលល្អគួរសមក្នុងការរៀននៅមហាវិទ្យាល័យ ហើយក៏ធ្លាប់ជាប់វគ្គផ្លាស់ប្តូរការសិក្សា (exchange program) នៅប្រទេសជប៉ុន នៅពេលដែលខ្ញុំរៀននៅឆ្នាំទី3 មុននឹងត្រឡប់មកកម្ពុជាវិញដើម្បីបន្តឆ្នាំទី4 និងបញ្ចប់ការសិក្សានៅថ្នាក់បរិញ្ញាបត្រ។ ក្រោយមកខ្ញុំក៏បានបង្រៀននៅដេប៉ាតឺម៉ង់ភាសាជប៉ុន រហូតរកឃើញថា ខ្លួនឯងស្រឡាញ់មុខវិជ្ជាអប់រំ មុនពេលដាក់ពាក្យទៅបន្តការសិក្សាថ្នាក់អនុបណ្ឌិតនៅប្រទេសជប៉ុននេះ។

តើដើម្បីជាប់ទៅសិក្សានៅប្រទេសជប៉ុន និស្សិតត្រូវឆ្លងកាត់ដំណាក់កាលណាខ្លះ? ហើយកញ្ញាមានគន្លឹះអ្វីខ្លះដើម្បីឆ្លងផុតដំណាក់កាលនីមួយ?

ដំណាក់កាលនៃការដាក់ពាក្យទៅសិក្សានៅប្រទេសជប៉ុន គឺត្រូវសរសេរពាក្យស្នើសុំ (Proposal)និងសម្ភាសពីស្ថានទូតជប៉ុន។ ការសរសេរ Proposal គឺចាំបាច់ត្រូវសរសេរជាភាសាអង់គ្លេស ឬភាសាជប៉ុន ដោយផ្តោតលើបញ្ហានានានៅក្នុងសង្គមដែលយើងចង់ដោះស្រាយតាមរយៈការយកចំណេះដឹងដែលសិក្សានៅប្រទេសជប៉ុន។ យើងត្រូវរកឱ្យឃើញនូវបញ្ហាប្រឈមដែលគ្រប់គ្នាតែងតែជួបប្រទះ ហើយមិនទាន់មានអ្នកណាដោះស្រាយបាន បន្ទាប់មកត្រូវបង្ហាញពីគោលជំហរដែលយើងចង់ដោះស្រាយក្រោយពេលបញ្ចប់ការសិក្សានៅប្រទេសជប៉ុន។

ម្យ៉ាងវិញទៀត នៅក្នុង Proposal ក៏ចាំបាច់ត្រូវបង្ហាញពីចំណុចខ្លាំង និងភាពអភិវឌ្ឍលឿនរបស់យើងដើម្បីបង្ហាញទៅគណៈកម្មការឱ្យឃើញថា យើងជាមនុស្សដែលអាចជ្រើសរើសទៅសិក្សាបន្តបាន ដើម្បីត្រឡប់មកចូលរួមអភិវឌ្ឍសង្គមនៅកម្ពុជាវិញបាន។

ចំណែកឯដំណាក់កាលសម្ភាសវិញ ក៏ត្រូវការត្រៀមច្រើនដែរ តែពេលខ្លះសូមកុំមានអារម្មណ៍ថា ភ័យខ្លាច ព្រោះថាសំណួរមួយចំនួនដែលគណៈកម្មការសួរមិនប្រាកដថាជាសំណួរលំបាកនោះទេ។ សំណួរខ្លះអាចសួរថា តើយើងអាចរស់នៅម្នាក់ឯងនៅជប៉ុនកើតទេ? ឬសំណួរមួយចំនួនទាក់ទងនឹងការដោះស្រាយបញ្ហារបស់យើងតែប៉ុណ្ណោះ។ តែក្នុងចំណោមសំណួរទាំងអស់នោះ ក៏អាចមានសំណួរជីកឫសជីកគល់ពី Proposal ដែលយើងបានសរសេរដែរ។

ដើម្បីងាយស្រួលក្នុងការទទួលបានគំនិតល្អបន្ថែមបេក្ខជនដែលដាក់ពាក្យទៅសិក្សានៅប្រទេសជប៉ុនទាំងអស់ គួរតែទៅសួរសិស្សច្បងដែលធ្លាប់ជាប់មុនៗ ឬស្រាវជ្រាវបន្ថែមពីមុខវិជ្ជាដែលយើងនឹងរៀននោះឱ្យបានល្អិតល្អន់ទើបជាការល្អ។

តើពេលទៅសិក្សានៅប្រទេសជប៉ុនដំបូងមានការលំបាកអ្វីខ្លះ?

ការទៅសិក្សានៅប្រទេសណាក៏ដោយ ដំបូងឡើយ គឺសុទ្ធតែឆ្លងកាត់ការលំបាកទាំងអស់ តែបើយើងចេះសម្របខ្លួនបានល្អ វានឹងប្រសើរឡើងវិញនៅក្នុងរយៈពេលប្រមាណជា 1ខែ ឬ 2ខែក្រោយ។ សម្រាប់ខ្ញុំ គឺខ្ញុំមានបញ្ហាខ្លះជាមួយនឹងអាកាសធាតុព្រោះខ្ញុំទៅចំខេត្តដែលត្រជាក់ខ្លាំង តែវាមិនសូវជាបញ្ហាធ្ងន់ធ្ងរពេកនោះទេ។

ចំណុចមួយផ្សេងទៀតដែលអាចនឹងជួបប្រទះគឺ របៀបរបបនៃការសិក្សាខុសគ្នាពីការសិក្សានៅប្រទេសយើង ហេតុនេះយើងត្រូវចំណាយពេលវេលាច្រើនក្នុងការតាមឱ្យទាន់របត់ទាំងអស់នោះ ស្របពេលជាមួយគ្នាដែលយើងត្រូវស្វែងរកមិត្តភ័ក្តិថ្មីៗដើម្បីជួយគ្នា។ គ្មានអ្នកណាម្នាក់អាចរស់នៅម្នាក់ឯងដោយគ្មានមិត្តភ័ក្តិបាននោះទេ ហើយជនជាតិជប៉ុនមិនសូវចូលចិត្តមករកយើងមុននោះទេ ហេតុនេះយើងត្រូវចូលទៅរកពួកគេ និងព្យាយាមស្និទ្ធស្នាលជាមួយគេមុន តែទោះជាយ៉ាងណាក្រោយពេលដែលមានមិត្តភ័ក្តិ និងពិភាក្សាជាមួយគ្រូៗច្រើនយើងនឹងអាចទទួលបានភាពកក់ក្តៅច្រើន រួមទាំងចំណេះដឹងជាច្រើនផ្សេងទៀត ទាំងការអប់រំជាក់ស្តែង និងទាំងរបៀបរបបនៃការរស់នៅក្នុងប្រទេសជប៉ុនថែមទៀតផង៕

March 28, 2018

កម្ពុជាជាប្រទេសមួយក្នុងចំណោម6 ក្នុងពិភពលោកត្រូវបានជ្រើសរើសដោយ UEFA និង HEINEKEN®

ភ្នំពេញ៖ កាលថ្ងៃទី ១៧ ខែមីនា ប្រទេសកម្ពុជាមានកិត្តិយសពិសេសក្នុងនាមជាប្រទេសមួយក្នុងចំណោម ៦ប្រទេសនៅក្នុងពិភពលោក ដែលនឹងរៀបចំធ្វើជាម្ចាស់ផ្ទះនៃកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ឆ្នាំនេះ ដែលនាំជូនដោយស្រាបៀរ Heineken®។

ក្រុមហ៊ុនស្រាបៀរ Heineken® ប្រចាំកម្ពុជាបានប្រកួតប្រជែងជាមួយបណ្តាប្រទេសជាង ១៩២ ដើម្បីដណ្តើមយកឱកាសធ្វើជាម្ចាស់ផ្ទះនៃកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League។ ដោយសារតែមានការគាំទ្រយ៉ាងច្រើនចំពោះកម្មវិធីប្រកួតក្របខ័ណ្ឌ UEFA Champions League និងដោយសារសេដ្ឋកិច្ចកំពុងអភិវឌ្ឍឆាប់រហ័សរបស់ប្រទេសកម្ពុជាក៏ដូចជាមានតំបន់ទេសភាពសម្រស់ធម្មជាតិដ៏ស្រស់ស្អាត ប្រទេសនេះត្រូវបានជាប់ជាប្រទេសបេក្ខភាពដ៏ស័ក្តិសមឥតខ្ចោះសម្រាប់កម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ឆ្នាំនេះ ដែលនាំជូនដោយស្រាបៀរ Heineken®។

ក្នុងប្រវត្តិសាស្ត្រដប់មួយឆ្នាំនៃកម្មវិធីដំណើរទេសចរណ៍នេះបានទៅដល់ ២៦ ប្រទេសនៅទូទាំងទ្វីបអាហ្វ្រិក អាស៊ី អាមេរិកខាងត្បូង និងអាមេរិកខាងជើង។ ឆ្នាំនេះ កម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ឆ្នាំ ២០១៨ នេះ ដែលនាំជូនដោយស្រាបៀរ Heineken® នឹងមកដល់ប្រទេសកម្ពុជាចាប់ពីថ្ងៃទី ២ ដល់ថ្ងៃទី ៤ ខែមេសា ឆ្នាំ ២០១៨ ខាងមុខនេះ។

កម្មវិធីដំណើរទេសចរណ៍រយៈពេលបីថ្ងៃត្រូវបានរៀបចំឡើងដោយស្រាបៀរ Heineken® ហើយកម្មវិធីនេះនឹងជំរុញផ្តល់ឲ្យអ្នកគាំទ្រទូទាំងពិភពលោកនូវឱកាសផ្ទាល់ក្នុងការចូលរួមទទួលបានភាពរំភើបរីករាយនៃការទស្សនាការប្រកួតនេះតាមរយៈយុទ្ធនាការរបស់ស្រាបៀរ Heineken® ដែលមានឈ្មោះថា “ចែករំលែកភាពរំភើបរីករាយ ចែករំលែកពានរង្វាន់”។

ដោយសារតែកម្មវិធីកីឡាបាល់ទាត់អន្តរជាតិមិនដែលធ្លាប់ធ្វើឡើងនៅក្នុងប្រទេសនេះពីមុនមក ស្រាបៀរ Heineken® មានកិត្តិយសណាស់ក្នុងការផ្តល់នូវឱកាសនេះជូនដល់អ្នកគាំទ្របាល់ទាត់កម្ពុជា និងកីឡាករកម្ពុជាដែលមានទេពកោសល្យ ដែលពួកគេមិនមានឱកាសអាចទទួលបាននូវបទពិសោធន៍រំភើបរីករាយ និងអារម្មណ៍រំជើបរំជួលចំពោះការប្រកួតក្របខ័ណ្ឌ UEFA Champions League ។

ព័ត៌មានបន្ថែមអំពីកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ដែលនាំជូនដោយស្រាបៀរ Heineken® នៅក្នុងប្រទេសកម្ពុជា និងឱកាសសម្រាប់អ្នកគាំទ្រចូលរួមក្នុងសកម្មភាពផ្សេងៗនឹងធ្វើការចេញផ្សាយក្នុងពេលឆាប់ៗនេះ។

ចំពោះព័ត៌មានលម្អិត សូមចូលមើលគេហទំព័រ www.facebook.com/Heineken
សូមរីករាយទទួលទានស្រាបៀរ Heineken ដោយទទួលខុសត្រូវ

March 27, 2018

រីករាយការផ្តល់ជូនយ៉ាងពិសេសពី LG BrandShop ក្នុងឪកាសបុណ្យចូលឆ្នាំខ្មែរ ឆ្នាំ 2018

ដើម្បីចូលរួមអបអរសារទរក្នុងឪកាសពិធីបុណ្យចូលឆ្នាំខ្មែរនាពេលខាមុខនេះ LG BrandShop បានរៀបចំផ្តល់ជូននូវកម្មវិធីលក់យ៉ាងពិសេសដល់អតិថិជនទាំងអស់ដែលមានដូចជា ការទិញមួយថែមជូនមួយ ការបញ្ចុះតម្លៃពិសេស និង ទទួលបានវត្ថុអនុស្សាវរីយ៍ភ្លាមៗជាច្រើនសន្ធឹកសន្ធាប់ផ្សេងទៀត។

ឪកាសការផ្តល់ជូនយ៉ាងពិសេសនេះនឹងចាប់ផ្តើមពីថ្ងៃទី 28 ខែមីនា រហូតដល់ថ្ងៃទី 10 ខែមេសា ឆ្នាំ 2018 ខាងមុខនេះតែប៉ុណ្ណោះ ។ ហើយកម្មវិធីដ៏ពិសេសនេះ គឺមានសំរាប់ផលិតផលថ្មីៗ ដូចជា ទូរទស្សន៍ ទូរទឹកកក ម៉ាស៊ីនត្រជាក់ ម៉ាស៊ីនបោកសំលៀកបំពាក់ និងឧបករណ៍បំពងសំលេង ជាដើម។

អតិថិជនទាំងអស់អាចមកទស្សនាការដាក់តាំងផលិតផល និង ទទួលយកនៅកម្មវិធីពិសេសដ៏អស្ចារ្យនេះ នៅសាខា LG Brand Shop រាជធានីភ្នំពេញ ខេត្តសៀមរាប ខេត្តបាត់ដំបង ខេត្តកំពង់ចាម ខេត្តព្រះសីហនុ។

ព័ត៌មានបន្ថែមសូមសូមទំនាក់ទំនងមកកាន់លេខ 023 222 699
LG BrandShop ទំនិញមានគុណភាព តំលៃសមរម្យ សេវាកម្មល្អ៕

March 27, 2018

ទុនវិនិយោគរវាងកម្ពុជា និងហុងកុងកើនឡើងប្រមាណជា1.64%

ការវិនិយោគរបស់ចិនហុងកុងក្នុងឆ្នាំ2017 គឺមានចំនួន 13គម្រោង ក្នុងវិស័យកាត់ដេរសម្លៀកបំពាក់ ស្បែកជើង កាបូប និងឧស្សាហកម្មដទៃទៀត ក្នុងទឹកប្រាក់វិនិយោគប្រមាណ 85លានដុល្លារអាមេរិក ស្មើនឹង1.64% នៃទុនវិនិយោគសរុបប្រចាំឆ្នាំ2017 នេះបើយោងតាមរបាយការណ៍កត់ត្រារបស់ក្រុមប្រឹក្សាអភិវឌ្ឍន៍កម្ពុជា។

ឯកឧត្ដម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ក្នុងជំនួបជាមួយប្រតិភូចិនហុងកុងឱ្យដឹងថា កម្ពុជាមានភាពអំណោយផលនៃបរិយាកាសវិនិយោគ ជាពិសេសស្ថិរភាពនយោបាយ និងស្ថិរភាពម៉ាក្រូសេដ្ឋកិច្ច ដែលបានផ្តល់លទ្ធភាពឱ្យកម្ពុជាសម្រេចបាននូវកំណើនសេដ្ឋកិច្ចជាមធ្យម 7.7 %ក្នុងមួយឆ្នាំក្នុងរយៈពេលជាង 2ទសវត្សរ៍កន្លងទៅ។ កំណើនដ៏រឹងមាំនេះបានធ្វើឱ្យកម្ពុជាធ្វើដំណើរយ៉ាងក្លៀវក្លាក្នុងការអភិវឌ្ឍសេដ្ឋកិច្ច ដោយផ្ដល់ទំនុកចិត្ដដល់អ្នកវិនិយោគបរទេសឱ្យបណ្តាក់ទុនលើគ្រប់វិស័យ។ ឯកឧត្តមក៏បានវាយតម្លៃខ្ពស់ចំពោះការសម្រេចចិត្ដរបស់អ្នកវិនិយោគហុងកុងដែលបានជ្រើសរើសកម្ពុជាធ្វើជាគោលដៅវិនិយោគដ៏មានសក្ដានុពលខ្ពស់ក្នុងការចាប់ផ្ដើម ឬពង្រីកអាជីវកម្មរបស់ខ្លួន។

ជាមួយគ្នានេះឯកឧត្ដម អ៊េតវឺត យ៉ាវ (Edward Yau) រដ្ឋលេខាធិការទទួលបន្ទុកកិច្ចការអភិវឌ្ឍន៍សេដ្ឋកិច្ច និងពាណិជ្ជកម្មបានថ្លែងដោយសន្យាថា នឹងខិតខំធ្វើការទាក់ទាញ និងផ្សព្វផ្សាយឱ្យអ្នកវិនិយោគហុងកុងឱ្យមកបណ្តាក់ទុននៅកម្ពុជាឱ្យបានកាន់តែច្រើនថែមទៀតដើម្បីបន្តរឹតចំណងមិត្តភាព និងទំនាក់ទំនងសេដ្ឋកិច្ចនៃប្រជាជាតិទាំងពីរ។

គួររំឭកផងដែរថា ការវិនិយោគរបស់ហុងកុងនៅកម្ពុជាពីឆ្នាំ1994 ដល់ឆ្នាំ2017 មានចំនួន 257គម្រោង មានទុនវិនិយោគសរុបប្រមាណ 1.33ពាន់លានដុល្លារអាមេរិក ស្មើនឹង 2.14%នៃទុនវិនិយោគសរុប៕

March 27, 2018

យុវជនត្រូវស្គាល់ច្បាស់ពីគ្រឹះ និងអត្ថន័យជាក់ស្តែងនៃវប្បធម៌ជាតិមុនអភិវឌ្ឍ

“អភិវឌ្ឍដើម្បីអភិរក្ស និងអភិរក្សដើម្បីអភិវឌ្ឍ” ជាប្រធានបទយ៉ាងសំខាន់មួយដែលត្រូវបានអ្នកស្រឡាញ់វប្បធម៌ជាតិតែងតែលើកឡើងដើម្បីជំរុញឱ្យមានភាពផុសផុលឡើងលើការលើកតម្លៃវប្បធម៌ជាតិ តែថ្មីៗនេះក៏មានបញ្ហាចោទមួយចំនួនដែលអាចរាំងស្ទះដល់ការអភិវឌ្ឍមរតកវប្បធម៌ដែរ ជាពិសេសសិល្បៈបុរាណរបស់កម្ពុជា។

ជាទូទៅគេសង្កេតឃើញថា យុវជនមួយចំនួនចាប់ផ្តើមមានភាពផុសផុលក្នុងការផ្សព្វផ្សាយពីទម្រង់នៃសិល្បៈវប្បធម៌ខ្មែរ ហើយក្រមាខ្មែរ រួមទាំងទម្រង់សិល្បៈជាច្រើនទៀតត្រូវបានយុវជនលើកយកមកបង្ហាញក្នុងកម្មវិធីសំខាន់ៗ រួមទាំងក្នុងបណ្តាញសង្គមទៀតផង តែបញ្ហាប្រឈមស្ថិតត្រង់ថា យុវជនដែលមិនយកចិត្តទុកដាក់នៅតែមិនសូវខ្វាយខ្វល់ និងមិនសូវចូលរួមអភិវឌ្ឍទម្រង់សិល្បៈវប្បធម៌បុរាណខ្មែរដដែល។

ទម្រង់សិល្បៈសម័យថ្មី ឬប្រភេទបទចម្រៀងមួយចំនួនត្រូវបានយុវជនយកចិត្តទុកដាក់ខ្លាំង ហើយពេលខ្លះដោយសារចរន្តមួយនេះបានធ្វើឱ្យទម្រង់សិល្បៈបែបថ្មី លុបបាត់ទម្រង់សិល្បៈចាស់ដែលមានតម្លៃទៀតផង។ ពាក់ព័ន្ធនឹងបញ្ហានេះ ទីប្រឹក្សានៃក្រសួងវប្បធម៌និងវិចិត្រសិល្បៈ សាស្ត្រាចារ្យ ព្រឿង ឈាង បានលើកឡើងថា វប្បធម៌មានតម្លៃខ្លាំងណាស់សម្រាប់សង្គមមួយ ហើយតម្លៃនៃវប្បធម៌មានជីវិតយូរអង្វែងដែលវាហាក់ដូចជាព្រលឹងរបស់ជាតិសាសន៍មួយ។

ជាក់ស្តែង យើងឃើញហើយថា មានប្រទេសខ្លះបានបាត់បង់រូបរាងពីលើពិភពលោកទៅហើយ តែវប្បធម៌នៅតែបន្តរស់ ឬនៅតែមានជីវិតបន្តតាមរយៈការអនុវត្ត និងការគោរពប្រតិបត្តិរបស់ប្រជាជន។ ហេតុនេះយុវជនគួរតែផ្តល់តម្លៃខ្ពស់លើតម្លៃនៃវប្បធម៌ជាតិ តាមរយៈការយកចិត្តទុកដាក់សិក្សាស្វែងយល់ឱ្យបានច្បាស់លាស់។

សាស្ត្រាចារ្យ ព្រឿង ឈាង បានមានប្រសាសន៍ថា៖ “មានយុវជនកម្ពុជាមួយចំនួនមិនទាន់ស្គាល់គ្រឹះនៃវប្បធម៌របស់ជាតិខ្លួនឯងនៅឡើយទេ។ ពួកគេមិនទាន់ស្គាល់ប្រវត្តិ លក្ខណៈពិសេស និងចំណុចលម្អិតនៃទម្រង់សិល្បៈបុរាណខ្មែរ និងផ្នែកសំខាន់ៗដទៃទៀតនៃវប្បធម៌ ដែលជាហេតុធ្វើឱ្យសកម្មភាពផ្សព្វផ្សាយវប្បធម៌នានាអាចធ្វើបានត្រឹមរយៈពេលខ្លីៗក៏ត្រូវបានគេបំភ្លេចទៅវិញ។

បើតាមលោកសាស្ត្រាចារ្យ ព្រឿង ឈាង ការស្គាល់ពីមូលដ្ឋានគ្រឹះ និងតម្លៃពិតប្រាកដរបស់វប្បធម៌ខ្មែរ គឺជាចំណុចចាប់ផ្តើមយ៉ាងសំខាន់ក្នុងការអភិវឌ្ឍឱ្យសិល្បៈបុរាណគ្រប់ទម្រង់ រួមទាំងមរតកវប្បធម៌ជាតិមានភាពល្បីល្បាញបានយូរអង្វែង។

លោកសាស្ត្រាចារ្យ បានលើកឡើងផងដែរថា យុវជនបច្ចុប្បន្នគួរព្យាយាមស្វែងយល់ពីគ្រឹះនៃវប្បធម៌របស់ជាតិខ្លួនជាមុនសិន មុននឹងធ្វើការអភិវឌ្ឍមរតកវប្បធម៌ និងធ្វើសកម្មភាពនានាដើម្បីសង្គមរបស់យើង៕

March 27, 2018

បន្តិចទៀតនឹងមានជើងហោះហើរត្រង់ពីគុនមីង មកខេត្តព្រះសីហនុ

មួយរយៈពេលចុងក្រោយនេះ ក្រុងព្រះសីហនុបានក្លាយជាតំបន់ដ៏មានសក្តានុពលផ្នែកសំណង់ អាជីវកម្ម និងទេសចរណ៍។ ក្នុងចំណោមភ្ញៀវបរទេសដែលមកទស្សនា មកវិនិយោគ និងប្រកបអាជីវកម្មនៅក្រុងព្រះសីហនុ ភាគច្រើនជាជនជាតិចិន ដែលមានចំនួនកើនឡើងខ្លាំងពីមួយឆ្នាំទៅមួយឆ្នាំ។

ស្របពេលគ្នានឹងចរន្តមួយនេះ ក្រុមហ៊ុនអាកាសចរណ៍របស់ចិន Ruili បានបង្កើតជើងហោះហើរត្រង់ពីតំបន់គុនមីង ប្រទេសចិន មកកាន់ខេត្តព្រះសីហនុនៃប្រទេសកម្ពុជា ដើម្បីសម្រួលដល់ការធ្វើដំណើររបស់ប្រជាជនចិនមកកម្ពុជា និងប្រជាជននៃខេត្តព្រះសីហនុទៅកាន់ប្រទេសចិន។

នាយករងប្រតិបត្តិនៃក្រុមហ៊ុនអាកាសចរណ៍ Ruili លោក Ma Zhanwei បានលើកឡើងថា ការបង្កើតជើងហោះហើរត្រង់ពីខេត្តព្រះសីហនុ ទៅគុនមីង និងពីគុនមីង មកខេត្តព្រះសីហនុនេះ គឺដោយសារតែក្រុមហ៊ុនបានមើលឃើញពីកំណើនភ្ញៀវទេសចរចិនដែលមកទស្សនាកម្ពុជា មានការកើនឡើងឥតឈប់ឈរ ដោយក្នុងនោះភ្ញៀវច្រើនជាងគេ គឺមកពីខេត្តគុនមីង។

យន្តហោះដែលនឹងហោះហើរទៅមករវាងក្រុងគុនមីង និងខេត្តព្រះសីហនុនេះ គឺប្រភេទយន្តហោះ Boeing B787 ដែលនឹងប្រតិបត្តិការ 3ថ្ងៃក្នុងមួយសប្តាហ៍ និងហោះ 1ជើងក្នុងមួយថ្ងៃ ហើយអាចផ្ទុកអ្នកដំណើរបានប្រមាណ 250នាក់ក្នុងមួយថ្ងៃ។

យោងតាមរបាយការណ៍ពីព្រលានយន្តហោះអន្តរជាតិកម្ពុជា បានឱ្យដឹងថា អ្នកដំណើរដែលធ្វើដំណើរមកកាន់ព្រលានយន្តហោះកម្ពុជាទាំងអស់មានចំនួន 6.3លាននាក់ មានការកើនឡើងចំនួន 25%។ ក្នុងចំណោមនោះ ភ្ញៀវទេសចរឆ្លងកាត់ព្រលានយន្តហោះអន្តរជាតិភ្នំពេញមាន 24.5% អ្នកធ្វើដំណើរតាមព្រលានយន្តហោះអន្តរជាតិសៀមរាបមានចំនួន 21.8% និងព្រលានយន្តហោះអន្តរជាតិក្រុងព្រះសីហនុមានចំនួន 16.2%៕

March 27, 2018

ហូឡង់ ជួយឱ្យលោក Koeman ឈ្នះជាលើកទី1 តាមរយៈការផ្តួលព័រទុយហ្គាល់ដោយងាយ

លោក Ronald Koeman បានកត់ត្រាជ័យជម្នះជាលើកទី1របស់ខ្លួនក្នុងនាមជាគ្រូបង្វឹកនៃក្រុមបាល់ទាត់ជម្រើសជាតិហូឡង់ ខណៈដែលក្រុមរបស់លោកដណ្តើមបានជ័យជម្នះដោយងាយក្នុងលទ្ធផល 3-០ លើក្រុមជម្រើសជាតិព័រទុយហ្គាល់ ក្នុងទីក្រុង Geneva កាលពីថ្ងៃចន្ទ។

ក្រុមម្ចាស់ជើងឯករងនៃយុទ្ធនាការ World Cup 3សម័យកាលមួយនេះ បានខកខានក្នុងការឈ្នះកៅអីរបស់ពួកគេសម្រាប់យុទ្ធនាការជុំផ្តាច់ព្រ័ត្រនៅឆ្នាំនេះក្នុងប្រទេសរុស្ស៊ី ប៉ុន្តែ ការប្រកួតជាលើកទី2 របស់លោក Koeman ក្នុងនាមជាគ្រូបង្វឹក បានបញ្ចប់តាមរយៈការដណ្តើមបានជ័យជម្នះដ៏គួរឱ្យជឿជាក់មួយ ក្រោយពីមានគ្រាប់បាល់ស៊ុតបញ្ចូលទីពីសំណាក់កីឡាករ Memphis Depay, Ryan Babel និង Virgil van Dijk។

វាបានក្លាយជារាត្រីដ៏ខកចិត្តមួយសម្រាប់ក្រុមម្ចាស់ជើងអឺរ៉ុប ព័រទុយហ្គាល់ នៅមុនពេលយុទ្ធនាការ World Cup ខណៈដែលខ្សែប្រយុទ្ធ Cristiano Ronaldo បានសម្រាកត្រឹមតែ 3ថ្ងៃគត់ ក្រោយពីការស៊ុតបាល់បញ្ចូលទី 2គ្រាប់របស់គេដើម្បីជួយឱ្យក្រុមខ្លួនទទួលជ័យជម្នះ 2-1 លើក្រុមបាល់ទាត់ជម្រើសជាតិអេហ្ស៊ីប។ លោក Fernando Santos គ្រូបង្វឹកនៃក្រុមបាល់ទាត់ជម្រើសជាតិព័រទុយហ្គាល់ បានឱ្យដឹងថា៖ «ពួកគេបានបង្កើតឱកាស 4លើក និងស៊ុតបាល់បញ្ចូលទីបាន 3គ្រាប់ ពួកគេពិតជាស័ក្តិសមក្នុងការទទួលបានជ័យជម្នះ»។

ក្រុមបាល់ទាត់ជម្រើសជាតិហូឡង់ ដែលបានរងបរាជ័យក្រោមស្នាដៃក្រុមជម្រើសជាតិអង់គ្លេស 1-០ ក្នុងទីក្រុង Amsterdam កាលពីថ្ងៃសុក្រនោះ បានរកគ្រាប់បាល់បើកឆាកនៅនាទីទី11 តាមរយៈគ្រាប់បាល់របស់ Depay នៅមុនពេល Babel និង Van Dijkបានបន្ថែម 2គ្រាប់ទៀតដើម្បីបំពេញជ័យជម្នះសម្រាប់ក្រុមរបស់លោក Koeman៕

ប្រភពពី៖ Channel News Asia

March 27, 2018

លោក Southgate៖ កីឡាករជម្រើសជាតិអង់គ្លេស នៅតែមានកៅអីក្នុងការទៅដណ្តើមពាន World Cup

លោក Gareth Southgateបានថ្លែងប្រាប់ពីសេចក្តីសង្ឃឹមក្នុងយុទ្ធនាការ World Cup របស់ក្រុមជម្រើសជាតិអង់គ្លេសថា វានៅតែមានកៅអីជាច្រើនក្នុងការដណ្តើមយក ខណៈដែលគ្រូបង្វឹករូបនេះត្រៀមជ្រើសរើសយកក្រុមចុងក្រោយរបស់លោកសម្រាប់យុទ្ធនាការនៅក្នុងប្រទេសរុស្ស៊ី នាពេលខាងមុខនេះ។

លោក Southgate ត្រូវតែបញ្ជូនឈ្មោះកីឡាករទាំង 23នាក់របស់លោកសម្រាប់យុទ្ធនាការ World Cup មិនឱ្យយឺតជាងថ្ងៃទី4 ខែមិថុនាឡើយ ប៉ុន្តែ អ្នកចាត់ការទូទៅនៃក្រុមជម្រើសជាតិអង់គ្លេសរូបនេះ ចង់បំពេញការជ្រើសរើសរបស់លោកនៅមុនពេលការប្រកួតមិត្តភាពជាមួយនឹងក្រុមជម្រើសជាតិនីហ្សេរីយ៉ា នៅថ្ងៃទី2 ខែមិថុនា។

លោក Southgate ចង់បានក្រុមចុងក្រោយដែលល្អបំផុតរបស់លោកសម្រាប់យុទ្ធនាការ World Cup មកធ្វើការកម្តៅសាច់ដុំរួមគ្នានៅពេលប្រកួតជាមួយនឹងក្រុមជម្រើសជាតិនីហ្សេរីយ៉ា និងកូស្តារីកា ដែលមានន័យថា ការប្រកួតនៅរាត្រីនេះជាមួយនឹងក្រុមជម្រើសជាតិអ៊ីតាលី នាកីឡដ្ឋាន Wembley នឹងបង្ហាញពីឱកាសដ៏សំខាន់ក្នុងការប្រជែងយកកៅអីមួយទៅកាន់ប្រទេសរុស្ស៊ីរបស់កីឡាករជម្រើសជាតិអង់គ្លេស។

ក្រោយពីក្រុមជម្រើសជាតិអង់គ្លេស ដណ្តើមបានជ័យជម្នះក្នុងលទ្ធផល 1-០ លើក្រុមជម្រើសជាតិហូឡង់ កាលពីថ្ងៃសុក្រ លោក Southgate កំពុងតែមានផែនការក្នុងការផ្លាស់ប្តូរកីឡាករជាច្រើននៅពេលប្រកួតជាមួយនឹងអ៊ីតាលី ដើម្បីផ្តល់ឱកាសចុងក្រោយដល់កីឡាករម្នាក់ៗ ក្នុងការបង្ហាញពីសមត្ថភាពរបស់ពួកគេ។ លោក Southgate បានប្រាប់អ្នកយកព័ត៌មាននៅឯទីលានហ្វឹកហាត់របស់ក្រុមជម្រើសជាតិអង់គ្លេស កាលពីថ្ងៃចន្ទថា៖ «វាមិនទាន់យឺតពេលទេសម្រាប់គ្រប់កីឡាករទាំងអស់។ យើងនឹងនៅតែពិនិត្យមើលគ្រប់ៗគ្នារហូតដល់ចុងរដូវកាលនេះ»។ ការប្រកួតនេះនឹងចាប់ផ្តើមនៅម៉ោង1រំលងអធ្រាត្រ៕

ប្រភពពី៖ Channel News Asia

March 27, 2018

ពាណិជ្ជករ និងកសិករនៅតាមខេត្តជាប់ព្រំដែនថៃ ទទួលបានការសម្រួលថ្មី ផ្នែកពាណិជ្ជកម្ម

ក្រោយពីការត្អួញត្អែរអំពីភាពលំបាកស្មុគស្មាញក្នុងការទទួលបានការអនុញ្ញាតឱ្យនាំចេញផលិតផលកសិកម្មទៅកាន់បរទេសអស់រយៈពេលដ៏យូរមក ក្រសួងពាណិជ្ជកម្មបានធ្វើប្រតិភូកម្មដល់មន្ទីរពាណិជ្ជកម្មចំនួន4ខេត្ត ដែលស្ថិតនៅជាប់ព្រំដែនថៃឱ្យអាចចេញវិញ្ញាបនបត្របញ្ជាក់ប្រភពដើមទំនិញបាន។

យោងតាមក្រសួងពាណិជ្ជកម្ម ខេត្តចំនួន4 ដែលមានព្រំប្រទល់ជាប់នឹងប្រទេសថៃឡង់ដ៍ នឹងទទួលបានសិទ្ធិចេញ “វិញ្ញាបនបត្របញ្ជាក់ប្រភពដើមទំនិញ” ទម្រង់D សម្រាប់ការនាំចេញកសិផល ដែលមន្ត្រីក្រសួងពាណិជ្ជកម្មអះអាងថា វាជាផ្នែកមួយដែលសម្រួលដល់ការនាំចេញកសិផលជូនពាណិជ្ជករ និងប្រជាកសិករនៅតាមបណ្តាយព្រំដែនកម្ពុជា-ថៃឡង់ដ៏។

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានចាត់ទុកការធ្វើប្រតិភូកម្មនេះជាភ័ស្តុតាងថ្មីមួយទៀតដែលបញ្ជាក់ពីការបេ្តជ្ញាចិត្តរបស់ក្រសួងពាណិជ្ជកម្មក្នុងការអនុវត្តគោលនយោបាយកំណែទម្រង់របស់រាជរដ្ឋាភិបាលសម្រាប់លើកស្ទួយ និងការសម្រួលការនាំចេញផលិតផលកសិកម្មទៅកាន់ទីផ្សារបរទេស។

ខេត្តចំនួន4 ដែលទទួលបានការធ្វើប្រតិភូកម្មអំណាចក្នុងពេលថ្មីៗនេះ រួមមានៈ ខេត្តប៉ៃលិន បាត់ដំបង បន្ទាយមានជ័យ និងឧត្តរមានជ័យ។ឯកឧត្តម ប៉ាន សូរស័ក្តិ បានបញ្ជាក់ថា៖“ ការធ្វើប្រតិភូកម្មនេះមិនត្រឹមតែជាការផ្ទេរភាពជាម្ចាស់នៃមុខងារប៉ុណ្ណោះទេ តែវាថែមទាំងជាការទទួលខុសត្រូវក្នុងការគ្រប់គ្រង និងការអនុវត្តមុខងារឱ្យកាន់តែមានប្រសិទ្ធភាព និងតម្លាភាព ចៀសវាងនូវបាតុភាពអសកម្ម និងការកកស្ទះកសិផល ជាយថាហេតុ។

ឯកឧត្តមរដ្ឋមន្ត្រីបានគូសបញ្ជាក់ទៀតថា ក្រសួងនឹងបន្តធ្វើប្រតិភូកម្មសេវាសាធារណៈនេះ ដល់បណ្តាខេត្តជាប់ព្រំដែនផ្សេងៗទៀតនាពេលអនាគត ទន្ទឹមគ្នានឹងការបណ្តុះបណា្តលមន្ត្រីរាជការមន្ទីរពាណិជ្ជកម្មជាមុន ទាំងកម្រិតជំនាញទាក់ទងវិធានប្រភពដើមទំនិញ ក៏ដូចការប្រើប្រាស់ប្រព័ន្ធស្វ័យប្រវត្តិកម្មនៃការចេញ CO ផងដែរ។

យោងតាមការបញ្ជាក់របស់ ឯកឧត្តម សួន បវរ អភិបាលខេត្តបន្ទាយមានជ័យ ដែលជាខេត្តមួយក្នុងចំណោមខេត្ត4 ដែលទើបទទួលបានប្រតិភូកម្មអំណាចក្នុងការចេញលិខិតប្រភពដើមទំនិញបានឱ្យដឹងថា ប្រជាជនក្នុងខេត្តបន្ទាយមានជ័យប្រកបរបរដាំដុះដំណាំដំឡូងមីច្រើនលើសលប់ ដែលមានបរិមាណរហូតដល់ 2លានតោនក្នុង 1ឆ្នាំៗ ហើយទីផ្សារសម្រាប់ដំឡូងមីពឹងផ្អែកតែលើទីផ្សារប្រទេសថៃប៉ុណ្ណោះ។

ក្រសួងពាណិជ្ជកម្មបានផ្សព្វផ្សាយថា ដើម្បីលើកកម្ពស់កិច្ចសហប្រតិបត្តិការរវាងការខិតខំប្រឹងប្រែងទាំងនៅថ្នាក់ជាតិ និងថ្នាក់ក្រោមជាតិ សំដៅធានាឱ្យមានការអភិវឌ្ឍដ៏ទូលំទូលាយ ប្រកបដោយនិរន្តរភាព ព្រមទាំងដើម្បីពង្រឹង និងធ្វើពិពិធកម្មសេដ្ឋកិច្ចមូលដ្ឋាន រាជរដ្ឋាភិបាលកម្ពុជា បានអនុម័ត និងអនុវត្តក្របខ័ណ្ឌយុទ្ធសាស្ដ្រស្តីពីកំណែទម្រង់វិមជ្ឈការ និងវិសហមជ្ឈការ ចាប់តាំងពីឆ្នាំ2005។

បើតាមទិន្ន័យរបស់នាយកដ្ឋាននាំចេញ-នាំចូលបានឱ្យដឹងថា ការនាំចេញនៅក្រោមប្រព័ន្ធអនុគ្រោះពាណិជ្ជកម្មទៅកាន់ទីផ្សារបរទេសបានកើនឡើងរហូតដល់ 11,153លានដុល្លារអាមេរិកក្នុងឆ្នាំ2017 ពោលគឺស្មើនឹងជាង18% បើប្រៀបធៀបឆ្នាំ2016 ដែលមានទឹកប្រាក់ត្រឹមតែ 9,421លានដុល្លារអាមេរិកប៉ុណ្ណោះ។

ដោយឡែកការនាំចេញតាមវិញ្ញាបនបត្របញ្ជាក់ប្រភពដើមទំនិញទម្រង់D ទៅកាន់ទីផ្សារតំបន់អាស៊ាន បានកើនឡើងប្រមាណជាង 66% គឺពីទឹកប្រាក់ 728លានដុល្លារអាមេរិកនៅក្នុងឆ្នាំ2016 រហូតដល់ទឹកប្រាក់ 1,214លានដុល្លារអាមេរិក នៅក្នុងឆ្នាំ2017៕

March 27, 2018

Author: វល័ក្ខ