ធឿន មករា - La Reine Media

ផ្សិតអំបោះមានតម្រូវការខ្ពស់នៅលើទីផ្សារ តែពុំសូវមានកសិករដាំ

ផ្សិតអំបោះជាប្រភេទរុក្ខជាតិបន្លែម្យ៉ាងដែលគេអាចយកទៅច្នៃធ្វើជាម្ហូបម្ហាបានច្រើនមុខ ដូចជាឆាសាច់មាន់ ឆាសាច់ជ្រូក សាច់គោ ឬស្ងោជ្រក់ជាមួយសាច់មាន់ ជាដើម ជាពិសេសអាចយកទៅដាក់លាយជាមួយបបរគ្រឿង ឬយកធ្វើម្ហូបផ្សេងៗទៀតសម្រាប់កម្មវិធីបុណ្យទាន ឬពិធីមង្គលការជាដើម ទើបជាហេតុធ្វើឱ្យផ្សិតប្រភេទនេះមានតម្រូវការខ្ពស់នៅលើទីផ្សារ តែវាបែរជាពុំសូវមានកសិករដាំច្រើនឡើយនៅក្នុងប្រទេសកម្ពុជា។

យុវជន ម៉េង សុភ័ក្ត្រ ដែលជានិស្សិតកំពុងសរសេរសារណាត្រៀមឡើងការពារបញ្ចប់ថ្នាក់បរិញ្ញាបត្រនៅសាកលវិទ្យាល័យភូមិន្ទកសិកម្មបានឱ្យដឹងថា មុននឹងបញ្ចប់ថ្នាក់បរិញ្ញាបត្រ ខ្លួនគេ និងយុវជនជាច្រើននាក់ទៀតបានសាកល្បងបណ្តុះផ្សិតអំបោះនេះឡើងដើម្បីទុកជាបទពិសោធ សម្រាប់បង្កើតកសិដ្ឋានផ្ទាល់ខ្លួននៅស្រុកកំណើតក្នុងគោលបំណងចែកចាយលក់នៅលើទីផ្សារឱ្យបានទូលំទូលាយទូទាំងប្រទេសកម្ពុជានាពេលខាងមុខ។ ក្រោយពីបានសាកល្បងធ្វើការបណ្តុះផ្សិតអំបោះរួមគ្នាមួយរយៈនៅក្នុងសាកលវិទ្យាល័យផ្ទាល់តាម-រយៈការសិក្សាកន្លងមក ពួកគេបានទទួលជោគជ័យ100% ដោយអាចប្រមូលផលផ្សិតលក់នៅលើទីផ្សារបានចំនួន 4-5គីឡូក្រាមជារៀងរាល់ថ្ងៃក្នុងចំណោមដំណាំផ្សិតចំនួន 2,000កញ្ចប់ ហើយក្នុងមួយគីឡូក្រាមអាចលក់បោះដុំបានក្នុងតម្លៃ 5,000រៀលទៀតផង ចំណែកម៉ូយយកទៅលក់រាយបន្តមានតម្លៃចន្លោះពី7,000 ទៅ8,000រៀល។

យុវជនខាងលើបន្តថា ក្រោយពីទទួលបានបទពិសោធជោគជ័យក្នុងការបណ្តុះផ្សិតអំបោះរួចមក ប្អូនប្រុសបានត្រឡប់ទៅស្រុកកំណើតដែលស្ថិតនៅក្នុងភូមិលេខ6 ឃុំព្រែកតានង់ ស្រុកកោះសូទិន ខេត្តកំពង់ចាម ដើម្បីរៀបចំកសិដ្ឋានតូចមួយនៅផ្ទះរបស់ខ្លួន សាកល្បងដាំដុះផ្ទាល់ខ្លួនចំនួនតែ1,000កញ្ចប់សាជាថ្មីម្តងទៀត ហើយក៏ទទួលបានជោគជ័យដូចការគ្រោងទុកដែរ ដោយប្អូនអាចប្រមូលផលបានប្រមាណជា 1-2គីឡូក្រាមជារៀងរាល់ថ្ងៃដើម្បីឱ្យប្រជាជននៅទីនោះបានសាកល្បងធ្វើជាម្ហូបអាហារពិសា និងលក់ទៅឱ្យម៉ូយនៅផ្សារដែលត្រូវបានពួកគាត់សរសើរថា ផ្សិតអំបោះពិតជាមានរសជាតិឆ្ងាញ់មែន។

ពីដំបូង កុំថាឡើយដាំដុះផ្សិតប្រភេទនេះ ប្រជាជននៅក្នុងភូមិខាងលើមិនទាំងស្គាល់អ្វីទៅដែលហៅថាផ្សិតអំបោះនេះផង តែក្រោយពីបានភ្លក្សរសជាតិម្តងហើយ ពួកគាត់តែងមករកទិញម្តងទៀតដែលកត្តានេះបានធ្វើឱ្យប្អូន សុភ័ក្ត្រគិតថា ងាយស្រួលរកទីផ្សារ និងមិនចាំបាច់ដឹកជញ្ចូនទៅលក់ទីឆ្ងាយឡើយ គឺលក់នៅក្បែរផ្ទះក៏មានអ្នកមកទិញដែរ។

ប្អូនប្រុសបន្តថា ដោយសារតែរវល់សរសេរសារណាបញ្ចប់ការសិក្សារ បច្ចុប្បន្នប្អូនបានសម្រេចចិត្តផ្អាកការដាំដុះផ្សិតមួយរយៈសិន រង់ចាំការប្រឡងចប់ជាស្ថាពរ ទើបវិលត្រឡប់ទៅស្រុកកំណើតម្តងទៀត ដើម្បីពង្រីកកសិដ្ឋានឱ្យបានកាន់តែធំឡើងដោយគ្រោងដាំដុះដល់ទៅ 10,000ថង់ដើម្បីប្រមូលផលឱ្យបានប្រមាណពី20 ទៅ30គីឡូក្រាមជារៀងរាល់ថ្ងៃ ដែលនឹងអាចធ្វើឱ្យជីវភាពគ្រួសារបានល្អប្រសើរឡើង ពោលគឺប្រសើរជាងរកការងារធ្វើដែលបានប្រាក់ចំណូលប្រចាំខែសឹងមិនគ្រប់ចំណាយប្រចាំថ្ងៃទៅវិញផងនោះ។

និស្សិត ម៉េង សុភ័ក្ត្រ បានរៀបរាប់ថា ផ្សិតអំបោះដុះលូតលាស់នៅក្នុងបរិស្ថានធម្មជាតិសើមមិនស្ងួតក្រៀម និងប្រើរុក្ខជាតិពុកផុយដែលមានសំណើមពី60 ទៅ70ភាគរយ និងសីតុណ្ហភាពពី25ទៅ28អង្សាC។ វាជាដំណាំម្យ៉ាងដែលត្រូវការសំណើម និងភាពត្រជាក់គ្រប់ពេលវេលា ហើយមិនសូវចូលចិត្តឱ្យគេរំខានឡើយក្នុងពេលកំពុងលូតលាស់។ ផ្សិតអំបោះ គឺជាប្រភេទផ្សិតដែលងាយស្រួលបណ្តុះ ការចំណាយថវិកាក៏តិច ប្រើកម្លាំងពលកម្មក៏តិច វត្ថុធាតុដើមដែលយកមកប្រើប្រាស់ក៏ជាកាកសំណល់ដែលងាយស្រួលរកមកបណ្តុះ ដែលមានដូចជាអាចម៍រណា ស្នូលគ កន្ទក់ស្រូវ ម្សៅអង្ករដំណើប ជីអ៊ុយរេ និងកំបោរស ប៉ុន្តែវាទាមទារឱ្យអ្នកដាំដុះត្រូវមានភាពអំណត់អត់ធន់ព្យាយាម ជាពិសេសបំផុតផ្តោតលើការអនុវត្តតាមលក្ខណៈបច្ចេកទេស និងអនាម័យឱ្យបានស្អាតជានិច្ច។

ប្អូន ម៉េង សុភ័ក្ត្រ ក៏បានប្រាប់ពីរូបមន្តធាតុផ្សំផងដែរ ដែលរួមមានអាចម៍រណាចំនួន 100គីឡូ-ក្រាម មេផ្សិតអំបោះចំនួនពី3 ទៅ3.5ដប កន្ទក់ម៉ដ្ឋ10គីឡូក្រាម ម្សៅអង្ករដំណើប 1គីឡូក្រាម កំបោរស0.5គីឡូក្រាម(កន្លះគីឡូ) ជីអ៊ុយរ៉េទម្ងន់ 0.3គីឡូក្រាម(3ខាំ)។ បន្ទាប់ពីរកវត្ថុធាតុផ្សំទាំងនេះបានមកហើយ គេត្រូវរែងអាចម៍រណាដើម្បីយកសម្បក និងចំណាំងឈើចេញ ហើយត្រូវលាយវត្ថុធាតុដើមទាំងនោះទៅតាមរូបមន្តខាងលើឱ្យបានច្បាស់លាស់ ហើយដាក់ធាតុផ្សំនីមួយៗទៅតាមស្រទាប់ៗ រួចទើបច្របល់ធាតុផ្សំទាំងនោះឱ្យចូលគ្នាបានសព្វល្អ ហើយត្រូវយកដៃជ្រោយល្បាយនោះឱ្យសព្វស្មើ និងត្រូវចេះការពារខ្លួនឯងដោយការយកម៉ាស់ ឬក្រមាមករុំច្រមុះផង។

បន្ទាប់ពីលាយល្បាយរួច គេត្រូវប្រមូលល្បាយនោះមកពូតផ្ដុំជាដុំៗ រួចវែកល្បាយនោះឱ្យមានប្រហោង បន្ទាប់មកស្រោចដោយទឹកស្អាតទៅក្នុងប្រហោងនោះ ដោយយកដៃច្របល់ល្បាយជាមួយទឹកដែលចាក់ចូលទៅនោះឱ្យបានសព្វល្អ ដែលធ្វើឱ្យមានសំណើមប្រហែល60 ទៅ70ភាគរយ ចៀសវាងកុំឱ្យស្ងួតពេក និងកុំឱ្យសើមពេកទើបជាការប្រសើរ។

បន្ទាប់ពីចាក់ទឹកផ្សើមរួច យើងត្រូវប្រមូលល្បាយទាំងនោះទុកមួយឡែក យកក្រណាត់តង់មកគ្របពីលើទុកចោលមួយរយៈពី1 ទៅ3ថ្ងៃនៅក្នុងម្លប់សម្រាប់អាចម៍រណាចាស់ និងសម្រាប់អាចម៍រណាថ្មីត្រូវគ្របចោលរយៈពេល7 ទៅ10ថ្ងៃ។ បន្ទាប់មកត្រូវត្រឡប់ល្បាយនោះឱ្យបានសព្វល្អចំនួន 2ដងអំឡុងពេលគ្របនោះ។ លុះគ្រប់តាមរយៈពេលខាងលើហើយ ត្រូវបើកគម្របក្រណាត់តង់ចេញហើយច្រកល្បាយទៅក្នុងថង់ឱ្យបានទម្ងន់ពី 8ខាំ ទៅ1គីឡូក្រាមក្នុងមួយថង់។ បន្ទាប់មកត្រូវបុកល្បាយនោះឱ្យណែនល្អ តែត្រូវធ្វើដោយថ្នមៗដើម្បីកុំឱ្យថង់រហែកការពារចូលទឹកនៅពេលចំហុយ ដែលបណ្តាលឱ្យមេផ្សិតមិនដើរល្អក្នុងថង់ល្បាយ។

ដំណាក់កាលបន្ទាប់ គេយកកងមកចងមាត់ថង់ល្បាយ ដោយដាក់សំឡីក្នុងប្រហោងមាត់ថង់ល្បាយ ហើយគ្របមាត់ថង់ល្បាយដោយថង់ប្លាស្ទិក និងកៅស៊ូកង រួចទើបចាប់ផ្តើមយកទៅដាក់ចំហុយនៅក្នុងឆ្នាំងចំហុយដាស់ដំណេកល្បាយរយៈពេល3 ទៅ4ម៉ោង រួចសឹមយកចេញទៅដាក់សំដិលចោលរយៈពេល 12ម៉ោងទៀត រួចហើយទើបបើកគម្របដាក់មេផ្សិតអំបោះចូល ដោយត្រូវរោលឱ្យក្ដៅជាមួយភ្លើងចង្កៀងអាល់កុលដើម្បីសម្លាប់មេរោគ ជាពិសេសត្រូវយកឡាំងបាំងកុំឱ្យត្រូវខ្យល់នាំឱ្យមេរោគជ្រៀតចូលបាន។

ដំណាក់កាលចុងក្រោយ គេត្រូវយកថង់ល្បាយនីមួយៗទៅដាក់ផ្តុំគ្នានៅក្នុងរោងដែលបិទជិតមិនមានពន្លឺថ្ងៃចេញចូល។ ចន្លោះពី21 ទៅ25ថ្ងៃទើបមេផ្សិតដើរពេញកញ្ចប់ល្បាយ ពេលនោះទើបគេចាប់ផ្ដើមស្រោចទឹករយៈពេល 7ថ្ងៃទៀត ផ្សិតនឹងចាប់ផ្តើមលាស់ចេញមកអាចប្រមូលផលបានជាបណ្តើរៗ ហើយត្រូវបន្តស្រោចទឹកមួយថ្ងៃ2 ទៅ3ដង ឬ4 ទៅ5ដងទៅតាមលក្ខខណ្ឌអាកាសធាតុថាត្រជាក់ ឬក្តៅ។

គេអាចប្រមូលផលផ្សិតអំបោះបានរហូតដល់ទៅ 3ខែ ឬ5ខែឯណោះទើបវាឈប់ឱ្យផល ហើយពេលនោះគេនឹងចាប់ផ្តើមធ្វើការដាំបណ្ដុះសាជាថ្មីឡើងវិញម្ដងទៀត។ ចំណែកវិធីសាស្ត្រធ្វើយ៉ាងណាកុំឱ្យអស់ផ្សិតលក់នោះ គឺគេត្រូវធ្វើការដាំបណ្ដុះជារបៀបវិលជុំ គឺប្រមូលផលអស់ពីមួយរោង ក៏មានមួយរោងទៀតដល់ពេលប្រមូលផលជាបន្តបន្ទាប់គ្នាជាប់រហូតមិនដាច់ហ្នឹងឯង៕

December 29, 2018

គ្រោះថ្នាក់ 12យ៉ាង ចំពោះរាងកាយដោយសារការខ្វះ “វីតាមីន B12”

កំលោះៗ ក្រមុំៗអាចនឹងស៊ាំធ្លាប់នឹងវីតាមីនតែប៉ុន្មានមុខប៉ុណ្ណោះ ព្រោះភាគច្រើនច្រើនតែងរកវីតាមីនមកញ៉ាំដើម្បីតែភាពស្រស់ស្អាត ដូចជាវីតាមីនC ដើម្បីថែបំប៉នស្បែក ឬវីតាមីនA ដើម្បីបំប៉នកែវភ្នែកជាដើម តែការពិតទៅវីតាមីន B ក៏សំខាន់ចំពោះរាងកាយមិនតិចជាងវីតាមីនប្រភេទផ្សេងទៀតឡើយ ជាពិសេសវីតាមីន B12 ដែលមានភាពសំខាន់ចំពោះប្រព័ន្ធផ្សេងៗរបស់រាងកាយ ប្រព័ន្ធប្រសាទ និងខួរក្បាលច្រើនលើសពីយើងគិតទៅទៀត។ បើរាងកាយមិនបានទទួលវីតាមីន B12 គ្រប់គ្រាន់ អាចនឹងបង្កឱ្យកើតគ្រោះថ្នាក់ដល់រាងកាយក្នុងផ្នែកផ្សេងៗបាន។

ប្រយោជន៍របស់វីតាមីន B12
វីតាមីនB មានចំណែកជួយក្នុងការផលិតកោសិកាគ្រាប់ឈាមក្រហម បំប៉នប្រព័ន្ធប្រសាទ និងខួរក្បាល បង្កើនកម្មវិធីការផលិត DNA និងជួយដល់ការធ្វើការងាររបស់ប្រព័ន្ធផ្សេងៗក្នុងរាងកាយ។ ជាមធ្យមមនុស្សក្នុងវ័យធ្វើការគួរបានទទួលវីតាមីន B12 ក្នុង1ថ្ងៃ 2.4មីក្រូក្រាម ហើយវីតាមីន B12 ក៏ដូចវីតាមីនដទៃទៀតដែរដែលរាងកាយមិនអាចផលិតដោយខ្លួនឯងបាន និងត្រូវតែទទួលបានពីអាហារដែលអ្នកទទួលទានប៉ុណ្ណោះ។

បច្ច័យប្រថុយប្រថានដែលអាចធ្វើឱ្យរាងកាយបានទទួលវីតាមីនB12តិចជ្រុល
បើលោកអ្នកមានទង្វើដូចតទៅនេះ លោកអ្នកអាចប្រថុយនឹងការបានទទួលវីតាមីន B12 តិចជ្រុល ៖
ទទួលទានមំសវិរតិ(មិនបរិភោគសាច់សត្វ) ឬទទួលទានអាហារបួសរយៈពេលយូរ និងមិនបានទទួលទានវីតាមីនបន្ថែម ព្រោះវីតាមីនB12 គ្មាននៅក្នុងបន្លែទេ តែមាននៅក្នុងសាច់សត្វ ស៊ុត សត្វស្លាប អាហារប្រភេទទឹកដោះ និងអាហារផ្សេងទៀតដែលធ្វើពីសាច់សត្វ។

អ្នកកើតជំងឺ ខ្រូន (Crohn ជាភាពខុស ប្រក្រតីរ៉ាំរ៉ៃរបស់ពោះវៀនធំ ធ្វើឱ្យកើតការឈឺក្ដៅផ្សារក្រហាយ និងហើមប្រព័ន្ធរំលាយ អាហារ) និងអ្នកដែលត្រូវញ៉ាំថ្នាំបញ្ចុះជាតិអាស៊ីតក្នុងក្រពះជាប្រចាំ ដែលអាចធ្វើឱ្យរាងកាយបឺតយកវីតាមីនB12 បាន តិច ព្រោះវីតាមីន B12 នឹង ត្រូវបឺតជ្រាបយកបានត្រូវតែមានជាតិអាស៊ីតនៅក្នុងប្រព័ន្ធរំលាយអាហារ។

អាយុច្រើនឡើង ធ្វើឱ្យការផលិតទឹករំលាយអាហារ(អាស៊ីត)ក្នុងក្រពះថយចុះទៅតាមវ័យដែលធ្វើឱ្យការបឺតជ្រាបយកវីតាមីន B12 បានតិចទៅតាមហ្នឹងដែរ។

គ្រោះថ្នាក់ចំពោះសុខភាពដោយសារការខ្វះវីតាមីន B12
1. ប្រព័ន្ធការទទួលដឹង(វេទនារម្មណ៍) ធ្វើ
ការខុសប្រក្រតី ដូចជាការដឹងពីរសជាតិ ឬការ ទទួលដឹងក្លិនផ្លាស់ប្ដូរ។
2. មានអាការស្ពឹក ឬស្រពន់នៅលើដៃ ជើង និងបាតជើង។
3. ពិបាកដើរ បាត់បង់ភាពរហ័សរហួន(ដើរ ទ្រេតទ្រោត ជើងទាំងពីរដើរមិនមានតុល្យភាពគ្នា)។
4. ប្រថុយនឹងសភាវលោហិតស្លេក។
5. ហើម ឬរលាកអណ្ដាត។
6. រិះគិត ឬ វិភាគរឿងផ្សេងៗដើម្បីរកហេតុ ផលមិនសូវបាន ឬការចងចាំបាត់បង់អស់មួយ ចំណែក។
7. ទប់ ឬទ្រាំការបន្ទោបង់មិនបាន។
8. សុខភាពជារួមចុះទន់ខ្សោយ។
9. ឆាប់ ឬងាយនឿយល្វើយ។
10. ឆាប់ ឬងាយវិតក្កកង្វល់ និងស្រេ្ត
11. សោកសៅ ឬចេះតែមើលឃើញទិដ្ឋ- ភាពអាក្រក់ៗ។
12. ប្រថុយប្រថាននឹងជំងឺដែលពាក់ព័ន្ធនឹងប្រព័ន្ធប្រសាទ ខួរក្បាល និងលោហិត។

វិធីបង្កើនបរិមាណវីតាមីន B12 ក្នុងរាងកាយ
1. ទទួលទានវីតាមីន B12 បន្ថែមពីពេលញ៉ាំអាហារប្រក្រតី(គួរទៅទទួលយកការប្រឹក្សានិងពិនិត្យសុខភាពដោយលម្អិត។អំពីគ្រូពេទ្យមុននឹងទិញមកទទួលទាន)។
2.ទទួលអាហារដែលមានវីតាមីនB12ឱ្យបានច្រើនឡើង ដូចជា សាច់សត្វ សាច់ត្រី អាហារសមុទ្រ ផលិតផលធ្វើពីទឹកដោះគោផ្សេងៗ។

ចំណេះដឹងបន្ថែមដែលមនុស្សយើងច្រើនតែយល់ខុសពាក់ព័ន្ធនឹងវីតាមីន B12
អត្ថបទនៅក្នុងអុីនធើណិតអាចមាន ការអធិប្បាយថា វីតាមីនB12អាចការពារជំងឺខួរ ក្បាលចុះខ្សោយ ជំងឺបេះដូង ជំងឺរ៉ាំរ៉ៃ គ្រោះថ្នាក់ផ្សេងៗ រួមទាំងកែបញ្ហាសភាវគ្មានបុត្រ ជំងឺសើរស្បែក និងជំងឺផ្សេងៗទៀតជាច្រើនទៀត ដែលទាំងអស់នេះច្រើនតែចេញមកពីការសិក្សាវិ ភាគ ដែលមិនទាន់មានភ័ស្តុតាងច្បាស់លាស់នៅឡើយ។

December 29, 2018

បុរសនិយមហាត់ប្រាណ ចាំបាច់ត្រូវបំពេញសាធាតុរ៉ែនៅក្នុងរាងកាយ

សាច់ដុំក្បាលពោះ6កង់ (Six Packs) សាច់ដុំទ្រូង ឬសាច់ដុំស្មាបើករីកធំ សុទ្ធសឹងជាក្ដីប្រាថ្នារបស់សុភាពបុរសទាំងឡាយ។ កន្លែងសាច់ដុំផ្នែកនៃរាងកាយទាំងអស់នេះ ដែលធ្វើឱ្យបុរសមានរូបរាងសង្ហា និងទាក់ទាញ។ តើអ្នកមានបានដឹងទេថា នៅពេលដែលបុរសនិយមហាត់ប្រាណយកសាច់ដុំ ធ្វើឱ្យបាត់បង់សារធាតុរ៉ែនៅក្នុងរាងកាយ? សារធាតុរ៉ែ គឺចាំបាច់ដើម្បីលើកកម្ពស់សុខភាព និងអនុវត្តមុខងារជាច្រើននៃរាងកាយ។ ដូច្នេះ ទង្វើនៃការហាត់ប្រាណ ធ្វើឱ្យសារធាតុរ៉ែមានការថយចុះ ហើយចុះអ្នកត្រូវការបំពេញសារធាតុរ៉ែអ្វីខ្លះចំពោះរាងកាយ?

1. កាល់ស្យូម
តម្រូវការនៃជាតិកាល់ស្យូមនៅក្នុងរាងកាយរបស់អ្នក គឺនៅចន្លោះ800មីលី្លក្រាមទៅ1,300មីលី្លក្រាម។ ជាតិកាល់ស្យូមមានសារៈសំខាន់ សម្រាប់ការបង្កើតភ្នាសកោសិកា។ អ្នកត្រូវការកោសិកាទាំងនេះសម្រាប់ការសាងសង់ឆ្អឹង សាច់ដុំ បេះដូង និងប្រព័ន្ធរំលាយអាហារ។ ក្រោយ ឬមុនពេលហាត់ប្រាណ ត្រូវមានទម្លាប់ទទួលទានទឹកដោះគោស្រស់មួយកែវជារៀងរាល់ថ្ងៃ។

2. ប៉ូតាស្យូម
រាងកាយរបស់អ្នកត្រូវការជាតិរ៉ែប៉ូតាស្យូមប្រមាណពី2,500មីលី្លក្រាមទៅ4,700មីលី្លក្រាមក្នុងរបបអាហាររបស់ពួកគេ។ ប៉ូតាស្យូម ជួយក្នុងការសាងសង់សាច់ដុំ រក្សាការលូតលាស់របស់រាងកាយ និងកោសិកា។ សារធាតុប៉ូតាស្យូមមាននៅក្នុងផ្លែឈើដូចជា ផ្លែចេក ផ្លែប៊័រ និងពពួកសណ្តែកជាដើម។ ក្រោយពេលហាត់ប្រាណរួច អ្នកអាចចម្អែតក្រពះដោយអាហារទាំងអស់នេះ ជំនួសចំណីអាហារក៏បាន។

3. ផូស្វ័រ
អ្នកត្រូវការជាតិរ៉ែផូស្វ័រប្រមាណ800មីលី្លក្រាមជារៀងរាល់ថ្ងៃ។ រ៉ែប្រភេទនេះមានសារៈសំខាន់ខ្លាំងណាស់សម្រាប់ការបង្កើតឆ្អឹង និងការផ្តល់ភាពរឹងមាំដល់ឆ្អឹង។ វាមាននៅក្នុងអាហារដូចជា គ្រាប់ធញ្ញជាតិ សណ្ដែកសៀង ផ្លែផាសិន ល្ហុង និងផ្លែស្រកានាគ។

4. សូដ្យូម
ក្នុងរបបអាហារប្រចាំថ្ងៃរបស់អ្នក រាងកាយអ្នកត្រូវការជាតិសូដ្យូមប្រមាណពី1,500មីលី្លក្រាមទៅ2,500មីលីក្រាម។ សារធាតុសូដ្យូម ជួយក្នុងការគ្រប់គ្រងបរិមាណជាតិទឹកសរុប និងកម្រិត pH នៅក្នុងរាងកាយ។ វាក៏ដើរតួនាទីយ៉ាងសំខាន់ក្នុងមុខងារសរសៃប្រសាទ និងការកន្ត្រាក់សាច់ដុំ។ សូដ្យូម មាននៅក្នុងប្រភេទទឹករ៉ែ និងអំបិល។

5. ម៉ាញ៉េស្យូម
រាងកាយរបស់អ្នកត្រូវការជាតិរ៉ែម៉ាញ៉េស្យូមប្រហែល350មីលី្លក្រាមទៅ420មីល្លីក្រាម នៅក្នុងរបបអាហាររបស់អ្នក។ ជាតិម៉ាញ៉េស្យូមអាចជួយភ្ញោចអង់ហ្ស៊ីម និងគ្រប់គ្រងតុល្យភាពអេឡិចត្រូលីត្រនៅក្នុងរាងកាយ។ ម៉ាញ៉េស្យូម មាននៅក្នុងអាហារ និងផ្លែឈើដូចជា ក្រូចឆ្មារ ទឹកដូង ផ្លែទៀប ផ្លែពុទ្រា និងផ្លែឈូកជាដើម៕

December 29, 2018

7 សញ្ញាគ្រោះថ្នាក់ ដែលប្រាប់ថា ដល់ពេលព្យាបាល ឫសធ្មេញ ហើយ

អាការឈឺធ្មេញ អាចបញ្ជាក់ប្រាប់អំពីអាការខុសប្រក្រតីរបស់ធ្មេញបានច្រើនយ៉ាង មិនថាតែធ្មេញពុក ធ្មេញទាល់ ធ្មេញបែក ឬរលាកអញ្ចាញធ្មេញនោះឡើយ តែបើជាអាការដែលបង្ហាញថា ឫសធ្មេញរបស់លោកអ្នកដល់ពេលវេលាត្រូវចូលទៅទទួលការជួសជុលជាបន្ទាន់វិញនោះ ច្រើនតែមានសញ្ញាគ្រោះថ្នាក់ដែលខ្លាំងជាងគ្រាន់តែឈឺធ្មេញធម្មតា។

សញ្ញាគ្រោះថ្នាក់… ដល់ពេលត្រូវព្យាបាល ឫសធ្មេញ ហើយ
1. កើតអាការឈឺធ្មេញពើតៗ តាមចង្វាក់លោតរបស់ជីពចរ។
2. ឈឺធ្មេញខ្លាំងពេលទំពា និងខាំអាហារ។
3. ឈឺ និងហើមអញ្ចាញដោយសារអាការអញ្ចាញធ្មេញឆ្លងមេរោគ។
4. ឈឺនៅពេលធ្មេញប៉ះគ្នា។
5. ឈឺធ្មេញដោយមិនដឹងមូលហេតុ។
6. ឈឺធ្មេញ សូម្បីតែពេលគេងនៅពេលយប់។
7. ឈឺធ្មេញដោយមិនចាំបាច់មានអ្វីមកជំរុញដូចជា ទឹកត្រជាក់ ឬអាហារដែលមានរសជាតិផ្អែម(នំ ឬបង្អែម)។

ហេតុអ្វីយើងត្រូវព្យាបាលឫសធ្មេញ?
ដោយសារឫសធ្មេញអាចមានភាពខុសប្រក្រតីដោយសារការឆ្លងមេរោគ ការរលាក តាមរយៈអាការធ្មេញពុកធ្លុះទៅដល់បណ្ដុំប្រសាទធ្មេញ មានធ្មេញដែលប្រេះ ឬបែករហូតទៅដល់បណ្ដុំសរសៃប្រសាទធ្មេញ ធ្មេញបានទទួលការបុកប៉ះខ្លាំងរហូតខូចខាតដោយសារគ្រោះថ្នាក់ឧប្បត្តិហេតុ រហូតធ្វើឱ្យមេរោគចូលទៅបំផ្លាញបណ្ដុំសរសៃប្រសាទធ្មេញនៅខាងក្នុងបាន។

តើត្រូវធ្វើដូចម្ដេច នៅពេលត្រូវព្យាបាលឫសធ្មេញ?
បច្ចុប្បន្នមានវិធីព្យាបាលឫសធ្មេញជាច្រើនដែលពាក់ព័ន្ធ វាអាស្រ័យលើភាពធ្ងន់ធ្ងររបស់ឫសធ្មេញដែលត្រូវបំផ្លាញ និងការពិនិត្យវិនិច្ឆ័យរបស់លោកគ្រូពេទ្យ។ ចាប់ផ្ដើមតាំងពីការរ៉ធ្មេញដើម្បីបើកផ្លូវចូលឆ្ពោះទៅរកបណ្ដុំសរសៃប្រសាទធ្មេញ កម្ចាត់សាច់ភ្នាសដែលមានឆ្លងមេរោគចោល លាងសម្អាតចង្អូរឫសធ្មេញ ដើម្បីមិនឱ្យមេរោគត្រឡប់ចូលមកជាថ្មីទៀត។ បន្ទាប់ពីនោះទើបងាកមកស្ដារសភាពឫសធ្មេញជាបណ្ដើរៗឡើងវិញ ដែលមានតាំងពីការដាក់ដាំបង្គោលធ្មេញ ការបណ្ដុះឆ្អឹង បណ្ដុះសាច់អញ្ចាញ (បើសិនចាំបាច់) រួមទៅដល់ការបិទប្រហោងធ្មេញ ធ្វើឱ្យធ្មេញត្រឡប់មកមានរូបរាងលក្ខណៈដូចដើមវិញជាដើម ដែលអ្នកជំងឺនឹងអាចប្រើប្រាស់ធ្មេញទំពាអាហារ និងមើលថែទាំសម្អាតដោយការដុសធ្មេញ និងប្រើអំបោះខាត់ធ្មេញបានដូចប្រក្រតី។

ការថែរក្សាធ្មេញយ៉ាងត្រឹមត្រូវ ដើម្បីការពារបណ្ដុំសរសៃប្រសាទធ្មេញដែលត្រូវបំផ្លាញ
1. សម្អាតធ្មេញដោយការដុសធ្មេញ និងប្រើអំបោះខាត់សម្អាតធ្មេញយ៉ាងត្រូវតាមវិធី យ៉ាងតិចក្នុងមួយថ្ងៃ 2ដង ព្រឹក-ល្ងាច ឬប្រើអំបោះខាត់សម្អាតធ្មេញគ្រប់ពេលក្រោយបរិភោគអាហារ។
2. មិនប្រើធ្មេញខាំត្របាក់ ខាំបំបែករបស់រឹងៗ ឬខាំទាញវត្ថុស្វិតៗ ព្រោះអាចធ្វើឱ្យធ្មេញរងការខូចខាត។
3. បើទទួលគ្រោះថ្នាក់ឧប្បត្តិហេតុដែលធ្វើឱ្យធ្មេញបាក់បែកខូចខាត ដូចជា របើកធ្មេញប្រេះ បែកជាដើមនោះ គួរប្រញាប់ទៅជួបលោកគ្រូពេទ្យដើម្បីធ្វើការព្យាបាលទាន់ពេលវេលា។
4. បើមានអាការឈឺធ្មេញ ឈឺអញ្ចាញធ្មេញ ឬមានភាពខុសប្រក្រតីផ្សេងៗ ដូចជា មានក្លិនមាត់មិនល្អខ្លាំងជាដើម គួរប្រញាប់ទៅជួបទន្តពេទ្យ។
5. ទៅជួបទន្តពេទ្យរៀងរាល់6ខែម្ដង៕

December 29, 2018

អ្នកជំនាញលក់អចលនទ្រព្យបង្ហាញគន្លឹះរកលុយក្នុងវិស័យអចលនទ្រព្យដោយមិនបាច់ប្រើដើមទុន

កម្ពុជាត្រូវបានគេមើលឃើញថា កំពុងស្ថិតក្នុងយុគសម័យអចលនទ្រព្យរុងរឿង ដែលផ្តល់ឱកាសដល់ប្រជាពលរដ្ធគ្រប់ស្រទាប់វណ្ណៈ មិនថាតែអ្នកមានជំនាញលើផ្នែកនេះទេ សូម្បីតែប្រជាពលរដ្ឋទូទៅ មន្ត្រីរាជការ ប៉ូលិស ទាហាន គ្រូបង្រៀន គ្រូពេទ្យ ឬអ្នកធ្វើការក្រុមហ៊ុនឯកជននោះទេ គឺសុទ្ធតែអាចរកប្រាក់ពីវិស័យអចលនទ្រព្យបានទាំងអស់ ដោយមិនចាំបាច់ប្រើដើមទុន ហើយមានឱកាសក្លាយជាអ្នកមានក្នុងរយៈពេលខ្លីទៀតផង។

ដើម្បីផ្តល់ជាទុនក្នុងការរកប្រាក់ក្នុងវិស័យអចលនទ្រព្យនេះ អ្នកយកព័ត៌មាននៃកាសែតឡារ៉ែនពាណិជ្ជ បានជួបសម្ភាសផ្ទាល់ជាមួយលោក គង់ តារា ដែលជាគ្រូបណ្តុះបណ្តាល និងជាប្រធានផ្នែកលក់នៃគម្រោងអចលនទ្រព្យដ៏ធំមួយនៅកម្ពុជា ដែលមានសំណួរ និងចម្លើយដូចខាងក្រោម៖

1. តើធ្វើយ៉ាងណាដើម្បីក្លាយជាភ្នាក់ងារអចលនទ្រព្យដែលអាចរកប្រាក់កម្រៃបានច្រើន?
ដំបូងបំផុតមុននឹងទទួលគម្រោងលក់ យើងត្រូវសិក្សាពីគម្រោងនីមួយៗទាំងនោះសិនថា តើគម្រោងនេះមានទំហំធំប៉ុនណា? ហើយទីតាំងគម្រោងនោះមានសក្តានុពលល្អក្នុងការទាក់ទាញអតិថិជនឱ្យមកទិញបានច្រើនដែរឬទេ? ជាពិសេសត្រូវសិក្សាអំពីម្ចាស់គម្រោងថា តើគាត់មានការទទួលខុសត្រូវកម្រិតណា និងមានការផ្តល់ជូនប្រាក់កម្រៃជើងសាទៀងទាត់ដែរឬទេ?។

ក្រុមអ្នកបណ្តុះបណ្តាលជំនាញលក់អចលនវត្ថុថតរូបជុំគ្នា

បន្ថែមពីនេះមុននឹងចូលប្រឡូកក្នុងវិស័យនេះ ត្រូវពិចារណាជាមុនសិនថា តើយើងគួរត្រូវចូលរួមជាមួយក្រុមណាដែលយើងគិតថា មានសមត្ថភាពពេញលេញ មានបទពិសោធគ្រប់គ្រាន់ក្នុងការដឹកនាំកូនក្រុម ព្រោះសម្រាប់ប្រធានក្រុមម្នាក់ មិនត្រឹមតែផ្តល់ឱកាសក្នុងការលក់តែមួយមុខប៉ុណ្ណោះទេ តែថ្នាក់ដឹកនាំត្រូវរៀបចំសិក្ខាសាលាបណ្តុះបណ្តាលយើងបន្ថែមទៀត។ បណ្តុះបណ្តាលើវិស័យអចលនទ្រព្យ បណ្តុះបណ្តាលលើជំនាញផ្នែកលក់ ផ្នែកទំនាក់ទំនងអតិថិជន និងជំនាញហិរញ្ញវត្ថុជាដើមហើយត្រូវបណ្តុះបណ្តាល និងហ្វឹកហាត់ជាប់ជាប្រចាំទៀតផង។ ឧទាហរណ៍សាមញ្ញបំផុតគឺ បើចង់ជោគជ័យ ត្រូវដើរតាមអ្នកដែលជោគជ័យ ព្រោះនៅពេលគាត់ទទួលបានលទ្ធផល យើងក៏ទទួលបានលទ្ធផលដូចគ្នា។

2. លោកបានមានប្រសាសន៍ថា ធ្វើការក្នុងវិស័យនេះ មិនចាំបាច់មាននដើមទុនក៏អាចរកប្រាក់ចំណេញត្រឡប់មកវិញបានច្រើនដែរ…តើគេអាចរកប្រាក់បានតាមវិធីបែបណា?
ការពិតទៅសម្រាប់ការងារជាភ្នាក់ងារអចលនទ្រព្យ មិនចាំបាច់មានដើមទុននោះទេ ឱ្យតែគាត់មានឆន្ទៈមុះមុតក្នុងការចាប់យកឱកាសការងារបែបនេះ គាត់នឹងទទួលបានផលកម្រៃត្រឡប់ទៅវិញបានយ៉ាងច្រើនមិនខាន។ ផលតបស្នងទទួលបានត្រឡប់ទៅវិញច្រើនលើសពីប្រាក់ខែរាប់សិបដង ជាក់ស្តែងក្រុមការងារផ្ទាល់របស់ខ្ញុំ ធ្វើការត្រឹមតែរយៈពេល 6ខែប៉ុណ្ណោះក៏អាចរកសល់ប្រាក់សម្រាប់ទិញឡាន ទិញផ្ទះរស់នៅផ្ទាល់ខ្លួនបាន និងមានសមត្ថភាពឱ្យកូនបានចូលរៀនសាលាល្អៗទៀតផង។ ឧទាហរណ៍ សម្រាប់និស្សិតបញ្ចប់ការសិក្សាថ្នាក់បរិញ្ញាបត្រ ប្រាក់ខែរបស់គាត់ទទួលបានចន្លោះពី200 ទៅ300ដុល្លារប៉ុណ្ណោះ ប៉ុន្តែសម្រាប់ការងារប្រភេទនេះ អ្នកខ្លះអាចរកប្រាក់បានខ្ទង់ពាន់ និងខ្ទង់ម៉ឺនក៏មានដែរក្នុងមួយខែ។ នេះមិនមែនលើកឡើងតែតាមទ្រឹស្តីនោះទេ គឺជាក់ស្តែងអ្នកខ្លះ ប្រវត្តិគាត់ធ្លាប់ធ្វើការងារផ្នែកសន្តិសុខ កម្មករសំណង់ ប្រាក់ខែជាង100ដុល្លារ ពេលមកចូលរួមធ្វើជាភ្នាក់ងារលក់អចលនទ្រព្យ អាចរកប្រាក់បានខ្ទង់ម៉ឺនអស់ទៅហើយ។ ដើមឡើយពួកគាត់មិនហ៊ានបោះបង់ការងារចាស់នោះទេ តែនៅពេលចេញទៅធ្វើការផ្នែកនេះបានមួយខែ ឬពីរខែ គាត់សម្រេចចិត្តបោះបង់ការងារចាស់ចោលតែម្តង ដោយសារប្រាក់កម្រៃដែលទទួលបានត្រឡប់មកវិញវាច្រើន ដែលគាត់មិនធ្លាប់គិតដល់ និងអាចសម្រេចគោលដៅរបស់ខ្លួនសម្រាប់ថ្ងៃអនាគតបាន។

3. ក្នុងនាមជាភ្នាក់ងារអចលនទ្រព្យម្នាក់ តើគេត្រូវប្រកាន់ឥរិយាបថដូចម្តេចដើម្បីផ្តល់ទំនុកចិត្តខ្ពស់ទៅដល់អតិថិជន?
ធ្វើការជាភ្នាក់ងារអចលនទ្រព្យលក់ដីឡូត៍ លក់ផ្ទះល្វែង ឬខុនដូ មិនមែនដូចលក់ទំនិញនៅផ្សារនោះទេ ពោលគឺអតិថិជនត្រូវចំណាយលុយច្រើនក្នុងការទិញទំនិញប្រភេទនេះ ដូច្នេះគាត់ត្រូវតែគិតពិចារណាខ្ពស់ទៅលើផលិតផល ក៏ដូចជាមានទំនុកចិត្តមកលើអ្នកលក់។ សម្រាប់ការងារប្រភេទនេះ តម្រូវឱ្យភ្នាក់ងារលក់ធ្វើការគោរពទៅតាមវិជ្ជាជីវៈជាដាច់ខាត ត្រូវចេះមើលអតិថិជនថា តើគាត់មានទំហំទឹកប្រាក់ទិញកម្រិតណា ដើម្បីដាក់ផលិតផលយើងទៅឱ្យចំតម្រូវការជាក់ស្តែងដែលអាចគាត់ទទួលយកបាន ពិសេសផ្តល់ជម្រើសទៅតាមលទ្ធភាពដែលគាត់មាន។ ឧទាហរណ៍ថា បើគាត់មានប្រាក់ 2ម៉ឺនដុល្លារ តើគាត់គួរវិនិយោគទៅលើអ្វី? គួរទិញដី? ទិញផ្ទះ ឬទិញខុនដូ? ហើយយើងត្រូវប្រាប់គាត់ថាបើចង់ទិញយកចំណេញត្រឡប់មកវិញលឿន គួរតែទិញអចលនទ្រព្យប្រភេទណាមួយ។ នៅពេលទិញហើយ តើគាត់ត្រូវរើសយកជម្រើសនៃការបង់ប្រាក់ប្រភេទណា? បង់រំលស់គ្មានការប្រាក់? បង់រំលស់ជាមួយធនាគារ ឬបង់ផ្តាច់តែម្តង? ចៀសវាងការទិញហើយជួបហានិភ័យធ្វើឱ្យជូបការលំបាកក្នុងជីវភាព ជាពិសេសពេលមានតម្រូវការលក់ យើងត្រូវរកគ្រប់មធ្យោបាយដើម្បីលក់ចេញជាបន្ទាន់ឱ្យគាត់វិញ។

4. កត្តាអ្វីខ្លះដែលភ្នាក់ងារអចលនទ្រព្យត្រូវដឹង មុនចេញលក់គម្រោងអចលនទ្រព្យណាមួយ?
អ្វីដែលសំខាន់ ភ្នាក់ងារលក់ត្រូវតែយល់ឱ្យច្បាស់ពីផលិតផលរបស់ខ្លួន និងអតិថិជនគោលដៅជាពិសេសវិធីសាស្ត្រក្នុងការនិយាយ ក្នុងការចរចា ឬភាពបត់បែន។ នៅពេលដែលអតិថិជនចាប់អារម្មណ៍មកលើគម្រោងយើងហើយ តែគាត់មានលក្ខខណ្ឌដែលតម្រូវឱ្យយើងត្រូវដោះស្រាយជាបន្ទាន់ ដែលក្នុងករណីនេះយើងត្រូវសុំប្រឹក្សាយោបល់ពីថ្នាក់ដឹកនាំគម្រោងជាបន្ទាន់ផងដែរ។ ក្នុងនាមជាភ្នាក់ងារអចលនទ្រព្យ ត្រូវមានការតាំងចិត្តខ្ពស់ ចេះទទួលយកការបដិសេធរបស់អតិថិជន ព្រោះថា អតិថិជនមិនមែនមកមួយ ទិញមួយទេ ហើយក៏មិនសូវសម្រេចចិត្តទិញភ្លាមៗដែរ។ តាមបទពិសោធអតិថិជនភាគច្រើន ពេលមកដល់គាត់តែងពេញចិត្តគម្រោងនោះទៅលើសោភណភាព គុណភាព និងតម្លៃជាដើម តែយ៉ាងណាក៏ដោយអតិថិជនមួយចំនួនតែងសុំពេលគិតជាមួយក្រុមគ្រួសារជាមុនសិន មុននឹងសម្រេចចិត្តទិញ។

5. តើទៅថ្ងៃអនាគតក្នុងរយៈពេល 5ឆ្នាំខាងមុខ តើការងារប្រភេទនេះនឹងត្រូវបាត់បង់ លែងមានឱកាសរកប្រាក់បាន ឬនៅតែរកបានបន្តទៀត?
ខ្ញុំជឿថាការងារក្នុងវិស័យអចលនទ្រព្យមិនសាបសូន្យទេ អចលនទ្រព្យនៅប្រទេសណាក៏នៅតែមានឱកាស ទោះជាប្រទេសនោះអភិវឌ្ឍដល់ចំណុចកំពូលក៏ដោយ ក៏ភ្នាក់ងារលក់នៅប្រទេសនោះនៅតែមានឱកាសរកប្រាក់ចំណេញបានច្រើនដដែល។ ងាកមកប្រទេសកម្ពុជា វិស័យអចលនទ្រព្យនៅក្មេងខ្ចីនៅឡើយ ការកសាងសំណង់អគារខ្ពស់ៗនៅមានកម្រិតនៅឡើយ ដូច្នេះយើងនៅមានឱកាសច្រើនឆ្នាំទៀត ទោះអំឡុងពេលខាងមុខអចលនទ្រព្យឡើងថ្លៃជាបន្តបន្ទាប់ក៏ដោយ ក៏នៅតែមានតម្រូវការទិញដែរ ព្រោះចំណូលប្រជាពលរដ្ឋក៏កាន់តែប្រសើរឡើងជាលំដាប់ផងដែរ។

6. តើលោកអាចផ្តល់អនុសាសន៍ផ្ទាល់ខ្លួនបានទេថា ក្នុងនាមជាភ្នាក់ងារអចលនទ្រព្យ ត្រូវមានផ្នត់គំនិតដូចម្តេច ដើម្បីឱ្យការងារកាន់តែរីកចម្រើនទៅមុខជានិច្ច?
ភ្នាក់ងារអចលនទ្រព្យមិនត្រូវភ្លេចអភិវឌ្ឍខ្លួនឯងទេ ទោះជាយើងកំពុងធ្វើជោគជ័យក៏ដោយ ប៉ុន្តែស្ថានភាពអចលនទ្រព្យចេះតែមានការវិវឌ្ឍផ្លាស់ប្តូរទៅមុខជានិច្ចពីមួយថ្ងៃទៅមួយថ្ងៃ ការប្រកួតប្រជែងក៏មានការផ្លាស់ប្តូរ ឥរិយាបថនៃការទិញរបស់អតិថិជនក៏មានការផ្លាស់ប្តូរ ដូច្នេះតម្រូវឱ្យភ្នាក់ងារអ្នកលក់មានភាពប៉ិនប្រសប់ មានជំនាញកាន់តែខ្លាំងឡើងៗដូចគ្នា។ ដូច្នេះសម្រាប់ខ្លួនខ្ញុំផ្ទាល់តែងទៅរៀននៅក្រៅប្រទេសដើម្បីយកចំណេះ-ដឹងមកបណ្តុះបណ្តាលបន្តដល់កូនក្រុម ឱ្យគាត់មានចំណេះដឹងកាន់តែទូលំទូលាយខ្លាំងឡើងៗ ដើរតាមឱ្យទាន់ការអភិវឌ្ឍទីផ្សារផ្នែកនេះ៕

December 29, 2018

ទីផ្សារអាផាតមិននឹងកើនឡើងលើសទ្វេដងនៅចន្លោះឆ្នាំ2018-2030

ក្រុមហ៊ុន Vtrust Appraisal បានរកឃើញតាមរយៈការសិក្សាថ្មីមួយ និងបានព្យាករថា ចំនួនអាផាតមិននៅកម្ពុជាបច្ចុប្បន្នដែលមានចំនួន 9,021យូនិតនេះ នឹងកើនឡើងលើសទ្វេដងនៅត្រឹមឆ្នាំ2030ខាងមុខ។

លទ្ធផលការសិក្សាស្រាវជ្រាវដែលបានបង្ហាញដោយក្រុមហ៊ុន Vtrust Appraisal នៅសណ្ឋាគារ Raffle Le Royal បានឱ្យដឹងថា បច្ចុប្បន្ននៅរាជធានីភ្នំពេញមានអាផាតមិនចំនួន 355គម្រោង ស្មើនឹង 9,025យូនិត។ ការព្យាកររបស់ក្រុមហ៊ុននេះបានឱ្យដឹងថា នៅត្រឹមឆ្នាំ2030 ចំនួនអាផាតមិននឹងកើនដល់ 28,000យូនិត ជាការកើនឡើងក្នុងសេណារីយោធម្មតាបើពិនិត្យមើលពីចំនួនប្រជាសាស្ត្រ និងការផ្គត់ផ្គង់បច្ចុប្បន្ន។

នាយកផ្នែកស្រាវជ្រាវនៃក្រុមហ៊ុន Vtrust Appraisal លោក ហ៊ឹម សីហា បានមានប្រសាសន៍ក្នុងរបាយការណ៍ព័ត៌មានដែលបានចែកចាយដល់បណ្តាញសារព័ត៌មានថា ការផ្គត់ផ្គង់អាផាតមិនមានកំណើន 10%ប្រចាំឆ្នាំ ឬស្មើនឹង 1,580យូនិតប្រចាំឆ្នាំ ចាប់ពីបច្ចុប្បន្នរហូតដល់ឆ្នាំ2030។

ស្របទៅនឹងការសិក្សានេះគេបានរកឃើញថាខណ្ឌចំការមន ខណ្ឌទួលគោក ខណ្ឌ7មករា និងខណ្ឌដូនពេញដែលមានចំនួនអាផាតមិនច្រើនជាងគេ។ ខណ្ឌចំការមន មានចំនួនអាផាតមិនច្រើនជាងគេរហូតដល់ 230គម្រោង ស្មើនឹង 5,820យូនិត និងគ្របដណ្តប់ 64%នៃចំណែកផ្គត់ផ្គង់ទីផ្សារទាំងមូល។ ខណ្ឌជាប់លំដាប់ទី2 គឺខណ្ឌទួលគោក ដែលអាផាតមិននៅក្នុងខណ្ឌនេះគ្របដណ្តប់បាន16%នៃចំណែកទីផ្សារទាំងមូល ចំណែកខណ្ឌ7មករា និងខណ្ឌដូនពេញ មានអាផាតមិនចំនួន635 និង590យូនិតរួមគ្នា។

របាយការណ៍សិក្សាខាងលើបានឱ្យដឹងទៀតថា នៅក្នុងដំណាច់ត្រីមាសទី4នេះ អាផាតមិនចំនួន7,600យូនិតត្រូវបានជួល ដែលស្មើនឹងអត្រាគ្របដណ្តប់ការប្រើប្រាស់សរុប84% នៅទូទាំងរាជធានីភ្នំពេញ។ របាយការណ៍ដដែលបានឱ្យដឹងទៀតថា ក្នុងចំណោមអាផាតមិនទាំងនោះ បន្ទប់អាផាតមិន1បន្ទប់គេងមានការផ្គត់ផ្គង់ច្រើនជាងគេក្នុងទីផ្សារ ស្មើនឹង 55%នៃចំនួនបន្ទប់អាផាតមិនសរុប និងអាផាតមិន 2បន្ទប់គេង ស្មើនឹង 34%នៃចំណែកទីផ្សារសរុប។

ឧកញ៉ា នួន រិទ្ធី អគ្គនាយកក្រុមហ៊ុន Khmer Foundation Appraisal បានមានប្រសាសន៍ប្រាប់ឡារ៉ែនពាណិជ្ជថា លោកមិនបានដឹងស៊ីជម្រៅលើបញ្ហានៃការកើនឡើងនៃចំនួនយូនីតអាផាតមិនទេ តែយើងមើលឃើញការកើនឡើងនូវអគារសំណង់កម្ពស់ចាប់ពី 9ជាន់ ដល់55ជាន់ឡើងទៅមានច្រើនហើយយើងក៏សង្កេតឃើញដែរថា ពី1ឆ្នាំ ទៅ1ឆ្នាំ អគារ អាផាតមិនខ្ពស់ៗបានកើនឡើងជិតទ្វេដងដែរ។ ពោលគឺតម្រូវការទីផ្សារអាផាតមិននាពេលបច្ចុប្បន្ននេះ ពិតជាកំពុងមានសម្ទុះខ្លាំងប្រាកដមែន។

លោកឧកញ៉ាយល់ស្របទៅនឹងរបាយការណ៍ខាងលើ ដោយលោកបានលើកឡើងថា របាយការណ៍នេះមិនបានវាយតម្លៃលើការកើនឡើងខ្ពស់ពេកទេ តែបើធៀបជាមួយស្ថានភាពបច្ចុប្បន្ន រួមជាមួយនឹងកំណើនសេដ្ឋកិច្ចដែលមាននិរន្តរភាព គួបជាមួយគោលនយោបាយដ៏ល្អប្រសើរ ភាពទាក់ទាញការវិនិយោគក្រៅប្រទេសក៏ច្រើន ការបណ្តាក់ទុនក្នុងស្រុកក៏ច្រើននោះ យើងឃើញថា ក្នុងវិស័យអចលនទ្រព្យយើងនេះមានការអភិវឌ្ឍស្ទើរគ្រប់ផ្នែក។

លោកឧកញ៉ា នួន រិទ្ធី បានបញ្ជាក់ថា បើតាមការសង្កេតឃើញជាក់ស្ដែង អាផាតមិនដែលកំពុងមានតម្រូវការក្នុងរាជធានីភ្នំពេញ គឺភាគច្រើនៗស្ថិតនៅក្នុងខណ្ឌចំនួន4 ដូចជាខណ្ឌចំការមន ខណ្ឌដូនពេញ ខណ្ឌទួលគោក និងខណ្ឌ7មករា។ ដោយឡែកចំពោះអាផាតមិនដែលស្ថិតនៅក្នុងខណ្ឌចំការមន ជាពិសេសម្ដុំទួលទំពូងតែម្ដង ត្រូវបានគេកត់សម្គាល់ឃើញថា ក្រៅពីមានតម្រូវការជួលស្នាក់នៅច្រើនហើយ តម្លៃក៏ខ្ពស់គួរសមដែរ។

លោកឧកញ៉ា នួន រិទ្ធីបានបន្តថា ពាក់ព័ន្ធនឹងការអភិវឌ្ឍហេដ្ឋារចនាសម្ព័ន្ធ យើងនៅមានចំណុចខ្វះខាត យើងទទួលស្គាល់ថា ទាក់ទងនឹងការកែប្រែតំបន់មួយចំនួនពីតំបន់លំនៅឋានឱ្យទៅជាតំបន់ពាណិជ្ជកម្ម ពីតំបន់វាលរហោស្ថាន ឱ្យទៅជាតំបន់ឧស្សាហកម្ម តំបន់លំនៅឋាន ឬពាណិជ្ជកម្មពិតជាមានការកើនឡើងលឿនជាងការគ្រោងទុករបស់រាជរដ្ឋាភិបាលទៅទៀត ដោយសារតែការអភិវឌ្ឍ និងការបណ្តាក់ទុនមានការកើនឡើងយ៉ាងឆាប់រហ័ស ធ្វើឱ្យយើងក្នុងនាមជាអ្នកផ្គត់ផ្គង់សម្ភារនិងហេដ្ឋារចនាសម្ព័ន្ធ ដូចជាទឹក ភ្លើងជាដើមស្ទើរតែមិនបានរៀបចំទាន់ពេលវេលាផងនៅតំបន់ខ្លះ៕

December 28, 2018

អ្នកជំនាញ៖ កម្មវិធីអនុគ្រោះពន្ធ EBA នៅតែចាំបាច់ក្នុងការអភិវឌ្ឍសេដ្ឋកិច្ចជាតិ

សហគមន៍អឺរ៉ុបជាទីផ្សារធំ និងសំខាន់ជាងគេបំផុតសម្រាប់ទទួលយកទំនិញគ្រប់ប្រភេទ លើកលែងតែអាវុធ(EBA)ពីកម្ពុជាដែលជួយឱ្យសេដ្ឋកិច្ចកម្ពុជាមានការកើនឡើងជាបន្តបន្ទាប់ពីមួយឆ្នាំទៅមួយឆ្នាំ ជាពិសេសបានចូលរួមចំណែកផ្តល់ការងារដល់ពលរដ្ឋខ្មែរជិត 1លាននាក់ និងជួយឱ្យកម្រិតជីវភាពពលរដ្ឋខ្មែរមានភាពល្អប្រសើរឡើងជាលំដាប់ផងដែរ។

ឯកឧត្តម ពេជ ឫទ្ធី អនុរដ្ឋលេខាធិការក្រសួងពាណិជ្ជកម្មបានគូសបញ្ជាក់ពីសារៈសំខាន់នៃកម្មវិធីអនុគ្រោះពន្ធ “អ្វីៗទាំងអស់លើកលែងអាវុធ (EBA)” ដែលផ្តល់ដោយសហភាពអឺរ៉ុប តាំងពីឆ្នាំ2001មកនោះ គឺបានរួមចំណែកអភិវឌ្ឍកំណើនសេដ្ឋកិច្ច និងធ្វើពិពិធកម្មឱកាសការងារជូនប្រជាជនជាង 7សែននាក់ដែលភាគច្រើនជាស្ត្រីមកពីតំបន់ជនបទ។

ករណីនេះ ឯកឧត្តមបានស្នើដល់អ្នកវិនិយោគ ផលិតករ ពាណិជ្ជករ និងអ្នកនាំចេញទំនិញទៅទីផ្សារអឺរ៉ុបទាំងអស់ឱ្យខិតខំប្រឹងប្រែងសិក្សាស្វែងយល់ពីចំណេះដឹងថ្មីៗទាក់ទងនឹងនីតិវិធីចុះឈ្មោះតាមប្រព័ន្ធចុះបញ្ជីអ្នកនាំចេញ (Registered Exporter REX) សម្រាប់ទីផ្សារសហភាពអឺរ៉ុប ដោយហេតុថា ចាប់ពីថ្ងៃទី1 ខែមករា ឆ្នាំ2019ទៅ អ្នកនាំចេញទាំងអស់នឹងតម្រូវឱ្យធ្វើការចុះឈ្មោះជាមួយប្រព័ន្ធថ្មីនេះទើបមានសិទ្ធិនាំចេញទំនិញទៅកាន់សហភាពអឺរ៉ុប។

ឯកឧត្តមបញ្ជាក់ថា ការនាំចេញរបស់កម្ពុជាទៅសហភាពអឺរ៉ុបកាលពីឆ្នាំ2017 មានទឹកប្រាក់សរុប 4.343លានដុល្លារអាមេរិក គឺបានកើនឡើង 10.22% បើធៀបនឹងឆ្នាំ2016 ដែលមានទឹកប្រាក់សរុបត្រឹមតែ 3.941លានដុល្លារអាមេរិកប៉ុណ្ណោះ។

លោក សន ជ័យ នាយកអង្គការសម្ព័ន្ធគណនេយ្យភាពសង្គមកម្ពុជា ហៅកាត់ថា អានសា (ANSA) បានមានប្រសាសន៍គាំទ្រចំពោះការបើកចំហទទួលយកទំនិញគ្រប់ប្រភេទលើកលែងតែអាវុធ (EBA) ពីកម្ពុជារបស់សហគមន៍អឺរ៉ុប។ លោកថា ការទទួលយកទំនិញពីកម្ពុជានេះ បានចូលរួមចំណែកសំខាន់ក្នុងការជួយដល់កំណើនសេដ្ឋកិច្ចកម្ពុជាឱ្យក្លាយជាប្រទេសមានការរីកចម្រើនលើគ្រប់វិស័យ មិនមែនតែលើវិស័យកាត់ដេរ វិស័យមីក្រូហិរញ្ញវត្ថុ ឬវិស័យដឹកជញ្ជូនប៉ុណ្ណោះទេ ហើយក៏មិនមែនផ្តល់ប្រយោជន៍ផ្ទាល់ចំពោះតែកម្មករ-កម្មការិនីនោះដែរ តែវាបានរួមចំណែកដោយប្រយោលជាប្រព័ន្ធ ដូចជាជួយដល់អ្នកផ្គត់ផ្គង់បន្ទប់ស្នាក់នៅ ជួយដល់អ្នកលក់ដូរទំនិញគ្រប់ប្រភេទនៅលើទីផ្សារ ជួយដល់អ្នកប្រកបរបរដឹកកម្មករ និងជួយឱ្យដីធ្លីឡើងថ្លៃ មានន័យថា រោងចក្រទៅដល់ទីណាដីធ្លីនៅទីនោះឡើងខ្លាំងភ្លាម។

ដើម្បីទទួលបានអត្ថប្រយោជន៍ទៅថ្ងៃអនាគត លោកស្នើដល់រដ្ឋាភិបាលកម្ពុជាធ្វើយ៉ាងណាបន្ទន់ឥរិយាបថក្នុងការដោះស្រាយជាមួយគណៈកម្មការសហគមន៍អឺរ៉ុបបន្តទៀត ព្រោះថា មកទល់ដំណាក់កាលនេះ ការបន្ត ឬព្យួរ(EBA) គឺស្ថិតនៅក្នុងកណ្តាប់ដៃរដ្ឋាភិបាលកម្ពុជា ហើយបើនៅបន្ត មានន័យថាកម្ពុជានៅតែរីកចម្រើនទៅមុខជាលំដាប់ ប៉ុន្តែបើសិនជាមានការព្យួរ (EBA) សេដ្ឋកិច្ចកម្ពុជាអាចនឹងមានការប្រែប្រួល។

លោក ង៉ែត ជូ អ្នកវិភាគសេដ្ឋកិច្ចមានប្រសាសន៍ថា កម្ពុជាគួររកវិធីសាស្ត្រដោះស្រាយដោយឈរលើគោលនយោបាយឈ្នះៗ ឈ្នះទាំងពាណិជ្ជករអ្នកនាំចេញ ឈ្នះទាំងភាគីរដ្ឋាភិបាលក្នុងទទួលបានការអនុគ្រោះពន្ធបន្តពីសហគមន៍អឺរ៉ុបបន្តទៅឆ្នាំក្រោយៗទៀត។ ជាមួយគ្នានេះលោកចង់ឱ្យរដ្ឋាភិបាលត្រៀមខ្លួនមុនពេលមានការផ្តាច់(EBA) តាមរយៈការធ្វើពិពិធកម្មបង្វែទិសក្នុងការអភិវឌ្ឍលើវិស័យមួយចំនួនទៀតដែលមានសក្តានុពលនៅកម្ពុជា ពិសេសកែលម្អវិស័យទេសចរណ៍ កែច្នៃតំបន់ទេសចរណ៍ដែលមានស្រាប់ដើម្បីទាក់ទាញអ្នកទេសចរចូលមកទស្សនាឱ្យកាន់តែច្រើនឡើង ចំណែកវិស័យកសិកម្មក៏ត្រូវការការកែលម្អជាចាំបាច់ដែរ ជាពិសេសរៀបចំប្រព័ន្ធធារាសាស្ត្រដែលអនុគ្រោះដល់ការធ្វើដំណាំរបស់ប្រជាពលរដ្ឋបានច្រើនរដូវ ហើយគួរមានការផ្លាស់ប្តូរពីការនាំចេញផលិតផលសម្រេចមកធ្វើការកែច្នៃផលិតផលកសិកម្មទៅជាទំនិញសម្រាប់ដាក់លក់នៅលើទីផ្សារក្នុងប្រទេស ក៏ដូចជាក្រៅប្រទេស និងជាពិសេស អភិវឌ្ឍធនធានមនុស្សឱ្យកាន់តែខ្លាំងឡើងដើម្បីចូលរួមអភិវឌ្ឍប្រទេសឱ្យរីកចម្រើនបានឆាប់រហ័ស។

គួរតែបញ្ជាក់ដែរថា សហភាពអឺរ៉ុប តែងតែធ្វើបច្ចុប្បន្នភាពកម្មវិធីប្រព័ន្ធអនុគ្រោះពន្ធទូទៅជារៀងរាល់ 2ឆ្នាំម្តង ដើម្បីពង្រឹងតួនាទីរបស់សភាអឺរ៉ុបលើកិច្ចការនយោបាយ និងពាណិជ្ជកម្ម ដោយជំរុញបន្ថែមនូវគោលការណ៍គន្លឹះសំខាន់ៗសំដៅធានានិរន្តរភាពនៃការអភិវឌ្ឍ និងអភិបាលកិច្ចល្អ។ ក្នុងន័យនេះប្រព័ន្ធចុះបញ្ជីអ្នកនាំចេញ (REX) ត្រូវបានកំណត់នៅក្នុងបញ្ញត្តិប្រព័ន្ធអនុគ្រោះពន្ធទូទៅរបស់សហភាពអឺរ៉ុបលេខ244/2015 ចុះថ្ងៃទី24 ខែវិច្ឆិកា ឆ្នាំ2015 ដើម្បីសម្រួលពាណិជ្ជកម្ម និងកាត់បន្ថយនីតិវិធីស្មុគស្មាញសម្រាប់ការនាំចេញទំនិញទៅសហភាពអឺរ៉ុប៕

December 28, 2018

ដឹងទេថា មកទល់ដំណាច់ឆ្នាំ2018នេះ កម្ពុជាទទួលបានហិរញ្ញប្បទានពីចិនចំនួនប៉ុន្មាន?

បច្ចុប្បន្នហេដ្ឋារចនាសម្ព័ន្ធជាច្រើននៅកម្ពុជាដូចជាផ្លូវជាតិសំខាន់ៗ ស្ពានថ្នល់ ផ្លូវរថភ្លើងជាដើមភាគច្រើនជាជំនួយហិរញ្ញប្បទានរបស់រដ្ឋាភិបាលចិន ដែលរឿងនេះត្រូវបានគេសួរថា តើកត្តាអ្វីខ្លះ បានជាចិនផ្តល់ជំនួយដល់កម្ពុជាច្រើនដូច្នេះ?

តាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា រហូតមកទល់ពាក់កណ្តាលខែធ្នូ ឆ្នាំ2018នេះ ទំហំហិរញ្ញប្បទានសហប្រតិបត្តិការពីរដ្ឋាភិបាលនៃសាធារណរដ្ឋប្រជាមានិតចិនមានចំនួន 5,800លានដុល្លារសហរដ្ឋអាមេរិក ដែលក្នុងនោះឥណទានសម្បទានមានចំនួនសរុប 4,400លានដុល្លារអាមេរិក និងហិរញ្ញប្បទានក្នុងក្របខ័ណ្ឌនៃកិច្ចសហប្រតិបត្តិការសេដ្ឋកិច្ច និងបច្ចេកទេសចំនួនប្រមាណ 1,400លានដុល្លារអាមេរិក។

កម្ចីនេះបានផ្តល់ជាបន្តបន្ទាប់ក្នុងគម្រោងកែលម្អហេដ្ឋារចនាសម្ព័ន្ធនានា និងវិស័យមួយចំនួនទៀត ឧទាហរណ៍ដូចជា កាលពីសប្តាហ៍មុននេះឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានចុះហត្ថលេខាលើកិច្ចព្រមព្រៀងថ្មីមួយទៀតជាមួយលោក Deng Boqing អនុប្រធានទីភ្នាក់ងារចិនសម្រាប់កិច្ចសហប្រតិបត្តិការនៃសាធារណរដ្ឋប្រជាមានិតចិន។

កិច្ចព្រមព្រៀងទាំង2នេះរួមមាន 1.កិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច និងបច្ចេកទេសដែលមានហិរញ្ញប្បទាន 200លានយន់។ ថវិកាហិរញ្ញប្បទានឥតសំណងនេះ នឹងត្រូវប្រើប្រាស់សម្រាប់អនុវត្តគម្រោងលើកកម្ពស់ជីវភាពប្រជាជន និងគម្រោងសាងសង់ហេដ្ឋារចនាសម្ព័ន្ធសំខាន់ៗ និង2.កិច្ចព្រមព្រៀងក្របខ័ណ្ឌ ស្តីពីឥណទានសម្បទានជាប្រាក់យន់ចិនសម្រាប់អភិវឌ្ឍន៍អាងទឹករក្សាក្នុងខេត្តព្រះវិហារដែលមានទឹកប្រាក់ឥណទានចំនួន 622លានយន់។

ពាក់ព័ន្ធករណីនេះ លោក ង៉ែត ជូ អ្នកវិភាគសេដ្ឋកិច្ចសង្គមបានមានប្រសាសន៍ថា ធម្មតាទេ ប្រទេសដែលកំពុងអភិវឌ្ឍន៍ តែងត្រូវការប្រើប្រាស់កម្ចីសម្រាប់យកមកកសាងប្រទេស សាងសង់ហេដ្ឋារចនាសម្ព័ន្ធផ្សេងៗដើម្បីឱ្យប្រទេសមានការ-រីកចម្រើនទៅមុខឆាប់រហ័ស តែយ៉ាងណាសូមឱ្យការប្រើប្រាស់កម្ចីទាំងនោះប្រកបដោយតម្លាភាព និងប្រសិទ្ធភាព ដើម្បីផលប្រយោជន៍របស់ប្រជាជន និងសង្គមជាតិទាំងមូល ហើយមុនប្រើប្រាស់កម្ចីត្រូវសិក្សាគម្រោងអាទិភាពជាមុន ដើម្បីប្រើប្រាស់ថវិកានោះឱ្យចំគោលដៅពិតប្រាកដ។លោកទទួលស្គាល់ថា បច្ចុប្បន្នកម្ពុជាបានប្រើប្រាស់កម្ចីពីប្រទេសចិនច្រើនជាងគេ ច្រើនជាងកម្ចីពីប្រទេសអឺរ៉ុប ហើយប្រើប្រាស់កម្ចីពីប្រភពតែមួយនេះ វាជារឿងមិនសូវល្អប៉ុន្មានទេសម្រាប់ប្រទេសកម្ពុជា។ យកល្អ គួរខ្ចីឱ្យបានច្រើនប្រភពទើបយើងមានជម្រើសក្នុងការចរចាការប្រាក់ និងលក្ខខណ្ឌនៃការសងត្រឡប់ទៅវិញផ្សេងៗទៀត។

បច្ចុប្បន្ន សម្រាប់ប្រទេសកម្ពុជា ការប្រើកម្ចីត្រូវបានគេរកឃើញថា មានប្រមាណជាង 30% ធៀបជាមួយGDPនៅក្នុងប្រទេស ដែលចំនួននេះកម្ពុជាមិនមានហានិភ័យក្នុងការសងត្រឡប់ទៅវិញនោះទេ។

អ្នកតាមដានសង្គមបានលើកឡើងថា កត្តាដែលចិនផ្តល់កម្ចីមកកម្ពុជាច្រើនបែបនេះ គឺដោយសារចិនចាត់ទុកកម្ពុជាជាដៃគូមិត្តភាពមិនអាចខ្វះបានក្នុងការអភិវឌ្ឍប្រទេសទាំង2ឱ្យកាន់តែរីកចម្រើនឡើង។ ការផ្តល់កម្ចីលើការសាងសង់ហេដ្ឋារចនាសម្ព័ន្ធនេះ គឺផ្តោតទៅលើគោលនយោបាយខ្សែក្រវាត់មួយ ផ្លូវមួយក្នុងការតភ្ជាប់បណ្តាញដឹកជញ្ជូនឆ្លងកាត់ប្រទេសផ្សេងៗក្នុងតំបន់អាស៊ី ដែលរួមទាំងកម្ពុជាយើងផងដែរ។

គួរបញ្ជាក់ថា ចំនួនកម្ចីដែលចិនផ្តល់ឱ្យ អាចចាត់ទុកថាជាចំនួនច្រើនសម្រាប់ប្រទេសកម្ពុជា ប៉ុន្តែចំនួននេះ មិនច្រើនទេសម្រាប់រដ្ឋាភិបាលចិនដែលផ្តល់មកឱ្យកម្ពុជា៕

December 28, 2018

ផ្លូវល្បឿនលឿនភ្នំពេញ-បាវិត បានបញ្ចប់ការសិក្សាហើយ តែមិនទាន់ច្បាស់ពេលសាងសង់

ក្រុងបាវិត ក៏ជាប៉ូលសេដ្ឋកិច្ចសំខាន់មួយដែរក្នុងចំណោមប៉ូលសេដ្ឋកិច្ចសំខាន់ៗ និងធំៗនៅកម្ពុជា។ តំបន់នេះក៏ជាបណ្តុំរោងចក្រសហគ្រាស និងច្រកមួយដ៏សំខាន់ក្នុងការផ្លាស់ប្តូរទំនិញរបស់អ្នកវិនិយោគធំៗនៅកម្ពុជាដែរ។ ការតភ្ជាប់តំបន់សេដ្ឋកិច្ចតាមព្រំដែនមករាជធានីភ្នំពេញ ជាយុទ្ធសាស្ត្រដ៏សំខាន់មួយរបស់រាជរដ្ឋាភិបាលដើម្បីជំរុញឱ្យមានការអភិវឌ្ឍកាន់តែប្រសើរឡើងនូវចរន្តសេដ្ឋកិច្ច និងការវិនិយោគ។ ក្រៅពីនេះ ការតភ្ជាប់ប្រព័ន្ធដឹកជញ្ជូនក៏ជាផ្នែកមួយផងដែរក្នុងការគាំទ្រដល់កម្មវិធីអភិវឌ្ឍន៍វិស័យឧស្សាហកម្ម និងការកាត់បន្ថយគម្លាតរវាងតំបន់ប្រជុំជន និងតំបន់ជនបទ។ ថ្មីៗនេះក្រសួងសាធារណការ និងដឹកជញ្ជូនបានបញ្ជាក់ថា ផ្លូវល្បឿនលឿនដែលតភ្ជាប់រាជធានីភ្នំពេញទៅកាន់ក្រុងបាវិត(ព្រំដែនកម្ពុជា-វៀតណាម)ត្រូវបានសិក្សារួចរាល់ហើយដោយអ្នកជំនាញ និងត្រៀមផងដែរសម្រាប់ការចេញសកម្មភាពស្ថាបនាក្រោមខ្ទង់ថវិកាប្រមាណ 3,800លានដុល្លារអាមេរិក។

ឯកឧត្តម ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា ផ្លូវល្បឿនលឿនដ៏សំខាន់មួយខ្សែនេះ គឺទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA) ទទួលបានសិទ្ធិពីរាជរដ្ឋាភិបាលក្នុងការសិក្សាលើគម្រោងផ្លូវទាំងមូលដែលមានប្រវែង 160គីឡូម៉ែត្រ ដោយក្នុងនោះក្រោយពីការសិក្សាចប់សព្វគ្រប់ហើយ អ្នកជំនាញបានបញ្ជាក់ថា ផ្លូវល្បឿនលឿនពីភ្នំពេញ ទៅបាវិតនេះត្រូវចំណាយថវិកា 3,800លានដុល្លារអាមេរិក។ ឯកឧត្តមបានបញ្ជាក់ទៀតផងដែរថា ថវិកាសម្រាប់សាងសង់ផ្លូវនេះអាចចំណាយច្រើនជាងការសាងសង់ផ្លូវល្បឿនលឿនដទៃទៀត ព្រោះស្ថានភាពផ្លូវមានលក្ខណៈស្មុគស្មាញ។

ឯកឧត្តមរដ្ឋមន្ត្រី មានប្រសាសន៍ថា៖ “ផ្លូវនេះត្រូវចំណាយច្រើន ដោយសារតែផ្លូវដែលត្រូវសាងសង់មានស្ថានភាពលិចទឹក ហើយកាត់តាមបឹង និងតំបន់លិចទឹករហូតដល់ទៅ 80គីឡូម៉ែត្រឯណោះ”។

បើតាមឯកឧត្ដមរដ្ឋមន្ត្រីក្រសួងសាធារណការនិងដឹកជញ្ជូនបានឱ្យដឹងថា ផ្លូវល្បឿនលឿនពីរាជធានីភ្នំពេញទៅកាន់ក្រុងបាវិតនេះ នឹងចំណាយថវិកាច្រើនជាងផ្លូវទៅខេត្តព្រះសីហនុ។ ឯកឧត្តមបានបង្ហាញការប្រៀបធៀបថា ផ្លូវទៅខេត្តព្រះសីហនុមានប្រវែងដល់ទៅ 190គីឡូម៉ែត្រ ត្រូវចំណាយថវិកាតែប្រមាណ 2,000លានដុល្លារប៉ុណ្ណោះ តែចំពោះផ្លូវទៅបាវិតវិញ ត្រឹមតែ160គីឡូម៉ែត្រប៉ុណ្ណោះតែត្រូវចំណាយថវិកាដល់ទៅជិត 4ពាន់លានដុល្លារ។

ចំពោះកំណត់ពេលការសាងសង់វិញ ឯកឧត្តមរដ្ឋមន្ត្រីបានបញ្ជាក់ថា រាជរដ្ឋាភិបាលនៅមិនទាន់សម្រេចថានឹងធ្វើការសាងសង់នៅពេលណា ឬយ៉ាងណានោះទេ ព្រោះផ្លូវនេះត្រូវចំណាយថវិកាជាតិច្រើនពេក ដូច្នេះត្រូវរង់ចាំការស្វែងរកដៃគូវិនិយោគឯកជនសម្រាប់កសាងផ្លូវនេះជាមុនសិន។ ក្រៅពីនេះរាជរដ្ឋាភិបាលក៏បានអនុញ្ញាតឱ្យទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) សិក្សាពីគម្រោងសំខាន់ៗមួយចំនួនទៀតនៅរាជធានីភ្នំពេញ និងតំបន់សំខាន់ៗទៀតផងដែរ ដូចជាគម្រោងពង្រីកផ្លូវជាតិលេខ1 និងផ្លូវរថភ្លើងលើអាកាសជាដើម៕

December 28, 2018

កម្ពុជាទទួលបានអ្នកដំណើរប្រមាណ 10លាននាក់តាមអាកាសយានដ្ឋានអន្តរជាតិទាំង3

អាកាសយានដ្ឋានអន្តរជាតិចំនួន3 របស់កម្ពុជា(អាកាសយានដ្ឋានអន្តរជាតិភ្នំពេញ សៀមរាប និងក្រុងព្រះសីហនុ) នៅក្នុងឆ្នាំ2018នេះ ទទួលបានអ្នកធ្វើដំណើរឆ្លងកាត់បានប្រមាណ 10លាននាក់ ដែលចំនួននេះមានការកើនឡើង 2លាននាក់ បើប្រៀបធៀបទៅនឹងឆ្នាំ2017។

លោក Eric Delobel នាយកប្រតិបត្តិនៃក្រុមហ៊ុនអាកាសយានដ្ឋានកម្ពុជា បានថ្លែងក្នុងពិធីអបអរសាទរការទទួលបានអ្នកដំណើរចំនួនប្រមាណ 10លាននាក់តាមអាកាសយានដ្ឋានអន្តរជាតិទាំង3នោះថា៖ “នេះជាមោទនភាពមួយរបស់ប្រទេសកម្ពុជាដែលបានបម្រើសេវាកម្មជូនអ្នកដំណើរចំនួន10លាននាក់តាមរយៈអាកាសយានដ្ឋានអន្តរជាតិទាំង3 ដែលនេះជាកំណត់ត្រាដំបូងបំផុតដែលមានការកើនឡើងចំនួន 2លាននាក់ ធៀបនឹងឆ្នាំ2017 ដែលមានតែ 8លាននាក់”។

លោកបានបន្តថា នៅឆ្នាំ1995 ពេលក្រុមហ៊ុន Cambodia Airport ត្រូវបានផ្តល់ការទុកចិត្តឱ្យធ្វើ-ការអភិវឌ្ឍអាកាសយានដ្ឋានអន្តរជាតិភ្នំពេញ គឺមានអ្នកដំណើរប្រមាណត្រឹមតែ 5ម៉ឺននាក់ប៉ុណ្ណោះ ដែលតិចជាងដល់ទៅ 20ដង បើធៀបនឹងបច្ចុប្បន្ន។

ឯកឧត្តម វ៉ាន់ ណូរ៉ាក់ អគ្គនាយកអាកាសយានដ្ឋានអន្តរជាតិកម្ពុជាបានមានប្រសាសន៍ថា៖“នេះជាការតភ្ជាប់កាន់តែប្រសើរឡើង និងកាន់តែជោគជ័យដែលយើងបានច្របាច់បញ្ចូលគ្នារវាងអាកាសយានដ្ឋានទាំង3 ឱ្យក្លាយទៅជាសហគមន៍តែមួយ គឺមានអ្នកដំណើរ 10លាននាក់សម្រាប់ដោយទំនាក់ទំនងដ៏ជិតស្និទ្ធ និងរឹងមាំរវាងដៃគូពាក់ព័ន្ធរបស់អាកាសយានដ្ឋាននីមួយៗអស់រយៈពេលជាង 23ឆ្នាំចុងក្រោយនេះ”។

ឯកឧត្តមបានបញ្ជាក់បន្តថា៖ “យើងបានសហការបង្កើតស្តង់ដារ ជាពិសេសទំនាក់ទំនងសន្តិសុខ និងសុវត្ថិភាព ក៏ដូចជាការគាំពារបរិស្ថានផងដែរជាមួយក្រសួងទេសចរណ៍ក្នុងការផ្សព្វផ្សាយ ប្រទេសកម្ពុជាដែលជាគោលដៅសម្រាប់អ្នកដំណើរ។ បច្ចុប្បន្នអាកាសយានដ្ឋានអន្តរជាតិទាំង3 កំពុងបម្រើសេវាកម្មជាង 60គោលដៅ។ ព្រលានយន្តហោះមិនត្រឹមតែជាស្ថានីយធ្វើដំណើរ និងការមកដល់របស់ភ្ញៀវប៉ុណ្ណោះទេ តែថែមទាំងជាអ្នករៀបចំប្រព័ន្ធផ្សេងៗនៅ Runways Aprons ផងដែរ”។

លោក Eric Delobel បានលើកឡើងថា ចំនួនអ្នកដំណើរមានការកើនឡើងនេះ គឺដោយសារមានការចូលរួមចំណែកពីរដ្ឋាភិបាល ក្រសួងទេសចរណ៍ រដ្ឋលេខាធិការអាកាសចរស៊ីវិល គយ និងរដ្ឋាករ អគ្គនាយកដ្ឋានអន្តោប្រវេសន៍ និងភ្នាក់ងារឯកជនដែលតែងតែគាំទ្រជាប្រចាំ បានសហការគ្នាក្នុងការបង្កើតបទដ្ឋានស្តង់ដារ ជាពិសេសទាក់ទងនឹងសន្តិសុខសុវត្ថិភាព និងការសហការគាំពារបរិស្ថានផងដែរ។

គួរបញ្ជាក់ដែរថា របាយការណ៍ 10ខែរបស់ក្រសួងទេសចរណ៍បានបង្ហាញឱ្យដឹងពីការមកដល់របស់ភ្ញៀវអន្តរជាតិដែលកើនដល់770,000 នាក់នៅក្នុងខេត្តតំបន់ឆ្នេរ ដែលកើនឡើង26,9% ធៀបនឹងរយៈពេលដូចគ្នាពីឆ្នាំមុន។ បច្ចុប្បន្នអាកាសយានដ្ឋានអន្តរជាតិទាំង3 កំពុងបម្រើសេវាកម្មជាង60គោលដៅនៅទូទាំងពិភពលោក ធ្វើយ៉ាងណាឱ្យមានអ្នកដំណើរឆ្លងកាត់បានច្រើន ដោយតែធ្វើកិច្ចពិភាក្សាជាប្រចាំជាមួយក្រុមហ៊ុនអាកាសចរណ៍នានា ដើម្បីធ្វើឱ្យអាកាសយានដ្ឋានអន្តរជាតិទាំង3នេះ ក្លាយជាប្រតិបត្តិករ ដែលទុកចិត្តបានសម្រាប់បម្រើសេវាកម្មជូនដល់អ្នកដំណើរទាំងក្នុងស្រុក និងអន្តរជាតិ៕

December 28, 2018

Author: ធឿន មករា