ធឿន មករា - La Reine Media

ឆ្នាំ2018 ក្រសួងពាណិជ្ជកម្មរកចំណូលបានច្រើន តែត្រូវសម្រួលការធ្វើពាណិជ្ជកម្ម និងរក្សាបរិយាកាសវិនិយោគឱ្យល្អ

ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានជំរុញឱ្យក្រសួងពាណិជ្ជកម្មខិតខំធ្វើកំណែទម្រង់លើវិស័យជាច្រើនទៀត ដើម្បីសម្រួលការធ្វើការពាណិជ្ជកម្ម និងរក្សាបាននូវបរិយាកាសវិនិយោគល្អក្នុងប្រទេសកម្ពុជា។ ព្រោះថា ក្រសួងពាណិជ្ជកម្មពិតជាបានចូលរួមចំណែកយ៉ាងសកម្មក្នុងការរក្សាបាននូវកំណើនសេដ្ឋកិច្ចកម្ពុជាក្នុងរង្វង់ប្រហែល 7% ក្នុងមួយឆ្នាំ។ ជាក់ស្តែង ប្រាក់ចំណូលជិត 82លានដុល្លារ ជាទឹកប្រាក់ដែលក្រសួងពាណិជ្ជកម្មកម្ពុជារកបានក្នុងឆ្នាំ2018 ពីអគ្គនាយកដ្ឋានកាំកុងត្រូល និងសេវាសាធារណៈ។

របាយការណ៍ក្រសួងពាណិជ្ជកម្មកម្ពុជាបានបង្ហាញថា អគ្គនាយកដ្ឋានកាំកុងត្រូលដែលជាសេនាធិការបស់ក្រសួងពាណិជ្ជកម្ម រកបានចំណូល 28.75លានដុល្លារពីសេវាត្រួតពិនិត្យគុណភាពទំនិញ ដែលតួលេខនេះកើនឡើង 12.92% បើធៀបនឹងឆ្នាំមុន។ ក្រសួងក៏រកបានប្រាក់ចំណូលប្រមាណ 52.78លានដុល្លារពីសេវាសាធារណៈផងដែរ។ របាយការណ៍នេះក៏បានបង្ហាញផងដែរពីការចំណាយរបស់ក្រសួងដែលមានចំនួន 27.11លានដុល្លារ។

របាយការណ៍បានបង្ហាញទៀតថា ក្រុមហ៊ុន Green Trade ដែលគ្រប់គ្រងដោយរដ្ឋ រកប្រាក់ចំណូលបាន 2.89លានដុល្លារ ខណៈការចំណាយទៅវិញរបស់ក្រុមហ៊ុននេះមានចំនួន 2.75លានដុល្លារ ដែលធ្វើឱ្យប្រាក់ចំណេញបានពីក្រុមហ៊ុនរដ្ឋមួយនេះក្នុងឆ្នាំ2018 មានចំនួន 13,7000ដុល្លារប៉ុណ្ណោះ។ ក្រុមហ៊ុននេះបានធ្វើពាណិជ្ជកម្មជាមួយក្រុមហ៊ុន COFCO មកពីប្រទេសចិនដែលបាននាំចេញអង្ករចំនួន 1,000 តោនទៅចិន និងបានលក់ឱ្យអង្គការ WFP ចំនួន 3,700 តោន ក្នុងឆ្នាំ2018។

ឯកឧត្ដមឧបនាយករដ្ឋមន្ត្រី អូន ព័ន្ធមុនីរ័ត្ន បានថ្លែងសង្កត់ធ្ងន់ថា “ខ្ញុំសូមលើកទឹកចិត្ត និងផ្តល់នូវការគាំទ្រដល់ឯកឧត្តម ប៉ាន សូរស័ក្តិ និងថា្នក់ដឹកនាំក្រសួងពាណិជ្ជកម្មទាំងអស់ឱ្យបន្តនូវកិច្ចខិតខំប្រឹងប្រែងធ្វើកំណែទម្រង់លើវិស័យជាច្រើនទៀតសំដៅសម្រួលដល់ការធ្វើពាណិជ្ជកម្ម និងរក្សាបាននូវបរិយាកាសវិនិយោគល្អនៅកម្ពុជាក្នុងរបត់ថ្មីនៃការប្រែប្រួលប៉ូលសេដ្ឋកិច្ចពិភពលោក និងពាណិជ្ជកម្មអន្តរជាតិ”។

ឯកឧត្តមបន្តថា ក្នុងឆ្នាំ2018នេះ តាមការប៉ាន់ស្មានជាបឋមរបស់រដ្ឋាភិបាល អត្រាកំណើនសេដ្ឋកិច្ចរបស់កម្ពុជានឹងសម្រេចបានក្នុងរង្វង់ 7.3% ដែលកំណើននេះទទួលបានពីការកើនឡើងយ៉ាងរឹងមាំនៃវិស័យសំណង់ ការបន្តកើនឡើងនៃវិស័យកាត់ដេរ និងការនាំចេញកំណើនជាមធ្យមទទួលបានពីវិស័យកសិកម្ម ការងើបឡើងយ៉ាងខ្លាំងនៃវិស័យទេសចរណ៍ និងកំណើននៃវិស័យលក់ដុំ-លក់រាយ ព្រម-ទាំងវិស័យបន្ទាប់បន្សំដទៃទៀតផងដែរ។

ទាក់ទងនឹងវិស័យពាណិជ្ជកម្ម កម្ពុជាបានបើកទីផ្សារ និងនាំចេញទំនិញទៅកាន់ 147ប្រទេស ក្នុងទំហំធំជាង 60% នៃផ.ស.ស (ផលិតផលក្នុងស្រុកសរុប) និងនាំចូលទំនិញមកបម្រើការផលិត និងប្រើប្រាស់ពី 135ប្រទេសក្នុងទំហំប្រមាណ 65% នៃផ.ស.ស ផងដែរ។

សភាពាណិជ្ជកម្មកម្ពុជាបានឱ្យដឹងថា ប្រាក់ចំណូលដែលក្រសួងពាណិជ្ជកម្មកម្ពុជារកបានក្នុងឆ្នាំ2018នេះ គឺជាប្រភពដ៏សំខាន់ក្នុងការជំរុញសេដ្ឋកិច្ចជាតិ ដែលជាផ្នែកមួយនៃចំណូលពន្ធ។ ឯកឧត្តម លឹម ហេង អនុប្រធានសភាពាណិជ្ជកម្មកម្ពុជាថ្លែងថា៖“វាផ្ដល់ប្រយោជន៍កាន់តែច្រើនដល់សេដ្ឋកិច្ចរបស់យើង ក្រសួងពាណិជ្ជកម្ម គឺជាអ្នកដើរតួនាទីដ៏សំខាន់ក្នុងការទាក់ទាញក្រុមវិនិយោគិន និងជំរុញលំហូរចូលពាណិជ្ជកម្មពីក្រៅប្រទេស និងពាណិជ្ជកម្មនៅក្នុងប្រទេស”។

ឯកឧត្តម លឹម ហេង បានបន្តថា៖ ”ប្រាក់ចំណូលបានពីសេវាសាធារណៈ មានន័យថា លំហូរចូលក្រុមហ៊ុនចុះបញ្ជីបានកើនឡើង ដូច្នេះនិន្នាការសេដ្ឋកិច្ចរបស់យើងរក្សាបានកាន់តែប្រសើរឡើងៗ ដោយសារប្រតិបត្ដិករនៅក្នុងវិស័យនេះគោរពតាមច្បាប់”។

អ្នកតាមដានស្ថានការណ៍សេដ្ឋកិច្ចកម្ពុជា លោកអគ្គនាយកក្រុមហ៊ុន ហ្វ័រតេ បានប្រាប់ឡារ៉ែនពាណិជ្ជឱ្យដឹងថា ចំនួនប្រាក់ចំណូល គឺជាសញ្ញាល្អសម្រាប់ក្រសួងពាណិជ្ជកម្ម ប៉ុន្តែក្រសួងគួរតែជំរុញបនែ្ថមទៀតនូវសេវាសាធារណៈឱ្យកាន់តែមានប្រសិទ្ធភាពបន្ថែមទៀត ដើម្បីបង្កើនទំនុកចិត្តសម្រាប់សាធារណជន។ ព្រោះចំណូលវាមិនមែនជាសូចនាករសម្រាប់បញ្ជាក់នូវកំណើនសេដ្ឋកិច្ចនោះទេ វាគ្រាន់តែជាចំណូលបន្ទាប់បន្សំ មិនអាចធ្វើជារង្វាស់រង្វាល់មួយបានទេ”។

លោក យក់ ចំរើនឫទ្ធិ អគ្គនាយកក្រុមហ៊ុនហ្វ័រតេបានបញ្ជាក់ប្រាប់ថា៖ “ប្រាក់ចំណូលដែលក្រសួងពាណិជ្ជកម្មរកបាន វាគ្រាន់តែជាការគួបផ្សំ តែវាមិនមែនជាការជំរុញនូវកំណើនសេដ្ឋកិច្ចទេក្រសួងគួរតែធ្វើការងារប្រមូលចំណូលឱ្យបានច្រើន ឱ្យគ្រប់ជ្រុងជ្រោយ ព្រោះចំណូលទទួលបានពីសេវាសាធារណៈ ជាចំណូលបន្ទាប់បន្សំ ដូច្នេះត្រូវជំរុញការប្រមូលចំណូលឱ្យមានប្រសិទ្ធភាពបន្ថែមទៀត”។

លោកអគ្គនាយកបានបន្ថែមថា៖ “ដើម្បីជំរុញសេដ្ឋកិច្ចជាតិ ក្រសួងពាណិជ្ជកម្មត្រូវរកដៃគូផ្លាស់ប្តូរពាណិជ្ជកម្មឱ្យបានច្រើន ការរកទីផ្សារក៏ជាការជួយរកប្រភពចំណូល និងការជំរុញផ្នែកសេដ្ឋកិច្ចរបស់ប្រទេសជាតិដែរ។ ការងារស្នូលរបស់ក្រសួងពាណិជ្ជកម្ម គឺត្រូវរកការផ្លាស់ប្តូរពាណិជ្ជកម្ម ទីផ្សារ និងដៃគូឱ្យបានច្រើន បើយើងបើកចំហទីផ្សារបានច្រើន យើងមានទំនាក់ទំនងដៃគូពាណិជ្ជកម្មកាន់តែច្រើន និងមានពាណិជ្ជកម្មកាន់តែធំ ចំណូលក៏កាន់តែធំ ដែលអាចជួយជំរុញកំណើនសេដ្ឋកិច្ចជាតិបានកាន់តែខ្លាំង”៕

January 2, 2019

សាច់ក្រកសៀមរាបមិនមែន ល្បីតែក្នុងស្រុកខ្មែរទេ តែនៅបរទេសក៏មានតម្រូវការខ្ពស់ដែរ

នៅពេលគេនិយាយពីរឿងសាច់ក្រក គេតែងនឹកឃើញដល់សាច់ក្រកសៀមរាប ដោយគេនាំគ្នានិយាយថា វាមានរសជាតិឆ្ងាញ់លើសពីសាច់ក្រកមកពីខេត្តផ្សេងៗទៀតនៅកម្ពុជាយើង ហើយនៅពេលគេធ្វើដំណើរទៅកម្សាន្ត និងត្រឡប់មកពីខេត្តសៀមរាបវិញ គេតែងទិញយកមកទុកទទួលទាននៅផ្ទះ ហើយខ្លះថែមទាំងទិញសម្រាប់ផ្ញើទៅបងប្អូននៅក្រៅប្រទេសទៀតផង។

លោក យ៉ែម ស្រ៊ុន អ្នកគ្រប់គ្រងទូទៅនៃសិប្បកម្ម លី ធាងសេង ដែលមានទីតាំងនៅភូមិវិហារចិន សង្កាត់ស្វាយដង្គុំ ក្រុងសៀមរាប មានប្រសាសន៍ថា សិប្បកម្មរបស់លោកចាប់ផ្តើមឡើង តាំងពីសម័យក្រោយឆ្នាំ1979 មកម៉្លេះប៉ុន្តែកាលនោះបង្កើតឡើងជាលក្ខណៈគ្រួសារ មិនទាន់មានការផលិតក្នុងទ្រង់ទ្រាយធំដូចសព្វថ្ងៃនេះទេ។ រហូតឆ្នាំ80ប្លាយ ទើបក្រុមគ្រួសារសម្រេចចិត្តចុះបញ្ជីនៅក្រសួងពាណិជ្ជកម្មជាផ្លូវការ និងពង្រីកចង្វាក់ផលិតកម្មឱ្យបានកាន់តែច្រើន សម្រាប់ចែកចាយនៅលើទីផ្សារទូទាំងប្រទេស។

ទីផ្សារដែលទទួលបានការកុម្ម៉ង់ទិញច្រើនជាងគេនាពេលបច្ចុប្បន្ននេះ គឺទីក្រុងភ្នំពេញ និងបន្ទាប់មកគឺ ប្រជាពលរដ្ឋដែលនៅតាមបណ្តាខេត្តផ្សេងៗទៀត ដែលពួកគាត់ទិញសម្រាប់ទុកទទួលទានជាលក្ខណៈក្រុមគ្រួសារ ឬយកទៅលក់បន្តនៅតាមទីប្រជុំជនផ្សេងៗ ហើយប្រជាជនមួយចំនួនទៀតបានទិញផ្ញើបងប្អូននៅក្រៅប្រទេស មានដូចជាប្រទេសអាមេរិក បារាំង ជប៉ុន កូរ៉េ កាណាដា អូស្ត្រាលីជាដើម។

អ្នកមើលការខុសត្រូវក្នុងសិប្បកម្មខាងលើបន្តថា ក្នុងមួយថ្ងៃមានអតិថិជនកុម្ម៉ង់ទិញប្រហែលជា100គីឡូក្រាមគិតជាមធ្យម ទាំងសាច់ក្រកធ្វើពីសាច់គោ និងសាច់ក្រកធ្វើពីសាច់ជ្រូក គឺមានការកុម្ម៉ង់ទិញប្រហាក់ប្រហែលគ្នា។

អ្វីដែលធ្វើឱ្យសាច់ក្រកសៀមរាបមានការគាំទ្រច្រើននៅលើទីផ្សារដូចនេះ គឺដោយសារផលិតផលមានគុណភាពល្អ ទិញសាច់ស្រស់ៗមកផលិត មិនទិញសាច់ក្លាស្សេ ឬសាច់សល់ និងផលិតឡើងដោយដាក់តែសាច់សុទ្ធៗ មិនលាយខ្លាញ់ និងសម្រិតសម្រាំងគុណភាព អនាម័យ មិនលាយជាមួយម្សៅ ឬដាក់ថ្នាំរក្សាគុណភាពឱ្យទុកបានយូរ នាំឱ្យប៉ះពាល់សុខភាពអ្នកបរិភោគនោះទេ។ សម្រាប់ប្រជាពលរដ្ឋដែលទិញទុកយូរ អាចយកទៅដាក់ក្នុងទូទឹកកកក្នុងកន្លែងកក នឹងអាចរក្សាទុកបានដល់ទៅ 1ឆ្នាំ និងបើទុកក្នុងកន្លែងត្រជាក់ធម្មតា អាចរក្សាទុកបានដល់ 1ខែ ប៉ុន្តែយ៉ាងណាក៏ដោយ ការក្លាស្សេសាច់ក្រកទុកយូរពេក ក៏មិនសូវមានរសជាតិឆ្ងាញ់ដូចញ៉ាំភ្លាមៗនោះទេ។

លោក ស្រ៊ុន បានបង្ហើបឱ្យដឹងពីវិធីសាស្ត្រធ្វើសាច់ក្រកនេះថា គ្មានអ្វីដែលលំបាកនោះទេ គ្រាន់តែយើងទិញសាច់ល្អៗមកពីផ្សារ ហើយយកមកលាងទឹកសម្អាតឱ្យស្អាត រួចទុកចោលឱ្យស្ងួតទឹកល្អហើយសឹមយកទៅដាក់ក្នុងម៉ាស៊ីនកិនសាច់ឱ្យម៉ដ្ឋ បន្ទាប់មកទើបយើងចាប់ផ្តើមលាយគ្រឿងទេសចូល ដែលរួមមាន អំបិល ស្ករ ប៊ីចេង បន្ថែមរសជាតិដោយខ្ទឹមសតិចតួច ដែលគិតថាសមល្មមមានរសជាតិឈ្ងុយឆ្ងាញ់ ហើយទើបយកមកច្រកក្នុងពោះវៀនជ្រូកដែលលាងស្អាតរួចជាស្រេច ឬថង់ច្រកដែលគេផលិតពីពពុះសណ្តែក(អាចហូបបាន) រួចយកទៅដាក់ចូលឡសម្ងួតឱ្យស្ងួតល្អ ដែលគេអាចប្រើឡធម្មជាតិដុតដោយធ្យូងក៏បាន ឬសម្ងួតក្នុងឡអគ្គិសនីក៏បានដែរ ប៉ុន្តែមិនត្រូវប្រើភ្លើងខ្លាំងបង្ខំឱ្យឆាប់ស្ងួតនោះទេ ពោលគឺត្រូវដុតភ្លើងតិចៗដែលជាទូទៅគេត្រូវប្រើពេលសម្ងួតដល់ទៅ 3ថ្ងៃឯណោះ ទើបអាចយកទៅលក់នៅលើទីផ្សារបាន និងអាចរក្សាទុកបានច្រើនថ្ងៃទៀតផង។ លោកបានបញ្ជាក់ថា បច្ចុប្បន្នសិប្បកម្មផលិតសាច់ក្រក លី ធាង សេង មានបុគ្គលិក-កម្មករប្រមាណជា3 ទៅ 4នាក់ប៉ុណ្ណោះ ដោយអាចផលិតសាច់ក្រកលក់បានជាង 100គីឡូក្រាមជារៀងរាល់ថ្ងៃ។

នៅថ្ងៃអនាគត សិប្បកម្មខាងលើនឹងពង្រីកឱ្យកាន់តែធំថែមទៀត ដោយសម្រិតសម្រាំងទៅលើគុណភាព អនាម័យ និងសោភណភាពសម្បកវេចខ្ចប់ជាដើម ដើម្បីដាក់លក់នៅក្នុងផ្សារទំនើប និងសម្រាប់នាំចេញទៅលក់នៅទីផ្សារបរទេសថែមទៀត។

អតិថិជនដែលទិញយកទៅលក់បន្តម្នាក់ អ្នកស្រី ពឹង ស៊ូលី ជាអាជីវករនៅក្នុងផ្សារទីរួមខេត្តក្រចេះបានលើកឡើងថា ដោយសារសាច់ក្រកសៀមរាបមានរសជាតិឆ្ងាញ់ និងមានការគាំទ្រពីអតិថិជនស្រាប់ អ្នកស្រីបានទិញយកទៅលក់បន្តនៅទីនោះ ហើយក៏មានការកុម្ម៉ង់ទិញច្រើនគួរសមដែរ ដោយក្នុងមួយថ្ងៃអ្នកស្រីអាចលក់ចេញបានប្រមាណជា 10គីឡូក្រាមគិតជាមធ្យម។ អ្នកស្រីបន្ថែមថា តាមពិតទៅ អ្នកទិញសាច់ក្រកនេះមិនមែនសុទ្ធតែជាអ្នកខេត្តក្រចេះទេ ប្រជាពលរដ្ឋនៅខេត្តជិតៗនោះ ដូចជារតនគីរី ស្ទឹងត្រែង កំពង់ចាមជាដើម ក៏មានការកុម្ម៉ង់ទិញតាមអនឡាញជារៀងរាល់ថ្ងៃផងដែរ៕

January 2, 2019

វិស័យអចលនទ្រព្យ និងសាងសង់ ពេញមួយឆ្នាំ 2018 ទទួលបានទុនវិនិយោគជាង$5ពាន់លាន

ការសាងសង់នៅកម្ពុជា ពេញមួយឆ្នាំ2018នេះ មានប្រមាណជា 2,867គម្រោង ជាមួយនឹងទុនវិនិយោគប្រមាណជាង 5,200លានដុល្លារអាមេរិក(5,228,992.522)ដែលគម្រោងសំណង់ទាំងនោះសាងសង់លើផ្ទៃដីចំនួន 11,427,190ម៉ែត្រការ៉េ។ នេះបើយោងតាមរបាយការណ៍សន្និបាតរបស់ក្រសួងរៀបចំដែនដី នគរូបនីយកម្ម និងសំណង់។

របាយការណ៍បានបញ្ជាក់ថា គម្រោងសំណង់នៅឆ្នាំ2018 មានការថយចុះជិត 19% បើធៀបនឹងឆ្នាំ2017 ដែលមានគម្រោងសាងសង់រហូតដល់ទៅ 3,052គម្រោង ជាមួយទុនវិនិយោគប្រមាណ 6,428,794.179ដុល្លារអាមេរិក។

របាយការណ៍នេះក៏បានឱ្យដឹងផងដែរថា គម្រោងសាងសង់ទាំងនេះស្ថិតក្រោមសមត្ថកិច្ចរបស់ក្រសួងមានចំនួន 245គម្រោង មានទុនវិនិយោគប្រមាណ 4,829,173.854ដុល្លារ ហើយស្ថិតក្រោមសមត្ថកិច្ចសាលារាជធានី-ខេត្តចំនួន 2,622គម្រោង ជាមួយទុនវិនិយោគប្រមាណ 399,818,668ដុល្លារ។

សំណង់លំនៅឋានសរុបក្នុងឆ្នាំ2018 មានចំនួន2.420គម្រោង ជាមួយទុនវិនិយោគប្រមាណ 1, 835,416.912ដុល្លារ ស្មើនឹង 18,471ខ្នង ហើយអគារខ្ពស់ៗចាប់ពី 5ជាន់ឡើងនៅរាជធានីភ្នំពេញក្នុងឆ្នាំ2018 មានចំនួន 110អគារ។ ដោយឡែកបណ្ដុំលំនៅឋានមានលក្ខណៈបុរីនៅរាជធានីភ្នំពេញក្នុងឆ្នាំ2018 មានចំនួន 28ទីតាំង។

តាមរបាយការណ៍របស់ក្រសួងរៀបចំដែនដីនគរូបនីយកម្ម និងសំណង់ដដែល បានអះអាងថាគិតចាប់ពីឆ្នាំ2000 ដល់ខែវិច្ឆិកា ឆ្នាំ2018 ក្រសួងបានចេញលិខិតអនុញ្ញាតសាងសង់បានចំនួន43,136គម្រោង ដែលមានផ្ទៃក្រឡាសំណង់សរុបចំនួន 114,297,621ម៉ែត្រការ៉េ និងតម្លៃប៉ាន់ស្មានទុនវិនិយោគសរុបប្រមាណ 43,370,423.378ដុល្លារ។ ជាមួយគ្នានោះដែរក្រសួងរៀបចំដែនដី នគរូបនីយកម្ម និងសំណង់ក៏ប្រមូលបានចំណូលប្រមាណ 390,476,442.711រៀល ឬស្មើនឹងជិត 98លានដុល្លារអាមេរិកដែលចំណូលនេះបានមកពីសេវាសុរិយោដី សេវាសំណង់ពីការជួលទីតាំងរោងចក្រ សហគ្រាស និងបានពីពន្ធលើការផ្ទេរអចលនទ្រព្យដែលប្រមូលនៅអង្គភាពពន្ធដារ។

ដោយឡែកលោកប្រធានសមាគមអ្នកវាយតម្លៃ និងភ្នាក់ងារអចលនវត្ថុ បានបញ្ជាក់អំពីការចុះបញ្ជីនៃគម្រោងសាងសង់ខាងលើថា ចំនួនគម្រោងនៃអចលនទ្រព្យខាងលើ វាគ្រាន់តែជាតួលេខនៃការចាប់ផ្តើមគម្រោងតែប៉ុណ្ណោះ ពីព្រោះគម្រោងនីមួយៗជួនកាលម្ចាស់គម្រោងបានចុះបញ្ជីរួចហើយ តែគាត់ពុំបានសាងសង់ភ្លាមៗទេ គាត់អាចសាងសង់នៅខែក្រោយ ឬឆ្នាំក្រោយ ឬពេលវេលាណាមួយសមស្របសម្រាប់គាត់។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុទើបជាប់ឆ្នោតថ្មី បានមានប្រសាសន៍ពីបញ្ហានេះថា៖ “ដូច្នេះតាមទស្សនៈរបស់ខ្ញុំ ការចុះបញ្ជីគ្រាន់តែជាតួលេខនៃការចាប់ផ្តើម បើគាត់ចុះបញ្ជីហើយគាត់មានបំណងឆន្ទៈពិតប្រាកដដើម្បីវិនិយោគ ហើយគាត់ថាសាងសង់ ឬចាប់ផ្តើមនៅពេលណាយើងមិនដឹងច្បាស់ទេ”។

លោកបានបន្តទៀតថា តួលេខនៃការចុះបញ្ជីច្រើន ឬតិច គ្រាន់តែជាតួលេខចាប់ផ្តើមតែអ្វីពិតប្រាកដ គឺការអនុវត្តគម្រោង។ បើយើងមានតួលេខដែលចុះបញ្ជីមានចំនួនប៉ុន្មាន? ឧទាហរណ៍ចំនួន100 ហើយយើងអនុវត្តបាន90 ដូច្នេះនៅសល់តែ10ទេ។ ហេតុនេះការចុះបញ្ជីជាបំណង តែផុតពីនេះគាត់ចាប់ផ្តើមនៅពេលណា យើងត្រូវមើលលើការអនុវត្ត ព្រោះគម្រោងខ្លះអាចត្រូវពន្យារពេល វាអាស្រ័យលើពេលវេលាជាក់ស្តែង និងបើឱ្យតួលេខចុះបញ្ជីឆ្នាំហ្នឹង ត្រូវនឹងតួលេខអនុវត្តគម្រោងឆ្នាំហ្នឹងតែម្តង វាមិនត្រូវទេ។

លោក សុខនីម បានបន្ថែមថា យើងមិនមានការព្រួយបារម្ភពីតួលេខដែលខុសគ្នាតិចតួចនោះទេ យើងទទួលស្គាល់ថា វាអាចមានគម្រោងដែលអាចចុះបញ្ជីហើយ តែត្រូវបានពន្យារពេល តែក៏បានសាងសង់ជាបន្ត ដូចដែលយើងបានមើលឃើញពីការកើនឡើងក្នុងវិស័យនេះ និងគម្រោងដែលបានចុះបញ្ជីហើយ និងបានបញ្ចប់គម្រោង តែខ្លះក៏នៅបន្តគម្រោងពុំទាន់បញ្ចប់ក៏មានដែរ៕

January 2, 2019

តើគួរជ្រើសរើសវ៉ែនតាបែបណា ឱ្យស័ក្ដិសមនឹងភ្នែករបស់អ្នក?

ជឿថាមនុស្សភាគច្រើននៅក្នុងសម័យកាលបច្ចុប្បន្ននេះ បានជ្រាបដឹងអំពីគ្រោះថ្នាក់នៃកម្ដៅថ្ងៃកើតឡើងចំពោះស្បែក ហើយក៏មានការការពារស្បែកដោយប្រើប្រាស់ឡេការពារកម្ដៅថ្ងៃជាច្រើនផលិតផល ដែលមានលក់នៅលើទីផ្សារផងដែរ។ ការផ្សព្វផ្សាយពាណិជ្ជកម្មបានប្រាប់អតិថិជនថា គ្រោះថ្នាក់ចំពោះស្បែក ដោយសារកម្ដៅថ្ងៃអាចនឹងធ្វើឱ្យស្បែកខ្មៅជាំ ស្បែកឡើងប្រេះ ស្ងួត ស្រអាប់ មិនស្រស់ថ្លា ហើយគ្រោះថ្នាក់ធ្ងន់ធ្ងរ អាចនឹងកើតជំងឺមហារីកស្បែក ដោយសារកាំរស្មីយូវី (UV)។ គ្រូពេទ្យជំនាញបានប្រាប់ឱ្យដឹងថា កាំរស្មី UV មិនត្រឹមតែមានគ្រោះថ្នាក់ចំពោះស្បែកតែមួយប៉ុណ្ណោះទេ តែវាក៏បង្កគ្រោះថ្នាក់យ៉ាងសាហាវចំពោះភ្នែករបស់អ្នកដូចគ្នាដែរ។ កាំរស្មីព្រះអាទិត្យមួយនេះ បានបង្កឱ្យភ្នែកមានអាការឈឺចុកចាប់ដូចជា ក្រហាយភ្នែក ហូរទឹកភ្នែក ភ្នែកឡើងក្រហម ភ្នែកឡើងសរសៃក្រហមតូចៗ ភ្នែកឡើងបាយ ទឹកដក់ក្នុងភ្នែក និងរលាកប្រស្រីភ្នែកជាដើម។ ទោះជាយ៉ាងណាក៏ដោយ មានមនុស្សភាគតិចណាស់ ដែលបានចាប់អារម្មណ៍ការពារភ្នែកពីកម្ដៅថ្ងៃ ខណៈដែលពួកគេធ្វើដំណើរលើផ្លូវវែងឆ្ងាយ។ ការការពារភ្នែកពីកាំរស្មី UV ជារឿងដ៏សំខាន់បំផុត ដែលអ្នកត្រូវយកចិត្តទុកដាក់ចំពោះសុខភាពភ្នែករបស់អ្នក។ មានវិធីសាស្ត្រជាច្រើនដែលគ្រូពេទ្យជំនាញបានណែនាំ តែទស្សនាវដ្ដី ឡារ៉ែន សូមលើកយកនូវវិធីប្រើប្រាស់វ៉ែនតាការពារកម្ដៅថ្ងៃ សម្រាប់ចែកជូនប្រិយមិត្តអ្នកអានឱ្យបានជ្រាបដូចតទៅ។

1. តើធ្វើដំណើរផ្លូវឆ្ងាយត្រូវប្រើ វ៉ែនតាខ្មៅ ឬវ៉ែនតាការពារកាំរស្មី UV?
វ៉េនតាខ្មៅការពារកម្ដៅថ្ងៃ ឬកាំរស្មី UV ជាទូទៅគឺមាន7ពណ៌ដូចជា ពណ៌ស្វាយ ពណ៌ទឹកសមុទ្រ ពណ៌ខៀវ ពណ៌បៃតង ពណ៌លឿង ពណ៌ការ៉ុត និងពណ៌ក្រហម។ ពណ៌ទាំងអស់នេះសុទ្ធសឹងតែជាពណ៌ដែលអាចទប់ទល់នឹងកម្ដៅថ្ងៃបានយ៉ាងល្អ ដូច្នេះរាល់វ៉ែនតាការពារកម្ដៅថ្ងៃនីមួយៗ តែងមានពណ៌ទាំងអស់នេះ ចម្រុះគ្នានៅក្នុងសាច់កញ្ចក់វ៉ែនតា និងទៅតាមការនិយមពេញចិត្តរបស់អ្នកប្រើប្រាស់ ក្នុងការរៀបចំស្ទាយល៍រៀងៗខ្លួន។ យ៉ាងណាមិញ បើទោះបីជាពណ៌ដែលបានរៀបរាប់ទាំងអស់នេះ អាចការពារពន្លឺព្រះអាទិត្យបានក្ដី ក៏វាមិនអាចទប់ទល់បានពេញ100%បាននោះទេ។ អ្នកត្រូវបន្ថែមនូវបន្ទះការពារកាំរស្មី UV មួយជាន់ទៀត។ នៅលើកញ្ចក់វ៉ែនតាដែលបានសរសេរថា UV 400 ឬ UV 100% នោះសុទ្ធសឹងតែមានការបញ្ជាក់ការពារយ៉ាងត្រឹមត្រូវ។ តែយ៉ាងណាមិញ អ្នកមិនគួរជ្រើសរើសប្រើប្រាស់វែ៉នតាដែលមានពណ៌ខ្មៅខ្លាំង ឬកញ្ចក់ខ្មៅតែម្ដងនោះទេ ព្រោះថា ពណ៌ខ្មៅ វាជាពណ៌ដែលស្រូប ឬចម្លងកម្ដៅថ្ងៃបានយ៉ាងប្រសើរបំផុត នោះវាអាចនឹងងាយស្រូបកម្ដៅចូលក្នុងរង្វង់ភ្នែករបស់អ្នក នាំឱ្យភ្នែករបស់អ្នកងាយរងគ្រោះថ្នាក់ទៅវិញ។

2. ការជ្រើសរើសវ៉ែនតាឱ្យស័ក្ដិសមនឹងអ្នក
* វ៉ែនតាដែលការពារភ្នែកពីកាំរស្មីព្រះអាទិត្យបាន100%។
* ជ្រើសរើសមុខកញ្ចក់ដែលអាចបិទបាំងរង្វង់ភ្នែកបានពេញ មិនឱ្យត្រូវពន្លឺថ្ងៃ ដើម្បីការពារភ្នែកមិនឱ្យឡើងជាំខ្មៅ ។
* វ៉ែនតាត្រូវបន្ថែមបន្ទះការពារកាំរស្មីយ៉ាងហោច1ជាន់បន្ថែមទៀត ត្រូវពិនិត្យ និងសាកល្បងមើលជាមួយពន្លឺថ្ងៃថាតើ មានពន្លឺចូលភ្នែកដែលឬទេ? មុននឹងសម្រេចចិត្តទិញយកមកប្រើ។
* ជ្រើសរើសវ៉ែនតាដែលផ្ទុយនឹងទម្រង់មុខរបស់អ្នក ដូចជា អ្នកដែលមានមុខមូល មិនគួរជ្រើសវ៉ែនតាណា ដែលមានរូបរាងមូលដែរនោះទេ។
* ទំហំនៃកញ្ចក់វ៉ែនតាត្រូវតូចល្មមសមនឹងទំហំមុខរបស់អ្នក។
* វ៉ែនតាដែលអ្នកពាក់ចាំបាច់ត្រូវតែសមស្របទៅនឹងបុគ្គលិកលក្ខណៈរបស់ខ្លួនអ្នកផងដែរ។ មានន័យថា បើអ្នកជាមនុស្សសុភាពរាបសារ មិនគួរពាក់វ៉ែនតាណាដែលមានម៉ូដហ៊ឺហារ ឡូយឆាយជ្រុលពេកនោះទេ។

3. ការប្រើប្រាស់កញ្ចក់កែវភ្នែក (Contact Lens)
គ្រូពេទ្យជំនាញ បានប្រាប់ឱ្យដឹងថា ការប្រើកញ្ចក់កែវភ្នែក ឬ Contact Lens នៅក្នុងកម្ដៅថ្ងៃអាចមានផលអាក្រក់ ដូចជា មានឱកាសឆ្លងមេរោគ ធ្វើឱ្យភ្នែកស្ងួត និងកញ្ចក់ភ្នែកខ្វះអុកស៊ីហ្ស៊ែន ជាពិសេសកញ្ចក់ Lens ដែលឃោសនាថា មានទឹកជាសមាសធាតុផ្សំច្រើននោះ គឺអាចធ្វើឱ្យភ្នែកស្ងួតលើសដើម។ សម្រាប់កញ្ចក់ Lens ពណ៌ផ្សេងៗនោះ ម៉ាកខ្លះមិនមានស្តង់ដារ អាចធ្វើឱ្យអាល់លែកហ្ស៊ី រលាក ឬធ្វើឱ្យស្ងួតភ្នែកលើសដើម ដោយសារកញ្ចក់ Lens ប្រភេទនេះក្រាស់ជាងធម្មតា រីឯកញ្ចក់ពា Lens មួយចំនួនទៀត អាចកោងខុបខ្លាំង ដើម្បីឱ្យអ្នកពាក់មើលទៅឃើញភ្នែកធំ នោះវាធ្វើឱ្យកញ្ចក់ Lens កោង អាចសង្កត់គែមកញ្ចក់ភ្នែកកាន់តែខ្លាំងឡើង។ សម្រាប់ការថែទាំកែវភ្នែក បើអ្នកពាក់កញ្ចក់ Lens នោះ អ្នកត្រូវថែទាំជាពិសេស មិនថាជាកញ្ចក់ Lens បែបមីញ៉ូប ឬកញ្ចក់ Lens បែបពណ៌ផ្សេងៗនោះទេ អ្នកគួរតែត្រៀមនូវទឹកលាងសម្អាតកញ្ចក់ភ្នែក (ទឹកភ្នែកសិប្បនិម្មិត) ដែលមានលក់ទូទៅ សម្រាប់លាងសម្អាត និងកម្ចាត់មេរោគឱ្យបានល្អ៕

December 31, 2018

អ្នកត្រៀមខ្លួនហើយឬនៅ? ព្រឹត្តិការណ៍ប្រកួតបាល់ទាត់ដ៏ធំអស្ចារ្យប្រចាំឆ្នាំ TIGER STREET FOOTBALL FESTIVAL 2019 រដូវកាលទី ៧ បានមកដល់ហើយ!

រាជធានីភ្នំពេញ៖ TIGER STREET FOOTBALL FESTIVAL 2019 កំពូលព្រឹត្តិការណ៍បាល់ទាត់ដ៏ធំបំផុត ដែលបានត្រឡប់មកវិញទៀតហើយជាមួយនឹងក្រុមចូលរួមប្រកួតកាន់តែច្រើន និងទីតាំងប្រកួតកើនដល់ ៩ ខេត្ត/ក្រុង ជាពិសេសមានវត្តកំពូលតារាបាល់ទាត់អន្តរជាតិ Ronaldinho ក្នុងនាមជាឯកអគ្គរដ្ឋទូតប្រចាំកម្មវិធី TIGER STREET FOOTBALL FESTIVAL 2019 នៅវគ្គប្រកួតផ្តាច់ព្រ័ត្រ នៅរាជធានីភ្នំពេញ ថ្ងៃទី ១៦-១៧ មីនា ឆ្នាំ២០១៩ ខាងមុខនេះ។

TIGER STREET FOOTBALL FESTIVAL 2019 គឺជាកម្មវិធីប្រកួតកីឡាបាល់ទាត់ដ៏ធំបំផុតនៅក្នុងប្រទេសកម្ពុជា ហើយនេះជាឆ្នាំទីប្រាំពីរហើយ ដែលបានរៀបចំឡើងដោយក្រុមហ៊ុនស្រាបៀរថៃហ្គ័រ ដើម្បីលើកកម្ពស់សកម្មភាពកីឡា និងជាវេទិកាមួយសម្រាប់កីឡាករបញ្ចេញទេពកោសល្យរបស់ខ្លួន។

TIGER STREET FOOTBALL FESTIVAL 2019 មិនដូចបាល់ទាត់ហ្វូតសាល ធម្មតា និងបាល់ទាត់ប្រភេទផ្សេងទៀតទេ គឺជាការប្រកួតបាល់ទាត់នៅលើទីលានរាងទ្រវែងទំហំ២៥មx១៤.៥មដែលជាកន្លែងប្រមូលផ្តុំសកម្មភាពប្រកួតឥតឈប់ឈរ។ ហើយជាការ ប្រកួតដែលមានកីឡាករមិនលើសពី៥នាក់នៅលើទីលាន មានសកម្មភាពប្រកួតយ៉ាងស្វិតស្វាញ ឥតឈប់ឈរនឹងធ្វើឲ្យទស្សនិកជនរំភើបរីករាយទស្សនាការប្រកួត។ ការប្រកួតមានរយៈពេលសរុប១២នាទី ដែលបែងចែកជាពីរវគ្គមានរយៈពេល៦នាទីពីរដង ហើយមានការសម្រាក២នាទីនៅចន្លោះវគ្គ។សម្រាប់ការប្រកួតចាប់ពីវគ្គពាក់កណ្តាលផ្តាច់ព្រ័ត្រ (បួនក្រុមចុងក្រោយ) ការប្រកួតនីមួយៗមានរយៈពេល ១០នាទីពីរវគ្គ និងមានរយៈពេលសម្រាកចន្លោះវគ្គចំនួន ៤នាទី។

ព្រឹត្តិការណ៍ TIGER STREET FOOTBALL FESTIVAL 2019 នេះមិនត្រឹមតែបង្ហាញស្ទីលលេងបាល់ទាត់ដ៏អស្ចារ្យថែមទាំងមានសកម្មភាពសប្បាយរីករាយជាច្រើនទាំងលើទីលាននិងក្រៅទីលានដូចជាការសម្តែងក្បាច់រាំពីក្រុមនារីរាំដ៏ស្រស់ស្អាត ការលេងហ្គេមកម្សាន្ត ការដាក់តាំងលក់សម្ភារកីឡាមានលក់ជូនពិសេសសម្រាប់ការជាវផលិតផលស្រាបៀរថៃហ្គ័រ មានការប្រគំតន្រ្តីនាពេលរាត្រីកាន់តែធំ កាន់តែប្លែក និងកាន់តែអស្ចារ្យជាងមុនដោយមានការអញ្ជើញចូលរួមសម្តែងពីសំណាក់តារាល្បីៗប្រចាំព្រះរាជាណាចក្រកម្ពុជាដូចជា លោកព្រាប សុវត្តិ លោក ខេមរៈ សិរីមន្ត លោក ឆន សុវណ្ណរាជ កញ្ញា ឱក សុគន្ធកញ្ញា កញ្ញា ពេជ្រ សោភា អ្នកនាង សុគន្ធនីសា រួមជាមួយនឹងកម្មវិធីកម្សាន្តសប្បាយៗជាច្រើន កាន់តែរំភើប កាន់តែអស្ចារ្យ ដែលញ៉ាំងឲ្យព្រឹត្តិការណ៍នេះកាន់តែជក់ចិត្ត និងដក់ជាប់អារម្មណ៍ដល់អ្នកទស្សនា។

តើអ្នកត្រៀមខ្លួនហើយឬនៅ? សូមចូលរួមជាមួយយើង #UNCAGE ការប្រកួតបាល់ទាត់ TIGER STREET FOOTBALL FESTIVAL 2019 រដូវកាល ២០១៩! សូមមើលកាលវិភាគ និងទស្សនាការផ្សាយផ្ទាល់នៅលើទំព័រ Facebook របស់យើង!

នៅឆ្នេរអូឈើទាល ក្រុងព្រះសីហនុ ចាប់ពីថ្ងៃទី 5 ដល់ ទី6 ខែមករា ឆ្នាំ 2019
នៅខាងកើតវិមានឯករាជ្យចម្ងាយ២០០ម៉ែត្រ ទីរួមខេត្តតាកែវ នៅថ្ងៃទី 13 ខែមករា ឆ្នាំ2019
នៅដីឡូន៍ឧកញ្ញា ឈួន គឹមសាន ទីរួមខេត្តកំពង់ស្ពឺ នៅថ្ងៃទី 20 ខែមករា ឆ្នាំ2019
នៅវាលបែកចាន ទីរួមខេត្តបាត់ដំបង ចាប់ពីថ្ងៃទី 26 ដល់ ទី27 ខែមករា ឆ្នាំ2019
នៅបរិវេណផ្សារាត្រី ផ្កាយ៥ ក្រុងប៉ោយប៉ែត ចាប់ពីថ្ងៃទី 2 ដល់ ទី3 ខែកុម្ភ: ឆ្នាំ2019
នៅបរិវេណទីលានអង្គរឃ្យុងយ៊ូ ទីរួមខេត្ត សៀមរាប ចាប់ពីថ្ងៃទី 8 ដល់ ទី10 ខែកុម្ភ: ឆ្នាំ2019
នៅបរិវេណកោះពេជ្រ ខាងកើតផ្សារាត្រី ទីរួមខេត្តកំពង់ចាម ចាប់ពីថ្ងៃទី 16 ដល់ ទី17 ខែកុម្ភ: ឆ្នាំ2019
នៅសួនច្បារមាត់ទន្លេ ក្រុងតាខ្មៅ នៅថ្ងៃទី 3 ខែមីនា ឆ្នាំ2019
នៅមុខមហោស្រពកោះពេជ្រ រាជធានីភ្នំពេញ ថ្ងៃទី 13 ដល់ 15ខែមីនា ឆ្នាំ2019 សម្រាប់ជើងឯកមណ្ឌលភ្នំពេញ និងចាប់ពីថ្ងៃ 16 ដល់ 17 ខែមីនា ឆ្នាំ 2019 សម្រាប់វគ្គផ្តាច់ព្រ័ត្រកំពូលជើងឯក ឆ្នាំ2019 ។

ក្រុមជាង ៦០០ ក្រុមនឹងចូលរួមការប្រកួតវគ្គជម្រុះតាមតំបន់។ ការប្រកួតវគ្គជម្រុះនេះនឹងធ្វើឡើង នៅតាមបណ្តាខេត្តក្រុងចំនួនប្រាំបួនរួមមាន៖ តាកែវ ព្រះសីហនុ កំពង់ស្ពឺ បាត់ដំបង សៀមរាប ប៉ោយប៉ែត កំពង់ចាម កណ្តាល និងរាជធានីភ្នំពេញចាប់ពីថ្ងៃទី ៥ ខែមករា ២០១៩ រហូតដល់ថ្ងៃទី ១៧ ខែមីនា ២០១៩។ ក្រុមកំពូលចំនួន ៦៤ ក្រុម នឹងចូលរួមប្រកួតប្រជែងក្នុងវគ្គផ្តាច់ព្រ័ត្តដែលនឹងធ្វើឡើងរាជធានីភ្នំពេញនៅ ថ្ងៃទី ១៦ និង ១៧ ខែមីនា ២០១៩ ដើម្បីដណ្តើមយកម្ចាស់ជើងឯក TIGER STREET FOOTBALL FESTIVAL 2019។

សូមរីករាយទទួលទានស្រាបៀរ Heineken® ដោយការទទួលខុសត្រូវ

December 31, 2018

ហេតុអ្វីបានជាបដិវត្តន៍ឧស្សាហកម្មទី4 ត្រូវការការអប់រំសិល្បៈកាន់តែច្រើន?

នៅក្នុងយុគសម័យឧស្សាហកម្មអ្នកជំនាញផ្នែកបច្ចេកវិទ្យា និងបច្ចេកទេសជាផ្នែកដែលមានតម្រូវការខ្ពស់បំផុត ព្រោះគ្រប់ផលិតកម្មទាំងអស់សុទ្ធតែត្រូវការអ្នកជំនាញ តែក្រោយពេលពិភពលោកបោះជំហានទៅមុខមួយជំហានទៀតអ្នកជំនាញបច្ចេកទេសទាំងអស់ត្រូវតែមានផ្នែកសំខាន់មួយទៀតដើម្បីទប់លំនឹងរបស់ខ្លួនក្នុងទីផ្សារការងារ។ ផ្នែកដ៏សំខាន់នោះ គឺសិល្បៈដោយបូករួមទាំងសិល្បៈនៃការរស់នៅ សិល្បៈនៃការធ្វើការងារ និងសិល្បៈក្នុងការធ្វើអាជីវកម្មជាដើម។

បច្ចុប្បន្ននេះ វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ជាផ្នែកសំខាន់បំផុតសម្រាប់ពិភពលោក តែចរន្តនាពេលអនាគត មុខវិជ្ជាសំខាន់នេះនឹងត្រូវប្តូរទៅជា STEAM ដោយបញ្ចូលនូវសិល្បៈដែលជាមុខវិជ្ជាមួយដែលម៉ាស៊ីនមិនអាចធ្វើជំនួសមនុស្សបាន។ យោងតាមទិន្នន័យរបស់វេទិកាសេដ្ឋកិច្ចពិភពលោកសម្រាប់ការងារអនាគតឆ្នាំ2018 (World Economic Forum’s Future ofJobs report 2018) បានឱ្យដឹងថា ការងារបច្ចេកវិទ្យានិងបច្ចេកទេសបានបង្កើនការប្រកួតប្រជែងយ៉ាងខ្លាំងជាមួយការងារ និងអាជីពប្រពៃណី។ ហើយចំណុចដែលធ្វើឱ្យអ្នកជំនាញបច្ចេកវិទ្យាទាំងអស់នោះអាចទាញយកឱកាសការងារពីផ្នែកផ្សេងៗបានគឺ ទេពកោសល្យដែលពួកគេមាន អាចបង្កើតសមត្ថភាព និងប្រសិទ្ធភាពខ្លាំងសម្រាប់ស្ថាប័ន។

របាយការណ៍ខាងលើបានបង្ហាញផងដែរថា មនុស្សចាំបាច់ត្រូវតែមានជំនាញសិល្បៈ ដែលជាផ្នែកទន់បន្ថែមលើទេពកោសល្យដែលមានស្រាប់នៅក្នុងខ្លួន ស្របពេលដែលពួកគេប្រើប្រាស់បច្ចេកទេស និងឧបករណ៍ទំនើបដើម្បីដោះស្រាយបញ្ហា។ ចាប់ពីពេលនេះទៅ មនុស្សចាំបាច់ត្រូវតែបង្កើនសមត្ថភាពឱ្យបានលើសពីអ្វីដែលមនុស្សមានក្នុងឆ្នាំ2010 ឬ2018។

មានអ្នកជំនាញខ្លះ គាត់ចេះខ្លាំងលើជំនាញបច្ចេកវិទ្យា ឬជំនាញបច្ចេកទេស តែគាត់មិនមានសិល្បៈក្នុងការរស់នៅ និងធ្វើការងារឱ្យបានល្អ ហេតុនេះគាត់ចាំបាច់ត្រូវតែបន្ថែមជំនាញទាំងអស់នោះដើម្បីធានាពីសុវត្ថិភាពការងាររបស់គាត់ ព្រោះអនាគតទៅ ទោះបីជាការងាររបស់អ្នកបច្ចេកវិទ្យាក៏ដោយ ក៏ម៉ាស៊ីនអាចធ្វើជំនួសបានដែរ និងមិនមែនជំនួសបានត្រឹមតែការងារតិចតួចនោះទេ។

ជំនាញសិល្បៈដែលអ្នកជំនាញបច្ចុប្បន្នគួរមានបន្ថែមនោះគឺ៖
1.សិល្បៈច្នៃប្រឌិតអ្នកជំនាញក្នុងវិស័យបច្ចេកវិទ្យា ឬវិទ្យាសាស្ត្រភាគច្រើនជាមនុស្សដែលមានសមត្ថភាពធ្វើការងារបានល្អ ហើយរហ័សជាងអ្នកដទៃ តែអ្វីដែលចាំបាច់ត្រូវមាននាពេលខាងមុខ គឺភាពច្នៃប្រឌិតដើម្បីដើរចេញឱ្យផុតពីភាពដដែល។ នៅពេលមនុស្សត្រូវបានជំនួសដោយម៉ាស៊ីន ការច្នៃប្រឌិតជាផ្នែកសំខាន់មួយដែលមិនរងការប៉ះពាល់ ព្រោះម៉ាស៊ីនអាចធ្វើការងារបានល្អឥតខ្ចោះតែលើការងារដំឡើង កែច្នៃ ឬរៀបចំចង្វាក់ផលិតកម្មប៉ុណ្ណោះ តែគ្មានសមត្ថភាពបង្កើតរបស់ថ្មីៗ ឬធ្វើនវានុវត្តន៍នោះទេហេតុនេះការងារសំខាន់ៗទាំងអស់នេះទាមទារឱ្យមានមនុស្សទៅធ្វើ។

សិល្បៈក្នុងការច្នៃប្រឌិត ជាផ្នែករុញកំណើនអភិវឌ្ឍន៍មនុស្សឱ្យកាន់តែខ្លាំង ព្រោះមនុស្សមិនចាំបាច់ខ្វល់ពីការអនុវត្តច្រើនពេកទេ ពួកគេគ្រាន់តែគិតស្រាវជ្រាវរិះរកអ្វីដែលល្អ ពិសោធឱ្យបានជោគជ័យ ម៉ាស៊ីននឹងធ្វើការងារទាំងអស់នោះជំនួសមនុស្ស ដែលវានឹងធ្វើឱ្យសមិទ្ធផលថ្មីៗកើតឡើងយ៉ាងឆាប់រហ័ស ហើយដោះស្រាយតម្រូវការមនុស្សបានកាន់តែច្រើនជាងមុន។

2. សិល្បៈក្នុងការគ្រប់គ្រងមនុស្សបើទោះបីជាការងាររបស់មនុស្សមួយចំនួនធំ ត្រូវបានដណ្តើមដោយម៉ាស៊ីនក៏ដោយ តែមនុស្សក៏មិនមែនអស់ការងារធ្វើដែរ។ ចរន្តនៃបដិវត្តន៍ឧស្សាហកម្មទី4 គឺផ្លាស់ប្តូរការងាររបស់មនុស្សពីការទទួលខុសត្រូវតិច ទៅធ្វើការងារកាន់តែធំជាងមុន។ ការងារលីសែង លើកដាក់ ដំឡើង និងរៀបចំកំប៉ិកកំប៉ុកនឹងត្រូវបានធ្វើដោយម៉ាស៊ីន តែគ្រប់កន្លែងការងារមិនអាចអវត្តមានមនុស្សបានទេ។ មនុស្សនឹងផ្លាស់ទីពីអ្នកធ្វើដោយផ្ទាល់ទៅជាអ្នកបញ្ជា និងត្រួតពិនិត្យលើភាពមិនប្រក្រតីវិញម្តងហេតុនេះដើម្បីឱ្យមានការរីកចម្រើន មនុស្សនៅតែត្រូវការសិល្បៈនៃការគ្រប់គ្រងមនុស្ស។

សិល្បៈនៃការគ្រប់គ្រងមនុស្សនាពេលអនាគតនឹងកាន់តែមានតម្រូវការខ្ពស់ ព្រោះមនុស្សចាប់ផ្តើមមានសមត្ថភាពខ្លាំងជាងមុន ហេតុនេះទាមទារឱ្យអ្នកគ្រប់គ្រងពួកគេទាល់តែចេះទាំងបច្ចេកទេស និងសិល្បៈដឹកនាំខ្លាំងពូកែ៕

December 31, 2018

កំណាព្យខ្មែរជាទម្រង់អក្សរសិល្ប៍ល្អប្រណីត តែយុវជនមិនសូវចាប់អារម្មណ៍

កម្ពុជាជាប្រទេសដែលមានអរិយធម៌ចំណាស់ជាងគេនៅតំបន់អាស៊ីអាគ្នេយ៍ ដោយក្នុងនោះយើងមានទម្រង់សិល្បៈប្រកបដោយគុណតម្លៃជាច្រើនទម្រង់ ដូចជាស្ថាបត្យកម្ម សិល្បៈវប្បធម៌អរូបិយ និងសិល្បៈអក្សរសិល្ប៍ជាដើម។ នៅក្នុងទម្រង់នៃអក្សរសិល្បិ៍ខ្មែរ កំណាព្យត្រូវបានគេមើលឃើញថាជាទម្រង់អក្សរសិល្ប៍មួយប្រភេទដែលមានប្រជាប្រិយភាពបំផុតកាលពីអតីតកាល ព្រោះកវីនិពន្ធកម្ពុជាបានចងក្រងទុកនូវក្បួនច្បាប់ រឿងព្រេងកថា រួមទាំងអត្ថបទអប់រំជាច្រើនដោយប្រើប្រាស់កំណាព្យកាព្យឃ្លោងដើម្បីទុកជាការកម្សាន្តផង និងការអប់រំផង។ នាពេលបច្ចុប្បន្ននេះ ដោយសារតែសង្គមមានការប្រែប្រួល និងដោយសារតែចរន្តសកលដែលមានភាពយន្ត និងទស្សនីយភាពសម្បូរបែប កំណាព្យហាក់សាបរលាបបន្តិចនៅក្នុងសង្គម ព្រោះយុវជនជំនាន់ថ្មីមិនសូវចាប់អារម្មណ៍។

អ្នកនិពន្ធ និងជាអ្នកអក្សរសាស្ត្រមួយរូបគឺ លោក សុគន្ធ សុខា បានលើកឡើងថា កំណាព្យបច្ចុប្បន្នហាក់មានស្ថានភាពសាបរលាបបន្តិច ព្រោះយុវជនបច្ចុប្បន្នគាត់ងាកមកចាប់អារម្មណ៍ច្រើនលើប្រលោមលោកខ្សែភាពយន្ត និងបច្ចេកវិទ្យាច្រើនជាងការចាប់អារម្មណ៍លើកំណាព្យ។ នាពេលបច្ចុប្បន្ននេះមានប្រជាជនខ្មែរមិនច្រើនទេដែលចេះសរសេរកំណាព្យ កុំថាឡើយដល់ទៅចូលចិត្តកំណាព្យ ហេតុនេះប្រសិនបើមិនចាប់ផ្តើមយកចិត្តទុកដាក់លើវិស័យនេះទេកំណាព្យអាចនឹងធ្លាក់ចុះខ្លាំងជាងនេះទៅទៀត។ បញ្ហាសំខាន់មួយផ្សេងទៀតដែលធ្វើឱ្យវិស័យកំណាព្យស្ថិតក្នុងស្ថានភាពធ្លាក់ចុះ គឺកង្វះការផ្សព្វផ្សាយ។ នៅពេលយើងមិនសូវមានការផ្សព្វផ្សាយ និងលើកទឹកចិត្តមនុស្សឱ្យមើលឃើញពីតម្លៃនៃកំណាព្យខ្មែរ ស្របពេលដែលផ្នែកផ្សេងៗជាច្រើនទៀតកំពុងត្រូវបានផ្សព្វផ្សាយច្រើននោះ យុវជនក៏ដូចជាប្រជាជនខ្មែរទូទៅដែរ ប្រាកដជាបែរចំណាប់អារម្មណ៍ទៅលើរឿងដែលមានមនុស្សច្រើនចាប់អារម្មណ៍មិនខាន។

លោក សុគន្ធ សុខា បាននិយាយថា៖ “យុវជននាពេលបច្ចុប្បន្នចូលចិត្តធ្វើអ្វីមួយឆាវៗ ឬផ្អើលៗតាមគ្នា ហេតុនេះនៅពេលខ្លះ ពួកគេអាចចាប់អារម្មណ៍លើរឿងអ្វីមួយក្នុងរយៈពេលខ្លីៗ ដែលធ្វើឱ្យផ្នែកវប្បធម៌អក្សរសិល្ប៍ ដូចជាកំណាព្យជាដើម មិនសូវត្រូវបានគេយកចិត្តទុកដាក់ ព្រោះគ្មានការគាំទ្រយូរអង្វែង”។

អ្នកនិពន្ធខាងលើបានលើកឡើងផងដែរថាចំពោះសៀវភៅកំណាព្យវិញ យើងសង្កេតឃើញថាមានតិចតួចបំផុតនៅក្នុងទីផ្សារ ព្រោះមិនសូវមានអ្នកណាចាប់អារម្មណ៍អានកំណាព្យនោះទេ ដែលការណ៍នេះនឹងធ្វើឱ្យអ្នកសរសេរ អ្នកនិពន្ធ ឬការបោះពុម្ពផ្សាយអំពីកំណាព្យចាប់ផ្តើមធ្លាក់ចុះ។ ចំពោះការសរសេរនិពន្ធកំណាព្យ និងការផូស្តបង្ហាញនៅក្នុងបណ្តាញសង្គមក៏ដូចគ្នាដែរ គឺមិនសូវមានអ្នកចូលចិត្តអានកំណាព្យ ឬលើកទឹកចិត្តអ្នកសរសេរកំណាព្យឡើយ ដែលកត្តានេះបង្ហាញឱ្យឃើញថា អ្នកសរសេរកំណាព្យមិនសូវទទួលបានការលើកទឹកចិត្តឡើយ។ ការមិនសូវមានការលើកទឹកចិត្តនេះអាចបណ្តាលមកពីបញ្ហាសំខាន់មួយទៀតដែរ គឺគុណភាពរបស់អ្នកសរសេរដែលនៅមិនទាន់បានល្អគ្រប់ជ្រុងជ្រោយហេតុនេះវាក៏ទាមទារឱ្យស្មេរ ឬអ្នកសរសេរកំណាព្យត្រូវពង្រឹងសមត្ថភាពរបស់ខ្លួនបន្ថែមឱ្យកាន់តែទាក់ទាញខ្លាំងឡើងដែរ។

ជុំវិញបញ្ហានេះ លោក ឡុច ចន្ថា ជាអ្នកនិពន្ធកម្ពុជាមួយរូបបានលើកឡើងថា កំណាព្យ គឺជាទម្រង់អក្សរសិល្ប៍ដ៏ល្អឯករបស់កម្ពុជា ព្រោះថា កំណាព្យជាទម្រង់មូលដ្ឋានដែលអាចបំបែកចេញជាអត្ថបទរឿងជាកំណាព្យផង អាយ៉ៃផង បទចម្រៀង និងជាទម្រង់សិល្បៈជាច្រើនដទៃទៀត។ កំណាព្យខ្មែរមានលក្ខណៈពិសេសត្រង់យើងមានបែបបទច្រើន ហើយទម្រង់ទាំងអស់នោះធ្វើឱ្យកំណាព្យមានភាពសម្បូរបែបដែលអាចពណ៌នាបានគ្រប់កាលៈទេសៈ ទាំងការរៀបរាប់ជាដំណើររឿង ការបង្ហាញពីអារម្មណ៍រីករាយ សោកសៅសោកស្តាយ ឬការបង្កើនការអប់រំជាដើម ដែលសុទ្ធតែអាចអន្ទងចិត្តអ្នកអានឱ្យជក់ចិត្តចង់អានរហូតតាំងពីដើមដល់ចប់។

លោក ឡុច ចន្ថា បាននិយាយថា៖ “កំណាព្យខ្មែរជាទម្រង់អក្សរសិល្ប៍យ៉ាងប្រណីតរបស់កម្ពុជា តែបច្ចុប្បន្ននេះវាទាមទារជាចាំបាច់នូវការយកចិត្តទុកដាក់ឡើងវិញ”។

អ្នកនិពន្ធខាងលើបានលើកឡើងផងដែរថាដើម្បីឱ្យកំណាព្យខ្មែររីកលូតលាស់បានលឿន លុះត្រាតែយើងទាំងអស់គ្នាចាប់ផ្តើមផ្តល់តម្លៃដល់អ្នកនិពន្ធតាមរយៈការគាំទ្រស្នាដៃរបស់ពួកគាត់ ការបង្កើតកម្មវិធីប្រកួតប្រជែងដើម្បីផ្តល់ពានរង្វាន់ និងចាប់ផ្តើមបង្កើតស្នាដៃប្រកបដោយគុណតម្លៃល្អៗដើម្បីផ្តល់ជាចំណីអារម្មណ៍ដល់អ្នកអានឡើងវិញ។ ចំពោះអ្នកដែលមិនធ្លាប់អានកំណាព្យ អាចសាកល្បងស្វែងរកស្នាដៃកំណាព្យល្អៗរបស់ខ្មែរយើងមកអានដើម្បីឱ្យដឹងថា ស្នាដៃទាំងអស់នោះមានតម្លៃប៉ុនណា ហើយផ្តល់គុណប្រយោជន៍ច្រើនប៉ុនណា។ ការរំលែកចំណាប់អារម្មណ៍ពីបច្ចេកវិទ្យា ឬទស្សនីយភាពប្លែកៗក្នុងសង្គមបច្ចុប្បន្ន មកគាំទ្រទម្រង់សិល្បៈកំណាព្យខ្មែរអាចនឹងធ្វើឱ្យយុវជនកម្ពុជាកាន់តែច្រើនឡើងមានគំនិតស៊ីជម្រៅ ហើយថែមទាំងអាចរក្សាបាននូវមរតកវប្បធម៌ប្រកបដោយគុណតម្លៃរបស់យើងទៀតផង៕

December 31, 2018

ការបំពុលបរិយាកាសបានក្លាយជាគ្រោះថ្នាក់ធំទី4 សម្រាប់ពិភពលោក

ការបំពុលបរិយាកាសបានក្លាយជាគ្រោះថ្នាក់ធំទី4 លើពិភពលោកដោយសារវាបានសម្លាប់មនុស្សអស់ជាច្រើននាក់បន្ទាប់ពីផ្សែងបារី សម្ពាធឈាមខ្ពស់ និងភាពអត់ឃ្លាន។ ការបំពុលបរិយាកាសត្រូវបានគេរកឃើញថា បានសម្លាប់មនុស្សប្រមាណជាង6លាននាក់ជារៀងរាល់ឆ្នាំ ហើយបញ្ហាទាំងអស់នេះត្រូវបានគេរកឃើញថា បានកើតមាននៅក្នុងប្រទេសក្រីក្រ ដែលធ្វើឱ្យមានការព្រួយបារម្ភពីបញ្ហាគុណភាពខ្យល់អាកាសកាន់តែខ្លាំងឡើង។ បច្ចុប្បន្ននេះ ប្រជាជនជាងពាក់កណ្តាលនៃពិភពលោកកំពុងរស់នៅក្នុងទីក្រុង ហើយបើតាមការប៉ាន់ស្មាន នៅឆ្នាំ2050មនុស្សរស់នៅក្នុងទីក្រុងនឹងកើនឡើងដល់ 2/3 នៃប្រជាជនសរុបលើពិភពលោក។ ស្របពេលដែលប្រជាជនកាន់តែច្រើនឡើងៗចាកចេញពីតំបន់ជនបទមករស់នៅក្នុងទីក្រុង កំណើនយានយន្តពិសេសរថយន្តដែលកាន់តែមានចំនួនច្រើនឡើងៗ បានធ្វើឱ្យកើតបញ្ហាកកស្ទះចរាចរណ៍កើនឡើងគ្រប់ទីកន្លែង ហើយចំពោះទីតាំងបៃតងជាច្រើនផ្សេងទៀតនៅជុំវិញផ្ទះ និងកន្លែងធ្វើការត្រូវបានកាត់បន្ថយ ដោយសារត្រូវជំនួសដោយកន្លែងចតឡានវិញម្តង។

អ្នករស់នៅទីក្រុងនាពេលបច្ចុប្បន្ននេះ និងទៅអនាគតនឹងត្រូវទទួលរងនូវការគំរាមកំហែងដល់សុខភាពកាន់តែខ្លាំងឡើងៗ ព្រោះគ្រប់ទីកន្លែងសុទ្ធតែមានផ្សែងពុលចេញពីយានយន្ត។ មិនថាអ្នកជិះកង់ហាត់ប្រាណស្ថិតនៅតាមសួនកម្សាន្ត ឬដើរហាត់ប្រាណនៅតាមសួនសាធារណៈនោះទេ ផ្សែងពុលបានធ្វើឱ្យអ្នកខកបំណង ព្រោះមនុស្សគ្រប់គ្នាចង់ហាត់ប្រាណដើម្បីឱ្យរាងកាយរឹងមាំ តែស្របពេលជាមួយគ្នាអ្នកគ្រប់គ្នាទាំងនោះបែរជាអាចប្រឈមនឹងបញ្ហាផ្លូវដង្ហើមទៅវិញ ព្រោះពួកគេបានស្រូបយកផ្សែងពុលជាច្រើននៅកន្លែងហាត់ប្រាណទាំងនោះ។

ស្របពេលជាមួយបញ្ហាប្រឈមមួយនេះ វាត្រូវបានគេមើលឃើញជាទូទៅថា អ្នកជំនាញជាច្រើនបានព្យាយាមទប់ស្កាត់ផលប៉ះពាល់ដែលនាំឱ្យមានបញ្ហាខ្យល់មិនស្អាតទាំងនេះ តែអ្វីដែលពួកគេអាចចូលរួមបាន គឺស្ថិតក្នុងចំណែកមួយតិចតួចប៉ុណ្ណោះ ហើយអ្វីដែលចាំបាច់ត្រូវធ្វើសម្រាប់អ្នកគ្រប់គ្រងតំបន់នានាគឺចាំបាច់ត្រូវធ្វើកំណែទម្រង់ប្រព័ន្ធសុខភាពសាធារណៈរៀបចំហេដ្ឋារចនាសម្ព័ន្ធឱ្យឆ្លើយតបនឹងបញ្ហាប្រឈម និងធ្វើការផ្លាស់ប្តូរទម្រង់ទីក្រុងឱ្យទៅជាពណ៌បៃតង។

ជាដំណោះស្រាយសម្រាប់តំបន់ខ្លះ គឺគេបានខិតខំប្រឹងប្រែងដើម្បីធ្វើយ៉ាងណាកាត់បន្ថយផលប៉ះពាល់ដែលមកពីការអភិវឌ្ឍដ៏លឿននៃការរស់នៅក្នុងទីក្រុងតាមរយៈគោលការណ៍ធ្វើឱ្យខ្យល់ស្អាត ដោយបង្កើនពន្ធលើការនាំចូលរថយន្តចាស់ៗមកប្រើក្នុងទីក្រុង។ ចំណែកឯភាគីវិស័យឯកជន ដូចជាឧស្សាហកម្មផលិតរថយន្តជាដើម ក៏កំពុងកែប្រែយ៉ាងគំហុកពីការផលិតរថយន្តធម្មតាទៅជារថយន្តប្រភេទHybrid និងរថយន្តអេឡិចត្រូនិក ដើម្បីជួយដល់បរិស្ថានតាមរយៈការកាត់បន្ថយការប្រើប្រាស់ប្រេងឥន្ធនៈផងដែរ។

ក្រៅពីដំណោះស្រាយទាំងអស់នេះ ការជំរុញលើកទឹកចិត្តប្រជាជនឱ្យកាត់បន្ថយការប្រើប្រាស់យានយន្តផ្ទាល់ខ្លួន និងធ្វើដំណើរដោយការជិះកង់ ជាដំណោះស្រាយប្រកបដោយប្រសិទ្ធភាពបំផុតក្នុងការកាត់បន្ថយផលប៉ះពាល់ដែលបណ្ដាលមកពីការបំពុលបរិស្ថានក្នុងទីក្រុង។ បើទោះបីជាយានយន្តត្រូវបានគេសម្រួលឱ្យស៊ីសាំងតិច និងកាត់បន្ថយការបំភាយជាតិកាបូនក៏ដោយ តែប្រសិនបើគេនៅតែប្រើប្រាស់វាច្រើនគ្រឿងក្នុងពេលតែមួយដដែលនោះ បញ្ហាកកស្ទះចរាចរណ៍នឹងធ្វើឱ្យការបំពុលនៅតែបន្តកើតមានយ៉ាងរ៉ាំរ៉ៃដដែល។ ប្រសិនបើប្រជាជនចាប់ផ្តើមប្រើប្រាស់សេវាសាធារណៈដូចជាការជិះរថយន្តក្រុង ឬជិះកង់ទៅធ្វើការនោះពួកគេនឹងអាចកាត់បន្ថយបញ្ហាបានមួយចំណែកធំ។

លើសពីនេះទៅទៀត ចរន្តនេះនឹងធ្វើឱ្យមានផលប្រយោជន៍ជាវិជ្ជមានធំមួយទៀតដែលអាចដោះស្រាយបញ្ហាបរិស្ថានបានគឺ បង្កើនចំនួនអ្នកជិះកង់ និងដើរទៅធ្វើការងារ។ នៅពេលដែលយានយន្តត្រូវបានកាត់បន្ថយ នោះអ្នកជិះកង់ និងដើរទៅធ្វើការងារកាន់តែមានភាពងាយស្រួល ទន្ទឹមគ្នានឹងប្រព័ន្ធហេដ្ឋារចនាសម្ព័ន្ធថ្មីៗត្រូវបានគេរៀបចំឡើងដើម្បីលើកទឹកចិត្តពួកគាត់។ ម្យ៉ាងវិញទៀតតាមការស្រាវជ្រាវបានបង្ហាញថា មនុស្សដែលចូលចិត្តដើរទៅធ្វើការរយៈពេល 30នាទីរាល់ថ្ងៃ ច្រើនតែមានស្ថានភាពផ្លូវកាយ និងផ្លូវចិត្តល្អជាងមនុស្សដែលចូលចិត្តប្រើប្រាស់យានជំនិះជាគ្រឿងយន្ត៕

December 31, 2018

វិស័យមនុស្សសាស្ត្រ និងសង្គមសាស្ត្រ កំពុងស្ថិតក្នុងចំណាប់អារម្មណ៍របស់គ្រឹះស្ថានអប់រំធំៗ

វិស័យមនុស្សសាស្ត្រ និងសង្គមសាស្ត្រជាផ្នែកមួយយ៉ាងសំខាន់ក្នុងការជំរុញឱ្យសង្គមមួយអាចអភិវឌ្ឍទៅបានប្រកប-ដោយគុណភាព សីលធម៌ និងគុណតម្លៃខ្ពស់ដែលអាចរុញច្រានឱ្យការរស់នៅរបស់ប្រជាពលរដ្ឋក្នុងប្រទេសកាន់តែមានលក្ខណៈល្អប្រសើរឡើង។ វិស័យដ៏មានសារៈសំខាន់នេះ អាចបំបែកចេញជាមែកធាងជាច្រើនដែលនឹងបម្រើឱ្យវិស័យសង្គម ការធ្វើអាជីវកម្ម និងការធ្វើការងារលើគ្រប់វិស័យ។

ដោយមើលឃើញពីសារៈសំខាន់នៃវិស័យមនុស្សសាស្ត្រ និងសង្គមសាស្ត្រនេះ គ្រឹះស្ថានឧត្តមសិក្សាធំៗនៅកម្ពុជាចំនួន 3 ដែលមានដូចជា សាកលវិទ្យាល័យភូមិន្ទភ្នំពេញ សាកលវិទ្យាល័យភូមិន្ទវិចិត្រសិល្បៈ និងវិទ្យាស្ថានជាតិអប់រំ បានរួមគ្បង្កើតមជ្ឈមណ្ឌលស្រាវជ្រាវដ៏សំខាន់មួយដើម្បីពង្រឹងដល់ការអភិវឌ្ឍវិស័យមនុស្សសាស្ត្រ និងសង្គមសាស្ត្រនៅកម្ពុជា។

រដ្ឋមន្ត្រីក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ ជួនណារ៉ុន បានលើកឡើងថា សកម្មភាពនៃការព្រមព្រៀងគ្នាបង្កើតមជ្ឈមណ្ឌលស្រាវជ្រាវអន្តរគ្រឹះស្ថានឧត្តមសិក្សានេះ នឹងជំរុញឱ្យមានកិច្ចសហការកាន់តែប្រសើរឡើងលើការសិក្សាស្រាវជ្រាវរបស់និស្សិតនៅកម្ពុជា។ ទន្ទឹមនឹងក្រសួងអប់រំ យុវជន និងកីឡា យកចិត្តទុកដាក់ក្នុងការជំរុញផ្នែកវិទ្យាសាស្ត្រពិត ដោយការធ្វើសកម្មភាពផ្សព្វផ្សាយ និងបង្កើតសម្ភារបរិក្ខារទំនើបៗដល់គ្រឹះស្ថានឧត្តមសិក្សា និងសាលានានានៅទូទាំងប្រទេសហើយនោះ ក្រសួងក៏បានយកចិត្តទុកដាក់ផងដែរលើជំនាញដែលទាក់ទងនឹងវិទ្យាសាស្រ្តសង្គម។

ឯកឧត្តម ហង់ ជួនណារ៉ុន មានប្រសាសន៍ថា៖“កម្ពុជាក៏ត្រូវការផងដែរនូវអ្នកឯកទេសខាងវិទ្យាសាស្ត្រសង្គម ដូចជាអ្នកអក្សរសិល្ប៍ ភាសា ទស្សនវិទ្យា និងភូមិវិទ្យា ជាដើម ដែលអាចផ្ដល់សញ្ញាវិជ្ជមានលើការលើកកម្ពស់អត្តសញ្ញាណ និងវប្បធម៌ជាតិ”។

ឯកឧត្ដមរដ្ឋមន្ត្រីក្រសួងអប់រំ បានលើកឡើងផងដែរថា ប្រទេសយើងមិនទាន់មានអ្នកស្រាវជ្រាវផ្នែកសង្គមសាស្ត្រច្រើននៅឡើយ ហេតុនេះការលើកទឹកចិត្តឱ្យសិស្ស-និស្សិតសិក្សាផ្នែកសង្គមសាស្ត្រក៏ជាចំណុចសំខាន់មួយក្នុងការពង្រឹងគុណភាពនៃចំណេះដឹងនៅក្នុងប្រទេស និងអាចឈានទៅបន្តការសិក្សានៅក្រៅប្រទេសថែមទៀត។

ការសិក្សាផ្នែកសង្គមវិទ្យា ចាំបាច់ត្រូវដើរទន្ទឹមគ្នានឹងការសិក្សាផ្នែកវិទ្យាសាស្ត្រ ព្រោះស្របពេលដែលសង្គមត្រូវការអ្នកជំនាញក្នុងការធ្វើនវានុវត្តន៍ និងការបម្រើការងារក្នុងវិស័យឧស្សាហកម្ម ប្រទេសនីមួយៗចាំបាច់ផងដែរនូវអ្នកជំនាញដែលមានការយល់ដឹងខ្ពស់ពីអត្តសញ្ញាណរបស់ជាតិ រួមទាំងអ្នកជំនាញដែលអាចជាជំនួយយ៉ាងសំខាន់ដល់អ្នកវិទ្យាសាស្ត្រ។

អ្នកសង្គមសាស្ត្រអាចជាអ្នកកត់ត្រានូវក្បួនខ្នាតដ៏សំខាន់សម្រាប់ដំណើរវិវឌ្ឍន៍របស់សង្គមអ្នកសិក្សា ឬវិភាគពីទីតាំងភូមិសាស្ត្រ កត្តាប្រជាសាស្ត្រ សិក្សាទីផ្សារ និងតម្រូវការរបស់ប្រជាជន រួមទាំងជាអ្នកដែលអាចធ្វើការងារទាំងឡាយណាដែលម៉ាស៊ីនភាគច្រើនមិនអាចធ្វើបាន។ នៅពេលសង្គមមួយសម្បូរទៅដោយអ្នកសង្គមសាស្ត្រ នោះអ្នកវិទ្យាសាស្ត្រនឹងមានភាពងាយស្រួលខ្លាំងក្នុងការស្វែងរកអ្នកប្រឹក្សាយោបល់ដើម្បីបង្កើតផលិតផលឱ្យត្រូវនឹងតម្រូវការជាក់ស្តែង និងស្ថានភាពទូទៅរបស់ប្រជាជននៅគ្រប់ទីកន្លែង៕

December 30, 2018

ចុងឆ្នាំ2019 កម្ពុជានឹងទទួលបានតំណក់ប្រេងដំបូង ខណៈផលិតកម្មប្រេងនឹងចាប់ផ្តើម

មន្ត្រីជាន់ខ្ពស់នៃក្រសួងរ៉ែ និងថាមពលបានអះអាងថា កម្ពុជាត្រៀមខ្លួនជាស្រេចក្នុងការផលិតប្រេងនៅដើមឆ្នាំ2020 ខណៈពេលដែលការនាំចេញប្រេងក៏អាចនឹងត្រូវបានធ្វើឡើងផងដែរនាពេលអនាគត។ ស្របពេលដែលប្រេងឆៅត្រូវបានចាក់បញ្ចូលទៅក្នុងរោងចក្រចម្រាញ់ប្រេង ជំហានបន្ទាប់គឺជាការលក់ប្រេងនៅលើទីផ្សារក្នុងស្រុក និងការនាំចេញក៏ជាជម្រើសមួយដែរសម្រាប់កម្ពុជា។

លោក ជៀប សួរ អគ្គនាយកនៃអគ្គនាយកដ្ឋានប្រេងឥន្ធនៈនៃក្រសួងរ៉ែ និងថាមពលបានមានប្រសាសន៍ថា៖ “នៅចុងឆ្នាំ2019ខាងមុខនេះ កម្ពុជានឹងទទួលបានតំណក់ប្រេងជាលើកដំបូង រួចហើយនឹងដំណើរការផលិតក្នុងលក្ខណៈពាណិជ្ជកម្មនៅឆ្នាំ2020ផងដែរ ដោយជាមធ្យម ក្នុង 1ថ្ងៃ យើងអាចផលិតបានប្រមាណ 7ពាន់បារ៉ែល”។

លោកបន្តថា បច្ចុប្បន្ន ក្រោយទទួលបានលិខិតអនុញ្ញាតផលិតកម្មពីរាជរដ្ឋាភិបាលកម្ពុជា ក្រុមហ៊ុន Kris Energy កំពុងដេញថ្លៃជ្រើសរើសក្រុមហ៊ុនមួយចំនួនដូចជា ក្រុមហ៊ុនខួងអណ្ដូងប្រេងសម្រាប់ធ្វើផលិតកម្ម កប៉ាល់ផលិតកម្ម(បានចុះកុងត្រារួចហើយកាលពី 1ខែមុន) ក្រុមហ៊ុនផ្ដល់នាវាបណ្ដែតផ្ទុក និងផ្ទេរប្រេង ជាដើម។

អគ្គនាយកប្រេងឥន្ធនៈរូបនេះបានអះអាងយ៉ាងដូច្នេះថា៖ “បើតាមផែនការដែលយើងបានប្រជុំក្រុមការងារអន្តរក្រសួងរបស់រាជរដ្ឋាភិបាលជាមួយក្រុមហ៊ុន Kris Energy គឺនៅចុងឆ្នាំ2019ហ្នឹងគាត់នឹងអាចផលិតតំណក់ប្រេងដំបូងបានហើយអាហ្នឹងផលិតដំបូងអ៊ីចឹងវាតិចៗសិនទេ ដល់ពេលជាលក្ខណៈពាណិជ្ជកម្មតែម្ដង គឺអាចនៅក្នុងឆ្នាំ2020”។

ពាក់ព័ន្ធនឹងការនាំចេញវិញ លោក ជៀប សួរ បានគូសបញ្ជាក់ថា កំពុងស្ថិតក្នុងការពិភាក្សាគ្នានៅឡើយទេ ព្រោះប្រេងដែលបូមបាន គឺជាប្រេងឆៅហើយបើសិនរោងចក្រចម្រាញ់ប្រេងត្រូវបានសាងសង់រួចរាល់ ហើយអ្នកផលិត និងអ្នកចម្រាញ់ឯកភាពគ្នាហើយ គឺយើងអាចនាំប្រេងមកចម្រាញ់នៅរោងចក្រក្នុងស្រុកបាន។ លោកបានបន្តថា “បើចម្រាញ់រួចហើយ ក្រុមហ៊ុនអាចលក់នៅក្នុងស្រុកបាន ក្រុមហ៊ុននឹងលក់ ហើយសល់ប៉ុន្មាន គឺនាំចេញទៅក្រៅប្រទេស”។

លោកបានបញ្ជាក់ថា៖ “ឥឡូវនេះក្រុមហ៊ុនកំពុងធ្វើការជ្រើសរើសក្រុមហ៊ុនផ្តល់នាវាធ្វើលទ្ធកម្ម ហើយគាត់កំពុងជួសជុលកប៉ាល់ដើម្បីត្រៀមមកធ្វើការនៅក្នុងតំបន់ប្លុកAនេះ”។ លោកបន្តថា៖“ការងារទាំងអស់ដែលយើងបានឯកភាពគ្នា គឺក្រុមហ៊ុនកំពុងតែអនុវត្ត ហើយយើងមានការប្រជុំបូកសរុបជាមួយក្រុមហ៊ុនរយៈពេល 6ខែម្តង។ អុីចឹងបានជាយើងអះអាងថា ផែនការនេះ គឺនៅចុងឆ្នាំ2019 យើងនឹងទទួលបានដំណក់ប្រេង”។

ប្រេងនឹងត្រូវបានបូមឡើងពីអណ្តូងប្រេងអប្សរាដែលមានទីតាំងស្ថិតនៅប្លុក A នៃអាងប្រេងរបស់ខ្មែរ និងត្រូវបានគេស្គាល់ថាជាតំបន់ផលិតប្រេងដំបូងគេបង្អស់នៅកម្ពុជា។ គម្រោងនេះអាចត្រូវបានចាត់ទុកថា ជាគម្រោងវិស្វកម្មដ៏ធំបំផុតមួយដែលធ្លាប់ធ្វើនៅក្នុងព្រះរាជាណាចក្រកម្ពុជាអស់រយៈពេលជាច្រើនទសវត្សរ៍មកហើយដែលពឹងផ្អែកលើប្រេងដែលបាននាំចូលមកពីបរទេសដើម្បីបំពេញតាមតម្រូវការថាមពល។

យោងតាមរបាយការណ៍ និងផែនការរបស់ក្រុមហ៊ុនរហូតមកដល់ពេលនេះ គម្រោងនេះត្រូវបានគេរំពឹងថានឹងទទួលបានជោគជ័យ។ ក្រុមហ៊ុន Kris Energy បានក្លាយជាដៃគូនៅក្នុងអាជ្ញាប័ណ្ណប្លុកនេះចាប់តាំងពីឆ្នាំ2010 ហើយនៅក្នុងឆ្នាំ2014 ក្រុមហ៊ុននេះបានក្លាយជាអ្នកប្រតិបត្តិការនៅក្នុងតំបន់នេះ។

នៅខែសីហា ឆ្នាំ2017 ក្រុមហ៊ុន Kris Energy និងរដ្ឋាភិបាលបានចុះហត្ថលេខាលើកិច្ចព្រមព្រៀងដំបូងដើម្បីចាប់ផ្តើមអភិវឌ្ឍតំបន់អប្សរាក្រោមកិច្ចសន្យា95% និង5% សម្រាប់ភាគហ៊ុន គឺក្រុមហ៊ុន Kris Energy ទទួលបាន95% ឯរដ្ឋាភិបាលទទួលបាន5%។

យោងតាមក្រសួងរ៉ែ និងថាមពល ការវិនិយោគផ្ទាល់ពីបរទេសនៅក្នុងវិស័យឧស្សាហកម្ម រួមទាំងគម្រោងមួយចំនួនដែលរំពឹងថានឹងត្រូវអនុម័តនៅមុនដំណាច់ឆ្នាំនេះ បច្ចុប្បន្នស្មើនឹង 1.3ពាន់លានដុល្លារដែលធ្វើឱ្យវិស័យនេះក្លាយជាផ្នែកមួយនៃការជំរុញកំណើនសេដ្ឋកិច្ចដ៏សំខាន់បំផុតនៅក្នុងប្រទេសកម្ពុជា។

យោងតាមនាយកដ្ឋានប្រេងកាតនៃក្រសួងរ៉ែ និងថាមពល កម្ពុជាបាននាំចូលប្រេងគ្រប់ប្រភេទមកពីបរទេសដែលមានប្រមាណជា 2លានតោនក្នុង1ឆ្នាំ។ កម្ពុជាមានធនធានប្រេងកាតនៅដែនគោកប្រមាណ 19ប្លុក ក្នុងដែនសមុទ្រ 6ប្លុក(A-F) និងតំបន់ត្រួតគ្នារវាងកម្ពុជា-ថៃ 4តំបន់ ។

ក្រុមហ៊ុន Kris Energy គឺជាប្រតិបត្តិករនៅក្នុងប្លុក A របស់កម្ពុជាដែលគ្របដណ្ដប់លើផ្ទៃដីទំហំ 3,083គីឡូម៉ែត្រការ៉េនៃអាងសមុទ្រខ្មែរ ក្នុងជម្រៅទឹកចន្លោះពី50 ទៅ80ម៉ែត្រ។ ដំណាក់កាល 1A នៃការអភិវឌ្ឍអណ្ដូងប្រេងអប្សរា រួមមានផ្លាតហ្វ៉មក្បាលអណ្តូងផលិតកម្ម ដែលបញ្ជាពីចម្ងាយមួយ ទ្រទ្រង់ដល់អណ្តូងបូមប្រេងចំនួន24 ដែលបញ្ជូនសន្ទនីយទៅកាន់នាវាផលិតកម្មមួយ។ ប្រេងឆៅដែលផលិតបាននឹងត្រូវបញ្ជូនតាមបំពង់បង្ហូរប្រេងប្រវែង 1.5គីឡូម៉ែត្រទៅកាន់នាវាបណ្តែត ផ្ទុក និងផ្ទេរប្រេងអចិន្ត្រៃយ៍មួយ។

ក្រុមហ៊ុនបានប្រកាសថា៖ “ខ្លួននឹងអាចទាញយកដំណក់ប្រេងបាន 3ម៉ឺនបារ៉ែលក្នុង1ថ្ងៃ និងមានបំពាក់នូវឋបនភ័ណ្ឌដែលអាចញែកឧស្ម័ន ប្រេង និងទឹកនៅចុងឆ្នាំ2019ខាងមុខនេះនៅដែនសមុទ្ររបស់កម្ពុជា”។

នៅពេលកម្ពុជាក្លាយជាប្រទេសផលិតប្រេងកម្ពុជារំពឹងថានឹងទទួលបានអត្ថប្រយោជន៍យ៉ាងច្រើនតាមរយៈចំណូលសារពើពន្ធ មានសន្ដិសុខថាមពល កំណើនឧស្សាហកម្មពាក់ព័ន្ធ ជំរុញកំណើនសេដ្ឋកិច្ច ដែលក្នុងនោះនឹងទាក់ទាញវិនិយោគិនក្នុង និងក្រៅស្រុក បង្កើនផលិតផលក្នុងស្រុកសរុប បង្កើនការងារ ចំណេះដឹង និងបង្កើនចំណូលដល់ប្រជាពលរដ្ឋទៀតផង៕

December 30, 2018

Author: ធឿន មករា