កីឡាកររបស់ក្លិប Juventus ដែលនៅលីគកំពូលអ៊ីតាលី Cristiano Ronaldo ត្រូវបានគេប្រទះឃើញកំពុងតែលំហែកាយនៅឆ្នេរសមុទ្រភាគខាងត្បូងប្រទេសបារាំង ជាមួយមិត្តស្រី រួមជាមួយនឹងកូនប្រុសច្បងរបស់ខ្លួន។
ក្នុងដំណើរកំសាន្តនេះផងដែរ គេឃើញកីឡាកររូបនេះបានផ្តល់លុយធីបក្នុងចំនួនដ៏ច្រើនគឺប្រហែលជា ២មឺនដុល្លា ដល់បុគ្គលិកដែលបម្រើលើកប៉ាល់ ដែលខ្លួនសម្រាកលំហែកាយ
គួរបញ្ជាក់ផងដែរថាកីឡាកររូបនេះបានចំណាយពេលលំហែរកាយ ក្រោយជួយក្រុមព័រទុយហ្គាល់ ក្នងពាន Nations League កាលពីដើមខែកន្លងទៅ៕
ពេលខ្លះអ្នកមានការធ្វេសប្រហែស ធ្វើឱ្យរលាកភ្លើង ឬវត្ថុក្ដៅ។ មានប្រិយមិត្តជាច្រើនបានជ្រាបអំពីវិធីងាយៗ ក្នុងការដោះស្រាយបញ្ហារលាកភ្លើង ឬទឹកក្តៅ គឺគ្រាន់តែយកផ្នែកពណ៌សនៃស៊ុតមាន់ ទៅលាបឱ្យសព្វលើបរិវេណដែលត្រូវទឹកក្តៅរលាក ទុកចោលមួយសន្ទុះ រហូតដល់ស្ងួត ទើបលាងជម្រះដោយទឹកឱ្យស្អាតជាការស្រេច។ វិធីនេះអាចបំបាត់ស្នាមដំបៅក្រហម ឬពងបែកនៅលើស្បែកបាន ប៉ុន្តែករណីដែលរលាកខ្លាំង ហើយធ្ងន់ធ្ងរនោះ វិធីងាយមួយនេះ ក៏មិនបានហុចផលឱ្យស្បែកជាសះស្បើយទាំងស្រុងនោះទេ។ នៅពេលអ្នកជួបប្រទះនូវបញ្ហារលាកភ្លើង ឬរលាកទឹកក្ដៅខ្លាំង សូមប្រតិបត្តិតាមវិធីសាស្ត្រសង្គ្រោះបឋមមួយចំនួនដូចខាងក្រោមនេះ៖
1- សង្គ្រោះរាងកាយ
ក្នុងករណីត្រូវទឹកក្ដៅរលាកទាំងសម្លៀកបំពាក់ ចូរប្រញាប់ឆក់ ឬដោះសម្លៀកបំពាក់ចេញពីរាងកាយឱ្យបានលឿនជាទីបំផុត ឬបើមិនអាចយកចេញបានទេ ចូរប្រញាប់យកទឹកត្រជាក់មកស្រោចពីលើរាងកាយភ្លាម។ ក្នុងករណីដែលអ្នកត្រូវភ្លើងរលាក បើសម្លៀកបំពាក់ឆេះភ្លើង ត្រូវប្រញាប់យកទឹកមកជះពន្លត់ភ្លាម។ បើមិនមានទឹកនៅក្បែរនោះទេ ចូរគេងទៅលើដី ហើយប្រមៀលចុះឡើង ដើម្បីពន្លត់ភ្លើងដែលឆេះខោអាវនោះជាមុនសិន។
2- បញ្ចុះកម្ដៅដល់ស្បែក
អ្នកត្រូវបញ្ចុះកម្ដៅស្បែកត្រង់បិវេណដែលរលាក ដោយទឹកត្រជាក់ ឬទឹកកក ព្រោះបើអ្នកមិនបញ្ចុះកម្ដៅភ្លាមៗទេ ស្បែកត្រង់បរិវេណនោះវានឹងរីកពងទឹក។ ការបញ្ចុះកម្ដៅស្បែកអាចធ្វើបានដោយការស្រោចទឹកត្រជាក់ដោយផ្ទាល់ ឬយកទឹកកកខ្ចប់ក្នុងក្រណាត់ស្អាតមកស្អំពីលើស្បែកក៏បាន។ តែហាមយកអ្វីដែលត្រជាក់ ហើយមិនស្អាតមកបិទជាដាច់ខាត ព្រោះវាអាចធ្វើឱ្យមុខរបួសរលាកភ្លើងឆ្លងមេរោគបាន។
3- សម្អាតស្បែកត្រង់បរិវេណ ដែលត្រូវភ្លើង ឬទឹកក្ដៅរលាក
លាងសម្អាតដោយសាប៊ូស្រាលៗ ជាមួយនឹងទឹកស្អាត។ ចូរចងចាំថា មិនត្រូវដុសស្បែកដែលរលាកពងនោះទេ ព្រោះអាចធ្វើឱ្យឆ្លងមេរោគ ហើយប្រែទៅជាដំបៅក្លាយខូចស្បែកកាន់តែធំ។
4- រុំមុខរបួសឱ្យជិតស្អាត
ក្រោយពេលសម្អាតស្បែកត្រង់កន្លែងដែលរលាកនោះរួចហើយ ចូរប្រើបង់រុំដំបៅ ឬសំឡីស្អាតដែលសម្លាប់មេរោគរួចមកជូតស្នាមរបួសឱ្យស្អាតថ្នមៗ។ បន្ទាប់មកសឹមបិទមុខរបួសដោយបង់ដែលមិនមានមេរោគ ដើម្បីការពារស្នាមរបួសឱ្យមានអនាម័យជានិច្ច។ ក្នុងករណីស្នាមរបួសតូចតាច អ្នកគ្រាន់តែលាបថ្នាំផ្សះសម្រាប់រលាកភ្លើង ឬរលាកទឹកក្ដៅ ឬក៏អាចប្រើសាច់ប្រទាលកន្ទុយក្រពើ ដែលចិតសម្រកខាងក្រៅចេញទុកតែសាច់ខាងក្នុងថ្លាៗដូចចាហួយ និងលាងសម្អាតជ័រហើយមកបិទពីលើស្នាមរលាកក៏បាន
5- ប្រញាប់បញ្ចូនអ្នករបួសទៅមន្ទីរពេទ្យ ក្នុងករណី៖
– កើតមានអាការស្លុត ឬឆក់ខ្សែភ្លើង
– មានអាការខ្វះជាតិទឹក ក្នុងករណីរលាកភ្លើងធ្ងន់ធ្ងរ វាអាចបណ្ដាលឱ្យរាងកាយអ្នកខ្វះជាតិទឹក។
– ស្នាមរលាកមានមុខធំ ឈឺចាប់ខ្លាំង រលាកហើមប៉ោង ឬពងទឹកខ្លាំង។
– ក្ដៅខ្លួនខ្លាំងលើស38អង្សាសេ។
– រលាកលើផ្នែកសំខាន់ៗ ដូចជា ក្បាល ក មុខនិងខ្នងជាដើម។
– អ្នករលាក គឺជាមនុស្សចាស់ ឬក្មេងអាយុតិចជាង5ឆ្នាំ។
– អ្នករលាក គឺជាអ្នកជំងឺទឹកនោមផ្អែម អ្នកជំងឺបេះដូង និងអ្នកជំងឺលើសឈាមជាដើម៕
នៅថ្ងៃទី24 ខែមិថុនា ឆ្នាំ2019 គណៈអភិបាលស្រុករតនមណ្ឌល នៃខេត្តបាត់ដំបងបានប្រារព្ធពិធីសម្ពោធអគារសិក្សាថ្មីចំនួន 1ខ្នង នៅក្នុងបរិវេណសាលាបឋមសិក្សា សេកសក ដែលស្ថិតនៅក្នុងភូមិសេកសក ឃុំផ្លូវមាស ស្រុករតនមណ្ឌល ខេត្តបាត់ដំបង ក្រោមអធិបតីភាពលោក ស៊ូ អារ៉ាហ្វាត់ អភិបាលរងនៃគណៈអភិបាលខេត្តបាត់ដំបង លោក ហ្សាន់នីជី ហាយ៉ាហ្សីដា ប្រធានក្រុមហ៊ុនគណនេយ្យ អ ស្ត្រេ ដែលជាម្ចាស់ជំនួយ និងលោក កេនជិ អូតានី ប្រធានអង្គការអភិវឌ្ឍន៍សហគមន៍ ស៊ី អឹម ស៊ី ព្រមទាំងលោកគ្រូ-អ្នកគ្រូ សិស្សានុសិស្ស និងប្រជាពលរដ្ឋដែលជាអាណាព្យាបាលសិស្សជាច្រើនដែលបានចូលរួមក្នុងឱកាសនោះ។
អគារសិក្សាចំនួន 1ខ្នងនោះ មាន 4បន្ទប់ មានបំពាក់ដោយសម្ភារគ្រប់គ្រាន់ រួមជាមួយខ្លោងទ្វារសាលា និងដងទង់ជាតិថ្មី ដែលបានដាក់សម្ពោធឱ្យប្រើប្រាស់នៅថ្ងៃនេះ គឺជាអំណោយរបស់លោក ហ្សាន់នីជី ហាយ៉ាហ្សីដា ប្រធានក្រុមហ៊ុនគណនេយ្យ អ ស្ត្រេ និងសប្បុរសជនជប៉ុនមួយចំនួនទៀត តាមរយៈអង្គការអភិវឌ្ឍន៍សហគមន៍ ស៊ី អឹម ស៊ី ត្រូវបានសាងសង់រួចកាលពីថ្ងៃទី30 ខែឧសភា ឆ្នាំ2019 កន្លងទៅ និងត្រូវបានដាក់សម្ពោធឱ្យប្រើប្រាស់ចាប់ពីពេលនេះតទៅក្រោយពីពិធីកាត់ខ្សែបូដោយលោក ស៊ូ អារ៉ាហ្វាត់ អភិបាលរង នៃគណៈអភិបាលខេត្តបាត់ដំបងរួចមក៕
កិច្ចការដ៏សំខាន់មួយសម្រាប់អ្នករស់នៅជាប់បឹងទន្លេសាប គឺការកែច្នៃត្រីស្រស់ទៅជាអាហារទុកបម្រុងដែលអាចរក្សាទុកបរិភោគបានយូរ មានដូចជា ប្រហុក ផ្អក ត្រីឆ្អើរ ហើយត្រីងៀតក៏ជាអាហារបម្រុងដ៏ពេញនិយមមួយដែរ តែកំពង់ចាមជាខេត្តមួយដែលមានដងទន្លេមេគង្គដ៏ធំស្ថិតនៅចំកណ្ដាលដែលក៏ជាជង្រុកត្រីទឹកសាបដ៏ធំមួយដែរនៅប្រទេសកម្ពុជា ហើយស្រុកមួយចំនួននៃខេត្តនេះក៏មានភាពល្បីល្បាញក្នុងការកែច្នៃត្រីស្រស់មិនចាញ់ខេត្តពោធិ៍សាត់ និងច្រើនជាងខេត្តផ្សេងៗទៀតដែលនៅជុំវិញបឹងទន្លេសាបដែរ ហើយខេត្តកំពង់ចាមអាចចាត់ទុកថាជាខេត្តដែលនាំចេញ និងចែកចាយត្រីងៀតធំជាងគេផងដែរក្នុងប្រទេសកម្ពុជា។
ក្នុងចំណោមឈ្មួញត្រីងៀតធំៗនៅខេត្តកំពង់ចាម អ្នកកែច្នៃផលិតផលត្រីធ្វើជាត្រីងៀតម្នាក់ដែរ គឺលោក សុខ ឃីម ម្ចាស់សិប្បកម្មត្រីងៀតឆ្ងាញ់កំពង់ចាម ស្ថិតនៅភូមិកំប៉ាល ឃុំសណ្តែក ស្រុកបាធាយខេត្តកំពង់ចាមបានមានប្រសាសន៍ប្រាប់ឡារ៉ែនពាណិជ្ជថា លោកបានកែច្នៃ និងប្រកបអាជីវកម្មត្រីងៀតនេះអស់រយៈពេលយូរឆ្នាំមកហើយ តែទើបតែ 3ឆ្នាំចុងក្រោយប៉ុណ្ណោះដែលផលិតផលត្រីងៀតឆ្ងាញ់កំពង់ចាមរបស់លោកទទួលបានចំណាប់អារម្មណ៍ច្រើនពីអតិថិជនក្នុងស្រុក ក៏ដូចជាក្រៅស្រុកដែរ ដោយមានការជាវ និងបញ្ជាទិញជាហូរហែ ដែលធ្វើឱ្យលោកមានគោលដៅនឹងពង្រីកមុខរបរឱ្យមានលក្ខណៈធំជាងនេះទៀត។
លោក សុខ ឃីម បានឱ្យដឹងថា៖“ជាង15ឆ្នាំរហូតដល់ពេលនេះ ដែលកាលដំបូងឡើយ ការកែច្នៃផលិតផលត្រីងៀត ខ្ញុំបានធ្វើជាលក្ខណៈគ្រួសារប៉ុណ្ណោះ គឺម្តាយរបស់ខ្ញុំជាអ្នកប្រកបរបរនេះតាំងពីដើមរៀងមក។ ទើបតែ 2-3ឆ្នាំចុងក្រោយនេះ អាជីវកម្មត្រីងៀតលក្ខណៈគ្រួសាររបស់ខ្ញុំក៏បានពង្រីកខ្លួនដោយបានធ្វើការផ្សព្វផ្សាយតាមហ្វេសប៊ុកYouTube ពីបច្ចេកទេសនៃការប្រឡាក់ត្រី ការរៀបចំអនាម័យ ប្រសើរជាងអ្វីដែលធ្លាប់បានអនុវត្ត គួបផ្សំ និងប្រវត្តិដែលគ្រួសាររបស់ខ្ញុំបានធ្វើ ទើបធ្វើឱ្យមានការទទួលស្គាល់ច្រើនឡើង ហើយទីផ្សារក៏មានការរីកចម្រើនធំជាងមុនដែរ”។
លោក សុខ ឃីម វ័យ 28ឆ្នាំ ម្ចាស់សិប្បកម្មត្រីងៀតឆ្ងាញ់កំពង់ចាម ក៏បានរំឭកឱ្យដឹងផងដែរថាកាលពីដំបូង ការធ្វើត្រី 1រដូវ គឺមានតែប្រមាណ 200គីឡូក្រាមប៉ុណ្ណោះ។ តែមកដល់ពេលបច្ចុប្បន្ន ការធ្វើរយៈពេល 1ខែបានជាង 30គីឡូក្រាម ឬក៏2-3ខែអាចបានជាង 90គីឡូក្រាមដែរ។ ឯត្រីដែលយកមកផលិតជាងៀត គឺបាននាំមកពីបឹងទន្លេសាប និងត្រីទន្លេ និងបឹងនៅក្នុងប្រទេសយើង ហើយត្រីងៀតត្រូវបានធ្វើឡើងពីត្រី 3ប្រភេទ គឺត្រីរ៉ស់ ត្រីដៀប និងត្រីឆ្តោ។ ត្រីរស់ត្រូវបានយកពីបែនៅក្នុងទន្លេមានចម្ងាយប្រហែល25គីឡូម៉ែត្រពីផ្ទះរបស់លោក។
លោក សុខ ឃីម បានឱ្យដឹងទៀតថា៖“ការច្នៃត្រីងៀត គឺច្រើនធ្វើចាប់ពីខែធ្នូ រហូតដល់ដើមខែមិថុនា ប៉ុន្តែឥឡូវឱ្យតែមានអ្នកបញ្ជាទិញ គឺយើងត្រូវរៀបចំឱ្យម៉ូយជាបន្ត ដោយត្រីងៀតមួយចំនួនធំត្រូវលក់ទៅម៉ូយនៅភ្នំពេញ ដែលភាគច្រើនយកទៅលក់នៅបុរី ដែលក្នុង1ម៉ូយទទួលយកទៅលក់ប្រមាណ ជា110-120kg ហើយក៏មានមួយចំនួនទៀត នាំទៅខេត្តផ្សេងៗផងដែរ”។
លោកបានបញ្ជាក់ថា៖“នៅឆ្នាំនេះខ្ញុំច្នៃត្រីបានច្រើនជាងការរំពឹងទុក ព្រោះថាការបញ្ជាទិញត្រីរបស់ខ្ញុំមិនត្រឹមតែអ្នកនៅក្នុងស្រុកទេ ក៏មានអ្នកនៅក្រៅស្រុកបានបញ្ជាទិញជាច្រើនគួរសមដែរ។សម្រាប់ការបញ្ជាទិញពីអ្នកនៅក្រៅស្រុក មានអ្នកអាណិកជន ពីប្រទេសអាមេរិក កាណាដា អូស្ត្រាលី អុីតាលី ជប៉ុន និងកូរ៉ ហើយវាក៏ជាទីផ្សារដែលអាចរីកចម្រើននៅពេលខាងមុខបាន”។
លោកបានបញ្ជាក់ថា៖“ខ្ញុំមិនមែនមានតែផលិតផល កែឆ្នៃត្រីងៀតតែមួយមុខទេ ខ្ញុំមានផលិតផលកែឆ្នៃត្រីច្រើនមុខ ព្រោះមានផលិតផលច្រើនដែលបានផលិត។ ផលិតផលត្រីទាំងនោះ រួមមានត្រីងៀតត្រីរ៉ស់ ត្រីងៀតប្រភេទឆ្តោ ត្រីកន្ធរ ត្រីប្រឡាក់ ប្រហុក ផ្អក ត្រីផាត់ និងងៀតគោជាដើម ដែលងៀតគោ ក៏ត្រូវបានគេចាប់ផ្តើមបញ្ជាទិញជាបណ្តើរៗហើយដែរ”។
លោក បាននិយាយបន្តថា បន្ទាប់ពីច្នៃរួច ត្រីងៀតប្រភេទត្រីរ៉ស់ងៀតលោកលក់ចេញក្នុងតម្លៃ1គីឡូក្រាមថ្លៃ6ម៉ឺនរៀល រីឯត្រីដៀបអាចមានតម្លៃថោកជាងបន្តិចបន្តួច ត្រីប្រឡាក់ ផ្សេងទៀតក៏មានតម្លៃផ្សេងៗគ្នាដែរ។ តម្លៃនេះបើគិតទៅលើទីផ្សារមិនជាថ្លៃ លើតម្លៃសិប្បកម្មកែច្នៃដទៃទៀតទេ ដោយសាររបស់យើងមានអនាម័យ និងការទទួលស្គាល់ពីម៉ូយ ដែលពួកគាត់អាចទទួលយកបាន។
លោកសុខ ឃីមបានឱ្យដឹងដែរថាបច្ចុប្បន្នការបញ្ជាទិញ បើគិតជាមធ្យមគឺប្រមាណ 90Kg ក្នុង1 ខែ(90×60,000=5,400,000 (ប្រាំលានបួនសែនរៀលស្មើនឹង1300$)និងមានការបញ្ជាទិញថ្មី ពីផ្សារ ធម្មជាតិនៅភ្នំពេញចំនួន150-200kgផងដែរ។ នេះគ្រាន់តែ ជាការគិត ត្រឹមតែផលិតផល កែឆ្នៃត្រីងៀតត្រីរ៉ស់មួយមុខទេ នៅមានផលិតផលកែច្ចៃជាច្រើនមុខទៀត។
ចំពោះការបញ្ជាទិញទៅក្រៅប្រទេសវិញ លោកសុខ ឃីមបានឱ្យដឹងថា៖“ខ្ញុំទទួលបានការបញ្ជាទិញទៅកាន់សហរដ្ឋអាមេរិក កាណាដាប្រមាណជា30-40Kg ដែលក្នុង1ម្ចាស់ប្រមាណជា10kg ហើយ ក្នុង1kg ខ្ញុំលក់បានតម្លៃ18$ តែតម្លៃផ្ញើតាមប្រៃសណីយ៍កម្ពុជា អ្នកបញ្ជាទិញគេជាអ្នកចំណាយ។ បើគិតទៅ ត្រីត្រឹម5Kgត្រូវចំណាយប្រហែលជា200$។ ពោលគឺបើគិតជាមធ្យមត្រី1kgអាចមានតម្លៃ45$”។
លោកបានរៀបរាប់អំពីរបៀបធ្វើត្រីងៀតដូចតទៅ៖ បន្ទាប់ពីប្រឡាក់អំបិល និងស្កររួច ត្រីនោះត្រូវហាលថ្ងៃរយៈពេល 2ថ្ងៃកន្លះ ទៅ3ថ្ងៃ។ លោកពន្យល់ថា ត្រីងៀតមិនព្រួយបារម្ភថាមានមេរោគទេ ព្រោះមុនបរិភោគត្រូវចម្អិន។ រូបមន្តធ្វើត្រីងៀតស្តង់ដារ ឆ្ងាញ់ត្រូវប្រើគ្រឿងផ្សំ៖ត្រីរ៉ស់ធម្មជាតិ ធ្វើស្អាតវះជាបន្ទះៗចំនួន10គីឡូក្រាមត្រូវប្រើអំបិល350g និងស្ករ800g(ប៊ីចេង1ចឹបដាក់ក៏បាន មិនដាក់ក៏បាន)។ ពេលធ្វើត្រូវលាងត្រីទុកឱ្យស្រស់ទឹក រួចដាក់ចូលចានដែកធំមួយ រួចយកអំបិលលាយជាមួយស្ករ និងប៊ីចេងរួចយកល្បាយអំបិលនោះមកចាក់លើសាច់ត្រីច្របល់ច្របាច់ ប្រឡាក់វាចូលគ្នារហូតដល់វាចេញទឹករួចបន្តច្របាច់ឱ្យសព្វសាច់ត្រីរហូតដល់ទឹកវាឡើងខាប់ស្អិត សឹមឈប់រួចយកត្រីនោះទៅក្លាស្សេក្នុងទូត្រជាក់ ឱ្យសាច់ត្រីត្រជាក់ស្រឹប សឹមលើកវាហាលថ្ងៃពេលមេឃកំពុងក្តៅខ្លាំង ល្ងាចសាវាទុក ព្រឹកលើកវាហាលជាបន្តទៀត ហាល2-3ថ្ងៃឱ្យល្មមវាក្រៀមល្អ សឹមឈប់ហាល។ត្រូវរក្សាត្រីងៀតក្នុងកន្លែងត្រជាក់តែស្ងួតល្អ។គេអាចទទួលទានត្រីងៀតអាំង ឬចៀនជាមួយបាយស បបរស ឬអាំងវាបុកធ្វើសាច់ត្រីផាត់ ច្រកក្រឡទុកទទួលទាន ឬច្នៃវាធ្វើជាម្ហូបផ្សេងៗទៀតនៅពេលក្រោយ។
លោកសុខ ឃីមបានបញ្ជាក់ពីគោលបំណងរបស់លោកថា៖“ខ្ញុំគិតថា នឹងពង្រីកការកែច្នៃសិប្បកម្មត្រីងៀតរបស់ខ្ញុំឱ្យធំជាងនេះ ព្រោះបច្ចុប្បន្នវានៅជាលក្ខណៈគ្រួសារនៅឡើយ។ ខ្ញុំនឹងបង្កើតShopតូចមួយនៅភ្នំពេញ ងាយស្រួលនឹងធ្វើការចែកចាយទៅកាន់ទីផ្សារក្នុងស្រុក ក៏ដូចជាទីផ្សារក្រៅស្រុកដើម្បីសម្របសម្រួលកិច្ចការ ដែលមានការបញ្ជាទិញកាន់តែច្រើនឡើង និងអាចបង្កើនបុគ្គលិកផងដែរសម្រាប់អាជីវកម្មរបស់ខ្ញុំ”៕
ក្រសួងសាធារណការ និងដឹកជញ្ជូន បានចុះហត្ថលេខាជាមួយនឹងក្រុមហ៊ុនកូរ៉េ Hanshin Engine ering and Construction Co., Ltd លើកិច្ចសន្យាសាងសង់គម្រោងធ្វើឱ្យប្រសើរឡើងវិញផ្លូវជាតិលេខ2 និងផ្លូវលេខ22 kalBIថ្ងៃទី25 ខែមិថុនា ឆ្នាំ2019។
សូមជម្រាបថា គម្រោងនេះ គឺស្ថិតក្រោមឥណទានពីធនាគរនីហរ័ណអាហរ័ណកូរ៉េ (Export – Import Bank of Korea) នៃមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF) ដែលមានចំនួនទឹកប្រាក់សរុប 56,100,000 ដុល្លារអាមេរិក (Loan Agreement)។ ដោយឡែកពិធីចុះហត្ថ លេខាថ្ងៃនេះ គឺមានទំហំទឹកប្រាក់សរុបចំនួន 47,750,000ដុល្លារអាមេរិក។
ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងក្រោយពិធីចុះហត្ថលេខានេះដោយរំពឹងថា ការបើកការដ្ឋានសាងសង់ផ្លូវជាតិលេ2 និងលេខ22នេះ នឹងធ្វើឡើងក្នុងអំឡុងខែវិច្ឆិកា ឬខែធ្នូខាងមុខ។
គម្រោងនេះ មានប្រវែងសរុប 72,17គីឡូម៉ែត្រ ដោយឆ្លងកាត់រាជធានី-ខេត្តចំនួន3 រួមមានខេត្តកណ្តាល រាជធានីភ្នំពេញ និងខេត្តតាកែវ គិតចាប់ពីរង្វង់មូលតាខ្មៅ (ស្ថិតក្នុងក្រុងតាខ្មៅ ខេត្តកណ្តាល) ដល់រង្វង់មូលអូរចំបក់ (ស្ថិតក្នុងក្រុងដូនកែវ ខេត្តតាកែវ) និងផ្លូវជាតិលេខ22 ពីរង្វង់មូលអូរចំបក់ដល់ផ្លូវជាតិលេខ3 ត្រង់ផ្សារអង្គតាសោម។គម្រោងនេះបែងចែកជា3កំណាត់ផ្លូវធំៗមានដូចជា៖
-កំណាត់ទី1- ចាប់ផ្តើមចេញពីរង្វង់មូលតាខ្មៅ ដល់រង្វង់មូលស្រ្តីបីកួរស្រូវ ដែលមានប្រវែង 8,7គ.ម ។ ពង្រីកពី 2គន្លង ទៅ 4គន្លង ដែលនៅតំបន់ទីប្រជុំជន ប្រវែង 4,3គ.ម មានទទឹងផ្លូវ 15មនិងក្រៅតំបន់ទីប្រជុំជនមានទទឹងផ្លូវ 20,5ម។ កំណាត់ផ្លូវនេះក្រាលបេតុងកៅស៊ូ (AC) ដែលមានកម្រាស់ 12ស.ម។
-កំណាត់ទី2- ចាប់ផ្តើមពីរង្វង់មូលស្រ្តីបីកួរស្រូវ ដល់រង្វង់មូលអូរចំបក់ ដែលមានប្រវែង 53,81គ.ម ស្ថិតក្នុងតំបន់ជនបទ។ កំណាត់ផ្លូវនេះមាន2គន្លង និងទទឹង 13ម ក្រាលបេតុងកៅស៊ូ (AC) ដែល មានកម្រាស់ 10ស.ម។
-កំណាត់ទី3- ចាប់ផ្តើមពីរង្វង់មូលអូរចំបក់ ដល់ផ្សារអង្គតាសោម (ផ្លូវជាតិលេខ22) ដែលមានប្រវែង 9,6គ.ម ស្ថិតក្នុងតំបន់ជនបទ។ កំណាត់ផ្លូវនេះ មានទំហំទទឹងផ្លូវសរុប 13ម ក្រាលបេតុង កៅស៊ូ (AC) ដែលមានកម្រាស់ 10ស.ម។
គម្រោងខាងលើធ្វើការពង្រីកលើផ្លូវចាស់ដោយក្រាលកៅស៊ូ AC សាងសង់ស្ពានថ្មីចំនួន11កន្លែង និងស្ថាបនាលូរំដោះទឹកភ្លៀង មានលូជ្រុងកាត់ទទឹងថ្នល់ 56កន្លែង និងលូមូលកាត់ទទឹងថ្នល់ 17កន្លែង។ ការស្ថាបនានេះ គ្រោងនឹងប្រើរយៈពេល 30ខែ (ប្រហែល2ឆ្នាំកន្លះ)៕
ថ្ងៃនេះជាថ្ងៃខួបកំណើតរបស់កីឡាករបាល់ទាត់ដ៏ល្បីល្បាញ នៅលើពិភពលោក Lionel Messi ដែលគិតមកទល់នឹងពេលនេះ រូបគេមានវ័យ៣២ឆ្នាំហើយ។
Lionel Messi ជាកីឡាករខ្សែប្រយុទ្ធរបស់ក្រុមជម្រើសជាតិ អាហ្សង់ទីន និងលេងអោយក្លិប FC Bacelona បានកើតនៅប្រទេសអាហ្សង់ទីន ក្នុងទីក្រុង រ៉ូហ្សារីយូ ក្នុងឆ្នាំ១៩៨៧៕
ចូលលេងឲ្យឈុតធំជិត៧០០ប្រកួត Messi ជួយ Barca ឈ្នះពាន La Liga ១០ដង, Copa del Rey ៦ដង, Champions League ៤ដង និងពានផ្សេងៗជាច្រើនទៀត តែសម្រាប់ក្រុមជម្រើសជាតិវិញហាក់មិនទាន់បានអ្វីជាដុំកំភួនឡើយ៕
ដោយ៖ ឃូរ៉ា
ប្រភព៖ Messi
កីឡាករវ័យក្មេងកម្ពុជា ត្រូវបានគ្រូបង្វឹករបស់ក្លិប Totternham Hotspur ធ្វើការជ្រើសរើសបាន យកទៅជុំរុំហ្វឹកហាត់នៅប្រទេសថៃ រយៈពេលជាង១សប្តាហ៍។
តាមរយៈក្រុមការងាររបស់ក្លិប ដែលបានមកធ្វើការចែករំលែកបទពិសោធន៍ក៏ដូចជាកម្មវិធី Football Clinic ជាច្រើនលើកមកហើយនោះ គ្រូបង្វឹករបស់ក្លិបល្បីនៅអង់គ្លេសមួយនេះបានសម្រេចជ្រើសរើសកីឡាករវ័យក្មេងកម្ពុជា ចំនួន២៤រូប ដើម្បីយកទៅធ្វើការហ្វឹកហាត់នៅជុំរុំហ្វឹកហាត់នោះ។
កម្មវិធីហ្វឹកហាត់នេះគ្រោងនឹងចាប់ផ្តើមនៅថ្ងៃទី២៧ ខែកក្កដានេះ រហូតដល់ថ្ងៃទី០៤ ខែកក្កដា ឆ្នាំ២០១៩ខាងមុននេះ នៅរមណីយដ្ឋានសុខភាព និងពហុកីឡដ្ឋាន Thanyapura ប្រទេសថៃ៕
ខ្សែប្រយុទ្ធដ៏មុតស្រួចរបស់ក្រុមជម្រើសជាតិអាហ្វហ្គានីស្ថាន Mustafa Zazai បានបង្ហាញថា ខ្លួនកំពុងធ្វើតេស្តក្នុងក្រុមមួយនៃលីកកំពូលកម្ពុជា ដើម្បីត្រៀមចូលលេងក្នុងជើងទី2 នៃរដូវកាលនេះ។
ទោះជាបែបនេះក្តី កីឡាកររូបនេះមិនបានបញ្ជាក់ច្បាស់ឡើយអំពីឈ្មោះក្លិបដែលខ្លួនកំពុងធ្វើតេស្តសមត្ថភាពនេះទេ ដោយនិយាយថា ទាល់តែច្បាស់ការណ៍ជាមុនសិន សឹមប្រាប់តាមក្រោយ ពីព្រោះមិនទាន់ច្បាស់ថា ក្លិបនោះព្រមទទួលយករូបគេ ឬក៏អត់នៅឡើយទេ។
គួរបញ្ជាក់ផងដែរថា កីឡាកររូបនេះទើបតែបញ្ចប់កុងត្រាមកពីក្លិបលីកទី2 ម៉ាឡេស៊ី KELANTAN FA ក្រោយពីបញ្ចប់ជើងទី1 កាលពីពេលកន្លងទៅ៕
សម័យបច្ចុប្បន្ន ចំនួនកូនគឺមិនមែនជារឿងដែលត្រូវបណ្តោយទៅតាមធម្មជាតិដូចសម័យមុននោះទេ ហើយក៏មិនមានអ្នកណាម្នាក់អាចមកកំណត់ជីវិតរបស់អ្នកថា នឹងត្រូវមានកូនប៉ុន្មាននោះដែរ គឺមានតែអ្នក និងស្វាមីរបស់អ្នកប៉ុណ្ណោះ ដែលជាអ្នកសម្រេចចិត្តរួមគ្នាថា នៅក្នុងគ្រួសាររបស់អ្នកនឹងត្រូវមានសមាជិកចំនួនប៉ុន្មាននាក់។ នេះជារឿងពិត ហើយក៏ជារឿងដែលមនុស្សគ្រប់គ្នាអាចធ្វើបាន ព្រោះពួកគេបានធ្វើការពន្យារកំណើត។ ការពន្យារកំណើតមានច្រើនបែបច្រើនយ៉ាងណាស់សម្រាប់ឱ្យអ្នកជ្រើសរើសមានដូចជា ៖
ស្រោមអនាម័យ : មានប្រសិទ្ធភាពសំខាន់ៗពីរយ៉ាងគឺ ការពារអ្នកពីការឆ្លងជំងឺកាមរោគផ្សេងៗនិងការពារមិនឱ្យមានកូន។ ស្រោមអនាម័យភាគច្រើនត្រូវបានយកមកប្រើសម្រាប់ភាគីខាងបុរស ដើម្បីទប់ស្កាត់កុំឱ្យទឹកកាមហៀរចូលទៅក្នុងស្បូនដែលជាមូលហេតុនៃការបង្កកំណើត។ ចំណែកឯស្រោមអនាម័យសម្រាប់ស្ត្រីវិញត្រូវបានប្រើសម្រាប់ការពារមិនឱ្យទឹកកាមបុរសចូលទៅក្នុងស្បូនបានដូចគ្នា ប៉ុន្តែវាហាក់ដូចជាមានការពិបាកក្នុងការប្រើបន្តិច ព្រោះវាតម្រូវឱ្យមានការដាក់បញ្ចូលទៅផ្នែកខាងក្នុងនៃប្រដាប់ភេទរបស់ស្ត្រី។
កងដាក់ដៃ : ជាការដាក់បញ្ចូលបំពង់ទន់តូចៗនៅផ្នែកខាងក្រោមនៃស្បែកដើមដៃរបស់ស្ត្រី។ បំពង់អស់ទាំងនេះមាននាទីជាអ្នកធ្វើឱ្យទឹករំអិលមាត់ស្បូនឡើងខាប់ ការពារមិនឱ្យមេជីវិតឈ្មោលជ្រាបចូលមកក្នុងស្បូនបាន។
កងដាក់ក្នុងស្បូន : ជាការពន្យារកំណើតដោយការដាក់ឧបករណ៍ទន់តូចមួយដែលអាចបត់បានចូលទៅក្នុងស្បូន ដើម្បីរារាំងការជ្រាបចូលនៃមេជីវិតឈ្មោលទៅក្នុងស្បូន។ថ្នាំពន្យារកំណើត : ធ្វើឱ្យទឹករំអិលមាត់ស្បូនឡើងខាប់ ដើម្បីរារាំងកុំឱ្យទឹកកាមបុរសអាចជ្រាបចូលទៅក្នុងស្បូនបាន។ ការលេបថ្នាំពន្យារកំណើតត្រូវធ្វើឱ្យបានទៀងទាត់ និងត្រឹមត្រូវទៅតាមការកំណត់ដែលបានបង្ហាញនៅលើសម្បកថ្នាំ ទើបមានប្រសិទ្ធភាពខ្ពស់។
ថ្នាំចាក់ : ជាការចាក់ថ្នាំរៀងរាល់3ខែម្តង។ តួនាទីរបស់ថ្នាំចាក់ក៏មិនខុសអីពីការពន្យារកំណើតផ្សេងៗទៀតដែរ ប៉ុន្តែតម្រូវឱ្យអ្នកចងចាំឱ្យបានល្អពីពេលវេលាដែលត្រូវចាក់ជាថ្មីម្តងទៀត។ចំពោះវិធីពន្យារកំណើតតាមបែបសម័យថ្មីនេះ អ្នកត្រូវចាំថា៖
– គ្រប់វិធីនៃការពន្យារកំណើតគឺសុទ្ធតែត្រូវការពឹងពាក់លើគ្រូពេទ្យជំនាញ ទើបមានសុវត្ថិភាព និងមានប្រសិទ្ធភាព។
– ជ្រើសរើសវិធីពន្យារកំណើតណាមួយដែលអាចផ្តល់នូវភាពងាយស្រួល មានសុវត្ថិភាព និងមានប្រសិទ្ធភាពបំផុតចំពោះរូបអ្នក។
– សាកសួរព័ត៌មានឱ្យបានច្បាស់ពីវិធីប្រើប្រាស់ពីអ្នកជំនាញ (ថ្នាំពន្យារកំណើតតែងតែប្រាប់ពីរបៀបប្រើប្រាស់នៅលើសម្បកកញ្ចប់ ប៉ុន្តែបើអ្នកនៅតែមិនទាន់យល់ច្បាស់ពីរបៀបប្រើប្រាស់ទេនោះ សូមកុំខ្ចិលច្រអូសក្នុងការទៅជួបគ្រូពេទ្យជាថ្មីម្តងទៀត ដើម្បីសាកសួរពីវិធីប្រើឱ្យបានច្បាស់។
-សូមចាំថា ការពន្យារកំណើតអាចមានប្រសិទ្ធភាពពិតប្រាកដលុះត្រាតែអ្នកប្រើវាបានត្រឹមត្រូវ។
– ស្រោមអនាម័យមានសមត្ថភាពពីរយ៉ាងគឺ ការពារមិនឱ្យមានកូន និងការពារខ្លួនអ្នកពីការឆ្លងជំងឺមួយចំនួនដូចជា កាមរោគ និងជំងឺអេដស៍ជាដើម ប៉ុន្តែមិនមែនមានន័យថា វិធីនៃការពន្យារកំណើតផ្សេងទៀតសុទ្ធតែអាចធ្វើបានដូចគ្នានោះទេ។ ដូច្នេះការការពារខ្លួនពីការឆ្លង ឬចម្លងជំងឺផ្សេងៗគឺជារឿងមួយផ្សេងទៀតដែលអ្នកត្រូវដឹង។
– មានស្ត្រីមួយចំនួនបាននិយាយថា គាត់មិនអាចពន្យារកំណើតបានទេ ព្រោះរាល់ពេលពន្យារកំណើតតែងធ្វើឱ្យគាត់មិនស្រួលក្នុងខ្លួនទាល់តែសោះ។ រឿងបែបនេះវាអាចកើតមាននៅក្នុងរយៈពេល1 ឬ2ខែដំបូង ហើយក៏បាត់់ទៅវិញ ដូច្នេះសូមកុំអាលរាថយ ហើយបោះបង់ចោលការពន្យារកំណើតឱ្យសោះ ព្រោះការពន្យារកំណើតមានច្រើនបែបច្រើនយ៉ាងអាចឱ្យអ្នកយកទៅសាកល្បង វិធីមួយនេះអាចមិនសមជាមួយអ្នក តែវិធីផ្សេងអាចនឹងផ្តល់នូវភាពងាយស្រួលដល់អ្នកក៏ថាបានដែរ។ សូមកុំបារម្ភទោះជាអ្នកជ្រើសប្រើវិធីពន្យារកំណើតបែបណាក៏ដោយ ព្រោះគ្រូពេទ្យជំនាញតែងតែប្រាប់អ្នកថា គ្រប់វិធីនៃការពន្យារកំណើតគឺមិនធ្វើឱ្យប៉ះពាល់ដល់សុខភាពនោះទេ៕
ត្រីទឹកសាបក៏មានសារធាតុអូមេហ្កា 3 ខ្ពស់ដែរ ជាពិសេសនោះគឺ ត្រីប្រា ត្រីរ៉ស់ និងត្រីឆ្ពុងសតែម្ដង ដោយមិនចាំបាច់ចំណាយថវិកាច្រើនទៅទិញត្រីសមុទ្រដែលមានតម្លៃថ្លៃៗមកទទួលទាន ដើម្បីទទួលបានសារធាតុអាស៊ីតខ្លាញ់ អូមេហ្កា 3 ច្រើននោះទេ។
ភាគច្រើនឱ្យតែឮពាក្យថា “អូមេហ្កា-3” យើងច្រើនតែនឹកទៅដល់អាស៊ីតខ្លាញ់ដែលមាននៅក្នុងសាច់ត្រីសមុទ្រ ដូចជា ត្រីសាលម៉ុន ត្រីេ្រថៅត៍ ត្រីសាឌីន ត្រីធូណា ត្រីមែកខារេល ដែលជាត្រីនាំចូលមកពីបរទេស និងមានតម្លៃថ្លៃៗ ដោយមិនសូវមានអ្នកគិតដល់ត្រីទឹកសាបដែលមានអាស៊ីតខ្លាញ់អូមេហ្កា3នេះខ្ពស់នៅក្នុងស្រុកឡើយ គឺមានខ្ពស់មិនចាញ់ត្រីសមុទ្រស្រុកក្រៅឡើយ ជាពិសេសគឺ “ត្រីប្រា” របស់ខ្មែរយើងតែម្ដង គឺជាត្រីទឹកសាបដែលមានអូមេហ្កា3ខ្ពស់បំផុតដល់ទៅ 2,570 មិល្លីក្រាមក្នុង 100 ក្រាម ច្រើនជាងត្រីសមុទ្រខ្លះដូចជា “ត្រីសាលម៉ុន” ទៅទៀត ព្រោះត្រីសាលម៉ុនមានអូមេហ្កា3 ប្រមាណត្រឹមតែ 1,000 – 1,700 មិល្លីក្រាមក្នុង 100 ក្រាមប៉ុណ្ណោះ។ ចំណែក “ត្រីរ៉ស់” ក៏មានអូមេហ្កា3 ខ្ពស់ដែរ គឺមានដល់ទៅ 870 មិល្លីក្រាមក្នុង 100 ក្រាមឯណោះ។ បន្ទាប់មកទៀតគឺ “ត្រីឆ្ពុង” ដោយមានអូមេហ្កា3 ប្រមាណជា 310 មិល្លីក្រាមក្នុង 100ក្រាម។ ហើយប្រភេទត្រីទឹកសាបកម្ពុជាអស់ទាំងនេះ មិនពិបាកឱ្យយើងរកទិញឡើយ និងថែមទាំងមានតម្លៃថោកជាងត្រីសមុទ្រទឹកប្រៃទៅទៀត។
ខាងក្រោមនេះ គឺជាអត្ថប្រយោជន៍របស់ “អូមេហ្កា3” ដោយ ឡារ៉ែន ជឿថា ពេលលោកអ្នកបានអានហើយ មុខជាចង់ទៅទិញយកមកទទួលទានជាក់ជាមិនខាន ៖* ការពារជំងឺបេះដូង និងសរសៃឈាម ព្រោះអូមេហ្កា3 នឹងជួយការពារការប្រមូលផ្ដុំសារជាតិខ្លាញ់បង្កកខ្លួន ឬខូលេស្តេរ៉ូល ដែលជាមូលហេតុធ្វើឱ្យសរសៃឈាមញ៉ុកណែន។
* បំប៉នខួរក្បាល ព្រោះអាស៊ីតខ្លាញ់ DHAដែលមានក្នុងអូមេហ្កា3 នឹងជួយបង្កើនប្រសិទ្ធភាពក្នុងការចងចាំ ការស្វែងយល់សមត្ថភាពក្នុងការគិតវិភាគ អារម្មណ៍ និងផ្នែកផ្សេងៗជាច្រើនទៀត រហូតដល់បណ្ដាលឱ្យកើតមានជាពាក្យមួយឃ្លាថា “ញ៉ាំត្រីច្រើនឆ្លាត” រហូតមកដល់សព្វថ្ងៃទៀតផង។
* បំប៉នប្រព័ន្ធប្រសាទ និងភ្នែក ព្រោះអូមេហ្កា3 ជាអាស៊ីតខ្លាញ់ដែលចាំបាច់ដល់ការសាងជញ្ជាំងកោសិកា។
* អាស៊ីត EPA នៅក្នុងខ្លាញ់ត្រី មានតួនាទីសំខាន់ក្នុងការព្យាបាលជំងឺសោកសៅ អារម្មណ៍មិនស្ងប់ ឬគេងមិនលក់។
* ជួយកាត់បន្ថយភាពប្រថុយក្នុងការកើតរោគមហារីកប្រភេទផ្សេងៗមួយចំនួន។តែបើអ្នកជាមនុស្សដែលមិនចូលចិត្តទទួលទានសាច់ត្រី ឬពិបាករកត្រីមកទទួលទាននោះក៏នៅមានអាហារប្រភេទផ្សេងៗជាច្រើនទៀតដែលមានអាស៊ីតខ្លាញ់អូមេហ្កា3 ខ្ពស់ ដែលអាចឱ្យអ្នកមានភាពងាយស្រួលក្នុងការទទួលទាន ដោយ ឡារ៉ែន នឹងលើកយកមកបង្ហាញប្រិយមិត្តអ្នកអាននៅលេខក្រោយទៀត ដូច្នេះសូមកុំភ្លេចរង់ចាំតាមដានណា៎៕