ធឿន មករា - La Reine Media

កម្ពុជានឹងប្រកាសមុខរបរចំនួន 10មុខ ដែលជនបរទេសមិនអាចបើកអាជីវកម្មផ្ទាល់ខ្លួនបាន

បច្ចុប្បន្ននេះ ដោយសារតែចរន្តនៃការប្រែប្រួល និងស្របពេលដែលកម្ពុជាស្ថិតជាសមាជិកអាស៊ានរួមទាំងជាសមាជិកស្ថាប័នអន្តរជាតិសំខាន់ៗមួយចំនួនទៀត បានធ្វើឱ្យកម្ពុជាបើកចំហការវិនិយោគកាន់តែទូលំទូលាយដល់ជនបរទេសដើម្បីមកបណ្តាក់ទុនរកស៊ីនៅកម្ពុជា។

កំណើននៃការវិនិយោគ និងចូលមករកស៊ីនៅកម្ពុជារបស់ជនបរទេសនេះ ត្រូវបានគេមើលឃើញពីផលវិជ្ជមានផង និងអវិជ្ជមានផង។ ផលវិជ្ជមាន គឺធ្វើឱ្យមានការកើនឡើងនូវសំណង់អគារថ្មីៗ ចង្វាក់ផលិតកម្ម រួមទាំងតំបន់ទំនើបៗជាច្រើនដែលកើតចេញពីការវិនិយោគ តែទន្ទឹមនឹងនោះ ប្រជាជនក៏មានការព្រួយបារម្ភផងដែរពីបាត់បង់ទីផ្សារការងារ និងមុខរបរមួយចំនួនដែលកើតឡើងដោយសារតែចូលមករបស់ជនបរទេសមួយចំនួន។

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម ហេង សួរ បានលើកឡើងថា ឆាប់ៗខាងមុខនេះក្រសួងការងារ នឹងដាក់ចេញនូវប្រកាសដើម្បីទប់ស្កាត់ជនបរទេសមិនឱ្យមានសកម្មភាពស្វ័យនិយោជ ឬហៅសាមញ្ញថា បង្កើតមុខរបរផ្ទាល់ខ្លួនលើប្រភេទមុខរបរ និងការងារចំនួន10 ដូចជា មុខរបរបើកយានយន្ត ដូចជា តាក់ស៊ី ម៉ូតូកង់3 ម៉ូតូឌុប លក់ដូរតាមផ្លូវ ឬតាមរទះរុញ កាត់សក់ ចែកចាយផលិតផល និងការធ្វើអាជីវកម្មខ្នាតតូច ជាដើម ដែលមុខរបរទាំងអស់នេះភាគច្រើនជាសកម្មភាពនៃសេដ្ឋកិច្ចក្រៅប្រព័ន្ធ។

ក្រៅពីនេះ ក្រសួងការងារ និងបណ្តុះបណ្តាលវិជ្ជាជីវៈ ក៏នឹងហាមឃាត់ផងដែរចំពោះជនបរទេសមិនឱ្យកាន់តួនាទីជាប្រធានផ្នែកធនធានមនុស្ស ឬបុគ្គលិកនៅក្នុងសហគ្រាស ឬគ្រឹះស្ថានឯកជនជាដើមទៀតផង។ យោងលើបទដ្ឋានសុវត្ថិភាព និងសុខភាពការងាររួមទាំងការធានាសេចក្តីថ្លៃថ្នូរ និងគុណភាពសេវាកម្មរបស់និយោជក អធិការការងាររបស់ក្រសួងការងារ នឹងចាប់ផ្តើមផាកពិន័យលើសហគ្រាស និងគ្រឹះស្ថានទាំងឡាយណាដែលមិនមានបិទសញ្ញាការ ឬបញ្ជីផលិតផល ឬបញ្ជីម្ហូប ឬបញ្ជីសេវាកម្មជាភាសាខ្មែរថែមទៀត។

ឯកឧត្តម ហេង សួរ បានថ្លែងថា៖ “ក្រៅពីការកំណត់មុខរបរ និងការងារដែលជនបរទេសធ្វើស្វ័យនិយោជ កន្លងមកក្រសួងការងារ និងបណ្តុះបណ្តាលវិជ្ជាជីវៈ ក៏បានកំណត់នូវច្បាប់មួយចំនួនផងដែរលើជនបរទេសដែលមកស្នាក់នៅ និងធ្វើការងារនៅកម្ពុជា”។ ឯកឧត្តម ហេង សួរ បានបន្ថែមទៀតថា តាមច្បាប់ វិនិយោគិនបរទេសដែលមកស្នាក់ជាប្រចាំ និងធ្វើការងារនៅកម្ពុជា ត្រូងបង់ប្រាក់ចូលថវិកាជាតិប្រមាណ 360ដុល្លារក្នុង 1ឆ្នាំ ដោយក្នុងនោះពួកគាត់ត្រូវបង់អាករលើទិដ្ឋាការស្នាក់នៅបណ្តោះអាសន្នរយៈពេលវែងចំនួន 180ដុល្លារក្នុង 1ឆ្នាំ បង់អាករប័ណ្ណ ឬសៀវភៅការងារប្រមាណ 130ដុល្លារក្នុង 1ឆ្នាំ និងបង់អាករស្នើសុំកូតាប្រើប្រាស់ជនបរទេសចំនួន 50ដុល្លារបន្ថែមទៀត។

ចំពោះសហគ្រាស និងគ្រឹះស្ថានដែលត្រូវបានអនុញ្ញាតឱ្យប្រើប្រាស់ជនបរទេសបាន លុះត្រាតែស្ថាប័ននោះបានបង្ហាញពីការផ្តល់អាទិភាព និងខិតខំជ្រើសរើសជនជាតិខ្មែរជាមុនសិន ឬមានការបញ្ចាក់ថា ជនបរទេសនោះមានជំនាញខ្ពស់ដែលនៅកម្ពុជាមិនទាន់មាន។ ក្រៅពីនេះអាជីវកម្មដែលអាចអនុញ្ញាតផងដែរនោះ គឺភាគច្រើនជាអាជីពដែលកម្ពុជាមិនមានលទ្ធភាពផ្គត់ផ្គង់កម្លាំងពលកម្មសម្រាប់អ្នកវិនិយោគនោះបាន។

គួរបញ្ជាក់ផងដែរថា ចាប់ផ្តើមពីការចេញវិធានការទាំងអស់នេះ ក្រសួងការងារ និងបណ្តុះបណ្តាលវិជ្ជាជីវៈនឹងចាប់ផ្តើមអនុវត្តសកម្មភាពដើម្បីធ្វើយ៉ាងណាការពារ និងធានានូវមុខរបរមួយចំនួនដូចបានកំណត់សម្រាប់ប្រជាជនខ្មែរ។ ក្រៅពីនេះ វាក៏ជាចំណុចវិជ្ជមានមួយផងដែរ ដើម្បីកំណត់ និងជំរុញឱ្យជនបរទេសវិនិយោគលើចំណុចទាំងឡាយណាដែលកម្ពុជាមិនទាន់មាន ឬធ្វើឱ្យកាន់តែប្រសើរឡើងនូវចំណុចខ្វះខាតដែលយើងមិនទាន់បានបំពេញឱ្យគ្រប់ជ្រុងជ្រោយ៕

July 26, 2019

កម្មវិធីផ្សព្វផ្សាយភាពយន្តថៃលើកទី6 បានប្រព្រឹត្តទៅនៅថ្ងៃទី24 ខែកក្កដា ឆ្នាំ2019 ប្រកបដោយភាពជោគជ័យជាទីមោទនៈក្រៃលែង

កាលពីថ្ងៃទី24 ខែកក្កដា ឆ្នាំ2019 កន្លងទៅនេះ កម្មវិធីផ្សព្វផ្សាយភាពយន្តថៃលើកទី6 ដែលត្រូវបានរៀបចំឡើងដោយស្ថានឯកអគ្គរាជទូតថៃ ប្រចាំព្រះរាជណាចក្រកម្ពុជា និងស្ថានតំណាងពាណិជ្ជកម្មថៃប្រចាំរាជធានីភ្នំពេញ (DITP), ក្រសួងពាណិជ្ជកម្មរបស់ប្រទេសថៃដែលបានប្រព្រឹត្តទៅចាប់ពីថ្ងៃទី24 ដល់ថ្ងៃទី28 ខែកក្កដា ឆ្នាំ2019 នៅរោងភាពយន្ត Major Cineplex នៅក្នុងផ្សារទំនើប អ៊ីអន ម៉ល សែនសុខ ស៊ីធី និងរោងភាពយន្ត Legend Cinema ស្ថិតនៅផ្សារទំនើប City Mall។

ឯកឧត្តម Panyarak Poolthup ឯកអគ្គរាជទូត ប្រចាំស្ថានឯកអគ្គរាជទូតថៃនៅរាជធានីភ្នំពេញ ប្រចាំកម្ពុជាបាននិយាយថា “ខ្សែភាពយន្តគឺជាប្រភេទនៃការកម្សាន្តដែលអាចផ្តល់នូវការយល់ដឹងពីរបៀប ឬបែបផែនដែលមនុស្សត្រូវគិត និងបញ្ចេញសកម្មភាពនៅក្នុងជីវិតពិត។ ការយល់ដឹងអំពីការគិតរបស់មនុស្ស និងមូលហេតុដែលវាប៉ះពាល់ដល់អាកប្បកិរិយារបស់ពួកគេ អាចជួយយើងឱ្យទទួលយកនូវភាពខុសគ្នារបស់យើង និងអាចតភ្ជាប់ជាមួយមនុស្សផ្សេងទៀត។ នេះគឺជាមូលហេតុដែលមហោស្រពភាពយន្តត្រូវបានរៀបចំជាថ្មីម្តងទៀត យើងជឿជាក់ថាខ្សែភាពយន្តនេះនឹងពង្រឹងចំណងទាក់ទងរវាងប្រជាជននៃប្រទេសថៃ និងប្រជាជននៃប្រទេសកម្ពុជា ទាំងមនុស្សពេញវ័យ និងកុមារផងដែរ។

– កម្មវិធីផ្សព្វផ្សាយភាពយន្តថៃ ឆ្នាំ2019 ចាប់ពីថ្ងៃទី24 ដល់ថ្ងៃទី28 ខែកក្កដា ឆ្នាំ2019 ត្រូវបានរៀបចំរួមគ្នាដោយស្ថានតំណាងពាណិជ្ជកម្មអន្តរជាតិនៃប្រទេសថៃ និងក្រសួងការបរទេសនៃប្រទេសថៃ ព្រមទាំងមានកិច្ចសហប្រតិបត្តិការពីរោងភាពយន្ត Major Cineplex នៅផ្សារទំនើប អ៊ីអន ម៉ល សែនសុខ និងរោងភាពយន្ត Legend Cinema ស្ថិតនៅផ្សារទំនើប City Mall។

– ក្នុងអំឡុងពេល5ថ្ងៃនេះ ខ្សែភាពយន្តថៃចំនួនមួយនឹងត្រូវបានចាក់បញ្ចាំងជារៀងរាល់ថ្ងៃ នៅរោងភាពយន្ត Major Cineplex ផ្សារទំនើប អ៊ីអន ម៉ល សែនសុខ និងនៅរោងភាពយន្ត Legend ផ្សារទំនើប City Mall ហើយការចាក់បញ្ចាំងនេះត្រូវបានបើកចំហដល់សាធារណជន ដោយចូលទស្សនាឥតគិតថ្លៃ។

– លើសពីនេះទៅទៀត យើងក៏មានរៀបចំសិក្ខាសាលាមួយស្តីពីការផលិតខ្សែភាពយន្តនៅថ្ងៃទី24 ខែកក្កដា ឆ្នាំ2019 ផងដែរ ដោយផ្តោតទៅលើការបង្កើតសាច់រឿង ការជ្រើសរើសបរិយាកាសនៅក្នុងសាច់រឿង និងការផលិត នៅសាល អ៊ីអន (AEON Hall) ស្ថិតនៅជាន់ទី3 នៃផ្សារទំនើប អ៊ីអន ម៉ល សែនសុខ បន្ទាប់មកគឺការទំនាក់ទំនងគ្នារវាងអ្នកជំនួញ និងអ្នកជំនួញ។ សកម្មភាពទាំងពីរនេះត្រូវបានរៀបចំឡើង ដើម្បីបង្កើតនូវវេទិកាជួបជុំមួយរវាងផលិតករភាពយន្តថៃ និងផលិតករភាពយន្តកម្ពុជា ដើម្បីចែករំលែកបទពិសោធន៍ និងរៀនសូត្រពីគ្នាទៅវិញទៅមក”។

លោក Jirawuth Suwanana-arj អគ្គទីប្រឹក្សាពាណិជ្ជកម្ម ប្រចាំស្ថានឯកអគ្គរាជទូតថៃនៅរាជធានីភ្នំពេញ ប្រចាំកម្ពុជា និងជានាយកនៃ ស្ថានតំណាងពាណិជ្ជកម្មថៃប្រចាំរាជធានីភ្នំពេញ (DITP) បានប្រសាសន៍ថា កម្មវិធីផ្សព្វផ្សាយភាពយន្តថៃ ឆ្នាំ2019 ក៏មានគោលបំណងជំរុញកិច្ចសហប្រតិបត្តិការរវាងផលិតករភាពយន្ត និងអ្នកដែលពាក់ព័ន្ធនឹងខ្សែភាពយន្តនៃប្រទេសកម្ពុជា និងប្រទេសថៃ ដើម្បីបង្កើតខ្សែភាពយន្តថ្មីៗ ឬធ្វើការជាមួយគ្នាបានកាន់តែល្អ។ សិក្ខាសាលា និងការតភ្ជាប់ទំនាក់ទំនងអាជីវកម្មនៅថ្ងៃដំបូងនៃព្រឹត្តិការណ៍កម្មវិធីផ្សព្វផ្សាយភាពយន្តថៃ ត្រូវបានរៀបចំជាវេទិកាសម្រាប់ចែករំលែកបទពិសោធន៍ និងបច្ចេកទេសនៅក្នុងចំណោមអ្នកដែលដែលពាក់ព័ន្ធនឹងការផលិតខ្សែភាពយន្ត ដូចជា នាយកផលិតកម្ម ផលិតករ និងតារាសម្តែងពីបណ្តាប្រទេសទាំងពីរ។ នាពេលបច្ចុប្បន្ននេះ “មាតិការឿង” គឺមានសារៈសំខាន់បំផុតសម្រាប់ការកម្សាន្ត និងឧស្សាហកម្មភាពយន្ត។ ដូច្នេះនៅឆ្នាំនេះ យើងបានអញ្ជើញក្រុមហ៊ុនថៃជាច្រើន ដែលទាក់ទងនឹងអ្នកបង្កើតមាតិការឿង ដូចជារឿងគំនូរជីវចល រឿងល្ខោន កម្មវិធីហ្គេមកម្សាន្ត និងការប្រគុំតន្រ្តី ដើម្បីជួយស្វែងរកគំនិតច្នៃប្រឌិតបន្ថែមទៀតចំពោះទីផ្សារភាពយន្តនៃប្រទេសកម្ពុជា ហើយអាចបង្កើតនូវគម្រោងភាពយន្តធំមួយ ដែលជាគម្រោងរួមគ្នានាពេលអនាគតនេះ។ ហើយក៏មានក្រុមហ៊ុនថៃ ដែលមានអាជីវកម្មលើផ្នែកឌីជីថល ដើម្បីគាំទ្រដល់ផ្នែកទីផ្សារដែលកំពុងមានតម្រូវការខ្ពស់នៅក្នុងប្រទេសកម្ពុជានាពេលបច្ចុប្បន្ននេះផងដែរ។

ព័ត៌មានលម្អិតអំពីការចាក់បញ្ចាំងខ្សែភាពយន្តថៃ

ព្រឹត្តិការណ៍នៅក្នុងឆ្នាំនេះ នឹងមានខ្សែភាពយន្តចំនួន5រឿង ដើម្បីចាក់ជូនទស្សនិកជនទស្សនាជារៀងរាល់ថ្ងៃ នៅសាលលេខ3 (Hall 3) នៅក្នុងរោងភាពយន្ត Major Cineplex នៅក្នុងផ្សារទំនើប អ៊ីអន ម៉ល សែនសុខ និងនៅសាលលេខ1 (Hall 1) នៃរោងកុន Legend Cinema នៅក្នុងផ្សារទំនើប City Mall។ ការចាក់បញ្ចាំងដោយឥតគិតថ្លៃនេះ គឺមាន 266កៅអី នៅក្នុងការចាក់រឿងម្តងៗនៅក្នុងរោងភាពយន្ត Major Cineplex និងមាន250កៅអី នៅរោងភាពយន្ត Legend Cinema។ ខ្សែភាពយន្តទាំងអស់នេះ គឺត្រូវបានបញ្ចូលសំឡេងភាសាខ្មែរ និងមានអក្សររត់ពីខាងក្រោមវីដេអូជាភាសាអង់គ្លេសផងដែរ។

ខ្សែភាពយន្តដំបូងគេដែលនឹងចាក់បញ្ចាំងនៅថ្ងៃទី24 ខែកក្កដា ឆ្នាំ2019នេះ នៅវេលាម៉ោង07:00នាទីល្ងាច នៅរោងភាពយន្ត Major Cineplex និងនៅម៉ោង05:00ល្ងាច នៅរោងភាពយន្ត Legend Cinema គឺជារឿង “Friend Zone” ដែលបានថតនៅបណ្តាប្រទេសនៅក្នុងប្រទេសអាស៊ាន ហើយខ្សែភាពយន្តនេះមានភាពទាក់ទាញយ៉ាងខ្លាំងជាមួយនឹងការច្រៀងដោយតារាចម្រៀងល្បីៗនៅក្នុងប្រទេសអាស៊ីដូចជា ប្រទេសកម្ពុជា ថៃ វៀតណាម ឡាវ ភូមា ចិន ហ្វីលីពីន ឥណ្ឌូណេស៊ី និងប្រទេសម៉ាឡេស៊ីផងដែរ។ បទចម្រៀងនេះត្រូវបានច្រៀងនៅក្នុងភាសារៀងៗខ្លួនរបស់តារាចម្រៀងនៃប្រទេសនីមួយៗ និងចែកចាយដោយក្រុមហ៊ុន Westec Media Limited។

ខ្សែភាពយន្តដ៏គួរឱ្យចាប់អារម្មណ៍ចំនួន4ផ្សេងទៀត ដែលត្រូវបានចាក់បញ្ចាំងនៅក្នុងអំឡុងពេលនៃកម្មវិធីផ្សព្វផ្សាយភាពយន្តថៃនេះគឺមានដូចជា ៖

– ថ្ងៃព្រហស្បតិ៍ ទី25 ខែកក្កដា ម៉ោង05:00ល្ងាច ចាក់បញ្ចាំងខ្សែភាពយន្ត “និស្ស័យស្នេហ៍អាប” នៅរោងភាពយន្ត Major Cineplex និងនៅរោងភាពយន្ត Legend Cinema។

ហើយភាពយន្តនេះត្រូវបានចែកចាយដោយក្រុមហ៊ុន M Picture Cambodia។

– ថ្ងៃសុក្រ ទី26 ខែកក្កដា នៅវេលាម៉ោង05:00ល្ងាច នឹងចាក់បញ្ចាំងរឿង “ខ្មោចប្រពន្ធ” នៅរោងភាពយន្ត Major Cineplex និងនៅរោងភាពយន្ត Legend Cinema។

រឿងនេះផលិតឡើងដោយក្រុមហ៊ុន One Touch និង Red Spark Production និងចែកចាយដោយក្រុមហ៊ុន Westec Media Limited។

-ថ្ងៃសៅរ៍ ទី27 ខែកក្កដា នៅវេលាម៉ោង12.00រសៀល នឹងចាក់បញ្ចាំងរឿង “Bikeman” នៅក្នុងរោងរោងភាពយន្ត Major Cineplex និងនៅរោងភាពយន្ត Legend Cinema។

ត្រូវបានចែកចាយដោយក្រុមហ៊ុន Sabay MVP។

– ថ្ងៃអាទិត្យ ទី28 ខែកក្កដា វេលាម៉ោង12យប់ នឹងចាក់បញ្ចាំងរឿង “បងប្រុសកំពូលកូរ” នៅរោងភាពយន្ត Legend Cinema និងរឿង “Friend Zone” នឹងចាក់បញ្ចាំង នៅរោងរោងភាពយន្ត Major Cineplex ដែលផលិតឡើងដោយក្រុមហ៊ុន GDH599 និងចែកចាយដោយក្រុមហ៊ុន Westec Media Limited។

តារាសម្តែងថៃ Naphat Siangsomboon (ហៅ Nine) ជាតួឯកប្រុសនៅក្នុងរឿង “Friend Zone” និង កញ្ញា Supawadee Kitisopakul (ហៅ Dear) ជាតួឯកស្រីនៅក្នុងរឿង “ខ្មោចប្រពន្ធ” បានមកពីប្រទេសថៃ មកចូលរួមជាមួយនឹងតារាសម្តែងល្បីៗប្រចាំប្រទេសកម្ពុជាជាច្រើនរូបទៀត ដើម្បីចូលរួមនៅក្នុងព្រឹត្តការណ៍នេះផងដែរ ដែលប្រព្រឹត្តទៅនៅរោងភាពយន្ត Major Cineplex by Smart ស្ថិតនៅក្នុងផ្សារទំនើប អ៊ីអន ម៉ល សែនសុខ នៅថ្ងៃទី24 ខែកក្កដា ឆ្នាំ2019 វេលាម៉ោង5ល្ងាច៕

July 26, 2019

ដឹងពីមូលហេតុដែលធ្វើឲ្យ Huawei Y9 2019 ទទួលបានការគាំទ្រខ្លាំងលើសលុប!

ភ្នំពេញ ថ្ងៃទី 25 កក្កដា ឆ្នាំ 2019 ៖ Huawei Y9 2019 បានបង្ហាញវត្តមានជាផ្លូវការនៅក្នុងទីផ្សារប្រទេសកម្ពុជា ដោយទទួលបានការគាំទ្រយ៉ាងគំហុក ច្រើនលើសលុប ។ ជាក់ស្តែង កាលពីថ្ងៃប្រកាសលក់ ថ្ងៃដំបូង មានអតិថិជនជាច្រើនរាប់រយអ្នក បានទៅតំរង់ជួរបន្តកន្ទុយគ្នា រង់ចាំទិញ។ ដូច្នេះអ្នកប្រាកដជាឆ្ងល់ហើយថា តើស្មាតហ្វូននេះមានភាពទាក់ទាញអ្វីខ្លះ ដែលធ្វើឲ្យអង្រួនចិត្តអតិថិជនបែបនេះ?

ចំណុចទីមួយ

Huawei Y9 2019 ជាស្មាតហ្វូនកាមេរ៉ា Pop-up Selfie កាលីបទាន់សម័យ ទំហំ 16MP សែលហ្វីស្អាតកប់សេរី អេក្រង់លាតពេញផ្ទៃទំហំ 6.59 អ៊ីញ គ្មានស្នាមឆក និងតម្លៃរំជើបរំជួលត្រឹមតែ $239 តែប៉ុណ្ណោះ។ ស្មាតហ្វូនប្រភទកាមេរ៉ាផុស ម៉ាកដទៃមានតម្លៃរហូតដល់ទៅជាង $300 ឯណោះ។ អីចឹងមិនចាំបាច់ចំណាយដល់ទៅជាង $300 ទៀតទេ ប្រសិនបើអ្នកពេញចិត្តស្មាតហ្វូនបែបនេះ។

ចំណុចទីពីរ

ស្មាតហ្វូននេះ បំពាក់ដោយកាមេរ៉ាក្រោយបែប AI ឆ្លាតវៃ រហូតដល់ទៅបីគ្រាប់។ កាមេរ៉ាទីមួយមានទំហំ 2MP(f/2.4) ជា Bokeh Sensor កាមេរ៉ាទីពីរទំហំ 16MP( f1.8) និងកាមេរ៉ាបីទំហំ 8MP មានមុខងារអាចថត Ultra-Wide បានល្អជាទីគាប់ចិត្ត។ សម័យនេះហើយ បើប្រើស្មាតហ្វូនកាមេរ៉ាផុស កាមេរ៉ាបីគ្រាប់បានស្ទាវ ហើយរកឯណាបាន តម្លៃតែជាង $200 សោះ កាមេរ៉ាម៉ាអែម មុខងារម៉ាឡូយ ថតបានម៉ាស្រលាញ់អីចឹង!

ចំណុចទីបី

ROM មានទំហំធំ 128GB ROM 4GB ដំណើរការដោយ Kirin 710F ដែលធ្វើឲ្យស្មាតហ្វូននេះដំណើរការបានលឿន និងដំណើរការដោយប្រព័ន្ធប្រតិបត្តិការ Android EMUI9.0 ថាមពលថ្មធំ 4000mAh សាកថ្មបានលឿន និង ប្រើ USB type C។ លើសពីនេះទៅទៀត Huawei Y9 2019 មានជម្រើសបីពណ៍ឡួយឆាយ គឺពណ៍បៃតង (Emerald green) ខៀវ (Sapphire blue) និងពណ៍ខ្មៅ (Midnight black)។

ម៉េចៗគិតគូ ទិញ Huawei Y9 2019 មួយហ្នឹងគេដែលទៅ បើពិសេសទាំងតម្លៃ ទាំងគុណភាពអីចឹងអីៗ! អ្នកអាចជាវនៅហាងទូរសព្ទដែលនៅជិតអ្នកបំផុត!

សម្រាប់ព័ត៌មានបន្ថែម សូមចូលទៅកាន់

Website: https://consumer.huawei.com/kh/

Facebook: Huawei Mobile (https://bit.ly/2ePDMSq)

July 26, 2019

តម្លៃកៅស៊ូធ្លាក់ចុះ តែឆមាសទី1 ឆ្នាំ2019នេះ កម្ពុជានាំចេញជ័រកៅស៊ូកើនឡើង 24ភាគរយ

ទោះបីជាទីផ្សារកៅស៊ូបច្ចុប្បន្នមានការធ្លាក់តម្លៃចុះក៏ដោយ តែក៏នៅឆមាសទី1 ឆ្នាំ2019 នេះ កម្ពុជាបាននាំចេញជ័រកៅស៊ូចំនួន 104,261តោន ដែលតួលេខនេះត្រូវបានគេឃើញថា មានការកើនឡើង 24% បើធៀបនឹងរយៈពេលដូចគ្នាកាលពីឆ្នាំមុន។ នេះបើតាមរបាយការណ៍ផ្លូវការរបស់អគ្គនាយកដ្ឋានកៅស៊ូ នៃក្រសួងកសិកម្ម រុក្ខា ប្រមាញ់ និងនេសាទ។

យោងតាមតួលេខពីក្រសួងកសិកម្មបានឱ្យដឹងថា បច្ចុប្បន្នតម្លៃកៅស៊ូ ជាមធ្យមមានតម្លៃប្រមាណជា 1,339ដុល្លារក្នុង1តោនលើទីផ្សារក្នុងស្រុក ដែលនេះជាការធ្លាក់ចុះជាង 100ដុល្លារបើប្រៀបធៀបទៅនឹងតម្លៃកាលពីឆ្នាំមុន។

ការធ្លាក់ថ្លៃនៃជ័រកៅស៊ូនេះ ត្រូវបានមន្ត្រីជំនាញអះអាងថា ដោយសារកត្តាទីផ្សារសកលលោក ដែលធ្វើឱ្យវិស័យឧស្សាហកម្មកៅស៊ូពិបាកនឹងទទួលបានផលចំណេញ ហើយអ្វីដែលគួរឱ្យកត់សម្គាល់ក្នុងរយៈពេលប៉ុន្មានខែថ្មីៗនេះ តម្លៃកៅស៊ូបានធ្លាក់ចុះដោយសារតែការធ្លាក់ចុះនៃតម្រូវការនៅទីផ្សារអន្តរជាតិ ជាពិសេសប្រទេសចិន ខណៈដែលកម្លាំងពលកម្មក្នុងវិស័យនេះក៏កាន់តែជួបបញ្ហាប្រឈមផងដែរ។

លោកឧកញ៉ា លឹម ហេង អនុប្រធានក្រុមហ៊ុន អាន ម៉ារឌី គ្រុប (An Mady Group) ដែលជាក្រុមហ៊ុនចម្ការកៅស៊ូ និងនាំចេញផលិតផលនេះបានថ្លែងថា៖ “នេះជាដំណឹងអាក្រក់ សម្រាប់វិនិយោគិនក្នុងវិស័យកៅស៊ូកម្ពុជា ព្រោះនៅក្នុងតម្លៃបច្ចុប្បន្ន អ្នកវិនិយោគក្នុងវិស័យនេះមិនអាចរស់រានបានទេ ហើយនិងមិនមានអ្នកវិនិយោគណាហ៊ានវិនិយោគលើវិស័យនេះដែរព្រោះនៅប្រទេសជិតខាងយើង ប្រទេសថៃ និងវៀតណាមគេមិនមានយកពន្ធទេ។

លោកឧកញ៉ាបានបន្តទៀតថា៖ “សម្រាប់កម្ពុជាយើង ការលើកទឹកចិត្ត មិនយកពន្ធក្នុងការនាំចេញបានអនុវត្តតាំងពីឆ្នាំទៅមួយ។ គឺតម្លៃក្រោម 1,000ដុល្លារ រដ្ឋមិនយកពន្ធទេ។ បើលើសពី 1,000ដុល្លារ គាត់គិតពន្ធ 50ភាគរយ គឺស្មើនឹង 1,500 ដុល្លារ។ បើលើសពី 2,000$ គាត់គិតពន្ធ 150%(គិតពីតម្លៃលក់)” លោកឧកញ៉ាបានពន្យល់ថា “តម្លៃផលិតកម្មខ្ពស់ជាងតម្លៃដែលផលិតផលកំពុងត្រូវបានជួញដូរ ព្រោះតម្លៃដើមរបស់ក្រុមហ៊ុនថ្លៃដល់ទៅ 1,400$ហើយ ឯតម្លៃកៅស៊ូបច្ចុប្បន្នតម្លៃត្រឹមតែជាង 1,300$ប៉ុណ្ណោះ (បើយើងលក់ក្នុងតម្លៃបច្ចុប្បន្នយើងត្រូវបង់ 50$សម្រាប់ថ្លៃពន្ធ)”។ ប៉ុន្តែលោកឧកញ៉ាបានបន្ថែមថា ចំពោះកសិករខ្នាតតូច តម្លៃបច្ចុប្បន្នអាចមាននិរន្តរភាព។

លោកឧកញ៉ាបានពន្យល់ទៀតថា៖ “សម្រាប់កសិករខ្នាតតូច គាត់ផលិតបានតិច មិនលើសពីតម្លៃដែលបានកំណត់(ក្រោម 1,000ដុល្លារ)ក្នុងការនាំចេញ រដ្ឋមិនយកពន្ធទេ។ចំណែកវិស័យឯកជន ឬក្រុមហ៊ុនសហគ្រាស គាត់មិនអាចនាំចេញក្នុងទំហំប៉ុននោះបានទេ។ហេតុនេះការបង់ពន្ធ និងតម្លៃដើមមិនអាចឱ្យគាត់រកចំណេញបានឡើយ”។

លោកឧកញ៉ាបានមានប្រសាសន៍ថា ប្រទេសវៀតណាមដែលជាទីផ្សារធំបំផុតសម្រាប់កៅស៊ូកម្ពុជា បានឃើញពីការធ្លាក់ចុះយ៉ាងខ្លាំងនៃការនាំចេញទៅកាន់ប្រទេសចិន ដោយសារតែការផ្លាស់ប្តូរនយោបាយចិន និងការភ័យខ្លាចអំពីសង្គ្រាមពាណិជ្ជកម្ម រវាងសហរដ្ឋអាមេរិក និងចិន។

លោកឧកញ៉ាបានមានប្រសាសន៍ទៀតថា៖ “បញ្ហានេះធ្វើឱ្យប៉ះពាល់ដល់ប្រទេសកម្ពុជាដោយសារតែផលិតកម្មកៅស៊ូរបស់កម្ពុជាត្រូវបានបញ្ជូនទៅកាន់ប្រទេសចិន ក្នុងការដឹកជញ្ជូនដោយប្រយោលដែលត្រូវឆ្លងកាត់ប្រទេសវៀតណាម។ ដោយសារតែបញ្ហាតម្លៃទាំងនេះ វិស័យឯកជនកំពុងទាមទារឱ្យមានការកាត់បន្ថយពន្ធលើការនាំចេញកៅស៊ូ”។

“វិស័យឯកជនបានស្នើសុំឱ្យរដ្ឋាភិបាលតាមរយៈក្រសួងកសិកម្មយកពន្ធនាំចេញកៅស៊ូ សម្រាប់តែការដឹកជញ្ជូនលើសពី 2,000ដុល្លារប៉ុណ្ណោះក្នុង 1តោន។ ទោះជាយ៉ាងណាក៏ដោយ មិនទាន់មានការឆ្លើយតបពីរដ្ឋាភិបាលនៅឡើយទេ”។ នេះបើតាមការបញ្ជាក់បន្ថែមរបស់លោកឧកញ៉ាលឹម ហេង។

លោកឧកញ៉ា លឹម ហេង បានបញ្ជាក់ឱ្យដឹងថា៖“តម្លៃកៅស៊ូនឹងនៅថេររហូតដល់ឆ្នាំក្រោយ។ ក្នុងតម្លៃបច្ចុប្បន្ន វិនិយោគិនលើវិស័យកៅស៊ូដែលមានស្រាប់អាចនឹងនៅក្នុងអាជីវកម្ម នេះបាន ប៉ុន្តែការទាក់ទាញវិនិយោគិនថ្មី នឹងមានការលំបាក។ បើគ្មានគោលនយោបាយថ្មី ដែលផ្តល់នូវការលើកទឹកចិត្តច្រើនទេ វិនិយោគិននឹងមិនហ៊ានចូលមកទេ។ ពួកគេនឹងរង់ចាំរហូតដល់ស្ថានភាពល្អប្រសើរឡើង”។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា ធ្លាប់បានអំពាវនាវដល់កសិករដាំដំណាំកៅស៊ូសូមឱ្យមានការអត់ធ្មត់ចំពោះបញ្ហាតម្លៃជ័រកៅស៊ូធ្លាក់ថ្លៃនៅលើទីផ្សារអន្តរជាតិ។ ដោយសម្តេចបានមានប្រសាសន៍ថា៖ “សុំឱ្យកសិករ និងអ្នកវិនិយោគកុំជ្រួលជ្រើមទៅតាមចរន្តទីផ្សារ លឿនពេក ហើយដាំដំណាំណាដែលមានទីផ្សារមួយកញ្ជ្រោលនោះ។ កសិករខ្លះបានកាប់ដើមកៅស៊ូរបស់ពួកគេចោល ហើយជំនួសដោយការដាំដើមស្វាយចន្ទីវិញ។ នៅពេលតម្លៃស្វាយចន្ទីថយចុះ ពួកគេនឹងត្រូវបង្ខំឱ្យកាប់ដើមឈើទាំងនេះ និងស្វែងរកដំណាំថ្មីដែលមានតម្លៃពលកម្មច្រើន”។

សូមជម្រាបថា គិតមកដល់បច្ចុប្បន្ននេះ កម្ពុជាមានផ្ទៃដីដាំកៅស៊ូសរុបចំនួន 434,013 ហិកតា ក្នុងនោះផ្ទៃដីចៀរជ័រមានចំនួន 233,212ហិកតា ស្មើនឹង 54% និងផ្ទៃដីថែទាំមានចំនួន 200,801ហិកតា ស្មើនឹង46%។

ក្នុងឆ្នាំ2018 កម្ពុជាបាននាំចេញជ័រកៅស៊ូជាង 21ម៉ឺនតោន ទទួលបានចំណូលជិត 300 លានដុល្លារអាមេរិក។ ផលិតផលជ័រកៅស៊ូកម្ពុជាបាននាំចេញទៅកាន់ប្រទេសចិន វៀតណាម សិង្ហបុរី និងម៉ាឡេស៊ី៕

July 26, 2019

ឆមាសទី1 ឆ្នាំ2019 អគ្គនាយកដ្ឋានពន្ធដារ ប្រមូលចំណូលពន្ធបាន 1,526លានដុល្លារ កើនជិត30%

នៅឆមាសទី1 ឆ្នាំ2019នេះ អគ្គនាយកដ្ឋានពន្ធដារបានប្រមូលចំណូលពន្ធសម្រាប់ថវិកាជាតិ មានចំនួន 6,106.17ប៊ីលានរៀល ឬស្មើនឹងប្រមាណ 1,526.54លានដុល្លារអាមេរិក កើនឡើង28.94% បើធៀបនឹងរយៈពេលដូចគ្នាឆ្នាំ2018។ នេះបើតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ ។

ឯកឧត្តម គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានពន្ធដារ ក្រសួងសេដ្ឋកិច្ច និងហិរញ្ញវត្ថុបានបញ្ជាក់ថា កិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែមិថុនា និងសមិទ្ធផលឆមាសទី1 ឆ្នាំ2019 តាមរយៈការដាក់ឱ្យអនុវត្តនូវប្រព័ន្ធអនឡាញ សម្រាប់ ការស្នើសុំការបង្វិលសង និងការប្រើប្រាស់ឥណទានអាករលើតម្លៃបន្ថែមតាមប្រព័ន្ធអនឡាញ សម្រាប់គ្រប់គ្រងអាករលើតម្លៃបន្ថែមរបស់អគ្គនាយកដ្ឋានពន្ធដារ (E-VAT Refund) ដោយបានបង្កើនប្រសិទ្ធភាព នៃការគ្រប់គ្រង ការប្រមូលអាករលើតម្លៃបន្ថែម និងទប់ស្កាត់ការគេចវេះ កេងបន្លំប្រាក់ពន្ធ ដែលជាលទ្ធផលរយៈពេល 6ខែ ឆ្នាំ2019 ចំណូលអាករលើតម្លៃបន្ថែមកើនឡើង36.62% ធៀបនឹងរយៈពេលដូចគ្នាឆ្នាំ2018។

ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងកោតសរសើរ ចំពោះសមិទ្ធផល ដែលសម្រេចបានក្នុងខែមិថុនា ក្នុងឆមាសទី1 ឆ្នាំ2019 នេះរបស់អគ្គនាយកដ្ឋានពន្ធដារ។

សម្រាប់ឆ្នាំ2019 នេះ ក្នុងការអនុវត្តការប្រមូលចំណូលពន្ធ និងឈានទៅការប្រមូលចំណូលពន្ធ គ្រប់តាមផែនការច្បាប់កំណត់ និងដើម្បីធានាបាននូវប្រសិទ្ធភាព ឈានទៅសម្រេចលើសផែន ការ ឱ្យបានជាអតិបរិមានោះ អគ្គបណ្ឌិតសភាចារ្យ បានគាំទ្រអគ្គនាយកដ្ឋានពន្ធដារ បន្តបេសកកម្មរបស់ខ្លួន និងផ្តល់អនុសាសន៍ណែនាំលើវិធានការ និងទិសដៅត្រូវអនុវត្តបន្តដូចខាងក្រោម៖

1- រៀបចំធ្វើបច្ចុប្បន្នភាព និងសិក្សារៀបចំបន្ថែមនូវបទប្បញ្ញត្តិស្ដីពីពន្ធដារសម្រាប់គំាទ្រ ដល់ការអនុវត្តអនុក្រឹត្យនៃការលើកទឹកចិត្តសហគ្រាសធុនតូច និងមធ្យម ក្នុងវិស័យអាទិភាពដើម្បីធានានូវប្រសិទ្ធភាពនៃការលើកទឹកចិត្តផ្នែកពន្ធដារ ជំរុញកំណើនសកម្មភាពសេដ្ឋកិច្ច ពង្រឹង និងជំរុញការ កាន់បញ្ជិកាគណនេយ្យព្រមទាំងបន្តផ្សព្វផ្សាយឱ្យបានជ្រួតជ្រាបដល់មន្ត្រីពន្ធដារ និងអ្នកជាប់ពន្ធ។

2-បន្តតាមដានវឌ្ឍនភាព និងអនុវត្តវិធានការដែលបានដាក់ចេញដោយរាជរដ្ឋាភិបាលកម្ពុជា ក្នុងវេទិការាជរដ្ឋាភិបាល-ផ្នែកឯកជនលើកទី18 កាលពីថ្ងៃទី29 ខែមីនា ឆ្នាំ2019 ដោយរៀបចំវិធានការ និងនីតិវិធីលម្អិតដើម្បីអនុវត្ត តាមដានវឌ្ឍនភាព និងវាយតម្លៃប្រសិទ្ធភាពនៃការអនុវត្ត និងរៀបចំស្នើនូវវិធានការបន្ថែមក្នុងករណីចាំបាច់ ដើម្បីដោះស្រាយនូវបញ្ហាប្រឈម និងកែលម្អចន្លោះខ្វះខាតក្នុងការអនុវត្ត។

3-ពិនិត្យ និងសិក្សាលើការលើកទឹកចិត្តផ្នែកពន្ធដារក្នុងការជំរុញ និងទាក់ទាញការវិនិយោគនៅកម្ពុជាដើម្បីជាធាតុចូលលើសេចក្តីព្រាងច្បាប់វិនិយោគថ្មី។

4-សម្រាប់ទិដ្ឋភាពការងារ និងកិច្ចសហប្រតិបត្តិការនានា៖ 1-ជំរុញ និងបង្កើនប្រសិទ្ធភាពនៃការផ្លាស់ប្តូរព័ត៌មានក្នុងចំណោមអង្គភាព ឬស្ថាប័នរដ្ឋពាក់ព័ន្ធ។ 2-បន្តយកចិត្តទុកដាក់ការចរចាកិច្ចព្រមព្រៀងនៃការចៀសវាងការយកពន្ធត្រួតគ្នា។ 3-ពិនិត្យ និងពង្រឹងការគ្រប់គ្រង ប្រមូលពន្ធលើវិស័យអចលនទ្រព្យ។ 4-ពង្រឹងការផ្តល់សេវាជូនអ្នកជាប់ពន្ធ ដោយកាត់បន្ថយឱ្យបានជាអតិបរមានូវបញ្ហាកកស្ទះ និងអសកម្មនានា និង5- ជំរុញការប្រមូលចំណូលពន្ធ ដែលគ្រប់គ្រងដោយអគ្គនាយក ដ្ឋានពន្ធដារ លើរាល់សហគ្រាស និងអាជីវកម្ម ដែលជ្រកក្រោមស្លាកយីហោកាស៊ីណូ ដែលមិនបានមកបំពេញកាតព្វកិច្ចចុះបញ្ជីពន្ធដារ និងមិនបានបង់ពន្ធស្របតាមច្បាប់កំណត់។

អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រីបានផ្តាំផ្ញើបន្ថែមដល់ថ្នាក់ដឹកនាំ និង មន្ត្រីពន្ធដារគ្រប់លំដាប់ត្រូវប្រកាន់ខ្ជាប់នូវបាវចនា-គោលការណ៍រួម ក្នុងការបំពេញការងារក្នុងនោះ៖1- កៀរគរប្រមូលឱ្យអ្នកជាប់ពន្ធ ចូលក្នុងប្រព័ន្ធរួមមួយ។ 2-ធ្វើឱ្យអ្នកជាប់ពន្ធងាយស្រួលក្នុងការបង់ពន្ធ។ 3-រៀបចំប្រព័ន្ធការងារឱ្យលំបាក សម្រាប់ការគេចវេះពន្ធ និង4-ធានាឱ្យបាននូវការប្រកួត ប្រជែងដោយស្មើភាព មានសមធម៌ក្នុងការបង់ពន្ធ និងយុត្តិធម៌សង្គម៕

July 25, 2019

ធនាគារ អេស៊ីលីដា ភីអិលស៊ី ចាប់ដៃគូជាមួយយូញៀន ផេ ពង្រីកសេវាទូទាត់កាន់តែទូលំទូលាយ

ធនាគារ អេស៊ីលីដា ភីអិលស៊ី បានប្រកាសជាផ្លូវការក្នុងការចាប់ដៃគូជាមួយក្រុមហ៊ុនយូញៀនផេ(UnionPay International) ក្នុងការសហការបោះពុម្ពបណ្ណឥណពន្ធអេស៊ីលីដាយូញៀនផេ (Contactless Debit Card) ដើម្បីពង្រីកបណ្តាញប្រតិបត្តិការទូទាត់សម្រាប់អតិថិជនឱ្យកាន់តែទូលំទូលាយលើពិភពលោក។

តាមរយៈកិច្ចសហការរវាងក្រុមហ៊ុន យូញៀនផេ និងធនាគារអេស៊ីលីដានេះ នឹងធ្វើឱ្យមានការពង្រីកនូវផលិតផល និងសេវាកម្មទូទាត់សម្រាប់អតិថិជន ដើម្បីឱ្យមានជម្រើសកាន់តែច្រើន ប្រកបដោយភាពងាយស្រួល សុវត្ថិភាព ការទូទាត់ប្រកបដោយសក្តានុពល ជំរុញឱ្យមានអត្ថប្រយោជន៍កាន់តែច្រើន និងកាន់តែមានភាពផ្តាច់មុខលើការទិញទំនិញ និងការធ្វើដំណើរជាអន្តរជាតិ។

លោកបណ្ឌិត អុិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី បានលើកឡើងថា ការប្រកាសកិច្ចសហប្រតិបត្តិការនៅថ្ងៃនេះ គឺដើម្បីបម្រើអតិថិជនរួម មានន័យថាអាចជួយដល់អតិថិជនរបស់អេស៊ីលីដាផង និងអតិថិជនរបស់យូញៀនផេផង សម្រាប់ទូទាត់ជាអន្តរជាតិផង និងនៅក្នុងទីផ្សារកម្ពុជាផង។ លោកបណ្ឌិតបានបញ្ជាក់ផងដែរថា ទាំងពាណិជ្ជករ និងអតិថិជន ទូទៅ បច្ចុប្បន្ននេះមិនថាការទៅក្រៅប្រទេសដើម្បីធ្វើវិស្សមកាលឬធ្វើជំនួញនោះទេ គាត់ត្រូវការប័ណ្ណដែលមានវិសាលភាពធំទូលាយសម្រាប់ធ្វើការទូទាត់ ហេតុនេះបើគិតដល់ប័ណ្ណដែលមានវិសាលភាពធំទូលាយ យូញៀនផេជាជម្រើសល្អបំផុត ព្រោះស្ថាប័ននេះមានវិសាលភាពធំជាងគេ។ងាកមកកម្ពុជាវិញ ស្ថាប័នដែលធំជាងគេ គឺអេស៊ីលីដាហេតុនេះស្ថាប័នធំៗទាំង 2 នេះបានចាប់ដៃគ្នាជាដៃគូយុទ្ធសាស្ត្រនឹងធ្វើឱ្យអតិថិជនកាន់តែមានភាពងាយស្រួល និងប្រសើរឡើង។

លោកបណ្ឌិត អុិន ចាន់នី បានមានប្រសាសន៍ថា៖ “នេះជាជំហានវិជ្ជមានថ្មីមួយទៀតដែលពីមុនមក អេស៊ីលីដាធ្លាប់បានដាក់ឱ្យប្រើប្រាស់ត្រឹមតែការទូទាត់ធម្មតា តែបច្ចុប្បន្ននេះយើងបានបោះពុម្ពប័ណ្ណសម្រាប់ប្រើប្រាស់ជាផ្លូវការ ដែលប័ណ្ណនេះមានលក្ខណៈពិសេស គឺមិនបាច់ស៊កបញ្ចូលទៅក្នុងម៉ាស៊ីនឆូតកាតដែលនាំឱ្យចំណាយពេលវេលាយូរនោះទេ វាជាប្រភេទប័ណ្ណម្យ៉ាងដែលគេហៅថា Contact less Card ដែលអាចទូទាត់ដោយគ្រាន់តែដាក់ពីលើម៉ាស៊ីនឆូតកាត ចំណាយពេលខ្លី និងមានសុវត្ថិភាពខ្ពស់”។

លោកប្រធាននាយកប្រតិបត្តិបានបន្តទៀតថា យើងតាំងចិត្តថា ស្តាប់អតិថិជនរបស់យើង ហើយងាកមកគិតបន្ថែមដើម្បីធ្វើយ៉ាងណាឆ្លើយតបទៅគាត់វិញឱ្យបានល្អ។ សព្វថ្ងៃនេះអតិថិជនរបស់យើងបានបង្ហាញថា ការប្រើប្រាស់សេវាកម្មនៅតាមបញ្ជរ បើទោះបីជាចំណាយពេលត្រឹមតែ2 ឬ 3នាទី ក៏រាប់ថាយូរដែរ ហើយការប្រើប្រាស់នៅម៉ាស៊ីនអេធីអឹមក៏រាប់ថាចំណាយពេលវេលាច្រើនដែរ ដោយក្នុងនោះមានតែការប្រើប្រាស់តាមសេវាកម្មអេស៊ីលីដាទាន់ចិត្តប៉ុណ្ណោះ ទើបមានភាពឆាប់រហ័ស និងប្រសិនបើអតិថិជនទៅក្រៅប្រទេស គាត់ចាំបាច់ត្រូវតែប្រើប្រាស់ប័ណ្ណនេះ។ ហេតុនេះហើយទើបយើងស្តាប់អតិថិជន ហើយអភិវឌ្ឍបច្ចេកវិទ្យារបស់យើង ដោយការចាប់ដៃគ្នាធ្វើឱ្យកាន់តែប្រសើរឡើងជាមួយយូញៀនផេនៅថ្ងៃនេះ។

លោក Yang Wennhui នាយកគ្រប់គ្រងទូទៅនៃក្រុមហ៊ុន យូញៀនផេ ប្រចាំនៅអាស៊ីអាគ្នេយ៍ បានលើកឡើងថា នៅក្នុងប្រទេសកម្ពុជា កាត យូញៀនផេ ត្រូវបានគេប្រើប្រាស់ជាង80ភាគរយនៃម៉ាស៊ីនអេធីអឹម និង90ភាគរយនៃម៉ាស៊ីនឆូតកាតនៅទូទាំងប្រទេស។ ការចូលទីផ្សារបានបន្តពង្រីក ហើយអតិថិជនកាន់តែច្រើនកំពុងប្រើប្រាស់ ដែលជាកាតជម្រើសដែលបង្ហាញថា យូញៀនផេ ជាវិធីទូទាត់ដ៏មានសារៈសំខាន់ចំពោះប្រជាជនកម្ពុជា។ យូញៀនផេ មានដៃគូជាមួយស្ថាប័នប្រមាណជាង 2,000នៅលើពិភពលោក ហើយបានដាក់ឱ្យប្រើប្រាស់នៅជាង 174ប្រទេស ដែលមានចេញកាតរហូតដល់ទៅ 7.5ពាន់លានកាត។

យូញៀនផេ ចាត់ទុកធនាគារអេស៊ីលីដាជាដៃគូប្រកបដោយគុណតម្លៃ និងជាដៃគូដ៏សំខាន់ក្នុងការអភិវឌ្ឍអាជីវកម្មនៅកម្ពុជា។ យើងនឹងបង្កើនកិច្ចសហការកាន់តែប្រសើរដើម្បីជំរុញឱ្យការបម្រើអតិថិជនកាន់តែមានភាពសម្បូរបែប និងបន្តបង្កើនភាពរឹងមាំនៅក្នុងទីផ្សារកម្ពុជា៕

July 25, 2019

កម្ពុជា ស្ថិតនៅក្នុងពូល A ពានរង្វាន់ AFF Futsal Championship

កាលពីឆ្នាំមុន ក្រុមបាល់ទាត់ហ្វ៊ុតសាលជម្រើសជាតិកម្ពុជា បានចូលរួមប្រកួតជាលក្ខណៈអន្តរជាតិលើកដំបូងក្នុងពានរង្វាន់ AFF Futsal Championship ដោយបានប្រកួតមិនដែលឈ្នះសោះឡើយក្នុងពូល ពោលគឺចាញ់រហូត និងមិនបានស៊ុតបញ្ចូលទីក្រុមគូប្រកួតបានសោះឡើយសូម្បីតែ 1គ្រាប់។
ចំពោះការប្រកួត AFF Futsal Championship ឆ្នាំ2019 នេះវិញ នឹងត្រូវធ្វើឡើងរយៈពេល1សប្តាហ៍ ចាប់ពីថ្ងៃទី21 ដល់ថ្ងៃទី27 ខែតុលា ឆ្នាំ2019 នៅក្នុងទីក្រុងហាណូយ ប្រទេសវៀតណាមជាម្ចាស់ផ្ទះ ហើយកម្មវិធីការប្រកួតត្រូវបានចែកចេញជា 2ពូល ដែលក្នុង 1ពូលមានចំនួន 4ប្រទេស។

ដោយឡែកឆ្នាំនេះ តាមលទ្ធផលនៃការចាប់ឆ្នោត កម្ពុជាបានស្ថិតនៅក្នុងពូល A រួមជាមួយក្រុមជើងឯក 14សម័យកាលថៃ មីយ៉ាន់ម៉ា និងទីម័រខាងកើត៕

July 24, 2019

Keith Thurman ទទួលស្គាល់លទ្ធផលចាញ់ Pacquiao តែសុំសងសឹក

កាលពីពេលថ្មីៗនេះ កីឡាករ Keith Thurman បានបង្ហាញខ្លួនក្នុងសន្និសីទកាសែតមួយ និយាយអំពីការប្រកួតរបស់ខ្លួនជាមួយនឹងកីឡាករស្តេចប្រដាល់ហ្វីលីពីន Manny Pacquiao ថា ខ្លួនពិតជាចង់សងសឹកខ្លាំងណាស់ប្រសិនបើមានឱកាស ច្បាស់ណាស់គេនឹងសងសឹក និងយកឈ្នះឱ្យបាន។Thurman បានសរសើរវីរបុរសរបស់ហ្វីលីពីនថា ជាអ្នកប្រដាល់ដែលវាយចេញមិនចេះខ្ជិល ហើយគេក៏ពេញចិត្តចំពោះការកាត់សេចក្ដីនេះដោយមិនតវ៉ាអ្វីដែរ។ ជាពិសេសកីឡាករដែលទើបតែចាញ់ជាលើកដំបូងក្នុងអាជីពរបស់ខ្លួននេះក៏បានអរគុណ Pacquiao ដែលបានផ្ដល់មេរៀននេះដល់គេ។គួររំឭកផងដែរថា កីឡាករ Manny Pacquiao បានយកឈ្នះកីឡាករ Keith Thurman កាលពីថ្ងៃអាទិត្យកន្លងទៅបន្ទាប់ពីបានប្តូរកណ្តាប់ដៃគ្នាទៅវិញទៅមករហូត 12ទឹកពេញដោយពិន្ទុមិនឯកច្ឆន្ទ៕

July 24, 2019

ASEAN School Games នៅឥណ្ឌូនេស៊ីឆ្នាំនេះ កម្ពុជាស្ថិតនៅបាតតារាងគ្មានមេដាយមួយពាក់នឹងគេ…

ការប្រកួតកីឡាសិស្សអាស៊ីអាគ្នេយ៍ (11th ASEAN School Games 2019) លើកទី11 នៅប្រទេសឥណ្ឌូនេស៊ីសម្រាប់កម្ពុជា គិតត្រឹមថ្ងៃទី22 ខែកក្កដា គឺបានបញ្ចប់ការប្រកួតហើយ។
កម្ពុជាបានបញ្ជូន 5ប្រភេទកីឡារួមមានកីឡាហែលទឹក កីឡាអត្តពលកម្ម កីឡាវាយសី កីឡាវាយកូនឃ្លីលើតុ និងកីឡាវាយកូនបាល់ទៅចូលរួមប្រកួតដែលមានប្រតិភូសរុប 56នាក់។បើតាមការឲ្យដឹងពីលោក ព្រំ ប៊ុណ្ណយី ដែលជានាយបេសកកម្មរបស់កម្ពុជាសម្រាប់ព្រឹត្តិការណ៍នេះកីឡាករ-កីឡាការិនីត្រូវមានអាយុក្រោម 18ឆ្នាំគិតត្រឹមថ្ងៃប្រកួត។ នេះជាការប្រកួតលើកទី11 តែសម្រាប់កម្ពុជាទើបតែចូលរួមបាន 4លើកទាំងលើកនេះប៉ុណ្ណោះ ហើយជាលទ្ធផល ឆ្នាំនេះកម្ពុជាមិនបានទទួលមេដាយឡើយពីកម្មវិធីនេះ និងបានឈរនៅចំណាត់ថ្នាក់ចុងក្រោយគេទៀតផង៕

July 24, 2019

រឿងត្រូវប្រយ័ត្ន 5យ៉ាង ពេលនាំកូន ដើរក្នុងហាង ឬ ផ្សាទំនើប

តាមរយ:ឧប្បត្តិហេតុជាច្រើនដងដែលតែងតែកើតឡើងនៅក្នុងហាង ផ្សារទំនើបធំៗ និងភាគច្រើនច្រើនកើតឡើងចំពោះកុមារតូចៗ ដោយសារតែស្ថិតក្នុងវ័យដ៏សែនរពឹស និងឪពុកម្តាយមិនបានប្រុងប្រយ័ត្នផងនោះ ទើបធ្វើឱ្យកើតឧប្បត្តិហេតុដែលមិននឹកស្មានដល់ឡើងបាន។ ដូច្នេះការបង្ហាត់ ឬប្រាប់កូនឱ្យចេះប្រុងប្រយ័ត្នជាមុននោះ គឺជាវិធីការពារបញ្ហាជាមុនដ៏ល្អបំផុតមួយ។ នៅក្នុងទស្សនាវដ្តី ឡារ៉ែន លេខនេះ យើងនាំគ្នាមកមើលថា នៅពេលដែលចង់នាំកូនៗទៅលេងផ្សារទំនើបតើមានរឿងអ្វីខ្លះដែលលោកឪពុកអ្នកម្តាយត្រូវប្រយ័ត្ន?

1. ជណ្តើរយន្ត
ត្រូវធ្វើ
-ចាប់កាន់ដៃកូនតូចជាប់ជានិច្ច ខណ:ពេលឡើងជណ្តើរយន្ត។ ឱ្យកូនឈរបែរមុខទៅរកទិសស្របគ្នានឹងការរំកិល(ឡើង ឬចុះ)របស់ជណ្តើរ។
-ពិនិត្យមើលភាពរៀបរយរបស់សម្លៀកបំពាក់កូន ដូចជា ជាយអាវ ជើងខោ ឬជាយសំពត់ ខ្សែចងស្បែកជើង -ល- ថាតើមានផ្នែកណាមួយត្រូវកៀបជាប់នៅក្នុងធ្មេញរបស់កាំជណ្តើរយន្តឬអត់?
-នៅពេលកើតហេតុបន្ទាន់ ដូចជាជណ្តើរយន្តកំពុងកៀបកូន ឬទាញជាយខោអាវ ឬខ្សែស្បែកជើងកូនចូលទៅនោះ ចូរចុចកុងតាក់បញ្ឈប់ជណ្តើរយន្តជាបន្ទាន់(នៅជាប់នឹងបង្កាន់ដៃនៃកាំទី1)ភ្លាម។ បើស្ថិតនៅឆ្ងាយមិនអាចចុចដោយខ្លួនឯងបាន ត្រូវប្រញាប់ប្រាប់បុគ្គលិករបស់ហាងឬអ្នកឡើងជណ្តើយន្តជាមួយគ្នា ឱ្យគេជួយចុចឱ្យក៏បាន។

មិនត្រូវធ្វើ
-កុំឱ្យកូនអង្គុយ ឬលេង ខណ:ពេលកំពុងឡើងជណ្តើរយន្ត (សូម្បីតែការឈរបែរខ្នងដាក់ជណ្តើរក៏មិនគួរធ្វើដែរ) ព្រោះវាអាចប្រថុយនឹងការត្រូវកៀបដៃ ឬជើងបានយ៉ាងងាយ។
-ចៀសវាងការយករទេះកូនក្មេងឡើងតាមជណ្តើរយន្ត តែត្រូវឡើងតាមជណ្តើរយន្តប្រអប់ជំនួសវិញ ព្រោះវាអាចនឹងកើតឧប្បត្តិហេតុ ដូចជារទេះរុញកូនអាចនឹងរបូតពីដៃ រអិលធ្លាក់ទៅក្រោម នាំឱ្យកើតមានគ្រោះថ្នាក់ដល់កូនបាន។

2. ជណ្តើរយន្តប្រអប់
ត្រូវធ្វើ
-ការរង់ចាំឡើងជណ្តើរយន្តប្រអប់យ៉ាងមានសុជីវធម៌ និងមានសុវត្ថិភាពនោះគឺ ឈរតម្រង់ជួរគ្នាមុខក្រោយ។ បើមានមនុស្សរង់ចាំច្រើនពេក អាណាព្យាបាលដែលមានកូនតូចគួររង់ចាំឡើង ឬចុះលើកក្រោយ(បន្ទាប់ទៀត)ក៏បាន ព្រោះការចូលទៅប្រជ្រៀតគ្នាណែននៅក្នុងប្រអប់ជណ្តើរយន្តនោះ អាចធ្វើឱ្យជណ្តើរយន្តគាំងនៅមួយកន្លែង ឬអាចបង្កជាហេតុគ្រោះថ្នាក់អ្វីផ្សេងៗបាន។
-អ្នកម្តាយត្រូវចាំសង្កេតមើល និងប្រាប់កូនកុំឱ្យឈរផ្អែកទ្វារប្រអប់ជណ្តើរយន្ត។
-នៅពេលកើតហេតុរអាក់រអួលផ្សេងៗ ដូចជា ជណ្តើរយន្តប្រអប់គាំងនៅមួយកន្លែងជាដើមលោកឪពុកអ្នកម្តាយត្រូវតាំងស្មារតី ពិនិត្យមើលផ្ទាំងសញ្ញាបញ្ជា(នៅជិតមាត់ទ្វារជណ្តើរយន្ត)ដែលតែងមានកុងតាក់មួយដែលសរសេរថា Emergency Call ចូរចុចកុងតាក់មួយនោះ ដើម្បីប្រាប់ទៅបុគ្គលិករបស់ហាងឱ្យដឹង និងជាការសុំជំនួយ។

មិនត្រូវធ្វើ
-មិនត្រូវបណ្ដោយឱ្យកូនតូចហក់លោត រត់លេងប្រឡែងគ្នានៅក្នុងប្រអប់ជណ្តើរយន្ត ឬចុចកុងតាក់ឡើងចុះលេងនោះទេ ព្រោះអាចបណ្ដាលឱ្យជណ្តើរយន្តមានបញ្ហា និងអាចគាំងដំណើរការ។
-ខណ:ពេលរង់ចាំ មិនគួរនាំកូនតូចទៅឈរនៅជិតមាត់ទ្វារពេកទេ ព្រោះអាចនឹងត្រូវបុកដោយអ្នកដែលនៅខាងក្នុងពេលដែលទ្វារជណ្តើរយន្តបើកឡើង ដែលនឹងធ្វើឱ្យដួល និងទទួលគ្រោះថ្នាក់បាន។-រឿងដែលត្រូវដឹង និងចាំទុកនោះគឺ ពេលមានទឹកលិច ផ្លេកបន្ទោរ រន្ទះ រញ្ជួយផែនដី និងអគ្គិភ័យ មិនត្រូវប្រើជណ្តើរយន្តប្រអប់ជាដាច់ខាត។

3. ទ្វារ និងកម្រាលឥដ្ឋ
ត្រូវធ្វើ
-ពេលដើរចេញ ឬចូលតាមមាត់ទ្វារ ត្រូវឱ្យកូននៅចំកណ្តាលមាត់ទ្វារ ដោយមានលោកឪពុក ឬអ្នកម្តាយនៅក្បែរចាប់ដៃកូន ឬលើកកូនពក៏បានដែរ។
-ពេលដើរនៅក្នុងហាង នៅក្នុងទីកន្លែងដែលស្រឡះៗក៏មិនអាចធ្វេសប្រហែសបានដែរ ព្រោះអាចនឹងមានវត្ថុដែលដាក់ពាំងពីមុខដែលយើងមិនបានមើលឃើញ ឬក៏មានទឹកដក់នៅលើកម្រាលឥដ្ឋជាដើម ដែលអាចធ្វើឱ្យកូនដើរបុក ឬរអិលដួលបាន។

មិនត្រូវធ្វើ
-មិនថាកន្លែងណាក៏ដោយនៅក្នុងហាង សូមកុំបណ្តោយឱ្យកូនរត់លេងស្រេចតែចិត្តតែម្នាក់ឯងឱ្យសោះ ជាពិសេសនៅមុខមាត់ទ្វារចេញចូល ព្រោះបើសិនជាទ្វារដែលបើកបិទដោយស្វ័យប្រវត្តិផងនោះ អាចនឹងធ្វើឱ្យកូនត្រូវទ្វារកៀបបាន។

4. ទូថ្នាក់ៗដាក់ទំនិញ
ត្រូវធ្វើ
-ក្នុងពេលដែលអ្នកម្តាយកំពុងដើររើសទិញទំនិញនៅក្នុងផ្សារទំនើប បើមានមនុស្សធំទៅជាមួយដែរ អ្នកម្ដាយអាចឱ្យអ្នកមកជាមួយនោះនាំក្មេងៗទៅលេងនៅកន្លែងរង់ចាំ ឬក្នុងភោជនីយដ្ឋានណាមួយ រង់ចាំឱ្យអ្នកម្តាយទិញឥវ៉ាន់រួចសិន សឹមជួបគ្នាវិញ។ តែបើសិនគ្មានអ្នកជួយមើលទេនោះ គួរឱ្យកូនតូចអង្គុយនៅក្នុងរទេះសម្រាប់កូនក្មេង ឬរទេះដើរទិញឥវ៉ាន់ទៅជាមួយគ្នាក៏បានដែរ។

មិនត្រូវធ្វើ
-មិនគួរនាំកូនដើរនៅកន្លែងដែលមានការសម្តែងអ្វីម្យ៉ាង កន្លែងដាក់តាំង ឬកន្លែងដាក់លក់ទំនិញ ឬផលិតផលណាដែលងាយបែកបាក់ឡើយ ជាពិសេសគ្រឿងកែវចាន។-ចូរប្រយ័ត្នកន្លែងណាដែលមានទូថ្នាក់ៗដាក់ទំនិញច្រើនជ្រុលពេក និងខ្ពស់ៗ ដោយមិនត្រូវឱ្យកូនដើរទៅជិតទីនោះឡើយ។

5. រទេះដាក់ឥវ៉ាន់
-ការប្រើប្រាស់រទេះដាក់ឥវ៉ាន់ គឺជួយសម្រាលបន្ទុកក្នុងការយួរ ឬកាន់របស់របរផ្សេងៗងាយស្រួលក្នុងការដើររើសទិញទំនិញ តែជាញឹកញាប់ណាស់ដែលយើងសង្កេតឃើញថា រទេះដាក់ឥវ៉ាន់ បានក្លាយជារទេះដឹកកូនក្មេងតូចៗ ដូច្នេះអ្វីដែលត្រូវប្រយ័ត្នឱ្យបានខ្លាំងបំផុតនោះគឺ ការប្រយឹតប្រតោងលេង លោតឡើងចុះ និងក្រោកឈរដើម្បីស្រវាចាប់យកឥវ៉ាន់ ឬរបស់របរផ្សេងៗរបស់កូនៗ ព្រោះវាអាចធ្វើឱ្យកើតឧប្បត្តិហេតុបានយ៉ាងងាយ។
ដូច្នេះ គោលការណ៍ងាយៗដែលគួរប្រត្តិបត្តិនោះគឺ កុំឱ្យកូនរបូតផុតពីខ្សែភ្នែកយើងឱ្យសោះ ព្រោះត្រឹមតែប៉ុន្មាននាទីប៉ុណ្ណោះ ឧប្បត្តិហេតុអាចនឹងកើតឡើងបានជានិច្ច។ ពេលនាំកូនៗទៅលេងហាង ឬផ្សារទំនើប លោកឪពុកអ្នកម្តាយត្រូវតែធ្វើជាអ្នកសង្កេតការណ៍ ភ្នែករហ័ស ត្រចៀករហ័ស ដឹងជាមុន ប្រយ័ត្នជាមុន ដើម្បីសុវត្ថិភាពរបស់កូនជាទីស្រឡាញ់៕

July 24, 2019

Author: ធឿន មករា