ធឿន មករា - La Reine Media

កាល់ស្យូមគឺជាអ្វី ហេតុអ្វីបានសំខាន់សម្រាប់កូនតូច?

កុមារនៅក្នុងអាយុ 1 – 3 ឆ្នាំ គឺជាវ័យមួយដែលមានការប្រែប្រួល និងការវិវឌ្ឍខាងរាងកាយខ្លាំងណាស់ អ្វីដែលយើងច្រើនសង្កេតឃើញបានយ៉ាងច្បាស់នោះគឺ ការវិវឌ្ឍខាងផ្នែកការធ្វើចលនា តាំងពីការវារ ឈរ ដើរ រហូតទៅដល់អាចរត់បានយ៉ាងស្ទាត់ជំនាញ ហើយនិងការប្រែប្រួលខាងការញ៉ាំ ដែលការវិវឌ្ឍខាងការទំពាលេប ក៏ជាអ្វីមួយដែលកូនតូចត្រូវធ្វើជាប្រចាំក្នុងមួយថ្ងៃៗដែរ។ គ្រោងសាងរាងកាយដែលមានចំណែកសំខាន់ក្នុងការបង្កើនដល់ការធ្វើចលនា និងការទំពាលេបរបស់កូនឱ្យធ្វើការបានយ៉ាងមានប្រសិទ្ធភាពនោះគឺ អវយវៈដែលមានឈ្មោះថា “ឆ្អឹង” និង “ធ្មេញ” ដូច្នេះដើម្បីជួយឱ្យកូនតូចមានគ្រោងសាងរបស់ឆ្អឹង និងធ្មេញដែលរឹងមាំនោះ ទើបសារជាតិអាហារចាំបាច់ដូចជា “កាល់ស្យូម” មានតួនាទីយ៉ាងសំខាន់ចំពោះរាងកាយកូនតូចខ្លាំងសម្បើមណាស់។

“កាល់ស្យូម” គឺជាសារជាតិអាហារប្រភេទអំបិលរ៉ែមួយប្រភេទដែលមាននៅក្នុងរាងកាយច្រើនបំផុត ជាពិសេសឆ្អឹង និងធ្មេញ អាចនិយាយបានថា ជាកន្លែងប្រមូលសន្សំជាតិកាល់ស្យូមដែលធំជាងគេបំផុតនៅក្នុងរាងកាយ។ មុខនាទីសំខាន់របស់កាល់ស្យូម គឺនាំយកមកប្រើប្រាស់ក្នុងការសាង និងជួសជុលចំណែកដែលសឹករេចរឹលរបស់ឆ្អឹង និងធ្មេញ ក្រចកដៃ-ជើង និងសរសៃសក់ឱ្យរឹងមាំ ក្រៅពីនេះនៅមានចំណែកជួយគ្រប់គ្រងការធ្វើការងាររបស់សាច់ដុំ ប្រព័ន្ធប្រសាទ ការបង្កកខ្លួនរបស់ឈាម ចង្វាក់របស់បេះដូង ការធ្វើការងាររបស់ប្រព័ន្ធទឹករំលាយអាហារ ការបឺតជញ្ជក់យកវីតាមីន និងជំរុញការបញ្ចេញរបស់អ័រម៉ូន។

តើនឹងទៅជាយ៉ាងណា… នៅពេលកូនតូចខ្វះជាតិកាល់ស្យូម?
កុមារដែលទទួលបានជាតិកាល់ស្យូមមិនគ្រប់គ្រាន់តាមតម្រូវការរបស់រាងកាយ នឹងមានផលប៉ះពាល់ដល់ភាពរឹងក្រាស់របស់ឆ្អឹងទាំងមូល ធ្វើឱ្យកើតជំងឺទន់ឆ្អឹង ឬឆ្អឹងកោង-ង ហើយការវិវឌ្ឍខាងផ្នែករាងកាយ ដូចជាការអង្គុយ វារ ដើរ នឹងដំណើរទៅមុខយ៉ាងយឺត។ ក្រៅពីនេះ គ្រោងសាងឆ្អឹងដែលទន់ខ្សោយ នឹងបង្កឱ្យកើតភាពខុសប្រក្រតីរបស់រាងកាយបាន ដូចជា ក្លាយជាកុមារជើងកោង-ង និងខ្លួនទាបតឿខុសប្រក្រតីជាដើម។

កាល់ស្យូមនៅឯណា… តើរកញ៉ាំបានពីអាហារអ្វី?
* ទឹកដោះ និងផលិតផលដែលធ្វើអំពីទឹកដោះ ដូចជា ឈីស ប៊័ររឹង ប៊័រស្រស់ យ៉ាអួ អៃស្គ្រីម-ល- ព្រោះទឹកដោះស្រស់ គឺជាប្រភពអាហារដ៏កំពូលដែលមានជាតិកាល់ស្យូមច្រើនបំផុត ទើបចាំបាច់ខ្លាំងណាស់ដែលកុមារត្រូវតែញ៉ាំទឹកដោះគោស្រស់ឱ្យបានយ៉ាងហោចណាស់ 1ថ្ងៃ 2កែវ។* គ្រាប់ធញ្ញជាតិ ដូចជាគ្រាប់សណ្តែកស្ងួត និងផលិតផលដែលធ្វើពីគ្រាប់សណ្តែក ដូចជា តៅហ៊ូ ទឹកសណ្តែកលឿង(សណ្តែកសៀង គ្រាប់ល្ងស-ខ្មៅ គ្រាប់សណ្តែកក្រហម-ខៀវ គ្រាប់អាល់ម៉ុន គ្រាប់ឈូក និងគ្រាប់ផ្កាឈូករ័ត្នជាដើម។* សាច់សត្វដែលញ៉ាំទាំងមូល ឬទាំងឆ្អឹងដូចជា ត្រីតូចៗ កម្ពឹស បង្គា បង្គាក្រៀម ត្រីខកំប៉ុង។ល។
* បន្លែស្លឹកបៃតង ដូចជាខាត់ណា ស្ពៃចង្កឹះ ប្រូខូលី ស្លឹកបាស ផ្លែពពាយ សណ្តែកហោឡាន់-តាវ ត្រប់ពុតលំញង។ល។

នៅពេលបានដឹងបែបនេះហើយ សមាជិកនៅក្នុងគ្រួសារទាំងអស់សូមកុំភ្លេចបន្ថែមជាតិកាល់ស្យូមឱ្យបានគ្រប់គ្រាន់តាមតម្រូវការរបស់រាងកាយឱ្យបានជាប់ជានិច្ច ព្រោះមិនថាស្ថិតក្នុងវ័យណាក៏ដោយ ក៏កាល់ស្យូមនៅតែជាសារជាតិរ៉ែដ៏សំខាន់មួយដែលទាំងកុមារ និងមនុស្សចាស់នៅតែចាំបាច់ត្រូវតែទទួលបានជារៀងរាល់ថ្ងៃ៕

October 26, 2019

ធនាគារពិភពលោកបង្ហាញពីទស្សនវិស័យបច្ចុប្បន្នភាពសេដ្ឋកិច្ចកម្ពុជា

ធនាគារពិភពលោកបានបង្ហាញពីបច្ចុប្បន្នភាពសេដ្ឋកិច្ចចុងក្រោយរបស់ខ្លួនដែលមានចំណងជើងថា “ការកើនឡើងនៃអាកាសធាតុ និងបញ្ហាប្រឈមក្នុងតំបន់ និងពិភពលោក” ដែលនឹងធ្វើឱ្យប៉ះពាល់ដល់កំណើនសេដ្ឋកិច្ចរបស់ប្រទេសកម្ពុជា។

ធនាគារពិភពលោក(World Bank)បានចេញផ្សាយរបាយការណ៍មួយកាលពីថ្ងៃទី10 ខែតុលាកន្លងទៅ ដោយបានព្យាករពីកំណើនសេដ្ឋកិច្ចកម្ពុជានៅឆ្នាំ2019 ថានៅតែបន្ដភាពរឹងមាំក្នុងអត្រា 7%។ របាយការណ៍បានកត់សម្គាល់ដែរថា វិស័យនាំចេញរបស់កម្ពុជានៅឆ្នាំ2019 នៅតែរឹងមាំ ខណៈវិស័យសំណង់នៅតែមានភាពមមាញឹកដដែល។

កំណើនផលិតផលក្នុងស្រុកសរុបពិតប្រាកដដូចដែលបានរាយការណ៍ដោយធនាគារពិភពលោកមានស្ថិរភាព 7% ក្នុងឆ្នាំ2016 និង2017 ដែលកើនឡើងដល់ 7.5% ក្នុងឆ្នាំ2018 ដែលជាឆ្នាំត្រូវបានពិពណ៌នាថា ជាករណីលើកលែង ដោយសេដ្ឋវិទូជាន់ខ្ពស់របស់ធនាគារពិភពលោកប្រចាំប្រទេសកម្ពុជា លោក លី សូដេត (Sodeth Ly) ដែលបានលើកឡើងពីការកើនឡើងនៃកម្រិតការវិនិយោគផ្ទាល់ពីបរទេស (foreign direct investment ឬ FDI) និងបង្កើនការនាំចេញទៅកាន់សហរដ្ឋអាមេរិកដែលជាកត្តាពាក់ព័ន្ធនឹងការកើនឡើងនេះ។

ទោះយ៉ាងណា ការប៉ាន់ប្រមាណរបស់ធនាគារពិភពលោកសម្រាប់ឆ្នាំ2019 បានមើលឃើញថា កំណើនផ.ស.សរបស់កម្ពុជាបានធ្លាក់ចុះដល់7% ដោយជាមួយគ្នានេះ World Bank ក៏បានព្យាករផងដែរអំពីសេដ្ឋកិច្ចកម្ពុជាថា នៅឆ្នាំ2020និ ងឆ្នាំ2021 នឹងមានកំណើន 6.8%។

អ្វីដែលសំខាន់ត្រូវចងចាំនៅពេលក្រឡេកមើលតួលេខទាំងនេះ គឺថា ការដកខ្លួនចេញពីសហភាពអឺរ៉ុបក្រោមគម្រោងអ្វីៗទាំងអស់លើកលែងតែអាវុធ(the EU’s Everything-but-arms ឬEBA) ឬប្រព័ន្ធអនុគ្រោះពន្ធទូទៅ (the Generalised System ofPreferences ឬ GSP) នៅសហរដ្ឋអាមេរិក ត្រូវបានគេលើកយកមកពិចារណា ដោយសារភាពមិនប្រាកដប្រជានៅពេលសរសេរឡើង។

ដោយបានបញ្ជាក់ថា ទាំងរូបលោក(លី សូដេត)និងធនាគារពិភពលោកមិនអាចធ្វើការប៉ាន់ស្មានអំពីជំហររបស់រដ្ឋាភិបាលបានទេ។ លោកបានបញ្ជាក់ថា រដ្ឋាភិបាលបានព្រមព្រៀងលើកញ្ចប់ថវិកាជំរុញសារពើពន្ធ 3%ភាគរយប្រសិនបើ EBA ត្រូវបានបាត់បង់ ទោះបីជាលោកបដិសេធមិន ធ្វើអត្ថាធិប្បាយអំពីកណ្តាប់ដៃណាដែលអាចជាកញ្ចប់ថវិកាក៏ដោយ។

ទោះជាមានព័ត៌មានដ៏គួរឱ្យស្រងាកចិត្តនេះក៏ដោយ ក៏សេដ្ឋកិច្ចរបស់ប្រទេសកម្ពុជានៅតែទទួលបានលទ្ធផលល្អជាងប្រទេសក្នុងតំបន់ និងពិភពលោកទាំងមូល។ កំណើនក្នុងតំបន់ត្រូវបានគេព្យាករថា នឹងធ្លាក់ចុះពី 6.3%ក្នុងឆ្នាំ2018 ដល់ 5.8%នៅឆ្នាំ2019 បន្ទាប់មកធ្លាក់ចុះបន្តទៀតដល់ 5.7% និង 5.6%នៅឆ្នាំ2020 និង2021 តាមលំដាប់។

កាលពីថ្ងៃអង្គារទី15 ខែតុលា ឆ្នាំ2019 សេដ្ឋកិច្ចពិភពលោកត្រូវបានស្ថាប័នមូលនិធិរូបិយវត្ថុអន្តរជាតិ ឬ IMF បានទម្លាក់ការព្យាករកំណើនសេដ្ឋកិច្ចសកលសម្រាប់ឆ្នាំ2019 មកនៅត្រឹម 3% នៅក្នុងរបាយការណ៍ “ទស្សនវិស័យសេដ្ឋកិច្ចពិភពលោក” (World Economic Outlook ឬWEO) ដែលទើបនឹងចេញផ្សាយ ពោលគឺធ្លាក់ចុះ 0.2% ពីការប៉ាន់ស្មានរបស់ខ្លួនកាលពីខែកក្កដា។

របាយការណ៍នេះក៏បានគូសបញ្ជាក់ផងដែរថា ការព្យាករកំណើនសេដ្ឋកិច្ចពិភពលោកត្រូវបានបន្ទាប ដោយសារតែកម្រិតនៃភាពមិនប្រាកដប្រជាបានកើនឡើង ជាពិសេសទាក់ទងនឹងសង្គ្រាមពាណិជ្ជកម្មរវាងប្រទេសចិន និងសហរដ្ឋអាមេរិកដែលស្ថិតនៅក្នុងស្ថានភាពសេដ្ឋកិច្ចចិនកំពុងធ្លាក់ចុះយ៉ាងខ្លាំងជាងការរំពឹងទុក។

សម្រាប់ប្រទេសកម្ពុជាដែលមាន 40%នៃការវិនិយោគផ្ទាល់ពីបរទេសមកពីប្រទេសចិន សេដ្ឋកិច្ចប្រទេសជិតខាងដែលកំពុងធ្លាក់ចុះនឹងជួបការលំបាកបំផុត ដែលអាចធ្វើឱ្យប្រទេសកម្ពុជាត្រូវបានគេចាប់អារម្មណ៍រវាងប្រទេសចិន និងអឺរ៉ុប។ របាយការណ៍ក៏បានបង្ហាញពីការកើនឡើងបំណុលដោយការបញ្ចូលគ្នារវាងធនាគារ និងមីក្រូហិរញ្ញវត្ថុដែលមានចំនួនជាង 100%នៃផលិតផលក្នុងស្រុកសរុប ឬផ.ស.ស របស់ប្រទេសកម្ពុជា។

ដោយមានក្តីសង្ឃឹមកម្រិតបំណុលបរទេសរបស់ប្រទេសកម្ពុជាបង្ហាញពីបំណុលសាធារណៈទៅនឹងផ.ស.ស កំពុងឈរនៅជុំវិញសញ្ញា 30%ដែលធនាគារពិភពលោកចាត់ទុកថា មាននិរន្តរភាព។

លើសពីនេះការបន្ធូរបន្ថយកំណើនផ.ស.ស ពី7% ទៅ6.8% គឺមិនមានភាពមុតស្រួចគ្រប់គ្រាន់ដែលត្រូវបានគេចាប់អារម្មណ៍ខ្លាំង ហើយឱកាសសម្រាប់សមាហរណកម្មក្នុងតំបន់កាន់តែមាននៅក្នុងទម្រង់នៃភាពជាដៃគូសេដ្ឋកិច្ចទូលំទូលាយក្នុងតំបន់ដែរ។

លោក Andrew Mason សេដ្ឋវិទូរបស់ធនាគារពិភពលោកប្រចាំតំបន់អាស៊ីបូព៌ា និងប៉ាស៊ីហ្វិកបានព្រមានថា យើងមានការភ្ញាក់ផ្អើលពីការធ្លាក់ចុះនៃបរិយាកាសហិរញ្ញវត្ថុពិភពលោក ប៉ុន្តែតាមរយៈវិធានការគោលនយោបាយសកម្ម និងការផ្តោតការយកចិត្តទុកដាក់កាន់តែខ្លាំងលើការវិនិយោគលើកកម្ពស់កំណើន ដូចជាហេដ្ឋារចនាសម្ព័ន្ធ តំបន់នឹងបង្ហាញភាពធន់។

លោក Mason មានប្រសាសន៍ថា៖“ដើម្បីភាពធន់ទ្រាំនេះ និងដើម្បីទប់ទល់នឹងហានិភ័យ ដែលកំពុងកើនឡើង យើងបានជំរុញឱ្យអ្នកដឹកនាំគ្រប់គ្រងបំណុលប្រកបដោយការទទួលខុសត្រូវកាត់បន្ថយហានិភ័យ និងទប់ទល់នឹងការគាំពារនិយម។

សម្រាប់សមត្ថភាពរបស់ប្រទេសកម្ពុជា និងប្រទេសជិតខាងរបស់ខ្លួន ដើម្បីទទួលបានជោគជ័យក្នុងបរិយាកាសសេដ្ឋកិច្ចពិភពលោក នឹងត្រូវពឹងផ្អែកលើការកែទម្រង់រចនាសម្ព័ន្ធដែលលើកកម្ពស់ការប្រកួតប្រជែង ជំរុញការបង្កើតថ្មី និងបង្កើតបរិយាកាសធុរកិច្ចដ៏ទាក់ទាញ”៕

October 25, 2019

សណ្តែកទ្រើង ឬសណ្តែកកួរ បន្លែធម្មជាតិរបស់សហគមន៍កសិកម្មខេត្តកំពង់ឆ្នាំងកំពុងត្រូវប៉ាន់ខ្លាំង

សណ្តែកទ្រើងជាបន្លែ 1ប្រភេទដែលកសិករកម្ពុជានិយមដាំ និងបរិភោគក្នុងជីវិតរស់នៅប្រចាំថ្ងៃដោយសារដំណាំសណ្តែកគួរអាចឆ្នៃជាបន្លែ អន្លក់ ហូបឆៅ ជ្រក់ និងឆា ស្លក៏បាន។ លើសពីនេះសណ្តែកកួរជាបន្លែដែលសម្បូរណ៍ទៅដោយជីវជាតិ និងសារធាតុចិញ្ចឹមជាច្រើនមុខ ដែលជួយទ្រទ្រង់សារពាង្គកាយមនុស្ស។

ដោយមើលឃើញពីគុណប្រយោជន៍ និងតម្រូវការសណ្តែកកួរនៅលើទីផ្សារ សហគមន៍កសិកម្ម “ស្វាយមានជ័យស្ត្រីសាមគ្គី” នៅភូមិក្រសាំងពុល ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង បាននាំគ្នាចាប់អារម្មណ៍ដាំដំណាំសណ្តែកកួរនៅលើផ្ទៃដីដាំដុះចំនួន 2ហិកតា(ក្នុងផ្ទៃដីសរុប 8ហិកតា) រួមជាមួយនឹងដំណាំរួមផ្សំផ្សេងទៀតគឺ ជីរ ត្រសក់ សណ្តែកកួរ ម្រះ និងត្រឡាច។

អ្នកស្រី ស៊ុន ស្រីពៅ ជាប្រធានសហគមន៍បានផ្តល់បទសម្ភាសអំពីការដាំដំណាំសណ្តែកកួរ ប្រាប់កាសែត ឡារ៉ែន ពាណិជ្ជថា៖ “គ្រួសារខ្ញុំ និងសហគមន៍ចាប់ផ្តើមប្រកបរបរដាំសណ្តែកកួរនេះរយៈពេល 10ឆ្នាំមកហើយ ដែលមានកសិករទាំងអស់ 18ក្រុម ស្មើនឹង 93គ្រួសារ ដាំដុះលើផ្ទៃដីប្រមាណ 8ហិកតាដែលមានដំណាំរួមផ្សំជាច្រើនមុខ”។

អ្នកស្រី បានបញ្ជាក់ឱ្យដឹងថា ដំណាំសណ្ដែកទ្រើង ឬសណ្ដែកកួរ គឺជាប្រភេទដំណាំដែលកសិករនិយមចូលចិត្តដាំដុះ ជាបន្លែដែលចូលចិត្តត្រជាក់ និងត្រូវការទឹកច្រើនគួរសម ដូច្នេះហើយទើបរដូវដែលស័ក្តិសមក្នុងការដាំបំផុត គឺរដូវរំហើយ ពីខែតុលា ដល់ខែកុម្ភៈ។

អ្នកស្រីបានឱ្យដឹងទៀតថា សណ្តែកទ្រើងអាចដុះលូតលាស់លើដីច្រើនប្រភេទដូចជា ដីក្រហមតាមតំបន់ភ្នំ ដីខ្មៅតំបន់ខ្ពង់រាប ដីល្បាប់តាមមាត់ទន្លេ និងដីល្បាយខ្សាច់ ហើយវាក៏អាចដុះលូតលាស់លើដីល្បាយខ្សាច់បានដែរ គ្រាន់តែបានទិន្នផលទាប។ ដំណាំប្រភេទនេះត្រូវរាប់បញ្ចូលទៅក្នុងក្រុមដំណាំដែលធន់ទ្រាំនឹងដីអាស៊ីត និងដីប្រៃ PH។

អ្នកស្រីបានបញ្ជាក់ថា ចំពោះវិធីដាំមិនមានអ្វីស្មុគស្មាញនោះទេ ដូច្នេះមុននឹងដាំគេត្រូវការរៀបចំដីជាមុនសិន ដោយត្រូវភ្ជួរដីឱ្យបានជម្រៅចាប់ពី 25-30សង់ទីម៉ែត្រ ហើយហាលទុកចោលរយៈពេលចាប់ពី 7-10ថ្ងៃ និងត្រូវភ្ជួរដីឱ្យបានយ៉ាងហោចណាស់ពី 2-3 ដងដែរ មុននឹងធ្វើការដាំដុះដំណាំសណ្ដែកទ្រើង ឬសណ្ដែកកួរនេះ។

ចំពោះការប្រើប្រាស់ជី គេត្រូវដាក់ជីមុននឹងដាក់ដាំ ឬទ្រាប់បាតដី គេដាក់ជីលាមកសត្វចាប់ពី 10-15តោន/ 1ហិកតា ដោយបាចទៅលើរងហើយរាស់លុបពេលរៀបចំដី(លើករង)។ បន្ទាប់ពីដាក់ជីហើយត្រូវស្រោចទឹកឱ្យជោគ។ សណ្តែកកួរត្រូវការទឹកជាប្រចាំ ប៉ុន្តែមិនត្រូវការទឹកដក់លើចម្ការឡើយ។ ការស្រោចដោយប៉ោតចំពួយផ្កាឈូករៀងរាល់ថ្ងៃ ព្រឹក-ល្ងាច គឺជាការល្អបំផុត។ ចំពោះការបញ្ចូលទឹក គេត្រូវបញ្ចូល 2ដងក្នុង 1អាទិត្យទៅតាមសភាពដី និងអាកាសធាតុ។ ស្ថិតនៅក្នុងសីតុណ្ហភាពចន្លោះពី 24-28អង្សាសេដើមសណ្ដែកនឹងដុះពន្លកចេញត្រួយ ហើយសីតុណ្ហភាពល្អបំផុតដែលវានឹងចេញផ្កា-ផ្លែ គឺចន្លោះពី 24-26អង្សាសេ ប៉ុន្តែអាចកើនលើសពីនេះបានរហូតដល់ 28.5អង្សាសេ។

សណ្តែកកួរត្រូវការទឹកកាន់តែច្រើនឡើងចាប់ពីវាមានអាយុ 30ថ្ងៃឡើងទៅ ព្រោះដំណាក់កាលនេះសណ្តែកចាប់ផ្តើមចេញផ្កាជាបណ្តើរៗ រហូតដល់ការប្រមូលផល។ យើងអាចប្រមូលផលបាន ចាប់ពីសណ្ដែកអាយុបាន 1ខែ បូក10-15ថ្ងៃឡើងទៅ អាស្រ័យទៅតាមពូជ។ គេអាចប្រមូលផលបានចាប់ពី 15-18 ដងក្នុង 1រដូវការដាំដុះ។ ទិន្នផលគិតជាមធ្យមប្រហែលពី 16-18តោន ក្នុងផ្ទៃដី1ហិកតា។ នេះបើតាមអ្នកស្រីប្រធានសហគមន៍បានបញ្ជាក់។

អ្នកស្រី ពៅ បានឱ្យដឹងទៀតថា៖“ចម្ការសណ្តែកកួរដែលសហគមន៍ខ្ញុំមាននៅលើផ្ទៃដី 2ហិកតានេះ គឺដាំក្នុងលក្ខណៈវិលជុំ ធ្វើឱ្យទទួលបានផលជាប្រចាំជាមធ្យម 200- 250គីឡូក្រាមក្នុង1ថ្ងៃដែលពេលខ្លះអាចដល់ 500គីឡូក្រាម។ ប៉ុន្តែសណ្តែកកួររបស់សហគមន៍ខ្ញុំដាំ មានលក្ខណៈខុសពីសណ្តែកកួរនៅលើទីផ្សារបន្តិចត្រង់ថា វាមានរសជាតិផ្អែម ឆ្ងាញ់ផ្លែស្រស់ តឹងណែន ស្វិតមានទឹក ដែលធ្វើឱ្យអតិថិជនជាប់ចិត្ត ចូលចិត្តទិញបរិភោគច្រើន ដណ្តើមគ្នាទិញលើទីផ្សាដោយសារខ្ញុំមិនប្រើគីមី។ ជាបន្លែសុវត្ថិភាព ដាំតាមធម្មជាតិ និងតាមការណែនាំពីមន្ត្រីជំនាញកសិកម្មខេត្ត”។

អ្នកស្រីបានបញ្ជាក់ថា៖“ការរកទីផ្សារលក់ចេញ គឺសណ្តែកររបស់សហគមន៍ខ្ញុំ មិនមានការលំបាកនោះទេ ដោយបច្ចុប្បន្នសហគមន៍កសិកម្ម ស្វាយ-មានជ័យស្ត្រីសាមគ្គី បានធ្វើកិច្ចសន្យាជាមួយវិស័យឯកជនមួយចំនួនដូចជាក្រុមហ៊ុន KOC REMIX ដែលបានប្រមូលទិញ និងចែកចាយ ទៅទីផ្សារ និងបានផ្គត់ផ្គង់ចែកចាយទៅ EAC (បណ្តាញរបស់ KOC) អង្គការស៊ីដាក ទីផ្សារនៅភ្នំពេញ និងទីផ្សារឧដុង្គ”។

ដោយឡែករឿងតម្លៃនៅលើទីផ្សារវិញ អ្នកស្រីប្រធានសហគមន៍បានប្រាប់កាសែតឡារ៉ែនពាណិជ្ជថា៖ “សណ្តែកួររបស់ខ្ញុំអាចលក់បានតម្លៃ 2,000រៀល ទៅ2,500រៀលក្នុង 1គីឡូក្រាម បើគិតតម្លៃសរុប 2500៛ X 250គ.ក= 625,000រៀលក្នុង1ថ្ងៃ។

អ្នកស្រី ស៊ុន ស្រីពៅ បានប្រាប់កាសែតឡារ៉ែនពាណិជ្ជ ទៀតថា៖“សម្រាប់សហគមន៍ខ្ញុំ បានធ្វើការពង្រីកការដាំដុះបន្លែសណ្តែកកួរបន្ថែមទៀតហើយ ទោះបីដៃគូសហការរបស់សហគមន៍ ពុំទាន់មានការបញ្ជាទិញបន្ថែមក៏ដោយ។ ម្យ៉ាងទៀតសហគមន៍ខ្ញុំក៏បានដាំដំណាំនេះក្នុងលក្ខណៈវិលជុំ ដែលអាចធ្វើឱ្យសហគមន៍យើងប្រមូលផលបានជាប្រចាំ នៅលើផ្ទៃដីដំណាំដែលយើងមាន យើងក៏អាចបូករួមផ្សំជាមួយបន្លែដទៃទៀត យើងអាចផ្គត់ផ្គង់ទីផ្សារក្នុងស្រុកបាន ដោយរួមជាមួយនឹងសហគមន៍ផ្សេងទៀតដែលគេមានដំណាំនេះដែរ តែតម្រូវការកាន់តែច្រើន យើងក៏ចង់ផ្គត់ផ្គង់ទីផ្សារក្នុងស្រុកឱ្យបានគ្រប់គ្រាន់”៕

October 25, 2019

វគ្គបណ្តុះបណ្តាល CIPS គឺដើម្បីជំនាញអចលនទ្រព្យអន្តរជាតិ និងជំរុញទីផ្សារក្នុងតំបន់

វគ្គបណ្តុះបណ្តាលជំណាញអចលនទ្រព្យស្ដីពី Certified International Property Specialist (CIPS) ដែលសមាគមអ្នកវាយតម្លៃ និងភ្នាក់ងារអចលវត្ថុកម្ពុជា ឬ CVEA បានសហការជាមួយ National Association of Realtors (NAR) របស់សហរដ្ឋអាមេរិក ដើម្បីចែករំលែកចំណេះដឹងនៃជំនាញផ្នែកអចលនទ្រព្យអន្តរជាតិនោះ ត្រូវបានបិទបញ្ចប់ហើយបន្ទាប់ពីបានចំណាយពេលលើការសិក្សាអស់រយៈពេល 5ថ្ងៃកន្លងមក។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ប្រាប់កាសែតឡារ៉ែនពាណិជ្ជក្នុងពិធីបិទកម្មវិធីថា៖“វគ្គសិក្សា(CIPS)នេះមានរយៈពេល 5ថ្ងៃ ដោយគិតចាប់ពីថ្ងៃទី14 ដល់ថ្ងៃទី18 ខែតុលា ឆ្នាំ2019 ក្រោមការបណ្តុះបណ្តាលពីលោក Furhad Waquadដែលជាអ្នកមានជំនាញ និងចំណេះដឹងខ្ពស់ផ្នែកទីផ្សារអចលនទ្រព្យអន្តរជាតិមកពី (NAR) របស់សហរដ្ឋអាមេរិក”។

លោកបន្តទៀតថា៖ “ការបណ្តុះបណ្តាលនេះ គឺដើម្បីឱ្យកូនខ្មែរទទួលបានចំណេះដឹងបន្ថែម ពីមុខជំនួញនៃទីផ្សារអចលនទ្រព្យជាលក្ខណៈអន្តរជាតិដែលគ្រូបានបង្ហាត់បង្ហាញពីរបៀបរបបនៃការធ្វើជំនួញក្នុងទីផ្សារអចលនទ្រព្យនៅតំបន់អាស៊ីអាស៊ីប៉ាស៊ីហ្វិក ទីផ្សារនៅក្នុងតំបន់អឺរ៉ុប សហរដ្ឋអាមេរិក ក៏ដូចជាភ្នាក់ងារអចលនទ្រព្យនៅក្នុងតំបន់ផ្សេងៗលើពិភពលោកដែរ”។

លោកប្រធានសមាគមបានបញ្ជាក់ថា៖ “CIPS គឺជានិមិត្តសញ្ញាមួយ និងជាផ្នែកមួយរបស់ NAR ដែលគេជឿជាក់នៅលើទីផ្សារអន្តរជាតិ ហើយនៅពេលដែលយើងមានសញ្ញាសម្គាល់នេះ គេនឹងជឿជាក់ក្នុងការធ្វើការងារជាមួយគ្នាដែលនេះជាគោលការណ៍សំខាន់ ហើយសម្រាប់ការឆ្លងកាត់វគ្គ CIPS នេះ ត្រូវការប្រើរយៈពេល 5ថ្ងៃជាប់ៗគ្នា ស្មើនឹង 40ម៉ោង ដើម្បីយើងអាចក្លាយទៅជាបណ្តាញសមាជិករបស់ CIPS”។

លោកប្រធានបន្តទៀតថា៖“ជាទូទៅ អ្នកដែលត្រូវបញ្ចប់ការសិក្សាក្នុងវគ្គនេះ គឺយើងមានសិក្ខាកាមចំនួន 68នាក់ដែលបានចូលរួមនៅក្នុងវគ្គបណ្តុះបណ្តាលជំនាញពិសេសមួយនេះ ភាគច្រើនជាថ្នាក់ដឹកនាំនៅក្នុងក្រុមហ៊ុនអចលនទ្រព្យ អ្នកវិនិយោគលើអចលនទ្រព្យ ពាណិជ្ជករ និងបុគ្គលដែលពាក់ព័ន្ធ ដែលទី1-ពួកគាត់ទទួលបានវិញ្ញាបនបត្របញ្ជាក់ពីគុណភាពនៃការទទួលបានចំណេះដឹង និងជំនាញយ៉ាងពិតប្រាកដក្រោយពេលបញ្ចប់ការសិក្សា”។

លោក សុខនីម ក៏បានបញ្ជាក់ផងដែរបន្ថែមថា៖“ទី2-គឺយើងជួយកសាងសមត្ថភាពគាត់ដែលជាភ្នាក់ងារអចលនទ្រព្យឱ្យមានក្រមសីលធម៌ខ្ពស់ ព្រោះនៅក្នុងវគ្គនេះ គឺមានបង្រៀនពីក្រមសីលធម៌វិជ្ជាជីវៈការធ្វើមុខជំនួញ និងបែបផែននៃការធ្វើអចលនទ្រព្យផងដែរ។ ព្រោះថា ការធ្វើជាភ្នាក់ងារអចលនទ្រព្យ មិនមែនយើងអាចធ្វើការបាននៅលើបណ្តាប្រទេសលើពិភពលោកនោះទេ”។

លោកបានបញ្ជាក់ទៀតថា ជាអ្នកពូកែរកស៊ីជួញដូរនៅស្រុកខ្មែរក៏មិនប្រាកដថា យើងអាចពូកែរកស៊ីនៅសហរដ្ឋអាមេរិកដែរ តែវគ្គ CIPS នេះ គឺបង្រៀនថា បើយើងជាភ្នាក់ងារអចលនទ្រព្យនៅអាមេរិក តើយើងត្រូវធ្វើម៉េច? មានច្បាប់អ្វីខ្លះដើម្បីអាចធ្វើជាភ្នាក់ងារអចលនទព្យបាន? មានបទដ្ឋានអ្វីខ្លះដើម្បីទិញ និងលក់អចលនទ្រព្យបាននៅសហរដ្ឋអាមេរិក។

នេះជាចំណេះដឹងមូលដ្ឋានក្នុងវគ្គសិក្សានេះ ហើយនៅអឺរ៉ុបវិញ ត្រូវធ្វើម៉េចដើម្បីទិញ-លក់អចលនទ្រព្យនៅអឺរ៉ុបបាន? ដូចនេះមានតែអ្នកឆ្លងកាត់វគ្គ CIPS នេះទេ ដែលអាចដឹងរឿង និងរបៀបរបបនៃការធ្វើការងារ និងការទិញ-លក់ និងការជួញដូរអចលនទ្រព្យជាលក្ខណៈសកល។

លោក ច្រឹក សុខនីម បានបន្តថា៖“នេះជាការល្អសម្រាប់ប្រជាជនខ្មែរ ជាភ្នាក់ងារអចលនទ្រព្យដែលមានជំនាញបែបហ្នឹង ដូច្នេះគាត់អាចធ្វើការងារជាលក្ខណៈសកលបាន។ ការទទួលបានចំណេះដឹងបែបនេះនឹងធ្វើឱ្យប្រទេសយើងមានឈ្មោះបោះសំឡេងលើឆាកអន្តរជាតិ និងបង្កើនអ្នកធ្វើជាភ្នាក់ងារអចលនទ្រព្យជាសកលបានចំនួនច្រើននាក់ ហើយវាក៏ជួយលើកតម្លៃភ្នាក់ងារអចលនទព្យរបស់យើងលើឆាកអន្តរជាតិផងដែរ”។

លោក ឈួន ស៊ុនហួត មកពីក្រុមហ៊ុន Reliance Property ដែលជាសិក្ខាកាមមួយរូបនៅក្នុងវគ្គនេះបានសម្តែងមតិថា៖ “ជាក់ស្តែង វាជាវិជ្ជាជីវៈសម្រាប់យើងជាភ្នាក់ងារអចលនទ្រព្យនៅទូទាំងពិភពលោកព្រោះការបង្រៀនវាទាក់ទងទៅនឹងប្រទេសផ្សេងៗ ជាមួយនឹងបទពិសោធនៃការ ទិញ-លក់ការជួញដូរ ច្បាប់ និងព័ត៌មានដែលជាចំណេះដឹងទូទៅនៃប្រទេសផ្សេងៗថា តើខាងគេការទិញ-លក់អចលនទ្រព្យវាយ៉ាងម៉េច? វាធ្វើឱ្យយើងស្វែងយល់បានខ្លះៗ ព្រោះរយៈពេលនៃការសិក្សាមានពេលខ្លី។ ដូច្នេះខ្ញុំយល់ថា ក្នុងនាមជាភ្នាក់ងារអចលនទ្រព្យម្នាក់ ការជួញដូរអចលនទ្រព្យនៅប្រទេសក្រៅ នៅអឺរ៉ុប សហរដ្ឋអាមេរិក ឬប្រទេសផ្សងៗទៀតនោះ តើយើងត្រូវចេះដឹងពីបច្ចេកទេស ឬវប្បធម៌ និងការអនុវត្តរបស់គេយ៉ាងម៉េច?”។

លោក ឈួន ស៊ុនហួត បានបញ្ជាក់ថា៖“ការឆ្លងកាត់វគ្គសិក្សានេះ យើងឃើញថា ប្រទេសក្រៅជាប្រទេសជឿនលឿន ហើយការទិញ-លក់អចលនទ្រព្យវាក៏ផ្សេងៗពីគ្នាដែរ អ៊ីចឹងខ្ញុំគិតថា យកតាមបទពិសោធរបស់គេខ្លះដើម្បីយកមកសិក្សា ហើយអនុវត្តនៅស្រុកយើងដែលយើងអាចចែករំលែកជូនដល់ភ្ញៀវនៅក្នុងស្រុក និងអ្នកវិនិយោគិនមកពីប្រទេសក្រៅបាន មានន័យថាយើងទាក់ទាញវិនិយោគិនពីស្រុកក្រៅមកវិនិយោគក្នុងស្រុក ហើយពីក្នុងស្រុកទៅវិនិយោគនៅក្រៅស្រុកបានដូចគ្នា ព្រោះជាចំណេះដឹងបែបសកល”។

លោក មឹក ចិន្តា ស្ថាបនិកនៃគេហទំព័រ Realestate.Com.Kh មានប្រសាសន៍ប្រាប់កាសែតឡារ៉ែនពាណិជ្ជថា៖“ជាការពិតទៅ វគ្គសិក្ខាសាលានេះផ្តល់ផលប្រយោជន៍សំខាន់ណាស់ទៅដល់ ភ្នាក់ងារអចលនទ្រព្យដែលនឹងទទួលបាននូវអ្វីដែលជាជំនាញពិតប្រាកដនៅក្នុងការទាក់ទាញភ្ញៀវថ្នាក់តំបន់ និងអន្តរជាតិ ដោយគាត់មានឱកាសក្នុងការជួញដូរជាមួយនឹងវិនិយោគិនក្រៅស្រុកដូចជាចិន ជប៉ុន អឺរ៉ុប និងអាមេរិកជាដើម ព្រោះវគ្គនេះបានផ្តល់នូវចំណេះដឹងពីការទិញ-លក់គ្រប់លក្ខណៈនៃអចលនទ្រព្យរបស់ប្រទេសនីមួយៗ និងយល់ដឹងពីវប្បធម៌ទំនៀមទម្លាប់របស់ប្រទេសទាំងនោះ ដែលនេះជារឿងចាំបាច់”។

លោក ចិន្តា បានបញ្ជាក់បន្ថែមថា៖“សម្រាប់ភ្នាក់ងារអចលនទ្រព្យ ប្រសិនបើគាត់មិនបានឆ្លងកាត់វគ្គសិក្សាហ្នឹង គាត់នឹងបាត់បង់ឱកាស ព្រោះវាជាឱកាសមួយដែលយើងត្រូវតែចាប់យកនូវចំណេះដឹងដ៏មានសារៈសំខាន់នេះ បើវាកន្លងហួស គឺវាពិតជាគួរឱ្យសោកស្តាយ ព្រោះវានឹងជួយបំពេញនូវបទពិសោធសម្រាប់យើង ក៏ដូចជាវិស័យអចលនទ្រព្យទាំងមូលជាលក្ខណៈអន្តរជាតិតាមរយៈការងារនៃវិស័យអចលនទ្រព្យរបស់យើង”៕

October 25, 2019

ថ្ងៃរៀបការកូនក្រមុំត្រូវតែស្អាតឥតខ្ចោះ

នេះគឺជាថ្ងៃពិសេសរបស់អ្នកហើយ ដូច្នេះធ្វើលេងៗមិនបានទេ ត្រូវតែចាំជាប់ក្នុងចិត្តជានិច្ចថា ត្រូវតែស្អាតឱ្យអស់ដៃគ្រប់ចំណុច តាំងពីក្បាលដល់ចុងជើង។ ប៉ុន្តែសូមរំឭកឱ្យច្បាស់បន្តិចសិន មិនមែនថាចង់ស្អាតក៏ស្អាតបានដូចមាត់នោះទេ គឺត្រូវតែមានការអនុវត្តផងដែរ ហើយការដែលអនុវត្តនោះគឺត្រូវធ្វើឡើងមុនថ្ងៃរៀបការរហូតដល់ថ្ងៃរៀបការចូលមកដល់ (ចាប់ផ្តើមធ្វើមុនបានកាន់តែយូរកាន់តែល្អ)។ មើលបន្តិចមើល៍ ត្រូវធ្វើដូចម្តេចខ្លះទៅ?

សក់ : សក់គឺជាផ្នែកមួយដ៏សំខាន់ក្នុងការតុបតែងនៅក្នុងថ្ងៃរៀបការ ហើយវាក៏អាចទទួលរងនូវការបំផ្លាញខ្លាំងផងដែរ ព្រោះអ្នកត្រូវធ្វើម៉ូដសក់ជាច្រើនម៉ូដ ដូច្នេះការមើលថែសុខភាពសក់ឱ្យបានល្អមុនថ្ងៃសំខាន់របស់អ្នកចូលមកដល់គឺជារឿងចាំបាច់មួយសម្រាប់កូនក្រមុំគ្រប់រូប។ អ្នកជំនាញបាននិយាយថា ដើម្បីថែរក្សាសក់ឱ្យមានសុខភាពល្អ និងស្រស់ស្អាត គឺមិនមានអ្វីល្អជាងការទទួលទានអាហារដែលសម្បូរទៅដោយវីតាមីន B នោះទេ ពីព្រោះថាវីតាមីនប្រភេទនេះអាចធ្វើឱ្យសក់របស់អ្នកភ្លឺរលោងបែបធម្មជាតិពីខាងក្នុងមក។ ប្រេងពីធម្មជាតិក៏ជាជំនួយការដ៏ល្អសម្រាប់ការថែរក្សាសក់របស់អ្នកដូចគ្នាដែរ។

ផ្ទៃមុខ : មានវិធីសាស្ត្រថែរក្សា និងកែខៃសម្រស់ផ្ទៃមុខជាច្រើន ដែលអ្នកអាចយកមកអនុវត្ត សូមជ្រើសរើសវិធីសាស្ត្រមួយដែលមានប្រសិទ្ធភាពខ្ពស់ចំពោះសភាពស្បែករបស់អ្នកដូចជា ការបិទម៉ាសតាមបែបធម្មជាតិ ការចំហុយផ្ទៃមុខ ការស្ប៉ាមុខ ឬការប្រើប្រាស់គ្រឿងសម្អាងជាដើម។

ភ្នែក : លាបក្រែមជំនួយ បិទដំឡូងបារាំង ឬត្រសក់ជាដើម ដើម្បីការពារ និងជំនួយទៅដល់រង្វង់ភ្នែកខ្មៅរបស់អ្នក។ ម្យ៉ាងវិញទៀត អ្នកគួរចៀសវាងការទទួលទានប្រៃពេក ពីព្រោះវាអាចបណ្ដាលឱ្យភ្នែករបស់អ្នកឡើងហើមបាន។

បបូរមាត់ : សូមព្យាបាលបញ្ហាដែលតែងតែកើតមានចំពោះបបូរមាត់របស់អ្នក ប្រសិនបើអ្នកមានបញ្ហាបបូរមាត់ខ្មៅ បបូរមាត់ប្រេះ ឬបបូរមាត់ក្រៀម។ សូមកុំបណ្ដោយឱ្យបញ្ហាបបូរមាត់នេះក្លាយជាឧបសគ្គមកបំផ្លាញភាពស្រស់ស្អាតរបស់អ្នកនៅក្នុងថ្ងៃដ៏ពិសេសរបស់អ្នកឱ្យសោះ។

ស្បែក-ក : ត្រូវចៀសឱ្យបាននូវពាក្យថា “កូនក្រមុំមុខស កខ្មៅ”។ អ្នកត្រូវប្រាកដក្នុងចិត្តថា ទាំងស្បែក-ក ទាំងស្បែកមុខ និងទាំងស្បែកដងខ្លួនរបស់អ្នក គឺមានពណ៌ប្រហាក់ប្រហែលគ្នា ទើបអាចជួយឱ្យអ្នកទទួលបាននូវភាពស្រស់ស្អាតពិតប្រាកដនៅក្នុងថ្ងៃរៀបការរបស់អ្នក។

រាងកាយ : បន្ថែមសារធាតុអាហារឱ្យបានច្រើនជាងមុន ប្រសិនបើអ្នកមានរូបរាងស្គម តែក៏ត្រូវសម្រករាងបន្តិចដែរ បើអ្នកធាត់ពេកនោះ។

ស្បែកដៃ និងជើង : ទោះជាស្បែកអ្នកមិនសខ្ចីដូចនារីផ្សេងៗក៏ដោយ ប៉ន្ដែក៏មិនត្រូវបណ្តែតបណ្ដោយឱ្យស្បែករបស់អ្នកមើលទៅខ្មៅស្រអប់ គ្រើម ស្ងួត ឬប្រេះបែកស្រកានោះដែរ។ សូមខាត់ស្បែករបស់អ្នកតាមបែបធម្មជាតិ ពីព្រោះវិធីនេះគឺជាវិធីដ៏ល្អបំផុត ដែលកូនក្រមុំគ្រប់រូបគួរធ្វើ និងត្រូវធ្វើដោយសន្សឹមៗ ដើម្បីទទួលបាននូវស្បែកភ្លឺរលោងស្រស់ស្អាត។

ក្រចក : ក្រៅពីស្បែកសូមអ្នកកុំភ្លេចពិនិត្យមើលក្រចកដៃ ក្រចកជើងរបស់អ្នកផងណា។ សូមថែរក្សាក្រចកដៃ ក្រចកជើងរបស់អ្នកឱ្យបានវែង និងមានសុខភាពល្អ ដើម្បីឱ្យអ្នកអាចលេងម៉ូដ និងពណ៌ក្រចកទៅតាមបំណងប្រាថ្នារបស់អ្នកនៅក្នុងថ្ងៃសិរីសួស្ដីរបស់អ្នកនាពេលខាងមុខនេះ៕

October 25, 2019

បន្ទាប់ពីរៀបការរួច តើគួរទៅក្រេបចន្ទទឹកឃ្មុំនៅឯណា?

ពិធីរៀបអាពាហ៍ពិពាហ៍ដ៏មានន័យត្រូវបានបញ្ចប់ ពេលវេលាដែលត្រូវគិតដល់ទីតាំងក្រេបទឹកឃ្មុំដ៏រ៉ូមែនទិក ក៏ត្រូវចូលមកដល់ដែរ។ សម័យបច្ចុប្បន្ននេះ ការធ្វើដំណើរកម្សាន្តក្រេបទឹកឃ្មុំអាចចាត់ទុកថា ជារឿងដែលមានភាពសំខាន់មួយដែរ ព្រោះថាសម្រាប់គូស្នេហ៍ដែលទើបតែរៀបការរួចថ្មោងថ្មីដូចជាអ្នកទាំងពីរ ការធ្វើដំណើរកម្សាន្តក្រេបចន្ទទឹកឃ្មុំ គឺប្រៀបដូចជា ការជួយបង្កើននូវការចងចាំអនុស្សាវរីយ៍ដ៏រីករាយ បន្ថែមជាមួយនឹងភាពផ្អែមល្ហែមដ៏សែនមានន័យមិនអាចបំភ្លេចបានដល់ជីវិតគូ។ “គិតចេះតែគិតហើយ ប៉ុន្តែដូចមិនទាន់ច្បាស់ក្នុងចិត្តសោះថា នឹងទៅក្រេបទឹកឃ្មុំនៅឯណាល្អ?” នេះគឺជាប្រយោគមួយដែលស្ថិតនៅក្នុងចិត្តគូស្វាមីភរិយាមួយចំនួនមែនដែរទេ? បើដូច្នេះចូរសាកមកទទួលយកទីតាំងមួយចំនួនដែល ឡារ៉ែន ចង់ណែនាំជូនដូចខាងក្រោមនេះ៖

តំបន់កម្សាន្តលើកោះ : អាចនិយាយបានថា ជាទីតាំងល្អលេខមួយហើយសម្រាប់អ្នកដែលចង់ស្វែងរកទីតាំងក្រេបចន្ទទឹកឃ្មុំលំដាប់ល្អដាច់គេនោះ។ ជាដំណើរកម្សាន្តក្រេបទឹកឃ្មុំដែលមានលក្ខណៈផ្ទាល់ខ្លួនខ្លាំងជាងគេបំផុត បើប្រៀបធៀបទៅនឹងការធ្វើដំណើរកម្សាន្តនៅទីតាំងផ្សេងៗទៀត តែក៏អាចនឹងត្រូវចំណាយអស់ច្រើនជាងគេដែរ ប៉ុន្តែអ្វីដែលអ្នកទទួលបានពីតំបន់កម្សាន្តនៅលើកោះនោះ ក៏ស្ទើរតែរកមិនឃើញភាពខ្វះចន្លោះទាល់តែសោះដែរ។ សម្រាប់ទីតាំងពិសេសបែបនេះអ្នកអាចនឹកគិតដល់តំបន់មួយចំនួនដូចជា កោះម៉ាល់ឌីវ កោះឡាំងកាវី កោះតាហីទី កោះបាលី និងកោះសាមុយជាដើម តែបើអ្នកគិតថាមិនចង់ទៅដល់បរទេសទេនោះ អ្នកអាចគិតដល់កោះមួយចំនួននៅក្នុងប្រទេសយើងក៏បាន គឺអាចផ្តល់នូវភាពរ៉ូមែនទិកដែលមិនអាចបំភ្លេចបានសម្រាប់រាត្រីចន្ទទឹកឃ្មុំរបស់អ្នកដូចគ្នា។

តំបន់មាត់សមុទ្រ : ខ្យល់ត្រជាក់បក់ផាត់នាំយកក្លិនដ៏ប្រហើរនៃទឹកសមុទ្រ រួមជាមួយនឹងសំឡេងរលកបោកច្រាំងទាំងថ្ងៃទាំងយប់ឥតឈប់ឈរ រួមជាមួយនឹងសម្រស់ដ៏ស្រស់ត្រកាលនៃសមុទ្រនឹងជួយធ្វើឱ្យភាពផ្អែមល្ហែមនៃគូស្វាមីភរិយាថ្មោងថ្មីកាន់តែមានភាពស៊ីជម្រៅឡើងមួយកម្រិតទៀត។

តំបន់ភ្នំ : នៅតាមតំបន់ភ្នំជាកន្លែងដែលមានខ្យល់អាកាសបរិសុទ្ធល្អ មានភាពត្រជាក់ស្រួល ស្ងប់ស្អាត់ មានទេសភាពពណ៌បៃតងស្រស់ មានសំឡេងសត្វរ៉ៃ និងសំឡេងទឹកជ្រោះជាតន្ត្រីកំដរគូស្នេហ៍ដែលស្រឡាញ់ចូលចិត្តធម្មជាតិ និងសម្រាប់គូស្នេហ៍ដែលភាពស្ងប់ស្ងាត់ឱ្យកាន់តែរ៉ូមែនទិក មានសេចក្តីសុខ និងមានភាពរីករាយកាន់តែច្រើនឡើង។ ប្រសិនបើអ្នកមិនចង់ទៅណាឆ្ងាយរហូតដល់ឆ្លងប្រទេសទេនោះ ចូរស្វែងរកទីតាំងពិសេសៗនៅក្នុងប្រទេសយើងក៏បានដែរ ហើយទីតាំងក្នុងប្រទេសដែលនិយាយនោះ វាគ្មានអ្វីក្រៅពីតំបន់សមុទ្រ (ដូចជា ក្រុងព្រះសីហនុ និងក្រុងកែប) ឬតំបន់កោះ (ដូចជា កោះសង្សារ កោះឫស្សី និងកោះរ៉ុងសន្លឹមជាដើម) និងតំបន់ភ្នំ (ដូចជា ភ្នំបូកគោ និងឧទ្យានជាតិគីរីរម្យជាដើម)៕

October 25, 2019

ជប៉ុនសន្យាបន្តបង្កើនកូតាទទួលយកកម្មសិក្សាការី និងពលករជំនាញពីកម្ពុជា

មួយរយៈពេលចុងក្រោយនេះ ការបង្កើនកិច្ចសហការផ្នែកពលកម្មរវាងកម្ពុជា-ជប៉ុន ហាក់មានការរីកចម្រើនគួរឱ្យកត់សម្គាល់។ ក្រៅពីការទទួលយកកម្មសិក្សាការីកម្ពុជាទៅសិក្សា និងធ្វើការងារនៅប្រទេសជប៉ុនហើយ ភាគីជប៉ុនបានសម្រេចបន្ថែមច្បាប់ដែលអនុញ្ញាតឱ្យភាគីកម្ពុជាបានបញ្ចូនពលករជំនាញតែម្តង ទៅកាន់ប្រទេសជប៉ុនដែលជាប្រទេសមានការរីកចម្រើនខ្លាំងលើផ្នែកបច្ចេកវិទ្យា និងឧស្សាហកម្ម។

ការបញ្ចូនពលករ និងកម្មសិក្សាការីរបស់កម្ពុជា ទៅកាន់ប្រទេសជប៉ុននេះ ត្រូវបានគេមើលឃើញថា បានផ្តល់ផលចំណេញយ៉ាងច្រើនដល់ប្រទេសទាំង2។ សម្រាប់ជប៉ុន ពួកគេទទួលបានកម្លាំងពលកម្មបន្ថែមដើម្បីបំពេញក្នុងទីផ្សារការងារ ជាពិសេសក្នុងរោងចក្រសហគ្រាស ឬក្នុងកសិដ្ឋានធំៗរបស់ខ្លួន ខណៈកម្ពុជាអាចបង្កើនចំណូលរបស់ប្រជាជន ក៏ដូចជាផ្តល់ឱកាសដល់ប្រជាជន ឬពលករជំនាញអាចមានលទ្ធភាពសិក្សាបច្ចេកទេសពីប្រទេសអភិវឌ្ឍន៍ធំៗដើម្បីត្រឡប់មកជួយអភិវឌ្ឍនៅក្នុងប្រទេសខ្លួនឯងវិញ។

ដោយមើលឃើញពីផលវិជ្ជមានទាំងអស់នេះ រដ្ឋមន្ត្រីក្រសួងការងារ និងភាគីពាក់ព័ន្ធនានាបន្តិចម្តងៗតែងតែធ្វើការខិតខំប្រឹងប្រែងដើម្បីជំរុញឱ្យស្ថានភាពនៃការបញ្ចូនកម្មសិក្សាការី និងពលករមានលក្ខណៈកាន់តែប្រសើរឡើង។ លើសពីនេះទៅទៀត ប្រទេសទាំង2 ក៏មានឆន្ទៈក្នុងការជំរុញឱ្យចំនួនកម្មសិក្សាការី និងពលករកម្ពុជាបានទៅកាន់ប្រទេសជប៉ុនមានការកើនឡើងផងដែរ។

ឯកឧត្តម MIKAMI Masahiro ឯកអគ្គរាជទូតថ្មីនៃព្រះរាជាណាចក្រជប៉ុនប្រចាំនៅកម្ពុជា បានលើកឡើងថា ក្នុងអាណត្តិថ្មីរបស់ឯកឧត្តមនៅកម្ពុជា ឯកឧត្តមនឹងប្តេជ្ញាចិត្តក្នុងការជំរុញឱ្យមានការបើកចំហទីផ្សារការងារនៅក្នុងប្រទេសជប៉ុនកាន់តែទូលំទូលាយសម្រាប់កម្មសិក្សាការី និងពលករជំនាញរបស់កម្ពុជា។ ឯកឧត្តមបានបញ្ជាក់ផងដែរថា ឯកឧត្តមបានជួបជាមួយក្រុមហ៊ុនរបស់ជប៉ុននៅកម្ពុជា ដូចជាក្រុមហ៊ុនអុីអន ជាដើម ដែលកំពុងដំណើរការអាជីវកម្មនៅកម្ពុជាយ៉ាងសកម្ម រួមទាំងក្រុមហ៊ុនជាច្រើនផ្សេងទៀតដើម្បីពិភាក្សា និងទទួលយកមតិនានាពីក្រុមហ៊ុនទាំងអស់នោះ។ ជាលទ្ធផលក្រុមហ៊ុនធំៗទាំងអស់នោះបានរាយការណ៍ និងបានកោតសរសើរពីការខិតខំប្រឹងប្រែងធ្វើការរបស់បុគ្គលិកជនជាតិខ្មែរ ដែលបានបង្កឱ្យមានបរិយាកាសការងារល្អ ជាពិសេសមានភាពអត់ធ្មត់ ឧស្សាហ៍ព្យាយាម និងស្មោះត្រង់ចំពោះការងារ។

ឯកឧត្តម MIKAMI Masahiro បាននិយាយថា៖ “ការលើកឡើងរបស់ក្រុមហ៊ុននៅកម្ពុជានេះ មិនខុសពីការលើកឡើងរបស់និយោជក និងតំណាងក្រុមហ៊ុននៅឯប្រទេសជប៉ុនប៉ុន្មានឡើយ។ ក្រុមហ៊ុនដែលទទួលយកកម្មសិក្សាការី និងពលករជំនាញនៅក្នុងប្រទេសជប៉ុនបានបញ្ជាក់ថា ពួកគេពេញចិត្តចំពោះអត្តចរិតការងាររបស់កម្មសិក្សាការីកម្ពុជា”។

ឯកឧត្តម អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា កម្មសិក្សាការីដែលបានទៅធ្វើកម្មសិក្សា និងបម្រើការងារនៅក្នុងប្រទេសជប៉ុន បច្ចុប្បន្ននេះមានចំនួនប្រមាណ 12,000នាក់។ គិតត្រឹមខែកញ្ញា ឆ្នាំ2019 នេះកម្ពុជាបានបញ្ជូនពលករជំនាញលើកដំបូងទៅបម្រើការងារនៅប្រទេសជប៉ុនប្រមាណ 11នាក់ ក្រោយអនុស្សរណៈនៃការយោគយល់គ្នារវាងកម្ពុជា-ជប៉ុន លើការបញ្ជូនពលករជំនាញត្រូវបានចុះហត្ថលេខារួចរាល់។

ឯកឧត្តម អុិត សំហេង មានប្រសាសន៍ថា៖ “ឯកឧត្តម ឯកអគ្គរាជទូតជប៉ុននៅកម្ពុជា បានសន្យាថា នឹងបន្តពង្រឹងកិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈជាមួយរាជរដ្ឋាភិបាលកម្ពុជាឱ្យកាន់តែរឹងមាំថែមទៀត មិនថានៅក្នុងប្រទេសជប៉ុន ឬនៅប្រទេសកម្ពុជានោះទេ”។

គួរបញ្ជាក់ផងដែរថា ការបញ្ជូនកម្មសិក្សាការី និងពលករជំនាញទៅប្រទេសជប៉ុន បាននាំមកនូវប្រាក់ចំណូលជាច្រើនសម្រាប់គ្រួសាររបស់ពួកគេ និងជាផ្នែកសំខាន់មួយផងដែរក្នុងការកាត់បន្ថយភាពក្រីក្រ។ ចំណូលទាំងអស់នោះ នឹងត្រូវចាយវាយក្នុងប្រទេសកម្ពុជាវិញ តាមរយៈការផ្ញើមកគ្រួសារ ស្របពេលដែលពលករជំនាញទាំងអស់នោះបានសិក្សាបន្ថែមពីរបៀបរបបនៃការរស់នៅ និងការធ្វើការងារនៅក្នុងប្រទេសជប៉ុន។ ក្រោយចប់អាណត្តិ ពួកគេអាចនឹងងាយស្រួលក្នុងការស្វែងរកការងារធ្វើនៅក្នុងទីផ្សារកម្ពុជា ឬក្នុងទីផ្សារក្នុងតំបន់ដទៃទៀត ព្រោះពួកគេបានទទួលចំណេះដឹង និងមានជំនាញច្បាស់លាស់ពីការធ្វើការងារជាក់ស្តែងនៅក្នុងប្រទេសជប៉ុន៕

October 25, 2019

សេវាផ្ទេរប្រាក់ ប្រាសាក់ ជួយសម្រួលដល់ការរីកចម្រើនរបស់អតិថិជន

សេវាផ្ទេរប្រាក់ ពិតជាមានសារៈសំខាន់យ៉ាងខ្លាំង ព្រោះប្រជាជនអាចវេរលុយ និងទទួលប្រាក់បានយ៉ាងងាយ សុវត្ថិភាព និងកាត់បន្ថយការមមាញឹកប្រចាំថ្ងៃ ព្រមទាំងសម្រួលដល់សកម្មភាពអាជីវកម្ម និងការរស់នៅផងដែរ។

ប្រាសាក់ ជាគ្រឹះស្ថានហិរញ្ញវត្ថុដ៏ធំនៅកម្ពុជា និងមានសាខាច្រើនជាងគេនៅកម្ពុជា បានចូលរួមក្នុងការ ផ្តល់ភាពងាយស្រួលជូនដល់ប្រជាជនកម្ពុជា តាមរយៈការផ្តល់ជូន សេវាផ្ទេរប្រាក់ ដែលមានភាពសាមញ្ញ និងសុវត្ថិភាពខ្ពស់។

បច្ចុប្បន្ននេះ អតិថិជនប្រាសាក់ អាចធ្វើការផ្ទេរប្រាក់ទៅកាន់ដៃគូជំនួញ មិត្តស្និទ្ធស្នាល សាច់ញាតិ ពីគណនីទៅគណនី ឬ ផ្ទេរប្រាក់ទៅអ្នកគ្មានគណនី ឬ អាចផ្ទេរឆ្លងធនាគារក៏បាន។

ជាមួយនឹងសេវាផ្ទេរប្រាក់នៅប្រាសាក់នេះ អតិថិជនអាចធ្វើការផ្ទេរប្រាក់ដោយខ្លួនឯងតាមម៉ាស៊ីនអេធីអឹម ឬ សេវាធនាគារចល័ត ឬ ប្រាសាក់ម៉ូបាលប៊ែងឃីង ឬ អាចអញ្ជើញមកធ្វើការផ្ទេរនៅតាមការិយាល័យប្រាសាក់ដែលនៅជិតលោកអ្នកបំផុត។

សូមគោរពអញ្ជើញលោកអ្នកមកទទួលយកការបម្រើដោយភាពកក់ក្តៅ រាក់ទាក់ពីបុគ្គលិកប្រាសាក់ទូទាំងរាជធានីខេត្តនៅកម្ពុជា។

សូមបញ្ជាក់ថា ប្រាសាក់ផ្តល់សេវាហិរញ្ញវត្ថុជាច្រើនប្រភេទរួមមាន៖ សេវាឥណទាន ប្រាក់បញ្ញើសន្សំ ទូទាត់វិក្កយបត្រទឹក ទូទាត់វិក្កយបត្រភ្លើង ផ្ទេរប្រាក់ ប្តូរប្រាក់ ទិញកាតទូរស័ព្ទ សេវាបើកប្រាក់បៀវត្ស សេវាទូទាត់រហ័ស សេវាទូទាត់តាមប្រព័ន្ធបាគង សេវាអេធីអឹម ម៉ាស៊ីនឆូតកាត សេវាធនាគារចល័ត និងសេវាបញ្ជាក់សមតុល្យគណនី ដែលគ្របដណ្តប់នៅទូទាំងប្រទេស។ ក្នុងរយៈពេល 6 ខែដើមឆ្នាំ 2019 នេះ ប្រាសាក់មានទ្រព្យសកម្មសរុបច្រើនជាង 2,800 លានដុល្លារអាមេរិក សម្ពៀតឥណទានច្រើនជាង 2,370 លានដុល្លារអាមេរិក អតិថិជនប្រាក់កម្ចីជាង 410 ពាន់នាក់ បណ្តាញការិយាល័យ និងទីតាំងម៉ាស៊ីនអេធីអឹមគ្របដណ្តប់ទូទាំងប្រទេស និងបុគ្គលិកជាង 8,០00 នាក់ ព្រមទាំងបានផ្តល់អគារបណ្ណាល័យចំនួន 40 នៅតាមបណ្តាខេត្តនានានៅកម្ពុជា។ សម្រាប់ព័ត៌មានបន្ថែម សូមទូរស័ព្ទមកលេខ 023 999 911 ឬ 086 999 911 ឬ ចូលទៅកាន់ www.prasac.com.kh

October 25, 2019

កម្ពុជាបង្ហាញពីសក្តានុពលនៅវេទិកាហេដ្ឋារចនាសម្ព័ន្ធអាស៊ីឆ្នាំ2019

ឯកឧត្តម វង្សី វិស្សុត ត្រូវបានអញ្ជើញចូលរួមជាវាគ្មិនក្នុងកិច្ចពិភាក្សាកម្រិតថ្នាក់ដឹកនាំស្តីពី “ការពង្រឹងភាពជាដៃគូ ដើម្បីសម្រេចចក្ខុវិស័យហេដ្ឋារចនាសម្ព័ន្ធប្រចាំតំបន់អាស៊ី” នៅក្នុង “វេទិកាហេដ្ឋារចនាសម្ព័ន្ធអាស៊ីឆ្នាំ2019” (Asia Infrastructure Forum 2019) A I F ដែលបានប្រព្រឹត្តទៅនៅប្រទេសសិង្ហបុរី។

ឯកឧត្តម វង្សី វិស្សុត អនុប្រធានឧត្តមក្រុមប្រឹក្សាសេដ្ឋកិច្ចជាតិ និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ ដែលជាវាគ្មិនក្នុងកិច្ចប្រជុំពិភាក្សានោះបានលើកឡើងថា៖“ គោលបំណងនៃការអភិវឌ្ឍហេដ្ឋារចនាសម្ព័ន្ធ ដែលជាវិស័យអាទិភាពរបស់រាជរដ្ឋាភិបាលអស់រយៈពេលជាង 20 ឆ្នាំមកនេះ គឺដើម្បីជំរុញ និងទ្រទ្រង់កំណើនសេដ្ឋកិច្ចដែលឆ្លើយតបទៅនឹងតម្រូវការសេដ្ឋកិច្ចសង្គម លើកកម្ពស់ការផ្តល់សេវាសាធារណៈ និងការប្រែប្រួលអាកាសធាតុ”។

ឯកឧត្តមក៏បានបង្ហាញអំពីសក្តានុពល និងវឌ្ឍនភាពនៃការអភិវឌ្ឍសេដ្ឋកិច្ចកម្ពុជាដែលសម្រេចបានកំណើនប្រចាំឆ្នាំជាមធ្យមប្រមាណ 7.6% នៅក្នុងរយៈពេល 20ឆ្នាំចុងក្រោយនេះ។ អត្រានៃភាពក្រីក្រ មានប្រមាណ 53.5% ក្នុងឆ្នាំ2004 បានធ្លាក់ចុះមកនៅក្រោម 10%នៅក្នុងឆ្នាំ2018 ។

ចំណែក ទំហំពាណិជ្ជកម្មអន្តរជាតិបានកើនឡើងពី 16,279លានដុល្លារអាមេរិកនៅក្នុងឆ្នាំ2013 ដល់ 25,070 លានដុល្លារអាមេរិក ក្នុងឆ្នាំ2017 និងឡើងដល់ប្រមាណ 30,000លានដុល្លារអាមេរិកនៅក្នុងឆ្នាំ2018។

សូមបញ្ជាក់ថា វេទិកាឆ្នាំនេះត្រូវបានរៀបចំឡើងក្រោមប្រធានបទ“ភាពជាដៃគូសម្រាប់អនាគត៖ការបង្កើនគុណភាពនៃហេដ្ឋារចនាសម្ព័ន្ធ” ដោយមានការចូលរួមពីថ្នាក់ដឹកនាំជាន់ខ្ពស់របស់រដ្ឋាភិបាល ធនាគារអភិវឌ្ឍន៍ពហុភាគី វិស័យឯកជន ព្រមទាំងស្ថាប័នហិរញ្ញវត្ថុ ដើម្បីពិភាក្សាលើតម្រូវការនៃការអភិវឌ្ឍហេដ្ឋារចនាសម្ព័ន្ធនៅក្នុងតំបន់ ការចែករំលែកបទពិសោធនៃការអនុវត្តកន្លងមក និងការលើកទឹកចិត្តឱ្យវិស័យឯកជន វិនិយោគលើវិស័យហេដ្ឋារចនាសម្ព័ន្ធ ប្រកបដោយចីរភាព។

ជាមួយគ្នានេះដែរ នៅក្នុងវេទិកាកិច្ចពិភាក្សាកម្រិតថ្នាក់ដឹកនាំនេះ ក៏បានផ្តល់ឱកាសឱ្យវិស័យឯកជនបង្ហាញ និងផ្សព្វផ្សាយពីបច្ចេកវិទ្យាទំនើបរបស់ខ្លួន និងរចនាសម្ព័ន្ធ ហិរញ្ញប្បទានថ្មីៗ សម្រាប់ការអភិវឌ្ឍហេដ្ឋារចនាសម្ព័ន្ធផងដែរ។

រាជរដ្ឋាភិបាលកម្ពុជា បាននិងកំពុងរៀបចំផែនការមេតាមវិស័យ ដូចជាការតភ្ជាប់ផ្នែកគមនាគមន៍ ថាមពល ឌីជីថល និងផែនការនគរូបនីយកម្មសម្រាប់ទីក្រុងសំខាន់ៗ ក៏ដូចជាការពង្រឹងយន្តការស្ថាប័ន និងយន្តការគ្រប់គ្រងការវិនិយោគសាធារណៈឱ្យកាន់តែមាំទាំ ដែលជាបច្ច័យនឹងនាំមកនូវកាលានុវត្តភាពដ៏ច្រើនសម្រាប់ការចូលរួមវិនិយោគពីសំណាក់វិស័យឯកជនក្នុងការជួយរៀបចំ និងអភិវឌ្ឍន៍ហេដ្ឋារចនាសម្ព័ន្ធនានា ឱ្យឆ្លើយតបទៅនឹងការអភិវឌ្ឍក្នុងយុគសម័យថ្មី។

ឯកឧត្តម វង្សី វិស្សុត ក្នុងនាមក្រសួងសេដ្ឋកិច្ច និងហិរញ្ញវត្ថុរបស់កម្ពុជា បានជួបពិភាក្សាការងារជាមួយលោក Xie Duo ប្រធានមូលនិធិផ្លូវសូត្រ (Silk Road Fund – SRF) តំណាងធនាគារវិនិយោគហេដ្ឋារចនាសម្ព័ន្ធ (Asian Infrastructure Investment Bank – AIIB) តំណាងសហគ្រាសសិង្ហបុរី (Enterprise Singapore) ដែលជាស្ថាប័នជំរុញការអភិវឌ្ឍវិស័យឯកជន និងវិស័យហេដ្ឋារចនាសម្ព័ន្ធរបស់ប្រទេសសិង្ហបុរី និងតំណាងក្រុមហ៊ុន InfraCo Asia ដែលជាក្រុមហ៊ុនឯកជនវិនិយោគលើគម្រោងដែលមានហានិភ័យខ្ពស់ និងផ្តល់ការគាំទ្រផ្នែកហិរញ្ញវត្ថុដល់ការអភិវឌ្ឍគម្រោងចាប់តាំងពីដំណាក់កាលបឋមនៃការរៀបចំសំណើគម្រោង។

ជាមួយគ្នានោះ ឯកឧត្តម វង្សី វិស្សុត ក៏បានចុះហត្ថលេខាលើអនុស្សរណៈយោគយល់គ្នាជាមួយនឹងស្ថាប័នហេដ្ឋារចនាសម្ព័ន្ធអាស៊ី (Infrastructure Asia – IA)ដើម្បីបង្កើតក្របខ័ណ្ឌកិច្ចសហប្រតិបត្តិការជាផ្លូវការរវាងស្ថាប័នទាំង2 ក្នុងការរៀបចំ និងអភិវឌ្ឍន៍លើគម្រោងស្តារប្រព័ន្ធលូ និងប្រព្រឹត្តកម្មទឹកកខ្វក់នៅខេត្តព្រះសីហនុ។ កិច្ចសហការនេះនឹងក្លាយជាមូលដ្ឋានសម្រាប់ជំរុញការរៀបចំគម្រោងអភិវឌ្ឍន៍ផ្សេងទៀតៗ នៅកម្ពុជាឱ្យកាន់តែប្រសើរឡើង បង្កើនភាពទាក់ទាញពីវិស័យឯកជន និងស្ថាប័នហិរញ្ញវត្ថុទាំងក្នុងតំបន់ និងអន្តរជាតិ៕

October 25, 2019

ទម្លាប់ និងនិស្ស័យល្អៗ 6យ៉ាងដែលធ្វើឱ្យមនុស្សអាយុវែង…តើអ្នកមានគ្រប់ចំណុចដែរឬទេ?

ពេលណាបានឮថា មានលោកតា លោកយាយណាម្នាក់មានអាយុវែងជាង 100ឆ្នាំ ; សារព័ត៌មាននានាបាននាំគ្នាទៅសម្ភាស និងសួរនាំអំពីវិធីការមើលថែទាំខ្លួនរបស់គាត់ នេះគឺដោយសារតែមនុស្សយើងគ្រប់គ្នាសុទ្ធតែចង់មានជីវិតរស់នៅលើពិភពលោកនេះឱ្យបានយូរបំផុតតាមដែលអាចយូរបានហ្នឹងឯង តែក្រៅពីការមើលថែទាំសុខភាពរាងកាយរបស់ខ្លួនឯងឱ្យនៅល្អហើយនោះ លទ្ធផលនៃការស្រាវជ្រាវវិភាគមួយបានបញ្ជាក់ប្រាប់ថា ; ទម្លាប់ និងទង្វើរបស់ខ្លួនយើងផ្ទាល់ក៏មានចំណែកធ្វើឱ្យយើងមានអាយុវែងបានដែរ និងថែមទាំងជួយឱ្យយើងមានជីវិតរស់នៅសុខសប្បាយនៅពេលចាស់ទៀតផង។

ចំណែកឯសំណួរដែលថា តើទម្លាប់ ទង្វើ និងលក្ខណៈនិស្ស័យដែលធ្វើឱ្យមនុស្សយើងមានអាយុវែងនោះ មានអ្វីខ្លះ? សូមតាមដានដូចតទៅ៖

1. មានសតិស្មារតី ភាពម៉ឺងម៉ាត់ហ្មត់ចត់ និងភាពប្រយ័ត្នប្រយែង
នៅឆ្នាំ2012 សៀវភៅ The Longevity Project បានធ្វើការស្រាវជ្រាវពិនិត្យនៅលើមនុស្សដែលមានអាយុលើស 80ឆ្នាំ ហើយបានរកឃើញថា អ្នកដែលមានលក្ខណៈនិស្ស័យម៉ឺងម៉ាត់ហ្មត់ចត់ល្អិតល្អន់ រស់នៅប្រកបដោយសតិបញ្ញានឹងមានអាយុកាន់តែវែងឡើង។ អ្នកស្រាវជ្រាវបានចង្អុលបង្ហាញតទៀតថា បុគ្គលភាព និងលក្ខណៈនិស្ស័យកាលពីវ័យកុមារអាចប្រាប់ពីអំឡុងពេលនៃជីវិតរបស់មនុស្សយើងបាន។ មនុស្សដែលស្ថិតនៅក្នុងវ័យកំលោះ ក្រមុំម្នាក់ណាដែលរស់នៅយ៉ាងមានសតិស្មារតី មានភាពម៉ឺងម៉ាត់ហ្មត់ចត់ និងមានភាពទទួលខុសត្រូវលើខ្លួនឯង ច្រើនតែមានអាយុវែងជាងគេបំផុត នេះគឺដោយសារតែមនុស្សដែលមានចរិតលក្ខណៈនិស្ស័យបែបនេះចេះមើលថែទាំជីវិតខ្លួនឯងបានយ៉ាងល្អ និងចេះចៀសគេចពីភាពប្រថុយប្រថានក្នុងជីវិតទៀតផង។

2. អារម្មណ៍ល្អ និងងាយសើចសប្បាយ
អ្នកស្រាវជ្រាវពីមហាវិទ្យាល័យ យេស៊ីវ៉ា បានធ្វើការពិសោធលើរឿងការមានអាយុវែងនេះ ដោយបានតាមដានសង្កេតមើលទង្វើ និងទម្លាប់របស់ក្រុមមនុស្សចាស់ៗ ហើយបានរកឃើញថា មនុស្សវ័យចំណាស់ភាគច្រើន ច្រើនតែមានអារម្មណ៍ល្អ និងជាមនុស្សដែលងាយអស់សំណើច ហើយអ្នកដែលមានអាយុលើស100ឆ្នាំ ជាង230នាក់ក៏មាននិស្ស័យឆាប់អស់សំណើចបែបនេះដូចគ្នាដែរ ដែលរឿងនេះធ្វើឱ្យគេល្មមអាចវាយតម្លៃបានថា អាការងាយញញឹម និងងាយសើចនេះ គឺជាគុណសម្បត្តិលេចធ្លោមួយដែលឆ្លុះបញ្ចាំងឱ្យឃើញពីទស្សនគតិដ៏ល្អរបស់បុគ្គលម្នាក់នោះ ហើយការរស់នៅប្រកបដោយទស្សនគតិដែលល្អនេះ នឹងធ្វើឱ្យអារម្មណ៍និងផ្លូវចិត្តភ្លឺថ្លាស្រឡះ ដែលវានឹងទៅពាក់ព័ន្ធជាមួយនឹងសុខភាពក្នុងចំណុចល្អៗជាច្រើនទៀតផង។

3. មានទំនាក់ទំនង និងអំណោយទានល្អ
លទ្ធផលនៃការវិភាគស្រាវជ្រាវដែលបានបោះពុម្ពផ្សាយនៅក្នុងទស្សនាវដ្តី PloS Medicine កាលពីឆ្នាំ2010 បានបង្ហាញឱ្យឃើញថា ក្រុមមនុស្សដែលមានទំនាក់ទំនងល្អ និងមានអំណោយទានល្អ អាចមានអាយុវែងឡើងរហូតដល់ 50% ដោយអត្ថបទនោះបានអធិប្បាយទៀតថា ការចងសម្ពន្ធភាពរវាងបុគ្គល មិនមែនមានផលប្រយោជន៍តែខាងផ្នែកផ្លូវចិត្តរបស់យើងប៉ុណ្ណោះទេ តែនៅមានផលប្រយោជន៍ល្អៗខាងផ្នែកសុខភាពរាងកាយទៀតផង ព្រោះការបានចេញទៅនៅក្នុងសង្គមដែលសម្បូរបែប នឹងធ្វើឱ្យយើងទទួលបានទស្សនៈថ្មីៗ បានដឹងពីព័ត៌មាន និងសារៈសំខាន់ផ្សេងៗ និងថែមទាំងបានរួមផ្លាស់ប្តូរអារម្មណ៍រវាងគ្នាទៅវិញទៅមកទៀតផង។

4. សម្លឹងមើលអ្វីៗជុំវិញខ្លួនក្នុងន័យវិជ្ជមាន
មនុស្សដែលមានលក្ខណៈនិស្ស័យសម្លឹងអ្វីៗជុំវិញខ្លួនក្នុងន័យល្អ ក៏មានសញ្ញាថានឹងមានអាយុវែងដូចគ្នាដែរ ដោយអ្នកវិភាគទាំងនោះបានធ្វើការអធិប្បាយគាំទ្រលទ្ធផលនៃការវិភាគរបស់ខ្លួនថា បុគ្គលភាព និងលក្ខណៈនិស្ស័យសម្លឹងអ្វីៗជុំវិញខ្លួនក្នុងន័យល្អនេះ នឹងធ្វើឱ្យយើងមានទស្សនគតិបែបវិជ្ជមាន ហុចផលឱ្យផ្លូវចិត្ត និងសុខភាពរាងកាយបានទទួលប្រយោជន៍ល្អផងដែរ។

5. មានសេចក្តីសុខជាប់ជានិច្ច
គេនិយាយថា មនុស្សដែលមានសេចក្តីសុខជាប់ជានិច្ច ផ្លូវចិត្តក៏នឹងភ្លឺថ្លាដែរ នោះគឺជារឿងពិត… មនុស្សអាយុច្រើនដែលមានសេចក្តីសុខជាប់ជានិច្ច មានអត្រានៃការស្លាប់ថយចុះ 35% ឬមានអាយុវែងថែមឡើងទៀត5ឆ្នាំ។ អ្នកវិភាគស្រាវជ្រាវបានវាយតម្លៃលើមនុស្សអាយុច្រើនជាង3,000នាក់ ដោយបានធ្វើការសង្កេតអត្រាសេចក្តីសុខរបស់ពួកគេរហូតពេញ1ថ្ងៃ និងទន្ទឹងរង់ចាំ និងសង្កេតមើលលទ្ធផលនៃការវិភាគ 5ឆ្នាំតមកទៀត ទីបំផុតលទ្ធផលនៃការវិភាគនោះបានធ្វើឱ្យពួកគេនឹកស្ងើចក្នុងចិត្តយ៉ាងខ្លាំង ដោយសារតែសេចក្តីសុខអាចធ្វើឱ្យមនុស្សចាស់កាន់តែមានអាយុវែងឡើងបានពិតប្រាកដមែន សូម្បីតែអ្នកដែលកំពុងមានជំងឺរ៉ាំរ៉ៃ ក៏នៅអាចប្រគងជីវិតខ្លួនឱ្យរស់បាន5ឆ្នាំទៀតដែរ។

6. ចូលចិត្តចូលរួមក្នុងសង្គម
នៅឆ្នាំ2009 លទ្ធផលនៃការស្រាវជ្រាវមួយត្រូវបានផ្សព្វផ្សាយនៅក្នុងទស្សនាវដ្តីមនុស្សចាស់របស់សហរដ្ឋអាមេរិក ដែលបានរាយការណ៍ថា អ្នកដែលមានអាយុវែងលើស100ឆ្នាំ ដែលភាគច្រើន ច្រើនតែមានទង្វើចូលចិត្តចូលរួមក្នុងសង្គម មានអត្រាប្រថុយនឹងការកើតរោគសរសៃប្រសាទតិចបំផុត និងមានភាពស្ថិតស្ថេររឹងមាំខាងអារម្មណ៍ខ្ពស់ ធ្វើឱ្យចេះចាត់ការនឹងសភាវធុញថប់តានតឹងបានល្អជាងអ្នកដែលចូលចិត្តតែសម្ងំខ្លួនមិនចូលចិត្តចេញទៅក្រៅ៕

October 24, 2019

Author: ធឿន មករា