ធឿន មករា - La Reine Media

សេដ្ឋកិច្ចកម្ពុជាឆ្នាំ2019 មានកំណើន 7% ជាមួយនឹងអត្រាអតិផរណា ត្រឹមតែ 2.5%

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្តែងនូវការពេញចិត្តចំពោះសេដ្ឋកិច្ចរបស់កម្ពុជាក្នុងឆ្នាំ2019 មានកំណើន 7% ជាមួយនឹងអត្រា អតិផរណាត្រឹមតែ 2.5%ប៉ុណ្ណោះ ដែលនេះគឺជាសេដ្ឋកិច្ចដ៏ល្អមួយសម្រាប់កម្ពុជា។ នេះបើតាមការថ្លែងរបស់សម្តេចតេជោ ហ៊ុន សែន ក្នុងឱកាសសម្តេចចែកសញ្ញាបត្រដល់និស្សិតសាកលវិទ្យាល័យ CUS កាលពីថ្ងៃពុធ ទី11 ខែធ្នូនេះ នៅមជ្ឈមណ្ឌល និងសន្និបាតកោះពេជ្រ។

សម្ដេចតេជោ ហ៊ុន សែន បានមានប្រសាសន៍បញ្ជាក់ថា៖“បើនិយាយពីទំហំសេដ្ឋកិច្ចឆ្នាំ2019 ទំហំសេដ្ឋកិច្ចរបស់យើងមានត្រឹមតែ 24ពាន់លានដុល្លារអាមេរិក ដូច្នេះប្រជាពលរដ្ឋរបស់យើងទទួលបានត្រឹមតែជាង 1,600ដុល្លារអាមេរិកប៉ុណ្ណោះក្នុងម្នាក់។ ប៉ុន្តែទំហំសេដ្ឋកិច្ចក្នុងពេលដែលថវិកាជាតិត្រូវបានអនុម័ត សម្រាប់ការគ្រប់គ្រងឆ្នាំ2020 ទំហំសេដ្ឋកិច្ចរបស់យើងនឹងឡើងដល់ជិត 30ពាន់លានដុល្លារអាមេរិក ដែលប្រជាពលរដ្ឋម្នាក់ៗនឹងទទួលបានលើស 1,800ដុល្លារអាមេរិក”។

សម្ដេចតេជោ នាយករដ្ឋមន្ត្រីបានមានប្រសាសន៍បន្តថា៖ “បើនិយាយពីចំណូលចរន្តវិញ ខ្ញុំអាចនិយាយដោយមោទនភាពថាកំណែទម្រង់ដែលយើងបានធ្វើ ទទួលបានផលល្អណាស់ នៅត្រង់ថា ទី1 ឆ្នាំនេះចំណូលគយក្នុងច្បាប់ថវិកាសម្រាប់ការគ្រប់គ្រងឆ្នាំ2019 ផែនការចំណូលគយត្រូវរកឱ្យបាន2,260លានដុល្លារអាមេរិក ប៉ុន្តែមកដល់ថ្ងៃទី9 ខែធ្នូ ឆ្នាំ2019 យើងរកបានរហូតទៅដល់ 3,013លានដុល្លារអាមេរិក បានសេចក្ដីថា លើសផែនការចំនួន 758លានដុល្លារអាមេរិក ស្មើនឹង 33.5% រួចស្រេចទៅហើយ។ បើតាមការប៉ាន់ស្មានចំណូលគយ អាចលើសផែនការជាង 800លានដុល្លារអាមេរិក”។

សម្តេចតេជោនាយករដ្ឋមន្ត្រីបានថ្លែងបន្តទៀតថា៖“ទី2 សម្រាប់ចំណូលខាងផ្នែកពន្ធដារវិញ គឺត្រូវរកឱ្យបាន 2,288លានដុល្លារនៃច្បាប់ថវិកា2019 ប៉ុន្តែឥឡូវនេះ រកចំណូលបាន 2,634 លានដុល្លាររួចស្រេចទៅហើយ ដែលលើសការគ្រោងទុក 345លានដុល្លារ។ អ៊ីចឹងទាំង 2ផ្នែកនេះ ត្រូវរកចំណូលសរុបឱ្យបាន 4,548 លានដុល្លារក្នុងច្បាប់ថវិកា ក៏ប៉ុន្តែមកដល់ពេលនេះ យើងរកបាន 5,647លានដុល្លារ។ យើងបានលើសផែនការ រួចស្រេចទៅហើយ លើស 1,103លានដុល្លារ នៅសល់1ខែចុងក្រោយនេះ ថវិកាដែលយើងទទួលបានលើសផែនការ ប្រមាណជាង 1,300លានដុល្លារ។ នេះជាចំណូលសារពើពន្ធ ឯចំណូលមិនមែនសារពើពន្ធ គឺមិនទាន់បានយកមកគិតនោះទេ”។

សម្រាប់ចំណូលពន្ធគយ សម្តេចតេជោ ហ៊ុន សែនបានឱ្យដឹងថា នៅឆ្នាំ2019 នេះ ចំណូលពន្ធគយដែលបានមកពីការនាំចូលរថយន្ត និងម៉ូតូ មានរហូតដល់52% ដោយសារស្ថានភាពជីវភាព របស់ប្រជាពលរដ្ឋកម្ពុជាមានភាពល្អប្រសើរ ពួកគាត់មានលទ្ធភាពទិញមធ្យោបាយធ្វើដំណើរកាន់តែច្រើន។ សម្តេចតេជោ ក៏បានសំណូមពរដល់អ្នកជាប់កាតព្វកិច្ចពន្ធទាំងឡាយ ត្រូវតែនាំគ្នាចូលរួមបង់ពន្ធជូនរដ្ឋ ហើយប្រាក់ដែលបានពីការបង់ពន្ធនេះ គឺយកទៅប្រើប្រាស់សម្រាប់ការធ្វើផ្លូវ និងសាងសង់មន្ទីរពេទ្យ ជាដើម។

សម្ដេចតេជោនាយករដ្ឋមន្ត្រី បានថ្លែងបញ្ជាក់ទៀតថា ក្រៅពីនេះយើងមានថវិកាសម្រាប់ចាយភ្លាមៗចំនួនប្រមាណ 3,500លានដុល្លារ ដោយមិនបានគិតអំពីទុនបម្រុងអន្តរជាតិប្រមាណជា 15ពាន់លានដុល្លារ ជាមួយនឹងមាស 30តោននោះទេ។ នេះហើយជាយន្តការ នៃការគ្រប់គ្រងថវិកា តាមរយៈអគ្គបញ្ជាការតែមួយ និងអគ្គសេនាធិការតែមួយ ដែលអគ្គបញ្ជាការតែមួយ គឺនាយករដ្ឋមន្ត្រី និងអគ្គសេនាធិការតែមួយ គឺរដ្ឋមន្ត្រីក្រសួងសេដ្ឋកិច្ច និងហិញ្ញវត្ថុ ដែលគ្រប់គ្រងហ្មត់ចត់។

ជាមួយគ្នានេះ សម្តេចក៏បានថ្លែងទៀតដែរថាកំណើនសេដ្ឋកិច្ចរបស់កម្ពុជា ស្ថិតក្នុងលំដាប់ខ្ពស់ជាងគេក្នុងតំបន់អាស៊ានសម្រាប់ឆ្នាំ2018 ហើយឆ្នាំ2019 នេះ ក៏នៅតែបន្តខ្ពស់ជាងគេក្នុងតំបន់អាស៊ានផងដែរ ដោយឡែកសម្រាប់ឆ្នាំ2020 ខាងមុខនេះ ចំណូលប្រចាំឆ្នាំសម្រាប់ប្រជាពលរដ្ឋម្នាក់ៗ នឹងកើនដល់ជាង 1,800ដុល្លារ។

សម្ដេចតេជោ បានថ្លែងថា តាមការវាយតម្លៃ កាលពីចុងខែវិច្ឆិកាកន្លងមក ដោយក្រុមប្រឹក្សាធនាគារជាតិកម្ពុជា និងអ្នកឯកទេសបរទេសបានឱ្យដឹងថា កំណើនសេដ្ឋកិច្ចកម្ពុជាឆ្នាំ2019 អាចឆ្លុះបញ្ចាំងបានថា មានចំនួន7,1% ជាមួយនឹងអត្រាអតិផរណាត្រឹមតែ 2.5%តែប៉ុណ្ណោះ។ នេះជារឿងដែលមានសារៈសំខាន់មួយសម្រាប់កម្ពុជាយើង៕

December 21, 2019

ហេតុអ្វីគួរបង្កើតបណ្ណាល័យនៅក្នុងផ្ទះ?

ការអានត្រូវបានគេមើលឃើញថា ជាវិធីសាស្ត្រប្រកបដោយសក្តានុពលក្នុងការអភិវឌ្ឍមនុស្សលើពិភពលោក ព្រោះមិនថាប្រទេសកំពុងអភិវឌ្ឍន៍ ឬអភិវឌ្ឍន៍ហើយនោះទេ បច្ចុប្បន្ននេះគេតែងតែជំរុញគ្រប់លទ្ធភាពដើម្បីឱ្យមនុស្សស្រឡាញ់ការអានឱ្យបានច្រើន។ នៅក្នុងប្រទេសមួយចំនួន ជាពិសេសបស្ចិមប្រទេស គេនិយមដាក់បណ្ណាល័យនៅក្នុងបន្ទប់ទទួលភ្ញៀវ ឬយ៉ាងហោចណាស់ក៏មានបណ្ណាល័យតូចមួយនៅក្នុងផ្ទះដើម្បីប្រើប្រាស់ក្នុងគ្រួសារដែរ ខណៈនៅប្រទេសកម្ពុជា និងនៅតំបន់អាស៊ីអាគ្នេយ៍ មិនទាន់សម្បូអ្នកបង្កើតបណ្ណាល័យនៅក្នុងផ្ទះនៅឡើយ។

ពាក់ព័ន្ធនឹងបញ្ហានេះ លោក ប៊ួយ សុធន ស្ថាបនិកហាងលក់សៀវភៅ My Book Shop បានលើកឡើងថា មនុស្សគ្រប់រូបសុទ្ធតែដឹងហើយថា ពិភពលោកទាំងមូលមានការផ្លាស់ប្តូរ និងរីកចម្រើនលឿនខ្លាំងណាស់ រួមទាំងសង្គមកម្ពុជាផងដែរ។ បច្ចុប្បន្ននេះ យើងកំពុងឈានជើងចូលជាបណ្តើរៗទៅក្នុងបដិវត្តន៍ឧស្សាហកម្មទី4 ដូច្នេះទាមទារឱ្យយើងព្យាយាមរិះរកមធ្យោបាយនានា ជាពិសេសការសិក្សារៀនសូត្រដើម្បីទៅឱ្យឆ្ងាយ ឱ្យផុតពីអ្វីដែលមនុស្សយន្ត ឬបច្ចេកវិទ្យាអាចធ្វើជំនួសមនុស្សបាន នោះគឺការប្រើប្រាស់បញ្ញា គំនិត ស្មារតី និងការស្រមើស្រមៃដែលគ្មានដែនកំណត់របស់យើង។

ចំណុចនេះ អ្នកជំនាញអភិវឌ្ឍន៍សង្គមលើពិភពលោកបានឯកភាពដូចៗគ្នា។ ការងារដែលដំណើរការដដែលៗ វិលចុះវិលឡើង នឹងត្រូវជំនួសដោយបច្ចេកវិទ្យា។ ហេតុនេះ ការបង្កើតទម្លាប់អានសៀវភៅ គឺជារឿងចាំបាច់ ហើយប្រសិនបើអាចមានការរៀបចំបណ្ណាល័យតូច ឬធ្នើរទូដាក់សៀវភៅសមរម្យមួយនៅក្នុងផ្ទះផងនោះ គឺជារឿងប្រពៃណាស់សម្រាប់អនាគតវែងឆ្ងាយរបស់គ្រួសារយើង ហើយការបណ្តុះទម្លាប់និស្ស័យអានពីក្មេងមក គឺជាកត្តាចាំបាច់បំផុតមួយ។

លោក ប៊ួយ សុធន បាននិយាយថា៖ «ប្រសិនបើមានបណ្ណាល័យ និងមានទម្លាប់ល្អក្នុងការអានក្នុងផ្ទះ ក្មេងៗនឹងមានសមត្ថភាពលើការរៀនសូត្រពេញមួយជីវិត ព្រមទាំងមិនខ្វះការងារធ្វើនោះទេនៅពេលពួកគេធំពេញវ័យឡើង»។

លោកសុធន បានបន្ថែមទៀតថា បច្ចុប្បន្ននេះ ថ្វីដ្បិតតែបច្ចេកវិទ្យាអាចធ្វើឱ្យយើងអានបែប ebook ឬ free pdf ក៏ដោយ ក៏ប៉ុន្តែវានៅតែមានគុណសម្បត្តិ និងគុណវិបត្តិរបស់វា ដែលនៅតែទាមទារឱ្យយើងគួរមានកូនបណ្ណាល័យតូចមួយនៅក្នុងផ្ទះ។ នៅកម្ពុជា ការប្រើប្រាស់ ebook នៅមិនទាន់សម្បូរបែប និងមានចំនួនអ្នកចេះប្រើតិចនៅឡើយ ហើយការអានតាមអ៊ីនធើណិត ឬ Ebook ច្រើនតែជាចំណេះដឹង ឬព័ត៌មានដែលមានប្រភពមិនច្បាស់លាស់ ដែលទាមទារឱ្យអ្នកអានជាច្រើនងាកមកអានសៀវភៅដែលបោះពុម្ពផ្សាយវិញ។ ម្យ៉ាងវិញទៀតសម្រាប់ក្មេងៗ វាមិនមែនជារឿងល្អពេកនោះទេ ដែលបច្ចុប្បន្ននេះយើងកំពុងព្យាយាមឱ្យគាត់នៅឆ្ងាយពីបច្ចេកវិទ្យា ដែលប៉ះពាល់ដល់ការរីកលូតលាស់ផ្នែកបញ្ញាស្មារតីរបស់គាត់ ហើយឱ្យគាត់មើលសៀវភៅតាមប្រព័ន្ធបច្ចេកវិទ្យានោះ។ ហេតុនេះ សៀវភៅបោះពុម្ពអាចជាជម្រើសល្អបំផុតដែលអាចធ្វើឱ្យគាត់បង្កើតទម្លាប់ល្អប្រចាំថ្ងៃផង និងវាជាគ្រឿងលម្អផ្ទះផង ប្រសិនបើយើងចេះរៀបចំវាឱ្យមានរបៀបរៀបរយស្អាតបាតនៅក្នុងផ្ទះ។

បន្ថែមពីលើនេះ ម្ចាស់ស្ថាប័នចែកចាយសៀវភៅខាងលើ បានលើកឡើងថា បច្ចុប្បន្ននេះទម្លាប់អានសៀវភៅ ឬរៀបចំសៀវភៅនៅក្នុងផ្ទះ បានចាប់ផ្តើមកើតមានច្រើនហើយ តែភាគច្រើនគ្រួសារដែលរៀបចំបែបនេះ ជាគ្រួសារដែលមានជីវភាពធូរធារ ឬមានការអប់រំខ្ពស់សមរម្យឡើងប៉ុណ្ណោះដែលពួកគាត់ចាប់ផ្តើមយល់ដឹងពីគុណតម្លៃរបស់សៀវភៅ។ តែទោះជាយ៉ាងនេះក្តី ក៏យើងសង្កេតឃើញផងដែរថា គ្រួសារធូរធារមិនទាំងអស់ទេដែលយល់ដឹងពីសៀវភៅ ហើយក៏មិនមែនគ្រប់គ្រួសារធម្មតាៗនោះដែរ ដែលមិនសូវផ្តល់តម្លៃទៅលើសៀវភៅ គ្រាន់តែគ្រួសារកម្រិតមធ្យម ឬក្រោមមធ្យម ភាគច្រើនគាត់មិនសូវផ្តោតខ្លាំងលើការអានតែប៉ុណ្ណោះ។

សម្រាប់មនុស្សមួយចំនួន នៅពេលនិយាយពីការទិញសៀវភៅ គាត់តែងតែលើកឡើងថាជីវភាពរបស់គាត់មិនទាន់ដល់ពេលត្រូវចំណាយលើការទិញសៀវភៅទេ តែស្ថានភាពជាក់ស្តែងគាត់បានចំណាយច្រើនលើរឿងផ្សេងៗដែលមិនសូវមានប្រយោជន៍។ មានអ្នកខ្លះ គាត់ចំណាយថវិកាជាច្រើនលើការកម្សាន្ត ឬប្រើប្រាស់ជីវិតដោយមិនផ្តល់តម្លៃលើចំណេះដឹង។ តាមពិតទៅ ការទិញសៀវភៅមិនមែនត្រូវចំណាយលុយរាប់ពាន់ រាប់ម៉ឺនដុល្លារភ្លាមៗដើម្បីទិញនោះទេ។ ប្រសិនបើមានការចាប់ផ្តើមល្អ គាត់អាចសន្សំម្តងបន្តិចៗ ដែលក្រោយពេលគាត់អានច្រើន គាត់នឹងមានគំនិតអភិវឌ្ឍន៍ជីវភាពបានកាន់តែប្រសើរឡើងទៅវិញទេ។

ចំពោះការផ្លាស់ប្តូរទម្លាប់ប្រជាជនខ្មែរឱ្យងាកចំណាប់អារម្មណ៍ពីការនិយមតែគ្រឿងស្រវឹង និងសម្ភារមានតម្លៃ មកជាការអប់រំ ឬតាំងលម្អសៀវភៅក្នុងគ្រួសារវិញនោះ លោក សុធន បានបញ្ជាក់ថា យើងទាំងអស់គ្នាគួរធ្វើការផ្សព្វផ្សាយឱ្យបានទូលំទូលាយ ជាពិសេសបណ្តាញផ្សព្វផ្សាយ ដែលជាអ្នកដើរតួនាទីសំខាន់ក្នុងការអប់រំប្រជាជនតាមគ្រប់លទ្ធភាព។ ម្យ៉ាងវិញទៀត ការផ្តល់ភាពជាគំរូក៏សំខាន់ផងដែរ សម្រាប់ការផ្លាស់ប្តូរជាវិជ្ជមាន ដូចជាអាណាព្យាបាល គ្រួបង្រៀន អ្នកគ្រប់គ្រងក្រុមហ៊ុន បុគ្គលសាធារណៈ និងសិល្បករជាដើម គួរចាប់ផ្តើមបង្ហាញគំរូល្អ ក្នុងការបំផុសពីការអានដើម្បីឱ្យសាធារណជនបានឃើញ។ អ្នកទាំងអស់នោះ ភាគច្រើនជាអ្នកមានឥទ្ធិពលចំពោះសង្គម ហេតុនេះប្រសិនបើយើងឃើញថា ពួកគាត់ចាប់ផ្តើមអានដើម្បីទទួលបានភាពជោគជ័យក្នុងជីវិតហើយនោះ នឹងមានមនុស្សកាន់តែច្រើនឡើងៗចាប់ផ្តើមងាកមករកសៀវភៅ ច្រើនជាងសម្ភារនិយម ដើម្បីបង្ហាញពីភាពថ្លៃថ្នូរ ឬហ៊ឺហាជាដើម។ ចំណែកឯវិធីសាស្ត្រសំខាន់មួយផ្សេងទៀតនោះ គឺគួរមានការលើកទឹកចិត្តតាមគ្រប់រូបភាពចំពោះអ្នកអានសៀវភៅដោយការផ្តល់តម្លៃ និងគោរពចំពោះអ្នកផ្តល់រង្វាន់ ឬកាដូ ជាសៀវភៅ ឬអានសៀវភៅនៅទីសាធារណៈជាដើម៕

December 21, 2019

កម្ពុជានឹងសហការជាមួយសហភាពអារ៉ាប់ ក្នុងការបញ្ជូនពលករទៅធ្វើការក្នុងពេលឆាប់ៗនេះ

ការបញ្ជូនពលករចំណាកស្រុកត្រូវបានគេមើលឃើញថា ជាយន្តការដ៏មានសារៈសំខាន់មួយដើម្បីជំរុញឱ្យប្រជាជនទទួលបានប្រាក់ចំណូលកាន់តែខ្ពស់ ស្របពេលដែលពួកគេក៏ទទួលបានចំណេះដឹងបន្ថែមពីវិស័យកសិកម្ម ក៏ដូចជាឧស្សាហកម្មនៅក្នុងប្រទេសអភិវឌ្ឍន៍ទាំងអស់នោះមកវិញដែរ។ កន្លងមកកម្ពុជាបានចុះអនុស្សរណៈយោគយល់គ្នាជាមួយភាគីកូរ៉េ ភាគីជប៉ុន និងបណ្តាប្រទេសដែលទទួលយកពលករកម្ពុជាមួយចំនួនទៀត ដើម្បីបញ្ជូនពួកគេទាំងនោះទៅធ្វើការហ្វឹកហាត់ការងារ និងបណ្តុះបណ្តាលវិជ្ជាជីវៈ ក៏ដូចជាបម្រើការងារនៅក្នុងប្រទេសទាំងអស់នោះដែរ។

ថ្មីៗនេះព្រះរាជាណាចក្រកម្ពុជា បានឈានមួយជំហានថ្មីទៀតលើវិស័យការងារ និងបណ្តុះបណ្តាលវិជ្ជាជីវៈ ដោយគ្រោងនឹងចុះអនុស្សរណៈនៃការយោគយល់គ្នាជាមួយនឹងសហភាពអារ៉ាប់រួម ឬអារ៉ាប់ អេមីរ៉េត ដើម្បីបង្កើនកិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈសម្រាប់ត្រៀមបញ្ជូនពលករកម្ពុជាទៅធ្វើការងារនៅអារ៉ាប់រួមដែលជាប្រទេសអភិវឌ្ឍន៍ និងមានការរស់នៅល្អប្រសើរ។

ឯកឧត្តម អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានលើកឡើងថា នៅមុនជំនួបពិភាក្សាជាមួយនឹងឯកឧត្តម Saif Abdulla Mohammaed Khalfan Alshamisi ឯកអគ្គរាជទូតនៃប្រទេសអារ៉ាប់ដែលមាននិវាសនដ្ឋាននៅទីក្រុងបាងកកនោះ ភាគីអារ៉ាប់បានព្រាងអនុស្សរណៈនៃការយោគយល់គ្នាលើវិស័យការងារ និងបណ្តុះបណ្តាលវិជ្ជាជីវៈមួយផ្ញើមកកាន់ភាគីកម្ពុជារួចហើយ ខណៈបច្ចុប្បន្នក្រុមការងារជំនាញរបស់កម្ពុជា កំពុងត្រួតពិនិត្យយ៉ាងយកចិត្តទុកដាក់។

ឯកឧត្តម អុិត សំហេង បានមានប្រសាសន៍ថា៖ «នៅពេលអនុស្សរណៈនោះត្រូវបានចុះហត្ថលេខារួចរាល់ វានឹងក្លាយជាការផ្តល់ឱកាសថ្មីបន្ថែមទៀតដល់ប្រជាពលរដ្ឋកម្ពុជាដែលចង់ស្វែងរកការងារធ្វើនៅក្រៅប្រទេស និងទទួលបានប្រាក់ចំណូលខ្ពស់»។

ឯកឧត្តមរដ្ឋមន្ត្រីបានបន្ថែមទៀតថា ទោះបីជានៅក្នុងប្រទេសកម្ពុជាមានការងារជាច្រើនដែលត្រូវការកម្លាំងពលកម្ម ឬកន្លែងខ្លះខ្វះកម្លាំងពលកម្មបន្ថែមទៀតក្ដី ក៏រាជរដ្ឋាភិបាលកម្ពុជានៅតែផ្តល់ និងស្វែងរកឱកាសការងារនៅក្រៅប្រទេសបន្ថែមដល់ប្រជាជន ដើម្បីឱ្យពួកគេមានលទ្ធភាពក្នុងការស្វែងរកចំណូល និងចំណេះដឹងពីប្រទេសអភិវឌ្ឍន៍នានា។ ការចេញទៅធ្វើការងារនៅក្រៅប្រទេស នឹងជួយឱ្យពលករកម្ពុជាទទួលបានប្រាក់ចំណូលខ្ពស់ រួមទាំងបទពិសោធជំនាញវិជ្ជាជីវៈថែមទៀតផង ដែលនឹងធ្វើឱ្យពួកគេងាយស្រួលក្នុងការប្រកបរបរ ឬធ្វើការងារនៅក្នុងស្រុក នៅពេលដែលពួកគេត្រឡប់មកពីបំពេញការងារនៅក្រៅប្រទេសវិញ។

គួរបញ្ជាក់ផងដែរថា ប្រទេសនៅក្នុងតំបន់ជាច្រើន បានជំរុញប្រជាជនរបស់គេឱ្យទទួលបានការងារធ្វើនៅក្រៅប្រទេស ដើម្បីជំរុញផ្នែកមួយនៃសេដ្ឋកិច្ចជាតិ ព្រោះប្រាក់ចំណូលដែលរកបានពីការធ្វើការងារនៅក្រៅប្រទេស នឹងត្រូវផ្ញើមកកាន់សាច់ញាតិនៅប្រទេសកំណើតវិញ។ ហេតុនេះសាច់ប្រាក់ទាំងអស់នោះនឹងត្រូវចរាចរណ៍នៅប្រទេសកំណើតនេះ ដែលធ្វើឱ្យសេដ្ឋកិច្ចកាន់តែល្អប្រសើរឡើង។

កន្លងមកសម្តេចនាយករដ្ឋមន្ត្រីក៏ធ្លាប់បានលើកឡើងផងដែរថា ប្រទេសដែលទទួលពលករ ក៏មានគោលការណ៍បញ្ជូនប្រជាជនរបស់ខ្លួនទៅក្រៅប្រទេសដែរ។ ជាក់ស្តែង ដូចជាប្រទេសថៃជាដើម ដែលប្រទេសនេះបានបញ្ជូនប្រជាជនទៅប្រទេសដែលមានចំណូលខ្ពស់ៗ ហើយស្រូបទាញកម្លាំងពលកម្មដែលមានតម្លៃទាបជាងដើម្បីបំពេញទីផ្សារការងារនៅក្នុងប្រទេសខ្លួនឯងវិញ។

ឯកឧត្តម Abdulla Mohammed ឯកអគ្គរាជទូតនៃប្រទេសអារ៉ាប់រួម បានលើកឡើងថា នៅប្រទេសអារ៉ាប់ រួមមានប្រជាជនរស់នៅយ៉ាងច្រើន និងចម្រុះជាតិសាសន៍ ក្នុងនោះមានប្រមាណ 200សញ្ជាតិដែលកំពុងរស់នៅ ប្រកបការងារ ធ្វើអាជីវកម្ម ពាណិជ្ជកម្ម និងទេសចរណ៍នៅទីនោះ។ នៅពេលថ្មីៗនេះ ប្រទេសអារ៉ាប់រួមក៏បានចេញនូវគោលនយោបាយគាំទ្រអ្នកទាំងអស់នោះឱ្យមានសិទ្ធិសេរីភាព និងផលប្រយោជន៍ជាច្រើន ដើម្បីជំរុញឱ្យមានភាពសុខសាន្តក្នុងការរស់នៅ ការធ្វើការងារ និងការប្រកបអាជីវកម្មជាដើម៕

December 21, 2019

រដ្ឋមន្ត្រីនៃក្រសួង2 បង្ហាញពីភាពសុទិដ្ឋិនិយមចំពោះព្រឹត្តិការណ៍ពិព័រណ៍សៀវភៅឆ្នាំនេះ

ឆ្នាំ2019នេះ ជាឆ្នាំទី8 ហើយដែលកម្ពុជាបានរៀបចំតាំងពិព័រណ៍សៀវភៅ ដែលគេសង្កេតឃើញថា មានអ្នកគាំទ្រកាន់តែច្រើនឡើងៗពី 1ឆ្នាំទៅ 1ឆ្នាំ។

ក្នុងនោះឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងឯកឧត្តម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានបង្ហាញពីការមើលឃើញ និងសុទិដ្ឋិនិយមយ៉ាងខ្លាំងចំពោះព្រឹត្តិការណ៍ថ្នាក់ជាតិដ៏មានសារៈសំខាន់នេះ។

ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានបានលើកឡើងថា ចំនួនមនុស្សដែលចូលរួមពិធីតាំងពិព័រណ៍សៀវភៅលើកទី8 នេះមានកំណើនយ៉ាងខ្ពស់ បើប្រៀបធៀបនឹងកាលពីប៉ុន្មានឆ្នាំមុន។

កាលពីការរៀបចំពិព័រណ៍សៀវភៅលើកទី1 លើកទី2 និងលើកទី3 មានមនុស្ស និងស្តង់មិនច្រើនបែបនេះទេ តែនៅពេលនេះមានអ្នកចូលរួមដែលភាគច្រើនជាយុវជនជាច្រើនដែលបានមកមើល និងទិញសៀវភៅ។ ឯកឧត្តមបញ្ជាក់ថា ខុសពីការមើលឃើញរបស់មនុស្សមួយចំនួនដែលគិតថា ក្មេងៗមិនចូលចិត្តអានសៀវភៅ។ ឯកឧត្តមមើលឃើញថា ក្មេងៗបច្ចុប្បន្ននេះ កាន់តែច្រើនហើយ ដែលចូលចិត្តអានសៀវភៅ។ ការដែលធ្វើឱ្យក្មេងៗចូលចិត្តអានសៀវភៅនេះ គឺបណ្តាលមកពីគុណភាពនៃការបោះពុម្ពផ្សាយនាពេលបច្ចុប្បន្ននេះ មានគុណភាពល្អជាងមុនឆ្ងាយណាស់ ហើយយើងក៏មានយុទ្ធនាការជាច្រើនក្នុងការផ្សព្វផ្សាយ និងជាចំណុចចាប់ផ្តើមដ៏ល្អសម្រាប់ជំរុញការអាន។

ឯកឧត្តម ខៀវ កាញារីទ្ធ បានមានប្រសាសន៍ថា៖ «បើនិយាយពីចំណេះដឹង ខ្ញុំតែងតែនិយាយពីចំណេះ3 គឺចំណេះដឹង ចំណេះធ្វើ និងចំណេះគិត។ ក្នុងនោះចំណេះគិត ជាផ្នែកសំខាន់ជាងគេ ព្រោះជាផ្នែកដែលជំរុញឱ្យសង្គមមានការអភិវឌ្ឍខ្លាំង ហើយចំណេះគិតនេះកើតឡើងពីការអាន»។

ឯកឧត្តមរដ្ឋមន្ត្រីក្រសួងព័ត៌មានបានបញ្ជាក់ផងដែរថា ការដែលប្រជាជន ជាពិសេសយុវវ័យចាប់ផ្តើមស្រឡាញ់សៀវភៅ និងចាប់ផ្តើមចូលចិត្តអាន វាជាសញ្ញាណវិជ្ជមានមួយដែលបង្ហាញពីការឈានឆ្ពោះទៅរកសង្គមមួយដែលមានអារ្យធម៌ និងឈានទៅរកគំនិតច្នៃប្រឌិតជាច្រើនផ្សេងទៀតនាពេលអនាគត។ ជាក់ស្តែង នៅពេលមនុស្សចេះស្រឡាញ់ការអានច្រើន យើងនឹងចាប់ផ្តើមស្រឡាញ់មនុស្សជាតិ ដែលវាជាចំណុចចាប់ផ្តើមនៃសង្គមមួយដែលមានភាពចាស់ទុំ។

ទោះជាយ៉ាងនេះក្តី ឯកឧត្តមក៏បានបង្ហាញផងដែរ ពីចំណុចដែលត្រូវប្រុងប្រយ័ត្នមួយក្នុងសង្គមថា នាពេលបច្ចុប្បន្ននេះមានបណ្តាញសង្គមកើតឡើង ដែលធ្វើឱ្យយុវជនជំនាន់ក្រោយសង្គ្រាម ដែលមិនសូវសម្បូរឯកសារអាន និងប្រជាជនមួយចំនួន បានចាប់ផ្តើមអាន និងទទួលព័ត៌មានតាម Facebook។

ពាក់ព័ន្ធនឹងបញ្ហានេះ អ្នកចិត្តវិទូបានលើកឡើងថា ការរៀន និងការមើលតាម Facebook ជារឿងគ្រោះថ្នាក់ ព្រោះនេះជាចំណេះដឹងតាមផ្លូវកាត់។ ភាគច្រើននៃអ្នកដែលមើល ឬជឿតាមប្រភព Facebook គាត់អានតែ 1ឃ្លា 2ឃ្លា គាត់គិតថាគាត់ចេះអស់ហើយ ខណៈស្ថានភាពជាក់ស្តែងនៅមានរឿងជាច្រើនផ្សេងទៀតដែលត្រូវសិក្សាស្វែងយល់។

ចំណែកឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា នៅឆ្នាំនេះការគាំទ្រពិព័រណ៍សៀវភៅមានចំនួនកាន់តែច្រើន បើប្រៀបធៀបនឹងប្រមាណជា 5ឆ្នាំមុន។ នេះជាជោគជ័យមួយដែលពី 1ឆ្នាំទៅ 1ឆ្នាំ សកម្មភាពនេះកាន់តែទទួលបានការគាំទ្រច្រើន ទាំងចំនួនស្តង់ និងអ្នកចូលរួម។ បន្ថែមពីលើនេះ នៅឆ្នាំនេះ មិនត្រឹមតែមានអ្នកចូលរួមជាប្រជាជនខ្មែរប៉ុណ្ណោះទេ តែនៅមានដៃគូជាអ្នកនិពន្ធជាច្រើនដែលពួកគាត់សរសេរជាភាសាបារាំង ភាសាអង់គ្លេស និងភាសារុស្សីជាដើមចូលរួមផងដែរ។ ការចូលរួមទាំងអស់នេះ នឹងបង្ហាញពីភាពកាន់តែសម្បូរបែបសម្រាប់វិស័យអំណាននៅកម្ពុជា ដែលផ្តល់ឱកាសឱ្យអ្នកអានជាប្រជាជនកម្ពុជាអាចជ្រើសរើសឯកសារល្អៗសម្រាប់សិក្សាផងដែរ។

ឯកឧត្តម ហង់ជួន ណារ៉ុន ក៏បានលើកឡើងផងដែរថា ការអានពិតជាមានសារៈសំខាន់ខ្លាំងណាស់សម្រាប់ប្រជាជន និងសម្រាប់សង្គមទាំងមូល។ ហេតុនេះហើយទើបក្រសួងអប់រំ យុវជន និងកីឡា បានរៀបចំកម្មវីធីជាច្រើនដើម្បីជំរុញការអាន ដូចជាកម្មវិធីលើកកម្ពស់អំណាន និងកម្មវិធីពង្រឹងការតែងសេចក្តីជាដើម។ កម្មវីធីលើកកម្ពស់អំណាន ជាកម្មវិធីមួយដែលផ្តល់ឱកាសឱ្យកុមារតូចៗ ចាប់ផ្តើមពង្រឹងសមត្ថភាពតាំងពីថ្នាក់បឋមសិក្សា ដល់នៅពេលពួកគេធំឡើង ពួកគេនឹងអាចប្រើប្រាស់ការអាន ដើម្បីអភិវឌ្ឍជីវិតឱ្យមានអនាគតល្អ។

ចំណែកឯកម្មវិធីពង្រឹងការតែងសេចក្តី គឺជាកម្មវិធីដ៏សំខាន់មួយដើម្បីជំរុញការតែងនិពន្ធនៅក្នុងសាលា ព្រោះដើម្បីតែងសេចក្តីបាន សិស្សត្រូវតែអានឱ្យច្រើនទាំងអក្សរសិល្ប៍ខ្មែរ អក្សរសិល្ប៍បរទេស និងអត្ថបទទូទៅ៕

December 20, 2019

សារៈសំខាន់នៃបច្ចេកវិទ្យា AR នៅក្នុងការអប់រំសម័យទំនើប

ដើម្បីឱ្យការសិក្សាដំណើរការទៅដោយភាពស៊ីជម្រៅ និងច្បាស់លាស់ អ្នកសិក្សាចាំបាច់ត្រូវតែស្វែងយល់ឱ្យច្បាស់ពីឫសគល់សំខាន់ៗនៃមេរៀននីមួយៗ ជាពិសេស គឺមុខវិជ្ជាវិទ្យាសាស្ត្រពិត។ ជាក់ស្តែង កាលពីមុន ដើម្បីឱ្យសិស្សយល់ច្បាស់ពីដំណាក់កាលនីមួយៗនៃម៉ាស៊ីនសម្រាប់មុខវិជ្ជារូបវិទ្យា ឬដើម្បីឱ្យសិស្សយល់ពីដំណាក់កាលនៃការលូតលាស់របស់រុក្ខជាតិក្នុងមុខវិជ្ជាជីវវិទ្យា គ្រូតែងតែនាំសិស្សឱ្យទៅមើលជាក់ស្តែង ឬចំណាយពេលវេលាយូរដើម្បីដោះគ្រឿងម៉ាស៊ីន ជាដើម។

ការធ្វើបែបនេះត្រូវបានគេមើលឃើញថា ជាវិធីបង្រៀនដែលអាចធ្វើឱ្យសិស្សយល់ស៊ីជម្រៅពីដំណាក់កាលលម្អិត និងប្រភពនៃមេរៀនដើម្បីឱ្យពួកគេចងចាំបានល្អ ឬងាយបំបែកទៅជានវានុវត្តន៍ថ្មី។

បច្ចុប្បន្ននេះ ដោយសារតែបច្ចេកវិទ្យាកាន់តែទំនើប អ្នកបច្ចេកវិទ្យាបានព្យាយាមគ្រប់លទ្ធភាពដើម្បីជួយដោះស្រាយបញ្ហានានាក្នុងការរស់នៅរបស់មនុស្ស ដោយក្នុងនោះការអប់រំក៏ជាផ្នែកមួយសំខាន់ផងដែរដែលបច្ចេកវិទ្យាបានចូលរួមដោះស្រាយ។ ក្នុងចំណោមបច្ចេកវិទ្យាអប់រំទាំងអស់ បច្ចេកវិទ្យាបង្ហាញពីហេតុផលជាក់ស្តែង ឬហៅថា AR (Augmented Reality) បានក្លាយជាបច្ចេកវិទ្យាប្រកបដោយសក្តានុពលក្នុងវិស័យអប់រំ។

បច្ចេកវិទ្យា AR ជាបច្ចេកវិទ្យាដែលមានសមត្ថភាពក្នុងការបង្ហាញពីរូបភាពនៃការផ្គុំគ្រឿងម៉ាស៊ីន ដំណាក់កាលនៃការរីកលូតលាស់របស់ជីវិត និងការផ្គុំនៃឧបករណ៍ជាច្រើននៅក្នុងមេរៀន។ ជាមួយនឹងវត្តមានរបស់បច្ចេកវិទ្យាថ្មីនេះ សិស្សមិនចាំបាច់ត្រូវចំណាយពេលច្រើនចុះទៅពិនិត្យ ឬមិនលំបាកស្វែងរកប្រភពនៃឧបករណ៍ជាក់ស្តែងដែលគេបានរៀននោះទេ។ ទោះបីជាកំពុងស្វ័យសិក្សានៅផ្ទះ ក៏ពួកគេអាចយល់ពីគ្រប់ដំណាក់កាល និងដើមហេតុនៃបញ្ហាទាក់ទងនឹងមេរៀនបានយ៉ាងងាយស្រួល និងលម្អិត ព្រោះគេគ្រាន់តែយកទូរស័ព្ទដៃទៅស្គែនពីលើរូបភាពដែលគេដាក់ក្នុងសៀវភៅ នឹងចេញជារូបភាពលម្អិតជា 3D ក្នុងទូរស័ព្ទបង្ហាញពីមេរៀននោះយ៉ាងច្បាស់។

បច្ចុប្បន្ននេះ ដោយសារតែមើលឃើញពីសារៈសំខាន់នៃបចេ្ចកវិទ្យា AR នៅក្នុងវិស័យអប់រំ ក្រសួងអប់រំ យុវជន និងកីឡា នៅកម្ពុជាយើងក៏បានប្រើប្រាស់កម្មវិធីនេះផងដែរជាមួយនឹងកម្មវិធីសៀវភៅសិក្សាចំណេះដឹងទូទៅរបស់រដ្ឋ។ កម្មវិធីដែលអាចប្រើប្រាស់បច្ចេកវិទ្យា AR ដើម្បីស្គែនសម្រាប់សិក្សានោះ គឺត្រូវបានបង្កើតឡើងដំបូងសម្រាប់មុខវិជ្ជាគណិតវិទ្យា រូបវិទ្យា គីមីវិទ្យា ជីវវិទ្យា និងប្រវត្តិវិទ្យា សម្រាប់សិស្សថ្នាក់ទី12។

ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា បច្ចេកវិទ្យា AR ជាបច្ចេកវិទ្យាថ្មីមួយដែលសិស្សខ្មែរអាចយកមកសិក្សាដើម្បីស្វែងយល់ពីចំណុចលម្អិត និងស៊ីជម្រៅរបស់មេរៀននីមួយៗ។ សិស្សគ្រាន់តែយកទូរស័ព្ទដៃស្គែនទៅលើរូបភាពដែលបានបង្ហាញលើសៀវភៅពុម្ព នឹងចេញជាវីដេអូលម្អិតបង្ហាញពីដំណាក់កាលនីមួយៗនៃគ្រឿងផ្គុំ ឬដំណើររឿងណាមួយនៃមេរៀន។ ក្រសួងអប់រំ នឹងបន្តស្វែងរកបច្ចេកវិទ្យាថ្មីៗទៀតដើម្បីជួយសម្រួលដល់ការសិក្សា និងជាពិសេសសម្រាប់សិស្សនៅកម្រិតមធ្យមសិក្សាទុតិយភូមិ។

បច្ចេកវិទ្យាថ្មីនេះមិនត្រឹមតែជាមធ្យោបាយបន្ថែមសម្រាប់ជាជំនួយដល់ការស្វែងយល់របស់សិស្សានុសិស្សនោះទេ តែក៏ជាមូលដ្ឋានដ៏សំខាន់មួយសម្រាប់ការបង្រៀនផងដែរ។ នៅពេលសិស្សយល់ច្បាស់ពីបាតុភូតនៃមេរៀន ឬយល់សុីជម្រៅលើគោលបំណងនៃមេរៀន គ្រូក៏ងាយសម្របសម្រួល និងផ្តល់ព័ត៌មានបន្ថែមដើម្បីអភិវឌ្ឍសមត្ថភាពសិស្សបានកាន់តែលឿន។ កម្មវីធីនេះក៏ជាកម្មវិធីមួយដែលផ្សារភ្ជាប់ការសិក្សាជាក់ស្តែងទៅនឹងកំណើននៃការប្រើប្រាស់បច្ចេកវិទ្យាព័ត៌មានប្រកបដោយភាពវិជ្ជមាននៅក្នុងបដិវត្តន៍ឧស្សាហកម្មទី4 ផងដែរ៕

December 19, 2019

វិធីកែនិស្ស័យកូន ចូលចិត្តប្រកែក…

ខាងក្រោមនេះ គឺជាសំណួររបស់អ្នកម្តាយម្នាក់ដែលកំពុងតែព្រួយបារម្ភអំពីនិស្ស័យមិនល្អរបស់កូនប្រុស ដែលបានសួរទៅអ្នកជំនាញខាងចិត្តវិទ្យាកុមារ ព្រោះតែខ្លាចវាក្លាយទៅជាទម្លាប់អាក្រក់នៅពេលដែលគេធំឡើង នាពេលអនាគត។ សូមប្រីយមិត្តអ្នកអាន ជាពិសេសមាតាបិតា និងអាណាព្យាបាលដែលមានកូនតូចទាំងឡាយ តាមដាន និងយកធ្វើជាចំណេះដឹងក្នុងការមើលថែទាំ និងអប់រំកូនៗដូចតទៅ ៖

ខាងក្រោមនេះគឺជាបញ្ហា និងសំណួរដែលអ្នកម្ដាយរបស់កូនប្រុសអាយុ 4ឆ្នាំម្នាក់បានសួរទៅគ្រូពេទ្យជំនាញ…“-នាងខ្ញុំសុំការណែនាំអំពីវិធីកែនិស្ស័យកូនដែលចូលចិត្តប្រកែក និងរឹងឌឺ ព្រោះនាងខ្ញុំខ្លាចកូនធ្លាប់ខ្លួន យកនិស្ស័យមិនល្អនេះទៅប្រើនៅឯសាលារៀន។

សំណួរ : កូនប្រុសនាងខ្ញុំ អាយុ4ឆ្នាំហើយ ជាក្មេងបុិនសម្ដីណាស់(ពូកែនិយាយ) តែចូលចិត្តលួចរឹង និងឌឺស្ងាត់។ ពេលប្រាប់គេឱ្យទៅធ្វើអ្វីមួយ គេចូលចិត្តតែប្រកែកជានិច្ច។ នាងខ្ញុំខ្លាចពេលចូលសាលារៀនហើយ ខ្លាចគេទៅប្រកែកជាមួយអ្នកគ្រូ និងមិត្តភក្តិ និងខ្លាចក្រែងគេចូលមិនចុះជាមួយអ្នកឯទៀត។ សួរថា តើនាងខ្ញុំត្រូវកែសម្រួល ឬកែនិស្ស័យនេះយ៉ាងណាស្រួលទៅ?”ពីអ្នកម្តាយ អូន ប៊យ / នៅភ្នំពេញ
ចម្លើយ : ក្មេងបុិនសម្ដី គឺជាមនុស្សដែលមានមន្តស្នេហ៍ មនុស្សចាស់ដែលបាននិយាយលេងជាមួយកុមារបែបនេះ នឹងកើតមានអារម្មណ៍ស្រឡាញ់ និងអាណិត ជាពិសេសសម្រាប់មនុស្សចាស់ បើមានកូនចៅបុិនសម្ដី ចេះនិយាយលេងនៅជាមួយផងនោះ នឹងមានសេចក្តីសុខខ្លាំងណាស់។ រឿងបុិនសម្ដីនេះ ភាគច្រើន ជាលក្ខណ:ចរិតរបស់ក្មេងស្រីច្រើនជាងក្មេងប្រុស តែក៏មិនមែនជារឿងប្លែកអ្វីដែរ ដែលក្មេងប្រុសខ្លះមាននិស្ស័យបុិនសម្ដីបែបនោះ ព្រោះមួយចំណែកនៃការក្លាយជាក្មេងបុិនសម្ដីនោះ គឺកើតចេញពីស្ថានភាពជុំវិញខ្លួន និងបុគ្គលដែលនៅជុំវិញខ្លួនកុមារនោះ។

អាយុ 3-4ឆ្នាំ គឺជាវ័យដែលចាប់ផ្តើមចេះមានការគិត និងមានហេតុផលរបស់ខ្លួនឯងហើយ ក្មេងៗច្រើនតែនិយាយ និងធ្វើផ្ទុយពីអ្វីដែលមនុស្សធំប្រាប់។ ចាប់ផ្តើមដោយពាក្យបដិសេធខាងដើមថា “ទេ” “កូនមិនធ្វើទេ” “កូនអត់ងូតទឹកទេ” ឬ“កូនមិនចង់ញ៉ាំទេ” ជាដើម។ល។ បន្ទាប់ពីពាក្យថា “ទេ” ភាសារបស់កុមារនឹងវិវឌ្ឍ ហើយចាប់ផ្តើមរៀនយល់ដឹងកាន់តែច្រើនឡើង បូកជាមួយនឹងហេតុផលដែលខ្លួនមានច្រើនឡើងផងដែរនោះ ទើបកុមារចេះបញ្ចេញគំនិត តម្រូវការ និងអារម្មណ៍មកជាភាសានិយាយ។ មកដល់ពេលនេះការបុិននិយាយមាន 2រូបបែប គឺការនិយាយបែបមានមន្តស្នេហ៍ និងការនិយាយដែលមនុស្សធំហៅថា “ប្រកែក”។ កូនអ្នកស្រីមិនមែនជាក្មេងរឹងឌឺទេ តែអ្នកជំនាញយល់ថា កូនកំពុងតែមានការចេះគិត មានហេតុផល ដូច្នេះអ្នកម្តាយត្រូវធ្វើចិត្តត្រជាក់ៗ បើកូនប្រកែកពេលអ្នកម្តាយប្រាប់ឱ្យធ្វើអ្វីមួយនោះ ចូរកុំបន្ទោស ឬដាក់ទោសកូនដោយការវាយឱ្យសោះ ព្រោះកូននៅមិនទាន់យល់ដឹងថា ការនិយាយតមាត់ ការនិយាយប្រកែកនឹងម្តាយនេះ ហេតុអីបានជាគេមិនអាចធ្វើបាន? ផ្ទុយទៅវិញ បើកូនប្រកែកហើយ អ្នកម្តាយសើច ហើយនិយាយប្រកែកទៅវិញនោះ កូនអាចនឹងគិតថា គេអាចធ្វើបែបនេះជាមួយម្តាយបាន ដូច្នេះការកែសម្រួល ឬកែនិស្ស័យបែបនេះ អ្នកជំនាញខាងចិត្តវិទ្យារបស់កុមារសូមណែនាំដូចតទៅ ៖

-កូនជាក្មេងបុិនសម្ដី អ្នកម្តាយគួរបង្កើន និងរិះរកកិច្ចការណាដែលពាក់ព័ន្ធនឹងការនិយាយឱ្យកូនបានធ្វើញឹកញាប់ ដូចជាឱ្យកូនបាននិយាយរៀបរាប់រឿងរ៉ាវផ្សេងៗ ឬនិយាយរឿងនិទានឱ្យអ្នកដែលនៅជាមួយជិតដិតបានស្តាប់ ដើម្បីឱ្យកូនមានឱកាសបានស្គាល់ពាក្យស័ព្ទថ្មីៗដែលគេចង់ប្រើ ព្រមទាំងឆ្លៀតឱកាសបង្រៀនកូនអំពីសុជីវធម៌ក្នុងការនិយាយ និងប្រាប់ឱ្យកូនបានដឹងថា សម្ដីណាខ្លះដែលមិនគួរប្រើជាមួយមនុស្សចាស់ ការប្រើសំឡេងនិយាយជាមួយអ្នកដទៃយ៉ាងណា ទើបគួរឱ្យចង់ស្តាប់ជាដើម។ល។

ពេលដែលកូនប្រកែក អ្នកម្តាយគួរឈប់ ដើម្បីស្តាប់សិន ដោយធ្វើទឹកមុខ និងអាកប្បកិរិយាធម្មតា កុំតមាត់ ទាំងអស់នេះ គឺដើម្បីឱ្យកូនបានដឹងថា ទង្វើដែលគេកំពុងធ្វើនេះមិនសមគួរទេ។ នៅពេលកូនឈប់ប្រកែក សឹមអ្នកម្ដាយប្រាប់ពីវិធីថា កូនគួរតែនិយាយយ៉ាងម៉េចវិញ ទើបជាការប្រសើរជាង។នៅពេលណាដែលគំនិតរបស់អ្នកម្តាយ និងកូនមិនត្រូវគ្នា យើងគួរប្រើវិធីនិយាយជជែកពិភាក្សាគ្នា ដើម្បីឱ្យកូនបានបង្ហាញពីអារម្មណ៍ និងគំនិតរបស់គេចេញមកយ៉ាងសេរី ហើយអ្នកម្តាយក៏គួរនិយាយប្រាប់កូនអំពីគំនិត និងអារម្មណ៍របស់ខ្លួនឱ្យកូនបានដឹងដែរ ដើម្បីឱ្យកូនបានរៀនយល់ដឹងពីវិធីកែបញ្ហាដែលត្រឹមត្រូវ៕

December 19, 2019

វិធីសង្គ្រោះបន្ទាន់ ជួយអ្នករងគ្រោះដោយសារ “គ្រាប់បែក កាំជ្រួច ឬផាវ”

មិនថាជាឧប្បតិហេតុនៅក្នុងទីតាំងគ្រោះថ្នាក់ ហេតុការណ៍អសន្តិសុខក្នុងទីក្រុង ដែលមានការប្រើប្រាស់គ្រាប់បែកដៃផ្សេងៗ ឬនៅក្នុងពិធីបុណ្យអបអរសាទរផ្សេងៗដែលមានការដុតកាំជ្រួច ឬអុចផាវនោះឡើយ ហេតុការណ៍ទាំងអស់នេះអាចបង្កឱ្យកើតមានគ្រោះថ្នាក់ រហូតមានរបួសស្នាមដោយសារវត្ថុអស់ទាំងនោះ ដែលជនរងគ្រោះត្រូវតែបានទទួលការជួយសង្គ្រោះភ្លាមៗទាន់ពេលវេលា ដើម្បីកាត់បន្ថយការឆ្លងមេរោគ និងងាយស្រួលក្នុងការព្យាបាលជាបន្ត។

វិធីសង្គ្រោះបន្ទាន់លើស្នាមរបួសរបស់ជនរងគ្រោះដោយសារ “គ្រាប់បែក កាំជ្រួច ឬផាវ”

1. ឃាត់ឈាមនៅលើអវយវៈដែលរងរបួស(ដូចជា ដាច់ រយះ)នោះ ដោយយកក្រណាត់ស្អាតបិទពីលើស្នាមរបួសហើយរុំឱ្យណែនការពារកុំឱ្យឈាមហូរ។ គួរតែប្រើក្រណាត់បន្ទះធំៗ ដូចជាក្រណាត់រាងយឺតៗ មិនគួរប្រើខ្សែ ឬកៅស៊ូចងរឹតអវយវៈដែលរងរបួសនោះឡើយ ព្រោះនឹងធ្វើឱ្យរឹតណែនខ្លាំង ខូចសរសៃប្រសាទ និងសរសៃឈាម។

2. សង្កេតមើលអាការជនរងគ្រោះ បើហូរឈាមច្រើន ចូរដាក់ឱ្យគេងសម្រាក និងប្រញាប់បញ្ជូនទៅមន្ទីរពេទ្យភ្លាមៗកុំបង្អង់យូរ។ គួរតមឱ្យអាហារតាមមាត់ ឱ្យក្រេបទឹកបន្តិចបន្តួច ព្រោះអាចនឹងត្រូវទទួលការវះកាត់បន្ទាន់។ កុំភ្លេចរក្សាទុកចំណែកអវយវៈដែលដាច់ជាពីរនោះផង។

3. យកវត្ថុកខ្វក់ចេញពីចំណែកអវយវៈដែលដាច់ជាពីរនោះ លាងទឹកឱ្យស្អាត ដាក់ក្នុងថង់ផ្លាស្ទិក បិទមាត់ថង់ឱ្យជិតណែន ទុកក្នុងធុងទឹកកក ឬក្នុងថង់ដែលមានទឹកកក(សីតុណ្ហភាពប្រមាណ 4អង្សាC)។

4. ប្រញាប់នាំទៅមន្ទីរពេទ្យឱ្យបានលឿនបំផុត។ អវយវៈដែលមានសាច់ដុំច្រើនៗដូចជាដៃ ឬជើង ត្រូវតែបានទទួលការវះកាត់តសរសៃឈាមឱ្យលឿនបំផុតក្នុងរយៈពេល 6ម៉ោង ព្រោះសាច់ដុំនឹងស្លាប់បើសិនទុកចោលយូរពេក។ ចំណែកអវយវៈដែលគ្មានសាច់ដុំដូចជាម្រាមដៃ អាចរក្សាទុកបានពី 12-18ម៉ោង ក៏នៅអាចតភ្ជាប់វិញបានដែរ។

5. បើនាំទៅមន្ទីរពេទ្យបានក្នុងរយៈពេល 2-3ម៉ោង អាចនាំទៅបានតែម្ដង ខាងមន្ទីរពេទ្យអាចនឹងត្រៀមរក្សាទុកចំ-ណែកអវយវៈដែលដាច់ចេញនោះ ដើម្បីធ្វើការតឡើងវិញ។

កំណត់សម្គាល់៖ អវយវៈដែលដាច់ចេញពីគ្នា ត្រូវតែនៅមានសរសៃឈាម និងសាច់ភ្នាសដែលមិនខ្ទេចគ្រាំគ្រាខ្លាំង ដូចជា ដាច់ចេញដោយសារត្រូវកាំបិតកាប់ ដាច់ដោយសារគ្រឿងម៉ាស៊ីន-ល- ហើយការរក្សាទុកចំណែកអវយវៈដែលដាច់ បើជាម្រាមដៃ ចូររក្សាទុកក្នុងសីតុណ្ហភាព 4អង្សាC អាចរក្សាទុកបានមិនលើសពី 12-18ម៉ោង។ ចំណែករបស់ដៃ ជើង អាចរក្សាទុកបានមិនលើស 6ម៉ោង ចំណែករបស់បាតដៃអាចរក្សាទុកបានមិនលើស 12ម៉ោង។ បើមិនបានរក្សាទុកត្រឹមត្រូវទេ ត្រូវប្រញាប់នាំយកទៅមន្ទីរពេទ្យក្នុងរយៈពេល 2-3ម៉ោង៕

December 19, 2019

កម្ពុជាត្រៀមរៀបចំព្រឹត្តិការណ៍«ឌីជីថលកម្ពុជា 2020»ប្រចាំឆ្នាំលើកទី2

សន្និសីទសារព័ត៌មានស្ដីអំពីព្រឹត្តិការណ៍ «ឌីជីថលកម្ពុជា 2020 ឬ Digital Cambodia 2020» បានធ្វើឡើងកាលពីថ្ងៃទី18 ខែធ្នូ ឆ្នាំ2019 នៅវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT)ក្រោមអធិបតីភាពឯកឧត្តមបណ្ឌិត កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាអនុប្រធានទី1 នៃក្រុមប្រឹក្សាមូលនិធិស.អ. ឯកឧត្តម សេង សុភាព ប្រធានវិទ្យាស្ថានជាតិ NIPTICT និងជាសេនាធិការអនុវត្តគម្រោង ស.អ. និងលោក ជី សីលា នាយកក្រុមហ៊ុន Sabay ដែលជាដៃគូសហការរៀបចំព្រឹត្តិការណ៍។

ព្រឹត្តិការណ៍ Digital Cambodia 2020 ជាព្រឹត្តិការណ៍ឈានមុខប្រចាំឆ្នាំលើកទី2 របស់ព្រះរាជាណាចក្រកម្ពុជាលើវិស័យបច្ចេកវិទ្យាឌីជីថលដែលមានគោលបំណងបង្កើត Platform ថ្នាក់ជាតិដើម្បី៖
1-បង្ហាញអំពីបរិយាកាស និង Ecosystem ប្រកបដោយអំណោយផល និងភាពទាក់ទាញសម្រាប់ការវិនិយោគវិស័យបច្ចេកវិទ្យាគមនាគមន៍ និងព័ត៌មាននៅកម្ពុជា។
2-បង្ហាញអំពីវឌ្ឍនភាពនៃការអភិវឌ្ឍក្របខ័ណ្ឌគោលនយោបាយ និងគតិយុត្ត និងផលិតផល និងសេវាពាក់ព័ន្ធនឹងបច្ចេកវិទ្យាគមនាគមន៍ និងព័ត៌មាន។
3-បញ្ជ្រាបអំពីសារៈសំខាន់ និងភាពមិនអាចខ្វះបាននៃវិស័យបច្ចេកវិទ្យាគមនាគមន៍ និងព័ត៌មានដល់គ្រប់មជ្ឈដ្ឋាន ជាពិសេសយុវជន និងស្ត្រី ក្នុងន័យធ្វើឱ្យប្រសើរឡើងនៃការអប់រំសម្រាប់សិស្ស-និស្សិត និងជំនាញបច្ចេកទេស បង្កើនប្រសិទ្ធភាពការងារ និងផលិតភាព និងពង្រឹងភាពប្រកួតប្រជែងសហគ្រាសធុនតូចបំផុត ធុនតូច និងមធ្យមរបស់កម្ពុជាលើឆាកតំបន់ និងអន្តរជាតិ។
4- កៀរគរគ្រប់តួអង្គពាក់ព័ន្ធក្នុងវិស័យឧស្សាហកម្មបច្ចេកវិទ្យាគមនាគមន៍ និងព័ត៌មាន រួមមាន ស្ថាប័នរាជរដ្ឋាភិបាល អ្នកវិនិយោគជាតិ និងអន្តរជាតិ អាជីវកម្មបង្កើតថ្មី (Tech Startup) អ្នកវិជ្ជាជីវៈ និងគ្រឹះស្ថានសិក្សាស្រាវជ្រាវ ព្រមទាំងសង្គមស៊ីវិល ដើម្បីផ្លាស់ប្តូរបទពិសោធ និងឧត្តមានុវត្តន៍ និងពិភាក្សាយោបល់អំពីនិន្នាការថ្មីៗ ក៏ដូចជាអំពីបញ្ហាប្រឈមនានាលើវិស័យឧស្សាហកម្មបច្ចេកវិទ្យាគមនាគមន៍ និងព័ត៌មានក្នុងក្របខ័ណ្ឌជាតិ និងអន្តរជាតិ។ 5-ជំរុញលើសហគ្រិនភាព និងនវានុវត្តន៍ថ្មីៗ និង6-អភិវឌ្ឍបណ្តាញអាជីវកម្ម រវាងអាជីវកម្មបង្កើតថ្មី (Startup) ជាមួយសហគ្រាសធុនតូចបំផុត ធុនតូច និងមធ្យម។

ឯកឧត្តមបណ្ឌិត សេង សុភាព ប្រធានវិទ្យាស្ថានជាតិ NIPTICT បានមានប្រសាសន៍ថា៖« ព្រឹត្តិការណ៍ Digital Cambodia 2020 នេះ គឺជាលើកទី2 ហើយ ដែលវិទ្យាស្ថានជាតិ NIPTICT ធ្វើជាម្ចាស់ព្រឹត្តិការណ៍។ Digital Cambodia 2020 ត្រូវបានរៀបចំឡើងក្រោមប្រធានបទ Digital Talents។ ក្នុងនាមជាប្រធានវិទ្យាស្ថានជាតិ NIPTICT ដែលជាគ្រឹះស្ថានអប់រំ និងស្រាវជ្រាវលើវិស័យបច្ចេកវិទ្យាឌីជីថល និងជំនាញដល់យុវជន ឯកឧត្តមជឿជាក់ថា ព្រឹត្តិការណ៍ Digital Cambodia 2020 នឹងក្លាយជាវេទិកាមួយដែលប្រមូលផ្តុំយុវជនឱ្យមកចាប់អារម្មណ៍លើវិស័យបច្ចេកវិទ្យាឌីជីថល ដែលជាវិស័យអាទិភាព និងជាឆ្អឹងខ្នងសម្រាប់អភិវឌ្ឍន៍សេដ្ឋកិច្ចជាតិ។ឯកឧត្តមបណ្ឌិត កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាអនុប្រធានទី1 នៃក្រុមប្រឹក្សាមូលនិធិ ស.អ. បានមានប្រសាសន៍ថា ព្រឹត្តិការណ៍ Digital Cambodia 2020 ជាផ្នែកមួយការចូលរួមចំណែកឱ្យសម្រេចបាននូវផែនការកសាងសមត្ថភាព និងការស្រាវជ្រាវ និងការអភិវឌ្ឍលើវិស័យទូរគមនាគមន៍ និងបច្ចេកវិទ្យាទូរគមនាគមន៍ និងព័ត៌មានឆ្នាំ2019 និង2020 ដែលបានដាក់ចេញដោយក្រុមប្រឹក្សាមូលនិធិស.អ. ពោលគឺដើម្បី៖ 1-ជំរុញការអភិវឌ្ឍធនធានមនុស្សខាងផ្នែកបច្ចេកវិទ្យាទូរគមនាគមន៍ និងព័ត៌មាន។ 2-ជំរុញការស្រាវជ្រាវ និងអភិវឌ្ឍន៍នវានុវត្តន៍ ខាងផ្នែកប.គ.ព. និង3-ជំរុញការអភិវឌ្ឍ Tech Startup Ecosystem។

ឯកឧត្តម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានផ្តល់ចំណាប់អារម្មណ៍ចំពោះព្រឹត្តិការណ៍ Digital Cambodia 2020 នាពេលខាងមុខថា៖«Digital Cambodia 2020 គឺជាសរសរស្តម្ភមួយដើម្បីសម្រេចបានគោលនយោបាយដែលរាជរដ្ឋាភិបាលកំពុងរៀបចំ ពោលគឺគោលនយោបាយសេដ្ឋកិច្ចឌីជីថល និងរដ្ឋាភិបាលឌីជីថល»។ ឯកឧត្តមជឿជាក់ថា ការអភិវឌ្ឍយុវជនប្រកបដោយទេពកោសល្យ នឹងចូលរួមចំណែកសម្រេចបាននូវយុទ្ធសាស្ត្រចតុកោណដំណាក់កាលទី4 សម្រាប់រាជរដ្ឋាភិបាលអាណត្តិទី6 ជាពិសេសដើម្បីត្រៀមខ្លួនចាប់យកសេដ្ឋកិច្ចឌីជីថល និងបដិវត្តន៍ឧស្សាហកម្មទី4»។

ព្រឹត្តិការណ៍ «ឌីជីថលកម្ពុជា 2020» (Digital Cambodia 2020) នឹងត្រូវរៀបចំឡើងចាប់ពីថ្ងៃទី20 ដល់ថ្ងៃទី22 ខែមីនា ឆ្នាំ2020 នៅសាលពិព័រណ៍កោះពេជ្រ៕

December 19, 2019

7 វិធីក្នុងការរចនាម៉ូដផ្ទះដោយខ្លួនឯងឱ្យស្អាតត្រូវចិត្ត ប្រើការបាន និងគោលការណ៍ដំបូងដែលគួរដឹង មុនចាប់ផ្ដើម (តចប់)

5. កំណត់ថវិកាឱ្យច្បាស់លាស់បញ្ហាមួយទៀតរបស់ការតុបតែងផ្ទះដែលមនុស្សជាច្រើនតែងជួបនោះគឺ ទិញអីវ៉ាន់ចូលផ្ទះជក់ដៃ រហូតដល់លើសថវិកាកំណត់។ ដោយសារតែចង់បានសឹងតែទាំងអស់ រឹតតែដើររក រឹតតែជួបរបស់ដែលត្រូវចិត្ត ដូច្នេះគួរកំណត់ថវិកាដែលនឹងចំណាយឱ្យបានច្បាស់លាស់ និងព្យាយាមគ្រប់គ្រងឱ្យនៅក្នុងរង្វង់ទឹកប្រាក់ដែលបានកំណត់ទុកនោះ។ ការពារកុំឱ្យការចំណាយថវិការីកធំ ឬអាចចំណាយលើសបាន តែត្រឹមតែបន្តិចបន្តួច មិនច្រើនរហូតជ្រុលពេក។ អ្វីដែលសំខាន់ គឺកុំភ្លេចធ្វើបញ្ជីទុកផង ដើម្បីឱ្យបានដឹងថា បានចំណាយទៅលើអ្វីខ្លះ និងអាចកាត់បន្ថយត្រង់ណា ដើម្បីសន្សំសំចៃបានថែមទៀត។

6. សួរយោបល់ពីអ្នកដឹងទាំងអស់នេះ គឺដើម្បីកាត់បន្ថយបញ្ហាដែលនឹងកើតឡើងនៅពេលក្រោយ។ គួរប្រឹក្សា ឬសួរយោបល់ពីអ្នកដែលស្ថិតនៅក្នុងពិភពរចនាម៉ូដផ្ទះ អាចជាមនុស្សដែលធ្លាប់ស្គាល់ដែលមានបទពិសោធ ឬអ្នកជំនាញ ដូចជាស្ថាបត្យករ វិស្វករ ឬអ្នកជំនាញខាងតុបតែងខាងក្នុងជាដើម ព្រោះពួកគេទាំងនោះ មានចំណេះដឹងបែបស៊ីជម្រៅ អាចផ្ដល់ការប្រឹក្សា និងការណែនាំបានគ្រប់ជ្រុងជ្រោយ រួមទាំងការកែសម្រួល និងកែខៃចំណុចមិនសមប្រកបផ្សេងៗ ដើម្បីឱ្យផ្ទះកាន់តែស័ក្តិសមនឹងក្រុមគ្រួសាររបស់អ្នក និងកាន់តែគួរឱ្យចង់ស្នាក់នៅទៀតផង។

7.ជឿលើសញ្ជាតិញាណរបស់ខ្លួនឯងខ្លះផង
ដោយសារតែការរចនាម៉ូដផ្ទះ គ្មានការខុស ហើយក៏គ្មានត្រូវដែរនោះ ដូច្នេះហើយទើបអ្វីដែលសំខាន់នោះគឺ ភាពស័ក្តិសម និងតម្រូវការ។ ក្រៅពីវិធីការរចនាម៉ូដដែលបានរៀបរាប់មកហើយនោះ យើងក៏មិនចាំបាច់ត្រូវតែធ្វើតាមឱ្យដូចប៉ាច់ៗគ្រប់ចំណុចនោះដែរ។ រឿងមួយចំនួនអាចនឹងមើលទៅក្រៅតម្រាខ្លះ តែបើបានសាកល្បងពិចារណាមើលហើយថា វាជាអ្វីដែលយើងស្រឡាញ់ចូលចិត្ត និងចូលគ្នានឹងលក្ខណៈការរស់នៅប្រចាំថ្ងៃរបស់ខ្លួននោះ ចូរជឿលើសញ្ជាតិញាណ និងធ្វើតាមតម្រូវការរបស់ខ្លួនឯងចុះ ឬអាចនិយាយបានយ៉ាងងាយស្ដាប់ថា បើមានអារម្មណ៍ថា ត្រូវ ក៏គឺត្រូវហើយ មិនចាំបាច់ត្រូវពឹងផ្អែកទៅតាមអ្នកណា ឬតាមក្បួនតម្រាសាងសង់ផ្ទះតាមចិត្តអ្នកណាម្នាក់ឡើយ។

ការរចនាម៉ូដផ្ទះមានច្រើនបច្ច័យណាស់ដែលពាក់ព័ន្ធ ដូច្នេះក្រៅពីរឿងការតុបតែងដែលស្រស់ស្អាតតាមចំណូលចិត្តហើយនោះ ចូរកុំភ្លេចនឹកដល់ចំនួនសមាជិកក្នុងផ្ទះ លក្ខណៈការរស់នៅប្រចាំថ្ងៃរបស់ម្នាក់ៗ រួមទាំងភាពងាយស្រួលរស់នៅផ្សេងៗផង ដើម្បីឱ្យផ្ទះក្លាយជាផ្ទះដែលគួរឱ្យស្នាក់នៅយ៉ាងពិតប្រាកដ និងដើម្បីកុំឱ្យតាមកែកុននៅពេលក្រោយហ្នឹងឯង៕

December 18, 2019

ការចិញ្ចឹមកូនក្នុងសតវត្សរ៍ទី21 តើត្រូវត្រៀមរួចជាស្រេចសម្រាប់កូនប៉ុនណាទើបគ្រប់គ្រាន់?

ត្រូវតែទទួលស្គាល់ថា ពិភពលោកសព្វថ្ងៃនេះវិលលឿនមែនទែន មិនដូចសម័យយើងកាលពីអតីតឡើយ។ ក្មេងដែលកើត និងធំធាត់ឡើងក្នុងយុគសតវត្សរ៍ទី21 នេះ កំពុងជួបនឹងយុគសម័យដែលមានការផ្លាស់ប្ដូរលឿនបំផុតក្នុងប្រវត្តិសាស្ត្ររបស់មនុស្សជាតិ។ លោកឪពុក អ្នកម្ដាយខ្លួនឯងក៏កំពុងប្រឈមនឹងភាពសាកល្បងដែលមិនធ្លាប់កើតមានពីមុនមកដូចគ្នាដែរ ឧទាហរណ៍ដូចជា មុខរបរអាជីពជាច្រើនក្នុងអតីតកាល ត្រូវបានរលាយបាត់ ខណៈពេលជាមួយគ្នា ក៏មានមុខរបរអាជីពថ្មីៗដែលមិននឹកស្មានដល់បានកើតឡើងដែរ ដូចជា You tuber ឬ Caster ការសរសេរកូដ ឬ Coding របស់លេង ឬវិធីការរៀនយល់ដឹងបែបថ្មីៗ ដែលធ្វើឱ្យពេលខ្លះបទពិសោធកាលពីអតីតកាលរបស់ឪពុកម្ដាយ លែងអាចជួយក្នុងការចិញ្ចឹមមើលថែកូនបានតទៅទៀត។ល។

រឿងតែមួយគត់ដែលឪពុកម្ដាយក្នុងយុគសតវត្សរ៍ទី21 នេះធ្វើបានល្អបំផុត គឺការត្រៀមរួចជាស្រេចសម្រាប់កូនជាមួយការរៀនយល់ដឹង និងប្រឈមជាមួយបញ្ហាគ្រប់ស្ថានការណ៍ដែលកើតឡើង ដើម្បីអ្វីដែលថា ទោះជាគេ(កូន)នឹងជួបរឿងអ្វីនាពេលអនាគត ក៏អាចទប់ទល់បានយ៉ាងទាន់ពេលវេលា និងត្រៀមជាស្រេចក្នុងការរៀនយល់ដឹងពីរឿងរ៉ាវផ្សេងៗដែលកើតឡើង បានយ៉ាងមានប្រសិទ្ធភាពបំផុត។តើឪពុកម្ដាយអាចត្រៀមភាពប្រុងប្រៀបរួចជាស្រេចឱ្យកូនយ៉ាងណា?

1. បង្ហាត់កូនឱ្យចេះជួយខ្លួនឯងអាចបង្ហាត់បង្រៀនបានតាំងពីកូននៅតូច ដូចជា ញ៉ាំបាយ ងូតទឹក ដុសសម្អាតធ្មេញ… ធ្វើឱ្យកូនមានអារម្មណ៍ថា ខ្លួនគេអាចទៅរួច ធ្វើអ្វីក៏បាន ស្រឡាញ់ និងមានមោទនភាពលើខ្លួនឯង ឬដែលហៅថា Self-esteem ដែលជាដំណាក់កាលដំបូងរបស់ការអភិវឌ្ឍខួរក្បាល។

2. បណ្ដោយឱ្យកូនលេង ព្រោះការលេង គឺជាការងាររបស់ក្មេងក្នុងអំឡុងពេលដែលកូនលេង នឹងកើតមានការតាំងគោលដៅរយៈពេលខ្លីម្ដងម្កាលដោយធម្មជាតិ។ មានការប្រើម្រាមដៃទាំង10 និងប្រព័ន្ធប្រសាទប៉ះពាល់ទាំង5 ធ្វើឱ្យខួរក្បាលផ្នែកខាងមុខបានទទួលការអភិវឌ្ឍ។ ឧទាហរណ៍ការលេងដែលជួយជំរុញខួរក្បាលរបស់កូន ដូចជា ការផាត់ពណ៌ សូនរូបជាមួយដីឥដ្ឋ លេងតម្រៀបដុំឈើ និងលេងតោងឡើងជាដើម។

3. សាងសម្ពន្ធភាពដ៏ល្អដោយការចិញ្ចឹមមើលថែកូនបែបវិជ្ជមានដោយការបង្ហាត់បង្រៀនកូនដោយហេតុផល បើកឱកាសឱ្យកូនចេះគិតវិភាគ យល់ដឹង ដោះស្រាយកែខៃបញ្ហាដោយខ្លួនឯង ដែលទាំងអស់នេះនឹងជួយអភិវឌ្ឍ “ខួរក្បាលផ្នែកខាងគិត” បន្តឆ្ពោះទៅរកការរៀនយល់ដឹង។ ការសម្លុត ការទិតៀន ការបញ្ជួសបន្សោក ឬការដាក់ទោសឱ្យរាងចាល នឹងធ្វើឱ្យកូនមានអារម្មណ៍ថា គ្មានសុវត្ថិភាព និងខួរក្បាលមិនបានទទួលការអភិវឌ្ឍ។

4. យកចិត្តទុកដាក់រឿងភោជនាហារជាពិសេសបំផុតសារធាតុអាហារដែលប្រើក្នុងការអភិវឌ្ឍខួរក្បាលកូន មានដូចជា ប្រូតេអុីន អាស៊ីតខ្លាញ់ចាំបាច់ DHA និងARA សារធាតុដែក អុីយ៉ូដ វីតាមីនA និងវីតាមីនB12 ដែលអ្នកម្ដាយអាចធ្វើបានតាំងពីកូនកើតដំបូងតាមរយៈការចិញ្ចឹមកូនដោយទឹកដោះម្ដាយរយៈពេលយ៉ាងតិច 6ខែ តាមដោយការមើលថែទាំកូនឱ្យបានទទួលសារធាតុអាហារទៅតាមវ័យដែលស័ក្តិសម ដូចជា ស៊ុត ត្រីសមុទ្រ បន្លែល្ពៅ ការ៉ុត បន្លែស្លឹកបៃតង និងទឹកស៊ុបដែលមានប្រយោជន៍ជាដើម។

ជាសរុបទៅក៏គឺ បើសួរថា តើការចិញ្ចឹមកូនក្នុងសម័យនេះ មានអ្វីដែលខុសប្លែកពីមុនខ្លះនោះ?… ចម្លើយគឺ គោលការណ៍គ្រឹះមិនខុសគ្នាទេ តែនឹងខុសគ្នាក៏ត្រង់រឿងតិចណូឡូជី ដូច្នេះយើងត្រូវត្រៀមឱ្យកូនឱ្យរួចជាស្រេចក្នុងការរៀនយល់ដឹងគ្រប់ពេលវេលា។ សង្គត់ធ្ងន់លើការអភិវឌ្ឍជំនាញគ្រប់ផ្នែក ទាំងជំនាញការដោះស្រាយបញ្ហាឱ្យបាន និងជំនាញការរស់នៅ រួមទាំងយកចិត្តទុកដាក់រឿងភោជនាហារដែលមានផលប្រយោជន៍ដល់ខួរក្បាល ដើម្បីឱ្យកូនអាចរស់នៅក្នុងសង្គមបានយ៉ាងមានសេចក្ដីសុខ និងក្លាយជាបុគ្គលដែលទទួលបានជោគជ័យក្នុងសតវត្សរ៍ទី21នេះ៕

December 18, 2019

Author: ធឿន មករា