Author: ធឿន មករា

ញាក់សាច់…ចេញមកមួយៗអស់ស្ទះម៉ង! ស្មាតហ្វូនជំនាន់ថ្មី…ល្បីថាខ្លាំងមិនធម្មតាស៊េរី Samsung Galaxy A21s មានលក់ក្នុងប្រទេសកម្ពុជាហើយ…!!
(ភ្នំពេញ) ថ្ងៃទី ០៨ ខែមិថុនា ឆ្នាំ២០២០៖ ពិតជាមិនសរសើរមិនបានមែន…! ក្នុងខែនេះក្រុមហ៊ុន សាមសុង បាននាំមកនូវភាពភ្ញាក់ផ្អើល និងមិនគួរមិនឱ្យជឿបន្តទៀតហើយដោយខ្លួនបានបញ្ចេញ និងធ្វើការដាក់លក់ផ្លូវការនូវស្មាតហ្វូនជំនាន់ថ្មីខ្សែស្រឡាយត្រកូលស៊េរី Samsung Galaxy A21s ក្នុងព្រះរាជាណាចក្រកម្ពុជាយើងហើយ!។
សូមបញ្ជាក់ថាស្មាតហ្វូនជំនាន់ថ្មី Samsung Galaxy A21s នេះត្រូវបានផលិត និងរចនាឡើងជាមួយនឹងសមត្ថភាពអស្ចារ្យលើសពីការរំពឹងដែលមិនធ្វើឲ្យអតិថិជនទាំងអស់ខកបំណងឡើយ។ ចេញមកលើនេះក្រុមហ៊ុន សាមសុង ពិតជាមិនបានគិតពីរឿងចំណេញ និងចំណាយឡើយធ្វើយ៉ាងណាអាចផ្តល់ជូននូវស្មាតហ្វូនដែលមានលក្ខណៈពិសេសៗ អស្ចារ្យ និងអាចបំពេញតាមតម្រូវការប្រើប្រាស់របស់អតិថិជនបាន។
Samsung Galaxy A21s មានអេក្រង់ធំទំហំ 6.5” ដាំមកជាមួយនឹងកាមេរ៉ាក្រោយចំនួន 4 គ្រាប់ទំហំ (48 MP+ 8 MP + 2 MP + 2 MP), កាមេរ៉ាមុខទំហំ 13 MP (Selfie បានស្អាតឥតខ្ចោះ), កម្លាំងថាមពលខ្លាំង 5,000 mAh (សាកថ្មលឿន), មេម៉ូរី 6 GB, អង្គផ្ទុក 64 GB (អាចថែមបាន 512 GB)! អូហូ…! អែមណាស់!! មកក្នុងសំណុំប៉ុណ្ណេះបែបថ្លៃហើយមើលទៅ? អត់ថ្លៃទេ…ខ្ញុំហ៊ានធានា…!តម្លៃគឺពិសេសសឹងតែមិនគួរឱ្យជឿទាល់តែសោះ។
ស្មាតហ្វូនស៊េរីថ្មីដ៏ស្រស់ស្អាតនេះ បានដាក់លក់ជាផ្លូវការនៅតាមបណ្តាហាងទំនើបសាមសុង និងដេប៉ូចែកចាយទូរស័ព្ទសាមសុងទូទាំងប្រទេសកម្ពុជាជាមួយនឹងតម្លៃត្រឹមតែ $249 ដែលភ្ជាប់ជាមួយជម្រើស៣ពណ៌រួមមាន៖ពណ៌ខ្មៅ ពណ៌ស និងពណ៌ខៀវ ជាងនេះទៅទៀតរាល់ការជាវ Samsung Galaxy A21s ឥឡូវនេះលោកអ្នកនឹងទទួលបានលេខពិសេសតម្លៃដល់ទៅ $29 និងទទួលបានការបញ្ចុះតម្លៃដល់ទៅ 50% លើការប្តូរអេក្រង់ថ្មីផងដែរ។ ម៉េចដែរ…នៅចាំអីទៀត…? ប្រញាប់ទៅរកជាវ និងប្រើមុនគេឥឡូវនេះភ្លាមទៅ!
សម្រាប់ព័ត៌មានបន្ថែមសូមអញ្ជើញទៅសាកសួរដោយផ្ទាល់នៅតាមដេប៉ូចែកចាយរបស់ សាមសុង ទាំងអស់ដែលនៅជិតលោកអ្នកបំផុត ឬទំនាក់ទំនងទៅកាន់សេវាបម្រើអតិថិជនតាមរយៈលេខទូរស័ព្ទ៖ 1800-203232៕
June 8, 2020
រៀបការពេលអាយុ 28 – 32 ឆ្នាំ ជីវិតគូនឹងស្ថិតស្ថេរយូរអង្វែង
អ្នកសង្គមវិទ្យា នែមហាវិទ្យាល័យ យូថាហ៍ សហរដ្ឋអាមេរិក បានបង្ហាញពីលទ្ធផលនៃការសិក្សាស្រាវជ្រាវមួយដែលបានរកឃើញថា ក្នុងអំឡុងអាយុចន្លោះពី 28 – 32 ឆ្នាំ គឺជាវ័យដែលស័ក្តិសមសម្រាប់ការរៀបអាពាហ៍ពិពាហ៍ខ្លាំងបំផុត ព្រោះជាអំឡុងវ័យដែលស្គាល់ពីអារម្មណ៍របស់ខ្លួនឯង រកឃើញដំណើរជីវិត និងមានភាពទទួលខុសត្រូវក្នុងកម្រឹតមួយហើយ។ ការស្រាវជ្រាវបានរកឃើញផងដែរថា អ្នកដែលរៀបការក្រោយអាយុ 32 ឆ្នាំ មានអត្រាការលែងលះកើនឡើង ខណៈដែលគូស្នេហ៍វ័យជំទង់អាយុ 15 – 19ឆ្នាំ លែងលះគ្នាច្រើនបំផុត។
វេបសាយទស្សនាវដ្តី ថាម បានរាយការណ៍ពីលទ្ធផលនៃការសិក្សាស្រាវជ្រាវរបស់ និគ វូហ្វ៊ីងហ្គើរ៍ អ្នកសង្គមវិទ្យាដែលបានរកឃើញថា អំឡុងអាយុដែលស័ក្តិសមសម្រាប់ការចាប់ផ្តើមជីវិតគូនោះគឺ 28 – 32 ឆ្នាំ ដោយអ្នកស្រាវជ្រាវបាននាំយកព័ត៌មានការពិនិត្យពីសភាវគ្រួសារជនជាតិអាមេរិកក្នុងចន្លោះឆ្នាំ 2006 – 2010 និង 2011 – 2015 មកវិភាគ និងរកឃើញថា គូអាពាហ៍ពិពាហ៍ដែលស្ថិតក្នុងវ័យនេះមានអត្រាការលែងលះទាបជាងអ្នកដែលរៀបការក្នុងវ័យផ្សេងទៀត ជាពិសេសក្នុងអំឡុងពេល 5 ឆ្នាំក្រោយពេលរៀបការមានអត្រាការចែកផ្លូវគ្នាតិចបំផុត។
វូហ្វ៊ីងហ្គើរ៍បានអធិប្បាយថា ហេតុផលដែលមនុស្សវ័យ 28 – 32 ឆ្នាំស័ក្តិសមល្អក្នុងការរៀបការនោះមានច្រើនចំណុចដូចជាៈ
– មនុស្សវ័យនេះធំគ្រប់គ្រាន់ក្នុងការដឹងទាន់ពីអារម្មណ៍របស់ខ្លួនឯងថា តើខ្លួនចូលចុះជាមួយដៃគូបានមែន ឬគ្រាន់តែជាអារម្មណ៍រំជើបរំជួលរបស់អ័រម៉ូន?។
– រូបគេ ឬនាងបានជ្រើសរើសដំណើរផ្លូវជីវិតដែលខ្លួនឯងត្រូវការហើយ និងចាប់ផ្តើមមានភាពទទួលខុសត្រូវចំពោះរឿងផ្សេងៗហើយ។
– មានស្ថិរភាពខាងហិរញ្ញវត្ថុបានមួយកម្រឹតហើយ។
– នៅមិនទាន់ចាស់ជ្រុលក្នុងការសម្របសម្រួលខ្លួន កែសម្រួលនិស្ស័យ ឡៃហ្វ៍ស្តាយល៍ ជីវិតរស់នៅប្រចាំថ្ងៃ -ល- ឱ្យចូលគ្នាជាមួយដៃគូឡើយ ដែលនេះគឺជារឿងសំខាន់ណាស់ក្នុងការមានជីវិតគូ។
“អ្នកខ្លះអាចហៅការសិក្សាស្រាវជ្រាវនេះថាជា “ទ្រឹស្តីមាសរបស់ការរៀបការ” ដែលគូរអាពាហ៍ពិពាហ៍ត្រូវតែមិនក្មេង ឬចាស់ជ្រុលពេក ក្រៅពីនេះនៅមានហេតុផលជាច្រើនទៀតដែលគាំទ្រថា ក្នុងអំឡុងអាយុ 20 ឆ្នាំក្រាស់ និង 30 ឆ្នាំស្តើង គឺជាអំឡុងពេលដ៏ល្អក្នុងការចាប់ផ្តើមជីវិតអាពាហ៍ពិពាហ៍ជាមួយនរណាម្នាក់នោះ” អ្នកសង្គមវិទ្យាពីមហាវិទ្យាល័យ យូថា អះអាង។
វូហ្វីងហ្គើរ៍ បានបន្ថែមទៀតថា គូអាពាហ៍ពិពាហ៍ដែលទទួលជោគជ័យក្នុងជីវិតគូ ភាគច្រើនៗតែជាគូដែលស្គាល់ពីនិស្ស័យចិត្តថ្លើមគ្នា។
ការរៀបអាពាហ៍ពិពាហ៍ក្នុងអំឡុងវ័យ 15 – 19 ឆ្នាំ នឹងធ្វើឱ្យកើតមានការលែងលះច្រើនបំផុត បន្ទាប់មកគឺក្នុងអំឡុងវ័យ 20 – 24 ឆ្នាំ 28 – 32 ឆ្នាំ តាមលំដាប់ ក្រៅពីនេះ មានបច្ច័យជាច្រើនទៀតដែលអ្នកសង្គមវិទ្យាជឿថា នឹងជួយឱ្យជីវិតគូស្ថិតស្ថេរយូអង្វែងនោះ មានដូចជា ស្ថិរភាពខាងផ្នែកហិរញ្ញវត្ថុ ការសិក្សាដែលល្អ ការរៀបការមុនមានបុត្រ-ល- សុទ្ធតែមានចំណែកធ្វើឱ្យគូអាពាហ៍ពិពាហ៍មានជីវិតប្រកបដោយសុភមង្គល និងគង់វង្សស្ថិតស្ថេរយូរអង្វែងបានទាំងអស់៕
June 8, 2020
រឿងដែលគួរដឹង មុននឹងឆុងទឹកដោះឱ្យកូន
ទឹកដោះម្តាយគឺជាអាហារសម្រាប់ទារកដែលល្អបំផុតដែលអ្នកម្តាយដឹងច្បាស់ណាស់ តែក៏មានអ្នកម្តាយមិនតិចនាក់ទេដែលមិនអាចចិញ្ចឹមកូនដោយទឹកដោះខ្លួនឯងបាន ឬបំបៅទឹកដោះកូនបានតែមិនប៉ុន្មានខែ បន្ទាប់ពីនោះក៏ងាកទៅពឹងលើទឹកដោះម្សៅវិញម្តង តែដើម្បីសុខភាព និងសុវត្ថិភាពរបស់កូនតូចជាទីស្រឡាញ់ ឡារ៉ែនសូមលើកយកចំណេះដឹងក្នុងការជ្រើសរើសម្សៅទឹកដោះ វិធីឆុង និងទុកដាក់ថែរក្សាមកជម្រាបជូនដូចខាងក្រោម។
ភាគច្រើនរបស់ម្សៅទឹកដោះគឺច្នៃប្រឌិតមកពីទឹកដោះគោដែលធ្វើឱ្យមានចំណែករបស់ប្រូតេអ៊ីន ខ្លាញ់ និងស្ករ ស័ក្តិសមសម្រាប់ក្មេងតូចៗដែលហៅថា “ម្សៅទឹកដោះគោកែច្នៃសម្រាប់ទារក” និងបន្ទាប់ពីទារកអាយុបាន 6 ខែឡើងទៅ អ្នកម្តាយក៏អាចនឹងប្តូរជាម្សៅទឹកដោះគោដែលមានប្រូតេអ៊ីនកាន់តែខ្ពស់ឡើង ដើម្បីឱ្យកូនតូចបានទទួលប្រូតេអ៊ីនគ្រប់គ្រាន់តាមតម្រូវការរបស់រាងកាយ ដែលនឹងនាំយកទៅសាងជាសាច់ដុំផ្សេងៗ ព្រោះក្មេងតូចក្នុងវ័យនេះរាងកាយនឹងចម្រើនធំធាត់លឿនណាស់។
មុនគេបង្អស់ នៅពេលអ្នកម្តាយសម្រេចចិត្តចិញ្ចឹមកូនដោយម្សៅទឹកដោះគោហើយនោះ រឿងដំបូងគេដែលអ្នកម្តាយត្រូវនឹកដល់ពេលទៅទិញម្សៅទឹកដោះគោនោះគឺ ការពិនិត្យមើលម្សៅទឹកដោះដែលមានស្តង់ដារ ជ្រើសរើសប្រភេទរបស់ម្សៅទឹកដោះគោឱ្យកូនយ៉ាងត្រឹមត្រូវ ស័ក្តិសមនឹងវ័យរបស់កូន បន្ទាប់ពីនោះត្រូវពិនិត្យមើលថ្ងៃខែឆ្នាំផលិត និងថ្ងៃផុតកំណត់គ្រប់ពេល និងអ្វីដែលសំខាន់គឺកុំទិញមកស្តុកទុកច្រើនជ្រុលពេកដោយសារតែឃើញមានតម្លៃថោកឱ្យសោះ ព្រោះទុកយូរអាចនឹងខូចគុណភាព និងមុនពេលទិញរៀងរាល់លើកអ្នកម្តាយគួរតែពិនិត្យមើលសភាពរបស់កំប៉ុងកុំឱ្យមានស្នាមក្រពិត ឬទ្រុឌខុសទម្រង់ដើមឱ្យសោះ និងរឿងដែលសំខាន់មួយទៀតនោះគឺ នៅពេលទិញមកហើយគួរទុកដាក់នៅក្នុងកន្លែងដែលស្អាតមានអានាម័យ មិនត្រូវកម្តៅថ្ងៃ និងស្ងួត។
រឿងដែលអ្នកម្តាយគួរដឹងមុននឹងឆុងទឹកដោះគោឱ្យកូនតូច ករណីដំបូង សម្រាប់អ្នកម្តាយដែលចិញ្ចឹមកូនដោយទឹកដោះខ្លួនឯងរួមជាមួយម្សៅទឹកដោះគោនោះ ដើម្បីឱ្យកូនតូចបានទទួលគុណប្រយោជន៍ច្រើនបំផុត និងជាការសន្សំសំចៃផងនោះ អ្នកម្តាយគួរៈ
– ឱ្យកូនតូចបៅទឹកដោះគោឆុងចំពោះតែពេលណាដែលចាំបាច់បានហើយ ដូចជា ពេលអ្នកម្តាយមានធុរៈត្រូវចេញទៅក្រៅ និងពេលត្រឡប់មកផ្ទះវិញគួរឱ្យកូនបានបៅទឹកដោះម្តាយតាមប្រក្រតី។
– ឆុងទឹកដោះគោឱ្យត្រូវតាមក្បួន ដោយអានពាក្យណែនាំនៅលើកំប៉ុងម្សៅទឹកដោះគោ ព្រោះម្សៅទឹកដោះគោនីមួយៗមានចំណែកផ្សំមិនដូចគ្នាទេ។
– ភាពស្អាតមានអនាម័យគឺជារឿងសំខាន់បំផុតសម្រាប់ទារក ឧបករណ៍ផ្សេងៗដែលប្រើសម្រាប់ឆុងទឹកដោះគោត្រូវលាងឱ្យបានស្អាតគ្រប់ពេល និងត្រូវដាក់ចំហុយ ឬស្ងោរសម្លាប់មេរោគគ្រប់ពេល។
– ឆុងក្នុងបរិមាណដែលល្មមនឹងតម្រូវការរបស់កូនតូច មិនគួរឆុងទុកចោលយូរពេកទេ ទឹកដោះដែលសល់ពីការឱ្យទារកបៅហើយនោះ ចូរចាក់ចោល មិនគួរយកមកឱ្យកូនតូចបៅម្តងទៀតឡើយ។
– ក្នុងអំឡុងពេលបៅទឹកដោះគ្រប់ពេល បើកូនតូចបៅឈប់ បៅឈប់នោះ ពេលអ្នកម្តាយទុកដបទឹកដោះគោ អ្នកម្តាយត្រូវតែបិទគម្របភ្លាម និងត្រូវលាងសម្អាតដបទឹកដោះគោភ្លាមៗនៅពេលឈប់ឱ្យកូនបៅហើយ ព្រោះបើទុលចោលវានឹងក្លាយជាកំណក ធ្វើឱ្យពិបាកលាងសម្អាត ងាយនឹងកើតមេរោគ និងនៅពេលលាងស្អាត និងស្ងោរសម្លាប់មេរោគរួចហើយ គួររៀបចំទុកដាក់នៅក្នុងកន្លែងដែលស្ងួត និងស្អាត៕
June 8, 2020
ទេសចរណ៍កម្ពុជាខាតជាង 3,000លានដុល្លារក្នុងអំឡុងពេល Covid-19
ក្នុងអំឡុងពេលដែលពិភពលោកកំពុងប្រឈមជាមួយនឹងវិបត្តិសេដ្ឋកិច្ចដែលកើតឡើងដោយសារតែការរីករាលដាលយ៉ាងឆាប់រហ័សនៃជំងឺ Covid-19 នេះ កម្ពុជាក៏កំពុងទទួលរងផលប៉ះពាល់យ៉ាងច្រើនផងដែរ ជាពិសេសគឺផ្នែកទេសចរណ៍។
កាលពីម្សិលម៉ិញនេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានបញ្ជាក់ថាកម្ពុជាខាតបង់ចំណូលប្រហែលជា 3,000លានដុល្លារអាមេរិក ក្នុងអំឡុងពេលវិបត្តិ Covid នេះ។ ជាផលប៉ះពាល់អាជីវកម្មទេសចរណ៍ក្នុងស្រុកប្រមាណ 2,956ទីតាំងត្រូវបានបិទទ្វា ដែលធ្វើឱ្យបាត់បង់ការងារចំនួន 45,404នាក់ក្នុងវិស័យទេសចរណ៍។
ស្របពេលជាមួយគ្នានេះដែរ ភ្ញៀវទេសចរក្នុងស្រុកបានធ្លាក់ចុះប្រមាណ 50% ខណៈភ្ញៀវទេសចរបរទេសបានធ្លាក់ចុះប្រមាណ 70% ដោយសារតែបញ្ហាសេដ្ឋកិច្ច និងការភ័យខ្លាចចំពោះការធ្វើដំណើរ បូករួមទាំងការរឹតបន្តឹងការធ្វើដំណើរពីប្រទេសនីមួយ៕

June 6, 2020
ខ្សែភាពយន្តនៃយុទ្ធនាការឃោសនា ដើម្បីព្រមានប្រាប់អំពីគ្រោះថ្នាក់នៃការបរិភោគសត្វព្រៃ
កាលពីថ្ងៃទី4 ខែមិថុនា អង្គការសម្ព័ន្ធមិត្តសត្វព្រៃ បានបង្ហាញខ្សែភាពយន្តឃោសនាដែលជាផ្នែកមួយនៃយុទ្ធនាការ#StopEatingWildlife (បញ្ឈប់ការបរិភោគសត្វព្រៃ) ដើម្បីជាសេវាប្រាប់ដំណឹងជាសាធារណៈ និងជាការដាស់តឿនទៅដល់អ្នកដែលនិយមបរិភោគសាច់សត្វព្រៃថា ពួកគេពិតជាប្រថុយប្រថាននឹងហានិភ័យផ្នែកសុខភាពខ្លាំងណាស់ នៅពេលដែលពួកគេបរិភាគសត្វព្រៃ។
ការបរិភោគសត្វព្រៃអាចបង្កឱ្យមានជម្ងឺកាចសាហាវជាច្រើន ដូចជា កូវីដ-19 ជាដើម។ សូមថែរក្សាសុខភាពរបស់អ្នក និងបញ្ឈប់ការបរិភោគសត្វព្រៃ គឺជាសារៈដ៏សំខាន់មួយនៃភាពយន្តយុទ្ធនាការឃោសនាមួយនេះ។
ខ្សែភាពយន្តដ៏រន្ធត់នេះ និយាយអំពីមនុស្សមួយក្រុមនៅក្នុងភោជនីយដ្ឋានមួយកន្លែង កំពុងបរិភោគសត្វពង្រូល ហើយរំពេចនោះខ្សែភាពយន្តក៏បែរទៅបង្ហាញអ្នកបរិភោគសាច់សត្វព្រៃដែលកំពុងដេកឈឺលើគ្រែ ក្នុងមន្ទីរពេទ្យវិញ។
កញ្ញា ស៊ូវណ្ណា ហ្គោនឡែត នាយិកាប្រតិបត្តិអង្គការសម្ព័ន្ធមិត្តសត្វព្រៃបានមានប្រសាសន៍ថា “នៅក្នុងខ្សែភាពយន្តនេះយើងចង់បង្ហាញឱ្យមនុស្សគ្រប់រូបបានយល់ថា អ្នកដែលនិយមបរិភោគសាច់សត្វព្រៃ កំពុងតែបង្កឱ្យមានបញ្ហាប្រឈមខ្លាំងចំពោះសុខភាពរបស់ពួកគេ គ្រប់ពេលដែលពួកគេទទួលទានសត្វព្រៃ។
យុទ្ធនាការនេះបានចេញផ្សាយកាលពី 2ខែមុន ជាការឆ្លើយតបទៅនឹងការរាលដាល នៃមេរោគកូវីដ-19 ដែលត្រូវបានគេតាមដានស្រាវជ្រាវរកប្រភពឃើញថា បានឆ្លងមកពីការបរិភោគសាច់សត្វព្រៃ ហើយវាត្រូវបានជឿជាក់យ៉ាងច្បាស់ថា មានប្រភពចេញពីផ្សារលក់សត្វព្រៃមួយកន្លែងក្នុងទីក្រុងវូហានប្រទេសចិន។
ការជួញដូរ និងការបរិភោគសត្វព្រៃ គឺជាការជំរុញឱ្យសត្វព្រៃ និងមនុស្ស មានការប៉ះពាល់គ្នាយ៉ាងជិតស្និទ្ធ ដែលធ្វើឱ្យជំងឺកាចសាហាវដូចជាកូវីដ-19 អាចឆ្លងរាលដាលមកមនុស្សបាន។
ការបរិភោគសត្វព្រៃក៏មានជាប់ទាក់ទងជាមួយជំងឺកាចសាហាវផ្សេងទៀតដែរ ដូចជាជំងឺសារស៍ (SARS) និងអេដស៍ជាដើម។
“ការប្រយុទ្ធប្រឆាំងនឹងការជួញដូរសត្វព្រៃខុសច្បាប់ មានន័យថា យើងកំពុងប្រយុទ្ធប្រឆាំងទប់ទល់កុំឱ្យមានឱកាសនៃការរីករាលដាលនៃជម្ងឺរាតត្បាតថ្មីផ្សេងទៀតនាពេលអនាគត។ យើងម្នាក់ៗមិនត្រឹមតែអាចដើរតួនាទីក្នុងការបញ្ឈប់ការបរិភោគសត្វព្រៃប៉ុណ្ណោះទេ តែយើងអាចរាយការណ៍អំពីបទល្មើសសត្វព្រៃ ទៅលេខទូរស័ព្ទប្រចាំការបាន” ។ នេះជាប្រសាសន៍របស់កញ្ញា ស៊ូវណ្ណា ហ្គោនឡែត។
ប្រសិនបើលោកអ្នក បានប្រទះឃើញសត្វព្រៃត្រូវបានគេបង្ខាំងទុកក្នុងទ្រុង ឬការុងបាវ ឬប្រសិនបើលោកអ្នកបានដឹងពីព័ត៌មានណាមួយដែលទាក់ទងទៅនឹងការរត់ពន្ធសត្វព្រៃដោយខុសច្បាប់ សូមទូរស័ព្ទមកទីស្នាក់ការប្រចាំការ តាមរយៈលេខ 012 500 094 ឬរាយការណ៍ទៅកាន់ក្រុមបង្ក្រាបបទល្មើសសត្វព្រៃបន្ទាន់ តាមរយៈទំព័របណ្តាញសង្គមហ្វេសប៊ុក ( https://www.facebook.com/WCHCambodia/ )។
ខ្សែភាពយន្តនៃយុទ្ធនាការឃោសនា បានបង្ហាញអំពីគ្រោះថ្នាក់ផ្នែកសុខភាព ដែលបណ្ដាលមកពីការបរិភោគសត្វព្រៃ Click here for the #StopEatingWildlife campaign film. .
ពង្រូលដែលជាសត្វកំពុងរងគ្រោះជិតផុតពូជ គឺត្រូវបានគេយកមកថតក្នុងខ្សែភាពយន្តនេះ ព្រោះវាជាប្រភេទថនិកសត្វដែលត្រូវបានគេជួញដូរច្រើនជាងគេនៅលើពិភពលោក។
Click here for the #StopEatingWildlife campaign film. .
សម្រាប់ព័ត៌មានបន្ថែម សូមទាក់ទងមកកាន់៖
លោក Andy Ball
ផ្នែកបណ្តាញសង្គម និងទំនាក់ទំនង អង្គការសម្ព័ន្ធមិត្តសត្វព្រៃ
ទូរស័ព្ទការិយាល័យ +885 23 211 604
ទូរស័ព្ទដៃ +855 96 258 76 31
អ៊ីមែលៈ [email protected]

Ollie Roberts
ជំនួយការនាយិកាប្រតិបត្ដិ
អង្គការសម្ព័ន្ធមិត្តសត្វព្រៃ
ទូរស័ព្ទការិយាល័យ +885 23 211 604
ទូរស័ព្ទដៃ +855 99 766 615
អ៊ីមែលៈ [email protected]

June 6, 2020
រោគចម្លែក 5 យ៉ាងដែលជួបតែលើបុរស
នៅពេលនិយាយពីរោគាព្យាធិហើយនោះ ប្រាកដណាស់ថាគ្មានអ្នកណាចង់ឱ្យវាកើតឡើងចំពោះខ្លួន ឬមនុស្សដែលនៅជិតខ្លួនឡើយ តែជួនកាលរឿងបែបនេះក៏ជារឿងដែលហួសពីការនឹកស្មាន និងមិនអាចការពារបាន ទោះជាខំមើលថែទាំខ្លួនឯងល្អខ្នាតណាហើយក៏ដោយ ថ្ងៃនេះ ឡារ៉ែន សូមនាំបុរសៗយើងមកស្គាល់រោគចម្លែកៗ 5 យ៉ាងដែលកើតតែលើមនុស្សប្រុស ឬជួបនៅលើភេទប្រុសច្រើនជាងភេទស្រី តើមានរោគអ្វីខ្លះនោះ សូមតាមដានដូចតទៅ ៈ
1 – រោគ ហេម៉ូហ្វ៊ីលៀ ( Hemophilia )
រោគ ហេម៉ូហ្វ៊ីលៀ ឬរោគឈាមហូរឥតឈប់ ជារោគដែលមានឈ្មោះប្លែក តែក៏យើងធ្លាប់បានឮមកខ្លះដែរ ប៉ុន្តែតើអ្នកដឹងទេថា សឹងតែមានតែមនុស្សប្រុសប៉ុណ្ណោះដែលមានអាការរបស់រោគប្រភេទនេះ។ អ្នកដែលកើតជំងឺនេះ នៅពេលកើតមានស្នាមរបួសហើយនោះ ឈាមនឹងមិនងាយឈប់ហូរឡើយ ទោះវាគ្រាន់តែជាស្នាមខ្វាច ឬក្តិចតូចមួយក៏ដោយ ធ្វើឱ្យអ្នកដែលកើតរោគនេះត្រូវប្រយ័ត្នខ្លួនជានិច្ចមិនឱ្យខ្លួនឯងមានរបួសឡើយ ក្រៅពីនេះ ហេម៉ូហ្វ៊ីលៀថែមទាំងជារោគដែលចម្លងតពូជទៀតផង។
2 – មៀលគ៍មែន ឬមនុស្សប្រុសមានទឹកដោះ ( Milkman ឬ Male lactation phenomina)
មៀលគ៍មែន ឬមនុស្សប្រុសមានទឹកដោះ គឺជាដែលសត្វចិញ្ចឹមកូនដោយទឹកដោះ (រួមទាំងមនុស្សផងដែរ) ភេទឈ្មោលអាចបង្ហូរទឹកដោះចេញមកបាន។ ដោយការជំរុញច្រើនប្រការដែលធ្វើឱ្យមនុស្សប្រុសអាចផលិតទឹកដោះបាននោះ បណ្តាលមកពីការបានទទួលអ័រម៉ូនភេទស្រីច្រើនជ្រុលពេក(មានការប្រើប្រាស់អ័រម៉ូនភេទស្រីក្នុងការព្យាបាលរោគមហារីកក្រពេញពងស្វាស) និងបញ្ចេញទឹកដោះចេញមកនៅពេលធ្លាក់ក្នុងសភាវធុញថប់តានតឹងក្នុងអារម្មណ៍ តែទាំងអស់នេះត្រូវអាស្រ័យលើបច្ច័យច្រើនយ៉ាងរួមគ្នា មិនមែនអ្នកណានឹកចង់សាកឱ្យកូនបៅទឹកដោះ ទៅបន្ថែមអ័រម៉ូនភេទស្រីហើយនឹងមានទឹកដោះឱ្យកូនបៅនោះទេ។
3 – ខាល់ម៉ាន់ ស៊ិនដ្រូម ឬ សភាវអ័រម៉ូនភេទទាប ( Kallmann Syndrome )
ឈ្មោះដ៏ចម្លែករបស់អាការនេះ គឺជាសភាវរបស់មនុស្សប្រុសដែលមានអ័រម៉ូនភេទទាប ធ្វើឱ្យអវយវៈភេទមានខ្នាតតូចប៉ុនរបស់ក្មេង ថែមទាំងមានពងស្វាសស្វិតមិនធ្លាក់ចុះក្រោមទៀតផង ជាសភាវដែលមានមូលហេតុមកពីខួរក្បាលផ្នែក “ហាយប៉ូថាឡាម៉ាស់” មិនបញ្ចេញអ័រម៉ូន GnRH ទើបគ្មានអ្នកជំរុញការសាងអ័រម៉ូនភេទនៅក្នុងពងស្វាស ទើបគ្មានទឹកមេជីវិត ធ្វើឱ្យមនុស្សប្រុសអ្នកដែលមានសភាវបែបនេះក្លាយជាមនុស្សអា(មិនអាចមានកូនបាន)។
4 – ឃូវេដ ស៊ិនដ្រូម ឬសភាវមានផ្ទៃពោះក្លែងបន្លំ ( Couvade syndrome )
ស្រ្តីជាច្រើននាក់ប្រហែលជាមានអារម្មណ៍ដឹងថា ស្វាមីដែលមានអាការចាញ់កូនជំនួសភរិយានោះមើលទៅគួរឱ្យស្រឡាញ់ខ្លាំងណាស់ តែសម្រាប់មនុស្សប្រុសដែលមានអាការ ឃូវេដ ស៊ិនដ្រូម ឬសភាវមានផ្ទៃពោះក្លែងបន្លំនេះ មានអាការខ្លាំងជាងគ្រាន់តែវឹលមុខ និងអារម្មណ៍ប្រែប្រួលប៉ុណ្ណោះទេ តែនៅមានទំហំពោះធំឡើងដូចស្រ្តីមានផ្ទៃពោះ 7 ខែ និងអ្នកខ្លះទៀតថែមទាំងក្អួតចង្អោរនៅពេលព្រឹកទៀតផង។ តែយ៉ាងណាក៏ដោយ អាការឃូវេដ ស៊ិនដ្រូមនេះ មិនបានមានមូលហេតុពីការឈឺចាប់ដែលកើតចំពោះរាងកាយនោះទេ តែជាអាការដែលកើតឡើងដោយសារសភាវខាងផ្លូវចិត្ត និងទាក់ទិនមកដល់កាយ ហើយអាការនេះនឹងបាត់ទៅវិញដោយឯកឯង នៅពេលអ្នកកើតអាការនេះមានសភាវខាងផ្លូវចិត្តធូស្រាលល្អឡើងវិញ។
5 ឃែបហ្ក្រាស ស៊ិនដ្រូម ( Capgras syndrome )
ឃែបហ្ក្រាស ស៊ិនដ្រូម អាចរាប់បានថាជាអាការដែលកើតពីភាពខុសប្រក្រតីខាងខួរក្បាលក្នុងប្រការមួយចំនួន ធ្វើឱ្យមិនអាចចងចាំ និងជឿបានថា មនុស្សដែលខ្លួនកំពុងឃើញនោះគឺជាមនុស្សដែលខ្លួនស្គាល់ពិតមែន ដូចជា មនុស្សប្រុសដែលកើតអាការនេះ នៅពេលឃើញមុខគូស្នេហ៍នឹងមានអារម្មណ៍ថា ស្រ្តីម្នាក់នេះស្រដៀងគូស្នេហ៍របស់ខ្លួនមែនទែន តែមិនមែនទេ គ្រាន់តែជាមនុស្សម្នាក់ដែលមុខដូចគ្នា តែបន្លំខ្លួនមក ពោលគឺអាចចំណាំមុខបាន តែមិនអាចតភ្ជាប់ និងជឿបានថាមុខមួយហ្នឹងគឺជាមនុស្សដែលខ្លួនចងចាំបាន។ អាការនេះច្រើនជួបនៅលើអ្នកជំងឺចិត្តភេទ មានសភាវខួរក្បាលចុះខ្សោយ ឬរងរបួសខាងខួរក្បាល។
ឃើញរោគនីមួយៗ អាការនីមួយៗហើយ ក៏រកនឹកទិដ្ឋភាពខ្លួនឯងក្នុងសភាពនោះមិនឃើញដូចគ្នា គិតៗទៅខ្លួនខ្ញុំពិតជាសំណាងល្អណាស់ដែលនៅរឹងមាំដូចប្រក្រតីល្អរហូតមកដល់ពេលនេះ ហើយនេះគឺ រោគចម្លែក 5 យ៉ាងដែលជួបតែលើបុរស៕
June 5, 2020
អគ្គស្នងការនគរបាលជាតិបញ្ជារឱ្យសមត្ថកិច្ចតាមចាប់ម្ចាស់រថយន្ត Mercedes និង Rolls-Royce ពាក់ស្លាកលេខនគរបាលក្លែងក្លាយ
បន្ទាប់ពីមានការភ្ញាក់ផ្អើលក្នុងបណ្តាញសង្គមដែលឃើញមានរថយន្តទំនើប2គ្រឿងប្រើស្លាកលេខនគរបាលដូចគ្នា នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានបញ្ជារឱ្យសមត្ថកិច្ចតាមឃាត់ខ្លួនម្ចាស់រថយន្ត Mercedes និង Rolls-Royce ពាក់ស្លាកលេខ នគរបាល 2-7715 មកផ្តន្ទាទោសតាមច្បាប់។
ឧត្តមសេនីយ៍ឯក ឆាយ គឹមខឿន បានបញ្ជាក់ថា រថយន្តទាំង2គ្រឿងនោះបានប្រើប្រាស់ស្លាកលេខក្លែងក្លាយ។ ដើម្បីទប់ស្កាត់ និងចៀសវាងការភាន់ច្រឡំពីសាធារណជន និងទប់ស្កាត់ការប្រព្រឹត្តិបទល្មើសខាងលើនេះ អគ្គស្នងការនគរបាលជាតិនាយឧត្តមសេនីយ៍ នេត សាវឿន បានដាក់បទបញ្ជារដល់សមត្ថកិច្ចស្រាវជ្រាវរកឱ្យឃើញនូវរថយន្តទាំង2គ្រឿងនេះ និងឃាត់ទាំងម្ចាស់រថយន្តដើម្បីអនុវត្តតាមនិតិវិធី។
លោកឧត្តមសេនីយ៍បានបញ្ជាក់ផងដែរថា បើប្រជាពលរដ្ឋទាំងអស់បានឃើញរថយន្តទាំង2គ្រឿងនោះ សូមជូនដំណឹងដល់សមត្ថកិច្ចដែលនៅជិតបំផុតជាបន្ទាន់។
សមត្ថកិច្ចបញ្ជាក់ថា រថយន្តទំនើបទាំង2គ្រឿងនេះបានប្រើស្លាកលេខក្លែងក្លាយដោយស្លាកលេខនោះជាស្លាកលេខដែលបំពាក់លើរថយន្តសមត្ថកិច្ចដែលជាកម្មសិទ្ធរបស់នាយកដ្ឋាននគរបាលទេសចរណ៍។ បើតាមគោលការណ៍ សមត្ថកិច្ចមិនអនុញ្ញាតឱ្យបំពាក់ស្លាកលេខនគរបាល លើរថយន្តឯកជននោះឡើយ។ ស្លាកលេខនេះបំពាក់បានតែលើរថយន្តដឹកកងកម្លាំង ដែលមានស្លាកសញ្ញានគរបាលជាតិ និងរថយន្តដែលជាកម្មសិទ្ធរបស់អង្គភាពនាយកដ្ឋានចំណុះក្រសួងមហាផ្ទៃប៉ុណ្ណោះ ដែលរថយន្តទាំងអស់នោះត្រូវចុះបញ្ជុះជាសម្បត្តិរដ្ឋត្រឹមត្រូវ៕

June 5, 2020
5ខែឆ្នាំ2020នេះ កម្ពុជានាំចេញអង្ករជាង 35ម៉ឺនតោន
ក្រោយពេលស្ថានភាពជំងឺ Covid-19 បានធូរស្រាលបន្តិច រាជរដ្ឋាភិបាលបានអនុញ្ញាតឱ្យនាំចេញអង្ករទៅទីផ្សារក្រៅប្រទេសជាប្រក្រតី ដោយក្នុងនោះបណ្តាប្រទេសជាច្រើនបានចាប់អារម្មណ៍ និងគាំទ្រអង្កររបស់កម្ពុជា។
ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រម៉ាញ់ និងនេសាទ បានលើកឡើងថា លទ្ធផលនៃការនាំចេញអង្ករដែលបានឆ្លងកាត់ការត្រួតពិនិត្យភូតគាមអនាម័យ ក្នុងរយៈពេល 5ខែដើមឆ្នាំ2020 សម្រេចបាន 356,097 តោន កើនឡើងប្រមាណ 105,925 តោន ស្មើនឹង 42.34% ដែលធៀបទៅនឹងរយៈ5ខែដើមឆ្នាំ2019 មានចំនួន 250,179 តោន ។
ដោយឡែក សម្រាប់ខែឧសភា ឆ្នាំ2020 នេះ សម្រេចការនាំចេញអង្ករបាន ចំនួន 55,845 តោន កើនឡើងចំនួន 19,436 តោន ស្មើនឹង 53.30% ធៀបទៅនឹងខែឧសភា ឆ្នាំ2019 ដែលក្នុងនេះមាន៖ អង្ករក្រអូបគ្រប់ប្រភេទមានចំនួន 51,683 តោន, អង្ករចម្រុះគ្រប់ប្រភេទមានចំនួន 3,578 តោន និងអង្ករចំហ៊ុយមានចំនួន 584តោន ។
ប្រទេសដែលបានបញ្ជាទិញអង្ករពីកម្ពុជាក្នុងរយៈពេល 5ខែនេះ មានចំនួន 54ប្រទេស៖ នៅក្នុងសហភាពអ៊ឺរ៉ុបមានប្រទេសចំនួន 24ក្នុងចំណោម28 ប្រទេស ប្រទេសចិន ប្រទេសសមាជិកអាស៊ានចំនួន6 ហើយនិងនៅទ្វិបដ៏ទៃទៀតចំនួន 23 ប្រទេស ។ ទន្ទឹមនឹងនេះក៏មានក្រុមហ៊ុនចំនួន 5 ក្នុងចំណោម 49ក្រុមហ៊ុន ដែលបាននាំចេញអង្ករច្រើនជាងគេ ។
សូមបញ្ជាក់ថា ការនាំចេញអង្ករកម្ពុជាក្នុងរយៈពេល 5ខែដើមឆ្នាំដូចគ្នាប្រៀបធៀបទៅនឹងឆ្នាំ2019 មានកំណើននៅគ្រប់គោលដៅនាំចេញទាំងអស់ សហភាពអ៊ឺរ៉ុបកើនចំនួន 51.10%, ប្រទេសចិនកើនចំនួន 25.26%, បណ្តាប្រទេសសមាជិកអាស៊ានកើនចំនួន 45.39%, និងគោលដៅដ៏ទៃទៀតបានកើនឡើងចំនួន 79.40%៕
June 5, 2020
មិនមែនតែកម្ពុជាទេដែលឈឺក្បាលនឹងព័ត៌មានក្លែងក្លាយ សិង្ហបុរីក៏កំពុងវិលមុខដែរ
នាយកដ្ឋានប្រឆាំងបទល្មើសបច្ចេកវិទ្យាបញ្ជាក់ថា សូម្បីតែប្រទេសសិង្ហបុរីក៏វិលមុខជាមួយនឹងព័ត៌មានក្លែងក្លាយដែរ មិនថាតែកម្ពុជាយើងនោះទេដែលកំពុងរងផលប៉ះពាល់ដោយសារតែបញ្ហាអសកម្មទាំងអស់នេះ។
នាយកដ្ឋានជំនាញខាងលើបានបញ្ជាក់ថា ការផ្សព្វផ្សាយព័ត៌មានមិនពិតនៅតែជាបញ្ហាក្តៅនៅលើបណ្តាញសង្គមនាពេលបច្ចុប្បន្ននេះ ដែលធ្វើឱ្យអ្នកប្រើប្រាស់ក៏ដូចជាប្រជាពលរដ្ឋជាច្រើនមានការយល់ច្រឡំ និងបង្កឱ្យមានចលាចលក្នុងសង្គម។ កាលពីកន្លងទៅថ្មីៗនេះ រាជរដ្ឋាភិបាលបានធ្វើការដកយកអជ្ញាប័ណ្ណពីអង្គភាពសារព័ត៌មានអនឡាញមួយចំនួន ដែលបានធ្វើការផ្សព្វផ្សាយព័ត៌មានក្លែងក្លាយបណ្តាលឱ្យមានការភាន់ច្រឡំជាច្រើនកើតឡើង ដោយឡែកនៅឯប្រទេសសឹង្ហបុរីក៏ជួបនឹងបញ្ហានេះដូចគ្នា។
កាលពីថ្ងៃសៅរ៍ ទី30 ខែឧសភា កន្លងទៅនេះ រដ្ឋាភិបាលសឹង្ហបុរី បានបញ្ជាឱ្យក្រុមហ៊ុនហ្វេសប៊ុកបិទកុំឱ្យអ្នកប្រើប្រាស់នៅសឹង្ហបុរី អាចចូលមើលទំព័រហ្វេសប៊ុកសារព័ត៌មាន National Times Singapore (NTS) ដែលបានធ្វើការផ្សព្វផ្សាយព័ត៌មានមិនពិតយ៉ាងហោចណាស់ចំនួនបី នៅលើទំព័រហ្វេសប៊ុករបស់ខ្លួន នេះបើតាមការឱ្យដឹងពី ក្រសួងទំនាក់ទំនង និងព័ត៌មាន របស់ប្រទេសសឹង្ហបុរី។
បើយោងតាមគេហទំព័ររបស់រដ្ឋាភិបាល ផេកនេះបានផ្សព្វផ្សាយព័ត៌មានមិនពិត និងធ្វើឱ្យមានការភាន់ច្រឡំនោះមានខ្លឹមសារដូចជា៖ “ការរិះគន់ទាំងអស់នឹងត្រូវបានហាមឃាត់ដោយរដ្ឋាភិបាលសឹង្ហបុរី តាមរយៈច្បាប់ថ្មី POFMA ដែលមានតែអ្នកនយោបាយកំពុងកាន់អំណាចទើបអាចសម្រេចថាអ្វីជាការពិត។ នេះជាផេកទី៤ហើយដែលបានបង្កើត និងគ្រប់គ្រងដោយបុគ្គលដែលមានឈ្មោះ Alex Tan ដើម្បីផ្សព្វផ្សាយព័ត៌មានមិនពិត ហើយត្រូវបានរដ្ឋាភិបាលសឹង្ហបុរីបញ្ជាឱ្យក្រុមហ៊ុនហ្វេសប៊ុកបិទទាំងអស់។
នាយកដ្ឋានប្រឆាំងបទល្មើសបច្ចេកវិទ្យា សូមធ្វើការក្រើនរំឭកដល់អង្គភាពព័ត៌មានអនឡាញ ក៏ដូចជាអ្នកប្រើប្រាស់បណ្ដាញសង្គមទាំងអស់សូមមេត្តាជៀសវាងក្នុងការផ្សព្វផ្សាយនិងចែករំលែកព័ត៌មានក្លែងក្លាយ ដែលវាធ្វើឱ្យមានការយល់ច្រឡំ និងបង្កឱ្យមានចលាចលអសន្តិសុខចំពោះប្រជាពលរដ្ឋដែលមិនបានដឹងច្បាស់ សូមមេត្តាធ្វើការផ្សព្វផ្សាយព័ត៌មានពិតនិងទាន់ហេតុការណ៍៕
June 5, 2020
មើលរំលងម៉េចបានទៅ…បើម៉ាស៊ីនបោកសម្លៀកបំពាក់ Samsung Active DualwashTM 21 គីឡូបោកបានស្អាតល្អ មានគុណភាព និងអត្ថប្រយោជន៍ច្រើនម្លឹងៗនោះ…!!
(ភ្នំពេញ) ថ្ងៃទី ០៥ ខែមិថុនា ២០២០៖ ការបោកគក់សម្លៀកបំពាក់ មិនមែនជាការងារងាយស្រួលឡើយ ជាពិសេសនៅក្នុងប្រទេសក្តៅ សម្បូរធូលីដី និងភ្លៀងធ្លាក់ញឹកញាប់ដូចជានៅប្រទេសកម្ពុជា ធ្វើឱ្យសម្លៀកបំពាក់ប្រឡាក់ខ្លាំង។ ជាទូទៅ ទោះបីជាមានម៉ាស៊ីនបោកគក់ក៏ដោយ ក៏អ្នកប្រើប្រាស់ភាគច្រើនត្រូវការ ការត្រាំ និងដុសជម្រះកន្លែងដែលមានក្អែលប្រឡាក់ខ្លាំងនៅលើសម្លៀកបំពាក់ មុននឹងដាក់ចូលទៅក្នុងម៉ាស៊ីនបោកគក់។ ដូច្នេះហើយបានជា សាមសុង បានបង្កើតនូវបច្ចេកវិទ្យាថ្មីៗជាច្រើន តម្រូវតាមភាពចាំបាច់របស់អ្នកប្រើប្រាស់។
ដោយយល់ច្បាស់ពីសេចក្តីត្រូវការ និងធ្វើឱ្យការរស់នៅប្រចាំថ្ងៃរបស់ស្ត្រីមេផ្ទះមានភាពកាន់តែងាយស្រួល និងកាន់តែទាន់សម័យបំផុតនោះក្រុមហ៊ុន សាមសុង បានរចនា និងផលិតឡើងនូវម៉ាស៊ីនបោកសម្លៀកបំពាក់ Samsung Active DualwashTM ស៊េរី WA21M8700GV/ST ដែលមានចំណុះធំ…បោកបានច្រើនមានគុណភាពល្អអាចបោកសម្លៀកបំពាក់បានដល់ទៅ 21 គីឡូក្រាម ជួយសន្សំសំចៃពេលវេលា ថវិកាដោយបោកតែម្តងហើយមិនចាំបាច់រង់ចាំបោកច្រើនដង និងបោកជម្រះបានស្អាតល្អ មានសំឡេងស្ងាត់ ជួយសន្សំសំចៃខ្ពស់ និងប្រើបានយូរទៀតផង!
ជាមួយនឹងម៉ាស៊ីនបោកសម្លៀកបំពាក់ Samsung Active DualwashTM 21 គីឡូក្រាមនេះត្រូវបានបំពាក់មកជាមួយនឹងចានបោក ឬទម្រជ័រមានរាងអង្កាញ់ៗដូចជាក្តារបោកគក់សម្រួលដល់ការបោក ឫត្រាំសម្លៀកបំពាក់ណាដែលប្រឡាក់ខ្លាំងមុននឹងដាក់ចូលទៅក្នុងម៉ាស៊ីន។
អ្វីដែលពិសេសមួយទៀតនោះគឺម៉ាស៊ីនបោកសម្លៀកបំពាក់ Samsung Active DualwashTM 21 គីឡូក្រាមនេះផងដែរមានប្រព័ន្ធទឹកដែលអាចបិទ និងបើកលើប៊ូតុងតែមួយ។ មានន័យថាសម្រាប់ទឹកដែលបានប្រើប្រាស់រួចនៅលើទម្រជ័រក្នុងដំណាក់កាលដំបូងនោះយើងអាចចាក់បញ្ចូលទៅក្នុងម៉ាស៊ីនបោកគក់តែម្តង!
ពិសេសជាងនេះទៅទៀត ម៉ាស៊ីនបោកគក់ Samsung Active DualwashTM ក៏បានបំពាក់នូវមុខងារឆ្លាតវៃដ៏ទំនើបបន្ថែមជាច្រើនទៀតដូចជា៖
1. Magic Dispenser
កង្ហាវាយបំបែកម្សៅសាប៊ូ ឬសាប៊ូទឹកបោកខោអាវជាមួយនឹងស្លាបចក្រទាំង ៦ ធ្វើឱ្យសាប៊ូរលាយបានយ៉ាងល្អបំផុតក្នុងទឹកដោយបង្កើតបានជាពពុះសាប៊ូ ហើយជ្រាបចូលទៅក្នុងសាច់ក្រណាត់បានយ៉ាងល្អឥតខ្ចោះមុននឹងម៉ាស៊ីនចាប់ផ្តើមប្រតិបត្តិការបោកគក់។
1. Magic Filter (Powerful Filtration)
គឺជាតម្រងពីរជាន់ដែលមានសមត្ថភាពអាចចាប់យកភាពកខ្វក់ កម្ទេចកំទីផ្សេងៗបានយ៉ាងល្អ មិនឱ្យតោងជាប់លើសាច់ក្រណាត់បានយ៉ាងល្អឥតខ្ចោះ!
1. WobbleTM Technology
ជួយកាត់បន្ថយការប្រទាក់គ្នានៃសម្លៀកបំពាក់ដែលជាមូលហេតុធ្វើឱ្យសម្លៀកបំពាក់ជ្រួញ និងរមួលចូលគ្នា។
1. Less Noise & Energy
បច្ចេកវិទ្យា Digital Inverter ធ្វើឱ្យម៉ាស៊ីនមានសំឡេងស្ងាត់ល្អ ស៊ីភ្លើងតិច គ្មានសំឡេងរំខាន ប្រើប្រាស់បានយូរ និងធានាជូនលើម៉ូទ័ររហូតដល់ 11 ឆ្នាំ!
1. Hot Water
អាចបោកជាមួយនឹងទឹកក្តៅសម្រាប់ជម្រះសម្លៀកបំពាក់ដែលប្រឡាក់ខ្លាំង ល្អសម្រាប់សាច់ក្រណាត់!
1. Smart Check
App Samsung Smart Washer/Dryer
អាចឱ្យលោកអ្នកឆែករកបញ្ហា និងដំណោះស្រាយ
តាមទូរស័ព្ទដៃរបស់ម៉ាស៊ីនដោយខ្លួនឯង សន្សំសំចៃការចំណាយ!
យ៉ាងម៉េចដែរសុភាពនារី ស្ត្រីមេផ្ទះ និងមេគ្រួសារដ៏ឆ្លាតវៃទាំងអស់គ្នា…? ត្រូវចិត្តអត់ប៉ុណ្ណឹង? នៅចាំអីទៀត…? ប្រញាប់ជាវឥឡូវនេះភ្លាមទៅ?
ដើម្បីជ្រាបឱ្យកាន់តែច្បាស់សូមអញ្ជើញទៅទស្សនាដោយផ្ទាល់នៅតាមហាងដេប៉ូចែកចាយផលិតផល
សាមសុង ទូទាំងប្រទេសដែលនៅជិតលោកអ្នកបំផុត ឬក៏អាចទំនាក់ទំនងសេវាបម្រើអតិថិជនរបស់យើងតាមរយៈលេខទូរស័ព្ទ៖ 1800 203 232!
* បញ្ជាក់៖ រាល់ការជាវម៉ាស៊ីនបោកសម្លៀកបំពាក់ Active DualwashTM តាមបណ្តាដេប៉ូចែកចាយផលិតផល សាមសុង ទាំងអស់កុំភ្លេចសួររកបណ្ណធានា!
June 5, 2020