Author: ពេជ្រ តារាវុទ្ធ

មហោស្រពភាពយន្តខ្លីចតុមុខ លើកទី១៣ នាឆ្នាំ២០២៤នេះ បានរៀបចំឡើងដោយក្រុមភាពយន្តឈូករ័ត្ន ដែលជាអង្គការភាពយន្ត ប្រមូលផ្តុំដោយយុវវ័យដែលស្រឡាញ់ចូលចិត្តវិស័យភាពយន្តខ្នាតខ្លី ដើម្បីជួយលើកស្ទួយ និងជួយគាំទ្រដល់យុវជន យុវនារីខ្មែរយើងឱ្យយល់ដឹង និងមានបំណិនប្រសប់នៅក្នុងការផលិតភាពយន្តខ្លីឱ្យមានគុណភាពខ្ពស់ មានការច្នៃប្រឌិត នឹងឈានទៅរកការផលិតភាពយន្តវែងនាពេលអនាគតបានយ៉ាងរលូនល្អ ជោគជ័យ និងមានការទទួលស្គាល់ពីសំណាក់ផលិតករនៅក្នុងស្រុក និងទូទាំងពិភពលោក។

ក្នុងឱកាសនោះដែរ លោក ស៊ុំ ស៊ីថែន ប្រធានមហោស្រពចតុមុខក្នុងឆ្នាំថ្មីនេះក៏បានលើកឡើងថា “មហោស្រពភាពយន្តខ្លីចតុមុខ លើកទី១៣ នាឆ្នាំនេះ ពិតជាមានមោទនភាពក្រៃលែង ដោយមានការគាំទ្រជាខ្លាំងពីសំណាក់ផលិតករភាពយន្តខ្លីជំនាន់ក្រោយ ដោយក្នុងឆ្នាំ២០២៤នេះ មហោស្រពទទួលបានភាពយន្តខ្លីសរុបចំនួន២៥៩រឿង តែយើងសម្រាំងយកតែ៥៧រឿង ដើម្បីប្រកួត និងចាក់បង្ហាញ ជូនទស្សនិកជន។ ក្នុងនោះ រឿងក្នុងស្រុកសម្រាប់ប្រកួតមានចំនួន៥រឿង និងរឿងបរទេសសម្រាប់ប្រកួតមានចំនួន៩រឿង ដោយមានការដាក់ពិន្ទុពីគណៈមេប្រយោគ២ក្រុមផ្សេងគ្នា ដោយមួយផ្តោត លើភាពយន្តខ្លីខ្មែរ និងមួយទៀតផ្តោតលើភាពយន្តខ្លីបរទេស”។

លោកក៏បានបន្តទៀតថា “កម្មវិធីបើកឆ្នាំនេះ មានការសម្តែងពិសេសពី សាលាសិល្បៈ សម្តែង ក៏ដូចជារំលេចនូវឈុតពិសេសៗពីភាពយន្តខ្នាតវែងបែបរន្ធត់ រឿង «អ្នកស្នងអគារ» ដែលសហដឹកនាំដោយ លោក នេត ឥន្ទនរាសុទ្ធីដ្ឋេព ដែលជាម្ចាស់ជ័យលាភីពីមហោស្រពចំនួន២ដង គឺនៅឆ្នាំ២០១៧ និងឆ្នាំ២០១៩។ ការចាក់បង្ហាញនេះ ចង់បង្ហាញថា យុវសមិទ្ធករយើងពិតជាទទួលបាននូវឱកាសអភិវឌ្ឍស្នាដៃរបស់ខ្លួន តាមរយៈវេទិការបស់មហោស្រព ដោយផ្សារភ្ជាប់ជាមួយវិនិយោគិន និងភាគីពាក់ព័ន្ធនានាក្នុងវិស័យភាពយន្ត។ ចំណែក កម្មវិធីបិទ នឹងលើកបង្ហាញពីការវិវិត្តរបស់មហោស្រព តាមរយៈវីដេអូ និងរូបសញ្ញា ក៏ដូចជាប្រកាសពីជ័យលាភីប្រចាំឆ្នាំ២០២៤ ទាំង៧ប្រភេទផងដែរ”។

សូមបងប្អូនយុវវ័យ និងទស្សនិកជនទាំងអស់អញ្ជើញទៅទស្សនាភាពយន្តខ្លីដែលដាក់ប្រកួតប្រជែងនៅក្នុងឆ្នាំនេះដោយឥតគិតថ្លៃ ពីថ្ងៃទី២៥ ដល់ថ្ងៃទី២៨ ខែតុលានេះ ដោយមានរយៈពេល៤ថ្ងៃជាប់ៗគ្នា នៅរោងភាពយន្តទំនើបចំនួន៥ មានដូចជា Legend Cinema ផ្សារទំនើបអូឡាំព្យា, Major Cineplex សាខាផ្សារទំនើបសូរិយា, Fabel Cinema, Workspace 2 នៅ Factory Phnom Penh និងនៅ Cine Hub ក្នុងនោះអ្នកចូលរួមទស្សនាទាំងអស់ក៏មានសិទ្ធិចូលរួមបោះឆ្នោតគាំទ្រភាពយន្តខ្លីដែលអ្នកស្រឡាញ់ពេញចិត្ត ដើម្បីគាំទ្រស្នាដៃភាពយន្តខ្លីនោះឱ្យមានឱកាសឈ្នះពានរង្វាន់ពីមហោស្រពផងដែរ។ ក្រៅពីការចាក់បញ្ចាំងភាពយន្តខ្លី ដែលបានសម្រិតសម្រាំងយ៉ាងពិសេសសម្រាប់ការប្រកួតប្រជែង មហោស្រពភាពយន្តខ្លីចតុមុខ លើកទី១៣ ក៏បានរៀបចំនូវកម្មវិធីជួបជុំជជែកពិភាក្សាពីវិស័យភាពយន្ត និងសិក្ខាសាលាចែករំលែកចំណេះដឹងជុំវិញវិស័យភាពយន្តនេះផងដែរ ដើម្បីជាការលើកទឹកចិត្តដល់យុវវ័យជំនាន់ក្រោយឱ្យចាប់អារម្មណ៍ និងចូលរួមលើកស្ទួយវិស័យផលិតភាពយន្តខ្លីដែលមានគុភាពខ្ពស់នៅក្នុងប្រទេសកម្ពុជាយើងនាពេលអនាគត៕

ភ្នំពេញ ៖ មន្រ្តីជាន់ខ្ពស់នៃក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា បច្ចុប្បន្ននេះ មានបុគ្គលមួយចំនួន ក្រោមលេសធ្វើទង្វើមនុស្សធម៌ បាន និងកំពុងដើរប្រមូលស្នាមមេដៃ រៀបចំឯកសារ និងឈរឈ្មោះធ្វើជាអ្នកតំណាងឱ្យគ្រួសារប្រជាពលរដ្ឋដើម្បីដាក់ពាក្យស្នើសុំដីធ្លីពីអាជ្ញាធរមានសមត្ថកិច្ច ឬពីរាជរដ្ឋាភិបាល ដោយលើកហេតុផលថា គ្រួសារទាំងនោះជាគ្រួសារក្រីក្រ និងគ្មានដីធ្លីសម្រាប់សាងសង់លំនៅឋាន ក៏ដូចជាបង្កបង្កើនផល។ បុគ្គលជាមេខ្យល់ទាំងនោះ តែងធ្វើការរ៉ៃអង្គាស ឬដាក់លក្ខខណ្ឌឱ្យប្រជាពលរដ្ឋដែលចូលរួមដាក់ពាក្យសុំដីបង់ប្រាក់ទៅឱ្យពួកគេ ដោយអះអាងថាយកទៅធ្វើសោហ៊ុយ “រត់ការ” ដើម្បីស្នើសុំដីពីអាជ្ញាធរមានសមត្ថកិច្ច។

មន្រ្តីដដែលបានបញ្ជាក់ថា ការស្នើសុំបែបនេះ គឺខុសទាំងស្រុងនឹងលក្ខខណ្ឌ និងនីតិវិធីដែលច្បាប់និងលិខិតបទដ្ឋានគតិយុត្តជាធរមានបានអនុញ្ញាត ហើយធ្វើឱ្យប៉ះពាល់ដល់បំណងដ៏ពិសិដ្ឋរបស់រាជរដ្ឋាភិបាលចំពោះប្រជាពលរដ្ឋដែលក្រីក្រ និងត្រូវការដីពិតប្រាកដ។ ក្នុងន័យនេះ ដើម្បីទទួលបានដីពិតប្រាកដ និងដើម្បីចៀសវាងចាញ់ការបោកប្រាស់ពីសំណាក់ជនខិលខូច គ្រួសារដែលក្រីក្រ ឬដែលគ្មានឬខ្វះដីពិតប្រាកដ ត្រូវដាក់ពាក្យដោយផ្ទាល់នៅសាលាឃុំ សង្កាត់ ដើម្បីស្នើសុំដីតាមលក្ខខណ្ឌនិងនីតិវិធីនៃកម្មវិធីសម្បទានដីសង្គមកិច្ច ដែលអនុវត្តដោយរដ្ឋបាលឃុំ សង្កាត់ និងក្រសួងរៀបចំដែនដី នគរូបនីយកម្ម និងសំណង់។

ជនដែលបានចាប់ផ្តើម និង / ឬកំពុងធ្វើសកម្មភាពប្រមូលស្នាមមេដៃពីប្រជាពលរដ្ឋដើម្បីដាក់លិខិតស្នើសុំដីរដ្ឋ គប្បីបញ្ឈប់ជាបន្ទាន់ ព្រោះទង្វើទាំងនេះមិនត្រឹមតែជាទង្វើខុសច្បាប់ដែលអាចប្រឈមនឹងការចោទប្រកាន់តាមផ្លូវតុលាការប៉ុណ្ណោះទេ ប៉ុន្តែវាធ្វើឱ្យប៉ះពាល់ដល់នយោបាយដ៏ត្រឹមត្រូវ និងចេតនាដ៏ល្អរបស់រាជរដ្ឋាភិបាលក្នុងការកាត់បន្ថយភាពក្រីក្ររបស់ប្រជាពលរដ្ឋ តាមរយៈការដាក់ចេញ និងអនុវត្តនូវគោលនយោបាយស្តីពីសម្បទានដីសង្គមកិច្ចចាប់តាំងពីឆ្នាំ២០០៣ មក។ ក្នុងន័យនេះ គ្រួសារប្រជាពលរដ្ឋដែលគ្មានដី ឬខ្វះខាតដីពិតប្រាកដ អាចទៅដាក់ពាក្យស្នើសុំដីសម្បទានសង្គមកិច្ចនៅរដ្ឋបាលឃុំ សង្កាត់ដែលជាទីលំនៅអចិន្រ្តៃយ៍របស់ខ្លួន ដើម្បីរដ្ឋបាលឃុំ សង្កាត់ និងក្រសួងរៀបចំដែនដី នគរូបនីយកម្ម និងសំណង់ មានលទ្ធភាពរៀបចំផែនការកម្មវិធីសម្បទានដីសង្គមកិច្ចតាមលក្ខខណ្ឌនិងនីតិវិធីជាធរមាន។

យោងរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ គិតពីចាប់ផ្តើមអនុវត្តរហូតដល់ដំណាច់ខែមិថុនា ឆ្នាំ២០២៤ នេះ តាមរយៈកម្មវិធីសម្បទានដីសង្គមកិច្ចគ្រប់ប្រភេទ រាជរដ្ឋាភិបាលសម្រេចផ្តល់ដីសរុបទំហំប្រមាណ ១,៣លានហិកតា ជូនប្រជាពលរដ្ឋសរុបជិត ៥០ម៉ឺនគ្រួសារ និងសាងសង់ផ្ទះជូនប្រជាពលរដ្ឋសរុបចំនួន ៨ ១៤១ខ្នង៕

ភ្នំពេញ៖ យោងតាមសេចក្ដីជូនដំណឹងរបស់ក្រសួងទេសចរណ៍ចុះថ្ងៃទី២២ ខែតុលា ឆ្នាំ២០២៤បានឱ្យដឹងថា កម្ពុជា ដែលមានក្រសួងទេសចរណ៍ជាសេនាធិការ នឹងរៀបចំពិព័រណ៍ម្ហូបអាហារ កម្ពុជា-ចិន (Cambodia-China Gastronomy Week) ចាប់ពីថ្ងៃទី២៦ ដល់ថ្ងៃទី២៧ ខែតុលា ឆ្នាំ ២០២៤ នៅខេត្តសៀមរាប ដោយមានស្តង់តាំងបង្ហាញសរុបប្រមាណ១០០ស្តង់ ។

ក្រៅពីនេះក៏មានសិក្ខាសាលាម្ហូបអាហារ (Gastronomy Conference) ក្រោមប្រធានបទ “Good Food for All” ក្រោមវត្តមានវាគ្មិនល្បីៗមកចែករំលែកបទពិសោធស្តីពីម្ហូបអាហារកម្ពុជា និងចិនផងដែរ។

សេចក្តីប្រកាសពត៌មានដដែលបានឱ្យដឹងទៀតថា៖ ព្រឹត្តិការណ៍នេះរៀបចំឡើងក្នុងគោលបំណងជំរុញការផ្សព្វផ្សាយពីមុខម្ហូប និងសក្តានុពលទេសចរណ៍ដ៏សម្បូរបែបរបស់កម្ពុជាឱ្យកាន់តែទូលំទូលាយទៅកាន់ទីផ្សារអន្តរជាតិ ជាពិសេសទីផ្សារចិន ព្រមទាំងពង្រឹងទំនាក់ទំនង និងកិច្ចសហប្រតិបត្តិការល្អក្នុងវិស័យទេសចរណ៍រវាងផ្នែករដ្ឋ-ឯកជន កម្ពុជា-ចិន និងបន្តជំរុញយុទ្ធនាការផ្សព្វផ្សាយ «ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤» ព្រមទាំងចូលរួមជំរុញយុទ្ធនាការ «ឆ្នាំទស្សនាសៀមរាប ២០២៤» សំដៅទាក់ទាញទេសចរ និងវិនិយោគិនចិនឱ្យមកទស្សនា និងវិនិយោគនៅកម្ពុជាឱ្យបានកាន់តែច្រើនថែមទៀត។

ជាមួយគ្នានេះ ក្រសួងទេសចរណ៍ ក៏បានអំពាវនាវដល់ប្រតិបត្តិករទេសចរណ៍ គ្រប់សមាគមទេសចរណ៍ផ្នែករដ្ឋ ឯកជន ស្ថាប័នពាក់ព័ន្ធ សារព័ត៌មានជាតិ-អន្តរជាតិ និងសាធារណជន ចូលរួមផ្សព្វផ្សាយអំពីពិព័រណ៍ម្ហូបអាហារកម្ពុជា-ចិន (Cambodia-China Gastronomy Week) ខាងលើនេះឱ្យបានទូលំទូលាយ សំដៅទាក់ទាញការចូលរួមឱ្យបានច្រើនកុះករ ព្រមទាំងបង្កើនចំណាប់អារម្មណ៍ភ្ញៀវទេសចរ និងវិនិយោគិនចិនឱ្យមកទស្សនា និងវិនិយោគនៅព្រះរាជាណាចក្រកម្ពុជាកាន់តែច្រើនថែមទៀត។ សូមកុំភ្លេចចូលរួមនៅក្នុងកម្មវិធីពិព័រណ៍ទាំងអស់គ្នា ដើម្បីគាំទ្រ និងជំរុញវិស័យទេសចរណ៍កម្ពុជា៕

ក្រសួងអប់រំ យុវជន និងកីឡា កាលពីម្សិលម៉ិញនេះបានចេញលិខិតថ្មីមួយដើម្បីជូនដំណឹងទៅគណៈអភិបាលរាជធានីខេត្តទាំងអស់ឱ្យផ្អាក​ដំណើរការអាជីវកម្ម​ក្លិបហាត់ប្រាណទូទាំងប្រទេសជាបណ្ណោះអាសន្ន។

នៅក្នុងសេចក្តីជូនដំណឹងនោះបានបញ្ជាក់ថា ក្នុងស្មារតីរួមបង្ការ និងទប់ស្កាត់​ការរីករាលដាល​ covid-19 ក្រសួងអប់រំ យុវជន និងកីឡា សូមស្នើឱ្យ​អាជីវកម្ម​ក្លិបហាត់ប្រាណ​នៅទូទាំងប្រទេសផ្អាកដំណើរការ​ជាបណ្តោះអាសន្ន ចាប់ពីថ្ងៃទី 02 ខែមេសា ឆ្នាំ2020 រហូតស្ថានភាពនៃការរាតត្បាតនេះត្រូវបានបញ្ចប់៕

នៅអំឡុងពេលសម្រាកវិស្សមកាលតូចនេះ គ្រឹះស្ថានអប់រំ​ឯកជនទាំងអស់បាន និងកំពុងប្រឹងប្រែងបន្តការបង្រៀនពីចម្ងាយសម្រាប់ជូនសិស្ស និស្សិតទាំងអស់តាមលទ្ធភាពដែលខ្លួនមាន។ ក្នុងដំណាក់កាលនេះ គ្រឹះស្ថានអប់រំ​ស្ទើរទាំងអស់ជាពិសេស​គ្រឹះស្ថាន​ដែលទទួលថ្លៃសិក្សាប្រចាំខែ និងត្រីមាសកំពុងជួបបញ្ហាប្រឈមជាច្រើនលើការបើកប្រាក់ឈ្នូលជូនបុគ្គលិក​ គ្រូបង្រៀន ថ្លៃឈ្នួលអគារ និងកាតព្វកិច្ច​ចំណាយផ្សេងៗទៀត។

លោក ប៉ិច បូឡែន ប្រធានសហព័ន្ធសេវាអប់រំនៃកម្ពុជា និងជាអគ្គនាយកក្រុមហ៊ុន Westline Education Group បានលើកឡើងថា​ក្នុងដំណាក់កាលនៃការប្រយុទ្ធប្រឆាំងនឹងមេរោគ covid-19 នេះលោកសូមថ្លែងអំណរគុណចំពោះរាជរដ្ឋាភិបាលដែលបានអំពាវនាវឱ្យមានការយោគយល់ពីម្ចាស់អគារ និងបានអន្តរាគមន៍គោលនយោបាយជាច្រើនដល់ធុរជនកម្ពុជា។ នៅក្នុងនោះដែរលោកក៏បានថ្លែងអំណរគុណផងដែរចំពោះក្រសួងសុខភិបាលដែលបាន និងកំពុង​ដឹកនាំការងារប្រយុទ្ធប្រឆាំងការរីករាលដាលនៃជំងឺ covid-19 និងថ្លែងអំណរគុណដល់ក្រសួងអប់រំដែលបានផ្តួចផ្តើម​ដំណើរការ​ ការគាំទ្រឱ្យមានកម្មវិធីរៀនពីច​ម្ងាយជូន​សិស្សចំណេះទូទៅខ្មែរ។ ដើម្បីរក្សានិរន្តរភាពសាលារៀន ក៏ដូចជាស្ថេរភាពការងារ​បុគ្គលិក គ្រូបង្រៀន​តាមគ្រឹះស្ថាន​អប់រំឯកជនទាំងអស់ លោក​ស្នើរសូមឱ្យស្ថាប័នពាក់ព័ន្ធមេត្តាពិចារណា​ចាត់វិស័យអប់រំឯកជនដែលកំពុងផ្តល់ការងាររាប់ម៉ឺននាក់​ និងផ្តល់ការសិក្សាដល់សិស្ស និស្សិតរាប់សែននាក់ ជាវិស័យអាទិភាពមួយផង។

លោក ប៉ិច បូឡែន ក៏បានស្នើរសុំផងដែរឱ្យ​ភាគីពាក់ព័ន្ធមេត្តាពិចារណា​ផ្តល់ជូនយន្តការពិសេសមួយចំនួនជូនដល់គ្រឹះស្ថានឯកជន​នានាដោយក្នុងនោះយន្តការសំខាន់ដំបូង គឺ​សូមឱ្យមានការរៀបចំឡើងវិញ​ ឬការផ្តល់ឥណទានបន្ថែមដោយមានការបត់បែន និងយោគយល់។ បន្ថែមពីលើនេះលោកស្នើរសូមឱ្យមានការលើកលែងការបង់ប្រាក់របបបេឡាជាតិសន្តិសុខសង្គម​រហូតដល់ស្ថានភាពប្រសើរឡើងវិញជាថ្មី និងសុំឱ្យមានការផ្តល់ប្រាក់ឧបត្ថម្ភបន្ថែមចំនួន 20% នៃប្រាក់ខែអប្បបរមា 190ដុល្លារដល់បុគ្គលិកអប់រំ និងគ្រូបង្រៀន​ដែលអាចនឹងទទួលផលប៉ះពាល់​ពីការកត់បន្ថយបៀវត្ស​ ការព្យួរការងារ ឬការផ្អាកអាជីវកម្ម។

ប្រធានសហព័ន្ធសេវាអប់រំនៃកម្ពុជា ក៏បានស្នើរសុំផងដែរទៅដល់ភាគីពាក់ព័ន្ធទាំងអស់ឱ្យមានការពន្យារពេលរៀបចំសៀវភៅការងារបុគ្គលិកបរទេសក្នុងអំឡុងពេលនៃការឆ្លងកាត់ការប្រយុទ្ធប្រឆាំងមេរោគ covid-19 នេះ និង​សូមផ្តល់ជូននូវកញ្ចប់ថវិកាសមរម្យណាមួយសម្រាប់គ្រឹះស្ថានអប់រំ ដែលរងផលប៉ះពាល់​ខ្លាំងដោយសារ covid-19 សម្រាប់ដំណើរការគ្រឹះស្ថានថ្មីឡើងវិញ។ ចំពោះម្ចាស់អគារវិញលោកស្នើរសុំឱ្យពួកគាត់ទាំងអស់ដាក់ចិត្តយល់ និងស្វែងរកដំណោះស្រាយឈ្នះ-ឈ្នះ មួយជាមួយម្ចាស់អាជីវកម្មក្នុងអំឡុងពេលនេះ។

គួរបញ្ជាក់ផងដែរថា កន្លងមកសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់ម្ចាស់ទីតាំងជួល​សម្រាប់ម្ចាស់អាជីវកម្មឱ្យមានការយោគយល់ក្នុងកាលៈទេសៈដែលម្ចាស់អាជីវកម្មនីមួយៗកំពុងបាត់បង់ចំណូល​ ដោយម្ចាស់ទីតាំងអាចបញ្ចុះតម្លៃប្រមាណ 50% ឬច្រើនជាងនេះដើម្បីជួយដល់អតិថិជនរបស់ខ្លួនដោះស្រាយបញ្ហាអាជីវកម្ម​​រហូតស្ថានភាពត្រឡប់មកប្រសើរឡើងវិញ។

សម្តេចតេជោ ហ៊ុន សែន បានមានប្រសាសន៍ថា៖ «​សូមឱ្យមានការយោគយល់គ្នា នៅលើបញ្ហាហ្នឹង ខ្ញុំបានស្តាប់នូវមនុស្សមួយចំនួនដែលបានរកស៊ីជួល អគារគេ ជួលទីតាំងគេ ឥឡូវម្ចាស់ដើមទារពេញថ្លៃ ក្នុងពេលដែលគ្នារកចំណូលអត់បាន អញ្ចឹងទេ សូមកុំកាប់មេមាន់ ទទួលទាន គួរត្រូវរក្សាមេមាន់នេះ ដើម្បីថ្ងៃក្រោយ ឱ្យវាពងកូនតទៅទៀត អញ្ចឹងប្រសិនបើកាប់គ្នា ក្នុងពេលនេះគឺបានសេចក្តីថា ហាងហ្នឹងត្រូវបិទទ្វារ រហូតគ្មានអ្នកណាជួល ទៅថ្ងៃក្រោយ។ ប៉ុន្តែ ប្រសិនជាអនុគ្រោះឱ្យគ្នា 1ខែ 2ខែ ឬក៏បញ្ចុះថ្លៃប៉ុណ្ណនេះភាគរយ ឬ50ភាគរយ 60 ឬ70ភាគរយ គឺយើងអាចរក្សាអតិថិជនឱ្យជួលត្រឡប់មកវិញ នៅពេលដែលសភាពការណ៍បានរើបម្រាស់ត្រឡប់មកវិញ»។

លោក ប៉ិច បូឡែន បាននិយាយថា៖ «ខ្ញុំជឿជាក់ថាយើងទាំងអស់គ្នា រដ្ឋាភិបាល ស្ថាប័នរដ្ឋ វិស័យឯកជន មាតាបិតា អ្នកអាណាព្យាបាល និងគ្រឹះស្ថានអប់រំ រួមទាំងប្រជាជនទាំងអស់គ្នាពិតជាអាចយកជ័យជំនះក្នុងការទប់ស្កាត់ការរាលដាលនៃមេរោគ covid-19នេះ ហើយនឹងអាចបន្តការអភិវឌ្ឍធនធានមនុស្ស និងសេដ្ឋកិច្ច​ប្រទេសយើងឱ្យរីកចម្រើនបន្តដូចចិត្តយើងចង់បានទាំងអស់គ្នា»។

កន្លងមកក្នុងដំណាក់កាលនៃការទប់ស្កាត់ការរីករាលដាលនៃ​មេរោគ covid-19 សហព័ន្ធសេវាអប់រំ​កម្ពុជា បានចូលរួមនូវថវិកាប្រមាណ 1ម៉ឺនដុល្លារ និងក្រុមហ៊ុន Westline Education Group ក៏បានចូលរួម​ថវិកាចំនួន 1ម៉ឺនដុល្លារផងដែរជាមួយសម្តេចនាយករដ្ឋមន្ត្រីក្នុងយុទ្ធនាការទប់ស្កាត់ការរីករាលជំងឺ covid-19៕

ការអប់រំជាផ្នែកយ៉ាងសំខាន់សម្រាប់ជីវិត បើទោះបីជាស្ថិតក្នុងពេលវេលា និងកាលៈទេសៈណាក៏ដោយ ក៏ការអប់រំមិនអាចត្រូវបានគេបំភ្លេចដែរ ព្រោះវាជាផ្នែកមិនអាចខ្វះបានក្នុងការអភិវឌ្ឍជីវិតមនុស្ស និងសង្គម។ ជាក់ស្តែង ទោះស្ថិតក្នុងកាលៈទេសៈនៃការរីករាលដាលនៃមេរោគ​ Covid-19 ក៏គ្រឹះស្ថានអប់រំនានាលើពិភពលោកនៅតែព្យាយាមស្វែងរកគ្រប់មធ្យោបាយដើម្បីធានាឱ្យបាននូវនិរន្តរភាពនៃការអប់រំ និងជាពិសេសគឺគុណភាពអប់រំសម្រាប់សិស្សានុសិស្សរបស់គេ។

នៅកម្ពុជា បណ្តាញសាលារៀនទាំងអស់របស់ក្រុមហ៊ុនវេសឡាញ អេឌ្យូខេសិន គ្រុប​ បានជំរុញការអប់រំរបស់ខ្លួនឱ្យនៅតែសកម្ម និងរក្សាបាននូវគុណភាពខ្ពស់តាមរយៈកម្មវិធីសិក្សាពីចម្ងាយ (online learning system) ដល់សិក្ខាកាម និងសិស្សានុសិស្សទាំងអស់របស់ខ្លួន។

លោក ប៉ិច បូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា ដើម្បីឆ្លើយតបជាមួយនឹងតម្រូវការអប់រំជាក់ស្តែងក្នុងកាលៈទេសៈដែលកម្ពុជាកំពុងការពារការរីករាលដាលនៃ​ជំងឺរលាកសួតប្រភេទថ្មីដែលកើតឡើងដោយមេរោគ covid-19 នេះ បណ្តាញសាលារៀនរបស់លោកទាំងអស់បានដាក់ឱ្យប្រើប្រាស់បណ្តាញសិក្សាពីចម្ងាយ (online learning system) ដើម្បីឱ្យសិស្សានុសិស្សទាំងអស់នៅតែមានលទ្ធភាពទទួលបានការសិក្សាបើទោះបីជាពួកគេមិនបានមកសាលារៀនក៏ដោយ។ កម្មវិធីដែលបណ្តាញសាលារៀនរបស់វេសឡាញ យកមកសិក្សាមានច្រើនប្រភេទដូចជាកម្មវីធី Seesaw class កម្មវិធី Class dojo និងថ្នាក់ខ្លះប្រើប្រាស់កម្មវិធីរួមគ្នាដូចជា​ Facebook massanger ក៏ដូចជា Facebook Close group ជាដើម។ បន្ថែមពីលើនេះមានថ្នាក់រៀនខ្លះបានអនុវត្តកម្មវិធី Google Email ក៏ដូចជាបណ្តាញផ្សេងៗទៀតដូចជា ការដាក់ឱ្យសិក្សាតាមរយៈ E-School Cambodia សម្រាប់ថ្នាក់សិស្សធំ និងចំពោះថ្នាក់បឋមសិក្សាវិញ យើងបានសហការជាមួយនឹង​កម្មវិធីអប់រំ sangapac ដើម្បីជំរុញការសិក្សារបស់សិស្សឱ្យកាន់តែមានភាពទាក់ទាញ និង​មានប្រសិទ្ធភាពខ្ពស់។

លោក ប៉ិច បូឡែន បាននិយាយថា៖ «​យើងមានទម្រង់ (platform) ច្រើនក្នុងការ​ដាក់ឱ្យសិស្សសិក្សា តាមបណ្តាញបច្ចេកវិទ្យា ហើយក្នុងដំណាក់កាលនេះ អ្វីដែលកាន់តែចាំបាច់សម្រាប់ការអប់រំ គឺការចូលរួម​ឱ្យបានសកម្មពីអាណាព្យាបាលទាំងអស់គ្នាក្នុងការជួយកូនៗបន្ថែមដើម្បីទទួលចំណេះដឹងឱ្យបានកាន់តែល្អ»។

ស្ថាបនិកគ្រឹះស្ថានអប់រំខាងលើបានលើកឡើងផងដែរថា ក្រៅពីការប្រើប្រាស់កម្មវិធីដូចបានរៀបរាប់ខាងលើ យើងក៏មាន​បង្រៀន​ដោយការផ្សាយផ្ទាល់ពីថ្នាក់រៀន ឬ​ចាក់ផ្សាយនូវការថតទុក​មេរៀន​នៅក្នុងថ្នាក់ផងដែរដើម្បីឱ្យសិស្សទទួលបានការអប់រំ​ដូចនៅក្នុងសាលា។ លោកថាទោះស្ថិតក្នុងដំណាក់កាលនេះក៏ដោយក៏គ្រឹះស្ថានរបស់លោកត្រូវខិតខំប្រឹងប្រែងជាចាំបាច់ដើម្បីពង្រឹងគុណភាពអប់រំ ដោយក្នុងនោះបុគ្គលិក​ និងគ្រូបង្រៀននៅតែត្រូវមកធ្វើការងារដោយប្រុងប្រយ័ត្នបំផុត ដោយ​ត្រូវសម្អាតដៃ និងវាស់សីតុណ្ហភាពយ៉ាងហ្មត់ចង់​ដើម្បីធានាបាននូវសុវត្ថិភាព និងអនាម័យខ្ពស់។ បុគ្គលិកទាំងអស់នៅតែធ្វើការយ៉ាងសកម្ម​ទៅតាមក្រុមនីមួយៗដើម្បីធ្វើយ៉ាងណាដោះស្រាយបញ្ហា និង​ផ្តល់គុណភាពអប់រំល្អដល់សិស្សានុសិស្សនៅតាមផ្ទះជាប់ជានិច្ច៕