សឿន សំណាង - La Reine Media

COVID-19! កម្មករជិត900នាក់នៅក្នុងរោងចក្រច្នៃសាច់ជ្រូក1នៅសហរដ្ឋអាមេរិក បានឆ្លងវីរុស

កម្មករចំនួន 890នាក់ ស្មើនឹង40% នៃកម្មករសរុបនៅក្នុងរោងចក្រកែច្នៃសាច់ជ្រូក Tyson Food ក្នុងរដ្ឋ Indiana វិជ្ជមានជាមួយវីរុសCOVID-19។

Sernity Alter ដែលជាប្រធានមន្ទីរសុខាភិបាលស្រុក Cass នៃរដ្ឋ Indiana របស់សហរដ្ឋអាមេរិក បានឱ្យដឹងថា ក្រៅពីអ្នកដែលបានឆ្លងវីរុស ក៏មានកម្មកររាប់រយនាក់ផ្សេងទៀតនៅរោងចក្រកែច្នៃសាច់ជ្រូករបស់ក្រុមហ៊ុន Tyson Food ក្នុងទីក្រុង Logansport កំពុងត្រូវបានធ្វើតេស្តរកមេរោគCOVID-19។ រោងចក្រនេះបានផ្អាកដំណើរការតាំងពីថ្ងៃទី25មេសា ដើម្បីទប់ស្កាត់ការឆ្លងរាលដាលវីរុសកូរ៉ូណា។

Hli Yang ដែលជាអ្នកនាំពាក្យរបស់ Tyson Food បានឱ្យដឹងថា រោងចក្ររបស់ខ្លួននៅ Logansport មានកម្មករចំនួន2,200នាក់ ប៉ុន្តែអ្នកនាំពាក្យរូបនេះមិនបានបញ្ជាក់អំពីតួលេខនៃអ្នកបានឆ្លងវីរុសកូរ៉ូណានៅទីនេះនោះទេ។

COVID-19! កម្មករជិត900នាក់នៅក្នុងរោងចក្រច្នៃសាច់ជ្រូក1នៅអាមេរិក បានឆ្លងវីរុស — លោក John H.Tyson ប្រធានក្រុមហ៊ុន Tyson Food

ប្រធានក្រុមហ៊ុន Tyson Food លោក John H.Tyson ដែលមានទ្រព្យសរុបប្រមាណជា 2.1ពាន់លានដុល្លារ កាលពីសប្ដាហ៍មុនបានព្រមានថា “បណ្ដាញ់ផ្គត់ផ្គង់អាហាររបស់សហរដ្ឋអាមេរិក កំពុងត្រូវបានបំផ្លាញ”។ លោកថា បច្ចុប្បន្នក្រុមហ៊ុននេះកំពុងប្រឈមនឹងហានិភ័យនៃកង្វះសាច់ដើម្បីផ្គត់ផ្គង់ទីផ្សារ ព្រោះតែវីរុសCOVID-19។ ដោយសារបញ្ហានេះ កាលពីថ្ងៃទី28មេសា លោកប្រធានាធិបតី Donald Trump បានចុះហត្ថលេខាលើបទបញ្ជាមួយដោយយោងទៅលើច្បាប់ផលិតកម្មការពារជាតិ ដែលបង្ខំឱ្យរោងចក្រផលិតសាច់់នានា បន្តធ្វើសកម្មភាពដូចធម្មតា៕

ប្រភព៖ សារព័ត៌មានបរទេស

May 2, 2020

ទៀតហើយ! រដ្ឋមន្ត្រី និងអនុរដ្ឋមន្ត្រីរបស់រុស្ស៊ី ចូលមន្ទីរពេទ្យដោយសារ COVID-19

រយៈពេល1ថ្ងៃ បន្ទាប់ពីនាយករដ្ឋមន្ត្រីរុស្ស៊ី លោក Mishustin បានប្រកាសថាខ្លួនបានឆ្លងវីរុសកូរ៉ូណាថ្មី រដ្ឋមន្ត្រីក្រសួងសំណង់និងលំនៅដ្ឋានរបស់ប្រទេសរុស្ស៊ី គឺលោក Yakushev ក៏បានចូលសម្រាកព្យាបាលនៅមន្ទីរពេទ្យកាលពីម្សិលមិញ ដោយសារបានឆ្លងវីរុសCOVID-19។

“ខ្ញុំកំពុងទទួលការព្យាបាលក្រោមការតាមដានរបស់ក្រុមវេជ្ជបណ្ឌិតនៅម៉ូស្គូ” រដ្ឋមន្ត្រីក្រសួងសំណង់និងលំនៅដ្ឋាន លោក Vladimir Yakushev បានប្រាប់ Interfax កាលពីថ្ងៃទី1ឧសភាបែបនេះ។

មន្ត្រីក្រោមឱវាទរបស់រដ្ឋមន្ត្រី Yakushev គឺលោកអនុរដ្ឋមន្ត្រី Dmitry Volkov ក៏បានចូលព្យាបាលនៅមន្ទីរពេទ្យ ព្រោះតែបានឆ្លងវីរុសកូរ៉ូណានេះដែរ។ អនុរដ្ឋមន្ត្រីនៃក្រសួងសំណង់និងលំនៅដ្ឋាន លោក Nikita Stasishin ត្រូវបានតែងតាំងជារដ្ឋមន្ត្រីស្ដីទីនៃក្រសួងមួយនេះ ជំនួសឱ្យលោក Yakushev។

Yakushev គឺជាមន្ត្រីជាន់ខ្ពស់ទី2របស់រុស្ស៊ី ដែលបានឆ្លងវីរុសCOVID-19។ នាយករដ្ឋមន្ត្រីរុស្ស៊ី លោក Mikhail Mishustin កាលពីថ្ងៃទី30មេសា បានប្រកាសថា លោកបានឆ្លងវីរុសកូរ៉ូណា និងកំពុងបង្ខាំងខ្លួនដាច់ដោយឡែកដើម្បីការពារការឆ្លងរាលដាលទៅអ្នកផ្សេង។ ឧបនាយករដ្ឋមន្ត្រីទី1 លោក Andrei Belousov ត្រូវបានប្រធានាធិបតី Vladimir Putin តែងតាំងជានាយករដ្ឋមន្ត្រីស្ដីទី។

ប្រទេសរុស្ស៊ី គិតមកដល់បច្ចុប្បន្ន មានអ្នកជំងឺCOVID-19សរុប ជាង114,000នាក់ ឈរលំដាប់ទី8ក្នុងពិភពលោក ក្នុងនោះមានអ្នកជំងឺជាង1,100នាក់បានបាត់បង់ជីវិត ដែលភាគច្រើននៅរដ្ឋធានីម៉ូស្គូ និងទីក្រុង St. Petersburg។ ប្រទេសនេះ បានធ្វើតេស្តរកមេរោគកូរ៉ូណា ប្រមាណជា3.7លានលើក៕

ប្រភព៖ សារព័ត៌មានបរទេស

May 2, 2020

មនុស្សជាង239,000នាក់បានស្លាប់ដោយសារ COVID-19 នៅទូទាំងពិភពលោក

សកលលោកទាំងមូលមានអ្នកស្លាប់ជាង239,000នាក់នៅក្នុងចំណោមអ្នកជំងឺCOVID-19 ជិត3.4លាននាក់ ខណៈដែលប្រទេសជាច្រើនបានចាប់ផ្ដើមដកបម្រាមគោចរ ឬបន្ធូរបន្ថយការរឹតត្បិតលើការដើរហើរ។

ទិន្នន័យនៅលើ Worldometers ដែលជាគេហទំព័រផ្ដល់ស្ថិតិទាន់ហេតុការណ៍ស្ដីអំពីតួលេខអ្នកជំងឺCOVID-19 បង្ហាញថា នៅទូទាំងពិភពលោក មានមនុស្សប្រមាណជា3,395,780នាក់បានឆ្លងវីរុសកូរ៉ូណា និង239,350នាក់បានស្លាប់ដោយសារវីរុសនេះ។ អ្នកជំងឺកើន146,113នាក់ និងអ្នកស្លាប់កើន6,414នាក់ បើធៀបជាមួយនឹងម្សិលមិញ។ អ្នកជំងឺដែលបានជាសះស្បើយមានចំនួន1,079,557នាក់។

នៅទ្វីបអឺរ៉ុប តួលេខនៃអ្នកជំងឺCOVID-19 បានឡើងដល់ 1,399,063នាក់ ខណៈអាមេរិកខាងជើងមានអ្នកជំងឺ1,226,668នាក់ ទ្វីបអាស៊ីមាន533,842នាក់ អាមេរិកខាងត្បូងមាន190,099នាក់ និងទ្វីបអាហ្វ្រិកមានអ្នកជំងឺតិចជាងគេ គឺ41,537នាក់។

បណ្ដាប្រទេសដែលមានអ្នកស្លាប់ដោយសារវីរុសCOVID-19 លើសពី20,000នាក់ រួមមាន5ប្រទេស៖

1.សហរដ្ឋអាមេរិក៖ អ្នកស្លាប់សរុប 65,753នាក់ និងអ្នកជំងឺសរុប 1,131,030នាក់។
2.អ៊ីតាលី៖ អ្នកស្លាប់សរុប 28,236នាក់ និងអ្នកជំងឺសរុប 207,428នាក់។
3.អង់គ្លេស៖ អ្នកស្លាប់សរុប 27,510នាក់ និងអ្នកជំងឺសរុប 177,454នាក់់។
4.អេស្ប៉ាញ៖ អ្នកស្លាប់សរុប 24,824នាក់ និងអ្នកជំងឺសុរប 242,988នាក់
5.បារាំង៖ អ្នកស្លាប់សរុប 24,594នាក់ និងអ្នកជំងឺសរុប 167,346នាក់

ប្រភព៖ សារព័ត៌មានបរទេស

May 2, 2020

Kim Jong-un បង្ហាញខ្លួន

បន្ទាប់ពីបានបាត់ខ្លួនរយៈពេល20ថ្ងៃ និងបានធ្វើឱ្យពិភពលោករំជើបរំជួល ចុងក្រោយ លោក Kim Jong-un ក៏បានបង្ហាញខ្លួននៅក្នុងពិធីសម្ពោធបើកដំណើរការរោងចក្រផលិតជីមួយ កាលពីម្សិលមិញ (1ឧសភា)។

មេដឹកនាំកូរ៉េខាងជើង លោក Kim Jong-un បានកាត់ខ្សែបូក្នុងពិធីសម្ពោធរោងចក្រផលិតជី Sunchon ដែលមានទីតាំងស្ថិតនៅចម្ងាយ50គមទៅទិសខាងជើងនៃរដ្ឋធានីព្យុងយ៉ាង ក្នុងថ្ងៃពលកម្មអន្តរជាតិ 1ឧសភា។

ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍ក្នុងថ្ងៃនេះ (2ឧសភា)ថា អ្នកដែលមានវត្តមានទាំងអស់ បាននាំគ្នាស្រែកកញ្ជ្រៀវ នៅពេលលោក Kim Jong-un បានបង្ហាញខ្លួន។ មេដឹកនាំកូរ៉េខាងជើង ក៏បានធ្វើទស្សនកិច្ចរោងចក្រនេះ និងត្រូវបាន “ណែនាំទ្រួសៗអំពីដំណើរការនៃការផលិតផងដែរ។

KCNA បានឱ្យដឹងថា ក្នុងចំណោមមន្ត្រីដែលបានអមដំណើរលោក Kim Jong-un ចូលរួមពិធីសម្ពោធនេះ ក៏មានវត្តមានប្អូនស្រីរបស់លោក គឺលោកស្រី Kim Yo-jong ផងដែរ។ មេដឹកនាំរួមនេះ បានសម្ដែងការពេញចិត្តជាមួយនឹងរោងចក្រផលិតជីមួយនេះ។

កូរ៉េខាងជើងគឺជាប្រទេសអាថ៌កំបាំងបំផុតនៅលើភពផែនដី ដោយពិភពលោកអាចតាមដានព័ត៌មានអំពីមេដឹកនាំប្រទេសនេះតាមរយៈសារព័ត៌មានរបស់រដ្ឋកូរ៉េខាងជើងតែប៉ុណ្ណោះ។

នេះគឺជាលើកដំបូងហើយដែលលោក Kim Jong-un បានបង្ហាញវត្តមាន បន្ទាប់ពីបានបាត់ខ្លួនអស់រយៈពេល20ថ្ងៃ។ ដំណឹងចចាមអារ៉ាមជាច្រើនបានកើតឡើង ទាក់ទិននឹងសុខភាពរបស់លោក Kim Jong-un ដោយសារតែអវត្តមានរបស់លោក ក្នុងនោះមានទីភ្នាក់ងារសារព័ត៌មានជាច្រើនចេញផ្សាយថា មេដឹកនាំកូរ៉េខាងជើងកំពុងស្ថិតក្នុងស្ថានភាពគ្រោះថ្នាក់ដល់ជីវិត បន្ទាប់ពីទទួលការវះកាត់ព្យាបាលជំងឺបេះដូង៕

ប្រភព៖ សារព័ត៌មានបរទេស

May 2, 2020

ទិវាពលកម្មអន្តរជាតិសម័យ COVID-19

ថ្ងៃទី1ឧសភា គឺជាឱកាសមួយដែលតែងតែមានបាតុកម្ម និងព្រឹត្តិការណ៍ជាច្រើនត្រូវបានរៀបចំធ្វើឡើងពាសពេញពិភពលោក ប៉ុន្តែឆ្នាំនេះ ប្រទេសមួយចំនួនត្រូវប្រើវិធីច្នៃប្រឌិតថ្មីដើម្បីជំនួសសកម្មភាពនៃឆ្នាំមុនៗ។

COVID-19 បានធ្វើឱ្យមានវិបត្តិសុខភាព និងវិបត្តិសេដ្ឋកិច្ចកើតឡើង បណ្ដាលឱ្យមនុស្សរាប់ពាន់លាននាក់រងផលប៉ះពាល់។ ដើម្បីគោរពទៅតាមបម្រាមគោចរ ឬបទបញ្ជារឹតត្បិតការដើរហើរ ក្រុមមេដឹកនាំសហជីពបានជ្រើសរើសវិធីប្រារព្ធព្រឹត្តិការណ៍ទិវាពលកម្មអន្តរជាតិតាមអនឡាញ ឬពន្យារពេលនៃការប្រារព្ធពិធីបុណ្យនេះ។

បារាំង៖ ប្រជាជនបានទទួលអំណរទិវាពលកម្មអន្តរជាតិនៅលើបណ្ដាញសង្គម និងស្រែកច្រៀងនៅតាមវេរ៉ង់ដានៅឯផ្ទះរបស់ពួកគេជាដើម ដោយមិនបានប្រារព្ធពិធីជួបជុំគ្នានៅតាមទីសាធារណៈនោះទេ។

ប៉ូលីសប្រឆាំងកុបកម្មនៅទីក្រុងហុងកុងក្នុងទិវាពលកម្មអន្តរជាតិ

ប្រទេសក្រិកបានស្នើឱ្យក្រុមសហជីពពន្យារពេលនៃការប្រារព្ធពិធីបុណ្យអន្តរជាតិមួយនេះជាងមួយសប្ដាហ៍ទៀតដើម្បីទប់ស្កាត់ COVID-19។ សហជីព GSEE បានអំពាវនាវឱ្យមានកូដកម្មទូទាំងប្រទេសនៅថ្ងៃទី1ឧសភា ហើយពួកគេក៏បានស្នើឱ្យមានកាយវិការអរគុណដល់ក្រុមបុគ្គលិកសុខាភិបាលផងដែរ។

ហ្វាំងឡង់តែងតែប្រារព្ធពិធីជួបជុំរួមទ្រង់ទ្រាយធំយ៉ាងសប្បាយនៅខាងក្រៅផ្ទះមុននឹងមានព្យុហយាត្រារបស់ក្រុមសហជីព។ ប៉ុន្តែ ឆ្នាំនេះមានតែមនុស្សតិចតួចប៉ុណ្ណោះដែលបានជួបជុំគ្នានៅជុំវិញរូបសំណាក Manta នៅក្នុងទីលានផ្សារ Helsinki ក្រោមការឃ្លាំមើលពីក្រុមប៉ូលីស។

ចំណែកនៅឯទីក្រុងហុងកុងវិញ មនុស្សជាច្រើនបានអំពាវនាវឱ្យធ្វើបាតុកម្មប្រឆាំងនឹងរដ្ឋាភិបាលក្រុងហុងកុងនាថ្ងៃទី1ឧសភានេះ។ ប៉ុន្តែ អាជ្ញាធរក្រុងហុងកុងបានត្រៀមកម្លាំងប៉ូលីស3,000នាក់ ដែលប្រដាប់ដោយកាំភ្លើងបាញ់ឧស្ម័នបង្ហូរទឹកភ្នែក កាំភ្លើងបាញ់គ្រាប់កៅស៊ូ និងឡានទឹកដើម្បីបំបែកហ្វូងមនុស្សបើសិនចាំបាច់។ ហុងកុងកំពុងតែហាមការជួបជុំមនុស្សលើសពី4នាក់ដើម្បីទប់ស្កាត់COVID-19។

ប៉ូលីសអាល្លឺម៉ង់ នៅក្នុងទិវាពលកម្មអន្តរជាតិឆ្នាំ2020

នៅអាល្លឺម៉ង់ ក្រុមស្ដាំនិយម និងឆ្វេងនិយម នៅតែធ្វើការអំពាវនាវឱ្យមានបាតុកម្មនៅ Berlin។ ប៉ុន្តែ មេដឹកនាំរបស់ពួកគេបានអំពាវនាវឱ្យបាតុកររក្សាគំលាតពីគ្នា និងពាក់ម៉ាស់។ ប៉ុន្តែ រដ្ឋមន្ត្រីក្រសួងមហាផ្ទៃប្រទេសនេះស្នើឱ្យប៉ូលីសការពារ និងបន្តអនុវត្តវិធានការទប់ស្កាត់វីរុសCOVID-19។

ទិវាពលកម្មអន្ដរជាតិគឺជាអ្វី?

ទិវាពលកម្មអន្ដរជាតិ ឬ ទិវាកម្មករអន្តរជាតិ (អង់គ្លេសហៅថា International Labor Day) គឺជាថ្ងៃឈប់សម្រាកមួយ ដែលប្រទេសជាច្រើននៅទូទាំងពិភពលោក ប្រារព្ធឡើងក្នុងគោលបំណងដើម្បី រំឫក និងឧទ្ទិសដឹងគុណ ដល់វីរភាពដ៏អង់អាចក្លាហាននៃកម្មករកម្មការិនី ដែលបានប្រឹងប្រែងតស៊ូ និងប្ដូរជីវិតដើម្បីសិទ្ធិកម្មករទាំងមូល។ ទិវាពលកម្មអន្ដរជាតិ តែងតែប្រារព្ធរៀងរាល់ឆ្នាំ នៅថ្ងៃទី1ឧសភា៕

ប្រភព៖ សារព័ត៌មានបរទេស

May 1, 2020

បាតុករអាមេរិកាំង កាន់កាំភ្លើងចូលវិមានសភា ទាមទារឱ្យដកបម្រាមគោចរ

បាតុកររាប់សិបនាក់ ក្នុងនោះមានទាំងអ្នកកាន់កាំភ្លើងក្នុងដៃផងដែរ បាននាំគ្នាចូលទៅកាន់វិមានសភារបស់រដ្ឋ Michigan នៃសហរដ្ឋអាមេរិកកាលពីថ្ងៃទី30មេសាកន្លងទៅ ដើម្បីស្នើឱ្យអភិបាលរដ្ឋដកបម្រាមគោចរ។

ក្រុមបាតុករបានប្រមូលផ្ដុំគ្នានៅសាលរង់ចាំនៃអាគារសភានៅក្នុងទីក្រុង Lansing ដោយគ្មានអ្នកណាម្នាក់ពាក់ម៉ាស់ ប៉ុន្តែមានបាតុករមួយចំនួនបានយកកន្សែងបិទមុខ។ ក្រុមមន្ត្រីនគរបាលបានឃាត់មិនឱ្យក្រុមបាតុករចូលក្នុងបន្ទប់ប្រជុំ។ បាតុករខ្លះ ឈរនៅខាងក្រៅ អ្នកខ្លះកាន់បដាដែលមានសរសេរខ្លឹមសារប្រឆាំងនឹងបម្រាមគោចរ ក្នុងនោះក៏មានបដាខ្លះ ប្រៀបធៀបអភិបាលរដ្ឋ Michigan ទៅនឹងមេដឹកនាំណាហ្ស៊ី Adolf Hitler ទៀតផង។

សមាជិកសភាជាន់ខ្ពស់នៃរដ្ឋ Michigan លោកស្រី Dayna Polehanki បានឱ្យដឹងនៅលើទំព័រ Twitter ថា “បុរសមួយចំនួនកាន់កាំភ្លើងក្នុងដៃ ស្រែកប្រឆាំងយើងខ្ញុំ។ មិត្តរួមការងារមួយចំនួនរបស់ខ្ញុំ ក៏ត្រូវពាក់អាវក្រោះការពារគ្រាប់ទៀតផង”។

បាតុកម្មនេះត្រូវបានគេដាក់ឈ្មោះថា ជនជាតិអាមេរិកាំងស្នេហាជាតិ ដែលត្រូវបានធ្វើឡើងដោយក្រុមសាមគ្គីដើម្បីសេរីភាពរបស់រដ្ឋ Michigan។ ក្រុមនេះបានសរសេរនៅលើបណ្ដាញសង្គម Facebook ថា “យើងមិនសុខចិត្តចំពោះការដែលសិទ្ធិមិនអាចប្រកែកបានរបស់យើងខ្ញុំ ត្រូវបានរឹតត្បិត ឬដកហូតដោយប្រការណាមួយ រួមទាំង COVID-19 ផងដែរ”។

ក្រុមនេះសរសេរទៀតថា “យើងខ្ញុំជឿជាក់ថា ជនជាតិអាមេរិកាំងនិយាយរួម និងអ្នកស្រុក Michigan និយាយដោយឡែក គឺសុទ្ធតែមានសិទ្ធិធ្វើការដើម្បីចិញ្ចឹមគ្រួសារ មានសិទ្ធិដើរហើរ មានសិទ្ធិប្រមូលផ្ដុំគ្នាជាលក្ខណៈសាសនា មានសិទ្ធិធ្វើបាតុកម្មប្រឆាំងរដ្ឋាភិបាល និងមានសិទ្ធិសម្រេចលើបញ្ហាសុខភាពរបស់ខ្លួន”។

បាតុកម្មខាងលើនេះ បានកើតឡើងមួយថ្ងៃ បន្ទាប់ពីតុលាការ Michigan បានចេញសាលក្រមមួយដែលនិយាយថា សារាចរណែនាំឱ្យពលរដ្ឋនៅក្នុងផ្ទះចាប់ពីថ្ងៃទី24មីនារបស់លោកស្រី Gretchen Whitmer ដែលជាអភិបាលរដ្ឋ Michigan គឺមិនបំពានរដ្ឋធម្មនុញ្ញនោះទេ។ កាលពីថ្ងៃទី16មេសា បាតុករប្រមាណជា3,000នាក់ ក្នុងនោះមានអ្នកខ្លះយកកាំភ្លើងតាមខ្លួន បានប្រមូលផ្ដុំគ្នានៅ Lansing បណ្ដាលឱ្យមានការកកស្ទះចរាចរណ៍នៅជុំវិញអាគាររដ្ឋសភា។ មួយថ្ងៃក្រោយមក លោក Trum ក៏បានសម្ដែងការគាំទ្រចំពោះក្រុមបាតុករនេះ។

សហរដ្ឋអាមេរិកគឺជាសម្បុកមេរោគកូរ៉ូណាធំជាងគេបង្អស់ក្នុងពិភពលោក ដោយមានអ្នកជំងឺសរុបជាង1លាននាក់ ក្នុងនោះមានជិត64,000នាក់បានស្លាប់ និងប្រមាណជា156,000នាក់បានជាសះស្បើយ។ រដ្ឋ Michigan មានអ្នកជំងឺ COVID-19 ជាង3,500នាក់បានបាត់បង់ជីវិត។ នេះបើតាមស្ថិតិរបស់សាកលវិទ្យាល័យ Johns Hopkins៕

ប្រភព៖ សារព័ត៌មានបរទេស

May 1, 2020

ជិត233,000នាក់បានស្លាប់ដោយសារ COVID-19 នៅទូទាំងពិភពលោក

ពិភពលោកទាំងមូល មានមនុស្សជិត233,000នាក់បានស្លាប់ នៅក្នុងចំណោមអ្នកជំងឺCOVID-19 សរុបជាង3.2លាននាក់។

ស្ថិតិពីសាកលវិទ្យាល័យ Johns Hopkins បានឱ្យដឹងថា នៅក្នុងបណ្ដាប្រទេស និងដែនដីចំនួន210 ក្នុងពិភពលោក មានអ្នកជំងឺCOVID-19 សរុបឡើងដល់3,249,667នាក់ និងអ្នកបាត់បង់ជីវិតដោយសារវីរុសនេះ កើនដល់232,936នាក់ ក្នុងនោះមានអ្នកជំងឺថ្មី61,748នាក់ និងអ្នកស្លាប់ថ្មី5,759នាក់។ អ្នកដែលបានជាសះស្បើយពីជំងឺនេះ មានចំនួនជាង1លាននាក់។

សម្បុកមេរោគកូរ៉ូណាធំជាងគេក្នុងពិភពលោក គឺនៅតែជាសហរដ្ឋអាមេរិក ដោយមានអ្នកជំងឺសរុប1,067,289នាក់ ក្នុងនោះមានអ្នកស្លាប់ចំនួន62,870នាក់។ អ្នកជំងឺថ្មីកើន29,763នាក់ ខណៈអ្នកស្លាប់ថ្មីកើន2,024នាក់ បើធៀបនឹងម្សិលមិញ។

ប្រភព៖ សារព័ត៌មានបរទេស

May 1, 2020

Hot News! នាយករដ្ឋមន្ត្រីរុស្ស៊ី ឆ្លងវីរុស COVID-19!

នាយករដ្ឋមន្ត្រីនៃប្រទេសរុស្ស៊ី លោក Mikhail Mishustin បានប្រកាសថា លោកបានឆ្លងវីរុសCOVID-19 និងកំពុងបង្ខាំងខ្លួននៅដាច់ដោយឡែក។

នាយករដ្ឋមន្ត្រីរុស្ស៊ី លោក Mikhail Mishustin អាយុ54ឆ្នាំ បានប្រកាសថា លោកបានឆ្លងវីរុសCOVID-19 និងកំពុងតែបង្ខាំងខ្លួននៅដាច់ដោយឡែក ហើយលោកក៏បានស្នើឱ្យមានអ្នកឡើងមកកាន់តំណែងជំនួសលោកផងដែរ។

“ខ្ញុំទើបតែទទួលបានលទ្ធផលវិជ្ជមានជាមួយនឹងវីរុសCOVID-19” នាយករដ្ឋមន្ត្រីរុស្ស៊ីមានប្រសាសន៍បែបនេះ នៅក្នុងកិច្ចប្រជុំតាមអនឡាញជាមួយប្រធានាធិបតី Putin នៅទីក្រុងម៉ូស្គូ កាលពីថ្ងៃទី30មេសា។

លោកនាយករដ្ឋមន្ត្រីបន្តថា “ខ្ញុំត្រូវបង្ខាំងខ្លួនដាច់ដោយឡែក និងធ្វើតាមការណែនាំរបស់ក្រុមវេជ្ជបណ្ឌិតដើម្បីការពារមនុស្សនៅជុំវិញខ្លួន”។ លោកថ្លែងថា លោកនឹងនៅតែបន្តរក្សាទំនាក់ទំនងជាមួយអ្នកគ្រប់គ្នា។

លោក Mikhail Mishustin ក៏បានស្នើឱ្យឧបនាយករដ្ឋមន្ត្រី គឺលោក Andrei Belousov ឡើងកាន់តំណែងជំនួសលោកផងដែរ។

អ្នកនាំពាក្យ Vladimir Belyakov របស់ Mishustin បានឱ្យដឹងថា នាយករដ្ឋមន្ត្រីកំពុងទទួលការព្យាបាលនៅក្នុងមន្ទីរពេទ្យមួយ ប៉ុន្តែមិនបានបញ្ជាក់ពីទីតាំងនោះឡើយ។

“បញ្ហាដែលកើតឡើងជាមួយលោក ក៏អាចកើតឡើងជាមួយមនុស្សគ្រប់គ្នា។ ខ្ញុំសង្ឃឹមថា លោកនៅតែអាចធ្វើការបាន និងបន្តចូលរួមធ្វើការសម្រេចចិត្តលើកិច្ចការរបស់រដ្ឋាភិបាល” ប្រធានាធិបតីរុស្ស៊ី លោក Putin មានប្រសាសន៍បែបនេះទៅកាន់នាយករដ្ឋមន្ត្រី។

លោក Mishustin គឺជាមន្ត្រីជាន់ខ្ពស់ដំបូងរបស់សហព័ន្ធរុស្ស៊ី ដែលបានប្រកាសថាខ្លួនបានឆ្លងវីរុសCOVID-19 ខណៈដែលប្រទេសនេះ មានអ្នកជំងឺកូរ៉ូណាសរុបជាង100,000នាក់ ក្នុងនោះមានអ្នកជំងឺជាង1,000នាក់បានបាត់បង់ជីវិត៕

May 1, 2020

មនុស្សរាប់ពាន់នាក់នៅ New York ចូលរួមបុណ្យសព្វអ្នកជំងឺ COVID-19

អ្នកនៅទីក្រុង New York រាប់ពាន់នាក់បានចូលរួមបុណ្យសពរបស់បព្វជិតសាសនាយូដាម្នាក់ បើទោះជាទីក្រុងនេះកំពុងស្ថិតក្នុងបម្រាមគោចរទប់ស្កាត់ COVID-19 ក៏ដោយ ធ្វើឱ្យសមត្ថកិច្ចត្រូវចាត់វិធានការ។

Dermot Shea ដែលជាស្នងការនគរបាលទីក្រុង New York ថ្លែងនៅក្នុងសន្និសីទសារព័ត៌មានកាលពីថ្ងៃទី29មេសាថា មនុស្សរាប់ពាន់នាក់នៅ Williamsburg ក្នុងតំបន់ Brooklyn បានប្រមូលផ្ដុំគ្នាកាលពីយប់មុននោះដើម្បីចូលរួមបុណ្យសព្វរបស់បព្វជិតយូដាម្នាក់ឈ្មោះ Chaim Mertz ដែលបានស្លាប់ដោយសារឆ្លងវីរុសCOVID-19។

ថ្នាក់ដឹកនាំសាសនិកយូដាមួយក្រុម នៅមុនថ្ងៃបុណ្យសព្វខាងលើ បានពិភាក្សាជាមួយក្រុមមន្ត្រីនគរបាលអំពីគម្រោងបិទផ្លូវមួយចំនួនក្នុងតំបន់នេះ ដើម្បីជួយឱ្យពិធីបុណ្យសពអាចរក្សាបានគំលាតពីសង្គម។ នេះបើតាម Mitchell Silber ដែលជាប្រធានប្រតិបត្តិនៃអង្គការផ្ដួចផ្ដើមដើម្បីសន្តិសុខសង្គម ជាកម្មវិធីការពារបណ្ដាអង្គការសហគមន៍ជនជាតិជ្វីហ្វដែលកាន់សាសនាយូដា។ ប៉ុន្តែ ទាំងសមត្ថកិច្ច ទាំងថ្នាក់ដឹកនាំអង្គការនេះ នឹកស្មានមិនដល់ថា ពិធីបុណ្យសពនេះមានមនុស្សចូលរួមរាប់ពាន់នាក់បែបនេះសោះ។

នៅចំពោះមុខការប្រមូលផ្ដុំគ្នាច្រើនបែបនេះ ដែលក្នុងនោះមានមនុស្សជាច្រើនមិនបានពាក់ម៉ាស់ អភិបាលក្រុង New York លោក Bill de Blasio ក៏ចេញបញ្ជាឱ្យប៉ូលិសបំបែកហ្វូងមនុស្ស។ បន្ទាប់មក មានសមត្ថកិច្ចយ៉ាងច្រើន រួមជាមួយនឹងរថយន្តល្បាត ត្រូវបានបញ្ជូនទៅកាន់ទីតាំងបុណ្យសព និងបានអនុវត្តបទបញ្ជា។

មន្ត្រីអង្គការសង្គមស៊ីវិលដែលពាក់ព័ន្ធនឹងជនជាតិជ្វីហ្វ(Jewish) និងមនុស្សមួយចំនួនទៀត ដែលជាអ្នកប្រតិបត្តិសាសនាយូដាខាងលើ បានចោទអភិបាលក្រុង New York ថា “រើសអើងពូជសាសន៍”។ ប៉ុន្តែ អភិបាលក្រុង New York ថា នេះគ្រាន់តែជាការទប់ស្កាត់ការឆ្លងរាលដាលនៃវីរុសកូរ៉ូណាតែប៉ុណ្ណោះ។

Jonathan Greenblatt ដែលជានាយកប្រតិបត្តិនៃសម្ព័ន្ធទប់ស្កាត់ការបរិហាកេរ្តិ៍ បាននិយាយថា ទីក្រុង New York គឺជាកន្លែងរស់នៅរបស់ជនជាតិជ្វីហ្វជាង1លាននាក់៕

ប្រភព៖ សារព័ត៌មានបរទេស

May 1, 2020

ក្រុមហ៊ុនយក្សរបស់ថៃ ទិញក្រុមហ៊ុនធំរបស់វៀតណាមចំនួន2 ក្នុងតម្លៃ240លានដុល្លារ

ក្រុមហ៊ុនថៃ Stark បានជោគជ័យក្នុងការទិញក្រុមហ៊ុនផលិតខ្សែកាបចំនួន2របស់វៀតណាម ជាមួយនឹងទឹកប្រាក់សរុប 240លានដុល្លារអាមេរិក។

ក្រុមហ៊ុនផលិតខ្សែកាបរបស់វៀតណាមដែលត្រូវបានក្រុមហ៊ុនថៃ Stark ទិញនេះ គឺទី1 ក្រុមហ៊ុន Thipha Cable និងទី2គឺក្រុមហ៊ុន Dovina។ ក្រុមហ៊ុនទាំង2នេះត្រូវបានលក់ក្នុងតម្លៃសរុប 240លានដុល្លារ។ ការទិញដូរនេះ ត្រូវបានធ្វើឡើងដោយក្រុមហ៊ុន Phelps Dodge International (Thailand) Co Ltd ដែលជាអ្នកផលិតខ្សែភ្លើង និងខ្សែកាបលំដាប់កំពូលនៅប្រទេសថៃ និងជាក្រុមហ៊ុនបុត្រសម្ព័ន្ធរបស់ Stark Corporation។

ជាមួយនឹងការព្រមព្រៀងនេះ ក្រុមហ៊ុន Stark មានគោលដៅបង្កើនផលិតកម្មរបស់ខ្លួន ក៏ដូចជាពង្រីកទីផ្សារដើម្បីក្លាយជាអ្នកផលិតខ្សែកាប ខ្សែភ្លើងនាំមុខគេក្នុងតំបន់។

Stark Corporation បានឱ្យដឹងថា “វិស័យជំនួញជារួម និងគោលដៅរបស់ក្រុមហ៊ុនទាំង2នេះ គឺដូចគ្នា ហើយវានឹងជួយគ្នាទៅវិញទៅមកទៅលើមុខជំនួញស្នូលរបស់ក្រុមហ៊ុន ក៏ដូចជាជួយបង្កើនគុណសម្បត្តិក្នុងការប្រកួតប្រជែងដល់Phelps Dodge នៅលើទីផ្សារអន្តរជាតិ”។

យោងតាម Mergermarket ការទិញដូរខាងលើនេះ គឺជាតំណាងនៃការជួញដូរក្នុងវិស័យឧស្សាហកម្មឯកជនធំបំផុតនៅវៀតណាមក្នុងអំឡុង3ឆ្នាំមកនេះ។ ករណីនេះក៏បង្ហាញអំពីភាពទាក់ទាញនៃទីផ្សារក្នុងស្រុកវៀតណាម និងឥទ្ធិពលក្នុងការប្រកួតប្រជែងដ៏ខ្លាំងក្លារបស់វៀតណាមក្នុងបណ្ដាប្រទេសជាសមាជិកសមាគមន៍អាស៊ានផងដែរ។

ក្រុមហ៊ុន Stark បានឱ្យដឹងថា ពួកគេនឹងបើកកិច្ចប្រជុំអនឡាញមួយដើម្បីបង្ហើយការទិញដូរនេះ ដោយសារតែផលប៉ះពាល់ពីវីរុសCOVID-19។

ក្រុមហ៊ុន ThiPha ត្រូវបានបង្កើតឡើងកាលពីឆ្នាំ1987 នៅទីក្រុងសៃហ្គន(ហូជីមិញ) គឺជាអ្នកផលិតខ្សែកាប និងខ្សែភ្លើងធំជាងគេលំដាប់ទី2នៅប្រទេសវៀតណាម។ ThiPha ក៏ធ្លាប់ផ្គត់ផ្គង់ទំនិញសម្រាប់សាងសង់អាគារវឌ្ឍនៈ និងហុងកុងឡែន នៅភ្នំពេញផងដែរ។

ចំណែកក្រុមហ៊ុន Dovina វិញ ត្រូវបានបង្កើតឡើងដោយភាគហ៊ុនិកនៃក្រុមហ៊ុន Thinh Phat ដើម្បីនាំចូលនិងកែច្នៃស្ពាន់ និងអាលុយមីញ៉ូមសម្រាប់ផលិតខ្សែកាប និងខ្សែភ្លើង។ Dovina លក់ស្ពាន់ និងអាលុយមីញ៉ូមទៅឱ្យ ThiPha និងរោងចក្រជាច្រើនទៀតនៅវៀតណាម និងនៅបរទេស។

ThiPha និង Dovina សុទ្ធតែស្ថិតក្នុងបញ្ជីនៃកំពូលក្រុមហ៊ុនឯកជនទាំង100 ដែលធំជាងគេនៅប្រទេសវៀតណាម។ គិតមកដល់ខែកញ្ញា ឆ្នាំ2019 ទ្រព្យសរុបរបស់ Thipha និង Dovina បានឡើងដល់201លានដុល្លារអាមេរិក៕

ប្រភព៖ សារព័ត៌មានបរទេស

April 30, 2020

Author: សឿន សំណាង