សឿន សំណាង - La Reine Media

COVID-19! អ្នកទោសអាមេរិកាំង ចម្លងវីរុសដល់ខ្លួនឯង ដើម្បីបានរួចពីពន្ធនាគារ

អ្នកទោសមួយចំនួននៅឯពន្ធនាគារក្នុងរដ្ឋ California នៃសហរដ្ឋអាមេរិក ត្រូវបានសមត្ថកិច្ចរកឃើញថា មានការព្យាយាមក្នុងការចម្លងវីរុសCOVID-19 មកលើខ្លួនឯង ក្នុងបំណងជួយឱ្យពួកគេបានរួចខ្លួនពីពន្ធនាគារ។

ស្នងការនគរបាលក្រុង Los Angeles នៃរដ្ឋ California លោក Alex Villanueva កាល ពីថ្ងៃទី11ឧសភា បានឱ្យដឹងថា សមត្ថកិច្ចមានភ័ស្តុតាងបញ្ជាក់ថា អ្នកទោសមួយចំនួននៅក្នុងបណ្ដាពន្ធនាគារនៅ Los Angeles កំពុងព្យាយាមដើម្បីធ្វើឱ្យពួកគេបានឆ្លងវីរុសCOVID-19។

នៅក្នុងឃ្លីបវីដេអូដែលត្រូវបានសមត្ថកិច្ចចាត់ទុកជាភ័ស្តុតាង គេឃើញថា អ្នកទោសមួយចំនួនបាននាំគ្នាផឹកទឹកដែលត្រូវបានដាក់នៅក្នុងបំពង់ទឹកមួយដែលមានផ្ទុកវីរុសCOVID-19។ ក្រោយមក ពួកគេបានលាក់បំពង់ទឹកនេះ និងរង់ចាំការដោះលែងព្រោះឆ្លងវីរុស។

Villanueva បានប្រាប់សារព័ត៌មាន Los Angeles Times ថា “ពិតជាមានការពិបាកទ្រាំណាស់នៅពេលដឹងថា មានមនុស្សជាច្រើនកំពុងព្យាយាមចម្លងមេរោគមកឱ្យខ្លួនពួកគេផ្ទាល់”។

សកម្មភាពនៃល្បិចខាងលើនេះត្រូវបានថតជាវីដេអូ បន្ទាប់ពីសមត្ថកិច្ចទទួលបានព័ត៌មានសម្ងាត់ពីអ្នកទោសម្នាក់ដែលបានរាយការណ៍ថា ខ្លួនបានឃើញសម្ភារមួយចំនួនដែលអ្នកទោសផ្សេងៗជឿថា វាអាចចម្លងមេរោគកូរ៉ូណាទៅឱ្យពួកគេ។

ប្រភពព័ត៌មានពីសមត្ថកិច្ចបានឱ្យដឹងថា អ្នកទោសដែលបានរាយការណ៍នេះ ហាក់ត្រូវបានអ្នកទោសដទៃវាយដំ ក្រោយពីបានរំខានដល់សកម្មភាពនៃការព្យាយាមបង្កជំងឺដូចដែលបានរៀបរាប់ខាងលើ។

រាប់ចាប់ពីវីរុសCOVID-19 បានឆ្លងរាលដាលនៅសហរដ្ឋអាមេរិក មានអ្នកទោស357នាក់បានឆ្លងវីរុសនៅក្នុងបណ្ដាពន្ធនាគារនេះ ក្នុងចំណោមនោះ មានអ្នកទោស117នាក់បានជាសះស្បើយ។

ចំនួនអ្នកទោសនៅក្នុងតំបន់ Los Angeles ត្រូវបានកាត់បន្ថយដើម្បីទប់ស្កាត់ការឆ្លងវីរុសCOVID-19។ គិតត្រឹមចុងសប្ដាហ៍កន្លងទៅ បណ្ដាពន្ធនាគារដែលមានអ្នកទោសប្រមាណជា17,000នាក់ ពេលនេះនៅសល់ត្រឹម11,723នាក់ប៉ុណ្ណោះ៕

ប្រភព៖ សារព័ត៌មានបរទេស

May 12, 2020

COVID-19! តួលេខអ្នកស្លាប់នៅអាមេរិក ជិតស្មើនឹងតួលេខអ្នកជំងឺនៅប្រទេសចិន

សហរដ្ឋអាមេរិកបានរកឃើញអ្នកស្លាប់ថ្មីជិត1,000នាក់ នៅក្នុងរយៈពេល24ម៉ោងកន្លងទៅ ធ្វើឱ្យអ្នកស្លាប់សរុបឡើងដល់ជិត82,000នាក់ នៅក្នុងចំណោមអ្នកជំងឺជិត1.4លាននាក់។

បច្ចុប្បន្ន សហរដ្ឋអាមេរិកមានអ្នកជំងឺ COVID-19 សរុប1,384,033នាក់ កើន18,501ករណីក្នុងរយៈពេល24ម៉ោងចុងក្រោយនេះ។ ចំនួនអ្នកស្លាប់នៅប្រទេសនេះក៏បានកើន971នាក់បន្ថែមទៀត នាំឱ្យតួលេខអ្នកស្លាប់សរុបឡើងដល់81,703នាក់។ តួលេខអ្នកស្លាប់ដោយសារវីរុសកូរ៉ូណានៅសហរដ្ឋអាមេរិក ជិតស្មើនឹងតួលេខអ្នកជំងឺនៅប្រទេសចិន ដែលបច្ចុប្បន្នមានចំនួន82,918នាក់ ពោលគឺអ្នកជំងឺនៅប្រទេសចិន ច្រើនជាងអ្នកស្លាប់នៅសហរដ្ឋអាមេរិកត្រឹមតែ1,215នាក់ប៉ុណ្ណោះ។

ប្រធានាធិបតីសហរដ្ឋអាមេរិក លោក Donald Trump កាលពីថ្ងៃទី11ឧសភា បានរិះទៅលើបក្សប្រជាធិបតេយ្យទាក់ទងនឹងការពន្យារការបើកទ្វារសេដ្ឋកិច្ចឡើងវិញ ដោយបានចោទបក្សប្រឆាំងថា កំពុងកេងចំណេញផ្នែកនយោបាយ។ លោក Trump ក៏បានជំរុញឱ្យបណ្ដារដ្ឋបន្ធូរបន្ថយបម្រាមគោចរ និងបើកទ្វារសេដ្ឋកិច្ចឡើងវិញកាន់តែឆាប់ កាន់តែល្អ។

ការស្នើរបស់លោក Trump ត្រូវបានធ្វើឡើងខណៈដែលអ្នកជំនាញផ្នែកសុខាភិបាលបានព្រមានអំពីហានិភ័យនៃការផ្ទុះឆ្លងរាលដាលសាជាថ្មីនៃវីរុសCOVID-19 នៅប្រទេសនេះ និងបានស្នើឱ្យមានការប្រុងប្រយ័ត្នខ្ពស់នៅពេលបើកទ្វារសេដ្ឋកិច្ចឡើងវិញ៕

ប្រភព៖ សារព័ត៌មានបរទេស

May 12, 2020

មនុស្សជិត287,000នាក់ស្លាប់ដោយសារ COVID-19 នៅទូទាំងពិភពលោក

វីរុសCOVID-19 បានសម្លាប់មនុស្សជិត287,000នាក់ ខណៈបានបង្កជំងឺដល់មនុស្សជាង4.2លាននាក់នៅទូទាំងពិភពលោក ក្នុងនោះ ប្រទេសចំនួន10 មានអ្នកជំងឺលើសពី100,000នាក់ និងប្រទេសចំនួន6 មានអ្នកស្លាប់លើសពី10,000នាក់។

នៅលើពិភពលោក មានប្រទេសនិងដែនដីចំនួន212 ត្រូវបានរាយការណ៍ថា មានមនុស្ស4,246,795នាក់បានឆ្លងវីរុសCOVID-19 ក្នុងនោះមាន286,740នាក់បានបាត់បង់ជីវិត។ រយៈពេល24ម៉ោងចុងក្រោយនេះ ពិភពលោកបានរកឃើញអ្នកជំងឺថ្មីចំនួន72,044នាក់ និងអ្នកស្លាប់ថ្មីចំនួន3,129នាក់។ ចំណែកអ្នកដែលបានជាសះស្បើយពីជំងឺកូរ៉ូណានេះ បានឡើងដល់1,522,034នាក់។ តួលេខនេះគឺយោងទៅតាមស្ថិតិរបស់ Worldometer។

ទ្វីបអឺរ៉ុបមានមនុស្ស1,653,012នាក់បានធ្លាក់ខ្លួនឈឺដោយសារឆ្លង COVID-19 ខណៈដែលអាមេរិកខាងជើងមានអ្នកជំងឺសរុប1,517,580នាក់ ទ្វីបអាស៊ីមាន683,637នាក់ អាមេរិកខាងត្បូងមាន319,297នាក់ និងទ្វីបអាហ្វ្រិកមាន
67,778នាក់។

ប្រទេសចំនួន10ដែលមានអ្នកជំងឺកូរ៉ូណាលើសពី100,000នាក់ រួមមានសហរដ្ឋអាមេរិក អេស្ប៉ាញ អង់គ្លេស អ៊ីតាលី រុស្ស៊ី បារាំង អាល្លឺម៉ង់ ប្រេស៊ីល ទួរគី និងអ៊ីរ៉ង់។

ចំណែកប្រទេសដែលមានអ្នកស្លាប់ដោយសារ COVID-19 លើសពី10,000នាក់ មានចំនួន6ប្រទេស រួមមានសហរដ្ឋអាមេរិក អង់គ្លេស អ៊ីតាលី អេស្ប៉ាញ បារាំង និងប្រេស៊ីល៕

ប្រភព៖ សារព័ត៌មានបរទេស

May 12, 2020

ពេទ្យភ្ញាក់ព្រើត!! លោកត្រាំ ប្រាប់ថា កូវីដ-19 នឹង “បាត់ទៅវិញឯកឯង” ដោយមិនចាំបាច់មានវ៉ាក់សាំងទេ…

លោកប្រធានាធិបតី ដូណាល់ ត្រាំ នៃសហរដ្ឋអាមេរិក បានធ្វើឱ្យអ្នកជំនាញការផ្នែកវេជ្ជសាស្ត្រ អង្គុយគូទលែងជាប់កៅអីជាថ្មីម្ដងទៀត បន្ទាប់ពីលោកបានចេញមកថ្លែងបញ្ជាក់ថា មេរោគវីរុសកូរ៉ូណាប្រភេទថ្មីនេះ នឹង “បាត់ទៅវិញដោយឯកឯង” នៅទីបំផុត ទោះជាពិភពលោកនៅមិនទាន់មានវ៉ាក់សាងការពារក៏ដោយ។

ក្នុងអំឡុងការផ្ដល់បទសម្ភាសនៅឯសេតវិមានកាលពីរសៀលថ្ងៃសុក្រ(ទី8ឧសភា)កន្លងមក លោក ត្រាំ បានថ្លែងថា “ខ្ញុំមានអារម្មណ៍ពាក់ព័ន្ធនឹងរឿងវ៉ាក់សាំង ស្រដៀងនឹងរឿងការត្រួតពិនិត្យដែរ គឺ វានឹងបាត់ទៅវិញដោយឯកឯងបានដោយមិនចាំបាច់មានវ៉ាក់សាំងឡើយ…វានឹងបាត់ទៅវិញដោយឯកឯង និងសង្ឃឹមថា យើងនឹងមិនជួបប្រទះវាទៀតឡើយ ពេលឆ្លងកាត់ទៅបានមួយរយៈហើយ”

លោកត្រាំ បានទទួលស្គាល់ថា អាចនឹងមានការ “ឆ្លងរាលដាលម្ដងទៀត” ខ្លះៗ រួមទាំងក្នុងរដូវស្លឹកឈើជ្រុះ តែលោកជឿថា ទីបំផុតទៅ វីរុស វានឹងអស់ទៅវិញដោយឯកឯង។

លោកបន្តថា “មានវីរុស ឬគ្រុនផ្ដាសាយប្រភេទខ្លះដែលកើតឡើង បានធ្វើឱ្យគ្រូពេទ្យត្រូវរិះគិតស្វែងរកវ៉ាក់សាំង ហើយក្នុងខណៈដែលពួកគេមិនទាន់ទាំងផលិតវ៉ាក់សាំងបានសម្រេចផង វីរុសអស់នោះ ក៏បាត់ទៅវិញអស់រលីង លែងបង្ហាញខ្លួនឱ្យឃើញទៀតតែម្ដង…ពួកវាក៏ចេះស្លាប់ ដូចអ្វីៗគ្រប់យ៉ាងដែរហ្នឹងឯង”។

នៅពេលដែលអ្នកយកព័ត៌មានសួរបញ្ជាក់ថា តើហេតុអ្វីបានលោកដឹង? លោកត្រាំ ក៏អះអាងថា លោកដកស្រង់ចេញពី “អ្វីដែលគ្រូពេទ្យបាននិយាយ”

លោកថា “ពួកគេប្រាប់ថា វានឹងបាត់ទៅវិញនៅទីបំផុត ដែលមិនបានមានន័យថា នៅក្នុងឆ្នាំនេះទេ មិនបានមានន័យថា វានឹងបាត់ទៅវិញក្នុងអំឡុងពេលមុន ឬក្រោយរដូវស្លឹកឈើជ្រុះនោះទេ…តែទីបំផុត វាក៏ត្រូវតែអស់ទៅវិញ។ សំណួរ ក៏គឺ តើយើងត្រូវការវ៉ាក់សាំងឬទេ? ជួនកាលវាក៏បាត់ទៅវិញបានដោយឯកឯង តែបើយើងមានវ៉ាក់សាំង វានឹងជួយបានច្រើន…”

យ៉ាងណាក៏ដោយ សម្ដីរបស់លោកត្រាំ មើលទៅវាហាក់ដូចជាផ្ទុយគ្នានឹងពាក្យអះអាងរបស់លោកវេជ្ជបណ្ឌិត អ៊ែនថូនី ហ្វៅហ្ស៊ី អគ្គនាយកស្ថាប័នរោគប្រតិកម្មចាញ់ និងជំងឺឆ្លងនៃសហរដ្ឋអាមេរិក ដែលបានផ្ដល់បទសម្ភាសជាមួយទីភ្នាក់ងារព័ត៌មាន Fox news កាលពី 2-3សប្ដាហ៍មុនថា “ការឆ្លងរាតត្បាតនឹងមិនទាន់បញ្ចប់នៅឡើយទេ រហូតទាល់តែយើងមានវ៉ាក់សាំង”។

កាលពីពេលមុននោះ អ្នកយកព័ត៌មានប្រចាំនៅសេតវិមាន បានធ្លាប់ដាក់សំណួរទៅលោក ហ្វៅហ្ស៊ី ថា តើសហរដ្ឋអាមេរិក នឹងអាចត្រឡប់មករកសភាវប្រក្រតី មុនពេលយើងមានវ៉ាក់សាំងសម្រាប់មនុស្សគ្រូបគ្នា បានដែរឬទេ?…ហើយចម្លើយ គឺលោកវេជ្ជបណ្ឌិត ហ្វៅហ្ស៊ី បានឆ្លើយបដិសេធ។

លោកហ្វៅហ្ស៊ី ថ្លែងថា “បើពាក្យថា វិលមករកសភាវប្រក្រតីវិញ មានន័យពីការធ្វើអ្វីគ្រប់យ៉ាងបានដូចមិនធ្លាប់មានវីរុសកើតឡើងដូចកាលពីមុន ខ្ញុំគិតថា ប្រហែលជាមិនអាចទៅរួចទេ រហូតទាល់តែយើងនឹងស្ថិតក្នុងស្ថានការណ៍ដែលអាចការពារឃុំគ្រងប្រជាពលរដ្ឋបានយ៉ាងល្អឥតខ្ចោះ”។

លោកវេជ្ជបណ្ឌិត ថម អ៊ីងហ្គើលស្ប៊ី អគ្គនាយកមជ្ឈមណ្ឌលដើម្បីសុវត្ថិភាពសុខភាព ចន ហប់គីនស៍ គឺជាអ្នកជំនាញការចុងក្រោយគេបំផុតដែលបានចេញមកជំទាស់អៃឌៀរបស់មេដឹកនាំសហរដ្ឋអាមេរិក ដោយបានផ្ដល់សម្ភាសនៅក្នុងកម្មវិធី Fox news Sunday ថា ទោះជាលោកត្រាំ នឹងសម្លឹងមើលពិភពលោកក្នុងន័យល្អប៉ុនណាក៏ដោយ តែកូវីដ-19 នឹងនៅតែជាបញ្ហាធំតទៅទៀត បើមិនដោយសាររឿងណាមួយ ក៏ដោយសាររឿងណាមួយទៀតដែរ រហូតទាល់តែមានការរកឃើញវ៉ាក់សាំងបានសម្រេច។

លោកថ្លែងថា “មិនមែនទេ! វីរុសមួយនេះ នឹងមិនបាត់អស់ទៅណាទេ! ពេលឆ្លងផុតទៅបានមួយរយៈ យើងអាចរៀនយល់ដឹងក្នុងការរស់នៅជាមួយវាបាន និងអាចកាត់បន្ថយភាពប្រថុយប្រថានក្នុងការចម្លងមេរោគបាន តែវានឹងនៅតែជាបញ្ហារ៉ាំរ៉ៃ ទាំងចំពោះសហរដ្ឋអាមេរិក និងទូទាំងពិភពលោកដដែល រហូតទាល់តែយើងមានវ៉ាក់សាំង”

លោកត្រាំ ធ្លាប់បានផ្ដល់សម្ភាសនៅក្នុងកម្មវិធី Town Hall របស់ Fox news កាលពីសប្ដាហ៍កន្លងទៅថា សហរដ្ឋអាមេរិក “ចាំបាច់” ត្រូវតែមានវ៉ាក់សាំង ដើម្បីបញ្ឈប់ការឆ្លងរាលដាលរបស់កូវីដ-19។

កាលនោះ លោកថ្លែងថា “ខ្ញុំខ្លួនឯង ក៏ត្រូវការវាដែរ ខ្ញុំត្រូវការវ៉ាក់សាំង…យើងគ្រប់គ្នា និងប្រទេសមួយនេះ ត្រូវការវ៉ាក់សាំង ហើយអ្នកនឹងបានវាក្នុងអំឡុងពេលប្រហែលជាចុងឆ្នាំនេះឯង ខ្ញុំជឿជាក់ដូច្នេះ តែ ខ្ញុំអាចនឹងគិតខុសក៏អាចថាបានដែរ”៕

ប្រភព៖ សារព័ត៌មានបរទេស

May 11, 2020

នេប៉ាល់ខឹងនឹងចិន ស្ទើរ “ដាច់ក្បាល ដាច់កន្ទុយ” ព្រោះតែរឿងកំពូលភ្នំអេវ៉ឺរ៉េស

សំណេរនៅលើ Twitter របស់បណ្ដាញទូរទស្សន៍សកលចិន CGTN(China Global Television Network) កាលពីសប្ដាហ៍កន្លងទៅបានប្រកាសថា កំពូលភ្នំអេវ៉ឺរ៉េស (Everest) ទាំងមូលគឺជារបស់ខ្លួន បណ្ដាលឱ្យប្រទេសនេប៉ាល់ “ខឹងដាច់ក្បាលដាច់កន្ទុយ”។

អ្នកប្រើប្រាស់បណ្ដាញសង្គម Twitter នៅប្រទេសនេប៉ាល់ កំពុងតែខឹងយ៉ាងខ្លាំង និងបានបង្កើតនិន្នាការ #backoffchina (ចិនចេញឱ្យឆ្ងាយ) នៅលើបណ្ដាញសង្គម ព្រោះយល់ថា CGTN បានរំលោភយកកំពូលភ្នំអេវ៉ឺរ៉េសទាំងមូលទុកជាកម្មសិទ្ធិរបស់ខ្លួន។ ពលរដ្ឋនេប៉ាល់ជាច្រើនបានស្នើឱ្យឯកអគ្គរដ្ឋទូតចិនប្រចាំនៅនេប៉ាល់ បកស្រាយឱ្យបានច្បាស់អំពីសាររបស់ CGTN។

ប្រតិកម្មខាងលើនេះ គឺទាក់ទិននឹងសារដែលត្រូវបានបង្ហោះនៅលើ Twitter ដោយបណ្ដាញទូរទស្សន៍ CGTN កាលពីសប្ដាហ៍មុន។ កាលពីថ្ងៃទី2ឧសភា ទូរទស្សន៍ CGTN របស់ចិន បានបង្ហោះរូបភាពមួយសន្លឹក ជាមួយនឹងសារមួយឃ្លានៅលើ Twittere ដោយសរសេរថា “ក្នុងរូបថត៖ រស្មីដ៏ស្រស់ស្អាតខុសពីធម្មតា ត្រូវបានថតកាលពីថ្ងៃសុក្រនៅលើកំពូលភ្នំ Qomolangma ដែលត្រូវគេស្គាល់ឈ្មោះមួយទៀត នោះគឺអេវឺរ៉េស ជាកំពូលភ្នំខ្ពស់បំផុតក្នុងពិភពលោក ដែលស្ថិតក្នុងតំបន់ស្វយ័តទីបេត៍របស់ប្រទេសចិន”។

អ្នកប្រើប្រាស់ Twitter ម្នាក់សរសេរថា “ឯកអគ្គរដ្ឋទូតចិនប្រចាំនេប៉ាល់ជាទីរាប់អាន តើលោកយល់ថា ប្រការនេះ វាយុត្តិធម៌ដែរ ឬទេ? យើងខ្ញុំចង់ធ្វើឱ្យបញ្ហានេះបានច្បាស់លាស់។ #BackoffChina”។ ចំណែកអតីតនិពន្ធនាយករបស់សារព័ត៌មាន Kathmandu Post របស់ Nepal មានប្រតិកម្មថា “ជាការពិតនោះគឺថា យើងខ្ញុំត្រូវបានបង្រៀនថា ជួរភ្នំអេវឺរ៉េស គឺស្ថិតក្នុងដែនដីរបស់នេប៉ាល់”។

ជម្លោះដណ្ដើមទឹកដីរវាងនេប៉ាល់ និងចិន ទាក់ទងនឹងកំពូលភ្នំអេវឺវ៉េស បានចាប់ផ្ដើមកើតមានពីទសវត្សរ៍ឆ្នាំ1960។ នេប៉ាល់បានប្រកាសថា ជាកម្មសិទ្ធិរបស់ខ្លួនកាលពីពេលនាយករដ្ឋមន្ត្រី Bishweshwar Prasad Koirala កំពុងធ្វើទស្សនកិច្ចនៅប្រទេសចិន។

ឯកសារមួយដែលត្រូវបានចេញផ្សាយដោយប្រទេសចិនកាលពីឆ្នាំ1998 បានបង្ហាញថា ទីក្រុងប៉េកាំងធ្លាប់បានស្នើឱ្យបែងចែកកំពូលភ្នំនេះជា2ចំណែក ប៉ុន្តែការដណ្ដើមគ្នានៅតែមិនទាន់បានបញ្ចប់។ មហាក្សត្រ Mahendra របស់ប្រទេសនេប៉ាក់ កាលពីឆ្នាំ1961បានប្រកាសថា កំពូលភ្នំអេវឺរ៉េសទាំងមូលគឺជារបស់ប្រទេសនេះ។

អេវឺរ៉េស ដែលជាកំពូលភ្នំខ្ពស់បំផុតក្នុងពិភពលោក ដោយមានកម្ពស់ដល់ទៅ8,848ម៉ែត្រ គឺជាប្រភពចំណូលចម្បងបំផុតរបស់ប្រទេសនេប៉ាល់។ មនុស្ស2នាក់ដែលបានឈានជើងឡើងដល់កំពូលភ្នំអេវឺរ៉េសដំបូងគេក្នុងពិភពលោក គឺ Edmund Hillary ជាជនជាតិអាមេរិកាំង និង Tenzing Norgay Sherpa ជាពលរដ្ឋនេប៉ាល់។ ផ្លូវឡើងទៅកាន់កំពូលភ្នំនេះ មានចំនួន2 ប៉ុន្តែ ផ្លូវដែលត្រូវបានគ្រប់គ្រងដោយប្រទេសនេប៉ាល់ គឺជាផ្លូវសំខាន់បំផុតដែលនាំទៅកាន់កំពូលភ្នំនេះ។

សូមបញ្ជាក់ថា CGTN គឺជាបណ្ដាញទូរទស្សអន្តរជាតិរបស់ទូរទស្សន៍ជាតិចិន ដែលគេស្គាល់ថា CCTV៕

ប្រភព៖ សារព័ត៌មានបរទេស

ព័ត៌មានទាក់ទង>អ្នកវិទ្យាសាស្ត្រចិនវាស់វែងកម្ពស់នៃកំពូលភ្នំអេវឺរ៉េសឡើងវិញ

May 11, 2020

ក្រសួងការបរទេសចិន បដិសេធការចោទប្រកាន់ខុសរឿង 24ចំណុចរឿងមេរោគកូវីដ-19 របស់អ្នកនយោបាយអាមេរិក

ក្រសួងការបរទេសចិនបានចេញមកបដិសេធការចោទប្រកាន់ 24ចំណុច របស់អ្នកនយោបាយអាមេរិក ដែលចិនបានបញ្ជាក់ថា គឺជារឿងកុហកបោកប្រាស់ដែលគ្មានខ្លឹមសារ ពាក់ព័ន្ធនឹងការទប់ទល់របស់ចិនចំពោះការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីថ-19 ដែលកំពុងធ្វើឱ្យមានផលប៉ះពាល់យ៉ាងធ្ងន់ធ្ងរទូទាំងពិភពលោកក្នុងខណៈពេលនេះ។

វេបសាយរបស់ក្រសួងការបរទេសចិន បានផ្សព្វផ្សាយអត្ថបទមួយដែលមានប្រវែងដល់ទៅ 30ទំព័រកាលពីចុងសប្ដាហ៍កន្លងទៅ ដែលជាការរួបរួម និងរៀបរាប់ពីការបដិសេធគ្រប់ចំណុចចោទប្រកាន់ផ្សេងៗ ដែលបានធ្វើឡើងក្នុងអំឡុងការថ្លែងការណ៍របស់ក្រសួងការបរទេសចិនកាលពីអំឡុងសប្ដាហ៍កន្លងទៅ។

ចំណុចបកស្រាយទាំងអស់ គឺជារឿងដែលពាក់ព័ន្ធនឹងការចោទប្រកាន់របស់អ្នកនយោបាយសហរដ្ឋអាមេរិក ជាពិសេសបំផុត គឺលោក ម៉ៃក៍ ប៉ុមប៉េអូ រដ្ឋមន្ត្រីការបរទេសសហរដ្ឋអាមេរិក ដែលបាននិយាយថា ចិនបានបិទបាំងព័ត៌មានពាក់ព័ន្ធនឹងមេរោគកូវីដ-19 រួមទាំងការបញ្ជាក់ថា មេរោគវីរុសនោះ មានដើមកំណើតចេញពីបន្ទប់ពិសោធន៍ក្នុងទីក្រុងវូហាន។

របាយការណ៍បដិសេធមួយនេះ បានលើកយកពាក្យសម្ដីរបស់លោក អាប្រាហាំ លិនខុន អតីតប្រធានាធិបតីសហរដ្ឋអាមេរិកដ៏ល្បីល្បាញ មកចាប់ផ្ដើមក្នុងកថាខណ្ឌដំបូងថា “លីនខុន ធ្លាប់បាននិយាយថា អ្នកអាចបោកប្រាស់មនុស្សមួយចំនួនបានគ្រប់ពេលវេលា ឬបោកប្រាស់មនុស្សគ្រប់គ្នាបាននៅក្នុងពេលខ្លះ តែអ្នកមិនអាចកុហកបោកប្រាស់មនុស្សគ្រប់គ្នាបានគ្រប់ពេលវេលានោះឡើយ”

រដ្ឋបាលចិន អះអាងថា ភ័ស្តុតាងគ្រប់យ៉ាងបង្ហាញឱ្យឃើញថា មេរោគវីរុសកូរ៉ូណា មិនបានចេញមកពីការផលិតរបស់មនុស្សទេ ខណៈដែលមន្ទីរពិសោធន៍ក្នុងទីក្រុងវូហានដែលត្រូវសហរដ្ឋអាមេរិកបញ្ជាក់ថា ជាកន្លែងផលិតមេរោគវីរុស រហូតដល់បែកធ្លាយចេញមកនោះ ក៏គ្មានសមត្ថភាពក្នុងការច្នៃប្រឌិតមេរោគវីរុសកូរ៉ូណាប្រភេទថ្មីចេញមកបាន ដូចដែលសហរដ្ឋអាមេរិកចោទប្រកាន់នោះដែរ។

ឯកសារដែលត្រូវបានផ្សព្វផ្សាយចេញមកនេះ នៅបានបង្ហាញអំពីពេលវេលាក្នុងការដំណើរការរបស់ប្រទេសចិន ដែលមានការផ្ដល់ព័ត៌មានទៅប្រជាសហគមន៍អន្តរជាតិថា វាបានដំណើរការឡើងយ៉ាងស័ក្តិសម បើកចំហ និងគ្មានលាក់លៀម ដើម្បីលាងជម្រះចំណុចចោទប្រកាន់របស់សហរដ្ឋអាមេរិកដែលថា ចិនយឺតយ៉ាវក្នុងការដាស់តឿនសហគមន៍អន្តរជាតិ ពាក់ព័ន្ធនឹងការឆ្លងរាលដាលរបស់មេរោគវីរុសកូរ៉ូណាប្រភេទថ្មីនេះ។

អត្ថបទរបស់ក្រសួងការបរទេសចិន ថែមទាំងបានបដិសេធចំណុចរិះគន់របស់ប្រទេសលោកខាងលិច ពាក់ព័ន្ធនឹងការដំណើរការរបស់រដ្ឋបាលចិនចំពោះលោកវេជ្ជបណ្ឌិត លី វឹនលៀង ដែលជាមនុស្សដំបូងគេ ដែលចេញមកដាស់តឿនអំពីការឆ្លងរាលដាលរបស់មេរោគវីរុសប្រភេទថ្មីនេះក្នុងទីក្រុងវូហាន មុននឹងសាមីខ្លួនបានស្លាប់នៅពេលក្រោយមកដោយសារតែមេរោគវីរុសដដែលនោះ ដោយអត្ថបទនោះបានសង្កត់ធ្ងន់ថា វេជ្ជបណ្ឌិតរូបនេះ មិនមែនជាអ្នកបង្ហាញពីតម្រុយរបស់មេរោគទេ ហើយគាត់ក៏មិនដែលត្រូវចាប់ខ្លួនឡើងតុលាការដែរ ដែលទាំងអស់នេះ វាផ្ទុយគ្នានឹងព័ត៌មានដែលបានផ្សព្វផ្សាយនៅក្នុងបណ្ដាប្រទេសលោកខាងលិច៕

ប្រភព៖ សារព័ត៌មានបរទេស

May 11, 2020

ទាហានឥណ្ឌា និងទាហានចិន ប៉ះទង្គិចគ្នាយ៉ាងខ្លាំងក្លានៅព្រំដែន(វីដេអូ)

ទាហានរាប់រយនាក់បានចូលរួមក្នុងហេតុការណ៍ប៉ះទង្គិចគ្នាមួយនៅព្រំដែនចិន និងឥណ្ឌា នៅតំបន់ Himalaya បណ្ដាលឱ្យទាហានទាំងសងខាងជាច្រើនរូប ត្រូវរងរបួស។

មន្ត្រីយោធាឥណ្ឌាមួយរូបសុំមិនបញ្ចេញឈ្មោះ បានឱ្យដឹងថា “ទាហានឥណ្ឌា4នាក់ និងទាហានចិន7នាក់ ត្រូវរងរបួសនៅក្នុងហេតុការណ៍ប្រតាយប្រតប់គ្នាមួយដែលមានទាហាន150នាក់ប៉ះទង្គិចគ្នា”។ មន្ត្រីទាហានរូបនេះនិយាយថា ហេតុការណ៍នេះគឺជាការប៉ះទង្គិចគ្នាដ៏សាហាវ។

ប្រភពព័ត៌មានពីកងទ័ពឥណ្ឌាក៏បានបញ្ជាក់ថា ការប៉ះទង្គិចគ្នានៅព្រំដែន ពិតជាបានកើតមានឡើងនៅភាគខាងជើងតំបន់Sikkim និងបានបណ្ដាលឱ្យទាហានទាំងសងខាងរងរបួស។

សារព័ត៌មាន ANI និង Hindustan Times បានរាយការណ៍ថា ហេតុការណ៍ប្រតាយប្រតប់គ្នានេះត្រូវបានដោះស្រាយរួចហើយដោយមន្ត្រីថ្នាក់ក្រោមនៅមូលដ្ឋាន។

កន្លងមក ប្រទេសចិន និងឥណ្ឌា ធ្លាប់មានការប៉ះទង្គិចបែបនេះជាច្រើនលើក ទាក់ទិននឹងបញ្ហាព្រំដែន។ ការប៉ះទង្គិចគ្នាបែបនេះ ជួនកាលកើតឡើងទូទាំងបន្ទាត់ព្រំដែនរវាងប្រទេសទាំងពីរផងដែរ។

ទីក្រុងប៉េកាំង និងទីក្រុងនីវដេលីបានបើកកិច្ចប្រជុំជាច្រើនលើកជាមួយគ្នាដើម្បីដោះស្រាយបញ្ហាព្រំដែន។ កាលពីខែធ្នូឆ្នាំ2019 ប្រទេសទាំងពីរបានយល់ព្រមបង្កើតខ្សែទូរស័ព្ទសំខាន់មួយដើម្បីចៀសវាងការប៉ះទង្គិចគ្នានៅតាមបន្ទាត់ព្រំដែននៃប្រទេសទាំងពីរ៕

https://www.youtube.com/watch?v=dLkMNYfxEAg

ប្រភព៖ សារព័ត៌មានបរទេស

May 11, 2020

ជាង4.1លាននាក់ឆ្លងវីរុសCOVID-19 នៅទូទាំងពិភពលោក

គិតមកដល់បច្ចុប្បន្ន ពិភពលោកមានអ្នកស្លាប់ជាង283,000នាក់ នៅក្នុងចំណោមអ្នកជំងឺ COVID-19 ជាង4.1លាននាក់។

ប្រទេសនិងដែនដីចំនួន212 ក្នុងពិភពលោក ត្រូវបានរាយការណ៍ថា មានអ្នកឆ្លងវីរុសសរុបឡើងដល់4,174,751នាក់ និងអ្នកស្លាប់ដោយសារ COVID-19 ចំនួន283,611នាក់ ក្នុងនោះមានអ្នកជំងឺថ្មី77,759នាក់ និងអ្នកស្លាប់ថ្មីមាន3,472នាក់។ អ្នកជំងឺដែលបានជាសះស្បើយ មានចំនួន1,483,147នាក់។ នេះបើតាមស្ថិតិរបស់ Worldemeters។

ទ្វីបអឺរ៉ុបទាំងមូលមានអ្នកជំងឺកូរ៉ូណាសរុប1,628,576នាក់ ខណៈដែលអាមេរិកខាងជើងមាន1,496,765នាក់ អាមេរិកខាងត្បូងមាន310,070នាក់ ទ្វីបអាស៊ីមាន668,733នាក់ និងទ្វីបអាហ្វ្រិកមាន64,750នាក់។

ប្រទេសដែលមានអ្នកស្លាប់ដោយសារវីរុសCOVID-19 លើសពី10,000នាក់ មានចំនួន6ប្រទេស រួមមាន សហរដ្ឋអាមេរិក អង់គ្លេស អ៊ីតាលី អេស្ប៉ាញ បារាំង និងប្រទេសប្រេស៊ីល។

ចំណែកប្រទេសដែលមានអ្នកជំងឺ COVID-19 លើសពី100,000នាក់ មានចំនួន10ប្រទេស ក្នុងនោះ សហរដ្ឋអាមេរិកឈរលំដាប់លេខ1 ដោយមានអ្នកជំងឺសរុប 1,365,532នាក់ ខណៈប្រទេសអ៊ីរ៉ង់ឈរលំដាប់លេខ10 ដោយមានអ្នកជំងឺសរុប107,603នាក់៕

ប្រភព៖ សារព័ត៌មានបរទេស

May 11, 2020

អតីតប្រធានាធិបតីអាមេរិកាំង រិះគន់លោក Trump យ៉ាងចាស់ដៃ ខណៈជាង80,000នាក់បានស្លាប់ដោយសារCOVID-19 នៅសហរដ្ឋអាមេរិក

អតីតប្រធានាធិបតីសហរដ្ឋអាមេរិក លោក Barack Obama បានបញ្ចេញមតិដ៏កម្រមួយ រិះគន់ទៅលើវិធីទប់ទល់នឹង COVID-19 របស់រដ្ឋាភិបាលលោក Trump ក្នុងពេលដែលវីរុសកូរ៉ូណានេះបានសម្លាប់ពលរដ្ឋអាមេរិកាំងជាង80,000នាក់។

ទិន្នន័យនៅលើគេហទំព័រ Worldometers បានបង្ហាញថា គិតមកដល់បច្ចុប្បន្ន តួលេខនៃអ្នកស្លាប់ដោយសារវីរុសCOVID-19 នៅសហរដ្ឋអាមេរិក បានឡើងដល់80,004នាក់ ក្នុងនោះមានអ្នកស្លាប់ថ្មីជិត1.389នាក់។ ប្រទេសនេះបានរកឃើញអ្នកជំងឺថ្មីជាង24,000នាក់ ធ្វើឱ្យតួលេខនៃអ្នកជំងឺសរុបឡើងដល់1,346,332នាក់។

ទស្សនាវដ្ដី Forbes ថ្ងៃនេះ បាននាំពាក្យអតីតមន្ត្រីជាន់ខ្ពស់3រូបដែលធ្លាប់ធ្វើការក្នុងរដ្ឋាភិបាលលោក Barack Obama បានឱ្យដឹងថា លោក Obama បានរិះគន់យ៉ាងខ្លាំងទៅលើវិធីប្រយុទ្ធប្រឆាំងនឹងវីរុសCOVID-19 របស់រដ្ឋាភិបាលលោក Donald Trump ដោយបានហៅវិធីដែលលោក Trump ប្រើប្រាស់នោះថាជា “គ្រោះមហន្តរាយសុទ្ធសាធ” (an absolute chaotic disaster)។

លោក Obama ថ្លែងថា ប្រការនេះគឺជាការក្រើនរំឭកមួយចំពោះមូលហេតុដែលគេត្រូវការការដឹកនាំប្រកបដោយភាពខ្លាំងក្លារបស់រដ្ឋាភិបាល ក្នុងការប្រឈមនឹងវិបត្តិសកល។

លោក Obama បានថ្លែងថា “ការបោះឆ្នោតដែលជិតមកដល់ គឺពិតជារឿងសំខាន់ ព្រោះថា អ្វីដែលយើងកំពុងប្រឈមមុខននេះ មិនមែនជាបុគ្គលមួយរូប ឬបក្សនយោបាយមួយក្រុមនោះទេ។ វាគឺជានិន្នាការយូរអង្វែង ក្នុងនោះមានភាពអត្មានិយម រើសអើង និងការចាត់ទុកអ្នកដទៃជាសត្រូវ។ នេះគឺជាផ្នែកមួយនៃមូលហេតុដែលនាំឱ្យមានប្រតិកម្មទៅនឹងវិបត្តិសកលនេះប្រកបដោយភាពទន់ខ្សោយ។ល។ នេះគឺជា “គ្រោះមហន្តរាយសុទ្ធសាធ”។

ក៏ប៉ុន្តែ ជំនួយការផ្នែកសារព័ត៌មានរបស់សេតវិមាន លោកស្រី Kayleigh McEnany បានច្រានចោលការរិះគន់របស់លោក Obama។ លោកស្រីថ្លែងថា “វិធានការទប់ទល់នឹងមេរោគរាតត្បាត COVID-19 របស់លោកប្រធានាធិបតី Trump គឺជារឿងដែលមិនធ្លាប់មានពីមុនមក និងបានជួយសង្គ្រោះពលរដ្ឋអាមេរិកាំងជាច្រើនទៀតផង”៕

ប្រភព៖ សារព័ត៌មានបរទេស

May 10, 2020

ជាង280,000នាក់ស្លាប់ដោយសារ COVID-19 នៅទូទាំងពិភពលោក

ពិភពលោកទាំងមូលមានមនុស្សជាង280,000នាក់បានបាត់បង់ជីវិត ក្នុងចំណោមអ្នកជំងឺCOVID-19សរុប ជិត4.1លាននាក់។

យោងតាមស្ថិតិពី WorldMeters ប្រទេសនិងដែនដីចំនួន212ក្នុងពិភពលោក បានរកឃើញមនុស្សចំនួន4,096,992នាក់បានឆ្លងវីរុសកូរ៉ូណា COVID-19 និង280,139នាក់បានស្លាប់ដោយសារវីរុសនេះ ក្នុងនោះមានអ្នកជំងឺថ្មី88,882នាក់ និងអ្នកស្លាប់ថ្មីមានចំនួន4,355នាក់។ អ្នកជំងឺដែលបានជាសះស្បើយមានចំនួន1,431,446នាក់។

ទ្វីបអាមេរិកនៅតែជាសម្បុកមេរោគកូរ៉ូណាធំជាងគេក្នុងពិភពលោក ក្នុងនោះអាមេរិកខាងជើងមានអ្នកជំងឺសរុប1,472,075នាក់ អាមេរិកខាងត្បូងមាន297,930នាក់ អឺរ៉ុបមាន1,605,838នាក់ អាស៊ីមាន650,884នាក់ និងទ្វីបអាហ្វ្រិកមាន61,983នាក់។

ប្រទេសដែលមានអ្នកស្លាប់ដោយសារវីរុសCOVID-19 ច្រើនជាង10,000នាក់ បានកើនដល់6ប្រទេស រួមមាន សហរដ្ឋអាមេរិក80,032នាក់ អង់គ្លេស31,587នាក់ អ៊ីតាលី30,395នាក់ អេស្ប៉ាញ26,478នាក់ បារាំង26,310នាក់ និងប្រេស៊ីលមាន10,656នាក់។

ប្រទេសដែលមានអ្នកឆ្លងវីរុសCOVID-19 ច្រើនជាង100,000នាក់ មានចំនួន10ប្រទេស រួមមាន សហរដ្ឋអាមេរិក អង់គ្លេស រុស្ស៊ី បារាំង អាល្លឺម៉ង់ ប្រេស៊ីល ទួរគី និងអ៊ីរ៉ង់៕

ប្រភព៖ សារព័ត៌មានបរទេស

May 10, 2020

Author: សឿន សំណាង