សឿន សំណាង - La Reine Media

អ្នកនាំពាក្យរបស់លោក Putin ឆ្លងវីរុសCOVID-19 ខណៈរុស្ស៊ីក្លាយជាសម្បុកមេរោគធំលំដាប់ទីបីក្នុងពិភពលោក

អ្នកនាំពាក្យរបស់វិមានក្រឹមឡាំង លោក Dmitry Peskov បានបញ្ជាក់អំពីស្ថានភាពជំងឺរបស់លោក ក្រោយពីបានចូលមន្ទីរពេទ្យដើម្បីព្យាបាលជំងឺរលាកសួតថ្មីដែលបង្កឡើងដោយវីរុសCOVID-19។

នៅក្នុងកិច្ចសម្ភាសមួយជាមួយសារព័ត៌មាន Kommersant កាលពីថ្ងៃទី13ឧសភា ជំនួយការផ្ទាល់របស់ប្រធានាធិបតីរុស្ស៊ី និងជាអ្នកនាំពាក្យរបស់វិមានក្រឹមឡាំង លោក Dmitry Peskov បានឱ្យដឹងថា លោកត្រូវរលាកសួតច្រើនកន្លែងដោយសារបានឆ្លងវីរុសកូរ៉ូណាប្រភេទថ្មី។ មុននោះ1ថ្ងៃ លោកក៏បានទទួលស្គាល់ថា ខ្លួនវិជ្ជមានជាមួយនឹងមេរោគCOVID-19នេះ ដែលនាំឱ្យលោកត្រូវចូលព្យាបាលនៅមន្ទីរពេទ្យ។

លោក Peskov រៀបរាប់អំពីអាការរោគរបស់លោកថា មុននោះ លោកមានអាការក្ដៅខ្លួន ហើយភរិយារបស់លោកក៏ចាប់ផ្ដើមមានរោគសញ្ញា។ លោកថា “នៅពេលមានអាការក្ដៅខ្លួន និងឈឺក្នុងរាងកាយ យើងក៏បាននាំគ្នាមកកាន់មន្ទីរពេទ្យ”។

អ្នកនាំពាក្យវិមានក្រឹមឡាំងបានទទួលស្គាល់ថា ដំបូងឡើយ លោកបានពាក្យកាត់មួយដែលអ្នកផលិតនិយាយថា អាចទប់ស្កាត់វីរុស។ “ប៉ុន្តែ ពេលអ្នកសារព័ត៌មាននិយាយថា កាតនោះគ្មានប្រសិទ្ធភាព ខ្ញុំក៏លែងពាក់វា”។

លោក Peskov គឺជាមន្ត្រីម្នាក់ក្នុងចំណោមមន្ត្រីជាន់ខ្ពស់ជាច្រើនរូបរបស់រដ្ឋាភិបាលរុស្ស៊ីដែលបានឆ្លងវីរុសCOVID-19។ កាលពីចុងខែមេសា នាយករដ្ឋមន្ត្រី Mikhail Mishustin ក៏បានប្រកាសថា បានឆ្លងវីរុសកូរ៉ូណានេះ។ ក្រៅពីនេះក៏មានរដ្ឋមន្ត្រីក្រសួងវប្បធម៍ Olga Lyubimova រដ្ឋមន្ត្រីក្រសួងសំណង់ និងលំនៅដ្ឋាន Vladimir Yakushev រួមនឹងអនុរដ្ឋមន្ត្រីក៏បានឆ្លងវីរុសCOVID-19 នេះដែរ។

គិតមកដល់ថ្ងៃទី14ឧសភា ប្រទេសរុស្ស៊ីបានរកឃើញអ្នកជំងឺកូរ៉ូណាជាង252,000នាក់ ក្នុងនោះមានជាង2,300នាក់បានបាត់បង់ជីវិត។ បច្ចុប្បន្ន ប្រទេសនេះបានក្លាយជាសម្បុកមេរោគCOVID-19 ធំជាងគេលំដាប់ទី3ក្នុងពិភពលោក បន្ទាប់ពីសហរដ្ឋអាមេរិក និងអេស្ប៉ាញ៕

ប្រភព៖ សារព័ត៌មានបរទេស

May 15, 2020

លោក Trump សង្ស័យតួលេខត្រូវបានគេបំប៉ោង ខណៈមានមនុស្សជាង85,000នាក់បានស្លាប់ដោយសារCOVID-19នៅសហរដ្ឋអាមេរិក

ប្រធានាធិបតីអាមេរិកាំង លោក Donald Trump យល់ថា តួលេខនៃអ្នកស្លាប់ដោយសារវីរុសCOVID-19 នៅប្រទេសនេះ ធាតុពិតអាចទាបជាងរបាយការណ៍ផ្លូវការ ដែលនេះគឺផ្ទុយទៅនឹងការយល់ឃើញរបស់ទីប្រឹក្សាផ្នែកសុខាភិបាលនៃសេតវិមាន។

សហរដ្ឋអាមេរិកមានអ្នកជំងឺសរុប1.428.993នាក់ ក្នុងនោះមានអ្នកជំងឺថ្មីចំនួន 20,357នាក់។ អ្នកស្លាប់សរុបដោយសារកូរ៉ូណាមានចំនួន85,144នាក់ គឺកើន1,719នាក់បើធៀបនឹងម្សិលមិញ។ ប្រទេសនេះ មានអ្នកជំងឺCOVID-19 ចំនួន307.893នាក់ហើយដែលបានជាសះស្បើយពីជំងឺ។

សារព័ត៌មានCNN ដកស្រង់ប្រភពព័ត៌មានមួយបានឱ្យដឹងថា សេតវិមានកំពុងតែមានការសង្ស័យទៅលើតួលេខនៃអ្នកស្លាប់ដោយសារវីរុសCOVID-19។ ប្រធានាធិបតី Donald Trump និងជំនួយការទាំងអស់របស់លោក ត្រូវបានគេជឿថា កំពុងស្រាវជ្រាវលើទិន្នន័យរបស់មជ្ឈមណ្ឌលគ្រប់គ្រង និងទប់ស្កាត់ជំងឺរបស់អាមេរិក US-CDC (Centers for Disease Control and Prevention) ដែលប្រើសម្រាប់ស្រង់ស្ថិតិចំនួនអ្នកស្លាប់ និងព្យាករចំនួនអ្នកស្លាប់ដោយសារCOVID-19 នៅសហរដ្ឋអាមេរិកកន្លងមក ដើម្បីឱ្យដឹងថា តើគួរទុកចិត្តបានដែរឬយ៉ាងណា។

ក្នុងកិច្ចប្រជុំរបស់គណៈកម្មធីការទប់ទល់ COVID-19 របស់សេតវិមាន ក្រុមមន្ត្រីជាន់ខ្ពស់បានសួរអំពីវិធីសាស្ត្រដែល US-CDC ប្រមូល និងតាមដានទិន្នន័យ។ ពួកគេយល់ថា តួលេខដែលបានរាយការណ៍ អាចត្រូវបានគេបំប៉ោងហួសពីការពិត។

ប្រការខាងលើនេះ គឺផ្ទុយទៅនឹងការយល់ឃើញរបស់អ្នកជំនាញកំពូលផ្នែកសុខភាពរបស់សហរដ្ឋអាមេរិក គឺវេជ្ជបណ្ឌិត Anthony Fauci ដែលជាសមាជិកម្នាក់នៃគណៈកម្មធិការដឹកនាំការទប់ទល់នឹងCOVID-19 របស់សេតវិមាន។ លោក Fauci មានប្រសាសន៍នៅចំពោះមុខគណៈកម្មធិការមួយនៃសភាជាន់ខ្ពស់អាមេរិកាំងកាលពីដើមសប្ដាហ៍នេះថា តួលេខអ្នកស្លាប់ដោយសារវីរុសCOVID-19 នាបច្ចុប្បន្ន ទំនងជាមិនទាន់បង្ហាញអំពីភាពជាក់ស្ដែងនោះទេ ដោយលោកអះអាងថា តួលេខអ្នកស្លាប់អាចខ្ពស់ជាងនេះ ដោយសារតែមានអ្នកខ្លះស្លាប់នៅឯផ្ទះ និងអ្នកខ្លះស្លាប់មុនពេលធ្វើតេស្តរកមេរោគ។

វេជ្ជបណ្ឌិត Anthony Fauci ក៏បានព្រមានថា ការបើកទ្វារសេដ្ឋកិច្ចឡើងវិញយ៉ាងប្រញាប់ប្រញាល់ អាចធ្វើឱ្យវីរុសCOVID-19 ផ្ទុះឆ្លងរាលដាលសាជាថ្មី និង “មិនអាចគ្រប់គ្រង” បាន។ ក៏ប៉ុន្តែ លោក Trump បានទាត់ចោលការយល់ឃើញរបស់លោក Anthony Fauci។

វិទ្យាស្ថានវាយតម្លៃនិងវាស់វែងផ្នែកវេជ្ជសាស្ត្រនៃសាកលវិទ្យាល័យវ៉ាស៊ីងតោន IHME (Institute for Health Metrics and Evaluation) ថ្មីៗនេះ បានបង្កើនតួលេខនៃអ្នកស្លាប់ដោយសារវីរុសCOVID-19 ជាបន្តបន្ទាប់នៅក្នុងការព្យាកររបស់ខ្លួន ដោយសារតែរដ្ឋជាច្រើនបានចាប់ផ្ដើមបន្ធូរបន្ថយបម្រាមគោចរ និងបើកទ្វារសេដ្ឋកិច្ចឡើងវិញ។ IHME បានព្យាករថា ចំនួនអ្នកស្លាប់ដោយសារវីរុសកូរ៉ូណានៅសហរដ្ឋអាមេរិកអាចឡើងដល់147,000នាក់នៅដើមខែសីហាខាងមុខ៕

ប្រភព៖ សារព័ត៌មានបរទេស

May 14, 2020

ជិត298,000នាក់ស្លាប់ដោយសារCOVID-19 នៅទូទាំងពិភពលោក

វីរុសCOVID-19 បានសម្លាប់មនុស្សជិត298,000នាក់ ក្នុងចំណោមអ្នកជំងឺសរុបជាង4.4លាននាក់នៅជុំវិញពិភពលោក។

ប្រទេសនិងដែនដីចំនួន212ក្នុងសកលលោក ត្រូវបានរាយការណ៍ថា បានរកឃើញអ្នកជំងឺCOVID-19 សរុបឡើងដល់4,423,902នាក់ និងអ្នកស្លាប់ដោយសារវីរុសកូរ៉ូណានេះចំនួន297,665នាក់។ ក្នុងរយៈពេល24ម៉ោងចុងក្រោយនេះ ពិភពលោកក៏បានរកឃើញអ្នកជំងឺថ្មីចំនួន88,081នាក់ និងអ្នកស្លាប់ថ្មីចំនួន5,364នាក់។ អ្នកជំងឺដែលបានជាសះស្បើយបានកើនឡើងដល់1,654,891នាក់។ នេះបើតាមស្ថិតិរបស់ Worldometer។

ទ្វីបអាមេរិកជាសម្បុកមេរោគកូរ៉ូណាប្រភេទថ្មីធំជាងគេក្នុងពិភពលោក ក្នុងនោះអាមេរិកខាងជើងមានអ្នកជំងឺ1,569,569នាក់ អាមេរិកខាងត្បូងមាន355,274នាក់ ខណៈទ្វីបអឺរ៉ុបមាន1,696,322នាក់ ទ្វីបអាស៊ីមាន720,802នាក់ និងអាហ្វ្រិកមាន73,832នាក់។

ប្រទេសដែលមានអ្នកជំងឺCOVID-19 ច្រើនជាងគេក្នុងពិភពលោក នៅតែជាសហរដ្ឋអាមេរិកដដែល ដោយមានអ្នកជំងឺសរុប1.428.993នាក់ ក្នុងនោះមានអ្នកជំងឺថ្មីចំនួន 20,357នាក់។ អ្នកស្លាប់សរុបដោយសារកូរ៉ូណាមានចំនួន85,144នាក់ គឺកើន1,719នាក់បើធៀបនឹងម្សិលមិញ។ ប្រទេសនេះ មានអ្នកជំងឺCOVID-19 ចំនួន307.893នាក់ហើយដែលបានជាសះស្បើយពីជំងឺ៕

ប្រភព៖ សារព័ត៌មានបរទេស

May 14, 2020

Twitter អនុញ្ញាតឱ្យបុគ្គលិកធ្វើការពីផ្ទះអស់មួយជីវិត

បន្ទាប់ពីបានធ្វើការពីចម្ងាយអស់រយៈពេលច្រើនខែដោយសារ COVID-19 ក្រុមហ៊ុនបណ្ដាញសង្គម Twitter យល់ឃើញថា បុគ្គលិកអាចបន្តធ្វើបែបនេះ សូម្បីនៅពេលកូរ៉ូណាបានបញ្ចប់។

“បើសិនជាទីកន្លែង និងស្ថានភាពរបស់បុគ្គលិកនោះសមស្របសម្រាប់ពួកគេធ្វើការនៅឯផ្ទះ ហើយពួកគេក៏ចង់បន្តធ្វើបែបនេះអស់មួយជីវិត យើងខ្ញុំនឹងអនុញ្ញាត” នេះជាសម្ដីរបស់នាយិការងរបស់ក្រុមហ៊ុន Twitter ទទួលបន្ទុកធនធានមនុស្ស អ្នកស្រី Jennifer Christie ដែលបានថ្លែងប្រាប់ CNN កាលពីថ្ងៃទី12មេសាកន្លងទៅ។ អ្នកស្រីបន្តថា “បើមិនដូច្នោះទេ ការិយាល័យរបស់យើងក៏នៅតែទទួលស្វាគមន៍ពួកគេត្រឡប់មកធ្វើការក្នុងការិយាល័យវិញ នៅពេលដែលយើងខ្ញុំគិតថា មានសុវត្ថិភាពអាចបើកទ្វារឡើងវិញបាន”។

ការសម្រេចចិត្តនេះអាចបង្ហាញបានខ្លះថា វិធានការដែលគេប្រើប្រាស់ក្នុងសម័យមេរោគរាតត្បាតនេះ អាចបង្កើតបានជានិន្នាការ ឬស្ថានភាពធម្មតាថ្មីមួយសម្រាប់ក្រុមហ៊ុននៅសហរដ្ឋអាមេរិក។ Twitter មិនបានឱ្យដឹងថា មុខតំណែងណាខ្លះដែលទទួលបានផលប្រយោជន៍នេះនៅឡើយ ប៉ុន្តែ ពួកគេបានបញ្ជាក់ថា បទពិសោធន៍ធ្វើការពីចម្ងាយក្នុងរយៈពេលច្រើនខែមកនេះ បានបង្ហាញថា វិធីនេះអាចអនុវត្តបន្តទៅមុខទៀតបាន។

Twitter មិនមានគម្រោងបើកទ្វារការិយាល័យ ឬចាប់ផ្ដើមដំណើរបំពេញបេសកកម្មរបស់ខ្លួននៅមុនខែកញ្ញានោះទេ។ ពួកគេក៏បានលុបចោលព្រឹត្តិការណ៍ផ្ទៃក្នុងទាំងអស់របស់ខ្លួននៅក្នុងឆ្នាំនេះផងដែរ ហើយបញ្ហានេះអាចពន្យារពេលដល់ឆ្នាំ2021។ នេះបើតាមសេចក្ដីប្រកាសមួយរបស់ Twitter។

ក្រៅពី Twitter ក៏មានក្រុមហ៊ុនជាច្រើនផ្សេងទៀត បានសម្រេចចិត្តឱ្យបុគ្គលិករបស់ខ្លួនធ្វើការពីចម្ងាយផងដែរ។ ក្រុមហ៊ុន Facebook និង Google កាលពីសប្ដាហ៍មុនបានបញ្ជាក់ថា ពួកគេអនុញ្ញាតឱ្យបុគ្គលិករបស់ខ្លួនធ្វើការពីចម្ងាយរហូតដល់ដំណាច់ឆ្នាំ2020។ ចំណែកក្រុមហ៊ុន Amazon វិញ បានសម្រេចថា អនុញ្ញាតឱ្យបុគ្គលិកធ្វើការពីផ្ទះរហូតដល់ដើមខែតុលា៕

ប្រភព៖ សារព័ត៌មានបរទេស

May 13, 2020

គម្រោងផ្លូវរូងក្រោមសមុទ្រវែងបំផុតក្នុងពិភពលោក នឹងត្រូវចាប់ផ្ដើមសាងសង់នាពេលដ៏ខ្លីខាងមុខ(វីដេអូ)

ផ្លូវរូងក្រោមឆកសមុទ្រ Fehmarn Belt ដែលតភ្ជាប់ប្រទេសដាណឺម៉ាកទៅកាន់ប្រទេសអាល្លឺម៉ង់ និងត្រូវសាងសង់ចាប់ពីដើមឆ្នាំ2021នោះ នឹងជួយកាត់បន្ថយពេលវេលានៃការធ្វើដំណើរពី45នាទី មកនៅត្រឹម7នាទី។

តាមគម្រោង កំណាត់ផ្លូវម្ខាងទៀតនៃផ្លូវរូងក្រោមសមុទ្រដែលស្ថិតក្នុងប្រទេសដាណឺម៉ាក នឹងត្រូវបានចាប់ផ្ដើមសាងសង់នៅថ្ងៃទី1មករា ឆ្នាំ2021។ នេះបើតាមសេចក្ដីប្រកាសកាលពីថ្ងៃទី24មេសារបស់ក្រសួងដឹកជញ្ជូននៃប្រទេសដាណឺម៉ាក។

ផ្លូវរូងក្រោមឆកសមុទ្រ Fehmarn Belt នេះ នឹងតភ្ជាប់កោះ Lolland របស់ប្រទេសដាណឺម៉ាក ជាមួយនឹង Puttgarden ដែលជាភូមិ និងកំពង់ផែនៅលើកោះ Fehmarn នៅភាគខាងជើងប្រទេសអាល្លឺម៉ង់។

នៅក្នុងការសាងសង់ ដំបូង ចង្អូរដែលមានទទឹង60ម៉ែត្រ ជម្រៅ16ម៉ែត្រ នឹងត្រូវបានជីកក្រោមបាទសមុទ្រ Baltic។ មិនដូចទៅនឹងផ្លូវរូងក្រោមបាទសមុទ្រផ្សេងៗ ដូចជាផ្លូវរូងក្រោមឆកសមុទ្រ Manche ឬ Seikan នៅប្រទេសជប៉ុននោះទេ ផ្លូវរូងនៅឆកសមុទ្រ Fehmarn Belt នឹងត្រូវបានសាងសង់ដោយប្រើប្រាស់កំណាត់ផ្លូវរូងដែលគេបានចាក់ពុម្ភជាស្រេច ដោយគ្រាន់តែយកវាទៅជ្រមុជក្រោមទឹកត្រង់ចង្អូរដែលមានជម្រៅពីផ្ទៃទឹកសមុទ្រប្រមាណជា35ម៉ែត្រ។ កំណាត់ផ្លូវរូងនីមួយៗនឹងមានទទឹង40ម៉ែត្រ ជម្រៅ(កម្ពស់)15ម៉ែត្រ និងទម្ងន់73,000តោន។

កំណាត់ផ្លូវរូងទាំងនោះនឹងត្រូវបានផលិតឡើងដោយរោងចក្រមួយនៅដាណឺម៉ាក បន្ទាប់មកវានឹងត្រូវគេដឹកដោយកប៉ាក់ យកទៅកាន់ការដ្ឋានសាងសង់ផ្លូវរូងនោះ។ ប្រព័ន្ធបណ្ដែតដ៏ធំនឹងត្រូវបានប្រើដើម្បីទម្លាក់កំណាត់ផ្លូវរូងទៅក្នុងចង្អូរដែលគេបានធ្វើរួចជាស្រេច។

គម្រោងសាងសង់ផ្លូវរូងក្រោមសមុទ្រដែលមានប្រវែងវែងជាងគេក្នុងពិភពលោកមួយនេះ នឹងត្រូវចំណាយប្រាក់ប្រមាណជា7.6ពាន់លានដុល្លារអាមេរិក។ ផ្លូវក្រោមសមុទ្រនេះរួមមាន ផ្លូវដែកប្រវែង18គីឡូម៉ែត្រចំនួនពីរខ្សែ និងផ្លូវល្បឿនលឿន2ខ្សែដែលមាន4គន្លង។

ផ្លូវរូងក្រោមសមុទ្រនេះនឹងកាត់បន្ថយពេលវេលាក្នុងការធ្វើដំណើរឆ្លងកាត់ឆកសមុទ្រ Fehmarn Belt ចុះមកនៅត្រឹម10នាទីបើសិនធ្វើដំណើរដោយរថយន្ត និង7នាទីបើធ្វើដំណើរតាមរថភ្លើង ដែលនេះពិតជារយៈពេលដ៏ខ្លីបើធៀបជាមួយនឹង45នាទី នៅពេលគេធ្វើដំណើរតាមស្រឡាងដូចបច្ចុប្បន្ន។

តាមគម្រោង ផ្លូវរូងក្រោមបាទសមុទ្រនេះនឹងត្រូវបានសាងសង់រួចរាល់ជាស្ថាពរនៅពាក់កណ្ដាលឆ្នាំ2029 ដោយផ្ដើមការសាងសង់ចាប់ពីដើមឆ្នាំ2021ខាងមុខ៕

https://www.youtube.com/watch?v=_XUiMncXp7A

ប្រភព៖ សារព័ត៌មានបរទេស

May 13, 2020

“ស្ពាន” ប្រវែង3លានឆ្នាំពន្លឺ តភ្ជាប់បណ្ដុំកាឡាក់ស៊ីចំនួនពីរ នៅឯនាយអវកាស(វីដេអូ)

“ស្ពានឧស្ម័ន” ដែលមានម៉ាស់ធ្ងន់ជាង6លានលានដងធៀបនឹងម៉ាស់របស់ព្រះអាទិត្យ ត្រូវបានបង្កើតឡើងក្រោយពីហេតុការណ៍ប៉ះទង្គិចគ្នារវាងបណ្ដុំកាឡាក់ស៊ីចំនួនពីរកាលពីអតីតកាលដ៏យូរលង់ណាស់មកហើយ។

បណ្ដុំកាឡាក់ស៊ីទាំងពីរនេះ បាន “សាងសង់” ស្ពានឧស្ម័នមួយដ៏វែងបន្ទាប់ពីពួកវាបានប៉ះទង្គិចគ្នាកាលពីរាប់រយលានឆ្នាំមុន។ ទីភ្នាក់ងារអវកាសអាមេរិក (NASA) បានឱ្យដឹងថា ពួកវាបានប៉ះទង្គិចគ្នា ហើយក៏ហោះបញ្ច្រាសគ្នា បង្កឱ្យមានឧស្ម័នដែលមានបរិមាណដ៏ច្រើនមហិមា បង្កើតបានជាស្ពានឧស្ម័នដ៏ចម្លែកដែលមានប្រវែងជាង3លានឆ្នាំពន្លឺ។

បណ្ដុំកាឡាក់ស៊ីគឺជាវត្ថុធំជាងគេបង្អស់ក្នុងលម្ហអវកាស ដែលត្រូវបានតភ្ជាប់គ្នាដោយកម្លាំងទំនាញ។ នៅក្នុងបណ្ដុំកាឡាក់ស៊ី ឬចង្កោមកាឡាក់ស៊ី គឺមានកាឡាក់ស៊ីជាច្រើន។

រចនាសម្ព័ន្ធដែលមានកាឡាក់ស៊ីពីរ និងស្ពានឧស្ម័ននេះត្រូវបានអ្នកវិទ្យាសាស្ត្រហៅថា Abell 2384។ Abell 2384នេះ មានម៉ាស់សរុបធ្ងន់ជាង260លានលានដងបើធៀបជាមួយនឹងម៉ាស់របស់ព្រះអាទិត្យ។ ដោយឡែក ស្ពានឧស្ម័នរបស់ Abell 2384 វិញ មានម៉ាស់ធ្ងន់ជាង6លានលានដងធៀបនឹងម៉ាស់របស់ព្រះអាទិត្យ។

រូបភាពស្ដីអំពី Abell 2384 ត្រូវបានថតដោយកែវយឹតអវកាស Chandra (Chandra X-ray Observatory) ដែលមានតួនាទីសង្កេតកាំរស្មី X រួមនឹងយានអវកាស XMM-Newton និងកែវយឹតរលកវិទ្យុ Metrewave។

មហាប្រហោងខ្មៅនៅចំកណ្ដាលកាឡាក់ស៊ីមួយដែលស្ថិតក្នុងបណ្ដុំកាឡាក់ស៊ីមួយក្នុងចំណោមបណ្ដុំកាឡាក់ស៊ីទាំងពីរ កំពុងតែបញ្ចេញវត្ថុធាតុដែលវាបាននិងកំពុង “ទំពាស៊ី” យ៉ាងខ្លាំងក្លា រហូតដល់អាចធ្វើឱ្យមហាស្ពានឧស្ម័នបានប្រែរូបរាង។

ក្រុមអ្នកវិទ្យាសាស្ត្រក៏បានរកឃើញដាននៃក្បាលរលកកាំរស្មី Shockwave ដែលដូចទៅនឹងការផ្ទុះដ៏ខ្លាំងក្លាពីយន្តហោះប្រដេញដូច្នោះដែរ។

យោងទៅតាមការវិភាគនៅលើកុំព្យូទ័រ អ្នកវិទ្យាសាស្ត្រយល់ថា បណ្ដុំកាឡាក់ស៊ីទាំងពីរនេះ នឹងរួមបញ្ចូលចូលគ្នាតែមួយនាពេលអនាគត។

លទ្ធផលនៃការរកឃើញនេះ ត្រូវបានចុះផ្សាយនៅលើទំព័រទស្សនាវដ្ដី Monthly Notices of the Royal Astronomical Society៕

ប្រភព៖ សារព័ត៌មានបរទេស

May 13, 2020

អាមេរិកាំងពង្រាយយន្តហោះទម្លាក់គ្រាប់បែកបំបាំងកាយ នៅពាសពេញពិភពលោក

សហរដ្ឋអាមេរិកបានបញ្ជូនយន្តហោះទម្លាក់គ្រាប់បែក B-2 និង B-52 ទៅកាន់ទ្វីបអឺរ៉ុប និងអាស៊ីប៉ាស៊ីហ្វិក ខណៈដែលយន្តហោះទម្លាក់គ្រាប់បែក B-1 កំពុងធ្វើសមយុទ្ធនៅសមុទ្រចិនខាងត្បូង និងសមុទ្រចិនខាងកើត។

បញ្ជាការដ្ឋានយុទ្ធសាស្ត្រអាមេរិកាំង STRATCOM (United States Strategic Command) កាលពីថ្ងៃទី11ឧសភា បានចេញសេចក្ដីប្រកាសមួយឱ្យដឹងថា យន្តហោះទម្លាក់គ្រាប់បែកបំបាំងកាយ B-2 Spirit ចំនួន2គ្រឿង និងយន្តហោះទម្លាក់គ្រាប់បែកយុទ្ធសាស្ត្រ B-52H ចំនួន4គ្រឿង មកពីមូលដ្ឋានទ័ពនានារបស់សហរដ្ឋអាមេរិក កាលពីថ្ងៃទី7ឧសភាត្រូវបានដាក់ពង្រាយក្នុងពេលតែមួយនៅទ្វីបអឹរ៉ុប និងតំបន់នានាដែលទទួលខុសត្រូវដោយបញ្ជាការដ្ឋាននៅមហាសមុទ្រឥណ្ឌា-អាស៊ីប៉ាស៊ីហ្វិក។

STRATCOM ឱ្យដឹងថា យុទ្ធនាការពង្រាយកម្លាំងលើកនេះ គឺដើម្បី “បង្ហាញអំពីសមត្ថភាពត្រៀមខ្លួនជាស្រេចក្នុងការប្រយុទ្ធ និងលទ្ធភាពគ្រប់គ្រងពិភពលោកទាំងមូលរបស់យន្តហោះទម្លាក់គ្រាប់បែកយុទ្ធសាស្ត្ររយៈចម្ងាយឆ្ងាយ”។ យ៉ាងនេះក្ដី STRATCOM មិនបានបង្ហើបឱ្យដឹងច្បាស់អំពីផ្លូវហោះហើរ ក៏ដូចជារង្វង់ប្រតិបត្តិការរបស់យន្តហោះទម្លាក់គ្រាប់បែកទាំងនេះនោះទេ។

យន្តហោះទម្លាក់គ្រាប់បែក B-2 Spirit អមដំណើរដោយយន្តហោះចម្បាំង F-35 ពីរគ្រឿងរបស់សហរដ្ឋអាមេរិក

មុននោះមួយថ្ងៃ យន្តហោះទម្លាក់គ្រាប់បែក B-1B Lancer 2គ្រឿង បានចូលរួមក្នុងសមយុទ្ធយោធាមួយនៅលើសមុទ្រចិនខាងត្បូង។ នេះគឺជាយន្តហោះ ដែលស្ថិតក្នុងក្រុមយន្តហោះទម្លាក់គ្រាប់បែក B-1B ចំនួន4គ្រឿងដែលត្រូវបានបញ្ជូនទៅកាន់មូលដ្ឋានទ័ព Andersen នៅលើកោះ Guam កាលពីដើមខែនេះ។

កាលពីម្សិលមិញ កងទ័ពសហរដ្ឋអាមេរិកក៏បានប្រកាសថា យន្តហោះទម្លាក់គ្រាប់បែក B-1B មួយគ្រឿងរបស់ខ្លួន បានចូលរួមធ្វើសមយុទ្ធយោធារួមជាមួយកងកម្លាំងការពារដែនអាកាសជប៉ុននៅសមុទ្រចិនខាងកើត ជាតំបន់ដែលមានប្រជុំកោះ Senkaku ដែលជប៉ុន និងចិនកំពុងដណ្ដើមគ្នាកាន់កាប់។

សេចក្ដីប្រកាសរបស់ STRATCOM មានឃ្លាសរសេរថា “ការដាក់ពង្រាយតាមកាលៈទេសៈរបស់យន្តហោះទម្លាក់គ្រាប់បែករយៈចម្ងាយឆ្ងាយ និងយន្តហោះការពារក្នុងលើកនេះ បានបង្ហាញអំពីសមត្ថភាពដែលអាចធ្វើសកម្មភាពកំញើញជាយុទ្ធសាស្ត្ររបស់សហរដ្ឋអាមេរិកនៅគ្រប់ទីកន្លែងលើពិភពលោក”។

ឥរិយាបថនេះ ត្រូវបានធ្វើឡើងក្រោយរយៈពេលជិត1ខែ បន្ទាប់ពីទីក្រុងវ៉ាស៊ីងតោនបានបញ្ជាឱ្យយន្តហោះទម្លាក់គ្រាប់បែក B-52 ដែលដាក់ពង្រាយជាប្រចាំនៅលើកោះ Guam ឱ្យត្រឡប់ទៅសហរដ្ឋអាមេរិកវិញ។ សកម្មភាពខាងលើនេះ ជួយឱ្យកងកម្លាំងទ័ពអាកាសយុទ្ធសាស្ត្ររបស់សហរដ្ឋអាមេរិក ស្ថិតក្រៅរង្វង់នៃការគំរាមកំហែងពីសំណាក់ប្រទេសចិន និងកូរ៉េខាងជើង ប៉ុន្តែនៅតែអាចរក្សាបាននូវអំណាចនៃការកំញើញ និងបង្កការភ្ញាក់ផ្អើលដល់សត្រូវរបស់ខ្លួន៕

ប្រភព៖ សារព័ត៌មានបរទេស

May 13, 2020

លោកត្រាំ ឈប់ថ្លែងព័ត៌មានភ្លាមៗ ក្រោយប៉ះពាក្យសម្ដីជាមួយស្ត្រីអ្នកយកព័ត៌មាន រឿងវីរុសកូរ៉ូណា

លោកប្រធានាធិបតី ដូណាល់ ត្រាំ របស់សហរដ្ឋអាមេរិក បានបញ្ឈប់ការថ្លែងព័ត៌មាននៅសេតវិមានរបស់លោកយ៉ាងបន្ទាន់ភ្លាមៗ កាលពីថ្ងៃចន្ទ(ទី11 ឧសភា) បន្ទាប់ពីលោកបានប៉ះពាក្យសម្ដីជាមួយស្ត្រីអ្នកយកព័ត៌មាន 2នាក់ គឺអ្នកស្រី វើយ ចៀចៀង នៃ CBS News និង អ្នកស្រី ឃែតឡាន់ ខូលលីនស៍ នៃ CNN។

អ្នកស្រីចៀង បានសួរលោកត្រាំ ថា ហេតុអ្វីបានជាលោកនិយាយដដែលច្រើនមែនទែន ពាក់ព័ន្ធនឹងចំនួនការត្រួតពិនិត្យវីរុសកូរ៉ូណា ដែលបានដំណើរការរួចហើយនៅក្នុងប្រទេសអាមេរិក?

អ្នកស្រីចៀង សួរថា “ហេតុអី? តើរឿងនេះមានភាពសំខាន់អ្វីដែរឬ? ហេតុអីបានរឿងនេះក្លាយជាការប្រកួតប្រជែងលំដាប់ពិភពលោកសម្រាប់រូបលោក? បើរៀងរាល់ថ្ងៃ នៅតែមានពលរដ្ឋអាមេរិកាំងស្លាប់ ហើយយើងក៏កំពុងតែបានឃើញករណីថ្មីៗ កើនឡើងរាល់ៗថ្ងៃដែរនោះ?”

លោកត្រាំ ឆ្លើយថា “ពួកគេឯទៀត ក៏កំពុងតែមានការស្លាប់បាត់បង់ជីវិតនៅគ្រប់ទីកន្លែងក្នុងពិភពលោក និងជួនកាល សំណួរនេះ អ្នកគួរតែទៅសួរចិនណា៎ កុំមកសួរខ្ញុំ យកសំណួរនេះទៅសួរចិនទៅ!”

លោកត្រាំ បញ្ចប់សេចក្ដី ដោយការងាកទៅហៅអ្នកយកព័ត៌មានដទៃទៀតឱ្យសួរសំណួរបន្តទៀត តែ មិនទាន់បានទទួលការតបស្នងភ្លាមៗឡើយ…។

“លោកប្រធានាធិបតីចា៎ស ហេតុអីបានលោកនិយាយបែបហ្នឹងជាមួយនាងខ្ញុំ ប្រៀបដូចជាមានចេតនាច្បាស់ៗបែបនេះ?” អ្នកស្រីចៀងបន្តតាមសួរ (អ្នកស្រីចៀង ធ្វើការឱ្យ CBS News ផ្នែកព័ត៌មានរបស់បណ្ដាញទូរទស្សន៍ CBS News របស់សហរដ្ឋអាមេរិក តាំងពីឆ្នាំ2005។ អ្នកស្រីកើតនៅក្នុងទីក្រុងសៀងមឹន ប្រទេសចិន និងភៀសខ្លួនមករស់នៅសហរដ្ឋអាមេរិក ព្រមជាមួយក្រុមគ្រួសាររបស់អ្នកស្រី តាំងពីអ្នកស្រី មានអាយុ 2ឆ្នាំ)។

លោកត្រាំ ថ្លែងថា លោកនឹងនិយាយបែបហ្នឹងជាមួយ “អ្នកណាក៏ដោយ ដែលសួរសំណួរគួរឱ្យខ្ពើមរអើម” តែ អ្នកស្រីចៀងឆ្លើយតបទៅវិញថា “វាមិនមែនជាសំណួរគួរឱ្យខ្ពើមរអើមទេ…ហេតុអ្វីបានរឿងហ្នឹង លោកគិតថាជារឿងសំខាន់?”

លោកត្រាំ បែរទៅសួរអ្នកយកព័ត៌មានឯទៀតថា មានអ្នកណាមានសំណួរអីទៀតទេ? បន្ទាប់ពីនោះ លោកក៏ប្រាប់ថា “បើអត់ទេ អ៊ីចឹងក៏អូខេ” និងបក់ដៃបណ្ដេញអ្នកស្រី ខូលលីនស៍ របស់ CNN ពេលអ្នកស្រីដើរតម្រង់ទៅរកក្បាលមីក្រូ…។

អ្នកស្រី ខូលលីនស៍ និយាយតវ៉ា “លោកចង្អុលមកនាងខ្ញុំ”

លោកប្រធានាធិបតីឆ្លើយថា “ខ្ញុំចង្អុលទៅអ្នកមែន តែអ្នកមិនបានតបស្នងអ្វីសោះ!”

អ្នកស្រីខូលលីនស៍ អធិប្បាយថា អ្នកស្រីកំពុងទុកពេលវេលាឱ្យអ្នកស្រីចៀង សម្រាប់បញ្ចប់ការសាកសួររបស់គាត់។

រួចអ្នកស្រីបន្តថា “ឥឡូវ នាងខ្ញុំសុំសួរបានទេ?”

លុះមកដល់ត្រឹមហ្នឹង លោកត្រាំ ក៏បញ្ឈប់ការថ្លែងព័ត៌មាន ហើយដើរចេញទៅតែម្ដង…។

អ្នកស្រី វើយ ចៀចៀង អ្នកយកព័ត៌មានប្រចាំសេតវិមាន របស់បណ្ដាញទូរទស្សន៍ CBS News ទាញម៉ាស់អនាម័យរបស់នាងចេញ ក្រោយពីសួរលោកប្រធានាធិបតី ដូណាល់ ត្រាំ ខណៈពេលថ្លែងព័ត៌មាននៅសេតវិមាន កាលពីថ្ងៃចន្ទ(ទី11 ឧសភា) កន្លងទៅ

អ្នកស្រីចៀង និងអ្នកស្រីខូលលីនស៍ សុទ្ធតែពាក់ម៉ាស់អនាម័យការពារ ខណៈចូលរួមស្ដាប់ការថ្លែងព័ត៌មាននេះ ដូចគ្នានឹងអ្នកយកព័ត៌មានភាគច្រើនដែរ ដោយសារតែមួយរយៈចុងក្រោយនេះ មានរបាយការណ៍កាលពីពេលថ្មីៗថា មានមន្ត្រីនិយោជិត 2នាក់របស់សេតវិមាន មានលទ្ធផលវិជ្ជមានពីការពិនិត្យរកមេរោគវីរុសកូវីដ-19 ដោយទាំង 2នាក់នេះ ម្នាក់ជាជំនួយការរបស់លោកអនុប្រធានាធិបតី ម៉ៃក៍ ផេនស៍ និងម្នាក់ទៀតជាទាហាន មានតួនាទីជាអ្នកបម្រើរបស់លោកប្រធានាធិបតី) ៕

ប្រភព៖ សារព័ត៌មានបរទេស

May 13, 2020

ស៊ី ជីន ភីង និងពាក្យប្រៀនប្រដៅរបស់ម្ដាយ

ទីភ្នាក់ងារព័ត៌មាន CRI និង CMG បានចេញផ្សាយអត្ថបទថ្ងៃអាទិត្យ ទី2 នៃខែឧសភា(ពេលវេលារាប់តាមប្រតិទិនចិន) ជាថ្ងៃមាតាពិភពលោក ដែលត្រូវនឹងថ្ងៃទី10 ខែឧសភា ឆ្នាំ2020 ដោយបាននាំយករឿងរ៉ាវរបស់លោកប្រធានាធិបតីនៃប្រទេសចិន ស៊ី ជីនភីង ជាមួយសេចក្ដីស្រឡាញ់ ចំណងសម្ព័ន្ធភាព និងពាក្យអប់រំប្រៀនប្រដៅរបស់ម្ដាយមកចុះផ្សាយដូចតទៅ…៖

នៅក្នុងបន្ទប់ធ្វើការរបស់លោកប្រធានាធិបតី នៃប្រទេសចិន ស៊ី ជីនភីង មានដាក់តាំងរូបថតរបស់បិតា-មាតា និងសមាជិកគ្រួសារជាច្រើនរូប…មួយនៅក្នុងចំណោមនោះ គឺជារូបភាពដែលកត់ត្រាពីភាពកក់ក្ដៅ រវាងលោក ស៊ី ជីនភីង ជាមួយនឹងម្ដាយរបស់លោក កាន់ដៃគ្នាដើរលេង ធ្វើឱ្យកើតមានក្ដីរំភើបចិត្តយ៉ាងខ្លាំងដល់អ្នកដែលបានឃើញរូបថតមួយផ្ទាំងនេះ។

ការធ្វើខ្លួនជាគំរូដ៏ល្អ និងការស្ដាប់ពាក្យប្រៀនប្រដៅរបស់ម្ដាយ គឺជាសិរីមង្គលជីវិតសម្រាប់លោកស៊ី ជីនភីង មករហូត។

លោកប្រធានាធិបតី ស៊ី ជីនភីង បានរៀបរាប់ថា កាលពីអំឡុងពេលដែលលោកទើបតែមានអាយុ 5-6ឆ្នាំ អ្នកម្ដាយបានស្ពាយលោក ទៅទិញសៀវភៅរូបភាពសម្រាប់និទានរឿងខ្នាតតូច របស់ យេវ ហ្វ៊ើយ ឬង៉ាក់ ហ៊ុយ នៅឯតូបលក់សៀវភៅស៊ីនហួ។ អ្នកម្ដាយ បានអានរឿងនិទានពាក់ព័ន្ធនឹងអ្នកម្ដាយរបស់វីរបុរស យេវ ហ្វ៊ើយ ដែលបានឆ្លាក់តួអក្សរ 4ពាក្យថា “មានបេះដូងស្រឡាញ់ជាតិ” នៅចំកណ្ដាលខ្នងរបស់យេវ ហ្វ៊ើយ ដើម្បីឱ្យគេក្លាយជាមនុស្សស្មោះត្រង់ មានភក្ដីភាព ដឹងគុណដឹងទោស និងលះបង់ដើម្បីប្រទេសជាតិ។

អក្សរ 4តួនេះ ប្រៀបដូចជាគ្រាប់ពូជដែលកប់ជ្រៅនៅក្នុងបេះដូងរបស់លោកស៊ី ជីនភីង ប្រធានាធិបតីចិន ដែលធ្វើឱ្យលោកចងចាំរហូតដល់សព្វថ្ងៃនេះ និងក្លាយជាពាក្យសច្ចាប្រណិធានជីវិត។

នៅក្នុងគ្រួសាររបស់លោកស៊ី ជីនភីង មានរបៀបវិន័យដែលប្រៀនប្រដៅកូនយ៉ាងម៉ឺងម៉ាត់ និងការគ្រប់គ្រងផ្ទៃក្នុងផ្ទះដោយក្ដីសន្សំសំចៃ និងឧស្សាហ៍ព្យាយាម។ បង្ហាត់បង្រៀនកូនចៅ ដោយប្រពៃណីដ៏ល្អផូរផង់របស់ក្រុមគ្រួសារ ដោយម្ដាយត្រូវមើលថែទាំកូន និងថែមទាំងត្រូវធ្វើការងាររបស់ខ្លួនឱ្យបានល្អទៀតផង។ ទោះជាលំបាក ឬហត់នឿយយ៉ាងណា ក៏នឹងនៅតែប្រកាន់ខ្ជាប់លើការងារជាចម្បង និងពេលមានក្ដីលំបាក ក៏នឹងចាត់ការដោយខ្លួនឯង។

លោកស៊ី ជីន ភីង ផ្ដល់ភាពសំខាន់ចំពោះក្រុមគ្រួសារ និងមានចំណងសម្ព័ន្ធភាពជាមួយសមាជិកក្នុងគ្រួសារខ្លាំងណាស់ តែដោយសារតែលោកជាមន្ត្រីថ្នាក់ខ្ពស់ ទើបច្រើនតែមិនអាចត្រឡប់មកផ្ទះនៅជាមួយក្រុមគ្រួសារក្នុងថ្ងៃឈប់សម្រាក ឬថ្ងៃបុណ្យបាន។

មានរឿងរៀបរាប់ថា ក្នុងអំឡុងពេលចូលឆ្នាំចិនក្នុងឆ្នាំ2000 អ្នកស្រី ឈី ស៊ីន ដែលជាម្ដាយ បានទូរស័ព្ទនិយាយគ្នាជាមួយលោកស៊ី ជីនភីង ដែលនៅពេលនោះមានតំណែងជាអភិបាលមណ្ឌល ហ៊្វូចៀន ដោយបានសួរសុខទុក្ខ និងដាស់តឿនកូនប្រុសថា “ការធ្វើការងារឱ្យល្អ គឺជាការសម្ដែងក្ដីកតញ្ញូដ៏ធំធេងបំផុតចំពោះឪពុកម្ដាយ ហើយក៏ជាការទទួលខុសត្រូវចំពោះក្រុមគ្រួសារ និងខ្លួនឯងដែរ ដែលអាចហៅបានថា វាជារឿងតែមួយ”

ច្រើនឆ្នាំកន្លងមកនេះ លោក ស៊ី ជីនភីង ក៏នៅតែចងចាំពាក្យប្រៀនប្រដៅ និងពាក្យដាស់តឿនរបស់ម្ដាយ ហើយរូបថតរបស់លោកស៊ី ជីនភីង ជាមួយម្ដាយ កាន់ដៃគ្នាដើរលេងក្នុងសួនច្បារ នៅតែស្ថិតនៅក្នុងបន្ទប់ធ្វើការរបស់លោកជានិច្ច មិនថាមុខតំណែង និងតួនាទីផ្លាស់ប្ដូរយ៉ាងណាក៏ដោយ៕

ប្រភព៖ សារព័ត៌មានបរទេស

May 13, 2020

អនុប្រធានាធិបតីអាមេរិកាំងនឹង “នៅឆ្ងាយ” ពីលោក Trump មួយរយៈ

អនុប្រធានាធិបតីសហរដ្ឋអាមេរិក លោក Mike Pence បានសម្រេចចិត្តថា “នៅឱ្យឆ្ងាយ” ពីប្រធានាធិបតី Donald Trump ក្នុងមួយរយៈពេល បន្ទាប់ពីអ្នកនាំពាក្យរបស់ប្រធានាធិបតីបានឆ្លងវីរុសCOVID-19។ នេះបើតាមការឱ្យដឹងពីសេតវិមាន។

“ខ្ញុំសូមបញ្ជាក់ថា នោះគឺជាការសម្រេចចិត្តផ្ទាល់ខ្លួនរបស់គាត់។ ការរក្សាគម្លាតប៉ុន្មានថ្ងៃគឺអាស្រ័យទៅលើអនុប្រធានាធិបតី”។ លេខាផ្នែកសារព័ត៌មានរបស់សេតវិមាន លោកស្រី Kayleigh McEnany បានឱ្យដឹងបែបនេះ ទាក់ទិននឹងការរក្សាគម្លាតរបស់អនុប្រធានាធិបតីអាមេរិកាំង លោក Mike Pence ជាមួយនឹងលោក Trump។

ឥរិយាបថរបស់អនុប្រធានាធិបតីអាមេរិកាំងរូបនេះ ត្រូវបានធ្វើឡើងក្រោយពី Kate Miller ដែលជាអ្នកនាំពាក្យរបស់លោក និងជាភរិយារបស់លោក Stephen Miller ដែលជាទីប្រឹក្សាជាន់ខ្ពស់របស់ប្រធានាធិបតី Trump បានឆ្លងវីរុសCOVID-19។ លោក Trump កាលពីថ្ងៃទី8ឧសភា បានអះអាងថា លោកមិនបានទាក់ទងផ្ទាល់ជាមួយនឹង Miller នោះទេក្នុងមួយរយៈពេលចុងក្រោយនេះ ប៉ុន្តែលោកស្រី Kate Miller មានទំនាក់ទំនងផ្ទាល់ជាមួយអនុប្រធានាធិបតី Mike Pence។

លោក Trump បាននិយាយបន្ថែមអំពីអនុប្រធានាធិបតីអាមេរិកាំងថា “Mike បានធ្វើតេស្តរកមេរោគ ដោយទទួលបានលទ្ធផលអវិជ្ជមាន”។ មេដឹកនាំកំពូលរបស់សហរដ្ឋអាមេរិកទាំងពីររូបនេះ សុទ្ធតែត្រូវធ្វើតេស្តរកវីរុសCOVID-19 ជារៀងរាល់ថ្ងៃ។

អនុប្រធានាធិបតីសហរដ្ឋអាមេរិក លោក Mike Pence

សូមរំឭកថា មុននេះមានទាហានពិសេសម្នាក់មកពីទ័ពជើងទឹក ដែលមានភារកិច្ចបម្រើលោក Trump ក៏បានឆ្លងវីរុសCOVID-19 ធ្វើឱ្យសេតវិមានព្រួយបារម្ភយ៉ាងខ្លាំងអំពីការឆ្លងរាលដាលក្នុងជួរស្ថាប័នកំពូលនេះ។ សមាជិកជាន់ខ្ពស់3រូបដែលស្ថិតក្នុងក្រុមអ្នកជំនាញការប្រឆាំងនឹងCOVID-19 របស់សេតវិមាន ក្នុងនោះមានមន្ត្រីជាន់ខ្ពស់ផ្នែកសុខាភិបាលនៅសេតវិមាន និងជាទីប្រឹក្សាផ្ទាល់របស់ប្រធានាធិបតីអាមេរិកាំង គឺលោក Anthony Fauci ក៏បានបង្ខាំងខ្លួនឯងផងដែរដើម្បីការពារការឆ្លងមេរោគ។

ការិយាល័យគ្រប់គ្រងសេតវិមាន កាលពីថ្ងៃទី11ឧសភាបានចេញសេចក្ដីប្រកាសណែនាំឱ្យបុគ្គលិកនៅទីនេះពាក់ម៉ាស់ជាប់ជានិច្ចក្នុងតំបន់ករិយាល័យប្រធានាធិបតី ទន្ទឹមនឹងនេះសេតវិមានក៏ស្នើឱ្យគោរពវិធានការរក្សាគម្លាតក្នុងទីសាធារណៈផងដែរ។ ក៏ប៉ុន្តែ លោក Trump ទទួលបានសិទ្ធិលើកលែងក្នុងករណីនេះ បន្ទាប់ពីជំនួយការនានានៅសេតវិមានបានឱ្យដឹងថា លោក Trump ទំនងជាមិនព្រមពាក់ម៉ាស់នោះទេ។

នៅសហរដ្ឋអាមេរិក គិតមកដល់បច្ចុប្បន្ន មានអ្នកជំងឺCOVID-19 សរុប 1,407,928នាក់ និងអ្នកស្លាប់សរុបមានចំនួន83,357នាក់ ក្នុងនោះមានអ្នកជំងឺថ្មី23,895នាក់ និងអ្នកស្លាប់ថ្មី1,654នាក់ដែលទើបបានរកឃើញក្នុងថ្ងៃនេះ។ អ្នកជំងឺដែលបានជាសះស្បើយនៅសហរដ្ឋអាមេរិកក៏បានកើនឡើងដល់293,074នាក់៕

ប្រភព៖ សារព័ត៌មានបរទេស

May 13, 2020

Author: សឿន សំណាង