សឿន សំណាង - La Reine Media

ជិត357,000នាក់ស្លាប់ដោយសារ COVID-19 នៅទូទាំងសកលលោក

ពិភពលោកទាំងមូលបានរកឃើញអ្នកផ្ទុកវីរុសCOVID-19 ចំនួនជិត5.8លាននាក់ ក្នុងនោះមានជិត357,000នាក់បានស្លាប់។

ប្រទេសនិងដែនដីចំនួន213ក្នុងសកលលោកត្រូវបានរាយការណ៍ថាមានអ្នកជំងឺរលាកសួតប្រភេទថ្មីចំនួន5,780,403នាក់ និងស្លាប់356,788នាក់ ក្នុងនោះថ្ងៃនេះអ្នកជំងឺកើន103,553នាក់ និងអ្នកស្លាប់កើន5,189នាក់បើធៀបនឹងម្សិលមិញ ខណៈអ្នកជំងឺដែលបានជាសះស្បើយមានចំនួនជិត2,500,000នាក់។

ទ្វីបអាមេរិកមានអ្នកជំងឺ COVID-19 ច្រើនជាងគេបង្អស់ ក្នុងនោះតំបន់អាមេរិកខាងជើងមាន1,952,626នាក់ អាមេរិកខាងត្បូងមាន719,633នាក់ ចំណែកទ្វីបអឺរ៉ុបមាន1,950,083នាក់ អាស៊ីមាន1,026,155នាក់ និងទ្វីបអាហ្វ្រិកមាន126,638នាក់។

ប្រទេសដែលជាសម្បុកមេរោគ និងជា “វាលពិឃាត” ធំជាងគេបង្អស់របស់ COVID-19 នៅតែជាសហរដ្ឋអាមេរិក ដោយមានអ្នកជំងឺសរុបជាង1,745,000នាក់ និងអ្នកស្លាប់សរុបជាង102,000នាក់៕

ប្រភព៖ សារព័ត៌មានបរទេស

May 28, 2020

រដ្ឋមន្ត្រីការបរទេសអាមេរិកាំងប្រកាសថា ទីក្រុងហុងកុង “អស់សិទ្ធិម្ចាស់ការ” ហើយ! សហរដ្ឋអាមេរិកនឹងចាត់វិធានការលើរឿងនេះនៅសប្ដាហ៍ក្រោយ

រដ្ឋមន្ត្រីការបរទេសអាមេរិកាំងបានថ្លែងថា ទីក្រុងហុងកុងលែងទទួលបានសិទ្ធិម្ចាស់ការ នៅពេលដែលប្រទេសចិនកំពុងរៀបផែនការចេញច្បាប់សន្តិសុខសម្រាប់តំបន់ពិសេសនេះ។

“មិនមានអ្នកណាដែលពិចារណាប្រកបដោយហេតុផលអាចនិយាយបានថា ទីក្រុងហុងកុងរក្សាបានសិទ្ធិកម្រិតខ្ពស់ពីប្រទេសចិនដីគោកនោះទេ នៅពេលគេមើលទៅលើស្ថានភាពជាក់ស្ដែងនាបច្ចុប្បន្ន” រដ្ឋមន្ត្រីការបរទេសអាមេរិកាំង លោក Mike Pompeo ប្រកាសបែបនេះពីទីក្រុងវ៉ាស៊ីងតោនកាលពីថ្ងៃទី27កន្លងទៅ។

“ខ្ញុំបានបញ្ជាក់ប្រាប់សភារួចហើយថា ហុងកុងលែងមានលក្ខខណ្ឌគ្រប់គ្រាន់ដើម្បីទទួលបានការប្រព្រឹត្តិទៅតាមច្បាប់ដែលសហរដ្ឋអាមេរិកបានចាប់ផ្ដើមអនុវត្តសម្រាប់ហុងកុងនៅមុនខែកក្កដា1997” លោក Pompeo ថ្លែងរំឭកដល់សម័យកាលដែលទីក្រុងហុងកុងត្រូវបានប្រគល់ត្រឡប់ទៅប្រទេសចិន។

កាលពីចុងឆ្នាំមុន សហរដ្ឋអាមេរិកបានចេញច្បាប់ “ប្រជាធិបតេយ្យនិងសិទ្ធិមនុស្សហុងកុង” ដែលតម្រូវឱ្យរដ្ឋមន្ត្រីការបរទេសអាមេរិកាំងត្រូវតែបញ្ជាក់ឱ្យច្បាស់ថា “តើហុងកុងនៅរក្សាបានសិទ្ធិម្ចាស់ការដែរឬទេ” ដើម្បីសម្រេចថាគួរឱ្យទីក្រុងនេះទទួលបានអត្ថប្រយោជន៍ ឬការលើកស្ទួយផ្នែកពាណិជ្ជកម្មពីសហរដ្ឋអាមេរិកទៀតឬអត់។

រដ្ឋមន្ត្រីការបរទេសអាមេរិកាំង លោក Mike Pompeo

ប្រការដែលហុងកុងទទួលបានការលើកស្ទួយពីសហរដ្ឋអាមេរិកមានដូចជា អាចទិញបច្ចេកវិទ្យាសំខាន់ៗ ការធានាអំពីការជួញដូរដោយសេរីរវាងប្រាក់ដុល្លារអាមេរិកាំង និងដុល្លារហុងកុង ការចរចាអំពីកិច្ចព្រមព្រៀងពាណិជ្ជកម្ម និងវិនិយោគដោយឯករាជ្យពីទីក្រុងប៉េកាំង។ ស្ថានភាពពិសេសខាងលើនេះក៏បានជួយឱ្យពលរដ្ឋហុងកុងជៀសវាងការរឹតត្បិតទិដ្ឋាការដែលអាមេរិកាំងអនុវត្តចំពោះពលរដ្ឋចិនដីគោកផងដែរ។

ការអនុគ្រោះទាំងឡាយដែលបានរៀបរាប់ខាងលើនេះ នឹងត្រូវបានប្រធានាធិបតីអាមេរិកាំង លោក Donald Trump សម្រេចថា គួរដកហូតការអនុគ្រោះនេះដែរឬអត់នាពេលឆាប់ៗខាងមុខ។ លោក Trump កាលពីម្សិលមិញបានព្រមានថា សហរដ្ឋអាមេរិកនឹងមានវិធានការប្រតិកម្មយ៉ាងខ្លាំងក្លាចំពោះច្បាប់សន្តិសុខហុងកុងដែលចិនគ្រោងនឹងអនុវត្ត។ វិធានការរបស់លោក Trump នឹងត្រូវបានប្រកាសនៅសប្ដាហ៍ក្រោយ។

សេចក្ដីព្រាងច្បាប់សន្តិសុខហុងកុងនេះ តាមគម្រោងនឹងត្រូវអនុម័តជាផ្លូវការនៅថ្ងៃទៅ28ឧសភាខាងមុខ ដែលជាថ្ងៃបិទបញ្ចប់កិច្ចប្រជុំប្រចាំឆ្នាំរបស់សភាចិន។ ច្បាប់នេះនឹងហាមមិនឱ្យមានសកម្មភាពផ្ដាច់ខ្លួន និងអំពើរដ្ឋប្រហារ ក៏ដូចជាការជ្រៀតជ្រែកពីបរទេស និងការធ្វើភេរវកម្មក្នុងទីក្រុង៕

ប្រភព៖ សារព័ត៌មានបរទេស

May 28, 2020

អាយុ17ឆ្នាំ បង្កើតបានគេហទំព័រតាមដាន COVID-19! គេស្នើផ្សាយពាណិជ្ជកម្មតម្លៃ 8លានដុល្លារ នៅតែបដិសេធ

សិស្សមធ្យមសិក្សាម្នាក់ មានអាយុ17ឆ្នាំ នៅសហរដ្ឋអាមេរិក បង្កើតបានគេហទំព័រមួយដើម្បីជួយឱ្យអ្នករាល់គ្នា តាមដានស្ថានការណ៍របស់ COVID-19 នៅទូទាំងពិភពលោក។ គេហទំព័រនេះកំពុងតែមានភាពល្បីល្បាញខ្លាំង រហូតដល់មានក្រុមហ៊ុនខ្លះត្រៀមចំណាយប្រាក់8លានដុល្លារដើម្បីបានផ្សាយពាណិជ្ជកម្ម ប៉ុន្តែ កុមាររូបនេះមិនយល់ព្រម។

Avi Schiffmann រស់នៅក្នុងតំបន់ Seattle នៃរដ្ឋវ៉ាស៊ីងតោន សហរដ្ឋអាមេរិក បច្ចុប្បន្នសិក្សានៅសាលាមធ្យមសិក្សា Mercer Island។ តាំងពីតូច Avi Schiffmann ចូលចិត្តកុំព្យូទ័រខ្លាំងណាស់ ដោយសារតែទទួលឥទ្ធិពលពីការងារជាអ្នកសរសេរកូដកម្មវិធីកុំព្យូទ័ររបស់ឪពុក។

កាលពីប៉ុន្មានខែមុន Avi Schiffmann បង្កើតបានគេហទំព័រមួយដែលមានអាសយដ្ឋាន ncov2019.live ប្រើប្រាស់ដើម្បីប្រមូលព័ត៌មានទាក់ទិននឹងស្ថានការណ៍នៃវីរុសCOVID-19 ពីបណ្ដាប្រទេស ក៏ដូចជាពីអង្គការសុខភាពពិភពលោក WHO ព្រមទាំងអាចធ្វើបច្ចុប្បន្នភាពនៃតួលេខអ្នកជំងឺ អ្នកបានជាសះស្បើយ និងអ្នកបានស្លាប់ដោយសារវីរុសCOVID-19។ល។

Avi បានចំណាយកម្លាំងកាយ ចិត្ត និងពេលវេលាជាច្រើនដើម្បីរក្សាគេហទំព័រនេះឱ្យដំណើរការបានល្អ ក៏ដូចជាដោះស្រាយបញ្ហាពាក់ព័ន្ធ។ កុមាររូបនេះបានប្រាប់អ្នកយកព័ត៌មានរបស់ Bussiness Insider ថា មកដល់ពេលនេះ Avi បានចំណាយពេលរាប់រយម៉ោងដើម្បីសរសេរកូដ និងដំណើរការគេហទំព័រនេះ ហើយមានពេលមួយនោះ Avi ត្រូវធ្វើការរយៈពេលប្រហែល50ម៉ោងជាប់ៗគ្នាទៀតផង។

គេហទំព័រនេះ ត្រូវបានបង្កើតឡើងដើម្បីធ្វើបច្ចុប្បន្នភាពនៃស្ថានការណ៍របស់ COVID-19 ដូច្នេះ ពេលណាក៏មានអ្នកចូលមើល។ ពេលគេហទំព័រជួបបញ្ហាក្នុងពេលគាត់កំពុងគេង ពេលភ្ញាក់ដឹងខ្លួន Avi តែងតែឃើញសារផ្ដល់ដំណឹងរាប់ពាន់ ដូច្នេះ Avi មានអារម្មណ៍ថា ខ្លួនមានភារកិច្ចធំធេងចំពោះកិច្ចការនេះ។

គេហទំព័រ ncov2019.live ទទួលបានអ្នកចូលមើលប្រមាណជា30លាននាក់ក្នុងមួយថ្ងៃៗ ហើយបើគិតមកដល់បច្ចុប្បន្ន គេហទំព័រនេះមានអ្នកចូលមើលជាង700លានលើក។ ដូច្នេះ វាជារឿងធម្មតា នៅពេលមានក្រុមហ៊ុនខ្លះចង់ចំណាយប្រាក់ដើម្បីបានផ្សាយពាណិជ្ជកម្មនៅលើគេហទំព័រនេះ។

អាយុ17ឆ្នាំ បង្កើតបានគេហទំព័រតាមដាន COVID-19! គេស្នើផ្សាយពាណិជ្ជកម្ម8លានដុល្លារ នៅតែបដិសេធ

Avi បានឱ្យដឹងថា ធ្លាប់មានគេស្នើជួលឱ្យផ្សាយពាណិជ្ជកម្មនៅលើ ncov2019.live របស់គាត់ក្នុងតម្លៃឡើងដល់8លានដុល្លារ ក៏ប៉ុន្តែ Avi បានបដិសេធ។ បើសិនជាទទួលការផ្សាយពាណិជ្ជកម្ម Avi អាចរកបានដល់ទៅ30លានដុល្លារឯណោះ។ ប៉ុន្តែ កុមាររូបនេះនិយាយថា ការរកប្រាក់មិនមែនជាគោលបំណងនៃការបង្កើតគេហទំព័រនេះនោះទេ។

Avi ថ្លែងថា “ប្អូនទើបតែមានអាយុ17ឆ្នាំ ប្អូនមិនត្រូវការ8លានដុល្លារនោះឡើយ។ល។ ប្អូនមិនចង់មានឈ្មោះថាជាមនុស្សឃើញតែប្រាក់នោះទេ”។

ក្រៅពីនេះ Avi ក៏បានឱ្យដឹងថា មូលហេតុផ្សេងមួយទៀតដែលនាំឱ្យប្អូនបដិសេធ8លានដុល្លារនេះ នោះគឺ Avi មិនចង់ឃើញឃ្លីបវីដេអូផ្សាយពាណិជ្ជកម្មលោតឡើងនៅលើគេហទំព័ររបស់ខ្លួន ព្រោះថា Avi មិនអាចគ្រប់គ្រងវាបាន។ Avi មិនចង់ថែរក្សាគេហទំព័រដោយការចុះកិច្ចសន្យាជាមួយក្រុមហ៊ុនផ្សាយពាណិជ្ជកម្ម ឬត្រូវទទួលយកអ្វីដែលខ្លួនមិនចូលចិត្តនោះដែរ។

Avi និយាយថា មានអ្នកអានជាច្រើនមកពីបណ្ដាប្រទេសដែលមានល្បឿនអ៊ីនធើណិតមិនសូវបានលឿន ហើយបើសិនជាដាក់ឃ្លីបវីដេអូផ្សាយពាណិជ្ជកម្មទៀត វានឹងកាន់តែធ្វើឱ្យគេហទំព័រត្រូវដើរយឺតមិនខាន។ ក៏ប៉ុន្តែ Avi ក៏បានផ្ដល់ជម្រើសមួយដល់សប្បុរសជនផងដែរ នោះគឺការដាក់ប៊ូតុង “បរិច្ចាគ” នៅលើគេហទំព័រនេះ ដើម្បីងាយស្រួលដល់ការគាំទ្រពីសំណាក់អ្នកចិត្តល្អ។

Avi ទទួលបានការអញ្ជើញឱ្យចូលធ្វើការនៅក្នុងក្រុមហ៊ុនជាច្រើនដោយសារតែជោគជ័យរបស់គេហទំព័រខាងលើ ក្នុងនោះក៏មាន Microsoft ផងដែរ។ ប៉ុន្តែ បច្ចុប្បន្ន Avi មិនទាន់ចង់ធ្វើការនៅឡើយ។ កុមាររូបនេះមានផែនការផ្ទាល់ខ្លួន និងមានកិច្ចការជាច្រើនដែលចង់ធ្វើ ពិសេសគឺកិច្ចការដែលមានការរួមផ្សំរវាងវិស័យវិទ្យាសាស្ត្របច្ចេកវិទ្យា និងវិស័យវេជ្ជសាស្ត្រ៕

ប្រភព៖ សារព័ត៌មានបរទេស

May 27, 2020

(វីដេអូ) ឧទ្ធម្ភាគចក្រគ្មានមនុស្សបើករបស់ចិន ហោះហើរសាកល្បងដោយជោគជ័យជាលើកដំបូង នៅ Jiangxi

ឧទ្ធម្ភាគចក្រ AR500C ដែលត្រូវបានផលិតឡើងដោយក្រុមហ៊ុនរបស់ប្រទេសចិន មានចំណុះអតិបរមា5តោន នឹងត្រូវបានប្រើប្រាស់ក្នុងការបំពេញបេសកកម្មស្វែងរក សង្គ្រោះអគ្គិភ័យ និងដឹកជញ្ជូន។

កាលពីថ្ងៃទី20ឧសភា នៅឯខេត្ត Jiangxi ប្រទេសចិន ឧទ្ធម្ភាគចក្រគ្មានមនុស្សបើក AR500C បានទទួលជោគជ័យក្នុងការហោះហើរជាលើកដំបូងក្នុងរយៈពេល20នាទី។

ឧទ្ធម្ភាគចក្រ AR500C នេះ ត្រូវបានរចនានិងផលិតឡើងដោយក្រុមហ៊ុនឧស្សាហកម្មអាកាសចរណ៍ចិន AVIC (Aviation Industry Corporation of China)។ ជាមួយនឹងសមត្ថភាពផ្ទុកបានរហូតដល់5តោន AR500C អាចហោះឡើងដល់កម្ពស់5,000ម៉ែត្រ និងហោះបានរយៈពេល6ម៉ោងជាប់ៗគ្នា បន្ទាប់ពីមានថាមពលគ្រប់គ្រន់។ ល្បឿនអតិបរមារបស់ឧទ្ធម្ភាគចក្រ AR500C គឺ170គីឡូម៉ែត្រ/ម៉ោង ខណៈដែលល្បឿនក្នុងការហោះហើរល្បាត ស្មើ165គីឡូម៉ែត្រ/ម៉ោង។

ក្រោយពីហោះហើរសាកល្បងដោយជោគជ័យ AR500C នឹងត្រូវបានដាក់ឱ្យប្រើប្រាស់សម្រាប់ជួយដល់បេសកកម្មរុករក គ្រប់គ្រងសន្តិសុខ សង្គ្រោះអគ្គិភ័យ និងដឹកជញ្ជូន៕

ប្រភព៖ សារព័ត៌មានបរទេស

May 27, 2020

តើវាសនាប្រជាជនហុងកុង នឹងទៅជាយ៉ាងណា នៅពេលហុងកុង កំពុងវិលទៅរកដានចាស់ម្ដងទៀត…

ប្រជាជនហុងកុងមួយចំណែក បានវិលត្រឡប់មករកបរិយាកាសដូចកាលពីមុន នោះគឺការជួបជុំគ្នាធ្វើបាតុកម្មប្រឆាំងតវ៉ាទាំងអ្នកគ្រប់គ្រងតំបន់គ្រប់គ្រងពិសេសមួយនេះ និងរដ្ឋភិបាលចិនដោយផ្ទាល់ ឯប្រធានបទថ្មីលើកនេះ គឺការចេញមកប្រឆាំងនឹងសេចក្ដីព្រាងច្បាប់ស្ដីពីសន្តិសុខជាតិ លើទីក្រុងហុងកុង ដែលរួមទាំងតំបន់កៅលូនផងដែរ។

អំឡុងចុងសប្ដាហ៍កន្លងទៅ គឺជាការចាប់ផ្ដើម…មានមនុស្សមកចូលរួមមិនច្រើនប៉ុន្មានឡើយ ភាគច្រើនជាមនុស្សក្នុងវ័យធ្វើការ ដែលព្រួយបារម្ភពីអនាគតរបស់ខ្លួនឯង ព្រោះ 27ឆ្នាំទៀតចាប់ពីពេលនេះទៅ ហុងកុងនឹងឈានចូលទៅនៅក្រោមការគ្រប់គ្រងរបស់ចិនយ៉ាងពេញរូបបែប មិនខុសពីចិនដីគោកឡើយ។

អ្នកចូលរូលរួមការជំនុំតវ៉ា បានពាក់ម៉ាស់ការពារឧស្ម័នបង្ហូរទឹកភ្នែក និងមេរោគកូវីដ-19 ដែលលែងសូវរាតត្បាតប៉ុន្មានហើយ ដោយមានអ្នកឆ្លងមេរោគត្រឹមតែជាង 1,066នាក់ប៉ុណ្ណោះ និងមានអ្នកស្លាប់តែ 4នាក់ ដែលចំនួននេះអាចរាប់បានថា តិចខ្លាំងណាស់ ទាំងដែលខ្លួននៅជាប់នឹងប្រទេសចិនដីគោក ដែលជាប្រភពកំណើតនៃការឆ្លងរាលដាល នេះគឺដោយសារតែអ្នកគ្រប់គ្រងតំបន់ហុងកុង គ្រប់គ្រងចាត់ការបានល្អហ្នឹងឯង។

ប្រជាជនហុងកុង មានបទពិសោធជាមួយនឹងការឆ្លងរាលដាលរបស់ជំងឺគ្រុនផ្ដាសាយបក្សី ជំងឺសារស៍ និងជំងឺផ្សេងៗទៀត ដែលឆ្លងមកពីចិនដីគោក ដូច្នេះហើយទើបការពាក់ម៉ាស់អនាម័យការពារ បានក្លាយជារឿងប្រក្រតី ដែលអ្នកហុងកុងត្រូវតែការពារខ្លួនឯង ក្រោមសភាវការរស់នៅដ៏ចង្អៀតណែននៅក្នុងអគារចាស់ៗ ដូចជានៅក្នុងតំបន់ម៉ុងកុក ជាដើម។

គ្រាន់តែការជំនុំតវ៉ាថ្ងៃដំបូង អាជ្ញាធរត្រូវបាញ់ឧស្ម័នបង្ហូរទឹកភ្នែកដើម្បីរំសាយហ្វូងបាតុករ និងមានការប៉ះទង្គិចខ្លះៗនៅថ្ងៃអាទិត្យ អាចនិយាយបានថា ជាការបន្ថែមគ្រោះលើទីក្រុងហុងកុង ដែលបានទទួលផលប៉ះពាល់យ៉ាងធ្ងន់ធ្ងរអស់ជាច្រើនខែមកហើយ…ធុរកិច្ចត្រូវបិទ សេដ្ឋកិច្ចស្ងប់ស្ងាត់ ជើងហោះហើរ សណ្ឋាគារ និងទេសចរណ៍សឹងតែរលាយបាត់អស់។

ហេតុការណ៍បាតុកម្មតវ៉ា កាលពីឆ្នាំកន្លងទៅ ត្រូវបានបញ្ចប់ដោយសារការឆ្លងរាតត្បាតរបស់មេរោគកូវីដ-19 ធុរកិច្ចត្រូវបិទទ្វារ ប្រជាជនហុងកុងត្រូវបង្ខាំងខ្លួនឯងនៅក្នុងផ្ទះ មានន័យថា ដោយសារការប្រឆាំងតវ៉ាយ៉ាងខ្លាំងក្លា តាមមកដោយការឆ្លងរាតត្បាតរបស់មេរោគ មនុស្សចំនួនដ៏ច្រើនបានភៀសខ្លួនចេញកាលពីពេលមុនហ្នឹង…ពេលបានឃើញហើយ អស់សង្ឃឹមតែម្ដង!!។

នៅពេលមកចាប់ផ្ដើមការជំនុំតវ៉ាជាថ្មី ឱកាសដែលហុងកុងនឹងស្ដារខ្លួនបានឡើងវិញ ស្ទើរតែមើលមិនឃើញ នៅពេលដែលរដ្ឋបាលចិន ប្រុងចេញច្បាប់ដែលគ្រប់គ្រង និងការពារការក្បត់ ការបំផុសបំផុលពន្យុះ ការបែងចែកទឹកដី និងការបង្កអសន្តិសុខ អាចនិយាយបានថា នេះជាថ្នាំខ្លាំងមួយដែលប្រជាជនហុងកុងមិនអាចទទួលយកបាន។

កាលពី 13ឆ្នាំមុន បានកើតមានការព្យាយាមចេញច្បាប់ហាមបំផុសបំផុល តែត្រូវលុបចោលទៅវិញនៅពេលមានបាតុកម្មតវ៉ា។ ឆ្នាំកន្លងទៅ អ្នកគ្រប់គ្រងទីក្រុងហុងកុង បម្រុងនឹងចេញច្បាប់បញ្ជូនជនល្មើសឆ្លងព្រំដែន ដែលបានក្លាយជាដើមកំណើតនៃការធ្វើបាតុកម្មតវ៉ាប្រឆាំងយ៉ាងខ្លាំងក្លា ដោយទាំងសងខាងមិនព្រមបន្ធូរបន្ថយឥរិយាបថទាល់តែសោះ។

លទ្ធផលចុងក្រោយ គណៈគ្រប់គ្រង បានយល់ព្រមមួយកម្រិត តែក្រុមអ្នកប្រឆាំងតវ៉ា មើលឃើញថា មិនយូរមិនឆាប់ នឹងមានការព្យាយាមធ្វើបែបនោះជាថ្មីម្ដងទៀតមិនខាន រួចហើយពេលនេះក៏បានបង្ហាញយ៉ាងច្បាស់ចេញមកថា លើកនេះចេញមកពីសភាប្រជាជនចិន ដែលកំពុងប្រជុំអនុម័តសេចក្ដីព្រាងច្បាប់ថ្មីមួយ ដែលធ្វើឱ្យសហរដ្ឋអាមេរិក និងប្រទេសផ្សេងទៀត ចូលរួមប្រឆាំងផងដែរ។

Chris Patten, Hong Kong’s last British governor

មានការថ្លែងការណ៍ ដោយអតីតអភិបាលក្រុងហុងកុង លោក គ្រិស ភែតថេន អ្នកនយោបាយជើងចាស់អង់គ្លេស និងជនល្បីៗឈ្មោះមកពី 23ប្រទេស ជាពិសេសអ្នកនយោបាយរបស់សហរដ្ឋអាមេរិក ដែលបានអាងថា ចិនបានល្មើសកិច្ចព្រមព្រៀងក្នុងរឿងការប្រគល់-ទទួលកោះហុងកុងកាលពីឆ្នាំ1997 និងវាជារឿងដែលគួរឱ្យមានកង្វល់យ៉ាងខ្លាំង។

សហរដ្ឋអាមេរិក ខ្លាំងក្លាជាងគេ កន្លងមកក៏អនុម័តច្បាប់ឃុំគ្រងស្ដីពីសិទ្ធិសេរីភាពរបស់ប្រជាជនហុងកុង លើកនេះក៏ព្រមានចិនទៀតថា នឹងរងទទួលការឆ្លើយតបខ្លាំងៗ ដែលអាចជារនាំងពន្ធភាស៊ីដែលខ្ពស់ជាងមុន សម្រាប់មុខទំនិញនាំចូលពីចិន ដែលអ្នកដឹកនាំចិនប្រហែលជាមិនខ្វល់ឡើយ ព្រោះមើលឃើញថា វាជាការជ្រៀតជ្រែកផ្ទៃក្នុងយ៉ាងច្បាស់ក្រឡែត។

សហរដ្ឋអាមេរិក មិនមែនរឹងមាំ អាចបញ្ជាអ្នកណាបានដូចមុនឡើយ ក្រុមប្រទេសអឺរ៉ុប ក៏មិនបានស្ថិតក្រោមការចង្អុលបញ្ជា ឬជាកូនឈ្នួលរបស់អាមេរិកដូចកាលពីមុនដែរ រឹតតែមានមេដឹកនាំសេតវិមានរបៀបលោកដូណាល់ ត្រាំផងនោះ បណ្ដាមេដឹកនាំប្រទេសលោកខាងលិច ស្ទើរតែមិនផ្ដល់ការគោរពរាប់អាន ឬជឿជាក់ទៀតផង។

អាចមានតែប្រទេសអូស្ត្រាលី ឬអង់គ្លេស ឬក្រុមប្រទេសដែលនិយាយភាសាអង់គ្លេសប៉ុណ្ណោះ ដែលនៅផ្ដល់តម្លៃឱ្យលោក ត្រាំ ព្រោះនៅរាប់ថា ជាមេដឹកនាំក្នុងក្រុមប្រទេស “5ភ្នែក” ដែលរួមមាន កាណាដា អូស្ត្រាលី នីវហ្ស៊ីលែនដ៍ ដែលនៅចែករំលែកទិន្នន័យ និងព័ត៌មានសម្ងាត់សំខាន់ផ្សេងៗពាន់ព័ន្ធនឹងសន្តិសុខជាតិ។

បើសិនប្រទេសណាមួយ បែកឆ្វេង ច្បាស់ជានឹងបានឮពាក្យគំរាមពីលោក ត្រាំ ដូចដែលប្រទេសអូស្ត្រាលី ក៏ធ្លាប់បានជួប ក្រោយពីត្រូវរងការព្រមានពីសហរដ្ឋអាមេរិកថា មានចំណែករួមក្នុងគ្រោងការ “ខ្សែក្រវាត់1 ផ្លូវ1” របស់ចិន ហើយអូស្ត្រាលីក៏ត្រូវចិនចាត់ការដែរ ដោយសារតែកាលពីពេលមុននោះ បានដើរតាមគូទសហរដ្ឋអាមេរិក។

អូស្ត្រាលី គឺជាអ្នកនាំអាទិ៍ដ៏សំខាន់ ឱ្យអង្គការសុខភាពពិភពលោក និងសហគមន៍ពិភពលោករៀបចំការប្រជុំស៊ើបអង្កេតរឿងដើមកំណើតនៃការឆ្លងរាលដាលរបស់កូវីដ-19 ដោយបានចង្អុលទៅរកប្រទេសចិន តែបណ្ដាប្រទេសក្នុងអឺរ៉ុបមិនមានឥរិយាបថម៉ឺងម៉ាត់ ទើបធ្វើឱ្យចិនបញ្ជាឱ្យដំឡើងថ្លៃភាស៊ីពន្ធនាំចូលស្រូវបាលេយ៍ពីប្រទេសអូស្ត្រាលី ជាការព្រមាន។

Australia’s Prime Minister Scott Morrison

ដូច្នេះ ការបញ្ចេញសំឡេងខ្លាំងៗពីប្រទេសណាមួយ ជាពិសេសសហរដ្ឋអាមេរិក ប្រហែលជាគ្មានផលអីធ្វើឱ្យចិនត្រូវដកថយពីការជំរុញសេចក្ដីព្រាងច្បាប់ស្ដីពីសន្តិសុខជាតិនេះឡើយ រឹតតែលោក ស៊ី ជីន ភីង មានអំណាច និងមានស្នាដៃល្អខាងការបញ្ឈប់ការឆ្លងរាតត្បាតរបស់មេរោគផងនោះ រឹតតែធ្វើឱ្យលែងមានក្ដីកង្វល់ច្រើន ក្នុងរឿងសំឡេងគាំទ្រដែលសំខាន់ៗឡើយ។ ចិនមើលឃើញថា ខ្លួនឯងត្រូវសហរដ្ឋអាមេរិក វាយប្រហារមកយូរហើយរឿងរនាំងភាស៊ីពន្ធ ធ្វើឱ្យសេដ្ឋកិច្ចទូទាំងពិភពលោកមានបញ្ហា និងត្រូវញាំញីបន្ថែមដោយការរាតត្បាតរបស់មេរោគកូវីដ-19ទៀត បើសិនជាចុះចាញ់សហរដ្ឋអាមេរិក ប្រហែលជានឹងធ្វើឱ្យបាត់បង់ស្ថានភាព ធ្វើឱ្យប្រជាជនក្រុងហុងកុងបានចិត្ត និងរកវិធីទាមទារមិនចេះចប់ មិនចេះហើយមិនខាន។

ព្រោះទោះជាយ៉ាងណា ហុងកុងក៏នៅតែស្ថិតក្រោមអំណាចចិនដដែល គ្មានផ្លូវរួចខ្លួនទៅណាទេ និងក៏មានទស្សនៈមួយថា បើជនជាតិចិនជាង 1.3ពាន់លាននាក់រស់នៅបាន គ្មានបញ្ហា គ្មានរឿងច្រើនផ្នែកសិទ្ធិសេរីភាព ហើយចិនក៏អភិវឌ្ឍទៅមុខយ៉ាងខ្លាំងដែរនោះ ហេតុអីបានប្រជាជនហុងកុងដែលមានមិនលើស 7លាននាក់ផងនោះ មិនចុះចាញ់?!។

ឃើញសភាពបែបនេះហើយ មនុស្សវ័យកំលោះក្រមុំហុងកុង ប្រហែលជាមើលឃើញហើយថា 27ឆ្នាំទៀតចាប់ពីពេលនេះទៅ ខ្លួនឯងនឹងមិនខុសអ្វីពីជនជាតិចិននៅដីគោក និងប្រហែលជាត្រូវដឹងថា ការរើបម្រះក្នុងគ្រានេះ អាចជាដង្ហើមចុងក្រោយ និងមិនបានទទួលការគាំទ្រច្រើនដូចកាលពីគ្រាកន្លងមកឡើយ ព្រោះការធ្វើបាតុកម្មតវ៉ា ធ្វើឱ្យសេដ្ឋកិច្ចធ្លាក់ចុះយ៉ាប់យ៉ឺន។

បាប់ពីពេលនេះទៅ ត្រូវតាមមើលថា តើនឹងមានអ្នកចូលរួមច្រើន និងមានភាពខ្លាំងក្លា មានការប៉ះទង្គិច ឬមានការដុតបំផ្លាញដែរឬទេ? និងត្រូវតាមមើលថា តើចិននឹងបញ្ជូនកងកម្លាំងចូលមកជួយប៉ូលិសហុងកុង ដើម្បីគ្រប់គ្រងស្ថានការណ៍ដែរឬទេ?។ គ្រានេះ គឺជាការប្រឈមមុខដោយផ្ទាល់រវាងរដ្ឋាភិបាលចិន និងប្រជាជនហុងកុង…។

តែ…គណៈគ្រប់គ្រងទីក្រុងហុងកុង អាចនឹងលួចដកដង្ហើមធំមិនខាន ព្រោះគ្រានេះ រដ្ឋាភិបាលចិនប្រឡូកដោយខ្លួនឯង!!

ប្រភព៖ សារព័ត៌មានបរទេស

ប្រែសម្រួលដោយ តាវ៉ែនតា

May 27, 2020

លោក ស៊ី ជីនភីង ស្នើឱ្យកងទ័ពត្រៀមខ្លួនសម្រាប់ធ្វើសង្គ្រាម

ប្រធានាធិបតីចិន បានទទួលស្គាល់ថា COVID-19 កំពុងធ្វើឱ្យប៉ះពាល់ដល់កងទ័ព ប៉ុន្តែ លោក ស៊ី ជីនភីង នៅតែស្នើឱ្យកងទ័ពចិនជម្នះឧបសគ្គ និងត្រៀមខ្លួនជាស្រេចក្នុងការប្រយុទ្ធ។

“យើងត្រូវការស្វែងរកវិធីសាស្ត្រថ្មីៗដើម្បីហ្វឹកហាត់ និងត្រៀមជាស្រេចក្នុងការធ្វើសង្គ្រាម ព្រោះថា ការខិតខំក្នុងការប្រយុទ្ធប្រឆាំងនឹងមេរោគរាតត្បាតបានក្លាយជាបញ្ហាធម្មតាទៅហើយ។ យើងក៏ត្រូវការត្រៀមខ្លួនសម្រាប់ជម្លោះប្រដាប់អាវុធ ចាប់ផ្ដើមធ្វើការហ្វឹកហាត់ជាក់ស្ដែងក្នុងការប្រយុទ្ធប្រកបដោយភាពបត់បែន បង្កើនសមត្ថភាពដើម្បីធ្វើប្រតិបត្តិការយោធា” មេដឹកនាំប្រទេសចិន លោក ស៊ី ជីនភីង មានប្រសាសន៍បែបនេះកាលពីម្សិលមិញ ខណៈដែលលោកចូលជួបក្រុមមន្ត្រីទាហាននៅខាងក្រៅសម័យប្រជុំប្រចាំឆ្នាំនៅទីក្រុងប៉េកាំង។

លោក ស៊ី ជីនភីង ដែលជាប្រធានគណៈកម្មាធិការយោធាមជ្ឈិមដែរនោះ បានទទួលស្គាល់ថា COVID-19 បង្កផលប៉ះពាល់ និងឧបសគ្គច្រើនដល់កងទ័ព ប៉ុន្តែ ការរួមផ្សំរវាងវិស័យយោធា ស៊ីវិល និងនយោបាយនៅប្រទេសចិន បានក្លាយជាប្រយោជន៍ក្នុងការដោះស្រាយវិបត្តិនេះ។

ជំនួបនៅខាងក្រៅសម័យប្រជុំសភាប្រចាំឆ្នាំរវាងលោក ស៊ី ជីនភីង និងមន្ត្រីកងទ័ពរំដោះប្រជាជនចិន PLA (People’s Liberation Army) ត្រូវបានធ្វើឡើងបន្ទាប់ពីទីក្រុងប៉េកាំងប្រកាសបង្កើនថវិកាសម្រាប់វិស័យយោធាចំនួន6.6% ដែលស្មើនឹង 1.268លានលានយន់ (ជាង178ពាន់លានដុល្លារអាមេរិក) បន្ថែមទៀត ដែលខ្ទង់ប្រាក់នេះ មានចំនួនតិចបំផុតក្នុងរយៈពេល10ឆ្នាំមកនេះ។

តារាងថវិកា និងការបង្កើនការចំណាយសម្រាប់វិស័យយោធារបស់ចិនក្នុងដំណាក់កាលពីឆ្នាំ2011-2020 (រូបភាព៖ Global Times)

អ្នកនាំពាក្យក្រសួងការពារជាតិចិន លោក Wu Qian បានឱ្យដឹងថា ប្រទេសនេះកំពុងប្រឈមនឹងការគំរាមកំហែងផ្នែកសន្តិសុខកាន់តែធ្ងន់ធ្ងរ ពិសេសគឺពីបក្សកាន់អំណាចនៅកោះតៃវ៉ាន់។ លោក Wu Qian ថ្លែងថា “រដ្ឋអំណាចរបស់បក្សប្រជាធិបតេយ្យជឿនលឿន (Democratic Progressive Party) កំពុងតែពឹងផ្អែកលើកម្លាំងបរទេស និងឆ្ពោះទៅមុខនៅលើផ្លូវផ្ដាច់ខ្លួន នាំឱ្យស្ថានការណ៍កាន់តែគួរឱ្យព្រួយបារម្ភ”។

លោក Wu Qian បន្ថែមថា ប្រទេសចិនថែមទាំងប្រឈមមុខទៅនឹងហានិភ័យ និងឧបសគ្គថ្មីចំពោះសន្តិសុខជាតិ រួមទាំងលទ្ធិឯកតោភាគីរបស់ប្រទេស “មួយចំនួន” បណ្ដាលឱ្យមានអសន្តិសុខអន្តរជាតិ និងការកើនឡើងនៃហានិភ័យទាក់ទិននឹងភូមិសាស្ត្រនយោបាយ។ អ្នកនាំពាក្យរូបនេះក៏យល់ថា ការគំរាមកំហែងផ្នែកសន្តិសុខ និងចលនាផ្ដាច់ខ្លួនក្នុងប្រទេសក៏កាន់តែបង្កភាពស្មុគស្មាញកាន់តែច្រើនឡើងៗផងដែរ។

លោក Wu Qian ថ្លែងថា “យើងត្រូវគិតអំពីសេដ្ឋកិច្ច ប៉ុន្តែនៅពេលពិនិត្យលើថវិកាការពារជាតិ យើងត្រូវតែគិតអំពីសន្តិសុខជាចម្បង”។

សហរដ្ឋអាមេរិក ថ្មីៗនេះក៏បានសម្ដែងការបង្កើនការគាំទ្រដល់តៃវ៉ាន់ ដែលជាកោះមួយត្រូវបានចិនចាត់ទុកជាផ្នែកមួយរបស់ខ្លួន ដោយរង់ចាំតែការបម្រួបបង្រួបប៉ុណ្ណោះ។ រដ្ឋាភិបាលរបស់លោក Donald Trump បានអនុម័តលើកិច្ចព្រមព្រៀងលក់អាវុធឱ្យកោះតៃវ៉ាន់ក្នុងទំហំទឹកប្រាក់180លានដុល្លារអាមេរិក។ ប្រធានាធិបតីអាមេរិកាំង ក៏បានថ្លែងថា លោកកំពុងរៀបចំយុទ្ធសាស្ត្រដើម្បីប្រឆាំងចិននៅក្នុងសប្ដាហ៍នេះ ទាក់ទិននឹង “សេចក្ដីព្រាងច្បាប់សន្តិសុខហុងកុង” ប៉ុន្តែ លោកមិនទាន់បង្ហើបឱ្យដឹងលម្អិតនៅឡើយ។

ចំណែកកោះតៃវ៉ាន់ឯណោះវិញ មេដឹកនាំ Tsai Ing-wen បានប្រកាសថា នឹងបង្កើនសមត្ថភាពយោធាដើម្បីការពារកោះនេះផងដែរ៕

ប្រភព៖សារព័ត៌មានបរទេស

May 27, 2020

ប្រធានាធិបតី ប្រទេសហ្វ៊ីលីពីន មិនទាន់ឱ្យសិស្សចូលរៀនទេ រង់ចាំរហូតទាល់តែមានវ៉ាក់សាំងប្រឆាំងកូវីដ-19សិន

លោកប្រធានាធិបតី រ៉ូឌ្រីកូ ឌូតឺតេ នៃប្រទេសហ្វ៊ីលីពីន បានប្រកាសយ៉ាងម៉ឺងម៉ាត់ថា លោកមិនអនុញ្ញាតឱ្យក្មេងៗត្រឡប់ទៅរៀនវិញទេ រហូតទាល់តែមានវ៉ាក់សាំងប្រឆាំងមេរោគកូរ៉ូណាប្រភេទថ្មី ឬកូវីដ–19 ជាមុនសិន បើទោះជាមានប្រទេសខ្លះ បានបើកទ្វារសាលារៀនឡើងវិញហើយក៏ដោយ។

លោក ឌូតឺតេ បានថ្លែងនៅក្នុងសេចក្ដីថ្លែងការណ៍មួយតាមរយៈស្ថានីយទូរទស្សន៍ជាតិ កាលពីពេលព្រលប់ថ្ងៃចន្ទ(ទី25 ឧសភា) ថា “ខ្ញុំមិនអនុញ្ញាតឱ្យបើកការបង្រៀនឡើងវិញទេ ព្រោះសាលារៀន ជាកន្លែងដែលសិស្សតែងនៅជិតស្និទ្ធ ប្រឡូកប្រឡែងគ្នា រហូតទាល់តែខ្ញុំប្រាកដក្នុងចិត្តថា ក្មេងៗរបស់យើងមានសុវត្ថិភាពពិតប្រាកដជាមុនសិន ដល់ពេលនោះ សឹមនិយាយគ្នាអំពីរឿងការបើកសាលារៀនឡើងវិញ…”។

ក្មេងៗថ្នាក់បឋម និងមធ្យមសិក្សា ច្រើនជាង 25លាននាក់ មានកំណត់វិលទៅសាលារៀនវិញក្នុងអំឡុងចុងខែសីហាខាងមុខ ក្រោយពីសាលាបានបញ្ឈប់ការបង្រៀនកាលពីខែមីនា ក្រោមស្ថានការណ៍នៃការឆ្លងរាលដាលរបស់មេរោគវីរុសកូរ៉ូណាប្រភេទថ្មី ដែលចាប់ផ្ដើមបន្ថយល្បឿនខ្លះៗហើយ នៅក្នុងប្រទេសហ្វ៊ីលីពីន នាពេលនេះ។

យ៉ាងណាក៏ដោយ លោកប្រធានាធិបតី ឌូតឺតេ បានប្រាប់ទៀតថា ភាពប្រថុយប្រថាន នៅមានច្រើននៅឡើយ ទោះជាមានការពន្យារពេលបើកសាលារៀនមួយរយៈពេលហើយក៏ដោយ “សម្រាប់ខ្ញុំ វ៉ាក់សាំងត្រូវមកមុនគេបង្អស់ បើវ៉ាក់សាំងត្រៀមរួចជាស្រេចហើយ ក៏អូខេ!”។

បច្ចុប្បន្ន នៅមិនទាន់មានវ៉ាក់សាំង ឬវិធីការណាមួយក្នុងការព្យាបាលអ្នកជំងឺកូវីដ-19 នៅឡើយ ទោះជាក្រុមអ្នកវិទ្យាសាស្ត្រទូទាំងពិភពលោកបានខិតខំព្យាយាមយ៉ាងមិនដែលធ្លាប់ធ្វើបែបហ្នឹងពីមុនមក ក្នុងការអភិវឌ្ឍវ៉ាក់សាំងឱ្យបានយ៉ាងឆាប់រហ័សយ៉ាងណាក៏ដោយ ដែលរហូតមកដល់ពេលនេះ នៅមិនទាន់ច្បាស់ការណ៍នៅឡើយថា តើពេលណាដែលវ៉ាក់សាំងនីមួយៗ នឹងឆ្លងកាត់ការពិសោធហើយថា អាចប្រើការបានលទ្ធផលល្អពិតប្រាកដ ឬតើនៅពេលណា ទើបវាត្រៀមរួចរាល់សម្រាប់ចែកចាយនៅក្នុងតំបន់យ៉ាងទូលំទូលាយ?។

រហូតមកដល់ថ្ងៃអង្គារម្សិលមិញ(ទី26 ឧសភា) ប្រទេសហ្វ៊ីលីពីន រកឃើញអ្នកឆ្លងមេរោគរួចហើយ 14,669នាក់ ក្នុងនោះស្លាប់ 886នាក់។

ទីក្រុងម៉ានីល និងតំបន់ផ្សេងៗដែលមានភាពប្រថុយប្រថានខ្ពស់ កំពុងស្ថិតក្រោមវិធានការបិទទីក្រុងបែបបន្ធូរបន្ថយមកតាំងពីថ្ងៃទី30 មេសា ដែលបានអនុញ្ញាតឱ្យឧស្សាហកម្មមួយចំនួន និងផ្នែកឯកជនខ្លះ ត្រឡប់មកបើកដំណើរការវិញយ៉ាងមានកំណត់ខ្លះៗហើយ។

សម្រាប់សាលារៀនរបស់រដ្ឋវិញ មានវេនរៀនចាប់តាំងពីខែមិថុនា រហូតដល់ខែមេសា នៅក្នុងប្រទេសហ្វ៊ីលីពីន តែអាជ្ញាធរបានពន្យារពេលការបើកបវេសនកាលឱ្យទៅចាប់ផ្ដើមនៅថ្ងៃទី24 សីហាវិញ ក្រោយពីរកឃើញអ្នកឆ្លងមេរោគបន្ថែមឡើងទៀតជារឿយៗ និងវិធានការបិទទីក្រុងដ៏ម៉ឺងម៉ាត់ បានធ្វើឱ្យប្រទេសមួយនេះស្ថិតក្នុងសភាវនៅទ្រឹងមួយកន្លែង។

តែយ៉ាងណាក៏ដោយ ក្រសួងសិក្សាធិការ បានបញ្ជាក់ថា ការបើករៀនឡើងវិញ អាចមិនចាំបាច់ត្រូវរៀនបែបជួបគ្នាដោយផ្ទាល់នៅក្នុងបន្ទប់រៀន ដូចកាលពីមុនក៏បានដែរ។

ទាំងអស់នេះ ដើម្បីកុំឱ្យបន្ទប់រៀនចង្អៀតណែនជ្រុលពេក ក្រសួងសាធារណៈសុខាភិបាល បានថ្លែងការណ៍ ឱ្យប្រើវិធានការបង្រៀន និងរៀនពីចម្ងាយតាមបែបផ្សេងៗ ដោយក្នុងនោះរួមទាំងការរៀនតាមអនឡាញ ដែលអាចប្រើសម្រាប់ការរៀន និងការបង្រៀនក្នុងឆ្នាំនេះផងដែរ។

យ៉ាងណាក្ដី បញ្ហាចម្បងក៏គឺ កូនសិស្សមកពីគ្រួសារទ័លក្រ ជាច្រើនលាននាក់ មិនទាន់មានកុំព្យូទ័រនៅផ្ទះនៅឡើយ ដែលនេះជាកូនសោសំខាន់សម្រាប់ការរៀនមេរៀនតាមអនឡាញ៕

ប្រភព៖ សារព័ត៌មានបរទេស

May 27, 2020

ចិនបង្កើនវិសាលភាពនៃសេចក្ដីព្រាងច្បាប់សន្តិសុខហុងកុង! ពលរដ្ឋត្រៀមធ្វើមហាបាតុកម្ម ខណៈប៉ូលិសថានឹងមិនអត់ឱន

ប្រទេសចិនបានបញ្ចូលអង្គការនានាទៅក្នុងដែនកំណត់របស់សេចក្ដីព្រាងច្បាប់សន្តិសុខហុងកុងដែលកំពុងតែបង្កឱ្យមានការរិះគន់យ៉ាងខ្លាំងក្លានាបច្ចុប្បន្ន នេះបើតាមសារព័ត៌មាននៅហុងកុង។

ទីភ្នាក់ងារសារព័ត៌មាននៅទីក្រុងហុងកុង រួមមានស្ថានីយវិទ្យុនិងទូរទស្សន៍ RTHK (Radio Television Hong Kong) និងកាសែត SCMP (South China Morning Post) កាលពីម្សិលមិញបានឱ្យដឹងថា សេចក្ដីព្រាងច្បាប់សន្តិសុខហុងកុងត្រូវបានពង្រីកវិសាលភាពបន្ថែមទៀត ដោយបូកបញ្ចូល “សកម្មភាពនានាដែលនាំឱ្យគ្រោះថ្នាក់ដល់សន្តិសុខ”។

ក្រុមមេធាវីនៅចិនដីគោក ដែលជាអ្នកធ្លាប់បានចាត់ការលើបញ្ហាទាក់ទិននឹងសន្តិសុខកន្លងមក និយាយថា “ការកែប្រែ ឬបន្ថែមវិសាលភាព(នៃសេចក្ដីព្រាងច្បាប់សន្តិសុខហុងកុង) មិនត្រឹមតែផ្ដោតលើឯកជននោះទេ តែគឺបូករួមទាំងអង្គការដែលស្ថិតក្រោមច្បាប់ទាំងអស់ផងដែរ” នេះបើតាម RTHK។

ពុំទាន់មានសេចក្ដីលម្អិតបន្ថែមត្រូវបានលើកឡើង ប៉ុន្តែ ប្រភពព័ត៌មាននានានិយាយថា សេចក្ដីព្រាងច្បាប់នេះនឹងមិនត្រឹមតែទប់ស្កាត់ និងដាក់ទោសលើ “សកម្មភាពប្រឆាំង” នានានោះទេ តែច្បាប់នេះក៏នឹងរាប់បញ្ចូលទាំងសកម្មគំរាមកំហែងដល់សន្តិសុខផងដែរ។ សេចក្ដីព្រាងច្បាប់សន្តិសុខហុងកុងនឹងត្រូវបានបោះឆ្នោតអនុម័តនៅថ្ងៃទី28ឧសភាខាងមុខ ហើយក្រោយមកនឹងត្រូវបញ្ជូនទៅកាន់គណៈកម្មាធិការអចិន្ត្រៃយ៍នៃសភាប្រជាជនចិន NPC (National People’s Congress) ដែលជាស្ថាប័នបង្កើតច្បាប់កំពូលរបស់ចិន ដើម្បីត្រួតពិនិត្យលម្អិត។

ប្រភពមួយបានឱ្យដឹងថា តំណាងរាស្ត្រហុងកុងភាគច្រើននៅ NPC បានគាំទ្រការពង្រីកវិសាលភាពនៃសេចក្ដីព្រាងច្បាប់នេះ។ តំណាងរាស្ត្រម្នាក់ក្នុងចំណោមអ្នកដែលបានជំទាស់ នោះគឺ Michael Tien Puk-sun ដែលជាអ្នកដាក់សំណួរសួរថា “តើការកែប្រែនេះនឹងមានផលប៉ះពាល់បែបណាទៅលើអ្នកដែលចូលរួមធ្វើបាតុកម្មហើយស្រាប់តែបាតុកម្មនោះបានក្លាយជាអំពើហិង្សា?”។

“ការរឹតបន្តឹងមិនគួរខ្លាំងក្លាជាងមាត្រាទី23នោះទេ” លោក Michael Tien Puk-sun ថ្លែងបែបនេះ សំដៅទៅលើផ្នែកមួយនៃច្បាប់ធម្មនុញ្ញរបស់ហុងកុង ដែលក្នុងនោះ ស្នើឱ្យហុងកុងបង្កើតច្បាប់សន្តិសុខដោយឡែករបស់ខ្លួន។

ព័ត៌មានខាងលើ ត្រូវបានលើកឡើងក្នុងស្ថានភាពដែលក្រុមសមត្ថកិច្ចហុងកុងកំពុងត្រៀមខ្លួនដើម្បីទប់ទល់នឹងបាតុកម្មដ៏ធំមួយដែលនឹងត្រូវបានធ្វើឡើងក្នុងថ្ងៃនេះ។ ក្រុមនិស្សិតមានគម្រោងបិទសាលារៀន ចំណែកក្រុមដែលគាំទ្រដល់សកម្មភាពប្រឆាំងរដ្ឋាភិបាលបានអំពាវនាវឱ្យមានកូដកម្មទូទាំងទីក្រុង ខណៈដែលក្រុមសកម្មជននានាបានអំពាវនាវឱ្យធ្វើបាតុកម្មបិទផ្លូវ។ រីឯភាគីខាងប៉ូលិសវិញ កាលពីម្សិលមិញបានព្រមានថានឹងមិនលើកលែងចំពោះសកម្មភាពដែលធ្វើឱ្យខូចសណ្ដាប់ធ្នាប់សាធារណៈជាដាច់ខាត។

ប្រធានប្រតិបត្តិទីក្រុងហុងកុង លោកស្រី Carrie Lam ពន្យល់ប្រាប់ប្រជាជនថា សេចក្ដីព្រាងច្បាប់សន្តិសុខហុងកុងនេះ នឹងមិនរំលោភលើសិទ្ធិសេរីភាពរបស់ពលរដ្ឋនោះទេ ប៉ុន្តែច្បាប់នេះនឹងផ្ដោតទៅលើតែក្រុមមនុស្សជ្រុលនិយមមួយក្ដាប់តូចប៉ុណ្ណោះ៕

ប្រភព៖ Reuters

May 27, 2020

ពេទ្យជប៉ុនព្រមាន ពាក់ម៉ាស់ការពារមេរោគ អំឡុងពេលធាតុអាកាសក្ដៅខ្លាំង ប្រឈមនឹងអាការខ្យល់គដួល

គ្រូពេទ្យជប៉ុន បានព្រមានថា ការពាក់ម៉ាស់អនាម័យការពារការឆ្លងមេរោគ កណ្ដាលធាតុអាកាសដែលកំពុងក្ដៅខ្លាំង អាចប្រថុយប្រថាននឹងការកើតអាការខ្យល់គ និងដួលសន្លប់បាត់ស្មារតី ដោយសាររាងកាយខ្វះជាតិទឹក។

ខណៈដែលប្រជាជនជប៉ុនស្ទើរតែទាំងអស់ពាក់ម៉ាស់អនាម័យ ដើម្បីការពារការឆ្លងមេរោគកូវីដ-19 សីតុណ្ហភាពនៅក្នុងប្រទេសជប៉ុន ក៏កំពុងចាប់ផ្ដើមកើនកម្ដៅឡើង មុនពេលឈានចូលរដូវក្ដៅក្នុងពេលមិនយូរប៉ុន្មានខាងមុខនេះដែរ។ គ្រូពេទ្យបានព្រមានថា ការពាក់ម៉ាស់ការពារមេរោគក្នុងអំឡុងពេលដែលធាតុអាកាសក្ដៅខ្លាំង ធ្វើឱ្យខ្យល់អាកាសដែលត្រជាក់ មិនអាចចូលទៅក្នុងសួតបាន ប្រព័ន្ធដកដង្ហើម នឹងធ្វើការធ្ងន់ធ្ងរឡើង ព្រោះដកដង្ហើមមិនស្រួល ដែលវានឹងបណ្ដាលឱ្យសីតុណ្ហភាពក្នុងរាងកាយកើនខ្ពស់ឡើង រហូតកើតអាការខ្យល់គ ដួលសន្លប់បាត់ស្មារតីបាន។

អ្នកជំនាញផ្នែកវេជ្ជសាស្ត្ររបស់ជប៉ុន បានបញ្ជាក់ថា នៅលើផ្ទៃមុខមនុស្សយើង មានបណ្ដាញសរសៃប្រសាទជាច្រើនដែលទន់ជ្រាយចំពោះសីតុណ្ហភាពក្ដៅ-ត្រជាក់ខ្លាំងជាងផ្នែកផ្សេងៗរបស់រាងកាយ ដូច្នេះហើយទើបការបិទបាំងផ្ទៃមុខដោយម៉ាស់ មានភាពប្រថុយប្រថានក្នុងការធ្វើឱ្យរាងកាយមានសីតុណ្ហភាពខ្ពស់ឡើង រហូតដល់មានគ្រោះថ្នាក់ក្នុងរដូវក្ដៅ។

គ្រូពេទ្យបានព្រមានថា ពេលពាក់ម៉ាសអនាម័យការពារ នឹងធ្វើឱ្យយើងមានអារម្មណ៍ថា មិនសូវស្រេកទឹក ដោយសារតែសំណើមនៅក្រោមក្រណាត់ម៉ាស់ តែខណៈពេលជាមួយគ្នា វាក៏នឹងប្រមូលសន្សំកម្ដៅទុកនៅក្នុងរាងកាយយើងដែរ។ គ្រូពេទ្យបានណែនាំឱ្យញ៉ាំទឹកឱ្យបានច្រើនៗ តែឱ្យចៀសវាងភេសជ្ជៈដែលមានជាតិកាហ្វេអ៊ីន ព្រោះវានឹងធ្វើឱ្យរាងកាយបណ្ដេញជាតិទឹកចេញកាន់តែច្រើនឡើង បត់ជើងតូចញឹកញាប់ រាងកាយនឹងខ្វះជាតិទឹក។

ក្រៅពីនេះ ទោះជាបង្ខាំងខ្លួនឯងនៅតែក្នុងផ្ទះក៏ដោយ ក៏គួរតែធ្វើលំហាត់ប្រាណស្រាលៗ ឱ្យចេញញើស ព្រោះវានឹងជួយធ្វើឱ្យរាងកាយមានអារម្មណ៍សប្បាយស្រួលខ្លួន។

គ្រូពេទ្យបានណែនាំទៀតថា បើសិនជាត្រូវពាក់មាស់អនាម័យកណ្ដាលធាតុអាកាសក្ដៅហប់ខ្លាំង យើងគួរតែប្រើក្រណាត់ជ្រលក់ទឹកដាក់ស្អំនៅលើកញ្ចឹងក ព្រោះវានឹងជួយបញ្ចុះកម្ដៅក្នុងរាងកាយបាន ក្រៅពីនេះ គួរប្រើម៉ាស៊ីនត្រជាក់ ញ៉ាំទឹក និងបន្ថែមពេលវេលាសម្រាកឱ្យបានយូរឡើង ក្នុងអំឡុងពេលធាតុអាកាសក្ដៅខ្លាំង ជាពិសេសអ្នកដែលធ្វើការនៅផ្ទះ ដែលច្រើនតែសន្សំសំចៃថ្លៃភ្លើង មិនហ៊ានបើកកង្ហារ ឬម៉ាស៊ីនត្រជាក់ អាចនឹងមានគ្រោះថ្នាក់ដោយសារធាតុអាកាសក្ដៅហប់បាន។

គ្រូពេទ្យជប៉ុនបានដាស់តឿនទៀតថា មិនគួរពាក់ម៉ាស់ខណៈពេលហាត់ប្រាណខ្លាំងៗឡើយ អាចមានគ្រោះថ្នាក់ដល់ជីវិត ព្រោះធ្លាប់មានសិស្សសាលាជនជាតិចិន ដែលពាក់ម៉ាស់អនាម័យ N95 បានស្លាប់ខណៈពេលធ្វើលំហាត់ប្រាណ ដោយសារតែខ្វះអុកស៊ីហ្ស៊ែនរួចមកហើយ៕

ប្រភព៖ សារព័ត៌មានបរទេស

May 27, 2020

អ្នកស្លាប់ដោយសារវីរុស COVID-19 លើស100,000នាក់នៅអាមេរិក! អ្នកជំនាញចិន “រន្ធត់ចិត្ត”

អ្នកជំនាញផ្នែករោគឆ្លងនៅប្រទេសចិនយល់ថា សហរដ្ឋអាមេរិកខ្វះការត្រៀមខ្លួនជាមុនចំពោះមហារោគរាតត្បាត COVID-19 បើទោះជាមានប្រព័ន្ធសុខាភិបាលទំនើប និងស្ថានភាពអំណោយផលល្អប្រសើរ។

យោងតាមស្ថិតិរបស់ Worldometer គិតមកដល់បច្ចុប្បន្ន តួលេខអ្នកស្លាប់ដោយសារវីរុសCOVID-19 នៅសហរដ្ឋអាមេរិក បានកើនឡើងដល់ជិត100,500នាក់។ តួលេខអ្នកជំងឺកូរ៉ូណានៅប្រទេសនេះក៏បានកើនលើសពី1.7លាននាក់ហើយដែរ។ ជាមធ្យមក្នុង1ថ្ងៃ សហរដ្ឋអាមេរិករកឃើញអ្នកជំងឺCOVID-19 ជិត20,000នាក់។

សហរដ្ឋអាមេរិកគឺជាសម្បុកមេរោគធំជាងគេក្នុងពិភពលោក ដោយមានអ្នកស្លាប់ប្រមាណជាជិត1/3 នៃអ្នកស្លាប់ដោយសារCOVID-19 នៅទូទាំងពិភពលោក។ COVID-19 មកដល់ពេលនេះ បានឆ្លងទៅមនុស្សជាង5.6លាននាក់ ហើយវីរុសនេះក៏បានសម្លាប់មនុស្សជាង350,000នាក់ផងដែរនៅទូទាំងសកលលោក។

Zhong Nanshan ដែលជាអ្នកជំនាញការកំពូលខាងរោគឆ្លងនៅប្រទេសចិន បានសម្ដែងការភ្ញាក់ផ្អើលជាខ្លាំងជាមួយនឹងតួលេខនៃអ្នកស្លាប់ដោយសារ COVID-19 នៅសហរដ្ឋអាមេរិក។ “កាលពី7ឆ្នាំមុន សហរដ្ឋអាមេរិកទប់ទល់នឹងរោគរាតត្បាត SARS បានយ៉ាងល្អ ខុសទាំងស្រុងទៅនឹងស្ថានភាពបច្ចុប្បន្ន។ល។ តួលេខនៃការស្លាប់ខ្ពស់បែបនេះ ធ្វើឱ្យខ្ញុំរន្ធត់ណាស់” លោក Zhong Nanshan ប្រធានមជ្ឈមណ្ឌលស្រាវជ្រាវជំងឺផ្លូវដង្ហើមចិនថ្លែងបែបនេះ។

លោក Zhong Nanshan ប្រធានមជ្ឈមណ្ឌលស្រាវជ្រាវជំងឺផ្លូវដង្ហើមចិន

លោក Zhong Nanshan បន្ថែមថា ក្រុមដៃគូនៅសហរដ្ឋអាមេរិកបាននិយាយប្រាប់គាត់ថា សហរដ្ឋអាមេរិកខ្វះការត្រៀមខ្លួនសម្រាប់មហាអាសន្នរោគ សូម្បីតែមានប្រព័ន្ធសុខាភិបាលទំនើបយ៉ាងណាក៏ដោយ។ លោកថ្លែងថា ប្រការនេះគឺដូចទៅនឹងប្រតិកម្មដំបូងនៅទីក្រុង Wuhan នៃប្រទេសចិនដូច្នោះដែរ ប៉ុន្តែ បញ្ហារបស់អាមេរិកាំង នោះគឺថា ក្រុមមេដឹកនាំមានការព្រងើយកន្តើយចំពោះការព្រមានរបស់ក្រុមអ្នកជំនាញផ្នែកសុខាភិបាល និងមើលស្រាលវីរុសCOVID-19នេះ ព្រមទាំងប្រញាប់ប្រញាល់ក្នុងការបើកទ្វារសេដ្ឋកិច្ច។

លោក Zhong Nanshan បញ្ជាក់ថា “ការប្រញាប់ប្រញាល់ក្នុងការបើកដំណើរការសេដ្ឋកិច្ចឡើងវិញ គឺជារឿងគ្រោះថ្នាក់។ ខ្ញុំគិតថា ពួកគេគួរតែគោរពតាមលក្ខខណ្ឌវិទ្យាសាស្ត្រ និងបើកទ្វារសេដ្ឋកិច្ចបន្តិចម្ដងៗទើបប្រសើរ”។

បច្ចុប្បន្ន រដ្ឋចំនួន50នៅសហរដ្ឋអាមេរិក បានបន្ធូរបន្ថយបម្រាមគោចរដើម្បីបើកដំណើរការសេដ្ឋកិច្ចឡើងវិញ។ ឆ្នេរសមុទ្រនានានៅប្រទេសនេះ ប៉ុន្មានថ្ងៃកន្លងមក សុទ្ធតែមានទេសចរទៅកម្សាន្តយ៉ាងច្រើនកុះករ ដោយមិនខ្វល់អំពីការព្រមានពីអ្នកជំនាញ ក៏ដូចជាពីវិធានការរក្សាគម្លាតក្នុងទីសាធារណៈ។

Anthony Fauci ប្រធានវិទ្យាស្ថានជាតិអាឡែរស៊ីនិងជំងឺឆ្លងអាមេរិកាំង បានព្រមានអំពីហានិភ័យនៃរលករោគរាតត្បាតទី2 ដែលនឹងកើតមាននៅពេលរដ្ឋប្រញាប់បើកទ្វារសេដ្ឋកិច្ច ប៉ុន្តែការព្រមាននេះមិនអាចទប់ស្កាត់គម្រោងបើកដំណើរការសេដ្ឋកិច្ចឡើងវិញរបស់រដ្ឋបាលលោក Donald Trump នោះទេ៕

ប្រភព៖ សារព័ត៌មានបរទេស

May 27, 2020

Author: សឿន សំណាង