សឿន សំណាង - La Reine Media

មូលបត្រនៅផ្សារហ៊ុនសហរដ្ឋអាមេរិក ត្រូវលក់ឡាយឡុង ដោយសារលោក Trump ចេញបទបញ្ជារឹតបន្តឹងលើក្រុមហ៊ុនបណ្ដាញសង្គម

មូលបត្រ Twitter បានធ្លាក់ថ្លៃ4.5% និង Facebook ធ្លាក់1.6% បន្ទាប់ពីប្រធានាធិបតីអាមេរិកាំង បានចុះហត្ថលេខាលើបទបញ្ជាដកហូតសិទ្ធិលើកលែងផ្នែកច្បាប់ពីក្រុមហ៊ុនបណ្ដាញសង្គមទាំងនេះ។

ចប់ការជួញដូរនៅថ្ងៃទី28ឧសភា សន្ទស្សន៍ DJIA បានថយចុះ 0.58% មកនៅត្រឹម25,400ពិន្ទុ។ សន្ទស្សន៍ S&P 500 បាត់បង់ 0.21% មកនៅត្រឹម 3,029ពិន្ទុ។ ចំណែក Nasdaq Composite ថយចុះ 0.46% មកនៅត្រឹម 9,368ពិន្ទុ។

ភាគហ៊ុននានានៅផ្សារមូលបត្រអាមេរិកបានឡើងថ្លៃជាបន្តបន្ទាប់នៅពេលចាប់ផ្ដើមការជួញដូរកាលពីម្សិលមិញដោយសារតែវិនិយោគិនមានការពេញចិត្ត និងសង្ឃឹមទៅលើការងើបឡើងនៃសេដ្ឋកិច្ច ក្រោយពីសហរដ្ឋអាមេរិកបានឆ្លងផុតពីចំណុចកំពូលនៃការរាតត្បាតរបស់ COVID-19។ សន្ទស្សន៍ S&P 500 បច្ចុប្បន្នបានកើនខ្ពស់គួរសមបើធៀបនឹងកម្រិតទាបបំផុតក្នុងខែមីនា ដោយសារតែសេដ្ឋកិច្ចបានចាប់ផ្ដើមដំណើរការឡើងវិញជាបណ្ដើរៗ រួមនឹងកញ្ចប់ថវិកាជំនួយសេដ្ឋកិច្ចដ៏ច្រើនសន្ធឹកសន្ធាប់របស់រដ្ឋាភិបាល។ ចំណែកក្រុមហ៊ុន Boeing ក៏បានឱ្យដឹងថា បានចាប់ផ្ដើមការផលិតយន្តហោះ 737 MAX នៅក្នុងរដ្ឋវ៉ាស៊ីងតោន បើទោះជាដំណើរការយឺតៗក៏ដោយ។

Twitter កាលពីថ្ងៃទី27ឧសភា បានដាក់ tag នៅលើសារចំនួន2ឃ្លារបស់លោក Trump ហើយបានបន្ថែមឧទានសញ្ញានៅខាងក្រោមសារទាំងនេះ។ ពេលចុចទៅលើតំណភ្ជាប់(link) ដែលត្រូវបានភ្ជាប់ទៅនឹងសារនោះ អ្នកប្រើប្រាស់នឹងត្រូវបាននាំទៅកាន់ទំព័រមួយដែលគ្រប់គ្រងដោយ Twitter ដែលមានសរសេរថា ប្រសាសន៍របស់ម្ចាស់សេតវិមានគឺមិនត្រឹមត្រូវនោះទេ។ នេះអាចជាមូលហេតុមួយដែលធ្វើឱ្យលោក Trump ខឹងសម្បា

ក៏ប៉ុន្តែ តម្លៃមូលបត្រខាងលើបានដើរថយក្រោយនៅចុងការជួញដូរនៃថ្ងៃដដែលនោះ។ មូលបត្ររបស់ក្រុមហ៊ុនបណ្ដាញសង្គម Twitter និង Facebook បានដាំក្បាលចុះ បន្ទាប់ពីប្រធានាធិបតី Donald Trump ថ្លែងថា នឹងចុះហត្ថលេខាលើបញ្ជាទាក់ទងនឹងក្រុមហ៊ុនបណ្ដាញសង្គម។ ចប់ការជួញដូរកាលពីម្សិលមិញ តម្លៃមូលបត្ររបស់ Twitter បានថយចុះ4.4% ខណៈ Facebook ធ្លាក់ចុះ1.6%។

មូលហេតុមួយចំនួនផ្សេងទៀតដែលនាំឱ្យមូលបត្រនៅផ្សារហ៊ុនអាមេរិកធ្លាក់ថ្លៃ នោះគឺ ភាពតានតឹងរវាងអាមេរិកាំងជាមួយចិន ពិសេសគឺបញ្ហានៅហុងកុង បញ្ហា COVID-19 និងបញ្ហាសង្គ្រាមពាណិជ្ជកម្ម។ល។

ប្រភព៖ សារព័ត៌មានបរទេស

May 29, 2020

លោក Trump ចុះហត្ថលេខាលើបទបញ្ជាស្ដីពីបញ្ហាបណ្ដាញសង្គម

ប្រធានាធិបតីសហរដ្ឋអាមេរិកបានចុះហត្ថលេខាលើបទបញ្ជាមួយទាក់ទិននឹងបណ្ដាក្រុមហ៊ុនបណ្ដាញសង្គមកាលពីថ្ងៃទី28ឧសភា ហើយបានហៅនេះថាជា “សកម្មភាពដើម្បីការពារសេរីភាពនៃការបញ្ចេញមតិរបស់ពលរដ្ឋអាមេរិកាំង”។

“ក្រុមហ៊ុនបណ្ដាញសង្គមភាគតិចកំពុងកាន់កាប់ព័ត៌មានទំនាក់ទំនងសាធារណៈនិងឯកជនភាគច្រើននៅសហរដ្ឋអាមេរិក។ ពួកគេធ្វើការត្រួតពិនិត្យ កាត់បន្ថយ កែប្រែ លាក់បាំង និងផ្លាស់ប្ដូររាល់ទំនាក់ទំនងគ្រប់រូបភាពរវាងពលរដ្ឋ និងសាធារណជន ដោយមិនត្រូវបានត្រួតពិនិត្យ។ យើងមិនអាចអនុញ្ញាតឱ្យបញ្ហានេះបន្តកើតមានទៀតនោះទេ”។ ប្រធានាធិបតី Donald Trump ថ្លែងបែបនេះកាលពីថ្ងៃទី28ឧសភា បន្ទាប់ពីបានចុះហត្ថលេខាលើបទបញ្ជាទាក់ទងនឹងបញ្ហាបណ្ដាញសង្គម។

លោក Trump បានអះអាងថា បទបញ្ជានេះគឺដើម្បី “ការពារសេរីភាពនៃការបញ្ចេញមតិនៅចំពោះមុខការគំរាមកំហែងមួយដ៏ធ្ងន់ធ្ងរបំផុតក្នុងប្រវត្តិសាស្ត្រអាមេរិក។ Twitter លែងនៅជាទីតាំងប្រមូលផ្ដុំរបស់សាធារណជនទៀតហើយ តែវាបានក្លាយជានិពន្ធនាយកដែលមានការយល់ឃើញដោយឡែក។ ខ្ញុំគិតថា យើងអាចនិយាយអំពីបញ្ហាដូចគ្នានេះចំពោះក្រុមហ៊ុន Google ក្រុមហ៊ុន Facebook និងក្រុមហ៊ុនមួយចំនួនទៀត”។

បទបញ្ជាខាងលើនេះត្រូវបានធ្វើឡើងដើម្បីដកហូតសិទ្ធិទទួលបានការលើកលែងផ្នែកច្បាប់របស់បណ្ដាក្រុមហ៊ុនបណ្ដាញសង្គម ដូចជា Twitter ជាដើម ដោយតម្រូវឱ្យស្ថាប័នរដ្ឋវាយតម្លៃថាតើបណ្ដាញសង្គមទាំងនេះមានលក្ខខណ្ឌគ្រប់គ្រាន់ឬទេក្នុងការធានាលើការទទួលខុសត្រូវផ្លូវច្បាប់សម្រាប់ខ្លឹមសារដែលត្រូវបានមនុស្សរាប់លាននាក់បង្ហោះ។

បទបញ្ជារបស់លោក Trump នេះ នឹងផ្លាស់ប្ដូរទម្លាប់ដែលមានតាំងពីរាប់ឆ្នាំមុន ដែលបានចាត់ទុកបណ្ដាញសង្គមជាផលិតករដែលត្រូវទទួលខុសត្រូវលើខ្លឹមសារដែលបានបង្ហោះដោយអ្នកប្រើប្រាស់។

Twitter កាលពីថ្ងៃទី27ឧសភា បានដាក់ tag នៅលើសារចំនួន2ឃ្លារបស់លោក Trump ហើយបានបន្ថែមឧទានសញ្ញានៅខាងក្រោមសារទាំងនេះ។ ពេលចុចទៅលើតំណភ្ជាប់(link) ដែលត្រូវបានភ្ជាប់ទៅនឹងសារនោះ អ្នកប្រើប្រាស់នឹងត្រូវបាននាំទៅកាន់ទំព័រមួយដែលគ្រប់គ្រងដោយ Twitter ដែលមានសរសេរថា ប្រសាសន៍របស់ម្ចាស់សេតវិមានគឺមិនត្រឹមត្រូវនោះទេ។

លោក Trump ក្រោយមកក៏បានចោទប្រកាន់ Twitter និងបណ្ដាញសង្គមផ្សេងទៀតថា “បិទមាត់” អ្នកអភិរក្សនិយម។ កាលណោះ លោក Trump បានគំរាមថានឹងកែប្រែឱ្យបានខ្លាំងក្លា ឬបិទបណ្ដាញសង្គមទាំងនេះ។ ប៉ុន្តែ ក្រុមអ្នកវិភាគយល់ថា លោក Trump ពិបាកក្នុងការធ្វើឱ្យការគំរាមរបស់លោកក្លាយជាការពិត ព្រោះថា រាល់ការកែប្រែទៅលើបណ្ដាញសង្គមនានា ទាក់ទិននឹងខ្លឹមសារនៅលើបណ្ដាញសង្គមរបស់ពួកគេដែលត្រូវបានបង្ហោះដោយអ្នកប្រើប្រាស់ គឺតម្រូវឱ្យមានការអនុម័តពីរដ្ឋសភា៕

ប្រភព៖ សារព័ត៌មានបរទេស

May 29, 2020

ជិត5.9លាននាក់បានឆ្លង COVID-19 នៅទូទាំងសកលលោក

ពិភពលោកទាំងមូលបានរកឃើញអ្នកផ្ទុកវីរុសCOVID-19 សរុបជិត 5.9លាននាក់ និងជាង 360,000នាក់បានបាត់បង់ជីវិត។

ប្រទេសនិងដែនដីចំនួន213 ក្នុងពិភពលោក ត្រូវបានរាយការណ៍ថា មានអ្នកឆ្លងវីរុសCOVID-19 សរុប 5,880,081នាក់ និងអ្នកស្លាប់សរុបឡើងដល់360,695នាក់ ក្នុងនោះមានអ្នកជំងឺថ្មី 99,678នាក់ និងអ្នកស្លាប់ថ្មីមាន 3,907នាក់។ អ្នកជំងឺចំនួន 2,576,260នាក់បានជាសះស្បើយ។

ទ្វីបអាមេរិកជាសម្បុកមេរោគធំជាងគេបង្អស់ ក្នុងនោះតំបន់អាមេរិកខាងជើងមានអ្នកជំងឺCOVID-19 សរុប1,980,527នាក់ តំបន់អាមេរិកខាងត្បូងមាន757,461នាក់ ខណៈដែលទ្វីបអឺរ៉ុបមាន1,969,899នាក់ អាស៊ីមាន1,051,266នាក់ និងអាហ្វ្រិកមាន131,570នាក់។

សហរដ្ឋអាមេរិក ប្រស៊ីល និងរុស្ស៊ី គឺជាប្រទេសដែលមានអ្នកជំងឺCOVID-19 ច្រើនជាងគេក្នុងពិភពលោក។ សហរដ្ឋអាមេរិកមានអ្នកជំងឺសរុប1,767,571នាក់ និងអ្នកស្លាប់សរុប103,302នាក់ ចំណែកប្រទេសប្រេស៊ីលមានអ្នកជំងឺសរុប438,812នាក់ (អ្នកជំងឺថ្មីមាន24,151នាក់) និងអ្នកស្លាប់សរុប26,991នាក់ (អ្នកស្លាប់ថ្មី1,294នាក់) ខណៈដែលប្រទេសរុស្ស៊ីមានអ្នកជំងឺសរុប 379,051នាក់ (ក្នុងនោះមានអ្នកជំងឺថ្មី 8,371នាក់) និងអ្នកស្លាប់សរុប4,142នាក់ (ក្នុងនោះមានអ្នកស្លាប់ថ្មី 174នាក់)៕

ប្រភព៖ សារព័ត៌មានបរទេស

May 29, 2020

ផែនដីនិងព្រះចន្ទមានទិដ្ឋភាពបែបណា នៅពេលមើលពីពិភពសៅរ៍ដែលមានចម្ងាយ1.4ពាន់លានគម?

យានអវកាស Cassini ដែលមានភារកិច្ចស្រាវជ្រាវពិភពសៅរ៍ ថតបានរូបភាពផែនដី និងព្រះចន្ទនៅពេលដែលយាននេះស្ថិតក្នុងដំណាក់កាលចុងក្រោយនៃជីវិតរបស់វា បន្ទាប់ពីបានបំពេញបេសកកម្មនៅក្នុងលម្ហអវកាស។

រូបថតបង្ហាញអំពីទិដ្ឋភាពផែនដីនិងព្រះចន្ទដែលយើងលើកយកមកនិយាយនៅទីនេះ។

កាលពីថ្ងៃទី27ឧសភា អង្គការ NASA បានចែករំលែករូបភាពនៃផែនដី និងព្រះចន្ទដែលត្រូវបានថតកាលពី3ឆ្នាំមុនដោយយានអវកាស Cassini។ ពេលនោះ ព្រះអាទិត្យត្រូវបានពិភពសៅរ៍បាំងពន្លឺអស់មួយរយៈពេលខ្លី បង្កបានជាឱកាសល្អសម្រាប់យាន ដើម្បីបង្វែរកាមេរ៉ាទៅរកតំបន់កណ្ដាលនៃប្រព័ន្ធព្រះអាទិត្យ។ ផ្កាយព្រះសៅរ៍គឺជាពិភពទី6 បើរាប់ពីព្រះអាទិត្យ ចំណែកផែនដីគឺជាភពទី3 មានន័យថាផែនដីស្ថិតនៅក្នុងតំបន់កណ្ដាលនៃប្រព័ន្ធព្រះអាទិត្យ។

ជាមួយនឹងរយៈចម្ងាយ1.4ពាន់លានគីឡូម៉ែត្រ ផែនដីនិងព្រះចន្ទនៅក្នុងរូបថត គឺគ្រាន់តែជាចំណុចតូចល្អិតនៅកណ្ដាលរង្វង់ខ្សែក្រវាត់នានារបស់ពិភពសៅរ៍ដ៏មហិមាតែប៉ុណ្ណោះ។ នៅផ្នែកខាងស្ដាំនៃរូបភាពគឺជារង្វង់ខ្សែក្រវាត់A របស់ពិភពសៅរ៍ ចំណែកនៅក្បែរជ្រុងខាងស្ដាំងគឺជាលម្ហEncke ដ៏ធំល្វឹងល្វើយ ខណៈដែលលម្ហKeeler រាងចង្អៀតបន្តិចដែលស្ថិតនៅក្បែរចំណុចកណ្ដាលនៃរូបភាព។ រីឯនៅជ្រុងខាងឆ្វេងគឺជាខ្សែក្រវាត់F ដែលមានការប្រែប្រួលជាប្រចាំ។

យានអវកាស Cassini ត្រូវបានបាញ់បង្ហោះទៅកាន់អវកាសពីរដ្ឋ Florida នៃសហរដ្ឋអាមេរិកកាលពីថ្ងៃទី15តុលា1997។ ឆ្នាំ2004 យានដែលមានតម្លៃ3.3ពាន់លានដុល្លាររបស់ NASA នេះ បានហោះទៅដល់ពិភពសៅរ៍ និងបានចាប់ផ្ដើមការស្រាវជ្រាវរបស់ខ្លួន។ ឆ្នាំ2017 យាននេះក៏អស់ថាមពល។ អ្នកវិទ្យាសាស្ត្របានបញ្ជាឱ្យយានអវកាសនេះ ហោះចូលក្នុងបរិយាកាសរបស់ភពសៅរ៍ដើម្បីកម្ចេចចោលនៅទីនោះ។ ការ “ធ្វើអត្តឃាត” បែបនេះគឺដើម្បីបញ្ជៀសមិនឱ្យវាអណ្ដែតត្រសែតគ្មានគោលដៅ ដែលអាចហោះធ្លាក់ទៅលើព្រះចន្ទនានាដែលអាចមានជីវិតរបស់ភពសៅរ៍ បង្កការឆ្លងជីវិតពីផែនដី៕

ប្រភព៖ សារព័ត៌មានបរទេស

May 28, 2020

សភានីតិកម្មហុងកុងកើតចលាចល និងត្រូវផ្អាកកិច្ចប្រជុំ ព្រោះតែតំណាងរាស្ត្រគប់ថង់ឈើស្អុយទៅលើប្រធានសភា

តំណាងរាស្ត្រម្នាក់មកពីបក្សប្រជាធិបតេយ្យ បានគប់ថង់ដែលមានវត្ថុស្អុយទៅលើប្រធានសភានីតិកម្មហុងកុង ធ្វើឱ្យកិច្ចប្រជុំពិភាក្សាអំពីសេចក្ដីព្រាងច្បាប់ភ្លៀងជាតិត្រូវបានអាក់ខាន។

សភានីតិកម្មហុងកុង LEGCO (Legislative Council of Hong Kong) ព្រឹកមិញនេះបានបន្តកិច្ចពិភាក្សាលើសេចក្ដីព្រាងច្បាប់ស្ដីអំពីភ្លេងជាតិ។ នៅពេលកិច្ចប្រជុំចាប់ផ្ដើម តំណាងរាស្ត្រម្នាក់មកពីបក្សប្រជាធិបតេយ្យ គឺលោក Ted Hui Chi-fung ស្រាប់តែរត់ទៅរកប្រធានសភា Andrew Leung Kwan-yuen ហើយបានគប់ថង់ពណ៌សមួយសំដៅទៅកាន់ប្រធានសភារូបនេះ។ ធាតុរាវនៅក្នុងថង់ក៏បានបែកខ្ចាយចេញមកក្រៅ ធ្វើឱ្យស្អុយពេញសាលប្រជុំ។

ភ្លាមនោះ តំណាងរាស្ត្រ Ted Hui ក៏ត្រូវបានក្រុមសន្តិសុខនាំខ្លួនចេញទៅខាងក្រៅ ហើយកិច្ចប្រជុំខាងលើក៏ត្រូវបានពន្យារពេល។ ចំណែក តំណាងរាស្ត្រ Chan Hoi-yan ក៏ត្រូវបានបញ្ជូនទៅកាន់មន្ទីរពេទ្យ ព្រោះតែមានអារម្មណ៍មិនស្រួលខ្លួនដោយសារក្លិនស្អុយនោះ។

ក្រុមសន្តិសុខបាននាំគ្នាយកផួយមកគ្របពីលើថង់ឈើស្អុយ និងប្រើថ្នាំបាញ់បំបាត់ក្លិនក្នុងសាលប្រជុំ នៅមុនពេលបុគ្គលិកអនាម័យមកដល់។ ក្រុមមន្ត្រីពន្លត់អគ្គិភ័យ និងប៉ូលិសជាច្រើននាក់ក៏ត្រូវបានបញ្ជូនមកកាន់វិមានសភានេះដែរ។

Ted Hui បានប្រកាសថា ខ្លួនប្រើប្រាស់ថង់ដាក់ឈើស្អុយដើម្បីតវ៉ា ព្រោះតែលោក Leung បានកាត់បន្ថយពេលវេលារបស់ក្រុមតំណាងរាស្ត្របក្សប្រឆាំងក្នុងការសម្ដែងមតិទាក់ទិននឹងសេចក្ដីព្រាងច្បាប់ភ្លេងជាតិ។

សេចក្ដីព្រាងច្បាប់ភ្លេងជាតិ តម្រូវឱ្យសាលារៀននានានៅហុងកុង បង្រៀនភ្លេងជាតិប្រទេសចិនដល់សិស្ស រួមនឹងអង្គការផ្សេងៗក៏ត្រូវចាត់ចែងការច្រៀងចម្រៀង និងលេងភ្លេងជាតិនេះដែរ។ ចំណែកអ្នកដែលមានឥរិយាបថប្រមាថមើលងាយភ្លេងជាតិនេះនឹងត្រូវដាក់ទោសឱ្យជាប់ពន្ធនាគារ ឬពិន័យជាប្រាក់ទៀតផង៕

ប្រភព៖ សារព័ត៌មានបរទេស

May 28, 2020

Quantum Levitation នឹងក្លាយជាបច្ចេកវិទ្យាហោះហើរថ្មីដ៏អាស្ចារ្យបំផុតសម្រាប់អនាគត

បន្ទះវត្ថុធាតុដ៏ស្ដើងមួយអាចផ្ទុកវត្ថុដែលមានទម្ងន់ធ្ងន់ជាងវាដល់ទៅ 70,000ដងឯណោះនៅក្នុងលម្ហបរិយាកាស ជាមួយនឹងគន្លងគោចរប្រកបដោយមហាស្ថិរភាព។ នេះគឺជាបច្ចេកវិទ្យាមហាចម្លង Superconductivity ដែលត្រូវបានគេសង្ឃឹមថានឹងក្លាយជាគ្រឹះដ៏រឹងមាំសម្រាប់បង្កើតយានយន្តដែលអាចហោះបានប្រកបដោយភាពអស្ចារ្យជាងយន្តហោះ ឬយានអវកាសនាបច្ចុប្បន្នទៅទៀត ដោយសារវាមិនទទួលឥទ្ធិពលនៃដែនទំនាញពីផែនដី។

ជាដំបូង សូមទស្សនាឃ្លីបវីដេអូមួយដែលបង្ហាញអំពីដំណើរការនៃបច្ចេកវិទ្យាខាងលើនេះនៅឯតូបឧទ្ទេសនាមផលិតផលរបស់សាកលវិទ្យាល័យ Tel Aviv នៃប្រទេសអ៊ីស្រាអែល ដែលបានធ្វើឡើងនៅក្នុងព្រឹត្តិការណ៍ ASTC (Association of Science and Technology Centers) កាលពីឆ្នាំ2011 នាមជ្ឈមណ្ឌលវិទ្យាសាស្ត្រ Maryland ក្នុងទីក្រុង Baltimore សហរដ្ឋអាមេរិក។

នៅក្នុងវីដេអូនេះ យើងឃើញថា មានបន្ទះវត្ថុធាតុមួយដែលត្រូវបានក្លាសេយ៉ាងត្រជាក់ដោយប្រើអាសូតរាវ (Liquid nitrogen) អាចបណ្ដែតខ្លួនក្នុងបរិយាកាសដែលមានគម្លាតពីមេដែកក្នុងរយៈចម្ងាយខ្លី។ នៅពេលបន្ទះវត្ថុធាតុនេះត្រូវបានដាក់ពីលើក្បែរប្រព័ន្ធមេដែកដែលមានរាងរង្វង់មូល ហើយយកដៃរុញវាតែបន្តិច វានឹងហោះទៅតាមរង្វង់មូលនៃមេដែកនេះ។

ជាពិសេស វត្ថុធាតុនេះនៅតែអាចបណ្ដែតខ្លួនក្នុងបរិយាកាស បើទោះជាវាត្រូវបានដាក់ពីខាងក្រោមមេដែកក៏ដោយ។ បាតុភូតនេះត្រូវបានគេឱ្យឈ្មោះថា quantum levitation ឬ quantum trapping។ Quantum levitation គឺជាបច្ចេកវិទ្យាមួយដែលអ្នកវិទ្យាសាស្ត្រប្រើប្រាស់លក្ខណៈពិសេសរបស់រូបវិទ្យាកង់ទិកដើម្បីលើកវត្ថុអ្វីមួយ (ក្នុងករណីនេះគេប្រើប្រាស់វត្ថុធាតុមហាចម្លង Superconductivity) ឱ្យអណ្ដែតទៅលើ នៅខាងលើប្រភពដែនទំនាញ (ករណីនេះ គេប្រើប្រព័ន្ធផ្លូវមេដែករាងរង្វង់មូល) ជាក់លាក់មួយ។

យើងគួរបកស្រាយបែបណា?

Superconductivity គឺជាបាតុភូតដែលកើតឡើងនៅពេលវត្ថុធាតុជាក់លាក់មួយស្ថិតក្នុងសីតុណ្ហភាពទាបជាងសីតុណ្ហភាពដល់កម្រិតជាក់លាក់មួយ ដែលពេលនោះកម្លាំងរារាំងការចន្លងអគ្គិសនីរបស់វាក៏បានថយចុះភ្លាមៗដល់ចំណុច 0។

ជាមួយនឹងវត្ថុធាតុឌីយ៉ាម៉ាញេទិក (Diamagnetic materials) ធម្មតា លំហូរនៃអគ្គិសនី Foucault ដែលមាននិន្នាការប្រឆាំងទៅនឹងមូលហេតុដែលបានបង្កើតវាឡើង (នៅក្នុងករណីនេះគឺចលនាប្រហាក់ប្រហែលគ្នារវាងដែនម៉ាញេទិក និងវត្ថុធាតុ) បានចុះខ្សោយយ៉ាងលឿន ដោយសារតែ រ៉េស៊ីស្ទ័រ (resistor) ដែលជាកម្លាំងរារាំងនៅខាងក្នុងវត្ថុធាតុនោះ។ ប៉ុន្តែ ដោយសារវត្ថុមហាចម្លង Superconductivity មិនមានរ៉េស៊ីស្ទ័រ ដូច្នេះលំហូរ Foucault ដែលកើតឡើង ក៏មិនមានការចុះខ្សោយ។ ហេតុនេះហើយ ដែនម៉ាញេទិកបន្ទាប់បន្សំដែលត្រូវបានបង្កើតឡើងក៏មិនថយចុះ ហើយវាកម្ចាត់ដែនទំនាញទាំងស្រុងពីក្នុងខ្លួនវា ដែលវាទទួលបានពីខាងក្រៅ (ដូចជាទំនាញផែនដីជាដើម)។ ពេលនោះ ដែនទំនាញនៅក្នុងវត្ថុធាតុមហាចម្លង Superconductivity នេះមានប្រហាក់ប្រហែលនឹង 0 ហើយក៏ត្រូវបានរុញច្រានចេញទៅខាងក្រៅទាំងស្រុង។ ប្រការនេះ ធ្វើឱ្យវត្ថុធាតុមហាចម្លង Superconductivity អាចបណ្ដែតខ្លួនក្នុងបរិយាកាសដែលមានចម្ងាយពីមេដែកបន្តិច។

យោងតាមអ្នកវិទ្យាសាស្ត្រអ៊ីស្រាអែល បើសិនជាវត្ថុធាតុ Superconductivity រុញច្រានដែនទំនាញពីខាងក្រៅចេញអស់ពីខ្លួន វាអាចហោះឡើងទៅលើ ប៉ុន្តែ ទីតាំង និងគន្លងគោចររបស់វាមិនមានលំនឹង ដោយសារតែវាចេះតែប្រឹងហោះ ដើម្បីជៀសពីដែនទំនាញខាងក្រៅ។ វត្ថុធាតុមហាចម្លងនេះត្រូវបានគេហៅថា ធាតុមហាចម្លងប្រភេទទី1។

ការប្រើប្រាស់បច្ចេកវិទ្យា Quantum Levitation ក្នុងវិស័យឧស្សាហកម្ម

បើទោះជាបណ្ដាក្រុមហ៊ុនផលិតរថភ្លើងល្បឿនលឿននៅជប៉ុន បានប្រើប្រាស់ទ្រឹស្ដីនៃបច្ចេកវិទ្យា Quantum Levitation នៅក្នុងការបង្កើតរថភ្លើងល្បឿនលឿនដែលអាចធ្វើដំណើរបានជិត600គីឡូម៉ែត្រ/ម៉ោង ប៉ុន្តែ វាមិនមែនជាបច្ចេកវិទ្យាពិតប្រាកដរបស់ Quantum Levitation នោះទេ។ វាគ្រាន់តែជាបច្ចេកវិទ្យា Maglev – Magnetic Levitation តែប៉ុណ្ណោះ។

យោងតាមអ្នកវិទ្យាសាស្ត្រនៃប្រទេសអ៊ីស្រាអែល ឱ្យដឹងថា វត្ថុធាតុ Superconductivity ដែលប្រើប្រាស់ក្នុងវីដេអូខាងលើ មានកម្រាស់ត្រឹមតែ 0,5មីក្រូមម (micromet) ប៉ុណ្ណោះ ប៉ុន្តែ វាអាចលើកវត្ថុមួយដែលធ្ងន់ជាងវាដល់ទៅ70,000ដងឯណោះ។ មានន័យថា វត្ថុធាតុ Superconductivity មួយបន្ទះដែលមានអង្កត់ផ្ចិត 7,62សម និងកម្រាស់ 2មម អាចលើករថយន្តដែលមានទម្ងន់1តោនបាន។

ប្រភព៖ សារព័ត៌មានបរទេស

May 28, 2020

អាមេរិកាំងនិងចិនបង្កើត “សង្គ្រាមវោហារសាស្ត្រ” នៅអង្គការសហប្រជាជាតិ ព្រោះតែបញ្ហាហុងកុង

ប្រតិភូអាមេរិកាំង និងប្រតិភូចិននៅអង្គការសហប្រជាជាតិបានដំឡើងសម្លេងដាក់គ្នា ទាក់ទិននឹងការដែលទីក្រុងប៉េកាំងបង្កើតច្បាប់សន្តិសុខសម្រាប់គ្រប់គ្រងទីក្រុងហុងកុង។

សារព័ត៌មាន Reuters បានចេញផ្សាយថា ប្រតិភូអាមេរិកាំង និងចិន នៅឯទីស្នាក់ការនៃអង្គការសហប្រជាជាតិ កាលពីថ្ងៃទី27ឧសភា បានបើកសង្គ្រាមវោហារសាស្ត្រដាក់គ្នាជាបន្តបន្ទាប់ ក្រោយពីទីក្រុងប៉េកាំងបានទាត់ចោលសំណើរបស់សហរដ្ឋអាមេរិកដែលស្នើឱ្យបើកកិច្ចប្រជុំក្រុមប្រឹក្សាសន្តិសុខដើម្បីពិភាក្សាអំពីគម្រោងដែលចិនកំពុងបង្កើតច្បាប់សន្តិសុខសម្រាប់តំបន់ពិសេសហុងកុង។

នៅក្នុងសេចក្ដីប្រកាសមួយ ប្រតិភូអាមេរិកាំងនៅអង្គសហប្រជាជាតិបានសង្កត់ធ្ងន់ថា នេះគឺជា “បញ្ហាបន្ទាន់ដែលមានការចាប់អារម្មណ៍ពីពិភពលោកទាំងមូលដោយវាទាក់ទងនឹងសន្តិភាព និងសន្តិសុខអន្តរជាតិ ហើយវាក៏ត្រូវការការយកចិត្តទុកដាក់ពីសមាជិកទាំង15ប្រទេសនៃក្រុមប្រឹក្សាសន្តិសុខរបស់អង្គការសហប្រជាជាតិ។

ឯកអគ្គរដ្ឋទូតចិនប្រចាំនៅអង្គការសហប្រជាជាតិ លោក Zhang Jun ក្រោយមកក៏បានបង្ហោះសារនៅលើទំព័រ Twitter ថា “ទីក្រុងប៉េកាំង ដាច់ខាតមិនទទួលយកសំណើមិនសមហេតុផល” ដូចខាងលើរបស់សហរដ្ឋអាមេរិកនោះឡើយ ព្រោះថា សេចក្ដីព្រាងច្បាប់សន្តិសុខជាតិសម្រាប់ហុងកុងគឺជាបញ្ហាផ្ទៃក្នុងរបស់ចិន និង “មិនទាក់ទងអ្វីជាមួយភារកិច្ចរបស់ក្រុមប្រឹក្សាសន្តិសុខនៃអង្គការសហប្រជាជាតិនោះដែរ”។

អាមេរិកាំងនិងចិនបង្កើត "សង្គ្រាមវោហារសាស្ត្រ" ដាក់គ្នា នៅអង្គការសហប្រជាជាតិ ព្រោះតែបញ្ហានៅហុងកុង — កិច្ចប្រជុំមួយរបស់អង្គការសហប្រជាជាតិ។

សហរដ្ឋអាមេរិកនិយាយថា ការដែលចិនបានទាត់ចោលកិច្ចប្រជុំរបស់ក្រុមប្រឹក្សាសន្តិសុខស្ដីអំពីបញ្ហាហុងកុង រួមជាមួយនឹង “ការលាក់បាំងអំពី COVID-19 និងការរំលោភជាបន្តបន្ទាប់ទៅលើកិច្ចព្រមព្រៀងផ្នែកសិទ្ធិមនុស្សនានា ការបំពានច្បាប់នៅលើសមុទ្រចិនខាងត្បូងជាដើម បានបង្ហាញថា ទីក្រុងប៉េកាំងបានអនុវត្តផ្ទុយពីភារកិច្ចជាសមាជិកមួយរបស់អង្គការសហប្រជាជាតិ”។

ជាការឆ្លើយតប អគ្គរដ្ឋទូតចិន លោក Zhang Jun បានចោទប្រកាន់សហរដ្ឋអាមេរិកថា ជាប្រទេស “បង្កភាពច្របូកច្របល់ក្នុងពិភពលោក” និង “បំពានច្បាប់អន្តរជាតិ”។

សេចក្ដីព្រាងច្បាប់សន្តិសុខហុងកុងរបស់ប្រទេសចិននេះ តាមគម្រោងនឹងត្រូវបានអនុម័តជាផ្លូវការនៅថ្ងៃទៅ28ឧសភាខាងមុខ ដែលជាថ្ងៃបិទបញ្ចប់កិច្ចប្រជុំប្រចាំឆ្នាំរបស់សភាចិន។ ច្បាប់នេះនឹងហាមមិនឱ្យមានសកម្មភាពផ្ដាច់ខ្លួន និងអំពើរដ្ឋប្រហារ ក៏ដូចជាការជ្រៀតជ្រែកពីបរទេស និងការធ្វើភេរវកម្មក្នុងទីក្រុង៕

ប្រភព៖ សារព័ត៌មានបរទេស

May 28, 2020

រន្ធត់ចិត្តណាស់! បុរសអ៊ីរ៉ង់ម្នាក់ កាត់កកូនស្រីពេលគេងលក់…សម្លាប់ដើម្បីកិត្តិយស ព្រោះរត់តាមប្រុស…

ប៉ូលិសអ៊ីរ៉ង់ បានចាប់ខ្លួនបុរសម្នាក់ ក្រោយពីបង្កហេតុសម្លាប់កូនស្រីខ្លួនឯង អាយុ 14ឆ្នាំ ដើម្បីរក្សាកិត្តិយសវង្សត្រកូល ដោយសារតែកូនស្រី រត់តាមប្រុសស្នេហ៍ មុននឹងប៉ូលិសតាមរកឃើញ និងនាំខ្លួនមកផ្ទះវិញ។

ទីភ្នាក់ងារព័ត៌មាន BBC បានរាយការណ៍ថា យុវតី រ៉ូមិណា អច្ឆារ៉ាហ្វ៊ី បានរត់ចេញពីផ្ទះនៅក្នុងខេត្តគីឡាន ទៅជាមួយប្រុសស្នេហ៍វ័យ 35ឆ្នាំ ក្រោយពីឪពុករបស់នាងបានជំទាស់រឿងរៀបការរបស់ពួកគេទាំង2 តែទីបំផុតប៉ូលិស ក៏តាមរកយុវតីអច្ឆារ៉ាហ្វ៊ីទាល់តែឃើញ ហើយបាននាំនាងត្រឡប់មកផ្ទះវិញ ទោះជានាងខំព្យាយាមប្រាប់ប៉ូលិសម្ដងហើយម្ដងទៀតថា បើត្រឡប់ទៅផ្ទះវិញ នាងអាចនឹងមានគ្រោះថ្នាក់ដល់ស្លាប់ក៏ដោយ។

រួចហើយក្ដីកង្វល់របស់នាង ក៏ក្លាយជាការពិតនៅក្នុងរាត្រីថ្ងៃព្រហស្បតិ៍ ទី21 ឧសភា…នាងត្រូវបុរសជាឪពុកលបចូលទៅសម្លាប់ដល់ក្នុងបន្ទប់គេងរបស់នាងតែម្ដង។ សារព័ត៌មានក្នុងតំបន់ Gilkhabar.ir បានរាយការណ៍ថា អច្ឆារ៉ាហ្វ៊ី ត្រូវបានកាត់ក្បាលដោយផ្លែកន្ដៀវ និងបន្ទាប់ពីនោះមក បុរសជាឪពុក ក៏ដើរចេញមកពីផ្ទះ ព្រមជាមួយផ្លែកន្ដៀវនៅក្នុងដៃ ហើយសារភាពគ្រប់យ៉ាង មុននឹងប៉ូលិសចាប់ខ្លួនគាត់យកទៅ។

ព័ត៌មានពីការស្លាប់របស់អច្ឆារ៉ាហ្វ៊ី បានធ្វើឱ្យកើតមានចរន្តនៃកំហឹងទូទាំងប្រទេស ហ៊ែចធែក#Romina_Asharafi នៅលើធ្វីតធើរ ត្រូវបានប្រើប្រាស់ជាង 50,000ដង ដោយអ្នកប្រើប្រាស់ភាគច្រើន សុទ្ធតែថ្កោលទោសអំពើឃាតកម្ម និងស្ថានភាពសង្គមរបស់អ៊ីរ៉ង់ជារួម ខណៈដែលសារព័ត៌មានអ៊ីរ៉ង់ Ebtekar ដែលមានទំំនោរលើការផ្លាស់ប្ដូរទំនៀមទម្លាប់សង្គម បានបញ្ជាក់ថា នេះគឺជាការបរាជ័យរបស់ច្បាប់សម្រាប់គាំពារស្ត្រី និងកុមារដែលប្រទេសអ៊ីរ៉ង់កំពុងមាន។

ខណៈដែលលោកស្រី ឆាហ៊ីនដកត៍ ម៉ូឡាវើឌី អគ្គលេខាធិការរបស់សមាគមគាំពារសិទ្ធិស្ត្រីអ៊ីរ៉ង់ បានផូស្តសំណេរមួយឃ្លាថា អច្ឆារ៉ាហ្វ៊ី មិនមែនជាជនរងគ្រោះទី1 និងក៏មិនមែនចុងក្រោយគេនៃការសម្លាប់ដើម្បីកិត្តិយសនេះដែរ ដរាបណាដែលច្បាប់ និងវប្បធម៌ក្នុងតំបន់មិនអាចហាមប្រាមទង្វើបែបនេះឱ្យបានយ៉ាងពេញលេញនោះ។

ទាំងអស់នេះ ច្បាប់អ៊ិស្លាមរបស់អ៊ីរ៉ង់ នឹងដាក់ទោសដល់ឪពុក ឬសមាជិកគ្រួសារណាម្នាក់ក៏ដោយ ដែលបានបង្កហេតុឃាតកម្ម ឬប្រើអំពើហិង្សាទៅលើកុមារ។ ក្នុងករណីការប្រើអំពើហិង្សាក្នុងគ្រួសារ ឬការសម្លាប់ដើម្បីកិត្តិយស ដូចជា បើបុរសនៅក្នុងប្រទេសអ៊ីរ៉ង់ ត្រូវបានរកឃើញថា មានកំហុសពិត ពីបទសម្លាប់កូនស្រី នឹងត្រូវទទួលទោសជាប់ពន្ធនាគារពី 3-10ឆ្នាំ ជំនួសឱ្យការត្រូវកាត់ទោសដោយការប្រហាជីវិតដូចប្រក្រតី៕

ប្រភព៖ សារព័ត៌មានបរទេស

May 28, 2020

តុលាការកាណាដាសម្រេចមិនដោះលែងនាយិកាហិរញ្ញវត្ថុរបស់ Huawei ខណៈចិនចាប់ផ្ដើមរិះគន់

នាយិកាផ្នែកហិរញ្ញវត្ថុរបស់ Huawei អ្នកស្រី Meng Wanzhou ប្រឈមមុខនឹងការបញ្ជូនខ្លួនទៅឱ្យអាមេរិកាំង បន្ទាប់ពីតុលាការកាណាដាបានចេញសាលក្រមបញ្ជាក់ថា ការចោទប្រកាន់របស់សហរដ្ឋអាមេរិកមកលើអ្នកស្រី គឺមានលក្ខខណ្ឌគ្រប់គ្រាន់បង្ហាញថា អ្នកស្រី “មានទោសពីរទន្ទឹមគ្នា” ពិតមែន។

ចៅក្រម Heather Holmes នៃតុលាការកំពូលរបស់ British Columbia នៃប្រទេសកាណាដា កាលពីថ្ងៃទី27ឧសភា បានចេញសាលក្រមបញ្ជាក់ថា ការចោទប្រកាន់របស់សហរដ្ឋអាមេរិកមកលើនាយិកាផ្នែកហិរញ្ញវត្ថុរបស់ក្រុមហ៊ុនចិន Huawei គឺអ្នកស្រី Meng Wanzhou គឺមានលក្ខខណ្ឌគ្រប់គ្រាន់បង្ហាញថា អ្នកស្រីមានទោសពីរទន្ទឹមគ្នា ដូច្នេះហើយអ្នកស្រី Meng Wanzhou នឹងត្រូវបានពិចារណាបន្តទៀតក្នុងការធ្វើបត្យាប័ននាំខ្លួនទៅកាន់សហរដ្ឋអាមេរិក។

សាលក្រមនេះនឹងបើកផ្លូវឱ្យមានការកាត់ទោសបន្តទៀតចំពោះជនជាប់ចោទ Meng Wanzhou ដើម្បីពិចារណាក្នុងការធ្វើបត្យាប័នបញ្ជូនខ្លួននឹងទៅឱ្យអាមេរិកាំងនៅខែមិថុនាខាងមុខ។ ការជំនុំជម្រះនោះនឹងពិនិត្យឱ្យដឹងច្បាស់ថា តើមន្ត្រីកាណាដាបានគោរពច្បាប់ដែរឬទេពេលឃាត់ខ្លួនអ្នកស្រី Meng Wanzhou ទៅតាមសំណើរបស់សហរដ្ឋអាមេរិក។ តាមគម្រោង ការប្ដឹងតវ៉ាពីជនជាប់ចោទអាចត្រូវបានបិទបញ្ចប់នៅក្នុងសប្ដាហ៍ចុងក្រោយនៃខែកញ្ញា ឬដើមខែតុលាខាងមុខ។

ក្រោយពីតុលាការបានចេញសាលក្រមភ្លាម ចិនក៏បានធ្វើការរិះគន់ភ្លាមដែរទៅលើកាណាដា។ ទីក្រុងប៉េកាំងមុននោះក៏ធ្លាប់បានស្នើឱ្យទីក្រុងតូរ៉ុនតូ “កែប្រែកំហុសឆ្គង” ហើយដោះលែងអ្នកស្រី Meng Wanzhou ជាបន្ទាន់។ មេធាវីរបស់អ្នកស្រី Meng Wanzhou បាននិយាយថា កូនក្ដីរបស់ខ្លួន “មិនសមជាចំណាប់ខ្មាំង” នោះទេ នៅក្នុងទំនាក់ទំនងរវាងចិននិងអាមេរិកាំង។ មេធាវី Weingarten ថ្លែងថា “សាលក្រមថ្ងៃនេះនៅកាណាដា គ្រាន់តែជាការបើកផ្លូវដំបូងប៉ុណ្ណោះសម្រាប់ដំណើរការវែងឆ្ងាយទៅមុខទៀត។ យើងជឿថា ចុងក្រោយ យុត្តិធម៍៌នឹងត្រូវបានអនុវត្ត”។

អ្នកស្រី Meng Wanzhou នៅតែអះអាងថា ខ្លួនគ្មានកំហុសអ្វីនោះទេ។ អ្នកស្រី Meng មានអាយុ48ឆ្នាំ នឹងបន្តស្ថិតនៅក្រៅឃុំបណ្ដោះអាសន្ននៅឯភូមិគ្រឹសរបស់ខ្លួនដែលមានតម្លៃជិត10លានដុល្លារអាមេរិក ក្នុងទីក្រុង Vancouver ប្រទេសកាណាដា ក្រោមការតាមដានរបស់សមត្ថកិច្ច។

សមត្ថកិច្ចកាណាដាបានឃាត់ខ្លួនអ្នកស្រី Meng Wanzhou នៅឯព្រលានយន្តហោះ Vancouver កាលពីថ្ងៃទី1ធ្នូ ឆ្នាំ2018 ទៅតាមការស្នើពីសហរដ្ឋអាមេរិក។ សហរដ្ឋអាមេរិកបានចោទប្រកាន់អ្នកស្រី Meng ថា បានផ្ដល់ព័ត៌មានក្លែងក្លាយដើម្បីបន្លំបោកប្រាស់ធនាគារធំៗនៅសហរដ្ឋអាមេរិកក្នុងបំណង “ឆ្ពិនភ្នែក” សហរដ្ឋអាមេរិក ទាក់ទិននឹងការដាក់ទណ្ឌកម្មប្រទេសអ៊ីរ៉ង់ ពោលគឺអ្នកស្រីត្រូវបានចោទថា កំពុងរកស៊ីលួចលាក់ជាមួយអ៊ីរ៉ង់។ បើសិនជាត្រូវបានកាត់ទោសនៅសហរដ្ឋអាមេរិក អ្នកស្រី Meng នឹងអាចជាប់ពន្ធនាគាររហូតដល់30ឆ្នាំ៕

ប្រភព៖ SCMP

May 28, 2020

សេចក្ដីព្រាងច្បាប់ដាក់ទណ្ឌកម្មមន្ត្រីចិន ដើម្បីជួយជនជាតិអ៊ុយហ្គួរនៅស៊ីនជាំង ត្រូវបានសភាអាមេរិកាំងអនុម័តរួចហើយ!

សភាជាន់ទាបអាមេរិកាំងបានអនុម័តលើសេចក្ដីព្រាងច្បាប់មួយដែលបើកផ្លូវឱ្យរដ្ឋាភិបាលដាក់ទណ្ឌកម្មលើមន្ត្រីចិនដែលមានជាប់ទាក់ទិននឹងអំពើកៀបសង្កត់ទៅលើជនជាតិអ៊ុយហ្គួរ (Uyghur) កាន់សាសនាឥស្លាម ដែលកំពុងរស់នៅក្នុងតំបន់ស៊ីនជាំង(XinJiang) ប្រទេសចិន។

សេចក្ដីព្រាងច្បាប់ “គោលនយោបាយសិទ្ធិមនុស្សរបស់ជនជាតិអ៊ុយហ្គួរ” នេះ ត្រូវបានសភាជាន់ទាបអាមេរិកាំងអនុម័តកាលពីម្សិលមិញ(27ឧសភា) ដោយមានឆ្នោតគាំទ្រចំនួន413សម្លេង និងបដិសេធ1សម្លេង។ ដោយសារតែទទួលបានការអនុម័តយល់ព្រមរួចរាល់ពីសភាជាន់ខ្ពស់ ដូច្នេះសេចក្ដីព្រាងច្បាប់នេះនឹងត្រូវបញ្ជូនទៅកាន់ការិយាល័យប្រធានាធិបតីអាមេរិកាំង ដើម្បីធ្វើការសម្រេចចិត្តចុងក្រោយ។

សេចក្ដីព្រាងច្បាប់នេះ តម្រូវឱ្យសេតវិមានបញ្ជូនរបាយការណ៍ឡើងទៅសភាក្នុងរយៈពេលយ៉ាងយូរ180ថ្ងៃ ដើម្បីកំណត់អត្តសញ្ញាណអ្នកទាំងឡាយណាដែលត្រូវបានចាត់ទុកថាជាអ្នកទទួលខុសត្រូវចំពោះអំពើរំលោភសិទ្ធិមនុស្សទៅលើជនជាតិអ៊ុយហ្គួរ។ អ្នកទទួលខុសត្រូវទាំងនោះនឹងត្រូវបានដាក់ទណ្ឌកម្មតាមរយៈការបង្កកទ្រព្យសម្បត្តិនៅសហរដ្ឋអាមេរិក និងការហាមមិនឱ្យចូលទឹកដីសហរដ្ឋអាមេរិកជាដើម។

អង្គការសហប្រជាជាតិបានរកឃើញថា ជនជាតិអ៊ុយហ្គួរកាន់សាសនាឥស្លាមប្រមាណជាជាង1លាននាក់ត្រូវបានអាជ្ញាធរចិនចាប់ខ្លួន និងបញ្ជូនទៅកាន់ជំរំកែប្រែ ប៉ុន្តែចិនបានច្រានចោលរបាយការណ៍នេះ៕

ប្រភព៖ សារព័ត៌មានបរទេស

May 28, 2020

Author: សឿន សំណាង