សឿន សំណាង - La Reine Media

ឆ្មាំការពារជាតិរបស់រដ្ឋចំនួន5 ធ្វើដំណើរមកកាន់ Washington D.C ដើម្បីជួយទប់ទល់នឹងបាតុករ

ប្រភពព័ត៌មានពីកងទ័ពសហរដ្ឋអាមេរិកបានឱ្យដឹងថា កងវរសេនាតូចមួយក្រុមកំពុងត្រូវបានកែនដើម្បីបញ្ជូនទៅកាន់ Washington D.C ខណៈដែលឆ្មាំការពារជាតិពីរដ្ឋចំនួន5របស់សហរដ្ឋអាមេរិក ក៏ត្រូវបានបញ្ជូនទៅកាន់រដ្ឋធានីនៃប្រទេសនេះផងដែរ។

សារព័ត៌មាន Reuters ដកស្រង់ប្រភពព័ត៌មានពីកងទ័ពសហរដ្ឋអាមេរិក បានឱ្យដឹងថា កងវរសេនាតូចមួយក្រុម រួមមានទាហានប្រមាណពី200ទៅ250នាក់ កំពុងត្រូវបានបញ្ជូនទៅកាន់ Washington D.C។ ការបញ្ជូនកងកម្លាំងនេះមកកាន់ Washington D.C គឺគ្រាន់តែដើម្បីការពារសន្តិសុខ និងមិនធ្វើការចាប់ចងជនណាមួយនោះទេ។

កាលពីថ្ងៃទី2មិថុនា Reuters បានចេញផ្សាយថា ទាហាននៅខាងក្រៅរដ្ឋធានី កំពុងត្រូវបានដាក់ឱ្យស្ថិតក្នុងការប្រុងជើងការខ្ពស់ដើម្បីទប់ទល់នឹងបាតុកម្ម។

ក្រៅពីនេះ មន្ត្រីជាន់ខ្ពស់ម្នាក់មកពីក្រសួងការពារជាតិបានប្រកាសថា ទាហានចំនួន1.200នាក់ដែលស្ថិតក្រោមអង្គភាពឆ្មាំការពារជាតិ (United States National Guard) នៅក្នុងរដ្ឋធានី ត្រូវបានដាក់ពង្រាយជាស្រេច។ កងទ័ពសហរដ្ឋអាមេរិកកំពុងតែកែនទាហានមកពីអង្គភាពឆ្មាំការពារជាតិ ប្រមាណពី600ទៅ800នាក់បន្ថែមទៀតពីរដ្ឋចំនួន5របស់សហរដ្ឋអាមេរិក ដើម្បីដាក់ពង្រាយនៅតាមគោលដៅនានា។

ព័ត៌មានខាងលើនេះត្រូវបានបង្ហើបឱ្យដឹង ក្នុងគ្រាដែលរលកបាតុកម្មបានរាលដាលពេញផ្ទៃសហរដ្ឋអាមេរិក។ បាតុកម្មទាំងឡាយនោះ ត្រូវបានធ្វើឡើងបន្ទាប់ការស្លាប់របស់ George Floyd អាយុ46ឆ្នាំ នៅរដ្ឋ Minnesota។ បរុសស្បែកខ្មៅម្នាក់នេះបានបាត់បង់ជីតក្រោយពីត្រូវបានប៉ូលិសចាប់ខ្លួន និងយកជង្គង់សង្កត់កក្នុងរយៈពេលជាច្រើននាទី ដោយសារតែបុរសឈ្មោះ George Floyd នេះត្រូវបានចោទថា បានប្រើប្រាស់លុយក្លែងក្លាយ។

កាលពីថ្ងៃទី1មិថុនា លោក Trump បានប្រកាសថា លោកបានដាក់ពង្រាយទាហានរាប់ពាន់នាក់នៅក្នុងរដ្ឋធានី។ លោក Trump ក៏បានរិះគន់ទៅលើមេដឹកនាំរដ្ឋមួយចំនួនថា “ទន់ទ្រាយ” ហើយបានស្នើឱ្យប្រើកម្លាំងឆ្មាំការពារជាតិដើម្បីបង្រាបបាតុករផងដែរ។ លោកថែមទាំងមានបំណងបញ្ជូនកងទ័ពទៅកាន់ទីក្រុងនានានៅទូទាំងសហរដ្ឋអាមេរិកទៀតផង៕

ប្រភព៖ សារព័ត៌មានបរទេស

June 2, 2020

នោះ! វីវរហើយ!! បុគ្គលិកហ្វេសប៊ុក នាំគ្នា “ធ្វីត”តវ៉ា “ហ្សាក់ឃើប៊ើក” មិនព្រមសិនស៊ើរសំណេររបស់ “ត្រាំ”

បុគ្គលិកក្រុមហ៊ុនហ្វេសប៊ុក បាននាំគ្នាផ្អាកធ្វើការ និងបង្ហាញពីភាពមិនពេញចិត្តតាមរយៈប្រព័ន្ធធ្វីតធើរ កាលពីថ្ងៃចន្ទ(ទី1មិថុនា)ម្សិលមិញ ករណីលោក ម៉ាក ហ្សាក់ឃើប៊ើក នាយកប្រតិបត្តិក្រុមហ៊ុនហ្វេសប៊ុក គ្មានវិធានការសិនស៊ើសំណេររបស់លោកប្រធានាធិបតី ដូណាល់ ត្រាំ ដូចដែលផ្លាតហ្វ៉មគូប្រជែងបានធ្វើ។

បុគ្គលិកក្រុមហ៊ុនហ្វេសប៊ុក រួមទាំងអ្នកគ្រប់គ្រងលំដាប់ខ្ពស់មួយចំនួន បានផូស្តសំណេររិះគន់ការសម្រេចចិត្តរបស់លោក ម៉ាក ហ្សាក់ឃើប៊ើក ដែលបណ្ដោយឱ្យលោក ត្រាំ ផូស្តសំណេរបំផុសបំផុលញុះញង់តាមអំពើចិត្ត ដោយមិនបានដំណើរការអ្វីសោះ ខណៈដែលប្រព័ន្ធបណ្ដាញសង្គមធ្វីតធើរ ជ្រើសរើសក្នុងការឡើងតួអក្សរព្រមាន។

“ការសម្រេចចិត្តរបស់ហ្វេសប៊ុកក្នុងការមិនដំណើរការអ្វីទាំងអស់ ចំពោះសំណេរដែលបំផុសបំផុសញុះញង់ឱ្យមានអំពើហិង្សា គឺជាការធ្វើព្រងើយកន្តើយចំពោះជម្រើសផ្សេងៗក្នុងការជួយឱ្យសហគមន៍របស់យើងមានសុវត្ថិភាព…យើងសុំអង្វរឱ្យអ្នកគ្រប់គ្រងហ្វេសប៊ុក #TakeAction” នេះជាសេចក្ដីថ្លែងការណ៍រួម របស់ក្រុមបុគ្គលិកក្រុមហ៊ុនហ្វេសប៊ុក ដែលបានផ្សព្វផ្សាយតាមប្រព័ន្ធធ្វីតធើរ។

លោក ចេសុន ស្ទើមែន អ្នកចាត់ការទូទៅផ្នែកឌីហ្សាញម្នាក់របស់ហ្វេសប៊ុក បានទទួលស្គាល់ថា លោកមិនឯកភាពទេ ដែល ហ្សាក់ឃើប៊ើក “មិនបានធ្វើអ្វីសោះ” ចំពោះសំណេរផូស្តរបស់លោក ត្រាំ។ លោកបានសរសេរនៅក្នុងប្រព័ន្ធធ្វីតធើរ កាលពីថ្ងៃសៅរ៍ថា “ខ្ញុំមិនមែនជាមនុស្សតែម្នាក់នៅក្នុងហ្វេសប៊ុសទេ ដែលគិតបែបនេះ បើវាជាការរើសអើងជាតិសាសន៍ហើយ វានឹងគ្មានពាក្យថា គោលជំហរជាកណ្ដាលទេ”

ហេតុការណ៍ចលាចល បានផ្ទុះឡើងនៅទូទាំងសហរដ្ឋអាមេរិក តាំងពីសប្ដាហ៍កន្លងទៅ ដោយសារករណីការស្លាប់របស់ ចច ហ្វ្លយ បុរសស្បែកខ្មៅម្នាក់ ដែលត្រូវប៉ូលិសចាប់ខ្លួននៅក្នុងទីក្រុងមីននីអាប៉ូលិស កាលពីថ្ងៃចន្ទ ទី25ឧសភា។ ឃ្លីបវីដេអូបានបង្ហាញឱ្យឃើញថា ប៉ូលិសស្បែកសម្នាក់ បានចាប់ក្រៀកខ្លួន ហ្វ្លយ ហើយប្រើជង្គង់របស់គេ សង្កត់ករបស់ហ្វ្លយ អស់រយៈពេលជិត 9នាទី រហូតទាល់តែហ្វ្លយ បាត់ស្មារតី និងស្លាប់។

តមក នៅថ្ងៃសុក្រ(ទី29ឧសភា) ប្រព័ន្ធធ្វីតធើរ បានឡើងតួអក្សរព្រមានក្រោមសំណេរធ្វីតរបស់លោកត្រាំ ដែលបានសរសេរថា “នៅពេលមានការឆក់ប្លន់កើតឡើង ការបាញ់កាំភ្លើងក៏នឹងចាប់ផ្ដើមឡើងដែរ” ដោយក្រុមហ៊ុនធ្វីតធើរ បានបញ្ជាក់ហេតុផលថា មេដឹកនាំសហរដ្ឋអាមេរិក កំពុងល្មើសច្បាប់របស់ផ្លាតហ្វ៉ម ដែលបានហាមឃាត់ការលើកតម្កើងអំពើហិង្សា។

យ៉ាងណាក្ដី ហ្វេសប៊ុកបែរជាមិន “សិនស៊ើរ” សំណេរដូចគ្នានោះនៅលើប្រព័ន្ធរបស់ខ្លួន ហើយហ្សាក់ឃើប៊ើក ថែមទាំងចេញមកបញ្ចេញយោបល់ក្នុងទំនងថា មិនត្រូវការនាំហ្វេសប៊ុកចូលទៅពាក់ព័ន្ធក្នុងសង្គ្រាមពាក្យសម្ដីរវាងលោក ត្រាំ និងក្រុមហ៊ុនធ្វីតធើរទៀតផង។

កាលពីពេលមុន ធ្វីតធើរ បានឡើងតួអក្សរព្រមាន fact-check ខាងក្រោមសំណេររបស់លោកត្រាំ 2សំណេរ កាលពីថ្ងៃទី26ឧសភា ដែលមានការអាងថា ប្រព័ន្ធបោះឆ្នោតតាមប្រៃសណីយ៍(mail-in voting) នឹងនាំឆ្ពោះទៅរកការទុច្ចរិតលើការជ្រើសតាំងប្រធានាធិបតី ដែលអាចនិយាយបានថា ជាលើកដំបូងហើយដែលធ្វីតធើរប្រើវិធានការនេះជាមួយសំណេររបស់មេដឹកនាំសហរដ្ឋអាមេរិក។

លោក ម៉ាក ហ្សាក់ឃើប៊ើក បានបញ្ចេញយោបល់ក្នុងប្រធានបទនេះ តាមរយៈ ហ្វក់ នីវស៍ ថា ក្រុមហ៊ុនរបស់លោក ដែលជាប្រព័ន្ធទំនាក់ទំនងសង្គមអនឡាញ ដែលមានអ្នកប្រើប្រាស់ច្រើនបំផុតក្នុងពិភពលោក មានគោលការណ៍ខុសប្លែកពីធ្វីតធើរ។

លោកនិយាយថា “ខ្ញុំជឿជាក់យ៉ាងខ្លាំងថា ហ្វេសប៊ុក មិនចាំបាច់ត្រូវធ្វើជាអ្នកអារកាត់ការពិតគ្រប់យ៉ាង ដែលមានអ្នកនាំយកមកផូស្តអនឡាញនោះឡើយ…ខ្ញុំយល់ឃើញថា ក្រុមហ៊ុនឯកជនទាំងឡាយ ជាពិសេស សូស្យ៉ល មីឌា មិនបានស្ថិតក្នុងឋានៈដែលនឹងត្រូវធ្វើបែបហ្នឹងទេ”

អ្នកនាំពាក្យហ្វេសប៊ុកម្នាក់ បានផ្ដល់បទសម្ភាសជាមួយ ស៊ីអិនអិន ប៊ីស៊ីនីស ថា “យើងយល់ច្បាស់ណាស់ថា បុគ្គលិកជាច្រើននាក់ ប្រហែលជាមានអារម្មណ៍ឈឺចាប់ ជាពិសេសសហគមន៍អ្នកស្បែកខ្មៅ យើងគាំទ្រឱ្យបុគ្គលិកទាំងអស់ បានបង្ហាញការយល់ឃើញយ៉ាងទូលំទូលាយ នៅពេលដែលពួកគេមិនយល់ស្របជាមួយអ្នកគ្រប់គ្រង និងក្នុងខណៈដែលយើងនៅតែត្រូវប្រឈមនឹងការសម្រេចចិត្តដែលលំបាកនៅថ្ងៃខាងមុខ យើងក៏ត្រូវការ ហ្វ៊ីដប៊ែក ដែលត្រង់ទៅត្រង់មកអំពីពួកគេដែរ”៕

ប្រភព៖ សារព័ត៌មានបរទេស

June 2, 2020

សារព័ត៌មានចិនបានដៃ…ប្រើករណីចលាចលជាតិសាសន៍នៅអាមេរិក សងសឹកវ៉ាស៊ីនតោន ដែលរិះគន់ប៉េកាំង រឿងហុងកុង…

ខណៈដែលទីក្រុងធំៗនៅក្នុងប្រទេសអាមេរិកជាច្រើន កំពុងកើតហេតុការណ៍ប្រឆាំងតវ៉ា និងបានប៉ះទង្គិចគ្នាយ៉ាងក្ដៅគគុក កាលពីប៉ុន្មានថ្ងៃកន្លងទៅ សារព័ត៌មានរបស់រដ្ឋចិនកំពុងបានដៃ នាំគ្នាតម្រង់គោលដៅ វាយប្រហាររដ្ឋបាលសហរដ្ឋអាមេរិក ដោយបានប្រៀបធៀបជាមួយនឹងការចលាចលនៅក្នុងទីក្រុងហុងកុង ដែលកើតឡើងដោយសារបាតុកម្មទាមទារប្រជាធិបតេត្យកាលពីឆ្នាំកន្លងទៅ។

ក្រុងប៉េកាំង ក្ដៅក្រហាយមកយូរហើយ អំពីការរិះគន់របស់ពួកប្រទេសលោកខាងលិច ជាពិសេសបំផុតសហរដ្ឋអាមេរិក ក្នុងរឿងដែលចិនបានចាត់ការលើបាតុកម្មទាមទារប្រជាធិបតេយ្យ ដែលបានអង្រួនកោះហុងកុងឱ្យរង្គោះរង្គើយ៉ាងខ្លាំងក្លាកាលពីឆ្នាំ2019 កន្លងទៅ។

ហើយខណៈដែលភាពអសន្តិសុខ កំពុងតែផ្ទុះឡើងទូទាំងសហរដ្ឋអាមេរិកដោយសារតែភាពមិនស្មើគ្នាខាងជាតិសាសន៍ និងភាពកាចឃោរឃៅរបស់ប៉ូលិស ក្រោយការស្លាប់ក្នុងអំឡុងពេលចាប់ខ្លួនបុរសស្បែកខ្មៅម្នាក់ ដែលគ្មានអាវុធក្នុងដៃ ក្នុងទីក្រុងមីននីអាប៉ូលិស រដ្ឋមីនីសូតាមក បណ្ដាអ្នកនាំពាក្យរបស់រដ្ឋាភិបាល និងសារព័ត៌មានផ្លូវការរបស់ចិន បាននាំគ្នាចេញមកលើកយករឿងរ៉ាវនេះ មកវាយប្រហារសងសឹកពួកអាជ្ញាធរអាមេរិកាំងយ៉ាងគគ្រឹកគគ្រេង។

សារព័ត៌មានចិន បានផ្សព្វផ្សាយឃ្លីបវីដេអូ 1ខ្សែ ដែលបង្ហាញឱ្យឃើញថា ប៉ូលិសហុងកុងមានភាព “ថ្នមដៃ” ច្រើនជាង បើប្រៀបធៀបនឹងទង្វើរបស់ប៉ូលិសដែលគេមើលឃើញនៅក្នុងសហរដ្ឋអាមេរិក នាពេលនេះ។

លោក ហ៊ូ ស៊ីជីន អគ្គបណ្ណាធិការរបស់ទីភ្នាក់ងារព័ត៌មាន ហ្គ្លោប៊ល ថាមស៍ ដែលមានផ្នត់គំនិតជាតិនិយម ដែលស្ថិតក្នុងខ្សែបណ្ដាញរបស់សារព័ត៌មាន ភីផល ដេលី របស់បក្សកុម្មុយនីស្តចិន បានសរសេរចុះផ្សាយកាលពីថ្ងៃសៅរ៍(ទី30ឧសភា)ថា “ប្រធានសភាតំណាងរាស្ត្រសហរដ្ឋអាមេរិក នែនស៊ី ប៉េឡូហ្ស៊ី ដែលកាលពីមុន ធ្លាប់ហៅការធ្វើបាតុកម្មទាមទារយ៉ាងខ្លាំងក្លានៅក្នុងទីក្រុងហុងកុងថា ជា “ទិដ្ឋភាពដ៏ល្អស្រស់ដែលបានឃើញទុកជាបុណ្យវាសនារបស់ភ្នែក”…ពួកអ្នកនយោបាយអាមេរិកនោះ ពេលនេះ អាចស្ងើចសរសើរទិដ្ឋភាពដូចគ្នានេះ តាមមាត់បង្អួចរបស់ពួកគេខ្លួនឯងបានហើយ”។ លោកបានសរសេរបន្តថា “វាប្រៀបដូចជា ដោយសារវិធីណាមួយ ពួកបង្កចលាចលក្បាលរឹងនៅក្នុងហុងកុង បានលបលួចចូលទៅក្នុងសហរដ្ឋអាមេរិក ហើយសាងភាពរញ៉េរញ៉ៃច្របូកច្របល់ឡើង ដូចគ្នានឹងអ្វីដែលពួកគេធ្លាប់បានធ្វើកាលពីឆ្នាំទៅ នៅក្នុងហុងកុងដូច្នោះដែរ”

ចិនបានអះអាងថា ត្រូវថ្កោលទោស “កងកម្លាំងបរទេស” ដែលសាងភាពច្របូកច្របល់ឡើងនៅហុងកុង ដែលមានអ្នកតវ៉ាទាមទារប្រជាធិបតេយ្យ ដែលក្រុងប៉េកាំងបានប្រាប់ថា ជា “ពួកបង្កចលាចល” ជំនុំគ្នាដើរក្បួនតវ៉ា ជួនកាលរាប់សែននាក់ ចាប់តាំងពីខែមិថុនាឆ្នាំទៅ និងកើតមានការប៉ះទង្គិចគ្នាយ៉ាងខ្លាំងក្លា ញឹកញាប់ណាស់ជាមួយប៉ូលិស។

ក្រុងប៉េកាំង បានបង្កឱ្យកើតក្ដីក្ដៅក្រហាយ និងបារម្ភកង្វល់យ៉ាងខ្លាំងនៅក្នុងខែឧសភា ដោយសារមានផែនការក្នុងការបញ្ជាឱ្យបើច្បាប់ថ្មីមួយនៅហុងកុង ដោយបានបញ្ជាក់ថា មានភាពចាំបាច់ដើម្បីគ្រប់គ្រង និងការពារសន្តិសុខជាតិ និងកម្ចាត់ “ការបង្កភេរវកម្ម” ដែលធ្វើឱ្យបណ្ដាអ្នកធ្វើសកម្មភាពទាមទារប្រជាធិបតេយ្យ និងប្រទេសលោកខាងលិច នាំគ្នាចេញមកថ្កោលទោសថា ជាការព្យាយាមកាត់បន្ថយសិទ្ធិសេរីភាពដែលមាននៅក្នុងទីក្រុងហុងកុង។

បន្ទាប់ពីលោកប្រធានាធិបតីសហរដ្ឋអាមេរិក ដូណាល់ ត្រាំ ប្រកាសកាលពីថ្ងៃសុក្រ(ទី29ឧសភា)ថា លោកនឹងដកសិទ្ធិពិសេសផ្សេងៗដែលសហរដ្ឋអាមេរិកបានផ្ដល់ឱ្យទៅហុងកុងនោះ ឆៃណា ដេលី សារព័ត៌មានជាភាសាអង់គ្លេសរបស់រដ្ឋការចិន ក៏បានបោះពុម្ពផ្សាយបទវិចារណកថាមួយឡើង កាលពីថ្ងៃអាទិត្យ(ទី31ឧសភា) ដោយបាននិយាយថា ពួកអ្នកនយោបាយអាមេរិក កំពុងស្រមើស្រមៃក្នុងការចង់ធ្វើឱ្យចិនក្លាយជាជនរងគ្រោះ។

បទវិចារណកថានេះបន្តថា “ឈប់ស្រមើស្រមៃទៅ ប្រសើរជាង! ហើយងាកមករកការពិតវិញ…អំពើហិង្សាកំពុងរាលដាលទូទាំងសហរដ្ឋអាមេរិក ពួកអ្នកនយោបាយអាមេរិក គួរតែត្រូវងាកមកធ្វើការងាររបស់ពួកគេ និងជួយដោះស្រាយបញ្ហានៅក្នុងសហរដ្ឋអាមេរិកវិញ ជំនួសឱ្យការចង់ព្យាយាមសាងបញ្ហា និងបង្កើតភាពរញ៉េរញ៉ៃថ្មីៗនៅក្នុងប្រទេសអ្នកដទៃ”

ប៉ូលិសក្នុងទីក្រុងនីវយ៉ក កំពុងចាប់ឃុំខ្លួនអ្នកប្រឆាំងតវ៉ាម្នាក់ ក្នុងអំឡុងពេលធ្វើបាតុកម្ម និងដើរក្បួនតវ៉ាទាមទារ ដើម្បីបង្ហាញភាពជាធ្លុងមួយជាមួយនឹង ចច ហ្វ្លយ កាលពីថ្ងៃសៅរ៍(ទី30ឧសភា)

ចំណែកលោកស្រី ហួ ឈុនអ៊ិង អ្នកនាំពាក្យនៃក្រសួងការបរទេសចិន ក៏ចេញមកតម្រង់គោលដៅវាយប្រហារក្រុងវ៉ាស៊ីនតោនដូចគ្នាដែរ…។

“ខ្ញុំដកដង្ហើមមិនរួចទេ” លោកស្រីបានផូស្តពាក្យនេះនៅលើធ្វីតធើរ ដោយមានរូបភាពគួបផ្សំជាសំណេរដែលធ្លាប់បានសរសេរធ្វីតដោយលោក ម័រហ្គែន អូតាហ្គុស អ្នកនាំពាក្យក្រសួងការបរទេសសហរដ្ឋអាមេរិក ដែលមានខ្លឹមសាររិះគន់រដ្ឋបាលចិនក្នុងរឿងគោលនយោបាយចំពោះទីក្រុងហុងកុង។

ពាក្យដែលអ្នកនាំពាក្យចិនរូបនេះនាំយកមកផូស្ត គឺជាពាក្យសម្ដីរបស់ ចច ហ្វ្លយ ដែលតាមរយៈឃ្លីបវីដេអូ ដែលមានអ្នកថតបាន និងបានឮ ចច ហ្វ្លយ និយាយពាក្យនេះជាច្រើនដង ដដែលៗ មុននឹងដាច់ខ្យល់ស្លាប់ ខណៈដែលប៉ូលិសមីននីអាប៉ូលិសម្នាក់ បានយកជង្គង់សង្កត់ករបស់គេអស់រយៈពេលជិត 9នាទី ហើយហេតុការណ៍នេះ គឺជាខ្សែដុតបញ្ឆេះឱ្យកើតការចលាចលឡើងទូទាំងសហរដ្ឋអាមេរិកនាពេលបច្ចុប្បន្ន។

កាលពីអំឡុងចុងសប្ដាហ៍កន្លងទៅ សារព័ត៌មានចិនថែមទាំងបានផ្សព្វផ្សាយឃ្លីបវីដេអូ នៃអំពើហិង្សារបស់ប៉ូលិសនៅក្នុងប្រទេសអាមេរិក ព្រមទាំងភ្ជាប់ហ៊ែចធែកថា “តើប៉ូលិសហុងកុង ថ្នមដៃ ប៉ុនណា?” នៅលើប្រព័ន្ធបណ្ដាញសង្គម “វេយពួ” របស់ចិនទៀតផង។

ឃ្លីបមួយទៀតដែលផូស្តដោយ រឹនមីន រីប៉ៅ បណ្ដាញព័ត៌មានរបស់ ភីផល ដេលី កាលពីថ្ងៃអាទិត្យ(ទី31ឧសភា) ដោយបានប្រៀបធៀបពីការដែលលោក អូម៉ារ ជិមេនេហ្ស អ្នកយកព័ត៌មានរបស់ ស៊ីអិនអិន ត្រូវប៉ូលិសចាប់ខ្លួននៅមុខអេក្រង់ទូរទស្សន៍ ខណៈដែលលោកកំពុងរាយការណ៍ព័ត៌មានអសន្តិសុខនៅក្នុងទីក្រុងមីនីអាប៉ូលិស កាលពីថ្ងៃសុក្រ(ទី29ឧសភា) ជាមួយនឹងរូបភាពប៉ូលិសហុងកុង ដែលមើលទៅហាក់ដូចជាដកថយចេញឆ្ងាយពីធនធានមនុស្សខាងផ្នែកព័ត៌មាន៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

June 2, 2020

ប៉ូលិសពាសពេញទឹកដី លុតជង្គង់សុំទោស និងគាំទ្របាតុកម្ម “ខ្ញុំមិនអាចដកដង្ហើម” នៅសហរដ្ឋអាមេរិក

ក្រុមមន្ត្រីប៉ូលិសនៅពាសពេញសហរដ្ឋអាមេរិក បាននាំគ្នាលុតជង្គង់ផ្ទាល់ដី ដើម្បីគាំទ្រក្រុមបាតុករ ព្រមទាំងបានសម្ដែងការយល់ឃើញថា សកម្មភាពរបស់ប៉ូលិសដែលបានបង្កឱ្យបុរសស្បែកខ្មៅ George Floyd បាត់បង់ជីវិតនៅក្នុងទីក្រុង Minneapolis កាលពីថ្ងៃទី25ឧសភា គឺជាទង្វើមិនអាចទទួលយកបាន។

https://www.youtube.com/watch?v=3vxR9ojtB58

ឃ្លីបវីដេអូដែលបង្ហាញអំពីសកម្មភាពក្រុមប៉ូលិសនៅទីក្រុង New York នាំគ្នាលុតជង្គង់ផ្ទាល់ដីនៅចំពោះមុខក្រុមបាតុករកាលពីថ្ងៃទី31ឧសភា ត្រូវបានគេចែករំលែតយ៉ាងច្រើននៅលើបណ្ដាញសង្គម និងទទួលបានការគាំទ្រវិជ្ជមានពីសាធារណជន។

ស្នងការនគរបាលក្រុង Houston ក្នុងរដ្ឋ Taxas លោក Art Acevedo កំពុងប្រកៀកស្មាគ្នាជាមួយបាតុករជាស្ត្រីម្នាក់ កាលពីថ្ងៃទី30ឧសភា។ លោក Art Acevedo ថ្លែងថា ការស្លាប់របស់ George Floyd គួរតែ “ត្រូវបានថ្កោលទោសដោយស្ថាប័នអនុវត្តច្បាប់ និងសាធារណជន”។

ទំព័រ Twitter របស់ស្នងការដ្ឋាននគរបាលតំបន់ Oklahoma ក៏បានបង្ហោះរូបភាពក្រុមប៉ូលិសរបស់ខ្លួន លុតជង្គង់នៅចំពោះមុខក្រុមបាតុករនៅបរិវេណពន្ធនាគារ Oklahoma ផងដែរ។

ចំណែកទំព័របណ្ដាញសង្គមរបស់ប្រធានគណៈកម្មធិការសុខាភិបាលនៃក្រុមប្រឹក្សាក្រុង New York លោក Mark D. Levine កាលពីថ្ងៃទី1មិថុនា ក៏បានបង្ហោះរូបថតបង្ហាញអំពីសាមគ្គីភាពរវាងក្រុមប៉ូលិសជាមួយនឹងក្រុមបាតុករដែលពួកគេកំពុងការពារ។

ក្រុមប៉ូលិស រួមនឹងបាតុកររាប់រយនាក់បាននាំគ្នាលុតជង្គង់ផ្ទាល់ដី ដើម្បីរំឭកដល់វិញ្ញាណក្ខន្ធជនរងគ្រោះ George Floyd

នាយកដ្ឋាននគរបាលក្រុង Santa Cruz ក្នុងរដ្ឋ California កាលពីថ្ងៃទី31ឧសភា បានប្រកាសថា នាយកដ្ឋាននេះគាំទ្រទាំងស្រុងចំពោះបាតុកម្មដោយសន្តិវិធីក្នុងទីក្រុង និងថា ពួកគេនឹងការពារបាតុករទាំងនោះ។ ក្រុមប៉ូលិស រួមនឹងបាតុកររាប់រយនាក់បាននាំគ្នាលុតជង្គង់ផ្ទាល់ដី ដើម្បីរំឭកដល់វិញ្ញាណក្ខន្ធជនរងគ្រោះ George Floyd៕

ប្រភព៖ សារព័ត៌មានបរទេស

June 2, 2020

បាតុកម្មប្រឆាំងការរើសអើងជាតិសាសន៍ពណ៌សម្បុរ គឃ្លើនកាន់តែខ្លាំង សម្រុកចូលហាងលក់ឡាន មែរសឺដេស វាយកម្ទេច-ដុតបំផ្លាញខ្ទេចខ្ទី(មានឃ្លីប)

ពួកអ្នកបង្កចលាចល បានដុត និងវាយបំផ្លាញរថយន្តជាច្រើនគ្រឿង នៅក្នុងសាលតាំងបង្ហាញមួយកន្លែងរបស់ក្រុមហ៊ុនផលិតរថយន្តទំនើប ម៊ែរសឺដេស បេនហ្ស៍ នៅក្នុងទីក្រុងអូកលែនដ៍ រដ្ឋកាលីហ្វ័រនៀ សហរដ្ឋអាមេរិក កណ្ដាលការធ្វើបាតុកម្ម តវ៉ាយ៉ាងខ្លាំងក្លាចំពោះហេតុការណ៍ការស្លាប់របស់បុរសជនជាតិស្បែកខ្មៅម្នាក់ឈ្មោះ ចច ហ្វ្លយដ៍ ដោយសារតែភាពឃោរឃៅរបស់ប៉ូលិស។

ស្ថិតក្នុងសភាពរញ្ជួយចិត្ត គេបានឃើញក្រុមបាតុករ បានវាយកម្ទេចផ្ទាំងកញ្ចក់ ចូលទៅក្នុងមជ្ឈមណ្ឌលសេវាកម្ម រថយន្តមែរសឺដេស បេនហ្ស៍ ហើយបានដុតបំផ្លាញរថយន្តថ្មីៗជាច្រើនគ្រឿងក្នុងទង្វើដ៏ព្រៃផ្សៃ ដែលបានក្លាយជារូបភាព ដែលត្រូវបានគេផ្សព្វផ្សាយបន្តយ៉ាងទូលំទូលាយនៅក្នុងប្រព័ន្ធបណ្ដាញសង្គមអនឡាញ។

ហេតុការណ៍បាត់បង់ជីវិតរបស់ ចច ហ្វ្លយ ដែលបានដាច់ខ្យល់ស្លាប់ ក្រោយពីភ្នាក់ងារប៉ូលិសបានអង្គុយយកជង្គង់សង្កត់ក ខណៈដែលរូបគេបានត្រូវចាប់ផ្ដួលឱ្យដេកផ្កាប់មុខ និងវាយខ្នោះដៃក្រពាត់មកក្រោយ បានដុតបញ្ឆេះការប្រឆាំងតវ៉ាដ៏ក្ដៅគគុកទូទាំងសហរដ្ឋអាមេរិក តែ អូកលែនដ៍ រដ្ឋកាលីហ្វ័រនៀ បានក្លាយជាទីក្រុងចម្បងនៃអំពើហិង្សា ក្រោយពីពួកអ្នកបង្កចលាចល បានចាប់ផ្ដើមចូលប្លន់ហាងលក់ទំនិញទំនើបៗជាច្រើនកន្លែង និងវាយបំបែកកញ្ចក់ចូលទៅក្នុងបន្ទប់តាំងបង្ហាញរថយន្តមែរសឺដេស បេនហ្ស៍។

រូបភាពនៅក្នុងឃ្លីបវីដេអូបានបង្ហាញឱ្យឃើញ រថយន្តទំនើបជាច្រើនគ្រឿង ត្រូវពួកអ្នកបង្កចលាចល ប្រើថ្នាំស្ព្រេយ៍បាញ់ដាក់ វាយបំបែកកញ្ចក់ និងយកភ្លើងដុត ព្រមទាំងស្រែកថា “យើងដកដង្ហើមមិនរួចទេ!!!” ដែលជាសម្រង់សម្ដីចុងក្រោយរបស់ ចច ហ្វ្លយ មុនពេលស្លាប់។

ក្រៅពីនេះ នៅមានរបាយការណ៍ថា ពួកអ្នកបង្កចលាចល ថែមទាំងបានលួចយករថយន្តដែលប្រើប្រាស់សម្រាប់ការងារសំណង់ ចេញពីទីកន្លែងសាងសង់ទៀតផង។

ទង្វើដ៏គឃ្លើនទាំងនេះ បានបញ្ឈប់នៅពេលក្រុមប៉ូលិសបានធ្វើដំណើរទៅដល់ តែយ៉ាងណាក្ដី មានរបាយការណ៍ថា ពួកអ្នកប្រឆាំងតវ៉ាថែមទាំងបានសម្រុកចូលប្លន់ក្រុមហ៊ុនតំណាងចែកចាយរបស់រថយន្តហុងដា នៅក្នុងទីក្រុងអូកលែនដ៍ដូចគ្នា ព្រមទាំងបានបើកយករថយន្តចេញពីសាលតាំងបង្ហាញអស់ជាច្រើនគ្រឿងទៀតផង ដោយគោលបំណងរបស់ការលួចប្លន់រថយន្តនេះ គឺយកទៅបើកបំបុកដើម្បីបំផ្លាញរថយន្តទាំងនោះ។

ហេតុការណ៍ចលាចលទាំងនេះ គឺជាផ្នែកមួយនៃការប្រឆាំងតវ៉ានឹងការរើសអើងជាតិសាសន៍ដែលកើតឡើងនៅក្នុងទីក្រុងជាច្រើនទូទាំងសហរដ្ឋអាមេរិក ក្នុងនោះរួមទាំង ទីក្រុងនីវយ៉ក អ៊ែតលែនតា មីននិអាប៉ូលីស ដាលឡាស់ ឈិកាហ្គោ និងឡូសអ៊ែនជើលេស ដែលភាគច្រើនបានធ្វើឡើងយ៉ាងស្ងប់ស្ងាត់ និងសន្តិភាព ដើម្បីទាមទារភាពយុត្តិធម៌ដល់ ចច ហ្វ្លយ និងអង្វរករឱ្យប៉ូលិសបញ្ឈប់ទង្វើព្រៃផ្សៃ ជាពិសេសជាមួយពលរដ្ឋអាមេរិកាំង ខ្សែស្រឡាយអាហ្វ្រិក៕

ប្រភព៖ សាព័ត៌មានបរទេស

June 2, 2020

បន្ទប់លាក់ខ្លួនក្រោមដីនៅសេតវិមានដែលការពារលោក Trump ក្នុងវិបត្តិសន្តិសុខជាតិ

នៅពេលក្រុមបាតុករទាមទាររកយុត្តិធម៌សម្រាប់ការស្លាប់របស់បុរសស្បែកខ្មៅ George Floyd កំពុងប្រមូលផ្ដុំគ្នានៅខាងក្រៅសេតវិមាន អង្គភាពសម្ងាត់ បានសម្រេចចិត្តនាំប្រធានាធិបតី Donald Trump ចុះលាក់ខ្លួននៅក្នុងបន្ទប់ក្រោមដី។

បន្ទប់ក្រោមដីនេះមានឈ្មោះថា PEOC (Presidential Emergency Operations Center/មជ្ឈមណ្ឌលគ្រប់គ្រងអាសន្ននៃប្រធានាធិបតី។ PEOC ដែលស្ថិតនៅក្រោមដី ផ្នែកខាងក្រោមនៃស្លាបខាងកើតរបស់សេតវិមាន មានតួនាទីជាកន្លែងលាក់ខ្លួនដ៏មានសុវត្ថិភាព និងជាមជ្ឈមណ្ឌលទំនាក់ទំនងសម្រាប់ប្រធានាធិបតីសហរដ្ឋអាមេរិក រួមនឹងមន្ត្រីសំខាន់ៗក្នុងជួររដ្ឋាភិបាលនៅពេលមានអាសន្នកើតឡើង។

បន្ទប់សម្ងាត់ក្រោមដីនេះ ត្រូវបានសាងសង់ឡើងកាលពីសង្គ្រាមលោកលើកទី2 ដើម្បីការពារប្រធានាធិបតី Franklin D. Roosevelt ក្នុងករណីមានការវាយប្រហារពីលើអាកាសនៅរដ្ឋធានីវ៉ាស៊ីងតោន។ PEOC ត្រូវបានការពារ 24ម៉ោង/24ម៉ោង ដោយកងកម្លាំងសន្តិសុខនៅសេតវិមាន។

កាលសម័យប្រធានាធិបតី Bush អនុប្រធានាធិបតីសហរដ្ឋអាមេរិក លោក Dick Cheney ក៏ធ្លាប់ត្រូវបាននាំចុះជ្រកក្នុងបន្ទប់ក្រោមដីនេះដែរកាលពីឆ្នាំ2001 ខណៈភេរវកម្ម11កញ្ញាបានកើតឡើង ដោយសារអាជ្ញាធរមានការព្រួយបារម្ភចំពោះយន្តហោះដែលត្រូវបានក្រុមភេរវកម្ម al-Qaeda ប្លន់ និងកំពុងឆ្ពោះមកកាន់សេតវិមាន។ ប្រធានាធិបតី George W. Bush ដែលមិនមានវត្តមានក្នុងសេតវិមានរហូតដល់ពេលយប់ ក៏ត្រូវបាននាំចុះលាក់ខ្លួនក្នុងបន្ទប់ PEOC នេះដែរ បន្ទាប់ពីលោកបានត្រលប់មកពីរដ្ឋ Florida។

នៅមុនហេតុការណ៍ភេរវកម្មថ្ងៃទី11កញ្ញា PEOC ហាក់មិនទាន់ត្រូវបានគេសាងសង់ឱ្យបានរឹងមាំជាស្ថាពរនៅឡើយ បន្តែក្រោយមានអំពើភេរវកម្មនេះ PEOC ត្រូវបានសាងសង់បន្ថែមយ៉ាងរឹងមាំ និងសុវត្ថិភាពបំផុត។ នេះបើតាម លោកស្រី Laura Bush ដែលជាភរិយារបស់ប្រធានាធិបតី Bush។

អនុប្រធានាធិបតីអាមេរិក លោក Dick Cheney និងក្រុមការងារនៅបន្ទប់ក្រោមដី PEOC កាលពីថ្ងៃ11កញ្ញា 2001

អ្នកកាសែតជនជាតិអាមេរិកាំង Garrett Graff បានសរសេរនៅក្នុងសៀវភៅ “Raven Rock” (និយាយអំពីគម្រោងរបស់រដ្ឋាភិបាលសហរដ្ឋអាមេរិកដើម្បីឆ្លើយតបនឹងសេនារីយោ “សេតវិមានត្រូវបានវាយប្រហារ”) ដែលបានបោះពុម្ភផ្សាយកាលពីឆ្នាំ2017 បានឱ្យដឹងថា PEOC មានទីចាត់ការនិងទំនាក់ទំនងមួយដែលមានទំហំ56ម៉ែត្រក្រឡា មានបន្ទប់ប្រជុំមួយ បន្ទប់សម្រាប់ជាទីបញ្ជាការធំមួយដែលក្នុងនោះមានអេក្រង់ទូរទស្សន៍ដ៏ធំមួយ និងតុប្រជុំដែលមានកៅអីច្រើនជាង16កន្លែង។

NYTimes បានសរសេរថា បន្ទប់ក្រោមដីនេះ មានសមត្ថភាពគ្រប់គ្រាន់ក្នុងការទប់ទល់នឹងកម្លាំងយន្តហោះដែលបុកចំពីលើសេតវិមាន។

លោក Bush និងលោក Cheney លាក់ខ្លួនក្នុងបន្ទប់ក្រោមដី PEOC កាលថ្ងៃទី11កញ្ញា2001

កាលពីឆ្នាំ2010 សកម្មភាពសាងសង់នៅផ្នែកខាងជើងដែលជាប់នឹងស្លាបខាងលិចរបស់សេតវិមាន ដែលបានចំណាយអស់ទឹកប្រាក់375លានដុល្លារអាមេរិក ក្នុងរយៈពេល4ឆ្នាំ ត្រូវបានសារព័ត៌មាននានាចុះផ្សាយថា រដ្ឋាភិបាលរបស់លោក Obama កំពុងសាងសង់ “មហាបន្ទប់ក្រោមដី” ថ្មី ដែលមានប្រព័ន្ធបច្ចេកវិទ្យាទំនើបៗ និងមានសុវត្ថិភាពខ្ពស់បំផុត។ អ្នកសារព័ត៌មាន Ronald Dessler បានសរសេរថា បន្ទប់ក្រោមដីខាងលើនេះ “រួមមានយ៉ាងតិច5ជាន់ និងអាចផ្ទុកបុគ្គលិកទាំងអស់នៅស្លាបខាងលិចនៃសេតវិមាន បើសិនជាមានការវាយប្រហារភេរវកម្មដោយអាវុធប្រល័យលោក”។

លោក Trump នៅក្រុមមន្ត្រីរបស់លោក នៅក្នុងបន្ទប់ស្ថានការណ៍ White House Situation Roomកាលពីព្រឹត្តិការណ៍ធ្វើឃាតមេដឹកនាំរដ្ឋឥស្លាម Abu Bakr al-Baghdadi

ក៏ប៉ុន្តែ ដំណឹងដែលត្រូវបានចុះផ្សាយនៅលើទំព័រកាសែតកាលណោះ ត្រូវបានច្រានចោលដោយអង្គភាពសេវាកម្មសាធារណៈ ដោយនិយាយថា នោះគ្រាន់តែជាសកម្មភាពផ្លាស់ប្ដូរប្រព័ន្ធបង្ហូរទឹក ខ្សែភ្លើង ការកែលម្អប្រព័ន្ធកម្ដៅ ម៉ាស៊ីនត្រជាក់ និងប្រព័ន្ធការពារអគ្គិភ័យតែប៉ុណ្ណោះ៕

ប្រភព៖ Drive/NYTimes

June 2, 2020

ជិត377,000នាក់បានស្លាប់ដោយសារ COVID-19 នៅទូទាំងសកលលោក

ពិភពលោកទាំងមូលត្រូវបានរាយការណ៍ថា មានអ្នកស្លាប់ដោយសារវីរុសCOVID-19 ជិត377,000នាក់នៅក្នុងចំណោមអ្នកជំងឺជាង6.3លាននាក់។

ប្រទេសនិងដែនដីចំនួន213ក្នុងពិភពលោក បានរកឃើញអ្នកផ្ទុកវីរុសCOVID-19 ចំនួន6,355,424នាក់ និង376,807នាក់បានបាត់បង់ជីវិត ក្នុងនោះអ្នកជំងឺ និងអ្នកស្លាប់ដែលត្រូវបានរកឃើញក្នុងរយៈពេល24ម៉ោងចុងក្រោយនេះមានចំនួន96,691នាក់ និង3,130នាក់។ អ្នកជំងឺដែលបានជាសះស្បើយ មានចំនួន2,888,406នាក់។

គិតមកដល់បច្ចុប្បន្ន ទ្វីបអាមេរិកទាំងមូលបានរកឃើញអ្នកផ្ទុកវីរុសCOVID-19 ដល់ទៅ 2,999,384នាក់ ខណៈទ្វីបអឺរុបមាន2,034,268នាក់ ទ្វីបអាស៊ីមាន1,163,795នាក់ និងទ្វីបអាហ្វ្រិកមាន154,907នាក់។

ប្រទេសដែលបានរកឃើញអ្នកជំងឺCOVID-19 ច្រើនជាង10,000នាក់ មានចំនួន53ប្រទេស ក្នុងនោះ 13ប្រទេសមានអ្នកជំងឺលើសពី100,000នាក់ រួមមាន សហរដ្ឋអាមេរិក (អ្នកជំងឺសរុប1,857,817នាក់) ប្រេស៊ីល (529,018នាក់) រុស្ស៊ី (414,878នាក់) អេស្ប៉ាញ អង់គ្លេស អ៊ីតាលី ឥណ្ឌា បារាំង អាល្លឺម៉ង់ ប៉េរូ ទួរគី អ៊ីរ៉ង់ និងប្រទេសឈីលី៕

ប្រភព៖ សារព័ត៌មានបរទេស

June 2, 2020

សហរដ្ឋអាមេរិកថា “បាតុកម្មហិង្សាអុជអាលដោយចលនា ANTIFA គឺជាភេរវកម្មក្នុងស្រុក

រដ្ឋមន្ត្រីក្រសួងយុត្តិធម៌សហរដ្ឋអាមេរិក លោក William Barr កាលពីម្សិលមិញ (31ឧសភា) បានប្រកាសអំពីអំពើហិង្សាទាំងឡាយដែលកំពុងផ្ទុះឡើងនៅពាសពេញសហរដ្ឋអាមេរិក។ លោករដ្ឋមន្ត្រីថ្លែងថា អំពើហិង្សានេះ “ត្រូវបានអុជអាល និងបង្កើតឡើងដោយក្រុម Antifa”។ លោកក៏បានហៅអំពើនេះថា ជាភេរវកម្មក្នុងស្រុក ហើយថា នឹងត្រូវបានចាត់វិធានការយ៉ាងសមស្រប។

ក្នុងសេចក្ដីប្រកាសកាលពីម្សិលមិញ លោក Barr ថ្លែងថា “អំពីហិង្សដែលកំពុងកើតឡើងនៅក្នុងទីក្រុងជាច្រើនក្នុងប្រទេស សម្លេងបាតុករអហិង្សា និងស្របច្បាប់ត្រូវបានលុកលុយដោយកត្តាជ្រុលនិយម និងហិង្សានិយម”។ លោករដ្ឋមន្ត្រីសង្កត់ធ្ងន់ថា “ក្រុមជ្រុលនិយម និងក្រុមអុជអាលខាងក្រៅ កំពុងតែប្រើប្រាស់ស្ថានភាពបច្ចុប្បន្នដើម្បីបង្កើតការបំបែកបំបាក់ អំពើហិង្សា និងអំពើជ្រុលនិយមនានា”។

លោក George Floyd ដែលបានស្លាប់ដោយសារប៉ូលិសក្រៀកសង្កត់ក ខណៈគាត់ត្រូវបានចាប់ខ្លួនពីបទប្រើលុយក្លែងក្លាយ

ជនរងគ្រោះដែលបានស្លាប់ដោយសារប៉ូលិសយកជង្គង់សង្កត់ក ក្នុងពេលត្រូវបានចាប់ខ្លួនពីបទប្រើប្រាស់លុយក្លែងក្លាយលោក William Barr បានបន្ថែមថា បណ្ដាក្រុមប្រើអំពើហិង្សានេះ កំពុងស្វែងរកវិធីបំបែកបំបាក់ប្រជាជនអាមេរិកាំង ហើយលោកក៏បានព្រមានថា ការអនុវត្តច្បាប់ “នឹងត្រូវធ្វើឡើងដើម្បីចាប់ខ្លួន និងកាត់ទោសក្រុមអុជអាលឱ្យមានអំពើហិង្សាជ្រុលនិយមដែលបានជ្រៀតចូលក្នុងក្រុមបាតុករសន្តិភាព និងចូលរួមក្នុងសកម្មភាពល្មើសច្បាប់រដ្ឋ”។

Antifa គឺជាឈ្មោះដែលសរសេរកាត់របស់ពាក្យ Antifascist ដែលហៅខ្លួនឯងថាជា ចលនាបាតុកម្មមិនមានរចនាសម្ព័ន្ធ ប្រើប្រាស់ដើម្បីប្រឆាំងនឹងលទ្ធិហ្វាស៊ីសនិយមថ្មី លទ្ធិស្បែកសនិមយ និងការរើសអើងពូជសាសន៍ ហើយក្រុមដែលជ្រុលនិយមជាងនេះ គឺមាននិន្នាការប្រឆាំងរដ្ឋាភិបាល និងប្រឆាំងមូលធននិយម។ លោក Trump និងក្រុមអភិរក្សនិយមបានចាត់ទុក Antifa ថាជាក្រុមជ្រុលនិយម និងឆ្វេងនិយម ហើយថា សកម្មភាពហិង្សារបស់ពួកគេត្រូវបានអុជអាល ឬបិទបាំងដោយក្រុមសារព័ត៌មានប្រឆាំងនឹង Donald Trump។

រដ្ឋមន្ត្រីក្រសួងយុត្តិធម៌បានអះអាងថា អំពើហិង្សាត្រូវបានធ្វើឡើងដោយក្រុម Antifa និងក្រុមស្រដៀងគ្នានេះ គឺជាភេរវកម្មក្នុងស្រុក ហើយលោកសន្យាថា ក្រុមបង្កភាពចលាចលនេះនឹង “ត្រូវបានចាត់ការយ៉ាងសមស្របបំផុត”។

ក្រុមមន្ត្រីរដ្ឋាភិបាល រួមនឹងលោកប្រធានាធិបតី Donald Trump ផងដែរ ក៏បានថ្លែងថា បាតុកម្មដែលបានក្លាយជាអំពើហិង្សានេះ គឺជាលទ្ធផលនៃការអុជអាលពីខាងក្រៅ ដើម្បីបង្កើតជាកំហឹង និងអស្ថិរភាពនៅសហរដ្ឋអាមេរិក។

លោក Trump កាលពីថ្ងៃទី31ឧសភា បានប្រកាសថា “សហរដ្ឋអាមេរិកនឹងបញ្ចូលឈ្មោះ Antifa ទៅក្នុងបញ្ជីនៃក្រុមភារវកម្ម”។

ប្រភព៖ សារព៏ត៌មានបរទេស

June 1, 2020

ភរិយារបស់ប៉ូលិសម្នាក់ដែលបានក្រៀកសង្កត់កបុរសស្បែកខ្មៅរហូតដល់ស្លាប់ ដាក់ពាក្យសុំលែងលះ ខណៈឃាតករប្រឈមនឹងការជាប់ពន្ធនាគារជាច្រើនឆ្នាំ

ភរិយារបស់អតីតប៉ូលិសឈ្មោះ Derek Chauvin បានដាក់ពាក្យសុំលែងលះ បន្ទាប់ពីស្វាមីរបស់អ្នកស្រីត្រូវបានបញ្ឈប់ពីការងារ និងត្រូវបានចាប់ខ្លួន ព្រោះតែបានចាប់ខ្លួន និងសង្កត់កបរុសស្បែកខ្មៅម្នាក់ឈ្មោះ George Floyd រហូតដល់ស្លាប់ ដែលបញ្ហានេះបានធ្វើឱ្យមានបាតុកម្មពេញផ្ទៃសហរដ្ឋអាមេរិក។

ការិយាល័យមេធាវី Sekula ជាតំណាងរបស់អ្នកស្រី Kellie Chauvin បានឱ្យដឹងថា បានពិភាក្សាជាមួយ អ្នកស្រី Kellie Chauvin និងគ្រួសារអំពីការលែងលះជាមួយនឹងអតីតប៉ូលិស Derek Chauvin កាលពីថ្ងៃទី30ឧសភា។

សេចក្ដីប្រកាសរបស់ការិយាល័យមេធាវី Sekula បានឱ្យដឹងថា “អ្នកស្រី (Kellie Chauvin) មានការខ្លោចចិត្តជាខ្លាំងចំពោះការស្លាប់របស់ Floyd និងបានសុំចូលរួមរំលែកទុក្ខដ៏ជ្រាលជ្រៅបំផុតជាមួយគ្រួសារសព្វ រួមនឹងអ្នកដែលកំពុងរងគ្រោះដោយសារហេតុការណ៍នេះ។ អ្នកស្រីបានដាក់ពាក្យលែងលះជាមួយនឹងលោក Derek Chauvin រួចរាល់ហើយ”។

សេចក្ដីប្រកាសខាងលើក៏បានឱ្យដឹងថា Kellie បានស្នើសុំឱ្យមានការគោរពសិទ្ធិឯកជន និងសុវត្ថិភាពរបស់កូនស្រី ឪពុកម្ដាយ និងគ្រួសាររបស់អ្នកស្រីនៅក្នុងកាលៈទេសៈដ៏លំបាកនេះផងដែរ។

អ្នកស្រី Kellie អាយុ45ឆ្នាំ ជាជនជាតិអាមេរិកាំងដើមកំណើតឡាវ គឺជាអតីតជ័យលាភីនៃកម្មវិធី “ស្ត្រីមេផ្ទះស្រស់ស្អាតនៅ Minnesota (Mrs. Minnesota) ឆ្នាំ2018។ Kellie បានឆ្លងកាត់ការរស់នៅជាមួយស្វាមីទីមួយរបស់អ្នកស្រីដោយមិនមានសុភមង្គល និងមានកូនប្រុស2នាក់ មុនពេលបានរៀបការជាមួយប៉ូលិស Derek កាលពីឆ្នាំ2010។ Kellie និង Derek មិនទាន់មានកូនជាមួយគ្នានៅឡើយ។

អតីតជ័យលាភីនៃកម្មវិធី “ស្ត្រីមេផ្ទះស្រស់ស្អាតនៅ Minnesota (Mrs. Minnesota) ឆ្នាំ2018 ដែលជាភរិយារបស់ប៉ូលិសឈ្មោះ Derek Chauvin

ក្នុងកិច្ចសម្ភាសកាលពីឆ្នាំ2018 អ្នកស្រី Kellie បានចំណាយពេលច្រើនសរសើរ Derek ដែលជាបុរសដែលអ្នកស្រីបានជួបដំបូងនៅមជ្ឈមណ្ឌលវេជ្ជសាស្ត្រនៃខណ្ឌ Hennepin ក្នុងទីក្រុង Minneapolis នៃរដ្ឋ Minnesota។ អ្នកស្រី Kellie បានធ្វើការនៅទីនេះអស់រយៈពេល13ឆ្នាំបន្ទាប់ពីបានបញ្ចប់ការសិក្សាផ្នែកវេជ្ជសាស្ត្រ។

អ្នកស្រី Kellie ថ្លែងថា “នៅខាងក្រោយឈុតឯកសណ្ឋាន(ប៉ូលិស)នោះ គាត់ (Derek Chauvin) គឺជាបុរសស្លូតត្រង់ខ្លាំងណាស់។ គាត់គឺជាមនុស្សចេះគួរសម គាត់បើកទ្វារឱ្យខ្ញុំ គាត់ពាក់អាវក្រៅឱ្យខ្ញុំ។ បន្ទាប់ពីបានលែងលះ (ជាមួយនឹងស្វាមីមុន) ខ្ញុំបានបង្កើតតារាងមួយ រៀបរាប់អំពីលក្ខខណ្ឌដែលខ្ញុំត្រូវការពីមនុស្សដែលខ្ញុំនឹងស្រឡាញ់ ហើយគាត់ (Derek Chauvin) បានបំពេញលក្ខខណ្ឌទាំងនោះ”។

Derek អាយុ44ឆ្នាំ ជាមន្ត្រីប៉ូលិសប្រចាំទីក្រុង Minneapolis ក្នុងរដ្ឋ Minnesota ត្រូវបានបញ្ឈប់ពីមុខតំណែង និងត្រូវបានចាប់ខ្លួនកាលពីថ្ងៃទី29ឧសភា ដោយសារជាប់ពាក់ព័ន្ធនឹងការស្លាប់របស់ Floyd ដែលជាបុរសស្បែកខ្មៅម្នាក់ត្រូវបានចាប់ខ្លួនដោយសារចាយលុយក្លែងក្លាយ។ ចៅក្រមបានឱ្យដឹងថា Derek បានប្រើជង្គង់សង្កត់ករបស់ Floyd រយៈពេល8នាទីនិង46វិនាទី ក្នុងនោះមាន2នាទីនិង53វិនាទីក្រោយពីជនរងគ្រោះ “លែងមានប្រតិកម្ម”។

ឯកសារចោទប្រកាន់បានឱ្យដឹងថា Floyd មានជំងឺប្រចាំកាយ រួមមានសរសៃឈាមបេះដូង និងខ្សោយបេះដូង ដោយសារលើសឈាម។ បើទោះជាជនរងគ្រោះអង្វរព្រោះតែ “មិនអាចដកដង្ហើមបាន” ប៉ូលិសឈ្មោះ Derek នៅតែមិនលែង។ ឯកសារបន្តថា “ឥទ្ធិពលរួមចំណែកក្នុងការដែល Floyd ត្រូវបានប៉ូលិសសង្កត់ក រួមនឹងជំងឺប្រចាំកាយ និងសារធាតុអ្វីមួយនៅក្នុងរាងកាយរបស់ Floyd បាននាំឱ្យមានការបាត់បង់ជីវិត”។

បច្ចុប្បន្ន ប៉ូលិសឈ្មោះ Derek Chauvin ត្រូវប្រឈមនឹងការជាប់ពន្ធនាគាររយៈពេល25ឆ្នាំពីបទមនុស្សឃាតកម្រិត3 និង10ឆ្នាំពីបទមនុស្សឃាតដោយអចេតនា។ ចំណែកប៉ូលិស3នាក់ទៀតដែលជាប់ពាក់ព័ន្ធនឹងករណីនេះ ក៏ត្រូវបានបណ្ដេញចេញពីមុខតំណែង និងកំពុងប្រឈមនឹងការចោទប្រកាន់៕

ប្រភព៖ CBS News

June 1, 2020

វិធីធ្វើការប្រកបដោយប្រសិទ្ធភាពខ្ពស់របស់មហាសេដ្ឋីល្បីៗក្នុងពិភពលោក

មហាសេដ្ឋីនានាដូចជាលោក Steve Jobs ឬ Bill Gates ជាដើម ក៏មានពេលវេលាត្រឹមតែ24ម៉ោងក្នុង1ថ្ងៃ ប៉ុន្តែ ពួកគេដឹងអំពីវិធីដែលជួយឱ្យធ្វើការប្រកបដោយប្រសិទ្ធភាពខ្ពស់។

Steve Jobs ដឹងថា ពេលណាត្រូវនិយាយថា “ទេ”

អតីតកំពូល CEO របស់ក្រុមហ៊ុន Apple យល់ថា គន្លឹះដែលជួយឱ្យលោកធ្វើការប្រកបដោយប្រសិទ្ធភាពខ្ពស់ នោះគឺការដឹងថា ពេលណាគួរនិយាយពាក្យថា “ទេ”។ លោកបង្ហើបឱ្យដឹងកាលពីឆ្នាំ1997 ថា “ការផ្ដោតអារម្មណ៍គឺមានន័យថា ដឹងអំពីវិធីនិយាយថា “ទេ” ជាមួយនឹងគំនិតរាប់រយផ្សេងៗគ្នា”។ ការងាររបស់អ្នកគឺត្រូវតែសម្រេចឱ្យច្បាស់ថា អ្វីគួរចំណាយពេលទៅលើវា និងអ្វីគួរតែកុំចំណាយពេល។

Bill Gates ហាត់សមាធិ

មានមហាសេដ្ឋីល្បីៗជាច្រើន ដូចជា Jack Dorsey ឬ Ray Dalio បានតាំងសមាធិជារៀងរាល់ថ្ងៃ ចំណែកលោក Bill Gates ក៏ដូច្នេះដែរ។ នៅក្នុងអត្ថបទមួយដែលត្រូវបានបង្ហោះនៅលើទំព័រ Gates Notes កាលពីឆ្នាំ2018 មហាសេដ្ឋី Bill Gates បានអះអាងថា “នេះ (ការសមាធិ) គឺជាវិធីដ៏អស្ចារ្យសម្រាប់កែលម្អការផ្ដោតអារម្មណ៍របស់ខ្ញុំ”។

លោក Bill Gates ថ្លែងថា “សមាធិគឺជាការហ្វឹកហាត់សម្រាប់ផ្លូវអារម្មណ៍ ដូចទៅនឹងវិធីដែលយើងធ្វើចលនាសាច់ដុំនៅពេលលេងកីឡាដូច្នោះដែរ”។ មហាសេដ្ឋីរូបនេះបានធ្វើសមាធិ “ចំនួន2ទៅ3ដងក្នុង1សប្ដាហ៍ ក្នុងនោះ ការសមាធិម្ដងចំណាយពេល10នាទី”។ លោកបន្តថា គ្រូបង្ហាត់ផ្នែកសមាធិ បានបង្រៀនលោកអំពី “វិធីយកចិត្តទុកដាក់ទៅលើការគិតក្នុងខួរក្បាល ដូច្នេះវាបានជួយកែលម្អសមត្ថភាពនៃការផ្ដោតអារម្មណ៍”។

Jeff Bezos សម្រេចចិត្តលឿន

CEO របស់ Amazon បានឱ្យដឹងថា ប្រការដែលសំខាន់គឺត្រូវតែធ្វើការសម្រេចចិត្ត “លឿន និងមានគុណភាព” ព្រោះ “ល្បឿន (នៃការសម្រេចចិត្ត) គឺជាប្រការដែលកំណត់លទ្ធផលនៃការរកស៊ី”។ នៅក្នុងសំបុត្រដែលផ្ញើទៅកាន់ភាគហ៊ុនិកកាលពីឆ្នាំ2016 មហាសេដ្ឋី Jeff Bezos បានឱ្យដឹងថា “ក្នុងករណីភាគច្រើន អ្នកត្រូវតែធ្វើការសម្រេចចិត្ត នៅពេលមានទិន្នន័យដែលអ្នកចង់បាន មានចំនួនត្រឹមតែ70%។ បើសិនជារង់ចាំដល់ពេលមានព័ត៌មានគ្រប់90% អ្នកប្រាកដជាតាមមិនទាន់គេនោះទេ”។

លោក Bezos អះអាងថា ជាក់ស្ដែង ការសម្រេចចិត្តលឿន គឺមានសារសំខាន់ជាងការសម្រេចចិត្តត្រឹមត្រូវទៅទៀត។ “មានការសម្រេចចិត្តជាច្រើននៅតែអាចបង្វែរស្ថានការណ៍បាន ដូច្នេះ បើខុសក៏វាមិនមែនជាបញ្ហាធំនោះដែរ”។ លោកបន្តថា “បើសិនជាអ្នកកែប្រែវាបានល្អ ការសម្រេចចិត្តខុសនឹងអាចត្រូវចំណាយតិចជាងអ្វីដែលអ្នកគិតទៅទៀត ខណៈដែលការសម្រេចចិត្តយឺត វាប្រាកដណាស់ថា គឺជាការខាតបង់ធ្ងន់ធ្ងរ”។

Jack Dorsey ប្រជុំដោយប្រើ Google Doc

ការសិក្សាស្រាវជ្រាវជាច្រើនបានបង្ហាញថា ថ្នាក់ដឹកនាំក្រុមហ៊ុនភាគច្រើនយល់ថា ការប្រជុំធ្វើឱ្យសមត្ថភាពបំពេញការងារត្រូវថយចុះ។ ការស្ទង់មតិមួយរបស់សាលាពាណិជ្ជកម្ម Harvard និងសាកលវិទ្យាល័យ Boston បានបង្ហាញថា មេដឹកនាំជាន់ខ្ពស់របស់ក្រុមហ៊ុននានា បានអះអាងថា កិច្ចប្រជុំនាំឱ្យពួកគេមិនអាចសម្រេចបានភារកិច្ចរបស់ពួកគេ។ ក្នុងចំណោមមេដឹកនាំក្រុមហ៊ុនដែលត្រូវបានស្ទង់មតិ មានរហូតដល់70%និយាយថា ពួកគេមានអារម្មណ៍ថា កិច្ចប្រជុំនានាមិនមានប្រសិទ្ធភាព។

Jack Dorsey ដែលជា CEO របស់ Twitter និង Square មានវិធីប្រជុំខុសប្លែកពីគេ ដែលលោកយល់ថា ជាការជំរុញការត្រិះរិះពិចារណា (Critical thinking)។ មហាសេដ្ឋី Dorsey បានឱ្យដឹងកាលពីឆ្នាំ2018ថា “កិច្ចប្រជុំរបស់យើង ភាគច្រើនធ្វើឡើងតាមរយៈកម្មវិធី Google Doc ដោយចាប់ផ្ដើមជាមួយនឹងការអាន10នាទី រួចហើយបញ្ចេញមតិផ្ទាល់នៅលើហ្វាលទិន្នន័យ”។ លោកបន្តថា “ប្រការនេះជួយឱ្យអ្នករាល់គ្នាងាយស្រួលក្នុងការមូលមតិគ្នា អនុញ្ញាតឱ្យធ្វើការពីចម្ងាយ និងបង្កើនល្បឿននៃការរិះរិះពិចារណា”។

Elon Musk កាត់បន្ថយកិច្ចប្រជុំដែលមិនចាំបាច់

មហាសេដ្ឋី Elon Musk គឺជា CEO របស់ក្រុមហ៊ុន Tesla, SpaceX, The Boring Company និងក្រុមហ៊ុន Neuralink។ លោក Musk ចាប់ផ្ដើមថ្ងៃថ្មីរបស់ខ្លួនជាមួយនឹងកិច្ចការសំខាន់បំផុត និងរៀបចំពេលវេលាដែលនៅសល់សម្រាប់ធ្វើកិច្ចការផ្សេងៗទៅតាមលំដាប់លំដោយនៃអាទិភាព។ មហាសេដ្ឋីរូបនេះបានថ្លែងនៅសាកលវិទ្យាល័យ Southern California កាលពីឆ្នាំ2014ថា “កុំខ្ជះខ្ជាយពេលវេលារបស់អ្នកទៅលើអ្វីដែលមិនអាចជួយឱ្យអ្នករាល់គ្នាបានល្អប្រសើរ”។

មួយក្នុងចំណោមវិធីដែលជួយឱ្យលោក Elon Musk អាចធ្វើបានប្រការខាងលើ នោះគឺការលុបបំបាត់កិច្ចប្រជុំកាន់តែច្រើន កាន់តែល្អ។ នៅក្នុងសំបុត្រដែលផ្ញើទៅកាន់បុគ្គលិកកាលពីឆ្នាំ2018 មហាសេដ្ឋីរូបនេះថ្លែងថា “ការប្រជុំច្រើនពេកគឺជាជំងឺរបស់បណ្ដាក្រុមហ៊ុនធំៗ ហើយវាតែងតែធ្វើឱ្យអ្នករាល់គ្នាកាន់តែដុនដាប។ ចូរឈប់បើកកិច្ចប្រជុំជាប្រចាំ លើកលែងតែមានកិច្ចការបន្ទាន់បំផុត”។

បើសិនជាត្រូវតែប្រជុំមិនអាចខានបាន លោក Musk ថ្លែងថា អ្នកចាំបាច់ត្រូវតែ “ប្រាកដថានឹងនាំមកនូវប្រយោជន៍ និងតម្លៃដល់អ្នកដែលបានចូលរួម”។ លោកក៏តែងលើកទឹកចិត្តឱ្យបុគ្គលិក “ចាកចេញពីកិច្ចប្រជុំ នៅពេលដឹងថា ខ្លួននឹងមិនទទួលបានប្រយោជន៍”។ លោក Musk អះអាងថា ប្រការនេះនឹងមិនមែនជាអសុជីវធម៌នោះឡើយ៕

ប្រភព៖ CNBC

June 1, 2020

Author: សឿន សំណាង